رواية حكم القلب❤ الفصل الخامس 5 - بقلم روز الفياض🌹

#حكم_القلب
#روز_الفياض
#ح٥
.
.
.
‏كل ما يدفَعك لأن تُحب نفسك هو اختيار صَحيح .
.
.
.

منال :
وين جنتي ؟؟
دورت الكليه كلها عليج ملكيتج وين رحتوا؟

مروه :
اني الوين جنت لو انت !!!
صار ساعتين مو محاضره عبالك تدرسين علم الذره ..

منال :
لج صار ساعة ادور عليكم ..
كلت هذا وين اخذها وراح ..

مروه :
اي مو اني طفله غمض عيوني وخلاني جوه عباته واخذني مدري وين ..
هههههه سوالفج تضحك .

منال :
وين جنتوا ؟؟؟

مروه :
وين يعني !!!! نتمشى ونسولف ..
مو انت الي عفتيني وياه ورحتي ..

منال :
كتلج عندي تنبيه مااكدر اغيب ، بعدين هو جاي حتى يحجي وياج مو وياي ..
المفروض تشكريني لان عفتكم وحدكم ..

مروه :
اممم ، المفروض ..
لان لو انت موجوده جان محجه شي ..

منال :
شكال لج شكال ؟

ابتسمت وبعدين ضحكت :
جاي علمودي ..

منال :
جذابه ؟

مروه :
والله ..

منال :
معقوله بعدج اباله من ذيج المره من شافج ؟!!

مروه :
الظاهر ..

منال :
شكلج ؟

مروه :
لح علي حتى ارجع اتصل بي .

حجيتلها الحجي الي حجيناه كله .

منال:
مريوه تعرفين انت جنج حبيتيه.

مروه :
شدعوه !!!!
حبيته مره وحده !!
شعرفت عنه؟

منال:
اي ومن اول نظره هم ..
والظاهر هو نفس الشي ..

مروه:
ماادري يجوز بس حسيته مختلف..

منال:
والله هاي مو انت مااعرفج.

مروه :
هاي ثاني مره اشوفه وبالمرتين مثلج مااعرف نفسي ..

منال :
يعني شنو قابل سحر عليج ؟

مروه :
ههههههه شيصير لو عشت بالاحلام الورديه شويه حرام؟

منال :
مو صديقتي واعرفج مو مال هيج سوالف جبانه وخوافه وخاف واحد من اخوانج يشوف لو يسمع شي.

مروه :
ليش تحبين النكد خليني فرحانه شويه حتى لو بالجذب.

منال :
لا مو جذب ..
انتو الاثنين مو مال جذب ..
وهذا المخوفني ..

مروه :
عابت هههههه .

استمرت علاقتنه حلوه وهادئه وصداقه بحته رغم الاعجاب الي جان واضح بيني وبينه بس متجرأنه نفتح هيج مواضيع.

جنت اني اتصل مرات هو ميتصل لان ميريد اخواني يحسون ...

من يكون عندي مجال اتصل وجنه نسولف باحداث اليوم شنو سوينه وين رحنه شنو اخبار الناس والعراق وجان الوضع مو أمان.

مرت الايام واجت امتحانات نصف السنة ..

آخر امتحان بنصف السنه امتحنه وطلعنه كعدنه يم الباب الرئيسي مال الجامعه نسولف ونضحك اني ومنال وبنات من القسم ..
فجأة سمعنه :

-السلام عليكم ...

التفتت شفت عبدالله !!!!!!!
ابتسمت ابتسامه عريضه وهو هم ابتسم ومنال متفاجأه !!!!

اني ومنال :
وعليكم السلام.

عبدالله:
شلونكم؟

مروه:
الحمدلله بخير انت شلونك؟

عبدالله:
الحمدلله شخباركم؟

مروه:
زينين الحمدلله ..
وانت؟

عبدالله:
كلش زين الحمدلله.

منال ساكته تباوعلي وتباوعله.
هو مبتسم ويباوعلي واني مبتسمه ومنال عالصامت بس تراقب ...

مروه:
شهالزياره المفاجأة ؟؟
شعندك هنا اليوم؟

عبدالله :
ماكو جنت قريب ومريت اشوفكم.

مروه :
زين سويت ..

منال ساكته ومخليه ايدها على خدها وتباوع ..

عبدالله :
شلونج بالامتحان؟

مروه:
الحمدلله ننجح ان شاءالله.

عبدالله:
ان شاءالله.

هنا انفجرت منال :
تره اني موجوده عبروني ..
حاجوني ...
وجهولي كلمه ...

ضحكت .

عبدالله:
منااال !!!
شلونج شخبارج ؟
منتبهتلج شوكت اجيتي؟

منال :
لا والله ؟
اني من الاول موجوده وواكفه ..
للهدرجه ممبينه ؟؟؟
هاي واني اضخم واطول منها وسافره وهي ناعمه ومحجبه وكل هذا وشفتها ومشفتني؟!!!!

مروه :
هههههههه

عبدالله:
لا والله منتبهت ...
اسف ..
لاتزعلين كل شي ولا انت تزعلين ..

رجع باوعلي:
مروه متريكه؟

ابتسمت:
لا ممتعوده اتريك.

عبدالله :
ليش ؟
مو زين اهم وجبه هي الريوك .
معناها اعزمج على ريوك لان اني هم ممتريك.

منال تباوعلي وتباوعله تباوعلي وترجع تباوعله جان منظرها يضحك ..

مروه :
ماشي بس على حسابك؟

عبدالله :
اكيد تدللين مو بس ريوك غدا وعشا بعد.

منال:
لا مااصدك ...
لااكو شي مو طبيعي !!!
مو انتوا اللي اعرفكم منو انتو ...!!!!
لا انت عبدالله ولاهي مروه راح اتخبل من وراكم.

مروه :
هههههه .

منال :
انت ابقي فاهيه بس ضحكي .

عبدالله :
ليش شبيج؟

منال :
انت نفسك يعني عبدالله جيرانه الفقير اللي من تعبر بنيه يدنك و( ٢٤ ) ساعة يدرس وماعنده وقت للبنات وسوالف البنات؟

عبدالله :
اي اني ههههه .

منال :
وانت نفسج مروه صديقتي اللي تخاف من خيالها ومتؤمن بالعلاقات والنظرات وهالسوالف وتكول سوالف تعبانه وناس بطرانه؟

ضحكت وكرصتها وهو ضحك ..

المهم رحنه للكافتيريا وكعدنه اكلنه كيك وشربنه عصير وبقينه نسولف ونضحك بعدين فجأة:
مروه اني كوولش معجب بيج.

استحيت رغم اعرف بدون ميكول سكتت.

منال :
اني اكوم اروح احسن ..
لان اذا ابقى اكيد يصير بعقلي شي من وراكم ..

راحت ماادري وين احنه ساكتين حتى محد من عدنه كللها لا لاتروحين ولا كنالها وين رايحه ..

عبدالله:
شأفهم من سكوتج؟

ابتسمت :
واضح بدون متحجي.

عبدالله :
ويعني؟

مروه :
ماادري بس هالاشياء تنحس ميحتاج كلام.

عبدالله :
يعني اعتمد على احساسي؟

ابتسمت :
لا رجاءاً لاتورطني  ..

عبدالله :
مو تكولين تنحس ..
اني هيج داحس ...

مروه:
معناها ميحتاج تسألني ...

عبدالله :
زين اني ليش من احجي وياج افقد تركيزي عالاشياء عالناس عالوقت على كل شي ؟

مروه :
ماادري ..

عبدالله :
وزين ليش احس انت تحسين بكل شي احس بي وتعيشين كل شي اعيشه بس متردين تعترفين ؟

استحيت .. بس جاوبته :
متلاحظ او متحس هذا الشي غريب ؟

عبدالله :
شنو هو الغريب قصدج ؟
انه انت تستحين تعترفين ؟

ضحكت :
هههههه لا ..
اقصد انه تعيش نفس الشعور بالضبط انت والمقابل بصورة غريبه ..

عبدالله :
لا ..
مااشوفه شي غريب بالعكس ..
المفروض هذا الطبيعي .

مروه :
ليش ؟؟؟

.
.
.
فهل الورد يلد وردآ بهيئة بشرآ يشابهك .
.
.
.
لايك وتعليق وعشر ملصقات ..