رواية حكم القلب❤ الفصل الرابع 4 - بقلم روز الفياض🌹

#حكم_القلب
#روز_الفياض
#ح٤
.
.
.
عَاطفيه أميل لكُل مَا هو ناعَم ورقَيق .🦋
.
.
.

رجعت للبيت ومحجيت لامي شي بس بقيت افكر بكل الي صار ..
وظليت محتاره اتصل لو لا ؟؟؟
ولا عمري سويتها واتصلت بولد غير اخواني ..

معقوله اغير قناعاتي واغير تفكيري واتخبل واتصل بي ؟!!!
لا لا لا ..
شعندي متصله ؟
قابل شبيني وبينه حتى اتصل بي ؟
مجرد شخص التقيت بي صدفة ...

اي التقيت بي صدفة بس اول مره اقابل شخص مثله .. بنفس العفويه والرُقي والتلقائيه ..
اول مره احس هيج احساس تجاه احد ..
هوايه اكو وياي طلاب وهوايه منهم حاولوا يتعرفون علي مجرد تعارف ورفضت ..

بس هذا مختلف ..
محسيته شخص غريب ..
ولا عبالك اول مره اشوفه ..
اني الي مااحجي ويه شخص مااعرفه كعدت وحجيت وياه بكل اريحيه وناقشت مواضيع ماممكن اناقشها مع احد ثاني .

العصر محد بالبيت كلهم طلعوا بقيت وحدي كعدت يم التليفون اتصل ؟
لا مااتصل ...
اتصل ؟؟
لا مااتصل ...
اتصل ؟؟

ظليت محتاره ...!!!
اخر شي اتشجعت ودكيت الرقم طلعلي ولد سألته عنه كال نص ساعه ويجي !!!!
وره نص ساعه اتصلت نفس الشي طلع نفس الولد كلي مموجود !!!!

اتصلت بعد شويه طلع هو.

عبدالله:
الو.

مروه:
الو؟

عبدالله :
نعم.

مروه:
عبدالله موجود بلا زحمه؟

عبدالله:
مروه ؟؟

مروه :
بلي ( نعم ) مروه ..
شلون عرفت ؟

عبدالله:هلوو.. هلو.. مروه شلونج؟

مروه:الحمدلله زينه.

عبدالله:
اتأخرتي ...
من الظهر لهسه مكابل التليفون ومااخلي احد يشغل الخط.

مروه:
جنت متردده اتصل بصراحه ..
ماادري شلون اتجرأت واتصلت ودكيت كم مره بس يطلعلي ولد يكول شويه ويجي.

عبدالله:
لا مدك عندي هاي الخط اكيد يشمر.

مروه:
يجوز.

عبدالله:
خفت متتصلين وانضرب بوري ههه.

مروه:
هههه خفت اتصل اصلا وماادري تصرفي هذا شنو نتيجته بس ياخوفي اتندم بعدين ..
عبدالله:
ليش؟
مروه:لان بحياتي كلها ممتصله بولد ومو مال هيج سوالف ابد بس ماادري ليش اتصلت.

عبدالله:
اعتبريني صديق سوالف عاديه مابيها شي.

مروه:
ماكو هيج صداقه وممتعوده اضم شي على امي.

عبدالله:
عادي تحجين لامج كل شي؟

مروه:
مااحب اضم شي عنها.

عبدالله:
زين خل نتعرف على بعض وبعدين اذا عجبتج صداقتنه كوليلها.

مروه:
بعدين شوكت؟
اني هاي اول واخر مره اتصل.

عبدالله:
ليش؟
اني اتمنى تتصلين بعد حسيت ارتاحيتلج اليوم من شفتج وحجينه عبالك اعرفج من زماان وخصوصا نفس الاراء والافكار عدنه.

بقينه شويه نحجي بعدين اترخصت وسلمت عليه وسديت التليفون بس جنت فرحانه ماادري ليش رغم الحجي جان عادي وماكو اي شي خاص.

ثاني يوم حجيت لمنال من داومنه مصدكت من كتلها اتصلت بي.

منال:
لو تحلفين مااصدكج.

مروه:
والله اتصلت بي ..

باوعتلي ممصدكتني ...

مروه:
لتباوعين هيج اتخبلت واتصلت وتدرين فد شي ...
ماادري ليش ضميري ميأنبني لان اتصلت ولا مستحيه من نفسي.

منال:
لا مااصدك ممعقول شنو هذا حب من اول نظره انت وهو صرت مااعرفكم.

مروه:
خوش ولد حباب.

منال:
اي بس نفسه الي كلتي عنه عادي الشي الوحيد الي يميزه بس كونه طبيب.

مروه:
اي فعلا.

منال:
وهسه شتغير ؟

مروه :
مااتغير شي ..
كلامي نفسه بس ضيفي عليه اكتشفت لاول مره انيان طبيعي ماعنده تصنع وافلام هندية ونافخ نفسه جذب ولا مثل بقية الشباب ملتهي يسشور شعره وكذلته لو حاير يكشخ بسيارته كدام البنات ..
انسان طبيعي عادي عفوي هاي كل القصة .

منال :
اممم ..
اشو مسامعتج تحجي عن احد من الطلاب الويانه هيج ؟

مروه :
انت تشوفيهم مثله ؟
انت مشايفه النماذج الويانه اكبر اهتماماته شعره وعطره وسيارته حتى يقشمر البنات لااكثر ولااقل ..

منال :
وشمدريج عبدالله مو مثلهم ؟

مروه :
ماادري يجوز يطلع مثلهم ..
بس اسلوبه عادي ماحسيته من هالنوع حتى من كال اوصلكم ماكال هاي سيارتي لو كال موديلها لو كال شكد سعرها ..
حتى مااصر علينه يوصلنه .

منال :
وهذا شي زين بنظرج ؟

مروه :
بالنسبة الي اي اشوفه انسان يعرف حدوده ومحاب يتجاوزها .

منال :
ومن انطاج رقمه وين جانت هاي الحدود ؟

ضحكت وكتلها بضحك لان عالموضوع مجان على بالي :
يجوز مكدر يقاوم جمالي هههههه .

منال :
والله اني مااكدر افسر تصرفاتكم انتو الاثنين لا انت ولا هو فاجأتوني ..

مااتصلت بعد بعبدالله .
ولااعرف عنه اي شي ..
مجان بذاك الوقت اكو موبايل ولا نت ..
مرت مده شهرين يمكن .

اني ومنال الصبح عدنه اول محاضره كلش مهمة واكفين بالكافتيريا مقابل القسم ،كالمعتاد ونراقب الرايح والجاي ..
وشفنه عبدالله جاي باتجاهنه !!!!

باوعت كلت هذا الولد الجاي باتجاهنه ماادري وين شايفته ؟
كلما يقترب اكثر اكول وين شايفته ؟؟
فجأة ابتسم بوجهي ..

مروه :
هذا عبدالله لو واحد يشبهه ؟!!!

منال :
وين ؟

مروه :
هذا الجاي منا ..

منال :
اي والله هو !!!!!!!!!!
هذا شعنده هنا ؟!!!!!!

عبدالله:صباح الخير.

اني ومنال في حالة صدمة :
صباح الخير

.
وكف وسلم وبقى واكف يسولف كال جاي ويه اصدقائه يسألون على بنيه بقسمنه.

قرب وقت المحاضره ومنال كالت:
اني اروح ادخل للمحاضره لان عندي تنبيه مااكدر اغيب ..

عبدالله :
زين معناها مروه تبقى وياي اريد احجي وياها.

مروه: وياي ؟؟؟

منال ؛
اي مروه تكدر ، هاي شاطره مو مثل حالتي متضرب محاضرات تكدر تغيب عن المحاضره ..

باوعتلها متعجبه :
ياا !!!
لج عندي غياب محاضرتين ...

منال :
عادي عندج مجال بعد وحده قبل ميضربوج بتنبيه ..
يلا باي ..

راحت وعافتني وياه !!!!

هو هم مجان عنده استعداد يكول لا روحي لمحاضرتج ..
سمع كل اللغوه ( الضجه ) بيني وبين منال وجان واكف ساكت منتظر النتيجة .
مجان عنده استعداد يتنازل ..!!!

عبدالله:
نتمشى شويه؟

مصر على كلامه يريد يحجي وياي ..
استحيت امشي وياه كدام الطلاب كلهم يعرفوني مو مال علاقات ومشي وهالسوالف بس استحيت ارفض بعد ..

مشينه شويه ابتعدنه عن القسم لان نظرات الطلاب جانت تلاحقني ..
مستغربين ... منو هذا ؟؟!!

عبدالله:
مروه انت مرتبطه؟

فاجأني كبل بدون مقدمات !!!

مروه :
شلون يعني مرتبطه؟

عبدالله:
يعني اكو بحياتج احد؟

مروه:
لا لاتشوفني حجيت وياك عبالك خبره ...
تره اني جبانه مو مال هيج سوالف بس ماادري ليش وياك اتصرفت بدون خوف وتفكير المره الماضيه .

عبدالله:
اني نفس الشي ههه ..
اول مره انطي رقم لبنيه واكعد انتظرها تتصل ..
وهسه اول مره اروح لغير كليه حتى اشوف بنيه.

مروه :
مو على اساس جايين حتى تسألون على بنيه بقسمنه ؟

عبدالله :
صحيح ..
سألت ولكيتها ..
وصلتلها ..

سكتت ..
ستحيت ارد عليه .
معناها جاي علمودي .
عرفت معنى كلامه ومثل ذيج المره جنت حاسه نفسي اعرفه مع العلم المفروض بعدني مااعرفه ..

ظلينه نتمشى ونحجي هو يحجي عن شخصيته واني عن شخصيتي لحد مطار الوقت محسينه بي ...
بقينه نتمشى ونسولف سوالف عاديه جدا ..
وراها راح وطلب مني اتصل ..

مروه :
مو جنك طماع ؟

عبدالله :
ليش ؟

مروه :
اتصلت مره بعد متكرر مره ثانيه ..

عبدالله :
اذا هذا يعتبر طمع فأعترف طماع ..
بس الشي الطمعان بي يستاهل ..
واني هم والله استاهل ..
بعدين الله سبحانه وتعالى يكول ( وادعوني خوفا وطمعا ) ، الله سبحانه وتعالى احل الطمع البريء المابي رياء ولا جشع ..

مروه :
لا ..
مستحيل ..

عبدالله :
صيري طماعه مثلي مرات الطمع زين ههههههه .

مروه :
هاي انت اجيت اليوم وحجينه بعد شنو الداعي للاتصال ؟

عبدالله :
معقوله بعدج محاسه بالداعي ؟

فهيت بوجهه !!!!
وبقيت طول الوقت من صفنه لصفنه ..
لحد مطلعت منال الي ماادري وين اختفت صار ساعتين ؟؟!!!!!!!

.
.
.

فوضوية وهادئة جريئة وخجولة
شُجاعة وقلقة هكذا أنا مزيجٌ غير مفهوم .
.
.
.
لايك وتعليق وعشر ملصقات فضلا 🌹