رواية حكمت محكمة الحب الفصل الحادي والعشرون 21 - بقلم زينب العبيدي(زينبيه)

شلونكم يحبات كلبي❤

هواي من المتابعين يضنون اني الكاتبه زينب ماجد وخصوصا المتابعين الجدد

طبعا تحياتي للاخت زينب ماجد بس اني لقبي الزينبيه او زينب العبيدي

حكمت محكمة الحب حضوريا
على قلبي بالعشق مدى الحياة
بعيداً عن كل الفروقات
محتضناً تلك اللحضات
مابين طفولتي وتلك الشيبات

#حكمت_محكمة_الحب

بقلم #الزينبيه

البارت #١٧

فتحت الباب وانصدمت حجيت بصدمه إيه ايمان شنو شبيجن شعدجن هنا

حجت ايه من بين دموعه نواره احنه ماعدنه مكان نروحله وسألنه عليج هواي اله اندليناج عفيه خل ندخل

نواره لعد رحمه وين

ايمان امي تزوجت

نواره دخلن دخلن وليش ما اخذتجن وياها

أيه بالبدايه زوجها وافق انضل يم امي بس ورا ٣ ايام كال ما اريدهن لان بناته هو ما يرضن وزعلن فا رحنه البيت خوالي بس هما هم مارادونه
شنسوي يانواره وين نروح ماعدنه احد وانتي اختنه الوحيده احتوينه فدوه

نواره ما اصدك رحمه تزوجت بس هي ماصارلها كم يوم وطلعت من العده ابوي حتى مادارت سنته شنو من بشر هاي

فوتن اتفضلن خل احجي وي سلطان واشوف شسوي

دخلن جوه وسلمن على ام سلطان ومهند الي قبل شوي كعد من النوم وطلعتلهن حنين هم سلمن عليها ضليت محرجه شنو احجي هسه لو ماما حبيبه هنا جان كلتلها اوف اكتفيت بالسكوت وانتظرت لحد ما اجه سلطان دخل للبيت كال السلام عليكم وراح باس راس امه

الحجيه الله يرضا عليك يابعد بيتي

رجعنه عليه السلام كتله الله يساعدك

سلطان هلا هلا نواره همسلي منو البنات

دنكت راسي وحجيت كتله خواتي

سلطان اهاا كل الهلابيهن رفعي راسج ابوي

حجه بصوت عالي ياالله حيهم نورتونه بابا

ايه شكرا عمو

اتغدينه وكملنه على ماشلت المواعين وغسلتهن كلت الاايه وايمان يكعدن بغرفه الحجيه على ما احجي وي سلطان

صعدت الدرج جنت خجلانه شلون افاتحه بالموضوع خواتي يكعدن عندي زين ماكو حل ثاني لا اكد اوديهن ابيت بابا الله يرحمه هنه بعدهن صغار منو الهن ولا اريد اوديهن للميتم ويصير وياهن مثل ماصار وياي عدهن اهل وهنه مشمورات بدار الايتام هنه ما الهن ذنب بالي سوته امهن بيه

فتحت الباب مالكيته التفتت ردت اطلع شفته وراي يريد يدخل

دنكت

سلطان تدورين علي

نواره هاا الصراحه اي

حجه وهو يتمدد ع الجربايه طفي الضوه وتعاي كولي شتردين

طفيت الضوه واجيت يمه كعدت ع الجها الثانيه

كتله سلطان اني ماعرف شلون اكلك بس الصراحه خواتي ماعدهن مكان يرحله

سلطان ها لعد مرت ابوج وين

نواره تزوجت وعافتهن وزوجها مايريدهن

سلطان لاحول ولاقوه الابالله لعد خليهن هنا خطيه شنو ذنبهن هل اطفال استغفر الله شلون ناس شنو من معدن ناس بحسرت الطفل وناس متبطره عل نعمه

نواره استغفر الله اللهم لاشماته بس الدنيا دواره وخلتهن بمكاني خل تضوك رحمه من نفس الكاس مستحيل مامتعذبه على بناتها بس مابيدها حيله يمكن

سلطان ببتسامه لج حرام خطيه ماالهن ذنب لاتتشفين بيهن

نواره ضحكت استغفر الله مو قصدي والله هنه ماالهن ذنب

سلطان. اششش كافي يله خل انام راسي مصدع
اخذت حبتين براسيتول ومارتاحيت اكول باله نزلي للحجيه شوفي عدها فكس اذا عدها جيبي وتعالي مرخيلي راسي

نواره ماشي نزلت ركض للحجيه سألتها على فكس ونطتني رجعت صعدت
هاي جبت فكس

سلطان. تعالي كعدي هنا

شال راسه من مكانه و وخر مخدته كعدت وخله راسه بحضني ضليت كلي ارجف وابلع بريقي

سلطان يله. شتانين

عضيت على شفتي من الخجل وخليت الفكس على كصته وضليت امرخ براسه وخذاني الواهس لان صار الملمس دهني لعبت لعب بكصته انتبهت عليه صافن عليه وبس باوعتله ابتسم

سلطان. انتي جاي تلعبين لو تمرخين وصلتي الفكس الحلكي خرب حضج

عضيت شفتي وضليت ارمش بعيوني كتله خذاني الواهس

سلطان. نواره. لاتعضين شفتج ياب. تره تصير سوله ومو حلوه تعضين شفتج كدام اين كان

نواره. أأ ها صار

سلطان يله هسه اشتغلي وغمض عيونه

رجعت. اني امرخ براسه لحد ماحسيت انفاسه ثكلت عرفته نام ضليت صافنه بوجه باوعت الملامحه الرجوليه خشمه طويل وعالي حلكه متوسط الكبر عضام الفج عريضه وبارزه وحاجبه طويل ومرفوع والي يزيد جماله ارموشه الكثيفات صحيح عيونه مو كلش اكبار  بس كلش جذابات والاحلى من هذا كله. عطره. الفواح اليوصف كل جمال ومنظره المرتب تحس بي نظافه حتى بلبس البيت او البدله العسكريه يطلع مرتب وكلشي يلوك الطوله

خذاني الواهس واني ادقق بتفاصيله طخت ابخشمي عطر شعره ومالكيت نفسي اله واني مدنكه واشتم براسه وما ان تبعدت اله وسد عيونه بسرعه كأنما مايريد يفشلني ويبينلي هو كاعد

بس اني ياكاع انشكي وطميني على شويه وابجي من الفشله. دعيت الله بالسر مايطيح دمعتي . اللهي ليش بس يمه اتفشل انذر نذر واجب علي لو صارت مره وما اتفشل وياه طاح حضج الثوله الغبيه بطلي سوالفج الي تفشل باله شيكول عني هسه

ضليت كاعده مثل الصنم حتى انفاسي ما ارفعه من الخجل مادري شكد ضليت على هذا الوضع لحد ما غفيت

كعدت على صوت تلفوني وهو يدك لكيت روحي نايمه بمكاني ومغطايه وسلطان ماموجود الظاهر هو الي حطاني ابمكاني شنو هل النوم الثكيل

رديت على التلفون جانت ماما حبيبه فرحت من سمعت صوتها تسلم علي وتسأل عني وعنه كل احنه وقطعت الاتصال على صوت حنين وهي ادك على الباب

حنين ست نواره كعدي اجونه خطار تعالي حضري العشه لو خدامتج حنين موجوده

نواره. سديت المكالمه وي ماما حبيبه وفتحت الباب

كلتلها مايحتاج اصيحين اني ما اشتم ايدي واعرف عدنه خطار شوي وانزل

سبحت وبدلت وعلى مامشطت وحطيت مكياج شوي ونزلت لكيت حنين محتركه حرك لان تأخرت

حنين جان اخذتيلج بعد ربع ساعه قبل لاتنزلين نازله على وكت

نواره. عاد والله على ماسبحت وبدلت اني ردت اتأخر بعد شوي حتى اتعلم المكياج بس كلت خطيه الوحدها حنين

حنين. اني اعلمج

نواره. شتعلميني ياست حنين اشو من اجيت لليوم رافعه خشمج علي وماطايقتني تكول كاطعه عليج ليله عرسج

حنين هينه صبري واني اعلمج

نواره اهووو خاب طيري تعلمني هيه

دفعتني حنين من صدري وهي تكول عليمن خاب طيري لج
ندفعت على الثلاجه وتأذه ضهري بأايد اباب الثلاجه رفعت حاجبي لج انتي منو وتمدين ايدج علي لاحسبالج ما اكدر اردج

حنين اني تاج راسج يالزعطوطه يالخدامه اكرهج كره المرض

نواره اهاا خدامه يالنذله اريد اشوف الخدامه اليوم منو سوي العشه ولاتتأخرين سمعتي وعفتها وطلعت

حنين اها يعني تتحديني لعلمج انتي جنت هذا البيت مو اني

نواره. راح تصيرين. جنته لو يحتاج اكلج انتي ومهند تحبون بعض

حنين اصص وكص صوتج وعشه ما اسويه وخل يجي سلطان واكله مرتك المصون مامسويه عشه

نواره. خل يجي اريد اكوله الست حنين تجاوزت علي ودفعتني وتكول عني خدامه وزعطوطه

وعفتها وصعدت للغرفه وبكلب بارد طلعت التلفون ودخلت على اليوتيوب اتعلم المكياج ونسيت روحي لاساعه ولاساعتين وفزيت على صوت سلطان وهو يرعد ويصيح.

سلطان وييييينهاااااا لج هيييييي نويرااا

نواره جان بيدي قلم الكحله وصعد فوك على حاحبي من كد ما فزعت من صوته ضلت اركباتي وحده اطك بالثانيه

نزلت شفت حنين واكفه وتبجي وعمتي ام سلطان تستغفر الربها ومهند باوع علي طك كصته وضحك

سلطان. ماتكليلي ليش الهسه عشه ماكو وماستحيتن الناس طلعت ابليه عشه هااا احجي ياتبن

نواره. حجيت بخوف جا بيش الساعه

عله صوت مهند بالضحك

التفت عليه وخزره سلطان سكت بسرعه ولا كأنما جان ديضحك

سلطان انتظر جواب احجيي

حنين. اني مو مسؤليتي ياسلطان اسوي عشه هي جنتكم المفروض هي تسوي

سلطان اهاا هسه صارت مو مسؤليتج مو انتي طول عمرج ماتخلين حبيبه تطبخ اذا مو انتي اتساعدينها او تطبخين عنها

حنين. بس هي استفزتني

سلطان. اششش ولا كلمه. وانتي والتفت عليه

نواره. والله العضيم ياسلطان اني جنت نازله اساعدها بالعشه بس هي دفعتني وأذتني وكالت عني انتي زعطوطه وخدامه وهددتني وتكلي اني اعلمج احجي واني ابجي من الخوف

سلطان. ولذلك ماسويتي عشه انتن ثنينجن زعاطيط وماتستحن الله يطيح حضجن البيت خلاف حبيبه مايسوه

طاح حضجن من نسوان وانتي والتفت على حنين يلي تكولين مو مسؤوليتي بعد لاتجييييسين اي شيي بالبيت سمعتيييييي يحجي بعصبيه ويصيح

واذا انعادت كلمة خدامه هاي والتهديد وسوالف النسوان والزعاطيط تره مايصير خيير سمعتتتتي لاتخليني اعاملج باسلوب مو حلو واني اكول بنتي ما اريد اقسي عليها

وانتي والتفت علي ماطول انتي زوجة سلطان معناتها هذا البيت بيتج والكل كاعدين خطار عندج وانتي المسؤله عن خطارج وضل يصيح بصوت عالي عشه و غده وتنضيف انتي المسؤله عنهن وماتحايلين احدد بالبيت صاااار معلووووم

زعاطيط تفو نسوان اخر وكت لاخير البيجن

اني جانت دموعي تنزل عشره عشره باوعت الحنين بحقد وهي تبادلني نفس النظرات وتمسح بدموعها

حنين. ان شاء الله مايتعده على خير الي صار يانواره

مهند. كافي لاتضلين تنعثلين روحي الغرفتج وانتي نواره روحي صعدي الرجلج وهسه راح اجيب عشه

اجانه صوت سلطان من فوك. لاااااء شنو اتجيب عشه يله كدامي روحي سوي عشه

هزيت راسي بمعنى أي واني دموعي يصبن دخلت للمطبخ واني محتاره شسوي اجت وراي الحجيه

الحجيه يمه هاي اكو بالمجمده كبه وبورك كليهن ونطيني خل اساعدج اكص وياج خيار وطماطه

ضليت ابجي بصوت عالي. شفتها اجت علي وشبكتني يمه لاتبجين بعد بيتي تره سلطان صح عصبي بس هو ماقصده يأذيج كل الي حجاه حتى حنين تنكسر عينها والله يايمه

رادج تكولين اني راح اسوي العشه وتكسرين عينها وليدي واعرفه اوووف اووف مدري شجالها هل حنين والله هي خوش بنيه وطيبه وحبابه وشايله البيت شيل بس ما ادري شجاها وياج

نواره. والله كلشي ماسويت الها يوم هاي اول مره اردها كل مره اسكت عنها هي دائما وياي هيج مو اول مره هاي

ام سلطان ميخالف يايمه الله يهديها لاتبجين بنيتي بعدج ماتفهمين وضع هذا البيت ولاتعرفين طبع رجلج الله كريم يبنيتي صبري ان الله مع الصابرين حبيبتي

نواره. روحي يوم ارتاحي هسه اصيح الايه لو ايمان يجن وياي

الحجيه لا عيب يايمه شلون تكومين الخطار

نواره. لا يوم. هذن مو خطار هذن راح يكعدن ويانه على طول

الحجيه يااء وليش

نواره خجلت ودنكت

الحجيه ياااء يمه مو قصدي بس قصدي امهن وين شعجب عايفتهن

نواره. ازوجت وعافتهن يوم ومحد الهن ومحد يريدهن

ام سلطان استعوذ بالله شنو هذول من بشر كافينه الشر ياربي يايمه الدنيه انكلبت اكو واحد يشمر كطعه من كلبه وعلمود شنو علمود الرجال من عمة عينهن شنو هذن من نسوان

نواره.اي والله مستحيل هذول بشر الله كريم ياحجيه روحي هسه انتي واني اصيح البنات يجن وياي

الحجيه على راحتج يمه

راحت الحجيه وصحت الايه تساعدني وضليت اكلي وهي كاعدن تكص طماطه وخيار

ايه. الله يساعدج على عصبية زوجج بس صوته هز البيت هز

نواره صلي على النبي ايه

ايه اللهم صل على محمد وال محمد هسه على شنو حاسدته على عصبيته لو صريخه بس والله هاي اخت شريجتج حيه

نواره. عاد بعد انتي اعرف بالحيايه

ايه. هاي شبيج نواره ليش احسج مابالعتنه اذا مضيقين عليج نروح نكعد بالشارع

نواره. اكول باله سكتي اني مالي خلك وانتي كاعده تتفلسفين براسي شنو الجديد الكلتي اعرف بسلطان عصبي وادري بحنين تكرهني

ايه. ماكلت شي جديد بس نصيحه. تغدي بيها قبل لاتتعشه بيج تره مو سهله هل حنين

نواره لا اريد اتغده ولا اريد اتعشه خليها يم الله هو الي يطلع حقي

كملت العشه وصبيت باوعت الساعه ب١١ مادري عشه لو سحور الله لاينطيج ياحنين

صبيت صحت العمتي والمهند وكلت الايه تصيح الحنين راحت ورجعت تكول ماتشتهي كلتلها صيحي الايمان خل تجي

مهند روحي خويه صيحي السلطان

نواره هزيت راسي وصعدت لكيته فاتح الابتوب ويطكطك عليه وبس فتحت الباب رفع عيونه باوع علي وبسرعه نزلهن

كتله صبيت عشه حجيت واني مدنكه

سلطان. ما ريد

نواره فتحت عيوني على كبرهن. لعد ليش خبصتنه
وكومت الدنيه ماكعدتها واليسمعك يكول ميت جوع وضلك ثلاث ايام ماماكل

رفع بس عيونه باوعلي بخزره حسيت عيونه عباره عن بياض ماعرف وين طار سواد عيونه بلعت رقي ودنكت

سلطان. تعالي اخذيلج راشدى بالمره لو جري ذاني شوي

نواره. أ أ أ أسفه ما اقصد بس

سلطان. باوعتله حسيته يريد ينفجر على كد ماضاغط على فجه وعضامه بارزه

خوفني شكله وصارت بيديه رجفه لا اراديه شفته اتنفس بصوت عالي وكام من مكانه صار اكبالي ضليت.

مركزه عيوني على المستوه الواصلتلها وياه يعني بحدود صدره اخاف ارفع عيوني وزادت الرجفه لزم ايدي اليرجفن وعصرهن حيل وتنفس يطرد غضبه

سلطان. لاتخافين يابه اني ماريد اخوفج بس ثمني احجاياتج وعرفي عمر البشر الكبالج واحجي على هذا الاساس

نواره. والله اسفه ماجان قصدي احجي وياك هيج. بس اني انقهرت انته

مانصفتني فوك ما انضربت ونهنت وتهددت انته اجيت وصيحت عليه كأن اني الضالمه مو المضلومه لو ماما حبيبه هنا ماجان رضت على حنين والسوته بيه

ابتسم سلطان مادري شلون راح يكضي العمر وياج فرق عقليتي عن عقليتج هواي انتي طفله واني تفكيري هواي ابعد من تفكيرج بس ميخالف هم راح اشرحلج

تعرفين ليش صيحت عليج ولمتج واله انتي مضلومه لو لا صعدتج الغرفتج وماهتميتي للعشه نواره ياب انتي لو مسويه العشه وهذيج الساعه جايتني وشاكيه حنين يمي ماجان سكتت عنها وذبيت اللوم كله عليها بس انتي غلطتي من اتجاهلتي وعفتي خطارنه يطلع بدون عشه

واني سبق و كتلج بما ان اني ابو البيت وانتي زوجتي فالمفروض انتي ام البيت وانتي المسؤله عن كل صغيره وجبيره وعن كل شارده وارده بهذا البيت ادري بعدج صغيره ومحتاجه تعلوم بس ساعات احس عقلج عقل جبير وفاهمه وساعات لا كلش زعطوطه

ع العموم عذريني اني عصبيتي تتحكم بيه احيانا ما اتحكم بيها

وشي ثاني. اني من صيحت عليج هذا اكبر بسمار الحنين جاي اوضحلها ان انتي المسؤله وانتي ام البيت وشانج اكبر من شانها ومتأكد هي افتهمت هذا الشي اني الكل حجايه حاسب احساب اريد اكبر شانج ما اصغره

وشي اخير يانواره تره حنين طيبه واني ربيتها بأيدي وحاسبها بنتي الله شاهد بس احتمال هيه تغار او هيج شي فا الاريده منج اتجنبيها وكفيها خيرج وشرج واكتفي منها انتي صار معلومه

نواره هزيت راسي بمعنى اي

سلطان وبعدين انتي ليش هلكد خوافه وترجفين ترى مو زين عليج اذا تضلين هيج جبانه كلش يجوز يصير بيج ارتفاع بالضغط او هبوط

نواره. انت شكلك يخوف

سلطان ابتسم وكال انعم الله عليج

نواره لا لا موقصدي قصدي انت من عصبي يصير شكلك يخوف وهاي عضامك تطلع لبره وخليت ايدي على فجه

سلطان اها اذا اني اخوف تعالي شوفي روحج وسحبني للمرايه وراواني خط الكحله الصاعد الحاجبي والمسكره والكحله السايحات

سلطان. شفتي جنج عيون الباندا انتي والاسود هذا

نواره. ضحكت بصوت عالي كتله كله منك انت خوفتني

باسني على راسي وهو واكف وراي ماريد اخوفج يابه ماحب اقهر اليتيم اني ودمعتج هاي الله مايغفرلي عليها

سامحين ابريلي الذمه ياب نواره اتمنى بس ما اكدر اسيطر على عصبيتي بساعتها الشيطان يطفر براسي

نواره. لاتكول هيج حبيب... اقصد سلطان لاتكول هيج انته تمون وطكيت كصتي وحاجيت روحي بصوت عالي ياربي. فدوه اروحلك مو كتلك نذر واجب عليه بس ما اتفشل يمه

شفته ميت من الضحك بس بدون صوت وايديه على عيونه

طلعت من الغرفه ركض لوين راح اوصل وي فهاوتي هاي والساني المتبري مني

رجت غسلت وجهي ونزلت لميت المواعين ستوه مخلصين عشه

الحجيه لعد يمه وينكم صعدتي والصعده صعده

مهند. ليش مغسله جان حلو مكياجج جنج مهرج سيرك انتي تبجين واني خربان ضحك عليج

نواره. اي شفتك ميت ضحك والدليل من خزرك سلطان انشدن تعابيرك كأنما شيئا لم يكن ههههههه

مهند. خرب. وين براغيه وجهي فلت طح حض الوكت الخلاني صافن وحده بطول زري قصفتني

نواره زدت بالضحك وهو كام و كال يله من رخصتكم
كتله واني اضحك ماوصيك اطمن على شرشبيل

مهند عض شفته بمعنى سكتي

نواره اي شبيك غير تباوعلهم بالتلفزيون هذوله سنافر وشرشبيل هههههه

الحجيه ياء يمه صدك تباوع افلام كارتون يحضي وستوك تكلي اريد ازوج

مهند. خليني ساكت حجيه احجايه وحده وانفضح الله لايوفقج يانويره بطول ركبتي وماتنكدرين

نواره وانته ضل كلساع قلص بيه شويه مره بطول زرك مره بطول ركبتك شويه واصير بطول صبع رجلك

مهند يله بس بس خل اروح اشوف شرش... اقصد خل اروح انام الله لاينطيج يانويره خليتيني اجفص. هههههه

الحجيه. يله يمه نواره فرشي الاخياتج يمي على ما باجر انفرغ غرفة مهند الهن ومهند يجي يمي

نواره لا يوم فشله من مهند

الحجيه لا ماما يمعوده يردن ياخذن رتحتهن يذبن الحجاب مالج علاقه اناي هسه روخي فرشيلهن كلتلها ان شاء الله وكامت الحجيه دخلت الغرفتها

ايه. اشدعوه هذا الميانه الزايده انتي ومهند

ايمان. انتي شكو حماها وحسبت اخوها

ايه على كيفج شحجيت اني

نواره. مثل ما كالت اختج يا بنت رحمه

ورحت افرشلهن ومشيت

ايه وشبيها رحمه تره ما اسمحلج تضل هي امي

نواره اهوو عاد سمحتي ولا ماسمحتي الي شفته من رحمه يحقلي احكم عليها اعدام مو بس احجي عليها

ايمان. بس مو كدامنه نواره احجي عليها بس هي هم اتضل امنه

نواره ام مثل رحمه ماتنراد ولاخير البيها ولو بيها خير مجان اتزوجت وعافت بناتها وهنه باأمس الحاجه الها لاعدهن اب ولا اخ ولا سند شتترجين من هيج ام

ورحت فرشتلهن

وقبل ما اصعد صاح علي مهند التفتت عليه شفته واكف وحنين وراه

نواره نعم

مهند نزلي

نزلت وكفت اكباله اتبعد هو من مكانه وصارت حنين اكبالي

مهند. يله اشوف كدامي اتصالحن وتباوسن وانسن كلشي

نواره. باوعتلها جانت امدنكه ورفعت عيونه باوعتلي من نظراتها اكدر اقره كم الكره الشايلته الي بس تذكرت احجايات

سلطان من كلي هي طيبه بس يمكن اتغار تضل هي اكبر مني واجب علي احترمها اتقدمت بستها وكلتلها اني اسفه حبيبتي

حنين. لاتتمسكنين مايلوكلج

مهند. حجه وهو صاك على سنونه اني شكلت اني شكلت

شفتها عضت على شفتها بحقد واجت تريد تبوسني كلتلها مايحتاج تسوين شي مغصوبه عليه اني من بستج برضاتي مو حلو واحد يلبس قناع الحب وهو بداخله كره شي واحد اريد اكلج اياه

اني ماسويتلج شي يضرج ليش تكرهيني اني ما اريد منج تحبيني بس اكفيني شرج واعترفلج اني لا احبج ولا اكرهج والله يهديج

درت وجهي وصعدت وكفت على النص بحيث مايشوفوني وسمعت مهند يحجي عليها هواي حجي وهي احسن منج وطفله وعقلها اكبر من عقلج ومن هذا الحجي

فرحت حيل من سمعته يمدح بيه صعدت الدرج دخلت لكيت سلطان نايم والضوه مشتغل اجيت غطيته وضليت واكفه كباله شوي وحجيت بداخلي فدوه
شكد احبك

شفته ابتسم وهو نايم وحجه طفي الضوه

نواره يعني انت وين شفتني مو مغمض عيونك

حجه وهو على نفس وضعه مايحتاج عيون حتى اشوفج ويله طفي الضوه

رحت اطفي الضوه واني احاجي نفسي يعني شلون مايحتاج عيون حتى يشوفني اوو وين ادري بي

ورحت لفراشي اطكطك ع تليفوني شوي لحد مانمت

مرت الايام وسلطان مثل ماهو تعامله كلش حلو وياي ودائما يهتم بيه وهوواي يصفن علي بدون علمي ولمن اباوعله يدور وجها بسرعه

ايه تقربت كلش من حنين وصارت صديقتها وحنين رجعت تشتغل بالبيت بعد ما اعتذرت من سلطان وبالكوه اله وافق يكسر حجايته ويخليها تطبخ وتنضف و ماتغيرت ابد تكهرني كره المرض

ايمان حبابه وكافيه خيرها شرها

صار اليوم الي ترجع بي مامه حبيبه من بعد ٢٢ يوم سفر

جنه منتضرينها توصل كلش فرحانه برجعتها ومشتاقتلها زينت البيت نفاخ ونشرات وحضرنه الجكليت

ولمن اجت استقبلها سلطان من المطار واجوي ع البيت وبدخلتها ذبحولها خروف فده رجعتها بالسلامه

شفتها وشهكت بالبجي شبكتها واني ابجي بحركه وحنين هم شبكتها وتبجي وتشتم بيها ضلت شابكتنه ثنيناتنه وهي هم بجت وباست راسي وراسها اشتاقيت الجن بعد كلبي حجت وهي تبجي

نواره ماما والله البيت بدونج موحلو وكئيب لاتروحين المكان بعد عفيه

حبيبه لاتخافين يعمري ماتركج

وبالكوه شلعتنه من يمها

رحت اجيب مي الهم وبرجعتي من المطبخ صار كبالي سلطان كلي نواره ماشفتي محفظتي صار ساعه ادور وماكو اني عفته بالغرفه

نواره اي خليته ع ميز التسريحه

سلطان روحي شوفي يابه اريد انطي الولد الكصاب فلوسه خطيه صار هواي واكف

كتله صار صحت على ايه انطيتها المي تودي

وصعدت.......

يتبع......