رواية حكمت محكمة الحب الفصل الثالث والثلاثون 33 - بقلم زينب العبيدي(زينبيه)

مرررراحب اشلونكم

اسفه كلش ع التاخير وكلتلكم جنت بالزياره والف شكر للي دعالي بقبول الزياره

بس اكو بعض التعليقات الي جدددا
نرررفزتني ومن ضمنهن وحده تكولي انتي تضحكين علينه حابه ارد واكول عيب كلمه اتضحكين علينه اني لانصابه ولا مستهتره ولا مامحترمه ولا اخلاقي سز واضحك عليكم وثاني شي كلت اني بالزياره افتهمو يعني يم الحسين عليه السلام شنو تردون اضيع هل للحظات علمود اكتب قصص علمود ميزعلون ويتنرفزون حضرت جناب الي ميتفهمون والي ميقدرون حطي نفسج بمكاني وشوفي الضروف قبل لاتحكمين وتحجين حجي مالائق

٣٠٠٠كلمه قراءه ممتعه
حكمت_محكمه_الحب

#بقلم_الزينبيه

#البارت٢٥

كعدت  الصبح شفت ماما حبيبه داتنزل صبحت عليها ونزلنه سوه  لكينه سناء مسويه الريوك وداتجيب وتحط يم الحجيه وهي تحجي اتفضلي خاله عليج بالعافيه صدك جذب انتي اتكعدين من وكت والهوانم نايمات استغفر الله عود يكعدن عود يسولج ريوك

والحجيه تكول لايمه اصلا اني ما احب اكل اول ما اكعد لازم وره ساعه يالله وحبيبه والبنات ما قصرات بس خطيه ضلهن بالسبوع عيونهن ما ماخذه نوم من وره القلق على وليدي سلطان

انوب اتدافع الهن قصرتي ياخاله جبتي نواره الي اضرب من حبيبه

حبيبه صباح الخير يوم
اني كلت وراها هم صباح الخير يوم

الحجيه صباح العافيه ابنياتي

راحت ماما حبيبه سوت جاي ثاني غير الي مسويته سناء وصبتلي وصبت النفسها

سناء يااا وليشش تستنكفين ست حبيبه موهذا جاي لو الكره وصل بيج فد مره

حبيبه لاحبيبتي سناوي اخاف من السحوره هههههه

سناء يااا خاله سمعتي سمعتي شتكول تكول علي ام السحوره

حبيبه على كيفج ياب دانشاقه خلي روحج رياضيه بس اني جاي الي اسوي متعوده عليه وياسبحان الله ما احب اشرب من غير جايي

سناء هاا لعد نواره ليش صبيتيلها

نواره اني همات غير الجاي الي تسوي ماما حبيبه ماشرب ياسبحان الله

سناء وبعد احسن

كعد مهند وصبتله ماما حبيبه اتريك وبعدها اخذ سناء وداها لان لطشت عليهه وديني وديني

كليوم لافيه اي شعندج سلطان وماكو ع العموم

للمغرب اجه مهند وكال باجر انطلعه السلطان حالته استقرت والدكتور كال تكدرون ترخصونه بس يضل نايم بالبيت
لحد ماتشفه عمليته

وكال ميت جوع اريد عشه ودخل الغرفته

دخلنه اني وحنين للمطبخ ودا انسوي عشه

وشوي ودك تليفون حنين شفتها ارتبكت وباوعتلي واخذت تلبفونها بسرعه وطلعت

اني ضليت احوس ياربي الفضول كتلني لويش هيج اتغيرت ملامحها

حاولت اشغل نفسي بالطبخ وانساها شوي ومرت نص ساعه وهي ماكو هاي وين راحت

طلعت ادور عليها مالكيتها بالطرمه يجوز دخلت جوه من الباب الخلفي

رجعت للمطبخ كملت العشه وجهزته صحت ع الحجيه وماما حبيبه

ورحت اصيح المهند وسمعت صياحهم بعصبيه وهمس بنفس الوكت وهو يكلها ولج والله ماكو شي من هذا الحجي والله
وهاي وحده جذابه ومتعجب على نواره ليش هيج سوت

وهي تكله هاي نواره حقيره وخبيثه اعرفها بس انت شلون اطاك كلبك هيج اتسوي بيه هاي جزاي لان حبيتك من كل كلبي

وهو يصيح عليها يكلها باع هاي انتي ليش غبيه وماتفهمين اني اخوي بين الحياة والموت ويني وين هاي الخرابيط بس انتي ثوله ورعنه اتصدكين هل حجي ونواره احسابها عندي

اني كلشاع اسمع اسمي بالموضوع صفنت بيني وبين نفسي اريد اتذكر اني شمسويه وي حنين شي غلط لو وي مهند مالكيت شي لعد ياربي ليش ديحجون هيج علي

كلت خلي ادك الباب هم اصيحله ع العشه وهم ةعرف السالفه دكيت الباب

بسرعه سكتت حنين ومهند كال منو

-اني نواره ياله العشه جاهز تعال لايبرد

-فتح الباب وكال الله جابج فوتي

-فتت يمهم واني اباوع الحنين ابدها تاكلني ومهند يباوعلي بكره

-خير مهند اكوشي

حنين اكو هواي اشياء ياقليله الادب شكد حقيره ومكاره مثل الثعلب من البدايه عرفتج بس ربج يفضحج يفضحج

التفت عليها مهند وخزرها اشششش انتي ولا صووت

وانتي باوعي علي انتي عندج صديقه اسمها وسن

-اي شعرفك انت

-حجه بكره شلون شعرفني وانتي الي دازتها تخرب علاقتي بحنين وتتبله علي ومنطتها رقميي وتكولين شعرفك

-فتحت عيوني على كبرهن هااا لحظه لحظه انت شدا تحجي

حنين الي سمعتييي يانذله ياسخيفه

-لحظه هاي شبيكم اني البنيه تعرفت عليها من الفيس صحيح كلشي احجيلها وهم ماانكر سولفت الها كلششي حتى عن علاقتكم بحكم احنه صديقات بسسس والله والله اي رقم ماانطيتها وبعدين شمصلحتي اخرب بينكم شعندي وياكم

حنين هذا الحجي روحي قشمري بي حبيبه ومصلحتج واضحه اتكرهيني وتردين اتضريني وتحركين كلبي

-حنين اني ما اكرهج صدكيني بس هو كلمن يرى الناس بعين طبعه و التفتت على مهند هسه اتصل عليها هل وسن وافهم منين جابت رقمك بس اقسم بالله مو اني الي انطيتها اياه

صاحت علينه ماما حبيبه نتعشه كال مهند  امشن اتعشن ولاتجيبن الشبه وباوعلي بنظرة احتقار

ما الومه لان مادري هل وسن شمصخمه وحاجيه عني

حنين انطيني تليفونج علمود لاتتصلين وتتفقين وياها اعرف سوالف الحيايه على كد مامرن علي

انطيتها تليفوني بدون اي كلمه لان اني واثقه من نفسي مستحيل اسوي هيج شي ويه منو ويه اخت ماما حبيبيه رحنه نتعشه وبالي افكر هاي وسن منين جابت الرقم مال مهند بس يجوز مو هيه لا اكيد موهي

لالا شنو مو هي وتكول الهم نواره انطتني الرقم

ما اكلت بس قليل كمت صاحت علي ماما حبيبه تعاي كملي اكلي موزين

-لا ماما الحمد لله شبعت اصلا ما اشتهي

وصعدت

حنينن صاحت بهمس من وراي والله يانواره اذا اتأكدت انتي وره هاي السالفه والله ماتلومين اله نفسج اراويج انجوم الضهر بسيطه

عفتها وصعدت مارديت عليها اصلا مزاجي تعبان واحس كارها الكل  وماالي خلك

شوي واجه وراي مهند دك الباب وكلي نواره اريد احجي وياج

فتحت الباب كلي تعاي اجيت ورا بالصاله

مهند ليش هيجي سويتي يعني حتى لو تكرهينها الحنين بس هل شي بي نذاله وسوالف الموزينات ماتصورتج انتي هيج

-والله يامهند اني متفاجئه مثلك وسن صديقتي من الفيس لا اكثر ولا اقل ماشايفتها حتى صدكني اني ما انكر كلشي اسولف الها بس ما منطتها اي رقم او عنوان صدكني واني ما اكرهه حنين ولا عندي شي وياك وهذا السوالف مو سوالفي

-لعد منيين جابت رقممي وليش خصصتج انتي وكالت نواره انطتنيي وانتي تكولين حتى ماشايفتها شنو هل تناقض واريد تفسير شلون اخذت رقمي وليش جاي تسوي هييج وليش اتهمتج

-مثلك والله ما ادري والحيره كتلتني ما اعرف والله منين اخذت الرقم وشنو الها من مصلحه حتى هيج اتسوي

-هاج تليفونج واتصلي كدامي وفتحي سبيكر

-اخذت التليفون واتصلت ردت علي بسرعه وكالت

-الو هلا نواره

-وسن انتي شنو علاقتج بمهند حماي ومنين جبتي رقمه وليش كايلتلهم اني الي منطتج الرقم

-شنو هاي شبيج نواره شكو تحجين هيج اكو احد يمج

-وسسن انتي الي شبيج مو اني داكلج منين اخذتي رقم مهند

-نواره اذا اكو احد يمج لمحيلي حتى اغير الموضوع لان دا اشك احد يمج من طريقة كلامج

-اللهم صبرج ياروح وسن احجي بلا لف ودوران كتللج منيييلج رقمه المهند

-والله عجيب امرج ليش داتحجين هيج ع العموم براحتج راح اجاوبج وانتي اعرف بالجواب اخذته منج انتي لو نسيتي انتي الي كلتيلي اريدج الحماي واريدج تصيرين يمي بنفس البيت بس هذيج الحيه تحبه وانطيتيني الرقم وكلتيلي خلي يحبج وكلتلي كولي الحنين ان عنده علاقه وياي هااا نواره ليشش احسج فاقده الذاكره

-ل ل لج  ان انتيييي شتحجين شوكت هيج صااار لج احجي ليشش داتجذبين شسويتلج اني(حجي واني مصدومه وكلبي ضل يدك بسرعه وبسرعه عيوني دمعن واباوع ع مهند رافع حاجبه ويباوعلي بكره واستهزاء واستصغار)

-نوواره هاااي شبيج شكلج اكو احد يمج وداتدورين السالفه براسي

-انتتتتي جذذذذااابه (والتفتت ع مهند)والله مهند والله هي جذابه هاي وحده نذله اني ما اسوي هيج شييي والله صدكني نزلن ادموعي

وهو باوعلي بااستحقار منجوه ليفوك وكال ما اتصورت انتي بهذا الحقاره والنذاله والخباثه صرت اخاف على حبيبه منج ومن افعالج الشيطانيه

ودار وجها ونزل تبعته وصحت عليه بس ما وكف ولا التفت جنت ابجي واكوله صدكنني مهند هاي لبستني تهمه واني غافله وما اعرف اي شي عن حجيها صدكني فدوه

ودخلت الغرفتي ومن حركت كلبي بجيت لحد مانشفت اعيوني اني منا نفسيتي تعبانه ومنا مشتاقه السلطان ووجوده يمي والقهر الاكبر هاي النظره الي خذاها عني مهند اكيد كرهني واكيد حنين ما حتسكت وسن الحقيره وغدرها بيه بس بعدني محتاره شلون اخذت الرقم

وضليت بين دمعه وحسره ونشغه وفكره لحد ماسلمت عيوني النومه عميقه هوواي نمت اليوم ثاني العصر حسيت ماما حبيبه اتكعدني اكثر من مره بس جنت ما اريد اكعد احس بعدني تعبانه

لحد ما اجتي المغرب تقريبا واسمعها تكولي ماما حبيبتي كعدي اكلي موزين عليج وعلى ابنج

همهمت واني متعاجزه احجي

-زين والي يكلج سلطان طلع وهسه هو جوه بالبيت بغرفة الحجيه

-فتحت عيوني بسرعه وبسرعه بجيت احس نفسي مخنوكه ومحتاجتله محتاجه حضنه مزاجي كلش متعكر وضايجه بسبب وبلا سبب

شبكتني ماما حبيبه وباستني ع راسي وكالت
-شبيج يا امي ليش دا تبجين اكو شي مضوجج كليلي

-ردت احجيلها عن الي صار وتذكرت هما سبق و وصوني ما احجي الاحد عن علاقتهم وهما هسه يكرهوني ولو كلت راح يزيد الكره اكتفيت بالسكوت ودنكت واني ودموعي تنزل

-اتصور مزاجج دايتقلب بسبب الحمل وانتي صغيره وهل شي طبيعي مزاجج يكون ما مستقر كومي حبيبتي غسلي وجهج وعدلي شعرج  وروحي شوفي زوجج راح ترتاحين واحجيله الي بكلبج ماطول ما احد يمه قبل ماتجيله الناس ترى ورى العشه كلها تجي

حطيت راسي على صدرها وبجيت هي شبكتني وضلت تمسح على شعري وهي تسمي وتقره علي وتكول حبيبتي شنو شجالج ليش الدموع عين ضاربتج لو نفسوج

-يمه تعبانه والله احس مالي بالطيب نصيب وماالي بالفرح حصه غير القليل

-لاحبيبتي حمدي ربج غيرج يتمنون حياتج هواي ناس مرضه بحاجه الصحه وهي عندج هاي اعضم فرحه وهواي ناس بحاجه الطفل وهذا الشي عندج وهاي احلى فرحه وهواي ناس متمنيه تعيش بيت وجوه سقف يسترهم وهذا الشي عندج كل هذا وتكولين قليل حمدي ربج حبيبتي

انتي صغيره وتجربتج بالحياه قليله والعمر حيراويج هوواي شغلات بعدج مشايفتهن ومثل ما اكو فرح واكو راحه واكو سعاده بهذه الدنيه كذالك اكو حزن وتعب وضيق ولازم بكل الحالتين نحمد الله لان لايحمد على مكروه سواه

-ونعم بالله مسحت ادموعي واني اكول الحمدلله الحمدلله بست راسها وكلتلها ماما والله حجيج ايريح ويفتح النفس

-شبكتني وانتي شكلج يفتح النفسس

-احبج حبيبه خانم اموووت عليج خصوصا وانتي تتغزلين بيه

-هههه يله كوومي عساس منو متغزل بيج سلطان

كامت واني رحت غسلت وجهي وبدلت دشداشتي ومشطت شعري ورشيت عطر وحطيت الشال ع راسي ونزلت

دخلت الغرفه الحجيه جانت الحجيه دتصلي المغرب وسلطان على جربايتها ومهند كاعد يمه ومن شافني بسرعه طلع حتى ما باوع بوجهي

اما سلطان التفت باوعلي وابتسم ع خفيف

مامصدكه عيوني واني اباوع عليه بحزن وفرحه بنفس الوقت اللللله هيج ورجعلي سلطان من حلك الموت رجع يكمل باقي سنينه وياي رجع ترس البيت بوجوده رجع طوله الفارع يمشي بالبيت الله ياربي مشتاقتله واحس نفسي اريد ابجي على جتفه اريده يلمني ويضمني ويشبكني الصدره

رفع حاجبه وهو يباوعلي لان واكفه بعيد عنه وصافنه علي

مدلي ايده واني ركضت عليه وشبكته نسيت جروحه وعمليته

صاح اخخخ

والحجيه لطمت زرورها وصاحت الله اكبر الله اكبر

ضحك سلطان مابيه شي يمه مابيه شي وهمسلي امي راح تفجرج جاي تكبر

ضحكت ودموعي تنزل وهمستله مشتاقتلك

اشتم ركبتي حيل وهمس افيشش ياريحة الكرز واني مشتاقلج اكثر

مسح دموعي بيده وهمسلي لاتبجين الخاطري موحلو عليج الدمع عمري انتي وسنينه

وهمس زين انطيني بوسه سريعه قبل لاتخلص الحجيه صلاه وتحرك الخلفوج لان اذيتيني

ضحكت اني بصوت عالي وهمستله اوكف خل ادورلك ع وحده

احترك مصنمج على ماتدورين الحجيه مخلصه وزالغه جلدج

اتقربت من يمه واني اضحك بسته بوسه سريعه ع الطاير وقبل ما اوخر سحبني من دشداشتي من يم ركبتي ورجع هو باسني

شوي وحسيته دفعني وكال اي ماكلتيل شنو تتمنين الرمش بيا عين هاي لو هاي

-الحجيه ولج يمه انتي جم دوب اتضلين هبشه وفاهيه مو راح تصيرين ام يحضي المصخم

-ضليت ارمش بعيوني وصافنه عليها

-نوب ترمش الفاهيه ولج رجلج يايمه هستوه طالع من ٣ عمليات ترحين مثل الطلي اتشمرين روحج عليه

-ط طلي ههههههههه

باوعت ع سلطان واني اضحك لكيته صاير احمر من الضحك وايده على عيونه

كال من بين ضحكاته احسلج هيج ماضل شي على  عيد ضحيه وراح تذبحج الحجيه

الحجيه يووو انوب يضحك الها زين مانحلن عملياتك وخياطاتك

سلطان لايمه شسالفه هاي الكتكوته تفتح اخياطاتي هاي ضماد لجروحي

الحجيه ياااا ماعرفتك يمه هاي انت لو عريان خلف

سلطان لا اني سلطان بس بعدني ماعريان وداعتج

الحجيه وهي تهز باايدها وتضحك يوو استخف وكعد ورفعت ايديها الله واكبر وتوجهت للصلاه

واني فاطسه ضحك

باوعت السلطان صافن علي

بسرعه اتقلصت الضحكه الى بدون صوت ثم ابتسامه ثم انسد الحلك شبيك

-احبج

-ابتسمت وبسته بالهوه وكتله اموت عليك

-احم اريد حجه وهو يغمزلي

-شنوووو حجيتها واني فاتحه عيوني

-بوسه هاي شبيج

-ها بوسه اي بسيطه بس اوكف...

قاطعني لاتكليلي ادور رحمه الامج

ضحكت

-فدوه ياب تكتلين كتل من تضحكين اعشق شامه الشفه هاي

-حسيت راسي احتر واني اضحك كتله كافي يمعود ترى انت المسئول عن تصرفي الي ح اسوي اذا تضل تحجي هيج

-لاه بربج اكو تصرف زين جريئه لو كلاوات

-لا مصيبه

-هلاوالله اليوم احجي للصبح ولا يهمج اني المسئول عن كلشي

-اوك كمزت عليه بس ما اذيته وضليت ابوس بي وهو هم

وفاجأه دخلت حنين وبيدها صينيه وكاسه شوربه

دفعني بسرعه وهو يحمحم

كمت اني بسرعه واعدل بشعري ميته من الخجل باوعت على حنين الي احس بس نضرات اعيونها كافي تحركني وتحرك الغرفه والي بيها

باوعت على سلطان وكالت اسفه بس ه هاي شوربه سويتها الك

سلطان شكرا حبيبتي عوفيها هسه اكلها

صاحت الحجيه سبحان رب العضيم وبحمده الله اكبر

عافت حنين الصينيه وخزرتني خزره خفت منها والله وطلعت

كمت اني اريد اطلع هم لان حسيت بالخجل والخوف بنفس الوكت

ورجعني صوت الحجيه وهي تصيح سبحان الله والحمدلله ولااله الاالله والله اكبر

التفتت كلتلها شنو يوم قابل شفتهم اني ياربي

سلطان تعاي شربيني الشوربه امي وحافضها صدكيني

باوعت عليها هزت راسها بمعنه اي وهي تكول الله اكبر الله اكبر

ضحكت عليه وكلتلها ماطلعت صلاة هاي عوزج بس تجين اتسحليني من شعري

اجيت يمه واني دا اشربه كتله شفت كله من وراك والله عيب شتكول علينه هسه

-اي والله عيب وزحمه كله انتي السبب كلتيلي واني ضعيف يم بوساتج ...يله غلسسي

-اني من عندي لك سليطين

-انجبي لج شنو هاي سليطين ابن جيلج لو لاعب وياج طم خريزه بالشارع

-لا اسفه والله ما قصدي عفيه سلطاني

-امششي لج دولي اشك حلكج ترى اله اذا بستيني هذيج الساعه افكر ما اشكه

-ههههه ابوسك بعدين من ينامون هههه

-اقنعتيني

الحجيه لج يمه انتي شنو اصيح الله اكبر اصيح لله الحمد يمه مايرادلها روحه للقاضي معناتها زوجج مصوب شربي انتي شنو ذكائج هذا بعد امج

سلطان يمه على كيفج وياها بعدها صغيره نويرتي ماتعرف رموز الصلاة مالتج عذريها

الحجيه يوو يمه كيفك

كمت بست راسها حبيبتي امي حبيبتي اني شعندي غيره سلطان كل اهلي واذا ع الشوربه دا اشربه اهم شي انتي ترضين

الحجيه الله يرضا عليج يمه اني شريد منكم ربي يسعدكم واشوف وجهالكم تارسين البيت

نواره امين اشكرج يوم ورجعت دا اشربه السلطان وهو يسولف عن الحادث الاغتيال وعن الي شاك بيهم واني مندمجه وياه

مرت الايام واجت ايام وصار على حملي شهر ونص وجانت نساتي كلها تعب ونفسيتي تعبانه ومزاجي متعكر على طول ونوم ٢٤ ساعه اكعد منا وانام اهنا واكل هوواي وسمنت شوي مو اهواي بس كل الي يشوفني يكلي صايره تخبلين والسمن حلو عليج

وسلطان ياسلطان محتار بيه بعدني ما اشتهيت الشي الكاه كبالي وكلش يخاف علي وهو تحسنت حالته شوي مو اهواي يعني بعده مضمد العمليه بس رجع الدوامه

ماما حبيبه همات مداريتني وكلما ترجع من الدوام تجيبلي وياها حلويات لان اعشق الحلات وخصوصا من صرت حامل ومتخليني المس شي بالبيت ولا اشتغل

حنين ومهند الي مايطيقوني مهند جان يذبحني الف مره بنضرت الاستحقار وحنين الي دائما تنغزني بالحجي وتصيح علي العكربه حاولت هواي احجي وي مهند بس ماصدكني واعذره لان سمع حجي مقنع مايشكك بي لان الاتصال صار اكباله ومحبوك زين

وبيوم من الايام جانن خوات سلطان يمنه وسناء اهنا هم تجي على مودهن

كعدتني ماما حبيبه ع الغده غسلت وغيرت ملابسي ونزلت جوه سلمت عليهن

ومنى كالت هاي صايره شكبرج ردت روحج مو مثل اول ماجبناج

اتجاهلتها لان مزاجي متعكر ونفسي صايره بخشمي

التفتت على ماما حبيبه وابتسمت شنو غدانه

حبيبه كل الي تحبي مطبك دجاج ومرك فاصوليا

كمشت بطني جوووواعنه عفيه

حبيبه اي خل يخلص سلطان صلاة وانصب

دخل علينه مهند فرحان وكال هاا ماكوو مبروك ولكم اتعينتتت

هلهلت ماما حبيبه وهي تكله الف الف مبروك حبيبي هنودي والله تستاهل كل الخيرر وباركله خواته وحنين

واني اجيت كتله مبروك مهند ربي يتمملك بخير

هز راسه ودار وجها

اجه سلطان كال شكو سمعت هلاهل منو عرس

حبيبه هههه هاي اني فرحانه بهنودي اتعيين

سلطان اي الف مبروك ياربي اراويك خيرها ويكافيك شرها وين وضفوك

مهند الله يبارك بيك ابو سيف مشكور بمدرسه اعداديه المن... للبنين

سلطان على خير انشاء الله يله صبو غده

رحت اني اساعد ماما حبيبه وحنين

وكملنه حضرنه كولشي واجت سناء تودي المواعين ع السفره

كعدنه نتغده وهما كلهم يسولفون ويضحكون اني ماالي خلق واحس راسي حينفجر تكول حامل بقنبله مو طفل هلكد ما متأذيه

منبين الحجي كال يمه خويه ابو سيف بما ان اني توضفت  والحمد لله فا قررت اتزوج واستقر

اني تلقائيا ابتسمت وباوعت ع حنين الي صار وجها احمرر وبسرعه نزلت راسها

الحجيه اي يايمه محله هل خبر

سلطان زين تسوي انت اشر واني اتكفل بكلشي

مهند دايم ابو سيف ماتقصر اني اريدك تخطبلي وحده نعرفها حق المعرفه بلا الغريبه وباوعلي بنص عين وكمل ماتدري الغريبه يجوز تغدر بيك ويجوز انشوفها شكل وتطلع شكل ثاني

وكفت العبره بصدري والله بريئه والله مو اني والله اني اتمنالكم الخير جان كلبي هيج يصرخ بداخله

سلطان على راحتك اهم شي خوش ابنيه وتناسبك

مهند اي خوش ابنيه وتناسبني اني اريدك تخطبلي حنين من حبيبه

سلطان رفع حاجبه وبعدين ابتسم

والكل اتعجبو حنين

وماما حبيبه عكدت حواجبها وهي مبتسمه

سلطان عاد هاي جانت بالي وتمنيتك صدك تختارها وباوع على حنين الي وجها ضل يكلب الوان من كد مايباوعون عليها

اني جنت فاتحه حلكي ومبتسمه بلا سبب

وعيوني تبعت حنين من كامت راحت الغرفتها

باوعت ع سلطان يباوعلي ضحك على شكلي والتفت على حبيبه وكال خير البر عاجله

ياخويه ياحبيبه اجيت اليوم متعني اطلب ايد كريمتكم حنين الاخوي مهند وانتم سمعتكم ماتنوصف بالذهب ونتشرف بيكم

ضحكت ماما حبيبه وكالت ابركها من ساعه ونتشرف بيك عميد سلطان ونتشرف بااستاذمهند واكيد اختي حنين ماراح تلكه انسان مثل مهند بس يضل القرار قرار اختي

سلطان على خير ردونه خبر

منى اكيد ماتلكه مثله هي حاصللها هل جمال وشاب   استاذ ومدرس كيمياء وعين الله عليه

حبيبه ليش هي عجوز اشو شابه وتخبل عين الله عليها

ملاك خويه خلي نقره الفاتحه ع الموافقه المبدئيه

قرينه الفاتحه وبعدها كمت اريد اشيل المواعين كعدتني سناء يااا خيه صدك جذب شلون انتي تكومين خليج مرتاحه انتي حامل وشالت المواعين كلهن وغسلتهن

اجت ماما حبيبه رادت اتصب جاي هم ماخلتها كلتلها روحي ارتاحي انتي تعبانه

ضلت ماما حبيبه فاتحه حلكها وباوعتلي مديت شفتي ورفعت امتوني بمعنه وين ادري

كعدنه وشوي وجابت

الجاي وكالت هاي اللستكان ام المرصعه والحلوه لجبير العأئله اتفضل ابو السلاطين

سلطان رحم الله والديج تسلمين واخذها

وضلت تفتر علينه واخد واحد تقدم النه الجاي

يتبع........