رواية حكمت محكمة الحب الفصل الخامس والثلاثون 35 - بقلم زينب العبيدي(زينبيه)

مراحب حبات القلب😍

على الي يسال عن مواعيد النشر ترى اني سبق وكلت النشر بين يوم ويوم عدا تاخرت عليكم بالعيد لان كنت بالزياره والوقت كلت من الساعه ١١ باليل فما فوق مامحصور بساعه معينه

حكمت_محكمه_الحب

#بقلم_الزينبيه

#البارت٢٧

طلعنه من البيت بخطوات اشبه بالركض اخذنه تكسي من راس الشارع جنت اريد اطلع الحجايه من حلكي واكوله يم صيدليه الهدى بس ماادري اشصارلي انشل حلكي والولد جزاه الله خير كال صعدي خويه وارتاحي  وبعدين كولي

صعدت وكتله يم الهدى صيدليه الهدى بمنطقه ال....

اوووف واندعي بكلبي تخلص الشغله بدون اي اضرار وانطي هل حيوان لفلوس ونرجع

رشا كامشه ايدي واني هم والطريق كله وحده تباوع للاخ وعيونه تسولف الخوف البينه والقلق

وصلنه للصيدليه ورشا عصرت ايدي حيل وكالت خل نرجع خايفه عليج وعلى روحي

نواره بعد ماطلعنه و وصلنه  دتحجين هل حجي

نزلنه شفنه سياره لونها ازرق حديثه واكفه شوي عن الصيدليه

حضرنه التليفونات

والتفتت على رشا هذا شيسوي بال٥٠ الف امبين عنده وشبعان من سيارته

-ما درييي ولج انطي لفلوس وخل يمسح كلشي ونروحححح

شفنا طلع من السياره وهو يضحك النذل واشر النه تعالن شلون يريد ايذلنه النذل حرام بي كلمه رجال هذا وصلت مسح  هواي عليه

ضل دمي يفور منه اني اخر ايام صارت حالتي النفسيه شرسه والله لو اكتل خلاص هم اعتيادي

تقدمنه يمه  وهو يكول لا لا نواره مو كلت ابحدج بس يله زياده الخير خيرين بس هاااا ديري بالج اتلعبين بذيلج والله اشاره مني كلشي ينشر هههههههه على فكره خوش اتهزين خصر هنيال سلطان عليج ههههه

عصرت ايد رشا حيل وضغطت على اسناني وحجيت امسسسح كلششي هسه وكبالي

-جبتي لفلوسس

-اي جبتهن يله خلصني ماعندي وكت الك يانذل

-وانتي رشا اشوفج ساكته حب

رشا حيوان خنيث لالا الحيوان اشرف منك تستغل بنات وتهدد بصور بس الله موجود يامرتضى واحنه يتامى ومالنه احد وانت استغلينتنه اكيد ماراح يتركك

-اهااا عاشووو خوش تحجين حبيبتي الكح...

رشا انجب اتفووووو عليك اني مو كح..  اني امنت بيك بواحد من اشباه الرجال وحبيتك وصدكتك وجذبت الكل من حذروني حسافه والله  احارب على مود واحد.........

وبعدها ما مكمله وشفناه ركض السيارته وبسرعه  وشغل وانطلق بسرعه والتفتنه ورانه بس ضربت باب السياره وراه سياره بيضه تبعتبه

بس لحظه لحظه هاي مو سياره س سلطان

ضربت على خدودي ورشا هم لطمت وجهه وكالت عزاااا عزاااا نواره

انشل طولي وانعكد اللساني ضليت كلي ارجف

اخذنه تكسي ورجعنه والطريق كله اعيوني اتصصصب مابطلت ورشا هم ياربي شسوي شلون اللهي الطف بيه اكيددد فهم غلط اكيددد وين اروح وشسوييي اي ماكو غير اكوله كل الحقيقه واني خفت من الفضيحه ورحتله

وصلنه نزلنه وكعت رشا بالكاع كومتها بسرعه ودخلنه نزعنه العبي وضميتهن بالكاونتر

ودخلت جوه يمهم  بس شنو وجهي مخطوف وايدي ترجف واني ادعي بكلبي كون يكمشه الهذا الحقير

اجتني ماما حبيبه وكالت شكو نواره شصاير

-م م ماصاير شي ل ليش

-مادري ادور عليج اختفيتي وسلطان نزل شايط سال عنج كال دوريها ومالكيتج طلع من البيت بسرعه

-عزااا يعني اكو واحد كايله ماما شلون دبريني عفيه اريد حل والله ماسويت شي اني احنه ضحية هذا النذل مرتضى

-لج فهميني شنو داتخربطين

-ماما هذا و احد ...................لحد ما شافنه سلطان وتبعه جنت احجي واني ابجي جنه بالحديقه على صفحه

-لطمت وجهه لج عززززا نواره هاي مصيبه شلون سويتي هيج وماكلتيلي ولج شهل غباء

-ماما والله

-اششششش لايطلع صوتج انتي غبيه وثوله وماتفتهمين لج اني مووو امج ليششش ما اجيتيني وكلتييي

-ماما والله والله هو هددني تنشر مقاطع الفيديو اذا واحد دره و وكال حتى لو هو صار عليه ششي هم ينشششر واللله (جنت احجي واشهك)

-لج غبيييه والله غبيييه زوجج عميددد وكامش سلاسل ارهابيه مو واحد وثنين تتصورين ماراح يكدر يكمششش واحد زعطوط بدون اي اضرار

بس لا حيييل بيج بالزايد لان انتي صدك طفله وطايشه وتسمعين العقلج وبس وجنت غلطانه من زوجتج السلطان

وعافتني كمشتها من ايدها ماما فدوه ماعندي احد غيرج واني كلش خايفه ماجنت متصوره حيصير هيج والله كلت انطي افلوس ويسكت

-لج ماما مشكلتج غبيه وعلى نياتج وتصدكين كلشي ولج ضنج اذا انطيتي افلوس راح يعوفج اذا ما سوالج شي ولمسج فاراح يستغلج وكليوم افلوس

-ضليت ابجي بالزايد والقران ماجنت امفكره هيججج والله كلت احلها بلا فضيحه رشا وبلا ما تنشر صوري واروح بالرجلين

شبكتني ماما حبيبه وتحسرت معليج اني اتص...

وبعده مامكمله شفتها دفعتني داخل المطبخ وهي تكلي ختلي

دخلت ختلت بالمطبخ تحت انضار كل من منار وملاك وسناء واني ائشر الهن اشششش ودموعي تصب سكته

اسمع سلطان يكول الماما حبيبه ويييينها

-لحظه افهم مني بالاول سلطان

-اششششش كتلج وينهاااا

-مو اني اني السبب ترى

-لك خرب لاتخليني اطلع من طوررري واهجم البيت عليكم اكواوي.... كليلي وينها وبلا فضايح

-شفت رشا دخلت للمطبخ وباوعت علي وطلعت بره

واسمعها تكوله عمووو والله اني اني السبب اسمع مني

-لا واضح حبيبه تكول هي السبب وانتي تكولين اني السبب هااااي ايسمووونها تستر والي يتسترررر على الجريمه حسابه كا فاااااعلهااااا

-عموو بس بس خل افهمك

-اششششششش دخليها حبيبه لا اكلب عاليها واطيها وييينها

-زين اهده شوي واني هسه اصيحه الك روح فوك للغرفه وبلا فضايح

-اني صاعد اذا تاخرتي انزل احرك البيت والي بي والللله

دخل من المطبخ ومجرد ماشفته ضليت ابجي وايدي ع حلكي هو ما شافني لان اني وره الباب الي دخل منه

والحقيره النذله سناء طيحت صينيه الكلاصات حتى يلتفت وره ويشوفني

وجان هستوه يريد يطلع من الباب الي يدخل للصاله

والتفتت اوووف وياريته ماالتفت اول نضراته اجت بالكاع بس  بسرعه رفع اعيونه وشافني وايدي على حلكي واناشغ

اتقدم وكمشني من ايدي بدون مايحجي اي كلمه بس اوردت ايده وركبته تريد تنفجر وتحجي كل معاني العصبيه

ركضت وراي ماما حبيبه وقبل لاتصعد الدرج ورانه دفعه وكال بصوت مبحوح والله اذا صعدتي اذبحه والله

وصعد بخطوات سريعه وايدي باايده ويسحلني وراه سحل

دفعني للغرفه وصرخ بيه صوت حسيت حتى الحايط رجف منه واني انخارت كل قواي وطحت بالكاع

ووووووولجججججججج ساااااااقطه كح..... منوووو الوياج كوا.......ج   لو حبيبج   اتقابلينه  وانتتتتتي على حبايييه ونص

انعكد اللساني ارريد احجي كلمه اي كلمه ضاع الحجي مني ودموعي بس تحجي واناشغ بصوت عالي

كمشني من دلعت البدله وكومني بحيث انرفعت رجلي عن الكاع وهو يهز بيه اححححججججييييي اسسسسمعجججج ودفعني ع الحايط  ولججج وانييي انيييي الغبي الارعن ما حاط ابالي بيوم هل طفله يمكن تخووووني

واكووول ماتطيقينييي ماتحببيني وتعكدين حواجبج مني وتلعب نفسج من اتقرب منج

ما اكدر احجي غير نشغات قويه ومتواصله ودموع اتصب

وهو يصيييح ماعندج رد هااااا شترررردين وانتييي متواعده وي هل نكسسسس جااان خفتي ربج حامل يااالجلبه

وضل يشكك بالبدله مالتي ويصيح نزعيييها خرااا تبنننن جايبلج بدله حتى تتواعدين بيهااا اثول ما دريت بيج ساقطه وكح....

وضل يضرب بيه حيل وبكل مكان عدا بطني لان جنت ضامتها بثنين ادي وكلساع يصرخ احجججججي بس مايطلع صوتي لابد صايره بيكم لمن واحد نشغاته اتصير قويه وميكدر يحجي اي شششي

وفجأه وكف وكمش الحايط باايده وايده الثانيه على عيونه ودنك وضل يلهث حيل وايده صب دم بشنو انجرح ما ادري

هذا اخر منضر شفته لان بعدها غمضت عيوني من كد الضرب والوجع حلكي ايصب دم وخشمي وجسمي كله يوجعني كله بدون استثناء

وماصحيت اله وماما حبيبه وملاك يغسللي بمي بارد ودموع ماما حبيبه اتصب وراسي بحضنها

وشهكت بس شافتني فتحت عيوني شبكتني وهي تكول يمه بنيتي

سندتني وكعدتني بالكوه شفت الكل متجمهر يم باب غرفتي اقصد بالكل خوات سلطان وسناء وحنين وحتى نوال

كمت بالكوه اسحل برجلي سحل وبحاله هستيريه طبكت الباب حيل وضليت ابجي وابجي واني اصيييح اكرررها مااا اريده خل يطلكككنيييي وضليت اغلط عليه من الاوعي وبالكوه كمشتني ماما حبيبه وسدت حلكي

وملاك شمرت بوجهي مي بارد حتى اسكت واهداء من حالت الهستيريه نشغت وبعدها ضليت ابجي

وماما حبيبه تكلي ليش ماشرحتيله ليش سكتي مثل المذنب

صرخت حيلل ماكدددرتتتتت اااخاااااف خفففت منه مجججججرم حقييييرررر اكرهااا

حبيبه بس بس ماما اهدي شبيج يله خل ناخذج للمستشفى نطمن على الطفل

-لاااا ماااا اررروح الاي مكااااان وياااريت ايموت ويموتني ويااااه   ولكم اشنو  شفتتت من حياتيييي من صغري ولليوم احجووولي شنووو شفت غير الاهانات والضرب ولكم رحمو حالي احد يفهههمنيييي محتاجه حنان مامحتاجه اتكفخ اريد واحد يسايسني ويعلمني مو تكولون طفله عللللمووونيييي كسبو بيه اجررر اني يتيمه ماشفت شييي اسمه حنيه

حبيبه  لججج ماما طول عمري اعلمج وحتى هو كلج شنو يصير تعاااي واحجي وكولي احنه اهلج ونوكفلج مانتركج

يعني شتردينه ايسوي ايشوف زوجته وام ابنه وحب اخر اسنينه وي واحد واكفه ومتواعده من وراه وكاشخه على الاخييرر ويجي يسألج تسكتين ماتحجين شي شتردين يسوي يمسح على راسج ويبوسج لا حبيبتي غلطانه من غيرته وحبه وحركه كلبه سوه هيج كل ضنه انتي تحبين غيره وتتواعدين من وراه

-طلعووو عوووفونيي اريد انام وياريت ما اكعددد اني شذنبي اذا هي المصايب تجيني واني كاعده هنااا وسسن ومهند وحنين بكوم وسلطان ومرتضى ورشا كوم ثاني شاسوي وضليت ابجي بحركه

شبكتني ماما حبيبه وحطت راسي على صدرها لحد مانمت

كعدت باليل احس جسمي كله يوجعني وتعبانه حيل كمت بالكوه واني اسند نفسي بلحايط وكفت اتباوع الروحي بالمرايه حلكي ازرك وخدودي بيهن اثر اصابع ضليت اتفحص بكل جسمي واني اشوف الكدمات تارستني ترس وي كل ضربه اشوفها احقد عليه واكرها ضليت ابجي مثل الجهال  ابنفسي احضنه وابجي واشكيله  على نفسه  واريده ياخذ حقي من روحه  اريده وكارهتا بنفس الوكت

طلعت اغسل وجهي لان عيوني تحركني من كد البجي  دخلت للحمام غسلت  وبالكوه امشي وبطني تغني من الجوع بس ما اشتهي اكل اي شي  سمعت صوت صياح سلطان بغرفة ماما حبيبه واني دا ادخل الغرفتي وكفت ابمكاني واني اسمعه يصيح

كاااااافي حبيبه كتلج ما اريدها بعد كرهتها لاطمطميلها وتطلعيلها اعذار

ماما حبيبه تكله

-هاي مو اعذار والله هاي الحقيقه اسمع مني اني مدا اجذب عليك

- اشششش كافي ولا كلمه كلشي واضح ولج حتى مابررتلي فعلها  ما اريدها كرهتها  حدي وياها للولاده واطلكها

جان يحج يحجي ويصرخ اشتعل كلبي بنار من سمعته يكول راح اطلكها واكرها  رحت الغرفة ماما حبيبه دكيت الباب حيل  واني اصيح

ساعة المنى استاذ سلطان ياريت اطلكني هسه وارتاح منك وافتك من هاي العيشه

وشفت الباب انفتح  بسرعه  وماما حبيبه تسحب بأيده بالكوه وهي تكله

فدوه سلطان اهداء شويه فدوه

سحب ايده حيل وطيح ماما حبيبه بالكاع وكمشني من فجي حيل حسيته يريد ينكسر بيده  وفاتح عيونه على كبرهن واوردته طالعه ليبره تريد تنفجر حجه وهو صاك على سنونه ومقرب وجه  بوجهي

تردين اطلكج حتى تروحيله يا كح..... مو  واطلكج شنو يعني ساقطه وحثاله انتي مايشرفني اربط هيج نماذج بأسمي ياتبن  ودفعني   

وقبل لا اروح صرخ علي

وهاااا بالج على بالج تراويني وجهج بهلفتره والله ثم والله كلما اشوفج اكتلج حبسي روحج بهل ٦ اشهر أئمنلج واحسنلي

ودخل للغرفه اني رجعت الغرفتي وضليت ابجي واصرخ اكرهه ما احبه

وللصبح اله نمت كعدتني ماما حبيبه الضهر وجايبتلي غده

وكومتني بالكوه غسلتلي و وكلتني اكلت بشراها ميته جوع احس بطني فارغه

حبيبه سوده بوجهي يا امي  اصبلج بعد

-لا ماما

-زين بعدين اخذج للدكتوره نطمن على الطفل وعليج

-هزيت راسي بمعنى اي وكلتلها ماما صدك سلطان ح يطلكني وميريدني بعد

-باستني على راسي وكالت الله لايجيب الطلاك ابينكم وانتم ابينكم اطفال بس هو مفتهم غلط وكل ضنه اني ورشا دانغطي عليج استنتج هل شي من كل وحده ذبت الوم على نفسها علمود ننقذج اتصور هو انتي غلطانه والي شفتي وقابلتي عندج وياه شي لذلك حجه هيج

-زين شسوي وشلون افهمه واخلي يصدك

-نواره حبيبتي سلطان يحبج لا ايعشقج وشفت هل شي بعيونه وبحركه كلبه امس والليل كله مانايم وحسيته يتمنى يجذب اعيونه وكل الي شافه وراد اي كلمه تطلع منج تنفي الي شافه بس هو اتصور سكوتج اثبات على الجريمه فا برأيي لو تحجين وياه مو اليوم بعد كذا يوم حتى بلكي يبرد شوي وتهدء عصبيته وحتى لو ما سمع منج حاولي بكل الطرق خلي يسمعج

-ماما اني اخاف منه اخاف يضربني مثل امس

شبكتني وضمتني الصدرها انشالله مايضربج ويسمع منج وانشالله ايبين كلشي وينفضح هذا الحقير ويلكفه سلطان

-صدك ماما هو مو تبعه ماكمشه

-لا ماكمشه دخل بين الافرع وتيه بالازدحامات

-زين خلي انطي رقمه وخلي يوصله من الرقم

-اي خطيه حاولت رشا تنطي الرقم  بس هو ماسمع منها ولاانطاها مجال تحجيله بسبب عصبيته

-راح احاول اني احاجي بس خلي يهدء شوي

وللعصر اخذتني ماما حبيبه للدكتوره وسوتلي سونار وكالت الطفل وضعه طبيعي وعمره شهرين وكتبتلي مقويات وفيتامينات

ومرت ٤ ايام على الي صار وابد ماشفت سلطان غير من بعيد وبس واسمع صوته افرح من يدخل للبيت بس هو محذرني ومحذر ماما حبيبه ما اتواجد يمه اكيد يكرهني هسه ومايحب يشوفني

جنت اشوف حنين ومهند وشلون عايشين وهما واحد يموت ع الاخ وشلون يدلعها ويدللها كدام الكل حلوه جرائته وروح الشباب البي  وهي احسها طايره من الفرح حقها اكو وحده تسمع كل هذا الغزل والحجي الحلو وماتفرح هو حتى مايصيحها بااسمها كله يوكل الها حبي وحبيبتي واكثر شي يسميها دنياي حقها وهنيالها والله يسعدها

وهذاك اليوم الساعه ب١٠ باليل جان سلطان ماموجود يم اصدقائه وجنت اني كاعده جوه يم الحجيه وماما حبيبه  طبعا محد يعرف على شنو ضربني سلطان عدا ماما حبيبه ومن يسألوها تكول ما اعرف لانواره تحجي ولاسلطان

دخلو علينه مهند وحنين جانوطالعين يتعشون بره

سلمو علينه وكعدو واني باوع الحنين بيدها ورده ومهند كامش ايدها وابد ماعافها ويسولفون وي حبيبه وين طلعو وشنو اشترو

ومهند يكول الماما حبيبه شفتي شلون لطشت اله تشتري ورده كلتلها يمعوده والله انتي احلى من الورده ومايصير ورده تشيل ورده بس ابد اله خسرتني خمس الاف اله ارتاحت

حبيبه ياا طلعت خايف ع الخمس الاف

مهند اي والله حرامات اقصد لالا شنو خمس الاف غير لورادت اسنين من عمري انطيها وبدون تفكير

حنين لا حجي ايفيدك زعلت هاك الورده

مهند خرب اتزعلين غير اتخبل وباسها بخدها

ضربته هي وكالتله يااا عيب

الحجيه ولك مهيند صاير كلش خفيف وسرسري

مهند ههههههه حجيه غير مرتي وحلالي شمسوي قابل حتى سرسري زين مكلتي سكير

الحجيه واذا مرتك هذا اخيك ضله ٢٠ سنه متزوج ماصار خفيف مثلك وحتى من خذه هاي الطفله هم ما استخف بس انت سرسري هي كوه

مهند اخوي شفهمه بالحبجيات والرومانسيات انطي يكفخ ويزورك ويعيط

اني وصلت الدمعه بطرف عيني وضليت ارمش بسرعه حتى لا تطيح وادور بوجهي بكل مكان واعصر باصابعي

كمت وكفت كلتلهم عن اذنكم وي حجايتي طاحت دمعتي

حبيبه خزرت مهند

وهو كال ا ا نواره هاي شبيج تعاي موكاعدين وجاي انسولف شعندج ابحدج خاف ضجتي مني لان حجيت على سلطان ترى جاي اشاقه تعاي يمعوده كعدي

فرحت لان مهند حجه وياي بعد ماجان زعلان علي كلش فرحت لان مهند يهمني هوايي وزادت دموعي جانت تنزل من وحدهن بدون ان ابدي اي ردت فعل

ابتسم بوجهي وكال كعدي

ابتسمتله اني هم وباوعت ع حنين خزرتني ودارت وجها

كتله لا اريد ارتاح شوي ضهري دايوجعني

بهل اثناء دخل سلطان وهو يمسح قميصه مدنك وكال السلام عليكم ورفع وجهه واجت عيني بعينه

رفعت ايدي امسح ادموعي  خزرني عرفته مايريد يشوفني بسرعه رحت خفت ليفشلني كدامهم ويصيح علي

اتقدم باس راس الحجيه وضل جوه

اني صعدت فوك وبالي احجي وياه وافهمه الي صار
مثل ماكالت ماما حبيبه لازم يسمع مني

سمعت صوت دايصعد الدرجع ويحجي وي ماما حبيبه يكول الها حضري جنطتي باجر اني خفر وعينج على هاي

صعد ماباوع بوجهي دخل الغرفه ماما حبيبه

واني كمشت ايد ماما حبيبه وكلتلها ماما اريد احجي وياه بس خايفه

حبيبه يله دخلي احجي وياه ولاتخافين ماطول انتي ماغلطانه احجيله كلشي وهو اكيد راح يصدكج لان سلطان يحبج ودايتعذب لان بعيد عنج

-مستحيل هو يحبني بعد الي صار احسه صار يكرهني ومايطيق شوفتي

-لاتلوميننه هو كل ضنه انتي ماتحبينه وبعتيي علمود واحد  بعمرج ودايحس بالسذاجه لان  تزوج وحده اصغر من يمه وبكد بنتيه لان ابنيه اصغر من يمه ب٢٣ سنه اكيد يجي يوم وتغير رايها بي وتندم على زواجها وراح تدور على ابن جيلها صدكيني سلطان حافضته واعرف كل تفكيره هيج دايفكر

بس مستحيل ايكرهج لج كليوم اراقبه اليل كله ماينام وبس يحرك جكاير ويومه يكضي بالصفنات

روحي احجي وياه والله يحنن كلبه عليج

دخلت للغرفه بعد ما ماما حبيبه شجعتني وجان دا يخابر كاعد على طرف الجربايه بحيث ضهره للباب

وكام وكف وهو يحجي ويفتح بدكم القميص ونزعه وهو دايخابر ومد ايده ينطيني القميص كل ضنه اني ماما حبيبه بس لمن التفت وشافني عكدحواجبه وسحب القميص الي جنت هستوني كامشته

ودار وجها ويحجي

واني واكفه وراه وادعي الله كون يتفهم مني

سد التليفون وبسرعه التفت علي انتتتي شدخلج اهناا بيا عين طلعييي لا اسحلج من  شعرررج

-لحظه بس احجي وياك فدوه اسمعنييي

-تقدم علي وكمش زندي حيل وسحبني للباب

كتله اتركني اني ح اطلع وسحبت ايدي حيل رحت للباب قفلته بالمفتاح وحطيت المفتاح بصدري

رفع حاجبه وكال الضاهر انتي جلدج ايحكج طلعي ارحملج ترى روحي واصله الخشمييي

-حرررام عليك سلطااان انت لاسمعت مني ولا من اي واحدد وفوك هذا ضربتني ضرب مال اجرام كله بسبب الي رسمه عقلك الك وتفكيرك الغلططط بيه

اتقدمت صرت اكباله ورفعت راسي اله وعيني بعيونه سلطان اني عمري ماسويتها والله قبل لا اتزوج لمن جنت بلا اهل لمن جنت نكره ولمن جنت باامس الحاجه للحنان للكلمه الحلوه ولمن جنت بلا رقيب ولا حسيب ماسويت هل شي وماتواعدت وي احد ولا جنت اعرف هاي السوالف ولا احبها ولا اتقرب منها تريدني هسه لمن لكيت دنيتي وكل اهلي لمن لكيت الرجال الي  حبني وقدملي الامان وفتحلي بيته وربط اسمي باسمه وتطوع ايصير ابوي قبل زوجي  وسندي والله سلطان ماعندي شي بس اسمع مني القصه كامله وانت احكم

دار وجها سحب الجكاير وشغل جكاره وحجه لاتبرريلي شي كلشي واضح واله شعندج هااا اطلعين من البيت بدون علم اي واحد حتى حبيبه ماتدري يعني البنيه المو جريئه ماراح تسويها الاي سبب من الاسباب

-اني قابلته خوف من الفضيحه هذا حبيب رشااا والله ياسلطان هواي حذرتها تتركه لحد ماغدر بيها وما اعرف يا حقير وابن حرام اموصله صورنه وهددها وكلها لازم نتقابل

فا ا ا اني كلتلها خل اهددها بسلطان واكله هو عميد وراح يكمشك واحنه ما نخاف منك ماعرفت هو بهل خسه والنذاله و واحد من اشباه الرجال كال راح ينشر صوري حتى اني

-شنووووو صورج عد هذاااا ابن الزنه

-هو مو اي اي صور بس والله احنه كصين بال بالحفله والله ي يعني مادري شلون اجن عنده  ومنو رسلهن بس بس والله مو رشا لو هي جان كالتي صديقتي واعرفها

-ولحللللل ست نواره طلعن صورج عد رجال غررريب شبعععع بيج شوووف ومادري يا ساعه الكه صورج تااارسه الفيسسس

استغفر الله

-والله مو اني ولا الي علاقه والله بوكتها تفاجأه وضليت ابجي

-وليشششش ماتسسممتي وحجيتيلي جان تصرررفت لو انتي كله اعناااد وكله الي براسج اتسسوينه ولا همج احد

-والله والله ردت اكلك بس هو كال حتى لو اني انكمشت او صار علي شي اكو غيري ينشرهن كال اريد افلوس ٥٠ الف وانطيج الصور بشرط مايدري اي بششر لان ح ينشرهن اذا عرفتوو

وضليت ابجي شتريدي اسسسوي هااا خفت على سمعتي وسمعتك كلت اذا الشغله تخلص بخمسسين ومحد راح يعررف اهون علي من انشهررر واطلك

-لججج انتي غبيه انتي حييوانه وتبن اني شنووو اني عميد بالشرطه ضلي فووك ١٥ سنه مرو علييي اشكال الوان مجرمين سفاكين مغتصبين نصابين حرامييه لج هذذا مايشتغل وهو يضرب على راسسي

ولج هذا ذبانه اطنطن جنت راح اكضه حتى بدون ما اتعب واني كاعد بمكاني وماااجان صار الي صااار وماطلعتي من البيت وما انكتلتي ومااا تشوهت صورتج يمي بسسسس شسسوي للغباء البيج

-والله ما قصدي بس جنت خايفه ومافكرت عدل

-ااااخ يارربي هو انتي يايوم امفكره يايوم مششتغل هذا لمجيم جم مره كايلج تعااااي كليلي تعاااي يابه  احجيلييي اني اكبر منج راح اعرف اتصرف

-والله اخر مره الله عليك هل مره عديها اخر مره اضم عنك ششي

-وشتفيدني الاخر مره وصورج مادري وين ما ويين

-زين اني عندي رقمه لان رشا انطتني اياه

-الله اكبر على راسسج  هو هلكد غبي يفتح الشريحه جيبي باله هذا اذا ماحاركها

-اي هسه اجيبه ورحت افتح بالباب ماينفتح واسحب واسحب

-حجه بعصبيه وضحكه احتررررك العرفني بيجج

-التفتت عليه وتذكرت هااا وضحكت ومديت ايدي ادور ادور ماكووو ضليت انكت بدشادشتي ياااا وييينه والله حطيته هنااا مو انت موجوود مو حطيته هنااا

-ضرب كصته وكال نزززعي بعد نزعييي بنت اليهوود بنت الزنادقه وين هيمتي المفتاح يحجي وهو يباوع ع الكاع ويدور

-وين ادرري ح يوكع والله يمكن هذا الي لابسته جبير مايكمشش

-طلعيييي من يمي راح تجلطييني والله محطمه الرقم القياسي بالغباء والفهاوه ودنك شمر علي المفتاح

-وفتح الباب وقبل لا اطلع شفته داير وجها وبس اكتافاته تهتز عرفته خربان ضحك

رجعت كتله هاا نسيت نقالي ما هو ومادري وين

-ليش هو الرقم بنقالج

-لعد وين

-حسبالي حافضته بورقه او شي لان تليفونج كسرته وبعد ماكو تليفون

-دنكت وجهي كتله ما اريد اذا هلشي يرضيك

-هاج اتصلي على صخامج صديقتج لو هم ما حافضه رقمها

-كمشت التليفون من عنده كتله لا اعرفه سهل وسجلته واتصلت

وهذيج العوبه تخاف تجاوب حسبالها سلطان

كتله ماترد اتقرب من يمي كمش النقال وكتبلها اني نواره ردي

اني شبكته وحوطت ايدي عليه وكتله اذيتي هوواي

وخفت لاتعوفني وانت صرت كل حياتي

-سمعته يتنهد وبعدني من يمه وكال بعدني ضايج منج وراح اضل ضايج اله اذا غيرتي طريقه تفكيرج وغبائج المفرط بعدني وحط التليفون ع ذاني

-ا الو اكلج رشا اريد رقم هذا الحيوان مرتضى وكل الي تعرفينه عنه

-هسه ارسله الج

وشوي ورسلتلي رقمه

سحب التليفون من ايدي

وكتله اكلك شفت ابنيه داتعلقلك بالفيس دايطلع فوك وكاتبه منور العميد ومره ثانيه مادري شنو كتبت

باوعلي بنص عين ورجع دنك على تليفون

وشوي واتصل على واحد كلاله هذا رقم راح ارسله الك حاليا هو مغلق اريدك تعرفلي صاحب الرقم وبيته وين او شغله اذا تكدر وها اسمه مرتضى احمد خضير

بس ها بدون مايحس عليكم  .... حبيبي تسلم ....باجر اي ....حبيبي ماتقصر....دايم دايم الله وياك

وسد التليفون

-اشو هواي كتله حبيبي

-طلعي بره تبن الغبيه الرعنه ماتصيرلج جاره بس البلاوي والمصايب شمستفاد منج

طلعت واني ضايجه وادردم مخبل بس يغلط مكروه عابت وضليت اعييب عليه ودخلت الغرفتي والله بعد ما احجي وياك ح ابيع ثكل واخليك تجي تعتذر مني اررراويك يابن فضيله

لاهاي شلج بيها نواره هو مايعتذر بس لالا ميخالف شنو يغلط علي ويضربني ويهيني

وفوكاها شبكته وهو حاط عطر وبالكوه متحمله ماراضي الاستاذ ويكول غبيه

شايف روحه شوي ذكي عنده الناس كله كلها اغبياء شايف روحه شوفه ابن فضيله

هذا الحجي كله وماما حبيبه سكرانه من الضحك وايديها على حلكها لان دخلت وراي عساس تسالني بس اني مكابله المرايه واخرط بالحجي

ومن شفتها متت من الضحك

مر يوم كامل وعلى اساس سلطان خفر اشو وكت الضهر وجنه دانتغده ودخل علينه وجها مايكصه السيف وصاير احمر من العصبيه

يتبع.....