رواية حكمت محكمة الحب الفصل الرابع والأربعون 44 - بقلم زينب العبيدي(زينبيه)

شلونكم حبات القلب

وهذا نص الثاني

وكولو الزينبيه ماتنطينه هدايه

١٥٨١كلمه قراءه ممتعه

#حكمة_محكمت_الحب

بقلم #الزينبيه

البارت #٣٣

وماكو غضون نص ساعه اجه سلطان وياه السيد

اني انقبض كلبي اي اني تعبت صحيح وما اريد اكمل هيج بس ليش وجع كلبي ليش دموع عيني تنزل ليش عيوني ماشلتها منه وكانما اريد اشبع شوف منه اريد املي عيوني بشوفته ليش صرت ادقق بتفاصيله واسترجع الماضي الحلو القليل الي عشته

بس صحاني من سكرت ندمي صوت ماما حبيبه وهي تكلي لا نواره لايرفلج جفن ولاتطيحلج دمعه انسي الصار وكنما ماكان ولاصار ولامريتي بي

عندج رقيه عيشي الاجلها وكبري وكبريها وتزوجي الي تشوفينه يناسبج ماراح اتركج

صدكيني حبيبتي اني ندمانه ومالي عين اعتذر منج لان الي صار بيج من ايدي انتي ماناقصج ضيم حتى تضوكين الي ضكتي

بس وغلات رقيه جنت اريدلج الخير وما اريد اضرج وردتلج عائله تحتويج بس مع الاسف ما تحقق الي اريده

جنت ساكته بالعه الغصه وماحجيت شي

شفت الحجيه تبجي على الحال الي وصناله وعلى حال ابنها

وسناء الفرحه ماشايلتها

وحنين شايله رقيه تبوس بيها وهم تبجي

باوعت بوجوهم واحد واحد ورجعت اعيوني اله وبمعانيه البارده الخاليه من المشاعر كال يله كومي لبسي حجابج وعبايتج السيد بالصاله

كمت واني خطواتي ثكيله

وتم الطلاك بسرعه اسرع من رمشات العين وبالحظه صرت محرمه عليه بلحظه انتها كلشي بالحظه اتحررت

التفتت عليه وكتله الله يشافيك ويرجعك العقلك ويسعدك بحياتك وي رجعك الماما حبيبه هواي انضلمت والله يقدرك وتعاقب سناء على فعلها

خزرني وكال روحي منين ما اجيتي ولاكلمه زايده

دخلت لكيت ماما حبيبه داتلم ملابسي وملابس رقيه

وكالت يله ماما خلي اخذج للميتم

-لاماما اريد اروح البيت بابا الله يرحمه اريد اضل الوحدي واعتزل من الناس

-بس حبيبتي شلون راح تضلين الوحدج ماتخافين هناك ومنو حيضل يمج

-لا ما اخاف صار كلبي حجر ادربت جو ايدين اكبر مجرم بالعراق هههه ضحكت واني ابجي

-شبكتني وكالت لاتخافين اني وياج وماراح اتركج ومحد مستاهل دمعه من عينج حبيبتي ورقيه محتاجتلج وراح نربيها اني وانتي ومانخليها بحاجه اب

هزيت راسي وبدلت ملابسي وطلعت من البيت واني اتمنه التفت واشوفه يباوع علي اتمنيت ايصيححني ويصحه شوي من سكرت السحر بس ابد اصلا صعد الغرفته ونام مرتاح واني انكسر ضهري بطفله والوحدي

بس لا الله موجود وماراح يتركني

رحت البيت بابا وصلتني ماما حبيبه هو هذا البيت هم اتمرمرت بي وهم ضكت ويل بي بس ماعندي مكان ثاني غيره

جان كله اتراب واضلم

كعدنه انضف بي ونرتبه

وكملناه للمغرب شمرت نفسي من التعب على القنفه بالصاله وماما حبيبه يمي

وضلت ادموعي اتطيح وصافنه بالسكف

كامت ماما حبيبه باستني وكالت شوي واجي وراحت

بس طلعت ضليت اصرخ وابجي بشكل هستيري واصيح لييشششش ليششش هيج يصير وياي

شحلاتني لو هسه كاعده يم امي وابوي ابيت ايلمنه وكله حب ومحنه واني اداوم وارجع الكه ماما مسويتلي غده والكه بابا جايبلي هدية نجاحي

واطلع وياهم للالعاب واغير جو واكبر واتخرج وارفع راسهم بيه

بسسسس هاي كلها لو كلها ياريت كلها تمني لا اكثرررر

استغفر الله ربي مو قصدي اعترض على حكمك لك الحمد ولك الشكر

هديت شوي ولمن سمعت ضحكات رقيه وحسبالها احجي وياها

شبكتها وبستها وكلتله انتي هم مشتاقه البابا لو بس اني

ونزلن ادموعي المايبطلن

واشوي واجت ماما حبيبه وجايبه مسواك هوايه للبيت ومخلتني اكوم رتبتهن بالمطبخ  واجت يمي

وكالت راح اضل يمج ماينطيني كلبي تضلين الوحدج

-لاماما اخاف اتسببلج بمشاكل انتي بغنه عنها وتعرفين سناء حيه وراح تفر راس سلطان بحجايتين وراح ياذيج

-بس اني مامرتاحه الكعدتج هنا وكلبي ماينطيني اعوفج زين خلي اتصل على مهند يجي يبات اهنا

-ستري علي ماما الناس شراح تكول منو هذا وبصفته شنو يبات يمي وباليل خصوصا هسه اني وحده مطلكه والحجايه تلزك بيه بالكوه

-لعد شلون

-عادي اضل اهنا اقفل البيبان علي والتليفون موجود اي شي يصير اتصل عليج وتعاي انتي ومهند

-والله ما ادري يايمه هسه لورايحه للميتم اقلها هناك امن الج

-ماما لاتخافين ولاتشيلين هم راح اقفل البيبان هسه

-زين ديري بالج على نفسج وعلى حبيبت كلبي رقوشه واني راح اتصل عليج كلساع اطمن عليج خوش

-خوش مشكوره يا اروع انسانه

-على شنو تشكريني لج ماما فهمي اني امج واروحلج فدوه اهم شي انتي سالمه

بسرعه شبكتها وضليت ابجي وهي باستني وكالت لاتبجين ماكو شي يستاهل ادموعج حبيبتي

وانطتني افلوس وكالت خلي هاي يمج واني باجر ورا الدوام امرج

وراحت واني قفلت البيبان

وكعدت استلمني صفناتي ودمعاتي وحسراتي

ورقوشه كبالي تلعب وتصرخ الوحدها واثار ايدين ابوها مطبوعه بجسمها الترف

وحسيت بجوع بس مالي نفس اكل شي كمت سويتلي كوب حليب واكلت وياه بسكت وجانت الساعه ب ٩

واندك الباب بهل اثناء بسرعه حطيت ايدي على كلبي ونزل ادموعي يماا منو اجاني والناس ماتعرف اكو احد بالبيت

من خوفي اخذت سجينه من المطبخ وحطيتها ورا ضهري ورحت للباب

صحت منوو

-هاي انتي نواره

-اي انت منو

-اني خالج حبيبتي

هففف يمه كلبي اخذت نفس وفتحت الباب ها خالو تفضل

دخل وكال ها نواره اشو اهنا شعندج

-اتحسرت سالفه طويله خالو على العموم اتفضل هلا بيك

-لابابا ماجاي اتفضل بس واني رايح البيتنه شفت الاضويه معلوكه استغربت حسبالي رحمه رجعت

-لاخالو اني منا ورايح راح اكعد ابيت بابا الله يرحمه

-يعني زوجج وياج

-لا ....اني اتطلكت حجيتها واني مدنكه

-لااه  شنو شلون اطلكتي انتي مو صار عندج ابنيه مو عايشه مرتاحه شلون صار هيج

سولفتله الي صار كله وهو حيل اتاثر وضل يغلط على سلطان

كتله خالو ميفيد الغلط عوفه الرجال راح الحال سبيله واني هم

-بس شلون ياخالو زين انتي شلون راح تكعدين ابحدج هاا ومنو الج مايصير لارجال ولا شي وانتي صغيره والدنيه تخوف

-ماعلي شي خالو واني مو اول ولا اخر  وحده تتطلك

-اووف زين زوجج ماخذيتو السيد الشيخ مازورتو اهل البيت

-ماخلينه مكان مارحناله ولا مرقد مازرنا وتنخينه بي بس هو مانكدر ناخذه هناك مانكدر انجبره وخصوصا هو صار مثل الوحش

-زين امشي وياي بابا الدنيه تخوف

-لاخالو اشكرك مااتحرك من مكاني

-زين بس اليوم بابا اقلها نفهم منج امشي بابا امشي

-لاخا...

-قاطعني لا بابا ولا كلمه امشي يله اتانيج اهنا روحي لبسي

-بس خالو اني ما ار...

-يله بابا هاي شبيج وشال بنتي وباسها واخذها وطلع

وكال اتانيج

-اتصلت على ماما حبيبه وكلتلها وهي كيفت كالت اي خوش تسوين لان بالي وياج

لبست واخذت قطعتين ملابس الرقيه وحليبها ومميتها وحطيتهم بجنطه وطلعت

صعدت وي خالو بالسياره بيتهم قريب فرق شكم شارع

و وصلنه البيتهم نزلنه واول مادخلنه اتلكتي مرة خالو بالسلام والهلا والمرحبه وباوستني

وهي تكول شعجب نواره تزورنه

ابو احسان عوفيها خل تدخل كليتي البنيه اكل

ابتسمت اني ودخلت  اجت زوجة احسان وزوجة حسن سلمن علي واخوهم الصغير توفيق عازل ومتزوج وفاروق بعده مامتزوج

وزوجة احسان كالت واخيرا شفت نواره عمي حقه فاروق ذابح روحه عليها تجنن

وصبولي عشه ونخبصو بيه كلهم

وشوي ونزل احسان  وهو يكول اهااا بنت عمتي نويره الفص اهنا كرصني من خدودي وهو يكول خرب حضج ولج اخر مره شفتج بطول زري صايره مره وعندج طفله

وكعد اكبالي ياكل وياي واني بس اضحك عليه

وهو يحجي واللكمه بحلكه اكلي اكلي لاتستحين ابنيتي اكلي

عاد زوجته كلتله ايي غير تنطيها فرصه تاكل اذا انت هجمت على الاكل جنك مامتعشي

حجه وهو يدك على صدره قل اعوذو برب الناس شركتني بت حمديه اعوذو بالله من عينج اكلي بابا اكلي

واني بس اضحك عليهم

وشوي وسمعنه هورن سياره وراحو جهال احسان وجهال حسن يفتحون الباب وهم يصيحون اجه عمو فاروق وركضو

احسان ياجوعيه مايحبونه بهالله بالله علمود ابطونهم يدرون يشتريلهم من يجي

واني اسبوع ادك هورن حتى مرتي تحكرني نواقيص

كتله لعد جيبلهم وياك شي حتى يركضولك

-بت حمديه ناهبتني نهيبه منين اشتريلهم اكعد الصبح كليوم الكه جيبي مزروف اتكرضه مثل الفاره بت حمديه

ضحكت عليهم ضلو يتناكرون وخالو ايصيح عليم كافي عود هاي انتم البعران الكبار

اجه فاروق وبيده علاكه ويوزع للجهال اجباس وكاكو ورقيه الجوعيه صرخت عليه صوت من شافت الاجباس

باوع وكال منو هاي الكمر وبسرعه باوعلي واختفت ابتسامته وضل صافن بوجهي ومركز علي

اني دنكت لان صار شكله مفضوح وهو يباوعلي وكل اهله صافنين عليه

فاروق نواره لو متوهم

-ههه شلونك خويه شخبارك

-حاليا كلش زين انتي شخبارج عاش من شافج ايبااه شكد متغيره شلونهم وياج

-الحمدلله دنكت

ابو احسان كال الحيوان طلكها وعافها هي وبتها ابيت ابوها

فاروق شنووو طلكج والله عرفته ناقص ومايستاهلج والله من البدايه المفروض ماتقبلين بي حسافه كضيتي وياه هل فتره هاي

-انسو السالفه ولاتغلطون وعوفو يشوف حياته الله يسعده ويشافي

فاروق بس والله زين واتطلكتي احسن من العيشه عنده ولاتخافين والله ماراح انتركج ولااعوفج اقصدانعوفج تحتاجين شي

-اشكرك ماتقصرون

وخلص اليوم وضلينه سهرانينه احسان وحسن وزوجاتهم وفاروق واني ونضحك ونسولف ورقيه ما ضاكت عينها النوم وفاروق ماعافها شايلها وانطاها كل العلاكه مال الحلويات ويبوس بيها ويلاعبها

وبعدين رحت نمت بغرفه فاروق وهو نام بالصاله قفلت الباب لان اخاف كلشي يصير والماضي ايعيد روحه

والصبح اول ماكعدت لكيت ماما حبيبه متصله علي
٧ مرات
اتصلت عليها سلمت علي وكالت

ماما انتي هسه متطلكه لازم اتلزمين عده خوب مضحكتي وطلع صوتج واتشاقيتي كدام اولاد خالج ترى حرام وميصير واني نسيت مانبهتج امس لان جنت قلقانه عليج

كلتلها اي اتشاقينه وضحكنه وكلشي

كالت يله بدون علمج صار هل شي هسه المطلوب منج مو ماتتواجدين يمهم لا بس مطلوب متكثرين حجي وياهم ولاتلبسين شي يلفت انضارهم وبلا ضحك وشقى تمام حبيبتي

-تمام وهسه راجعه للبيت

كلتلهم اريد ارجع البيت بابا كافي

توسلو رادوني ابقى كلهم بس جنت مصره اله اروح وكال فاروق اني اوديج من اروح للدوام تعالي اتريكي اول

اتريكت وياهم وبعدين كبل لبست عبايتي الاسلاميه واخذت الجنطه ورقيه وسلمت عليهم وطلعت ورا فاروق

صعدت وياه وطول الطريق هو ساكت ويضرب حسرات

واني دايره وجهي على الجامه

وقريب نوصل كال نواره عليج الله عليج الله اي شي تحتاجينه خابريلي ولايردج اله السانج ابسط شي اكدر اسوي الج هو خدمتج عفيه اي شي تحتاجينه كليلي

-دايم ماتقصر

طلع افلوس وحطهن باايد رقيه

-كتله لا خويه اعذرني ما اكدر اقبلهن عندي خير من الله

-مو الج هذن الرقيه

-حتى وان مشكور ما اكدر اقبلهن

-نواره عفيه لاتحسبيني غريب واخذيهن كتلج مو الج الرقيه

سكتت ودنكت عفتهن باايد رقيه

وصلنه للبيت شفت سياره اكبال البيت بس لحظه هاي السياره اعرفها

يتبع...