رواية هل إنتهيت منى!!؟ الفصل الرابع والعشرون 24 - بقلم ساحرة العقل

احمد مشى من غير ما يسلم على عمار ولا كانه موجود اصلا ليلى رفضت تسأله الوضع اصلا مش ناقص اى توتر اللى كان غريب فى الموضوع برود احمد اللى غير طبيعى بالمرة بالنسبه لشخصيه عصبيه وغيوره زى شخصية احمد

وصل البيت من غير كلام لكن اللى كان جواه بقى عباره عن يقين بحب ليلى لعمار فى الوقت اللى احمد كان انتهى الكلام بالنسبه له لحد كدا الجوازه هاتكمل بس عشان خاطر عمه لكن الحب انتهى هو ميقدرش يجبر ليلى على اى شئ عمه يعمل العمليه وبعد كدا يدى لليلى حق اختيار حياتها .
مرت الايام وكل واحد مشغول فى حاجات اهم من التفكير فى اخر حوار بينهم لانه فعلا تقريبا اخر حوار بينهم وكانهم اتنين اغرب مش مخطوبين ليلى مشغوله بدراستها بين الدروس والمذاكره تقريبا احمد شافها خلال الشهرين دول اربع خمس مرات ودا كان بالصدفه على السفره او وهو راجع من شغله بتكون نازله رايحه الدرس ما سمعش اى شئ يخص عمار من اخر مره كانو فيها قدام مدرسة ليلى ودا خلى احمد واثق انه رجع شارم ليلى مكنتش عارفى اى حاجه بتجرى حوليها مكنتش فاضيه حتى تاخد بالها من تغير احمد معاها كل اللى كان شاغلها انها تجيب مجموع وتدخل هندسه عشان تبقى مع احمد المذاكره تقريبا هى الحاجه الوحيده اللى سيطرت على عقلها طول الشهرين دول .

اما بالنسبه لاحمد فهو بدأ يوضب فى شقة والده وبدأ يشترى فرش جديد للشقه وحجز قاعه عشان الفرح كل شئ كان ظاهر انه ماشى طبيعى لكن اللى جوا قلبه هو الشئ اللى ما كنش طبيعى احنا ممكن نضحك على اللى حولينا عشان نسعدهم لكن منقدرش نضحك على نفسنا ممكن نرسم البسمه قدامهم لكن الوجع اللى جوا القلوب صعب ننساه بمجرد ابتسامه سخيفه بنرسمها بالكدب على الناس .

الشهرين فاتو ليلى خلصت امتحانات ومنتظره النتيجه والفرح خلاص ابعد الانتظار بداء باقى اربع ايام كمال ونجوى فى قمة سعادتها ليلى فضيت من المذاكره وبدأت تاخد بالها معاملة احمد المتغيره لكن مكنتش مهتمه اوى كانت بتفكر بيتها وبين نفسها انه ممكن يكون تغير عادى بسبب زحمة الفرح والدوشه اللى حوليه اليومين دول احمد رجع البيت من الجامعه لقى ليلى مستنياه

ليلى.. ايه يا احمد باقى اربع ايام مش ناسى حاجه فى وسط الزحمه

احمد.. حاجه؟؟ حاجه زى ايه الله يرضى عليكى ياليلى لو حاجه تافهه اجليها انا ما فيش دماغ خالص كفايه اللى انا فيه

ليلى .. لا يااحمد مش حاجه تافهه دى اهم حاجه

احمد .. خير الله ما إجعله خير

ليلى ..فستانى انت مش ملاحظ انى لسه مجبتش فستان الفرح

احمد.. مين قالك انى نسيت

ليلى .. يعنى هاننزل انهارده نشترى الفستان

احمد ..لا طبعا

ليلى والحزن على وشها .. يعنى مفيش فستان

احمد .. خليكى هنا دقيقه هاجيب حاجه كدا من اوضتى وارجع

دخل احمد وساب ليلى واقفه بنارها هى حاسه بتغيره بس مش لدرجة انه مايجبش فستان الفرح اخدت قرار تتكلم معاه بصراحه وتفهم منه هو ليه اتغيرت بالشكل دا معاها قطع تفكيرها احمد اللى خرج ومعاه علبه كبيره وقدمها لليلى اللى فتحت العلبه وكانت مصدومه من اللى قدامها

ليلى.. دا .. اقصد ان دا نفسه الفستان

احمد .. اشتريته من سنتين وطلبت من الاتيليه يتعدل لواحده محجبه يارب بس يكون لسه المقاس مظبوط

ليلى .. اقصد ايه

احمد بسخريه .. يعنى تكونى تخنتى انتى مش واخده بالك انتى كنتى بتاكلى قد ايه

سابها ودخل مكنش عاوز الحوار بينهم يزيد عن كدا مكنش عاوز يعلق نفسه بحبال دايبه ممكن توقعه هو فعلا بيحبها كان نفسه يعمل اى حاجه تسعدها كان يتمنى لو كان بيعمل دا وهى بتبادله نفس المشاعر

اما عند ليلى كانت طايره من الفرحه مش مصدقه نفسها فرحتها كانت قد الدنيا كل اللى بتتمناه او حتى مجاش فى بالها انها بتحلم بيه بيتحقق من غير ما تطلب هى لسه فاكره اليوم اللى شافت فيه الفستان ولما احمد احبطها وقال انه وحش هى إفتكرت قد ايه يومها زعلت وقضت ليلتها كلها بتبكى لسه فاكره نظرته ليه لما شافها لابساه لما فضلت تنادى عليه وهو سرحان فى جمال الفستان عليها ايوه الحب اللى عند ليلى مكنش حب من طرف واحد هى كانت عارفه ان احمد بيحبها هى بس اتجاوبت مع حبه ليها لكن دايما كانت مستنيه منه الخطوه الاولى كانت دايما بتتعمد تستفز مشاعره بس هو كان دايما غبى عامل نفسه بيفهم كل حاجه وهو مش فاهم اى حاجه الموضوع كله كان محتاج شوية صراحه منه ومنها بس الخوف كان مانعهم ودلوقتى فى الوقت اللى هى بقت تتعامل معاه بعفويه وبتتصرف باى حاجه قلبها بيقول عليها هو بقى يسمع لغباؤه ولافكار مسمومه زرعها انسان حاقد عليهم

ليلى دخلت تشوف الفستان لسه مقاسها ولا زى ما احمد وزنها زاد والمفاجاه ان الفستان كان مظبوط وكمان الاضافه اللى طلبها احمد عشان الفستان يكون للمحجبات كانت رقيقه وزادت الفستان جمال كل شئ كان مثالى الفستان والعروسه حاجه كدا زى الملايكه.

#ليلة الحنه

احمد قرر يروح يبات فى شقتهم عشان يسيب مساحه لقريبهم الكتير اللى كانو فى البيت بعد ما اخد كل شئ يخصه نقل كل حاجه وساعده معاذ ومصطفى .

ليلى لبست الفستان اللى اشترته هى واحمد

والبنات كانو معاها ولبست حجابها كل معارفها كانو موجودين صاحبتها وقريبها فضلو يحتفلو لحد نص الليل كل واحد بينقضى يومه بشكل مختلف ليلى فى منتهى السعاده بتعد الدقايق اللى ربنا هايجمعها بالانسان اللى بتحبه وبتدعى ربنا يتمم ليهم على خير احمد بيقضى ليلتها محتار ومتضايق ومش عارف ياخد قرار خايف يتهور ويأذى الناس اللى بيحبوه وافضالهم عليه وهو كمان بيحبهم وخايف يمشى ورا قلبه يتأذى اكتر كان معاه اصحابه اللى كانو عاوزين يعرفوه سبب حالته هما عارفين انه بيحب ليلى عشان كدا مفيش مبرر عشان حالته دى معاذ كان قلقان عليه اوى مصطفى مكنش فاضى

معاذ .. احمد انت فيك ايه المفروض الليله حنتك يعنى انت المفروض فرحان

احمد.. ولا حاجه مخنوق شويه

معاذ .. فيه ايه بس انت من امتى بتخبى عننا اى شئ طول عمرك بتحكى لينا كل حاجه حتى لو صغيره

احمد بصوت مخنوق.. الموضوع المره دى ما ينفعش يتحى اعذرنى مش قلة ثقه فيك بس فعلا المره دى ماينفعش اشارك الحوار مع اى حد

معاذ .. بص انا ماعرفش ايه الموضوع بس انا واثق ان الموضوع بخصوص ليلى عشان كدا بأقولك اعمل اللى يدلك عليه قلبك انت بتحبها وهى كمان كل تصرفاتها بتقول انها بتحبك

احمد.. انت مش عارف حاجه مش تتكلم احسن

معاذ .. ومش عاوز اعرف صدقنى بس انا عاوزك انت تمشى ورا قلبك انتو من بكره هاتبقى متجوزين رسمى هاتعيشو فى بيت واحد هاتبقو حاجه واحد كل حياتكم المفروض ما تخرجش برا سيبك من اى فكره سلبيه عشان متدمرش حلم جميل انت ما صدقت حققت وانشاء الله كل شئ هايكون بخير

كلام معاذ طمن احمد شويه لكن مغيرش الانطباع السئ اللى جوا دماغه لكن على الاقل خلاه يقدر يعدى اليوم بشكل لطيف تانى يوم الصبح احمد صحى على صوت موبيله بيرن كانت ليلى هو نسى انه مش بايت فى نفس البيت اللى هى فيه اول مره يبات فى مكان هى بعيده عنه مجرد وجودها قريب منه كان بيخليه يحس بسعاده مجرد انه ينام ويفتكر انه هايصحى الصبح يشوفها قبل ما يغسل وشه كان احساس كان ليلى قلبه يرقص اول مره يكتشف كل الحاجات دى لمجرد بعده عنها ليله واحده

رد عليه بصوت نعسان ..صباح الخير ياليلى خير فيه حاجه

ليلى .. انت لسه نايم يا احمد دا احنا بقينا العصر

احمد .. وايه المشكله انا اصلا ما نمتش امبارح غير بعد الفجر

ليلى .. ايه المشكله ؟؟؟ إنت اكيد بتهزر مش كدا

احمد .. واهزر ليه بس انتى ايه معصبك كدا بس انتى واراكى حاجه مهمه

ليلى .. احمد ماتعصبنيش انهاردا فرحنا وانا متاخره ساعه على معاد الكوافيره عشان انت لسه نايم وناسى ان انهاردا فرحنا وانا مش لاقيه حد يوصلنى لان العربيه مع حضرتك

احمد بصدمه.. الفرح !!!ايوا صح دا انهاردا الفرح طيب معلش ياليلى البسى وانزلى تحت وانا هاخلى معاذ يعدى عليكى بالعربيه ماشى على ما اقوم اجهز انا كمان اتاخرت اوى مش عارف تصحينى بدرى شويه
♨♨♨♨♨♨♨♨♨♨♨♨♨♨♨♨♨♨♨♨♨
_______________________________________
∆∆∆∆∆∆∆∆∆∆∆∆∆∆∆∆∆∆∆∆∆∆∆∆∆