الحلــــــــقه الثالثـــــــه
رواية... هل كانَ حُلماً...؟
{العِراق-المُصغَر...عنـاق-الارواح}
بقلمي ... لؤلؤة_البِحار ...
___________________•
من أسوأ الليالي المرت علينا ليلة موت سمسم
ضليت مصفصفه لا اخذ ولا انطي عيوني بحياة واكفه وبس تردد
حياة... سمرا راحت
راحت سمرا
الضابط مبقى گال :- البنيه لتطلع من البيت واني رايح هسه لازم ابقى ويا رشم ... باوع لمقدام كله... ممنوع تطلع.. وياشر على حياة الي اصلا جانت فاقده كل الي تگوله... سمرا راحت
طببتها جوه بالهول تبجي وابجي وياها ماادري بالكل فصلت عن العالم كل الاشوفه بيبي لازمه ايد حياة وترجف
بهيه... شصار فهميني
هي مجاوبت غير... راحت سمرا راحت سمسم
حره... هالليله ابد مامرت بسلام الليل كله كاعدين وع نفس الحال نبجي لثاني يوم محسيت بالوقت ابد
رتيل تجيبلنا اكل وتحجي تكول
رتيل... اكلن حبيبات..تحجيها بحزن ودموع
واحنا منگدر ضلينا بس ع المي وشنو الي صار مندري بوقت العصر غفت حياة اني وراها بشويه غفيت بس افكر بيني وبين نفسي
اگول... بلكي حياة متوهمه بلكي سمرا مميته او يمكن اني بحلم بلكي نطلع بحلم ونفز
معقوله ماتت واني البارحه الصبح يمها
نضحك
ونسولف
ولا كأن اكو شي ولما غفيت انعاد عليه موقف حياة من انطتني العلاج و راحت تركض وكالت
... لتعوفين بيبي
ماادري شوكت فزيت بس هدوء والدنيا ليل وبيبي فارشه بالغرفه ونايمه باوعت شفت نفسي بالفراش سألت نفسي
هاي شوكت وشكد نمت اني
اتلفت و ادور بالغرفه حياة ماكو طلعت منها رحت للهول
باوعت امي ورتيل نايمات
رحت للاستقبال حياة ماكو اباوع دنيا ليل.. شديصير شنو
معقوله هذا حلم!!!
حسيت بهاللحظه وكأني ممستوعبه الصار كله
طلعت برا شفت حياة گاعده يم الحديقه والدنيا ظلمه رحت تقربت يمها
باوعتلي ورجعت تباوع للحديقه كتلها... حياة شعندج هنا
حياة... خنگه
گعدت يمها... حياة اني ممستوعبه شي
هي باوعتلي بهدوء كالت... هذا الكاتبه ربنا
تفاجئت فجأه هدت والرجفه الي بجسمها اختفت وجانت سابحه ولابسه اسود وحتى بجي متبجي گتلها... شنو الي صار احچيلي؟
حياة... هم كتلوها هم المسؤولين عن كلشي
گتلها... منو
حياة... احچيلج بعدين منتظره يصير الفجر حتى اروح
حره... وين ترحين
حياة... لهواي امكان
گتلها ... اي كوليلي وين
حياة... لازم اشوف رشم ضروري وبعدين...
حره... شنو بعدين
حياة... اروح لگبرها ماگدر
ابقى هيج
حره... بس خطر هسه
حياة... لتخافين ماكو شي اسوء بعد ممكن يصير
حره... سكتت كتلها... لعد اجي وياج
حياة... تمام
حره... تنتظريني ابدل والبس اسود باوعتلي كالت
حياة... مااحب الاسود
حره... لعد ليش لابسته
حياة... لاني بحداد حاليا
حره... واني هم بحداد..حجيتها و بجيت مجان على بالي يجي يوم واكون بحداد على سمسم
حياة... اني بحداد بس راح ينتهي حدادي بس يصير الي ببالي
حره.. شنو ببالج
حياة... مو هسه اگولج
حره... لعد اني هم بحداد
گالت... الله يهونها
رحت طبيت للحمام اسبح
وهي جابتلي تراك اسود
كملت وطلعت
شعري ممشط واحس بدوخه قويه اخذت المشط مادري شلون مشطت وحطيت ع راسي شال واباوع الدنيا هم ليل
گتلها بصوت ناصي لان نايمين... شنو بيش الساعه اشو مااكو ضوا
حياة... ب 2 ... گالتها وطلعت للحديقه وهم على راسها شال اسود رحت كعدت يمها
گطعت ورده وضلت تشم بيها وصفنت حسيتها بغير عالم گتلها
... مراح تگوليلي شصار
سكتت شويه وگالت... لما طلعت منا وصعدت سياره لبيت سمرا مر الوقت ببطئ حسيت هاليوم مراح ينتهي لما نزلنا
طلبت تكسي حتى يوصلني لبيتها اسرع
اخر دقايق فتحت موبايلي لكيت مكالمات هوايه من رشم وهم رجع اتصل
گالي... وينج فهميني سمرا ليش طلعت
حياة... ماادري اني بطريق حااوصللها واسمعت ضجه يمه گلي
رشم... لا لا حياة ديري بالج البيت لتدخلليله عشر دقايق واني بالبيت حياة ديري بالج
يحجي و محسيت غير السايق دخل للمكان گتله... اي اي هنا اوكف ونسيت رشم
طلعت اركض ووكفت يم محل اباوع من بعيد اشو ماكو حمايه ع بيتهم ولا الاضويه مشتغله ماتحملت ما ادخل رحت اركض فتحت الباب وركضت الابواب كلها مغلقه عدا المطبخ
دخلت شفته مخربط ودم ع الحايط والسجاجين والكلاصات مكسره بالكاع ركضت دخلت للهول
شفت سمرا واگعه وكلها دم لما ركضت عليها ورحتلها جانت مطعونه بسجينه
اني كمت اصرخ گلتلها لتخافين راح اعالجج تحملي
هنا باب الهول اندفعت مره بالمره الثانيه انفتحت دخل رشم وواحد لابس زي عسكري مااعرفه دخل من المطبخ
هنا مااتذكر شلون وصلت للسياره وشوكت تحركت كل الي اتذكره رشم جان يصيح
... ياالله دخيلك ياارب
والولد صاااح... اوگف حنندعمم
لان جانت السرعه حيل عاليه الا ان انسحب بريك اني حضنت سمرا خفت توگع
وبسرعه غيرو اماكنهم والولد كام يسوق ورشم لازم ايد سمرا ويسوي
:- يارب دخيلك
اني هنا تاكدت سمرا راحت لان مجان بيها نفس الولد مااعرف شحجه بالي جان كله يم سمرا الي اتذكره بس
گله :- بس ندخل المستشفى يستلمونا تحقيق وواضح حتوگع براسنا رشم ضروري نبعد حياة
بس رشم مجان وياه اول مره اشوف رشم يبجي... سكتت صافنه
اني بجيت كتلها... كملي
حياة... بعدها اجه الولد الي جابني اخذني وياه بالسياره مالته وهم راحو للمستشفى
اني مقبلت كمت ابجي كتلهم ترجعوني يم اختي بس هو مسمعني و صف سيارته و دخل لمحل جاب علاكه واجه و اخذني يم مغاسل قديمه ومهجوره وكلي
... غسلي ولبسي هالملابس يلا اخذج
اني مقبلت كمت ابجي كلي
... لعد ماخذج لاختج
مادري شلون غسلت وبدلت هو الملابس ملاتي البيهن دم اخذهن حطهن بجنطة سيارته وجرني من ايدي صعدني السياره وكلي...
.:- المستشفى بعد دقايق الي اريده منج ولمصلحتج تكولين خابروني كالو اختج بالمستشفى وانتي مجنتي بموقع الحادث
كتله... لييش
كال... حتى ماتتورطين
اسمعي مني رشم وفارس راح يوقفوهم لان هم النقلو اختج
اني ضليت ابجي وصلنا للمستشفى دخلت اركض وشفت امها وخوالها امها تبجي
حره... ضليت متفاجئه من تحجي عبالك دتحجي قصه ملامحها جامده حيل دتكمل و بهالاثناء اذن
كالت... يلا نصلي ونطلع
صدك رحنا صلينا بهدوء صلينا برا بالحوش كملنا كالت
حياة... حادخل على كيفي اجيب فلوس ما اريد يحسون او يكعدون
حره... ليش خنكوللهم
حياة... لا مستحيل يقبلون واني ضروري اشوف رشم
حره... ماشي ماشي
اني فتحت الباب على كيفي وهي جابت فلوس وبيدها الموبايل واجت وطلعنا نركض توه بادي الضوه بعدها ظلمه رغم خايفه لان طلعنا بدون علم اهلنا
بس كلت اهم شي
ابقى ويا حياة ضلينا نركض للكراج صعدنا وحياة خابرت مجاوب كتلها :-هذا منو .؟
حياة... صديق رشم
رجع اتصل فتحت خط كلتله... ضروري اشوف رشم
هو مدري شكللها كلتله... معليه اني حاروحله
سدت الخط لاوعتلها كتلها... هو وينه؟
حياة... بالسجن
حره... صدك تحجين؟
حياة... والله الكلب ابوي اتهمه كللهم هو هددني قبل كم يوم وانطاهم تسجيل بس قسما بالله لتكون نهايته على ايدي
اني حطيت ايدي على كلبي ضلينا من سياره لسياره طلع الضوا گلبي كام يدك بسرعه وكفنا يم مكان اباوع الامن مسطرين شفت هذا الرجال الي اجه ويا حياة واكف يمهم
شافها ركض ابتجاهنا كللها... شبيج تخبلتي
حياة... كتلك ضروري اشوف رشم
صادق... مو هسه يابنت الحلال ميصير هسه
حياة... اذا متساعدني اروح وحدي
هو جر نفس كللها... ماشي باوع لصديقه مدري
شاشرله وراح هو طببنا من الباب ورا شويه اجه صديقه وگله... تم
الرجال گال... ماشي حياة بس انتي تشوفيه وخمس دقايق تعاي وياي
حياة... وصديقتي؟
باوعلي كال... اكعدي هناك واشرلي ع الكراسي كال... خمس دقايق ونجي ولتخافين الامن بكل مكان
حره... تمام
هي راحت وياه گعدت ع الكرسي وضليت اطگ اصابعي متوتره واحسب واحد ثنين تلاثه ومنتظره الدقايق تخلص واحس الكل يباوع عليه
اكو ناس يدخلون بس قليلين مو هوايه ومدري شيسوون يحجون ويه الامن ورا شويه اجت حياة كلتلي
حياة... كومي معدنا وقت
حره... شصار وياج
طلعنا بسرعه اجه الرجال گال... اخذت زمنيه واجيت انتظري اوصلج للكراج
حياة... لا ميحتاج
هو مقبل بعدين ضل يباوع للوقت گللها... ترجعين بسرعه للبيت مفهوم ترا هذا الكلب كلشي يسوي
حياة... لتخاف دنيا صبح محد يكدر يسوي شي
حجتها وجرتني ومشينا كتلها.... شصار
حياة... كلت لرشم اشهد هم قتلوها بس كلي لتتدخلين وضلي راقبي من بعيد
حره... وانتي شحتسوين
حياة... افضحهم
حره... خاف يكتلوج..
اتصل موبايلها
كالت... رتيل تتصل يمكن درت احنا طالعات
حره... خنرجع
حياة... بس نشوف ام سمرا
كتلها ماشي...
اخذنا سياره ورحنا لبيت سمرا
جانت هوسه وامن هناك رادت تروح حياة جريتها
... لا متروحين يلا خلي نرجع
حياة... اريد اشوف امها
حره... خابريها تجينا لهنا انتي متروحين
هي صدك اخذت الموبايل واتصلت گالتلها... تعالي احنا هنا
شويه واجت وحدها باوعتلها لابسه اسود لمحت ولد مراهق باوعلنا من ورا السياره وراح يركض
اني ماادري خفت اول ماوصلت يمنا كتلها... خاله اكو ولد باوع وركض
گالت... اي ابني هذا
حضنتها حياة وامها تبجي وگوا واكفه كلتلها حياة
حياة... وصفيلي المكان الي اندفنت بيه اختي اريد اروحلها
هي گالت... تعالن نكعد بالمحل مالتنا احسن
حجتها وفتحت المحل
رحنا گعدنا وهي كامت توصف المكان الي اندفنت بيه سمسم و ضلت تبجي وتسأل بحياة وجانت مصدكه رشم هو الكتلها
حياة كلتلها... انتي شلون تصدكيهم؟
گلتلها... مو سمعت التسجيل
اني گلتلها... شنو التسجيل گايل راح اكتل سمرا ؟
... لا بس گايله راح انتقم منكم واحرك گلبكم
حره... لعد شلون تصدگين ليش هالحرب كلها علمود منو صارت غير علمود سمرا؟
كالت... مادري
وبجت
حياة... رجلج والنذل ابن عمها وبعد واحد هم الكتلوها
گلتلها متفاجئه.. شنوووو!
حياة... اني جنت بموقع الحادث وحجتلها كلشي
كامت تبجي وتلطم
حره ... سووا كل هذا لان سمرا
جانت راح تطلع بالاعلام وتحجي كلشي
امها تبجي وتلطم كامت گالت... والقران افضحهم واسحلهم
لزمناها گتلها... خاله بس ماكو دليل
گالت... حياة تشهد
حره... ومنو يگول ياخذون بشهادتها لازم اكو دليل قوي
حياة... خاله اني من دخلت شفت ببيتكم كامرات ضروري تشوفيهن ونسلمهن للقضاء اكيد مصوره كلشي
كالت ... من وصلت للبيت لگيت كل الاجهزه مكسره والكامرات وحده منهن مكسوره وساحبين من الكامرات كل الاشرطه مال تسجيل
واكو ريحة بانزين الظاهر رادو يحركون ومالحگو
حياة... بس اني من وصلت ماكو ريحة بانزين
حره... اكيد مو هم الكتلوها يمكن تذكرو ومن خوفهم كسرو كلشي ورادو يحركون ويمكن مالحكو
امها كالت... لعد لازم تشهدين حياة راح اخلي احسن محامي ما اقبل حق بنتي يضيع
حياة... ميضيع بس خلي نتصرف بذكاء اكيد تركو اثر ماكو مجرم يكمل جريمته وميعوف عليه زله
ضلن يتناقشن اخر شي قررن انو ام سمرا ترفع على ابوها واخوتها وابن عمها دعوه وتذكر انهم جانو يضربوها ويكرهون رشم ورادو يجبروها تتزوج واكثر من مره هددوها بالقتل
وكالت... نشهد كلنا ع هالحجي حتى انتي حره تشهدين ويانا
حياة... بس حره عمرها ١٧ يقبلون بيها ك شاهده؟
ام سمرا... راح اسأل وخوالها هم يشهدون ومن اخذناها للمستشفى ذاك اليوم التقارير موجوده
حياة... هاهيه لعد
باوعنا للساعه ب ١١ كتلها... لازم نرجع حيصير الظهر
حياة... تمام
... كمت دخت حيل حياة كالت.... هاي لان ما اكلنا شي تعاي نشتري اكل منا
حره... مااشتهي
حياة... حتى اني بس نجبر نفسنا لازم نبقى بعافيتنا هالفتره علمود سمرا
ام سمرا كالت... ابقن هنا
كامت فتحت الثلاجه وطلعتلنا عصاير وطلعت بسكت مالح باوعنالها باستغراب
گالت... هذا محلنا يلا اكلن
صدگ اگلنا وگمنا اذن صلينا وسلمنا عليها وطلعنا مشينا لنهاية الشارع دنيا ظهر سيارات قليله باوعنا سياره اجت ورانا ولد وكف
گال... اوصلكم
حياة... لا شكرا
كللها... خيتي متلگين سياره هسه اصعدي اوصلكم للكراج
باوعتلي ورجعنا كناله تمام وصعدنا وياه اثنينا من صعدنا مارتاحينه لان كل شوي يباوع بالموبايل ويرجع يباوع بالمرايا للسياره الوراه
الى ان غير الطريق اخذنا لغير طريق مو نفس طريقنا
حياة لزمة ايدي وگالت... خننزل
... گلتله عيني هاهيه وصلنا هذا بيت اهلنا نزلنا
هو گال... ليش مو للكراج..
حياة... لا شكرا هنا نزلنا
هو ارتبك ومشى سريع صاحت حياة
:-كتلك نزلنا
هو مارد مدري شديطلع من الجكمجه بس حيل ارتبك اني بسرعه مديت جسمي و فريت الستيرين السياره كامت تروح يمين ويسار وهو يصيح
الى ان
دفعني وطلع المسدس بس مالحك انضربت السياره بالعامود بسرعه فتحنا السياره وطلعنا نركض سياره ورانا نزلو شباب منها
اني جريت حياة انجرحت بيدها بس ماحسينا ركضنا بين الافرع المنطقه النزلنا بيها جان بيها جهال صغار يلعبون واكو بناء مكامل نركض وهم ملثمين يلحگون ورانا
ضلينا نركض بين الافرع اكو طفل شافنا ركضنا وشافهم ورانا بسرعه دخل يصرخ
احنا تعدينا بيتهم بس ضل املي بصوته
يسوي... بابا حراميه
ركضنا عبرنا بيتهم وسمعت واحد يصيح انتو منو درت وجهي داشوف شفتهم ورانا وواحد ياشر ع ركبته بمعنى اذبحج انطخينا بواحد
كال... ها شكو
ركضنا ورا حياة كلتله... عمو الحك حيكتلونا
هو باوعلهم و صاح... انتو منو؟
وجهو عليه السلاح واحد گله ... ولا نفس
اجو البقيه الملثمين من الفرع الثاني جرو حياة الرجال جرنا عليه وصاح
... يااهلل الحي الحكوو
يااهل الحييي الحـ
بعده مامكمل ضربو ع راسه وكع وجرونا اني ملزمه بحياة وندفر بيهم الى ان انضربت على راسي وبعدها محسيت بشي..
گعدت بمكان مربطه عيوني ومربطه اديه من الخوف النفس ماگدر اجره كمت اصرخ
... حياة وينج حياااااة
سمعتها تحجي... هنا هنا لتخافين
حره.. دشبيهم هذول الجلاب شيردووون
حياة... اشش لتحجين خلص كلشي حيكون تمام
... اريد افك اديه مااكدر جنت لما اشوف مسلسل واحد مربطين ايده اگول سهله يكدر يفكها بسهوله هيج جان ببالي
بس لما تعرضت لهالموقف حسيت ايدي تريد تنگطع والحبل
مينگطع
شويه وسمعت صوت وضجه وهوسه وصوت فتحت الباب واسمع صوت واحد يكوله
... لكك حماار بس يموتن ننكشف يامغفل دتورطنا بالزايد
والثاني من يحجي بعصيبه وصوته كأنه يريد يبجي يكوله
... لعد شنسوي ولك شنسوي راحح اتخبلل راح اتخبل ننكشف والله ننكشف خلي نكتلهن
الثاني جان اهدا كله... مو هنا اني عندي فكره اسمعو مني لتصيرون اغبياء
طلعو همه وضلو مده وهم رجعت نفتحت الباب سمعتهم يحجون ويانا واحد جر حياة شمرها يمي وشالو العصبه من على عيوننا
باوعتله اي هذا الكلب شايفه صورته ابو حياة مشعل ويمه جماعه ملثمين اني وحياة نبجي گعد گاللهم
مشعل... ليش هيج رابطين بنتي حياة فكوها بسرعه
اجه واحد فك ايدها هي بسرعه دفعته وضلت تفك بالحبل مالتي وهو يحجي
مشعل... بنتي حياة شوفي ربي يشهد اني ماكنت اتمنى ان نلتقي بهيج ظرف لكن الحياة مرات تجبرنا ان نتخذ مواقف احنا لانريدها
اني باوعتله صفح هذا شبيه نص فصحى ونص جلفي
فكتلي ايدي حياة گلتله
حياة... بلا هالمقدمات التافهه الي ماالها داعي شنو تريد مننا
مشعل..د انتي شنو الترديه
حياة... لتلوف بالحجي
مشعل... بنتي انتي اجيتي وقابلتي زوجتي السابقه ليش؟
اني گلتله... مو نريد نعرف مكان دفن سمرا
مشعل ... وتقنعيني انج ماتكلمتي معاها عن سمرا ومقتلها
حره... اقتنعت او لا مو مهم انت والنعال
صاح بيا هذا الخنثه الي جان يريد يبجي گلي... احجي عدل ياادبسزز مالومج جايه من الشارع ورفع ايده دايضربني مشعل صاح بيه
مشعل... ممنوع تمد ايدك هاذي تكون صديقة بنتي وانا لا يمكن ان اسمح ان تهان حالها من حال بنتي
حياة... مدافهم انت شنو تريد جبتنا لهنا وبعدين شاكول لام سمرا يعني
مشعل... بنتي لاتغشمين نفسح احنا نعرف كلش زين انتي كنتي في موقع الحادث وماتكلمنا ولاجانت نيتنا نجيبج لهنا لان توقعنا تخافين وتسكتين مثل ماسكتي لما عرفتيني
حره... وانت تقارن قيمتك بقيمة سمرا؟
صدگ مغفل
الولد ديصيح عليه گاله... كوم اطلع برا الكل يلا برا اريد ان اتكلم معاهن ونتفاهم في بعض
الامور بالنهايه حياة تكون بنتي
دااحجي حياة گرصتني گلتله ... احجي بابا
هو سمعها كام يبجي ويمسح بدموعه يگوللها
مشعل... انتي وسمرا اكثر شي قريب على قلبي لكن سمرا كانت جدا قاسيه معي وكانت راح تفضحني اختك اخطأت يابنتي
ويبجي بطريقه هستيريه لدرجه گلبي گام يخفق گلت وين وگعنا بيد مجانين لان فرفح من البجي كام يشگگ بقميصه ويعض ايدو واحنا صافنات هذا شبيه لشويه مسح دموعه وهدأ ورجع يحجي ولا كان جان يبجي قبل شوي
گللها... حياة انتي بنتي وانا مااتمنى ان افقد ابنه ثانيه ويشهد الله انك من اعز الاشياء لقلبي لهذا احنا لازم نتحد وندعم بعض اساعدج وتساعديني
حياة...و شلون؟
مشعل... راح اسفرج انتي وبيبتج واي شخص تردين لمكان بعيد تكملين دراسه وتعيشين حياة رفاهيه بدل هالعيشه السيئه وبالمقابل انتي تكونين واقفه بجنبي
حياة... شلون اوگف وياك؟
مشعل... ببساطه تشهدين ويانا انك كنتي في موقع الحادث ولما دخلتي كان رشم يقتل باختج
هي صفنت عليه شويه وگالت... وشگد تنطيني فلوس اذا حجيت هيج؟
مشعل... انتي شكد تريدين؟
حياة... مو اقل من ١٠٠مليون!
هو صفن عليها تفاجئ يمكن مجان متوقع كلامها وانها ممكن
تقبل گللها..
مشعل... متشوفين المبلغ كبير
حياة... والخدمه الي راح اقدمها الك اكبر راح اخليك تكون بريئ بدل مجرم شنو الي تريده بعد
هو سكت حك بلحيته گللها... اذا هيج متفقين بس
.. حرك السبحه مالته گللها.. خلينا نتفق على الامور الاخرى
حياة... مثل شنو
مشعل... مثلا اني ما اضمنج يابنتي راح توگفين معاي
حياة... وشنو التكدر تسوي وحده بسيطه مثلي حتى لو حجيت واشتكيت منو ممكن يصدكني؟
مشعل... رغم هذا من الذكاء ان اخذ احتياطاتي
حية... وشنو هن
مشعل... صديقتج حره راح تبقى هنا لبين ما تقدمين افادتج كامله وتكولين رشم الي قتل اختج
حياة... مستحييييل
مشعل... هذا الي راح يصير باجر تروحين للمركز وتقدمين افادتج وخلي ببالج يابنتي ان كل خطوه تخطيها احنا نعرف بيها كلش زين لان انتي مراقبه وايضا باي لحظه احس انج بلغتي بذاك الوقت صدگيني راح انحر صديقتج
هي سكتت گلتله... اني ابقى هنا خليها تروح
حياة... الي عندي گلته بعدين اذا انتي ويانا من شنو خايفه لو مفكره تلعبين بذيلج
حياة... شنو اليضمنلي مراح تاذوها؟
مشعل... تكدرين تجين وتشوفيها وتاكدي بس تنطين افادتج وتشهدين ويانا بالمحكمه راح تطلع صديقتج وهي ايضا راح تاخذ حصه من الفلوس
حياة... بابا رجائا خليها تجي وياي وانته كلت احنا مراقبين بعد شكو اي شي يصير تگدر تمنعه
مشعل... اني الي عندي كلته يابنتي واياج تحجين عن هالموضوع شي لاي احد
صديقتك وين وشلون رجعتي انتي ماتدرين ولا تذكرين شي
حياة باوعتلي كلتله... ماشي بس خلي ببالك اذا انمست شعرايه منها راح يكون حسابي قاسي عليك
مشعل... احنا مو اعداء واني ماعندي معاها شي حتى ااذيها وهي كلها يومين تقدمين افادتج منا صديقتج تطلع منا تاخذون الفلوس وتطيرون بدون سفك دم وتعيشون وتسلمون
حياة... اريد اروح هسه حتى اقدم افادتي باجر
مشعل... جيد باجر راح تلكين نقيب هناك هو راح يكون معاج وتاكدي اي حركه غلط راح يوصلنا خبر قبل لتخطين خطوه
حياة... اتطمن اني مو غبيه واضيع هيج فرص
مشعل... حتكونين مراقبه من بيتج للمركز ال*****.. هناك تقدمين الافاده وراح يحققون وياج لفتره واياج تفكرين تطلعين منا او منا او حتى تتصلين باحد لان مراح تكونين بخير بعدها
حياة... ماشي
صاح على واحد گله... ابني ترجع حياة
... بعدها حضنتني حياة وشاورتني..راح اسحلهم
رجعوا عصبوا عيونها وربطوها وطلعوها واني هم شدولي عيوني ورا شويه حسيت بصوت هذا العصبي يصيح ويكوله
... شلوون تطلعها شلون راح ننفضح راح ناكلها بخاشوكه اني شلون سويت هيج سوده بوجهي...يحجي ويبجي وبعدها كال... بابا خليني ارجع اكتلها الله يخليك
وابو يكوله... اهدا ابني اهد.. ويصيح.. جيبوله علاجه
الثاني حجه كله... شلون خليتها تطلع جان صورنا فيديو تعترف وكتلناها
مشعل كاللهم... انتو تردون تزيدون الطين بله هي سمرا وارتكبتوا بيها كومه اخطاء تريدون نرتكب بعدها جريمتين ونخلي الانظار علينا
من غير شي الاعلاميه الحجت وياها سمرا شكت في هذا الموضوع وراحت وتكلمت مع رشم لو حدث وشكو بينا اكثر راح نصير على كل لسان يامغفل
سكت شويه وحجه كال... اهدو حياة حالها حال كل الفقراء تحلم بفلوس تعيشها مراح ترتكب اي شي ياذينا هي لما عرفتني ماتجرأت تطالب بحقها ولا تفضحني على الرغم برشم وباقي الضباط كانو راح يكونون بجانبها لكن سكتت ليش؟
لانها تخاف على حياتها والافضل ان نمشي مع الموضوع بدون سفك دم
الولد گال... واذا اشتكت شلون؟
كله... مااتتجرأ صديقتها هنا ولو فكرت تبلغ ف احنا مراقبيها واذا تغير طريقها عن المركز راح تنقتل
اني كلبي يدگ عشره عشره من الخوف واحجي بكلبي... شلون يربي شلون حتطلع حياة من هالورطه
احس فقدت وجسمي يرجف اخر شي كال
مشعل... هاذي البنت ممنوع احد ياذيها لان لو تاذت راح تكون حياة ضدنا واني حجيت واكرر مااريد اسفك دم بنتي الثانيه
حره... احس فقدت مادري شصار بيا اغمى عليه ورجعت صحيت عيوني شاديها وبالي يم مقدام ورتيل شلون بيهم وشحيسوون
وبداخلي خوف وقلق على حياة وعليه مادري شنو مصيري
شويه وحسيت الباب نفتح اسمع صوت واحد مسامعته صفر كال
... هنيالك ي رشم هالكلب ماكو بنيه حلوه مايعرفها
اجه تقرب مني كال... هاي شنو مره حوريه صدقه لله... وتلمس وجهي
اني صرخت ضربني راجدي كال... ووجع منو يصدك هالصوت يطلع من هاي
واحد يمه ضحك كله... ابتعد عنها
كله... اووف شيلزمني... ولمس وجهي دفرته وكمت اغلط هو رجع ضربني ولزم رجليه
الثاني كله... لك عوفها ياحمار كلها يومين تجي ذيج الشكره وعود ننطيكياها لعد لو تشوف ذيج شتسوي
وضلو يفشرون يلعبون النفس
گله.... هاي حلوه تخبل
... اي بس تنطي افادتها ذيج ناخذهن وخر عنها يلا
اني هنا فقدت كمت اغلط عليهم ربطوا حلگي وشالوني كعدوني بغير غرفه وفكو عيوني
باوعت الغرفه عباره عن تعذيب نفسي الضوا احمر مبيها شبابيك نفسي حسيته قل ضليت ابجي وادعي يربي هذوله غدارين
شحيصير بينا
ضاع عليه الوقت والحساب الغرفه حفظتها وحفظت زواياها شويه وانفتحت الباب طب واحد جايبلي اكل گعد يمي باوعت جايب تمن ومرك وتفاحه
اني اباوعله وابجي
گال... اكلي شبيج
... عرفته نفسه الضربني قبل شويه باوعتله بخزره فتحلي الحبل و گال
... شنو ماكلج مو زين جايبلج اكل ترا المخطوفين لا ياكلون ولا يشربون بس يتعذبون واكو ينذبحون وينشمرون
... اني بلعت ريكي... كال... بس لا تخافين احنا مانعامل الحلوات بقسوه وغمزلي
هو كال هيج لو تخبلت شلت المرك والتمن ولطختهن بوجهه
هو فار وتخبل كفشني من شعري وضربني راجدي ديضرب الثاني وگف گال... بسيطه هسه ماكدر اضربج بس مابقى شي
دفعني وخله وطلع
ضليت بلا اكل فتره طويله بحيث گمت احس بدوخه قويه وضجه براسي والم قوي بايدي لما باوعت شفت دم بايدي
صفنت احاول اتذكر هاي شلون انجرحت وشوكت
عيوني بدت تغوش الى ان غفيت انعاد عليه الحادث لما نركض اني وحياة واحتمينا بالرجال فزيت مرعوبه تذكرت الرجال الي حاول يساعدنا حسيت بشوية امل بگلبي
اكول.. بلكي اشتكى بلكي يلگوني وبقيت هيج اغفى ماادري شكد وافز لما اغفى واني حزينه او زعلانه او مخنوگه تنعاد عليه الذكريات دنيا صبح ليل ماادري وراها بفتره طويله حسيت بجوع قوي كمت ابجي من الجوع
شويه وفات نفس الرجال حاولت اكعد كعد كبالي باوعلي گال
... ليش تبجين
مجاوبته دار وجهه يباوع لجهه
وراها كال... تصرفاتج رعنه بطليهن
رجعت نمت ع صفحه دايخه مااكدر اكعد گتله... جوعانه اريد اكل
هو گام طلع من الغرفه ورا شويه طب جايب اكل اجه حط الاكل وكعد كدامي كال
... اكلي
اني كمت اكل وابجي هو ورث جكاره ويباوع عليه كال
... ليش تبجين
حره... ميخصك
هو ابتسم مجاوبني كام ديطلع فتح الباب وباوعلي كال... احمدي ربج واشكري اني يمج والا جان كتلج الجوع متلكين ارحم مني بهالمكان ف الزمي حدودج لمصلتحج
طلع وقفل الباب وراه گتله... روحه بلا رجعه وكعدت اكل مر وقت طويل شكم يوم اني هنا ماادري الولد يجي ينطيني اكل ويكعد يستفزني بشكم حجايه ويروح
بهالفتره تقريبا تخبلت ساعه اكعد ابجي على سمرا ساعه اتذكر سوالفنا و اضحك ساعه اتذكر اني هنا بين الحياة والموت وابجي ومن اتذكر حياة برا اضحك
بقيت ع هالحال فتره شكم يوم تاهت عليه
اليوم دخل هالولد جابلي اكل
كتله... اليوم شنو من الايام؟
كلي... احد
حره... اني تفاجئت معقوله كل هالوقت مامر بس يوم لان الحادثه صارت يوم السبت كتله شگد بالشهر
كال... ميخصج
وطلع اخر شي من كثرة التفكير كمت اكوم افتر بالغرفه اتلمس الحيطان اشوف بلكي اكو ممر سري لو شي هو مستحيل بس اامل نفسي بهالامور لما اتعب من الفره والبحث اتوقف بالمكان الي تعبت بيه
وامدد وانام ولما اكعد ابقى افكر حياة وينها هسه شدتسوي وارجع بدوامة تفكيري
وگفت يم الباب ومددت ونمت لشويه فزيت ع وجع بظهري لان هذا الولد من راد يدخل ضل يدفع بالباب قوي لان حس وراها ثگل
اني وعيت بس اريد اگوم مااگدر بس ظهري حسيته تشخط لشويه حسيته يمد ايده من الباب يدفعني عنها
ورا شويه دخل اسمع صوته بس مابيا اتحرك ولا اشوفه زين
ع هالحاله وغفيت لما فزيت بالكوه فتحت عيني من الضوه
ناقلني لغير غرفه اتلفتت بيها من فوك شباك صغير والضوا الي بيها مو احمر بقت عيني تدمع
من فزيت لكيت اكو كمادات بين رگبتي وع راسي اسمع صوته يخابر اسمعه يكول
.. لا هاي كعدت مايحتاح
وسده واجه حط ايده گال
... صلوات على ساعه ابتلي من وراج
اني رجعت داغفى هو ضربني راجدي خفيف كال
... اگعدي بس تنامين ترجعين تتخربطين اگعدي حتى تصحصحين
وجرني يكعدني بس اني ممتوازنه ابد حسيت بخنكه مو طبيعيه گمت ابجي واصرخ
... ساعدوني ساعدوني
هو يحاول يسكتني ماكو اخر شي طلع سلاحه سحب اقسام
وگال... قسما بالله اذا ماسكتتي افرغ الشاجور براسج
اني گمت ابجي وارجف كتله لا الله يخليك لتكتلني
گال.. لعد اسكتي هزيت راسي بـ اي هو كام طلع من الغرفه..
ضليت ابجي واسولف وحدي وهالفتره مااعرف شلون مشت كمت اعرف الوقت من الشباك
من التعب والفره نمت دنيا ليل كعدت ع ضجه قويه وركض باوعت للشباك اضوه توه طالع كلت
دنيا الفجر
فجأه اندفر الباب طبو اثنين ملثمين وطب وياهم الولد الي جان يمي هم جروني اني صرخت اجه هو جرني ووجهه السلاح عليه ... نهاية البارت ...
يتبع...
عسلك يمشعل بنار جهنم التحرگك حرگ
انعوج حلكي واني اسرد كلامك الفصحى والجلفي
للاسف مااكدر اتفل عليك فشله منا المتابعات 🥲
قراءه ممتعه احبتي
لتنسون التصويت والمتابعه
داانزللكم سكرينات الانستا بس مدايحمل
النت عندي ضعيف
هذا يوزر الانستا
nawras_qasim_22
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!