الحلــــــــقه الثالثـــــــه
رواية... هل كانَ حُلماً...؟
{العِراق-المُصغَر...عنـاق-الارواح}
بقلمي ... لؤلؤة_البِحار ...
___________________•
حره :- طلعنا دنودي الخبز
شفنا شاب نزل من سياره فخمه اسمها لاند گروز
لابس شفقه ورجع فتح الباب الجهه الثانيه
ونزل منها واحد احدب
ضل يتلفت ويباوع لمكان المحل وبيتنا وبيتهم
الى ان باوعلنا
نزل راسه بسرعه
وبعدها عدل الشفقه مالته
ورجع دخل للبيت
من طبو باوعتلي حياة گالت :- هذول يمكن جوارينا الجدد؟
حره.. اي الظاهر هم
حياة... ان شاء الله يكونون زينين...
حره...ان شاءالله
رحنا ودينا الخبز ورجعنا وصلت قريب ببيتي گالت
حياة... ابقي يمنا تغدي وروحي
حره... لا والله مااگدر
حياة... ليش؟
حره... لان رتيل مسويه تنظيف دااساعدها مترهم اعوفها وحدهه
خطيه
حياة... خوش لعد اجي وياجن ع الواهس
حره... هلا بيج تعالي
طبينا لبيتهم گالت حياة لبيبي
حياة... بيبي رايحه اساعد البنات بالتنظيف
بهيه... عفيه يمه روحي
حره... حياة امشي نطفر
من السياج
حياة... احب هالشي.. گالتها بضحكه
حره...رحنا للسياج وگفت ع البرميل داتصعد باوعت لبيتنا گالت بععععع بصوت عالي
اسمع رتيل تضحك
رتيل... تعودت على سوالفج
مااخاف
حره... ضحكنا
طفرت حياة وطفرت وراها لكيت رتيل شاده الدشاشه للنص وشاده شعرها ولازمه الماسحه
من شافتنه كالت... اي يلا تعالن نهجم ع البيت
... صدگ احنا مثلها تحزمنا وبدينا بالغرفه والاستقبال اني وحياة ننظف الغرفه ورتيل وسالي بالاستقبال
طلعنا اغلب غراض الغرفه للهول گلنا خنمسح الاثاث ونجلف الكاع وبعدين ونرجعهن
جبت المكناسه حتى نكنس
حياة كالت... انطينياها وروحي جيبي خنمسح لبين ما اكنس
حره... تمام
رحت حطيت سطل مي وعملاق وغسلت الوصله وجبت الماسحه واجيت لكيتها داتكنس وبيدها ورقه واني رحت امسح هي كملت طبكت الورقه وحطتها بالحمالات
كملنا وگمنا نرجع الاثاث لبين ماكملنا هالهوسه باوعت للساعه بالوحده ماحسينا بالوقت
التفتت على صوت حياة
حياة ... عزا خطيه بيبي ضلت وحدها گالتها وهي تباوع للساعه
رتيل... كوليلها تجي يمنا
خنتغده سوه
حياة... لا والله عدنا بس خلي اروح اشوفها خاف تنتظرني و ماتغدت
حره... تمام روحي ارتاحي تعبتي
حياة... لا ماكو اي تعب يلا بيباي
حجتها وراحت
اني كملت كلشي ورحت سبحت وتغديت ونمت للعصر كعدت على صوت سالي داتقرا فوگ راسي
كعدت مشتهيه حلا گمت طلعت المواد و سويت عوامه خبطتها وكملت گليت ووصلت لاخر وجبه اگليها
اجت رتيل يمي
حره... رتيل بلا شوفيها طيبه..
شالت وحده اكلت منها.... اممم تخبل عاشت ايدج
حره... لعد خلي اودي لحياة خطيه تحبها
رتيل... تمام وديلها
حره... طلعت حافظه وحطيت بيها عوامه لحياة كملت خليتلها شيره هوايه لان تحبها
باوعت لرتيل ... اكلو انتو
اني شبعت
رتيل... وين كلتي انتي..؟
حره... صار ساعه اسوي واكل
ضحكت... بالعافيه
... اخذت الحافظه داطلع فتحت الباب صارت بوجهي حياة داتجيني ضحكت... توني جنت داجي اجيبلج عوامه
حياة... يااي حلو والله مشتهيه حلا
حره... فوتي تعاي
حياة... ضوجه امشي خنفرفر
حره... اليسمعج يكول احنا بباريس تفرفرين بالمنتزهات هي كلها ال**** خنكه بخنگه
حياة... يلا كلمن يمد رجله ع كد غطاه احسن من كعدت البيت ... گالتها بضحكه
ضحكت سديت الباب ومشينا فتحت العلبه داتاكل
انتبهنه ع صوت فتحت الباب طلع الاحدب واجه كدامنا باوع علينا بنظره سريعه ورجع ركز بحياة
طبك حواجبه وهو مركز بيها حياة تفاجئت باوعتلي كتلها...هذا جيرانا الجديد
حياة... اعرف بس شبيه يباوعلي هيج؟
حره... مدري ما اعرف
حياة... اها خاف ع العوامه؟
راحت يمه
باوعتله غير نظراته بسرعه مدتله العلبه كالتله
... تفضل
هو ضحك ورفع حواجبه ويسويلها
الاحدب... اليي اليي هاي الي
دتنطيني
باوعنا لبعض باستغراب ورجعنا ابتسمنا
حره... اي الك اخذ... گلتها بابتسامه
الاحدب... احبها الحلاوه اني احبها
حياة... بالعافيه
هو گال... انتو منو... گالها وهو يفر باصابعه اشارة للسوال كمل... شنو اسمائكم حبابين انتو
حره... احنا جيرانكم الجدد
حياة... هياتنا بصفكم ... حجتها وهي تأشر على بيتها
كال... هاا خوش جيران حبابين يسوون حلاوه طيبه...
حره... بالعافيه... حجيتها بابتسامه
هو كال ... انتي شنو اسمج؟
حره... حره وهايه حياة
الاحدب... فرحت بيكم
حره... وانت شنو اسمك؟
الاحدب... مرتضى اني... حجاها وهو يضحك وياشر على نفسه
حياة... هلا بيك مرتضى خواتك احنا اي شي تحتاجو بعيوننا
هو ركز عليها وابتسم ديحجي صفطت نفس السياره نزل منها نفس الشخص الي اجه وياه
اجه علينا وهو يگله... اني مو كلتلك لتطلع لبين ماجيبلك علاجك
الاحدب... ضجت اختنكت...حجاها وياشر ع ركبته... كمل كلامه وهو يكول... عوامه تريد عوامه؟
الشخص كاله... لا ماريد يلا العلاج بالسياره اخذه
هو راح باتجاه السياره فتح الباب باوعلنا الرجال وگال
... اعتذر اخاف ضوجكم اخويه
حياة... بالعكس ماكو ازعاج
... اخويه عنده مشكله... حجاها واشر ع دماغه بمعنى مخبل...كمل... يتصرف مرات مثل الاطفال ف اذا زعجكم اعتذر
حياة... لا بلعكس ابدا ماكو ازعاج
هو ابتسم كال... احنا جيرانكم الجدد اني مصطفى اي شي تحتاجوه اخوكم اني
حياة ... تسلم متقصر
ابتسم
مصطفى... اترخص
كلناله... اخذ راحتك
وراح فتح الباب ودخل سيارته
لثاني يوم نفس الروتين كعدنا الصبح نظفنا ورا شوي اجت حياة وسمرا سلمت عليهن ودخلن للبيت
رتيل... حلو دام البنات وياج خلي اروح لعذراء اودي الاقساط واجي
حره... ماشي
ماما ومروه طالعات ومقدام مموجود و سالي يم رغوده
باوعت لرتيل وگتلها...رتيل من ترجعين جيبي كيك
رتيل... تمام حطي الجاي ع النار ما اتاخر
طلعت واني كمت احط الجاي ع النار البنات يمي باوعت لسمرا مو على بعضهاو
حره... شبيج سمسم اشوفج ضايجه اليوم؟
سمرا... اي والله خنگه حيل
حره... ليش اسم الله
سمسم... مدري اهلي مجلوبين ورشم مانزل من شغله
انوب ماما راحت لاربيل
ويا صديقاتها
حياة... شعجب مارحتي وياها جان غيرتي جو؟
سمسم... علمود المدرسه لان امتحانات وتاليتها هم حاخذ زيرو بيهن كلشي مدا اجاوب... گالتها بحزن
حياة... لتصيرين غبيه مثل هاي... واشرت عليه... اهتمي بدراستج وكملي هالسنه ترا ضاع هوايه عليج
سمسم... ان شاء الله انجح اكيد اكو قرار يرفعني
اني خزرتهاكالت... شكو تخزريني ترا جد الواحد من تصير عنده فرصه وميدرس هذا غبي وحيندم
حره... الظروف تاثر ع النفسيه وماكو واحد يكدر يركز ويا هيج مشاكل
حياة... هو الواحد شلون ينعرف كافح وجاهد وتعب بحياته من المشاكل حتى لو تواجهك مصايب تحقق هدفك هذا هو الانسان القوي
سمسم... صح بس الحجي سهل مو مثل الفعل
حياة... ومنو كللجن سهل هالفعل بالعكس كتلجن الانسان القوي هو الي يكدر يكمل وينجح ويوصل لهدفه بهالظروف
حره... ان شاء الله السنه الجايه
ارجع
حياة... اي عفيه ترا ميفيدج شي غير شهادتج والله
حره... ان شاء الله... حجيتها واني اتنهد
شويه واجت رتيل
جايبه كعك
صبينا جاي وحطيته بصينيه هو والكعك و كعدنا نسولف بيناتنا
للمغرب سمرا خابرت خالها... خالو تعال اخذني اني يم اختي حياة...
وهم دلته بالمنطقه واجه اخذها وحياة سلمت عليه ورجعت للبيت
لثاني يوم هم رحت يم حياة وهاي صارت قانون
الكل تعود عليه
لو اروحلها لو تجيني ميمر يومي بدونها ابدا
هم رحت يمها خبزنا وساعدتها بالشغل وكعدنا يم بيبي نسولف وگامت بيبي تحجيلنا قصة النبي ابراهيم من رادو يحركوه الكفار ومگدرو
كاعدين نستمعلها شويه وكالت
حياة :- مخنوكه خلي نطلع ..
بهيه... لتروحن بعيد وجيبلي العبايه وطفن الاضويه خلي انام
گمت طفيت الاضويه وحياة غطتها بالعبايه وطلعنا رشينا حديقتهم وهم طلعنا نفتر
وصلنا لبيت الاحدب كالت
حياة :- تدرين هذا الولد من حاجاني حسيته بريئ
حره... مدري شلون يحجي مثل الاطفال
حياة... اي لاحظت اعتقد بيه مرض نفسي
حره... اذا هيج خطيه الله يشفيه
حياة... امين يارب.. حره ضوجه
حره... اي والله
حياة... انوب سمسم ماكو اليوم تكول عندي امتحانات وحتى مخابره ماخابرتني اليوم الزماله
حره... خليها تدرس خطيه
حياة :- عندي فكره...حجتها وهي تباوعلي مبتسمه
حره... شنو ؟
حياة... حابه اروح اشوف بيت ابوي... گالتها بحزن
حره... يا صدك تحجين؟
حياة... والله خلي نروح ماريدها تضل بنفسي
حره... لج مقدام خاف ميقبل
حياة... هو اكيد ميقبل بس نروح هو شمدريه للمغرب يلا يجي وهسه دنيا الظهر منا لليل هواي نلحك
حره... والله هالسالفه خطره خاف يشوفج
حياة... ميشوفني لابسه حجاب اغطي وجهي وانتي هم لبسي
حره... ليش تردين تروحين؟
حياة... ماادري عندي فضول اشوفه
حره... لج خاف نتاخر
حياة... يبو شلون بيج تتحججين متردين تروحين منتاخر دنيا ظهر ب ٢ نروح ونرجع ومحد يدري
حره... جريت نفس... تمام لعد
حياة... خوش تعالي نبدل
... رحنا لبيتها لبست من عدها بنطلون وقميص ولبسنا حجابات وطلعنا ايد بايد
حياة... يلا خلي نغامر خلي نشوف ما خلف الكواليس شنو
حره... يلا لعد تندلين؟
حياة... اي دلتني بيه سمرا وحتى عندي صوره للبيت بس عندهم حمايه لازم نوكف نباوع من بعيد
حره... اوكي خلي نشوف حياة الاغنياء شلونها
صعدنا السياره واني كلي خوف وقلق واحسني مبهذله بس يلا هي حلاتها بالشخص التطلع وياه
بيتهم بعيد كلش عن بيتنا
وصلنا لهناك باوعت للساعه ب تلاثه وربع زين عدنا وقت مشينا وهي تدور بالبيوت ضلينا نفتر بالمنطقه شفنا بيها مطاعم ثنينا لازمات ايد بعض ونباوع بدهشه ماتذكر بيوم دخلنا مطعم فاخر شويه وكالت
حياة... هذاك ... ركزت شويه وكملت.. اي هذاك بيتنا... اقصد بيت ابويه... گالتها بحزن واضح
حياة...خلي نتقرب شوي
حره...باوعت اكو كدامنا سياره عاليه وكفنا وراها نباوع للبيت بعيد شويه عنا
البيت كلش جبير وحلو وبيه اضويه والحديقه الاماميه كلش جبيره باوعنا عليه
حياة... الله هذا البيت الجنت احلم بيه.. گالتها بحزن وخنگه
حره... الي يشوف جمالية هالبيت ميتوقع كل هالبشاعه بالناس الكاعدين بيه
حياة... اي والله
حره... يلا نروح
حياة... بيش الساعه
حره... باوعت ب ٤ كتلها...
ب الاربعه
حياة... نلحك نروح لبيت سمرا
حره... عزا حياة شعدنا
حياة... نشوفه من بعيد ونرجع
حره... هو هنا؟
حياة... اي قريب سياره ربع ساعه
حياة... تمام يلا هو احنا طالعين طالعين
وهم رحنا اشرنا وصعدنا سياره ومن وصلنا قريب
كالت... نازل
هو بيتهم ع الشارع نزلنا شفنا تلث زلم لابسين دشاديش وعگال گتلها ... نروحلها؟
حياة... لا هيج بس نباوع
حره... ليش؟
حياة... منتقرب احسن
حره... تمام
صفنت عليهم الزلم واگفين بالباب بعدين شغلو سياراتهم گتلها
:- هذول منو؟
حياة... ماادري بس هذا الي ع اليسرى خالها عندها صوره وياه
حره... شنو رئيج نخابر سمسم نكوللها احنا قريبين يمكم
حياة... لا خليها
حره... ليش؟
حياة... مااحب احد يدري احنا اجينا لهنا حتى سمرا
حره... تمام اذا هيج تحبين
حياة... اي
باوعت للبيت عيونها دمعت ونزلت راسها و كالت... يلا حره خلي نروح ما اريد نتاخر
حره... لتضوجين حياة
حياة... لا ابد
... غيرنا جو وصدك اخذنا سياره ورجعنا للحي باوعت الاحدب برا والجهال مسوين لمه يصفكون يسوون احدب و هو يصفك ويه الجهال
رحتلهم واني اصيح عليهم... ادبسزيه اوگفولي اليوم بالشحاطه على روسكم لكم زمايل
هم ركضو للافرع وهم يضحكون
حياة... ولكم قليلين الادب شهالحجي العتب مو عليكم على اهاليكم
باوعتله هو هم يصفك عطت بيه... انت شبيك تصفك لتصفك وتخليهم يلزموها عليك
الاحدب... ها اوكي اوكي
حره... هزيت ايدي ومشيت
حياة وراي كالت
:- ميفهم خطيه
حره... يارب يتشافى... حجيتها وطبينا كل وحده لبيتها
اول مطبيت تلگتني رتيل
رتيل :- وين جنتي؟
حره :- هنا نفرفر ضوجه
رتيل... انوب كوليلي... رحت لبيت حياة ملكيتج خفت... باوعتلي و كالت ليش لابسه ملابس حياة؟
حره... انجب الجاي على ملابسي وبدلت
رتيل... اها
حره... اي
لثاني يوم طلعت بتراك بدون حجاب رحت يم حياة انطتني ملابسي
حياة... سمرا خابرتني البارحه بليل بس مبين من صوتها تعبانه وهسه اتصل ماكو مدا تجاوب
حره ... خاف من الدراسه؟
حياة ... اي هي كلتلي مبيا شي بس سهرت بسبب الدراسه وتعبت
حره ... خطيه الله يوفقها
حياة... امين
... ضلينا نسولف شويه وطلعت داطب لبيتنا صار كدامي الاحدب هو ركز
كال.... يبنيه
حره... وگفت فاتحه عيوني بصدمه حسيت صوته مألوف بس مدا اتذكر وين سامعته
حره... ها؟
صفن كال... لا ها ماكو شي
حره... احجي اكو شي؟
الاحدب... لا بس انتي تلبسين حجاب وما تلبسين هاي شلون
ابتسمت... شلون يعني
الاحدب... البارحه... وياشر
حره... اها اي اني اريد البس حجاب بس لحد الان ماثبتت عليه
هو كال... اااا ويحك بشعره
كتله... يلا اترخص
هو اشر بمعنى بيباي ويبتسم
دخلت لبيتنا تغديت وكملت شويه واجت اسيل
اجتنا اسيل و ضلينا اني وياها وخواتي نضحك ونسولف طبيعة اسيل حركه واجتماعيه بسرعه تندمج
حره... خلي اصيح حياة ويانا خطيه الصبح جانت ضايجه
اسيل... اي يلا اجي وياج
حره... مشينا دنروح لبيتها
كالت اسيل
اسيل... حياة ناكعه بكلبي اتمنى اصير مثلها قويه وحبابه اني صح اخذ حقي بيدي بس اميل للشر عكسها
ابتسمت طبينا سلمنا على بيبي كالت بيبي
بهيه :- حياة راحت تجيبلي العلاج
حره... تمام حاروح اشوفها
طلعنا مشينا من يم الاحدب هو سلم على اسيل وسووا حركه بايده وكال :-هاااي
وهي هم اشرتله بمعنى هاي
اسيل... هذا شلون يسوي حركات
حره... خطيه بيه مرض نفسي يتصرف مثل الطفل
اسيل... ياا خطيه
حره... اي والله
رحنا يم حياة سلمنا عليها باوعتلها جايبه العلاج دانرجع لكينا قريب من بيت حياة ع الجهه الثانيه الجهال هم مسوين لمه عليه ويسوون احدب احدب مخبل مخبل
وهو كاعد ع الكرسي وعيونه بجماعه مال شباب قريبين يمه يحجون وياكل موطه
دار وجه باوعلنا دنمشي باتجاهه هو نزل راسه ووكعت الموطه
اسيل شهكت كالت ... يااا خطيه وكعو موطته اليوم انعل والديهم
وهجمت تصيح عليهم وتلحك وراهم بعد اسيل المشكلجيه
الجهال شردو
رحنا يمه هو باوعلنا زعلان وگال
الاحدب... عوفيهم مساكين هم ماجذبو اني فعلا احدب
حجاها ونزل راسه
اسيل... لا انت انقى واطهر منهم صير قوي... واشرتله بيدها شلون العدها عضلات..
هذا التنمر لازم ينتهي احنا لازم نتحد ونحارب هايه الفئه بالمجتمع لازم تثبت انت قوي
وهو يباوعلها ويهز براسه
تالي حياة تحمست گالت ... عااش العراق يعيش الشعب...
ونزلت العلاج بالكاع وكام تصفك هو باوع لحياة وكام يصفك
اني متاكده گال هذن مخبلات اكثر مني اسيل هم صفكت
وكالت :- نحط ايد بايد ونكون اقوياء ونحارب التنمر
اني شفتهن هيج هم گمت اصفگ وياهن طلعت رتيل لازمه النعال عبالها تعاركنا لان الاصوات عاليه كالت من الباب
رتيل :- يا هاي شكو
باوعتلنا وهم نزلت النعال وكام تصفك وتاشرلنا ها شكو
رحنا طبينا وحياة راحت تودي العلاج كالت رتيل
... شكو ليش تصفگن؟
... سولفتلها كالت
:- يا طلعت سالفه تافهه واني اصفك وياجن
ضحكت عليها اسيل خابرت ابوها اجه ياخذها توسلنا بيها تعشي
مقبلت كالت
اسيل... عندي مشاكل اسويها لاتحتمل التاخير
ضحكنا بوستنا وطلعت رحت للسياج صحت حياة
... حياااة وينج
حياة...هااا حره اجيت
حره...سمسم هم خابرتج؟
حياة... لا والله شو لسه ماكو حتى رشم خابرني كلي اليوم نزلت
سمرا يمج مداتجاوب
كتله خاف دتدرس
حره... شعجب سمرا اول تالي
متجاوب؟
حياة... والله ماادري شتكولين نروحلها؟
حره... منا لباجر اذا ماخابرت نروحلها
حياة... اي عفيه بالي يمها
رجعت گعدت بالاستقبال واني افكر بسمسم شبيها ليش مختفيه مو من عادتها
لليل تعشيت وكملت دغسل المواعين صاحتني حياة من السياج صحت سالي تكملهن
ورحت كتلها...ها بشري..؟
حياة... خابرتني بس مبين عليها التعب وكالت باجر اجيج
حره... اي الحمد لله يمكن من الامتحانات لتخافين
حياة... اي يمكن
لثاني يوم الصبح يوم عطله نظفت وسبحت وكملت رتيل دتخيط گتلها
... محتاجه شي حاروح يم حياة
رتيل... بس الملابس بالغساله
شريهن
حره... تمام
رحت طلعتهن وصعدت للسطح اشرهن دااشر بيهن و صعدت سالي
... ها شكو شو صعدتي وراي؟
سالي... دااخذ تراكي البارحه شريته ونسيته
حره... كملت اشر بالملابس سمعت سالي گالت
:- يااااحح
حره... ها شنو
سالي... باعي جيرانه الجديدين الظاهر يحبون الخصوصيه
حجتها وهي تباوع من سطحنا عليهم
حره... مفهمت!
سالي... تعاي شوفي مسوين هذا الچينكو يعني لو اموت روحي ماگدر اشوفهم
حره... وانتي شكو حاشره خشمج لج عيب بطلي هالسوالف
سالي... فضول مو بيدي احب من تصير عركه اعرف كل تفاصيله
وبعدينـ... قطعت كلامها واني اگول
حره...و تنقليه لرغوده وتسون نشره اخباريه مو بلا؟
سالي... اي والله عشتي
هزيت ايدي
گالت...رغوده تگول هذا الولد الاحدب نسيت اسمه
حره... مرتضى؟ شبيه؟
سالي... اي هو يگولك فر المنطقه فر وماكو واحد ممصادقه
حره... بهالسرعه؟
سالي... اي ويگولك هذول عدهم فلوس فاغلب اهل المنطقه شافوه مريض وعود يستغلوه
حره... شلون يعني
سالي... رغوده گالت عازم اغلب شباب المنطقه على غده بمطعم قريب ودافع كومه فلوس واخوه يكوللهم اخويه مريض لتمشون وراه
حره... عزا خطيه
سالي... اي والله حيفلس الرجال
حره... نزلنا وهي نزلت الملابس الناشفه گتلها... يلا رايحه يم حياة تجين..
سالي... لا حادرس هسه
حره... تمام
گلتها وطلعت لبيت حياة دكيت الباب فتحتها حياة ضايجه حيل سلمت عليها
.. شبيج؟
دتحجي طلعت سمرا مبينه باجيه و ايدها مجبره تفاجئت شبيها ايدها هي اجت حضنتني كتلها...
لج هايه شصاير بيج سوده عليه شبيها ايدج..؟
حياة... فوتي نحجي جوه..
طبينا كتلهن... فهمني شكو
سمرا... اخوتي ضربوني
حره... عزا ليش
نترت بيا حياة... شنو هالسؤال حره ليش يعني لانهم حيوانات وماعندهم ضمير... گالتها بقهر
حره... هم حيوانات هالمسأله منتهين منها بس بيمن تحججو وخوالج وين امج وين
سمرا... امي باربيل مارجعت الا البارحه
وهذا الكلب اليتسمى اخويه ضل يهددني يكولي
سيف... بعد متروحين لحياة وتنسين رشم وحنحدد موعد العقد انتي وابن عمج
سمرا... تحلم بهالشي تحلم سامع
اجه مره ثانيه بليل هو وابويه ضل يهددون ويتوعدون واجو خوالي طردوهم واتصلو بماما وكلتلهم اجي باجر
من اجت ماما اجه ع اساس ديشوفها وكعد ع الاساس ديقنعها انو تقنعني اعوف رشم واتزوج ابن عمي واني انقهرت من كلتله متقبل والزواج مو اجبار يكوللها
سيف... غصبا عليها قبلت ولا ماقبلت احنا النقرر المن تزوج ماتقبل يعني نايمه ويه رشم وتخاف تنكشف
ماما كلتله... احترم نفسك زمال
اني طبيت كتله... والله ثم والله هاي اخر مره اشوفك هنا اذا تجرأت واجيت او حاولت تهدد قسما بالله اشتكي عليكم واطلع ع القنوات افضحكم فضيحه لا عبالكم اسكت وحتى عن حياة والظلم الظلمتوهيا احجي ويومين بس قسما بالله يومين تخسرون كلشي باديكم وطز بيكم
هو شافني هيج ضربني راجدي ودفعني ع البلازمه حسيت ايدي انخلعت وگعت ع جهه ماما صرخت هو طلع سلاحه ديرمي دفعته ماما الرصاصه صارت بالثريا
دخت و اسمع اصوات كزاز توكع بالكاع
واسمع ماما تصرخ وبعدها اجو خوالي واحد منهم بسرعه اجه شالني وخالي اياد كله شوفها بيها شي واعيه هذا اخر شي سمعته
وبعدها اغمى عليه
حره... يممه عزاا هذا مجرم ليش مااشتكيتي
سمرا... من صحيت وشفت ماما وخوالي ردت اشتكي بس ماما خافت وكالت سديها وخوالي كالو ماكو فائده من الشكوى يطلع منها بسهولة المي وهذا الحمار بعد ميدخل البيت لتخافون
بس اني حلفت لو انعاد هالموقف ميصير خير
وهالمره اشتكي زوجي اني اختاره مو هم يختاروه ولو اموت لو اتزوج رشم لو ماكو غيره
حره... ورشم دره بهالموضوع
سمرا... لا گتله وگعت من الدرج خطيه توه نازل واگوله واخوفه عليه وهو شيكدر يسوي اذا اهلي حقراء شبيده خوما يكتل اخواني يلا ارتاح
حياة... سمرا اني خايفه هذول اهلج ماعندهم عزيز خاف يكتلوج...گالتها بخوف وقهر
سمرا... معقوله ابويه يفكر هيج؟
حياة... كلشي يسوي
سمرا ماادري شاكولج بس انتي ورشم مراح تنجمعون بهيج ظروف
سمرا...نترك مشاكلنا للزمن
حره... وابوج شلون بيه يريد يزوجج
سمرا... لا مو بكيفه دام اني مقابله ميكدر يسوي شي وهو يخاف حيل على سمعته لو عرف اني ناويه اشتكي يبطل لان ميريد ينفضح
حياة...سمرا اذا حسيتي باي خطر تجين يمي سمعتي
سمرا...اي ان شاء الله
حره... وامج شكالت
نزلت راسها بقهر ورجعت باوعتلنه بدموع... امي بعد هالحادثه كالت عوفي رشم وتزوجي ابن عمج اهلج مراح يقبلون
وگالت هو مابيه شي ضابط وفلوس وبيت وماشفنه منه الشين
حره... يااا
سمرا... اي امي خافت بس اني مستحيل اقبل اموت ومااقبل بهيج ذله اخذ حقي منهم مربع قسما بالله
حياة... يربي دخيلك اهديهم... رجعت باوعتلها...سمرا لتفكرين بالشكوى هذول كلشي يسوون
سمرا... گلتلها لتخافين كلشي حيكون تمام
حياة كلش خافت ضلينا نهدي بيها
طلعت ورجعت للبيت
ضليت بقلق وخوف ضليت ادعي واقره قران لان كلبي ناغزني اكو شعور مو حلو بداخلي حسيت اكو شي حيتغير
مرت ايام وماعدت شفت مرتضى بهالفتره نهائيا
بيوم كاعدين بليل كتلهم
:- شنو جيرانا مسافرين
سالي :- لا ليش
حره... اشو مرتضى جان كبل بالباب يكعد هسه ماكو؟
سالي... يروح للافرع الي هناك ويتجمع ويه الشباب
حره... والثاني اشو نهائيا مااشوفه
سالي... هذا الثاني مشايفته بس سمعت ان هو يشتغل
حره... زين اني يجي ببالي اهله وين امه ابوه
سالي ضحكت... تلكيهم مثلنا
مقدام... اخ سالي لو تركزين بدراستج بدل هالسوالف
سالي... اني متفوقه بكل المجالات
حره... ضحكنا ع سوالفها
لثاني يوم اجتني الصبح حياة تريكت يمنا وضلينا نسولف شويه وكالت
حياة... شو سمرا مداترد
حره... شعجب
حياة... مدري خاف هذول الحقراء شو شسووا
ردت اهديها كتلها... لا لتخافين ان شاء الله خير هسه تجي العصر
حياة... تعاي يمنا شويه ننتظرها
حره... اوك
رحت يمهم طبخنا مرك وتمن اذن صاح الله اكبر اندكت الباب فتحنا الباب رشم لازم سمرا من ايدها وسمرا تبجي
احنا خفنا كلنالها... شكو
طلعت بيبي ع اصواتنا سمرا ترجف بيبي گالت
... ها ولجن شكو
رشم سد الباب ووگف وراه ومبين عليه متوتر وبوجهه ملامح خوف وقلق وعصبيه
سمرا ترجف كعدنا بباب الهول بيبي كالتلي
... جيبي مي
ركضت اجيبلها شربناها مي
ورشم يكوللها :- خلص اهدي لتخافين
اني وحياة وبيبي انخبصنا لشويه هدأت شويه گلتله حياة
حياة... فهمني شكو
هو باوع لسمرا ورجع گال
:- ابوج واخوانها يدورون على سمرا
گلناله... ليش
رشم ... لان سمرا اشتكت عليهم راحت للمركز وحجت للضابط كلشي والضابط خابر الكلب مشعل وكله بنتك هنا ودتشتكي و الكلب حتى ماسجل الدعوى ولا اخذ الحاله بجديه راح يركض لابوها
بهيه... ولج شلون تسوين هيج
سمرا... خليهم يتحاسبون كرهتم
رشم... كلتلج يا سمرا هالفكره شيليها من بالج كلتلج انطيني صبر اني اعرف شلون احاسبه استعجلتي يا سمرا استعجلتي
حياة... كافي لتلوموها خلص
سمرا تبجي حياة گلتلها ... رجعو اذوج.؟
سمرا... اي مدا احس بامان حتى من انام احس حيطبون يكتلوني اخر شي البارحه ابويه جاب الحمايه واخواني غصب للبيت وضربوني
حجتها وبجت... گلولي الخطوبه حتصير باجر واني سبقتهم ونهزمت واشتكيت
جسمي بيه اثار ضرب حياة هذا هم اثبات
حياة بجت حضنتها كالتلها... ضلي هنا متروحين
رشم مرتبك باوعتله لابس زي العسكري كال
:- لا مترهم ابوج يعرف هالمكان مااكدر اخليها هنا ضروري اشوفلج مكان امن يلا كومي
بيبي جرته گلتله... اهدى ابني ولتخاف هو يبقى ابوها ما معقوله يكتلها
سمرا... انتي لسه ماشفتي وجهه الحقيقي طلع واحد نذل
حياة گالت لرشم... اختي تضل يمي لبين متلكى مكان نجي اني و سمرا وبيبي سمرا متبقى وحدها حاليا ابويه مراح يتقرب لان بس يسوي شي هو المتهم الوحيد
رشم... راح ادور على بيت
بمكان بعيد
بهيه... انتو بس اهدو ولتخافون كلشي راح يتصلح
ضليت يمهم شويه وسمعت صوت سالي تصيحني من السياج
رحتلها
سالي... تتغدين يمهم لو يمنا
حره... حبقى يم حياة كالت ماشي وراحت اني والبنات ضلينا بخوف وبيبي تحاول تهدي الموقف
ورشم كل شوي يتصلون عليه واحنا نرجف ونخاف ضلت حياة تهدي بسمرا كلتلها
حياة... لتخافين ميصير غير الكاتبه ربنا
سمرا... افضحه مايصيرلي شي الا لما افضحه
رشم... سمرا خطوه وحده متمشين اذا متگوليلي خلص كافي تهور
سمرا... حااسوي المستحيل حتى ينكشف هالرجال
حره... ولج يكتلج لتتهورين سمسم
سمرا... ليش هسه اني عايشه؟ شنو يعني لان اتنفس اني عايشه؟ تحجي وتبجي كالت نفذ صبري خلص هالرجال ظلم هواي
ضلينا گاعدين وحايرين بهالمشكله والخوف متوغل لقلوبنا
لل ٣ رشم كال... عندي شغل مهم لازم اكمله سمرا امانه عندكم
بهيه... اطمئن يمه
طلع رشم وسمرا نامت وضلينا نحجي اني وحياة واهدي بيها صاحتني رتيل من السياج رحتلها
... حره وين ليش لحد هسه مرجعتي؟
حره... مااجي هسه سمرا مريضه
رتيل... يا شبيها؟
تنهدت... اخوانها وابوها مو خوش
رتيل... حسبنا الله الله ينتقم منهم لسه معاديها
حره... اي كلتها بحزن
رتيل... ماشي لعد ابقي ساعديهن
حره... تمام
رجعت يم حياة و هم صار الليل اجه عليه مقدام بس گلبي ماانطاني اعوفهن
حره... حاابات هنا
مقدام... خو ما بيها شي سمرا
حره... والله مشاكل
مقدام... تمام اي شي تحتاجيه رمشي
كتله تمام وراح
رشم كل خمس دقايق يتصل يتطمن عليها وكال
:- دا ادور ع شقه صغيره او بيت يأمن بيه على حياتها
بليل من نامت بيبي بهيه كعدنا نحجي سمرا ضلت تبجي وتحجي كالت
سمرا... اني حيل كرهته لابويه حيل
حره... لاحظتج اخر فتره متطيقيه
سمرا... اي لان عرفت متورط بجرائم
حياة... شلون؟
سمرا... قبل ليكول لابن عمي ينهي عليه جنت اروح ازوره واحجي وياه من باب ان هو ابويه
مره رحت يمه وجان هو طالع اكو شي بداخلي شجعني افتح اللابتوب مالته جان بيه رمز ضليت احاول مصار
صار عندي فضول افتحه
من اجه هو الظهر وفتحه اني جان تركيزي وياه وعرفت الرمز
ثاني يوم من اجيت بابا بالشغل فتحت اللابتوب و دخلت على ملفات
جانت صور اله وللحمايه وهم يشربون ويمهم بنات ودخلت على صور ثانيه جانت محادثه الباشا يهدد ابويه
بوقتها الباشا كال لابويه حافتح كل الدفاتر القديمه من حياة للراعي الي انتحر بسببك
واغلبها جانت بصمات واكو محادثات مصوره كايل الباشا بيهن لابويه جماعتك اغتصبو بنات وانته تسترت عليهن وصور ثانيه لشخص مقتول ومغطى بدمه
واكو سكرين موجود شخص داز هالصوره لبابا ويكوله لعيونك صفيناه وكثير ملفات ملحكت اشوفهن لان كمت اتقيأ
اثنينا ندهشنا كلنا معقوله
حياة... ليش مكلتيلي
سمرا... مكدرت
حره... ع هالحجي هذا فعلا يكدر يكتلجن بلا مايفكر
سمرا... ادري بيه ادري ولهالسبب اريد افضحه
حياة... بس بالاول لازم تامنين على حياتج يلا
ضلينا نتناقش بهالموضوع للصبح كعدنا تريكنا ونظفنا ورحت لبيتنا سالتني رتيل شكو و حجيتلها ضلت تتحسب عليهم وكالت
... ضلن يمها بالبيت لتعوفنها ابد
حره... ان شاءالله
رجعت لبيت حياة
طبيت اسمع صوت امها تكوللها
... ولج ماما مو هيج تنحل الامور اسمعي مني وانتي بامان
طبيت يمهن بالهول كلتلها سمرا
سمرا... التحجيه مستحيل ماراح اقبل بذاك الكلب ولا اخضع لكلام ابوي وخلي هالشي ببالج راح افضحهم كلهم مو اني التسكت على حقها
امها كلتلها... هسه لتقبلين بس عوفي رشم ولج يمه رشم مراح يصير من نصيبج استوعبي
سمرا... انتي الي لازم تستوعبين ميفرقني شي عن رشم غير الموت
امها حاولت حاولت بدون فائده تالي انطتها فلوس وكلتلها
... لتطلعين منا لبين منشوف حل اخوتج كل شوي يهدون علينا
وراحت وراها اجه رشم كال
رشم... اني وسمرا حنتزوج واسفرها يم اهلي بالسويد لبين متنحل هالامور
حياة... اي عفيه ابعدها منا
بهيه... ليش ماتطلبون السماح منه بلكي تنحل هالامور
سمرا... مستحيل
بيومها هم مثل كل الايام گعدت ورحتلهم الصبح كعدنا نسولف سمرا كالت
سمرا... حجيت ويا واحد حيوصلني لاعلاميه معروفه وراح افضح ابويه
حياة ضلت تهديها وتكوللها...لتفكرين هيج ابتعدي عنهم واخلصي من شرهم..
سمرا... البارحه فتحت موبايلي ودايهددوني ولو اموت مااسكت عن اخطائهم كافي
ضلينا نهدي بيها شويه ورجعت انظف اساعد خواتي ل ٤ تقريبا رمشت عليه بيبي ركضت لبست نعالي ورحتلها طبيت للبيت الباب مفتوح ع النص طبيت لگيت بس بيبي هنا كتله
حره... شكو بيبي البنات وين
بهيه... ولج يمه خابري رشم وكوليله يلحك سمرا اجاها اتصال ركضت لاهلها
عطت مفزوعه... ليييييش وحياة ويين..
بهيه... راحت تجيب علاجي مااادري امها مدري شبيها اخوها الصغير خابرها يبجي يكوللها امي تنزف
حره... دخيلك ربي...طلعت موبايلي بسرعه اتصلت على رشم ميجاوب وطلعت ادور بالشارع
رجعت اتصلت على حياة جاوبت كتلها... وينج
حياة... خير سمرا بيها شي..
وصارت كدامي تركض وصلتلها كتلها... راحت لبيت اهلها ركض
ماادري شبيها
هي شهكت كالت... شبيها تخبلت... هاج انطتني العلاج وكلتلي... روحي يم بيبي
حره... ولج وين رايحه
حياة... لتخافين بس اتطمن عليها اذا اضطريت ابلغ گالتها وركضت
رجعت للبيت بيبي خايفه كالت... وينها حياة
بجيت كتلها... ماادري ركضت وراها دتروح
بهيه... ولج ويين تروح
حره... اتصلت على رشم جاوب اني ابجي كال
... شكو سمرا بيها شي
حره... اي اتصلو عليها وراحت للبيت وراحت وراها حياة
هو بسرعه غلق بيبي تخربطت اني ركضت ع البنات ابجي واحجي كلشي مفهمن مني اجت رتيل وسالي يركضن ومقدام اجه اخذ بيبي للمستوصف
ضليت ببيت حياة ب ٨ اجت بيبي مرتفع ضغطها گعدن البنات يمها يهدنها واني روحي لابت
طول الوقت اي خبر عنهن ماكو صار ب ١٠ تقريبا اندكت الباب طلعت اركض فتحتها
باوعت حياة ووراها واحد لابس زي عسكري حياة تبجي
رحت بسرعه حضنتها وجريتها كتله...ولج وينج سمرا وينها ؟
باوعت لملابسها مو نفسهن الطلعت بيهن لا اجت بملابس جديده
حجت بأنين مخنوگ
... راحت سمسم راحت
وتبجي
مقدام... اهدي وفهمينا
حره... الولد واگف يم الباب طلعت بيبي گوه تمشي حضنت حياة وتسألها مقدام راح للولد سأله شكو گله
... والله ماادري شكلك بس البنيه سمرا لگوها مكتوله ببيت اهلها ومالحكوا عليها للاسف... نهاية البارت...
_____________________
وغادرتنا سمسم وغادرت هالدنيا مقتوله من اقرب الناس الها 💔
غادرت النا اول بطله بسبب صوت الحق
اكو هوايه بنات يسألوني عن مقدام اذا تاجر مخدرات اولا ع الانستا والواتباد يسألون
البارحه جاوبت ع الانستا وحنشره هنا لان مبيا اكتب بعد
والصراحه بسبب هالبارت حسيت گلبي ضاق عليه 💔
السكرينات مداتنشر ويه البارت حنشرهن ببارت وحد بعد. هذا البارت
قراءه ممتعه فراشاتي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!