الحلــــــــقه السادســــــــــــــه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
:- نزلت وراه واشوف مره شايله جنطه سوده على ظهرها ولابسه صايه وتحجي ويا ابو رشاش
ابو زاهر... غلطتي ياخويا ماهيج
جاوبته وهي تصيح... اشعل اهلو اشعل اهلو بالقران
انه ما سهله عندي اخوه يشكون الحلك شني والي يدوسلي على طرف اكسر رجلووو
واكفه ع الدرج مصدومه بهالمره الكدامي من شكلها مبينه وكحه وصوتها اعلى من صوت عمي وتحجي وتهدد
نزلت وگفت يم طيبه وهي مستمره تصيح
... اشعل اهلوو
بكر... جان تفاهمتو ياعمه
... على شني نتفاهم يولو غير هو هاني وغلط عليا تقبلوهاا؟؟
باوعت لابو بكر كالتله... تقبل تنهان اختك يا ابو زاهر ؟؟
ابو زاهر... لا مااقبل فوتي فوتي هسه نحلها
كالت وهي تطب للمضيف... بالقران مااريدو ولا اريد ادحك خلقتو اتطلك منو من باجر
طبو وراها سمعت اوس وحجه يم رشاش گاله... تعال ندحگ شني السالفه ليش متكاونه ويا زلمتها
كالتله مرت حازم بهمس وهي تضحك :-تلگاها هالمره ضربتو بالنعال
جاوبها رشاش وهو يمشي... ما غريبه عليها هالسوالف
طبو للمضيف اني بلعت ريگ باوعت بصدمه لـ طيبه ورجعت باوعت لجيلان فاتحه عيونها وتبتسم مجامله كلتلهن ... هاي منو؟
طيبه... هههههه شني ماتدرين
حره... بشنو؟
طيبه... هاي گبل وحده دعت على جدي ابو ابوي
حره... اي؟
طيبه... الحرمه دعت عليه وگالتلو عساك بالساحق والماحق والغضب المتلاحق
هزيت راسي باي واني مركزه عليها كالت... طب فش اجتو عمتي ثناء
فتحت عيوني بدهشه هزت راسها وابتسمت مجامله گالت... اي الي ببالج صحيح هاي... واشرت ع المضيف... هي الغضب الملاحقنا امدانا
غمت روحها وطبت للمطبخ بعصبيه منا عرفت هاي ام مصايب
ركضت ورا طيبه كتلها... شلون بيا احميني هاي ينخاف منها وكحه
كالت وهي تمسح الطباخ... صيري اوكح منها
باوعت باتجاه الباب گالت... هاي مطوله عدنا اكيد
حره ... خاف متحبني
طيبه ... بدون شك هي تموت على ام احمد
حره... ليش
طيبه... شبيه الشيء ينجذب اليه وهذول اثنينهم جذابات وحقودات
حره... مبينه متأذيه منهن
طيبه... اكثر مما تتصورين بس ماعلينا اكيد راح تجي اللحظه الي اعرفهم بحدودهن
طب رشاش كالتله... ها خذت اقامه هنا.؟
رشاش... لامحدوده للاسف يعني
طيبه... وشمفينه هالمره؟
رشاش... مامسويا شي الفقيره المسكينه بس كاتله اختو
طيبه... عفيه زلمه جان سحلتها گبل لاتجيبها امدا هيج زلم
ضحك كاللها وهو يطلع مي ... هو يکدرلها غير تشگو
الحرمه اخشن مني
ضحكت بصوت عالي گال... يولو فضحتينا هسه تجيج
حره... كرهتها بدون مااحجي وياها
كال... ولا تحجين اصلا
حره... شنو بطلت مانروح علمود الغرفه؟
گال... لا خلي نروح اخلص من صياحها
لزمته طيبه من ايده كالتله...انه بشاربك يخوي اخذني وياك صوتها يقززني
ضحك كاللها... بسࢪعه بدلي
ركضت طبت لغرفتها تبدل صعدت وراها داطب لغرفتها سمعتها تحجي ويا اختها هند
هند تكوللها... شني حيجيبلها غرفه؟
طيبه... عروس عجل تبقى بلايه غرفه؟
هند... هي القبلت يطبها مرض
طيبه... عيب هالحجي احترمي
هند... اوي يالملاك ختفيدج الـلواڪه
لـ حرها اصلا اذا بقنها شهر كلش زين
ضحكت طيبه كالتلها... والله اخوي يبيع الف ام احمد وثناء ويشتريها
هند سكتت
ضجت داارجع سمعت هند تكوللها :-عجل مايعرف يجي يگلي يجوز اريد اروح وياكم شگد يفرق
اسمع طيبه تگوللها... بطلي هالسوالف
تركتهن و رجعت نزلت وبينت عليه الضوجه طبيت للهول رشاش كاعد وهاي مستمره تصيح بالاستقبال والولد وابو يمها
شافني گالي... حدري هين
رحت كعدت يمه گالي... شبيج ضجتي
هزيت راسي بـ لا... ماكو شي
گالي... لا تضوجين من عمتي تراها ماتگدر تمسچ بـ اذى وانه موجود
ابتسمت هزيت راسي بـ إي نزلت طيبه گال... يلا مشينا
طلعنا دانصعد بالسياره ركضت قبلي صعدت بالصدر گالت... دوري
اني ضحكت گعدت ورا رشاش لاحظ اني ضايجه حاول يلطف جو گال... اي طيبه تدرين بحرمة اخوج شتريد
طيبه... شني شتريد
گاللها... تريد مرايه ام الشمس
طيبه... سهله... باوعتلي گالت... كلما تردين تدحكين لوجهج بالمرايه صيحيني اوكف يمها وهاي حصلتي مرايه ام الشمس بعد شتردين؟
ضحكت گتلها... الله يرزقني ثقتج بنفسج
طيبه... امين
نزلنا وشوفني هواي غرف الى ان عجبتني وحده تركيه گالت
طيبه... يولي التركي يتكسر ما زين
حره... لا حبيتها حلوه
رشاش... ما مشكله نبدلها لو تكسرت
وراح يعامل على الغرفه واشتراها ورجعنا نفتر بالاسواق شفت طواك وحفايات اشتريت درازن
ورشاش يگلي... ادري شني راح يختفن وهالگد ماخذه
حره... احسن
صعدنا السياره دانرجع گالت طيبه :-خلي نتأخر بلكي للعصر تديح ثنيوه
گاللها... خلي تولي شني تبتعدين عن بيتج بسببها البسيها
طيبه... رغم هذا غدينا ياابو السباع
ضحك كاللها... صار
طيبه... اخذني للمطعم الدائما نروحلو لا تغيرو.. باوعتلي كالت.. اكلهم طيب ونظيف
هزيت راسي وباوعت من الجامه ولا اراديا قارنت بيني وبينها من جنت ببيت اهلي وهي تحجي وتسولف ومنطلقه ابد مااحسها تتقيد گدام اخوتها
بلعكس علاقتها حلوه وياهم على عكس هند ما مقربه هيج من الكل
سمعتها كالتله... اي ابو السباع خندحگ محفظتك شگد بيها
باوعتلها المحفظه بايدها ابتسمت گتله :-رشاش عود ليش يكولولك ابو السباع؟
ابتسم قبل لا يحجي سبقته طيبه گالت... لان جنوده سباع وهو سبع فيسموه ابو السباع
ضحك باوعلي و كال... ها عرفتي
هزيت راسي باي وصلنا للمطعم ونزلنا جان كلاسيكي وحلو عجبني كعدنا رشاش انطاني المنيو
گال... اختاري
قريت الاكلات الموجوده وحيل خجلت لان اغلب الاكلات مااعرفها والمشكله اسمائها غريبه واني مطالعه لمطعم سابقاً
رشاش كاعد بصفي گلي... ها شتختارن
باوعتله بدهشه گتله... هاي شنو رشاش
كال... شني
گتله... شو الاكلات اسمائها عجيبه غريبه اول مره اسمع بيهن... وضحكت
باوعلي بدهشه وبعدين ابتسم وباوع لطيبه رجع باوعلي گال... ماعليج بهذني كلهن ماطيبات... واشرلي عليهن
طيبه... خويه انه اريد باجه هذن كلهن مايشبعني
ضحك كاللها... لا تفقدين انتي شيطلعج منا اگوم انه اجيب انتن تتفهن
وصدگ جابلنا اكل ومقبلات واكلنا ورجعنا للبيت نزلنا فتح باب البيت كتله... الغرفه شوكت يجيبوها
... العصر
طبينا للهول واول ماطبيت انصدمت بـ ام احمد بوجهي تباوعلي بحقد تفاجئت طب وراي رشاش ركض ابنها احمد عليه اني باوعت لرشاش بعصبيه
گاللها... من جابج انتي
سمعت صوت عمته ثناء طلعت من المطبخ وگالتله... شهالحجي ابو السباع غير بيتها هذا
وام احمد تباوعلها وتبتسم وتهز براسها گاللها... مااضن سألتج الج عمه لاتدخلين روحج بيها الله يرضى عليج
ثناء ... شني ماادخل غير بنت اخوي المرحوم
وبعدين وين اكو بيت مابيه مشاكل قابل الحرمه تعوف بيت زلمتها ماترهم يعمه
كاللها... بنت اخوج انه مامعتبرها زوجتي ولو عندها شوية كرامه تفكني
وبعدين دام الحرمه مالازم تعوف بيت زلمتها شعندج هين؟
ليش مابقيتي ببيت زلمتج؟
ثناء ... ياا يااا ياا عجل تعيرني يـ رشاش مستثگلني وانه ببيت اخوي؟
كاللها... انه جاي اذكرج بحالتچ گبل لتنصحين احد دحكي لروحج ماشيه بالنصيحه لو لا
حتى ماتتفاشلين
حجت بصياح... دحكوو دحكوو شلون يعايرني هاي كله لان تزوجت... وباوعتلي... تغيرت علينا من ورا هاي.. وتأشر عليا..
بعت اهلك الي تعبو عليك بيومين من وراها
وفوگاها جاي تهيني يـ رشاش!
والله لأگول لابوك على اهانتك هاي
يـ رشاش
گاللها... عندي خدمه اذا تحبين تتصلين عليه
ثناء ... صلفف صلفف والله ماجذب ابوك بيك صلف وماتستحي بس انه اخخ
انه صوجي ادافعلك اكول خطيه مثل وليدي وانه امممه
بسرعه كالتلها ام احمد... لا عمه والله هو يحبج ويعزج وساعة عصبيه حبيبه لاتاخذين على خاطرج
حجه رشاش... لاتقارنين روحج بامي رجائا
لو تدفعين كل عمرج ماتصيرن بثلث من محبتي الها
ثناء ... ليش عجل انه ماتعبت بيك؟ما ادافعلك؟
ماافكر بمصلحتك؟
بس هاي انت مايفيد وياك غير التلبسك مثل هاي
وتهين عمامك وماتحشمهم زلممم ماتحب بس الاهانه
كاللها... اول شي لاتعلين صوتج نحن ما بالشارع وهاذ بيت محترم ثاني شي من تحجين احترمي وثمني حجايتج الحجايه التنكال عن حرمتي تنكال عني
واعرفي حدودج ولا تتجاوزيها هاذ البيت ما بس بيت اخوج وبيتي بعد والي جابج هين مايكدر يردج لو طلعتج منو
هي سمعته كال هيج لو تكهربت كامت تصيح... يطردنيي من بيت اخوي عبالو يستقوي عليااااا
اسمع يول انه عندي اخوه تشگ الحلگ بالقران اخليهم يكاونوك
خاف عبالك بسالفة حسنين محد ردك انه مااسكت بالقران
الي ياذيني بحجايه انهيه
طلعت مرت ابو بازار الصلاة كالت... يمه شبيكم دخيل الله اتعوذو من الشيطان مازين العرايك تگصر العمر
ثناء ... رشاش مامحشمني دحگ عمامو ساكتيلو صار يتصرف من كيفو
صاح... احجي عدددددل
نزيت اني هي بجت كالت.. وانه شسويتلو وهيج يهيني حتى يرضي حرمتو
كال... استغفر الله
وهي مستمره تحجي تكوللها... انه رحت جبت بنيتنا ام احمد حتى نهدي النفوس ودحكي شسوا بيا ماخلا حجايه ماحجاها عليه
هو فتح عيونه كاللها... يعني انتي جبتيها!
انه ما كلت ممنوع احد يجيبها انتي منو وما تسمعين حجايتي
طيبه جرته كالتله... خويه هدي ماترهم تسوي مشكله
وذيج تدردم وتصيح طببتها ام حازم للغرفه وهي تهدي بيها وهاي ضرتي وگفت تتلوگ لرشاش تتموع وتحجي تگوله
... والله انه بس ردت امقلبها شعندي وياها غير اختي هي بس دامها زعلت مااعيدها لخاطر عيونك
اني باوعتلها صفح كالت... انه ماعندي غيرك سند بهالدنيا لاتكسر بيا ابو السباع
وحمودي يدحگ ابوه بيك
دار وجهه كال... استغفر الله يول حسي على دمج شني ماعندج احساس انتي
افتكار... غير من حبي الك مابيدي ابعد عنك
اني ماتحملت خزرته وصعدت ركض لغرفتي طبيت سديت الباب احس نار تحرگ بصدري
كعدت ع السرير ابجي
طب هو وراي كمت وكفت كدامه كتله
:-هاي شنو شعدها اجتت
كال... بالله عليج لاتزيديها علي انتي دحگتي شصار تحت
حره... اي شفت كلش زين هاي شلون تتموع كدامك
گال... وانتي ليش ضايجه انه شايلها من گاعها؟
هالحرمه متعوده تنهان يلا تجر عدل
كعدت كتله واني ابجي... طلكها مااعيش ويا ضره اني معليه
جر نفس اجه كعد بصفي كال... جاي تدحكين الوضع كلشي ضدي اصبري عليا لبين مااحل الامور
باوعتله كتله... رجعني لاهلي
باوعلي كال... بربج؟
كتله... لبين متحلها وتطردها من البيت ارجع اني مااتحمل فكرة اكون ضره
كام كال... لاتخبليني ضرتيش متكليلي الحرمه ماجايسها انه
حره... بس على ذمتك
گال... انه مو نذل احط عيني على حرمه جان عاشگها اخوي
حره... شنو الفائده الكل يكول هاي مرتك
وكف كدامي تقرب مني گال... وانتي شعليج بالكل المهم انه
فرك عيونه وكال بقهر... لاتبقين تذكريني بهالغلطه وتعاقبيني عليها كافي صارلي سنين اكل بروحي
لزم ايدي كال... انه ماادحگ لوحده غيرج
لاتعاقبيني على سالفه ماجانت بايدي
مسحت دموعي كعدت على السرير حطيت ايديه على راسي كتله... ماادري مامتحمله وجودها
كعد بصفي كال... المهم نظرتي الها ما مهم هي شتگدر تسوي يعني؟
انه لو مفكر بيها صارلي سنين حتى كبل لااعرفج
هي جانت رخيصه بنظري وراح تبقى هيج
حره... حتى لاختي لسه ماخابرتها ولا كلتلها عن زواجك لان ادري بيها ماتقبل
... باوعتله كتله... راح تزعل هواي
مد ايده لخدي يمسح دموعي كال :-احلها وياهم وداعتج مااكدر اخليج بين نارين
بس انطيني شوية وقت
هزيت راسي بإي گتله... يارب
باوعتله كتله... رتيل ماراح تقبل
كال... من تعرف ظروفي راح تعذرني
حطيت راسي ع صدره گال... لاتعوفيني حره جاي أحارب الكل علمودج
انه ماعندي استعداد احرگ بروحي اكثر بعد ما رممتها وياج
جر نفس وكمل بقهر... انه مابقى مني غير الرماد الزمن اخذ مني هواي
جاي اتعب حتى ماترحين مني
حافظي على تعبي هذا
حره... اني هذا مو طريقي واجيت لهنا علمودك
باسني من راسي گال... اعوضج عن كلشي اعوضج
ابتسمت حضني وبقينا ع هالحال صار هدوء تام بالغرفه فزينا ع صوت الموبايل جاوب كال
... ها كسار
سكت شويا كله... انجب عريس انه شعندي اگابلك
ضحك گله... من التحق
سكت شويه ضحك گله... وليي
.. وسد الخط
گتله... تذكرت
كال... ها شني
حره... كسار شيصير منك
رشاش... صديقي
حره... لعد شو ذاك اليوم تگول لـ طيبه
قبل لا اكمل ضحك وگام كال... اي طلب ايد طيبه مني
حره... اي وهي موافقه؟
ابتسم وگال... اي
حره... لعد ليش ماخطبو لسه؟
رشاش... لان هو عندو ظروف بس جاب مشيه عليها ونحن منطيه كلمه
حره... بلكي مايتزوجون
رشاش... ليش؟
حره... يعني مو للابد هيج يطولون فتره
رشاش... شعندج وياهم
جريت نفس... بس طيبه الي تحبني عاد تبقى وياي لبين ماتطلك هاي
ابتسم مسح باصابيعه على خدي كال :-انه يمج ثقي بيا
ابتسمت هزيت راسي باي كال... تنزلين
حره... لا اريد اخابر اختي رتيل من اجيت لسه ماحاجيتها
رشاش... اني خابرتهم وطمنتهم
حره... وتعاركتو مو؟
رشاش... لا مو كِلش
حره... إي واضح
ضحك وانطاني الموبايل كال... طالع شويه
حره... تمام
تقرب باسني من عيوني وطلع من الغرفه اتصلت على رتيل رن مرتين وجاوبت كتلها... شلونج
رتيل... ياحقيره خلي الزمج الا اكطع النعال على راسج
ضحكت كتلها... ليش
رتيل... شنو ليش ماتخابرين ماتگولين يضل بالهم البارحه ابد مااتصلتي
حره... مو وداني لاهله
رتيل... اي كلي
تنهدت... وابو ميريدني
رتيل... يا يلوكله يلكى مثلج عشتو
حره... وخطيه هو متعارك وياابو وويا كل عمامه علمودي
رتيل... شلون كلاوات
حره... لا رتيل صارت العركه كدامي
حجت بهدوء... صدگ؟
زين ليش ميردوج؟
حره... مو هو حاول يصلح الوضع ودزلنا مشيه بيوم الي انهزمت وبنص الطريق رجعهم
جرت نفس كالت... شوفي الغلط منه هو مو منا احنا شمدرينا ديجون غير يكول قبل بيوم الصبح يلا كلي
حره... خطيه تفشل
رتيل... زين عمامه شبيهم ترا الكل تصير عدهم ضروف
حره... عبالهم احنا كلناله مانستقبل عمامك ورجعهم
رتيل... رشاش هيج كللهم؟
حره... لا هم هيج فكرو
رشاش كللهم عندي شغل بس ماصدكو
رتيل... اووف يحضنا بيا مگبره نايم كلشي يصير عكسنا
زين خوما اذوج
حره... لا ابد ورشاش كلش زين وياي
سكتت رجعت كالت... ملاحظه نفسج شكد تحجين بيه؟
شبيج ذايبه بيه؟
ابتسمت... يستاهل هو خوش رجال
رتيل... ياااح منو الجانت تبجي وترجف تخاف منه
حره... اي لان انصدمت بس اكتشفت هو ميحب يأذيني ابد
حتى لو يهدد بس حجي
رتيل... ماادري اني لسه ضايجه منه
حره... حقج بس هو الظروف كلها عكسه
رتيل... رغم هذا غِلط
حره... اي صح بس دايحاول يعوضني
رتيل... يمه يمه ماتتركين عليه ثغره
ضحكت گتلها... هو هم متعوب مثلنا
ضحكت بإستهزاء گالت... شلون متعوب انذل؟
لو جان يخبز ويبيع للعالم؟
لو طلع بالظهريات علمود خمس تالاف؟
حره... يمكن حياته اصعب الفلوس مو كلشي
سكتت شويه وكالت...حره اكو شي متغير بيج؟
من شوكت تكولين الفلوس مو كلشي؟
حره... من شفت رشاش عنده فلوس ومامرتاح
رتيل... ليش؟ شناقصه ومايرتاح
حره... ابوه ظلمه
رتيل... ليش
جريت نفس گتلها... زوجه من مرت اخوه
فزت گالت بصياح... شنووووو متزوووج؟؟
حره... بس افهمي
رتيل... ولج شافهم شافهم يعني هذا المصخم طلع متزوج
ولج شلون طايقته
لا وتدافعيله شربج سحر لو شنو
هسه لو الزم النعال اكطعه على ظهرج احد يلومنييي؟
حره... بس افهمي
رتيل... راح انجلط ياالله
حره... رتيل اسمعي مني وبعدين حكمي
رتيل... اي شنو
حره... اخو انقتل قتلو داعش
رتيل... الله يرحمه
حره... اخوه قبل لايموت جان يحب وحده كلش يحبها ع گولة رشاش يعشگها
وخلف منها طفل ومن جان عمر هالطفل شهور انقتل اخو رشاش
رتيل... لا حول ولاقوة الا بالله
حره... فعمام رشاش واهله كالوله لازم تتزوج مرت اخوك وهو رفض وضل رافض ست اشهر
وحتى بوقتها جان امشي على بنيه بس ابو خربها
وهواي صارت احداث وضغوطات عليه الى ان اضطر يتزوجها
رتيل... بس هذا مو مبرر حره الرجال متزوج حرام عليج لاتخربين حياة مرته
شلون راضيه انتي
حره... هي بغرفه وهو بغرفه وما لامس شعره منها
رتيل... يااا
حره... والله
رتيل... خاف يجذب حره
حره... لا حتى اهله كلهم هيج كالو والكل يدري وهو اصلا اشترط عليها قبل الزواج
لان مرة اخو مايكدر يتقبلها
رتيل... رغم هذا شلون تامنين بيه حره خاف من يضمنج اله يروح يكمل زواجه منها
حره... هي يمه من سنين حتى قبل لااجي اني
رتيل... مامرتاحه اوف راح انجلط
حره... اسم الله عليج لتخافين اني بخير ورشاش وعدني يصلح علاقته بيكم ويراضيكم
رتيل... خايفه عليجن حيل
حره... احنا بخير لتخافين
رتيل... لازم اجي واشوفج واني اتصرف
حره... تعاي ياريت حيل مشتاقتلج
رتيل... ان شاء الله
حره... حجينا شويه وسدته بدلت وطلعت نزلت جوا وبيدي موبايل رشاش دورت عليه مموجود
كعدت ع الدرج اكلب بالموبايل فتحت الواتس مالته
شفت هواية ارقام اغلبهم ما مسجله
شفت صورة عثمان عرفت هذا رقمه صابني فضول دخلت عليه المحادثات عباره عن ارقام وحجي بالانكليزي واتصالات وصور دواعش
ضليت اصعد بالمحادثه ما اكو كلام مهم الى ان وصلت لمحادثه عثمان داز لرشاش
... ليش ماتروح للعرس شني مضروب بوري؟
مجاوبه رشاش
... خابرني الفرح رايد علاقه وياي گتلو سنين صار الحزن خاطبني
راد عليه عثمان
:-خابرتو وگتلو طلگنا انه وياه
گال اخذ صاحبك يول وولي من يمي
راد عليه رشاش
:-ونيت بحزن عاتبتو والله هواي
بس هي قسمه ونصيب شبيدي بس فهمني
راد عثمان
:- اخ بويه
رشاش دازله
:-كمنا نمضرط حبيبي... وحاط ملصق ابو البوسه...
عثمان داز
:- حبيبي والله
ضحكت بصوت عالي رفعت راسي شفت اوس ينزل من فوگ وبيده كتب
باوعلي ابتسم كال... عفيه بمرت اخوي هيج اريدج سبعه
دوري ورا رجلج ترا الزلم مالهم امان
مر من يمي ونزل ضحكت كمت ورا طلعت ام احمد من المطبخ
ابتسمت گتله... لا يا اوس اني متأكده من حبه الي
... باوعتلها وكلت... يحبني ميشوف غيري
هزيت راسي گتله... واثقه من هالشي... احجي واباوعلها رديت باوعتله گتله :-بس هو گلي لعبي بموبايلي وتونسي لان ماعنده شي يضمه عليه
هي خزرتني ودفعتني من كتفي كالت :-انتي شنو دتسمعيني
صاح بيها اوس ... ديري بالج تمدين ايدج مااسمحلج
البارحه طردج شني ماتوبين انتي
افتكار... عجل ماتدحكها شلون تعيل بيا
ديجاوبها طلعت عمتها من المطبخ جرتها كالتلها... حدري هين يول وفكينا من المشاكل
بهالاثناء نزلت طيبه من الدرج اسمع عمته ثناء تگول... هذا امتحان من الله لان نحن ناس خيره والله يرد كيد العدو
نصبر شبيدنا قابل الله يعلم شمشربه الولد وهيج صايريلها مثل المي بالصينيه
اني فتحت عيوني وهزيت ايدي صاحت طيبه... اوووي هاي منو الخيره
صم حلكها اوس وكاللها.. بالله عليج غلسي هي هم تدري بنفسها جذابه
ومغلسه
رحنا كعدنا بالهول العب بالموبايل اجه اوس كعد يقرا كتاب لشويه وشميت ريحة الجاي باوعت لطيبه كتلها... الله جاي
اوس شال راسه گال... وياكم ع الواهس
ضحكت كتله... خاف اطب ويكتلني
اوس... بصراحه مااضمنلج سكوتهن
طيبه كامت كالت... كومي هو هذا الناقص نخاف نفتر براحتنا ببيتنا كومي والتحجي اسحلها
كمت وراها كالت... انه اخت السباع الي يحاجيني افشكو نصين
وطبينا للمطبخ جانن يحجن سويا اثنينهن التفتن عليه باوعلي صفح غلست طلعت الصينيه وطيبه تحضر بالاستكانات
حجت ثناء كالت... اي يمه مثل ماكتلج انتي هين المعززه المدللة
جبناج بمشية عمام وبزفه وبمهر اما الغير شحصلو
ضحكت بصوت عالي ... حالهم حال الفصليات لابدلة عرس ولا زفه
حسيت القهر والحراره وصلت لراسي وعيوني غوشت ضحكت ضرتي كالت وهي تباوعلي :-بالله ماجذبتي بحجايه ياعمتي هو الرخيص هيج يجرالو
طيبه نترت... سدي حلگج يول واحچي عدل
ثناء.. وانت شبيج انتغزتي طويبه شكو الحجي مسج
طيله...لا لان هالكلام جاي من وحده ذليله تبوس بالقنادر حتى تبقى يم رجال ماطايقها
وهسه جايه تتفلسف
كامت الحربايه كالت... هاي عليييه
طيبه... اي عليج
ثناء كالت لام احمد... عوفيها يمه هاي صلفه ومسترجله محد يكدرلها خوش منطيها مجال اخوتها
ضحكت طيبه كالتلها... اكيد شني نسيتي انتي عمتي؟
ثناء... يا يا جسره تهينيني ببيت اخوي
دترد طيبه طب رشاش گال... خير شعدكم ويا اختي
ثناء... اختك تحجي عليه وتهيني ترضاها ولو هي منين اخذت هالحافز غير منك
سمعت صوت اوس كال... فكونا من المشاكل تراني جزعت جيبولي جاااي
رشاش اشر لطيبه اخذت الجاي وجرني من ايدي واحنا دانطلع كال :-شبيج شحجن وياج ذن
مرديت كعدنا عود نشرب جاي كتلهم :-ماشتهي هاك... انطيته الموبايل وصعدت الدرج
صاحني مرتين مارديت صعدت طبيت للغرفه گلبي نار طب وراي كال :- يول راح يجيبون الغرفه هـ... وسكت
گال بهدوء... شبيچ؟
كتله واني ابجـي... انت ماسويتلي عرس
گعد بصفي كال... ومن هاي تبچين
حره... قبل شوي عيروني يگولون حالها حال الفصليه
رشاش... من قهرهم هيج گالو
هزيت راسي بـ لا گتله... هم ماچذبو فعلا اني اجيت لهنا بلا عرس ومهر ولا أي شي
مسح دموعي ابتسم كال... والله لأسويلج احلا عرس ما علمود اسد حلوگهن
لا بس انتي تستاهلين واحد يفتخر بيچ كونج زوجتو
ابتسم كال... وانه كِلش فرحان ومامصدگ شوكت صرتي الي.. وجر ايدي باسها ضحكت گال... اي هيج اضحكي دموعچ هاي تچوي گلبي
ومد ايده يتلمس خدي كتله... شدعوا هيج كلامك حلو
ضحك گال... من الحلاوه الگاعده گبالي... وباس عيوني
هز راسه گال... يلا كومي نزلي بغرفة طيله
حره... ليش؟
رشاش... راح يجيبون الغرفه
گام صاح... اوس تعال نطلع هذول الاغراض
نزلت غسلت اجت طيبه يمي كالت :-لتهتمين خيولن من قهرهن هيج يحجن
هزيت راسي باي رحت كعدت يمها بالغرفه گتلها... لعد وين هند
طيبه... طلعت ويا امي للسوك
حره... طيبه هذول البرا
طيبه... شلة الزنابير
حره... گلتي اذوج شلون؟
ابتسمت بقهر گالت... الي شخصيا يمكن ماكثير اذوني بس اذو المرحومه اختي كثير
حره... احجيلي عنها
ابتسمت گامت فتحت كنتورها وطلعت صور انطتنياهن جانت صوره لبنيه شابه حاضنه بنيه صغيره يطلع عمرها ١٤ عرفتها طيبه ضحكت كتلها... هاي انتي
طيبه... اي والي بصفي المرحومه
حره... حلوه
طيبه... الصوره قديمه بالحقيقه احلى
حره... شلون أذنها
دمعت عيونها گالت... بعدين احچيلچ كلش اختنگ لو حچيت هسه
حطيت ايدي على ايدها وگتلها... الله يساعدچ
طيبه... نحن أخذنا نصيبنا من الحزن ومنتظرين عوض الله
.. باوعتلي گالت.. انتي لگيتيه الي يعوضج ماراح تلگين واحد يحبچ گد اخوي
ابتسمت گالت... احجيلي عنج انتي
كعدت احجيلها عن نفسي گبل وشلون جنت اخبز للعالم حتى اعيش وشلون ابوي يكره السنه وشلون عافنا
طيبه... يعني ابوكم عايفكم؟
حره... اي
طيبه... اخوي ماكال هيج لاهلي
سكتت... شگال لعد؟
طيبه... گاللهم انو ابوكم انفقد بحرب الطائفيه
سكتت باوعتلها... ليش هيچ حچه؟ نزلت راسي افكر گتلها... شنو يستحي من اهلي؟
طيبه... لا ابد لتفكرين هيج بس انتي متعرفين اهلي اقل شي ويعيروج ويمكن هو راد ينهي السالفه حتى محد يأذيج بحچايه
حره... والله
طيبه... صدگيني اخوي مايحب يجرحج ابد ولا يحب احد يقلل من قيمتچ
ابتسمت گالت... تحبينو
ابتسمت نزلت راسي گالت... الله يديمكم
للمغرب صاحني رشاش كتله... ها راحو
رشاش... اي تعاي شوفيها
طبيت شفتها كتله.. عاش ذوقي يخبل
طبت طيبه وجيلان مرت حازم كالت :-تخبل
اتصل موبايل رشاش رفعه كله... هلا عثمان
اني فزيت صار تركيزي ويا حتى احجي ويا سالي تلاشت ملامحه باوعلي ورجع گله بهدوء... ابقى بمكانك جاي... وديطلع
كتله... شكو
كال... ماكو شي شغل
خله وطلع لليل تعشينا وكملنا وهو ماكو انشغل بالي صارت ال ١٠ وهو ماجاي كاعده بالهول ومنتظرته يجي على نار
لان حسيت بشي غلط
اجت طيبه كالت... تعاي نسوي عصير وكيك علما يجون
كمت وياها سويت عصير برتقال بالخلاط دااصب اجه حمودي كلي... عمه عمه
باوعتله كتله بضحكه... ها يعمري
احمد... هادا اني احبو انطيني منو
حره... تدلل
صبيتله كلاص وانطيته كال... شكرا وطلع من المطبخ
بهالاثناء طبت ضرتي خزرت ابنها كلتله :-حمودي هاي منيلك العصير
هو اشر عليه وكاللها.. من عمه
افتكار... عما بعينها منين صارت عمتك جيب
جرت الكلاص منه هو ماقبل لزمه كاللها... احبو احبو
افتكار ... لاتسممك يمه هاي ماتحبنا
انجب العصير الطفل بجى انقهرت منها كتلها... حرام عليج خافي الله واذا شرب من العصير
دفعتني كالت... انتي لاتتدخلين عود انتي مثاليه عبالج مااعرف بهالسوالف لا عيني حافظتهن تردين تاخذين ابني ورجلي حتى تطلكيني واصفى وحدي... وبجت كالت بصراخ... تحلمين والله
وشالت الكلاص وكسرته الطفل ختل ورا عمتها الي تكوللها... حدري هين النا الله عوفيها الله بالمرصاد
اني ضليت فاتحه حلكي وصافنه طيبه كالتلها... تعاي لمي الكزاز
افتكار... ماعليه
طيبه... اوكي انه عايفتو هين تا من يجي ابوي يدحكو
هي جابت مكنسه وشالتهم صعدت لغرفتي مخنوگه ومقهوره صارت ال ١٢يلا اجه رشاش گمت گتله... وين جنت؟
رشاش... شغل
حره... شبيه عثمان
رشاش... مابيه ليش؟
حره... قلقتني عبالي سالي بيها شي
ابتسم كال... ماكو شي بس عثمان راد شكم ملف وامور بالشغل انطيتها الو وتاخرنا لان ضلينا نشتغل
حره... اها .. كعدت
كالي... شبيج ضايجه
سولفتله عن الي سوته ضرتي كال :-المره مليانه عقد نفسيه.. جر نفس كال... ختولي البسيها
تنهدت بقهر... انقهرت عليها من بجت ماجاوبتها
هز راسه نمت كتله... يلا احجيلي قصه
ابتسم... انه ماشاطر بهالسوالف
حره... اي قصه
ضحك واجه گعد يمي حجالي قصة البط والثعلب الى ان غفيت لثاني يوم الصبح گعدني رشاش وهو يگرص زندي كال... يلا نتريك
كمت غسلت ومشطت ونزلت يمهم جانت ام احمد مسويه الريوگ عمي ما موجود بس البقيه كلهم هنا صبت جاي انطت للكل واني ماانطتني صفنت عليها والريوك هم ماحاسبه حسابي بيه
رشاش كاللها... عجل وحره؟
افتكار... وانه شعليه بيها؟
خلي تصب لروحها وتكوم تسوي بيض ماصعبه
جريت نفس نرفزه من الصبح ام حازم كالتلها... عيب يمه شهالحجي شلون ماتحسبين حسابها
افتكار... وانه شعليه حلو هاي انوب
رشاش... لما ماتردين تسوين للكل ليش ماخليتي طيبه تسوي؟
سكتت كاللها... ديري بالج تنسين ان كل الخير الي انتي عايشه بيه من خيري
وبما انو توته حرمتي يعني الخير راجع الها
ع العموم كام رشاش كال... ما مشكله يلا ام التوت بدلي نطلع ناكل برا
ابتسمت كمت وياه بدلت وطلعنا برا اكلنا رجعت دانزع الصايه اتصلت سالي جاوبتها كالت
... حررره
... شنو؟
سالي... مقدام كوا هديته
حره... شنو ليش؟
سالي... البارحه اجه علينا اني اجيت وياه لبغداد
حره... انتي ببغداد
سالي... اي
حره... ليش
سالي... مقدام اجه عليه
حره... وشعجب عثمان وافق
سالي... لان حامل خاف عليه اضوج واسقط
حره... الحمد لله
سالي... واجه وحجه ويا رجلج ورجلج ماقبل وتعاركو وكوا فاككوهم
حره... عزا صدك والله
سالي... والله
حره... بس ما كلي
سالي... مقدام راد يضربه وفكوهم وتعاندو اثنينهم
حره... منو البدا
سالي... هم اثنينهم ضايجين بس مقدام نتر عليه وكله غصبن عليك ترجع اختي فتعاركو
حره... ولا گلي
سالي... وهسه مقدام هم يريد يجي المشكله خاف تصير مشكله كدام عيالج من غير شي هم محاربين رشاش
حره... ماادري شاسوي
طب رشاش سديت الخط وكفت كباله كتله :-البارحه اجه اخوي مقدام
جر نفس كال... وصلتج الاخبار
نترت كتله... انت شلون تسوي هيج تدري بيا مشتاقه لاخوي صار هوايه مشايفته... بجيت
كال... لاتبجين راح تجلطيني
حره... انت ماتحس بيا مشتاقتلهم
جر نفس كال... راد ياخذج من هين
حره... هو اني اريد اروحلهم
رشاش... وتعوفيني؟
حره... لا بس نحل مشاكلكم
رشاش... احلها بس
حره... اريد اروح انت شلون تطرد اخوي فهمني هسه تاخذني لبغداد
رشاش... يولو افهمي
حره... اخذني منا رشاش
جر نفس كتله... ارجع شبيك بس تتفاهمون مداكدر مشتاقتلهم
مسح دمعتي كال... ماشي لبسي يلا
رجعت لبست الشال ونزلت وياه طيبه كالت... ديحوني وياكم
بوستها كتلها... لا رايحه لاهلي
كالت بخزره... ليش؟
رشاش... اشتاقتلهم.. وانطاها المفتاح كاللها.. قفلي غرفتي وخلي المفتاح يمج
طيبه... بعيني
طلعنا بالسياره الطريق كله ضايج ويتأفأف كال. حره
حره... ها
سكت شويه جر نفس... لا تعوفيني مااگدر اعيش بلا عيونج
عيونج يالمصگوعه دوهنني
خجلت وابتسمت... مراح اعوفك
صار الظهر كال... تنزلين بمطعم
حره... لا منا جيب لفات
رشاش... تمام
نزل اتصل موبايله واتساب تفاجئت هذا منيله نت شلته باوعت الاسم "المكسرچي"
ابتسمت دااخرج دخلت بالغلط ع المحادثه
وهم جانت كلها اتصالات
صابني فضول نزلت وجان اشوف صوره انصدمت بيها
صورة السامر... يتبع...
________________
شلونكم كرزاياتي 🍒
بنات التنزيل حيكون يومي الايام الماانزل بيها معناها لو اني لو حره تعبانين ومگدرنا ننزل
بس ان شاءالله مااقصر وياكم البارحه ع الاساس انزل بس عيوني غدرني تعبن من گد ملازگه بالشاشه فااخذت ريست وكلت باجر انشرلكم
والاهم ارائكم للقصه
بنات شاركو القصه ويه اصدقائكم وشاركوها بالگروبات خلوها تصعد حبيباتي
والله داانقهر من اشوف جماليتها وتفاعلها قليل ادعموني حبايب دااكتبلكم واتعب وكله جهد ووقت مني والله في سبيل اسعدكم انتم هم ادعموني وصعدولي القصه 🫂🍒
لا اهد عليكم (ذبانة الچلب) بصوت عمو رشاش
(ذبانة الچلب يقصد ع عمتو ثناء)
اما بخصوص الاسم ع الاساس سميتها شهربان بس تصويتكم كان ع ثناء اكثر فـ سميتها مثل متردون
وهسه لتنسون التصويت والمتابعه
قراءه ممتعه ♡
تصبحون ع ماتتمنون🍒❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!