الحلــــــــقه السادســــــــــــــه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
"تعبت كلش واني اكتبلكم هالبارت الوقت ضيق والمسؤوليات العليه هوايه بس لعيونكم كتبته اريدكم تقدرون تعبي وتصوتون وتعلقون.. لاڤيو 🤍"
________________•
حره... هزيت ايدي وطبيت للحمام فتحت الدوش ووكفت تحته
شفت الشامبو كدامي اخذته وحطيته ع شعري وغمضت عيني
جريت نفس اصبر نفسي بيه
فتحت عيني باوعت انصدمت واني اشوف الارض حمرا
وجسمي احمر
بسرعه تذكرت لما شفت حياة مقتوله لا اراديا وقبل لا استوعب صرخت واني اباوع لجسمي كله احمر ويحرگني
حسيت نفسي مداستوعب شي ابجي واصيح... رشاااااش
والف فكره اجت ببالي جريت المنشفه لفيت روحي وفتحت الباب وركضت انصدمت برشاش بسرعه حضني واني ابجي گال
... شبيج اسم الله يولو هيدي
حاضنته وارجف من الخوف والبرد سمعت صوت اوس كال بصوت عالي :-هاي شكووو
رشاش... ابقى بمكانك لاتجي
اجت طيبه تركض شافت جسمي كالت :-عزا شصاير بيج... ونزعت شالها لفتني بي
واني حاضنته وارجف راد يوخرني عنه مقبلت كلي... بس خلي ادحگ شبيج
كتله واني ابجي وارجف... حياة حياة هم هيج صار بيها باوع باوع الدم
طيبه... اسم الله يولو هذا ما دم
كتلها... لا لا اني اعرفه هذا دم مثل دم حياة
جرني طببني للحمام مسح على وجهي وركبتي حجه بنتر... طيبه هذا شنووو
طيبه.. هذا مثل الصبغ
كتلهم واني اشهك... جلدي دايحركني
... تعاي اسبحي
صارت عينه ع الشامبو راح اخذه شمه ورجع حط على ايده صارت عباره عن صبغ احمر باوع لطيبه كاللها... ياابن منـ**** سوا هيج
هي باوعت كالت. ماادري والله... صفنت بالكاع كالت... اكيد الحربايه ما غيرها
كمت احك بزندي تذكرت من شفتها طالعه من الحمام كتله... هي جانت بالحمام قبل لا اطب اني
وكالتلي اطلعج منا سحل
هز راسه ونزع سترته لبسنياها سحب السحابه وحط ايده بايدي وجرني لبرا طلعت طيبه كدامي كلتله... خويه اوس لاتطلع لهين مرت اخوي راح تصعد لغرفتها
اوس... حدري فهميني شكو
راحتله ورشاش لازم ايدي صعدنا من الدرج وكف بالممر الفوك وصاح... افتكاااار
هي طلعت من غرفتها تركض وكفت كدامه باوعتلي بلعت ريك ورجعت باوعتله
اشر عليا وكاللها بحده
... انتي حطيتي الصبغ ويا الشامبو؟
افتكار... لا والله
رشاش... حلفي بـ احمد
افتكار... لا ميصير
لزمها من زندها وعاط... ليش هيج سويتي؟
جاي تهددين لو شني؟
هي بجت هزها حيل من ايدها كاللها :-سوالف المزعطه هاي تبطليها ومرتي ديري بالج تگربيلها
والا قسما بالله امسح بيج الگاع
كالتله وهي تاشر عليه... لاتصدگها هاي المحتاله تتبلى عليا
انه ماسويت شي
كاللها بصياح... لا تجذبين عبالج مااعرف سوالفج انه
ترا حافظهن
دفعها طلعت هند اخته باوعتلي ورجعت باوعتله كالتله... شكو
رشاش... اوووووس
سمعت اوس گال... ها رشاش
... تاخذ ام احمد تشمرها عند اهلها انه مااتشرف بيها
افتكار... لا ابوس ايدك انه مااكدر بلايه ابني
... اخذيه وياج
افتكار... لا ابوس ايدك هاي اخر مره والله
صاح...اوووس تاخذها هسه مااريد اشوف خلقتها كدامي... وجرني طببني للغرفه
اسمعها تكول لهند... شفتيي من اول مااجت خربتو عليا المسمومه تتبلى عليه
وكف كدامي باسني من راسي وحضني كال... لا تخافين
حطيت راسي ع صدره كتله... هاي من بدايتها هيج
كال... اصبريلي الا ما الكالها حل.. وباسني بعيني ورجع نزل راسه لركبتي باسني
اندكت الباب كال... صخام بوجهك يا حسنين ما وكتها
راح فتح الباب
طبت طيبه كالت وهي تبتسم وتباوع لرشاش... حمل وانزاح عن كلبي اي من البدايه طردها ياخويه
ضحك كاللها... احسها ضرتج يولي
طيبه...هم لو ضرتي مااكرهها هيج بالقران
رجعت باوعتلي حطت بايدي غسول كالت... هذا غسولي الخاص طبي روحي غسلي بيه
انه بعادتي ماانطيه لاحد هاي اول مره اخلي وحده تاخذ منو من بعد المرحومه هاج
اخذتها منها كالت... حتى تعرفين انه شكد رحيمه وحبابه ومااتعوض
ضحك رشاش وحضنها كاللها... نظر عيني.. وباسها من راسها
ابتسمت كالت... يلا دحكي شصاير بجسمج
باوعت لرجليه هنا يلا استوعبت الفضيحه رجليا كلها طالعه
يكول رجلين دجاجه مهلسه
الستره مالت رشاش نازله طالع كتفي وركبتي ودلعه حيل فضيحه
حطيت ايدي استر بيها وباوعتله كتله :-عزا شعندك هنا وتباوع اطلع اطلع
ضحك كال... توج حسيتي غير صار ساعه شبعنا تدحگ
حره... ياقليل الادب... و دفعته طلعته من الغرفه
وهو يضحك ويگول... خلي ام احمد تكثرلنا من هيج مقالب زين جاي استفاد
ضحكت طيبه كالت... لبسي دشاشه ونزلي اسبحي يلا يمكن تحسس جلدج
لبست دشاشه واخذت الغسول وطلعت واني مستحيه نزلت شفته كدامي واكف يم اخوه
شافني ضحك استحيت
ركضت للحمام
اسمع اوس يكوله... انه عفتها ساندريلا شلون صارت سبايدر مان
ضحكت و طبيت سبحت بالغسول ولبست تراكي من طلعت شفت طيبه واكفه كالت
... نعيما
حره... الله ينعمج
ضحكت بصوت عالي كالت... يولي ما هيج
ابتسمت كالت... هاج هذا مرطب خلي لجسمج
حره... شكرا طيبه وگفتج هايه مراح انساها
طيبه... تكدرين تنسيها وانه مگابلتج غير اسحلج
ضحكت وصعدت فوگ سديت الباب وگعدت حطيت المرطب الرجلي وزندي صارت بيهم بقع حمرا
دااحط لايديه مرطب انفتحت الباب طب رشاش نزلت راسي وابتسمت
اجه كعد بصفي كال... صخام بوجهك ياحسنين شگد حلوه انتي
باوعتله بابتسامه كتله... منو هذا حسنين؟
... ابن عمي غفار
ضحكت كتله... شعندك وياه
كال... حساسيه
... مبين مو خوش رجال
كال... طبعا
وجر المرطب مني وحط ع ركبتي وضل يمسح ابتسمت باوع بعيوني سرح شويه ودار وجهه وكال
... استغفر الله
ضربته بكتفه كتله... شبيك بس تستغفر
ضحك كال... وليش تنزعجين من استغفر غير احب الله
... مدري تحسسني بيا شي غلط
باوع بعيوني وكال... سبحان الخلقج ولا غلطه حوريه ونازله من الجنه
... ومسح خدي بايده
غمضت واني مبتسمه اجتاحني شعور حلو كتله... لاتبالغ مو لهالدرجه حلوه اني
كال... انجبي
ابتسمت سكت شويه وكال... حلوه كِلش حلوه انتي
لدرجة عيوني ما تشبع منج متربعه هين... واشر ع كلبه
رجع كال... خوب هين.. واشر على راسه ... فارشه ومتمدده
ضحكت كال وهو ياشر على راسه... هذا يسوي لملامحج نسخ حتى من انام يعرف صورتج كبالي
شني السالفه لازگه براسي وبجفن عيني
حرام عليج اارحمي بحالي
ضحكت لزم ايدي حطها على گلبه وكال... گلبي يصير طبل لما يدحگج
ابتسم گال... احس الخلايا الي بجسمي تكوم تلعب چوبي من الفرح
ضحكت كتله... داتخجلني.. سكتت شويه كتله... لتحجي هيج اني مااعرف اجاوب ع الكلام الحلو
ابتسم ودنك باسني من خدي كال :-نظره منچ تكفيني
باوع بعيوني خجلت نزلتهن رفع راسي و باسني من حنجي تقرب اكثر حطيت ايدي على حلكه و دفعته كتله :-كافي عاد لا انطيتك مجال
ضحك كال... ترا مرتي
... هالحجايه تكولها اكثر مما تكول اسمك كافي
كال... لاتستكثرين عليه هالفرحه
جريت نفس كتله... وهاي راحت
كال... اي
صفنت... واضح انها خبيثه ومراح تعوفني ارتاح اكيد حتفتعل مشاكل باوعتله كتله... عوفها لترجعها
كال... لو تبقى عليه تحلم تدحگ باب البيت بس هم يرجعوها
... منو
كال... عمامي
... شسالفه ماكو كرامه
گال... لو اكو كرامه تدحكيها هين بعد كل هالاهانات
هزيت راسي بـ لا كتله... والى متى نبقى هيج شوكت تطلكها
باوع بعيوني وجر نفس كال... اول ماتصيرلي فرصه
اندك الباب فاتت طيبه كالت... ها سبحتي بالمرطب مالتي
ضحكت كتلها... عوفيه الي
طيبه... هذا غالي ب ٣٠الف
.. عزا بعينج ٣٠ هذا مصروفنا مال يومين... وضحكت
باوعت لرشاش تلاشت ضحكته
باوعلها كاللها... عوفي انه اشتريلج غيرو
طيبه... شسالفه اتشاقه خلي تاخذو بالعافيه... واشرتلي... يلا كومي وياي ضايجه وحدي تحت
كام رشاش كمت وراه كاللها... عجل هند وين
طيبه... بغرفتها
... مااجت مرت حازم
طيبه... راح يجيبها حازم
هز راسه باوعلي كال... ابقي يم طيبه اروح اجيب ابوي
ضحكت طيبه كالت... تلگى عمي غفار غسل عقلو
... الله كريم
نزلنا سويا اجه اوس وكف كدامنا يضحك وبايده الموبايل باوعلنا وكال :-يولو باركولي طلع اسمي بالقرعه مال السلفه
ضحك رشاش كاله... الف مبروك
طيبه... الف مبروك
اوس... بهاي المناسبه خنجيب مندي يخبل نتعشى... باوع لرشاش كاله... انطيني فلوس
... يافلوس
اوس... المندي شبيك
رشاش ضربه دفره كله... دكوم عبالي صار ادمي وراح يجيبلنا عشا
ضحكو وجره وطلعو لزمتني طيبه من كتفي كالت... حدري دحكي بيتنا
شوفتني التحت عباره عن مضيف جبير والهول وتلث غرف وحده لـ حازم والثانيه لـ اوس والثالثه لاهلهم والمطبخ صاير كباله الدرج وع الجهه الثانيه ممر للحمام
صعدنا فوك غرفة رشاش وخواته وام احمد والغرفه الرابعه فتحتها جانت فارغه كلتلها... هايه ليش فارغه
طيبه... جانت لاختي المرحومه
سمعت اصوات جوا كالت... اجى حازم ومرتو...
نزلت و نزلت وراها اجه حازم سلم عليه طبت وراه بنيه لابسه صايه ومحتشمه وكصيره باوعتلي فكت حلكها وخزرت حازم كالتله بصياح
.... هاي منووووو
هو خزرها وكاللها بهدوء... صوتج يولي
اني نزلت كلت بكلبي... دخيلك ياعلي شبيها هاي انوب
طيبه طكتها ضحكه كالتلها... يولي شجم مره كتلج ام الخيره عوفيها ماتزوج رجلج
هاي مرت اخوي رشاش
هي بسرعه تحولت ملامحها وضحكت وحضنتني كالت... انه مرت حازم... باوعتله كالت... دحكتج مالابسه حجاب عبالي... وضحكت
كلتلها... اخوتي ليش حتى البس حجاب
ابتسمت ونزعت حجابها كالت وهي تدخل لغرفتها... شني منين ما منين
كالتلها طيبه... بغداديه
ضحكت كالت... صاكات البغداديات... وكعدت
ضلت تسالني ونحجي تلاثتنا لحد مااجه رشاش واخو
گالت طيبه... كومن نصب عشا
كمنا جايبين مندي سمعت مرت حازم كالت... عجل وينهم ابوي رشگ وامي مطره مااجوو
اوس... لا يتعشون يم عمامي
رحنا للمطبخ اني اسوي زلاطه والبنات يحضرن طب اوس يشرب مي وكف يم مرت حازم كاللها
... انه مااحب الفتنه بس احس رجلج يخونج
جيلان... شمدريك؟
اوس... شفتو يخابر بالختلات
جيلان... خاف هم يطلع صاحبو مثل ذيج المره
اوس... انه العليه ابلغ
جيلان... بعشوي افتش موبايلو
باوع ليفوك كال... اللهم اني فاعل خير
طيبه... اوس ماتبطل سوالفك راح تفقد الثقه بزوجها بسببك
كاللها وهو يطلع... عادي هو اخوي ومااثق بيه شلون هي تثق
ضحكت طيبه كالتلها... لا تصدكيه
هزت راسها وكملت شغل ومر الوقت عادي تعشينا وسوالف وضحك كملنا راحت طيبه تسوي جاي
والولد كل واحد كاعد بجهه مكنكين
همس رشاش كال... حره تراكج
... شبيه
كال... زحمه تلبسيه جدام اخوتي
... شسالفه لعد تريدني اتگبع بالبيت
كال... دشداشه ارتب واحلى
... لا مااحبها متلوكلي
رشاش... لبين مااجيبلج ملابس محتشمه
حره... ترا هم اخوتي لتعقدني
رشاش... حتى لو ما حلو لبسج
غلست مجاوبته كال... سهله
جابت طيبه الجاي ووزعت دانشرب جاي ونتصفح ع النت
اندكت الباب طلعو الولد رشاش كاعد يمي يتصفح بالموبايل واني اباوعله
اجه اوس كال... رشاش اجو عثمان ومرته
فزيت ضحكت وگمت ركضت لزمني رشاش كال... وين وين وين
حره... اشوف اختي
كال... البسي حجاب وشي محتشم
ماتطلعين بتراكج
حره... ترا هو اخوي باعتبار
باوع لطيبه كاللها... انطيها دشداشه
وطلع يستقبلهم ضربت رجلي بالكاع ورحت ويا طيبه لبست الدشداشه مو حلوه عليه لان طيبه اسمن مني نزعتها شمرتها ولبست التراك وطلعت اركض
ركضت وراي طيبه كالت... يولو يامصخمه راح تنسحلين
مارديت عليها وركضت اشوف اختي حيل مشتاقتلها سمعت اصواتهم بالمضيف فتحت الباب شفت سالي كاعده يم عثمان جان مزين لحيته شافتني بسرعه اجت حضنتني حضنتها وبجينا كتلها
... مشتاقتلج هاي شصاير بيج... اباوعلها حيل ضعفانه ولابسه صايه واسعه وحجاب مبهذله
كام عثمان كال... شلونج توته
هزيت راسي ورجعت حضنت اختي كح رشاش باوعتله خزرني خزره بسرعه التفتت على سالي كلتلها... تعالي نسولف بغرفتي
سالي... تمام
جريتها ومشينا للغرفه شفت طيبه بالهول وكفت كتلها... هاي طيبه حماتي حبابه حيل
ابتسمت طيبه و حضنتها
سالي باوعتلها و كالت ... سبحان الله تشبهين زهراء
ابتسمت طيبه كالتلها... منو زهراء ؟
حره... صديقتنا
طيبه... اها.. دارت وجهها كالت.. احضر الضيافه واجي اصعدن
صعدنا لغرفتي طبت سالي كالت... يا مكعدج هنا
حره... باجر يجيب جديده تعاي فهميني ليش هيج ضعفانه شنو مجوعج
ضحكت كعدت يمي كالت... لا والله حملي صعب حتى المي من اشربه اتقيئه
حره... سوده عليه
سالي... اسم الله
حضنتها كتلها... مشتاقتلج ومشتاقه لاخوتي
سالي... اني هم حيل اشتاقيتلكم
حره... شلونه عثمان وياج
سالي... كلش زين وحباب وياي بس
حره... بس شنو
سالي... ابو مايطيقني ابد
حره... ليش
سالي... حقاره بعد
حره... وامه شلونها؟
سالي... متوفيه امه
حره... وشلون هسه
سالي... طلعني بيت وحدي حتى يتفادى المشاكل وكال احتمال نشتري بيت ببغداد
حره... ويعوف اهله
سالي... علاقته بابوه ابد مو زينه
حره... ليش
سالي... گال جان ياذيه وهو صغير ويضرب اخته المتوفيه
حره... خطييه هم عنده اخت متوفيه
سالي... اي ولج تصير صديقة اخت رجلج
حره... يا ولا ادري
سالي... وامه من القهر انجلطت وماتت
حره... دخيلك ربي
سالي... احجيلي رشاش شلونه وياج
جريت نفس... طلع متزوج
سالي... سولفلي عثمان
حره... خايفه سالي
سالي... خطيه انظلم لا تظلميه اكثر هو شبيده يعني
حره... ابوه وام احمد ميطيقوني
سالي... لا هسه يرضون وام احمد لابد يجي يوم وتتطلك
طبت طيبه جايبه عصاير وكيك وكعدت كالت سالي... مشتاقه لاخواني اريد اشوفهم
حره... اني هم
سالي... خلي نروحلهم بنفس اليوم
كتلها... ان شاء الله
طيبه گالت لسالي...انتي تدرسين
سالي كالتلها... اي بمدرسه هناك قريبه من بيتنا
حره... نقلج
سالي... اي
كتلها... الحمد لله قبل
سالي... يكدر مايقبل اشمره بالمطبخ
ضحكنا طبت مرت حازم سلمت على سالي وكالت... رجلج يكول يلا
حره... يا بعد وكت ماشبعت منج
سالي... لا هم يلا نروح عندي مدرسه باجر اريد انام تعبانه
حره... ماشي
بوستني ونزلنا كالت... حره انتبهي من هاي التس خاف توكلج تشربج شي تطلع سحاره
حره... لا بعيده عنها اني
سالي... اي عفيه... باوعت من المضيف ورجعت باوعتلي كالت... هذا حماج اعزب؟
حره... اي
سالي... هم زين لابأس بيه
حره... شنو؟
سالي... دازوج رغوده لواحد انباري حتى يمي
ضحكت كتلها... شوفيلج بيت ثابت يلا تقررين
سالي... اي هو حاطته احتياط.
طبينا باوعت لرشاش ضايج وكالب خلقته كوا يحجي شافني باوعلي بحده ورجع التفت لعثمان
سالي گالت لرشاش... دير بالك على اختي
ابتسم مجامله وكاللها... ببطن عيني اخليها
لزمت ايد عثمان وكالتله... يلا
سلمو وطلعو صعدت للغرفه سديت الباب واخذت موبايلي احجي ويا رتيل مشتاقتلها
بعدني دااطلع الرقم طب رشاش
اجه بسرعه جرني من زندي كال بنتر :-انه شحجيت؟؟
كتله بارتباك... هااا شنو
... مو كلت لاتطلعين بهذا؟
اشو انتي ماعندج احترام وضاربه كلامي بعرض الحايط
حره... مو هيج الدشداشه مو حلوه عليه
كال... ومالكيتي غير هذا تطلعين بيه!
حره... بس هو مثل اخوي
عاط... جابته امج؟ لا مو فـ انجي ولزمي حدودج ولاتخليني
اتصرف وياج غير تصرف
كتله بصياح... شبيك احجي وياي عدل
كال بنتر... جري عدل حتى يتعدل حجيي
حره... ممسويه شي غلط ترا انت اخذتني هيج ببيت اهلي سافره وتراكات البس وهسه شكو جاي تحاسبني ترا ميحقلك
رشاش... كلشي اختلف عيني وانتي صرتي حرمتي و على ذمتي والمفروض من احجي حجايه تسمعيها وماتضربين كلامي بعرض الحايط ولا كأن حاجي
حره... مو هيج
قبل لااكمل كال... اجيج بالحسنى مايفيد اصيح عليج اطلع كو***د ومستفز شلون امشي وياج حيرتيني كافي ترا وصلت لخشمي مره كتلج احتشمي واطلعي بيها شي؟
هو عناد لو شنو؟
تراك ضيك كتلج الف مره ماينلبس كدام احد غيري
تطلعين بيه ليش؟
عبالج حلوه يعني من تهينيني هيج كدام اخوتي
دمعت عيوني كتله... ليش داتزودها هم اخوتي وبعدين شهالهمجيه الا اتكبع يعني؟
رشاش... وانتي شايفه الثقافه والتصخيم باللبس الضيك المفضوح؟ عبالج حلوه من تلبسين هيج كدام رجال غير رجلج
حره... يربي راح يجلطني كتلك هم اخوتييي
وعثمان رجل اختي لو نسييت
رشاش... استغفر الله استغفر الله... باوع ليفوك كال... يارب صبرني
كتله بنتر... اوووف جزعت ترا جزعت كافي تحاسبني ع كلشي
رشاش... والله مو صوجج صوجي انه الي خليتج تدوسين ببطني وساكت بس هينه
حجاها وطلع وطبك الباب وراه حيل
انقهرت كعدت كلت... هم كلهم باعتبار اخوتي ماله داعي هيج يزودها
ضليت احوص ابد ماارتاحيت وكفت كدام المرايه تراكي مابيه شي ليش هيج يصيح
انقهرت كلت اروح اتفاهم وياه دااطلع شفت تراكي كلت خاف يطلع كدامي واحد من اخوانه وهم يرزلني
جريت سترته لبستها وحطيت شال على راسي ونزلت
الكل بغرفهم دورت عليه ملكيته شفت موبايله والسويج ع الميز عرفت هو مطالع
طلعت برا شفته كاعد بالحديقه يدخن رحت يمه شافني طفى الجكاره
جريت الكرسي وكعدت يمه محجيت ولا هو حجه
ضلينا ساكتين الى ان نطق وكال :-مااحب ااذيج بس تجبريني
حره... انت مرات تزودها
جر نفس... يمكن انتي صح من جهتج انتي جنتي عايشه ببيئه مختلفه ماتهتمين للبس وتطلعين وترجعين براحتج
باوعلي كال... بس هم فكري بيها من ناحيتي
... باوعتله كال... انه رجال وهاي بيئتي مااتحمل ادحك حرمتي تلبس ضيك حتى لو جدام اخوي
حره لا وانوب طلعتي جدام صاحبي وانتي عرضي ومحسوبه علي... جر نفس كال... حسيت نار بصدري من دحكتج هيج داخله علينا
انه مااگدر اتخيل احد يدحك لحرمتي غيري
اتخبل
نزلت راسي كتله... اسفه ماتنعاد
جر نفس كال... ان شاء الله
حره... بس ماالبس دشاديش
صفن بوجهي كال... بالقران مايفيد وياج الحجي كومي منا
ضحكت ابتسم كتله... اكو تراكات محتشمه
رشاش... هاهيه
مديت اصبعي كال... شني
حره... جيب اصحابك
ضحك وجنكل اصبعي باصبعه كتله :-اهلك مايجون
هز راسه بلا كتله... ليش
رشاش... بقو يم عمي
حره... زعلانين منك.. سكت كتله... المفروض احنا النطلع
رشاش... لا هذا بيتي ومااعوفو انه دام ماغلطت بشي
حره... ذاك اليوم كلت لابوك مااسمحلك تتحكم بمصيري مرتين شجنت تقصد؟
جر نفس كال... ابوي مايحبني كثير
حرهو... ليش هيج تحجي
رشاش... مايعزني مثل اخوتي او يفكر بيا مثلهم
حره... لتحجي هيج هو هسه حقه دام تزوجت وهو مايدري
رشاش...ماكتلو لان ادري بي يخربها
حره... ليش
رشاش... كل صفحاتو البيض الجانو عندي تلطخو بالسواد
حطيت ايدي ع ايده كتله... فهمني
باوعلي وكال... گبل جنت كثير احترمو دحكي هو جان بينا مشاكل بس ما هيج
جنت احن الو وافكر بيه
حره... وهسه؟
رشاش... شعوري تجاهو تلاشى تدريجيا
صح ازعل واضوج بس ما مثل گبل
حره... شلون بدت مشاكلكم
رشاش... من يوم الحسيتو ظالم
حره... من شوكت
رشاش...من جان اخوي عايش وكثير فرحان بزواجو
اتذكر اللمعه بعيونو
باوعلي وگال... جان يحبها كثير يمكن مثل حبي الج
ابتسمت حطيت راسي على كتفه ورفعت راسي اباوعله وهو يحجي كال :-وهي هم ماجانت هيج جانت تحبو وتهتم بيه
وهو وين مايكعد يحجي بـ افتكار
اتذكر بيوم طلعنا لمطعم انه وياه جنا كلش مقربين اكلنا شربنا اسرارنا... جر نفس كال... جان مي عيني
حره... يعني مثلي اني وحياة... ونزلت دمعتي
مسحها كال... اي ويمكن اكثر
نظرة عيونج بعد ما انقتلت حياة تغير بيها شي اتذكر من شفتج الفجر
شفت نفس الكسره الجنت اشوفها بعيني بالمرايا
وبيومها ماكدرت اخليج تحتركين وحدج
مسح دمعتي كتله... شلون تخطيت
رشاش... تعايشت
حره... بس صعب
رشاش... المهم انه بخير
مسحت دموعي كتله... اي كمل
ابتسم كال... بوكتها دحكت بنيه عجبتني
اني بسرعه ابتعدت جر وجهي كال :-ارجعي
حضني وحط ايده ع خدي رفعت راسي يحجي ويباوعلي كال... فطلبتها على سنة الله ورسوله
كتله... حبيتها؟
كال... ما حب اعجاب لان جانت محتشمه وسألت عليها بنت اصول وانه جنت شاب جنت محتاج اتزوج حتى مااميل للحرام
اي فـ مشيت عليها زلم بس ماعقدنا لان قبل العقد بيوم
جر نفس وگال... اغتالو اخوي
حره... يمه شلون
رشاش... اتذكر جنت توني نازل بوكتها جان بداية تنظيم القاعده
بوكتها الانبار جانت نار الاغتيالات ماتوقفت والي ينخطف ويطلع منها عايش فيطلع مكسر ومحروك واشكال انواع التعذيب
حره... ليش هيج يسوون
رشاش... السني الي يسند ويدافع للشيعه يقتلوه من بعد محاكمه من القاضي مالتهم
والشيعي جانو يقتلو بدون قاضي
حره... زين ليش
كال... يعتبروه كافر فعندهم فتوى بقتله بدون قاضي
حره... الله يلعنهم
رشاش... ونحن ماجان عندنا هيج اتذكر اخويا جانو اصدقائو كلهم بغداد ناصريه بصره
ومنهم جعفر لان اصلا بالجهاز ممنوع الحديث بالطائفيه
وعوائلنا مناسبين من الشيعه فما انجرفنا ورا هالفتنه... ابتسم كال... اتذكر باليوم الي لكيت على سيارتو وصله بيضه وبنصها رصاصات
جان هذا بمثابة تهديد
كلتله بيومها... انتبه يااخوي التنظيم جاي يقوا يوم عن يوم
لازم تاخذ حذرك لبين ما نصفيهم والحگ يرد لاصحابو
هي محنه ولازم نتحمل مرورتها واكيد الله ويانا
جاوبني... لو عشت وانتصرت عليهم فهاذ فخر الي
ولو انقتلت وسال دمي اعلى هالگاع فهاذ شرف وفخر وعزه ونصر
انه حضنتو وكتلو... ولدك محتاجك روحك غاليه احميها لجلو
حرام يتيتم وماصارلو شهور لما شاف النور
بوكتها حط ايدو ع كتفي وگال... انه لو عشت اربي احسن تربيه ويطلع شهم مثلي ومثل عمامو
ولو مت متأكد انك ماراح تفرط بامانتي
وتربيه احسن تربيه حتى يطلع زلمه سبع مثل ابوه وعمامو
بيومها ومن نظرة عيونو حسيتو راح يروح مني
وحسيت بغصه ببلعومي بس اقنعت نفسي انها مجرد خنگه وتروح باجر
جر نفس كال... ومرت سنين وماراحت
بجيت مسح دمعتي كتله... احس بيك
گال بصوت مخوگ... وانه هم شفتو بدمو ما بس انتي
جان راسو مهشم بالحجاره والرصاص مزرف صدرو
كتله واني ابجي... الله يرحمه
تنهد... وين رجعتيني
لزمت ايده كتله... ماادري بيك هالكد متأذي وممبين عليك
ضحك گال... كتلج كل واحد يعيش همومو بطريقتو
انه شغلت نفسي وانتقمت
الدواعش الي دست على روسهم ببسطالي
جانو اكثر من الطلقات الزرفو صدر اخوي
وهاذ جان يبرد گلبي
حره... وبعد ما استشهد شصار
رشاش... اجاني ابوي وگال حرمة اخوك مايجوز تبقى هينا وجان ابوها عايش
گتلو... ردها لاهلها
ابو زاهر... وابننا؟
رشاش... نتطمن عليه كل يوم
ابو زاهر... لا ماارضى بهالحجي انه الولد يعيش بيننا ونحن ما نحرم طفل من امو
حتى لا توگفنا يم الله وتحاسبنا
رشاش... شتريد
ابو زاهر... تتزوجها ير شاش
رشاش... مستحيل الحرمه عاشگها اخوي شلون اخذها؟
ابو زاهر... واخوك استشهد وتركلنا امانه لازم نصونها
رشاش... مستحيل اتزوجها يابه بعدين انه مشيت على البنيه لو نسيت
بيومها سكت ومرت هالليله ومر وياها جزء من محبتي لابوي
بوكتها العصر جنت راجع من بيت جعفر صاحب اخوي ووگفني ابوي وگالي
ابو زاهر... انه وعمامك حچينا ويا اهل الحرمه الي عقدت عليها
وگلتلهم ابننا بعد مايتزوجها لانو راح يعقد على مرت اخو المرحوم
بيومها النار اكلتني وتعاركت وياه لانو استصغرني جدام الكل وماحشمني ولا اخذ برايي
وانه ماجنت صغير وتركت البيت اسابيع
وماسأل عني ولا اتصل
طيبه جانت صغيره لما جنت اسئلها من اخابرها واگوللها... ابوي هم سأل عني من گعدتو اكلتو ذكرني
وجان الجواب دائما لا شهر وانه بعيد مااتصل ولا كلف نفسو
ماعاتبتو ولا حاولت احننو لو هو يحس لو مااريد
اجوني عمامي وولد عمي وبعد ضغط واصرار خمس اشهر
وافقت بس گبلها گعدت عمامي وگلتلهم... الحرمه التردوني اعقد عليها جان عاشگها اخوي
وليوم موتو هو يحجي بيها تأكدو حتى لو عقدت عليها ماراح يجي اليوم الي اعتبرها زوجه
وهي بغرفه وانه بغرفه اعتبرها اختي وباقيه لجل ابنها
صح بالبدايه اعترضو بس من گلتلهم :-اذا لو هيج لو مااتزوجها وافقو
وگلتلهم... انه ماارايد اضلمها انطوها خبر
وفعلا راحو وبلغوها وهي جاوبت
گتله بمياعه... اهم شي ابنيي يربى ببيت ابووو
ضحك كال... بسرعه علمتج طيبه
حره... اي
رشاش... گبل لا اعقد عليها بيوم رحتلها لان عبالي يجذبون وماكالولها گتلها يابه هيج وهيج الحجي وجاوبتني وصدمتني بجوابها
... انه راضيه
رشاش... ام احمد ترا يجي يوم واتزوج واعشگ مالج حگ علي
افتكار... اهم شي وليدي يربى ببيت ابو بنص عمامو
رشاش... وتزوجتها ومن يومها هي باليسرى انه باليمنى
حره... شهالقابليه شلون تكدر تفكر تحبك وانت مثل اخوها
رشاش... هذا الماجاي استوعبو
رفعت راسي باوعتله كتله... انت هم عانيت مثلي
ابتسم باسني بخشمي گال... بس تعوضت بيج
حره... ماحبيت طول هالسنين
رشاش... لا
حره... ليش
رشاش... ماجان بالي يم هالسوالف هلكت روحي بشغلي ولو يجي يوم ماعندي شغل
اشغل نفسي
ابتسم گال... وطلعتي جدامي انتي
گتله... تحبني؟
رشاش... بگد حبي للوطن وريحة امي
ابتسمت نزل راسه وباسني بشفتي ابتعد عني كال... كومي الجو بارد هين
گمت ضحك گال... هاي شلابسه
حره... جاكيتك حتى ماتكول ماساتره روحج
ضحك كال... وتحشمتي عگب مانامو.. وجرني من ايدي
حره... احجيلي بعد عن اهلك
رشاش... عوفج منهم هسه ونامي حتى باجر نكعد من وكت
حره... ليش
رشاش... نجيب غرفه
ايده بايدي وصعدنا الدرج كتله... الله اريد كنتور ابو الدرج
رشاش... شني؟
طبينا للغرفه سد الباب كتله... اي وكرسي ابو الطسه
هو صفن عليه كتله... ومرايه ام الشمس
رشاش... ماتردين جربايه ام المسبح؟
ضحكت ضربني خفيف ع راسي كال :-شني هاي مخبله
وطلع دوشك كتله... حتنام هنا
رشاش... اي انتي نامي ع السرير
كعدت ضليت اباوعله كال... شبيج
هزيت براسي بلا حط مخده وكعد رحت كعدت كباله كتله... احجيلي بعد
رشاش... شاحجي
حره... عن اهلك
رشاش... غير مره
حره... ليش
رشاش... مااريد يتعكر مزاجي
جريت نفس كتله... احجيلي قصه
ضحك كال... جاهله انتي
حره... دحجيلي
رشاش... ليلى والذئب
حره... اي
ومددت وضل يحجيلي ونسولف الى ان غفيت فزيت الصبح عليه وهو يگرص بزندي گمت شفت نفسي نايمه ع السرير
تفاجئت شوكت نقلني لهنا
گال... يلا كعدي تريكي
وراح فتح اللابتوب يرسل ملفات كمت غسلت وبدلت ورجعت للغرفه حطيت حجاب ع راسي باوعلي ابتسم كام كال
... اجو اهلي اتحمليهم حتى لو يحجون تمام
هزيت راسي باي نزلنا شفتهم كاعدين بالهول كتلهم... صباح الخير
جاوبوني... صباح النور
ابو جاوب من ورا خشمه تحسست صاحتني مرت ابو بضحكه كالت... حدري يمه ندحك هالجمال
ابتسمت رحت كعدت يمها اجه رشاش كعد بصفي كالت... اللهم صلي ع النبي حليوه
حره... عيونج الحلوه
ام حازم... المشاكل الصارت ماخلتنا نسولف شكد عمرج يمه منين ما منين
حره... من بغداد ومواليد ال2000
ام حازم... عسى العمر الطويل ديري بالج على وليدنا
حره... بعيني جابت طيبه الاكل حطته كدامنا كالت
... كولو الله لايحرمنا منج يـ طيبه مدللتكم
ضحك ابوها كللها... امين بنيتي شسوي بلاج انه
كعدت تصب جاي لاحظت طيبه المدللة بالبيت الكل يحبها ويحترمها وبداخلي گلت تستاهل لان فعلا طيبه صبينا اجه اوس
ابو زاهر... وينو حازم
اوس... داح يابه داح
هز راسه ابوه كعدت مرت حازم داناكل وحجه ابو من بعد سكته
ابو زاهر ... اوس تروح تجيب ام احمد وتجي
رشاش باوع لاوس وكال... اكسر ظهرك اذا رحت
ابو زاهر... الحرمه مكانها ببيت رجلها
رشاش... وانه ما معتبرها حرمتي يابه
ابو زاهر... عجل شني تعوفها يم اهلها؟
رشاش... خليها تضل
ابو زاهر... لا انه مااقبل بهالحجي البنيه تقشمرت ويا ضرتها مابيها شي لا تكرههن ببعض حتى لا يتعبنك
ضحك رشاش كله... انت مقتنع بهالحجي ضرتها شني؟
ليش انه معتبر ام احمد زوجه؟
ديحجي ابوه امه كالت... اسم الله يمه هدو ولاتشمتون بينا العالم
كملو ريوك وصلو ع النبي وبعدها نسولف مايصير كملو ريوك
كمت غسلت وصعدت للغرفه طب رشاش كتله... رشاش لا ترجعها
اجه كعد يمي كال... انه هم مارايدها
حره... بلكي تحس وتطلب الطلاگ
كال... ماتحس يلا كومي بدلي
كمت داالبس الصايه سمعت صوت صايح مره ركضت داانزل نزل رشاش كبلي بسرعه وگال
... لا هلا ولا مرحبا صخام بوجهك ياحسنين
نزلت وراه واشوف مره شايله جنطه سوده على ظهرها ولابسه صايه وتحجي ويا ابو رشاش
ابو زاهر... غلطتي ياخويا ماهيج
جاوبته وهي تصيح... اشعل اهلو اشعل اهلو بالقران
انه ما سهله عندي اخوه يشكون الحلك شني والي يدوسلي على طرف اكسر رجلووو ... يتبع ...
___________________
اشتعلو اهلك ياحسنين
خلي افلت قبل لتكسرلي رجليييي
قراءه ممتعه فراشاتي.. ♕
تصبحون على ماتتمنون♡
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!