الحلــــــــقه الخامــــــــــــــــسه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
مصطفى... من حقكم تعرفون اني جنت سني وصرت شيعي قبل ٦سنين فحبيت اغير اسمي لـ مصطفى لاني استشيعت
مقدام... ماكو فرق سني ولا شيعي اهم شي اخلاقك مشهودتلها
مصطفى... حبيبي والله بس اريدكم تعرفون اسمي بالجنسيه مو مصطفى
حره... هنا مرتضى باوعلي بتركيز وجر نفس
مصطفى... اسمي عثمان
سالي ضحكت كالتله... حتى اني اسمي سهر بس مااحبه
مصطفى... اعرف والكل يعرف بس اني مااحب احد يعرف ان اسمي عثمان لان اني لما اجيت ببغداد بديت حياة جديده باسم جديد ومااحب ارجع للماضي
مقدام... مجرد اسم عادي
مصطفى ... بالنسبه الك بس اني احب اسم مصطفى اتمنى موضوع الاسم يبقى ببينا انتو باعتبار عائلتي ومن حقكم تعرفون لهالسبب حجيت الكم
اميره... هاهيه يمه ماعدنا مشكله
ابتسم كال... شوكت نعقد سيد؟
مرتضى دار وجهه عليه باوعله بنظره حاده
مصطفى باوعله ورجع نزل عيونه
ورجع باوع لمقدام
مقدام كله... بهالشهر اعقدو قبل محرم والمدرسه هم راح تبدي
مصطفى... نعقد هالاسبوع؟ حتى اعقد عليها محكمه
رتيل كلتله... بس ليش هالاستعجال؟
مصطفى... احسن علمود المخصصات
مقدام باوع لسالي كال... شتكولين عندج مانع لو عقدتو سيد ومحكمه هالاسبوع؟
سالي... لا بس اريد نعقد بكربلاء
مصطفى... هاهيه الترديه يصير
اني ابتسمت باوعت لمرتضى ماباوعلي بعد
ولا حاجاني
موبايله كدامه كل شوي تطلع ومضه اعتقد يتصلون ويرفض
ضلو يحجون ويتفقون واني بالي مو يمهم انتبهت من كال مقدام
مقدام ... مرتضى ولا تبين هالفتره
مرتضى ابتسم مجامله كله... مااحب ابقى بالبيت
ضحك مصطفى كله... مو كتلك يفتر وكل يوم من يتاخر الوقت الكاه
بالكهاوي بالكوه اشلعه مناك
باوع لمرتضى وكال... روحه هناك شسويله
مرتضى هز راسه كال... احبهااا وباوعلي ورجع باوع لمقدام كله... الكهوه روحي بيها
ابتسم... احب التجمعات
مقدام... انت مثلي اني هم كل ماافرغ اروح لهناك
ورجعو يحجون الى ان ترخصو وراحو ووضع مرتضى ابد ماعجبني ضليت وحدي بالغرفه ضايجه سالي كعدت تسولف لرغد وسمعتها كالت لرغد
... لتكولين لاحد اسمه عثمان لان يضوج افهم شعوره اني هم مااحب اسمي
سكتت شويه كالت... لا هو امني ترا ازعل اذا حجيتي لاحد
سكتت كالت... اي عفيه
حره... شويه واجو اجتمعو وضلو يسولفون ماما تمدح بـ مصطفى
كمت طلعت الدفتر وكمت اشخبط وصلت لورقه وشفت كتابه
وهاي اول مره ادري ان الدفتر مكتوب بيه
"عيناها تلمع بشكل غريب .. كانها " التوباز "
ضحكت لا اراديا هذا اكيد مرتضى هيج كاتب
لان هو دفتره
فرحت بداخلي حيل كلبت بالدفتر ادور بلكي اكو بعد كتابه دورت لكيت مكتوب قبل الصفحات الاخيره
"ملامحها بـ" جفن عيني " كلما اغمض گبالي "
ضحكت لاارديا معقوله يقصدني لو مجرد اشعار
دورت بعد ملكيت شلون مانتبهت من قبل لهالكتابات
مجربت اكلب بالدفتر ابد
كمت وبيدي الدفتر باوعت مقدام وامي ورتيل طالعين من الغرفه
ولا انتبهت
سالي فارشه داتنام
كمت وكفت كدام المرايه اضحك واباوع لعيوني معقوله يقصدهن؟ كلبي يرفرف من فرحتي بهالكتابه دمعت عيوني
عرفت بوقتها الكلمه الحلوه شلون تأثر بنفسيه الشخص وتقلب مزاجه خصوصا اذا جانت بالوقت الصح
التفتت على صوت سالي من كالت :-شبيج واكفه ع المرايه وتتبسمين شنو تخبلتي ..؟
ابتسمت... لا بس اول مره الاحظ اني حلوه
سالي... اي احنا نخبل بس غير ممهتمات بروحنا من القهر
والقران لو نحط مكياج نطلع نشك شك
خلي انخطب وشوفي شلون اكوم البخ لبخ
ضحكت كتلها... الله كريم
ورجعت اباوع لكتابات الدفتر وابتسم الى ان غفيت
ثاني يوم كعدت بنشاط نظفت وسويت غده الهم ورحت اوديه الظهر
بس انصدمت هو مموجود وبس مصطفى هنا
حيل ضجت ورجعت ضايجه للبيت هذا وين يديح ابو الشوارع
رجليك متتعب من الدياحه!
كعدت بالغرفه ضايجه ليش بس اني هيج افكر بيه واريد اشوفه واحجي وياه
ليش ميسوي هو هيج وياي
معقوله اني بالغت بتفكيري بيه!
جريت نفس ماكدر ماافكر بيه
هو سندني بوقت جان النفس يحتاجلي جهد وقوه يلا اخذه
خلاني اشوف الدنيا بعيون مختلفه كلها امل وتفاؤل
قبل جنت مااشوف غير
الفقر والحسره
بس هسه صرت اتأمل كل حالي حيتغير
موبايلي بيدي مااريد اتصل خليه هيج اريد اعرف اني شنو بالنسبه اله
مرت ٤ ايام بالضبط وهو مموجود نهائيا
ولا اكو اي خبر منه
بهالفتره اجه مصطفى وجاب مشيه وياه اصدقائه وخطبو اختي وتعذر ان هو مااله غير ابوه المريض
وماعنده عمام
الي فاجئني مرتضى مااجه ولما مقدام سأل مصطفى عليه
گله... اخوي راح هو وصديقه بسفره لاربيل قبل بداية محرم واني ردته يروح لان دكتوره النفسي نصحني و مااريد حالته تسوء خليه يرتاح
وراها بيوم رحنا لكربلاء حتى يعقد هو واختي
لبست عبايه خليجيه كلش حلوه وفضفاضه
ولبست وياها حجاب لان مكان مقدس ماعزمنا احد من المنطقه بس خالاتي ورغد اجن ويانا لان مصطفى اكد ان العقد بسكته لبين مايرجع ابوه بفرحة الزهره يسوون حفله كبيره كلش
رحنا بكوستر مصطفى جايب صديقه وياه
وصديقه جايب وياه كامره
حسيتني شايفه هالشخص!
بس وين مدااتذكر
عصرت دماغي حيل تذكرت هذا نفسه الي اجه للنجف ويا مرتضى هو نفسه ابن زهراء "
كعدت بالبدايه ويمي رتيل وماما و خالاتي وبناتهن لورا
ضليت اباوع ع الطريق سمعت صوت صديقه
صوته عالي من يحجي يفززني وصلنا من داننزل سمعته كال
... لك هلا مرتضى
انتبهت دايخابر سكت كله... هو ششفت وتسألني ع الاجواء
هم سكت رجع كله... بالقران من ورا عثمان غير شكني
سكت شويه كله... هسه لتصيح لا افتح سبيكر وافضحك
ضحك كله... راح اصورلك الاجواء وادزها واتساب
سكت شويه كله... عندي نت وسده
ضحك باوع لمصطفى گله... اخوك يريد يشوف الاجواء
وكام يصور اني بداخلي كلت... بعد لو يموت مااهتمله ولا اسأل عليه شنو صعب يخابرني مثل صديقه!
مر الوقت ووصلنا لكربلاء وعقدو ورحت زرت اول مادخلت الامام دعيت ربي يهديني وينورلي طريقي بجاه الامام
لما طلعنا اجتمعنا كلنا كال صديق مصطفى "كسار"
كسار... خلي ناخذ صوره جماعيه تبقى ذكرى دام جايب كامرتي
وصدگ اخذنا صور هوايه ورحنا لمطعم تعشينا ودانرجع مرينا بالاسواق شفت ورد مشيت يم مقدام ضحكت كتله ... محد يجيبلي ورد يهديني شي
ضحك كال... جنج على ورده
وراح اشترى ورد الي ولخواتي ديدفع اجه مصطفى كله
مصطفى... لا حبيبي اختك اني اشتريلها ورده
مقدام خزره ... لتصير حقير كول مرتي بيها مجال
مصطفى... اي لعد هي مو اختك شو تعاي... ولزم ايد سالي كللها... تردين ورد
سالي... جيبولي اثينكم يلا
صدك اشترولها اثنينهم ومشينا اخذت وردتي اصطناعيه بس بيها عطر اتصل موبايل كسار جاوب كله
... ها حبيبي
سمعته كال... خاف احصل جلاق
سكت رجع كال... زين شلون ماترهم
هم سكت ىجع كال... اي والله خربيا وبحضي الشغلني وياك
سكت شويه ضحك كله... لا حبيبي انت
اهم شي المالات (الفلوس)
ضحك وسد الموبايل
جر مصطفى مدري شحجه وياه مرتين يباوعلي حسيته يريد يحجي شي ويتردد
وكفنا بمكان حلو كال
كسار... الي يريد يسوي جلسة تصوير وببلاش ترا ماتتوفر الكم
هيج فرصه بعد لان راح نرجع
مصطفى... حره شو مااخذت صور بس بالجماعيه تعاي هذا تصويره يخبل
مقدام... تعالو ناخذ ونكبرها
رحنا وكفنا اني وياه ورتيل وسالي وماما
واخذنا ضلو ياخذون صور
وكسار كل شوي يباوعلي ويتصل موبايله ويرفضه بعدين كال
كسار... يلا خلي اخذ الكل واحد صوره وحده حتى نروح يلا
اخذو هم باوعلي كال... يلا اخذلج صوره
اخذت الورد ولزمته ووكفت كال :-ابتسمي
ابتسمت اخذلي صوره رجع كال... لا لحظه نحذفت خلي اخذلج بعد وحده اخذ بعد صوره كال
كسار... اوكفي يمكن مغوشه خلي اعيد وهم اخذ صوره كال... هاي ضبطت بس شنو رئيج تكعدين تصير احلى
كعدت واخذلي كمت كتله... هاهيه
كسار... اي هيج كلشي تمام
اتصل موبايله سمعته جاوب.. تم وغلقه
بعدها خلينا ورجعنا للبيت والطريق كله سالي تصور بايدها وتسوي :-مختووبه
وتضحك وتسولف
وصلنا للبيت رحت بدلت وجمعت الورد مال خواتي حطيته بمزهريه وحطيته يمي بالغرفه مقدام شافه ضحك
مقدام... باجر اجيبلج طبيعي يخبل
حره... اي والله ياريت يريح النفسيه
هز راسه..
فرشت حيل تعبانه ردت انام مكدرت ضليت الوب لحد الساعه ب ٢:٣٠ اجاني مسج فتحته
مرتضى كاتبلي
... اليوم طالعه حلوه
فز كلبي ودزيتله مسج... هو انت وين شفتني
مرتضى... الصايه والحجاب يخلوج مميزه واحلى
ابتسمت دزيتله... مجاوبتني
ضليت انتظره يجاوب الى ان غفيت الصبح كعدت بسرعه شفت موبايلي بعد مادازلي مسج
كمت نفس روتيني لحد العصر كاعده استمع لاغنية حياة اجاني اتصال منه كلت ماريد اجاوبه بسرعه دامه هيج يتاخر عليه اصير مثله
حسبت واحد اثنين خمسه ثمانيه عشره وفتحت خط كال... هلا شلونج
حره... بخير
مرتضى... البارحه غفيت
حره... اي
مرتضى... اخوي دزلي الصوره الجماعيه فشفتج
حره... ها صحيح اخذنا جماعيه
مرتضى... كلش لايكلج الحجاب
حره... الله يهديني والبسه
مرتضى... ان شاء الله تلبسيه
حره... وينك هالفتره كلها مشفتك
مرتضى... باربيل
حره... شوكت ترجع؟
مرتضى... ليش
حره... شنو ليش
مرتضى... تريديني ارجع
سكتت كتله... شبيك هو سؤال
ضحك... ماادري شوكت نرجع احتمال نتأخر المكان حلو هنا
حره... تمام
سمعت صوت واحد يكول... ابو السباع ضروري تتأكـ...
هو جاوب بسرعه... جايك ابن سهاد كلي... يلا توته اجه صديقي
حره... اخذ راحتك
مرتضى... هلا
وسد الخط حطيت ايدي ع كلبي كلش افرح من احاجيه ردت اسأله عن كتاباته الي بالدفتر
بس ملحكت
يلا مو مشكله من يجي اسأله
طبيت للمطبخ لكيت سالي تطبخ وتغني"
... طب ليه بيداري كده "
فركت عيوني... اني بحلم لو بعلم شو داتطبخين
سالي... غير صرت مختوبه خوما اخلي ختيبي جوعان
حره... ياحقيره واحنا ولا مره طبختيلنا
سالي... اوووي حقووداا مسمومااا مترديني اسوي اكل لختيبي
تحجي وتشوفني بالحلقه وتتموع اني ضحكت
هي ضحكت وراي كتلها... خوش جايبه دور المختوبه
سالي... حبيت اجرب الطبخ
حره... عفيه صيري شاطره
لثاني يوم راحو عقدو محكمه وراح وياهم مقدام
ومقدام بهالفتره كدر يشيل نفسه بسبب المحل وخصوصا ان مكانه تجاري
ورا تلث ايام كاعدين نتغدا
مقدام... شوكت المدرسه
سالي... اقل الاسبوعين
مقدام... طلعتلجن فلوس للملابس يمنا صداري تخبل تجن وياي العصر
حره... اني مابيه حيل مااروح
رتيل... انجبي انتي... باوعت لمقدام... اي مقدام نجي وياك
هو باوع لامي كللها... تجين علمود تختارين لمروه
اميره... لا مابيه حيل ختروح ويا خواتها رتيل ذواقه
مقدام... هاهيه
كملنا غدا سالي خابرت مصطفى كاللها :-انتظريني من اجي انطيج فلوس
سالي... لا اخوي مطلعلنا
مصطفى... لا مايصير انتي على ذمتي هسه اني انطيج
وصدك ب ٣:٣٠ اندك الباب
راح مقدام فتحه كله... هلا مصطفى تفضل
مصطفى... لا مستعجل صيحلي اختك
مقدام... ترا بديت تغثني
مصطفى... ترا مرتي... وشوفه ايده اللابس بيها الحلقه
طبيت اضحك كتلها... ختيبج بالباب ورحت ابدل كملت هي طبت بيدها فلوس
سالي... من ختيبي
حره... راح اركعج بالنعال انتي وياه
هي ضحكت كملنا وصدك رحنا افترينا اباوع الصداري النازله تجنن
عجبتني صدريه من فوك بيها تعلاكتين ونازله ع شكل حرف V ومن تحت كلوشه تجنن
سألت ع السعر ب ٤٠ اخترعت بس مقدام شافه
مقدام... تخبل اخذيها
مقبلت ضل يلح واشتراها
رتيل كالت :-هالوقت متعرفيه صيف شتى احنا بالعراق ع ساعه تشتي اخذي قميص طويل
فجبت قميص تلث ارباع الردن
والثاني كامل جهزت للمدرسه كلشي حسيت بواهس لان ملابسي جانن كلش حلوات
مرت هالايام بشكل عادي ومشفت مرتضى نهائيا
قبل المدرسه بـ خمس ايام وقت الظهر جان مقدام نايم والبنات بالغرفه اني كاعده بالهول افكر...ليش مقدام هاليومين ضايج؟
وكلبي مقبوض خصوصا من الشخص الي تدين منه
كمت دااجيب موبايلي حاطته ع الشباك يم موبايله ع الشحن شفت جايته رساله مكتوبه
... انت ويامن داتلعب ترا جدك السابع عشر نعرفه
خفت باوعت لاخوي نايم اخذت موبايله حسيت بشعور مو حلو اني اتجسس عليه
رجعته لمكانه وضليت افكر الفضول والخوف مشكله
اخر شي صفنت وكمت اخذت موبايله ورحت للمطبخ فتحته وشفت المسجات من ارقام مامسجله واغلبها جانت تهديدات مثل
:-اليندك بينا نشيله...
لو :- وين تروح ولو تضيع خواتك موجودات...
ومن رقم ثاني :-ترجع ال ٨ملايين لابو مصعب والا نكتلك ونمثل بجثتك...
جسمي كام يرجف وكل هالتهديدات اليوم
من الخوف بجيت وكثير تهديدات منها نذبح
نصلخ
نحرك
نثرم
واكو رقم مجاوبه مقدام
... مليونين رجعتهن اذا ضليتو هيج ابلغ عليكم
مجاوبيه بس من رقم ثاني... جرب بلغ وشوف شلون نعلك راسك ع الجسور
الموبايل بيدي كمت ارجف رحت رجعته اخذت موبايلي ودفتري وصعدت ع السطح ابجي
خايفه فكرت ان اخوي بخطر رعب بالنسبه الي
اني مااتحمل افقد اكثر
ضليت ع السطح ماادري شكد حسيت نفسي مخنوكه بلا وعي اتصلت على مرتضى بعدين كلت.. وهو شيكدر يسوي
سديته ورا ربع ساعه اتصل مجاوبت اتصل مره ثانيه فتحت خط
مرتضى... هلا شفتج متصله
حره... بالغلط اتصلت
مرتضى... شنو باجيه
حره... لا ماباجيه
مرتضى... احجي الصدك
جريت نفس... اي
مرتضى... ليش تبجين؟
حره... مخنوكه
مرتضى... من شنو؟
تنهدت... هذا الحقير الكتلك عنه
مرتضى... منو
حره... هذا المتدين منه اخوي
مرتضى... اي شبيه؟
حره... شو يهدد باخوي... وبجيت
مرتضى... لحضه بس اهدي وفهميني لاتبجين
حره... يهدد باخويه يكولوله نذبحك
مرتضى... وبعد ؟
حره... سولفتله ع التهديدات
مرتضى... ها يعني يريد ٨ بدل المليونين
حره... اي واخويه ضايج ومدايحجيلنا دايحجي كتله... شلون مرتضى خايفه ساعدني
مرتضى... مرتضى مايكدر يساعدج
حره... خايفه
مرتضى... اهدي ولاتخافين من شي مايكدرون يأذون اخوج ولو يكدرون مجان انتظرو
انتي من زمان كلتيلي هو مديون وماسووله شي فلتخافين
حره... ماادري.. سمعت رتيل تصيح كتله... اختي تصيحني رايحه
... سديته ونزلت شافتني رتيل كالت :-لج شعندج ع السطح بهالحر
حره... داشر ملابسي
نزلت كعدت بالغرفه الرجفه بعدها بايدي بالليل كالت سالي
سالي... باجر نروح نجيب الكتب خلي نطلع ع الماده
حره... ماشي
صدك لثاني يوم رحنا للمدرسه نجيب الكتب المديره تعرف رتيل انطتنا كتب جديده خليتهن بالجنطه اخذتهن سالي ضلت تحجي ويا رغد والبنات كتلها... سالي اذا تتاخرين حاروح
سالي... تمام روحي اريد اشوف البنات صار هوايه مملتقيه بيهن
طلعت من المدرسه مشيت شويه اتصل مرتضى فتحت خط
مرتضى... تعالي منتظرج يم شارع ا****
حره... ماشي هو قريب خطوتين مشيت شفته ابتسمت صار هوايه مشايفته
مرتضى... شلونج شنو باجيه
هزيت راسي لا
مرتضى... لعد شبيها عيونج
حره... ولا شي
مرتضى... تعالي
كعدنا سويه كال... ضايج ع موضوع اخوج
حره... اني هم كلش ضايجه
مرتضى... احجيلي
حره... هو الحجيته الك كله
مرتضى... زين ماشفتي اسم لهذا المتداين منه اخوج او لقب اي شي
حره... لا والي فهمته من الكلام ان اليحجي ويا اخويه مساعده
مرتضى... زين الرقم
حره... شو هوايه ارقام
مرتضى... مع هذا دزيهم
حره... ليش شحتسوي
مرتضى... ناخذ الارقام للاحتياط
حره... ماشي
مرتضى... زين ماقريتي المكان ماذاكره
حره... اي ذاكر التقينا بديالى
مرتضى... ها تمام
حره... شلون شنسوي حيل خايفه
مرتضى... لاتخافين صدكيني كلشي مايسوي
حره... خايفه ومتلخبطه مدافهم شي من حياتي
مرتضى... ليش هيج تحجين
حره... والله اكو اشياء مدالكالها تفسير خايفه حيل
مرتضى... صدكيني ماراح يصيرلج شي مو زين ابد ثقي بيه
هزيت راسي كال... سؤال
حره... شنو
مرتضى... ذاك اليوم سمعت هذا الضابط رشم
حره... شبيه رشم
مرتضى... جان يحجي ويا اخوج عن واحد شنو اسمه.. غمض عينه كال... اي تذكرت سامر الهادي
حره... شحجو
مرتضى... ان هذا سامر يكول انتي وهو تحبون بعض
حره... فتحت عيوني كتله... صدك الله يصخم وجهه هم رجع هيج يكول
مرتضى... اني هذا الي سمعته... سكت كلي... هو هذا منو
حره... هذا خطفني جان ويا ابو حياة الكلب بسببه دخلت مستشفيات وصار عندي رضوض بالاضلاع
هز راسه... اي؟
حره... وبعدين انهزم من السجن
هز راسه باي كتله... وراسلني...
ركز بعيوني كال... كملي
حره... وقدم ادله ضد مشعل وضل يسال عني مفهمت ليش هيج يسوي
مرتضى... وليش مابلغتي عنه؟
حره... مدري تلخبطت
مرتضى... بشنو تلخبطتي
حره... كلت اخاف تاب مااريد ابلغ لان صار ضد مشعل
غمض عيونه كال... كملي
حره... اي وبعدين فجاه سمعت من رشم انهم لزموه من خلال رقم الموبايل واني حيل تفاجئت وضجت عليه
فزيت متفاجئه ع صوته وهو ينتر بيا ويكول... وليش عيني ضايجه عليه!
صفنت بيه متفاجئه كال... تحبيه؟
حره... شبيك ليش تصيح عليه؟
مرتضى... جاوبي ع السؤال
حره... احبه شنو شبيك تخبلت هو هذا ينحب!
مرتضى... لعد؟
حره... ضميري انبني لان هو صار ضد مشعل
ابتسم باستهزاء ودار وجهه كال بهدوء :-هيج ناس ماتوب حره
سكتت كتله... شبيك
مرتضى... عندي حساسيه من المجرم الي يضل برا السجن افرح من يعتقلون واحد مسوي غلط حتى يتربى
حره... بس ممكن يتوب
مرتضى... لا مايتوب باوعلي كال :-هالرجال خطفج وعذبج لو جان ناوي يتوب جان ساعدج تطلعين اذا فضح مشعل يجوز عنده مشاكل وياه مو علمود عيونج
جان المفروض تبلغين عنه لان وجوده برا خطر وممكن الي صارلج يصير لغيرج
سكتت كتله... هسه هو انسجت
هز براسه كال... خوش
حره... شوكت اجيت
مرتضى... البارحه بالليل.. باوعلي كال :- يلا تاخر الوقت لازم ترجعين
حره... ماشي
رجعنا وصلنا للفرع كال... يلا روحي اني شويه وارجع للبيت
هزيت راسي ورجعت للبيت مرت الايام مثل ماهي لحد مااجه الدوام لبست صدريتي وقميص يوصل لنص ايدي لبست طوك ورتبت شعري طلعت صدك كشخه
اخذت الجنطه ورحنا للمدرسه اني وسالي
صرنا بنفس الصف
طبيت للمدرسه وهناك كل الي تشوفني تسألني عن حياة حتى المدرسات كضيت يومي كله مختنگه ومكتأبه لان كل الي تشوفني تسألني..
شلون نقتلت؟..
يكولون رصاص بكلبها صدك؟..
البقيه بحياتج ..
شلون عايشه بلاها..
خطيه چنا نحبها
طلعت من المدرسه مخنوكه وصلت للبيت شفت مصطفى واخوي واكفين برا
الدمعه بطارف عيني طبيت للغرفه كعدت ابجي اجت ورايه رتيل كالت
رتيل... شبيج توته
حره... كل الي يشوفني يسألني عن حياة يشوفون حياة بيا... وبجيت
ضلت تحجي ويايه وتهون عليه شويه وكامت تشوف الطبخ اني قفلت الباب وبدلت شفت موبايلي يتصل رفعته باوعت مرتضى جاوبت
مرتضى... شبيج ضايجه
حره... لا مضايجه
مرتضى... شفتج من رجعتي من المدرسه
كعدت احجيله كال... لاتضوجين بالعكس شوفي البنات شلون مفتخرات بصديقتج وصارت قدوه الهن
صح استشهدت
بس بقت تنذكر عند الناس وهذا الاهم لان الانسان ميعوف وراه غير الاثر الطيب
حره... بس شي يقهر
مرتضى... اكيد بس كلنا ع هذا الطريق وراح يجي يوم و نموت
المهم نترك اثر لهالسبب ادرسي حتى بالمستقبل تصيرين قدوه مثل حياة
حره... ان شاء الله
مرتضى... ابدي من اليوم مو تخليها تتراكم
حره.. ان شاء الله
ضلينا نحجي الى ان سديته ونمت ومشت ايامي مثل بعضها دوام ودراسه ومرتضى طول هالوقت يتصل ويسال عليه ويشجعني ادرس وجوده هون عليه فقد حياة وسمرا
لولاه يمكن مجنت اكدر اعيش بعد هالحوادث
وراها بفتره سووا سفره مدرسيه لمدينة العاب ولمه حلوه سالي ضلت تلح على مصطفى وافق بشرط اني وياها ميأمن تروح وحدها
وهنا ضلت تلح عليه الى ان قبلت اروح وياهم
سويت اكل واشترطت عليها هي الي تشيل الاكل كالت
سالي... سهله
لثاني يوم لبست فستان اسود نص ردان ورتيل سوتلي ضفاير من الجهتين
وكصتلي كذله وحطيت ماشات وصلنا مقدام لمكان الباص
صعدنا وراح هو لشغله وصلنا لهناك دخلنا
سالي انطلقت تلعب وتصور واني يمها صعدت ب المنخل امي مصعدت لان ادوخ منها ضليت كاعده اباوع الها اتصل مرتضى جاوبت
مرتضى... كثير بنات يمج بس مادااشوف غيرج
ضحكت كتله... ليش انت وينك
مرتضى... وراج
درت وجهي واكف ورايه بس بعيد ضحكت وكمت يمه كتله... هاي هنا
مرتضى... بدل ماتكوليلي هلا بيك
ضحكت كتله... هلا بيك
مرتضى... تعالي نفتر
حره... مو سالي
درتضى... وياها البنات
مشينا كتله.. حلو فستاني
مرتضى... حلو لو ما الردن
حره... شبيهه
مرتضى... انتي شني سالفتج يوم لابسه نقاب يوم لابسه نص اصفي على راي
ضحكت... حسب المكان
مرتضى... راح اتخبل اخوج شلون يخليج هيج تطلعين
حره... ترا جسمي واني حره
مرتضى... ادري بيج حره
ضحكت كعدنا كال... ذاك اليوم كلتيلي دعيتلك تتحقق امنيتك
حره... اي
صفن شويه وكال... واذا تكدرين تحققيها تسويها؟
حره... اكيد كولي
مرتضى... اتمنى مااشوفج لابسه هيج برا بعد
حره... ترا...
مرتضى... قبل لاتاكليني بلسانج خليني احجي... سكتت كال... انتي بنيه حلوه وبعدج شابه والف واحد يتمناج واعرف اللبس مو مقياس بس لازم تفهمين هالعين... واشر على عينه... موجوده عند الكل
بس النظره تختلف مو كلها من تشوف بنيه حلوه تفكر بشي زين
حره... شلون
مرتضى... مو كل الزلم محترمه اكو ينظرولج بطريقه شهوانيه وانتي اكيد ماتقبلين هالشي
هزيت راسي باي كال... فـ انتي ليش تنطين هيج فرصه لهيج حيوانات لاتلبسين حجاب هاي قناعه بس ماتحسين لبسج مو محتشم!
باوعت لفستاني هو مخصر كلوشه كتله... بس اني حبيته
مرتضى... اني هم... دار وجهه كال بصوت ناصي... استغفر الله
باوعتله... ترا داتضوجني شبيك ليش هيج تحجي وياي
ضحك... شحجيت
حره... مادري تحسسني مسويه شي غلط
مرتضى... لان فعلا لبسج هذا غلط تلبسيه بلبيت كدام اخوج زوجج ماشي
بس مو برا
حره... اهو انت شكد عقده هذا اخوك هم مثلك حتى اكول لسالي تبطل بعد متتزوج
ضحك... شتبطل بعد عقدت
هزيت راسي كال... ماناويه تسوين مثل سالي
حره... شنو؟
مرتضى... تتزوجين
حره... لا بعدني صغيره
مرتضى... سالي اصغر منج
حره... اي بس اني مو ببالي زواج حاليا
هز راسه كال... تدبر
حره... شنو
مرتضى... ولا شي... ابتسمت كال... مادزيتيلي الارقام
حره... اشو هوايه
مرتضى... رغم هذا دزيهن
حره... ليش
مرتضى... داسال ابن زهراء بلكي يكدر يساعد اخوج
حره... ابن زهراء شيشتغل
مرتضى... جيشي
حره.... جيشي شنو
مرتضى... يعني يشتغل هناك بالجيش
ضحكت... عسكري
مرتضى... مااعرف بهالامور
اني ابتسمت ركز بعيوني نزلتهن ضل يباوع وهم استغفر كتله... شبيك بس تستغفر
مرتضى... اي احب الله وداستغفرله انتي شبيج
مرديت كتله... كوم نلعب
مرتضى... ماشي
حره... نصعد العباره
مرتضى... لا وين كلها زلم
حره... دولاب الهوا
مرتضى... لا الرجال هذاك مبين عوينجي
حره... سفينة نوح
مرتضى... دشوفي الزلم وانتي لابسه نص
حره... لعد شلون هسه
مرتضى... تعاي
مشينا يم النهر لبسنا سترة الطفو وصعدنا الزورق انطاه فلوس كله... بس احنا لاتصعد احد ويانا
وصدك مشت هاي اول مره اصعدها كمت بودي احضن المي كمت العب بيه شعري كله تبلل ضحك مرتضى كلي
... اسبحي بعد اسبحي
ضحكت... شو حلو
ابتسم... مثلج
ضلينا نفتر ونسولف جان هذا احلى يوم بحياتي الى ان توقف الزورق وطلعنا كال
... دشوفي شسويتي بروحج
حره... اهم شي تونست
مشى اشترالي شعر بنات لونه وردي وكفه يم شعري كال
... شو مايشبه شعرج
ضحكت... هو غير حلا
مرتضى... شمدريني كلي شعر بنات تفضلي
... اخذته وكتله... شكرا
كعدت اكل ونحجي كتله... سالي وينها هسه
مرتضى... تلكيها هنا
حره... اكلت باوعت لواحد يبيع نفاخات كتله... خلي نطير نفاخ
هو دار وجهه كال... تعاي
راح اشترى نفاخ وانطاني سته اني كمت اكمز هو ضحك كال... تعالي يم النهر بس مو تشمرين روحج مناك
ضحكت... ماشي
مشينا شمرت شعر البنات بالزباله ووصلنا يم النهر كتله... انت هم وياي يلا
كال... ماشي من اكول تلاثه عوفيهن واحد اثنين تلاثه
وطيرت النفاخ لاراديا كمت اصفك واضحك واباوع للسما شعور كلش حلو كتله... الله تخيل كل العالم تسوي مثلي
ضحك... يجي يوم واخذج لهيج فعاليه
ضحكت... شكرا اليوم احلى يوم بحياتي
ابتسم... ضحكتج كِلش حلوه
اتصلت سالي جاوبتها كالت... يلا ولج صبينا نريد ناكل
كتلها... جايه
مرتضى... يلا روحي
حره... تعال ويانا
مرتضى... لا ولتكولين لاحد اني اجيت
حره... يا ليش
مرتضى... الذكريات الحلوه حلاتها من تحتفظين بيها لنفسج بدون متكولين لاحد
ابتسمت... ماشي
مرتضى... حتى لخواتج
هزيت راسي باي وصلني قريب منهن لوحتله باي ورحت يمهن كعدنا سالي سالتني
... وين جنتي دورت عليج
حره... رحت العب لان شفتج تاخرتي وصعدت بالزورق
تغدينا انطلقت اضحك واسولف وياهن احس بكلبي فراشات تطير
ومشى اليوم وجان هذا احلى يوم رجعنا للبيت ضميت الفستان وكلت بعد ماالبس نص احقق امنيته وكلامه صحيح
صدك اكو زلم ميخافون الله انفع نفسي من البس محتشم مااضرها بالنهايه الله هم امر بالحشمه
مرت ايامي نفس الروتين وهاليوم ببالي ودخلنا بمحرم بيوم رحت للمدرسه نفس الروتين بطبيعتنا اني وسالي صح بنفس المدرسه بس منرجع سوا
اكثر المرات سالي ترجع ويا صديقاتها واني اول ماخلص اطلع بس بالروحه نروح سويه
احنا دوامنا من الصبح لوقت الظهر دا ارجع وقت الظهر وهوسه البنات راجعات للبيت
داامشي شفت واحد صاعد دراجه ولابس خوذه مشى ورايه مااهتميت كلت يجوز ديرجع لبيته
لحد ما وصلت للشارع داعبر حتى ادخل الفرع هو يمشي وراي ع كيفه حسيت بخوف
مااعرف ليش تقرب مني صار بصفي كال... تروحين تتنازلين عن السامر والا... واشرلي بسجينه صغيره ع ركبته
توني داصرخ دفعني وبعدها ضرب كتفي بالسجينه
وكعت حسيت كتفي انخلع كمت ابجي اكو بنات شافني ركضن عليه
كمت ارجف وابجي اباوع لكتفي كله دم
اجه سايق كلي... انتي اخت مقدام مو
البنيه.كلتله... اي
اجه الولد سندني ووصلني لبيتنا طبيت ضلن البنات ويايه اول مطبيت رتيل صاحت حضنتها وكمت ابجي كالت
.... شكو فهميني
سالي شافت الدم صرخت
اجت ماما ضلت تسال... شكو.. ركضت تجيب كطن وسالي خابرت مقدام كاعده بالهول اجه مصطفى كال
... شبيج
اني ابجي وارجف شاف جرحي كال... سهل مايحتاج مستشفى بس جيبولي خلي اعقمه
صدك جابلته سالي وكعد يعقملي الجرح
وهنا بدا التحقيق سولفتلهم كلشي رتيل كالت
... هذا السامر مو مسجون شدايصير
اجت سالي انطتني علاج غفيت حتى قبل لا اغير ملابسي للعصر مقدام كاعد يمي ضل يهدي بيا كال... منا ورايح اني اوصلجن ولتخافين السامر مسجون بعد كلشي مايكدر يسوي
صح جان يهديني بس جان مبين عليه الخوف
كمت سبحت وبدلت طلعت بالحديقه فتحت موبايلي ٢٧ مكالمه من مرتضى اتصلت عليه رفضني ورجع اتصل جاوبت بصوت مخنوك يمه هوسه وحجي وواحد يصيح كلي
... شلون صرتي شصار وياج
حره... ماادري واحد هددني و ضربني بالدراجه
مرتضى... بشنو هددج
حره... يكولي تنازلي عن السامر لو اذبحج هيج اشرلي... وبجيت
مرتضى... شفتي شكله
حره... لا لابس خوذه
مرتضى... علامه بايده
حره.. مشفت شي
مرتضى... ضعيف سمين طويل قصير؟
حره... يعني ضعيف
مرتضى... تقريبا وزنه شكد
حره... ماادري بس اضعف من ضاوي الاخرس جيرانه
مرتضى... وطوله؟
حره... ماادري جان يسوق
مرتضى... حسب تخمينج شتشوفيه؟
حره... تقريبا من ١٧٠الى ١٨٠ هو صاعد ع الدراجه فممتاكده
مرتضى... ماشي
واحد يمه مدري شحجه انقطع الصوت نهائيا كلشي مااسمع ورا شويه رجع حجه كال... زين صوته مألوف؟
حره... شلون يعني
مرتضى... يعني ممكن يكون واحد من الي خطفوج
حره... لا لا مو منهن الهيئه تختلف
مرتضى... ماشي اهدي هو السامر انسجن شيكدر يسوي بعد
حره... مادري خفت
مرتضى... لاتخافين محد يگدر يأذيج بس لاتطلعين وحدج
حره... ماشي
سديته و رجعت كعدت بالهول سالي جابت الاندومي وكعدت كالت
... اكلي
اكلت شويه وياها و مددت لليل اجه رشم وضل يسالني هم شلون هيأته وشكال بالضبط ونفس الاسأله انعادت
وهم ضل يطمن بيا لثاني يوم راح مقدام اخذلي اجازه من المديره وانطتني
لان سمعت بالي صار وسالي مداومت
مرتضى كل شويه يخابرني ويطمن عليه
لليل كاعدين كلنا بالهول نباوع تلفزيون اني نايمه على رجل رتيل وسالي كاعده بصف مقدام سمعت صوت اشعار ماسنجر على موبايل اخوي
هو كال... مروه انطيني موبايلي
كامت جابتله الموبايل فتحه سالي كالت... دخيلك ياربي
اني بسرعه كمزت سمعت صوت فيديو واحد يصيح كمت
بسرعه شفت فيديو
السامر مضروب ووجهه كله دم... يتبع...
________________
قراءه ممتعه
لتنسون التصويت والمتابعه
والاهم رئيكم للقصه
دمتم بخير ❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!