رواية حمائم تخشى الطيران الفصل العاشر 10 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

متابعة لحسابي وتعليقات بين الفقرات لطفًا 😊🖤
شعلو البارت تفاعل حتى نستمر بالنشر

واتباد FFATEMA__

__________________

ليلى :- قيس اني يتيمة

رفع رأسه بصدمة التقت نظراتنه گبل طفرت دمعتي

قيس :- مو گلتيلي ذاك اليوم والدچ بالدوام چذبتي علي ليلى؟! گال اخر كلماته بخيبة امل وبين الزعل ع وجهه

رفعت اكتافي بجزع وكتله بقهر :- مادري ردت احس بشعور البنات العدهن اهل اسفة لان كذبت
بس شعور اليتم صعب يسلب الطمأنينة والفرح من الگلب ويجودر الحزن بنص الروح

قيس :- بس ما يصير تچذبين ليلى بعدين تتعودين ولسانج ياخذ ع الجذب يصير شي طبيعي عندج الانسان اذا فقد الصدق بعد حتى بروحه ميثق ولا بالعالم

ليلى :- والله ما اعرف اچذب بس گتلك حب...... قاطعني

قيس :- لا تعيدين فهمت موقفچ الله يساعدچ ويخليلچ الوالدة خيمة على رأسچ

ضحكت بوجع ورديت :- والدتي هم ميته اني يتيمة الأبوين وعايشة ويا خالتي الشفتها انتَ وحجيت وياها

قيس :- لا حول ولا قوة الا بالله ، گطعتي گلبي والله
الله يرحمهم ويغمد ارواحهم الجنة ماتو ثنينهم سويه؟
هزيت راسي بقهر ورديت

ليلى :- امين، زعلت؟
قيس :- من شنو؟
ليلى :- لأن جذبت عليك
ابتسم رد :- لا ما ينطيني گلبي ازعل منچ ، مسحي دموعچ خاتون لأن چون گلبي

ليلى : مسحت دموعي ودرت وجهي عنه ضلينة دقايق ساكتين تنهدت بضيق
گال :- تعاي للعرس ليلى لا تگليلي بصفتچ منو اني راح اضبطها اريد اهلي يتعرفون عليچ

هزيت رأسي برضا .. بدون رد
قيس :- باچر الصبح تجيكم اختي تسلم عليج وتعزمج عود انتن صاحبات وعلى واهسها اجيتي

ليلى :- بس اشوف خالتي بالأول

طلع ورقة كتبلي رقم ، گال :- خابري من تقبل هذا تلفون البيت انتظر اتصالچ باالـ10 بالليل خاتون
عدكم تلفون مو؟

:- اي اكيد عدنا

حچيت لخالتي كل شي وافقت بس على شرط هيَ تجي وياي ، عاد خالتي رغم سوالفها التقهرني بس حريصة عليَ جدًا

صارت الساعة 10 وگفت يم التلفون حطيت الرقم وخابرت ، جاوبني
ليلى :- هلا قيس ؟
قيس :- مية هلا خاتون ، بشريني؟
ليلى :- قبلت خالتي گالت اني اخذچ ونروح للعرس سوية
قيس :- الله يبشرچ بالخير الصبح اجيب اختي ونمر عليكم بما ان باچر عطلة يعني
تعرفين علمود من تجين تلگين احد يعرفج

ليلى :- خاف عيب
قيس :- لا ابد مو عيب بس ليلى لبسي حجاب متفقين
ليلى :- اي البس
سمعت صوت يمه ولد يگله بخوف "اجة سيد رحمـن"
سد السماعة بسرعة بدون ما يگلي الله وياچ

قوست شفايفي مستغربة رجعت السماعة وگمت صعدت حضرتلي ملابس گعدت الصبح متحمسة تريكت لبست گلابية حلوة وحطيت حمرة
الساعة 9 اندگ الباب ركضت بلهفة فتحته على وسعه صارت عيني بعين بنية لابسة نقاب ماطالعات غير عيونها رفعته من شافتني مبتسمة سلمت بوستني

كتلها تفضلي رفضت وگالت :- اني العلوية دنيا حبيبة ، اخت قيس اجيت اعزمچ على عرس اخوي هاشم انتِ والأهل ، اتمنى تشرفينة راح نفرح بجيتچ

ليلى :- ان شاءالله نجي حبيبتي تفضلي يعني ليش واگفة

دنيا :- اخوي منتظرني بالسيارة الله وياچ ، نزلت نقابها والتفتت استغربت يعني ليش جابها حتى تگلي كلمتين
باوعت شفت قيس واكف يم السيارة مبتسم وصعدت عينه عليَ ارتچيت ع باب اباوعله

رجعت دنيا تركض باتجاهي وشالت النقاب ضحكت بخجل :- نسيت اگلچ عود احنة چنة سوية بالابتدائية وشفتچ صدفة هسة بمحل ملابس وحجيتلج عن عرس اخوي وعزمتچ
ربي يسامحني على هاي الكذبة ان شاءالله طالما نهايتها خير بحيل الله

تغابيت من وصلت لاخر كلام هزيتلها راسي وكلت هذا هو متفقين ..

راحت بسرعة صعد قيس قبلها شغل السيارة رفع راسه شافني واكفة بالباب اشرلي بكف ايده بمعنى "فوتي جوة"

فتت وسديت الباب ركضت لغرفة خالتي ابلغها بكل شي هزت ايدها وگالت :- تهي بهي تاليته يطلع عاشگچ ابن السادة

ليلى :- لا مجرد زملاء

نسيمة :- سولفيها للبطة مجرد زملاء بت الحلو وينه ذاااك هو عاشگچ
اذا تكولين عنه ولد مؤدب وما يباوع ولا عنده صداقات ويخاف الحلال والحرام شعنده وياچ؟
ليش يترس سجله ذنوب من يمشي وياچ؟

يخالة الولد عاشگچ بس ما سألتي روحچ شلون اذا عرف انتِ يتيمة؟

ليلى :- صح النوم غير حچيتله

نسيمة :- عزة وطين وشگال؟

ليلى :- ما كال شي عادي تقبل الموضوع وتفهمني
هسة كليلي شلبس
هو طلب مني البس حجاب انطيني منج حجاب يطابق ملابسي اني محضرة تنورة وقميص وبدلة مادري شلبس شوري عليَ

نسيمة :- طبعا بدلة قابل رايحة للكلية وتلبسين تنورة وقميص، فتحي كنتوري اخذيلج ربطة تلوك ويا ملابسج

توجهت للكنتور اگلب بالربطات المتنوعة اخذتلي ثنين حطيتهن على رأسي وباوعت بالمراية
:- شنو رايچ؟ تلوكلي؟

نسيمة :- كلشي يلوگلچ يوم
اكلج هذول هم يركصون يردحون يشغلون غنة اني اريد اردح واكسر الكاشية

ليلى :- ولا انتِ اخت الولد ولا اخت البنية بعد المن رادحة

نسيمة :- يبوي منج بومة بومة

ليلى :- صاعدة صاعدة لا تشمرين حچي

نسقت لربطة ويا البدلة ونزلت خلطت نشا وماي ورد حطيته لوجهي جاي اهفي واندك الباب صحت خاله الباب
نسيمة :- لج عيني اني بالحمام دطلعلي فتحي انتِ

غسلت وجهي واني اتأفأف مو حتى الخلطة ما نشفت على وجهي ركضت للباب من ورا الباب صحت منوووووو

صهيب :- صهيب

رديت بأنزعاج :- خالتي بالحمام شنو رايد؟

صهيب :- فتحي الباب جاي عليچ مو على خالتچ نسومة

ليلى :- لا؟
صهيب :- والله ،، فتحي يله نحجي كلمتين واروح
ليلى :- لا صهيب انتظر نسومة تطلع من الحمام ما افتحلك الباب هسة شلون ادخلك للبيت وبس اني بي

صهيب :- استغفرالله راح اطفر السياج

ليلى :- شنو انتَ ما تستحي

رد وهو يباوع من فوگ السياج :- لا زايع المستحى والخجل وازيدج من الشعر بيت مخبل

حجاها وطفر، حطيت ايدي على صدري نشغت
الخوف اعتلى ملامحي ارتديت كم خطوة حتى اكون بعيده عنه
نفض ايدينه من التراب وباوعلي بطرف عينه

صهيب :- شبيچ ليلى شايفة جني شايفة بُعبُع وهيج لونچ صار اصفر
باوع لطولي وصوفر :- حتى بالگلابية حلوة الله اكبر شنو من مرأة انتِ

ليلى :- صح انتَ بُعبُع وراح اسميك صهيب البُعبُع ،، يله تفضل اطلع ماعندي حجي وياك ما احجي ويا ناس ما يستحون

صهيب :- اذا على المستحة سهلة اروح للسوگ اشتريلي كيلوين

ليلى :- خااااالة هذا واحد من السرسرية مالتچ منتظرچ دطلعي بسرعة

اشرتله بأيدي يوخر حتى افوت رفعلي حواجبة وزم شفايفة برفض

ليلى :- لا حول ولا قوة الا بالله
وبعدين وياااك؟ وبعدين يا اخي اني رافضتك ما اريدك زوج وملتهية بدراستي وخر عني وخر شگد لحوح

صهيب :- بس انتِ تستاهلين الواحد يتعبلچ واني راح اتعب علمود تصيرين الي وبأسمي

ليلى :- لا تتعب ماراح تستفاد شي وراح تخسر هواي جهد

صهيب :- اني ما اخسر يالترفة راح اكسر غرورچ اني وياچ والزمن طويل
اروضچ وما يصيرلج غيري خيال

ليلى :- نشوف

صهيب :- وتشوفين طبعا واكيد

ليلى :- تفضل اطلع برا البيت يتعذرك او بالأحرى گلبي يتعذرك لان البيت بزود خالتي صار يلفي شكول شكول اعوذ بالله

صهيب :- راح تشوفين هاي الشكول شنو تسوي

ليلى :- الانسان بنفسه يصنع قيمة النفسه وأسم وسمعة حتى صفحته تضل بيضة وحلوة بعيون ناسه واحبابه
الا انتَ ضابط واسمك شگدة الرائد صهيب
خربت قيمتك واسمك وسمعتك بنزوات توالي الليل

صهيب :- وأذا گتلچ اتغير؟

ليلى :-طبع الي بالبدن مايغيره الا الچفن ، انتَ لو تريد تتغير جان تغيرت من اول ماحطيت عينك عليَ وبعد ماعتبت هذا البيت ولا اي بيت او مكان يشبهة

صهيب :- هذا مو طبعي اني تغيرت ورا خسارة زوجتي
بسبب الاحتياج والوحدة ماعندي لا ولد ولا تلد
وعايش وحدي
حتى ابني سلام فقدته قبل ليطلع الاربعين وضليت وحيد وخالي

ليلى :- اي واحد حياته فارغة يلجئ للحرام؟ هاي كدامك اني وحيدة و كاعدة بنص الحرام بعد تعرف هذا البيت
الله شاهد لكمة حرام ما احط بحلگي موصية خالتي توكلني من فلوس خياطها والعرايس
مو قصة امدحلك نفسي بس جاي انطيك مثال

انتَ ماعندك ايمان ولا قوة على شهواتك ونفسيتك شلون تكمل باقي حياتك بهاي الروح الضعيفة التخضع للحرام بكل سهولة؟

صهيب :- اتغير اني من ايدچ هاي الأيدچ هاي شكليني شلون ما تردين ، قمعي جماح شهواتي للحرام ، رتبيني وعدليني
مستعد اتعب سنين حتى اصير مثل ما ترديني

ليلى :- ساعد نفسك بالاول
الانسان لازم يساعد نفسه وما ينتظر احد يساعده

راد يحجي رفعتله ايدي اسكته :- شلون اعدلك واني ما يربطني بيك شي وماعندي اي مشاعر اتجاهك تخليني اوافق على زواجي منك حتى ادخل بيتك واتحكم

حچة بخيبة امل وخذلان :- انتِ ما تحبيني
شلون اگدر اتغير ماعندي حافز راح تضل خسارتج لازكة براسي وتزيدني سوء

ليلى :- هاي مشكلتك ما تريد تتغير النفسك اولًا

صهيب :- زين تغيرت وصرت مثل ما تحبين راح تأخذيني
ليلى :- ما اگدر انطيك كلمة الواحد ما يدري الدنيا شنو ضامتله بعد ساعة

هز رأسه تنهد ومد ايده فتح الباب رمقني رمق اخير وگال :- راح اتغير مو علمود نفسي علمودچ اني روحي ما تهمني بگدچ

ليلى :- الله وياك صهيب

صهيب :- في امان الله

سديت الباب ورا كعدت بالمطبخ حطيت ايديني على رأسي الخوف تغلغل بداخلي من لا شيء
ايدي رجفت رجفة خفيفة ، تنهدت بقهر كسرت گلبي نظرة الحرمان الي بعيونه

نسيمة :- هااا ولچ وينه صهيب وين كعدتي

شلت راسي ورديت :- را..... هاي شلون طالعة لافة روحج هيج بالخاولي ترة باردة

عكست ايديها ولطمت :- چنت اسبح وجاني الخبر واجيتكم عريانه
احو احو
اسبح وجاني الخبر واجيتكم عريانة

ليلى :- لو ضالة بالحمام احسنلچ روحي بدلي روحي
طلعتلي عريانة تهي بهي

بدلت واجت ركض قصيتلها كلشي هزت رأسها برضا
لزمت كفوف ايدي بحنية وگالت
:- ما تلكين هيج واحد بسهولة الحب مو كلشي بالدنيا المراة اهم شي تكون مرتاحة
ومدللة يا حب يا بطيخ هذا البطيخ يسوي اسهال عوفي يولي

ليلى :- خالة! موضوع جدي تشمرين بي حجي

نسيمة :- داضحكج يوم من غمة تغمچ
بس وين حبيبة انتِ گلبچ يم ابن السادة

ليلى :- قيس مجرد زميل لا تحطين برأسي افكار مادري شلونها وتورطيني

نسيمة :- اي مجرد زميل اسم الله وجايبلچ اخيته وجاي والله انچ فطيرة وفاهية
الولد مبين حابچ ورايدچ بس سألي روحج راح يتقبلج مثل ما انتِ لو لا؟

اذا هو عرس ورايحيلة خطار ورادج تلبسين حجاب الله يعلم من تصيرين يمه شيسوي وشنو يطلب
ينقبچ ويلطشج بجفوف وجواريب طبگ سود
تصيرين بيذنجانة وتمشي بالشارع مو مراة

ليلى :- وين وصلتي بتفكيرج حتى للنقاب خالتي احنة زملاء فهمي ارجوچ
كايمة احضر حتى اكون جاهزة على وقت

نسيمة :- عنوانهم يوم
ليلى :- كاتبتة بدفتر الملاحظات

بيومها تكشخنة ورحنة من وصلنة الهم توترت عدلت ربطتي ونفضت ملابسي
نزلنة من السيارة راح ابو التكسي ، اني وخالتي تصنمنة وحدة لاطشة بالثانية

همستلي :- خالة وين بيتهم خاف ندگ باب غير بابهم ونتفشل
تگولين يم جوكة الجهال ذولاااك

ليلى :- أضن يمهم يوليد يولللد تعال حبيبي تعال

اجاني يركض نصيت گتله :- عرس سيد هاشم وين

:- بالبيت

ليلى :- اي وين بيتهم ممكن تدليني حبيبي .. وباوعتله وابتسمت

:- ليش تباوعيلي ؟ وتخليني اباوعلچ و اوكع بالحرام غضي البصر اختي

فكيت حلگي بصدمة خالتلي گلتله :- همبيتك وبيت چروخك غير انتَ بطول زري وينك وين الحلال والحرام

:- امي اني عمري 13 ولازم احافظ على نفسي واحفظ روحي وانتن كذلك
المهم طالت وهيَ گصيرة عرس سيد هاشم بذاك البيت

نسيمة :- امي بعينك هازة كاروك تگلي امي

:- تمام اختي تفضلن فوتن للبيت لا تضلن واگفات بالشارع بطولچن بدون عبي والزلم تباوع عليچن

نسيمة :- فدوة لله بس ما گتلي وينهم الزلم شو ماجاي اشوف غير مزعطة يلعبون دعبل چنهم فروخ دجاج

ندست خالتي وجريتها هو فر ايده واستغفر ربه

ليلى :- مشكور حبيبي

:- استغفرالله واتوب اليه من ذنبچ

نسيمة :- لچ يوم خل نرجع اذا صغيرهم هيچ الكبار شلون
لچ ليلى خاف ندخل ويرجمونة

ليلى :- عاد انتِ تستاهلين الرجم

دكيت الباب طلعلي ولد صغير فسحلي المجال وكال تفضلي خالة
رحت امشي ورا اول ما فتت للبيت صارت بوجهي دنيا تنفست بأرتباح وكأنها منتظرتني

تقربت بوستني وگالت :- هلا دادا نورتي بيتنا تفضلي

سلمت على خالتي اخذتنة عرفتنة على والدتها العلوية بوسناها رحبت بينا وفرحت بحضورنة وگعدتنة يمها

العلوية :- هلا بيچن حبيبات منين انتن من يا گاع

نسيمة :- حجية احنة من ال......

العلوية :- عليكم بالعافية انتم اهل دجلة

گالت وحدة من النساوين :- وين صايرة ال.....؟

نسيمة :- اطراف بغداد تربط بغداد بالمحافظات منين ما نميل محافظه ومار بيها دجلة

:- هنيالكم بس شكد المسافة من ال..... لهنا اظنها بعيده

نسيمة :- اي والله اكثر من ساعة بالسيارة بس احنة اجينة نقوم بالواجب وهم افرح البنيات ماردت اكسر بخاطرهن بنيتكم دنيا عزمت ليلى واصرت عليها تجي

وتردين الصدك علوية انتم صيتكم سابقكم وتستاهلون واحد يتعنالكم

العلوية :- بعد روحي عساچ دايمة وان شاءالله نرجعلكم هاي الزيارة بالافراح
گلتلي دنيا چنتو قريبين كلش علينا شعجب شلتو هناك؟

تلعثمت خالتي بعدها تلاحقت نفسها وگالت :- بعد ماعدنا احد هنا گرابتنة كلها هناك ، رحنة يمهم

ليلى بنية اختي ويتيمة واني مرة عزبة ماعندي احد احتاج سند ، لملمت وشلت هناك يم الگرابة والأهل

العلوية :- ياااا شوف يااا عبالي انتِ امها خطية زين عمامها وين شعجب مخلينها يمچ

نسيمة :- عدهم خلاف ويا المرحوم والمرحومة وحتى من ماتو اني سويت فاتحتهم وما حضر منهم ولا طير

كش وبرة ما نريد هيچ ناس تجي وتمنمن علينا بالواجب

العلوية :- حبيبة الظفر ما يطلع من اللحم البنية بنيتهم وصلاوات شابة وتجيب العين شلون عايفينها
لا لا مو خوش ابد مو خوش المفروض يحتوونها ويربونها ويصيرولها ظهر قوي
حجت ورجعت تباوعلي تدرس شكلي من جديد

نسيمة :- بعد حظ ما عدها هل مسكينة شسوي والله لو علي اروح ادورهم واخليها بنصهم بس ادري بيهم مايردونها ، خليها يمي عاد اني اداريها

باوعتلي العلوية بنظرة قهر ودارت وجها عني ، كملت حجي ويا خالتي

:- شلون ماتو اهلها بيوم واحد ؟ گـلتي فاتحة المرحوم والمرحومة

:- اي والله بيوم واحد حادث سيارة وشالهم ثنيناتهم

:- الحمدلله راحو يم الارحم مني ومنچ
البنية غورگت عيونها اسم الله على هاي العيون الحلوة من البواچي

ابتسمت مجاملة ، شحيت نظري ضليت اباوع للبيت
مرتب ونظيف البنات كلهم محجبات لابسات حجاب اميرة وربطات
ولبسهن مستور كلش ، يهوسن هوسات نسوان ويدبچن
بعدها شغلو ايات من القران

العروس لابسة فستان بسيط وشعرها رافعاته تسريحة وحتى مكياجها هادئ ومبينة صغيرة يعني مو اكبر من 13 سنة

بالركن معرض طويل متروس كتب باحجام كبيرة وطبلة عالية سيقانها ذهبيات وعليها محطوط تلفون ارضي كبير بي نقوش ذهبية ومبخرة مشتغلة ويطلع منهما بخور طيب جدًا
وباقي البيت قنفات ملكية
ابتسمت واني اتخيل قيس كاعد يم المبايل ويخابرني البارحة

تعشينا يمهم عشاهم كان حيل طيب وخلصنا غسلنا ورجعنا گعدنا ..

لكزتني خالتي بخاصرتي قربت راسي منها همست

:- لج يوم زين لبستي ربطة وما اجيتي مفرعة جان هسة رابطاتنة بالنص ويرجمونة بالحجارة

:- لا تبالغين بعد شبي الستر حلو الله يهديني واتحجب

ضيگت عيونها وگالت بنبرة مكر :- مأثر ابن السادة

فجأة اخذو العروس ورا ربع ساعة دخل شاب لابس جلبات ، منصي رأسه
العلوية واكفة على صفحة طشت هيل وچُكليت وهلهلت
ابتسم بخجل ونصة باس ايديها بحنية وحطهن على گلبه

هاشم :- احسنتي تربيتي وغذيتيني بالعلم والدين و تعبتي عليَ حد ما سويتيني زلمة عليه الاعتماد
ممنون جدًا، ومديون الچ طول العمر

العلوية :- الله يوفقك وليدي ويحفظك الي بس هذا الأريده

رجع قبل ايديها ورأسها وكمل طريقة لغرفته وصلته للطابق الثاني وهي تطش على رأسه ماي ورد

خالتي نسومة قربت راسها مني وحجت بحسرة
:- لج يوم يگللها زلمة منيله زلمة شو هو بطول زري
والعروس تووة طالعة من البيضة

ليلى :- زلمة بأفعاله لا تعلقين على كل شيء والله يشورون

نسيمة :- دخيل بخته دخيل بخته بس ما جذبت غير احجي الصدگ

ليلى :- تعشينة وشفنة الزفة لو نگوم نطلع مو احسن؟ ورانة طريق ساعة كاملة لا هنا ولا هنا

نسيمة :- اي يا الله كومي ليلو ، گمنة توجهنة للعلوية سلمنة عليها نودعها حتى نروح
وسلمنة على دنيا
گالت العلوية وصيت قيس يوصلچن ما نقبل خطارنة يطلع من عدنة بهيج وقت وما نوصله

نسيمة :- يا عيني فدوة لگلبچ الطيب احنة نترخص لو بيدي غير اگابلج واكعد سوالفج حلوة ما تنمل

العلوية :- والله لو تباتون

نسيمة :- وين نبات دادا عدنة اهل منتظرينة
بوستها مرة ثانية وترخصنة طلعنة وگفنة بالباب والعلوية وصلتنة وضلت واكفة بظهرنا تودعنا وترجع تعزم بينة حتى نضل

اجة قيس بسيارته اخذنة اني وخالتي گعدنة ورا

خالتي ما ضمتها لا گبل زاعت وين تضل حجاية بحلگها ماكو ما تتحمل يورم گلبها

نسيمة :- اگلك يوم فدوة لوجهك الحلو اعذرني على ذاك اليوم انجبرت اجذب من ورا هاي المعزاية كلت يمكن خايفة منك

قيس :- لا خالتي جدا عادي تفهمت مو مشكلة

جرتلها حسرة وگلتله برهاوة :- ماما ابو وجه الحلو ماعندك اغاني كظومي تشغلي

قيس :- يا كظومي
نسيمة :- الساهر ماما

قيس :- لا ما عندي
نسيمة :- هيثم يوسف؟
قيس :- لا
نسيمة :- ابن السادة بعد ، زين عبد الحليم حافظ
قيس :- لا حجية ما اسمع اغاني

نسيمة :- حجية؟! هذا هم حظي شايفني كاضة عكازتي وامشي محدبة ما حبيتها منك

قيس :- لا والله بس احترمًا الج

نسيمة :- هيچ احترام ما اريدة كش وبرة

قيس ضحك حط ايده على وجهة حتى متشوفة وهوَ يضحك
لگزتها حتى تسكت خنست ماطلع منها نفس حد ما وصلنة
نزلت من السيارة اني تعمدت انزل وراها حتى اشكره

باوعت بعيونه وابتسمت :- شكرًا تونسنة بفضلك

قيس :- خادم

فك حلگة راد يحجي بس بسرعة تلاحق نفسه وسكت ، ابتسم ودار وجهة عني

خالتي صاحت بصوت عالي :- يله يوم مو حلتلج السوالف هسة

نزلت التفتت باوعتله نظرة اخيرة عدل شعره بأصابعه مبتسم وطالعة غمازتة ، مسح ارنبة خشمة بأبهامة ونظرلي نظرة اخيرة

ركضت للبيت قبل لا يطلع سديت الباب وفتت ركض ، ما انطيت مجال الخالتي تحاجيني صعدت ركض وتلفلت بفراشي اضحك بشكل غريب واغطي وجهي بأيديني .

كلها دقايق وسمعت صرخة حور وراها صرخات ريحانة بألم وخوف واضح
ريحانة :- مامااااااااا لاا مامااااااااا
طفرت بهمة حطيت رجلي على اول باية دانزل ركض واخترق مسامعي صوت طلقة من داخل المطبخ ...

___

شيهانة ..

كملت كل الاجرائات القانونية الي تخص الورث ، اخذني جبران الله ينطي الصحة والعافية
وما قصر وگفلي وگفة ماتنسي

اني وصگر متفقين اسبوع ما ردت اتصل بخواله وهوَ مموجود الله يعلم يمكن حتى مبايلهم يبدلو
الناس كلها تخاف من شر مشاري اذا ثار

اكيد بس يعرفون اني الشيهانة راح يتوقعون احنة انفصلنة ورجعتي للعراق وراها شي
بالتالي راح يخافون ويسوولهم شي حتى يبعدوني عنهم

چنت گاعدة بالصالة يم عمة علياء تسولفلي عن اهلي قبل وفاتهم
ادرس حديثها بشكل دقيق عسى ولعل الگالي خيط يوصلني للحقيقة

لفتني صوت خطوات على الدرج رفعت رأسي وفكيت حلگي بصدمة

شيهانة :- لا تگلي انتَ عماد نفسك لا لا لا ما اصدگ
عمة هذا ابنچ صدگ لو مبدلي!

عماد :- اوي شبيچ ممتحملة شوفتي قلبچ حجر واسود جير

فريت ايدي باستهزاء :- بشية بشة انتَ وين والرتبة وين ابد ما تلوگلك

عماد :- بشرفچ بشرفچ

شيهانة :- لا والله مالة الله طالع هيبة بالبدلة العسكرية ،، بس ابد ما توقعت ولا حطيت ببالي ممكن تكون ضابط شكلك مو مال ضباط

علياء :- لا يغرچ الضحك والشكل الهزلي الي لابسه ترة عماد اكثر واحد قوي وسبع بين ولدي
بس هوَ يضحك هواي يعني مغطي وجهة الثاني القوي

عماد :- عليچ نور حجية

شيهانة :- هسة شلون نضل نخاف منك ونهابك لو شلون عمي المن نزلت گبالي بالبدلة والرتبة

عماد :- الله عليچ شلون الشارب مو يوگف علي الصگر؟

شيهانة :- اي والله چنه غصن شجرة

عماد :- جيرة بفرگچ كون ما تسوين واهس ومضيعة هيبتي

علياء :- معليك بيها غيرانة منك تخبل حبيبي كلك هيبة وشاربك ياصلاوات يا صگر يوگف علي الشيهانة بكبرها توگف علي

عماد :- بارك الله بيچ يما

علياء :- صدگت روحك الشاذي بعين امه غزال ، اجاملك

خذه جنطته عقد حواجبة وزم شفايفه بغيض باوعلنة بطرف عينه متصنع الغضب
بس وجهة ابد مايساعد بي براءة مو مال غضب
عافنة وطلع

طلعنة ورا نضحك ذبت ورا عمتي طاسة ماي ، ضلينة واكفين بالباب باوعت النسوان يمشن بالشارع والاجوء يمهم حلوة
المنطقة بيها روح

عمتي تسولفلي على اهل المنطقة ومواقفهم الحلوة ونخوتهم
شلون الجار يحب جارة ويحترم الجيرة
وعن سوالف جاراتها ومشاكلهن

ما حسينة غير واحد معصب واگف گبالنة وعاط بينة :- فوتن جوة

علياء :- يا يوم شبيك متگلي؟ مو جاي نسولف ونسلم على النساوين

جبران :- اي ومطلعتلي هاي واگفة بثوب البيت بنص الشارع انزع القندرة ازين بيها شاربي؟ انزعها؟

شيهانة :- يا نص الشارع غير واكفين بالباب عندك مشكلة بالنظر راجع طبيب عيون

خزرتني عمتي واشرتلي اسكت لان جان معصب كلش

جبران بغضب :- لا والله عادي عادي تفضلي اوگفي بالباب بهذا ثوبج الخفيف والعالم تمر ويطلع بيهم واحد عينه نگسه ويگصچ كص وانا ازين شاربي لان مو زلمة والناس تباوع لعرضي

شيهانة :- لا تصيح
حجيت بـنبرة باردة

خزرني بغضب وگف گبالي بتحدي وگال بهدوء  :- وأذا صيحت؟

شيهانة :- ابچي .

جبران :- ابچي ابچي علمود ابتلي بيچ وحگ أسد بغداد

شيهانة :- والله؟
جبران :- انا ماعندي مرة تبچي يله طبن طبن ولا تعيدنها

عمتي فرت كف ايدها وكالت بغيض :- من تالي بزر بطني يگلي طبي ويتأمر

جبران :- ست الحبايب غيرتي ما تسمحلي بعد انتِ فهميها مو الا اوضح

شيهانة :- تعالي عمة سودة عليَ ضوجچ جبران تعالي

جبران :- يمة فداوي لـ حنين أهلي

علياء :- ما تستحي

جبران :- والله؟ ،، طبن طبن

اخذت عمتي ودخلنا وهوَ طلع مادري وين راح

هستوة گعدنة نزلت هدير الكشخة ومدندشة بالذهب
تمشي على كيفها برقة

هدير :- مساء الخير

ردينة مساء النور

هدير :- عمة اني معزومة على العشا اخذت أذن من عماد حتى اطب واطلع براحتي

علياء :- ليش عمة انتِ منو يتجرأ يگلچ لا؟
بس مو كأنچ ما گعدتي ويا اخيتچ لا سألتيها على احوالها شلون اجت وشنو جابها
اذا مخلفة لو لا
يعني عزايمج وشغلج اهم من اختج؟

هدير ردت بضيق تتأفأف :- اهوووو شگد لحيتو بهذا الموضوع اني مشكلتي مو ويا اختي
مشكلتي وياكم بيت عمي ما احب انزل واگابلچ لو اكابل رجلج و ولدچ مالي نفس اشوفكم

علياء :- تگدرين تعزميها بشقتچ فوگ لو برة وتاخذيها وتطلعين هم هيَ تغير جو وهم تسولفين ويا اختچ وتشوفين شبيها مابيها

ردت بدون نفس :- اشوفلي يوم

حچتها ودارت وجهة بعجرفة وغرور،  طلعت بدون ما تنتظر كلمة مني

علياء بقهر وحسرة :- شفتي؟ حتى ما يجي يوم وتگولين ضالمين اختي ونابذيها بدون سبب

هزيت رأسي بحزن وهمست بغصة :- شفت ، منين اتلگاها ومنين يتلگاها كلبي
من ظناي البعيد عني وحضني ضال فاهي
لو من اختي الطلعت المو اختي

علياء :- الله كريم امي الله كريم
تنهدت وباوعت للمطبخ صاحت نزهة نزهة تعالي داده

دخلت نزهة تركض وشالها طايح على صفحة من وجهة ، جنها بشة من تركض

علياء :- نزهة ما عليج امر ما تطلعين تتسوگين وبدربچ مري على ابو طالب جيبيلنة منه فد كيلو بقلاوة وشوفيلنا شنو عندة حلويات جيبي فد نوعين غير البقلاوة
البقلاوة شوفيها زين كون بالفستق الشيهانة تحبها

حچتها وباوعتلي مبتسمة
شيهانة :- شنو هاي شلون تتذكرون كل شيء احبه
من جهة جبران يتذكر احب الدجاج المشوي وهسة انتِ عمة تتذكرين البقلاوة بالفستق

علياء :- شلون لعد قابل ننسى العزيزة وننسى شنو تحب وشنو تكره

شيهانة :- فدوة لـگلبچ ، عمة عادي اروح ويا نزهة؟ مشتهية امشي شوية وهم اشوف منطقتكم

علياء :- بكيفج انطيج جبة لبسيها لحظة
نززهة انتظري انتظري

جابتلي جبة لبستها وحطيت الشال على راسي بدون ما الفه
وطلعت ويا نزهة باوعتلها حاطة ديرم وشواربها خضر وبالشمس صارن واضحات
لميت شفايفي للداخل استحيت اضحك

:- نزهة ليش ما تحفين شاربچ تطلعين شحلاتچ

فتحت حلگها تريد تجاوبني واجالنة صوت من ورانة التفتت واحد حاط بين رجلينة عصة طويلة مسويها مثل الحصان ويطفر بيها
صلوحي :- طربگ طربگ يـ حصاني طربگ طربگ

نزهة تولولت :- يوووو لا هلا ولا هلة مرحبا

صلوحي :- صلوحة صلوحة الحلوة ام شامة

نزهة :- ولك لا تصرخ يمن كون صرخو عليك ولي منا اخذ حصانك و ولي

صلوحي :- ما اولي اصرخ
خل يسمعوني هلي لو يسمعوني صلوحة حبي الاولي
ويلالا ويلالا اهوو اهوو يلالا اهوو صلوحة حبي الاولي

نزهة :- ياا يااا شوف الفطيرة تضحك امشي امشي

شيهانة :- هوَ هذا صلوحي

نزهة :- صلبووووخي صلبوخي

صلوحي :- لا تغلطين بربوگ

نزهة :- انچب ولي منا

صلوحي :- احبچ صلوحة اتزوجج
صلوحة صلوحة احبچ صلوحة صلوحة احبچ

هذا الحجي احنة نمشي وهو ممتطي حصانه (العصة) ويهنجل

شيهانة :- صلوحي روح منا عيب

صلوحي :- سكتي الحولة شلچ غرض انا وصاحبتي نسولف

شيهانة :- ياااااا صخام نزهة مصاحبتة

نزهة :- يمن كون صاحبتك العلة ولي ولي
تحجي وتخزر بي وتأشرله يروح

بس وين لا حياة لمن تنادي الظاهر صلوحي واگع بغرام نزهة

بعد دقايق مشي وصلنة لمحل يبيع خضروات وفواكه اشترينة كلشي محتاجي وبعدها طلعنة لأبو طالب عفنه صلوحي يتعارك ويا ابو المخضر وطلعنة ركض حتى ما يلحگنه

وصلنة لابو طالب رجال راقي اخذنة منه بقلاوة وبعدها نزهة اشترت منه نوعين حلوات زلابية وكليچة بس شكلها شوية غريب
چانت دويرات مثل الخبزة بداخلها تمر

رجعنة للبيت محملين اغراض خليناهن بالمطبخ فتت للبيت نزعت الجبة طلع بوجهي جبران بالصالة

جبران :- انظفلچ الجرح؟

شيهانة :- ياريت

جبران :- كعدي هنا انتظريني

كعدت راح للاستقبال ورجع بايده الاغراض ، كعد يمي لزم ايدي بهدوء قربها منه وبدا ينظف الجرح ويعقمه

تنهد باوعتله ورفعت طرف حاجبي :- سلامتك

جبران :- شلون كيفچ؟

رفعت اكتافي بمعنى ما ادري
جبران ابتسم تك خد وگال :- مشاري أذاچ؟
:- اكثر من ما تتصور حسبنا الله ونعم الوكيل بي

جبران :- چا ليش عفتي ابنچ يمه
شيهانة :- صگر راح يجيبه ويجي للعراق بأقرب وقت ممكن

جبران :- كلش زين
جرحچ يأذيچ؟

هزيت رأسي بالنفي :- الروح تعودت بعد ما يهزها شيء

جبران :- كبرتچ الدنيا هواي كلش هواي اذكر من شفتچ اخر مرة قبل لا يطگچ الضيم چنتي شحلاتچ جنچ بطة

ضحكت ونصيت بحزن :- اي والله الدنيا والضيم غيروني

خصم عيونه يباوعلي بترقب وگال
:- سولفيلي

شيهانة :- المضموم خلي مضموم افضل الي والك

ضحك تك خد وگال بحسرة :- مكاتيبچ حرگتهن .

شيهانة :- اني ذبيتهن بالبحر ما ردت كلماتك تلتهمها النار ..

ضغط ايدي حيل وكأنه ينبهني على شيء صك على اسنانه وحچة من بينهن بغضب
:- چان حرگتيهن مثل ما حرگتي گلب راعيهن

شيهانة :- ما اگدرت فوگ الگلب احرگ الكلمات ..

..............للحكاية بقية 🖤

رأيكم بالقصة يهمني 🖤..