رواية حمائم تخشى الطيران الفصل الحادي عشر 11 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

تصويت + تعليقات بين الفقرات لطفا 🖤

_________________________________

سمعت صرخة حور وراها صرخات ريحانة بألم وخوف واضح
ريحانة :- مامااااااااا لاا مامااااااااا
طفرت بهمة حطيت رجلي على اول باية دانزل ركض واخترق مسامعي صوت طلقة من داخل المطبخ

من خوفي وگعت على الدرج وانضرب راسي بالمحجر ، راحت روحي سلهمت

رفعت راسي شفت ريحانة تركض مفرفحة شافتني وضلت تعيط

ريحانة :- خالة لحگي ماما لحگي راحت روحي عليها

جريت روحي ونزلت للمطبخ اشوف حور لازمة رأسها تبچي والدم مالي وجهة وصاير عبارة عن قطعة حمرة

وخالتي تعيط على واحد تگله :- الا اسجنك يا سافل سرسري منحط لك انتَ تمد ايدك ع حور؟ اشمرك ورا الشمس واشگك شگ

رد هو بغضب :- تاكلين خرة من تالي وكت النسوان طلع حسهن وصارن يراددن الزلم

نسيمة :- والله عاد تعذرني مالي الي نفس اكلك من خرة بشكلك الخايس جنك منهولة ريحتك فايحة روح نظف روحك ونظف حلگك ريحته خايسة عبالك ميته بمعدتك فارة والنوب تعال احجي

راد يهجم على خالتي اني وريحانة صرخنة بس هيَ شمرت حور من حضنها وجرت الچفچير وطفرت علي ضربته بالچفچير على رأسه وصيحت بعصبية

نسيمة :- اذا تفكر تمد ايدك على نسومة مرة ثانية ما افتح راسك افتح صدك واطلع گلبك اعضه بسنوني حتى اتوبك *****

حطيت ايدي على حلگي احس غطيت بهدومي من الحچي الحچته

صيح عليها :- ساقطةةةة اني اعلمچ

فرت روحها وسوتله بحلگها حركة وگالت بطريقة مستفزة :- يمة خوفتني يمممممة راح اموت لحگوني راح يوگف گلبي وجه الفارة يهددني
لك تعال تعال خليني اشگك شگ واشوفك نسوومة منووو

:- انطيني حور وطلعي منهاااا انتِ مرة غريبة مالچ شغل

نسيمة :- خوش اشوفك الغريبة شتسوي وانتَ طافر على بيتها بنصاص الليالي لك اذا ما شگيتك شگ

:- درووووحي شخبصتينة تشگيني وتشگيني وعلى اساس بيتج شلونة شو يگولون صاير سبيل للگ***

نسيمة :- اطلعع

ابو حور :- تنطيني بنتي يلا اطلع ما اخلي بنتي تكبر ابيت ك** وتصير زانيه

سكتت خالتي دقيقة وهو سكت اباوع لريحانة تبچي وحور تون بألم

خالتي عوجت روحها وحطت ايد على ايد وگلتله :- انطيك حور وريحانة بس اريد مقابل

عقد حاجبة :- شگد؟

نسيمة :- مو فلوس تطلع جنسية لريحانة من اشوف جنسية ريحانة بنفسي انطيك حور وبنتها

حور شهگت بصدمة وريحانة وگفت وراي خايفة

استرسلت بالكلام :- وشرط تسويها باليوم الاريده عندي عرف يساعدوني ويمشونها و اوديهم وياك حتى اضمن سلامتهن

:- شوكت؟

:- عگب باچر الصبح تجي تلگاهم وتلگى حور وريحانة ينتظرنك تجيب البيان وياك ، تكملون الجنسية وتستلمها وتجي تحطها بأيدي اشوفها بعدها اطلعلك جنطهن

هز رأسه وكال واذا خلفتي الوعد
نسيمة :- مو نسومة التخلف وعودها روح واسأل عني من الصغير للجبير كلها تحلف بحجايتي
هز راسه اي خوش وراح طلع اجت خالتي صيحت بوجها بغضب
:- شلوووون تنطيهن لهيج واحد منحط شلووووون انتِ ماعندچ ضمير ماعندچ مخافة الله

نسيمة :- انتِ سدي حلگچ وتعاي ساعديني نگومها

شحيت نظري عنها بغيض شلنة حور غسلنة وجهة وعقمنة الجرح ولفيناه طلع النذل دافعها على طباخ حيل

گعدت تبجي وتأن ، حضنت ريحانة خايفة وتباوع لخالتي بعتب

نسيمة :- كلشي گلته لمصلحة ريحانة خطية بنية بهذا العمر لا مدرسة لا شي
ماعدها جنسية شلون من تكبر؟ حالها حال الغجر وابناء الحرام

حور :- بس مو تنطيني لطليقي على طبق من ذهب انتِ ماتدرين شنو ممكن يسوي بيَ
احتمال يرجعني لأخواني وترجع تنعاد معاناتي

نسيمة :- خليني افكر خليها يمي احلها مو صعبة علي

حور :- سمعي نسومة ضله بهذا البيت بعد ما اضل الظاهر وصلولي الجماعة
من تطلع الشمس اخذ ريحانة واشوفلي مكان ثاني يلمني

لمعت عيون ريحانة وبرطمت بزعل بعدت گذلتها من وجهة وگالت بغصة :- الناس كلهم يخوفون بس هنا حلوين خلينه نضل يم خالة ليلى ونسومة

نسيمة :- بعد رويحتي ولج حور صبري نلگالنة حل منا لعگب باچر

حور :- اذا رجعت لهذا المطي احرگ روحي واحرگ ريحانة وياي

ريحانة :- ما اريد احترگ ما اريد ، اتعور بالنار

حور :- انچبي شلون اعوفج يم خوالج لو يم ابوج العار بعد شفتي بعينچ جنة مطي هجم علينه

ريحانة :- لالا خالي يتحرش بيَ يلزم جسمي ويگلي نزعي هدومچ اشوف ****
حرگيني عادي

باوعنة بصدمة حور جفلت وصفنت بوجه بنتها رجفت ايدها وحطتها على خد ريحانة مسحت دمعتها وگلتلها شوكت؟

نسيمة :- سولفي يوم

ريحانة :- قبل لا نجي لبغداد بـ فترة چنت طالعة من الحمام وانتِ ضليتي تسبحين
لزمني جرني من ايدي جر دخلني للتواليت

حط ايده على **** يتلمسه دفعته وگتله خالو عيب
لزم فانيلتي رفعها وراد ينزعني بجامتي
گال لا مو عيب نزعي خليني اشوف ونلعب لعبة
وضل يسوي حركات على جسمي

طگيته بالبريگ على رأسه المدوحس وشردت للغرفة بسرعة

عاد حور هنا گطعت روحها تكطع وكالت والله احرك روحي

ضليت متعجبة شنو من بشر اخوان حور؟
معقولة يكونون طبيعين؟ لا لا مستحيل مستحيل هذول اقذر من القذارة نفسها

صعدت لازمة رأسي الدوخة لزمتني گوة غفيت گوة ثاني يوم نزلت بالـ10 مسطورة خالتي طالعة وحور وريحانة گاعدات بالمطبخ حور تبچي على زمانها وريحانة صافنة وجهة اصفر من الخوف

مسكينة بهذا العمر وشافت كل هذا الضيم من تكبر شنو تشوف؟ الله يعلم شنو ضامة الدنيا الها بعد

گعدت يمهن فترة وحدة صافنة بوجه الثانية حتى كلمة ما دارت بيناتنة اندگ الباب ركضت صحت منوووو

نسيمة :- اني يوم

فتحت الباب فاتت والصدمة فات وياها صهيب اخذته وراحو للغرفة الباب ضل مفتوح ما سدو اسمعهم يحجون بس ذاني ما گدرت تلتقط شي بسبب الدوخة احسها توش

ضل نص ساعة وطلع ، اجت خالتي طبخت غداء بس مثل ما حطته شالته ما النه نفس ناكل شي

حور اخذت ريحانة وراحن للغرفة ضليت خايفة لا تسوي شي لروحها لو لريحانة
سبحان الله صارن جزء من روحي ومن عائلتي بفترة قصيرة وضليت اخاف عليهن مثل ما اخاف على روحي

بليل اجو زلم ثلاثة مبينين فد ناس طاگين والهم مكانة من لبسهم الراقي وساعاتهم الذهب
باوعت من فوگ دخلو للغرفة شوية واجن بنات ثلاثة واشتغلن الاغاني

تنهدت بحزن وفتت سديت الباب على روحي ، ضليت ادرس بس ما ادري ليش صرت انفر من الكتاب يمكن بسبب الخوف
اكيد باجر ابو ريحانة يجي مثل ما گلتله خالتي الله يعلم شنو ممكن يصير

العصر خالتي كعدت يم حور ساعة كاملة تحجي وراها طلعت حور بس الخوف بعده واضح بملامحها

سمعت صوت خالتي تندهني ركضت باوعتلها واكفة جوة والاغاني طافية
صاحت "يردونچ على التليفون"

نزلت ركض :- منو يريدني؟

نسيمة :- ولد والله ماعرفته اضن ابن السادة گال وين ليلى

ركضت بلهفة للتليفون هزت ايدها وضحكت :- مخبلها وماكل گلبها ابن السادة

شلت السماعة حطيتها على أذني وهمست :- الوو

قيـس :- السلام عليكم
ليلى :- عليكم السلام هلا قيس ،، شخبارك؟
قيس :- الحمدلله احم
ضل يحمحم احسه متوتر
گتله :- قيس بيك شي

قيـس :- لا، لا، سلامتچ سلامتچ كل شي ما بيَ ردت اسألچ اذا تداومين باچر لو لا

استغربت سؤاله اني ما اغيب الا ما ندر

ليلى :- بصراحة ما أظن اداوم عندي ظرف

قيـس :- لااااااااا

ليلى :- اي والله
ما ادري للصبح اشوف يمكن اغير رأيي

قيـس :- بس باچر عدنا امتحان ضروري تجين علمود درجاتچ ما تنزل

ليلى :- اذا على الأمتحان سهلة دكتور ميثاق يعزني كلش بس احچي ويا يتفهم ويعيدلي الامتحان

تنهد بألم ، وگال :- محتاجة مساعدة ، اكدر اسـ..... قاطعه صوت من يمه

:- راح يجي سيد رحمن

قيس حچه بأستعجال :- تحتاجين اساعدج بظرفج اجيكم للبيت؟

ليلى :- لالا ظرف عائلي ما تقصر مشكور سيد

قيـس :- تصبحين على خير خـاتون
ليلى :- وانتَ من اهله

قوست شفايفي بأستغراب ،، هاي ثاني مكالمة اسمع بيها اسم سيد رحمـن والده
كاعد يمه شخص يحذره من قدوم والده ، معقوله مانع عليهم يحجون بالتليفون ويا كائن من يكن لو لان اني بنت!!

رجعت السماعة بمكانها التفتت ويبس الدم بعروگي من شفت صهيب واگف وراي مكتف أيدينه ويباوعلي وخالتي ماكو

صُهيب :- ويامن تحچين؟

ليلى :- ما اعتقد هذا الشي يخصك ولا الك حق تسألني ويامن تحچين لا اني اختك ولا بنت عمك

صهيب :- شبيچ خفتي وراح يوگف گلبچ هوَ مجرد سؤال من باب الفضول

ليلى :- مو چنت رايد تتغير؟ وتسلك طريق صحيح ياخذك لرب العالمين
شر رجعت لدروبك! هاي اذا مشيت خطوة بالطريق الصح اصلًا
..فريت ايدي بأستهزاء

ضحك تك خد ،، أشرلي برأسه على الدرج وگال :- صعدي ليطلع احد ويشوفك ماريد احد ناقص يلمح طولك لا اكتله وابتلي بي

ليلى :- والله مصدگ روحك
باوعتله بنص عين وطگيتها ركضه فوگ فتت وسديت الباب

ضليت اتگلب بفراشي لحد ما طلعت الشمس وضواها غزى الغرفة ، غطيت رأسي بالفرشة گوة يله غفيت

دگ المنبه طفيته ورجعت نمت گمت الساعة سبعة غسلت ونزلت لگيت خالتي تمشط شعر ريحانة وتحچي ويا حور

شافتني سكتت التفتت اشوف حور مغمضة عينها بقوة جفنها متكرمش وحاطة رأسها على الحايط

:- شنو الخبر؟

:- راح يرحن علمود الجنسية ان شاءالله خير

:- وشنو يضمن ما يأذيهن؟ خالة ليش تجازفين وتذبينهن للموت بأيدينچ
لا حول ولا قوة الا بالله
الا اذا كنتِ مأيسة من الجنسية ماتطلع ومأمنه

:- سكتي ليلى الف حلال يحلها بس خل يطلع لريحانة الحلوة جنسية

هزيت رأسي متألمة ، حميت الچاي وسويتلي لفه
اندگ الباب طلعت خالتي ورجعت
كالت اجو ولد ثنين من جماعتي يرحون وياهن حتى اضمن سلامتهن

قبل ثمانية اجة ابو ريحانة گامت حور لبست عبايتها واخذت بيدها جنطة لزمت ريحانة من ايدها ومشت للباب

التفتت باوعتلي بخوف وبعيونها حزن

ركضت وراها جريتها :- اخاف يسويلج شي لا ترحين حور فدوة رحتلچ

حور :- بقت يم الله سلمته امري ما اعتقد يخيب ضنوني ، حجي نسومة صحيح هاي البنية شلون تكبر بدون جنسية
شلون تكمل حياتها ؟ وهي ماعدها هوية وما معروف منو ابوها ومنو امها بالنسبة للجمتع

ليلى :- لا تخلينه يستقوي عليچ حتى بالنظره صيري سباعية

هزت رأسها مسحت دمعتها الغدرتها ونزلت غفل ..

ومشت للباب تجر ذيال الخيبة والحزن ، باوعت الشباب صعدو كدام واحد يسوق واحد بالصدر وحور وطليقها وريحانة ورا وانطلقو

نسيمة :- ياربي كون ما يسويلهن شي

ليلى :- تدوسين الگبر وتصيحين أسم الله

نسيمة :- لچ يوم والله لمصلحتها والله ليش تصيرين مادري شلونچ وتدورين حجج عليَ
بعدين تعاي ليش مارايحة للدوام

ليلى :- غير من ورا الخوف افكر افكر عقلي ماجاي يرتاح ابد اكول ها خاف اروح ارجع الگاجن مذبحات
ها يمكن الگاه كاتل حور وماخذ ريحانة وشارد

نسيمة :- يا بكيفه؟ غير اشگه شگ واشگ الخلفه
لج يوم اني نسومة بعدچ ما تعرفيني

ليلى :- اوف منچ گلبي عليل من جوة راسچ جاي تضيعين بينه وتلگين روحچ

نسيمة :- طبي غسلي مواعين

ليلى :- صهيب شيسوي هنا البارحة؟

نسيمة :- عندي ويا شغله اجة گعد ساعة وراح
لازم بديتي تغارين علي ويهمج امره هسة اضل افكر منو ماخذ عقلج ابن السادة لو صهيب

ليلى :- لا هذا ولا هذا
بس هيج داسأل شي عادي بدون هدف او غاية

هزت رأسها وگالت بمكر :- اي خوش غسلي المواعين يله

تأفأفت بضجر ومشيت اغسلهن صعدت نظفت غرفتي گلبتها رأسًا على عقب غيرت بأماكن الاثاث والديكورات
ما خلصت حد الأذان مشيت سبحت وطلعت صليت
تمددت نمت شوية لل2 گعدتني خالتي اتغدة

غسلت وجهي ونزلت مثل السكران ، گعدت اكل بعدني ما بالعة لگمتي اندگ الباب طلعت خالتي ورجعت وياها صهيب باوعتله وفكيت حلگي بالبدلة العسكرية عزة بعينك عزة على هاي الشخصية والجمال ، حجيت بسري

نسيمة :- تفضل تفضل تغدة ويانه

صهيب :- رحم الله والديچ ، كاتلني الجوع بس خاف ليلى ما تقبل اشاركها السفرة

ليلى :- لا شعليَ تريد تگعد ما تريد تگعد مو مهم ما اشوفك موجود

خالتي عضت أصبعها وخزرتني :- لج!!!

صهيب :- خليها نسومة اني صرت ما اهتم ولا انزعج من حچيها هيَ ما تتحكم بلسانها ،، بلوة مو لسان

گعد بالكرسي الي بصفي باوعتله بطرف عيني وكملت اكل خالتي فتحت الجدر تصبله همست بأستهزاء

:- وكأنك ما راح تفكنه وتضل مگابل وجوهنا منين ما نلتفت نشوفك

همس يم اذني :- شگد محظوظين لعد؟

ضحكت باستهزاء ورديت بنفس النبرة الهادئة :- قصدك شگد فگور حظ
هوَ ليشوف وجهك يومية هم عنده حظ؟ شگد غثيث وما تنجرع

صهيب بهمس :- شهادة اعتز بيها

سكتت ما رديت كعد يتغده ويسولف ويا خالتي خلصت غده امرتني خالتي اسوي چاي
هي شالت المواعين وبدات تمسح بالميز وتسولف ويا بمواضيع مختلفة واغلبها تخص وضع العراق الاقتصادي

حضرت ثلاث اكواب ثنين الهم وثالث الي اخذه واصعد صبيت الجاي انطيته كوبه بغضب
اخذه بكل برود وخاطه بهدوء وهو يباوعلي يتأملني مبتسم

اندگ الباب مرة ثانية ضحك ونزل الچاي على الميز وفرك ايد بأيد وكال بحماس :- اجة الغدا الحقيقي المشبع

واشر لنسومة تطلع للباب فريت ايدي وكتله :- شنو ما تشبع شبيك مو هستوة تغديت شبيك مفجوع ما كفاك غدانه ...... بعدني ما كملت وسمعت ريحانة تحجي

باوعتلها تركض وتصيح :- سوولي جنسسسية خالة وصوروني

فتحتلها ايديني ركضت حضنتني بلهفة بوستها ضلت تبوس بوجهي بفرح

شفت خالتي وحور ورجل حور يمشي ويتلفت على الولد الي راحو ويا الصبح
ويرجع يباوع لصهيب بخوف
وگف صهيب وسواله حركة بأيده بمعنى تعال

رجل حور صاير اصفر خرط العافية تقرب من صهيب لزمه من رگبته وجره جوة وگال نسومة سدي الباب
نسومة سدت باب المطبخ وما نسمع بس صوت الضرب والسب والفشاير الي تطلع من صهيب وتوسلات ابو ريحانه الخايف

صهيب :- لك حيوان تافه ساقط گـ** ، *** من انعل ابوك لا ابو الخلفك،،، اشگ حلگك اليوم واگطم لسانك الي تهدد بي ام بنتك

ابو ريحانة بـ بچي :- سيدي والله غلطت والله ما تنعاد

صهيب :- ولك اذا ما خيست اعضائك من الكتل شايف هاي الرتبة؟ انزعها واديح بالشوارع

ابو ريحانة :- لا سيدي بداعة اهلك لا والله مريض والله كلياتي يوجعني والله اموت جوة ايدك
وعندي مرأة وجهال يضلون بدوني

شهكت حور وحطت ايدها على حلگها

صهيب :- تفكر بمرتك وجهااالك؟!! وهاي مو بنتك؟! جاووووووب لا افلش وجهك

ابو ريحانة :- نعم سيدي بنتي

صهيب :- اذا تعرف بنتك ليش تتصرف ويا امها بهاي الحقاررررة؟ ليش رافض تطلعلها حتى جنسية بس گول اني گو** زايعتني الدنيا و ا*** والي يعجبني اسويله اليريده والمايعجبني اضربه بعرض الحايط

ولك تطب لبيوت الناس بالليل تهدد عرررررضك؟
اليوم الا ا*** يا حيوان ،، سفيه ،، ****

فتحت الباب باوعت من الفتحة الصغيرة صهيب قاضي بي التوبة صايرة جوة مثل الجريذي

اجت عينه عليَ خزرني بغضب سديت الباب وايدي ترجف من المنظر ومن اصواتهم العالية

ورا شوي عافه واجة فتح الباب وگال للولد تعالو

مشو ويا باوعت شفته نايم بالكاع كله دم وجهة من الضرب ما ينشاف

صهيب :- اسمعني حيوان راح تضل بضيافتنة كم يوم وراها ترجع الاهلك واذا سمعت عاتب بغداد لو حاجيلك حجاية ويا نسوان هذا البيت اطلعك منا بتابوت

وصل لأخوانها العارات كلشي صار بيك وگللهم الرائد صهيب يكول لا يفكرون مجرد تفكير بالجية هنا
اذا سألوك ليش
گللهم الموت يتلگاكم قبل لا تعتبون باب هذا البيت

شالو شيل للسيارة واخذو وين ما ادري
ضليت ارجف لزمت ايدي بقوة حتى توگف رجيف ، خالتي كلتلي صعدي ضليتي ترجفين حتى شفايفچ ترجف

هزيت رأسي وصعدت ركض باوعت لصهيب بوسط البيت واكف عيونه تمشي وياي
،، يباوعلي بلطف وكأنه يهدأني ويطمني

_____________________________

‏والله إن الشوقَ فاق تحمُّلي
يا شوقُ رفقًا بالفؤادِ ألا تعي ؟
‏حاولتُ أن أخفي هواكَ وكلّما
أخفيتهُ في القلبِ فاضت أدمُعي.

___________________________

احط الرقم وأيدي ترجف جريت نفس عميق وخابرت
حطيت السماعة على أذني أنتظر الجواب
جاوبتني مرأة

شيهانة :- مساء الخير بيت الجحيل؟

ردت :- مساء النور هلا ومرحبا ،، لا خية مو بيت الجحيل

عقدت حواجبي بأستغراب :- شلون يعني مو بيت الجحيل غير انتم اهل الزبير
خوال صگر

ردت بأستغراب :- يا صگر؟! يا زبير، غلطانة خية

شيهانة :- متأكـ..... نهت المكالمة ضليت مصفصفة لا اخذ ولا انطي
دقايق فاصلة عن العالم ولشتي كلها ترجف
معقولة يكون الرقم غلط فعلًا!! يعني ماراح اعرف بجية صگر للعراق الا ارجع للبصرة واروح للزبير!!

دخل عادل للأستقبال شافني ضل يباوعلي بتساؤل
رجعت السماعة وگتله

:- چنت اخابر خوال صگر ابن رجلي

:- اي غير سمعتچ من اول ما حطيتي السماعة على اذنج اني دخلت بس ما انتبهتي

:- طلع الرقم غلط

:- جربي خابري مرة لخ

:- حطيته صحيح متأكدة بس يمكن كاتبة صگر غلط جائز يكون مخربطله برقم

:- زين شنو تردين منه؟

بلعت ريگي بأرتباك :- گلي يجي للعراق ويجيب ويا شعلان اشوفه گلبي طاگ علي راح اموت ، شلون حاله هسة
نصيت رأسي بقهر

:- ابنچ مو يم غرب ضال يم اهله ممعقول يكون حاله مثل ما متخيلة

:- الله يسمع منك شنو اريد غير سلامته
من رخصتك عدولي رايحة ارتاح كلش دايخة

:- اخذي راحتچ

مشيت للغرفة قفلت الباب ودموعي شقن طريقهن على خدي ما ادري عليمن ابچي
على يا جرح
جرح اهلي العافوني بدون وداع
لو جرح ضناي المحرومة منه ؟
والله حيرة والله حيرة ، نار گلبي شبت وطلعت على عيوني الصارن حمر ويجرن

ضغطت على رأسي حيل بأيديني وجثيت على اركبي اريد اصرخ اريد اطلع نار گلبي بس ما اگدر
تمددت بمكاني ابجي وضاغطة على رأسي بأيديني قوي

شهگت بقوة حطيت ايدي على حلگي اكتم شهگاتي واهز رأسي بـ لا ما اريد احد يسمع صوت وجعي

غمضت عيني صار وجه امي گبالي ضربت رأسي بالگاع بقوة ، عيني مثل غيمة سودة زخت مطرها

بعد دمعة وتنهيدة طويلة كسرت الروح ، غفيت بمكاني

گعدت على دگة الباب شلت رأسي ثگيل كلش باوعت للساعة بلـ9
صحت بصوت مبحوح :- اجيت

ركضت للدولكة صبيت ماي علي ايدي غسلت بي وجهي ومسحته زين ركضت سحبت مشطي الخشب مشطت شعري من المقدمة ولفيته زين
دققت على شكلي زين وجريت نفس مرتاحة

فتحت الباب صار گبالي جبران متوجه للباب عقد حاجبة وگال

جبران :- شلون كيفچ عيناي

شيهانة :- زين زين

جبران بهدوء :- ولو وجهچ ما يگول زين بس شگول بعد حافظچ زين ما تكشفين وجعچ گدام بشر

شيهانة :- هدوئك مخوفني الظاهر الوحش البداخلك لسه نايم

جبران :- وبدون گعدة ،، يله تعاي تعشي

طلعت وكعدت وياهم على نفس السفرة ، طول وقت العشا يحچون على طلعة معينة
لبيت صديق عمو اقترحو عليَ اروح وياهم لكن رفضت لغاية في نفس يعقوب ..

كمل العشا نزهة وگفت تغسل مواعين ردت اساعدها رفضت بسبب جرح ايدي گالت من تطيبين ساعديني

تسولفلي عن صلوحي گامت تسمي صلبوخي مجرد ما تذكر اسمه اتذكر وجهة الاسمر وگلابيته الوسخة
وشلون صاعد على العصة وطالعة كراعينه

نزهة :- اليوم اول ما شافني ركض وراي يصيح صلوحة صاحبتي صلوحة صاحبتي
بالله هسة ليسمعه شيگول؟
حتى لو اكو واحد اله نيه ياخذني راح يبطل

جرت حسرة وباوعت على الباب :- شوكت يجي ستاري

شيهانة :- وهذا منو يمه؟

نزهة :- شمدريني اقصد اليسترني يعني ستاري

شيهانة :- اوو نزهة بينت غايتچ تردين احد يسترچ سهلة والله وصلتي يمي
باوعتلي بنص عين :- اي بالله وينه
:- اخذچ لـمحل العبي وجيبيلج عباية تسترج وفضت راحت

نزهة :- خلي العباية الج ام عطوب لا شال ولا شي باچر رب العالمين يشيلچ ويشمرچ بالنار على رأسچ انتِ واعطوبچ السود

ميلت شعري من وجهي بدلع وگتلها بغرور :- غاثچ شعري غيرانه منه ترديني اغطي

مسحت ايديها بدشداشتها وگالت :- گلابچ اي والله شوفي شوفي
ذبت شيلتها وفلت شعرها ما شاءالله لنص فخذها واسود ليل ، بي لمعة

:- صلاوات على محمد وآل محمد شعرچ شحلاته هنيال صلبوخي علي

كفختني على رأسي بكوعها زرفت رأسي وگالت :- عمت عينچ اي والله عندي هذا الشعر ليخبل واخذ صلبوخي خل اطم روحي بالزبل اشرفلي

:- شهل ميانة زرفتي راسي عمي خل ابطل حجي وياج خاف يومين تنوميني بقسم الكسور

:- بقت عليچ روحي

:- لا عفا عليچ نزهة ما اعوفچ اشاقة وياچ وان شاءالله اساعدچ بنيشانچ من تاخذين صلبوخي لان ذوقي حلو

:- يمن كون جيرة بفرگچ

طلعت عمتي من يمنه وصتنة على البيت وراحت اخذهم جبران ، گلت أستغل الوضع

:- اني رايحة انام نزهة كلش تعبانة تصبحين على خير

:- اجمعين

عفتها بالمطبخ وتسحبت لغرفة بيت عمي فتحت الباب ودخلت سديته بهدوء طكيته قفل

وگفت بنص الغرفة محتارة وين ادور ركضت على الجرارات ادورهن كلهن اغراض عادية ما بيهن شي
فتحت الكومديات ادورهن واسدهن بسرعة

الكنتور اخر شي فتحت خانتين تعاليك ومابيهن شي غير هدوم معلگه
فتحت خانه يم الحايط بيها ملابس رجالية وبالخانه الفوگ صندوگ
جريته بهدوء ونزلته وعيني على الباب رغم اني قفلته من الداخل بس بداخلي خوف لا يندگ فجأة لو يرجع احد

الصندوگ جان خشب بي قفل بس ممقفول ، فتحته ،، كله اوراق مرتبه شلتهن بهدء ادور بيهن
كلهن اوراق تخصه بتواريخ واضحة
ماكو اي ورقة تثبت هوَ ماخذ شي من ابوي سواء برضاه او بالغصب

وتأكدت انُ عمي حميد بريء من لكيت اوراق تثبت هوَ متبرع بحصته من جدي ومزوج بيهن عدد لا بأس بي من الشباب وفاتحلهم مصادر رزق يجنون منها لگمة بالحلال

لو جانت نيته يحرك اهلي بسبب الطمع ما جان تبرع بورثه من ابو الي تهمة الفلوس ما يتبرع بورث قيمته بيوت واراضي وفلوس

وبنص الاوراق شفت ورقة كشفتلي شي صاير بدون علمي صدمتني صعقتني جانت مثل الرصاصة الستقرت بنص كلبي رجفت ايدي حيل ما اعرف شصار بس عيوني غوشن شمرتها من ايدي بسرعة ..

رجعت كلشي بمكانه طگطگت القفل على كيفي وطلعت ركضت لغرفتي كانت قريبة دخلت وسديت الباب أيدي على گلبي الهث

گعدت اجر نفس وعقلي قفل اريد افكر ما اگدر
شلون اخذتني رجليني للسرير شوكت تمددت شلون غفيت ما اعرف جنت مبنجة

حسيت برعشة وبرودة مو طبيعية فتحت عيني الدنيا كلها صارت تفتر بيه كمت وكفت ع حيلي الكاع جواي ممستقرة عيوني تغوش حسيت بصوت طگه قوية وآلم نزل ع راسي فجأة عطت بصوت عالي والغرفه افترت بيه

فتحت عيني اشوف المروحه تفتر وحسيت بجهاز الاوكسجين ع وجهي و وجه جبران يباوعلي بترقب
ضليت اهذي والزم ايده بخوف
:- وين جايبني انت والله جلب ومطي ما تستحي مطلعني بالليل

كعد ع السدية ولزم ايدي حيل :- لا جلب ومطي ما استحي خطفتچ

انيت بالم وبعدت الجهاز عن وجهي وكتله بنتر :- رجعني لمشاري من عمت عينك كون ليش تباوعلي هيج؟

رفعلي طرف حاجبة وهمس :- ما ارجعج خاطفج صرتي مالتي
شيهانة :- مشاري يحضني انت ما تحضني ما اريدك
جبران :- تردين احضنچ؟ سهلة ما طلبتي غير حقچ

دفعته حيل :- وخر ساقط صوج عمي ما مربيك مخلف سواقيط مثلكم انت وعماد وعادل
رفع حاجبة كال بتساؤول :- حتى عادل وعماد سواقيط؟

شيهانة :- اي بس انت اسقط واحد بيهم وجلب ومطي شكد اكرهك من عابت هلعيون شكد حلوات

:- شكرا .. زين سهير بعدچ تحبيني؟

:- اني روحي ما احبها تريد احبك

:- نسيتيني؟

:- انجب ما انساك انسى روحي وما انساك بس بعد ما احبك قهرتني لازمة عليك لزمه شكبرها ساقط ما اگللك شنو لازمة عليك الا بشرط واحد
باوعلي ينتظر اكمل :- تبوسني حيل

ضحك بمكر :- ابوسج وتحجيلي شنو لازمة علي؟

باوعتله بصدمة :- ما تستحي تريدني ابوسك والله ما تستحي كوم منا صوج عمي ممربيك

جبران ضل يضحك ويرفعلي بحاجبه :- جا كولي ترديني ابوسج ومستحية والله اني ولا ارد بشر طالبني بشي النوب بوسة

خزرته حسيت بديت استعيد وعيي واكول هذا شي شنو يسربت
هو حس اني صحيت وكام وكف يم راسي يحجي وياي يصحصحني اكثر ضليت اتذكر شنو حجيت بس سويت روحي ما اتذكر واكلله وين اني شوكت اجيت شنو نسوي هنا وهو يضحك ويكول صرختي ولكيناج متخربطه بالغرفة

ساعدني كومني كال بس اني وياج ماخليت امي تجي تتعب بدون فايدة كتلها اني وياها اكفي و اوفي

:- جلب تريد تكضكض بيه وما خليتها تجي حتى يخلالك الجو

صفن بوجهي واني صافنه شبي لساني عبالك سكرانه احجي تجفص
ما كال شي

رجعني للبيت قفل الغرفة مكسور كال احنه كسرناه ودخلنا عليج عمي مخلينا نايم ميدري وعمتي راحت تسوي عصير

هو يشتغل بالباب وتذكرت كل شي شفته كتفت ايديني وكتله بنبره خبيثة
:- الظاهر بعدك تحبني وگلبك يشب نار يمي
ما رد ضل يشتغل بالقفل
تقربت منه مكتفه ايديني واباوعله بمكر توتر ضل يبلع بريگه متوتر گال
:- هذا مايصير خربان

:-بعدك تحبني جبران؟

ضل يتهرب بنظراته ويحجي ع القفل الخربان ..

_هواي تهربت هيچ الجواب صعب؟

خزرني وگال بغضب _ وين تردين توصلين سهييييررر
_لگلبك
_مرة لخ؟ شتسوين بيَ هل مرة
_احرگه .. چا انه التتزوج اختها ما لگيت غير اختي جبران؟ .......................للحكاية بقية 🖤

رأيكم بالقصة يهمني ..