رواية حمائم تخشى الطيران الفصل التاسع 9 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

تصويت + تعليق لطفًا 🩷🖤

حرگو البارت حرگ تفاعل حتى باچر ننشر بارت حلو مثل تفاعلكم 🫣🤍🤍

__________________________

شيهانة :- مو انطيتي صگر وعد ، عاهدتي راح تكونين اله وخليتيه يقسم ما يتزوج وحدة غيرچ؟ ويضل على عهده ليش خلفتي العهد

هدير :- المرحوم على مشاري ما قابل تردي يقبل بصگر؟

شيهانة :- صگر ومشاري بيناتهم فرق مثل السما والگاع
تدرين بأخر لحظات هوَ يوصيني عليج ومتأمل بيج خير
عباله يجي للعراق يلگى البنية الحبته من صغرها وعاهدته موجودة وتنتظره يا وسفة

بهت لونها وگالت بصوت خافت :- يجي للعراق؟

هزيت راسي بأسى وزميت شفايفي بعدها رديت
:- ما اگدر اتخيل رد فعله و هوَ يجي يلگاچ متزوجة ، هدير چنتي زينة شنو غيرچ

هدير :- لا تغيرت ولا شي
واذا على زواجي فـ من حقي اتزوج مو اكعد انتظر واحد شفته كم مرة وبيناتنة كم رسالة

اف اف ميته تعب حذائي عالي ومن الصبح واگفة على رجليني ادرس صاعدة ارتاح محتاجة شي

شيهانة :- حتى ما سألتيني شبيها ايدچ واني الچنت اركضلچ وگلبي يطيح قبل لتطيحين

هدير :- راح من بالي والله ، سلامتج ان شاءالله ما تشوفين شر

ضحكت باستهزاء عافتني وطلعت بقيت على وكفتي اضحك مستهزءة بالوضع الى ان حسيت على روحي ورحت سديت الباب

ضليت افتر على روحي اكثر من ساعة اريد اوصل لحل معين او اثبت على رأي محدد ماكو عقلي متشتت كلش كلش ، واصعب شي صار عليَ هو التفكير

انطرق باب غرفتي بهدوء فتحته لگيت جبران واگف ابتسم وگال :- شلون كيفچ؟

شيهانة :- الحمدلله

جبران :- حطينة غدا وننتظرچ

شيهانة :- دقيقة

هز رأسه وراح ركضت لفيت شعري وطلعت عمو اجاني قبل لا اكعد تحمدلي بالسلامة وضل يلوم بيهم

حميد :- مطايا مراية ما تعرفون تدگونها صح ومكيف مخلفلي زلم ، مخلف صخول ولا مخلفكم

عماد :- چا جبران شنو؟

ضربه على علباته بقوة وخزره
جبران :- تأدب

عماد :- على ناس وناس والله اني بشر مظلوم

حميد :- لا تتدلعون مثل النسوان جيبو مراية وعلگوها زين مانريد يتأذى احد ثاني بسبب استهتاركم بحياة اهلكم

جبران :- تدلل بوية المراية اني اجيبها وادگها بأيدي

حميد :- بارك الله بيك ابني بس انتَ زلمة

عماد :- وين ربطتي اوي يـ ماما رااااح يدخلون زلم وين ربطتي وين
انطيني انطيني هذول ابنج ورجلج
سحب الربطة من راس امه وخلاها على رأسه وغطه وجها كله مطلع بس عينه

متت من الضحك من ورا جبران يباوعلة يخنزر گله بدلع

عماد :- شيل عينك لك ما تستحي ماعندك خوات تباوع على عرض الناس

جبران :- جابت صخلة ولا جابتك

علياء :- يا طلابة الصخول الماتخلص

حميد :- مطايا كافي احترمو نعمة الله غيرك ما محصلها حمير

جبران :- انااخوك صرنة مطايا بسلامة الوالد

حطيت ايدي على حلگي من باوعلي اكتم ضحكاتي خزرني وسكتت خافية ضحكتي

نزهة صعدت فوگ بأيدها صينية وهدير ماكو شوية ونزلت نزهة كعدت على السفرة ويانه بقيت مستغربة رفعت راسي باوعت ع درج حجت عمتي

:- لا تباوعين امي اختچ عازلة ما تاكل ويانا

:- ليش؟ لمتكم حلوة ونفوسكم طيبة ليش متنزل تاكل وياكم

حميد :- بوية اخيتچ مرتاحة هيچ واحنة هم مرتاحين من المشاكل هيچ افضل هي شوية تتحسس من ابسط حجاية ولسانها فلات تذب جلمات بدون مقصد بس تغث المقابل وتعلك الطلايب رادت تعزل وتدلل خلها دامها سالمة ومرتاحة

اجت عيني على جبران منصي ياكل بدون ما يرفع رأسه كمل اكل بسرعة قرأ الفاتحة وگام صاح :- نزهة مجهزة القوري

نزهة :- اي حبيبي

عماد :- العب نزهة حطت عينها على جبران هلهلي يما

علياء :- ااااخ عوف المرة شبيك مجلب بيها هل مگرودة لا تزعل وتهج من عدنا

نزهة :- ام عادل عوفي غير هوَ بحسبة وليدي وانا متعودة علي وعلى سوالفه الحلوة عزيز روحي هذا

عماد :- لا تصچمين متزوج

حميد :- عوف المرة ما تولي يم مرتك تاكل ونفتك من لسانك

علياء :- لا عيني اني ارتاح من اشوف ابني گاعد يمي وياكل وين يروح يم هذيچ الـبر... انتبهت لهفوة لسانها وسكتت ما كملت

خلص الغدة لمو المواعين كامت مرت عادل ساعدت نزهة بالمطبخ واحنة شربنة چاي عمي دز نزهة على هدير نزلت وبيت عادل راحو

عمي فر سبحته خلص چاينة صاح نزهة جددي الچاي النة

طبت بيدها القوري تركض :- سويت ابو عادل كبل لا تكول
شطفت الاستكاين وصبت وطلعت

تحمحم عمي عدل گعدته باوعت بالوجوه عماد وجبران صفة وهدير بصفي وعمتي علياء گاعدة يم رجلها

حميد :- هدير والشيهانة انتن شاهد الله حالچن حال بنياتي وما اميز بينچن
وحدتچن طالعة من روحي وعايشة بگلبي هدير بعد صارلها فترة طويلة يمنة من اول ما ردت للعراق وهيَ تعرفنة زين وتعرف شگد نحبها ونعزها ، مو بابا؟

حجت بهدوء :- صح عمو تحبني وما مقصر

حميد :- والشيهانة جانت غايبة بس الله حاضر ويعرف الهم الشايلة الگلب عليها
يمكن احسب بيها اكثر من ما احسب ببنياتي لأنها بعيدة ورجلها مانعها من التواصل ويانا وما نعرف اخبارها

وبنفس الوكت هيَ ما تعرف شنو صار بغيابها
ولازم تعرف
بنيتي يالشيهانة من جنتي متكترة بالكويت صار خلاف بيني وبين ابوج بسبب ابناء بليس الدخلو بيناتنا وخربو النفوس وتخالفنة انا وابوچ رحمه الله واسكنه فسيح جناته

مع هذا انا ما افكرت أأذي اخوي لو اضربة بريشة الله شاهد ، شائت الاقدار واحترگ البيت وماتو بيت اخوي وياهم امي وابوي
انكسررت وندمت على كل حجاية طلعت مني لو حجيتها بوجه اخوي وغثيته بيها
عضيت العشرة ندم ، رحتله للمگبرة وتعذرت منه ونمت ليله كاملة يم گبره غفت دمعتي وياي على تراب الگبر وحلمت بيَ ذاك الحلم اجاني وگلي روح محالل وماهوب

الحمدلله ارتاحت نفسيتي وبريت ذمتي من سويت الفاتحة والثوابات وتصدقت

بس ضل شوية هم صغير ، و هوَ هم الورث
الحجي والدي جان عندة شوية املاك ما مقسمهن علينا بأسمه
وابوج بعد املاكه اله وبعد وفاته انتِ وهدير وريثات

گلولي الك ويطيحلك حصة ومن هذا الحجي كتلهم لا فلس واحد احمر من ورث اخوي ما اخذ كلشي عافة يتقسم بالتساوي على بنياته

جبت محامي ، وگعدنالها گعدة مرتبة وقسمنة الاملاك بيناتچن بالتساوي حسب قيمتهن بس صار فرق
هدير استلمت ، والفلوس الورثتهن دخلتهن بشغل والعقارات صارن بأسمها

وضليتي انتِ دزيت جبران للكويت بس ما لگالچ اثر گالو متزوجة ومحد يدري بيا ديرة حاطة وحتى گبل موتت اهلج ترة اجة للكويت دورج وهم ما الج اثر
عاف الكويت ورجع وكل املاكج من والدج ضلت الج الفلوس بالبنگ والعقارات على حطت ايدچ
هسة دام اجيتي لازم تستلمين كلشي عافة والدج

احنة طبعا ردنة نبيع ونقسم بينجن الفلوس لان قسمة العقارات والاراضي ما تكون مرضية شويَ بس انا ولان اعرفج شنو كلت لا ما نبيع نقسم قسمة عادلة واذا جزء يكون اكبر من جزء
فـ الجزء الاكبر الهدير والاصغر بشوية الچ

شيهانة :- شلون؟

حميد :- من حصة هدير ارض جبيرة مقارنة بالارض الصارت نصيبچ الفرق بينهن تقريبا 700 متر

شيهانة :- مو مشكلة عمو نمونة قابل عليها بالعافية

حميد :- هدير رادت الارض هاي للمعمل السوته لهذا السبب رفضت ناخذ منها ولو شبر وننطي الج

هدير ردت متضايقة وهي مضيگه عيونها :- انطيها فلوس شنو يعني حتى ما تصير المظلومة البريئة واني الظالمة والسارقة وماخذة اكثر من استحقاقي
باوعتلها بصدمة

عمي هز راسه وكال :- بكيفها اذا تريد فلوس انطيها حقها هذا واذا تحاللج وتواهبچ ماله داعي

شيهانة :- لا عمي ما اريد محاللة ومبرية الذمة

حميد :- بارك الله بيچ تربية حجي راضي وتعبه ما ضاعن
لمعت عيونه بدهاء وصاح الخلف ما مات لا وحك علي

شيهانة :- فدوة الگلبك عمو تسلم

حميد :- الله يسلمچ
بالنسبة للورث التركه الوالد تقسم بيناتنة حسب الشرع حطينه حصة ابوج على كل املاكه العافهن وراها قسمنه

شيهانة :- المزرعة والبيت الي احترگ المن؟

هدير :- الچ

حميد :- اذا ماتريدها لان البيت احترك بيعيها الي ما افرط بي انا

شيهانة :- بالعكس شلون ابيع ؟! غير روحي معلگة هناك بس اصفي اموري اعيد ترميم البيت والمزرعة من جديد

حميد :- عفية بارك الله بيچ بنتي اخ بالشيهانة بعدج انتِ انتِ الرزنة والعاقلة عقلچ يوزن بلد
اتذكر كبل لا تطلعون للكويت و اول ما طلعتو جنت دوم اروحلكم والتقي بيج صلاوات على محمد عقلج يعجبني وشخصيتج تبهرني واخلاقج اخلاق حجي حامد وحجي راضي عينًا

هدير زفرت بضيق ودارت وجها

رديت بحزن :- متوهم عمي الدنيا اخذت حيفها مني وشمرتني مكسورة ومسلوبة العقل والارادة ، كمت حتى اشك اني مو اني

جبران :- تخسى الدنيا بت عمي ما تنكسر جبل شامخ

عماد :- نخلة

حميد :- لا بوية قوية بعدج وعقلج رزن
اي شي تحتاجينة احنة هنا بالخدمة كلنا تحت امرج

شيهانة :- الله يحفظكم ويطول اعماركم

هدير بضجر :- عمو دايخة اريد انام خلصت؟

حميد :- صعدي بوية نامي نوم العافية

علياء :- عيب تحجين بهذا الاسلوب صاحبك لو صار حلو لا تاكله كله
وين اكو جنة تكول لعمها خلصت عبالك ممحترمة كلامه

حميد :- خليها يا مرة براحتها اعرف كلبها طيب وما تقصد الي تحجي

كامت بدون ما ترد صعدت لحگها رجلها عمتي ابتسمت براحة من راحت وكأنها كانت كاعدة على انفاسها وكاتمتهن

جبران :- هم مخططة تفتحيلج مشروع شي شياتين فد معمل فندق مطعم

شيهانة :- ما ادري بس حاليًا ما اظن يمكن بالمستقبل

حميد :- ارتاحي لملمي روحج يلا تشتغلين
ما ينجح الشغل اذا الواحد جان مكسور وتعبان وانا واخوتج كلنا وياج وبظهرج ونساعدچ بأي شي تردينا

شيهانة :- اي هوَ هيچ عمو ارتاح والملم شتاتي وان شاءالله بوجودكم اصعد للقمه وافتح بدل المشروع عشرة

ليلى :- هنيالچ عمي

ضربتها على كتفها بقوة :- على شنو هنيالي غير خسرت اهلي ولحد هسة النار بگلبي شابة ما تقبل تهيد

ليلى :- والله بلوة الله يساعدچ ويرحمهم

شيهانة :- بس تدرين بالعراق حسيت روحي طير حر مو مثل من جنت بالكويت من ورا مشاري الجلب المطي

ليلى :- زين هوَ ليش منعج من اهلچ

شيهانة :- مو بس منعني ليلى حتى اني ماعرف شلون اوصللهم ما ادري بيهم راجعين لنفس البيت عبالي غيرو
وهوَ مشاري الله لا يوفقه منعني حتى ما انطيهم علم بسوالفة ويجون ياخذوني

حجة ويا ابوي وجه الى وجه وگله ماريدكم تتواصلون وياها بأي شكل من الاشكال ماعندي مرة تحجي ويا اهلها

ابوي كلي شتكولين بوية كتله موافقة

وافقت بسبب غايتي بس وين مشاري غدرني وكذب عليَ وكسرني الله يكسره كسرا ما من وراها جبر

رفعت ايديها وصاحت اميييييين

جرت دفتري اخذت من عندة ورقة وكتبت
ليلى بنت غنيمة و سهير بنت ماجدة بسجن ...............

طبگتها وحطتها جوة فراشها ، ورجعتلي الدفتر
ليلى :- تدرين مرات احس ريحانة تشبهني بهواي امور

شيهانة :- حتى اني حسيت اول شي ثنيناتكم عدكم عمام بس ما تتواصلون وياهم ولا تعرفوهم

ليلى :- وثنيناتنة وحيدات النة الله

شيهانة :- زين اكلچ انتِ ليش رفضتي الضابط صهيب يمكن يكون هوَ عوضچ بغض النظر عن تواجدة ببيتكم بس يمكن يكون كلامه صحيح
ومن ياخذج يبطل سوالفه

ليلى :- ذيل الچلب عمره ما ينعدل بعدين منو گلچ اني رفضت؟

شيهانة :- قبلتي؟

هزت راسها بلا

ليلى :- ما كدرت ارفض ولا اقبل ضليت افكر و اتگلب كل ليلة بين الاريد اوافق وبين الاريد ارفض جنت كل يوم ابجي

يمكن تستغربين ليش ابجي بس كوني موجود ببيت علي سمعة وخالتي تجيب بي منكر وناس من اصناف تعبانة هذا الشيء يأذيني حيل

افكر اوافق واطلع بس من اجيبها بالعقل اكول هوَ دخل لهذا العالم الوسخ بعد ما يطلع منه الا وهوَ ملثگ بوساخته
وبنفس الوكت گلبي ما چان رايده گلبي نافر من عنده

بيوم من الايام العصر ظفرت شعري وحطيته صفح اخذت فلوس وحطيت عباية على راسي وطلعت شافتني ريحانة شمرت اقلامها وركضت بأتجاهي

:- خالة وين رايحة؟ اروح وياچ

:- روحي انطي خبر الماما اذا قبلت امشي وياي گليلها رايحين نشتري

ركضت الامها طلعت من الباب حاجتني وكلتلها روحي
لبست نعالها واجت
سديت الباب ومشينة گبل مدت ايدها لزمت كف ايدي ، ابتسمت على لطافتها

وصلت للمحل گتله اريد قرص بي اغاني هيثم يوسف
گلي تدللين

:- حطلي اغنيته الجديدة عيني
هز رأسه كمل انطيته فلوس وطلعنة للمحل اليبيع حلويات اشترينه من عندة وطلعنة نتمشى للبيت

ريحانة :- خالة مشكورة احب النستلة هاي

ليلى :- بالعافية ريحانتي الحلوة

ريحانة :- اني ريحانتچ؟! كمزت بفرح وحضنتني
ليلى :- هههههه لج شارع عيب فضحتينة ماما

ريحانة :- گولي ريحانتي
ليلى :- ريحانتي حبيبة گلبي

باست كف ايدي بفرح ولزمته حيل مسحت على رأسها واحنة نمشي بالفرع طبگت سيارة علينه
ريحانة خافت لاذت بسدي لزمتها بقوة نزل رجال
وگف گبالي وحجة بتهديد

:- شوفي حور اخوج ابو هاني يگول احنة وياج والزمن طويل ترجعين ترجع الماي المجاريها
ما ترجعين نخلي مجاريها دم

ليلى :- شبيك عيوني شبيك اغاتي يا حور اني مو حور

باوع الريحانة وكال :- هاي هيَ عدنة صورتها منها وعرفناچ ست حور

ليلى :- يخلق من الشبه اربعين اذا بشر ما متأكد منه لا تهددة
اسمعني واسمع كلامي وياريت توصلة لأبو هاني
گله ليلى مرت الرائد صهيب الهددتها دزتلك سلام وتگلك "احنة نمشي الماي ونحدد مجراه باليعجبنة واذا انتَ زلمة وطالع من ظهر زلمة تعال واجهني حتى اشوفك النسوان شتجيب والزلم شنو تربي"

بهت لونه من سمع رائد اعرف نقطة ضعف هذول الناس هيَ الدولة والقانون
يتراجفون من من تنجاب يمهم سيرة ضابط يبلعون العافية

رفعت اصبعي بتهديد :- وهذا رقم السيارة حفظته حسابي وياكم شي ثاني
يلا ماما زنوبة امشي البابا

نزل الي يسوق اعترض طريقي وگال :- خوية على بختچ اني شعليَ كلي خلك مرسال لابو هاني وجاي بكروتي

ليلى :- لا عيني انتَ اندگيت بيَ واني مو قليلة شر ولا گصيرة لسان اذا ما وگفتك انتَ واليطلع وراك بالشمس حفاي فـ لا تسمى ليلى ، وهذا وجهي حفظه يجيك يوم تشوفة وانتَ بأسوء حالاتك

الا شوية رادو يبجون وگعدو يتوسلون بس سدي الموضوع واني راسي بالف سيف عصبت وصيحت بوجوهم

:- شغلتكم راح تصير يم رجلي انتم ناس ماعدكم ذمة وضمير وتحتاجون من يربيكم

تخطيتهم ومشيت واحاجي ريحانة بصوت مسموع :- زنوبة حبيبتي لا تخافين بابا يحلها

ركض وراي واحد وكال :- والله خربطنة شاهد الله عبالنة غير وحدة عمي احنة طالعين من السالفة وهاي لو توكفين كبالنه وتكولين اني حور وهاي ريحانة نكلج ما نعرفج بس لا تدمرينه احنة زلم برگبتنة عوائل

ليلى :- لا عيني انتم لاحكين مرية وبنتها لازم يجي شخص يوگفكم عد حدكم حتى ماتضلون تصولون وتجولون براحتكم

:- خوية احنة راجعين لمنطقتنة وبعد مالنة شغل بالسالفة

:- يله لعد ابتعدو عن طريقي بس اذا صار شي الي لو البنتي اشمركم وراء الشمس
رقم السيارة خزنتة براسي و راح اكتبه واضمه للاحتياط

عفتهم وراي ورجعنة للبيت نمشي بسرعة من الخوف حرف واحد ما حچينا لحد ما وصلنة للبيت
حطيت حور وحچيتلها كل شي صلت تبجي وتدك على رجليها بخوف

حضنت ريحانة وكالت :- بعد ما اطلعها وياي اخليها بالبيت واني اتنقب واطلع

ليلى :- ليش هوَ البيت امان؟ داده اخذيها وياج عاد تكون گبال عينج

حور :- بس والله سباعية شلون طلعتي هاي الچذبة اني مرت الرائد صهيب والله طلعتي داهية

ريحانة :- ماما اني سكتت خليتها تجذب براختها

فكينة عيونة بصدمة حور خزرتها :- عيب تگولين تجذب على خالة ليلى هيَ ما جذبت جانت تحميج

ريحانة :- اي اعرف اعرف جذبت علمود تحميني جذبة بيضاء مثل الثلج

ليلى :- اي حبيبتي اهم شي تعرفين بوستها بخدوها
:- حور عينچ على البنية وعلى روحچ هذول الكلاب اخوتج وراچ خاف يلگفونچ ويسوولچ شي

حور :- ان شاءالله عن نفسي ماخايفة على روحي گتلچ المبلل ما يخاف من المطر
بس خايفة على ريحانة اذا صارلها شي احرگ روحي

ليلى :- گولي يا الله صاعدة راح اموت من الخوف دشوفي لسه ارجف

ريحانة :- حتى اني ارجف شوفي

رفعت ايدها تراويني
مسكينة كسرت گلبي بعدها طفلة وشافت الضيم من تكبر شلون
صعدت اريد اتاح وانسى الموقف الصار شغلت اغنية هيثم يوسف
وسرحت ويا بغير عالم

چانت اغنية جديدة لهيثم يوسف صوروها بجامعتنة دائما امر بالمكان الي صوروها بي

حطيت القرص وگعدت بالأرض حطيت مخدة جواي سندت روحي على الميز،  اسمع

شيجيب باجر وصبر شلون
باجر التقي ويا اجمل انسان
كل لحظة التمر تسألني العيون
شضل من الوكت؟ مو صبري خلصان

حرت شلبسلة باجر اني يا لون
اي لون الالبسة يكلي خجلان

شلون اوكف كباله وحالي شيكون
الله بعينه جمع كل الالوان

سرحت بخيالي البعيد ، ورحت بعالم ثاني
حسيت هيثم لزم ايدي واخذني لعالم الحب والخيال
صرت طايرة بين الغيم واني بمكاني
اووف شاحبك يا شاحبك

رفعت ايديني للسماء ولهج لساني بالدعاء
:- ياربي خلي هيثم يوسف يحبني وياخذني والله احبه احبه
فدوة ياربي خلي يجي يصور اغنية ثانية بجامعتنة ويشوفني ويوگع بحبي
والله يومية اروح لكلية العلوم خل يجي ويشوفني يلگاني انتظره

بعدين تذكرت البنات كلهن يحبنه شلون ياخذني؟
گلت يلا هوَ الله يكتبه الي

تخلص وتبدي اغنية غيرها لهثيم يوسف ، خالتي صاحت من جوة :- لييييلى

نصيت الصوت وركضت باوعتلها من فوگ لازمة المحجر وتصيح بغضب
:- لج يوم كافي روسنة طگت من هيثم اربعة وعشرين ساعة هيثم هيثم مللتينة
دشغلي كاظم الساهر يمة يمن غديتله فدوة بلكت ياخذني

حور :- لا والله ياخذني اني ، اقتل وانقتل وما اقبل اضيع كاظم

نسيمة :- سدي حلگچ بعدني ما حطيت عيني لحگتيني اني عاشگته لكظومي من فدوة لطوله الحلو

حور :- هوَ كاظم مگلبنة هذا واكف بالباب يتوسل بينة ناخذه تهي بهي
سمعي سمعي ديصيح حور اموت عليج اخذيني

نسيمة بغضب :- لا والله يصيح نسومة حتى جايبلي ورد

حطيت ايدي على خدي وگلت :- عزة العزاني طلعت الگاع عوجة الصوج مو صوج الشجرة

حور :- خليتي ليلى تضحك علينا ارتاحيتي نسومة

ريحانة :- ماما انتِ تحبين كاظم اني احب جعفر ابن ام جعفر اخذه من البس ستيان مثلچ

نسيمة :- عزززة وطين داحت البنية هلهلي يـ حور

حور ما گالت باطل طگتها هلهولة وصلت لسابع جار

ليلى اشرتلها ع كتفي وگتلها :- انتِ من صاحبتي خالتي غسلت ايدي منچ منا

نسيمة :- يمة صدقة لله شبينا شناقصنا ياماما ، اني نسومة اهز شوارب الزلم هز والگاع من امشي تاخذلي تحيه

حور :- مو حضرتچ صدام حسين وهازة شوارب الزلم ومرجفة الگاع

هزيت ايدي ثنين وحدة تكول للثانية اني مخبلة اكثر منچ

شلت القرص وخليت قرص ثاني بس اغاني كاظم الساهر خل ترتاح خالتي ام كظومي

تعشينا درست ورا العشاء اليوم بيت هادئ مابي صوت الحمدلله ، گعدت الصبح بكل نشاط تمغطت وباوعت للسماء من شفت الغيوم محتله السماء اختفت ابتسامتي
ما احب المطر ولا تعجبني الغيوم ، اذا غيمت الدنيا احسها كئيبة وظلمة المنظر يرعبني

لبست بنطلون جارلس وبلوز ام الرگبة جوزي ، مشتريتهن خالتي الي جديدات
مشطت شعري وسويته ظفيرة نزلت البرچم (غرة)
لونت شفايفي بأحمر شفاه برونزي
رشيت من عطري المفضل ، باوعت لـ نفسي بأعجاب

نزلت اركض مستعجلة كل عادة ضيعت وقتي بتجهيز نفسي متجاهلة الوقت الي دا يمر بسرعة خيالية

صادفت ريحانة بالمطبخ شايلة قوري الچاي
ليلى :- شدتسوووين لتحتركين ماما اوف منچ
اخذته منها صبيت الها تضحك وتباوعلي

ريحانة :- خالة تخبلين من اكبر اصير مثلچ حلوة وشعري طوييل اني

كرصت خدها وبست اصابعي :- تصيرين تموووتين توكعين الطير الطاير من السما

ابتسمت برضا وكعدت تاكل بدون ما تجاوب اسلوبها احبه ما تماطل بالحديث وتكتفي بأبتسامة كـرد على المديح

طلعت من باب البيت امشي بسرعة للشارع وعيني كل شوية تنزل على ساعة ايدي الذهبية ، اباوع للوقت بخوف واخذ نفسي بصعوبة
وصلت للشارع صعدت بالكية شويَ وطلع يله تنفست براحة

باوعت للشارع متضايقة وغميت روحي بدون ما ينتبهلي احد "نسيت اجيب مظلة بله مطرت هسة؟"

ركضت للقاعة ركض الدكتور بعده ما جاي تنفست براحة وفتت وكفت اجر نفسي صدري ضاق بسبب خفقان گلبي ، رفع رأسه وگال :-متگعدين شمنتظره؟

هزيت رأسي وكعدت

قيس :- حطت الطيرا يا صباح الله الحلو

ليلى :- وينها؟

قيس :- الطيرا حطت على سطوحنة

ليلى :- مفهمت شي؟

قيس :- لا تفتهمين احسن ، اذا اعزمچ بعرس تجين؟

ليلى :- منو معرس؟

قيس :- سيد هاشم اخوي الصغير

ليلى :- الصغير عرس وانتَ لا شعجب؟

قيس :- بعاداتنا الولد يتزوج بسن الـ16 او 17 ما يوصل 18 والبنية 13 او 14 ومرات اذا اولاد عم محجوزين ويكونون نفس العمر من يوصلون 16 يزوجوهم

ليلى :- انتَ شگد عمرك
قيس :- عشرين

ليلى :- يعني انتَ حاليًا متزوج
قيس :- لا اني لحمه طفرت من الجدر ومحد رجعها
ليلى :- يعني؟
ابتسم ورد :- استثناء

ليلى :- وانتَ تريد تعزمني يعني انتم وين واني وين لازم البس عباية وحجاب يلا اجيكم اذا مو بوشي

قيس :- يوم واحد هوَ تتعرفين على الاهل

ليلى :- بصفتي شنو؟ اني مو اكثر من زميلة وياك لا اعتذر ما اكدر اهلك ياخذون عني نظرة

ابتسم برضا باوع لساعته وگال :- مو كأن الدكتور تأخر ما اعتقد يجي

رديت بأنزعاج :- خفة وراحة اكرها هذا الدكتور ما اطيقه

نقر ع الستيج باصابعه وگال ينصحني :- شعور الكره حقيرة جدًا
وانتِ اكبر من انُ تكرهين شخص ممسويلچ شي
الانسان اذا كره وحقد مرة مرتين يوم ورا يوم گلبه يصير اسود واذا الگلب صار اسود سواده ينعكس على الدنيا وكلها تصير سودة بعينچ

تحسرت بضيق :- ما اكرها من فراغ ظلمني بالدرجات قبل يومين حجيت ويا يستصغرني
يگلي شنو انتِ بگد الفصمة جاية تتهميني بالظلم

رفع عينه عليَ باوعلي ونصة بسرعة ، رد :- هذا هوَ خليها يمي اني احچي ويا هاي اذا داوم بعد

:- ليش ميداوم بعد؟
:- سمعت مشتكين علي يمكن راح يفتحون محضر ويتحاسب ، اذا اجت لجنة احچيلهم شلون ظلمج بالدرجات وشلون استصغرچ حتى ياخذون حقج منه على شكل عقوبات او اقتطاع راتب الله اعلم ماعرف هواي بهاي الامور

ليلى :- تمام،  نطلع نتمشى بشارع العلوم

قيس :- والله يا اتمنى بس اخاف على سمعتچ تتلوث من يشوفون كعداتنة بدأت تكثر وسوالفنة كذلك

ليلى :- لتشيل هم هاي العالم كدامك مو كلهم شباب وبنات صداقات وصور لو بس يم ليلى يصير غلط ومايجوز

قيس :- هوَ شرعًا ما يجوز ويعتبر ذنب ، و انتِ ذنبي
ليلى :- امحيني بسجدة
تنهد وميل رأسه يباوعلي :- ما تنمحين انتِ ذنب لا يُـغتفر

بدون رد طلعت اتمشى لشارع العلوم والف فكرة اجت براسي ، قيس معتبرني ذنب لان اني بنية وهو يسولف وياي
بس حقه هوَ من عائلة دينية ، متدين وما يباوع ولا يصادق بنات بس اني يحجي وياي
امر طبيعي يعتبرني ذنب ما يريد يلطخ نفسه بيَ أكثر من هيـچ

قيس :- ليلى
التفتت شفته يمشي باتجاهي صار يمي مبتسم عدل ياخة قميصة، لم شفايفة للداخل
ودخل ايده بجيب البنطلون وطلع من جيبه چُكليتات حمـر

مد ايده گبالي :- البارحة طشو چكليت الفرح وعزلتلچ هذني الحمر طعمهن كلش طيب

اخذت وحدة منهن فتحتها :- الثانية الك
قيس :- نتشارك الحلوة
ليلى :- والله يبعد عنا المرة

قيس :- مو كلشي مُـر يعني سيء هسة انتِ مـرة بس ما شاءالله وجهچ اجمل لوحه رسمها الباري

ليلى :- اني مرة؟

قيس :- البيض لحمهم مـر عكس السمر يكون لحمهم حلو
ليلى :- منين جبت هاي الدراسة؟

قيس :- من جيبي اني عندي ثقة تامة ان البيض طعمهم مر كلش والسمر طعمهم حالي

ليلى :- اگلك خاف تطلع من أكلي لحوم البشر؟!!

ضحك ونصة يعدل طرف چاكيته :- لا ابد لتخافين امني

:- تدري احب هذا الطريق لان هيثم يوسف صور اغنيته هنا
:- لا والله؟

:- اي والله امس اشتريت قرص بي الاغنية الجديدة وتقريبا حفظت جزء منها

:- هاي بدل ما تحفظين جزء من القرآن تحفظين اغاني ولا كأن الاغاني حرام معتبرتهن شي اعتيادي ويجيبن الهم والفقر وكل الضيم

:- ليش حرام؟ ما بيهن شي حجي عادي

:- لا بيهن عزف ، الاغاني تُلهي القلب عن ذكر الله
وتهيج المشاعر هذا الشيء حرام

:- ما ادري الله يهديني لعد

ضحك وگال :- امين

:- جان كتلك اسمعها بس ماريد اشيل ذنبك بركبتي
اغنيها الك؟

:- هيَ بقت على هاي؟ هوَ اني ركست ركست

:- ما فهمت؟

:- سمعيني بله احجيلي الكلمات

:- تعال نگعد هنا ، سبقته بخطواتي كعدت بالكاع اجة كعد مقابيلي
:- مو تضحك على صوتي موحلو

:- يعني راح تغنين؟ عبالي تحجين الكلمات حجي

:- لا أغني الي حفظته
اسمع تحمحمت شفته باوعلي وابتسم بانت غمازته واربكتني نصيت
رجعت رفعت رأسي لگيته يباوع الوجهي بطريقة غريبة وبدون ما ينصي وهاي كانت اول مرة يطيل النظر الي

غنيتله بصوت ناصي وبهدوء ، حتى ما يسمعني احد المارة
"شيجيب باجر وصبر شلون
باجر التقي ويا اجمل انسان
كل لحظة التمر تسالني لعيون
شضل من الوكت مو صبري خلصان
حرت شلبسلة باجر اني يا لون
اي لون الالبسة يكلي خجلان
شلون اوكف كباله وحالي شيكون
الله بعينه جمع كل الالوان"

بس هذا حفظته شرأيك؟ بعيدًا عن صوتي طبعا

باوعتله سارح بغير عالم وعيونه على الكاع
ابتسم وصفگ :- خوش صوت والله عاش عاش
شيجيب باجر واصبر شلون باجر التقي ويا اجمل انسان
كلش حلو

رديت ابرر حتى ميشك اني احب :- بس ترا ما اسمعها علمود احد يعني عادي بدون سبب ماعندي انسان احتار شلبسلة حتى اعجبة

:- هوَ هذا الصحيح بس المفروض تعرفين عندج رب يشوف شنو تلبسين
ولازم تسعين حتى تعجبينه

:- انتَ كلساع تفشلني ، حجيت بقهر وبرطمت بزعل

:- والله ما قاصد بس غير من غي..... سكتت لحظات وكمل
من حرصي عليچ اريد تكونين من اهل الجنة
ورجلچ ما تهتز ع سراط المستقيم

:- الله يهديني
سكت شوية ورد بسؤال تبينلي من عنده يريد يعرف اكثر عني وعن اهلي ..

قيس :- ابوج شنو شلونه ..
شنو طريقته او اسلوبه بالتربية لين او قاسي
ما اعرف ليش من اشوفج واشوف اسلوبج ودلعچ  احسه انسان لين ومداريچ كلش ويهتم لمشاعرچ

سكتت لحظات تنهدت بضيق ونزلت رأسي افرك بأيديني بخجل
:- احرجج سؤالي اسف بس والله ردت اتعرف اكثر عليكم وعلى اطباعكم واشوف هاي الانسانة الرقيقة شنو وراها

تنهدت ورفعت راسي حطيت عيني بعينه تفاجئ من عيوني المليانات دموع وعقد حاجبه ..
كتله بحزن :- قيس اني يتيمة ......... للحكاية بقية 🖤

رأيكم بالقصة يهمني ..

ليلى ... ذكرت سابقا ان هي تشبه سعاد حسني ليلى شعرها طويل تمري مموج

تابعولنا بصرة الربيعية راح تنزل قصة نقراها سويا اني وياكم ان شاءالله هذا حسابها 20nana29