رواية حمائم تخشى الطيران الفصل الثامن وثلاثون 38 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ....

وصلو البارت الف تصويت + والف تعليق لطفا 🖤 ....

1000 😁🔥🔥

.....

فجأة فز گلبي وارتجفت روحي والتفتت بكل حواسي من اجة بأذني صوت سامعته ذاني
يصيح بأسمي
قيس :- ليلى .. خاتون تعالي بابا
التفتت اشوف بنية صغيرة شگره تركض بأتجاها وهو واگف بعبايته الجوزية وعمامته السودة ويمه العلوية فاطمة شايلة ولد وتاشرله ع الحلويات
والطفلة جلبت بعبايته
نصة مبتسم يكللها
:-ليلى بابا شنو عجبج من الحلويات اخذي ..

حسيت العالم كله وگف ولحظة صمت نزلت ع الارض كلها ، بس منظرهم بعيني وهم عائلة مرد روحي مرد
ما عرفت شعوري اذا كان غيره لو حرمان لو حسد كره حقد .. كل المشاعر تجمعت بداخلي واني اباوعلهم

العلوية فاطمة بنت عمته خلت راس ابنهم ع كتفها لان ضل يبجي وهو نصة ياخذ حلويات يخليهن بالعلاكة والطفلة الشگرة (ليلى) تختار وسبحان الله وكع اختيارها ع الاشياء الي اني جنت احبهن وافضلهن

وكأنها مو بس شايلة اسمي حتى ذوقي ..

الموقف كان لحظات التفتت بسرعة ودموعي تتسابق ع خدودي مشيت بهمه جريت هادي وخليته جوة عبايتي باوعلي هادي ابن عمي متفاجئ وعقد حاجبه

حاجيته بهمس والدموع ع الخدود هماله
:- اقسم عليك بالله اذا شفت قيس سوي نفسك ما تعرفه وامشي ما مستعدة للمواجهة بهيج موقف امشي هادي نرجع للبيت امشي اقسم عليك بالله

اشتدت عقدة حاجبه ورفع عينه يباوع بالمكان وكعت انظاره ع مكانهم اني جنت ناطيتهم ظهري
هز راسه وكال بنتر

هادي :- شبيج ولج شني شايفة ملك الموت هيج انسحبت روحج والدموع تنزل

نسيمة بهمس وهي تتقرب بهمه
:- الوقت مو مناسب امشو يلا نروح منا لا يشوفنا السيد وعيب نجذب لو نسلم علي وما نگله هذا ابنك نطلع جذابين

هادي عاقد حواجبه ماقابل يباوع وراي ويرجع يباوعلي اباوع لشيهانة فهمت وعرفت ضلت تباوعلهم
وترجع تباوع النه

كالت لهادي بصوت هادئ
:- اذا. واحد شاف الثاني هسة تصير سالفة طويلة منها سلام ومنها الطفل ويانه راح يكون واكف كبال ابو وعائلته وصعب نحجي وصعب نضل ساكتين خلونه ننسحب وبغير وقت يلتقون ويحجون ويتصافون

هز راسه غطيت وجهي ومشيت بهمة ورا خالتي انكطعت روحي كطع يلا عبرتهم وهم جانو مندمجين سوية وما يباوعون ع العالم واني اتختل ومخلية هادي جوة عبايتي

وهادي ابن عمي منصي راسي ويمشي كدامنه

اباوعلهم من طرف العباية واشوفهم شلون عائله حلوة ، اشوف ابوهم يمهم وجايبهم يزورون ويشتريلهم واني حظي وحظ ابني انكتب علي يعيش خمس سنين من عمره وحيد والله يعلم بالجاي ...

شيهانة گالت بصوت ناصي مستغلة الوضع الحرج
:- شفتي؟ ليش اني اكلج روحي واجهي وحطي ابنج گبالهم وفرضي عليهم حتى يكون اله وكفة مثل هاي بسد ابوه

هزيت راسي بسرعة اي ودموعي تنزل ..
ليلى :- اعرف اعرف

هادي نتر :- جيبي هادي شلعتي گلبه تسوحلين بي

جره لزمة من ايده يمشون قبلنا خفت التفتت رغم بداخلي اريد اشوف
اريد اشوف شلون عاش وكمل حياته طبيعي ولا كأنه عايفله گلب يتعذب ويتمرمر بعشگه كل ليله!
ردت اشوف نسيانه الي الواضح

يمكن لو مارة گباله ما ذكرني ولا اهتز گلبه ..

صعدنا بالسيارة وطلعنا اول ما حرك هادي نتر معصب
:- شسالفة موتي روحج بواجي

شيهانة :- غير العشگ يموت

باوعلها بالمراية بخزره سكتت ودارت وجها عنه

هادي :- عشگيش؟

نسيمة :- شمالك متعصب عاشگه ابن الجيران؟ غير رجلها وابو ابنها مو غريب

هادي :- لا انه اسأل ام اعطوب عشگيش؟

شيهانة :- احنه نحجي بليلى

هادي :- وانه انشدج عشگيش؟
رفع طرف حاجبه بتساؤول شيهانة ما قابلة علي خزرته ودارت وجها

هادي :- انتي اصخم والطم منها بعد مخليات حياتجن واكفة ع زلم مو يمجن
هاي عرس وراح و لو تطگ راسها بالحايط ما يرجعها ولا يريدها بعد
وانتي تركضين ورا روح ..

شيهانة بأنزعاج :- اني متأكدة جبران عدل ما اركض ورا روح!

ما عجبه ضحك مستهزأ وهز ايده
:- ما ضل عدل ما طلع من السجون وحتى المريض طاب والميت وصل خبره لأهله بس انتي ضاله تصيحين عدل عدل وينه اذا عدل؟

طفل هوا ومايندل الدرب لو مايعرف يكول اسم اهله للعالم؟

باوعتله ورجعت باوعت لشيهانة تباوعله بتفكير وعيونها انترست دموع

نتر :- لا تبچين لا املص عيونچ

شيهانة :- انتَ جاي تدوس بگلبي بهذا حجيك

هادي :- بعد ما احجي انه هم اسربت دائما مالجن شغل بحجيي دخلنا من ذان طلعنا من الذان الثانية

سكت شوية تنهد واني اذا السيارة يطلعلها لسان وتحجي هم ما حجيت

كال بهدوء يوضح موقفه
:- والله انتن خواتي وانه ميت محترگ علمودچن اشوفچن تايهات وحدتچن ما تندل دربها لا طايلة السما ولا الگاع وانقهر عليچن ، چا انه ما اكرهچن

نسيمة :- اني مو اختك

باوعلها بنص عين :- اي خالتي المعدلة

نسيمة :- فدوة لعينك يوم

سكتت درت وجهي عنهم الطريق كله دمعتي مجلبة بعيني مختنگة كلش احاول اقاوم وما ابجي
باوعت لهادي كاعد بنصنا اني وشيهانة رفع راسه باوعلي ابتسمت بمراره

نزلت دمعة حارة جوت خدي بدون ما احس
رفع اصابعه الصغيرة مسح دمعتي وگال بقلق
:- ليش تبچين ماما؟

ليلى :- ما ابجي هوى دخل بعيني حبيبي

باوعلي بعدم قناعه وضل يمسح بخدي بهدوء وعينه ع المكان الي يمسحه
تنهد وكال موجه كلامه لخاله هادي

:- خالو بعد لا تصيح ع ماما وتخوفها تضل تبچي

هادي :-ما مصيح عليها خالي جا مو هل ساكت شني تفترون علي؟

سيد هادي :- قبل شوية صيحت وماما مرأة بسرعة تبچي مو رجال لا تصيح بعد الله يخليك

حضنته لصدري ابوس راسه
:- بعد حيلي يا يمه بعد حيلي كله

ابوس براسه ومخليته ع صدري لو تدري ابجي عليك و ع وحدتك وكارهة روحي لان اني اعتبر نفسي سبب بوحدتك هذه اني الي اصريت اجذب وامشي بطريق مو صحيح حتى اتزوج ابوك وانت صرت الضحية

باوعلي عاقد حواجبه متضايق عباله بيه شي ابتسمت ابوس بوجهه

وصلنا للبيت غسلت وجهي وقويت گلبي علموده هذا ابني لازم يشوف امه قوية حتى يصير قوي ويكدر يلاوي هاي الدنيا الما ترحم

مشيت للصالة اشوف خالتي متربعة فوك القنفة ومخلية ايدها ع فخذها تحجي بصوت ناصي منفعلة وتحرك بأيدها الثانية بعصبية وهادي عاقد حاجبه ويهز راسه اي

من شافوني سكتو
دخلت للغرفة لكيت الشيهانة متمددة ويمها هادي تحجي ويا
:- بس حلو بايسكلك اني من اجيب شعلان يمك هم اشتريله واحد تتسابقون بيهن بالصالة

نزل اكتافه بجزع وكللها :- شوكت يجي

شيهانة :- ارفع ايدينك سيد وكول يارب يجي شعلان اليوم قبل باجر

ببراءة وطفولة رفع ايدينه يدعي
ضليت اتصنع الضحك وافتحله العلاليك طلعلته حلويات ياكل اباوعله ولا اكو ضحكة بوجهه

ليلى :- عيونه وحواجبه شلون عمته دنيه يبين حزين وينكسر كلبج من تباوعيله

شيهانة :- اي منتبهه حتى من يضحك مايبين علي فرحان

هزيت راسي ضايجة ، تمددت تعبانة
كتلها باحراج
:- خاف تضوجين اذا بات هادي هنا الليلة من باب انتي ما تقربيله شي

شيهانة :- لا شكو اضوج شنو نايم بحضني شو نشمره بالاستقبال وهوا خوش زلمة

سكتت ما رديت دخلت نسيمة اخذت فراش وراحت خلتله بالاستقبال ورجعت تحجي
:- رايحة لبيتي بالليل امر عليكم محتاجات شي اجيبلجن وياي شي من اجي؟

شيهانة :- ملابسي مو تنسينهن
نسيمة :- لا ما انساهن

راحت طلعت غمضت عيني اريد انام فززني صوت هادي
:- ماما عادي اروح انام يم خالي

هزيت راسي اخذ مخدته وراح
غمضت عيني مقهورة وكل شوية يرجع منظرهم ابالي وانمرد مرد صرت مثل الجمرة طلعت مني شهگة غطيت حلگي كتمتها واتمنى انهي حياتي وافتك من هذا التعب

شيهانة :- جا ليش اكلج استعجلي لا تحرمين هادي من العائلة لا تخلينا يعيش اليتم وهو مو يتيم

ليلى :- نفس الشي
حجيت بقهر

شيهانة :- لا مو نفس الشي والله صح هو يمكن يصير متشتت شوية بيناتكم بس راح يكون عنده ابو وعمام واخوان يردونه من يروحلهم يكولون هذا ابنه هذا اخونه
ومن يجيج راح تكون عنده ام

يمكن مايعيش شعور يكون عنده ام واب بوكت واحد ولا يكعد ببيت يحس بي عنده عائلة كاملة بس ع الاقل ما راح يكون وحيد ولا ينحرم من شعور وجود الاهل بحياته

ليلى :- اليتم مر اني ما اريده يعيشه بس شسوي اخاف ياخذه مني

شيهانة :- مو بكيفه ياخذه شبيج انتي شنو مسلسل هوا غير واقع هذا مادري شلون تفكرين انتي

ليلى :- لا تخليني هسة البس واخذ هادي واروح الهم

شيهانة :- لو طخة لو اطلخ مخة
نامي نامي

سكتت وغمضت عيني احس جواي جمرة ، اتذكر شكلها واكفة يمه وشكله بالعمامه
كعدت وكان اجتلي لحظة وعي وكتلها
:- النوب لابس عمامة صاير سيد فد نوب

شيهانة :- اي معمم وشكله كله وقار وهيبة صلاوات على محمد شلون سيد وزوجته تخبل ولا توقعت بهذا الجمال

ليلى :- اي عفيه فاطمة نازكة مرتبة وبريئة اتذكرها من جنت يمهم وتجي بالمناسبات مثل النسمة والكل يحبونها اخلاقها عالية
نهيت كلامي وتحسرت

شيهانة :- الله يستر عليها تخبل السيد مجنص منج حلوة ومنها حلوة منين ما يلتفت يلكى جمال

ليلى :- وين اني انتهيت
طبكت المخدة وسندت روحها عليها
:- اذا كلج نرجع سوية علمود هادي ترجعين

شهكت ولطمت صدري :- لو اموتتتتت ولج اني نار شابة بكلبي هسة بس من الشفته تخيلي ارجع وعندي ضره ويروح ينام بحضنها ويرجع لحضني غير اموت

شيهانة :- بس انتم الوضع جبركم تنحطون بهيج موقف تكدرين تتنازلين شوية وتقبلين علمود هادي

هزيت راسي لالا ... لو اموت ما اتحمل وكرامتي هم فوك كل شي هوا شدعوة علي طلكني منا وراح تزوج وخلف منا جان صبر شوية
حتى ما فكر ينطيني فرصة ولا هزته دموعي ولا قهري ولا ندمي ع السويته

شيهانة :- جا انتي ما مقصرة ليلى كل سالفة اكبر من راسج حقه يطلكج
بس سمعي هوا ماتزوج فاطمة لان نساج وركض عليها تزوجها حتى يرجع يكسب اهله
هم صعبة علي خسرج وخاسر اهله مناك

ليلى :- هاي هيه ربح اهله وفاطمة ومخلفتله ثنين كافي اني خليني ضمن خسايره
اقبل اكون خساره ولا غنيمة ناقصة مركونه ع صفحة

شيهانة :- كيفج بعد انتم لازم تستشرعون هم اذا طلاقكم باطل اعتقد لازم ترجعون تطلكون مرة ثانية

هزيت راسي وتمددت بداخلي تناقض وحرب من المشاعر جزء يريد يوصل اله وجزء رافض يخطي خطوة وحدة باتجاها

نمت كعدت العصر ع صوت هوسة هادي يلعب ويا السيد كمت غسلت وجهي طلعت اعدل بربطتي واباوعلهم بعيون فرحانة

سويت جاي وخليت كيك وحلويات عصرونية وطلعت للصالة خليتهن
يلا تعالو بسرعة ناكل

كعدو يلهثون من الضحك
هادي :- جا ام اعطوب وينها شني زعلانة مني

ردت من الغرفة :- سالمين

ضحكت وخزرته احذره
هادي :- انه ماريد هذني الحلويات اريد من الدولمة ام الشكر المسويتها ام اعطوب مو كتلج ضميلي اكلها بعدين

ليلى :- ضامتلك هسة احميها واجيبلك من عيوني
هادي :- لا جيبيها باردة اذا بالجدر احسن

ضحكت وجبتله خليتها كباله وهو فلسها تفلس ما ضل شي بيها ما انتقده
اخير شي من خلص الجدر سده وگال
:- عاشت ايدج طيبة

مدت راسها من الغرفة تحجي ما عاجبها
:- عگب ما طلعت بيها الف عذروب ؟

هادي :- اي جا شلون غير لازم نعيب اذا ما نعيب ما تكمل الكعدة

عافته ومشت للتلفون تخابر ماكو جواب التفتت كالت
شو نسومة تأخرت ومتجاوب
ليلى :- تلكيها جاية بس بعدها ما واصلة هية هيج وكت تنور

رجعت السماعة واجت كعدت ع صفحة صبيت الها استكان جاي تخوط بي وتباوع لهادي وهو يباوعلها
ويرجعون ثنينهم يباوعون علي مثل الي عدهم مخطط

شوية ودخلت نسومة وربطو فيشة تلاثتهم واستلموني يقنعون بيه اخذ هادي واروح للسادة
ومن كد ما كلامهم مقنع كتلهم عمي هسة البس عبايتي ونطلع
هادي كال يلا حضري الولد وبدلي واخذج ونمشي الهم ..

ما كلت باطل وما ردت اطولها اكثر كمت غسلت وبدلت بسرعة وبدلت لهادي بس البسه وعيوني تجري

كال وين رايحين ماما
كتله واني ابجي
لبيت جدو .. انت مو كتلك عندك جد وبيبي وعمام وعمات هسة رايحين نتعرف عليهم

هادي :- زين هذول يحبوني؟

ليلى :- اي يمه يحبونك هذول وهم نشوف بابا واخوانك

هز راسه كملت جريت عبايتي وشحاطتي وطلعت الدنيا عصر قريب الغروب
طلعنا اني وهادي والسيد بس ورحنه على بيت السادة

حتى نتواجه ويعرفون عدهم ولد ، وهادي يصير عنده عائلة وسند

هادي :- الحجي مثل ما اتفقنا ماريدج هناك تجفصين وتطلعينا كل واحد يحجي شكل

ليلى :- لا احجي الصدك اني رحت لاقاربكم وكتلهم حامل وانتم دزيتو الي خبر ماتردوني وهسة جايتكم وجايبة الطفل حتى ما يضل تايه بدون اهل

هادي :- عفية عليج

وصلنا لفرعهم وتمشي السيارة وكفها كبال بابهم نزلنه
جريت هادي من ايده احاجي
شوف ماما هذا بيت جدك

يباوع للبيت وكال
حلو جبير
ليلى :- اي كول ماشاءالله
هادي :- ما شاءالله

دگينه الباب وضلينه واكفين فترة وانفتح الباب طلع مصطفى حماي الجبير وعرف هادي وتسالمو
فسح النه المجال من فتت باوعلي وباوع لابني وسلم علي بس عيونه علامات استغراب
يمكن الشبه بين هادي وبينهم صار واضح وصعب نكدر نخفي ان هادي يشبه قيس ودنيا بشكل عجيب ماخذ من ملامحهم ثنينهم

فتح الصالة وكال تفضلي خوية

فتت بايدي هادي وهو ركض للاستقبال دخل هادي كلبي جان يدك بسرعة دخلت للبيت وحدي الصالة فارغة
مشيت كعدت ع صفحة وكعدت هادي يمي وعيوني تباوع للبيت واسترجع كل ذكرياتي بي

دخل مصطفى من باب الصالة مشى بهمه للغرفة مال اهله دك الباب وفات واسمعه يكول
علوية عدنا ليلى

سمعت شهگت بنية عرفتها من صوتها
فاطمة :- ليلى!!

مصطفى :- طلعن يمها صيحي للعلويات عيب البنية ضاله وحدها

حجيت اني بصوت مسموع
خوية مصطفى
التفت باوعلي

كتله :- اني اريد اروح للاستقبال يم ابن عمي عندي موضوع ويا سيد رحمن

باوعلي بحيره ونصة راسه ما لحك يرد طلعت العلوية من ورا تهلي وترحب
كمت الها سلمت عليها وعيني وكعت ع الباب العلوية فاطمة عيونها كلها دموع تباوع من الباب ومن شافتني وخرت بسرعة

عين العلوية صارت ع هادي وهو يباوع عليها مستغرب
لزمته من ايده وقربته الها
نصت باسته بخده وهي تباوعله مستغربة وكأنها بعقلها جاي تربط وتشوف عمره والشبه

رجعت كلت لمصطفى
:- ها سيد ماتاخذني هناك احنه هم ياله نحجي ويا السيد ونرجع طريقنا طويل والدنيا خطر

مصطفى :- اشوفهم وارجعلج
سميرة :- اي والله مال خطر هيه خطر يالليلى لو تدرين شصاير بينااا
ضربت ايدها مقهورة كتلها بتساؤول
:- خير ان شاءالله شصاير

سميرة :- يا خير ياخير غير مؤمن رجل دنيه مادري حتى اذا انتي عرفتي دنيه خذت مؤمن
المهم وين احجي؟  ... هاا سيد مؤمن انخطف صارله اسبوعين ولهسه ماكو اثر ولا خبر عنه

حطيت ايدي ع حلكي مصدومة :- يااا زلمة شخطفه؟
ردت مقهورة تحجي بحسرة :- الخطف صاير للكبار قبل الصغار مابيها زلمة شخطفه وكلوبنا غادية نارررر ناررر نريد نموووت هاي العلويات توة صعدن يرتاحن الظهر كله ملتهيات بدنيه طايحة مواته

ودنيه توة انطتها فطومة منوم يلا ها شوية غفت وهم شنو وهي نايمة تحجي مؤمن ومؤمن

ليلى :- والله انقهرت لو ادري هيج مشدوهين متلوعين ولا اجي جان اجلت موضوعي وجيتي

سميرة :- لا شسالفة يمة؟
رجعت باوعت لهادي ومسحت ع خده
:- منين هذا الحلو ليلى ؟

بهت وجهي ابتسمت وكتلها :- ابني

انطعن وجها ضلت تباوعله بتمعن وترجع تباوعلي لسانها كانه انعقد
بعدها بصدمتها وتفكيرها وعيونها ثابته ع هادي واجة مصطفى يصيحلي اروح يمهم

كمت وهي من صدمتها ضلت ع كعدتها تباوع لهادي
مصطفى :- علوية لبسي عبايتج وتعاي

ردت ببهوت وهي تباوع لهادي :- هاا؟!

هز راسه وكللها لبسي عبايتج وتعالي الجماعة عدهم موضوع مهم ويانه

مشيت لازمة هادي ودخلت للاستقبال كلت السلام عليكم وعيني طاحت ع قيس
فز فزة بس الله يعلم بيها وعدل كعدته فورا وعيونه صارت علي صدره صعد ونزل بسرعه
لفيت روحي بالعباية ونصيت راسي هو هم نصة غمض عينه حيل جفنه تكرمش وضغط سبحته بأيده. 

كعدت قريب ع هادي وكعدت ابني يمي
سيد رحمن :- شلونج عمو؟ شلون صحتج

ليلى :- الحمدلله عمو اسأل عليك انت شلونك
رحمن :- بخير ونعمة الحمدلله

هادي :- سيد هاي ليلة اجت وانت موجود واولادك اربعتهم كاعدين
هسة نحجي الموضوع الجايين علموده ونخلصه لان موضوع جبير مو زغير وانتم ناس عدكم مخافة الله والطلع منكم قبل نكول طلع بسبب الخوف ع ناسكم لو بسبب غضبكم
بس هسة بعد مايصير لازم كلشي يتصلح

سيد رحمن :- احنه نسمعك وليدي احجي

هادي :- لا انه ما احچي ، ام الانه تحجي سالفتها وتسمعون منها احسن سيد
لان هي تعرف كل الاطراف وعاشت كلشي واني سمعته مثل ما انتم راح تسمعون
وعدنا شهووود خير من الله ع كل حرف راح تكوله ليلة

رفعت عيوني من گال اني الاحجي وبسرعة باوعت لقيس الي كان صافن ع هادي ابني وعيونه تسولف حيرته

جانو يحجون اصواتهم باذني صارت مثل الوشة غمضت عيني جريت نفس وباوعت لهادي هزلي راسه بمعنى احجي
ثبتت عيني بعينه اخذت منه القوة وحجيت بهدوء

ليلى :- عمو قبل سنين من دزيتلكم خبر حملي بأبنكم تبريتو من عندي ومن الطفل بس ..........

قاطعتني شهكة العلوية الواكفة بالباب وعلامات التعجب انرسمت ع معالمهم كلهم بدون استثناء
قيس فز وكف ع حيله يباوعلي ويباوع لابنه

مديت ايدي لزمت ايد هادي حيل خايفة وهو من شاف نظراتهم المتفاجئة تقرب مني اكثر لفيت ايدي حول ظهره وخليته جوة جناحي

قيس بأستنكار :- ابنكم!؟

ليلى :- شبيكم يا جماعة؟ ليش انصدمتو ولا كأنكم انتم نفسكم الگلتو ما تردوني ولا تردون الطفل الي ابطني؟

سيد عبد الرحمن يباوع متعجب وعيونه تريد تطلع من حجرها
رفع ايده بعلامة الصبر وگال
:- عمو ليلى وضحيلنا السالفة ابنه منو ابنه؟ هذا الطفل ابنج وابن قيس ابني؟ حفيدنا يعني؟

ليلى :- اي حفيدكم وانتم تدرون وقيس ع رأس القائمة

باوعتله انطعن وجهه كال بغضب
:- ما ادري ولا واحد بينا يدري كل عادة تكذبين وتضمين سوالف ما يصير تنضم

سيد رحمن صاح بتحذير :- صوتك .. صوتك احترم الحضور ونصي صوتك

سميرة :- عمي يشهد الله احنه ماندري ! حتى مادري شنو احجي واكول اني من كثر الصدمة احس ضغطب صعد

هاشم :- كعدي علوية هسة نفهم
ساعدها هاشم تكعد وقيس خزرني بغضب كل ظنه اني مكذبة مثل كل مرة

باوعت لابو وكتله
:- والله يا عمو رحت لبيت عمك وبطني لحلگي اسال عن قيس طلعتلي مرت ابن عمك كالت قيس رجع للعراق وتزوج
كتلها وصليله خبر حملي كالت سهلة واخذت رقمهم

ورا فترة قصيرة اتصلت كالت خابرت السادة ما يردونج ولا يردون الطفل الشايلته وقيس تزوج وعاش حياته

وبيت ابو محمود شهود ع هذا الحجي وهي اقاربكم نفسها شاهدة ع حملي لان رحتلها واصلة تكدرون تتواصلون وياهم وتتاكدون الظاهر احنه جنة ضحية كذب هاي المرة!!

هادي :- وبسبب هاي المرة وحجيها ليلة ردت للعراق علمود ابنها وسيد قيس رادت تسوي المستحيل حتى يعيش هذا الطفل جوة جناح ابو بس انسجنت الامن لزموها بالهور وراحت سنين من عمرها مسجونة ومحرومة من ابنها

قيس :- شايفة اني شايفة يم بيت ابو محمود

هادي :- اي عافته يمهم امانة ورجعت علمودك

قيس :- بس اني بايران ولا وصلت العراق الا ورا السقوط
هادي :- اتوقع الاجوبة راح تكون يم زوجة ابن عمكم مادري عمكم

توجهت كل انظارنا لسيد رحمن مصدوم انطعن وجهه
رفع ايده مسح وجهه حيل وكال
استغفرالله العظيم واتوب اليه من كل ذنب حسبنا الله ونعم الوكيل
عمو احجيلي شلون رحتي الهم وشنو كلولج

رجعت قصيت علي كل شي صار وهو مصدوم والعلوية تبجي مقهورة بسبب الصار بيه وبحفيدهم
وقيس ضل يروح ويرجع بالاستقبال وكل شوية يخلي ايدي فوك راسه مصدوم ومقهور

بالنهاية هادي كاللهم الافضل تتواصلون ويا اقاربكم تتاكدون خاف تشوفون ليلة جذابة!!
ختم كلامه وباوع لقيس بخزره

سيد رحمن :- احنه ما نشكك باحد وليدي!! هذه مو اخلاقنا بس مصدومين السالفة جبيرة ع العقل البشر مرات يحتاج وكت يلا يكدر يستوعب

هادي :- الكم كل الوكت احنه هم ما جايين نطلب شي غير جنسية لهذا الطفل خطية كبر ورا مدرسة ومستقبل وهم بعد انتم اهل دين وعلم المرة ضالة معلگة لازم نشوف موضوع طلاكهم شلون يصفا

قيس رد بنبرة هادئة بس ماكدر يخفي الغضب
:- ليش السالفة عندك بس جنسية وتمشي؟ هذا ابني من دمي ولحمي جايني تطلب اله جنسية؟!!!

هادي :- سيد ما حجينا شي خليك هادئ
الولد امه اولى بي منكم حتى لو ما تقبلون علي بس كرايبكم خلوكم بهذا الموقف يعني الذنب مو ذنب ليلة ، هم جبروها تصير اله ام واب وتحارب وتطلع من ايران للعراق علمود تدورك وتنقذ مستقبل ابنها وانسجنت علموده وطلعت ورجعت تحارب حتى تعبر لايران وتجيبه ومخليته ع كلبها ومداريته مثل الماي بالصينية

هي المحاربة وهي الام والاب لهذا الولد وبكيفها تريد تعتبرك ابو اله وتحسبلك حساب وتنطيك حق تشوفه وتختلط بي
واذا ماتريد بكيفها محد يجبرها جيف محد تحمل بكدها ومحد ضحى علموده بكدها

سيد عبد الرحمن بعتب :- لا هادي ما مرجية منك وهذا انت ابن عشاير وتعرف شما كان الولد مرجعه النه

هادي :- تعذرني سيد ، بس من تحطها بميزان عقلك راح تشوف الچفة المن تميل

هسة ما نحجي بالعشاير والقانون نحجي بالحلال والحرام
من تشوف مرة ضحت كل هاي التضحيات وتجرعت المر علمود هذا الطفل وكلبها نار علي ومتلوعة ، بنفس الوكت ابو عايش حتى مايدري عنده ولد وكلبه بارد
المن تميل وتشوف الولد بالحلال من حك منو بالمرتبة الاولى؟ غير من حك التعب وشگة وتعذب

قيس :- اني وحك ذاك ابن البدوية لو ادري بليلى حامل ما اعوفها!! يابة تسمع اني ما ادري هسة وياكم عرفت جانت حامل ومخلفة ولد
بأي حق تكول مالي نصيب من هذا الطفل!!؟

ليش تحملني ذنب مالي دخل بي

هادي ضحك تك خد مستهزأ ورد بنبرة ساخرة
:- مثل ما حملت ليلة ذنب مالها دخل بي

بهت وجه قيس حواجبه كانت معقودة وعيونه حمر
مسح وجهه يستغفر
وهنا بدو يلومون ويعتبون ع اقاربهم وكانوا ينفضون غضب
حتى وصلت بالسيد اقسم بالله اذا ابن عمه يعرف بكلام زوجته راح يتبرأ منه ليوم الدين لان حرمو قيس من ابنه وبسببهم اني رجعت للعراق وانسجنت

كعدت عتب طويلة وكلام طال بالاخير سيد رحمن كال لهادي
الذنب لا علينا و لا ع ليلى ع الي كذب وكل شي بهاي الدنيا يتصلح ماكو شي يضل ع حاله

ليلى :- الله كريم عمو اني هم دوم اكله انت عندك بيت جد وابو وحاولت ازرع بي محبتكم علمود يكون مهيئا نفسيا لهيج موقف

سيد رحمن :- تعال يا بطل تعال سيدنا

مغطي راسه بعبايتي وخاتل بحضني طول الكعده
بعدت راسه من حضني رفع عيونه وجهه كل دموع احمر يبجي شهكت مصدومة ومسحت خدوده
ليش تبجي ماما شبيك؟

هادي :- شوكت نرجع للبيت؟

ليلى :- فد شوية نرجع باوع ماما اني مو كتلك انت عندك بابا تريد تشوفه وتشوف جدو؟

هز راسه لا خايف
قيس تقرب بخطواته النه من اول ما عرف هذا ابنه يريد يتقرب ويسحب نفسه وهسة انتهز الفرصة

مد ايدينه فاتحهن وعيونه ع هادي تلمع دموع لهفة فاتح ايدينا متشوق لحضنه مثل شوق حضن البذرة لصدر الكاع

هذا بذره فعلا واليوم سيد قيس يزرع هادي بنص روحه ..

قيس :- يابة .. وليدي .. اني ابوك
همست باذنه :- هذا بابا روحله حبيبي

باوعله بخوف ورجع باوعلي ياخذ قوته من نضراتي نزل ع كيف من القنفة يريد يتقرب اله ، ما حسينا غير قيس وكع ع اركبه يبجي بحرگة وسحبه لحضنه بسرعه
خله راسه برگبته يبجي ويشم بي
ويگول بحسرة :- يا ثمر الوجع يا يابة

ضل يشم بنحره ويحضنه حيل لصدره
ودموعه تنزل ع وجهه بغزارة يباوع النه كلنا ويحجي
قيس :- هذا ابني ، بذر العشگ خضر ..

ما تحملت بجيت وغطيت وجهي
كلهم بجو حتى سيد رحمن ضل يمسح عيونه بعبايته وخانگته العبرة

روح حاضنه روح .. طينه السادة امتزجت
وصارو روح وحدة ..

بعده عن صدره خله ايدينه ع اكتاف هادي يباوعله مبتسم وجهه مبلل
قيس :- گول يابة حبيبي
باوعلي هادي مسحت وجهي وحجيت بصوت مبحوح
هذا بابا حبيبي ..

هادي :- بابا؟

قيس هز راسه ولزم وجه هادي يبوس بي بلهفة
:- اي بابا بعد عمر ابوك ونظر عينه
اي بابا كول بابا خلي اذني تسمع صوتك الحلو وانت تكول بابا

هادي ضل ساكت خجلان وخايف وما مستوعب كل شي
حضنه قيس لصدره وكام شايله اخذه لابو خلاه كباله
قيس :- هذا جدك حبيبي سلم علي

هادي ببراءة مد ايده لزم ايد جده باسها مثل ما متعلم من ابو محمود يبوس ايد كبير السن
سيد رحمن صارت دموعه تنزل ع خدوده بدون توقف وايده ترجف

رفعه قيس ساعده خلاه بحضن ابو حضنه جده باس راسه ولزم ايد هادي يبوس بيها
ويكله كول جدو .. ومنتظر الحجاية تطلع من حلگه كأنه اول حفيد الهم

ارتاح كلبي من شفتهم هيج عرفت حجي هادي والشيهانة صحيح
كالو اهله ما راح يكرهونه وراح يحبونه ويرحبون بي لانهم يخافون الله حسيت نقذت ابني من حياة صعبة طويلة و وحدة
هسة راح يواجه الحياة وهو عنده ظهر قوي ..وعنده اهل يساندونه ويرفعونه يحزنون لحزنه ويفرحون لفرحته

العلوية حضنته وبوسته وهو سبحان الله اكثر وحدة ارتاح الها وضحك الها وبسرعة كللها بيبي وكانه يعرفها من قبل وحاجي وياها ..

سيد عبد الرحمن :- علوية اخذي ليلى وهادي جوة يم العلويات وحضرن العشا
هادي :- لا والله ما نكدر نضل اكثر من هيج الوضع صعب وخطر لازم نرجع نجيكم بوكت ثاني
سيد عبد الرحمن :- دام رجعتكم صعبة تضلون يمنه هاي هيه واحنه ترة ورانه حجي طووويل السالفة هسة بدت ما انتهت

هادي :- سيد هيه مال هسة بدت صدك هسة بدت
بس كعدة ورا كعدة تنحل
وهم الحياة حياة ليلى وقيس والطفل ابنهم هم يقررون الجاي احنه العلينا نشوف قرارهم اذا بي مضرة لهذا الطفل نتدخل وننصحهم بما يرضي الله

سيد عبد الرحمن :- صحيح كلامك وليدي والله يا هادي وانت تشهد اني حتى ع طلاكهم ما جنت قابل وخابرت ابوك وحجيت ويا هواي بس همه الاثنين عاندو والا طلاگ

هادي :- الفات مات سيد الجاي هو الاهم

سكتو ثنينهم ، گالت العلوية امشي جوة كلت الها
الله يخليج لا تخليني بموقف محرج اني ما اكدر اتواجه ويا زوجته لسيد قيس مسكينة تروح تنقهر لو تشوف جيتي هاي خطر ع حياتها الزوجية وتروح تنقهر العلوية

سميرة :- شلون حجي هذا؟ احنه هسة بتحدي صعب وكبال سالفة جبيرة نحتاج القوة من كل الاطراف حتى نكدر نحلها
ليلى :- لا ما نحتاج كل هذا بس شوفولي موضوع طلاكنا واذا باطل مثل ما عرفت نتطلك هسة وكل شي ينتهي وبالنسبة لهادي ابني وابنكم بنفس الوكت واني ما احرمكم منه

باوعتلي بنظرات قهر ماتكدر تكول شي لان صرنا بموقف صعب واحنه كبال اكثر من قرار وكل قرار بي كسرة لطرف من اطراف هاي القضية ..

التفتت باوعت لقيس جان يباوعلي بنظرات غريبة لميت روحي وحجيت ويا هادي
يلا هادي هم ياله نوصل ان شاءالله نجي غير وكت

هادي :- يالله نرفع الزحمة

كام هادي والسيد اعترض بس اني اصريت نطلع لان المواجهة صعبة ودخلتي لبيتهم يعني اشوف فاطمة وتشوفني وهذا الموقف يمكن اصعب من موقف لقائي ويا قيس

همه هم فهمو وخلونا بالاخير نمشي مديت ايدي لهادي ركض لزمها وطلعنا وصلونه للباب قيس نصة لزم هادي من ايده الثانية وسحبه باسه وكاله
تعال يمي باجر لو اني اجي اخذك

سيد رحمن :- اي نروح نجيبة لازم نتعرف ع البطل ويتعرف ع اخوته واولاد عمامه
هادي :- اذا تقبل ماما اجي

باوعلي قيس باوعتله وحجيت :- عادي مو مشكلة بس اول شي نكمل الجنسية ونصفي امورنا

هز راسه اي فتحت باب الصدر وصعدت لميت عبايتي زين التفتت باوعت لقيس يباوع صافن
وعيونه حمر نار .. حس شوية بناري من شفتها واكفة يمك

مديت ايدي صحت هادي ماما
فلت ايده من قيس وركض صعدته بحضني خليته مديت ايدي اريد اسد الباب سبقني قيس لزمه ونصه رفع طرف عبايتي دخلها للسيارة حسيت كلبي انتفض
رفع عينه باوعلي نظرة خاطفة وهو يسد الباب گال
:- خلي بالج ع هادي

ليلى :- ما احتاج توصيني انت مو احرص مني ع ابني

سد الباب والتفت وكلهم يباوعون كانما فلم سينمائي وينتظرون اللقطة الجاية ، حجة هادي وياهم وعرفت ديكللهم اني ماعايشة بنفس البيت الي تزوجت بي ومستأجرة وبدأ ينطيهم العنوان بالضبط ..

وبعدها صعد باوعت بالمراية سيد قيس واكف مخلي ايدينه ع ورا ظهره ويباوع ع السيارة مثبت نظره علينا ..

......

فاطمة ..

جية ليلى كانت اشبه بالعاصفة بالنسبة الي دخلت لحياتي خربطت صفو حياتي واستقرارها وطلعت ..

ما كنت مرتاحة لجيتها واحس وراها شي كبير ، مديت راسي اباوع من الباب شفت يمها طفل اشگر باوعتله ملامحه مألوفه وكأني شايفة هذا الوجه من قبل

عقدت حاجبي خليت ايدي ع خدي خايفة ما انكر اجتلي افكار غريبة مثل ان يكون هذا الطفل ابنها من قيس وكانت خافيته عن قيس وهسة قررت تنتهز الفرصة وتجي بحجة هذا الطفل ترجع لقيس وتصير ضرة الي ..

ضليت الوب طلعت حنان تحجي علي
:- معظمة الموضوع تلكين بيت عمها عدهم شغلة ببغداد وجايين يسألون لو يطلبون مساعدة السيد

فاطمة :- لا حنان اني گلبي ما مرتاح

حنان :- ضلي بهذا خبالچ فاطمة وملحتج وشكج وغيرتج هسة يبزع ويطير منج السيد ترة الزلم مايحبون المرة التلح زايد وتنگ

فاطمة :- والله لو تدرين بنار كلبي يا حنان ما حچيتي هيچ؟ النوب جايبة وياها طفل

حنان :- يجوز قريبها لو متزوجة ومخلفته

فاطمة :- عمره مال ابنها هي وقيس

هزت ايدها ع افكاري ما قابلة وراحت للمطبخ ويا وفاء تحضر العشا
لحكتهن اشاركهن ومنها افضفض واحجي مخاوفي
وعيني معلكة ع الباب انتظر احد يجي حتى اسأله واشوف شنو ديحجون جوة

مر الوكت وطلعو ضليت واكفة بالباب اباوعلهم رجعو للبيت دخلو من باب الاستقبال
شلت الحسن خليته يم كريمة تلعبه ومشيت للاستقبال دكيت الباب وفتت

شافوني وسكتو بس نظراتهم ثبتت علي وكأن الجايه بي ليلى يأثر بيه ويخصني مثل مايخصها

حجيت بهدوء مصطنع اخفي بي نار غيرتي
:- سمعت ليلى اجت شعجب طليقة قيس بعدها تزوركم

سميرة :- عدها شغلة يم خالج حبيبتي
فاطمة :- الشغلة يم خالي لو يم سيد قيس؟

قيس :- فاطمة السالفة طويلة نحجي بيها بعدين
اختنگت بعبرتي حسيت حرورة صارت بحنجرتي ماكدرت انطق بس عيوني دمعن
فاطمة :- الموضوع يخصك مو؟

عبد الرحمن :- تعالي علوية كعدي اسولف وياچ واحچيلج الموضوع بكل تفاصيله

مشيت بهدوء كعدت يمه اغطي ايدي بردن الدشداشة خجلانة لان دخلت عليهم بهذا الشكل وحجيت بنبرة موحلوة

حط ايده ع راسي من ورا الحجاب مسح علي وكال
:- علوية انتي مؤمنه ان الله سبحانه وتعالى كاتب النه امور هواي يمكن احنه ما راغبينها او ما متوقعينها بس فجأة نلگى نفسنا مجبورين عليها ولازم نقتنع ونحمد الله ع هذا الشي وان كان ضار النه مثل ما احنه نعتقد
لان حاشاه ربي ما يضر عبده المؤمن

هزيت راسي اي واذاني تهيأت لسماع خبر صادم
لان عيونهم تحجي هواي وتوترهم انتقل بشكل تلقائي الي

بدأ يحجيلي كل سالفة ليلى من هروبها لايران لحملها وبعدها روحتها لاقاربنا وكذبهم عليها واخفاء موضوع حمل ليلى لكيت نفسي ابجي بحرگة گلب ع روحي وحظي ما صدكت تزوجت شخص الحبيته من طفولتي حب طاهر وانتظرت اكبر واكون حلاله
ورغم كل الصعاب صرت اله وبديت الاوي الدنيا واصارعها حتى انسي ليلى وحب ليلى
فجأة تجي تدخل ليلى جايبة طفلها من قيس وترجع لحياتنا من اوسع الابواب ..

:- لا تبجين خالو تنحل هيه البنية هم ما رايده الرجعة

خالتي شهگت :- والطفل شلون يضل متشتت سيد؟

باوعلها بتفكير وهز راسه بحيره
:- والله ماادري ام مصطفى ماادري المشكلة احنه ضحايا مرة جذابة وكل الوصلنا اله بسببها
لو ما خافية حقيقة حمل ليلى ماصار كل هذا واعتقد وقت روحتها الهم نفسه وقت زواج فاطمة وقيس
جان لغينا الزواج

عصرت ايدي حيل ما قابلة عن حجي خالي
يعني جاي يكول لو ندري بليلى حامل مانقدم فاطمة كأداة صلح بينا وبين قيس

سميرة :- هوا نصيب ونصيبهم هيچ
مصطفى :- قيس انتَ تگدر تفتح بيتين؟

باوعتله مصدومة ونشغت :- شنو يفتح بيتين؟ اني وجووودي هنا شنووو حتى تسأله هيج سؤال بسهولة عبالك الموضوع يخصه هو وبس

مد ايده قيس لزم ايدي حيل وكال من بين اسنانه بغضب
:- صوووتج!

سديت حلكي معصبة وباوعت لخالي يباوعلي بحيره
جريت ايدي من جوة ايد قيس متعورة وحجيت
:- والله اذا يرجعها يطلگني لو اني لو ليلى

سميرة بتفهم :- بس يا ماما مثل ما انتي ام اطفاله هي هم ابن وليده وصعبة المرة تربي طفل وحدها لازم ابو يكون فوك راسه

فاطمة :- خل تعوفه اني اربي احسبه حاله حال جهالي

قيس ضحك باستهزاء :- مقدمة اله تضحيات زلم ماتقدمها وملاوية الموت علموده تجين حضرتج بكل بساطة تكولين خل تعوفه؟

سيد عبد الرحمن :- ماكو هيج منطق فاطمة البنية تعبانة ومتأذية علمود هذا الولد ما تعوفه لاي سبب كان
فاطمة :- اي هاي هيه قيس خل يعوفه عنده غيره بنية و ولد كافي

:- هاي هيه خالو تدللين ومثل ما تحبين محلولة ان شاءالله هو ولد مو بنية يعيش

فاطمة :- والله يعيش واذا تريد تتزوج وتعوفه جيبو الي

قيس غمض عينه بقلة صبر باوعتله والغضب يفور بداخلي
كتله واني الزم ايده بقوة
:- فتح عيونك لا تفكر ترجعها والله اذا ترجعها تطلكني لو تدوس كبري بالاول

استغفر من بين اسنانة دفع ايدي
خزرني بغضب :- تخبلتي شبيج تصرفاتج صارت مو طبيعية تحكمي بنفسج شوية

فاطمة :- اني طبيعية انت الموطبيعي شو تحجي عادي وتكول شلون تتنازل عن ابنها وبنفس الوكت عندك رغبة تربي هذا الطفل
قصدك صار واضح تريد ترجعها
رجعها بس بالاول طلگني وروح الها خليها يومية تنزل مصيبة ع راسك امس احزاب باجر ارهاب

كمت بغضب هو عصب لحكني من طلعت جرني من زندي حيل توجعت كلت اخ بعد ايده عني بسرعة
عيوني تجري وانبلع صوتي من القهر
قيس :- صعدي جاي وراج

فاطمة :- اي حتى تموتني انت هنا كدامهم هيج تتصرف من نصعد شنو تسوي

عض اصبعه بغضب وكال
:- ياااا ربي الصبر فاطمة صعدي نتفاهم الموضوع مو مثل ما متوقعة ولا مثل ما متخيلة

درت وجهي مشيت للمغسلة ابجي واغسل وجهي اجة وراي يمشي مقهور ويعاتبني
:- عيب تحكمي بتصرفاتج هسة يكولون فاطمة مو محترمة ويحجون عليج والله ليلى دخلت لهذا البيت وطلعت وهي صوتها ما معليته لا بوجهي ولا بوجه احد بحيث من طلعت منا خلتهم كلهم يحبونها

فاطمة :- اذا هيج حابينها ليش خطبوني الك؟ انت تضحك ع نفسك ويمكن موهوم بسبب نظرتك الها
عجيب امرك تشوف هاي البنية مثالية ثمن سنين صارلك من عرفتها راح يصيرن تسعة لليوم ماكدرت تشوف وجهة الحقيقي!!!

ماكدرت تشوف ورا هذا الوجه البريء بنيه لعيبة وصاحبة مشاكل؟

سكت يباوعلي بتفكير
:- انت مو بجيت بحضني دم منها؟ مو كلت خدعتني حتى باحلامك تبجي وتصيح خدعتني
مع هذا بعدك تشوفها مثالية شلون ما ادري يمكن حتى جذبها وخداعها تشوفه مميزات وصفات حميدة

قيس :- لا تدخلينا بموضوع طويل اني وضحتلج ليلى شلون كسبت محبتهم
وجاي احذرج حتى ما تنزلين من عيونهم
هذا ما يعنيلج شي؟ ما يوضحلج اني متمسك بيج وبهذا الزواج

فاطمة :- وليلى وابنها
قيس :- ليلى وابنا اني وياها فاطمة

فاطمة :- اي ليلى وابنكم؟ شلون من كلامكم جوة مبين تردون الطفل يعيش بنصكم وبنفس الوكت تكولون ليلى ما تتنازل عنه
هذا يثبت شي واحد تردونها ترجع

غمض عينه بقلة صبر مسح ع وجهه
فتح المغسلة غسل وباوعلي محتار
:- فاطمة اني لهسة ما مقرر شي ولا مفكر الله يعلم بالجاي خليني اخذ راحتي بالتفكير

فاطمة :- فكر بس خلي يكون بعلمك لو اني لو هيه بحياتك ما نرهم ثنيناتنا

رد بجزع :- البنية اصلا ماتريد ترجع
فاطمة :- زين هسة من شفتها حجيتو
هز راسه اي ..

فاطمة :- اي شنو حچيتو بالضبط اني اريد اعرف
سكت منصي راسه وحواجبه معقودة بآلم
بچيت وخليت ايديني ع راسي بضعف
:- سألتك كلتلك شلون حياتك ؟ تزوجت؟ كلتلك تحب فاطمة لو لا؟

قيس :- لا تقهرين روحج بهذا التفكير وبعدين ما كعدنا وحدنا حتى تسألني هيج اسأله
هزيت راسي لا وعيوني تجري :- اكيد سألتك عني زين من شفتها انته هم حجيت وياها وجهت الها اسأله شنو گلتلها احجي راح يوگف گلبي
شنو سولفتو

رفع اكتافه جر نفس وهز راسه لا وهو يبعد نظره عني رد
:- ما حجينه شي علوية
دفعت المزهرية بغضب وطاحت وياها سراحية الماي المحطوطة ع الميز تفلشت
باوعلي بغضب وعيونه حمر كال بعصبية وهو يبعدني عن الكزاز
قيس :- لشوكت تضلين بهذا جنونج مصختيها فاطمة طلعت من ماعوونها جم دوب اضل ساكت واعبرلج علمود ما تنجرحين

دفعته حيل من صدره ، وكتله بغضب واني ارجع ليورا
:- انتَ ما صدكت تشوووفها حتى تبينلي ان حياتي وياك موحلوة ومليت مني
تدور حجج وهسة اجتلك للحلگ جايبة طفل منك وجاية طبعا راح تچلب بيها ماتصدگ

نتر :- صعددددي

فاطمة :- لا تعلي صوتك بوجهي قيس
قيس :- فاطمة لا تخليني اتهور واحجي حجي اندم علي لو اسوي افعال اندم عليها بعدين

فاطمة :- شنو الافعال تطلگني ماكو غيرها

قيس :- لا حول ولا قوة الا بالله .. فاطمة صعدي

غمضت عيني بقلة صبر مسحت وجهي من الدموع هو شافني بهذا الضعف خله ايده ع كتفي
وحجة بهدوء
:- خلينا كم يوم نفكر ونقرر هسة خليج هادئة ولا تتصرفين تصرفات تجبرنا ع شي نندم علي بعدين

هزيت راسي اي باوعت للكاع كلها كزاز دنكت المه راح يجيب السطلة
سكتت بس كلبي من جوة يفور يمكن اطلع بالملامة بس بالحقيقة اي زوجة مكاني راح تكون هيج ردة فعلها ويمكن اكبر

سمعنه صوت دك الباب بشكل قوي خليت من ايدي الكزاز ومشيت وقيس ركض قبلي

بس فتحنا باب الصالة اجت بالباب علاكة سودة انشمرت من ورا السياج
طلعت دنيه تركض ع صوت دك الباب القوي مفزوعة وكأن كلبها حس اكو شي يخص سيد مؤمن

دنك قيس جر العلاكة وفتحها بسرعة طلع منها عباية سيد مؤمن حمرة من كثر الدم .. غطيت حلگي باوعت لدنيه عيونها انفتحت من الصدمة
ضلت تفرفح مثل الطير المذبوح ركضت سكينة تلزمها وخالتي انغمى عليها وانخبصنا
دنيا تعيط مفرفحة :- كتلووو لان نظيف
كتلوو حبيبي خذو نبض گلبي عدمو سعادتي
وما حسينه غير توكع بالكاع منهارة تبجي
ركض عليها هاشم مالحك يوصل مدت ايدها ع الكزاز اخذت كزازة جبيرة خلتها ع ركبتها حتى تذبح روحها ............للحكاية بقية

رأيكم بالقصة يهمني 🖤..

ان شاءالله رجعنا ع نظام التنزيل بين يوم ويوم عذروني ع القصور البدر مني بالبارتات السابقة

شكرا ع تفاعلكم بالبارت السابق كلش فاد القصة ويسوي واهس استمرو بنفس المستوى 😁 عاشت ايديكم