رواية حمائم تخشى الطيران الفصل السابع وثلاثون 37 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو البارت الف تصويت والف تعليق لطفاااااا🖤🖤🖤🖤🖤🖤🖤

...دخلنا بحالة فزع وخوف
واكفين گبال باب المطبخ ونشوف اباذر مخلي ايدينه ع رأسه مقهور ومحتار
وخالي ابو مؤمن يفتر ع روحه مثل الاسد الجريح

دنيه وكعت من طولها من سمعت الخبر

دخل ابن مصطفى للمطبخ التمن علي العلويات يسألنه

كللهن بصوت يرجف
:- بعد ما كمل اذان المغرب والصلاة والناس رجعت لبيوتها طلع هوا حتى يرجع
وطابگة علي سيارة بدون ارقام نازلين منها مسلحين جارينه للسيارة بلمح البصر

ام قيس شهگت ولطمت صدرها :- اسم الله الزهرة

رد :- اكو ناس بالشارع شايفين الخطف

فاطمة :- عزة هاي لهنا واصل الوضع يخطفون بشر كدام العالم

ام مؤمن تبجي وتندب حظها غطت وجهه بالفوطة
:- يا اللهي احفظلي وليدي ورجعه سالم والله ماعندي حظ ولا هو عنده حظ حتى ظنى ماصار عنده ويسدون مكانه لو يشيلون اسمه

نرجس :- دگولي يالله ادعيله يرجع سالم لا تفاولين بالشر

سميرة :- الخطفوه اكيد عدهم غاية ويردون فدية لو مقابل والسادة مستعدين يدفعون دمهم حتى يرجعونه

ام مؤمن :- يا اللهي نذر عليه اذبح سبع ذبايح لوجهك الكريم واطبخهن واوزعهن للمحتاجين
بس كونك ترده الي سالم غانم

سميرة :- ان شاءالله داده

اباوع لوجوهم الخوف مسيطر عليها وكلهن صفر يرجفن
مشيت داخل دنيه متمددة تبجي وترجف من القهر والخوف والصدمة ، شافتني اجيت من المطبخ رفعت راسها عيونها حمر يجرن وشفايفها ترجف كالت بصوت مبحوح
هااا؟

فاطمة :- ينتظرون اتصال من الخاطفين لو خبر

دنيا :- عود صدگ يحجووون صدك مابلغووووووو الشرطة ليشششششش وين عبايتي والله اني اروح ابلغ

دخلت من وراي حنان تحجي بحركة
:- صوتچ لا تتخبلين
اكيد بلغو وطلعو الشرطة واكو شهود انطو مواصفات السيارة الخطفته الهم
والشرطة جاي يسألون اذا عنده اعداء لو مشاكل
او مهددينه من قبل

دنيا :- ماعنده ماعنده زلمة فقير يروح بطريقه ويرجع بطريقه

تبجي وتضرب وجها مقهورة حنان لزمت ايديها وحضنتها لصدرها تصبر بيها

حنان :- يرجع ان شاءالله يمكن يردون فلوس مقابل يرجعونه وهاي سهلة

ردت وهي تبجي بحرگة :- جاي يكتلون بالعالم هواي خطفو وكتلو خاااااف يكتلوونه
عمت عيونهم ان شاءالله هذا امام جامع ورجل تقي مؤمن حوبته عند الله چبيرة

سميرة :- يردون يسكتون كل واحد يحجي الحك ويخوفون كل واحد صوته عالي بوجه الباطل مثل سيد مؤمن

نرجس :- بهذا وضعنا الواحد لازم ينصي صوته
ديگطعون كل صوت ما يعجبهم بالرصاص
حنان :- الله اكبر امام جامع يخلص صلاة الجماعة ويطلع لبيته ما يرجع!؟ وين وصلت بينه الدنيا وييين

حجيت بصوت ناصي خايفة يم وفاء
:- ليش هيج الوضع صاير والله خفت لو ادري ما راجعة وضاله بأيران ويا عائلتي
وفاء باوعتلي مقهورة وجرت حسرة
:- تصفيات طائفية كل يوم مخطوف رجل دين يكولون اكو منظمات ارهابية جاي تشعل نار الفتنة بين الطائفتين بهاي الافعال

فاطمة :- النوب؟
وفاء :- والله ليش انتي وين عايشة ما سمعتي بهاي السوالف؟ جيرانه قبل شهرين تركو العراق وطلعو لان اجاهم تهديد وبعد وبعد
غير الانفجارات الدتصير تخوف

باوعتلها بخوف ودرت وجهي اباوع للعلويات كلهن خايفات ويبجن بحرگة ع مؤمن
الحزن خيم على السادة انخطف صوت الحق مثل مايكولون عنه انخطف امام الجامع المؤمن الكل الناس تحبه وتحضر محاضراته وتستمع اله بانصات

سيد مؤمن كان قدوة لكثير من الشباب بالمنطقة بالفترة الاخيرة لانه سيد شاب وتفكيره مو معقد ولا متعصب ودائما يلجئون اله الشباب مو لغيره
بسبب تقارب الافكار وتسهيله لامور الدين ..

اكثر وحدة قاهرتني دنيا جانت تريد تموت من كثر البجي تشهگ ودموعها تجري ساعات لدرجة حسيت روحها راح تطلع من جسدها
انگلب وجها اصفر وشفايفها بيض متجردة من الحياة
وعيونها تورمت وصارت اجفانها حمر تتخللها خطوط زرگ

خالي عبد الرحمن طلب من الكل يرجعون لبيوتهم ويضلون كاعدين بالبيت مايطلعون ويحذرون حتى من دگة الباب حتى بناته خلاهن يرجعن لبيوتهن باستثناء دنيا الجانت طايحة حتى ماتكدر تكوم وتتحرك

دخل هو والولد بنص الليل للبيت كامت دنيا من شافته فات مثل الطير المجروح ركضت علي حضنها ولمها جوة عبايته يمسح ع راسها وهي منهارة بحضنه تبچي بحرگة گلب وتشكيله وجع روحها بصوت مكسورة
دنيا :- يااابة اخذو روحي من اخذووو يااااابة راح اموووت
سيد رحمن :- والله لو يطلبون روحي ثمن رجعته انطيها الهم وارجعه الچ دنيه يابة

ضربت وجها بحركة لزم ايديها اخوها مرتضى واخذها حضنها
سيد عبد الرحمن :- تضربين روحچ يابة اني ما ربيتچ هيچ اريدچ قوية وتقبلين بالمكتوب شگد ما كان مر لا خير بمسلم يعترض ع امر رب العالمين ويموت نفسه بنفسه

مصطفى :- دنية اخيتي الغالية خليچ سباعية احنه وياج اربع حياطين وسگف منين ما تميلين ارتجي علينا .. لا توكعين دنيه

اصواتهم مخنوگة كعدوها بالصالة راسها بحضن مرتضى وخالي من الجهة الثانية كاعد ومصطفى گاعد يم خالي وقيس كدامها جاثي ع اركبة ولازم ايديها يحجي وياها بهدوء يصبرها
باوعتله بعيون تدمع
وكالتله مقهورة
دنيا :- خافو منه لان نظيف .. يخافون من النظيف ف يخطفونه لو يقتلونه حتى ينتهي خوفهم

هز راسه مقهور وباس ايدها خلاها بين ايدينه وضل يمسح عليها بحنيه
قيس :- لا ما يكتلونه هسة يطلبون فدية ندفعها ونرجعه لو نعرف نبيع الهدوم العلينا نبيعهن ونرجعة بس خلي ثقتچ برب العالمين ..
ماخاب من تمسك بحبل الثقة الممدود من رب العباد النه

هزت راسها وهي تبچي مسح دموعها وجرها من حضن مرتضى باس راسها
هاشم واكف بنص الصالة كل شوية يضل يلوب يمشي ويوگف كأن جوا جمر كامت سكينة شايلة ع كتفها بنتها الثانية الاصغر من كريمة (خديجة)

تقربت منه وكالتله بصوت ناصي وعيونها تلمع بالدمع
:- سيد وجهك اصفر تعال اكعد ارتاح خليني اعصرلك برتقال اشرب

هز راسه لا شفايفه يابسة كللها وهو يغمض عيونه متأذية
:- الماي بحلگي مر ما اجرعه يا سكينة
انطيني خديجة وصعدي كريمة نوميها شوفيها عيونها حمر ودتغفى وهي كاعدة

هزت راسها ما مقتنعة اخذت كريمة من ايدها صعدتها تنومها

الليلة كانت صعبة كوة كدرنا نقنع دنيا تدخل للغرفة ترتاح وعمتي يمها
البنات والولد كل واحد صعد الغرفته حتى ينام يرتاح بس جذب الكلوب صوت وجعها عالي لدرجة اخترق جدران الغرف
وما خلانه نغفى
صوت الوجع صاخب كسر حاجز الاذان وصار يدري بنص الراس

التفتت شفت قيس مخلي ايده ع عيونه وصدره يصعد وينزل بسرعة
عرفته ما نايم شمرت الغطة وكمت جريت دشداشتي لبستها وسحبت الربطة خليتها ع راسي

فتحت باب الغرفة ع كيفي وطلعت عيني صارت ع غرفة قيس و ليلى القديمة اختنگت اخذتني رجليني بدون شعور خليت ايدي ع عروة الباب ونزلتها بهدوء
وانفاسي تتسابق ويا دگات كلبي العالية
ما انفتح مقفول ..

شلت ايدي غمضت عيني بتعب الغيرة شعورها سيء وقاتل ، ما كنت متوقعة توصل بالانسان يغار من غرفة قديمة متروكه .. بس لان بيها ذكريات جمعت حبيبه .. ويا حبيبه

نزلت اجر بخطواتي وعيوني تتفحص البيت من جديد
دخلت للمطبخ لكيت الباب الخارجي مفتوح مديت راسي شفت دنيا كاعدة بالحديقة بالكاع لامه رجلينها لصدرها ومخليه راسها ع اركبها

ردت اطلع فززني صوت من وراي التفتت خايفة وايدي ع صدري
قيس :- علوية؟ شعندچ مانايمة يابة صعدي نامي انتي تعبانة من الطريق الطويل

ميلت راسي ورمشت بعيوني
رفع حاجبه وخله ايده ع كتفي يمسح من كتفي الزندي ويحجي باهتمام
قيس :- شنو يوجعج شي؟ راسچ يأذيچ

هزيت راسي اي وكتله بتعب
:- راح ينفجر راسي
قيس :- اشوفلج علاج من صيدلية البيت كعدي ارتاحي

هزيت راسي كعدت راح يمشي ويحجي
ان شاءالله ما يطلعون مغيرين مكانها

فتحها وطلع منها ادوية جابلي حباية خلاها بايدي وصبلي كلاص ماي
اخذتها منه اصابعي ترجف لاحظ رجفتي جر الكرسي وكعد كبالي
بلعت الحباية ونزلت الكلاص مد ايده اخذه من ايدي ولزم ايديني بحنية

رفع عينه خلاها بعيني وكأنه فاهمني وفاهم كل تفكيري
گال بنبرة هادئة يريحني بيها ..

قيس :- فطومة انتي زوجتي وام اطفالي الموجوديين والمستقبليين هم
ضحكت وهزيت راسي لالالا
:-كافييي سيد

قيس :- لا مو بكيفچ علوية اني اريد عائلة جبيرة
سكتت مبتسمة ميلت راسي شال كفه خلاه جوة خدي مبتسم
قيس :- الفات مات فطومة واني اليوم زوجچ وانتي زوجتي والعلاقة بيناتنا مبنية ع اساس قوي وهو الصدق والاحترام والتقدير والتفاهم لا تتوقعين خب قديم انتهى يخرب علينا صفو علاقتنا لو ينهيها

فاطمة :- ليش تحجي هيج هية راجعة للعراق؟

قيس :- اي راجعة سمعت من السادة جاية ماخذة مفتاح البيت حتى تعيش بي
سكتت مبهوته نصيت عيني ودكات كلبي زادت مسح بأبهامه ع خدي غمضت عيني نزلت دمعتي حارة
مسحها بأبهامه وكال بحنية

قيس :- علوية ليش تبچين
فاطمة :- خاف گلبك بعده يحن الها وترجعها ع ذمتك

ضحك رد بنبرة بيها غصة ما خطأت بيها غصة بس يمثل اللامبالاة
قيس :- البنية متزوجة غير رجال فطومة مثل ما اني كملت حياتي هي كملتها

رفعت راسي متفاجئة :- وانتَ شمدريك
قيس :- قبل لا تجيبين الحسن رحت لبيت عمي وسمعت هيج شي جانوا يسولفون وكالو البنية متزوجة

رفع كتفه بمعنى ما مهتم وكال :- ما ادري مجرد سامعين لو صدك ما اهتميت للموضوع واستفسرت اكثر

رديت بغصة :- بس لونك يسولف هواي قيس

قيس :- متوهمة فطومة كومي نامي يلا اني راح اسويلي جاي وانام وراج

مسحت وجهي وكمت
:- اني اسويلك
:- لا روحي ارتاحي مالج دخل بيه

التفتت كتله :- براحتك ترة دنيه بالحديقة كاعدة

عقد حاجبة متألم وفرك جبينه
:- هسة اشوفها ..

عفته وراي بالمطبخ محتار وحاير وعيونه تلمع
يباوع للحديقة لدنيا

دنيا ..

رفعت راسي من سمعت صوت خطوات قريبة شفت قيس يمشي بأتجاهي مسحت وجهي من الدموع
حط ايده ع الكاع حتى يكعد بصفي وعيونه تباوعلي بقهر

ما حجة شي ولا اني حجيت ..

السكوت جان سيد الموقف ارفع عيوني للسماء المتحجبة بالسواد ومزينه بالنجوم
اشوف عظمة ربي الخالق المنان
اكول العظيم الكدر يخلق كل هذا الكون بهاي الهيبة والعظمة يكدر يطلع مؤمن من ايد الخاطفينه سالم

كسر الصمت قيس وگال
:- ربي الكتب السيدنا يونس الحياة بعد ما ابتلعه الحوت وطلعه وكتبله عمر جديد قادر يرجع مؤمن ويطلعه من الظلمة الهوا بيها هسة بس استمري بالدعاء

هزيت راسي وباوعتله :- نفس تفكيري بس انت حجيت بلسانك اني بگلبي اكول ربي العظيم الخالق كل هذا الكون ماتصعب علي يرجعلي مؤمن

قيس :- ان شاءالله يرجع

سكتنا ثنينا فترة بعدها سالت دمعتي ع خدي مسحتها بجف ايدي وكتله بتساؤول
دنيا :- شلون تحملت الفراگ؟ البشر شلون يگدر يكمل حياته طبيعي ورا ما يفقد شخص جان مشاركه روحه وقريب علي ويأثر بحياته لدرجة البعد عنه يعتبر جحيم !

تحسر وسكت ما رد
دنيا :- خذو روحي مني قيس خذو نبض گلبي اذا ما رجعلي مؤمن اموت .. اموت قيس تطلع روحي
خايفة يرجعلي جسد بلا روح .. وخايفة ما يرجع نهائيا

قيس :- يرجع

باوعتله يحجي مخنوگ
دنيا :- تذكر من گال النة ابونا الحب مرض خبيث جذوره قوية بس مؤذية وخبيثة وصعب اقتلاعه من الروح يضل ويانه ملازمنا طول العمر
طلع كلامه صحيح!! من نحب شخص الحب هذا يتحول لعنة تأذينا دائما ويصير هذا الحب نقطة ضعفنا المانگدر نغيرها ولا نستقوي عليها

حياتي كلها ربطتها بمؤمن احبه حب ما اكدر اوصفه الك
بس احس روحي بروحه اليأذي يأذيني اضعاف وبعده يهلكني اليوم الماشوفه بي ناقص وموحلو واتمرض وانهلك هلاك

صار هذا الحب والتعلق نقطة ضعفي ، انت متخيل اذا مارجعلي مؤمن شنو ممكن يصير بيه؟

قيس :- ماا اريد اتخيل عندي ثقة راح يرجع

هزيت راسي ، سكت فترة وگال ..

قيس :- الحب سرطان الگلب دنيه ..
جر حسرة طلعت من نص گلبه ورفع ايده فرك صدره حيل ونزلها متأذي ، حواجبه معقودة بألم ووجهه مطعون ..گال كلمات اذتني و وجعت گلبي مثل ما وجعت گلبه وطلعت ..

قيس :- انا لـ ليلى نذرت العمر والفؤاد
ويلومني الوغد ان بكيت على الرماد
و يسألني ان كان هذا ما اعبد او ما ورثته عن الاجداد
لا يعلم هذا رماد قلبي المحترق بنار من هم بعاد

اني روحي تعلعلت بفراگها دنيه ما نسيتها ولا لحظة ، والفراگ خلاني مثل المجنون
رجل دين قوي وصلب ومؤمن گلبي صار ثابت وما يميل ، بس يم ذكراها رهيف ..

دنيا :- تدري بيها رجعت للعراق
هز راسه وكال سمعت اليوم من السادة

دنيا :- وتدري بيها جانت مسجونة ؟

رفع راسه متفاجئ وعيونه اتسعت بصدمة
هزيت راسي مقهورة
:- والله احنه سمعنا بس ماصدكنا ومن طلعت بعد السقوط واجت تاخذ مفاتيح البيت كايله لامي راجعة للعراق ومسجونة بسنة الـ2000

باوعلي بصدمة وكأنه بدأ يربط خله ايده ع راسه
قيس :- اني اكول ليش من اسأل عليها ما ينطوني خبر ويطردوني

دنيا :- مادري شنو رجعها للعراق بس هي متهورة الله يسلمها

ضل يباوع محتار رجع باوعلي مقهور وكال
:- قبل فترة قصيرة سمعت بيها متزوجة يعني جذب ع حجيج جانت مسجونة شلون تكون متزوجة وهي بالسجن

دنيا :- ليش اليتزوج ماينسجن
قيس :- لا دنيا انتي فهميني اني سمعت كبل فترة قصيرة يعني الكالت شفت ليلى متزوجة تجذب
لان ع حجيج هسة ليلى جانت مسجونة من الـ 2000

هزيت راسي الي شفت تلخبط افكاره الصار واضح بعيونه وحيرته
باوعلي ورجع سأل بلهفة
:- هي رجعت للبيت العشنا بي قبل

هزيت راسي اي .. اخذت مفتاحة من امي

هز راسه اي وضل يصفن بعيد
دنيا :- سيد انت عندك زوجة وبنية و ولد لا تهجم بيتك وانطيها مجال تنساك وتكمل حياتها لا تروح تزرع روحك كبالها ولا تنطيها امل ولا بنظرة
لا هي ثوبك ولا انت ثوبها كل واحد بيكم من عالم ثاني ورجعتكم اصعب من زواجكم الصار قبل ع اساس غلط وتعبان

تنهد وكال مقهور :- ادري دنيه ادري بس اريد اسأل عليها لو مرة وحدة

دنيا :- بالنسبة الك مرة وسؤال بالنسبة الها امل وراح تضل تننظر سؤالك الثاني .. ونظرتك الثانية
راح تشوف حبها لهسه بعيونك راح تشوف رجفتك عليها واصفرار وجهك گبالها وتتأمل بيك خير ..
وانتَ مو مابيك خير .. انتَ مامكتوبلك خير وياها

گام مقهور من يمي يفور مختنگ .. گال وهو يمد ايده الي
حطيت ايدي بايده وكمت
:- يرجع مؤمن وتقر عينج بشوفته دنيه تعاي نامي ارتاحي وخليها ع الله

هزيت راسي وفتت ويا للبيت رحت للفراش تمددت وجذب النوم ما زار عيني ولا دقيقة
ولساني ما سكت يلهج بالدعاء لحبيب گلبي وروحي وسيد عمري ونبضات كلبي ، مؤمني ..

فاطمة ... غافية وفزيت ع صوت شهگات مكتومة فتحت عيني مغوشات ضليت افركهن اباوع للغرفة بيها ضوة خافت

رفعت راسي شفت قيس ساجد واكتافه تهتز يبچي ..
كمت من مكاني وكفت اباوعله مقهورة
طال سجودة وبكائه ، رفع رأسه ورا فترة وصار وجهه گبالي احمر وعيونه دم ولا كأنه يشوفني ..
غمض عينه بتعب واكتافه نزلت بضعف

ضل مغمض دقايق وبس شفايفه تتحرك تناجي رب العالمين بعدها مسح وجهه بايدينه وفتح عينه شافني تفاجئ

كتله بعتب :- ليش هذا الضعف سيد مؤمن يرجع ان شاءالله لا تهلك نفسك هيچ حرام ما يجوز

باوعلي لحظات وهز رأسه ، رد وهو يلم سجادته بصوت مبحوح
:- فراگه ثگيل هلك روحي وخوفي علي علعلني
احس روحي تلوب علي فطومة واريد اعرف حاله هسة

فاطمة :- ان شاءالله يكون بأحسن حال

توجه للفراش تمدد تمددت يمه ما غفينا بعد وجبت صلاة الفجر ، نزل هو صلى ويا خالي واولاده سوية واني صليت ويا العلوية والبنات

قرينه ما تيسر من القرآن ودعينا لسيد مؤمن بالفرج

وبعدها البنات وكفن بالمطبخ يسون ريوك
ويكعدن الاطفال حتى يتريكون

نزلت خاتون .. مثل ما يسميها ابوها
واجت تمشي لجدها وهي تجر بطانيتها بايدها لان ما تفاركها
حطت راسها بحجرة وكأنه صارت هنا وعاشت يمه
مو امس رجعت

مسد ع راسها وكال :- هلا بـ خاتون السادة

ليلى :- هاا

قيس :- عرفتك تقصدها متعودة ع كلمة خاتون احنة نصيحلها هيج

هز راسه وهو يمسح ع راسها ويحاچيها يلاعبها

ورا الريوك طلعو الولد وصارو يدورون عن سيد مؤمن ويرحون للناس الي يعرفهم يسألون اذا فد شخص مهدده او عنده مشكلة ويا

تعلعت ارواحهم وارواحنا .. صرنا عايشين بقلق ورعب وحتى من دگة الباب نخاف

مر اول يوم والثاني وبعدها صار اسبوع وماكو اي خبر لا اتصلو وطلبو فدية ولا دزولنه خبر عنه

دنيا بهذا الاسبوع انسلت سل حالها حال الميته
وجها اصفر ومابيها روح ومن كثر البجي صوت ماضل عدها بس تهز راسها وتون وتنزل دموعها بصمت ..

ليلى ..

:- استعجل امي استعجل حبيبي راح يوصل خالك صارلك شهر ماشايفة ما اشتاقيت اله

رفع راسه متذمر وبعيونه ثورة بين العصبية والاحترام
لم شفايفه للداخل وگال بهدوء وهو يرفع ايده ويلم اصابعه بمعنى اصبري

هادي :- اني ما اريد اطلع ادوخ بالسيارة اتقيء

ليلى :- حبيبي ما رايحين للنجف بس نزور الامام هنا قريب ويا خالو من يجي

غمض عيونه بقلة صبر وهز رأسه
هادي :- خليني اكتب هذا الدرس وراها وين ما تردين تاخذيني اخذيني

ليلى :- ماما انتَ متأكد عمرك 5 سنين شو احسك 5 سنين قبل الهجرة

الشيهانة ضحكت وغطت حلگها
:- دسكتي عينج حارة لا تحسدينا للطفل والله ذكي وشخصيته رزنه شحلاتها

ليلى :- ما عايش طفولته شيهانة

هادي :- شنو طفولتي؟
ليلى :- يعني تلعب تركض تشخبط ابتليت جبتلك قراءة وبديت اعلمك تقرا وتكتب ما ضليت تسوي اي نشاط ثاني غير القراءة والكتابة!

هز راسه وسد القراءة والدفتر وحط ايده ع خاصرته متضايق
هادي :- انتم ماتلعبون وياي اني ماعندي اخو يلعب وياي جيبيلي اخو

هزيت راسي مقهورة وكتله :- لا عندك اخوان ان شاءالله عن قريب نلتقي بيهم ونضل نشوفهم كل فترة وتلعب وياهم

هادي :- انتي جبتيهم؟
هزيت راسي لا واعجز اجاوبه طفل ذكي يمكن يغلبني بالذكاء ماشاءالله ما اكدر حتى اتناقش ويا

هادي :- شلون اخواني اذا انتي ما جايبتهم؟ هذول اصدقاء مو اخوان

تقربت گعدت يمه ومسحت ع راسه كتله بحنية افهمه
ليلى :- كل واحد بالدنيا عنده ام واب حبيبي
هادي :- اعرف بس اني ماعندي بابا بس انتي

ليلى :- لا عندك بابا قريبا نروحله ونشوفه وهذا بابا متزوج وحدة ثانية وعنده اولاد يصيرون اخوانك

هادي :- ليش متزوج ثانية
ليلى :- تكبر وتفهم امي تكبر وتفهم كل شي بس بابا خوش رجال وزوجته زينه وعندك اخوان

هادي :- وخالو؟

ليلى :- خووش رجال خالو ويحبك كلش يموت عليك
هادي :- اني هم احبه بس هو من يحجي صوته عالي وياج وانتي تبجين دائما
ليلى :- لا اني ما ابجي بسببه ابجي بسبب غير ناس وهو لان يحبني يصيح عليهم واني ابجي

هز راسه وفتح القراءة والدفتر وكعد ع اركبه وسند ايدينا ع الكاع حتى يكتب
رد وهو يلزم القلم :- اني محد يحبني

ليلى :- لا اني احبك وخاله الشيهانة ونسيمة وخالك هادي يحبونك

هز راسه ما مقتنع يكتب باوعت لشيهانة بتعجب وعجز وهي كالبة شفايفها باعجاب
كالت بصوت ناصي
:- ماشاءالله علي ذكاء ومعرفة رغم صغر سنه داري وربي زين والله يطلع عالم هذا الولد شما اشوفه راح يصير شي جبير

هزيت راسي وكمت وكفت وراي بالمطبخ وفتحت الدفتر تحسب وترجع ليورا
شيهانة :- كل الامور ماشية تمام راح افتح معملي باسرع وكت. ممكن

ليلى :- اي عيني سيدة اعمال تصيرين
شيهانة :- مو احسن ماتضل الاملاك والفلوس جامدة لازم ابيع واشتري وافتحلي مشروع
اني من صغري اشوف حب ابوي للسجاد وكان عنده خارج العراق معمل كبير لصناعة السجاد هسة اريد امشي ع خطاه واكمل

ليلى :- عاشت ايدج الله يفتحها بوجهج ويرزقج رزق ماله من نفاذ

هزت راسها فرحانة ورجعت تجيك وتكتب سمعت صوت الرعد ورفعت راسها مخروعة
غمضت عينها وكالت
الصوت هذا يخوفني ويذكرني بوحدتنا والمنه

ليلى :- انتي محد جابرج ع الوحدة

شيهانة :- لا هسة صرت مجبورة ليلى اريد ابني حياتي هنا ماريد ارجع للبصرة حتى بيت عمي اجيبهم يمي وعدتهم بس احصل بيت بمنطقة زينة ويكون بيت يسوة ويليق بمقامهم

سكتت مستغربة كملت كلامها توضحلي
شيهانة :- سمعي كل اهلنا وناسنا بالبصرة لهذا السبب محد جاي ينسى مصيبة عادل وهدير
وهذا الشي يأثر بشكل سلبي ع بيت عمي و ع نفسياتهم هنا احسن اقاربنا هنا قليلين وماالهم دخل باحد وكلهم ملتهين بحياتهم يعني افضل وانسب حل اجيب بيت عمي هنا

ليلى :- الله اكبر تفكيرج يعجبني

جرت عيونها بغرور وكالت :- شعبالج غير بنت البصرة الشيهانة

ليلى :- واطفالج داده؟

رفعت اكتافها بمعنى ما تدري وكالت بحيرة
:- اني حاليا مثل الادور سمجة معينة بنص البحر
جاي ادور ثلاث اطفال مادري وين عايشين بيا دوله
دزيت خبر وصيت عالم وحتى خليتهم ينشرولي وان شاءالله خير

ضحكت متوجعة وكالت :- هو جبران زلمة وراح هنا بالعراق وما لگيته يمكن مكتوبلي اعيش محرومة من كل احبابي

ليلى :- يساعدج الله حبيبتي الله ضاملج عوض جبير بس يمكن مو باحبابج يمكن بمالج
الله يمكن يكتبلج رزق واسع مقابل الاخذه منج

شيهانة :- الله كريم عيني بعين ربي واشوف وين توصل

ليلى :- هادي ع جية تدرين من سالفة العرس لهسة شهر واني مقهورة ومستحية هسة اواجهه

شيهانة :- ع شنو مستحية هو مصدكج ومجذبهن
ليلى :- اكول خاف بگلبه شك اتجاهي

شيهانة :- لا وداعتج ولا اكو شك يعرف سوالفهن ماتشوفينه ما لح عليج بعد حتى ياخذج للنجف لان خايف عليج

ليلى :- يمكن صح كلامج
اكلج فدوة من يجي كعدي يمه سولفي ويا لخاطري اريده يثق بيج ويتعرف عليج

رفعت حاجبها ما قابلة وباوعتلي بنص عين استرسلت بالكلام اشرحلها
ليلى :- هو متخوف منج لان مايعرفج اريده يسمعج ويتطمن من ناحيتج شوفي مو ما يرتاحلج بس يحسج طايشة وشاخطة يكول تخاف توكعج بمشاكل مايدري اني مجلبة بذراعج وما اخطي خطوة وحدة بدون رضاج لان ماكو اطيش واشخط مني هههههه

شيهانة :- بكل شي تسمعيلي الا بسالفة هذا الطفل وبس يجي اكعد يمه واسولف ويا تدللين

لمعت عيونها بوكاحة وسدت الدفتر اخذته وراحت للغرفه مادري شنو تفكر بدلت لبست ثوب طويل مستور ورفعت شعرها ذيل حصان ورجعت للمطبخ حضرت مواعين حتى بس يجي هادي نتغدة ونطلع نزور ..

اندك الباب ركضت اعدل ربطتي وافتحه طل وجهه مبتسم سلم ودخل محمل بالعلاليك ماكلني اكل بالسلام

ويصيح هادي وينك خاااالي ولك هديووووو

طلع هادي يمشي بهدوء مدله ايده للسلام مثل الزلم هادي ضحك ورفعه بسرعه لحضنه باسه وكاله
صاير زلمة ولك ماتشبگ خالك وتبوسه

هادي يضحك خجلان نزله وصاح يالله ودخل للبيت
لكاها بوجهه كاعدة وكفت سلم عليها ردت السلام وكعد هي رجعت كعدت بمكانها رفع طرف حاجبه مستغرب عينه ع هادي وباله ذاك هو واضح وياها لان ضلت كاعدة يمه ومادخلت جوة للغرفة

مشيت للمطبخ احضر الضيافة واسمعها تكله
شلونك خوية شلونها النجف واهلنا بالنجف شلونهم

هادي :- الحمدلله طيبين
انتم شلونكم مرتاحين ان شاءالله

شيهانة :- الحمدلله مرتاحين
هادي :- سمعت من ليلى بالاتصال تشتغلين مبارك عليج الشغل

شيهانة :- الله يبارك بيك مثل ما سمعت صحيح جاي اشتغل بس لهسة مابديت بالايام الجاية ان شاءالله ابدي بس اكمل مكاتبة وهم ع ما توصل الادوات

شيهانة ...باوعلي مستغرب كتله اوضحله
جاي افتح معمل سجاد

رفع حواجبه باعجاب :- ماشاءالله تبارك الرحمن بس انتي جنتي سجينة منين جبتي هذا المال لو ورث

شيهانة: - ليلى حاجيتلك كل قصة حياتي بس ما كايلتلك اني صاحبة خير ومن انسجنت وكفولي ناس خيرة حتى ما يتصدر حلالي

هادي :- ما جابت سيرة المال بس هم كالت بنية من عائلة زينة وتكدر تعيش وتساعدني واساعدها بالعيشة ومن هذا الحجي

شيهانة :- لا اني صاحبة مال يغطي عين الشمس وهسة اجة وكته شو الحياة يمي واكفة ومثل ماتعرف زوجي ماله اثر اطفالي بالدول ضايعين مادري شلون وشوكت اشوفهم
واهلي انطوك اعمارهم ضلو بس بيت عمي كلت اوكف ع رجليني هسة واشوف نجاح مشروعي واشتري بيت بمنطقة راقية واجيبهم يمي يعيشون

هادي :- لا حلو طلعتي نجرة
ام عطوب كال اخر كلمتين بصوت ناصي

اختفت ابتسامتي ورديت بهمس
المتوحش! ليش يغلط

رفع حاجبه يضحك دخلت ليلى بصينية الضيافة ورزلها
:- شو انتي ما تعرفين جايبة ضيافة وجاية تردين تسدين نفسي حتى ما اتغدة

ليلى :- هههههه غير اضيفك
هادي :- لا اني اريد غدة
ليلى :- شغلة نص ساعة ويجهز الغدة

هادي :- مبين خوش اكل شنو طابخة
ليلى :- اني سويت برياني من هذا اليشتهي گلبك وسهير مسوية دولمة بصراوية حالية

عقد حاجبه وكال :- وهاي يهي ع الله شني جبتلجن وحدة ثالثة وانه مادري وحك علي الفحل اكوم افرسجن فرس

ليلى :- شيهانة شبيك اسمها سهير بس ندلعها شيهانة اعصابك

باوعلي مستغرب وكال :- كلساع اكتشف شي جديد بيج

رفعتله حاجبي وحاجيت ليلى واني عيني بعينه
:- روحي كملي الغدة اريد احجي ويا ابن عمج شوية اتعرف علي بعد صار بحسبة ابن عمي لازم ناخذ وننطي ع بعض

باوعتلها نظرة سريعة تباوعلي بقلق وراحت

باوعت وراها وحجيت ويا بصوت ناصي
:- اريد اكلك شي يعني اطلب مساعدتك بشغلتين الاولى تخص ليلى والثانية تخصني الي

كال بنخوة :- تامرين امر بس كون شغلتج بيها خير

شيهانة :- لا بيها كل الخير اني سمعت انت اليوم ضال يمنه خوية اريدك تكعد وياي وندز ع خالة نسيمة ونحط ليلى نحجي وياها لازم نقنعها تروح للسادة وتاخذ الهم هذا الطفل واني عندي حجي طووويل وادري انت راح تكون مؤيد الي لان اني وياك ترباية عشاير ونعرف شكد الاهل والعمام مهمين للولد والبنية وشكد يحتاجهم هادي الصغير

لمعت عيونه بفخر وكال :- والله كبرتي بعيني انتي انه ترة هم حجيت طاحت وذرة من لساني بس هية تاجل خايفة

شيهانة :- لا ماكو خوف بس لازم نسولف وياها نوضحلها شكد مهم هادي يتعرف ع اهله وينسب الهم
سواء هي رجعت لقيس او ما رجعت

هادي :- لا مهم ولا عبالج انه مخليها ترة بس ساكت انتظر شفاطات السجن تروح من راسها وحك علي الفحل مخطط اذا تضل بعنادها اشيله وانه اخذه للسادة واحطه بنصهم واخليها تلطم

شيهانة :- لا لا
كتله بخوف
:- اني اريدك تصيرلها سند وتوكف بوجوهم اذا رادو ياخذونه منها لان ليلى ماعدها غير هذا الولد راح يصيرلها سند

هادي :- شبيج قصدي اخذه الهم اجباري عنها والله وعلي الفحل اليفكر يحرم ليلة من ابنها احرمة جرة النفس

شيهانة :- كفو منك بس هذا الحجي خلي بعدين نحطها ونحجي وياها
اني عندي شغلة ثانية منك واريد تساعدني وشكد تأمر تدلل

هادي :- خير ان شاءالله

شيهانة :- اريد ابني فندق بالنجف والدي الله يرحمه جان يحلم يبني فندق مرتب قريب ع الامام بس ماصارت ما تحققت الله يرحمه
اريدك تساعدني تسألي تشوفلي ارض قريبة وسعرها يكون مناسب اريد الفندق يكون ثاني مشروع الي بالعراق

هادي :- جا صلاوات شكد عندج فلوس؟

ضحكت :- خيررر من الله عندي فلوس لان والدي جان ثري ومن مات ورثناه اني واختي بس النص بالنص وطاح لكل وحدة من عدنا فلوس واملاك هواي وها اني ليش اجذب عليك عندي املاك بالبصرة اريد ابيعهن حتى من ابني الفندق اسوي يسوة
ماريد فلوسي مطشرة ع مشاريع صغيرة

هادي :- سهلة يمي النجف كلها حدر ايدينا

شيهانة :- اني اتمنى يكون عندي شخص هناك يشرف علي اذا تعرفلك واحد ثقة من اعمامك اصحابك هم بعدين عرفني علي بس مو هسة من نبدي بالمشروع

هادي :- سهلة هاي

باوع للساعة وكال :- شني يمته تتغدن ترة هناك نتغدة ويا اذان الظهر
شيهانة :- ماتسمع صوت المواعين جاي تصب ليلى

هادي :- اخ ياليلة اخ شالعة كلبي

شيهانة :- اني ماعوفها ليلى صارت مثل اختي وصيت واحد من معارفي هنا يشوفلها وضع الرواتب والمكافئات ماعرف شنو مال السياسيين حتى نضمن مستقبلها ومستقبل هادي

رد بعصبية :- انه امشي بين البساتين واكول اخ لو ما البرابيج العدنا جا جبت ليلة وحطيتها هنا دكيت الها بيت وكعدتها يمي بس النساوين بليس يتعلم منهن الخبث واخاف ع ليلة

سكتت صافنة من جفصته لان فشر هو ما انتبه لروحه
بعدين كتله خليها هنا احسن الها
وترخصت مشيت للمطبخ لكيت ليلى مكملة صب نقلنا الاكل وبعدنا ما كاعدين وصلت خالة نسومة طبت عبايتها ع راسها بدون حجاب تسلم

التقت نظراتها ويا هادي المايطيقها رفع حاجبه ورد السلام
وهي كعدت وبدت تتغدة وتسولف وهو يسمعلها ومتفاعل وياها وبين حجاية والثانية واحد يخزر الثاني ويدنكون ع الاكل

هادي :- وين اكو واحد يحط شكر ع التمن!

شيهانة :- اي احنه البصرة نحط والله طيبة شبيك
هادي :- لا حلوة بس غريبة مادري شلونها شكر وتمن ولحم حلاوة هاي تنوكل ورا الغدة خلولي منها لبعدين مو مال غدة

نسيمة :- ماخذ ع الوضع جنك كاعد بنص خواتك وتتشرط عليهن

هادي :- اي جا هنه خواتي لو ماهن خواتي ولا اعتب البيت ولا اكعد كبالهن

نسيمة :- واني خالتك عيني

هادي :- اي خالتي الحلوة

ضحكت ليلى منصية مديت ايدي بيها دولماية لابنها هادي اخذها من ايدي بكل احترام اكلها وهز راسه
باوعلي وبلع اللكمة :- طيبة خالة عاشت ايدچ الله يحفظج

هادي صرخ بفرح :- بوياي نسل السادة يخبل خلقة واخلاق

ليلى :- شلون لعد ابن السيد هذا

هادي :- اااخ السيد والله خوش زلمة بس ضاع بسببج ليلى عاد الولد ذهب صافي

ليلى انطعن وجها ونصت مقهورة
باوعتله وحجيت بهمس
:- تتحسس من طاريه

هز راسه وكال :- بس انتي هم مو بيدج ماعندج حظ شتسوين لو عندج حظ جا هسة مو هذا حالج
بالعشرين وشايفة كل الضيم وحدة لغيرج جا هسة ماتت

نسيمة :- اكلك خالة شنو انته تريد تموتها قهر شو ماتسكت

هادي :- شو انتي لا تحجين وتكليلي اسكت

نسيمة :- عزة وطين طالع من وراي ويسكت بيه اسمع ولك ترة اني خالتها نسووووومة

هادي :- واذا صخووومة انه ابن عمها هادي

نسيمة :- واذا معادي مادري هادي تدوس بكلبها وتقهر بيها

هادي :- سكتي وانه اسكت لا نتعارك كدامهم زحمة وهاي منا ام عطوب مستغربة تحسسني اليتعارك همجي وهسة اكوم والله افرسجن فرس

نسيمة :- حتى اشگك شگ

تعاركو هادي ونسيمة وكوة فكيناهم وليلى كلتلهم
اقسم عليكم بالامام المتعنين نزوره تتصالحون وتمشون وياي من گلب صافي لان انتم ثنينكم تخصوني وثنينكم احبكم وماريد اكسب واحد واخسر واحد

وتصالحو گوة وبدلنا وطلعنا بسيارة هادي للامام ..

يوم جمعة وعيون ليلى طايرة تباوع للعالم تتمنى تلمح اثر منه ولسانها يلهج بالدعاء
ما اسمعها بس متاكدة جاية متعنية وناخية ربها تلمحه
وتكحل عينها بشوفة اثره ..

دخلنا نزور وكملنا صلينه حطت سبحتها بحضنها وضلت تسولفلي تكول دائما من تجي ويا تجي منا وتكعد هنا وتبدي تتذكر كل سوالفهم وتعيدهن للمرة الالف وكأن ماعدها شي بالدنيا غيره ..

طلعنا من الامام لكينا هادي ابن عمها لازم هادي السيد و واگفين ينتظرونه ضلينه نمشي ونتسوگ
والحلو هادي السيد شاف الحلويات والتفت لامه كاللها
ماما اشتريلي منهن وهي گبل اختنگت وباوعتلي

ليلى :- سبحان الله نفس ابو والقران حتى الرجال النشتري منه نفسه يعوف كل العالم وكل الاشياء ويجيبني اله

مشت هي تريد تشتريله وابن عمها خزرها شلون فتحت جنطتها وگللها بخزرة
هادي :- تكتري اشتريله واجي ..

ضلينة واكفين يختار السيد وهادي يشتريله
واحنة واكفين ع صفحة نباوعلهم ونرجع نباوع للمكان ..

رجعو والسيد شايل العلاكه ثكيلة ماضال شي مامشتري اله هادي كاللها
:- ماما شوفي خالي كل شي اشترالي

هادي :- تعال بالله اشوفلك هنا لعبة نلعب بيها سوية بالليل
جره لبسطية قريبة واحنة بنفس مكانه نباوع للسيد عيونه تلمع فرحان

نسيمة :- شوفي فرحته تخيلي لو ابو شلون راح تكون فرحته ليش اكلج استعجلي وامشي للسادة

ليلى :- سودة عليه ماما يشوف روحه وحيد ومحد يحبه

شيهانة :- استعجلي ليلى وخلي الولد يعرف عنده اهل يردونه ويحبونه لا يتمرض لو يصير حقود بسبب شعوره بالوحده

هزت راسها مدمعة كتلها بنتر :- انتي شنو ماعندج غير البچي!! بس تبجين 24 ساعة ليش هيج ضعيفة شلون تواجهين الحياة بهذا الضعف

ليلى .. مسحت وجهي وكتلها بقهر
:- الدنيا جبرتني اضعف شسوي شيهانة شسوي ما نصفتني ابد

درت وجهي مقهورة منهن يعرفن كلشي مريت بي ويطلبن مني اصير قوية واني والله اتمنى احد يسندني اتمنى احد يطبطب ع متني ويقويني

ضليت واكفة اباوع لحيرة ابني محتار شنو يختار من لعبة كام هادي اخذله بايسكل صغير
وسيارات صغيرات وياهن سكة تتركب

ضليت ابتسم اشوف عيونه تلمع بفرح

كل تركيزي ويا وكل بالي يم هادي ابني

وفجأة فز گلبي وارتجفت روحي والتفتت بكل حواسي من اجة بأذني صوت سامعته ذاني
يصيح بأسمي
قيس :- ليلى .. خاتون تعالي بابا
التفتت اشوف بنية صغيرة شگره تركض بأتجاها وهو واگف بعبايته الجوزية وعمامته السودة ويمه العلوية فاطمة شايلة ولد وتاشرله ع الحلويات
والطفلة جلبت بعبايته
نصة مبتسم يكللها
:-ليلى بابا شنو عجبج من الحلويات اخذي ........للحكاية بقية

رأيكم بالقصة يهمني ..

ادري القفلة تجلط وهسة تكلولي لو مكملة بس اكو حدث ورا هذا الحدث حييييل طويل لو اكمله احتاج فد ساعتين اكثر

وهم يجلط ف خلونه هذا خفيف مقارنة بالجاي

شكرا الكم ع انتظاركم وتفاعلكم ان شاءالله مثل ما كتلكم للدفنة تخلص الخدمة ومن بارت 36 ارجع انشر بين يوم ويوم 🖤