رواية حمائم تخشى الطيران الفصل التاسع وثلاثون 39 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 .

وصلو البارت 1000 تصويت وتعليق لطفا 🖤🔥

لسان حال ليلى ..

اضحك بالوجوه بغير راحت
بال و اصبر لو ليالي العسر ضكني

عريان السيد خلف

..........

سمعنه صوت دك الباب بشكل قوي خليت من ايدي الكزاز ومشيت وقيس ركض قبلي

بس فتحنا باب الصالة اجت بالباب علاكة سودة انشمرت من ورا السياج
طلعت دنيه تركض ع صوت دك الباب القوي مفزوعة وكأن كلبها حس اكو شي يخص سيد مؤمن

دنك قيس جر العلاكة وفتحها بسرعة طلع منها عباية سيد مؤمن حمرة من كثر الدم .. غطيت حلگي باوعت لدنيه عيونها انفتحت من الصدمة
ضلت تفرفح مثل الطير المذبوح ركضت سكينة تلزمها وخالتي انغمى عليها وانخبصنا
دنيا تعيط مفرفحة :- كتلووو لان نظيف
كتلوو حبيبي خذو نبض گلبي عدمو سعادتي
وما حسينه غير توكع بالكاع منهارة تبجي
ركض عليها هاشم مالحك يوصل مدت ايدها ع الكزاز اخذت كزازة جبيرة خلتها ع ركبتها حتى تذبح روحها ...

سكينة دفعت ايدها وفاتت الكزازة بايدها ضلت تنفض دم هاشم جر دنيا حضنها قيدها بأيدينه

اني ركضت لسكينة ايدها كلها دم شمرت الكزازة وركضت خلت ايدها جوة الماي متوجعه

هاشم عينه ع سكينة وهو لازم دنيه حاضنها
فاطمة :- اوكفي اجيبلج شاش

سكينة :- لا عوفي الشاش لمي الكزاز زين لا يتأذون الجهال

مشيت حطيت السلة وضليت الم بالكزاز وعيوني يصبن مقهورة اشوفهم كلهم اشتعلو نار
هاشم جر دنيه كعد ع باية الدرج وكعدها يمه حاضنها وهي بس تشهگ وتبجي وجسمها كله يرجف

مسح وجهه وجر نفس مال واحد تعبان وگللها
:- صبري ع هذا الابتلاء خوية

ردت وهي تنحب :- كتلووو مؤمن هاااشم كتلوووووووو كسرو كلبي وشلو حالي

هاشم :- الله لا يگولها ان شاءالله ما كاتلينه يمكن جابو عبايته ملطخة بالدم حتى يخوفونه ويضغطون اعصابنا

دنيا :- والدم منين هااشم
هاشم :- يجوز مجروح خلي عينج بعين الله

عبد الرحمن :- گلب العباية زين گلب العلاكة ماكو ورقة بيها رقم نخابر علي مابيها عنوان نروحله ننطيهم فدية ونجيبة

قيس :- لا يابة مابيها شي بس العباية
:- شوف بالله العباية هم بيها شگ

قيس كلبها وكاله :- لا مابيها شي يجوز مو دم مؤمن
هسة لو ضاربي سجينة طلقة هم اكو شگ بالعباية

خالي كعد مغمض عينه بتعب وكال
:- الحمدلله ، يردون يخوفونه و يوگفون گلوبنا جعل ربي لا ينزل عليهم رحمة ولا يذيقهم طعم الراحة

فتح عينه باوع لدنيا وهز راسه متحسف
حنان تركض للصيدلية تاخذ منها علاج لخالتي
حسيت البيت كله وكع فوك روسنا

مصطفى :- الوو اباذر اسمع الراح اكوله بس لتحجي كدام عمي وعمتي
.. قبل شوية شمرو علينه علاگة بيها عباية مؤمن بيها دم بس نعتقد هذا تخويف النه لان العباية حتى شگ مابيها يمكن ملطخينها دم مو دم مؤمن

سكت شوية ورجع كال بهدوء :- ويمكن مجروح صحيح بس عدل مؤمن ما ميت لو ميت جان شمرو علينه

خليك قوي ودير بالك ع عمي ان شاءالله خير
احنا مسلمين الامر لرب العالمين لان الدولة بكبرها عجزت تلگاله اثر وترده
ماكو غير ربنا هوا يلتفت اله ويطلعه من اسره
..... الله وياك لا تطلع من البيت وقفلو البيبان
الله وياك

رجع السماعة لمكانها والتفت لدنيا كال الها بنبرة زعل يعاتبها
مصطفى :- ماعندج ايمان؟ هاي حركة تسوينها دنيه والله من يرجع مؤمن اسولفله وراح يزعل منج زعل ثگيل

دنيا :- والله ما اعرف شلون طلعت مني
تحجي وتمسح بدموعها

مصطفى :- علوية انتي مؤمنه ولازم تتقبلين كلشي يصير وتحمدين الله بكل الاحوال
لا تعيدين هاي الحركة مرة ثانية ولا تلطمين والله اني اول واحد ازعل عليج وبس يرجع مؤمن ابلغه

هزت راسها لا بقوة وكالت
:- والله ما اعيدها والله الحمدلله اني قابلة بالكاتبة الله الي

مصطفى :- عفية بارك الله بيج
التفت النه وكال بهدوء :- سمعو يا جماعة وضع العراق صعب والواحد مايدري بأي لحظة ينفجع بعزيز
اريدكم تكونون مؤمنين وكلوبكم قوية وتخلون عيونكم بعين رب العالمين
شنو يصير كولو فدوة دام الله كاتب هيج الف فدوة
والينكتل من عدنا كولو هذا استشهد وراح فداء للارض والدين والعقيدة ..

قيس :- سيد كول يالله خوفتهم!

مصطفى :- ماريد موقف دنيه ينعاد سيد
اريدهم كلهم يكونون مؤمنين وقابلين بالمكتوب
شنو احنه خالدين؟ شو كلنا نهايتنا الموت والاسباب عديدة ومختلفة ليش تنفجعون وكانما صاير شي جبير!!
الموت حق علينا كلنا وراح نشوف احبابنا يموتون ونحضر عزاهم بكل الاحوال

اني اذا طلعت من هذا الباب وانكتلت كولو فدوة

هاشم :- صح الموت حق سمعي دنيه اذا الله كتب لمؤمن ما يرجع ثقي واعتقدي هو نفسه يريدج تكونين قوية وقابلة بالمكتوب
مانريد تتهورين وتخسرين دنيتج واخرتج ..

هزت راسها وعيونها تدمع هم كانوا يهيئونها للجاي حتى ما تنصدم اذا انكتل مؤمن

كالت بغصة
:- بس الفراگ صعب

هاشم :- الله لا يجيب الفراك ان شاءالله يرجع مؤمن ونفرح بشوفته
بس يا اخيتي وضوة عيني المكتوب علينا شكد ما جان صعب من نباوع من جهة ثانية ونشوف شلون كل امورنا بيد رب العالمين وكل شي اله بيها حكمة وارادة راح تسهل علينا
ومن ينوجع واحدنا ويكول ياربي سلمتك امري اشفي جرحي وخفف ألمي
گبل يرتاح ويحس الدنيا سهلت والحمل بدأ ينزاح والثگل يخف

مصطفى :- بارك الله بيك هاشم
دنيه سلمي كل امرج لله هوا يخفف عنج ويزيح الثكل راح تموتين روحج

هزت راسها اي بس دموعها تجري كلهم كانوا خايفين ويتلعثمون بالكلام وحتى حسيت حجيهم مو مرتب بسبب هبطتهم كل بالهم يم مؤمن

مشيت لغرفة خالتي شفتها متأذية تدمع ومتخربطة

كعدت ع طرف الجرباية خليت ايدي ع ايد وفاء كاعدة منصية راسها ضايجة
فاطمة :- شلونها خالتي
وفاء :- ضغطها صعد وتخربطت
لمت شفايفها بحزن ونصت مرة ثانية

حنان :- ربي لا يرضا عليهم حيوانات

سكينة :- حبايب خلن عمتي ترتاح خلينا نطلع يم دنيه نصبرها ونقويها

حنان باوعت النه و وجهت اوامرها واحنه نستجيب لانها زوجة الابن الكبير واكبر جنة والها احترام نفس احترام خالتي ..
:- فطومة وسكينة ضلن هنا يم عمتي عينجن عليها
وفاء اخذي دنيه صعديها فوك وهوني عليها لا تصعبينها ولا تبجين
واني رايحة اكمل العشا

البنات طلعن ، واني وسكينة ضلينا يم خالتي خايفين لان ضغطها صعد شوية وفات خالي كعد يمها لزم ايدها وكللها بحنية
:- علويتنا صبري

غمضت عيونها وفتحهن كجواب اني وسكينة استحينا نضل طلعنا للمطبخ
الولد التهو بالاطفال واحنه كملنا العشا رغم محد اله نفس ياكل بس حنان گالت نخلي ويجتمعون ياكلون خو ما العالم تموت كلساع واحد يتخربط من الجوع

صعدت حنان جابت دنيا و وفاء والتمينة ع السفرة
هدوء مرعب حتى اللكمة من امضغها احس صوتها مسموع

هاشم يسوي لفات صغار يمدهن لدنيه يوكلها غصب
كوة اكلت كم لكمة
واحنة حالنا من حالها
ليلى :- ماما اليد من هذا
فاطمة :- شنو هذا؟ باوعتلها بتساؤول

مدت ايدها تأشر على الكبة اخذت وحدة انطيتها الها اخذتها لزمتها بأيديها الاثنين وعضتها برقة
صفنت عليها لحظات وتحسررت
بنتي واحبها والله يعلم اعز من روحي بس كلشي بيها مثل ليلى سبحان الخالق تكول بنت ليلى مو بنتي

تشبها بهواي امور رقتها نعومة ملامحها اسلوبها بالحجي تحجي برهاوة وتتدلع وحتى حركاتها
وفوگ كل هذا اسمها
ضحكت بوجع ورفعت راسي باوعت لقيس جان يباوعلي وكأنه فهم الاحس بي

نصيت راسي مختنگة وغمضت عيني خفت تتجمع بعيني الدموع وابجي
ندستني ليلى فتحت بفزة مثل النايم وكعدو وباوعتلها

رفعتلي الكباية تحجي وهي مكورة شفايفها وعاقدة حواجبها
:- هارة ماما هارة

اخذتها من ايدها وحاجيتها بصوت ناصي
:- هسة تبرد افتحها الج هيج؟
هزت راسها اي فتحتها بالنص حتى تبرد الحشوة

خليتها كدامها :- شوية واكليها
هزت راسها اي سويت الها لفة صغيرة خليتها بايدها وكتلها
:- اكليها ماما ع ما تبرد الكبة

ليلى :- ثكرا
اخذتها من ايدي تاكلها

ضليت اوكل الحسن ثريد حليب وخبز

اباوع لاطفالي وبگلبي حسرة ، ورا العشا نظفنا واخذتهم صعدتهم لان تعبانين واليوم جان ثكيل
سبحت الحسن وخليته بالغرفة واخذت خاتون سبحتها وطلعت امشطلها شعرها وهي كل شوية تعوفني وتروح لاخوها تبوسه وتضحك ويا وترجعلي

ماعندي طاقة الزمها كل ما تتحرك تروحله اعوفها وترجعلي تكعد كدامي

اخير شي تعبت وانفجرت
شهگت وبجيت لميت رجليني خليت راسي بين اركبي وانهاريت ، ابچي بحرگة گلب وحسرة ذيج المكسور خاطرها

ليلى :- ماما اداج (اجاج) دني؟ (جني)

رفعت راسي عيوني تصب وجهي كله دموع باوعتلها بقهر وكتلها
:- لا ماما ما اجالي الجني لتخافين روحي يم اخوج لعبي ويا

تباوعلي بقلق مستغربة دموعي
لزمت وجهي بايديها ثنينهن وباستني بعيوني مثل ما ابوها يبوسها بعيونها من تبچي

زدت بالبچي ضليت اناشغ وعيوني تجري هي خافت ضلت تبجي وياي مبرطمة وعيونها تجري

مسحت وجهي وضحكت جذب
:- لا تبجين يمة كعدي امشطلج يلا اكمل شعرج

كعدتها امشطلها وعيوني تصب والحسن يباوع ويصيح مما مما .. ببا

كملت تمشيط شعرها وفرشت الها بصف كاروك اخوها
فاطمة :- نامي حبيبتي خاتونة السادة الحلوة الله يكتبلچ نصيب احلى من نصيب امچ
ولا يعيشج العاشته فاطمة

غطيتها رفعت ايدها تفرك عيونها اباوعلها شعرها خيوط ذهب وعيونها عسل صافي
الله انطاها جمال واتمنى ربي يتمم عليها ويكتبلها الحظ الحلو
وما تعيش العشته وتتلوع مثلي ..

لان اني هم ربي انطاني جمال .. بس كل حظ ماعندي جنت اتوقع البنية اذا حلوة ما تصعب عليها حياتها واي واحد تحبه وتتمناه تاخذه ويضل يحبها ويموت عليها

بعدين اكتشفت الرادة رادة الگلوب .. والعشگ دگة گلب ورجفة روح
مو نظرة ..

نومتهم وتمددت بفراشي نمت متهربة من مواجهة قيس ..

....

الشيهانة ..

واگفة كبال ميز المراية اقلام الحمرة مشمرة علي وهوسة عطور وفرش ، واكسسوارات متنوعة
ارفع بشعري واشوف شكلي شلون يصير وارجع انزله

ليلى :- خليني اكصلج برجم وادرجه يصير يموت وشعرج حلو مموج خلي نازل

شيهانة :- اني من اخلي نازل احس بالامان بس احس لو ارفعه احسن

ليلى :- لالا خلي بس خليني اكصلج
شيهانة :- بس مو تطيرين شعري هوا كوة هيج صار
ليلى :- يا كوة كولي من الكمل الصار بينه بالسجن يومية نكعد نطلع ونطكطك بالگمل
السجن المفروض يسمونه سجن القملة

ضحكت و طلعت الها مكص من الجرار
كعدت وهي ضلت تسحب شعر وتحدد وتكص من كملت جابت الفرشة والشسوار وسوتها

ليلى :- خلصت شوفي وجهج شلون صار يخبل

كمت وكفت كبال المراية انبهرت بشكلي كلش لاگتلي ضليت انثر بشعري بدلع
شلت قلم الحمرة البرونزي وطوخت حمرتي للمرة الثالثة رشيت عطر ، ولبست تراجي يصيرن حلقات ذهبيات وخواتم ذهبية وساعة

باوعت ليلى تباوعلي بأعجاب عيونها تلمع
:- كافي ماتكدرين تخفين اعجابج بيه شسالفة

ليلى :- ولا جنت متوقعة عندج هذا الجانب عبالي ما تهتمين بمظهرج بهذا الشكل
وشكلج بالمكياج يخبل خصوصا عيونج من رسمتيهن بالكحل صرتي توكعين الطير الطاير من السما بنظره

ضحكت وحركت كتفي بغرور
:- جا شعبالج اني عندي المظهر بالمرتبة الاولى بس الدنيا جبرتني اهمل نفسي واصير مبهذلة
بس من بعد اليوم ماكو الشيهانة القديمة رجعت

ليلى :- تخبليين عين الله تحرسج من كل شر

شيهانة :- شكرا حبيبتي

هادي :- ليلة .. ليلة

ركضتله ليلى نصيت طلعت حذاء كعب بسمار من الميز لبسته وزاد طولي فوك ما اني طويلة
باوعت لنفسي برضا رجع شكلي القديم واحس رجعت هيبة الشيهانة واضحة ..

رجعت مثل قبل لبس انيق واعتمد المديلات الرسمية
كنت لابسة قميص حرير لون لؤلؤي وتنورة لنص الساق لون جوزي تجي كصتها مثل الحورية ..

شلت جنطتي خليت مبلغ حلو حتى امر ع السوك اشتري هداية لاهل عمار ياخذونهن وياهم ويضلن ذكرى مني  لانهم راح يتركون العراق بعد يومين ..

وبنفس الوكت ادفع للمحامي ..

رجعت ليلى فتحت الكنتور تدور
:- شيريد هادي؟

ليلى :- يكول راح امر للسادة يحجي ويا قيس ويتفاهمون علمود موضوع جنسية هادي ومناك يطلع للنجف گبل

شيهانة :- ها يعني ميضل؟

ليلى :- شيضل هو البارحة كوة بات يكول اروح لفندق احسن شلون ابات وياجن وانتن نسوان وحيدات كتله شتحجي غير انت اخوي وارتاح من تبات

شيهانة :- تدرين البارحة جانت اكثر ليلة انام بيها مرتاحة وما اخاف من شي ولا توهمت
ليلى :- حتى اني وكتله بس هو ميقبل شسوي

شيهانة :- اكلج اني راح اطلع وينه هو؟ ما اريده يشوفني من اطلع

ليلى :- فات للحمام طلعي ميشوفچ

هزيت راسي اخذت جنطتي وطلعت من الغرفة سمعت صوته يتحمحم سرعت بخطواتي طلع صوت الكعب اعلى
صاح :- ام عطوب ولج تعاي شني وين مولية؟

التفتت باوعتله بتفكير ، ميلت شعري ليورا وحجيت بهدوء
:- صباح الخير

رفع طرف حاجبه :- صباح الخيرات .. وين؟

شيهانة :- تحقيق؟ لازملي سيطرة لو شنو

هادي :- لا بس شو جنج عروس وانتي مرة وحيدة والزلم ذياب تدرين بهذا شكلج جم ساقط ابن ساقط راح يكول عليج هاي سهلة؟
تدرين جم جلب ابن جلب راح يحطج براسه؟

شيهانة :- طيب .. اني ما اهتم وما احب احد يتدخل بيه

هادي :- بكيفج شلي غرض

درت وجهي وكتله يلا الله وياك

هادي :- مودعه بالله

مشيت نفخ وصاح
:- اوكفي غضب الله ع راسج وين موليه ماكتيلي

شيهانة :- انت شدخلك عجيب مو عيب تتدخل
هادي :- لا اوصلج بطريقي انه هم طالع

شيهانة :- اني رايحة للمحامي عندي ويا شغل ومناك معزومة عند صديق رجلي
فك عيونه :- صاحب رجلج
شيهانة :- هو وعائلته عازميني عزيمة عائلية شبيك

ارتخت ملامحه وهز راسه برضا
:- اي زين اوصلج وين ما جان ما اخليج تفترين بالشوارع هيج غضب

شيهانة :- لا اخذ تكسي مشكور

هادي :- يروح يتحرش بيج ابو التكسي لا بعلي الفحل الا اوصلج

نفخت متضايقة :- اوووف شكو تحلف ؟
هادي :- حلفت بعد

ليلى :- ماتخلصون عرايك انتم

شيهانة :- شعلي اني ابن عمج ديج عرب متوحش

هادي :- ها هسة لان هادي عنده غيره ويخاف عليج صار متوحش ما يعجبج ولج انه عديتج اختي من كعدتي ويا ليلة اذا ما يعجبج طلعي روحي كعدي وحدج

ليلى :- يغار عليج شبيج بحسبة اخته

سكتت متضايقة باوعلي وسوا حركة مثل اليخوط استكان
وكال
:- بس اشرب جاي كعدي

مشة هو يكعد وليلى صاحت نسيت القوري وركضت للمطبخ مشيت وراها بسرعة وحجيت بغضب
:- يعاملني كأنما صرت اخته من صدك وناطي نفسه الحق يتدخل بحياتي ويرزلني هم شسالفة

باوعتلي باحراج وردت :- فدوة تحملي لخاطري هو كل شهر يجي مرة يشوفني ويروح

شيهانة :- هلا بي ماكايله شي ما اكرهااا اني بس ينرفزني والنوب اني لساني شطوله ينعقد كدامه ما اكدر ارد يمكن علمودج والله

ليلى :- اي علمودي تحملي
سوتلي بوسة هوائية باوعتلها بنص عين وكلت يله اصبر شسوي

اخذتله الجاي ضليت انتظره يوصلني خلص شرب الجاي ودع هادي الصغير وانطاه فلوس وضل يوصي ليلى ما تتهور ولا تستعجل بأي تصرف وتستشيرني وتستشيره يلا ..

طلعنا اني ويا شغل المسجل فؤاد سالم مديت ايدي طفيته
شيهانة :- هذا سلبي واغانيه حزينه واني كلبي خلصان خلينا بدونه احسن

رد بنبرة استهزاء :- ها اغنيلج انه اغاني سعيدة؟

شيهانة :- يبوووو غراب ويغني خلينا ع فؤاد سالم عاد صوته حلو

هادي :- ولج شو تعيبين علي؟
شيهانة :- غير صوتك من تحجي يجفل من تغني شلون اكلك شو اسكت خلينا ع الصامت احسن

هادي :- ولج انه هادي النجف كلها تسميني النچر زلم ما تتواجه وياي ولا يتطاولون تجين انتي ام اعطوب تكليلي اسكت وجنك غراب؟

شيهانة :- انت مو تكلي انتي اختي واني اخوج؟
هادي :- انه مااكول اني
شيهانة :- اي تكول انه اخوج

هادي :- اي

شيهانة :- اي واني من احجي ويا اخوي اخذ راحتي وافلت واجفص واخوي يتحملني

ضحك :- ما تنغلبين بعلي الفحل

صفن مسح ع لحيته يرتبها وضحك
همس استغفرالله العظيم واتوب اليه من كل ذنب

شيهانة :- شو تستغفر شكو

هادي :- والله يالشيهانة عمري كله ما حاجي ويا مرة غريبة ومطول وياها الحجي ومسولف ومعتبرها هيج مثل اختي انتي اول وحدة وانه مستغرب من روحي .. مو عوايدي اطولها ويا النسوان حتى الكرايب بس ليلة عبنها يتيمة وحلفت اتكفل بكلشي يخصها لانها دمي ولحمي وعرضي ..

باوعتله بتفكير وابتسمت ميلت راسي وكتله :- يمكن حظي السعيد كتبلي اخو بعد ما صرت وحيدة ويتيمة

هادي :- اي وانه اصير كافل الايتام والارامل والمطلقات

شيهانة :- هههههه شكو بيها ياعيني الك اجر وثواب

هادي :- بعلي لو عذيرة تدري الا تروح لاهلها مختاضة كل ما اجي لبغداد تكلي اي انت متزوج ليلة من وراي

شيهانة :- ههههههههه خطية ليش ما تراعي مشاعرها

هادي :- جا اراعي مشاعرها اعوف ليلة؟ غير بت عمي وشعره من شاربي

ضحكت حيل غطيت حلكي هز ايده
هادي :- شمالج تتمضحكين
شيهانة :- انت ورجلي هواي تتشابهون هو هم سولته بشاربه بس اسوي شي ويعصب مني يكلي اي انتي تردين ازين شاربي واذا راد يوعدني بشي يكول ازين شاربي اذا ماسويت فلان شي مجلب بشاربه

انت هم كل ماتحجي تكول ليلى شعره من شاربي

هادي :- غير الشارب عزيز من معزته نحلف بي

شيهانة :- لا وامس تكلي اشلع عيونج لا تبجين سبحان الله هو هم يكلي اشلع عيونج اذا بجيتي واذا راد يغير يكلي املص عيونج

هادي :- يلا طلعو المثلي يعجبونج

شيهانة :- اي جا شبيكم خوش زلم
هادي :- مشكورة ام اعطوب

شيهانة :-اكلك مو تنسى شغلتي وشكد ما استعجلت يكون احسن
هادي :- ان شاءالله خير
شيهانة :- انت ليش ماتصير ايدي هناك وهنا ادري بيك ما محتاج وعندك خير بس زيادة الخير خيرين تاخذ مبلغ ممتاز لانك راح تكون صاحب مسؤولية جبيرة

هادي :- انه اشتغل جوة ايد مرة امداني

شيهانة :- وشبيها المرة؟ بعدين ماتشتغل جوة ايدي انت راح تلزم شغلي لان اني وحدي ماكدر احتاج واحد مثلك سبع ونچر
عمي عوف بغداد من تلكالي ارض بالنجف الزم الشغل هناك

هادي :- مايعجبني بس اذا تردين ندخل شراكة اقبل
شيهانة :- جا اني عندي ما محتاجة شريك
هادي :- اي نوسع نسوي فندق ويا مطعم مثلا ناخذ كاع جبيرة كلش ونسوي مشروع يسوة النص بالنص

سكتت اباوعله بتفكير
:- شبيج لا تصفنين ناخذ كاع اكبر بمرتين ونسوي مشروع اكبر من التردينه هم انجح النه ومنها انه الزم الشغل هناك لان راح يصير مشروعي مثل ماهو مشروعج وبدون ما تدفعيلي

سكتت افكر
:- خليني بعدين ارجعلك خبر انت بكل الاحوال دورلي

هادي :- موجودات ضالات صح يردن فلوس بس انتي صلاوات عندج وتدفعين واحنه ال يوشع اهل خير بعد اظن ليلة مسولفتلج و

شيهانة :- اي كالت عنكم اغنياء هي شنو مالها ورث شي

هادي :- والله يا محفوظة السلامة عمي مات كبل جدي وهيج ليلة مالها شي وهوا جدي متبري من عمي ليوم الدين مايريده يعني بكل الاحوال مالها حصة من الورث
اذا ع ابوي وعمي ابو حاتم ينطون ماي عيونهم الليلة ومايكولون لا بس عمي ابو سوادي هذا ملطلط وعماتي ملطلطات اكثر منه ما يرضون ينطون شي الليلة يعني ما يتنازلون ويحسبولها حصة من الحلال

شيهانة :- فهمتك
هادي :- اي بس بيناتنا احنه انه اقصد وابوي وعمي ابو حاتم مخططين نبيع كاع من كيعان آل يوشع مشترينها غاد محد يدري بيها خصوصا النسوان ولا جايبين سيرتها كدامهن
من نبيعها نشتري حصة السيد من البيت الماخذه نصه هيه مهر وباقي المبلغ اضمه يمي لعازتها الجبيرة

بس بدون مايدرون الجماعة ولا ليلة تدري لا تكولين كدامها هسة

شيهانة :- لا ما اكول ، طيب السيد يبيع
هادي :- احنه كلنا نحجي ويا ما اظنه يعارض واذا اعترض نحجي ويا ليلة تبيع حصتها ونشوفلها بيت نخلي فلوسها ونحط فوكهن النقص من فلوسنا ونشتريلها .. نريد نضمن مستقبلها

شيهانة :- والله خوش ناس انتم الله يحفظكم الها

هادي :- مشكورة

ضلينا من سالفة لسالفة لحد ما وصلني لمكتب المحامي تشكرت منه وهو كال انتظرج اوصلج لبيت صديق زوجج بس رفضت كتله اتاخر بالساعات حتى يروح ورا لقاء ويا االسيد ورجعة للنجف مو مال ينتظرني

راح دخلت لمكتب المحامي ابو حمزة سلمت علي وكعدنا نحجي بموضوع المعمل والبناية والتحويل استمر اجتماعنة ساعة كاملة انطيته اتعابه وانطاني موعد بعد اربع ايام اجيله حتى نكمل الاجرائات وطلعت منه ..

اخذت تكسي اول شي رحت تسوكت قصدت محلات اعرفهن متسوكة منهن قبل واخذت هداية لام عمار وزوجته ولعمار
ورحت لبيتهم استقبلوني سلام حار وترحيب جنت اسلم عليهم ودمعتي بعيني لان راح يرحون ويتركون العراق

ام عمار :- والله صعب علي افارك بغداد بس مو بيدنا الموت يركض ورانه

ردت زوجته بنبرة مقهورة :- مندري يا ساعة تنخطف بنتنا لو يدخلون علينا للبيت يقتلونه يومية تهديد
الله حافظنا

عمار :- هانت

ابتسم متألم جريت حسرة غمضت عيني اداري دمعتي
شيهانة :- احبابنا خلصو المات مات والي انفقد ماله اثر والهاجر هاجر

ام عمار :- الله يرحم المات ويرجع المفقود
شيهانة :- ويحفظ المهاجر

عمار :- اريد منج تعذريني لان مالكيت جبران اني وعدتج ودورت بس ماكو اله اثر والله خجلان منج

شيهانة :- لا يمعود شتحجي ؟ شنو ما ادري اني هم دورت وتعبت بس الظاهر احنه فقدنا جبران حي او ميت فقدناه

عمار :- تجيلي افكار ممكن يكون طلع للخارج ومايكدر يرجع
هزيت راسي
:- هاي افكاري هم اكول اذا عايش يرجع

عمار :- شوفي اني هم وصيت هواي ناس وانطيتهم عنوانج بس يرجع جبران راح يعرفون بي لانهم شي قريب من شي وجبران يثق بيهم اكيد يروح ع واحد منهم اذا ما لگاني
المهم عنوانج يمهم بس يجيهم ينطو اله ويجيج وحتى الرقم

شيهانة :- مشكور ما قصرت اني هم وصيت اهل المنطقة وناطيتهم الرقم والعنوان والله كريم

بدينا نسولف عن وضع العراق بعدها عن مشروعي من عرف محتاجة شخص كال عنده ابن خاله خوش رجال امين وزين اكدر اعتمد علي هو يساعدني
يلزم المعمل

وافقت وراح اتصل بي وطلب منه يجي حتى نتفاهم بوجود عمار لان كل شي بدا يكمل وما ضل شي

اجانه ورا الغدة كعدنا نسولف شرحتله كل شي وكال هو مستعد يلزم المعمل ويهتم بكل شي لدرجه اني اكعد مستريحة

فرحت لان اخيرا لكيت شخص ثقة اسلمه المعمل بس اكيد اني ما راح اعوف حلالي بيد الغرب حتى لو كانو ثقة

صبت النه زوجة عمار جاي وكعدنا نسولف ونضحك سوية

وفجأة حسينه البيت كله ارتج صرخت ام عمار وركضت شبكت بنته وهو طفر مخترع يصيح نزلن للكاااع

حطيت ايديني ع الكاع جسمي كله يرجف ورا لحظات رجع نفس الصوت وتكسر جام البيت كانما قنبلة انفجرت

البيت انترس تراب ودخان عمار كام من الكاع ابن خاله صاح
:- تعااال عمار هذني رمانات لا يشمرون الثالثة

ركض عمار ما مهتم للكهرباء طفاها
صاح تعالن منا

كمنا نمشي بهمه ام عمار من الهبطة ترجف كوة تخطي لزمت ايدها وبنت عمار تبجي شالتها امها وركضت

فتحلنا باب البيت الخلفي طلعنه وركض ابن خاله تقدم صار كدامنا
عمار فات للبيت لحظات وطلع بأيده مسدس وجنطة صغيره سحب المسدس وتقدم

الباب الخلفي طلعنا ع طريق ضيق بين البيوت مشينا من عنده
حسنين :- رايح ركض اجيب السيارة طلعو منا انتم واني اجيكم اخذكم يردون يكتلون عمار وما يترددون يكتلون حتى النسوان

عمار :- روح بس دير بالك
حسنين :- خلي سلاحك بيدك انتبه عينك عليهن

عمار غمض كاله بصوت يرجف روح
.. ركض الولد يجيب السيارة
ام عمار :- يمه وليدي راح يذبحونه

عمار :- يخسون يوصلونجن والله اكطع روسهم

مشة كدامنا سلاحه بايده ، الدخانة كبت سودة مال البيت ضل يحترك

طلعنه ع الفرع الثاني نرجف خايفين حتى حافيات
ابن خاله اجة بسيارته يمشي سرعه طبك بسرعة فتحنا البيبان وصعدنا ، شخط السيارة وطلع التفتنا نباوع ورانه من بين البيوت طالعة الدخانة والنار

حسنين :- هاي ذبو رمانة وقبلها بطل فجرو حتى يحركون البيت

عمار :- طلعنا منها
زوجته كالت وهي تبجي :- مادري شلون طلعنه زين ما متنا والله جسمي كله ديرجف شوكت ينتهي هذا الرعب عمار كلبي خلص

عمار :- طالعين!!!

بلعت ريكي بصعوبة وحجيت :- عمار اليوم طلعو من بغداد لا تضلون اعبرو لديالى لصلاح الدين
وكملو طريقكم لسوريا

لجين :- اي عماررر حجيها صحيح هناك اامن النه فدوة خلينا نطلع حسنين اخذنا

عمار غمض عيونه بتعب يلهث مسح وجهه اباوع ورانه اخاف احد لاحكنا وارجع اباوع كدام
حسنين باوعلي بالمراية وكال
:- لا تخافين محد لاحگنا جاي اباوع

ام عمار :- يبس دمي يوم عمار مثل ماكالت الشيهانة خلينا نشتري اعمارنا ونطلع من بغداد هاي اليومين

هز راسه وهو مغمض باوعت لزوجته ترعش وتبجي وامه صارت ليموونه متجية راسها ع الكشن وتكلب بعيونها

حسنين :- عمه هسة اخذكم وياي لبيتنا منطقتنا امان وهادئة مابيها شي

عمار :- حتى منطقتنا بيها امن وصافية بس اخر فترة صارو حتى الامن ميكدرون للعصابات هاي السايبة

حسنين :- شلون لعد؟ اذا اطلعكم برة بغداد وين تنامون شلون بيكم عمي امشو وياي لبيتنا والله الحافظ

سكتو كلهم باوعتله بعد مدة وحجيت
:- زين تعالو وياي اخليكم بعيني

عمار :- لا انتي البيج مكفيج وهم وياج بنية غريبة مانعرفها شلون ماترهم نروح ويا حسنين

شيهانة :- اطلب منها تبات يم خالتها هل يومين
هز راسه لا
حسنين شوفلنا مكان بي تكاسي راح اصعدج تكسي توصلج لباب البيت ديري. بالج ع روحج سهير
باوعلي بنظرة قهر ودار وجهه

جان ضايع وبعيونه دمعه وبصوته غصة
كال بحسرة :- اذا بوطني ما احس بالامان وين احس؟

حسنين :- هو صاير غابة وكل العالم ماكلين تبن

عمار :-اخخ ياهاي الكاع شكد خدمتج تاليتي شايل ع اجتافي حمل منج وادور كاع غيرج تلمني
عض ايده مقهور ونصة

ضليت ابجي مقهورة ما يستاهل كل هذا اليصير بي

طبك حسنين استغربت
باوع وكال هاي تكاسي
عمار اشرلي براسه انزل باوعت لامه مقهورة زمت شفايفها تبجي بستها وكتلها
:- الله يحفظكم خاله ويكتبلكم طولة العمر والامان من توصلون لسوريا اتصلو بيه

هزت راسها وهي تبجي كالت بتعلثم
وصوتها بي غصة :- ان شاءالله اذا وصلنا وما تكطعنا

شيهانة :- لا توصلون سالمين اني رايحة ماريد عمار يضل واكف كلشي يصير لجين حبيبتي حاجيني انتي هم وطمنيني عنكم

هزت راسها وهي تبجي توادعنا بنظرات العيون ونزلت رحت للتكسي اتفق ويا عمار وطلع محفظته من جيبه حاسبة باوعتله بنظرات مقهورة وعيون تجري

ما حجة شي ولا حرف بس عيونه هواي سولفت وراح صعد ويا حسنين وطلعو قبل ابو التكسي

وصلني ابو التكسي للبيت نزلت دكيت الباب فتحته ليلى باوعتلي ونصت باوعت لرجليني حافي وحالي يسولف
كحلي سايل من البجي ولوني مخطوف

ليلى :- عزززة وطين عزة وطين شبيج ولج منو مسوي بيج هيج

شيهانة :- محد بس صار موقف ابيت عمار

سولفت الها كلشي واني ابجي ضلت مقهورة تدعي عليهم غسلت وجهي وبدلت ملابسي لزمت راسي متأذية

ليلى :- ولج همزين ما متي

شيهانة :- ربي ستر وكتبلنا عمر مادري شلون مادري

...

دنيا ..

من جابو عبايته ملطخة بدمه حسيت الدنيا وكفت وحياتي انتهت لدرجة فقدت ردت اكتل نفسي
بس اخواني عاتبوني وحسيت نفسي مذنبة
رجعت لربي طلبت منه يسامحني ويحفظلي زوجي وين ما كان

ايام مرت واني احط راسي ع المخدة ماكدر انام افكر بحاله اكول هسة جوعان وعطشان ومعذبينه
احسه متوجع وانوجع ويا
ابجي من اتخيل شكله تعبان حبيبي هذا ياليت التعب بيه مو بي والاذية تجيلي اني مو هو

احبه لدرجة مستعدة اتحمل الاذية بمكانة المهم هو ميجي سوء ..

ثاني يوم من سالفة عبايته الملطخة دم كعدت صليت الفجر وصبيتلي جاي لان راسي موتني
ضليت افتر بالبيت وحسيت روحي مخنوكة كل شي خانگني

طلعت للحديقة اباوع للسما بيها غيم وخيوط الشمس منتشرة من بين الغيوم
الجو بارد ، وبي ندى

كعدت اريد بس اتنفس شوية وشفت والدي طالع يمشي بأيده عكازته لابس فروة فوك كلابيته
شافني ابتسم كال وهو يتقرب

:- هلا بعلويتنا هلا كاعدة يا عين ابوج؟
دنيا :- هلا يابة صبحك الله بالخير
:- هلا بهالصباح
دنيا :- صليت وماكدرت ارجع انام

حجة وهو يتقرب كمت مديت ايدي اساعده
كال: بارك الله بيج بنيتي شلونج اليوم
:- زينة يابة زينة فدوة ادعي لمؤمن كل ماتصلي

:- ليش اني ناسي يابة؟ غير هذا وليدنا ومعزته من معزة اخوتج اني اشوف مؤمن مثل مصطفى

دنيا :- اعرف بس من حركة كلبي حتى للورد اشكي همي واكللهم ادعوله

ضحك مسح ع راسي وباسه
:- يرجع رجلج بنيتي
ليش هيج طالعة باردة ..
نزع الفروة
:- لا يابة ما علي برد
:-تتمرضين بنيتي
خلاها ع اكتافي ورفع راسه :- ياللهي فرح بنيتي دنيه برجعة سيد مؤمن بحق رسول الله
يا من كتبت ليعقوب رؤيا سيدنا يوسف بعد سنين اكتب لدنيا رؤيا مؤمن سالم غانم

دنيا :- امين

بدأ والدي يسولفلي قصة سيدنا يوسف رغم اعرفها لاني الحمدلله قارئة للقرآن بس هو يريد يذكرني
حتى اتفائل واصبر
بعد كل صبر فرج .. وبعد كل فراق لقاء
اذا الله كتب وراد نلتقي راح يرجع

طال حديثنا الغيوم تناثرت وطلعت الشمس
دفوها خلاني اهدأ وحسيته لامس كلبي
ويمكن كعدتي ويا والدي وكلامه وياي هو الي دفئ روحي وخلاني الين وزرع بداخلي بذر الامل

بهذا اليوم رجع ابن عم ليلى حجة ويا قيس بس ما عرفنا شنو لان قيس كعد ويا والدي وضلو يتناقشون
فاطمة تلوب تريد تعرف اشوف قهرها وانقهر وياها
وبنفس الوكت انقهر ع ليلى

يعني عجيب ثلاثتهم مظلومين ما نعرف عليمن ننقهر

واي قرار ياخذونه راح يطلع طرف مكسور ومتأذي

رجعة ليلى لقيس يعني كسرة فاطمة

وابتعاد ليلى عن قيس يعني كسرة قيس و وحدة ابنه هادي ، ما راح يعيش تحت جناح ابو

وليلى احسها انكسرت من قبل وعايشة بكسرة
رجعتها تكسرها وبعدها يكسرها
البنية صارت مهشمة

اجت عمتي ام مؤمن تسأل اذا اجانة خبر عن مؤمن واحنه نسألها نفس السؤال ..

للعصر جنت اقرا قران بغرفة اهلي وسمعت صوت امي تهلهل صدقت وكمت عثرت بطرف ثوبي وكعت ع اركبي ورجعت وكفت كلبي طاير

ورجليني يرجفن اركض وروحي احسها حلقت
فتحت الباب وودعمت بسكينة لزمت راسها واني لزمت حلكي طك براسها

سكينة :- مؤمن عدل دنيه ولج مؤمن عدل ذبو ع بيت عمي صحيح متأذي واخذو كبل للمستشفى بس عدل

حطيت ايدي ع كلبي ورفعت راسي للسما
:- الف وحمد وشكر الك ربي ماقصرت ربي رجعتلي مؤمن ماقصرررت
حضنتني سكينه بجيت من الفرح

اضحك مثل المجنونة واصيح الف حمد وشكر
ربي
اجت امي حضنتني تبوس بيه وتضحك فرحانة وعيونها تجري
سميرة :- كرت عينج دنيه رجع حبيب. روحج

باوعتلها واختلطت فرحتي بخوفي
:- شلونه يمه وين ذبو شنو بي متعور

سميرة :- ذبو ع اهله اجة اباذر يركض اخذ مصطفى وركض ويا قيس وهاشم
دقيقتين ورجع هاشم يكول ذبو مؤمن بس متعور شوية نقلو للمستشفى

دنيا :- وينه هاشم شنو متعور وين يعني مصوب مضروب

حنان :- هاشم بالاستقبال يم عمي ومرتضى يحجيلهم
بالمبارك رجعته دامه عايش كل جرح يطيب

دنيا :- الحمدلله
خليني اروح اريد اسمع من هاشم

مشيت وهن وراي دخلت للااستقبال شفت وجه هاشم يضحك وتطمنت
ركضت علي كبل حضني وباس راسي
:- الحمددلله رجع سيد مؤمن

دنيا :- الحمدلله بس شفته شنو وين متعور

سيد رحمن :- تعاي دنيه كعدي يمي
مشيت اباوعله بقلق واسأله شنو يابة خاف متصوب
:- لا بنيتي بس ضاربينه هواي ومتعور يحتاج مستشفى ادعيله بالشفاء

دنيا :- زين اخذذوني اشوفه
:- وين يا بنيتي احنه هسة راح نروح وراهم نشوفه ونرجع نسولفلج عن وضعه هسة صعبة ترحين كل الاهل والاقارب راح يرحون للمستشفى

نصيت مقهورة واختنكت بعبرتي
مرتضى :- تدللين اني اخذج بس مو هسة اول شي خلينا نروح ونشوفه وبعدين اخذج بالليل

رفعت راسي فرحانة هزيت راسي اي
وكمت
رايحة اصلي ركعتين شكر ، استجاب دعائي ورجعه الي عايش وهو جان بحلك الموت لو اخلص عمري ساجدة لربي شكر احس روحي مقصرة ..

عفتهم ورحت للغرفة صليت شكر لربي وسجدت سجدة طويلة ، لساني يلهج بـ الحمدلله حمدا كثيرا
وكل ما ارفع راسي ارجع اسجد سجدة شكر طويلة

ضليت انتظر رجعتهم من المستشفى من اجو ركضت عليهم اباوع الهم انتظر منهم الحجاية
ابوي كال
:- شفناه زين حجينة ويا سلمنه علي والدكتور طمنه كال يتحسن

سميرة :- شنو متأذي بي

مرتضى :- والله يا علوية الكبد متأذي بس الدكتور كال يصير زين اذيته مو كلش قوية وعنده اثار ضرب وجروح خيطوهن

شهكت خليت ايدي ع حلكي
باوعلي مرتضى كال: - كولي الحمدلله غيره مايرجع

غمضت عيني بقهر وهمست الحمدلله
حسيت خناجر طعنن كلبي
رجعت باوعتله وتقربت منه بهدوء
:- مو كلت تاخذني
مرتضى :- ورا العشا علمود بالليل ماكو عالم هواي

هزيت راسي اي الشوق ذبحني ذبح
ضليت اباوع للساعة واحس الوكت ما يمشي واكف

من فرحتي ماكدرت اكل ورا العشا جهزت روحي واخذنا مرتضى اني وامي للمستشفى
من دخلت وشميت ريحة المستشفى لعبت نفسي واختنكت كلش

مشينا من بعيد لمحت السادة نصيت راسي ودنيت عبايتي ع وجهي
مرتضى :- علويات اوكفن هنا بس اتاكد محد يمه حتى تفوتن يمه

وكفنه ع صفحة امي حجت من ورا البوشي :- دنيه يمه صيري سباعية لا تبجين الزلمة طالع من الموت وممرود مرد لا تمردينا بالزايد

دنيا :- شسويلهن يمه هن يدمعن من وحدهن

سميرة :- اندري شتسويلهن المهم لا تبجين تنفسي زين واذا دمعتي دوري وجهج

هزيت راسي اي ضليت واكفة اجة مرتضى وخرو عن الطريق ومشينا اني وامي من فتح الباب ودخلنا سده وضل برة

باوعت اله متمدد ع السدية وجهه مايبين ازرك عيونه متورمة الوجه مو وجه مؤمن
الوجه وجه شخص ثاني ، حسيت كلبي طاح من شفته وجن ذبحوني ذبح
سلمت علي امي واني عيني تباوعله شلون متأذي ..

ركضت علي ودموعي كبل نزلن
:- مؤمن حبيب روحي
خليت اصابعي ع لحيته بخفه اخاف يتوجع يباوعلي وابتسم خفيف وكال بصوت خافت
:-دنيتي .. شلونج زينة؟

دنيا :- شلون ما اصير زينة واني اشوفك؟ گلبي تمرمر بفراگك حسيت روحي رادت تطلع
ذبحني فراگك سيد

مؤمن :- كل فكري يمچ علويتي ادري بيج ترفة وحساسة ما تتحملين بنص النار وادعي ربي ينطيج الصبر ويقويچ

دنيا :- شلونك متعور؟ شنو يوجعك؟
رفع ايده خلاه ع خدي مسح دمعتي بأبهامة وكال بصوته التعبان
مؤمن :- انتِ توجعيني دنيه ، لا تبچين دموعج يوجعني

اني غير ابطل من يكلي هيج ازيد بجي وامي تخزر بيه
وهو يمسح دموعي ويكول :- بس كافي رجعتلچ الله كتبلي عمر لخاطر عيونچ

دنيا :- بعد لتروح مؤمن
غمض عينه وهز راسه اي
دنيا :- ليش خطفوك؟

مؤمن :- سالفة طويلة اصير زينه واحجيلج تعبت واني احجيها للشرطة

هزيت راسي اي اخذت ايده لمخليها ع خدي وبستها خليتها ع گلبي
:- كون الوجع البيك يعوفك ويجيلي مااريدك تنوجع مؤمن
رفع ايده خله صبعه ع شفايفي
:- اسم الله عليج من كل وجع اني اتعذبلج عمر ولا تنمس شعرة منج لو تنوجعين

سميرة :-عمة مؤمن الحمدلله من رجعت النه كلوبنا خلصت من القهر

مؤمن :- اسم الله عليكم

سميرة :- يلا لا تحجي هواي انتَ تعبان سيد ..

باوعلي ثبت عينه بعيني وهمس :- دنيه ليش اجيتي للمستشفى متروسه عالم وكلهم لازمين الباب

دنيا :- شلون لعد؟ ما اجي واشوفك غير اطك واموت

مؤمن :- اشش .. لا تجيبين طاري الموت هسة يجي مرتضى ورجعي ويا بعد لا تجين تحملي كم يوم واطلع
دنيا :- والله ما اتحمل ليش ماتريدني اجي ما تريد تشوفني يهون عليك فراكي؟

هز راسه لا عقد حاجبه متألم وهمس :- احترگ حرگ من يشوفون طرف عباتچ ، نار السادة كلها تصعد لراسي

دنيا :- البس بوشي واجي
مؤمن :- دنيا لا تعانديني اذا تردين راحتي بعد لا تجين
هزيت راسي اي ونصيت مقهورة دموعي تنزل

مؤمن :- اني اذا لمحو خيالچ احترگ من جدمي للراس ، اشتري راحتي لا تخلين عزيزچ يحترگ بنار غيرته عليج

بست ايده وهمست :- تدلل

وفعلا رجعت بيومها ويا مرتضى وبعد ما رحت بس اسمع اخباره من اخواني ..

.....

الشيهانة ...

سافر عمار لسوريا ويا عائلته وصلني خبرهم سالمين ، الحمدلله
ضلينا اني وحسنين نشتغل وقتي كله راح بالشغل اسبوع اني ما شايفة الراحة وليلى وكفت سالفتها لان السادة ملتهين بأبنهم المخطوف ورجع ..

ضليت كل نهاري برة البيت اشتغل ارجع المغرب
اذب روحي انام لثاني يوم الصبح اكعد اصلي واطلع

حسنين سبع ويكدر يدير مسؤولية كل شي ، بس مع هذا بداية المشروع تحتاج تعب

ورا اسبوعين تقريبا سمعت التلفون جانت ليلى بالحمام طلعت اركض بايدي كلاص الجاي جاوبته واني اخذ رشفه منه

هادي :- الووو
:- الووو هلو
هادي :- هلووو ام اعطوب شلونج

ضحكت :- زينه وانته شلونك
:- الحمدلله ليلة وهادي شلونهم
شربت جاي ورديت :- زينين الحمدلله ليلى بالحمام من تطلع اخليها تتصل

هادي :- لالا اني مخابر علمودج

شيهانة :- خير ان شاءالله
هادي :- كل خير ، اول مارجعت وصيتلج دلال معدل والبارحة حاجاني علمود ارض كلش جبيرة وموقعها حلو
شيهانة :- اني ماعرف انت حسب عرفتك شلونها زينة اخذها؟ يعني سعرها مناسب الها ماطالبين اكثر من اللازم

هادي :-كلشي بيها ممتاز بعلي تفوتج
شيهانة :- لازم اجي للنجف
هادي :- تعاي هلا بيج نروحلها وتشوفينها بس مارديتيلي خبر ماتردين ندخل شراكة؟

شيهانة :- بصراحة؟  اريد لان اني هنا كلش تعبت والمسؤولية جبيرة بس مو مال تلفون اجي للنجف ونشوف الارض وراها نحجي

هادي :- يمته تجين ؟ اكول استعجلي خاف تروح من عدنا
شيهانة :- ماكدر غير الجمعة اطلع من الفجر واجي وارجع بنفس اليوم

هادي :- اجي اخذج
شيهانة :- لا ميحتاج اكو ابو تكسي زلمة زين وثقة معتمدة علي ياخذني بكل مواعيدي اكدر اعتمد علي لا اتعب روحك

هادي :- براحتچ
شيهانة :- لازم نتفق ع مكان خليها قبل لا اجي ارجع احجي وياك ونتفق

هادي :- ان شاءالله

نهيت المكالمة ورجعت للغرفة بعدين طلعت للعشا باوعت لليلى :- والله جاي اتعبج وكله عليج الشغل عذريني
ليلى :- ومصرف البيت كله عليج شسالفة ترديني اكل وامسح ايدي بالحايط

شيهانة :- ما تستحين ليش تجيبين سيرة المصرف هادي امك صايرة موخوش

ضحك يعرف جاي نتشاقة تعشينة وردت انام بس اليوم جايلي خلك ضليت احف وليلى سوت حواجبي وسبحت

طلعت شغلت التلفزيون هادي نايم وليلى سوت شامية وجبنة كرزات قررنه نسهر ع فلم نتونس

كعدنا كبال التلفزيون مندمجات ع فلم ، كل بالي يم التلفزيون واكل
جان التلفزيون بالاستقبال والاستقبال قريب من الشارع

سمعنة صوت سيارة طبكت وحدة باوعت بوجه الثانية بخوف

ليلى نصت التلفزيون وكالت
:- شو جنها طبكت يم بابنا

هزيت راسي اي :- شعلينا البيبان قويات ومقفولات زين لا تخافين

سمعنه صوت موسيقى طرقت اذني ورجعتني بذاكرتي ليورا ، گلبي ضل يرجف وحسيت صدى بأذني اجة بأذاني صوت رائد جورج وهو يغني "لا ترحلين" باوعت لليلى الخايفة وفزيت من مكاني ..
شيهانة :- جبران هذااا جبران اجة والله جبران
رجع جبراني
ركضت وهي تركض وراي تصيح ولج لالالا خطر لا تفتحين الباب
فتحت الباب بدون ما اهتم بلهفة عاشقة للقاء معشوقها ، عيني صارت ع السيارة الواكفة كبال البيت ويطلع منها صوت الاغنية باوعت لمكان السايق شكله غريب عيني تجولت بالسيارة بلحظات وثبتت ع الكشن الورا السايق واشوفه گاعد مثبت عينه علي ..........للحكاية بقية

رأيكم بالقصة يهمني 🖤...

لغيت حدث وقدمت حدث رجعة سيد مؤمن لان تعبنا من الحزن بس شنو ماتوقعت ياخذ مني هل كد وقت عبالي ل12 يكمل 🥺💔 اسفة ع التأخير

عندي حدث مكتوب بلكي باجر اكدر اكمل واسويلكم بارت هدية شجعوني 🤣😁😁😁😁😁