رواية حمائم تخشى الطيران الفصل الثاني عشر 12 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

لتنسون تصويت + تعليق بين الفقرات لطفًا 🖤

التفاااعل التفاعل بنات 🙏🏽 نريد واهس للكتابة والنشر البارت طويل ..

_______________________________________

(رسالة كتبت بشوق ولهفة عاشقة زارها الشجن ، فردت جناحيها تلك الصغيرة فحلقت بسماء الحب تجوب فضاء الهيام وترسم اسمى لوحات الغرام )

من الشيهانة .. العاشقة الى محبوبها وابن عمها جبران حامد حميد ..

عزيزي جبران بعد التحية ..
الكلمات لا تسعفني ، الحروف ليست كافية لتنقل اشواقي
فـ شوقي اكبر من ان اترجمه بقليل من الحبر على وريقات خالية من الحياة ،، لكن لا توجد طريقة اخرى للأسف الشديد
لك في الفؤاد حنين ، حب ، هيام ..وشوق لا يوصف
واسجن لك في العينين دموع فرح تتشوق لاطلق سراحها فرحًا عند لقائك
واحمل لك فوق الشفاه قُبل ساخنة اتمنى لو استطيع ان اضعها على وجنتيك وشفاهك ، واه ثم اه ، ليتني استطيع وضعها على عُنقك

حَـنينة أهلك (سهير)

حجت بخوف وهي تحذرني وتمنعني
ملاك _ عيب عيب شنو كاتبتله شفاهك وعنقك لالا ذبيها هاي وكتبي غيرها
كتبي رسالة محترمة لا تصيرين مستخفة

_لچ الحب اذا مابي شقاوة و وكاحة ما يتسمى حب

_عيب والله لو توگع بيد ابوي او جدي يتبرون منچ
_يووو شگد نگاگة ملاك سكتي خليني اطبگها زين

_يعني ما تكتبين غيرها وراح تخلينها توصل للولد ويقرأها ويشوف قلة ادبج
عاتبيني عود اذا خذاچ هسة يگول هاي ما تستحي

_انتِ ما تفتهمين سكتي

_شنو الما افتهمة قلة ادبچ

ابتسمت بعد ما حطيت الرسالة بظرف وقبلته بشغف
_ ما تفتهمين الحب ، تعرفين لهفة العاشگ؟ ضگتي مرارة البعد؟ حسيتي بنار الشوگ؟ لو الغيرة؟
اف اف الحب عذاب وما ينفهم بس حلو

_خاف يگول مستخفة وما ياخذچ

_مالچ شغل ، طلعت للسطح حطيت الكرسي وطفرت من سطحنة لسطح جيرانة "مهيب" صديق جبران
حطيت الرسالة بالشباك ودگيته حيل

ركضت وايدي على گلبي ارجف طفرت على سطحنة خايفة ارجف وملاك تراقبلي الدرج
ركضنا لغرفتنة كل وحدة شمرت روحها بسريرها تغطينه نضحك ونرجف من الخوف

حجيت بهمس _ شافنة احد؟

هزت رأسها _ لا لا محد شاف يمة لو يلگفنة احد يشوونه ويتغدون بينه

_ههههههههههههه راح توصله الرسالة ويشوف شكد متلهفة اله بلكي يجي واكحل عيوني بشوفته

_مستخفة عمرچ 16 سنة گبور تلفچ خفيفة خفيفة راح تفشلينة ويا بيت عمي

_سكتي لچ .

_اذا عرستي ترحين للبصرة؟

_ ويا جبران لو الجهنم هم اروح مو بس للبصرة

_ هجم بيت البانية شگد تنفخ لجهنم لچ انتِ الطباخ تخافين تشبينها
فرت ايدها بأستهزاء ،، غميتها وشمرت عليها الدبدوب

تفلت عليَ طفرت عليها بغضب _حيوانه
_مطية تف عليچ تضربيييني؟!
تمالخنة من الرؤس صعدت ماما على صوت عياطنة فاككتنة

كعدت كل وحدة على سريرها صرنة متواجهين

ماما عاقدة حاجبها بغضب وصاحت حيل
_شنو السبب العركة؟

ملاك _ شمرت عليَ الدب

_ اكو جروح؟ اصابات؟ حالات غرق؟

_لا بس حركة مستفزة

_سكتي سكتي، انت مايعة شوكت تصيرين مرة ولج شوكت شامرة عليج دب تعاركينهاااا؟!
اخ شوكت تكبرين

_ماما شيهانة عورتني بالدب

_سكتي ، لا يسمع جدج يكوم الدنيا على روسنة كلشي ولا عزيزته يهجم البيت فوگ رؤسنا اذا درى مضوجينها

برطمت بزعل وگالت :- هاي تفرقة واني مضطهدة اطالب بأنصافي ويا هاي
حجتها واشرت عليَ عافسة وجها

_شبيچ عافسة وجهچ

امي صاحت _ اهوووو شيهانة گومي يله تباوسن وتصالحن وراي الف شغلة

ملاك _ما ابوس هاي
شيهانة _ ليش بيَ ابو خريان وتخافين اعديچ

امي عضت اصبعها وصرخت _ وتااااالي يمتة تخلص هاي المشاحنااااات

سمعنة صوت حجارة ضربت باب السطح امي گالت _هاي شكو بالسطح؟ يمة دخيلك ربي بس لا سطى علينا حرامي بهل ليل

بلعت ريگي بخوف باوعت الأمي وگتلها _ لا لا يا حرامي غير اني حطيت اكل للبزونة؟ تلگيها هيَ جاي تلعب وتطفر يم الباب

_ يا طلابة البزونة الماتخلص يله ملاك بوسي اختچ ونامن بسرعة

هزت راسها بسرعة اجت باست خدي وتمددت تباوعلي بخوف امي طلعت ضلينة كاتمين انفاسنة اكثر من خمس دقايق
خايفين لا تصعد فوك
ورا ما حسينة امي خلص صارت جوة والوضع امان

طفرت من فراشي بخوف وسرعة _ رايحة اشوف الظاهر اكو رسالة قديمة هسة وصلتلي

ملاك _اوكفي اراقبلچ

طلعنة نمشي على اطراف اصابعنة ضلت ملاك واگفة تراقب واني فتحت الباب ركضت للكرسي لگيت رسالة محطوطة فوگها حجارة اخذتها ضميتها بجسمي واني اركض

كلها ثواني وصرت بفراشي مغطية راسي وكل ذرة بيَ ترجف

ملاك _محد شاف محد الف الحمدلله گلبي راح يوگف من ورة حبچ والتمعشگ مالچ والله اذا صار بگلبي شي اذبها براسچ گبل اگول هي مرضتني

_قفلي الباب لج

مشت قفلته وگعدت بفراشها كعدت عدلت كعدتي مديت ايدي سحبت الرسالة بفرح وفتحتها بلهفة
خليت شعري ورا أذني وتربعت

جريت نفس عميق وفتحتها وبديت اقرأ بكلماته الحلوة بصوت ناصي حتى ملاك تسمع وتكون شاهدة على كل تفاصيل علاقتنة

بداية الرسالة كاتب التاريخ

12 تشرين عام 1988

حنينتي سهير .. انا الان جالس امام النافذة اتأمل حديقة المنزل من النافذة حديقة جميلة تملأها الالوان الزاهية اتأملها بحب لانها تشبهكِ كثيرًا
زهورها جميلة مثل وجهك اوراق الزهور الوردية اخذت لونها من مقام شفتيكِ .. والبيضاء منها تكاد تموت من شدة الغيرة لانها لا تستطيع ان تصل الى جاذبية عنقك
الفراشات تنتظر قدومك لتتعلم منك الرقة فـ هي امامك لا شيء

اصبحت اغار عندما يقطف احد زهرة من الحديقة ويشمها واتمنى ان اقتله بعدها اتذكر انها مجرد اشباه هي لست انتِ قد ابدو مضحك بالنسبة لك لكن صدقيني اصبحت اغار حتى على اسمك عندما ينطقه ابي او احد اخواني اتمنى ان اشيد لك بقلبي قلعة واسجنك رهن الحب فيها الى الابد ..

وكم يؤسفني ان حضنك بعيد عني .. لكن لا بأس سأحضن روحك الى ان يكتب الله لنا لقاء بالحلال

ابن عمك و حبيب قلبك "جبران"

حطيتها على وجهي شميتها وضميتها لصدري حيل ،، افيش يا ريحتك ،، يا حروفك
حسيت الرسالة ايدينه وحضنتني
حسيت بدفو حضنه وعطر صدره الي عمري ما جربت اشمه عن قرب
قبلت كلماته اكثر من مئة قبلة ، كل دقيقة ارفعها لوجهي اشمها واقبلها وارجعها على صدري

ملاك _ اذا العشگ هيچ يسوي بالبشر عمري ما اعشگ واحد ،، ما اريد اكون عرضه للجنون مثلچ

شيهانة _ ليش اكو احلى من الحب ،، الحب حلو اني احب الحب

____________________________________

_هواي تهربت هيچ الجواب صعب؟

خزرني وگال بغضب _ وين تردين توصلين سهييييررر
_لگلبك
_مرة لخ؟ شتسوين بيَ هل مرة
_احرگة ،، جا اني تتزوج اختي جبران ما لگيت غير اختي؟
بهت وانسرقت الكلمات من عنده، طاح الدرنفيس من ايده بدون ما يحس ، شفت عقد الزواج بين اوراق عمي

مكتفة ايديني ورفعتله حواجبي
_اي اريد احرگ گلبك مرة ثانية اريد اشعل بي نار عمرها ما تطفى

_مو طبيعية يالشيهانة ليش تسوين هيچ وانتي متعرفين اي شي عن الماضي وشنو عشت وشلون تم زواجنا
_طبيعية جبران ، تزوجت ملاك جبران؟ ملاك الجانت شاهدة ع حبنا وعشقنا وهيامنا؟!!

عاف كلشي من ايده وراح بدون ما يرد سديت الباب حطيت ورا مخدة حتى ما ينفتح
تجولت عيني بالغرفة لگيت الساعة طايحة
غمضت عيني بعد ما استوعبت الصار
معناها الصوت الخوفني صوت طيحة الساعة

شلتها حطيتها على الميز باوعتلها الساعة بالوحدة ضبط
عقرب الساعة الصغير واگف على الساعة 1 والعقربين واگفين على الـ12
يعني الساعة طاحت الساعة بالوحدة ضبط

رعبني الوقت لأن هاي مو اول مرة يصير وياي حدث مؤذي يخليني افقد عقلي بهيج وقت

تمددت بفراشي حطيت ايدي على عيوني ابجي بدون ما اطلع صوت
الف مشكلة الف سالفة
كل شوية صدمة ، وتالي وتالي!! يمتة تتوضح الأمور

مسحت دموعي من سمعت الباب يندك وشلت راسي فاتت عمتي جايبة العصير خلتني اشربه غصب
_الحمدلله على السلامة شلون صرتي

_زينة عمة

_ اني راح انام يمج الليلة خاف يصير بيچ شي

_ عمة اني كلش ثگلت عليكم وجودي سببلكم ازعاج خلوني اطلع بيت وحدي وارتاحو من همي

ضربت على ايدها وكالت بعتب _ما مقبول هذا الحچي منچ
بعدين طلعتي وحدج وصار بيچ مثل الصار اليوم
منو الج منو ينقلج للمستشفى
طحتي، تسممتي، طفر حرامي، منو يمچ؟

لا تتوقعين نقبل نخلي بتنة وحيدة تصارع الدنيا وحدها واحنة موجودين وروسنة تشم الهوى

نامت بالجهة الثانية ، وگالت _ نامي يله ارتاحي لا تفكرين بأشياء تعبانة تأذي نفسيتچ وتعلعل گلبچ الهم البيج كافيج لتزيدينا ولتشيلين همنا احنه قابلين نتعب وياچ وعاجبنا

_الله يحفظكم ما تقصرون اثبتولي انتم اهل ينشد بيكم الظهر

_ويحفظج النه يالغالية

غمضت عيني بسرعة غفيت بسبب التعب
كعدت الصبح على صوت هوسة بالبيت وسوالف وضحك
رفعت رأسي باوعت عمتي ماكو مكانها خالي
الساعة وكفت ما ادري بيش

گمت طلعت للحمام غسلت وفرشت اسناني وعيني على الاستقبال تجي منه اصوات عالية
الظاهر عدهم ضيوف ، مشطت شعري ورفعته كباية وطلعت للمطبخ

جمدت رجلي بباب المطبخ من شفت نسوان ، كل الانظار توجهت الي
_صباح الخير

ضحكت وحدة وردت _ يا صباح الشمس معلگة صار ظهر امي
الحمدلله على سلامتچ گالو مريضة

_الله يسلمچ عيني

نزهة _تعرفين الجماعة؟

شيهانة _لا وين طبعا مو صغرًا بيهم بس ماعرفتهم

نزهة _ هاي لمعذربة شيماء اخت ام عادل الجبيرة
وهذني الحبايب المايعات خوات ام عادل الزغار "شذى و عواصم"

_تشرفت بيكم، اني شيهانة

شيماء _نعرفچ نعرفچ شايفتج من جنتي صغيرة ، ما شاءالله صايرة شحلاتچ تجيبين العين

_ عيونچ الحلوة مو اني

شذى _ بدون دلع عاد لا تسوين روحچ متواضعة هههههههههههههههههههه

خزرتها اختها وهي كملت
شذى _ والله ماجذبت هيَ حلوة تكلج لا عيونچ الحلوة والله لو اني بمكانچ ما اتواضع واگللها اي اني حلوة واجيب العين شتردين بعد

شيماء _ اعوذ بالله من لسانچ

نزهة _على اساس انتِ عايزة لسان شو معذربة

شيماء _ ما ضل عليَ غير نزهة تحجي عليَ تهي بهي
فرت ايدها ،، انتِ شبيچ واگفة جنچ فزاعة تعاي گعدي گابلينة نظفي ويانة الخضرا
لفي ويا البنات دولمة شنو خطار ونعزم بيچ على الشغلة

خجلت لميت شفايفي ضغطتهن وگعدت يم البنات الف وياهن دولمة .. جانن يسولفن اندمجت وياهن وسالفة جرت سالفة ما حسينة غير مخلصين جدر دولمة جبير
وحطينا على النار

شيماء _شحلات الشغل من يصير معاون ولا احب المطبخ من يصير فارغ وبي مرية وحدة تفتر
اني بالبيت اوگف بناتي ثنينهن وياي يله يرتاح گلبي

شيهانة _ حلو قبل زواجي هيج چنه بس بعد الزواج تغير الوضع لان عيالي ماعدهم مرأة تطبخ لو تشتغل كل شي يجي حاضر

شيماء _ والله خوش بس الواحد هم يمل لازم يلاعب ايدينه
وعن نفسي لو هسة يسطرولي عشر خدامات اكوم اوكف وياهن بالمطبخ على الواهس

عواصم _ شومة انتِ تموتين على الركضة ، تجيلي للبيت تلگاني اقرأ روايات لاجاثا كريستي تاخذهن مني تضمهن تخليني اكوم افر البيت فر انظف حتى الحيطان
يله ترجعلي رواياتي لو بيدها تخليني اعبر على الجيران

شذى _ مو بس هيچ تصيح علينا
تقرن جرايم راح تصيرن سفاحات تسميني ام طبر تخيلي

شيهانة _ ليش؟

شيماء _ بصغرها طبرت رأسي بطبر ملعونة السلفة لحد هسة اكو أثر برأسي

شيهانة _ والله تخوفين لازم ناخذ الحيطه والحذر منچ

صاحتلي عمتي واخذتني للاستقبال جريت نفس عميق وفتت
وبدات تعرفني على الناس من ضمنهم امها الحجية سلمت عليها بوستها
عرفتني على اخوانها وازواج خواتها وثنين من نسوان اخوانها كاعدات

سلمت على الكل وطلعت ،، جان خالة شيماء گالت
_ امي حبيبتي ما عليچ أمر ما تصعدين تنزليلي المواعين الفرفوري من المخزن

رمشت بعيوني وحجيت _ وين يا مخزن

شيماء _ ما تندلين؟ فوگ يم باب الصحيات اكو باب مال مخزن تلكين بي نص مواعين علياء هناك مسطرتهن
اكو بيهن فرفوري لونهن ابيض يصيرن كبار مخليتهن علياء بداخل معرض جام موجود بالمخزن
نزلي منهن الكاسات الكبار والصغار والصحون الكبار

شذى روحي ويا البنية ساعديها ركضي

شذى _ شومة داثرم زلاطة صعدي انتِ

شيهانة _ يا شسالفة اني انزلهن وحدي كملي ثرم حبيبتي

صعدت الدرج ركض هاي اول مرة اصعد ،، باوعت للبيبان ، باب كبير ويم الباب نعولة ثنين الظاهر هاي شقة هدير

وباقي البيت مفتوح بصالة كبيرة كعدة بيها وتلفزيون وبيبان
عرفت باب الحمامات لان جان قريب كلش من الدرج تقريبًا صاير جوا الدرج مال السطح

مشيت فتحت الباب فعلا ممر بي مغسلة وحمامات ومراية طويلة عجيبة تخبل

فتت وكفت كبالها درست شكلي ،، جنت لابسة ثوب بسيط يوصل لنص الساق ، ردانة جوة العكس يعني ثلث ارباع
لونه سمائي فاتح بس ماعجبني شكل شعري فليته نثرته
نزلت گـذلتي ورفعت باقي شعري ابتسمت لنفسي برضا

طلعت سديت الباب وفتحت باب المخزن
عبارة عن رفوف بالحيطان ومعرض بي جام كبير
لاحظت جدورة ومشاعل ومواعين اشكال والوان

فتحت المعرض نزلت منه كل المواعين المطلوبة حطيتهن على الكاع علمود بس انقلهن ،، سديت الجام حتى ما يتربن المواعين

نكتت ملابسي واخذت بايديني كاسات مرتبتهن وحدة فوگ الثانية
التفتت وفتحت عيوني بخرعة وشهگت
_جبران خرعتتتني!!! طلعلك صوت طلعلك طرگاعة وگفت گلبي

خزرني بدون رد ، باوع لطولي وگال _ انه انزلهن انتِ روحي بدلي لبسيلچ شي اطول وأستر
وهذني عطوبچ رفعيهن ،، لا اجيب المگص واطكهن الج من العرك احشهن حش

_ لا يمة؟ شبي لبسي عمتي وعمي راضين علي وما كلولي بدلي ، وگذلي عاجباتني اريدهن يلعبن على خدودي شغاثك؟

_لچ ولد خوالي كلهم جوة

حجيت ببرود
_ وين المشكلة عمتي گالتي عادي اعتبريهم اخوانچ
شسالفة ماعندك ثقة بيهم؟ چا المن مدخلهم بيتك

رد بغضب
_ اييي عادي مثل اخوانچ نزلي افتري كدامهم بثوبچ الكصير والحجل يرن برجلج كلش عادي اصلا كلهم راضعين وياچ
وانه ازين شاربي واگعد اباوع ، طبيعي

_ اجيبلك مكينه الحلاقة
_ لاااا حول ولا قوة الااا بالله شلون راح اجنزها

_ شنو تجنزني؟ ترة ما اقبل تحجي وياي هيچ تمام وخر خليني انزل المواعين

اعترض طريقي منعني اطلع رفع اصبعه بوجهي وگال بتهديد
_ لچ شوفي وحگ أسد بغداد اذا ما اختفيتي من كدامي وطبيتي للغرفة و طلعتي لابسة غير لبس اشگ ثوبچ عليچ وقد اعذر من انذر

حركت كتفي وقوست شفتي بعدم اهتمام لكلامة
_شگه .

ضرب بأيدينه ثنينهن على رأسه وگال
_ يااا صبر ايوووووووووب يا صبرررر ايوووووب

نزلت جزء من المواعين وهوَ نزل وياي الباقي باوعتله بمكر ،، لاحظته ضل يحوم

وما خلة ولا ولد يفوت للمطبخ لو للصالة الجوة كلهم بالاستقبال

گلبنا الدولمة وحطينه كلشي ضل بس نقل الأكل ،، شفت نزهة حطتلها صينية جبيرة جمعت بيها الاكل تريد تصعده لهدير ..
فكرت بسرعة وگلت هدير لازم اطلع اسوء ما بداخلها عسى ولعل تزللها زلة تبينلي الحقيقة لو تنطيني خيط

مديت ايدي لزمت ايدها باوعتلي بتساؤول اشرتلها بعيني على كاونتر
_حطي الصينية نزهة لا تصعدينها

_ترزلني مالي خلگ اسمع حچيها وتسممني بي

_عوفيها گتلچ هيَ تخدم نفسها بنفسها شنو تشتغلين خدامة عدها؟

علياء _شبيچن؟ امي ليش تخزرين بنزهة

_ماكو گتلها تعوف الصينية
_صينية هدير؟
_بلي صينية هدير شو مسويتكم خدم عدها؟ شنو حلوة هيچ؟ ناطينها مجال زايد

_هي تريد امي شعلينا نصعدلها الاكل
_سؤال عدها مطبخ؟
_طبعا

_هذا هو كليلها يا تنزل تاخذ الاكل لنفسها بنفسها يا تطبخ لروحها وتاكل
زايدة منكم هاي تصعدولها الاكل ،، وهي تاكل وتمسح ايدها بالحايط بشية بشة
فريت ايدي والتفتت

شفت خالة شيماء تباوعلي بأعجاب ، بس انتبهتلها حجت موجهة لكلام لعمة علياء
_والله حچيها ذهب هاي البنية وحچت الضامته بگلبي من زمان بس جنت مستحية منج وماردت اسبب مشاكل

علياء _نزهة صعديلها الاكل هسة واني العصر اصعد احجي وياها وافهمهة

نزهة _صار

شيماء _شوف البشر اذا صار حقاني لا يعرف اخو ولا يعرف اخت يوكف ويا الحق دائما
بعدين عيب والله عيب معلگة فوگ وتصعدين البنية نزهة الهة
ترة نزهة هنا مثل اختج وتساعدج مو خدامة لست هدير

علياء _ما اگدرلها داده

ليلى _اختچ صدگ صلفة ابد ماحبيتها مادري ليش احسها سببتلج مشاكل

شيهانة _ اختي هدير من الصغر تغار مني بس ما جانت هيج ، ما اعرف شنو غيرها؟
وخلاها توصل لهذا الحد من الحقد والسم والصلافة

نزهة سولفتلي گلتلي هدير مرة ضاربتها راشدي لهذا السبب اني ماخليتها تصعدلها الاكل بعد
واعترضت على هذا الشيء وهم لسبب ثاني ردت هدير تغضب وتحجي وتطلع كلشي بداخلها

ليلى _شصار وراها؟ عمتچ حجت وياها

شيهانة _اي ونزلت المدام تعيط
((من اجت وكلكم گلبتو ضدي شسالفة؟ عمت عيونكم مثل ما جانت عامية ابوي وجدي ومسكتتهم))

عمي عصب گللها _صعدي هديرررررررر لا تخليني اغير تصرفاتي وياچ

خزرتني بغضب وگالت بصوت مسموع _ام السطوووح

الكل سمعوها بس غلسو عبالها ما يدرون بالفات ما تدري بيت عمي جانو مؤيدين لعلاقتنة ورادو ياخذوني لجبران
بس بعد الصار صار ...... تنهدت بضيق ودرت وجهي

اجالنة امر نگوم للتنظيف تحزمنة وبدينة بتنظيف السجن ، السجانات بس يفشرن
لو بيدهن يخلنة نشيل الارضية نغسل الجواها ونرجعها

اني وليلى فتنة لوحدة من الحمامات طشينة الماي بالكاع والمنظفات وبدينه نغسل

ليلى _تالي عمري اغسل خ*** الضباط امداني هذا الماعندة حظ

شيهانة _هههههههههههه شتگولين عليَ اني خليها سكته والله وكت اني الچنت عايشة ببيوت تنلحس عليها الزبدة
هسة صرت بهذا السجن القذر ابو الفيران والوزغ

ليلى _وزغ؟

شيهانة _يعني جرابيع

ليلى _هسة اني عرفت الوزغ حتى اعرف الجرابيع

شيهانة _ولج ابو بريص نسمي وزغة لو جربوع

ليلى _عزة بعينچ مصطلحات عجيبة غريية اگلچ هسة عوفينة شوفي الساعة هاي

رفعت رأسي شفت ساعة ذهبية محطوطة على المغاسل قوست شفايفي باعجاب واخذتها گلبتها
_ هاي ذهب ولچ

_ تخبل بس شكلها رجالية؟ لو مال السجانات شو هنة وحدتهن كرشها شكبرة وايديها تكول ايدين هايشة

_لا لا لج رجالية هاي تشبه ساعة جبران

جاي نحجي وانفتح الباب فات واحد سمين شوية على اكتافة نجوم باوعلنة بنص عين وفات للحمام
رجعنة الساعة بمكانها وكملنه تنظيف
هو طلع وسد الباب ورا

ليلى _عزة بعينة شنو ماكل جريذي؟ شو الريحة طلعت ورا خايسة لعبت روحي راح اتقيء

شيهانة _تلگي زارطلة راس بصل على شوية فجل وكراث

ليلى _اي والله

شيهانة _ليش تحلفين بالتواليتات وتجيبين اسم الله ،،يااا ياااا استغفرالله يااااااا

ليلى _سكتي لا تفجرينها خليها مضمومة

كملنا شغلنة كله الحمدلله ،، سبحنة اجيت كعدت كدام ليلى صارت تمشطلي شعري وتسولف وياي
نحجي بعض المواقف الي صارت ويانه

تنهدت فجأة وسكتت

_الظاهر بحلگچ حچي هوووواي طلعي

ليلى _ اريد اسولفلج شنو صار ورا فترة

_ كلي اذان صاغية

_ سمعي ،، ورا ما صهيب ضرب ابو ريحانة بعد ما شفناهم ثنينهم

حور ارتاحت لان صارت بأمان وسلام ، والايام بدأت تمشي حضرت لامتحاناتي النهائية
جنت كل يوم امتحن اجاوب واطلع مرتاحة

بأخر يوم حسيت جبل انزاح عن ظهري وارتاحت نفسيتي بعد ما كملت المرحلة الاولى بخير ..

كافئت نفسي بحلويات وگعدت على المصطبة اكل

صارت عيني بعين قيس صار اكثر من أسبوعين ما حاچين اني ويا ، لان احنة بالأساس ما نحجي برا هواي
اكثر شي بالقاعة بوقت انتظار الدكتور

شفته تقدم بأتجاهي ،، فجأة صار يمي ابتسمت بادلني الأبتسامة وگال

قيس _هلا خاتونه شلونج بالامتحان

ليلى _زينة تفضل .. حجيتها ورفعت النستلة
اخذها من ايدي وگعد بالطرف الثاني للمصطبة ناطيني وجهة
ميلت گعدتي وصارت مقابيلة

اخذ قضمة من النستلة ورفع حواجبة _طيبة والله مشكورة

ليلى _بالعافية

قيس _شلون الاوضاع يمچ؟

ليلى _بخيرر
حجيتها وتنهدت
رفعلي طرف حاجبة بتساؤول ابتسمت ورديت _انت شلونك؟

قيس _الحمدلله جاوبت بالامتحانات وهذا اهم شي حاليًا

ليلى _قيس نطلع؟

قطب حواجبه بتساؤول _وين؟

ليلى _برة نتمشى او نروح لشارع العلوم نتمشى بي

قيس _برة ما نطلع بدون علم خالتچ امشي للعلوم

شلت اغراضي مشينة صفة السكوت كان سيد الموقف
اكو بحلگه كلام بس متردد يطلعه
ربما خايف او خجلان

باوعتله من جوة لجوة وگتله _ متغير كـشكل يعني صاير احلى من قبل ولحيتك صايرة اكثف

اتسعت عيونه بصدمة وفجأة ضحك _ مصيبة انتِ مصيبة
عمري وحياتي ما سامع بنية غريبة تگلي حليان وملاحظة كثافة لحيتي
امي بس تتغزل بيَ حتى خواتي ما يتغزلن يستحن مني

ليلى _ اني ما استحي؟ حجيت بزعل

قيس _ حشاچ حشاچ اني اقدر الفروق بيناتنة وملاحظها

ليلى _ شنو هي الفروق؟

قيس _ هواي ليلى هواي منين ابدي
و وين انتهي ،، ما اريد اعددهن بس اريد اسألچ سؤال

ليلى _تفضل
قيس _مثلًا مثلا اذا خطبچ واحد مثلي نفس شكلي واسلوبي وديني والتزامي وعائلتي بس طلب منچ تتحجبين وتلبسين عباة مبدئيًا ، وبعد الارتباط يبدي يعلمچ على الالتزام .. تقبلين؟

وگفت ساكته باوعلي ينتظر مني اجابة وبسرعة نصة جريت نفس عميق اداري بي ارتباكي

ضاف على كلامه :- ادري اليريد محجبة ياخذ محجبة واليريد ملتزمة ياخذ ملتزمة بس اليح... اليريد ما يگدر والستر حلو مابي شي ويزيد من مقام الانسان بالدنيا والاخرى

عقدت حاجبي محتاره تنهدت ودرت وجهي منه
_اگدر اجاوبك بغير وقت؟

قيس _براحتچ خاتون بس بعد ما اشوفچ منا للسنة الجاية

ليلى _اتصل عليك

طبگ شفايفه وضغطهن باوعلي بتفكير بعدها گال
_اني اخابرچ كل جمعة الساعة 10 مساءً
شنو رأيچ؟
حتى اعرف اخبارچ بالعطلة وما ننقطع فد مرة

_موافقة سيد قيس

تقدمت بمشيتي صرت امشي قبله وهو وراي بخطوة جر حسرة وگال بصوت خافت
_يَ منبع ذنوبي
يَ الگايدني الجهنم

سمعته بكل وضوح التفتت باوعتله بطرف عيني
_ شنو حچيت سيد؟

_ما حجيت شي! متوهمة

_سـيد

صفن بوجهي لحظات تنهد وگال _ نعم خـاتون

_انطيني اول ذنب ارتكبته بسببي

_باوعت لبنية محرمة عليَ وركزت بتفاصيلها واني عمري ممسوي هذا الشيء

_اني؟
_اكو غيرچ؟

ابتسمت ودرت وجهي مشيت _شحلاته هذا الذنب خلي برگبتي سيد انتَ بريء منه

تحسر ولحگني عاقد حاجبة ومبين علي الأنزعاج ، گال بضوجة
_احچيلج باقي الذنوب لو نخليها سكته

_ ههههههه ثاني ذنب شنو؟

_كذبت من عزمتچ للعرس بس چنت مضطر ردتكم تتعارفون
رفعت حاجبي
كمل _انتي وامي أقصد

_الذنب الثالث

_خليتيني اسمع أغنية واني عمري وحياتي ممسويها ولا داخل لأذني صوت حرام

فكيت عيوني بصدمة _ويا اغنية سمعت؟

_شيجيب باچر لهيثم يوسف سمعتها بصوتج مرة ومرتين بصوته
ربي يغفرلي وهو شاهد اني تبت وماراح اعيدها واسمع اغنية مرة لخ

_الظاهر اني تارستك ذنوب

حچة بصوت خافت _ ويا محلة الذنوب التجي منك
انا تايب لله بس لوانك ذنب بكل حيلي اريدنك

_سمعتك سيد

_جوابچ على سؤالي راح يكون هوَ الحل لكل مشاكلي والماء الطاهر الراح يغسل ذنوبي ويطهرني

_شلون تريدني افكر وأقبل وانتَ تشوفني ذنب وتريد تتطهر مني؟

_لچ انتِ جنچ شيلة امي ترهم سجادة صلاة يا ذنب خـاتون
حچاها مبتسم

_هسة گلت جوابج راح يكون الماي الي يطهرني من ذنوبي
وگتلي ترستيني ذنوب

_اي بسببچ سويت ذنوب وهذا الشيء اني مسؤول عنه اكو شي بداخلي جبرني أذنب

_يعني اني مو ذنب؟

هز رأسه بـ لا _اني المذنب والذنوب ملطخاتني هم

_سـيد امشي اگولك لا تضل واگف كل شوية توگف

ابتسم بانت غمازاته حافرات خده ضحكت شكله بريئ يشبه الأطفال من يضحك

_____________

هدوء ، اذا وگعت الأبرة ينسمع صوتها
نزلت امشي على أطراف اصابعي اباوع منا ومنا خوفًا من سيد رحيم

طلع بوجهي سيد هاشم ، رفع طرف حاجبه وگال بصوت خافت
_قيس؟ شبيك تتخنس مسويلك مكسورة

قيس _ الله يبعدني عن المعاصي اني ما ارتكب المعاصي
هاشم _ماگتلك معاصي بسبب خوفك ألقيت بسرك أمامي
قيس _مكسورة تعني معصية هذا الفهمته من كلامك

ربت على كتفي وگال _ولا تكون كالذين نسو الله ... ؟
باوعلي بتساؤول كملت _فأنساهم انفسهم

هاشم _ انتبه سيد وجودك بمكان مختلط قد يأخذك الى التهلكا
لا تسلك طريق ابليس سيد

بلعت ريگي اباوع بوجهة ينظرلي بأهتمام
رجعت بلعت ريگي بخوف ضاعن الكلمات عجزت عن الرد
كان فاهمني وعارف كل شيء يدور بداخلي

هيَ ليلى ويا لسوء حظي بأني قيسها ..

اكملت طريقي للأستقبال ، سديت الباب بدون قفل
بقانون هذا البيت ممنوع ينقفل الباب اثناء أستخدام التليفون
والسبب اكيد معروف حتى ما نتكلم ويا بشر من الجنس الأخر وتقع الفاحشة

اني مو ضد قوانين هذا البيت بالعكس اني مؤيد
وما احب استسهل الحرام
ولا أنظر لبنت او اتكلم وياها بشيء غير ضروري جدا
لكن هاي المرة شيطاني وازاني ..

حطيت الرقم ورفعت السماعة حطيتها على أذني ، وضليت أنتظر اجابتها

ردت بسرعة وكأنها واكفة يم التليفون تنتظر اتصالي

قيس _السلام عليكم
ليلى _عليكم السلام اهلا سيد

قيس _شلونچ ليلى؟

ليلى _ماينعرف حالي بهاي اللحظة ، شنو اخبارك

قيس _ ما تنعرف اخباري

ليلى _سيد تقلدني

قيس _هههههههههههههههه شنو سويتي بهذا الأسبوع

ليلى _رحت للزوراء ويا ريحانة وحور وخالتي تغدينة هناك كلش نونسنه
هذا الكلام اليوم والايام الفاتت لا كانت مملة بس كاعدة بالبيت

قيس _شجابكم للزوراء

ليلى _صعدنة بسيارة شغلها السايق وأخذنا ، الجمعة التجي هم نشوف النة مكان ونروح وعلى الأغلب راح يكون ........ حتى نتغدة على دجلة اذا تجي اكون سعيدة

بلعت ريگي افكر لحظات ، ما بين ايماني والتزامي وحبي وغرامي وكعت بحرب
بعد تفكير استمر لحضات الشوگ وازاني اريد لقاء اروي بي ضمأي لرؤيتها ، گلت
_نعم اجي الساعة 11 واضل انتظر جيتكم

رديت ، سمحت للشيطان يسيطر على عقلي وقلبي

ردت هي بصوت هامس _ متفقين سيد

غمضت عيوني ، حسيت روحي تعرقت
جريت نفس عميق وگلتلها _ ليلى محتاجة شي؟
ليلى _سلامتك ممحتاجة شي
قيس _تصبحين على خير ليلى
ليلى _وانتَ من اهله قيس ..

نزلت السماعة حطيتها بمكانها وخليت ايدي على قلبي غمضت عيني وارتچيت على القنفة
ياللهي ياللهي ، كثرت ذنوبي اختنگت من كثرتهن
اكتبها حلالي وتقبل توبتي

استغفرك يا رب من كل ذنب ، واتوب اليك من كل معصية
احرمني لذة معصيتك يالله واسعد قلبي بحلالك

هاشم _هاي نتائج الحب اذا ما كان لله

فتحت عيني مفزوع ، زميت شفايفي بغيض وخزرته

_تتصنط علي سيد

هاشم _لا اعوذ بالله اجيت للمكتبة وسمعت اخر كلمات مجبر

قيس _اياك تذيع سري

هاشم _مو لهاي الدرجة سيد شنو شفتني فتان؟ الفتنة اشد من القتل
ما اريد اوصل لهاي المواصيل
بس راح انصحك ، كعد يمي وحط ايده على ذراعي

_من كنت تحجي ويا البنية ، خايف يدخل احد ويسمعك وتتفشل وتخجل وينزل راسك
نسيت اكو رب يشوف كل شيء وسمع كل شي حجيته وياها ويعرف مخططك كله

ليش يا اخوي سلكت هذا الطريق ليش
وتتواعد وياها فوك ذنوب المكالمات ذنب النظر

قيس _ وهل تلوم القلب أن هوى؟
ام تذم العقل ان ضاع؟
يأسرني الشوق كل ليلة والى ليلى الفكر ينساق

هاشم :- سـيد توكل على الله وتقدم لخطبتها ، الزواج سنة الحياة
ويستر الانسان ويمنعه من الوقوع بالفاحشة
هوَ ستر للرجل والمرأة ، اني اشوف لو تصارح الوالد وتتوكل على الله
احسن ما تضل هيج وتذكر حديث رسولنا الحبيب
يقول يا معشر الشباب :- من استطاع منكم الباءة فليتزوج ، فإنه اغض للبصر و احصن للفرج
ومن لم يستطع فعليه بالصوم ، فإنه له وجاء

قيس :- عليه الصلاة والسلام صدق الرسول

هاشم :- بعد انتَ سيد قادر والحمدلله لا تطولها وهيَ گصيرة استر نفسك وقلبك وعقلك بالحلال معا هذه البنت ، واتوقع نفسها الاجت لعرسي غريبة تكلمو بيها الاهل وبحسنها استغفرالله الله يستر عليها

قيس :- نعم هيَ سيد عاشت ايدك وخوش ملاحظ

هاشم :- عيونك بابليه وتسولف هواي من يمر طاريها لهذا السبب لاحظت
واتوقع الباقين كذلك كدرو يشوفون اعجابك بهاي البنت بس عيبها ماتلبس عباة

قيس :- هاي مگدور عليها تعال للمصيبة الكبرى البنت مو علوية عامية
هاشم :- لعد؟ منين ترجع
قيس :- من عشيرة ..... عامية الوالد سيد رحمـن راح يعترض
هاشم :- يقتنع في حال وافقت البنت تتغير وتلبس عباة ونقاب وتتستر وتلتزم بالدين وشرع الله بحذافيره

تنهدت ومسحت وجهي بقوة باوعتله بحيرة ..

هاشم :- افهم منك الاخت ما عدها رغبة تتغير

قوست شفايفي ورفعت اكتافي كعلامة على عدم معرفتي وجاوبته ..
قيس :- متحررين بشكل كبير ، صعبة بين يوم وليلة البنت تتغير وتصير مثل علوياتنا بس الله كريم
وكلت امري لله وهو نعم الوكيل

هاشم :- الله يكتبلك الي يتمناه قلبك لكن تذكر كلامي البدايته حرام وما ترضي الله ورسوله نهايته توجع گلبك
اترك الحرام والمواعدات والله يعوضك وياها سنين مديدة بالحلال

گام توجه للمكتبه يأخذ كتب ورجع كتب وحچة موجه الي بعض التحذيرات
هاشم :- يا ويلك يا قيس اذا سيد رحمـن عرف بيك تتكلم مع بنت على التليفون والله يغضب عليك غضب ما صاير
لا تنسى هوَ كان معارض دخولك للجامعة حتى يبعدك عن الاختلاط والوقوع بالحب مع بنت وتكون معها علاقة خارج اطار الزواج ..

قيس :- ليش تحسسني كفرت؟

هاشم :- لا تستهل الحرام سيد شوية شوية تتعود ويصير سهل وتسوي الذنب بضمير مرتاح
وهاي شگد كبيرة عند رب الكون؟
يشوف عبده يعصيه وبضمير بارد

قيس :- راح استعجل واشوف حل للموضوع

هاشم :- المصلحتك اني واله اني منو وانصح اخوي الاكبر؟

ابتسمت كـ رد على كلامه اخذ كتبه وطلع ، كمت غسلت وجهي وتوضيت صعدت لغرفتي سجادتي ممدودة صليت صلاة الليل وضليت گاعد على سجادتي اناجي ربي في جوف الليل
قرأت ما تيسر من القرآن ونمت ..

اجة اليوم الموعود متوتر جدًا وگفت اختار لبس كل ثيابي مو مناسبة گلابيات وجلبات ودشاديش ، ما البس بناطيل غير بوقت الدوام وما عندي منها الكثير
زفرت بضجر وبخت نفسي لأن ما نزلت للسوگ واخذتلي قميص يكون مناسب او تيشيرت مريح

مرت بمخيلتي وابتسمت ، وتذكرت الاغنية واستغفرت ربي
بس فعلا الكلمات جاية عليَ ومضبوطة
حرت شلبسله باجر اني يوم باجر التقي ويا اجمل انسان ...
صدك محتار
اخير شي اخذت قميص رصاصي رسمي وبنطلون قماش اسود
لبست خواتمي وساعتي مشطت شعري ورشيت عطر
رتبت لحيتي بأيديني ، خليت فلوس بمحفظتي و نزلت ..

سيد عبد الرحمـن :- قيس؟ وين يابة؟
قيس :- طالع ل.... اتغدة على دجله
سيد رحمن :- وصلاة الظهر جماعة تصليها على دجلة
اني احب تكونون كلكم واكفين بصفي ورا الامام ونصلي سوية جماعة

قيس :- يابه اكو جوامع اصلي بيهن وعد وما تتأخر صلاتي دقيقة

هز رأسه برضا نزل رداناته وگال يحذرني
:- مرة لخ تتعذر او تصلي ويانا بعدها تطلع هسة من يسألون عليك السادة والشيوخ شأگللهم يابة سيد قيس يتغدة على دجلة هسة يظنون بيك سوء ويگولون سيد قيس تغير بعد التحاقه بالجامعة وصار يطلع عزايم ويترك صلاة الجماعة

قيس :- تأمر يابة

بسري استغفرت الله وطلعت بسيارتي للمكان المنشود ، كبير وعوائل كثيرة متواجدة ومتوزعة ضليت اتمشى واروح اجي على امل المحها او تجيلي بنفسها

ليلى :- خالة فدوة ، باوعتلها بتوسل گلبت عيونها بضجر وباوعت لحور
:- مو اكلچ ابن السادة ماكل گلبها تلوميني انت الخ
حور :- خليها يا نسومة على الاقل هي تعيش حياتها وتحب انسان يسوة يرفعها ويعلي مقامها خو ما مثلي ومثلچ؟

نسيمة :- شبي صهيب لعد عاد يعرف شبينا وشلونا داده بس هذا ابن السادة ما يدري

حور :- بس يريد يتقدم رجعيها العمامها وخل يطلبها من عمامها وكان الله يحب المحسنين

ليلى :- اني رايدة اشوفة واحجي ويا وانتن تخططن للخطبة؟ ترة بعدنا ما گلنا حلال ولا متفقين على شي

نسيمة :- گومي امي روحيله بس گليله گولت لخالتي لمحت السيد بالصدفة ورايحة اسلم علي وسوي روحج خايفة مني وعود اني ما ادري انتي جايبته

حور :- يمة منج نسومة
نسيمة :- اي غير حتى ماياخذ نظرة علينا ويكول هذول سفردحي تمردحي

ليلى :- صارررر ادللي ..

كمت امشي وادور علي بعيوني باوعت لساعة ايدي صارت 11 ونص ، معقولة ميجي
قيس :- ليلى؟
التفتت شفته انرسمت على محيياه ابتسامة فرح
واني هم ضحكت وكتله بشهگة :- خووووفتني منين طلعت
قيس :- من دجلة

ليلى :- نزول عليك

ضحكنا ثنيناتنا ونصينا خجلانين من بعض
رفع رأسه گال
:- وين خالتج
:- گلتلها لمحت زميلي قيس ورايحة اسلم وارجع

:- صارت بذمتي مو

ليلى :- لا ممم قيس اني ردتك تجي حتى انطيك جواب
مرة سئلتني اذا تقدملي شخص نفسك ونفس التزامك وطلب مني اتحجب والبس عباة والتزم اوافق او لا

بين علي التوتر لم شفايفه لداخل ثغره بحيره بعدها تنهد وگال بتردد :- اذكر وكنت منتظر اجابتچ ..

ليلى :- اي اني اقبل اذا اجة ودگ بابي وطلب ايدي للزواج وشرط عليَ التزم راح احط ايدي بايده واسلك الطريق الصحيح
يجوز تگولي هسة تغيري لرب العالمين من ذاتج ومو علمود شخص
بس اني راح اگلك مرات الله يدزلنا شخص يفتح عيونا وعن طريقة نبدي نسلك طريق التوبة يمكن بدايتها ماتكون خالصة للرب بس نهايتها اكيد اله هذا الشخص راح يفتح عيوني ويفتح عين گلبي ويخليني احب ملاگة رب العالمين ويدخلني بجو رحماني ويخليني احب الدين

رد بلهفة وعيون تلمع بفرح :- رفيق وحبيب صالح يصلح ما افسده الزمان ..

ليلى :- بالضبط

قيـس :- اتوكل على الله وافاتح سيد رحمـن بموضوع الزواج هذا قرارج متأكده منه
ليلى :- طبعا هو اني شنو اريد قابل بنية بسيطة وگلبي عجينة وطبعي ماي تشكلني وتتحكم بيَ مثل ما تريد بس طبعا بحدود

قيس :- شنو هي الحدود
ليلى :- احترامي وكرامتي خطوط حمر اما عن التزامي وديني مسموحلك تطلب مني الي تريده وتحجي عنه حتى تعلمني

قيس :- كرامة الانسان خط احمر لا يمكن ان اتخطاه
بيوم من الايام
واذا على الاحترام اني قدوتي النبي وآل بيته بعد ماله داعي اكملچ الايام تثبت

ليلى :- والنعم بالمناسبة اني لينه بس ويا الاودهم گبالك ماي ويم غيرگ حجر صلد

قيس :- تعلميني بيچ؟ غير اعرفچ

جان يحجي وعيونه تلمع

ابتسمت حثيته على مرافقتي والسلام على خالتي بعد ما گتله تعال سلم وخلي خالتي تحطلك من الاكل الطابخته حيل طيب نسومة نفسها طيب بالاكل

تقربنا هو من ما باوع بوجوهم سلم بثكل خالتي حلفت علي ما يمشي اذا ما ياخذ صحن وياكل كعد بطرف الفرشة متربع وساند ايدينا على رجلي سابلهم

نسيمة :- عيوني جاي انت والاهل

قيس :- لا ويا الاصدقاء تركتهم وتمشيت والتقيت بليلى صدفة
نسيمة :- فدوة للصدف الحلوة الله قاسملك تضوگ طبخ خالتك نسومة

قيس :- والله هاي گعدتي يمكم ما الها كل داعي كلش خجلان ... قاطعته خالتي
نسيمة :- يااا يااا ماما لتگول هيچ ما اقبل عيوني انتَ لو ما گاعد وداعة ليلو ازعل وما اخليها حتى تسلم عليك بعد

ضحكت ونصيت هو كان محرج وصاير احمر من الخجل ، كل شوي يمسح جبينه ورقبته وينصي يسبح
اني كاعدة كباله وبيناتنا مسافة زينة

قربت الصحن منه رفع عينه وطرف حاجبه باوعلي ونصه بسرعة
بدينا ناكل خالتي اخذته حاصل فاصل تسأل وهو يجاوب ربع ساعة تقريبا وترخص ودعنا وگام راح ..

حور :- چلبي بي بأيدينچ وسنونچ ليلى
نسيمة :- فدوة لله مستحي شگد متربي هلوليد اني عن نفسي حبيته بس شما اشوف يا ليلى ما بيناتكم نصيب

حور :- القسمة لو رادت تصير تسكت اكبر حلگ
ريحانة :- يعني اخذ جعفر ابن ام جعفر

نسيمة :- يمة حتى المزعطة عاشگة ونسومة محد مگلبها
حور :- عجل شمتوقعة

نسيمة :- ياا يا دمعت ليلى
مسحت دمعتي بسرعة ونصيت اكل هي كملت
:- اي غير احجي الصدك يا امي تردين اجذب عليج واگلج باوعلي ليفوگ وتالي تنكسر رگبتچ

حور :- نسومة تقصد الولد ابن حسب ونسب ومال ودين
ليلى :- واني لا حسب ولا نسب ولا مال ولا دين

نسيمة :- عليچ نور .. بس عندج جمال واخلاق

ليلى :- اتغير اني اتحجب والتزم بس يتقدملي وان شاءالله عن طريقه اصير احسن مرة
نسيمة :- والله هذا الاريده بس بعد اذا صارت ..

كملنا اكلنا وگمنه كعدنا على الشط شوية ، ريحانة چانت تلعب ويا اطفال من عمرها طوبة
عيونا عليها شوية ومر رجال بعربانه يبيع شعر بنات

ربحانة باوعتله والتفتت باوعت الامها گامت نسومة ومشت اخذت ريحانه من ايدها لأبو العربانه واشترت على كدنا شعر بنات ولگت عنده بيض الحمام ملون هم جابت ثلث اكياس واحد الها واحد الي واحد انطته لحور ..

اجرنا تكسي ورجعنا للبيت ..

شيهانة ...

دخلت السجانة تصيح علينا بغضب وراها ثنين ، يدفرن بينا وكل احنة ضلينا نتطافر وگفتنا على الحايط معاقبات

:- ساقطات وين ساعة الضابط بنات الخر* حسرة تلگن شي الا حطيتنا ببطونجن
هيج هيج منجن وضلت تسب
وتصيح على البنات يضلن يفتشن بأغراضنا وجوة فراشاتنا

وحدة منهن شالت فراشي وطلعت الساعة من جوة فراشي
صاحت هذا فراش منو؟
بهتت انبلع صوتي من الصدمة
البنات كالن بأصوات متفاوته .. سهير .. شيهانة ..

..... وللحكاية بقية 🖤