رواية حمائم تخشى الطيران الفصل الأربعون 40 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو 1000 تصويت وتعليق لطفا 🔥🖤🖤🖤

........

سمعنه صوت موسيقى طرقت اذني ورجعتني بذاكرتي ليورا ، گلبي ضل يرجف وحسيت صدى بأذني اجة بأذاني صوت رائد جورج وهو يغني "لا ترحلين" باوعت لليلى الخايفة وفزيت من مكاني ..
شيهانة :- جبران هذااا جبران اجة والله جبران
رجع جبراني
ركضت وهي تركض وراي تصيح ولج لالالا خطر لا تفتحين الباب
فتحت الباب بدون ما اهتم بلهفة عاشقة للقاء معشوقها ، عيني صارت ع السيارة الواكفة كبال البيت ويطلع منها صوت الاغنية باوعت لمكان السايق شكله غريب عيني تجولت بالسيارة بلحظات وثبتت ع الكشن الورا السايق واشوفه گاعد مثبت عينه علي ...

شهگت خليت ايدي ع حلگي رجفن رجليني
فتح باب السيارة ينزل طلعت من الباب اريد اركضله رجليني ما شالني طحت ع اركبي

ركض علي رفعت ايدي ودموعي تجري
:- جبراااان

ما اصدك عيوني اشوفه كبالي شكله متغير كبران هواي والشيب تارس راسه رجل اربعيني بشكل رجل خمسيني ، لابس بنطلون وقميص عادي ابيض
عيونه حمر ثابته علي ويركض باتجاهي ويحجي ما جنت اسمعه شنو يكول بأذني وشة صارت

احاول اكوم وارجع اطيح ع اركبي ، رجليني ماتن

الموقف لحظات بس جان عمر بالنسبة الي ما مصدكة عيوني وصل الي لزمني من زنودي رفعني عن الكاع بسرعه لصدره حضني حيل ورفعني عن الكاع لفيت ايديني ع ركبته وخليت راسي بيها غمضت عيني اول ماشميت ريحته وارتخت روحي وجسمي
كبل دخلني من الباب للبيت وهو حاضني ورافعني عن الگاع

جنت ابجي واشم بريحته ما مصدگة شفته ما مصدكة رجعلي ، براسي مليون سؤال انتظر يجاوبني عليهن واريد اكعد ويا كعدة عتب طويلة
وابجي بحضنه واعاتبة وارجع احضنه وابوسه واشمه لحد ما ارتوي منه

حسيت بدكات كلبه وهو حاضني وبهزة اكتافه وهو يبجي وحاضني حيل وكل ما احس بلزمته ارتخت يرجع يحضني اقوة حسيته ضلوعي وجعني

شلت راسي وسحبت ايديني لزمت وجهه اصابعي تخلل شعر لحيته اباوع لوجهه كله دموع ويباوعلي عيونه حمر وحالي امر من حاله
اباوعله لوجهه ما مصدكة والزم بي شلت ايدي امررها ع وجهه واحجي
:- صدك انت جبران صدك رجعت مو حلم الله عليك جاوبني سمعني صوتك اريد اصدك

هز راسه وغمض عيونه بتعب وفتح كال بصوت مبحوح
:- انه انه جبران رجعت وحك اسد بغداد رجعت

بجيت اكثر والزم بوجهه جنت مثل المخبلة ردة فعلي غريبة الزم بي اتفحصه
شيهانة :- ليشش عفتني ولك كسرت روحي تمرمرت بفراكك جبران تمرمرتتتتت والله روووحيييييي ررراااحت

جبران :- مجبور على الفراگ مو بأيدي
ميلت راسي مقهورة وابجي عاقد حواجبه وعيونه تجري دموعه بللت ايدي

حضنته حيل اشم بي :- وين جنت جبران
جبران :- مسجون
شيهانة :- سودة عليه حبيبي سودة عليه

رفعت راسي اتلمس وجهه اتاكد هو فعلا كبالي لزم راسي من ورة جر راسي يبوس بوجهي بلهفة
غمضت عيوني خله وجهه ع وجهي يتنفس سريع احس بانفاسه تضرب وجهي حارة واختلطت دموعي بدموعه

شيهانة :- تعال جوة نكعد وخليني اخابر بيت عمي انطيهم خبر برجعتك
جنت احجي واني مغمضة ومخليه وجهي بوجهه
همس :- لا تخابرين عوفيهم

فتحت عيني باوعتله محتارة ولميت شفايفي للداخل وخرت راسي ليورا
رفع ايده يشيل كذلتي النازلة ع وجهي ويميل شعري يخلي ورا اذني لزك بوجهي

جبران :- انه حاجيتهم يدرون بيه رجعت
هزيت راسي اي مديت ايدي ع الباب قفلته وابتعدت عنه
جبران :- احاجي السايق يروح
التفتت باوعتله بتساؤول محتارة اريد اعرف شنو صار ويا وشلون رجع و وين جان

هزيت راسي بعد صفنة فتح الباب من خوفي ضليت واكفة ورا اباوعله من راح حجة ويا لحد مارجع دخل
شيهانة :- بس اسويلك طريق للاستقبال اوكف

ركضت لكيت ليلى مو بي اشرتله دخل ومشيت جوة للبيت المغسلة صارت بوجهي وكفت شفت وجهي خريطة من البجي وشواربه لان بوس وجهي غسلت وجهي وركضت للغرفة اشوف ليلى

بس دخلت كامت ركضت حضنتني تبجي وتبوس بيه فرحانة
ليلى :- ان شاءالله اليوم جبران وباچر ابنائج بحضنج

شيهانة :- الله يسمع منج رايحة يمة عذريني ماخليته يروح ماصدكت يرجع

هزت راسها ومسحت دموعها مشت للفراش شمرت فراش كالت
:- اخذي فراش وبعد لترجعين ضلي يمه شبعي منه عليج بالعافية

شيهانة :- جا شنو ينام اني عندي الف سؤال وحجي طويل ويا
ليلى :- اي احجو ونامو

هزيت راسي شلت الفراش دخلت للاستقبال شايلته شمرته بالكاع باوعتله كاعد شابك اصابعه من شافني ضحك
جبران :- شنو نعسانة
شيهانة :- لا بس حتى ماطلع بعد
هز راسه

فرشت وشلت المواعين اتحرك واني ممصدكة احس روحي حلمانة وهسة افز
دخلت لكيته متمدد ع الفراش مخلي ايده ع عيونه سديت الباب شال ايده
كال باحراج :- خاف عيب من البنية العايشة. وياج اخابر السايق يجي ياخذنا للفندق؟

شيهانة :- لا موعيب ، تقربت كعدت كباله خليت ايدي ع صدره سندت روحي علي
شيهانة :- شمدريك عايشة وياي بنية ومنين اندليت البيت

جبران :- غير انتي وعمار ما مخلين بشر ما ناطينه الرقم والعنوان مال البيت بس سألت كالولي يابة ترة مرتك تدورك هذا رقمها وعنوانها
وهم تواصلت ويا خوال عمار وطلع حسنين يعرفج حق المعرفة ويعرف ويامن عايشة

ضحكت :- مرتك .. هسة حسيت بشعور الحجاية هاي شكد حلوة

جبران :- مرتي وحبيبتي وكلشي حلو بحياتي انتي الامل الجان مخليني مقاوم الموت وعايش وانتي السبب الوحيد الضليت عايش علموده

شيهانة :- مممم دريت شنو صار ويانه؟

هز راسه مقهور ومد ايده يلعب بشعري
:- وعيونچ راح اخذ حقج وحقنا مربع

شيهانة :- منين تاخذه من الطفرو برا العراق

جبران :- رجعو ورا السقوط كل ظنهم محد راح يحاسبهم ما يدرون الموت منتظرهم

شيهانة :- شلون عرفت

سكت تنهد وكال :- ما الج دخل بهاي الامور انتي خليها يمي

شيهانة :- لا تخوفني جبران اني كلبي خلصان وما اريد اخسرك مرة ثانية هذول باطل ويمشون بدروب شيطانية و وصخة وانت نظيف ماتكدرلهم

جبران :- النظيف يكدر يطلع وصاخة الجايف ويكتله بيها حبيبتي

سكتت محتارة وخايفة
جبران :- اني صرت قوي لا تخافين علي

شيهانة :- شلون ما اخاف عليك واني كلبي خلص وانكطع بالانتظار تدري شكد بجيت ؟ شكد نمت واني بأمس الحاجة الك ولحضنك؟ فراكك سلني سل وماريد ارجع اخسرك

جبران :- اششش كافي كتلج لا تخافين ثقي بيه

شيهانة :- احجيلي شلون اختفيت وين رحت يعني ماكو هيج طلعت والطلعة طلعة

جبران :- اجاني واحد من المنطقة عرف بسيارته كال صاحبك عمار متصوب بالمستشفى والله انه انخبصت كال تعال وياي ركضت صعدت ويا من باب اعرفه وجار النه
اخذني نسولف وسأله عن حال عمار شو شوية وصعدو ثنين زلم بالسيارة هيه طكة ع راسي بس خلتني الشوف الدنيا كلها سودة
غمضت هاي العين وفتحتها بالسجن لا تحقيق ولا محكمة

شيهانة :- الله لا يوفقهم
جبران :- سرسرية

شيهانة :- شكد دورنه عليك لا ضلت مستشفيات لا سجون
جبران :- ضيعو ذكري
شيهانة :- عرفت السبب؟
جبران :- لا بس من طلعت تواصلت ويا عمار وحجالي كل شي

عدلت كعدتي مصدومة
:- هاي يمته
جبران :- صار شهور بس انه وصيته مايحجي لا تكعدين تحجين علي وتلومين جانت عندي غاية ردت اوصلها يلا اجيج

بجيت وضربته بقبضة ايدي ع صدره
:- نذل شلون تسوي هيج بيه شلون
لزم ايدي خلاها ع صدره

جبران :- تفهمين كلشي بعدين حبيبتي وتعذريني
شيهانة :- شنو اعذرك شو انت ماتعرف تحجي شهوور اني ادور عليك وحضرة جنابك الكسيف ضام راسك عني

جبران :- اششش سكتي
ردت اكوم زعلانة واحس الدم صعد الراسي
جرني حيل طيحني ع صدره يضحك
جبران :- الغايب عذره ويا تتوقعين اطلع من السجن وما احجي غير لشخص واحد واضل بعيد عن العالم بدون سبب وعذر مقنع؟

شيهانة :- ومن سألتك منين عرفت تكلي انتي وعمار مخلين العنوان طلعت تعرف كلشي ومسوي نفسك كلش

جنت احجي بغضب منفعله لزمني من شعري حيل جر راسي باس شفتي حيل غمضت عيني حسيت جسمي ارتخى اول مرة يبوس شفايفي
رخت ايده راسي اندمجت ويا ذابت روحي

بعد شفته عن شفتي مسافة بسيطة همس وهو عيونه ع شفايفي
:- رضيتي؟

ضربته ع صدره ردت ابتعد جرني حيل شمرني ع الفراش وذب روحه فوگي
:- وين رايحة؟ شاب راسي وانه انتظر هاي اللحظة وانت تشردين وتزعلين؟ اجلي كلشي عتابج وزعلج لغير وكت

بلعت ريكي بصعوبة غمضت عيني رفع صبعه خلا ع شفتي يتحسسها رجفت شفتي جوة صبعه
همس بخدر :- احبهن

همست :- ورانه حجي طويل جبران
جبران :- خليني اسولف حبي وعشكي ولهفتي بالاول
شيهانة :- جبران ...
جبران :- عيونه

شيهانة :- مشتاقتلك هواي

باس شفتي بوسة طويلة ابتعد وهمس
:- اذا انتي مشتاقة انه ميت

شيهانة :- جبران
جبران :- فتحي عيونج حطيهن بعيوني وكولي حبيبي

فتحت عيوني شوية ذبلانات رفعت ايدي خليتها ع لحيته همست :- حبيبي

مو همست حبيبي لا انطيته الضوء الاخضر انكلبت احواله حسيته من كد لهفته وجنونه راح يموتني

اتحدت انفاسنا وصرنا واحد بهاي الليلة
الليلة هاي كانت حلم النه بنهاية الثمانيات
عشقنا بعض بالثمانيات تمنينا بعض بالثمانينات
بس ما كان النه نصيب

قطفنا ثمار الحب بالـ 2004
سنين طويلة ننتظر هاي اللحظة سنين نتمنى نكون بهذا القرب من بعض
واليوم تحققت رغباتنا ..

ذبيت روحي ع صدره تعبانه ميلت شعري شمرته
خليت ايدي ع صدره مررته ع اسمي الموشوم ع صدره
شيهانة :- صاير مدكدك
جبران :- الينسجن يصير مدكدك
رفعت راسي لميت الغطة ع صدري وكعدت ادور الوشوم

واحد ع زنده مكتوب "الارقط"
واحد ع كتفه من كدام مرسوم اسد

شيهانة :-صاير مستهتر
جبران :- ما يعجبج المستهتر؟
نصيت بسته بطرف شفته :- لا يعجبني

مد ايده كرصني بفخذي :- شنو هاي تنورتج الجوزية اذا لبستيها بعد اشگها عليچ
عطت متوجعة :- اوووووي
:-وجعووي والرجلين مبرومات يلالن

:-وين شفتننييي
:-شفتج عمار كال راح تجي معزومة يمنه وانه تلثمت وكضيتلج الشارع كاعد ورا واباوع للباب وشفتج نزلتي من التكسي والتنورة مرفوعة للركبة نزلتي وعدلتيها ونثرتي شعرج ليورا بشكل مغري ردت انزل اسحلچ من شعرچ

:-شحدك

:-لا شحدي اشوف مرتي تمشي تخبل جنها فلقة من الكمر ومتزوكة والتنورة لاطشة وكصيرة وانه اباوع لان شحدي
غير ردت ازين شاربي بالقندرة

باوعتله بدلع :- بس جنت طالعة اخبل
جبران :- امانة الله مال تخبلين فعلا تخبلين

تمددت نمت ع صدره سكتت ما احس هسة وكت عتب ولا شي غمضت عيني حتى انام بحضنه مرتاحة

ضل يلعب بشعري ، ما جنت مستوعبة هو صار يمي وراسي ع صدره احس بدكات كلبه وريحته تارسة ريتي!!

جبران :- صارلي 16 سنة منتظر هاي اللحظة .. 16 سنة سهير

ضليت ساكته جنت ذبلانه بحضنه لدرجة ما عندي قدره احجي ولا حرف واحد
جبران :- نمتي؟

همست بذبول :- لا ، روحي خدرت

ضحك جر ايدي يبوس بيها خلاها ع رگبته
غفيت بدون شعور حسيت بحركته فزيت مفزوعة
كتله بخوف :- وين رايح؟

جبران :- ما رايح لمكان حبيبتي يمچ بعد عمري

غمضت عيني تعب وذبيت روحي ع الفراش
جبران :- حبيبتي غسلي ملابسي حتى اسبح والبسهن وجبت الصلاة واحنه مامصلين

هزيت راسي جريت ملابسي لبستهن هو يباوعلي
:- مو جاي البس شكو تباوع
جبران :- اشوف ابداع الخالق مد ايده كرصني بخصري وغمز
:- يخبل .. كلشي بيج يخبل ويستاهل الانتظار والتعب

شيهانة :- اوووي لا تكررص

:- وجعووي

شيهانة :- كافي نوجعت حد ماكلت بس
جبران :- يخسى الوجع يوصلج وانه يمج هسة صرت موجود بحياتج اصيرلج درع

طفرت حضنته وبست خده بوسات موزعه وقوية :- فدوة احبك احبك احبك
لزم وجهي حيل باس شفتي :- اعشگنچ عشگ ما ينوصف
يا طين معجون بعسل صافي ، يا ريحة هيل

ضحكت ابعد بي سحبني حيل من خصري يبوس بشفتي حيل حاولت ادفعه ما يندفع
مد ايده يرفع ملابسي ضحكت ورخيت ايدي
ما منعته وخليته يسيطر علي وياخذ رغبته

كمت مستحية هسة ليلى كاعدة هي تكعد من الصلاة
اخذت ملابسة وطلعت اغسلهن وانشفهن
وهي اجت التفتت باوعتلها غمزتلي وركضت للغرفه

خلتني اغط بهدومي المطية تلمح ، كملت غسل الملابس مالته خليتهن ع الحبل

مشيت للاستقبال ارتجيت ع الباب
وحجيت :- رايحة اسبح حتى تفوت وراي وانطيك ملابسك

غمزلي :- سبحيني وياچ

شيهانة :- عيب منا البت فاسد

ضل يضحك متمدد غمزتله وطلعت

رحت اطلعلي ملابس ليلى امددة شافتني وضحكت
:- شبيكم ماعدكم صبر هسة عاد سوو عرس

شيهانة :- انجبي هوا رجلي المن العرس ، لا اني عندي صبر ولا هوا ما صدكنا يجي هذا اليوم

ليلى :- مبارك عليكم .. صباحية مباركة يا عروس

:- الله يبارك بيج حبيبتي

اخذت ملابسي وفتت سبحت ، من خلصت اجيت للغرفة فتحت الكنتور وصفنت بي صفنة طويلة دورتلي مناشف طلعت منشفة وبرنص جبير يدخلون بي نفرين اجة عدل وكبل

مشيت للاستقبال
شمرت البرنص: لبسة اطلع بي للحمام وهاي المنشفة يلا تعال

لبسه: هذا مالمن
شيهانة :مالي بس جبير اشتريته عود افيك وتاجرة تلبس برنص وتطلع تفتر بي بالبيت وما لبسته مالي خلك

ضحك اخذته للحمام علكت المنشفة ، صليت و مشيت للمطبخ اسوي ريوك طلعت بيض اسوي مخلمة وحطيت الجاي
صاح :- حبيبتتتيييي

ركضت جريت ملابسه مديت ايدي انطي لزم ايدي حيل يجر بيه واني اجر بيها فلتتها كوة وركضت للمطبخ طفيت جوة الطاوة وركضت للاستقبال طويت الفراش

شلته اريد اطلعه وصاح غلست علي ذبيت الفراش بالغرفة وركضت للحمام
كتله اطلع
طلع بسرعة للاستقبال يصلي ركضت حضرت الصينية اخذتها للاستقبال لكيته يورث جكارة

خزرته ومشيت اخذتها من بين شفايفه
ضحك ورفع طرف حاجبة
خليت وجهي بوجهه :- شنو الحلو بيها وبشنو تفيدك؟

جبران :- تكعد الراس

لزمت وجهه وبسته بشفته :- هسة كعد راسك؟

جبران :- اشتعلت

:- عوف التدلع سويتلك ريوك من ايديني الجميلات
رفعت ايديني بوجهه وجريت عيوني بغرور

جر ايديني باسهن :- يعيشششن يعيشششن

كعدنا نتريك سألته شنو رد فعل اهله من عرفو بي موجود. ورجع

تنهد وصفن شوية وجاوب :- ليش اجذب عليج ما خابرتهم ولا كتلهم اليوم اطلع للبصرة واشوفهم وجه الى وجه

صفنت علي محتارة :- شنو هذا ليش عايش بالجذب جبران فهمني شنو فلمك

ضحك تك خد وهز ايده
:- فلمي طويل .. سمعي بالسجن صادقت شخص مسجون جان جبير بحزب ضد النظام وصار صديقي كلش فد نوب مرة رادو يكتلونه بأبرة بالسجن وانه جنت كاعد كبل كمت من فراشي وحجيت ويا السجان كتله شنو جليل بي شي?

ذاك اصفر لونه وكال لا وطلع كعدت جليل وانطيته علم بالصار وبعدها صرنه حذرين واحد ينام والثاني كاعد يحرس تخيلي صرنه مناوب وسنين ع هذا الحال

ينام جليل انه اضل كاعد وعيني علي خاف يكتلونه انام انه هوا نفس الشي

من صار السقوط واقتحمو السجون وطلعنا جليل عنده ظهر جبير كبل لبسو ثوب السلطة مثل ما نكول
صار صاحب مكانة وانطوها اله مقدما من اول ما طلعنا انت يا جليل راح تكون من ضمن الحكومة الجديدة
هسة صح الاوضاع مو كلش استقرت بس بعد هم اهلها ويعرفون شلون يديرونها

هزيت راسي منتظره يكمل
جبران :- وانه جنت ويا جليل من طلعنا سوية وكالي راح يكون الك نصيبك لانك تستاهل
رفعت حاجبي وحجيت .. ايي

جبران :- وانه اريد السلطة ، ما اكدر اخذ بثاري وثار عمار بدونها

سهير :- وصرت وياهم بالحكومة

جبران :- وشبيها الحكومة؟ بعدين ما صرت كلش مثل ما متوقعه جوة من جليل

سهير :- والله مادري خاف صعبة جبران شلون تكدر

هز راسه اي :- نكدر ليش الصارو كلهم شنو نصهم حتى شهايد ماعدهم خيرهم مخلص متوسط
سهير :- اي زين انت ليش ما انطيتنا خبر برجعتك

جبران :- ردت تكمل شغلتي وانشغلت هواي ليش اجذب عليج خفت عليج و ع اهلي اول فترة جانت صعبة وبيها خطورة حتى ع حياتي

سهير :- وهسة؟
جبران :- هسة لا استقرت اموري صبري بس يكملون اثاث البيت اخذج بي
سهير :- بيت؟
جبران :- اي بيت هدية من جليل

سكتت ما عجبني كلامه حسيت جبران صاير غريب
ومو عوايده يقبل هيج هدية جبيرة من شخص! يمكن من ابو مايقبل

شيهانة :- اخذني وياك للبصرة اشوف اهلك رحتلهم مرة وحدة روحة سريعة ورجعت
جبران :- هسة اخابر السايق ويجي مسافة الطريق تلحكين تخلصين؟
شيهانة :- شعندي بس كون نرجع بسرعة

جبران :- نحاول يومين بالهواي واهلي اجيبهم هذا الشهر يمنه مااخليهم هناك يموتون قهر

هزيت راسي ضليت اسولف ويا عن المعاناة مال السجن بس حالهم امر من حالنا معانين هواي ومتعذبين
كال زلم ما سلمو من الاغتصاب بالسجن

:- اسكت احنه محافظين ع نفسنا كوة بينا مابينا ساترين نفسنا وكوة كدرنا نبعدهم عنه

هز راسه برضا :- اصيلات

سكتت كال اريد اتصل بالسايق
:- عدنه تلفون بس اسويلك طريق

كمت شفت ليلى بعدها بلغرفة كتلها جبران راح يطلع يتصل
هزت راسها طلعت كتله تعال
خله رقم واتصل
شوية ورد سلم
كله هلا غفار ... تجيلي نطلع للبصرة بس مر جيبلي ملابس مال يومين وتعال
ونهى الاتصال رجع للاستقبال

كتله بحيرة
:- شلون وضعك ويا عمار وهو جان ويا ناس يعتبرون اعداء جليل

جبران :- وضعي ويا طبيعي هذا صاحبي ولا انه اضره ولا هو يضرني من كتله راح اصير صاحب منصب
اول شي تخوف بعدين كال صير بس لا تلطخ ايدينك بدم واحد بريء وخليك نزيه

والحمدلله جان راضي وكتلج احنه اصحاب ما تفركنه مناصب وانتماء وغيرها

سهير :- الحمدلله طمنتني

مشيت اطلع ملابس الي واحجي ويا ليلى اسولف الها والحيرة كتلتني
كالتلي :- شنو عبالج الجانو معارضين موزينين؟ شنو نغشمين نفسج لو ما انتي انسجنتي ضلم خلينا ساكتين ترة النظام السابق تعبان وكله ظلم

شيهانة :- وهسة شنو شفنه الانفجارات والكتل والضيم
ليلى :- قابل الحكومة؟ غير الوضع صعب امريكان بصفحة وكل طائفة تصيح احنه اهلها
ماكو واحد بريء جماعة النظام السابق يتذابحون ويا الجماعة الاجو ورا السقوط يعني ماكو واحد احسن من واحد

شيهانة :- كلتيها ماكو واحد احسن من واحد يعني ثنينهم سيئين
ليلى :- غير لكل فعل رد فعل .. انزرعت بذور الفتنة وسگوها دم
طبيعي تشوفين النار شابة

بعدين جبران شنو تذابح وياهم قبل لو هسة؟ شو قبل فقير يمشي بصف الحايط وهسة صار يمج وراقبي

هزيت راسي ايد وبدلت لبست بنطلون اسود وقميص ماروني مشطت شعري وخليت ليلى تسويلي البرجم بالشسوار

تمكيجت واخذت مكياجي وياي رشيت عطر واخذت جنطتي علكتها بكتفي وشلت جنطة الملابس وحذائي بأيدي الثانية ورحت للاستقبال

دخلت لكيته مثعول الاستقبال بالدخان
شمرت الجنطة وخليت ايدي ع خشمي
:- شمسوي شنو هااي شبيك جبران

ضحك وطفاها بكلاص الجاي باوعتله اكو كم كطف مطفيهن بالكلاص

باوعلي باعجاب وجرني من ايدي كعدني ع رجله
:- لج شنو هاي اميرة النسوان انتي
باسني بخدي وضل يلعب بشعري ويتخيل رد فعل اهله من نروح عليهم

مر الوكت بسرعة واجة السايق غفار دك هورن كمنه طلعنا ثنيناتنا اخذ جنطتي السايق نازل اجة بسرعة اخذ الجنطة وركض فتح الباب الورا

صعدت اني وجبران بس صعدت سد الباب ودار من الباب الثاني وهو يحجي ويا غفار
:- صعد الجنطة حتى نطلع بسرعة

دار صعد من الباب الثاني يمي وصعد السايق وانطلق بينا للبصرة ..

ماكدرت احجي رغم اكو هواي اسأله براسي
كلت اسكت واخلي الايام هي تبين كلشي الي ليش ادوخ راسي؟ يعني اذا جبران صار صاحب منصب يعني هاي هي فسد؟ ليش كل هل المناصب فاسدين؟
اكيد لا لو خليت قلبت واني راح اراقبه اذا شفته مو جبران القديم ارجعه بطريقتي ..

كسر حاجز الصمت من سألني
:- حسنين يكول مشروعج ماشي تمام التمام شلونه عاجبج ومتحمسة تكملين بي؟
شيهانة :- حلو ومسولف ويا عن مشروعي

جبران :- غير انه طلبت من عمار يشوفلج اكثر واحد يثق بي ويتفق ويا بعدها يقترح عليج يشغله وياج وتسلمي الامور

فكيت عيوني بصدمه قوست شفايفي باعجاب
وحركت اظفري ع ايده الي لازم ايدي بيها
:- خوش والله طلعت من بعيد مداريني

جبران :- جا شلون غير اداري مرتي هههههههه مرة مريت ملثم من وراج بالسيارة هزيتي ايدج ماعجبج

فكيت عيوني اكثر ونشغت
:- هذا انت؟

ضل يضحك ويهز راسه
:- جا انه مراقبج اول باول
بس تواصلت ويا عمار حجالي كلشي صاير وياج وكل ما يستجد شي يوصله الي

شيهانة :- ممممم
رفعت حاجبي قلد حركتي
شيهانة :- اجاوبك ع سؤالك .. اي مرتاحة بي ومتحمسة اكمل حبيبي حسنين ما مقصر شايل الحمل وكلشي ماشي زين

جبران :- الحمدلله

شيهانة :- وعندي مشروع اريد ابدي بالنجف شراكة ويا ابن عم ليلى البنية الكاعدة وياي صديقتي
رفع حاجبة بتساؤول :- شنو من مشروع

حجيت اله كلشي وسولفت اله عن هادي صدمني من كال
:- اعرف هادي زلمة جاي داخل طاب عليجن شلون ما اسأل علي؟ سألت عمار انتي مسولفتله عنه كايلتله زين بس المشروع هذا ما حجالي عنه

:- اني هسة حجيت الك
هز راسه :- اروح وياج ونشوف اريد اسندج واكون وياج بكلشي واصير رفيقج بالنجاح
ضحكت وقربت روحي لفيت ايدي حول زنده حضنته وخليت راسي علي
:- اروحلك فدوة حبيبي

طريقنا طويل تعبت وغفيت ع ايد جبران فززني صوته من مال لغفار
:- اخيرا دخلنا للبصرة

شلت راسي من ع كتفه
:- صح النوم
:- صح بدنك
انطاني ماي شربت ضليت اباوع لشوارع البصرة
:- نزل الجامة اريد اشتم ريحة ولايتي

نزل الجامة ضليت اباوع للشوارع لحد ما وصلنا لمنطقتنا القديمة التفتت باوعتله بعيونه متجمعة دموع وهو يباوع للشوارع
خليت ايديني ع الباب ومديت راسي والهوى يلعب بشعري
:- جبران هوى البصرة يخبل فدوة جن ريحة من الجنة
جبران :- لا تطيحين حبيبتي
لازمني من قميصي يجر بيه

واني طايرة من الفرح ومستمتعه
جرني حيل دخل راسي من الجامة
:- كعدي وسكتي لا تتعورين

ضحكت وغطيت حلكي ضل يسولف ويا غفار يحجيله عن المنطقة وبنفس الوكت يدلي بي

لحد ما وصلنا للمزرعة حسيت كلبي طار فرحت
رغم من رجعت اول مرة انكسرت وبجيت هنا بس كد العذاب الشفته والغربة هسة فرحت لان اعرف اكو كلوب تحبني بداخل هاي المزرعه واكو ناس تنتظرني متلهفة ..

نزلنا اني وجبران دكينه الباب والجرس
انفتح الباب فتحه الفلاح
سلم جبران ماعرفه بس عرفني ورحب بيه وفتح الباب

جبران وهو يدخل باوعله وكله
:- انه ابن حجي حميد جبران

الزلمة نشغ وكله انت المفقود

جبران هز راسه وذاك اكله بالسلام ويتحمدله بالسلامة
كاله جبران افتح الديوان للسايق

هز راسه وركض واحنه نمشي للبيت بنص الخضار مال الحديقة الامامية شحلاته يرد الروح

من وصلنا اكو باب مال صالة داخليه ضحكت وكتله خليك وراي الله عليك اريد افاجئهم هم من اجيت الهم هنا يكعدون من الصبح لليل

هز راسه وكف ع صفحة فتحت الباب وسبحان الله لكيت حتى زهراء ورجاء موجودات وكاعدات وعمي. ع القنفة مكعدينه ورافعين رجلي لان تعبانات
وعمتي تكشر برتقال بنص البنات وصوت الجهال جاي من جوة البيت

من شافوني فرحو عمي صاح يا هلااااا

ضحكت و ضليت واكفة بمكاني وهن يكومن حتى يسلمن علي مشيت سلمت بوستهن وبست راس عمي

باوعتلهم وعيوني انترسن دموع
مشيت للباب
صاحت عمتي عوووفي احنه انسده

وكفت يم الباب مبتسمة
:- عندي الكم مفاجئة

علياء :- خير ان شاءالله

مديت راسي اشرتله هم ولا توقعو جبران ادري بيهم عبالهم ميت وماله رجعه بعد

هو دخل بس دموعه خانته حتى قبل لا يشوفهم
شافته عمتي وهي صرخت
علياء :- يييييمة يممممة جبررران يمة

والبنات شهكن ويصيحن جبران خووية
وعمي من صدمته بس يباوعله وفاك حلكة

ركض جبران ع عمتي وهي ركضت علي
حضنها يبوس براسها وايدها وهي تبوس صدره وتبجي
وماكو ع لسانها غير جبران يمة
وهو ضل يبجي مثل النسوان ويحضن بيها

خواته ما انتظرن اجن يبوسن باكتافه وهو يحضن بيهن ويا امه ويبوس بيهن تلاثتهن بروسهن

ركضت ساعدت عمي يكوم وانطيته عكازته

عافنه حتى يسلم ع عمي اجة علي متلهف وفاتح ايدينه وتشابك ويا عمي طاحت عكازة عمي من ايده وضل واكف ع حيله حاضن جبران

لقاء حار وخله دموعي ع خدودي ما نشفن
جبران :- بوووووية يا بوووية انه جبران الاخذوني منك عبالهم يكسرونك بس انت جبل ما تنحني

حميد :- لا بوية الجبل انحنى فراكك اخذ حيله
جبران :- من حيلي ع حيلك تاج راسي
اكعد بوية ارتاح

ساعده كعده ع القنفة
امه واكفه ورا تباوعله ما مصدكة اجت تلزم بي مثل ما سويت اني بالضبط جانت متهسترة ما مصدكة
وتبوس بصدره

جبران :- ست الحبايب امي ارتاحي رجع وليدج

علياء :- ييييمة ما مصدكة شفتك ابو طول الحلو يمه كبران مشيب كلش سودة علي

جبران :- جا شسوي

كعدو وبدو اسأله وين جنت و وين رحت وشلون طلعت واكلو اكل
واحنة ما متغدين ونسينه نكللهم ما متغدين وهم من فرحة اللقاء نسو يسألونه ما حسينه غير الدنيا صارت ليل

فرغولنا غرفة ورا الصلاة ارتاحينه بيها وتعشينا
وضلينا 3 ايام يمهم بس ماشفت جبران الاقارب والاصحاب ترسو البيت كل شوية جايين مجموعة يتحمدوله بالسلامة ...

............

ليلى .. راحت الشيهانة للبصرة ويا رجلها
شكد فرحت بس بنفس الوكت ضجت لان راح افاركها من تروح ويا رجلها
بس يلا ع الاقل رجعلها جبران لانها مسكينة مكتوب عليها تفارك احبابها دائما ..

ع الاقل هاي المرة خليها تنجمع وتعيش ويا شخص تحبه وتريده

دزيت ع خالتي تجي يمنا لان اني وهادي نخاف نضل وحدنا ، اول يوم مر ثاني يوم الصبح اجة اتصال من هادي كال راح اجي لبغداد السيد خابرني عندي شغلة وياج و ويا

ضليت ابلعم باوعت لخالتي ورجعت السماعة لمكانها
:- يكول عنده شغله وياي و ويا السيد بس لا يكلي رجعيله بالقران العب لعب

نسيمة :- هسة كبل طفرتي ع الرجعة يجوز يطلكج يجوز الشغلة تخص ابنج

ليلى :- تخصه شنو ياخذه مني؟ اخذه واشرد بي محد يلگالي اثر وحق الله
نسيمة :- ليش داده اني اخذج واشرد وياج عفا عليج ما اعوفج

ليلى :- انتي وين اكو منج خالة

نسيمة :- اكلج بالله رجعي سولفيلي لقاء هذول زوج الحب

ضحكت وكعدت كبالها
:- خالة هي طلعت تركض عرفته من الاغنية وهو من شافها نزل من السيارة رادت تركضله بس طاحت ماكدرت تركض من الصدمة والفرحة لو شايفة شلون اجة لزمها من زنودها ولمها لصدره رفعها عن الكاع ودخلها للبيت ورد الباب برجله وهي راسها بركبته

وشلون حاضنها فدوة يخبلون بس بعدين استحيت اضل اباوع ركضت للغرفة

وضل هنا بالليل والصبح سبحو

نسيمة :- اهم شي سبحو

ضحكت :- نزول عليج

نسيمة :- اي والله تكمل الحب هسة لو ترجعين لابن السادة هم تبوسين بي هيج وتحضنين بي

ليلى :- ما اريده ولا اريد ارجعله غير راح وكمل حياته وخلف ثنين النوب القهر اسم بنته ليلى

نسيمة :- من زود المحبة مسميها ع اسمج
ليلى :- لا من قلة ذوقه يسمي بنته ع اسم زوجته السابقة بدون ما يفكر بشعور زوجته بس هم الزلم بدون احساس

نسيمة :- ههههههه فلشج اكلج صدك ابو خلدون يسلم عليج
ليلى :- الله يسلمج وين شفتي
نسيمة :- غير اول البارحة يمي
ليلى :- ما اتوبين ابد

نسيمة :- بالحلال
فكيت عيوني
:- شبيج اخترعتي ترة ابو خلدون عاقد علي بالسر من سنين وبنين بس احنه ما حجينه تدرين بالعالم من حلك الحلك وتوصل المرته

لطمت ع راسي وصرخت :- يبوووووي ام الطراكيع والمصايب يبووووي يبووووي

طلع هادي يركض مخترع :- شبيج ماما
:- لا ماما مابيه شي حبيبي جاي اسولف

جر نفس وغمض عيونه :- عبالي طحتي

ليلى :- لا حبيبي ارجع العب مابيه شي لو اجي العب وياك
هادي :- تعاي

كمت وطبكت السبابة ع الابهام وكتلها :- العب ويا ابني احسن ماضل يمج تسودنيني
عاقد عليها هوا علمود شنو عاقد علمود النومة لو بي خير عاقد عليج يوفرلج مصرف وعيشة كريمة ويخليج تبطلين شغلج وتأجرين بيتج للحفلات ولل استغفرالله

نسيمة :- يااا هو هسة يكلي بطلي وهو يحط بايدي بكد الاحصله
:- ما تبطلين شمنتظره
:- افكر بعدني روحي للطفل خليني اسوي غدا علمود من يجي المتوحش ابن عمج يتغدة

:- علمتج الشيهانة

:- اي المفلوكة مسميته اسم عدل

رحت العب ويا هادي وهي تطبخ غدا خالتي ما استغرب اي شي تسوي هي متعودة تصدمني وتخليني مصفنه

وعقد ابو خلدون عليها لا يقدم ولا يأخر بس حتى يحلل النومة

لعبنا اني وهادي هواي تعب ولزم القراءة يقرالي يسمعني شنو حفظ وشنو تعلم من حرف ضليت اكتبه
وطلعنه الاوراق مال القرعة كاتبة بيهن اسم السور القصيرة نسحب وحدة كل اسبوع واحفظه الايه زين ع قلبه يومية احفظه اسبوع يضبطها

خبطت الاوراق سحب ورقة طلعت سورة القدر

كعدت احفظه واعلمه شلون يقراها ويلفظ الحروف ويرتلها
علمني قيس الترتيل جنت كل ما اعلم هادي ارجع بذاكرتي ليورا

واتذكر من يكعد يقرا قران واجي الزك روحي يمه
ويضل يعلمني واقرا بصوت جنت ارتبك وهو يشجعني اعلي صوتي وارتل وكل ما اغلط يوكفني ويعلمني اللفظ الصحيح

كل شي تعلمته من بيت السادة جاي اعلمه لهادي وبيت ابو محمود ما مقصرين انطوني الطفل وهم مخلين الاساس الصحيح واني بس كملت علي
شكد ما ادعيلهم بالخير احس روحي مقصرة لانهم يستاهلون اكثر واكثر

وصل هادي واحنه نقرا ما توقعت مرن ساعات لحد ما باوعت للساعة
الوقت ويا ابني يمر بسرعة وهذا الشي يفرحني
احس ما راح اتعب وبسرعة تركض ويا الايام وراح يكبر .. ويرد عني وحشتي

كمت لبست ربطة واسمع صوته يحجي ويا خالتي وسلام ركض هادي قبلي يسلم علي

طلعت ورا هادي شفته يدخل ويا للاستقبال
ضربت ايدي وكلت ويا روحي
شوف شلون ما منظفة الاستقبال هسة شفوته هناك بس لا عباله الشيهانة موجودة

مشيت ورا دخلت سلمت علي وشفته يطلع لهادي من علاكة لعبة سيارة جبيرة تخبل هادي فرح بيها وباسه يتشكر منه
وركض بيها جوة فرحان يخليها ويا باقي العابة

دخلت خالتي انطت هادي ماي وطلعت جاي تصب غدة
اخذ الماي باوعلي وسألني
:- وين الشيهانة؟ شو ما سلمت شني ما تريد تسلم علي

ليلى :- ما موجودة

هز راسه شرب ماي جاي يخلي يمه وسألني
:- شلونه شغلها بالمعمل ام اعطوب ولا خابرتني بعد علمود شغلة الكاع
عقد حاجبة جان اكو كوب مال جاي رفعه

سكتت انبلع صوتي لان وجه هادي صار ما يتفسر

مد ايده طلع كطوف جكاير من الكوب رفع حاجبه وضحك تك خد مستهز واعلامات الغضب اعتلت ملامحه

رفع عينه باوعلي وكال بنبرة استهزاء كلها غضب
:- شني كطوف جكاير تدخنن بالسلامة لو زلمة طاب عليجن وانه ما عندي خبر

صفنت شوية اباوعله بحيرة منين كطوف الجكاير
نتر بغضب :- مو احجي وياج هذني النعل شجابهن بهذا النعال ياهو طاب عليجن لو صايرات برابيك تدخنن وعلي الفحل افرسجن فرس

سكتت لحظات وبعدها عطت واني اضحك
:- يبوووي والقران راح من بالي والقران غير اول البارحة اجة رجل الشيهانة رجع وبات هنا بالليل والصبح طلعو للبصرة الاهله يبشرونهم برجعته يمكن هو مدخن والله لان محد داخل علينا ابد واحنه ماندخن بس هوا

باوعلي صفن شوية وكال بصدمة :- صدك عود رجلها رجع لو تضيعين علي السالفة

ليلى :- لا والله صدك وخالتي باتت يمي البارحة لان اخاف وحدي

هادي :- وين جان زين عرفتي زين خو ماشافج؟

ليلى. :- لا وين يشوفني جوة اني اصلا جيته صارت بوكت متاخر وطلعو من الصبح
هادي :- اي وين جان
ليلى :- مسجون

هز راسه :- يلا الحمدلله فرحت هيه يمكن

ليلى :- يمكن شنو غير طارت طارت البنية
هادي :- الشافطة كالت عدل حاسه بي عدل الحمدلله طلع احساسها صحيح تستاهل كل خير

ليلى :- اي والله تستاهل وهو يمكن فترة قصيرة وياخذها لبيته واني شلون بيه مادري

هادي :- هو انه جاي علمود شغله تخص سكنج
سمعي كبل فترة قررنا نبيع كاع عد ابوي وعمي ابو حاتم وفلوسها حلال زلال الج بس مو هيج نحطهن بايدج
لا كلنا نشتري النص مال البيت الي باسم قيس وباقي المبلغ نضمه للكبار مثلا عمليه واحد يحتاج سفر يشتري امور غالية للبيت يعني مو للمصرف

ليلى :- يا شسالفة اني غير عندي نص بيت

هادي :- ما يخدمج سمعي من طلعت منج ورحت للسادة علمود سالفة الجنسية حجيت ويا السادة
كالولي اقتراح عجبني الصراحة

قيس يشتري حصتج وبفلوسج والفلوس العدنا نشتريلج بيت قريب ع بيت السادة علمود هادي يصير قريب ع ابو ومنها منطقتهم كلش امان وتكدرين تكعدين وحدج وانتي مأمنه

صفنت بوجهه بحيرة ورفعت اكتافي بمعنى ماعرف
:- ماعرف هادي انت بكيفك والله اني كلشي ماكو بهاي الامور

:- انه والله قبلت والسيد كال يمنه بيت معروض للبيع بيناتهم يمكن عشر بيوت تخيلي حتى كال رايح يحجي ويا الزلمة صاحب البيت واذا اتفقو ع السعر نرتب الامور وامس حاجاني طلب مني اجي حتى اشوفج واذا تقبلين نتوكل ونمشي بسالفة البيت

ليلى :- انت قابل تشوفه زين

هادي :- اشوفه اكثر امان الج ومنها هادي يصير يم اهله غير انتي تكولين اتطلك وما ارجع للسيد؟
هزيت راسي
:- هاي هيه مطلكة وكاعدة بمكان امان وابنج يم اهله وعمامه انتي والسادة شو مو حرب متصافين وهم خوش ناس انه اريد اامنج يمهم

تدرين صعب اخذج للنحف وهنا شايل همج ع الاقل يم السادة اكون مرتاح

ليلى :- لا توصيهم علي ولا شي اني اتحمل مسؤولية روحي بس علمود هادي اي عادي

هادي :- سهلة هسة نتوكل؟

ليلى :- هاي هيه دامك شايفة موضوع زين ويخدمني توكل قابلة

هز راسه ابتسم برضا
اخذ كلاص الماي يشرب ونسمع صوت تطكطك لمواعين نسومة تنقل الاكل

ليلى :- شوكت السيد يكمل جنسية ابنه شو طالت
هادي :- كال ترحون بعد جم يوم عدهم عرف بالنفوس يمكن يساعدكم متفق ويا ماعرف شلون من اروحله افتهم وارجعلج خبر

وبيومها راحو واتفقو ع سالفة البيت وضل يمنه ثاني يوم راح ع السادة علمود شغلة البيت واخذ هادي ويا طلبو ياخذه الهم يشوفونه ..

......

فاطمة ...

سكتنا ثنيناتنا وخلينا الايام تمشي بهدوء
لا اني سألته شي ولا هو حجة

كلت اخلي براحته واشوفه شنو يقرر بذيج الساعة احجي اذا راد يرجعها اني انسحب من حياتهم واخليهم يكملون سوية واتطلك

دست ع روحي هواي رحت واخذته ع اساس منفصل ومطلعها من حياته بس تالي بسبب مرة كذابة تدمرنا
وشكد خالي تعارك وياهم وسمعهم كلام يفشل بس كلبي ما برد لان بكذبهم اني صرت ضحية!

لو كايله ليلى حامل جان قيس رجعها واني ضليت يم اهلي لا رحت ولا وصلت وتزوجته لان ما اقبل ع روحي اكون زوجة ثانية بس اخ والف اخ من حقدها ع ليلى ياليت هي تعرفها لو عدها شي وياها بس كل هذا لان جانت تتمنى يتزوج من بناتها

تالي خالي خطبني ورحت لايران تزوجت قيس وما اخذ منهن ما استفادت شي

اجة ابن عم ليلى جايب ابنها هادي دخل الطفل هادئ كامت خالتي بوسته وجابته كعدته يمه وجانت محضرة اشكال والوان لان تدري راح يجي

ضلت تجيب وتقدمله هو والاطفال حتى ياكلون واحنه ملتمات اربعتنا نباوع كأنما اول مرة بحياتنا نشوف طفل بس فضول عدنا

شكد هادئ ومؤدب ياكل باحترام وكلامه مهذب
خالتي حاولت تخلي شوية ياخذ ع الجو واجت شالت الحسن واخذت خاتون الي جانت تلعب بلعابتها ويا كريمة بت هاشم

كعدت خاتون بصف هادي والحسن حطته بحضنها وكعدت
سميرة :- بيبي شوف هاي الحلوة اختك انت تدير بالك عليها وتحبها لان الاخو المفروض يحب اخته ويداريها

باوعلها ابتسم ولم شفايفه للداخل خجلان
:-وهذا اخوك الصغير ضعيف بعده انت الجبير تعلمه وتداري حتى يكبر ويصير مثلك معدل

هادي :- بس هذا ما يعرف يلعب
سميرة :- اي فترة ويضل يعرف بس اختك تعرف تلعب
هادي :- اسمهم اخوي واختي؟

سميرة :- لا هذا اخوك الحسن وهاي اختك ليلى

ضحك وفك عيونه كال ببراءة اطفال :- امي اسمها ليلى
خاتون :- لا اني اسمي هاتون

سميرة :- اسمها خاتون نسيت بيبي نسيت راح من بالي

ضلت خالتي تحاول تخليهم يتعودون حتى مرة ورا مرة ولقاء ورا لقاء يعرفون هم اخوا ويدركون الوضع

كمت للمطبخ اجن وراي حنان وسكينة يسولفن وبس دخلن للمطبخ سكتن ضليت اباوعلهن
ضجت وانقهرت كتلهم بقهر :- ليش سكتن احجن اني مستعدة اسمع واتقبل اي شي

حنان :- سمعي هنا قريب علينا اكو بيت صغير معروض للبيع راح يشترون حصة ليلى من بيتهم ذاك وهي عدها فلوس ويشترون هذا البيت القريب الها علمود هادي يعيش يم اهله وناسه

هزيت راسي مقهورة. :- هادي يعيش يم اهله وناسه لو السيد متلهف بس حتى تجي وتصير قريبة منه

سكتت ما حجت لحظات وكالت :- قبلي بالمقسوم انتي حطيتي روحج بهيج موقف قبلتي تاخذين واحد عاشك لا تكليلي اخذته مطلك
شنو المطلك اذا تزوج ثانية نسى الاولى؟ جذب ما طول يحبها وعاشكها يرجعها حتى لو ما مخلفة منه

ركضتي اله عبالج تخلينا ينساها
شلون قبلتي ع روحج فطيم؟ شلون؟
شلون ركضتي لحضن واحد يحب غيرج وانتي تدرين بي ميت عليها وحارب اهله وناسه علمودها وصلت بي غضب ابو

سكتت ما رديت لان حجيها صحيح بس اني اضحك ع روحي من اكول اخذته مطلك
مثل ما كالت اليحب يرجعها حتى لو ما مخلفه بس جنت غبية وعبالي اخلي ينساها

تالي نسيت روحي واني اركض ورا وهو ما نساها ..

اسبوع واحد وراحو جابو اثاث ذاك البيت علمود تجي ليلى تكعد بالبيت هذا جنت احترك من جوة بس ما احجي

لان من دخل قيس وكتله بموضوع البيت
كال شعليج بيها المرة تكعد بي وحدها لو حتى وهي كاعده وحدها تحجن وتردن تسون مشاكل؟

كمت سكتت خفت اكله خاف ترجعها ويروح يسويها عناد

بس هو وضعه مو طبيعي مثل وضعه من جان مطلكها واني تزوجته غريب دايخ تعبان مريض يشرد هواي ويصفن وكل اوضاعه مو طبيعية

وكد ما تعبان بليلة من الليالي كعد يصرخ من كلبه ونقلو للمستشفى شالو شيل
ضليت طول الليل ابجي رجعو وجه الفجر ومصطفى يوبخه
لان الدكتور كايله قلل توتر ولا تقهر نفسك

الظاهر القهر كله عليها والاذية الهو بيها بسبب شوقه الها وحزنه ع فراكها

تنهدت خليت ايدي ع عروة الباب فتحته ع كيف ودخلت لكيته يصلي مشيت طلعت ثوب نوم عصرته بايدي احس روحي ويا عايشة غريبة وصلت لمرحله اخجل منه

التفتت شفته يلم سجادته مخلص وضل يبدل ملابسة صرت ورا باب الكنتور نزعت ثوبي ولبست ثوب النوم

باوعلي حسيته ضاج بس ابتسم مجاملة عيونه جانت تسولف غير عن الابتسامة

مشيت للميز خليت حمرة خفيفه وفليت شعري مشطته ورشيت عطر خفيف ..
خاتون حولتها ويا بنات عمامها بغرفتهن والحسن صغير غطيت راسه بالشرشف وكاروكه بعيد عن فراشنا

اجيت تمددت يمه رفعت الغطة الصدري خجلانه
تقرب مني حضني باسني جوة اذني غمضت عيوني

رخيت نفسي وتجاوبت ويا ، ضل يبوسني جنت احس بوساته بدون مشاعر بس اوهم نفسي واكول يمكن اني بسبب تفكيري وشكي احس هيج

اندمجنا وتقربلي اكثر لحد ما صرنه روح وحده وبنص العلاقة حسيته تعب بسبب كلبه هاي الايام ياذي
خليت ايدي ع صدره وهمست :- قيس وخر تعبت كلبك ليصير بيك شي

خله راسه برگبتي وهمس :- اششش حبيبتي ليلى مالج دخل بگلبي ..........للحكاية بقية

رأيكم بالقصة يهمني ...

الساعة 3:59 دقيقة فجرًا
وقت تنزيل البارت ... الي كان المفروض ينزل ب11 لان كامل
بس للاسف اجيت انشره وانحذف كله ولا حرف ضل عندي ولاااا حرف ردت انزل اعتذار بس كلت ما ترهم والبعض ما يصدكون لو اجيبلهم ضريح احلف بي
فـ كعدت من 11 لهسة ع فد كعدة وعدت كتابته من اول حرف لاخر حرف

خاف اكو اغلاط عذروني سحك هم عذروني لان عيوني احسهن طلعن من مكانهن يصبن وحارات واني اكتب اكتب 🤣🤣 هسة راح انشرة وادخل بسبات