رواية حمائم تخشى الطيران الفصل الثلاثون 30 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

من تعيش ويا انسان زين بالخداع والكذب الله يكشفك ويكشف كذبك وخداعك بأبسط وضع
منو جان يتوقع راح تنكشف حقيقتي كباله بهذا الشكل؟ واني الجنت متوقعة ماراح يكشفني واعيش ويا تحت غطاء الستر
تالي الله كشفني مادري اني مذنبة لدرجة الله كشف عني غطاء الستر ما ادري قيس بخيت واله حوبة والله كشفله حقيقة عيشة زوجته القذرة وعن طريق لسانها حتى ما سامع من ويجذبه بحجة يريد يخرب بيناتنا ..

فاك حلگه و وجهه مفجوع كأنه سمع مصيبة التفتت على صرخة خالتي شفت حور شمرت دبة النفط وصرخت طاحن العلاليك من ايدين قيس وطب من شاف مكان نظراتي وشافني ارتعبت وبهاي الاثناء خالتي ركضت لحور صرخت
...ولج لا محلولة حور لا تسوينها

ما انطتنا مجال حتى قيس ركض الها مالحك يوصل وشبت روحها لزمتها النار ضلت تصرخ وتركض وخالتي ركضت جابت بطانية قيس ركض اخذها من ايدين خالتي وحور ذبت روحها بالكاع من حلاة روحها تصرخ اني ابجي واعيط واشم ريحة جلدها وهوا يحترگ

منظر بحياتي ما انساه قيس وخالتي يطفونها ويلفونها بالبطانية والناس القريبة على صوت العياط تراكضو

ضليت اصرخ وابجي بشكل هستيري اشوفها شلون محترگة يطلع دم من وجها وشعرها كله احترگ ونص جسمها راسها اسود ونص لحم محترگ

ركضت للحمام سديت الباب على روحي خايفة ضليت اتقيء
ريحة جلدها المحروگ بخشمي جسمي كله يرجف سمعت صوت نسوان بالبيت طلعت ارجف لكيتهن واكفات يحجن و وجوهن كاشة بألم

...يبوي من الحجي شاغت روحي شحال روحها من شبت الله يهون عليها ولو لو تموت احسللها شالوها محتركة بكبرها تشوهت

...الله يبعد عنه النار دنية واخرى

باوعلي وكالن ...يا هاي ليلى هنا

ضليت ابجي منهارة تقربن يطبطبن علي ويصبرني هذني من جاراتنا وهواي جانن يدخلن علينا
ضليت اناشغ واكللهن ...ما شفتنها شلون فرفحت من شبت بيها النار صارت تركض بالبيت من حلات روحها ذبت جسمها على الكاع شايغة وعيونها حسيتهن رادن تطلع من مكانهنن باخر لحظات

...يبوووي الله يرحمها حية ميتة مگرودة

...اكلج هي عليش انتحرت وين بتها

حجيت الهن الصار ويا بتها ضلن يبجن وحدة منهن غطت وجها بردان عبايتها تبجي على حالهن صدگ يقهر و وضعهن يفطر گلب الكافر
شلون من تسمع ريحانة بأمها انتحرت شيصير بحالها وهي بدون شي صايرة جلد على عظم وحالها من حال الاموات

ضلن النسوان يمي وكل شوية يجن غيرهن ساعتين ودخلت خالتي تبجي كمت ركضت الها تمسح بدموعها حضنتني و گالت
...حور ماتت

ضليت اصرخ والطم عبالك اختي الميتة انهاريت وشكلها وهي تحترك انطبع بعقلي بحياتي ما انسى هذا اليوم الاسود
يوم اگشر يمرد الروح بنفس اليوم النسوان يجن يعزن ويگولن ويرحن لان يعرفن حور صارلها فترة هواي تعرفت على النسوان

المكرودة لا فاتحة ولا شي دخل قيس يمسح بوجهه واشرلي ركضت علي وجهه يبين شكد كارهني ومقهور مني
گال ...بس جيبيلي عباية سودة راح نروح للنجف ندفنها اني وابو خلدون

ليلى ...وشتسوون بالعباية انتم زلم وخالتي هاي جوة لابسة عبايتها

مسح وجهه عيونه حمر دم ...من شلتها وخذيتها للمستشفى گالت

حور ...جبت عمري كله لابسه ثوب العار من ورا اخواني واني شريفة
من اموت ستروني وحتى على گبري حطو عباية تستر ترابي

التفتت الها مقهور و حجيت ...ان شاءالله مشافاية خوية قوي گلبچ يحضرج ابو الحسنين

غمضت عيونها وفجأة فزت كالت بصوت متقطع وروح لايبة ...دفنوني بالنجف ومن تچفنوني شدو الچفن زين انهتك عرضي واني عدلة اخاف ينهتك واني ميتة

نسومة عينچ على بنيتي شوفي شلون ترتاح اعتبريها بنيتج ولا تخلين الطال ليلى يطولها

غمضت عينها وشخرت ، فاضت روحها وعرجت للخلقها شايلة الام الدنيا كلها وحسرات ودعوات ..

هزيت راسي مسحت دموعي وجبت عباية اخذوها دفنوها ورجعو لبغداد
جنت منهارة وما اعرف شنو الجاي وشلون راح يكون

بس كل الاعرفه اني تدمرت حياتي ويا قيس
دخلت للغرفة لكيت نسومة تبجي بخلسة وبس شافتني مسحت وجها
...ها شتردين

ليلى ...جيبي ريحانة هاي اني وقيس خربنا راح يطلگني اكعد اربيها واداريها ما ضل شي واتخرج اتوظف واطلع بيت ايجار واصرف عليها

نسومة بتساؤول ...كالج راح يطلگچ
ليلى ...واني شنو انتظره يحچي؟ واضحه

نسومة ...عوفيها البنية بعد عرست وحبلة ما يفيد شي اني اروحلهم واحط زلمتها احجي ويا وأامنها يمه واتطمن عليها كل فترة احسلها من هذا البيت وحور كالت اعتبريها بنتج التشوفينه زين سوي الها واني هذا الاشوفة زين

عقدت حاجبي معصبة ... شنو .... قاطعتني
نسيمة ...وياريت لو رايحة لعمامج ومرجعتج عليهم جان ماصار الصار ولا تلوثتي بسببي وتدمرتي الصوج صوجي والغلط غلطي

عاد بلكي ريحانة تنستر اني اروح واشوف شلون عايشة اذا متعلعلة ارجعها غصبا على شاربه واشگه شگ اذا فتح حلگه واشوفلي بشر امين وشريف اخليها يمه واتكفل بعيشتها

هزيت راسي مقهورة ...دمرتيني انتي ياليتني ميته ويا اهلي ولا ضاله يمچ تدمرت جانو اهلي حريصين علي ويخافون ع سمعتي وينتبهون لخطواتي

انتي مو مثلهم ما يهمچ امري ما تهمچ سمعتي ولا تراقبيني صغيرة وشكد غلطت اغلاط يمكن اموت من وراها
متاكدة لو اهلي موجودين ما جان سويتهن بس انتي ما حرصتي علي

باوعتلي مستغربة ... اذا تعرفين روحج مو حريصة ولا گد المسؤولية وتردين تسوين بيتچ سبيل للگ** ليش ما اخذتيني لـعمامي؟ ليش خليتي سمعتي تخرب شعبالج اذا هسة تطلگت يجي واحد وياخذني؟ محد يريدني بعد اني سمعتي خاست ريحتي طلعت بدون مااسوي شي بس لان اسمي مرتبط بأسمج ودمج مختلط بدمي

فكت حلكها مصدومة ونترت ...من چنتي وحيدة مو هذا حچيچ طلعلوچ عمام وتفرعنتي وصارت نسومة كخة وتبزز

سكتت شوية ورديت بهدوء ...تذكرين اول ماعرفت بيج سويتي البيت للحفلات والدعارة شحجيت؟ كتلج راح اطلع من البيت انتي منعتيني واستغليتي ضعفي واني انجبرت اضل وياج لان وين اروح ماعندي احد وماعرف عمامي

ردت بغضب وهي تنزع شيلتها السودة وتنثر شعرها
... اي وهسة عرفتيهم ذاك الدرب ولي محد لازمچ شنو اتوسل بيچ تضلين يمي
عود بنية اختي واحبج واعتبرچ بنتي

ليلى ... ورا ما تشوهت؟ ليش ما اخذتيني الهم من الاول وخليتيني اعيش حياة نظيفة بعيده عنج

نسيمة ... غير يعذبونج عذاب اليهود جانت جدتج عايشة هيه ابوج شردته وهوا زلمة وگلبه شگده قوي

ليلى ...اتمنى لو عايشة يمهم ويدگون علي من الصبح لليل وصايرة خدامة لنسوان العمام ولا عايشة هنا كلشي ولا الشرف والسمعة
اقلها اعيش خدامة الهن بشرف والله يباوع لحالي

سكتت صفنت شوية وضحكت ...تدرين بعمامي مو مثل نسوانهم زينين ويحبوني وهادي كال لينزل من عينچ دمعة اكتله

نسيمة ...ماعايشة يمهم هاي لان بعيده هسة خله يطلكج وروحي يمهم نشوف بالله

ليلى ...اي اروح لا عبالچ اضل اني هذا البيت بعد ما اعتبه هناك اضل بعيدة ومحد يعرفج ولا يعرف جنت عايشة ببيت مسويته مقر مال دعارة بلكي انظف

خزرتني جنت معصبة كلش احب خالتي وهي تحبني بس حياتها وشغلها دمرني لو ما تشتغل هيچ ابيع الدنيا واضل وياها

طلعت شلت السماعة اتصلت ببيت عيالي طلبت قيس احجي ويا ادري بي موجود
اجاني صوته بثگل ...الو
ليلى ...قيس تعال اخذني منا
قيس ...قبل لا تحجين جنت محضر روحي اجيج

فرحت عبالي راح ينسى ويعبرها الي ويمكن يعاتبني ويزعل فترة ونتصالح

اجة علي طلعت ويا سلمت رد بثكل وزعلان وجهه ما يكصه السيف
من اجيت انزل كال سلمي وگبل صعدي اريدچ فوگ لا تتأخرين

هزيت راسي نزلت وسلمت ع البنات وعمتي هن اجن سلمن هناك وعزنا بس بعد هنا هم تلگني وعزني مرة ثانية

گبل صعدت گلبي يرجف مادري شلون ابررله سكوتي شلون راح يكون العتاب وشلون اصالحه

فتحت الباب ودخلت ذبيت العباية والربطة وهو كاعد يهز رجله منصي مخذول ادري بي

كعدت يم رجله لزمت ايده الحاطها على ركبته بستها جرها بساع
باوعتله ابجي وحجيت بتوسل خليني احجيلك قيس واسمع مني وصدگني

ضحك مستهزأ وهز ايده ...اني بعد اصدگچ ليلى؟ اني اصدگچ؟! ولچ لو تحلفين بالله وكل الانبياء والرسل هم ما اصدگ حرف واحد منچ

ليلى ...موبيدي والله موبيدي واني شريفة ممسوية شي يعني تحملني ذنب خالتي؟ هي الموزينه وسالكة طريق غلط

قيس ...ولج نسب هذااا ليلى نسب ولج العرگ دساس
ضرب رجله مقهور متحسف ... ولج ما حجيتي وخليتينا نخصمها من الاول ما حچيتي ..
ساعة السودة الداومت بيها بالجامعة
ساعة السودة الشفتچ بيها لو ادري بگلبي راح يدگ لوحده مثلج امد ايدي بين ضلوعي وامرده مرد واشمره للجلاب السايبة ولا اخلي بنص صدري يدگلچ ويحبچ

ليلى ...هسة بس اسمعني
حجيت اتوسل

قيس ...اي جذبي جذبة جديدة الف مرة كتلج لا تضمين شي عليه احجيلي احجيلي ماكو سااكتة راسچ بحضني وتچذبين عينچ بعيني وتجذبين هسة اكتشفت كل حياتج وياي بانيتها على چذب وخداع

حتى حور وريحانة تكووولين اقاربي وطلعن غريبات ما يصيرلج لا من قريب ولا من بعيد

وخالتج موزينة وجنتي عايشة ببيت مال دعارة وهسة تاكدت الف بالمية انتي ويا احزاب معارضة والصار بالمطار ما جان من فراغ

فكيت عيني مصدومة باوعلي والشرر يتطاير من عيونه اول مرة اشوفه هيج عصبي لهذا الحد
كام يفتر بالغرفة ويحجي ...انتي تجذبين وضامة امور شكدها بدون ما يرفلج جفن ولا يبين عليج خوف حتى ما شكيت ولو واحد بالمية انتي جذابة
بس سالفة المطار جانت واضحة واني غالطت روحي ونصحتج تحجين وما تضمين علي ردت اشوف تاليها وياج وانطيج فرصة تصححين بيها مسارچ

شهگت مقهورة ودموعي تجارى ...طلعت منهم وانسدت هاي الصفحة والله

فك عينه بكل غضب وصدمة اجة لزمني من كتفي يعت بيه ياخذني ويرجعني
قيس ...جنت اسحب لسااانچ ليلى ولچ اني صدگتچ هناك وكلت ضلمتها وهاي فقيرة ما عدها هيج سوالف من شفت جذبج انكشف كلت افتج الموضوع وهم طللللعتي مجذبة بييي شنوووو عندج بعد احجي شنوووو عندج

ضليت اضرب بوجهي واعيط ...ماعنديييي ماعندي امداني اني فگر وانت تستاهل لاحسن مني بس بهاي السالفة جنت طايشة والله

رفس الكنتور حيل الباب دخل ليجوة غطيت وجهي ميته خوف سمعته قفل الباب ضل يحوم ويحجي
...ماخذج شهر عسل اونسچ واغيرلچ جو واصنع النا ذكريات حلوة وانتي رايحة تنقلين معلومات للاحزاب ولج ليلى تستغللليييني؟
تستغليني حتى تمشين شغلج واني العاندت اهلي علموودچ وغضبتتتهم

شايفة ابوي بس وياج لين وياي قاسي وما يباوووع بوجهي
غاضب علي غضب بس الله يعلم بي شگله هسه؟ ها شگله ليلى الحاربتك علمودها طلعت تشتغل ويا احزاب معارضة وطلعت جذابة واني ابنك النچر رحت وكعدت ببيت مال دعااارة خطبتها وحطيت مهرها نص بيت والفلوس نصهن من القاصة ماخذهن بدون ما احجي واكول بس علمود اتزوج بنية من بيت دعارة

يشدد ع الكلمات من يگول بيت دعارة سديت ذاناتي مرعوبة وعيوني تصب اريد اطم روحي احتار على شنو يحاسبني ويعاتبني

غم گصته وگال من بين سنونه بغضب
...انتي ما تستاهلين تدخلين البيتنا شگد كلولي اخذ بنت عمتك العلوية فاطمة ورفضتها
البنية بعرس طوعة ظفرها ما مبين من كثر عفتها وحيائها ماتكدر ترفع عينها من الگاع وامها احسن عماتي واتقاهن واهدئهن مرة بوجها نور الرحمن وخايفة الله

والله من سلمت علي عمتي وشفت فاطمة استحيت اباوعلها بدون قصد لمحتها اتعجبت عليها بس ولا التفت كلبي ولا ندمت وكلت هاي البنية حلوة هاي البنية احسن من ليلى ابد
بس هسة جاي اكول شوفي الله راوانياها حتى يكلي شوف شنو خسرت شوووف هاي العاندت وماردتها وغضبت ابوك وركضت ورا وحدة ساسها اعوج

سكت افتر ورجع كال وتكليلي اسأل ع عمامي لان خالتي لاحتها حجاية من الناس الماتخاف الله واني واثق ومصدكج ودزيت اخواني للنجف يدورون عمامج

حجيت من بين دموعي ...اني مرجعي لعمامي وعمامي زينين وكلهم شرف ونخوة وحمية مابيهم واحد موزين لو عنده سوالف مكسرة

قيس ...وخالتج؟ والبيت الجنتي كاعدة بي؟ والاحزاب الجنتي وياهم؟ والجذذذب الجذب تحطين عينج بعيني وتجذبين بكل صلافة

ليلى ...والله طلعت منهم وخالتي شبيدي شسوي طفلة واكتلها واكللها لا تسوين هيج

قيس ...يطبها مررض شتسوي يطبها مرض انتي المفروض تحجيلي واني الي حق الاختيار اغض النظر واخذج لو اعوفج
ليلى ...جنت راح تعوفني
قيس ...وهسة راح اعوفچ

رفعت عيني مصدومة طول ما هو يحجي عندي امل يخليني ويسامحني
عضيت شفتي متألمة من القهر وحجيت بحسرة
...انطيني فرصة والله هسة اكعد احجيلك كلشي وخالتي بعد ما اوصلها والله وبالله عتبة ذاك البيت ما اعتبها
لا تكسرني فدوة والله مالي غيرك انتَ مو تحبني ليش تسوي هيچ؟

كنبص كبالي وكال متحسر ...ولان احبچ استغليتيني واستغفلتيني؟
هزيت راسي ب لا نتر ...اي لان احبج هيج سويتي بيه

ولج ثقي بمحمد بيمن احلفلج بس وحك ذاك ابن البدوية شايفة هاي المجموعة مالتنا احنة العمام فضيحة ماعدنا بنية طالعة عن الطريق ماعدنا واحد ماخذله وحدة مثلچ ماعدنا
بس اني الغبي الزمال اجيت وبكل غباء دخلتچ لبيت السادة

جان يحجي بهدوء وبنبرته اكو قسوة ضليت اشهگ مستهضمة
كمل كلامه ...هم زين الله مازرع برحمچ طفل وماشلتي طفل مني
العرگ دساس ليلى تخيلي ورا كل هاي السنين بسببي تنزل روس السادة اخواني واعمامي
تخلفين بنية وتطلع مثل خالتج وتكسرنا وتنزل روس السادة

حچيت بقهر وبعيوني اتوسله...اني من ايدك هاي لايدك هاي اعتبرني طينة شكلني مثل ماتريد والبنية الاخلفها نربيها احسن تربية شلون تطلع مثل خالتي بعد؟
قيس ...وراثة هاي ليلى وراثة مو بيدي وبيدج ولا بيد التررربية
هو شلون يطلع من ظهر العالم فاسد؟ هاي وحدة من الاسباب الوراثة يكون عدهم واحد بالعائلة عرجه اعوج ويورثونه

ليلى ...كافي قيس كافي تحملني ذنب
قيس ...كلشي صوجج حبل الجذب كصير وماكو شي يضل مغطى ومستور
كلشي تاليته ينكشف حتى اهلي يجيهم يوم ويعرفون وضعج كله

ضليت ساكته منصية
قيس ...العرفته كافي يكرهني بيچ وتدرين شنو اكثر شي خلاني اكرهچ؟
رفعت عيني
...چذبچ يمكن لو بذيج الساعة كايلتلي خالتي موزينة عفتج بس ضليت احبج ومتعذب الله رحم بحالي ضليتي تجذبين تجذبين لحد ما كبرن جذباتج وصارن كافيات يخلني اكرهچ

گومي طلعي جنطج ولمي كلشي يخصچ اخذج لعمامج

كام نزل الجنطة الفوگ وگال ...وين الباقيات خليني اطلعهن الج
سكتت مقهورة التفت وحجة بغضب وهو يحرك سبابته گبال وجهي
...وحگ ذاك ابن البدوية اذا سمعت بيج راجعة يم خالتچ اروح لعمج حجي طاهر اطلعله تاريخ خالتج وكل سوالفچ الا اخليهم يفصمون ظهرچ

جنت انقهر من اسمع زلم يعذبون بالنسوان هسة والله ما الومهم و لو ما تربيتي جان هسة قضيت بيج التوبة حتى تبطلين جذب ومشي بكل طريق اعوج ومابي خير

اباوعله معصب كلش وجهه احمر صار وعيونه دم قيس حكيم وما يخطي خطوة بدون تفكير بس من حبني تغير وبعد جيتنا هنا يم اهله رجع مثل قبل ورجع لطبعه وهذا الشي عرفته من دنيه
معناها هذا قراره الاخير وشاف طلاگنا انسب شي
ممعقولة صار ايام وما مفكر وحاسمها

كمت مسحت وجهي وطلعت ملابسي ضل يفتر بالغرفة وعيونه حمر كل شوية يصفگ ايدينا متحسف ويگول
قيس ... شگللهم؟ ولچ شگللهم وحبوچ واحترموچ هسة يصيرون وياچ ضدي واني اضل مثل بلاع الموس ماگدر احجي وافضح جذبج ومن اضل ساكت احترگ ويشمرون علي نفط بحجيهم وافعالهم الراح تبدر منهم

ليلى ...لا عادي اني انزل احجي لعمي
نتر ...اششش ولا نفس اشش تحجي عبالها سهلة سكتي لا تخليني اتصرف غير تصرف

سكتت خايفة كل ما يمر من يمي اكول راح يضربني جمعت ملابسي لبست ربطتي وعبايتي كال اخذتي كل اوراق
هزيت راسي
...اوراق البيت بعد هذا مهرج
هزيت راسي وهمست ...اخذت كلشي

جنت محضرة جنطتين لزم كل وحدة بايد وصلهن يم الباب وفتحه طلعهن عيني ضلت تجري اكثر اشوف حبيبي الماعندي غيره شايل جنطي حتى يدزني لاهلي وما يرجعني بعد
شفت كل مواقفنا الحلوة واحلامنا وسوالفنا ضلت تتهدم كبال عيني

باوعلي وعيونه لمعت مقهور ومكسور بسببي
اني الغلطت واستاهل الدايصير بيه
اني القررت ابني ويا حياة اساسها الچذب

وكل شي ينبني على اساس غلط تاليته ينهدم

جر حسرة حسيتها كسرت ضلوعه وطلعت نزل قبلي واني ورا كلهم كاعدين وتوجه نظرهم النه اكيد سمعو يصيح وان شاءالله مايكونون فاهمين صياحه

ابو عقد حاجبة وبدل ما يحجي ويا سألني ...ها يابة وين على الله تبچين وجنط اهلچ بيهم شي؟

بلعت غصتي ونصيت ...رايحة لعمامي اشوفهم
التفت علي گال ...يلا يابة ورانا طريق طويل

طلع يمشي نصيت راسي اكو بصدري غصة حجيت بخنگة بس اسلم عليهم اودعهم

سكتو هم ما حجو ما عبالهم احنه انتهينا عمي حجة بصوت ناصي كله غضب
...مصطفى اطلع شوفه لا يفشلنا ويا حجي طاهر زحمة!!

كام سيد مصطفى اني نصيت بوست عمتي كتلها الله وياج عمة
لزمتني من زنودي تحجي بصوت ناصي
...شنو زعلانة؟

هزيت راسي اي وشاورتها ...بعدين اخابر على تلفون البيت واحجي وياج
عقدت حاجبها ...شنو تحجون صدگ وينه قيسسس صيحو لقيس هية مو زعلانة تعزل فراشها يم دنيه لحد ما تنحل سالفتهم مو ماخذها للنجف وتبجي مهضومة والله ولا اقبل

سيد رحمن ... خليها تصعد لغرفتها هوَ ينزل ينام بالاستقبال لمن يحل مشكلتهم يصعد
من شوكت عدنا نسوان يزعلن؟ يريد ينزل راسي يم حجي طاهر

حجيت بخنگة ...لا ما اگللهم زعلانة اضل يمهم كم يوم اني هم مخنوگة واريد شوية اطلع من جو الحزن واشوف عمامي واكعد بنصهم فترة

ويا كلامي دخل قيس وسمعني كال بحدة ...هيه هم لازم تسير على اهلها دام عدها عطله
ام مصطفى ...لا شنو تروح بهذا الوضع من تريد تروح خطار عليهم كون بواهس وهيه متلهفة لشوفة اهلها مو تبجي

قيس ...يمة اني عصبي وهيه عصبية وضلتها هنا تكبر مشكلتنا ما تصغرها خليني اخذها لعمامها هيه هم ترتاح ويختفي غضبها واني اراجع نفسي واصفي بالي واروح اجيبها

حجي عمي بحدة ...اسبوع .. 7 ايام يوم الثامن اريد اشوفها هنا كبالي بالبيت

سلمت علي بست ايده و ودعت البنات مشيت للمطبخ دنية بالباب واكفة تباوع بوستها وشاورتها

...صيري سباعية وقوي گلبج مو بسرعة تطيحين وتتمرضين ترة الدنيا اصعب من ما تتصورين وتريد بشر قوي يلاويها وما يگول اخ

نصت ضايجة كالت ...ان شاءالله اتصلي سلمي وطلبيني بالاسم اسلم عليج خوش

هزيت راسي وطلعت وشكد طويل الطريق نشف دمعي وسلمت امري لله وهوا ما نطق ولا حرف من وصلنا للديرة مال عمامي كتله

ليلى ... شنگللهم؟

قيس ... شتگولون ليلى؟ شنو نگللهم وشلون نتصرف؟

نصيت ميتة قهر ايدي ترجف گتله بغصة ...گللهم مو خوش بنية مأذيتني واني اصف وياك ضد روحي لان استاهل

تنهد ضل ساكت من وصلنا كلش كال ...كليلهم ما متفاهمين ابد وشكد ما نحاول نتفاهم مانكدر وانتي گولي اريد طلاگ واني اكول اريد طلاگ وتفض

نصيت مسحت دموعي جريت بطل ماي غسلت وجهي من دخلنا بين البساتين القريبة منهم الزلم ضلو يباوعون وكل الانظار صارت على السيارة عرفو ليلى اجت للنجف

صف السيارة ورا المضيف الگصب مناك يصير بيت عمي حجي طاهر الجبير اجو الشباب بهمه نزل يسلم عليهم واني نزلت ورا لافة روحي بالعباية سلمو علي وهم مدنگين روسهم

قيس نزل الجنط والوضع جان مبين غريب اني عيوني مورمة و وجهي احمر من البجي وهو ضايج
گال للولد ...اريد اسلم على حجي طاهر
گلاله بالمضيف الحجي امشي

جريت الجنط ثگال اجة ولد منهم ماعرفه بس هو يعرفني گال شلونج ليلة انطيني اشيلنهن عنچ

خذاهن مني صغير توة خاط شاربة دخلني للبيت وهو يصيح يالله عمممة ام هادي اجت ليلة بنت عمي

دخلني من باب المطبخ هيه مرة شافتني لو عبالك شايفة ملك الموت طاب عليها وجها انخطف ذبت من ايدها خاشوكة جانت تكلي سلمت ودخلتني للبيت شفت وحدة باوعتلي وخطفت حتى ما سلمت علي
تنهدت خليت ايديني بحضني افرك ايد بأيد

سألتني مستغربة ...ياهو جابج صوبنه؟

ليلى ...رجلي قيس

هزت راسها ... جا شمالج شني باجية خافنج زعلانة
تنهدت وكلت ...اي والله طريقنا انسد اني ويا

باوعتلي ما عاجبها طبگت ايد على ايد وخلتهن على بطنها
...وين تكعدين من يطلگچ

اختنگت من سؤالها وانقهرت بس زين اجتلي فطنة وحچيت
...عندي نص بيت بمنطقة زينة ابيعه واشتري هنا بس اضل يمكم فترة قصيرة على ما اكمل شغلتي

من سمعت هيج ارتاحت وفك وجها الظاهر وجودي ما مرحب بي
شوف البنات عندهن اهل من يرحن يتلگوهن بالحچاية الحلوة الزينة واني حتى اهل ماعندي بعدني هسة داخلة ومختنگة مني

طب هادي يصيح عرفته من صوته
...وينهاا ليلة ليلة يالله يالله

لفيت عبايتي على روحي طاحت عيني على عمتي فرت حلگها باستهزاء
هادي ...الله بالخير
ليلى ...الله بالخير والبركة شلونك خوية هادي

ردت اكومله كال استريحي وتقرب منصي راسه كال
...حجية من رخصتچ شوية عندج جم جلمة ويا بنية عمي

ما عجبها ارتفع حاجبها وباوعتلي بطرف عينها گامت للمطبخ
كنبص وخله ظهره على الحايط طلع الجكارة من حلگه ذب نفس ورفع عينه علي

...شني عرف خالتج مو خوش مرة

فكيت عيني مصدومة كال ...احجي ولج لا اروح ادفنه عرف خالتج مو خوش مرة لو السالفة تافها وما تسوة

نصيت مقهورة وهزيت راسي ...اي والله عرف وتخبل حقه ما الومه

اخذ نفس من الجكارة و وكف ...اي مال حقه ، صدگ حقه عدهن عرج خايس الساقطات من جدتج لخالتج جا ليش جدي جان متسودن ولو امج يكولون شريفة بس بعد الشر يعم

عقدت حاجبي مستغربة ...شقصدك؟
هادي ...بعدين رايح خاف الولد يمطلون السيد ويكتلونه ماعبالهم السبب يسوة لان حلكه عوج وخبصنه اني مو خوش ما متفاهمين
اگله ولك احجي شي يبرد الفاد شني اني وياها ما متفاهمين النوب انه اتعقد من ابو الـ اني ابدي اسرت حلگه

حجاها وجاي يطلع دعم بالباب ...دخيل بخت جدة يشور السيد

راح وامه رجعت ضليت مصفنه اني الاعرفه عدهم بنات وجناين وحتى بيت عمي ضاري كاعدين هنا وياهم بنفس البيت بس ماكو ولا وحدة اجت سلمت علي

من راد يروح طب الولد الشال جنطتي كال ليلة رجلج يريد يحجي وياج كبل مايروح

ام هادي ...منين رجلها مطلكها هذني يخلن الزلمة يركد يهججنه من اول سنة ما يرتاحن بحضن واحد

باوعتلها مصدومة ...شسالفة استلمتيني بعدني ما ذبيت حملي عليكم ولا ثگلت

ماردت مشيت للباب جان عدهم حوش ومحد بي وهو واكف يم الباب مشيت اله حجيت بصوت مخنوك وبعيوني الدمعة تلالي

ليلى ...قيس

شال راسه التفت عيونه حمر ومبين مخنوگ اباوع لركبته تفاحة ادم تصعد وتنزل
وفكة ينبض يرجف
كال بصوت مختنگ ...عمج طلع يعرف والله اني ما حجيت هوا السألني وجاوبته اني كتله لا تخليها ترجع يم خالتها ابد خلها يمكم ماريدها تضيع وهم خوش زلم ودگو الصدر انتي يمهم بأمان

هزيت راسي جسمي كله يرجف اباوعله ماكدر احجي بس افك حلگي تنزل دموعي
فرك عيونه ورفع راسه باوعلي ...ماراح اطلكج هسة لازم احجي ويا اهلي حتى افهمهم اني وياج ما متفاهمين وخصمناها

هزيت راسي اي ... كال بغصة
...ما تحچين شبيچ

جريت نفس كتله بصوت يرجف ...شنو احجي الحق وياك اني جذبت عليك وضميت هواي حجي بس انته ماتدري ليش جذبت
جذبت لان احبك واريدك وغيرك خضعو جوة رجلي صهيب الله يرحمه كالي يرجعني لعمامي وياخذني منهم بس اني من كد ماحبك رفضته هو وسلطته ورتبته وماله وبسببي تدمر وراح
هاي حوبته ما راح اتوفق بحياتي

نصة ...كرهتچ اضعاف

سكتت رفع عينه وادري بي مقهور كتله بحسرة
...روح صار الليل طريقك طويل لا تشرد عينك وبالك ثنينهن خليهن على الطريق

حسيت گلبي ينمرد واحس بي شرايين تتگطع ضلع يبلع بغصته
ليلى ...بس شي واحد رايدته منك تشبگني لصدرك وتمسح على راسي مثل ما تسوي يومية قبل لا تروح للشغل
خلي موادعنا الاخير لا تعوفني بدون موادع

ضل يوجف فكه وعيونه دم واني دموعي خذلني ونزلن
ليلى ...راح ارجع ليلى مو ليلاك

باوع بالمكان محد بس اني ويا لان حوش خاص لبيتهم خلونه سوية فتح ايدينه ترجف
غمضت عيني وتقربت خليت راسي على صدره دموعي تنزل حضني ومسح على راسي من ورا الشال

نبضه عالي ويرجف حاله امر من حالي كال بغصة
...بعد داري روحچ زين

عافني بدون حجي ابتعد نصة راسه وطلع من الباب الوراه ضليت ارجف وبس دموعي تنزل عطره ترس هدومي ورياتي

راح قيس وعاف ليلاه ... ويشاءالله ان تعود ليلى وحيدة و لم يكتب لها مع قيس نصيب

دخلت مكسورة لكيت هادي واكف كبال الباب يدخن فد خفت هادي ضخم واسمر عيونه حادات وحواجبة كثيفة
نظره منه تخليني ارجف من صرت كباله رفع حاجبه
...ها مابي امل

ليلى ...لا وين حقه الزلمة اني صوجي ماحجيت
هادي ...ابوي جان متوقع ضامه عنه كال جا شلون هذول السادة خذوها من بيت نسيمة استغربنه

تحسرت ودخلت للبيت صاح بصوت ...چا وينهن شني نوديلهن عزيمة علمود يجن يسلمن على ليلة عمه تم سوادي .. نويرة .. عذيرة ... تماضررر ...هيووو طويفة تعالن

اجن عرفتهن عذيرة وتماضر جناينهم ونويرة بت عمي طاهر و طويفه بت عمي ضاري
وام سوادي تصير زوجة عمي ضاري

اجن بساع سلمن علي وكعدن بس حسيت بروحي صدك ثكيله وحجي نسومة صدك هذول مايردوني لو جاية يمهم من كبل جان هم سون بيه سالفة مبينات شرانيات

حجة وياي عمي وكال بعد هاي هيه بوية يطلكج وضلي هنا يمنه رده لبغداد ما تردين

حجيتله عن البيت ما قبل وهادي كال
تضلين هنا ما عدنا مرة تكعد وحيدها ومحد يدوسلج على وخلني اشوف واحد لو وحدة ضوجتج لو غثتج بحجاية افصم ظهرها وحگ علي

خذن جنطي يم نويرة و طويفة بغرفتهن حطنها البيت يروش ماشاءالله بس حياتهم مو متعبة عمامي كبار السلف وعدهم رعيان وفلح و ولدهم خير من الله وهمه شايلين التعب ونسوانهم مرتاحات

عرفت من طويفة تكول ... يسمنا النساوين "خواتين آل يوشع" جيف مدللات ونتكشخ
والذهب اربعة وعشرين ساعة يتبارج علينا
وكلنا شعرنا طويل تمري مابينا وحدة شعرها كصير واسود
ومن نمشي حجولنا الذهب تدگ

تحسرت بدون ما احس ضحكت كلتلي ...شمالچ تردين حجول مني تلبسين؟
هزيت راسي لا
وتشكرت منها

ضليت يمهم ما مرحب بيه بس ساكتات عرفت ام سوادي وبنتها عذيرة زينات
بس ام هادي وبناتها وجناينها وزوجة عمي حاكم وبناتها و باختصار باقي نسوان آل يوشع كلهن ما حاباتني ولا رايداتني

والمشكلة همه شي يم شي وكل شوية وحدة داخلة علينا وتضل تگص بيه گص واسمعهن بذاني يكولن بنت الكاولية لان جدتي وخالتي موزينات

مر اسبوع صار اتصال بين عمي والسيد ابو قيس ابو قيس يريد يجي يرجعني بس عمي كاله لا همه اختارو ينفصلون خلهم هيج احسن الهم ابو قيس احنه نعرف اشياء انت ماتعارفها ونشوف مصلحتهم بالطلاگ

غلسو اهل قيس كلت يمكن صار بينهم خلاف ابو ماقبل يطلكني الا قيس ينطي حجة قوية
وقيس مايريد يحجي ويفضحني وطلع توقعي صحيح من حجيت وياهم دنيا كالتلي

مرن اسبوعين جنت بالحمام نويرة دكت الباب ونترت ...يلا شني عروس شو مشمورة ومطلگة

لبست هدومي وطلعت ...شبيچ شسالفة سابحة من مايچ لو بحمامج ترة بيت عمي وهوا مستقبلني ومايريد اطلع والله اني لو علي اطلع اكعد وحدي

نويرة ...حتى تلعبين براحتچ وتهزين للزلم مثل خالتج وجدتج والله يعلم امج يمكن تطلع نفسهن كاولية بس عمي سترها

ليلى ...اي زين كاولية وتزوجت وانسترت انتي شوكت تتزوجين محد اله نيه يسترچ لسانچ هذا عام عليچ

نويرة ...دولي

دفعتني من جتفي ودخلت للحمام ركضت للغرفة ورجعت احسب بأيدي واندعي
ناخية ام البنين التنخاها العلوية كون اطلع حامل ويرجعني قيس لان بدونه جاي اتعذب ماريده يعوفني گلبي نار راح اموت

لليل ونزل علي دم ضليت ابجي بالحمام مختنگة من امدا حظي حتى بهاي ماكعد هسة لو حامل جان رجعني وغض النظر عن كلشي صار

طلعت وجهي احمر لكيت قيس كاعد وحاط المسجل يسوي بي عطلان وبحلگة جكارة من شافني عقد حاجبة ولو هن من الله معقودات

طلع الجكارة وزفر نفس ...ياهو وياج خلني اكتله

ليلى ...لا والله محد بس ضايجة مقهورة ع حظي ونصيبي

هادي ...خله يطلگچ وتكملين عدتچ انه اعرسچ واخلي عرسچ تحجي بي النجف سنة اذا مو سنتين

عذيرة ...خاف ناوي تاخذها انته
هادي ...سدي حلگچ هاي انه عادها ويا خواتي مو مرتي المرة يجي يوم وترجع غريبة
الاخت تضل اخت شما كان وصار

عذيرة ...قصدك تطلكني وارجع غريبة وتاخذها الا اسود عيشتك بعلي شني وفروخك

شال الدرنفيس الجان يفل بي البراغي وكللها ...بعلي اذا ماتسدين حلكج انبته بعيونج

عفتهم يتداهرون زمخ بيها ومن الخوف لبست عبايتها وراحت لبيت عمي حاكم من طلع يلا رجعت

كم يوم وفجأة بدون اي خبر اجة قيس وحدة دخل ويا عمي للدوانية مال البيت وصاحولي عدلت ربطتي ودخلت عليهم رفعت راسي سلمت بس ثنينهم وجوهم ما تتفسر

عمي كال ...ولج ليلة اندهرنا الحكومة عرفت بيج جنتي ويا احزاب وكاعد يدورونچ

شهگت مصدومة كام وكف يعدل عكاله وعبايته وكال
...ارجع بوية لديرتك انه اتكفل ابتي

قيس ...ليلى مرتي اذا ما اامن عليها مارجع

طاهر ...جا ضل هسة ارد

عافنه وطلع باوعلي قيس بعتب وگال ...شفتي الصار ليلى مو حذرتچ بس انتي تهوين الطريق الاعوج مايفيد وياج شي

ضلت دموعي تجري مقهورة مسحت وجهي وحجيت
...روح عمي يحتار بيه بس شنو انته حاجيله؟

قيس ...ذيج المرة حجيت ويا بيناتنا وفهمته كلت خاف يجي يوم وينكشف بي امرج على الاقل عنده علم ما ينصدم

نصيت خجلانة من روحي اتمنى الگاع تنشگ وتبلعني

قيس تنهد ...لزمو دلال ومعذبينها معترفة من كد العذاب خطية الله يرحم بحالها وبحالچ

شهكت مصدومة هزيت راسي لالا متحسفة على دلال ما تستاهل
قيس ...دمرتن نفسجن
نصيت بس دموعي تصب ماكو حجي عجزت بعد ماعندي شي احچي

ضلينا ساكتين شوية ودخل هادي فاير اشرلي براسه وكال ...طبي للبيت جايين العبي حضري اوراقج وجم هدم وفلوسج وكلشي مهم عندج بجنطة صغيرة

ما حجيت ولا اعترضت دخلت بسرعة طلعت ملابس لبسة وحدة كاملة ولميت ذهبي وفلوسي واوراقي كلهن
وجفية قيس جبتها وياي من اجيت بيها ريحته ماكدر احرم روحي حتى من ريحته وصورنا سوية

حضرت عبايتي اندفر الباب وجفتت عمتي كبل ضربتني راشدي
ام منذر ...راح تتكتل زلمنا من وراج انتي منين اجيتي منين لفيتي علينا الله جابج صوبنا بلاء انتقام

دفعت ايدها معصبة ...لو ما سوالفچن وسمجن وحقدجن جان ماصار كل هذا انتم عفتوني وضليت ماعندي احد ينصحني ويعلمني ولا احد يراقب دخلتي وطلعتي شما اسوي ما اتعاقب عبالي الدنيا هيچ تمشي
مادري بيها قوانين وبيها محطات والها ناسها

ضلت تحجي وتدعي علي اجة هادي عاط بيهن كلهن رزلهن وكال تعاي

مسحت دموعي وطلعت للحوش شفتهم محضرين سياراتهم وكل واحد سلاحه على متنه

حجي طاهر ...وحگ ذاك الكفل زينب اذا ليلة انكضت و دخلت للسجن وانتم تشتمون الهوى الا اترس بجثثكم النهر

ام منذر
... جا شنو تريد هاي الزلم تتكتل علمود ليلة عمي انطيها للحكومة يضربها مرض مجرمة

افتر وسلاحه بأيده
...يموتون ولدي كلهم وما انطي ليلة والله اذا ما تكتلو علمود  ليلة و السيد اترس بجثثكم النهر

هادي خله سلاحه ورا ظهره وگال بنخوة
....يوذروني وما اخليهم يوصلون لخيال ليلة واليلمس طرف ثوبها املص رگبته واشرب من دمه

قيس ...والله لو تخلوني اني اخذها واعبرها

حجي طاهر ...لا عدنا عرف يساعدونه هسة تطلعون للبصرة لربعنا ومناك يطلعونكم لايران

قيس ...هاي هيه

حجي طاهر ...السلاح ضمو عدل كون مايحسون عليكم شايلين سلاح واذا وصلتو لحدود المحافظة ردو بس هادي و حاتم يرحون ويا ليلة وقيس وبدون سلاح

هادي ...اذا مو سلاحي بمتني ما اتحرك ولا اخليتهم يتحركون شلون بلا رادو يكتلون ليلة شلون اكتلهم

حجي طاهر ...بالبصرة تلكاهم محضريلك تفگة يلا توكلو

صعدو السيارات دار قيس لزمني من معصمي جرني وصعدني بسيارة هادي ودار صعد يمي وحاتم صعد بالصدر وانطلقنا لمصير مجهول

ما ندري نرجع لو نموت لو ننسجن ........للحكاية بقية

لهنا وكافي اليوم الحدث الجاي طويل ويحتاج شرح ان شاءالله ع بارت 29 😊😊

وياي يا غوالي تعالو نتابع رواية ( كريات الدم السمراء ) للكاتبة المبدعة زحل
هذا حسابها zhalalshrefe
تعالو وياي نحتار بسلاسل واسرار قدر واسعد وثابت 🥺