رواية حمائم تخشى الطيران الفصل التاسع والعشرون 29 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

سهير ...

كضتني الدنيا وطلعت حيفها مني
مادري ليش جانت تعاقبني و على شنو تحاسبني بس كل الاعرفه ذبتني جثة هامدة بنص الدرب
ولا اني البيه حيل ارجع لنقطة البداية واضل واكفة بيها ولا اگدر اكمل وامشي وادورلي نقطة نهاية
استسلمت وضليت بمكاني جسد بدون روح ، فرقي عن الجثث الحقيقية النفس يصعد وينزل

طلعت من الحمام ودخلت للغرفة شعري يگطر ماي ما منشفته وبردانه ارعش ، لگيت جبران جاي يفك دكم قميصه توة راجع من الدوام

هز رأسه متضايگ وگال ... ليش ما لافه شعرج بخاولي منشفته

مديت شفتي ورفعت اكتافي ...ماادري
جر الخاولي مالته من التعلاگه الورا الباب واجة باتجاهي جنت ادهن ايديني نيفيه وارعش من البرد عظامي احسهن يطكطكن

ضل ينشف شعري ويحجي علي ...ليش هيج مو تتمرضين واحنه ما نعول تصيرين زينة ونفرح بيچ
...عوفه ما اتمرض شنو اليطلع شعره مبلل يموت ؟

جبران ...اششش
سكتت لف شعري بالخاولي زين
...عوفي دقيقة ينشف طلعيلج هدوم بدلي

...وين رايحين؟
...نشتريلج هدوم جديدات عرس خالتي عواصم باچر

رديت بصوت مبهوت وعيوني صارت بعيونه بدون حياة طافية
...مالي خلگ اروح

...لا شلون انتي كلتي تردين ترحين وانه حجيت ويا خالتي وانطيتها كلمة كتلها اجيبها للعرس شلون تتراجعين وتكسرين كلمتي

رفعت اكتافي ماادري
غمض عينه احسه بدأ يفقد صبره مشيت گعدت على الجرباية نزعت نعالي ورفعت رجليني صعدتهن ولميتهن لصدري اباوعله

فتح الكنتور طلعلي ملابس واجه
...هذني حلوات تحبينهن؟
هزيت راسي اي

خلاهن على صفحة ونزل رجليني باوعتله مستغربة
غمزلي وگال ...ابدلج ملابسج
...انته تريد حجة علمود انزع هدومي كدامك

...امتع نظري بحلالي لا عيب ولا حرام ولا بايگ ولا ناهب

رفع ثوبي واني ممتثله لاوامره نزعنياه كتله بصوت يرجف مو تباوع
هز رأسه اي ولبسني الملابس مال الطلعة ضل يعدل بياخة القميص مالتي ويتعمد يطخ ركبتي بأصابعه حتى اكش وارفع جتفي وانزل راسي متضايقة

جاب المشط ودهن الشعر خلاله دهن ومشطه الي
كعد ركبه ونص ولم شعري حيل وظفره سوالي كصيبة خلاها صفح وكال
...كضيها لا تنفل خل اطلعلج تچة

كضيتها من الطرف حيل علمود لا تنفل نزل رجله من الجرباية باوعتله غمزلي وطفر للكاع طلعلي كم وحده يرفعهن ويحجي
...تردين هاي؟
اهز راسي لا .. ويطلع الثانية ...تردين هاي؟
اهز راسي لا جابهن كلهن بأيده گال اختاري

مديت شفتي وعيني صارت عليهن بتفكير اجة صوت نزهة تصيح من ورا الباب ...جبران يردونك بالباب واحد من ربعك

باوع للباب ورجع باوعلي خلاهن على الجرباية
جبران ...اختاريلچ وحده على ما ارجع وضلي كاضة گصيبتچ لا تنفل وتخرب

هزيت راسي ...لا تتأخر انتظرك

عفس وجهه نصة باسني بخشمي ضحكت و وخرت راسي لان شواربه بززني
جبران ...تكشين مني انه الچ حرام العلي اذا ما اخلي اثر لشاربي على كل ذرة بيچ اطلع معتب
سهير ...ما اخليك توصلي انت وشاربك هذا الخشن
جبران ...اذا يضوجچ ازينه

ضحكت ودفعته بأيدي الثانية ...دروح للباب ينتظرونك

دار وجهه يتحلف بيه يرجع ويضل يبوسني لحد ما ابچي واصرخ
ضليت كاضة طرف گصيبتي وانتظره عيني تصعد على الساعة و تنزل لايدي الكاضة بيها طرف الگصيبة
ربع ساعة وحسيت بالملل طلعت وبعدني كاضة طرف كصيبتي بأيدي لكيت عمه علياء جاي تلف كبه

...وين جبران؟

علياء ...طلع عمه تعاي كعدي هنا يمي

اشرتلي بأيدها اگعد يمها مشيت بهدوء گعدت وراويتها الگصيبة
...شوفي جبران ظفرلي شعري بس ماحطلي شكاله كال انتظريني ارجع
علياء ...خاف يتأخرن وتخرب الگصيبة گومي حطيلها شكاله حرامات

هزيت راسي لا ...خليها هسة يجي ويحطلي شكاله

باوعتلي بحزن وهزت راسها عيني صارت على الحديقة من شباك المطبخ باوعت بنظرات خالية ماعندي روح ولا عندي حياة و وحيدة بس شوية يم جبران ارتاح واحس بالانتماء وحتى صارت عندي شكة گمت اخاف من الناس اخاف يأذوني وبس بي اثق

وهو يومية يگلي بس يم امي كعدي ولا تاكلين وتشربين من احد غيري وحتى بخواتي واخواني لا تثقين

البنات رجاء وزهراء جانن موجودات علمود عرس عواصم
طبت رجاء للغرفة تتمخط جانت نايمة شربت ماي وكعدت ع الكرسي صفح
...اكلج انه بعد شوي اروح للصالون احف واكص شعري اسوي ترتيبات ما تجين وياي تحفين شاربج خاط ينحلف بي

ضحكت وهزيت راسي لا ...راح نروح اني وجبران للسوگ نتسوگ بعدين اخلي ياخذني احف وجهي

رجاء ...يا خوش عليكم بالعافية

علياء ...جيبيلي ربطة مو تنسيني وعلي ما اخليج تدخلين للبيت من الباب اطردج

رجاء ...شسالفة يمة لو ماكلة ورثج ما تسوين بيه هيج وتطرديني من الباب شنو قحط ربطات انطيج ربطتي

علياء ...شوف الجلبة اني علمود اللون اريدها تلوگ ويا صايتي

رجاء ... اجيبلج ان شاءالله اذا لحكت امر للسوك اذا مالحكت نرهملج وحدة لو شوفي خالتي شومة تلكين عدها اللون التردينا

هزت راسها وصلت تلف بالكبة عيني تراقب الباب وكاضة كصيبتي انتظر جيته تنهدت بدون شعور وارتجيت على الحايط
علياء ...شبيج عمة؟

شيهانة ...جبران تأخر
علياء ...والله ما ادري دگو الباب ولد گال اني من جماعته وطلعله

هزيت راسي ضليت انتظر مليت رجاء راحت للصالون هي وزهيرة واني ضاله انتظره يجي يحطلي الشكاله وياخذني للسوگ يشتريلي ملابس جديدة للعرس

كمت للغرفة امشي بملل نزل عماد باوعلي و وگف بنص الدرج
عماد ...ها عافسه خلقتج منو وياج

شيهانة ...اخوك تأخر علي عودك نروح للسوگ
عماد ...انه اخذج

هزيت راسي لا وطبيت للغرفة تمددت خايفه تخرب روحي صارت بيها واني انتظره غمضت عيني وما حسيت على روحي غير غفيت فزيت عيوني ثگال وايدي خدرانه وعرگانة لان قابضتها حيل على طرف الگصيبة

نزلت رجليني من الجرباية مختنگة حسيت روحي بأضعف حالاتي نزلن دموعي وعيني ضلت على الباب مقهورة
حتى جبران عافني ومل مني عافني بدون ما يخليلي شكاله ولا اخذني اتسوگ للعرس

شهگت مستهضمة وعيني على الباب تنتظر دخلته
اريده يجي ويمسح دموعي بأيده ويگول صار عنده شي خلا يتأخر ما متقصد يعوفني
حتى لو يجذب علي قابلة المهم يبررلي وارجع احس اكو واحد يمي

سمعت الاذان مال المغرب رجعت تمددت تعاجزت اگوم اصلي اني من تمرضت وفقدت عقلي فترة وادراكي عفت الصلاة بس جبران من شافني بديت اتحسن ضل يومية يجي ياخذني للمغسلة اتوضأ وينطيني الاحرام البسه ويمدلي السجادة علمود اصلي ورا وما اعوف صلاتي

طبت رجاء شايله علاكة مسحت وجهي ورفعته من المخدة باوعتلها بتساؤول وحجيت ...ها ما اجة جبران؟

رجاء ...لا والله حتى عماد راح يشوفه خاف بالكهوة واذا ما موجود يسأل جماعته علي شو بطى وقلقنا علي

كعدت على حيلي ...شنو قصدج بطى وقلقنا علي يعني خاف بي شي لو متعور؟
رجاء ...ماكو شي ان شاءالله

اجت كعدت يمي طلعت صاية من العلاكة ...هاي جبتها الج شوفيها تخبل ولونها شحلاته ماروني

شيهانة ...لا ماريدها اريد جبران وينه
حجيتها وبجيت بضعف

رجاء ضحكت عكس الخوف الي بعيونها وضربت ايدها متحسفه
...ياا شوف تبجي على رجلها شنو تصغرين تكبرين حتى الطفلة ما تسوي سوايتج لو طلعت امها

حجيت واني ابجي
...ماريدكم كلكم اريد بس جبران وينه صيحوله

رجاء ...شوية ويجي كومي جربيها علمود من يجي يشوفها عليج ويشوفج طالعة حلوة ويفرح

شيهانة ...لا ماريد ما البس هدوم جايبهن واحد غير جبران
حسيتها استهضمت بس وضعي المامستقر وقلقي وخوفي خلاها تسكت وماترد بشي

باوعت بالمكان ورجعت باوعتلي ...صدك هم راح تخلفون النه طفل ترة ملينا نريد من نجي نلگى وليد بنيه يتلگونه ذيج اليابسة ماكو ماخلفت عاد انتي

شيهانة ...لا مانخلف اني ما اخلي ينام وياي عووع تلعب روحي من الزلم ولا اريد يوصلني وعلي اصرخ

استغربت ردت ...جا ليش تسوين هيج غير جبران رجلج ويحبج يموت عليج
شيهانة ...عوع اكره الزلم ماريدهم

سكتت شافت الشكالات على الجرباية جرت وحدة وكالت ...حطيها لكصيبتج المن ضاله كاضتها هيج خية ايدج راحت

نصيت مقهورة ...تؤؤؤ خليها لحد مايجي جبران يحطلي شكاله هو كال ضلي كاضتها لا تهدينها تنفل وتخرب

رجاء ...جبران يريد راحتج اذا اجه وشافج متعبه روحج هيج ومتشنجة يضوج ويزعل خليلج شكاله حلوة علمود من يجي يشوفها
نشوفه يلاحظ لو لا

باوعتلها بتفكير مديت روحي اخذت وحدة خليتها لطرف الگصيبة وخليتها صفح
مدت ايدها گلبت بيها تضحك ...خوش يظفر جبران عاشت ايده والله معدل

ضحكت خجلانة سمعنه صوت صياح طلعنا لكيناه عمي يتصايح ويا عادل ما فهمنه شي
اخير شي عادل صيح بغضب
يمه ابنج ماله اثر فص ملح وذاب لا بالكهوة موجود لا يم اصدقائه من العصر لهسة

عمتي شهگت ولطمت صدرها اني تراجعت خطوات ليورا فاكه عيوني مصدومه
عمتي ضلت تكطع بروحها وزهراء تبجي هبة طبت تركض شايله هدى على متنها وتحجي بخنگة

هبة ...لگيت هاي بالباب مال بيتنا يمه دخيلك يا ابو الحسن خفت افتحها

اخذها عادل من ايدها بنتر متوتر ومعصب هدير نزلت تركض على الصياح تباوع بتساؤول و وجهت سؤال لنزهة
...شكو؟
نزهة ...جبران ماكو طلع ومارجع

حميد ...هسة يمكن معزوم صاير ويا شي
عادل ...ما اعتقد
يحجي و وجهه مبهوت ويقرأ بالورقة

انخطف لونه رجع يمشي ليورا حط ايده ع القنفة وكعد شفت ايدينه رعشن
حميد ...انمرد افادي احجي شكوو شمكتوب

عمتي ضلت تعيط وتضرب صدرها ... يمة جبران يمة يمة

عادل ...مكتوب جبران راح وبعد ما يرجع وانتم تعرفون الاسباب

بهت وجهي يا اسباب؟ احنة شنو نعرف
حميد ...يا اسباب هو جبران شعنده يروح بدربه ويجي بدربه
علياء ...عداوه هذول ربع بشير الجلب ابن الجلب يردون ينتقمون من وليدي ويحرگون گلبي علي

عمي كض راسه وطاح بالكاع ضل يصيح
خابرو عماد يجي عنده عرف وحاجو عمار صاحب جبران انهد حيلي اخ بوية جبير اخ يا بوية

انخبصو وضلو كل شوية شايلين السماعة وحاجين ويا واحد وتجمهرو اصدقاء جبران ومعارف عماد من الضباط وعمار وربعه وضلو يدورون علي

الليل كله اني ما نايمة الوب وعيوني يصبن ما يوكف دمعي ناشغ محروك كلبي
والبنات يبجن ويلطمن كل شوية يكولن راح جبران راح اخونه وين نلگاه بعد

وعمتي گوة گوة خلوها تنام شوية قنعوها يرجع وطب عمار كعد بنصنه باس راسها وكللها
...حجية يرجع المخطوف يردون فدية مقابل سلامته ننطيها ويرجع والمسجون هاي اسهل نحصله وين بيا سجن ونطلعه

ونامت بالصالة علمود بس يجي تسمع صوته وتكعدله سودة علي

مشيت للمطبخ وكفت بالباب شفت الباب الرئيسي مفتوح والزلم متجمهرين وعمار واگف بالباب باوعلي وطال النظر الي استغربت نظراته كتفت ايديني احس روحي راح اتخبل بهاي الحركة حسيت احتويت روحي وتحكمت بمشاعري

من شافني ضليت واكفه طلع ورد الباب ضل كاضه بأيده عيوني تهمل طال الليل وطلع الصبح واحنه نلوب نبجي وندعي يرجع جبران سالم غانم

گعدت على باية الدرج اشوف الشمس طلعت والبنات يصلن ويقرن قرآن يدعن
اجت رجاء كومتني كالت توضي وصلي ادعيله يرجع

هزيت راسي توضيت وصليت ماعرفت شنو ادعي بس عيوني يصبن تمددت على السجادة مكرفصة على روحي ابجي

ونفس الشي مر اليوم واليوم الثاني بحيث ماضل النه حيل من گد البجي والمشكلة ماجاي نعرف اذا مخطوف لو وين ..

عمي گال ندور والله كريم عدل ميت اريد الگاه

مشيت للكنتور اريد اسبح صارلي يوم ثالث ماسابحة وكفت اريد افل شعري واختنگت بعبرتي ضليت اشهگ وكاضة الكصيبة ضامتها لصدري
ما انطاني كلبي افلها ذبيت الهدوم وضليت بدون سبح

يوم خامس من فقده البنات اجو رجولتهن خذوهن هم خافو لا ينخطفون الجهال لو يصير شي شكد انقرنه وزادت وحشتنا
ولا عدهم احساس اخليهن غير اخوهن مختفي لحد ما نلگاله اثر بس منين ماكو ما صدكو دخلو لبغداد گلولهن لملمن نرد للبصرة وهن خطية من لا جارة لمن ورجعن يتباجن

وگفت يم باب البيت فتحته شوية اباوع للشارع عندي امل المحه جاي يمشي وكحل عيني بشوفته
طاحن رجليني من وگفة الباب وعيني يبست
وتكحلت بحزنها
الم الفقد يجلد بروحي ماضلي حتى حيل للبجي

طبيت للبيت كعدت ولميت رجليني الصدري عمتي حالها امر من حالي تبجي وكل شوية يجن نساوين يواسنها ويرحن

ضجت من روحي واحس روحي كلش ثگيلة ردت اسبح وايدي ترجف كل ما اكض كصيبتي اريد افلها انقهر ..

فتحت الجرار طلعت مگص خليته على شعري من فوگ وگصيت الگصيبة الظفرها الي جبران بأيدينه
انگصت روحي وياها وانهدم حيلي

خليتها بداخل الجرار ذكرى منك يالرحت بلاية وداع
الكتلي انتظريني وما رديت

سبحت بسرعة وطلعت عمتي شافتني استغربت عقدت حاجبها
...ظفرلياها بايده ما هان علي افلها كصيتها .

ضلت تبجي وتعاتبه وهوَ غايب ما يسمعها والله يعلم يمكن يسمعها ويدري بحالها وحالي بس ما يگدر يرد

بالليل وازاني الشوك اله واذتني وحدتي صعدت لغرفته فتحت الباب لگيت هدير متمدده بفراشه تبچي وحاضنه قميصه

تخبلت فقدت عقلي هي بس شافتني طفرت وكالت
...مقهورة علي ابن عمي واخوي

هجمت عليها جلبت براسها ...جلبة مطية ليش تشمين قميصه هذا رجلي مو رجلچ
دفعت ايدي حيل ونترت ...يمته شميت قميصه مخبلة تتخايلين يمته تصحين

شيهانة ...شفتج بعيني

هزيت ايدها وكالت باستهزاء ...هوا انتي ضل ضيم ماشفتي ساعة شايفة زلم ساعة شايفة حيوانات تاكلج ساعة حياية تدخل لبطنج مادري تطلع منها هوا انتي مسودنه

عافتني وطلعت كعدت على فراشه ابجي واشهگ من كل گلبي جريت قميصه جان اسود قربته من خشمي اشمه بس عطره هذا ممغسول حضنته حيل واشم بي واني ابجي بعد روحي ريحتك ما راحت اتمنى ما تكون انتَ الرحت وعفتني وحيدة بهاي الدنيا واني مالي غيرك

صدك هوا نزل يمي اخر شي بس الغرفة هاي بيها اله بكل ركن اثر وذكرى ايام يمي بالغرفة الجوة ما يمسحن اثره منا

مشيت اتحسس الميز هنا يوگف يمشط شعره ويجهز روحه حتى يطلع
فتحت الجرارات بيهن محابسة وساعاته
واحد منهن بي ورق ورسائل ودفتر غلافه جوزي

جريته فتحته لكيته دفتر مذكرات حضنته لگلبي وضليت ابجي بست الحروف الكاتبها بأنامله واستنشقت عطره ما ادري تهيئألي هذا الشي من كد ما اريده ومحتاجته

ما فتحت دفتره لان هاي تضل خصوصيته حي ميت ما لازم احد يوصلهن ضميتهن وعيني طاحت على صورتي محطوطة جوة الاغراض ابتسمت بألم هاي الصورة بعد زواجي من مهيب بشهر مصورتها جوة شجرة واكفة مبتسمة ومخليه مكياج وجهي جان حلو رغم كل الحزن الجنت عايشته بذيج الفترة

استغربت منين جابها لان هاي الصورة عد اهلي
يمكن من ملاك ماخذها
درتها شفت كتابه بظهرها واضح مو كلش قديمة مو بعمر الصورة

كاتب "تركتني محبوبتي على جرف الذكريات اتعاطى الحزن واخاطب صورتها كل يوم
بـ لا ترحلين من بعدك يموت ورد الياسمين ..
اذ بها رحلت ، و من بعدها مات الياسمين و قلـبي"

عيوني طاحن على الكتابة مسحتها خرب الحبر وجزء من المكتوب بس مستحيل انساه لان انطبع بذاكرة گلبي الغير قابلة للنسيان

خلص ليلي ونه على ونه وحسرة على حسرة سلب حيلي الحزن و وجع الفراگ نهش گلبي نهش تمنيت يرجع واحضنه واشتم عطره لحد ما اروى
الروح هم تعطش وتريد من يرويها ..

مرن الايام متشابها حزن على فقده وفقد اثره كل يوم اكعد بغرفته فوك كبال الشباك واشغل المسجل اسمع اغنيه لا ترحلين واتذكر وجعه والمه وهو يسمعها من فارگني وابچي اشهگ لحد ما انتهي وتختدر روحي من كثر البجي والقهر وانام ..

هد حيلي فراگه والايام تمشي وما لگيناله اثر والشهر صار شهرين والشهرين تلاثة
وخلصت السنة واحنة نتمنى بس نسمع خبر عنه لو يجي واحد يگول ترى جبران عايش
بس ماكو وانگطع الامل عد بعض الاهل والبعض الاخر لا مستمر

اني استرجعت حيلي وقوتي وتعافيت ولزمت بيت عمي لان عمتي صارت ماتكدر ع شي بسبب حزنها على جبران
صرت اني المسؤولة شلون ما ادري بس لكيت روحي متعافية وقوية وادوس على جرحي و اوگف استقبل الخطار واجاوبهم من يسألون عنه
واركض اضيف واخابر عمار بين الحين والاخر اسأله اذا سمع خبر عنه
اخذ عمتي للدكتور لان دائما مريضة وتتخربط علينا
واساعد عمي بالمشي مرات مابي حيل يمشي انحنى ظهره وما ضل عنده حيل من ورا فراگ جبران

ادوس روحي واصعد انظف غرفته واهويها وابخرها ويومية اطلعله ملابس ارتبهن على الجرباية انتظره يجي ويلبسهن بس تالي الليل انهار وارجعهن للكنتور واغفة بفراشه وتغفه وياي دمعتي و ونتي والاه التكسر ضلوعي وتطلع

شلون صرت بهاي القوى بعد ما جنت بأضعف حالاتي ما ادري
يمكن جاي امثل وممكن من يجي خبر سيء عنه انهار وافقد عقلي تماما واموت

سنة كاملة ما شايفة طوله سنه كاملة ابجي من امشط شعري واتمنى يرجع ويشوف الكصيبة انكصت لان ما حطلها الشكاله بأيده
اتمنى يرجع وابجي بحضنه واحقق حلمه واصيرله زوجة

اندگ باب البيت ركضت شمرت المس على السنگ
...نزهة عينج على الجدررررر

ركضت بسرعة وهاي كل ما يندگ الباب يطير گلبي حسبالي هو رجع
فتحت الباب وگبل اندفر وچيتو الامن يصيحون وييين عماد

يبس دمي وركضت وراهم دفرو البيبان دفر ودخلو سحلو عماد سحل قيدوه ونزلو من فوگ دفر
الضابط گال حضرو نفسكم شغلته ماتطول اسبوع وتشوفونه ميت حضرو الفاتحة. 

رفع راسه عماد باوع علينا مقهور مافاهم الصاير شنو ولا ينطو مجال يحجي وهدير تبجي وتركض ورا تصيح
...رجعو ممسوي شي بريء

عمتي خرت وطاحت والبيت انگلب جحيم .. وهاي چانت بداية سقوطي

....

ليلى ... جمدت اسمعها تعيد نفس الجملة عقدت حاجبي وكتلها
شنو تخبلتي خاله

...هوا راح اتخبل ليلى وحور راح تموت طلعو معرسينها المكرودة وحبلة

...حور الحامل؟
...ريحانة

...عزززة وينها وين العرس والحمل شنو يحجون صدك لو تخبلو
...اني ادري؟ ليلى شوكت عرس السادة

...باجر خالة
...ورا العرس تعاي گبل ترة حور راح تتخبل واني حاجيت ابو خلدون راح يساعدني ويحميهن

...اي خوش ورا العرس اجي عدل وگبل عليكم اشوف هاي المصيبة وندبرلها حل
...هاي اذا ما لگينا حور لاعبة لعب بروحها لج ليلى خايفة لا تكتل ريحانه وروحها

...عينج عليهن لعد لا تفاركيهن لحد ما ندبر حل

سديت السماعة واحس گلبي يدگ بكل جسمي كعدت والرجفة لازمتني يمه يمه ريحانة وينها وين العرس والحمل طفلة وين تگدر رحمها يتدمر

ضليت افرك بوجهي محتارة والحيرة اكلتني اكل شلون تنحل هاي بالله رفعت راسي من حسيت احد گبالي شفته عمي جاي يتقدم كمت وكفت كال استريحي يابة وگعد

كعدت منحرجة
سيد رحمن ...تفركين بوجهج ومصفرچة شبيج يابة مريضة دايخة ؟

بلعت ريگي متوترة ونصيت راسي ...لا عمو بس شوية شغلة قهرتني وضليت بقلق وحيرة

...احجي يابة يمكن اشور عليچ انطيچ حل اذا گدررت

لميت شفايفي وضغطتهن بحيرة رفعت راسي تنهدت وحجيت
...عندي قرايبي صغيرة بعدها عمرها ماصار 12 وزوجوها
هز راسه اي ... والبنية حامل هي حتى عمرها مو 12 بهيج عمر صعب تكون ام خطية تتدمر يعني باعتبارك تعرف تشوف اذا لجئت لدكتوره وطرحت حرام؟

صفن بوجهي ...كلش صغيرة شنو ماعدهم خبزة

ليلى ...استثقلوها لان ماعدها ابو شمروها شمر خطية

هز راسه مقهور
سيد رحمن ...يابة الله زرعه ابطنها راح يتكفل بيها وبي ويحميهم ويحرسهم ومن تجي ساعة المخاض سبحان الله ربي يقوي گلبها وجسمها وتوضع حملها بخير وسلامه وتگوم بحيلها

ليلى ...بس صغيرة معقولة الدين والشرع ما بيهن حل لهيج حالة صعبة شلون

...سمعي يابة الشي من تلوحه ايد ابن ادم حتى تشلعه گوة يوجع ، اي شي كان سنج هذا اليوم اذا وجعج ورحتي للطبيب من يشلعه راح تحسين بي عته وشلعه گوة ويضل مكانه خاااالي ومستحيل يطلعلج واحد ثاني بمكانه

الطفل نفس الشي من تتدخل دكتورة حتى تنزلة للبنية توقعي تموت واذا ما ماتت تتدمر بعد الحجي هذا مابي عيب
رحمها يابه يتدمر لانها صغيرة كلش بس من تجي ساعة الولادة من الله والله هو يقدر ويشاء ويشلعه من كيفه النتيجة مختلفة الله راح يتكفل بسلامتها وحياتها

ليلى ...صحيح حجيك عمو خليها بأمانة الله هوا يحفظها ومثل ما كتبلها هذا الطفل هو يحميها ويحفظها ويحفظه

سيد رحمن ...عفية بارك الله بيج نصحيها لا تشمر روحها للنار

هزيت راسي وتشكرت منه طلب مني ماي بي عصرة ليمون كمت جبتله شربه ودعى لوالدي بالرحمة

صعدت يم دنيا لكيتها لابسة ومنتظرتني
دنيا ...هذا اول واحد اختاريته حلو راح اثبت علي ولونه يجنن طوعة عدها صبغ اظافر نفس لونه اكللها تنطينيا وانطيها فلوسه

ليلى ...ما يحتاج حبيبتي اني عندي بلونه والوان تشبهة انطيج
دنيا ...مشكوورة

طبت سكينة تدردم على بنتها كريمة لان تبجي وشافت الفستان حبته اخذت كريمة من ايدها خليتها على كتفي امشي واهز بأيدي وهية كالت عدها ثوب احمر راح تلبسه تريد ويا صبغ اظافر احمر

كتلها واني اضحك ...شكو معجون طماطه احمر بأحمر صبغي ويا صبغ اسود

گالت ... ماعندي اني شفتج مرة مصبغة احمر كلت اخذه منج بس كون يطيح

ليلى ...حتى اسود عندي ومكياج اشكال والوان عندي واعرف اتمكيج وامكيج خالتي معلمتني

كالت هاي هيه انتي تمكيجيني بس مو طوخ خاف يشوفني هاشم وما يرضا
رغم هنه مبوشايات بس كلش محسبات حساب للبس والمكياج ويردنه استر شي

بالليل سويت ايديني شيرة وعدلت حواجبي بالملقط سبحت وطلعت للغرفة مشطت شعري عفته مفتوح ينشف وحطيت بودرة جوليا لجسمي ، حطيت حمرة خفيفة كلش وكحل
لبست ثوب نوم وردي ورشيت عطر نثرت شعري ورتبته و عطرت الفراش
طفيت الضوة خليت كلوب نوم مشتغل لونه خافت كلش و كعدت على السرير انتظره يجي ..

دگ الباب تذكرت اني قافلته ركضت فتحته وحجيت
....اجيت حبيبي

صار بوجهي ظهر سيد مرتضى واگف ظهره للباب ماشافني شهگت و ويا ما جاي اسده صار هاشم بوجهي يمشي لغرفته وجهه صار فجأة علي فتح عينه ودار انطاني ظهره

سديت الباب ايدي ترجف رغم لابسة روب طويل فوگه وما جنت واكفه بطولي كدام الباب بس مادة روحي
بس طالعه ايدي وجتفي وشعري وشافني هاشم مرتضى مدنگ وظهره للباب من الاول ما شاف ولا لمحني حتى

ضليت ابجي وبسرعة نزعت ولبست دشداشة ومسحت الحمرة
شلت شعري رفعته وعيوني تجري مقهورة شلون شافني هاشم وطالع جتفي وايدي وشعري والله يعلم يمكن حتى صدري

ماكو دقايق وصعد قيس شافني ابجي استغرب سد الباب ولزم وجهي من حنكي ورفعه
قيس ...ليش البچي خاتون ليش هاي العيون الحلوة تبجي كولي حتى افصل حك كل دمعة مربع

عضيت شفتي مقهورة هزيت راسي لا لا
ونصيت
رفع راسي وهو يباوع بوجهي وخر كذلتي خلاها ورا اذني وحجة
قيس ...دموع الشوگ هذني ادري بيج ما تتحملين فراگي

شافني ماضحكت وانعقدت حواجبه كال باهتمام
خالتج عمامج بيهم شي ميت احد

مشيت للجرباية كعدت تربعت
ليلى ...اسمع احجيلك بس لا تعصب بس تعصب ابجي بالزايد واموت قهر

ثنى ركبته وكعد كبالي لزمني من اكتافي
...احجي سحنتي روحي بدموعج اني اضعف من اشوفج تبچين هاي العيون الحلوة عيب تبجي وزحمة ازعلهن وابجيهن

شرحتله الموقف كله بالتفصيل ضاج كام يمشي بالغرفة ذهابا وايابا ويوكف يباوعلي ويكول
غير تنتبهين ليلى احنه مو وحدنا بالبيت
ليلى ...متعودة عليك بس انته تجيلي واذا مو انته البنات وهذا الشي نادر يصير شمدريني ع حظي يجي مرتضى بس مرتضى ماشافني بس هاشم

قيس ...مرتضى مايدري بيه يم بيت عمي جايب السويج مالتي

فرك عيونه ورجع يفتر
ليلى ... اسمع والله ماشاف هواي وهو اجت عينه ع راسي بس واني شوف هيج واكفة ومادة روحي بس جتفي وايدي وراسي
لابسه الروب صح مو كلش ثخين بس من بعيد مايبين جسمي منه
يعني بس الشعر شافة بوضوح

ضل يحوم فوگ راسي
قيس ...هسة لازم اقنع روحي عود انتي بعدج ما محجبة واني احبج قبل الحجاب ومن باجر تلتزمين ومحد يشوفج

ليلى ...اي خوش
قيس ...صعبة بس الحمدلله اخوي ولا غريب اخواني اعرفهم زين هسة هاشم تلگين وضعه امر من وضعچ يمكن حتى يبجي

عقدت حاجبي مقهورة ...تحجي صدك
قيس. ..والله هاشم ينقهر خصوصا من تصير السالفة بيها عرض

ضليت ابجي بالزايد وهو كمل ...من خطب سكينة جانوا عاقدين وراحلها هي مجيته للاستقبال ماتدري بي بدون حجاب طالع منها شارد وبعد ماراحلهم ولا شافها ليوم العرس مكرود عود رايح يحجي وياها يتعرف عليها ويشوف طلباتها للغرفة والعرس

ضليت اشهگ مقهورة ...كافي سكتي هاشم ما يهوى الحرام ولا يضل يفكر بشعرج ولا بشكلج

ليلى ... الحمدلله ربي الحمدلله بعد ولا البس ولا اكشخ ولا شي بطلت

جريت الغطة تمددت وغطيت راسي خجلانة كلش وهو هم ضاج ونام

ثاني يوم الصبح احتاريت شلون اطلع وادري بيهم كلهم موجودين يتريكون سوية جريت نفس عميق ولفيت الربطة زين
نزلت صبحت عليهم وتريگنا سوية ولا رفعت راسي وهو هاشم بدون شي اصلا مايباوع و ورا موقف البارحة يمكن يشرد اليوم

صرت اتعجب شلون جنت اطلع بدون حجاب والزلم تشوف شعري لو البس قصير وضيگ شلون جنت ارتاح؟

لمينا المواعين وكفت ع الحوض اغسل وعيوني نار من كد مابجيت البارحة وانقهرت كالت سكينه
تعاي ليلى هاشم يريد يحجي وياج

كالتلي هيج لو انمغصت بطني
باوعتلها تضحك وتهز بأيدها علي ذبيت من ايدي ومشيت وراها للحديقة لگيته واكف منزل راسه لابس دشداشة ومخلي جفية سودة على اكتافة وقيس واگف يمه مخلي ايده حول اكتاف هاشم ويضحك
وهاشم منصي يفرك عيونه بطرف جفيته من اجيت قيس كله هاي اجت

رفع راسه بسرعة علي عيونه حمر دم
نصة بسرعة وحجة مثل الواحد الحافظ
هاشم ...خوية ليلى والله اني ولا قاصد ارفع راسي مادري شلون رفعته وشفتج بدون حجاب بس والله ولا حفظت شكل شعرج ولا شي وانتي بالنسبة الي مثل خواتي حتى لو حافظ شكل شعرج لا تشيلين هم

دار وجها يمشي بسرعة وقيس يگله ولك كمل
وكف والتفتت
كمل. ..الله عليج حالليني و واهبيني اني ولا قاصد من كون اموت اليوم اذا قاصد ارفع راسي واشوفچ

بلعت ريگي بصعوبة ...محالل وماهوب انته اخوي شسالفة

والحمدلله انسدت خطية شگد خجول ومحترم هاشم ويخاف الله
ياريت كل الزلم مثله

دنيا ...بعرس طوعة وابن عمي لبست بدلة من ليلى وحجاب وصبغتلي ظافيري
ومن مكيجت سكينة كل شوية تكللها عدلي لا اذكرج ب.....وتسكت
وليلى تضربها وتنهضم تريد تبطل وترجع تبتزها بشي مضموم

من شافني استغربن حجن الموقف ضحكت وانقهرت بنفس الوكت لان خطية ليلى وهاشم هو شافها وانقهر وهي انكشف سترها كدامه

ليلى تحلف بينا مانحجي ابد كدام اي بشر واحنه نحلف وتريد نحلف بعد الا شوية تاخذنا لبيت الله تحلفنا هناك

ليلى ...كافيج صارلج ساعة تنفخين على الصبغ لو صابغين الحايط ع نفخج جان نشف

دنيا ...عبالي بعده
اكلج شلون اطلع بالصبغ
سكينة ...لبسي جفوف سود
دنيا ...اضوججج عادي ادخل ايديني جوة العباية وما يبينن اريد البس محابس وسوارات ذهب علمود اتكشخ

ليلى ...تكشخي داده تكشخي منو لازمج اخ لو تخليني اخليلج شوية حمرة وارسملج عيونج بالكحل
دنيا ...لاا دخيلج كدام ابوي واخواني
ليلى ...اي تبوشي من تطلعين شو عمتي تكول الستر الستر من تطلعن ما كالت لا تتمكيجن وتتعدلن كدام النسوان

دنيا ...ما قبلت لان ادري امي ماتقبل
طلعن من الغرفة مشيت بالخلسة لزمت سفنجة مثلثة بيها وردية بدون ما اخليلها شي بس مشيتها شوية على خدودي وخذيت قلم سحري حطيت نقطات وضليت امشيهن على شفايفي وامسح بيهن لان حسيته بين

تذكرت طوعة من خلتلي مسكارة عيوني صارن حلوات جريتها وحطيت شوية مشيتها مرة وحدة على رمشي
باوعت لوجهي شو هذا وجهي بين بي اليوم امي تكتلني كدام العالم وتخليني فرجة لامة محمد

ردت اروح اغسل وامي شافتني كالت تعاي تعاي
مشيت الها باوعتلي منا ومنا
كالت من تطلعين نزلي راسج كلش وستري حتى وجهج بالعباية

هزيت راسي اي همزين ما كالت غسلي يعني هاي هيه خلي مايبين

لبست جواريب وجريت العباية لبستها نزلتها وخليت ايديني جواها لفيت روحي لف وما طلع مني بس قرص وجهي

نسوان اخواني كلهن تبوشن حتى ليلى غطت وجها بالشال طلعنا اني جلبت ويا قيس وليلى علمود قيس شوية من حب ليلى استهتر حتى اذا شاف مخليه مكياج ما استحي منه

كعدت وراهم واخذنا الطريق كله يسولف ويا ليلى وهي تجاوبة شلون فوك ما هي مايعه تتمايع اكثر وتتدلع واني اكول شبي اخوي طايح على وجهه اذا الاخت ساطرته بالانوثة والدلع

رفعت راسي صارت عينه بعيني بالمراية ضحك وبسرعة عفس وجهه وعقد حاجبه بس كوة لازم ضحكته
كال بحدة ...لج دنيه مخليه لعيونج كحل ومسكرة

نصيت خجلانة ليلى ضحكت ومدت ايدها على ساعده كرصتها
وهو يضحك ويكول دنگي من نوصل غطي وجهج ولفن روحجن زين بالعبي لا تخلن واحد يشوف هدومجن لو يعرف يالون لابسات

نفذنا ووصلنا العروس لهسة ما جايبينها من الصالون وكل الاهل والاقارب ملتمين مشينا للغرفه ننزع العبي ونرجع نسلم ، باوعت ليلى لابسة بدلة ضيگة مبينه تفاصيل جسمها ومخليه مكياج ولابسه ذهب مزينه روحها بي

طلعنا نسلم كلهن كصنها كص ويكولن شفتن مرت قيس لابسة ضيك والمكياج على حباية ونص

بس امي من كللها ليش هيج مرت قيس مكياج طوخ وضيك
كلتلهن عرس وبس نسوان وين المشكلة لو انتن شايفات ارواحجن زلم

كلهن سكتن وليلى بس سلمت كعدت بعد ماكامت ولابسة حجاب بعد عليمن هذا الحجي ما ادري

جابو طوعة وجانت اول عروس عدنا ماتلبس حجاب وتسوي تسريحة جابوها مغطينها زين وبالبيت شلنه الكبوس والعباية من فوكها

طوعة وخطيبها ثنينهم ماقبلو ع سالفة الحجاب بالعرس صدك الكبار ماقابلين بس مابيدهم شي ما طول العرسان هيج يردون وهذا الشي ما يأثر لانها يم النسوان نازعة حجابها مو يم الزلم

جابو ملة ضلت تقرا مولد ونصفگ
وزعنه كيك وشربت وجكليت وتعشينا وخلص العرس

طلعنا تعبانين رجعنا للبيت نزلت من السيارة شفت سوادة يم الباب التفتت علينا طلع سيد مؤمن يمه حسيت گلبي راد يطلع گبل دنكت راسي ودخلت للبيت اركض

ليلى ركضت وراي لزمتني من زندي وشاورتني ...ضل يباوع وراج من ركضتي ليش تحسسينا انتي متأثرة وشاردة تصرفي طبيعي

هزيت راسي ب لا وعيوني غوركن
بلكي ما انتبه الي
ليلى ...لا ترى اني مخليه شال واشوف هو من دار عيونه افترت بسرعة بيني وبينج وثبت نظره عليج والنوب عبايتج انفتحت من مشيتي ومخليه ايدج على عبايتج من كدام من يم الصدر وهي العباية اصلا طايرة ومصبغه ذاك هو صبغج مبين

دنيا ...لا تقهريني
ليلى ...مو اقهرج بس ادري بيج يهمج سترج كلش المفروض تصيرين متزنة وبهيج موقف تكونين قوية تلمين روحج زين وتمشين بهدوء وتحسبين حساب لروحج قبل لا تحسبين حساب لنظرته واله
حتى ما تنفتح عبايتچ كدامه مرة ثانية

هزيت راسي .. كالت ضل يمه قيس مخنوك خطية شبگ قيس وگله بقهر
...خذاها شمعه من نص گلبي مو بيتي

وحسيته يبجي على طوعه
...يموتون عليها موت

صعدت سبحت وشلت الصبغ همزين بالعرس صليت لان متوضية ومحافظة ع وضوئي
جددت وضوئي وكعدت قريت جزء من القرآن
ورددت مية مرة (سبوح قدوس رب الملائكة والروح)

حسيت نفسيتي ارتاحت شلت قرآني وفليت شعري طفيت الضوة البردة جانت شوية مشيوله ومبين منها ضوة
رجليني رجفن مشيت ع كيفي رفعت طرفها وباوعت شفته فاتح شباكه و واگف منصي راسه كبال الشباك
ضليت اباوعله فتره جامد وفجأة رفع رأسه رجفت وتراجعت بسرعة

ركضت لفراشي تغطيت حتى راسي وافكر بكلام ليلى
من كالتلي سيد مؤمن اذا فتح شباكه معناها يريدچ

ليش فتح شباكه وليش رفع راسه اتجاهي معقولة سيد مؤمن صدك يريدني بس اكو شي واكف عائق بطريقه الي
لا ليش اكو شي خوب اكو اباذر يمكن مايريدني لان اباذر خطبني

كعدت ع حيلي ...لا هو ما جان يريدني ولا حاس بيه واني ما اقبل اذا فكر بيه ورادني ورا ما حجيت مادري ليش بس احس اذا حبني وانتبهلي ورا كلامي ويا اكو اهانة الي والمشاعري وشخصي واحس روحي ما كنت ولا شايفني وهذا الشي يغث

ليلى ...ثاني يوم العرس كلت لقيس اخذني لبيت خالتي شفت حور وريحانة يقهرن
ريحانة عدها نساوة وبس تتقيء ودايخة ونايمة بله هاي وينها وين النساوة ومبينه من صفار وجها عدها نقص دم

وحور ميته ماكو ما احس بيها عايشة متخبلة ما تگول غير اريدلها دوة خليها تذبة وتعيش
اذا كبر ابطنها تموت

صرنه مثل بلاعين الموس لا نكدر نطلع ولا نكدر نبلعه واكف بالبلعوم ومخلينا بالضيم
ضلت تلح علمود ندبر علاج يخلي ريحانة تطرح ماقبلت كلت خاف يصير بيها شي ولا خالتي قبلت

كلش تخربطت علينا حور خالتي دزت ع تكسي اخذتها اني للمستشفى لان قيس نزلني وراح وخالتي ضلت يم ريحانة

بالمستشفى وانهارت حور
كالتلي وهي ترجف ..بداعة كل عزيز على كلبج روحي للصيدلية سألي وشوفي علاج يخليها تذب الجنين وتفتك

ضليت ابجي ...خاف تموت
حور. ..خل تموت احسلها احسن ما تجيبه وتضل تموت باليوم الف موته ويصير حالها مثل حالي

هزيت راسي مقهورة مشيت للصيدلية ابجي توسلت بي ماقبل ينطيني رفض والنوب اجت وحدة رزلتني بأدب عن طريق كلامج وهاي عرفت هاي انتي بس والله ولا اذكرچ

شيهانة ...عبالي الحبوب الج
ليلى ...لا لريحانة المسكينة
شيهانة. ..شفتج ثاني يوم بالامام
ليلى ...اي اجة قيس اخذني من بيت خالتي للامام احنه كل جمعة نروح ورا صلاة الظهر بس بيومها كسرنا القاعدة ورحنا قبل الصلاة وسبحان الله شفناچ

شيهانة. ..احجيلي شصار ريحانة شلون وضعها كملت حملها لو لكيتن دوة خلاها تطرح

ليلى ...سمعي

ورا ما رجعني قيس لعيالي ضليت الوب وكل يوم اخابر خالتي اسأل عن وضعها مكسورة عليها كلش وروحي يمها

ورا اسبوع خليته ياخذني الهم لكيت حور مريضة وريحانة حال الضيم حالها كاعدة وظهرها محنية مسنحة وكبالها طشت كل شوية تذب من راسها

انفطر گلبي عليها خالتي كاعدة بالمطبخ تباوع عليهم مقهورة وحور بباب الغرفة مخليه ايدينها على خدها

ليلى ...خاف يوصلون الهن
نسيمة ...ماعدنا مكان ثاني و وصيت ابو خلدون يدبر النه مكان محد يوصل النه بي
هسه احنه بحمايته

كعدت خايفة متوترة وجسمي كله ينفض اجة ابو خلدون صديق خالتي وصاحب منصب يعني خالتي مونسته ومونسه جماعته

حجة وياها شوية حجي خالتي بدلت وطلعت كالت رايحة عندي شغل ما ارجع مجبورة

ضليت مستغربة بس سكتت
عافتنة وطلعت والليل سوادة خيم على گلوبنا

حضنت ريحانة وغسلت وجها لان ضلت تتقيأ هواي وحور بس تبچي منهارة
صار عندي مغص وخوف مادري ليش كلبي ما مرتاح واحس هاي هيه احنه انتهينا

وفعلا ما طالت للفجر وطفرو من السياج على بيتنا واحنه نايمات ما حسينا جنة بغرفة وحدة حور من خوفها كبل ضلت نايمة بفراشها تريد تتحرك ماتكدر
حضنت ريحانة اصرخ
رفعو علينا سلاح
خلسونا خلس واذا ذيج المرة اخذوهن ثنينهن هاي المرة اخذو بس ريحانة

والزلمة الاخذها سحل يكول ...مرتي وشايلة ابني ما افرط بيها

بعدنا ماندري شلون شردن حتى المسكينة اخذوها المشكلة جانت بضعفنا ورغم ابو خلدون متكفل بيهن بس كدرو يسطون على البيت وياخذونها
طبطبت على وجه حور وحجيت
...لا يصير بيج شي ترجع ابو خلدون تكفل بالسالفة يروح يجيبها ويجي والله

ضلت مبهوته حسيتها انجلطت ذبيت عليها ماي فزت تبجي
حور. ..تدمررت مثل امها تدمرت ريحانتي تدمررت بنيتي

ضليت اشهگ ...يرجعها ابو خلدون والله
ضليت ارجف وابجي وحور انهارت وجسمها ثگل حسبالي انجلطت ضليت افتر ومادري شسوي وشلون و وين اروح لحد ماطلعت الشمس كلت هسة قيس يجي لان عندي دوام المفروض ياخذني للجامعة
وخالتي بلكي تجي نشوف شلون ننقلها للمستشفى واذا تاخرو اطلع للشارع اجيب تكسي

ضليت افتر وكل شوية اجي اريد اكومها اكعدها ماكو جسمها ثگيل الدم صعد الراسي وخالتي تأخرت
حسيت حور راح تموت

اندگ الباب ركضت بسرعة وبكل غضب فتحته وانفجرت بخالتي بس طبت وكفت والباب بعدني ماسادته تعاركنا سوية ضلينا نتلاغه بالاخير كالتلي بنتر
نسيمة ...لا تتسودنين هسة احجي ويا ابو خلدون ويروح يجيبها ويجي نعرف اسم رجلها وكلشي يخصه ماعليها شي

ليلى. ..طبعا دمج بارد لانها مو بنتج لو بنتج جان هسة جاي تلوبين عليها بس منيلچ احساس انتي اصلا ماعندج احساس

لو عندج احساس ما تشتغلين ويا الكاولية وتجيبين الك** بنص البيت يزنون بدون ما تفكرين حتى بيه واني بنت اختج بعد تشيلين هم ريحانة الغريبة

نسيمة ...احترمي روحج ادبسزز اني غير علمود العيشة
ليلى ...ماكو عيشة بس بالك**ة العالم مادري شلون عااايشة

التفتت ايدي على الباب اريد اسده وجهي محتقن وصار بوجهي قيس واگف مفجوع وكأن مصيبة نزلت على راسه بيده علاليك مسواگ وبنفس الوكت خالتي صرخت واجالي صوت حور تشهگ التفتت شفت حور يم باب المطبخ شمرت دبة النفط من ايدها للگاع
عطت ويا عيطتي وعياط خالتي شبت عود الشخاط وحرگت روحها ..... للحكاية بقية

حذفت بعض الاحداث وهذا البارت اختصرت بي احداث مال بارتين علمود اوصلكم لسبب السجن 🖤😁