رواية حمائم تخشى الطيران الفصل الخامس 5 - بقلم فاطمة العبادي

#فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

لتنسون تصويت + تعليق بين الفقرات لطفًا 🖤

البارت عيدية 🫣🖤🖤🩷

يا حبراً ضممته دون راء الى قلمي والميم باء

_____________________

الشـيهانة :-

گاعدة وحدي اصارع الالم وانتظر ساعة موتي شوكت تجي شوكت ارتاح من هذا العذاب
انتظر الساعة الاكون بيها تحت التراب واخلص من ظلم مشاري الي اذاني وعذبني وجرح كرامتي وحرمني من ظناي .. غمضت عيني ويا ما سمعت صوت طگة الباب وجفل گلبي من سمعت صوته!!

فتحت عيوني بصدمة باوعت بأتجاه الباب تقرب ركض علي بعدني ما مستوعبة الصاير گبل فتح القفل وحررني من قيدي حچة يأمرني بأستعجال

صگر :- ما في وكت للحجي الحين تسبحي بسرعة السيارة ناطرتچ بالباب

شيـهانة :- ابوك وينه؟

صگر :- طالع اليوم العرس ما يرد للبيت هل حزة يلا شيهاااانة طلعي جدامي بسررررعة ركضي لدارج اخذي التبينه وغيري هدومج تسبحي

سبقته وركضت من الغرفة نزلت الدرج فتت للغرفة اخذتلي ملابس وركضت بيهن للحمام سبحت بدقيقتين وطلعت ، حسيت الحمل انزاح عني بعد ما طيحت كل الاوساخ الجانت عالگة بيَ

شفت فراش شعلان ركضت ودموعي سبقتني السرير مالته خالي انفتح الباب بقوة التفتت شفت صگر قاطب حواجبه و وجهة احمر من الغضب
قبل لا انطق حجة يستعجلني

:- شيهااانة بسرررعة تعالي
السيارة بالباب ناطرة ياخذج السواگ لمكان امان ما يوصلج ابوي لا تخافين
وانا اطر عليج بين نوبة والثانية ، سكت متردد ثواني وبعدها كالي ياي معاج

:- تحجي صدك؟ وابني؟ وشعلان!! تريدني اطلع بدونه

تقرب جرني من ايدي حيل كملت حجي واني امشي ويا بسرعة :- صگر ابني شعلان شلون اعوفة فهمني فدوة اروحلك

صگر :- تاليتچ تعوفينة وترحين تدرين بأبوي ما ينطي لج بهاي السهولة

انفتح الباب صعدني بالسيارة وصعد يمي وطلع بينة السايق كمل كلامة بهمس
:- ابوي ما ينطيج شعلان نوصل للبيت ونحجي

هزيت راسي بـ اي وسكتت مشت بينه السيارة هواي بعدها وصلنة لمكان شبه مقطوع وبي بيوت قليلة نزلنه كبال بيت صغير كلش ومبين قديم ضل السايق بالباب مشيت ورا صگر ودخلت جوة

شيهانة :- وين جايبني صگر؟ اشرحلي الله يخليك وضحلي وينك كل هاي الايام معقولة ما تعرف اني وياكم بالبيت لو تعرف وساكت
هم تعرف شنو موجود بذيج الغرفة؟ تدري لو لا

فرك عيونه بتعب حط ايده على خاصرته رفع حواجبة بحيرة وگال :- لا الدار الكنتي فيها متروكة وشايفهة مرتين ثلاث كانت فاضية بالحقيقة كنت مستبعد وجودج داخل البيت رغم في ذرة شك بداخلي سكتت وراقبت لين ماشفت ابوي يدش عليج ، سرگت المفتاح بدون علمه ونطرت البيت يفضه حتى اطلعج

شيهانة :- تمام تمام هسة طلعتني سولفلي بالجاي

صگر :- شيهانة طالعي
كعد كبالي وكال بتوسل :- ولي يعافيچ سمعي مني ونفذي
هزيت راسي استرسل بالكلام :- طلاگچ من ابوي راح يتم بمساعدتي متفقين؟

هزيت رأسي بالموافقة
:- وشعلان يمي صدگي كلها فترة ما تتعدة الشهرين وراح يكون يمج وبحضنـچ بس صبري

شيهانة :- ليش ما اخذة بعد الطلاك

صكر :- ابوي مستعد يورطج بمصيبة ويذب براسج بلوة جبيرة ويستغل شعلان ضدج هسة سوي روحج متنازلة عن شعلان وتطلكي والباقي يمي

شيهانة :- هواي خسرت كلش هواي ما اريد اخسر شعلان مابيَ حيل على الخسااااير بعد نسيت اني من قبل هم خسرت ضناي؟

صگر :- لا ما نسيت لهذا السبب اريدج تنفذين لأكولة وحتى وان ما يبته لج شعلان راح يكون يمي وانتِ تعرفيني زين شيهانة انتِ تعرفين صگر من ؟

شيهانة :- اعرفك كلش زين وادري بيك راح تداري

صگر :- احطه بماي عيني

بجيت وغطيت وجهي حجيت بضعف :- الغرفة بيها عظام بشر ابوك قاتل خطير ممكن يقتلك لو يتقل شعلان خلي نعوووف كلشي جيب شعلان وخلينة نشرد احنة الثلاثة ونعوف كلشي ورانه لا من شاف ولا من درى

صگر :- بس ما يكتل شعلان اطمني

حجيت بجزع
شيهانة :- صگر؟!! گتلك نشرررد كل احنة سوية شبيك ما تسمع

تنهد نصة بحزن ورد :- ابوي يگول انا عاشگچ وعندي وياچ علاقة محرمة اذا انحاش معاچ راح اثبتله كل شكوكه ما اريد هذا الشي يصير

:- دوختني دوختني صگرررررر .... صرخت بقهر

:- رايح ماريد احد يحس ومن باجر الصبح نروح ونكمل اجرائات الطلاك

:- طيب بس ابوك ماراح يلگاني هنا

هز رأسه بالنفي :- الجن الازرگ ما يوصلچ هني يا حرمة ابووووي

عينچ على عمرچ نطريني الصبح اكون يمچ

شيهانة :- الله ينطيك الصحة والعافية صگر ماقصرت شلون اجازيك

صگر :- واجبي ما سويت غير واجبي اتجاهچ هسة رايح وصيت السواك يجيب شي تاكلينة اشوفة وارد

شيهانة :- تمام ، طلع دقايق واجة جاب علاكة بيها مواعين كال هذا اكل عبري روحج بي و وصاني ما افتح الباب واخلي مقفول
اخذته منه متشكرة وسديت الباب ورا كعدت سندت ايديني على اركبي وحطيتهن على راسي بتعب لحد هسة ما ادري شنو صار وشلون وصلت لهنا كل ما اغمض. عيني ترجع صورة ذيج الغرفة تمر براسي وافتح عيني مفزوعة كرهت حياتي وكرهت كلشي كل الاريدة ابني يرجع بحضني واروح للعراق اعيش بنص اهلي بسلام

باوعت الايديني ما مصدگة طلعت من ذيج الغرفة المشؤومة خفت اغمض عيني وتجي صورها ابالي وانتفض من الخوف وتصيبني نوبة هلع الرعب بعده يدبي بجسمي

رفعت ايديني ليفوگ غمضت عيني طاحت دمعتي قبل لا يلهج لساني بالشكر والحمد لله ، ضاعت الكلمات سجدت لربي سجدة طويلة اشكره بيها واحمده حمدًا كثيرً
لك الحمد ربي دائمًا وابدًا لك الحمد على جميل عطائك لك الحمد على بلائك وابتلائك
لك الحمد حتى تغادر الارواح مساكنها و تجف العروق
لك الحمد حتى يتوقف النبض ويذهب العقل

نهضت بوجه رطب بللته الدموع وگفت على حيلي ومشيت بخطوات متثاقلة اتفحص البيت لگيت يم الحمام مرايه باوعت لوجهي بيها باهت خالي من الحياة وكأن الموت زارني بالأيام السابقة واخذ مني بريقي وحيلي وحتى لوني

صدر صوت من معدتي يعلن عن اعتراضها على الجوع ، فتحت العلاكة وطلعت المواعين واكلت من الموجود وشلت الباقي فتت للمطبخ لكيت ثلاجة فتحتها وحطيت الاكل بيها كانت خالية من الاكل بيها فقط ماي توقعت هذا البيت من بيوت مشاري
واذا توقعي كان صحيح معناها نهايتي اقتربت ..

افتريت بالبيت وبعدها غلبني التعب رحت تمددت بالكاع وحطيت جوة راسي مخدة اتامل سگف البيت الأبيض وبنصه مروحه تفتر وكل شي شفته بالايام السابقة صار يظهر كبالي كأنه فلم

غمضت عيني غفيت ما حسيت غير الباب يندگ شلت راسي اجت عيني على الشباك گبل غطيت عيوني بساعدي حجبت ضوء الشمس
فركت عيوني وگمت ركض غسلت وجهي وطلعت للباب خفت افتحه وكفت ورا وحجيت

:- صگر؟

:- اي صگر افتحي الباب يمصگوعة

فتحت الباب فات للبيت بيدة علاگة سديت الباب ولحگته جوة جان مبين علي تعبان حط العلاكة بالكاع وارتجى على الحايط حط ايده على رأسه بتعب

شيهانة :- صگر؟ لا تخوفني ابوك سوالك شي أذاك
شهگت بقوة وغطيت حلگي بأيدي :- سوا شي لشعلان احجي صگر مردت روحي احجي انطق گلبي راح يوگف من الخوف

هز رأسه بـ لا وگال :- مصدوم من الشفته بالدار

شيـهانة :- حتى اني مصدومة ما تخيلته مجرم

صگر :- ليش انتِ تعرفين هاي عظام شنو

شيهانة :- عظام اطفال كلش واضح

ضحك تك خد مستهزأ ، رد :- يا عظام اطفال هذني عظام حيوانات شيهانة يستخدموهن للسحر
الغرفة يسوون بيها طقوس سحر وشعوذة

شيهانة :- شنو تريدني اغالط روحي غير شفت عظام بعيوني
وريحة نتنة جنت راح اموت بسببها

صگر :- تفقدت كلشي بنفسي يا حرمة ابوي
العظام مو عظام بشر والغرفة بيها اثار سحر

شيـهانة :- طيب
منو يسحر؟ يعني ابوك سحار

رفع اكتافه وقوس شفته بمعنى ما ادري ، فرك جبينه ونزع شماغه خلا على صفحه ضل يفرك برأسه
بعد سكوت دام دقايق حجيت
:- بيك شي راسك يوجعك

هز رأسه بالموافقة بدون ما يحجي شي جريت نفس عميق باوعلي وگال
:- ما سألتيني اذا ابوي عرف بطلعتچ لو لا؟

:- ما اتوقع ابوك فات للغرفة بالليل لان هو مرات يخليني يومين بدون ما يجيلي

:- لا الواضح فات ومتخبل وما يدري شيسوي ولا يكدر يحجي ويكول الشيهانة جانت محبوسة هني من طلعها ولا يكدر يضل ساكت واجه الكل بالعصبية والصراخ والغلط وحتى بالضرب والكل يجهل سبب غضبه الا انا عارف وسويت عمري ما ادري بشي

:- والمفتاح شلون رجعته

:- غير اخذته من داركم ورجعته لمكانه بعد ما تفقدت الدار بدون ما يحسون

:- صگر اني خايفة شأسوي؟ ما خايفة على روحي خوفي على ابني شلون

عدل گعدته وگال
:- سمعي ، اول شي اليوم راح اخذج علمود الطلاك صكر مايدري بيج ولا انت تعرفين عنه شي
راح اساعدج بأجرائات الطلاك بدون علمهم وادير بالي عليج لحد ما تتطلكين بالمحكمة راح تتنازلين عن شعلان الأبوي .... قاطعته منتفضه بغضب

:- شلوووون تريدني اتنازل عن ابني لواحد مجرم مثل ابوك مستحيييل ابني اخذه وياي

:- صدگيني راح تتورطين اذا اخذتي شعلان صدگيني
ابوي مستعد يضل وراج وياخذ الياهل منچ ويذبحه ويكطه يم دارج ويبلغ عنچ و يكطج بالسجن تهمة ذبح شعلان

طالعي ، انتِ تتنازلين عنه وانا اخطفه وانحاش بي فترة والحكچ للعراق واخلي ابنج بحضنج

شيهانة :- يعني اتطلك واسافر للعراق بدون ابني

صگر :- امبلا ، بس سايريني وامشي على الاتفاق

شيهانة :- طيب
زين صگر ابوك ماراح يأذيني ما راح يوصلني

صگر :- هنا ما يوصل لج بس ممكن يصير شي ويسببلج خطر انا راح اضل وراج يا حرمة ابوي لا تحاتين

رفعت اكتافي بجزع وگتله :- طيب هذا هو

فتح العلاكة طلع الريوك منها تريكنه اكلت على قدر الشبع وبعدها كمت عدلت ثوبي وشديت شعري ومشيت ويا كملنا كلشي ومرينه اخذت كم قطعة ملابس امشي روحي بيهن ورجعني للبيت
باوعت عيوني للطريق تراب وشمس حارة تعكس على الارض ، وبعيد جدًا جزعت واني انتظر وصولي للبيت حتى اسبح وارتاح

دخلني للبيت وراح دخلت سبحت زين اخذتلي نص ساعة داخل الحمام اغسل بجسمي وبعدني احس بالقرف اتجاه نفسي عشت ايام صعبه كلها رعب برعب عيني ع الباب اخاف بأي لحظه يطب علي مشاري ويذبحني وخوفي الاكبر ع شعلان وصگر ربي اعمي عينه عنهم واحرسهم

طلعت الاربعين اجة يوم الطلاق خذاني صكر نزلني بمكان قريب وضل يراقبني لحد ما وصلت

صار مشاري بوجهي باوعلي وعقد حواجبه بغضب عيونه رادت تطلع من مكانها كاز على اسنانه بغيض حسيته راح يلتهمني بعنف ويشرب دمي

صار مقابيلي ابتسمت ابتسامة نصر وكنت مطمئنة لان المكان امن ، كتفت ايديني وگتله :- اجة الوقت مشاري راح اتخلص من قيودك ومن وجودك بحياتي

لمحت على محيياه ابتسامة مكر وخباثه ونطق بغرور مقرف :- مشاري كابوسچ راح يلازمچ الف ليلة وليلة ، راح تتمنين الموت وما تطولينه وبكل مرة تتذكرين مشاري وتترحمين على ايامج وياي

شيهانة :- تخسى

مشاري :- انا اخسى؟ انا اعلمچ يالشيهانة
ليلچ راح يصير جحيم ونهارچ عذاب راح اخليج معلگة بين السما والگاع ان طرتي لجهنم وان نزلتي لمشاري

شيهانة :- أعلى ما بخيلك اركبه ما تخوفني

ابتسم بثقة وجحضت عيونه ، كأنه ثعلب ماكر
المكر لعبته المفضلة ، وكسر الناس الابرياء متعته
اخذ ايدي بين كف ايده الكبير وضغطها بقوة سمعت صوت اصابعي تطگ نترت ايدي منه بقوة انطيته ظهري ومشيت كعدت بعيد عنه

بعد ساعة تم الطلاق اتسعت عيونه من سمع عن تنازلي عن حقوقي وعن ابني وكلت سبب طلاقي هو رغبتي بالعودة لموطني وترك ارض الكويت

نطق المحامي أسمي الثلاثي ( سهير راضي حامد ) هذا كلامچ النهائي

شيهانة :- نعم اني متنازلة عن كل حقوقي وبالنسبة الأبني فـ اني مو قدر المسؤولية وما عندي القدرة الكافية على رعايته او الانفاق علي
وما اريده يعيش بعيد عن ابو

تم الطلاق واخيرًا ومن بعد سنوات حسيت روحي حرة طليقة لأول مرة ، طلعت امشي بفرح الكاع ما تشيلني حسيت بخفة وسعادة ما حاسه بيها من سنوات عشت سنوات من الاذية سواء ويا مشاري او بدونه حياتي جانت عذاب وهسة تحررت
هسة راح ارجع لحضن جدي حامد واغفه ع كتف اخوي هسه راح اصبح بوجه ابوي وابوس ايد امي بكل صباح ..

تجمعت بعيني غيمة فرح زخت مطرها وبللت روحي الهالكها العجاف ، حطيت ايدي على صدري ورفعت رأسي للسماء
خلقتني حـُرة وگلبي مثل طير اطلقو سراحه ، فرد جنحانه بفرح وحلق لقلب السماء حامل ويا دعواتي وامنياتي ورجائي .. فـ لا ترده خائبًا منكسرًا يا الله

رجعت للبيت متخلصة من ابشع انسان تعرفت علي بكل حياتي ، دموع الفرح مافارگت خدي دمعه باردة وتبث بروحي الامل والتفائل بالقادم

اجالي صگر بعد ساعات من رجعتي للبيت باركلي على الطلاك وفات للبيت جايبلي اكل

صگر :- طليقة ابوي ، حجاها ونرسمت أبتسامة فرح على محيياه

غطيت وجهي ابجي كاال بخوف :- لاه لاه علامچ تبجين يالشيهانة لايكون تندمتي لو ابوي سمعج شي يغث

شيهانة :- دموع الفرح هاي دموع الفرح راح اطير احس عندي جناحات

صگر :- طليقة ابوي
اذا كل واحد يفرح مثلچ الكويت تغرك بالدموع

شيهانة :- سيول الفرح

صگر :- تشهد اراضي الكويت سيول قوية تدخل اراضيها متوجهة من **** الى **** ويقال انها ناتجة عن فرح فتاة عراقية بعد طلاقها من زوجها الظالم

ضحكت مسحت وجهي ورجعت ملامحي للجد وهمست :- و شعلان

صگر :- لازم نأمن عليچ بالاول وراها شعلان يصير بحضنچ بس مو هني ، لا بالعراق

شيهانة :- يعني شگد؟

صگر :- مادري باقرب وقت ممكن

سكتت ابتسم وگال :- طليقة ابوي تحضري سفرچ للعراق قريب

ابتسمت بفرح :- داري وليدي صگر شعلان امانة بعنقك

صگر :- بماي عيني

رفع دشداشته وصعد العتبة وطلع من البيت قفلت البيت واكلت وشربت وتمددت ماعندي قوة كافية تخليني اوكف وقت طويل ، خلص النهار وصار ليل

الظلام غزا السماء ، ورفع اسلحة الخوف بوجه كل من عاداه
ليلة مظلمة ، ودعنا القمر وهجر احضان السماء
وفرت النجوم هاربة ، ظلام حالك يحاكي الارض
هيَ خائفة
وبسبب قتام الليل باكية
هجرت الأرض وأبت ان تعرج الى السماء
وبينهما هيَ الأن شَارِدة

جاء الوقت ، أنتصف الليل واذا بها هي الساعة الواحدة
او الواعدة !
نزلت الدماء ونادى السحرة
نفسها فلـتشقى ، وقلبها فاليدمى
اين ما وضعت اقدامها حلت اللعنة ونار السعير تلضى تأكلها ومن معها والى من في قلبها تصل
وبعد الفؤاد والعقل في جسدها تضل
ألم لا ينتهي وحبًا لا يزول وجمعًا لا يتم

فـليحترق الفؤاد وتلازم اللعنة الابناء من الاجداد

يحل السواد في قلب الابناء قبل الاحفاد
نار لا تنطفئ ولعنة ما بها من بشر منتفع
تبدأ الان حكاية ( الواحدة بعد منتصف الليل )

ارض واسعة موشحة بالظلام ، وسماء سوداء هاجرها القمر هذه الليلة وفقد منها النجوم
اركض بخوف وبدون توقف سمعت صوت من وراي بعيد جدًا ناداني بأسمي " سهير "

ليلى :- والله صدمتيني ولا اعرف اسمچ سهير عبالي شيهانة اسمچ الحقيقي

شيهانة :- ابوي لقبني شيهانة بسبب عزة نفسي
يگول انتِ اكثر وحدة ببناتي واولادي عدها عزة نفس على البشر بس اخ اخ شنو ضل بعزة نفسي؟
اخ لو يدري ببنته هسة بغياهب السجن بين القتلة والمجرمين

ليلى :- ترة هذا بسمار منچ

شيهانة :- ما فهمت!! انتِ قاتلة ؟

سكتت ماردت طأطأت رأسها بحزن وگالت :- يگولون مجرمة شنو جريمتي مرات ما ادري

شيهانة :- "مرات ما تدرين؟" شلون يعني

رفعت اكتافها بجزع وگالت :- عوفيچ مني سولفيلي شلون فجأة طلعتي تركضين بالهيمة يعني حسيتي بذيج الساعة وسويتي هيج حسيتي بخطر محاوطچ؟

شيهانة :- ليلى عقلي انسلب من رأسي بدون شعور وبعد ما دگت الساعة الواحدة بعد منتصف الليل فتحت باب البيت وركضت بدون توقف على الحدود الفاصلة بين العراق " ام قصر تحديدًا " والكويت

ليلى :- منو صاحلچ زين كملي گلبي صار خرخاشة

شيهانة :- اجليها .. حجيتها واشرتلها بنظري ليورة التفتت نص التفاتة شافت هاجر كاعدة قريب من عدنة وتباوع علينا

ليلى :- ام الجرابيع شعدها تراقب بينا؟ ترة هاي شغلتها تخوف راح اكوم اتعارك وياها

حچتها ورادت تگوم جريتها من ايدها حيل وحجيت من بين اسناني بغضب :- ما ناقصنة مشاكل صارلنة شهرين هنا لحد هسة خمس عقوبات ماكلين اكعدي وسكتي

نفخت بضجر وقطبت حواجبها ضحكت وگتلها واني اداعب خصلات شعرها
:- لون شعرچ تمري يجنن حتى حواجبج تشبهين منو من اهلج عليمن طالعة

ليلى :- امي الله يرحمها ويرحم والديج جانت جميله بشعر طويل تمري وعيون بُنية اني اشبها حباية ومفشوگة

شـيهانة :- يعني انتِ والوالدة ثنينچن تشبهن سعاد حسني؟

ليلى :- هاي منو؟

شيهانة :- فنانة شفتها بالتلفزيون اسمها سعاد حسني الشبه بينكم كبير من شفتچ گلت بيني وبين نفسي هاي البنية شكلها مو غريب بس ورا ايام گدرت اتذكر سعاد حسني وقارنت بيناتكم بعقلي شفت الفرق بسيط 

ليلى :- هي حلوة لو لا؟

شيهانة :- هم سؤال هذا ليش انتِ ما شايفة روحج بالمراية؟

ليلى :- چنت اشوف روحي حلوة بس هسة كلشي تغير كمت اكره اباوع لنفسي بالمرايه

شيهانة :- السبب؟

ليلى :- سالفة طويلة خلينه منها هسة

شيهانة :- ما اكملج سالفتي اذا ما اسمع سالفتج ترة

ليلى :- شنو ورانة شو تاليتنه ضالين هنا لحد ما يجي الموت وياخذنا نسولف قصصنة الف مرة و وكتنه ما يخلص

شيهانة :- بله متت بعد ساعة؟ تضل قصتج حسرة بگلبي؟ ترة الموت ما نعلم بأي ساعة يجي

ليلى :- بشنو تفيدچ قصتي اذا متي؟ والله فارغة وخري انطيني روايتي اكملها
سحبت روايتها وارتچب على الحايط تقرأ حشررت روحي بصفها وحجيت بمكر احاول استدرجها

:- ما گلتيلي انتِ و الولد الوسيم ابو ليلى هم جمعكم لقاء سوية اعتذرتي منه ، اعتذر منچ لتصيرين نحيسة احچي

غلقت الكتاب ونرسمت ابتسامة عريضة على وجهة واحمرت وجناتها، لمعت عيونها و گالت

ليلى :- ثلاث ايام مرت ما شفته بيها وكأنه يعاقبني
حسيته انسان مجرد من الرحمة فقير القلب غني العقل ..
راد يحسسني بغلطي بغيابة بس ما يدري بهذا تصرفه اثبتلي هوَ مهتم بيَ وخلاني ابتسم بخبث وأقرر العب ويا على الوتر الحساس

راح تگولين منين جبتي هذه الثقة بصراحة شفت واحد صديقة اسمه ناصر بغير قسم يومية يمر ويباوعلي وكأنه جاي يتفحصني ويروح جزمت ان هوَ الي دازه حتى يراقبني وينقله اخباري

باليوم الرابع عدنا محاضرات مهمة جدًا وبحث جنت متأكدة راح يحضر بديت بالتحضير من الليل
حضرتلي ملابس انيقة كانت عبارة عن تنورة قصيرة وضيقة وقميص فوگه سترة انيقه
خليت سكارف صغير على رقبتي وشلت اللفافات نزلت شعري وكثرت مستحضرات التجميل حتى ازيد جمالي ورونقي وجاذبيتي

رشيت العطر على كل جزء بيَ ، لبست كالون خفيف وكعبي العالي وطلعت بدون ما اشوف خالتي مشيت للشارع بهمة صعدت بالسيارة انتظرت السيارة تقبط بملل وكل دقيقة كانت بالنسبة الي ساعة
طلع بينه السايق وصلت للجامعة تمشيت للقسم مالتي ردت افوت بس وقت المحاضرة بعدله عشر دقايق ، رجعت كعدت وفضلت اوصل متأخرة حتى يكون دخولي ملفت اله رتبت شعري بأصابعي ، من حان الوقت گمت تمشيت بهدوء وثقة فتت للقاعة توجهت بعض الأنظار الي ومن بينهم هوَ باوعلي ودار وجهة بسرعة متجاهلني شال جنطته من المقعد وحطها بالجانب مشيت بوسط هدوء فضيع وما ينسمع غير صوت رنة كعبي بداخل القاعة گعدت بمكاني بعد ما القيت السلام على كل الطلاب ..
رد بهدوء بصوت خافت يكاد لا يسمع

:- عليكم السلام ورحمة الله وبركاته

ابتسمت تك خد درت وجهي منه وما باوعت بأتجاها ابد خلصت المحاضرة ضليت بمكاني وهوَ كذلك كل شوي يجر نفس عميق ويتحمحم يحاول يلفت نظري
عرفته يريد يحچي بس ما انطيته مجال ولهيت نفسي بالقراية
ثاني محاضرة خلصت والوضع كذلك جان عدنة وقت نص ساعة تقريبا لحد ما تجي محاضرة دكتور ميثاق كمت بهدوء طلعت من القاعة اشتريت بسكت وعصير وگعدت على المصطبة اكل واباوع للعالم يا رايحة يا راجعة
بنات ثنين ثنين او ثلاثة واكثر وشباب صداقات الا اني وحيدة ما تعرفت على احد لحد هسة
تنهدت بضيق وتلاشت احزاني بعد ما شفته كدامي شحيت نظري عنه ما اريد ابينله ان اني راسمتله شي ببالي

صارت المحاضرة فتت قبلة كعدت طبگت رجليني وملت بكعدتي شوية بكل انوثه رتبت اطراف شعري وضليت انتظر دخوله
دقايق فات الدكتور وكان يمشي ويا ويحجون سوية لا ويضحكون ، حسيت بشي غريب اجتاحني كانت غيرة مو اكثر غيرة على دكتوري المفضل والشخص الوحيد الأحبه بهاي الجامعة باوعتلهم بغيض

تقرب كعد يمي ، انطانة الدكتور المحاضرة و قبل لا يختم التفت على الوح وكتب "أ خسارة العقل أصعب ام خسارة القلب"

جاوبة احد الطلبة :- دكتور خسارة القلب هيَ الأصعب الانسان اذا خسر قلبه ما راح يحس بأي شعور حزن، فرح، الشعور بالظلم والاضطهاد، راح يصير انسان مجرد من المشاعر
وما اعتقد اكو انسان اسوء من الانسان الماعنده مشاعر

دكتور ميثاق :- جيد

ليلى :- دكتور ، باوعلي انطاني الاذن بالكلام
مشاعرنة تستند الى أسس كيميائيا وعصبية بالدماغ
اذا لا سامح الله وصار شي على گلبك ما راح تفقد الادراك ولا تتضرر المشاعر بس في حال تضرر دماغك راح تتضرر ، القلب ما اله اي دخل بالمشاعر هوَ ياخذ النتائج من الدماغ

محمد :- وجهة نظر ، لكن اني مصر ان المشاعر بالقلب وخسارة القلب هيَ الاصعب

دكتور ميثاق :- ليلى كلامج جيد جدًا وانتَ كذلك محمد

تُقى :- دكتور اني اكول خسارة العقل هي الاصعب لان الانسان في حال فقد عقله ما راح يعرف يتحكم بتصرفاته ويمكن يقتل او يسرق او يأذي المقابل لان مو برأيه

ابو ليلى :- اوافقها الرأي

ليلى :- زين دكتور شنو الغاية من هذا السؤال؟

دكتور ميثاق :- حبيت اشوف اجوبتكم
وأعرف من منكم يفكر بعقله ومن يفكر بقلبه

محمد :- طلعت العاطفي الوحيد هنا
حجاها وضحك

:- من وجهة نظري الانسان الي كال القلب هذا انسان حساس جدًا ويتبع عواطفه دائمًا وشنو يگول گلبه يسوي

بينما الي كال نمشي ورا دماغنه هذا انسان متحكم يعرف يتصرف بحياته ويفكر بعقلانية اكثر

طبعا هذا ما يعني ان واحد احسن واحد وابو العقل احسن لو العكس لا ، بس نبين الاختلاف
لا اقل ولا اكثر

كمل حديثه وربط سؤاله ويا محاضرتنة انبهرنة بأسلوبه الذكي واللطيف ، انتهت المحاضرة طلع الدكتور لملمت أغراضي وطلعت

حسيت بخطوات شخص قريبة مني التفتت على النص شفته وراي توقفت باوعتله بمكر و حجيت متصنعة الغضب

:- انتَ شكو لاحگني ما تستحي؟

:- لا فهمتي غلط ردت احجي وياج كلمتين
تنهد بضيق حط كتبه بالايد الثانيه رتب شعره باوعت على ساعتي ورجعت باوعتله
:- راح تمر دقيقة كاملة من وقتي الثمين جدًا ممكن تحجي

:- صار خاتون
تحمحم ، كال وهو يشح نظره عني :- اسف اخر مرة تجاوزت عليج اعتذر جدًا بس الغضب ما خلاني اسيطر واسلوبچ مستفز

رفعت حواجبي وگتله بنبرة باردة

:- اسلوبي مستفز؟

:- جدًا

:- عديم التربية والاخلاق صدك ما تستحي انتَ

فك عيونه بصدمة عقدت حاجبي بغضب وعفته ومشيت حسيته صار يمي گال

:- شوفي هذا قصدي بسرعة تثورين كأنچ بركان

:- يعني اني عصبية زايد وما اتحمل حجاية

:- نعم خاتون

:- اكول وخر لا هسة اصرخ والم العالم كلها عليك واخلي المايشتري يشوف وخر

رد بنبرة قهر وهو يفرك وجهه بسرعة
:- طباعچ حادة اني ماجاي اعلمج بس اجيت اعتذر قبلي اعتذاري حتى يبرد گلبي ويرتاح ضميري
الضمير من يوجع يسلب راحة الانسان

وگفت باوعتله بحيرة عيونه الواسعة تتجنب النظر الي يبلع ريگه بصعوبة وكأنه داخل حوار مع الموت
يقطب حاجبه ويفردهن بمحاولة منه للسيطرة على توتره وغضبه الدفين
نطقت بحزم :- ما ابريك الذمة ولا تمشي وراي تجيبلي سمعة موحلوة خاف على عرض الناس مثل ما تخاف على عرضك

عفته وراي متفاجئ رد فعلي القاسي ابتسمت بنصر
راح يتجدد هذا اللقاء مرات عديدة ويطول الحديث كلها مسألة وقت ..

نزلت امشي للبيت حسيت رجليني راح تنشل حذاء كعب مؤذي ومشي بهيچ شارع ، عذاب عذاب
نزعت حذائي لزمته بأيدي ومشيت حافية للبيت اول ما وصلت لگيت سيارتين گبار بيتنة بلعت ريگي بخوف باوعت لأرجاء المكان عسى ولعل تكون للجيران تقربت من الباب بخوف نزلت المقبض انفتح وياي الباب مثل كل مرة

بس هاي المرة خايفة مرعوبة واحس بخطر منتظرني ورا هذا الباب ، فتحته ودخلت كلها خطوتين وصرت واگفة بين اربع زلم كل واحد بيهم شايل طول وضخامة ، لبس راقي وغالي وارواح رخيصة
اشكال الها هيبة لكن شخصياتهم المخفية مثيرة للاشمئزاز ، نظراتهم التهمت جسمي من تحت الملابس وصارت تتجول على كل انش بيَ ، رجفت اقدامي حسيت ايدي تخدرت وكع الحذاء من ايدي سبب صوت خلاني اگمز وارتد خطوتين للخلف
.................للحكاية بقية 🖤

شاركوا القصة لطفًا القصة تحتاج دعمكم لا تقرون بصمت 😊

اريد اسمع رأيكم بالبداية؟

اكيد راح تكولون باردة ومملة احب اطمنكم البداية هي بوابة للاحداث القوية ف انتظرو وطولو خلگ