رواية حمائم تخشى الطيران الفصل الرابع 4 - بقلم فاطمة العبادي

#فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

لتنسون تصويت + تعليق بين الفقرات لطفًا
...

نفضت عن عاتق قلبها الرماد
ونهضت بشموخ وضعت احمر الشفاه وقالت .. وجدت نفسي الأن .. وهوَ من ضاع

...

ليلى :- ثاني يوم وگفت گبال مرايتي الصبح اباوع لوجهي غمضت عيني وجريت نفس عميق ، زفرته وگلت :- اسمعني خوية اني اسفة على الصار امس

هاي هيَ وذيچ هيَ راح يتقبل اعتذاري متأكدة ، حطيت كحل لعيوني وتحمرت حطيت لخدودي شوي حمرة صارن يضون ابتسمت بفرح لان اشوف وجهي لطيف وجميل حمدت الله وشكرته على عطاياه الي

شلت اللفافات من شعري ورتبتة عدلت قميصي وتنورتي تأكدت من كمال اناقتي وبعدها طلعت لگيت خالتي گاعدة باوعتلي بأعجاب من فوگ ليجوة وگالت

نسيمة :- صدقة الله عين الله تحرسچ شنو هل ترتيب والاناقة شنو خاف عاشقة من وراي يوم

رديت بثگل :- اني وين والحب وين ، طموحي اكبر من هاي السوالف قررت اكون أنسانة فوگ بالقمة وألي شأني ومكانتي العالية

نسيمة :- اي عفية يوم عفية الله يرفعچ مثل ما رفع غيرچ بس شدي حيلچ
الانسان من يسعى الله يسهلة كلشي وينطي حتى اكثر من تعبه

ليلى :- ان شاء الله

عفتها وراي وطلعت لحد هسة ما اكدر اسامحها او اتقبل الشي الي تسوي لان كلش حرام واشك اكو اشياء اكبر واكثر من الحچي الحچته

بالقاعة دخل الشاب واجة لمكانه المعتاد بصفي كعد بكل احترام مخلي مسافة بيني وبينه لا باوعتله ولا حتى حچيت ويا حسيت روحي بديت اعرگ من الخجل رغم برودة الجو بنص المحاضرة اجة شخص للدكتور طلع وسد الباب حتى يحچي ويا

جنت اكتب بدفتر بطرف الدفتر من جوة كتبتلة "أسفة على الصار امس" مديت الدفتر اله ونقرت على الستيج بأظافري حتى ينتبه باوعتله بطرف عيني عقد حاجبة قرأ المكتوب وابتسم ابتسامة خفيفة بعدها كتب بطرف دفترة ..

" ماكو داعي للأعتذار خـاتون "

ابتسمت ودرت وجهي منه ، من خلصت المحاضرة طلعو الطلبة شفته گاعد خفت يحچي كمت طلعت ما اريد احچي ويا وبحجة اعتذار وموقف تقوى العلاقة
ويضل ياخذ وينطي وياي مع العلم كان واضح علي مو من هذا النوع

ضليت كاعدة ساعة كاملة ماعندي شي يلا اجت محاضرة دكتور ميثاق دكتوري المفضل

كان دكتور ظريف لطيف خلوق جدًا محترم ويحبني صار اسبوع كامل ما شايفته كان ماخذ اجازة وگللنه قبل لا ياخذها حتى نكون على علم ، فتنة للقاعة گعدنة خمس دقايق وفات علينا كان طويل القامة بشرته بيض لابس قاط اسود رسمي وشايل جنطة لونها اسود بيها اوراقه وگف گبالنة وسلم بكل حب ..

دكتور ميثاق :- صباح الخير طلابي الاعزاء صباح السعادة والسرور صباح الجمال والحب سيعد جدًا بأنتهاء اجازتي والعودة للدوام وشوفة وجوهكم الجميلة هذه

ردينة علي بين ضحكة وبين كلمة حلوة من عدنا وبدأ ينطي محاضرته سجلت ويا كم معلومة ، انتهى انطانة بعض الملاحظات وباوعت على ساعته الفضية وگال :- بعد عشر دقايق الي ينطيني بيت من قصيدة يطلع

ليلى :- ما اعتقد اكو واحد يريد يطلع ويعوفك دكتور
يعني ما راح تسمع شيء

ميثاق :- مرات محبة الناس نقمة مو نعمة

تكلم الحجر الكاعد بصفي وگال :- دكتور من رخصتك اشرلة براسه استرسل بالكلام :- دائما اسمع هذه الجملة "مرات المحبة نقمة مو نعمة"
تبدأ التساؤولات بداخلي وين المزعج او المضرة بمحبة الناس او شخص معين ألنة

ما اتوقع اكو شي احلى من الحب ، اذا ساد الحب ارجاء المكان نشأ مجتمع سليم ومسالم
اليوم الجار اذا حب جاره راح يقدملة كل الحب ما راح يضره كذلك محبة الدكتور الطلابه تخلي يحترمهم ويقدرهم وينطيهم حقهم وما يظلم شخص بيهم ، وحب الطلبة لدكتورهم ورب العمل لعماله ، حب المواطن لوطنه وأرضه

كلها نتائجها سليمة ما بيها اي ضرر او نقم !

ميثاق :- طالب جديد؟

:- نعم دكتور

ميثاق :- شنو اسمك عزيزي

قبل لا يفتح حلگه وينطق سبقه صديقة وجاوب وهوَ يضحك :- ابو ليلى دكتور

ضحك الدكتور باوعت على وجهة بصدمة شنو هاي الصدفة والمفاجأة يعني متزوج وعنده بنية ولا نفس اسمي بعد قوست شفايفي بتعجب وباوعت للدكتور

دكتور ميثاق :- أسمع يا ابو ليلى هذه القصة القصيرة
قصة حقيقية صارت ويا شخص اعرفه
هذا الانسان يحب زوجته بشكل جنوني زوجته عنده فوق كل شيء ، زواجهم أستمر لسنوات عاشو حياة حلوة وسعيدة وما اشتكو بيوم الى ان مات ابو امه ضلت وحيدة جابها للبيت تعيش وياهم ..

بدأت المشاكل بين امه وزوجته يوم بعد يوم وصارت تكبر مشاكلهن الى ان وصلت لمرحلة امه بدأت تضرب زوجته ، الزوجة طفح عدها الكيل وقررت تتطلق عافته وراحت

هو تخبل انجن وفقد عقله بشكل كامل وأقدم على قتلها
من سألو بالتحقيق ليش قتلتها؟ جان طلقتها وكل واحد راح بطريقه
جاوبهم :- احبها وخسارتها خلتني افقد عقلي ، اتقبل اشوفها ميته ولا تعيش بعيدة عني او ويا رجل آخر

هسة هذا الحب نعمة لو نقمة؟

:- نقمة

دكتور ميثاق :- يعني لو ما يحبها جان تنازل عنها وتلگاها هسة حية ترزق ، حبه الها الي وصل حد الجنون خسرها حياتها وحياته هوَ الثاني

ابو ليلى :- بس دكتور هذا اسمه جنون مو حب

دكتور ميثاق :- عزيزي الحب ينطي للانسان مقام عالي، يرفعه، يعقله، يسوي انسان رزن ومسيطر ومتحكم حينًا،،، واحيانًا يقود الانسان للجنون وهنا يكون نقمة

انتهى النقاش والوقت طلع الدكتور شلت اغراضي وطلعت گعدت على المصطبة اكل بسكت مالح واباوع على الگاع بملل ، حسيت بخطوات واحد وراي تقرب وگعد يمي جريت نفس بقلة صبر وباوعت بأتجاها شاب ما اعرفه ولا شايفة خلقته قبل ابتسم بوجهي ورفع ايده للسلام

باوعتله بنص عين وگتله متضايقة :- اعرفك تعرفني مادلي ايدك

:- عمار الحامي من جماعتكم

رمشت بدون فهم ضميت البسكت وشلت اغراضي ضحك وگال

عمار :- شبيچ ليلى اني البارحة چنت عدكم بالبيت اجيت مخصوص علمودچ بس ما شفتچ

بلعت ريگي بخوف شحيت نظري عنه وگتله :- ما فهمت أي شي منك يمكن مشبه بوحدة ثانية لو متوهم

رسم على وجهة ابتسامة خبث وگال :- يعني ترديني اغالط نفسي واگلچ متوهم ومشبه بيچ غير انتِ ليلى بت الحفافة

ليلى :- لا متوهم امي متوفيه وما كانت حفافة الله يرحمها

عمار :- نسيمة شتصير منچ جاوبيني
اذا مو امج عمتچ لو خالـتچ ما تقبل غلط بيتكم بـ **** نسيمة الحفافة ، حچاها وغمز بمكر

ليلى :- ما اعرف وحدة اسمها نسيمة غلطان حضرتك

عفته وراي مشيت بهمة فتت للقاعة الهث لكيت الولد ابو ليلى گاعد سحبت نفس عميق تمالكت نفسي بي وگعدت بمكاني احاول الهي نفسي بأي شي حتى ما يحس بتوترتي وغضبي واضطراب نبضاتي ورجفة ايديني ..

رفعت عيني علي شفته يكتب وبدون ما يباوعلي گال :- سلامتچ خاتـون

بلعت ريگي بصعوبة وهمست :- الله يسلمك ، نصيت اكلب بأوراقي گال بتساؤول

:- ليش ترجفين صاير وياچ شي احد معترضلچ احچي اني اخوچ هنا أعتبريني سلاح برأس الي يضايقچ

بدون شعور نترت :- ما احتاج احد

حسيته تصنم شمر قلمه بغضب وهمس :- والله لو زلمة جان مسحت بيها الگاع

ليلى :- اعتبرني زلمة مشورب گاعد بصفك وگوم امسح بيَ الگاع ، يلا شنو منتظر لو تخاف عيني

:- من عمت عينچ

ليلى :- والله عسى عينك بالعمى انتَ

:- شو انتِ ماخذة على العالم وما تحترمين على شنو شايفة روحچ؟ بشعرچ التمري هذا الشيبة

ليلى :- عديم الرجولة والأخلاق وشنو شيبه

:- وحش اسمه الشيبه يشبهچ

ضربت ايدي على الستيج بغضب وگتله :- عديم الرجولة والاخلاق ملطلط سفيه

أشر بأصبع السبابة على صدرة وگال بصدمة :- اني ملطلط وسفيه

ليلى :-وعديم الرجولة والاخلاق وماعندك لا قيم ولا مبادئ ما تستحي على وجهك گاعد تحچي على بنية وتگللها امسح بيچ الگاع وعمت عينچ

:- وانتِ تنترين بالعالم ما علموچ اهلچ الاحترام وينهم دليني بيهم اروح اشمرچ بنصهم واگللهم ربوها من جديد الظاهر ما اخذتي كفايتچ من التربية

بهت لوني سكتت بدون اجابة درت وجهي عنة ما رديت علي بعد ضل يزفر بغضب گام وطلع من القاعة دفر طرف الباب برجلة

شبكت ايديني وخليتهن على راسي بقلة حيلة الله ينتقم منك الي ما تتسمى عمار مادري بسمار منين طلعتلي بسالفة نسيمة ثرت غضبي وخليت الدم يتجمع برأسي حتى نفس ماكدر اتنفس الله يحرم عليك الهوى بجاه كلمن عنده جاه

رجعت للبيت اول ما دخلت شمرت كلشي من أيدي وضليت اصيح بغضب

:- خااالة خااالة وينچ خاااااالة ، فتحت باب غرفتها تلف روحها بروب قديفة وتأشر على حلگها اش اش

نسيمة :- صوتچ تعاي منا تعاااااي
جرتني من ايدي بقوة لغرفتي شمرتني جوة ورفعت اصبع السبابة تهدد

نسيمة :- نصيي صوتچ ما اريد اسمع منچ نفس واحد لحد ما افرغ

ليلى :- ليش عيني شنو عندچ؟ شو ما شاءالله سويتي بيتچ بيت دعارة وبعدچ تحچين بزود عبالك صرتي رئيسة جمهورية

نسيمة :- دقايق واجيج
جاي تطلع من الباب التفتت كلتلي لا تنزلين خليج هنا

نزعت ملابسي بدلت ورفعت شعري بقراصة ضليت منتظرتها فترة وأجت فاتت عليَ مبدلة ملابسها لابسة كلابية حمرة بيها تطريز ذهبي

اجت كعدت يمي وحطيت ايدها على كتفي نترته منها ما ضاجت ابتسمت وگالت

:- سولفيلي شصاير وياج يوم ليش جايتلي اعصاب

ليلى :- والله وصيت بيتچ طش ما شاءالله الله يزيد ويبارك

نسيمة :- بعدني ما مفتهمة شي منچ

گلبت عيوني بضجر وباوعتلها بنص عين :- شنو گلتلج نفسج من قررتي تسلكين هذا الطريق انتِ راح تدمرينة خالة هاي اذا ما طلعنة طامسين واحنة ما ندري

نسيمة :- اسم الله يوم شبيچ رفعت عكسها وكالت: - هذا فالج
ليش تفاولين علينا ماكو شي يدمرنة وراح يصير عدنة ظهر قوي

ليلى :- شنسوي بالظهر القوي؟ احنة شنو عدنا على كد حالنة عايشين والله ساترنة ليش دخلتي نفسچ لطريق ما يرضي الله ونهايته معروفة

نسيمة :- وداعتچ نهايتة حلوة وداعتچ انتِ بس طلعي منها واحچيلي شنو صار وياچ
شلون عرفتي صيتنة انتشر

ليلى :- اجاني ولد اسمه عمار يگلي البارحة اجيت مخصوص عليچ علمودج بس نسيمة الحفافة

نسيمة :- الحفافة تشرفه وتشرف اهله ، اني اعلمه واخلي ما يجيج ويحجي وياج شي بعد واذا سواها اشك حلكه وحلك الخلفه لا تضوجين كومي يلا اكليلچ لگمة سدي بيها جوعتچ وارتاحي ودرسي

ليلى :- برودچ راح يورطنة ويوگعنة بمصيبة

عافتني بدون اجابة وطلعت ضجت ولعبت روحي نمت بدون غداء وحتى نسسيت اصلي كعدت على صوت اذان المغرب صليت كل الصلاوات سوية قضاء ما في الذمة ونزلت لگيت وجه خالتي ثگيل

اول ما فتت للمطبخ كالت بعتب :- ليش غداچ ضال ليلى لا تزيدين تعبي وهمي كافي عليَ هموم الدنيا
دشوفي الناس شوفيهم شلون عايشين شوفي بيوتهم القصور واكلهم وشربهم شنو

ليلى :- جابو كل هذا بكد ذراعهم مو بأشياء ثانية

نسيمة :- لا يوم لا مو كلهم جابو هذا بكد ذراعهم نصهم سلكو درب اعوج وبي مضرة للناس وصعدو وعاشو بخير على الأقل اني ما سلكت درب بي أذية للناس كل اليجي هنا بأرادته ورضاه مضرتنة على نفسنة

كعدت على الكرسي ناطيتها ظهري حجيت بحزن :- بس تضرين نفسچ وتضريني وسمعتنة هسة صارت زفت وكل الناس تلگيها تحجي باعراضنة انتِ أذيتيني وألسنة الناس صارت مثل الخناجر المسمومة وكلها نغرزت بصدري

نسيمة :- طيب شنو رأيچ واني گايله للكل بت اختي راحت العمامها مو وياي بالبيت

ليلى :- على اساس محد راح يشوفني من اطلع واطب وما راح يعرفون اني عايشة وياچ ، راح ادورلي شغل وأستأجر شقة واگعد وحدي مستحيل اكمل باقي سنين ببيت مشبوه

نسيمة :- ويا شغل الينطيج ايجار شقة ومصاريف الكلية والمأكل والمشرب؟

سكتت ما جاوبت لان فعلًا الظروف كلش صعبة ومن سابع المستحيلات اگدر احصل شغل بي دخل زين ويسد حاجاتي ..

بدأت عطلة نهاية الاسبوع خلصتها بغرفتي صرت اخاف انزل لا يطلعلي رجل فجأة ويهتك ستري ويعتدي عليَ ما اريد اخسر اغلى شي ضل عندي الي هوَ شرفي

بدأ الدوام لبست تنورة وقميص جان الجو بارد رغم اني دائما البس بس قميص ما احس بالبرد بس اليوم حسيت البرد زايد فـ لبست چاكيت طويل يجي بطول التنورة اسود ، رشيت عطر ورفعت شعري ذيل حصان نزلت گذاتي وطلعت للدوام بدون ريوگ

من بدأت خالتي خطواتها بهذا الطريق اني حتى الاكل بديت اقطعه شهيتي انسدت بسبب القلق والخوف والحزن والتفكير المفرط بالمستقبل القريب والبعيد

التفكير كل يوم ياكل بروحي وكأنه شعلة من النار وگعت بداخلي وبدأت نيرانها تلتهمني بدون رحمة خفت لا تجي اللحظة الاخيرة واشوف نفسي صرت رماد متناشر تسحگني ارجل المارة

صعدت بالسيارة دقايق وقبط وطلع وصلت لجامعتي دخلت للقاعة فارغة عيوني راحت على مكان الولد جريت نفس بحزن وگعدت بمكاني اراقب الباب انتظر دخلته بس الغريب بالموضوع خلص الدوام والاخ ما بين اعتصر كلبي الالم طلعت من الجامعة اجر بذيال الخيبة والحزن
كنت متوقعة شوفته حتى اقدمله اعتذاري عن الصار بيناتنه يوم الخميس

شيهانة :- يعني كل هاي الايام ما عرفتي عنه شي غير هو من عائلة دينية وأسمه ابو ليلى

هزيت رأسي بحزن ونصيت رأسي :- اي بوقتها رجعت للبيت ضليت ابجي جنت مختنگة بسببه ماعرف ليش

ردت عليَ وهي تبتسم بمكر :- يعني حبيتي الأخ ؟

ليلى :- لا ابد ما حبيته خصوصاً من گلي الظاهر ما خذيتي كفايتچ من التربية حسسني اني انسانة عديمة تربية واخلاق لهذا السبب حقدت علي بس ردت اعتذر وأبري ذمتي لا اقل ولا اكثر

شيـهانة :- زين اني اموت واعرف خالتچ نسيمة جانت تأجر البيت لو هيَ نفسها تشتغل بالدعارة؟ وتبيع نفسها

صاحت السجانة بصوت عالي :- شيلن مواعينچ كافي انتن الزوج ما شبعتن سوالف صارلچ ساعة كاملة تگرگرن يلا گوووووومن

گمنة اني وشيهانة كملنة كلشي عدنا وغسلنة وتمددنه بفراشاتنة فراشها قريب من فراشي رفعت راسي وهمست الها

:- شيهانة هاي هاجر تخوفني اخاف انام وتسويلي شي
حجيتها بضحك

شـيهانة :- اي تغتصبچ تغتصب برائتج هاي اذا عندچ برائة

ليلى :- لو عندي ما تلگيني يمچ بالسجن بس عيب تنطيني طينتي بخدي على الأقل جامليني ثول حتى ثول

ضحكت وغطت رأسها بدون جواب غمضت عيوني احاول انام ما اگدر غطيت راسي بس عيني مطلعتها حتى اراقب كلشي يصير هنا لحظات قليلة وشفت هاجر ملكة الدعارة طلعت من فراشها وراحت دكت الباب انفتح الها اشرت بأيدها لوحدة الثانية كامت بس بشكل غريب ولبس شوية بعيد عن لبسنة كـسجينات وطلعت وسدت الباب ورجعت هاجر لفراشها دقيقة وكامت تمشي وصلت لفراش الشيهانة ضلت واگفة تباوع بأتجاها بدون هدف وربما اكو هدف بداخلها الله يعلم ما تخفيه النفوس
شوية وراحت لرجعت لفراشها نامت خذيتلي ساعة يلا غفيت

صبح الصبح كعدنة سوينة روتينة كـسجينات ورتبنة فراشاتنة ونظفنة اماكنة ما ضل عدنة شي نسوي اجيت گعدت على سريري يم شيهانة رفعت راسها باوعتلي رفعت طرف حاجبي وهمست :- بمنو تفكر يا حلو

شيهانة :- يعني سجينة خلف القضبان بيمن تفكر؟ برأيچ وحدة مثلي شنو يشغل بالها غير ظناها الخسرته

ليلى :- خسرتي؟ يعني مات لو شنو كمليلي قصتچ والله اكلني الفضول اكل البارحة كله افكر بسالفتچ اريد اعرف من شافتچ صمود شنو كان رد فعلها شلون بلغت عليچ شلون وصلوچ للعراق ودخلتي السجن ليش ما حكموچ بالكويت عندج جنسية وفوكاها القتل صار هناك ترة كلش دخت

شـيهانة :- غمضت عيوني ورجعت بذاكرتي لذاك اليوم اجتاحتني عاصفة حزن دمرت كلشي باقي بداخلي حطيت ايدي على حلگي اكتم شهگاتي

ليلى حطت ايدها على ايدي تصبرني مسحت دموعي وباوعتلها بأسى و گلت

:- لگيت بوجهي صمود ما انصدمت من شافتني بالعكس ركضت بسرعة عليَ جرتني من ايدي حاولت اقاومها بس جنت ارجف وهي اقوى مني
فوكاها الظروف المريت بيها بالايام الفاتت جانت صعبة وخلتني افقد قوتي يوم بعد يوم بشكل تدريجي

قاومتها شمرت روحي بالگاع جرتني حيل بكل قوتها وضربتني عدة ضربات على رأسي بقبضة ايدها فقدت اخر ذرة بقواي وسلمتها روحي كلها ثواني واشوف مشاري واگف كله دم گبالي ما فهمت شنو صار بذاني اسمع وشة وعيوني غوشت بس حسيت بضربهم الي وبعدها فقدت الوعي

فتحت عيني ورجعت غمضتها احاول استوعب كلشي صار
ما جنت مستوعبة عالبالي كل الصار كابوس اغمض واحاول استجمع قوتي والم الصور برأسي حتى اعرف اذا الي صار واقع لو حلم

حاولت اتحرك شفت روحي ما اكدر كل ذرة بجسمي توجعني عبالك طايحة من مكان عالي جسمي كله يون عليَ

اخذت وقت يلا رجعتلي ذاكرتي بشكل مضبوط و وعيت وعرفت كلشي صار اني هنا قررت بس اسمع صوت صگر اعيط واحسسه بوجودي حتى يساعدني وشنو يريد يصير خلي يصير يا روح ما من بعدچ روح

وقررت بس اطلع اشتكي علي واجيب الشرطة يشوفون كل شي موجود بهاي الغرفة حتى يعرفون هذا المجرم شنو مسوي

كان شعور صعب انتِ نايمة وجوة فراشچ جثث وفراشج كله اوساخ ودم وريحة لا تطاق بس تشبعت بيها

مرت الساعات والساعات صارت يوم كامل واني بعدني بمكاني ما تحركت ولو حركة وحدة سمعت اصوات غريبة تخوف خلتني ارتجف بس ما تحركت اكتفيت بقراءة ايات من القرآن

بنص الليل وفات مشاري للغرفة لابس دشداشة ولاف رأسه بشاش والواضح ان الضربة مأثرة بي لان من شغل الضوء بين وجهة الاصفر وشفايفة لبيض ضليت افكر بموضوعه

قفل الباب و وگف كبالي ، اجت ابالي فكرة يمكن راح تنقذني بس قبل لا افتح حلگي واحچي صدمني بكلمته

:- بعت ولدچ

بهت لوني انشلت حركة لساني بس عيوني تباوعله بصدمة

ابتسم بخبث وگال :- ان سويتي غلط نوبة الثانية تسمعين مني هذا الحچي انصحچ تصيرين عاقلة ولا تتصرفين برعونة مرةً ثانية

غمضت عيوني براحة جريت نفس عميق وجاوبته

شيهانة :- الحمدلله الحمدلله
داري وليدي لان هو ابنك وطالع من صلبك

مشاري :- ويمكن يطلع ولد صگر!

فكيت عيوني بصدمة وفتحت حلگي عجزت اجمع الكلمات واجاوبة غرز اصابعه بفكي وتمتم بكلمات نزلت مثل السم بأذني

مشاري :- ادري بعلاقتچ وي صگر ، محبة ، م ح ب ة

شيـهانة :- تفكيرك قذرررر قذرررررر تخسى
مو اني الادخل بعلاقة غير شرعية ومحرمة بس انتَ انسان مريض وتفكيرك مرررررريض انصحك تتعالج قبل لا تتأزم حالتك ولو هيَ شنو باقي بيها اذا انتَ حتى قتل قاتل والعظام جوة السرير توضح كلشي

ضحك بقهقهة ارتفع رأسه ونزل، زم شفايفة وگال

مشاري :- شعلان ولد صگر؟

هزيت رأسي بـ لا :- ابنك مشاري بطل هذا المرض بطل شك انتَ تشك حتى بأظافر ايدك

مشاري :- انا و لأول مرة اكون متأكد مو شاك
علاقتچ ويا صگر ولدي علاقة حب الحب بيناتكم من گبل لا تاخذيني عاهرة العاهرات ما يسون السويتي يالشيهانة
تشيلين راسچ من مخدتي تحطينه بحضن ولديييي!!!!!!

غمضت عيوني بقلة حيله وهمست :- ما عندي علاقة بصگر اطلاقًا اذا ما تريد تصدگ فـ هاي مشكلتك مو مشكلتي ، مريض

مشاري :- ما اصدگ لو تنزل بيج ايه تبرئچ ما اصدگ انتِ نظيفة ، انتِ اقذر من ماي المجاري

ضحكت باستهزاء :- اذا اني قذرة انتَ شنو؟ لك مشاري اظلم القذارة اذا ارمزها الك انتَ شي صعب وصفه بس كل الاعرفه هوَ انك ما تتنظف لو يغطوك بماي زمزم

مشاري :- ما يهمني اتنظف سولفيلي عليچ شلون راح تطلعين من هني شلون توصلين للسلام
ضحك تك خد :- ما اظن راح تگدرين بعد انتهت حياتچ وانحكم عليج بالموت بهاي الدار حالچ من حال الگبلچ

شـيهانة :- يلا هذا هوَ اني موافقة اموت هنا تفضل اطلع يالقذر

دار وجهة طفه الضوء وطلع قفل الباب ورا غمضت عيوني بحيرة ياربي شسوي هذا هوَ اني انتهيت حياتي كلها انتهت وينك يا صگر والله لو بس اسمع صوته حتى اصرخ استنجد بي
وبنفس اللحظة اتردد اخاف مشاري يقضي بيهم التوبة هذا مختل عقليًا

ضلت الاوهام تجيلي مثل الليالي الفاتت بين اشوف طفل صاعد على صدري ويباوعلي بحقد وبين الشباك الي تنحط علي ايد واسمع اسمي ينذكر وبعدها يختفي كلشي .. شفت الموت بعيني اخاف افتح عيني واشوف واخاف اغمض

صبري بدأ ينفذ والموت بدأ يسحبني غمضت عيني بعد تعب شديد وسحبني النوم لساعات طويلة
كعدت على صوت الباب اجة مشاري جايب اكل وشرب رفضت اكل خلاه وطلع

فضلاتي جواي الغرفة ريحتها نتنة حسيت روحي حتى تمرضت ، بچيت بحركة كلب من شفت روحي شلون مذلولة وشفت الصاير بيَ
واني الجنت عزيزة شوف الدنيا شلون ذلتني! وطيحتني طيحة ما وراها نهضة

قاومت جوعي بس بالاخير استسلمت واكلت وشربت ، ما تحملت اكثر ضليت ابجي بنحيب منهارة لحد ما صوتي طبگ

..... للحكاية بقية 🖤

ملاحظة #التنزيل بين يوم ويوم ..

شاركو القصة مع اصدقائكم رجاءً