رواية حمائم تخشى الطيران الفصل السادس 6 - بقلم فاطمة العبادي

تصويت + تعليق بين الفقرات 🖤
تاكات الأصدقائكم الي يحبون القراءة

#فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

أضَعت فِي عَرض الصَحراء قَافلتي
وجِئت ابحثُ فِي عَينيك عَن ذاتي

______________________________

اثرياء المال ، يرتدو اغلى الثياب ويتزينو بأغلى الحلي يلمعون احذيتهم ويهتمو بنظافة اجسادهم
لكن لم يهتمو بنظافة قلوبهم
لم يعبء احد منهم الى ميزانه حيث اثقلته الذنوب

توجهت انظارهم الي بكل فضول ودهشة ، واحد منهم فر سبحته وقطب حاجبة وهوَ يباوعلي من رأسي حد اخمص رجلي طلعت خالتي من احد الغرف تحچي بصوت واضح

نسيمة :- حياااهم تفضلو تفضلو استريحو جوة هلا ومية هلا بالعزاز هلا بالشيوخ
شافتني بهت وجها وصفنت لكن بسرعة استوعبت وابتسمت
نسيمة :- ها يوم اجيتي صعدي الغرفتج هسة الحگچ
رجعت باوعت الهم وگالت :- تفضلو حياكم الله ، واشرتلهم على الغرفة

رد واحد :- حي الله نباچ

ضليت متصنمة بمكاني بسبب الفضول اريد اعرف هذول منو وشنو سالفتهم وليش خالتي طايرة بيهم من الفرح

نزعو احذيتهم ديفوتون الا هذا الشخص الگصني بنظراته لابس رسمي طويل اسمر البشرة ، عيونه واسعة بأيده ساعة ذهبية ، وبين اصابعة مسبحة بأحجار مميزة لونها ازرق

باوع لخالتي هي تخزر بيَ حتى أصعد ورجع باوعلي وگال :- بنتچ؟

نسيمة :- لا عيوني ابو سلام البنية اقاربي ومخلينها امانه يمي اهلها مسافرين

ابو سلام :- ليش مسافرين وحدهم ما اخذوها وياهم

نسيمة :- فترة ويرجعون وهي طالبة جامعية شلون تعوف دراستها اسبوعين واكثر صعبة فـ ضلت يمي واهلها منا وهيج يرجعون تروح يمهم

ليلى :- انتَ منو؟ يعني جاي تحف لو تخيط؟ لا خاف عروس وتحتاج مكياج من ايدين خالتي

خزرتني خالتي واعضتلي شفتها بمعنى أسكت باوعلي بنظرة مختلفة وكأنه يعيد النظر ويدرسني من جديد ، مال طرف شفته بأبتسامة جانبية
وخصم عيونه كأنه ذيب راح يهجم على فريسته

ابو سلام :- اقاربك يدرون ؟

نسيمة :- لا شمدريهم ليلى صعدي يوم هسة الحگچ
ليلى :- مو قبل ما اعرفه واعرف الجاي يصير هنا ، لو اعرف كلشي واصعد لو اطلع من هذا الباب بدون ما ارجع
نطقت اخر كلمات بغضب مفرط

ابو سلام :- وياچ الرائد "صهيب حاتم" وعلى هذا اسلوبك وياي اتوقع لازم نتحاسب

نسيمة :- ابو سلام!!! البنية امانه يمي وقت حساب وكتاب يا عيني ليلى هذا هوَ عرفتي صعدي يلا
اتفضل يم الجماعة جوة ابو سلام

ليلى :- اذا تريد نتحاسب نتحاسب ماكو مشكلة ما تخوفني ضباط اخر وكت عديمين التربية والاخلاق

ركضت خالتي جرتني من ايدي للمطبخ حيل وضربتني على رأسي بغضب و حجت من بين سنونها :- تردينه يشمرچ ورا الشمس؟ شو انتِ ما تعرفين تحجين ولا تتصرفين واني الأكول عنج ذكية وسباعية !! صدمتيني بهذا تصرفچ
يوم هذولي مثل البحر ما يتگايشون وبعدني جديدة وياهم ومو بعيدة يشمروني وياج بسبع داهيات

نترت روحي منها وحجيت بغضب :- اذا تعرفينهم ما يتكايشون شكو تتعاملين وياهم ولا خلصنة من ظلمة الليل هسة صارت بوضح النهار
خل يكون بعلمج ضلتي وياج ماراح تطول

عفتها تحجي وراي بغضب من بين سنونها :- ولج ليلى لا تستهترين

شفته مرتجي على الدنگة مكتف ايدينه وعينه ع مطبخ طلعت باوعلي ولمعت عيونه بمكر
لسانه ما نطق غير كلمات قليلة لكن عيونه تسولف هواي مو غضب ، لا ، سوالف عيونه مكر وخبث وخديعة وتوعد
يتوعد لي بالهلاك وبالمحاسبة

هوَ كـالذئب ، يقتنص فرصته وينتظر الفرصة للأفتراس
هوَ كـالذئب مهما قدمت له من الطعام يحن الى الغابة
كـي يفترس من يشاء ويمكر بمن اراد

رمقته رمق اخير
أبتسم بانت انيابه، واحتتدت نظرة عيونه الصفراء
بلعت ريگي بخوف سديت باب الغرفة وگعدت بطرف السرير نصيت اتذكر شكله
يشبه الذئاب بنظرة عيونه وانيابه البارزة

ارتعد جسمي بمجرد ما ذكرت نظرة عيونه شمرت جنطتي بغضب على الگاع وذبيت روحي على وجهي ، غميت وجهي بقوة وضربت جبيني وحجيت بغضب اوبخ نفسي
" شنو هاي الرعونية الشايلتها واللسان السليط ، هسة انتِ شكو وتتدخلين بأشياء ما تخصچ ست ليلى فهميني انتِ شكوووو ليش طولتي لسانچ ويا بله سوالي شي بله اغتصبني لو سجني الله ينتقم مني ما اخاف رعنة "

بدلت ملابسي لبست بجامة نوم وضليت اتگلب بفراشي فترة ، طلعت اخر ملاحظات دونتهن وضليت ادرس ساعات واني محبوسة صار الليل صلاة بعدني ممصلية تأفأفت بضجر وقررت انزل اتفقد الوضع
اي صوت ماكو اتوقع راحو رفعت شعري بأهمال حطيتله قراصة ونزلت على الدرج امشي على اطراف اصابعي ، باوعت هدوء تام

ركضت للمطبخ باوعت على الميز صواني اكل مأكول منهن وبطالة اشكال والوان وفواكه
المواعين مو مواعينه الظاهر احد جايب هذا الاكل جنت ميته جوع من بداية النهار لحد هسة باكيت بسكت
الاكل جان يشهي عبارة عن تمن ولحم وشعرية والفواكه بأنواعها مديت ايدي ردت اخذ لكمة ورجعت سحبتها،  هذا مو مال حلال متأكدة مال حرام ما اكل منه

مشيت للثلاجة فتحتها لكيت بيض طلعت الطاوة شبيت جواها وحضرت قوري الجاي ، وكفت على اطراف اصابعي وجبت الفلفل
جاي اطگ البيضة ويا مانزلت بالطاوة وطلع صوت طگطكة الدهن اجالي صوت من وراي سامعته أذني بس غالطت نفسي بسبب الخوف والرجفة الي غزن جسمي ويا ما سمعت صوته ..

عطره تسلل لرياتي ، بلعت ريگي بخوف والتفتت بهدوء متصنعة القوة

ليلى :- نعم؟

صهيب :- عايفة خيرات الله كلها ، اشر بعيونه على الاكل
وكمل :- وتگلين بيض ما يلزم الگلب

ليلى :- اوضحلك نقطتين يخصني

صهيب :- ما يهمني اي شي يخصچ

ليلى :- تعقيبًا على كلامك لا اقل ولا اكثر
اول نقطة اني ما اكل فضلات غيري
ثاني نقطة ما احب تدخل لبطني لگمة حرام

زم شفايفه وأبتسم وهو يجاوبني :- هذا الاكل بفلوسي وفلوسي حلال لا تفكرين زايد

ليلى :- حلال بس فضاله

تقرب خطوات مني وصارت المسافة الفاصلة بيناتنة قصيرة جدًا ، ارتديت خطوتين درت وجهي طفيت الطاوة وباوعتله بأرتباك
مبتسم ابتسامة جانبية ويراقب تصرفاتي

رفعت طرف حاجبي وباوعتله بأستنكار :- تصرفك مزعج ممكن تبتعد اريد اطلع

صهيب :- تطلعين بس ورا ما تعتذرين عن كلامج
تنزلين رأسچ وتگولين بأسف شديد
اعتذر منك سيادة الرائد واتمنى تعفي عني اني الضعيفة بين ايديك اريد عفوك عني ورحمتك

بدون شعور طلعت مني ضحكة بصوت مسموع غطيت شفايفي بأصابعي باوعلى باستغراب
بعدت خصلات شعري النازلة وحچيت باستهزاء

ليلى :- اني اگول هيچ! لا انتَ فعلًا مو بعقلك مو صاحي نصيحة روح للشماعية بس ماعندي علم اذا تلفي ضباط لو لا
اذا تحب استفسر وادزلك خبر بيد نسومة

جدحت عيونه بغضب تقرب مني اكثر حسيت انفاسه صارت تلفح وجهي حطيت عيني بعينه بتحدي همس بخبث :- خشمچ هذا اكسره وتشوفين

ليلى :- أعلى ما بخيلك اركبه سيادة الرائد .... ااا ...شنو اسمك؟! مو مهم اسمك لدرجة ما حفظته حتى

طبگت الوسطى والسبابة ودفعته بخفة من زندة ابتعد فسحلي المجال امر بدون ما ينطق حرف واحد ، عفته ومشيت بسرعة صعدت لغرفتي والجوع گطعني تگطع

بعد ساعة تقريبا اجت خالتي جابتلي بيض مسويته وگلاص جاي وصمون فاتت للغرفة بهمة تحط الاكل على الميز و هي تحچي

:- اكلي يوم لا تضلين جوعانة ما صارتلي فرصة اصعدلج اكل
ليش ما متغدية؟ مو مخليتلج اكل بالفرن
وتالي ياماما وتالي تضلين بهذا عنادچ الف مرة گتلج مالج علاقة بكلشي يصير بهذا البيت انتِ تعيشين وتدللين واني المسؤولة عن كلشي يصير

فضلت التزام الصمت على الكلام ، باوعتلي بأسف
رجعت باوعتلها من جديد لابسة ثوب قصير ومدلع والذهب تارس رگبتها وايديها ، وحاطة حمرة لون احمر
تقربت گعدت يمي ولزمت ايدي باستها وگالت بغصة
:- ليلى اريد اعيش بس ما اريد اخسرچ

ليلى :- انتِ ما جاي تعيشين جاي تخسرين روحچ وتخسريني ، حجيتها وبچيت

حضنتني تطبطب على ظهري بدون كلام بعدتني من حضنها مسحت دموعي وقبلت راسي و گالت

نسيمة :- ياماما راح اوصيچ وصيه لا تنسيها
من تشوفين بير لا تذبين روحچ بي بس لأنچ عطشانة

ليلى :- خالة من تشوفين بير لا تذبين روحچ بي لأنچ عطشانة

ضحكت وگرصت خدي :- ذبوني بي من زمان وراح وكتي هسة صار وكتج ، اريدج سباعية وما تخلين شي يهزچ وما اريدچ تذبين روحچ وراها تصيحين تصيحين أسم الله يلا يوم اكلي ودرسي ونامي

گامت فتحت الباب وصتني اسرگي وما افتحه
لوحتلي بايدها وكالت تصبحين على خير
رديت وانتِ من اهله

جريت نفس عميق كمت اكلت وطلعت للحنفيه غسلت ، رجعت الغرفتي مريت من يم الدرج باوعت ليجوة شفت كراسي وطبلات وماكو غير هذول الزلم الاربعه
اجت عيني على الرائد ويا ما صارت عيني علي رفع رأسه شافني وابتسم ابتسامة جانبية ، فر سبحته ونصة

ركضت للغرفة ركض سرگيت الباب على روحي ضليت اقرأ ساعتين وراها نمت
مر اسبوع الوضع على حطته ابو ليلى وجهي ثگيل بس مع هذا احسه يريد يبادر ويحاجيني بس اني اتجنب الحديث ويا وقررت ما اهتملة ابد

كعدت الصبح الجو ما كان بارد لبست بدون چاكيت وطلعت للدوام ، شفته واكف بباب القاعة لابس جاكيت اسود وحاط لفاف على رگبته اسود رفع عينه بدون مايرفع رأسه حط عينه بعيني ، اربكني وهز شي بيَ
وبسرعة نزل عينه

عبرته ودخلت للقاعة دخل وراي بدقايق وكعد بصفي
أبتسم وگال :- ما لان الحجر

ليلى :- لان

:- يعني صلح

:- ما اعتقد بيناتنا شي تكدر تكول هسة صرنة متصافين لا الك شي يمي ولا الي شي يمك

:- الحمدلله ، فرك ايدينه ببعض يدفيهن وگال بصوت خافت
يالله تحجبت السماء بالغيوم الرمادية الظاهر راح تمطر

رفعت عيني باوعت من الشباك ويا وقوست شفايفي :- قبل دقايق صحو شبسرعة غيمت بس لا تمطر

باوعلي مستغرب وكال :- ليش اكو احلى من المطر؟ خير من رب العالمين ورحمة

ليلى :- اعرف بس اني انزل على الشارع العام يعني وراي امشي بفرع طويل واتطين يلا اوصل للبيت

:- اذا تحبين اوصلچ للبيت بسيارتي

رديت بانفعال
:- لا شنو شايفني تايها واروح وارجع ويا اي من مكان لا عيني اني بنت ناس اخاف على روحي و على سمعتي وهم ما اثق بيك شمدريني ما تطلع واحد منحط اخلاقيًا وتسويلي شي

تنهد وكال بضجر
:- يا حجاية رجعي لمكانج ما تتحاجة بسرعة تهجم

ضحكت ونصيت بخجل :- اعتذر بس شوية تنرفزت

رد بتفهم :- ماصار شي حقچ اي بنية تخاف على سمعتها وسمعة اهلها راح يكون ردها مثل ردج

ابتسمت كـرد اول محاضرة وبدأت تمطر بغزارة وصوت الرعد عالي ، كل ما تبرق وترعد أنزل وجسمي يرتج حتى الدكتور لاحظ هذا الشي وسد الباب حتى يخف الصوت

ضلت الدنيا تمطر نص ساعة تبطل شوية وترجع تزخ
خلص الدوام الطلاب گامو يطلعون بقيت كاعدة اباوع بتفكير شلون اوصل ما جايبة مظلة ، هسة اذا اطلع اسبح سبح بالمطر

باوعتله بتفكير حچة بصوت عالي حتى اسمعه لان صوت المطر مغطي على صوته ما سمعته تقرب مني وكال :- ليش كاعدة كومي ما الج نيه ترجعين للبيت اليوم

:- دتزخ متشوف!

باوعلي بتفكير بعدها گال
:- اني اوصلچ للبيت ماكو مشكلة احسن متضلين كاعدة هنا لليل

هزيت رأسي ب لا وكمت حجيت :- لا لا اني اروح شسالفة هو مطر قابل حجار

ما لح عليَ كال براحتچ صاح علي صديقه ناصر بصوت عالي عافني وراح يهرول ، اخذت اغراضي وطلعت امشي سريع تبللت بالمطر
ورجفت من البرد ، ملابسي صارت تقطر ماي
والطريق صار طويل ركضت وكفت جوة شجرة كثيفة جريت شعري حطيته صفح يقطر ماي مسحت وجهي وباوعت للطريق بتفكير

حجيت بداخلي "هسة شنو ابات بالكلية اليوم؟!"

باوعت للطلاب شايلين مظلات وشباب حاطين قماصلهم فوگ روسهم ، زميت شفايفي و وبخت نفسي لان ما لبست معطف كان حطيته على راسي ومشيت

اوراق الشجرة ما تحملت ثقل قطرات الماي وذبت الماي على رأسي غسلني فوگ ما اني مغسولة ..

خنگتني العبرة مسحت وجهي ومشيت بس اوصل اصعد سيارة وعود من اوصل الله كريم بلكي تبطل
جاي امشي انصدمت بواحد وانضرب رأسي بصدره توغل عطره لرياتي ، ابتعدت عنه واتسعت عيوني قميصه تدمر حمرة
بلعت ريكي بخجل ورفعت رأسي اتعذر
شفته گبالي شايل مظله

:- جبتلچ مظله ليش طلعتي

:- ما ادري بيك ،، كلت اروح للسيارة

مد المظلة خلاها فوگ راسي اخذتها منه شفايفي كانت ترجف من البرد حجيت برجيف :- وانتَ شلون بيك تروح بالمطر

:- سيارتي قريبة حجاها ونزلت عيونه على قميصي اتسعت عيونه باوعت لمكان نظرته قميصي من الماي  مخيل  على جسمي وكلشي مبين غطيت صدري بالجنطة تنفست بصعوبة

هوَ شح نظره بسرعة نزع معطفه فورًا وتقرب مني كلش صار قريب عليَ وجهي بصدره ، ارتعش گلبي
لف ايدينه وحط معطفه على الكتافي ، همس
:- حتى يسترچ خـاتون .

قال الشاعر كريم العراقي ، بعد ما استعارت احد الجميلات معطفه في ليلة شتوية باردة
"لما أستعارت معطفي
فورًا تغير موقفي ،، يا برد اينك من دمي؟
فـ  أنا شعلةً لا تنطفي ، فـ هي استعارت معطفي
الكُل من حولي هتف
بردٌ رهيبٌ وأرتجف .. وأنا عن الكل أختلف في داخلي دفئٌ خفي فـ هي استعارت معطفي ..

يا معطفي ما اسعدك قربي وما ابعدك حاولت ان لا احسدك ياليتني انا معطفي
،، قالت اعطرك اجنبي؟
بالله لا تستغربي هو عطر قلبي الطيبِ
قالت بكل تلطفي تبدو الحنون العاطفي
ياللهدوء العاصفي
ف تغامزو من حولنا الحب اصبح معلنا
وسألت روحي هل انا محبوبها ام معطفي؟
اين الدليل لأحتفي؟

وهنا اتتنا الحافلة فـ تنهدت هي قائلة
شكرًا،  وخذه قبله قد كان يوم معطفي
والكل صفق يشتفي لما اعادت معطفي ومضت بغير توقفي

لحظة!! تغير كل شيء عندما اقترح عليها ان يوصلها بسيارته الخاصة الى المنزل
فـ لم تتنهد هيَ قائلة "شكرًا، ، وخذه"
لا بل ابتسمت و اومئت برأسها متلهفة "نعم، بكل سرور"

تحت مظلة واحدة ، بأجساد متقاربة ، ببطئ هيَ تسير حتى يفرح قلبه ذاك الصغير
أرادت به ان تمكر ، والى خبثها تعود
رفعت ببطئ رأسها واليه توجه النظر
على عينه حكمت بالسهر
و الى قلبه هيَ سارت من دون خبر
أخذت منه الفؤاد ، اذ بـ قلبه لـصدره هجر

الى جحيم عشقها ..
_ماذا؟
_يُقال انه اعلن الخبر …

و بنيران مكرها؟
_ احترق الحجر ...

و لـقلبها؟
_يقال أنه نذر العمر ...

يا للريبة ، من كان قلبـهُ خالي من أي حَبيبة
وقع بغرام فتاةٌ عجيبة !
هل يا تُـرى سـ تصبح نصيبه ؟

ام للقدر رأي أخر ..؟

فتح باب الصدر صعدت بخجل ، صديقه ناصر واكف تحت المطر باوع له بخيبة مصطنعة وگله
:- خيانات

:- غيرتي ما تسمحلي اخلي بنية بهيج جو وظرف وحدها ابتعد افندي .

دار صعد يمي عاف ناصر ، اول ماطلع تنفست براحة باوعت للطريق ورجعت باوعتله
:- اسفة خليتك بموقف موحلو وفوكاها تبللت بسببي وحتى بردت

:- ماكو داعي للأسف ، هسة گليلي وين بيتكم

:- وانتَ شعليك ؟

باوعلي متفاجئ اتسعت عيونه ضحكت :- بيتنة بلـ **** ردت الطف جو

:- والله خرعتيني ليلى خـاتون

:- حلو وتعرف اسمي شنو بعد؟

:- والله بس اسمچ عرفته من دكتور ميثاق كلشي ماعرف عنچ

:- حلو ، الصدفة اسمي نفس اسم بنتك

:- بنتي؟ ضحك
وباوعلي ورجع نظره للطريق :- ماعندي بنية ولا متزوج بس هذا لقب اني واخوتي من صغرنة كل واحد بينه اختار اسم ابنه او بنته بالمستقبل

:- فهمت يعني انتَ مقرر تسمي بنتك ليلى ، شوكت قررت

:- اوو قبل سنوات طويلة من عمري 14 تقريبا وصار اسمي ابو ليلى

:- زين اگدر اعرف اسمك الحقيقي لان بصراحة الكل ينادونك بأبو ليلى حتى الدكاترة

ابتسم :- أسمي قـيس .

:- عاشت الاسماء

:- اسمچ العايش ، راقبيلي الطريق خاف نوصل للفرع
ما اريد اتيهكم واني گوة راح امر من يم داركم

:- لا وين بعد هواي
اجت عيني على المسجل حجيت بحماس
:- الله مسجل مخلي يمك تسمع بي من تطلع مو ، عندك اقراص ؟

:- اي عندي اقراص بيهن لطميات اشغلهن من اكون وحدي وبعيد عن السيطرات هذه اوامر القيادة الفوگ مني

:- القيادة الفوگ منك؟

:- السيد ، والدي

:- اي حقه والله بهذا الوضع الصعب، من طائفية وانتشار الفتن اكيد يخاف عليك
زين عندك هيثم يوسف؟

:- هذا منو؟

:- وين اكو بشر ما يعرف هيثم يوسف

:- والله ما اعرفه شنو رادود لو ممثل او مطرب

:- مطرب احب أسمع اغانيه

:- بعمري كله ما سامع اغنية وحده الحمدلله

گتله بصدمة :- چذذذب! ما اصدك اكو بشر ما سامع اغاني بكل حياته يعني منا منا ما سامع

قيس :- كدامچ سيد ملتزم شلون اسمع اغاني
بعدين الاغاني بيها فتن وأذية للنفس اني ما احب اشمر روحي للأذيه وللعذاب

ليلى :- شكلك مو شكل واحد ملتزم
حجيت بضحك

قيس :- بعدچ ما تعرفيني

ليلى :- على أساس انت التعرفني؟
ضلينه نحجي فترة بمواضيع عامه لحد ما وصلنا قريب ع بيتنا كتله ..
منا فوت منا يم بهذا الفرع
المحل الاصفر من يمه

فات بالفرع باوعلي وگال :- اسمچ ليلى وراح اندل بيتكم وعمرچ على الاغلب 18 او 19 سنة شوية شوية راح اعرف الباقي

ليلى :- يهمك؟

قيس :- لا ،، بس ارضي فضولي مو اكثر
ما احس يهمني اذا ماعرفت ما راح اضوج لو ادوخ عادي

ليلى :- افضل خوفتني وتفضل هذا معطفك أخذه مشكور على الستر والتوصيلة

قيس :- رجعي رجعي ، يمعودة شلون تنزلين بدونه
اني انزل وياچ واسلم على اهلچ و اوضح الهم الموقف بطريقة بسيطة حتى ما يمسچ ضرر

ليلى :- ماكو داعي اصلا اهلي هسة ماموجودين كلهم بالدوامات بس خالتي بالبيت وهيَ صديقة مو بس خالة اني اوضحلها السالفة

ما اعرف ليش جذبت علي بذيج اللحظة ما فهمت روحي يمكن ردت ابينله ان اني من عائلة الهم مكانتهم و وجودهم ما ردته يحس بشيء سيء اتجاهي

وصلنة نزلت والمعطف على اكتافي نزل وياي دگيت الباب دقيقة وطلعت خالتي فتحت الباب تضحك شافت قيس واختفت أبتسامتها

سلم عليها وگللها :- خالة المطر قوي وهيَ تبللت ما حبيت اعوفها بهيج وضع اتمنى ما اكون سويت شي يضركم لو سببت احراج؟

نسيمة :- فدوة لعيونك خالة ماكو اي احراج تفضل تفضل اضيفك شي شنو تضل واكف جوة المطر

قيس :- ابو ليلى موجود

حجيت بسرعة :- بابا بالدوام لو اجة؟

فهمتني هي لگفتها بسرعة ، گالت :- لا بعده والله بس عادي يوم اني بحسبة امك تفضل لا تستحي

قيس :- خليها غير مرة ما اكدر ادخل للبيت بي بس نسوان يلا ليلى فوتي جوة

نزعت المعطف طبكته وقربته منه حول المظلة بأيده اليسرى وابتسم ، مد ايده اليمين حطيت المعطف فوگ ايده بدون قصد تلاامست ايدينا ، ثنينه نزينة سرت رجفة بكل جسمي ..

سحبت روحي وفتت للبيت بسرعة التفتت باوعتله ابتسمت و لوحتله بايدي للوداع
راح يصعد وكف يم باب السيارة لحظات بدون تصرف وعيونه تباوع بالفراغ ، فتح باب السيارة والتفت باوعلي بنظرة غريبة خلت علامات الاستفهام تحتل دماغي ابتسم واشرلي افوت ، ضحكت وسديت الباب

حطيت ظهري على الباب وغمضت عيوني اتنفس بعمق خالتي گالت بمكر :- كأنچ غرگتي ياماما؟

عدلت وگفتي جليت صوتي ورديت :- لا! ويني وين الغرگ هذا ماي المطر

نسيمة :- ماي المطر؟ خير ان شاءالله
لحگيني للمطبخ عندي وياچ موضوع مهم ما يتحمل تأجيل

ليلى :- الله يستر من موضوعچ المهم نسيمة

نسيمة :- نسيمة حاف! يله تمونين

فتت للمطبخ كعدت على الكرسي اطكطگ من البرد
كعدت كبالي شبكت اصابعها تنفست بعمق جانت تباوعلي بتوتر

نسيمة :- شوفي يوم اكو بنية خطية مطلقة وعدها طفلة ماعدها مكان تروحله
تروح الأهلها يصكعون بيها ترجع لرجلها يموتها ضرب وذلة وخيانة ، عرضت عليها تستاجر بيت صغير وتسكن بي

بس هي گالت .. شلون اسكن وحدي اني والطفلة صعبة عليَّ وهاي الناس تخوف والوضع صعب كلش والايجار منين اجيبة اذا كان عالي
اقترحت عليها تستأجر هنا يمنه يعني تكعد ويانه بالبيت وتنطينة ايجار بسيط
لان كرامتها ماتسمح تكعد بمكان هيج بلاش

ليلى :- انتِ رضيتي؟

نسيمة :- قابل اعوف بنية بهيچ عمر صغير وياها طفلة تايها ماتدري وين تروح!
جبتها وانطيتها غرفة گلت اشورچ اذا ماقبلتي اخليها كم يوم لحد ما تحصل مكان

ليلى :- راح تلوحها وصاخة هذا البيت؟

حجت بتحذير :-ليلى!!

ليلى :- ما تسألچ على الناس التجي لو ع الطرب والله يعلم شكو بعد

نسيمة :- حجيتلها اني كلشي مفهمتها وضحتلها السالفة وگتلها وياي بنت اختي وهم عايشة بأمان ماعليها شي انتن تحت جناحي ما يلوحچن المطر

كمت قوست شفايفي بحيرة ورديت :- براحتچ ،، احسن من غيرها هاي اذا كانت فعلًا مثل ماتفضلي

نسيمة :- والله خوش مرة اشوفها كم مرة تشتغل خدامه بالبيوت وضاله من بيت لبيت ومن شارع الشارع ونختني ماكدرت اردها نكسب بيها اجر

هزيت راسي وعفتها

داطلع صاحت وراي :- شنو سالفة بابا بالدوام ، انتِ مجذبة على الولد ؟

ليلى :- ما ردت احسسه اني تايها وما عندي احد

نسيمة :- ليش ياماما مو بعينچ اني؟

ليلى :- بعيني ، بس وضعنة صار صعب الشرح ومُـخجل اكثر من ما متصورة
وهم عجبني احس بشعور هذول البنات العدهن أب

عفتها وصعدت اجر ذيال الخيبة والالم ،، شكله الحزن والخوف بهذا البيت راح يزيد
وين انطي وجهي اني لا ولا اب يلموني بحضنهم ويحموني من شر هاي الدنيا ..

شيهانة :- الله يعينچ والله شگد صعبة الواحد يشوف بيته تحول من بيت عادي لبيت مشبوه وبي سكارى ومنكر

ليلى :- وشعور الأمان فجأة اختفه بس الله ياخذ شي وينطي شي ثاني
بهذاك اليوم عرفت بنفسي صرت معجبة بـ قيس و هوَ هم مُـعجب بيَ نظراته وتصرفاته مال واحد مهتم

ما راد يبين بس اني بمكري گلت اجرجرة واخلي يوگع بشباكي

شيهانة :- والله انچ مو هينة بس ما خفتي يعرف حقيقتچ؟
من جهة بيت خالتج ومن جهة ثانية انتِ ما گتيله اني يتيمة يعني لو ساكته وما گايله شي كان افضل

جريت حسرة :- بعد الفات مات شيهانة .. لو نصيحلچ سهير والله حرنه وياچ

شيهانة :- شيهانة هذا اسمي من الطفولة

ضحكت وكرصتني بفخذي :- قـيس وليلى ثنائي معروف بس نهايتهم مؤلمة ، ونهايتكم صارت واضحة بعيني بدون ما تحچين

ليلى :- يمعودة بعد هووواي حچي والف سالفة من تسمعيهن تنصدمين

هاجر :- يا الله ، حبايب ردت اشاركچن الگعدة
شلونچن

شيهانة :- بس احنة ما نحب نشاركچ بالكعدة ولا بالحديث ممكن تفضلين وتكومين منا

ليلى :- شيهانة! عوفيها

هاجر :- يمة اسم الله شبيچ انبزيتي بز وتكهربتي شگتلچ هسة اني ردت نگعد سوية وندردش شوية شنو نگلب الدنيا لو طاح السجن فوگ راسچ

شيهانة :- شوفي الاسلوووب!!

ليلى :- اني متعودة حبي خليها يمي ... ردت احجي قاطعتني وهي تردحلي

هاجر :- و شنو هيَ لتخليها يمچ عيني ، وانتِ شبي اسلووووووووبي يمة؟ يبز يعض
وحدتچن جنها طير مهلس ننفخ عليها تطير وما حاطات رجليجن بالكاع هااااااي بالسجن وهيچ لوووووو تكعدن بقصوووووور شتسووووون؟؟

ليلى :- برنسيسات عيني ونتصرف باليعجبنة

كامت ورفعت دشداشتها حطتها بملابسها الداخلية وبرزت سيقانها السمان باوعنالها اني وشيهانة وبلعنة ريگ جنها سيارة مدرعة .. صفگت ايديها وهزت اكتافها بأعتراض خصمت عيونها الصغار المليانات كحل ولوت حلگها

هاجر :- يمةةةة اممممم، امهات الگلگ بنسيسات ..... قاطعتها شيهانة

شيهانة :-برنسيسات

هاجر :- بلنسيسات مادري درنفيسات خايبات ما تسدن حلگجن التلزگ لا اطمچن عليهن لطمة اخليچن تذبن ضروسچن بحضونچن

شيهانة وگفت بغضب حطت ايدها على خاصرتها و عاطت بيها :- شمالچ لافيه علينا ومتحزمة على الشر اگلچ حبوبة شيلينا من راسچ لا اكسرة مثل ما كسرت روس القبلچ هذا السجن يشهدلي شهرين شهرررين وكفت امثالج على تك رجل

هاجر :- ****** ،، فتحت حلگي بصدمة عفطت للشيهانة يمة يمة راح يهد ابو زيد الهلالي راح يهد

ما حسيت غير الشيهانة تهجم عليها وصارن من الروس ، وحدة تصيح اخ شعري والثاني تعيص بطنيييي
اني والسجينات نفاكك بيهن لحد ما اجت السجانة يلا فكتهن

هاجر تعيط :- درنفيسسسات امهات الگلگ

شيهانة :- منو ساحگ ذيل هاي الهايشة اليوم خل يطلع مانسويلة شي بس نخنگة

هاجر :- دمشي لج بت الك*** بت ال*** ام ال**** من احترگت صفحتج وصفحة الخلفچ

شيهانة :- اااااخخ لو يهدني عليج اعضج بـ بلعومچ اشلع لوزاتچ الخايسة

هاجر :- ****** „ رجعت عطفت الها ضلينة مصفنين اخلاقها سزز يعني مادري شنو احجي بقيت مصفنة
السجانة ضلت تعيط وتهدد تعاقبهن اذا استمر هذا الوضع

كل وحدة راحت لمكانها شيهانة ركضت للحمام غسلت وجها وايديها
كتلها بعتب :- چان غلستي عنها تولي ليش ضربتيها

شيهانة :- خلي تولي شنو ماخذة على السجن وتشلخ وتملخ بكيفها بس بسيطة اني الها النذلة اذا ما خبلتها

ليلى :- تكفي الشر هاي سلطتها هنا اكبر من سلطة الضباط مسكته شوارب ، وتردين تحطين راسچ برأسها

هزت راسها بوعيد وطلعت قبلي ، خلص يومنة حاله حال الايام القبله نمنة ليلنة وگعدنة الصبح صلينة وتريگنة وقمنة بكل اشغالنة

شيـهانة :- ليلى الله عليچ سولفيلي على المرأة والطفلة شنو طلعن؟ شلون شكلهن شكد اعمارهن

ليلى :- لا عيني ، سولفيلي سالفتچ بالأول شرحيلي وضعج

شيهانة :- والله مادري شحچيلج يعني كتلج بس دكت الوحدة اني عقلي طار من رأسي بدون شعور ضليت اركض بالهيمة

ليلى :- و منو صاحلچ بأسمچ؟

شيـهانة :- من سمعت صوت ناداني بأسمي الحقيقيي
:- سهييير!!

ما التفتت وضليت اركض بخوف الى ان تعثرت و طحت على وجهي ، انقطع نفسي من الخوف سمعت خطوات صارت قريبة تبعها صوت سيارة رفعت رأسي شفت زلمة صار قريب مني يصيح

الله بنتي الله ، طك ضوء السيارة بعيني غطيت عيوني بأيدي تأذن من ضوء سمعت الباب انفتح
واجالي صوت صگر يحجي بخوف
:- شيهانة! علامج يبا شمطلعج بنص الليل

تقرب مني رفعني من الكاع حجة الرجل :- عمي هيَ طلعت تركض سريعة مالحكتها

صگر :- ما صار شي اركب ، تعالي تعالي صعدني ورا وسد الباب
دار صعد بالسيارة بدون شعور تمددت على الكشن ونمت فزيت لگيت صكر يرش على وجهي ماي
اني وين، تنقلت عيني شفت مكان غريب

صگر :- ذبحتيني من الخوف علامچ؟ شركضچ بالليل

شيـهانة :- ما ادري عقلي احسه طار

بهت لونه حاجاني باستعجال :- حضري عمرج الليلة تردين لعراق

شيـهانة :- تحجي صدك؟ شلون؟

صگر :- حضرت كل شي لا تخافين وجبت كل اوراقج الثبوتية
بالليل تطلعون من الكويت احنة هسة عند صاحبي على الحدود

هذا ذهبچ بيعي وهذا ذهب من امي الله يرحمها يفيدج بعد

شيهانة :- شسوي بي اني رايحة الاهلي بالبصرة ما احتاجة

صگر :- الدنيا ماندري شنو ضامة الج باجر اخذيي لا تضيعينة يفيدج

هزيت رأسي استرسل بالكلام :- جبت كل هدومج طر الفجر وانتِ على نومتج نزلتج من السيارة شيل
عبالي متي گلت مو وكتها مابي حيل صراخ وبچي

شيهانة :- لا، ما متت جسديًا بس روحي ماتت

صگر :- ما ماتت ولا شي خلي ايمانچ بالله قوي يجي شعلان لحضنچ وتضحكلج الدنيا

شيهانة :- شلونة هوَ ، وينه يم منو يبجي ساكت
حتى ما شبع من حناني الله لا يوفقك مشاري يحرگ كلبك مثل ما حرگت كلبي بوليدي

صگر :- بامان بالبيت وكلها بخدمته لا تفكرين زايد

سكتت خنكتني العبرة غصيت بدمعتي درت وجهي منه گال بهدوء

:- طليقة ابوي؟ تبچين

:- صگر اريد انام من يصير الليل كعدني

:- توة طر الفجر! 

سكتت ما جاوبت مر اليوم واني بداخل هاي الغرفة صار المغرب سبحت وطلعت حضرت اغراضي واكلت جنت وحدي بالبيت
بالليل اجة صكر ويا صديقه

وكال امشو نطلع هاي المسافة مشي السيارة ناطرتنة بمكان ثاني

طلعنة نمشي بظلام الليل وصلنة يم سيارة شكلها غريب ، التفتت باوعت الصكر صاحبه عافنة وراح
طاحت دمعتي قبل لا انطق

:- دير بالك على شعلان امانه يمك

نصة فرك عيونه بشماغة وگال :- بماي عيني

:- صگر ، لا تتأخر بس فهمني شلون تجيلي الاهلي لو شلون

صگر :- لا، طلع ورقة وكال
خوالي ، هذا الرقم خابري علي رقم خوالي كل فترة خابري ونشدي من اكون موجود يمهم راح احجي وياج ونلتقي وهذا عنوانهم
كافي بالاسبوع مرة تخابرين
لا تفكرين بشعلان بماي عيني

شيهانة :- مايكفي الرقم اريد عنوانهم كلشي يصير عاد اروحلهم بنفسي
صگر :- بالزبير ، بس تطبين الزبير گليلهم اريد بيت فهد الجحيل گبل يوصلونج الهم

نصيت رأسي ابجي بدون صوت مد ايدينه لزم وجهي وكال :- إن الصبر لله غناء. والصبر بالله بقاء، والصبر مع الله وفاء، والصبر عن الله جفاء
لا تنسين حجيي طليقة ابوي

شيهانة :- خلي ضميرك هوَ الرقيب على افعالك
لا تصير مثل ابوك

صگر :- ما يموت ضميري يالشيهانة دام النفس يصعد وينزل

صاحبه حجة :- صگر يلا

طاحن دموعة وگال :- لا تنسين قضيتي ، گلبي راح يضل ويا حب عمري لاخر نفس
انام واكعد ويتجدد هذا العشگ بداخل صگر
حافظي على "سري" وداري "حب عمري" لحين ما اجي للعراق

ابتسمت وگتله نفس جملته :- بماي عيني

صگر :- داري عمرچ ، يلا طليقة ابوي الله معاج

صعدني بالسيارة وانطلق الولد التفتت شفته واگف عيونه علي تراقبني بحزن لوحلي بأيده ولوحتله كلي. ثقة بي وعندي امل صگر راح يجيبلي ابني وتقر عيني بشوفته ، الدنيا ليل ومشت بينا السيارة هواي وگفونة سيطرة مادري حرس الحدود الولد طلع اوراق وانطاهم شافوهن ورجعوهن وكلولة امشي

بعد مشي فترة سيطرة ثانية جيش لابسين لبس عسكري ، شفت علم العراق ولمعت عيوني
طلع الولد الاوراق وانطاهم عبرونة باوعتله وحجيت :- هذول عراقيين

:- اي دخلنا العراق الحمدلله

:- انتَ عراقي

:- نص ونص ، سكتت ما جاوبته ضلت السيارة تمشي فترة وبعدها توقفت يم بيت طوابق او فندق

:- راح تباتين هني ، هسة انا وصلت الامانه ورايح
بس اسلمج الهم

:- تسلمني الهم؟

هز راسه وكال :- فندق عدهم غرف ااجرلج حتى ترتاحين وترحين الاهلج

هزيت راسي نزل نزلت ورا فندق او بيت ما جان اكو شي واضح سكتت ما حجيت ولا حتى خفت
لان المبلل ما يخاف من المطر

انطاني مفتاح غرفة ورحت ادور عليها عافني الولد وراح شوية واندك الباب تقربت منه صحت منو
رد: - انا صاحب صكر

فتحت شايل فلوس :- نسيت ذني من صكر وصاني انطيج فلوس عراقية
هزيت رأسي واخذتهن تشكرت وسديت الباب

كبل شمرت روحي بدون ما اطول غفيت بسرعة وفزيت باوعت للساعة بـ1 ، الضوء قوي داخل من الشباك كمت فتحته الجو حار كلش
جريت نفس عميق وابتسمت احس روحي رجعتلي
اخ يا ريحة بلادي اخ ريح من الجنة

ضليت اتنفس براحة واباوع على الشارع بهدوء اشوف الناس تمر ، سيارات، اطفال بالشوارع ارتاحيت حسيت بشعور الانتماء بعد ماقتلني شعور الوحدة

فتت للحمام سبحت بسرعة طلعت طلعت ملابسي لبستهن مشطت شعري ورفعته ، حضرت اغراضي وفلوسي وطلعت من الفندق بعد ما سلمت المفتاح

تمشيت خطوات عيوني تباوع للناس والمحلات والبيوت احس اريد اصرخ بأعلى صوتي "احببببك يااا عراق" احبك يا ابو الحضارات يابو الغيرة والحنية

وگفت سيارة سألت اذا يكدر يوصلني لمنطقة اهلي وافق بدون اعتراض
بيت اهلي اخر مرة طلعت منه قبل 15 سنة من سافرنة للكويت وبعدها ما رجعتله ولا شفته

جنت طفلة كلش صغيرة ، مشت بينة السيارة ساعة ونص اذا مو اكثر لا وصلنه للمنطقة
معالمها متغيرة خليته يوصلني لاخر نقطة اتذكرها واقرب نقطة على بيت اهلي
انطيته كروة ونزلت اتمشى شايله بأيدي جنطتي تقودني اقدامي لبيت اهلي صار سنين ماشايفتهم والشوق بداخلي تخطى الحدود

جنت افكر واتخيل حرارة اللقاء ، امي، خواتي، اخواني، وابوي شلون راح يفرحون بشوفتي
زين جدي وبيبي شلون صارو بهاي السنوات

باوعت للشجر طالعة من سياجات العالم الناصية ، عبرت من يم بيت ضربت بخشمي ريحة كيكة
ضحكت واني اتذكر كيك امي وكليجتها الطيبة

ضيعت بنص الطريق ، الدنيا جانت عصر تقريبا
الساعة بالأربعة الا ربع .. لمحت ولد شاب طويل واكف يرش باب بيتهم

هرولت بأتجاها لمحني ونصة راسه وكفت قريب مني والقيت السلام رفع رأسه يرد وابتسم

شيهانة :- اگول اخوي وين بيت حجي حامد ابو راضي

فتح عيونه وگال :- بيت حجي حامد المهندسين لو غيرهم

شيهانة :- اي هُم المهندسين

باوعلي بتفكير ورد
:- انتِ شتصيرين منهم؟

:- بتهم جنت بالكويت و رجعت للعراق البارحة ، تيهت دربي معالم المنطقة متغيره كلش هواي

ضل يباوعلي بحيره نظرته قلقتني زم شفايفه بأسى ورد ..
:- بس خوية يعني مادري شلون اجاوبچ ، البقية بحياتج والله يصبرج على مصيبتچ ..
الجماعة صارلهم سنة ونص من ماتو كلهم من اكبر شخص بيهم لأصغر طفل ما طلع منهم واحد عدل
................للحكاية بقية 🖤

#ملاحظة التنزيل بين يوم ويوم بس انا اريد امشي البدايه الكم حتى متحسون بملل لهذا السبب راح اكثف النشر بأول 15 بارت واخلي يومي او تنزيل 3 ايام ويوم ترك 🖤
بعدها نرجع ع التنزيل بين يوم ويوم واكيد مو قاعدة ثابتة بوقت فراغي انشر يومية ومن تصير عندي ازمة وقت انشر بين يوم ويوم