رواية حمائم تخشى الطيران الفصل الثالث والعشرون 23 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

🚫البارت طويل ومتعب وصلو 500 تصويت وتعليق لطفًا

ماضينا راح يضل يلاحقنا يمرمر علينا حاضرنه ويسمه ويدمر المستقبل
ماكو شي اسمه ماضي وينتهي ..الماضي ما ينتهي يضل لعنه مرافقتنا طول حياتنا

وگف الرمي وصوت العياط گاب دنيا وسكينه فتحن الشباك حتى يسمعن وشالن البردة شوية يشوفن اني رجليني بادن من الخوف ضليت بمكاني گاعدة لميت رجليني الصدري ارجف واباوعلهن خايفة بأذني وشة ما اكدر حتى اسمع اصواتهم

دنيا التفتت مصدومة وعيونها صارت علي گالت بصوت خافت مرعوبة
دنيا ...ليلى هذا جاي عليچ! يصيح مرتي ليلى طلعوها شنو انتي متزوجة قبل

هزيت راسي ب لا ارجف باوعتلي عمتي بنظرة قهر وعتب كتلها بصوت يرجف
...كنت مخطوبة مو عقد بس قرايه فاتحة وبعدين خربنا السالفة قديمة

ما اعرف ليش كذبت ما ردت يعرفون هذا يجي ويدخل ع بيتنا ويحبني تالي اصير مكروهة وام علاقات بعيون اهل قيس

العلوية ...دنية سمعي بالله شنو يصيح شنو يحجون

دنيا ...ما ادري بس اكو ضابط ثاني وشرطة يمكن لاحگينا شو هذا الرجال كأنه مو صاحي
خبل يمكن مو بعقله

ليلى ...الله ينتقم منك صهيب الله ينتقم منك
ضليت اضرب على وجهي منهارة وجسمي كله يرجف انفضحت وفضيحة راح تجر فضيحة وبس الله الساتر اليوم قيس يحط ورقة طلاگي بحلگي ويرجعني الخالتي

العلوية لزمت ايديني وكالت ...لا تضربين روحچ مو زين عليچ كل مشكلة والها حل

كانت تحجي ما مقتنعة وتريدني اني اقتنع ، البنات خايفات ويفترن يكولن
لا محلولة ماكو شي ان شاءالله

گب صوت الصياح مال الزلم اسمعهم يصيحون قيس

كمت على حيلي اركض لشباك الصالة شلت البردة اشوف قيس يهد ع صهيب وصهيب يطوطح سكران وشايل سلاحه على العالم واكو ضابط ثاني يجر بي ويمنعه

قيس معصب ويريد يضربه يهد ويلزمونه اولاد عمامه

عرضو السادة الكبار بعمايمهم وهيبتهم حجو ويا الضابط الثاني وخلو يجر صهيب بكل قوة وياخذه يصعدة بالسيارة ويطلعون

التفت سيد رحمن ضرب ايد بايد متحسف وهز رأسه بأسى عرفت هاي هي اخذ عني نظرة بعد

اشوف اخوته يحجون ويا وهو عصب ضل يصيح على قيس فتحت الشباك شوية اسمعه يصيح علي يگله
...طوووول عمرنا ما يجي البابنا بس الخير تالي من وراك ضلت عتبتنا للضباط والسكارى

قيس معصب يفور عيونه صايرات بگصته عمه نتر
نزل عيينك

بس قيس بدل ما ينزل عينه دافعلي ...مرتي شريفة ماعدها شي ويا هذا الضابط واثق منها واعرف كلشي بيها وهذا الضابط هيه رافضته وما قبلت تزوجه لهذا السبب مقهوووور لان خذتني وما خذته

رد علي عمه ...لا تعلي صوووتك مؤمن اخذه دخله للبيت خله يهدأ هسه

اخذه طلعه من البيت ويمكن اخذه البيتهم بصف بيت عيالي شفتهم دخلو للاستقبال ابو قيس معصب كلش ولا قابل كعدت بالكاع خليت ايديني ع راسي ابجي انفضحت ياربي

اجت العلوية گالت كومي ولج گومي وذبت عليه عباية
كلت راح تاخذني لاهلي بس هيه كالتلي
...سيد رحمن واخوانه يردون يسمعون منج حتى لو غلطانة لا تحجين كولي قارين الفاتحة وما تمت لا تزيدين شي عليها

خلت العباية على راسي نزعت ربطتها غطت وجهي بيها مصطفى واكف يم باب المطبخ منتظرتي مشيت ارجف احس رجل تطخ برجل وحدي وخايفة لو قيس يمي استقوي بي على الاقل عمتي
بس ماكو مشيت للاستقبال ويا بالباب كال مصطفى اذا تردين احجي بمكانج امي حجتلي

رديت بصوت يرجف من البجي ...لا خليهم يسمعون مني

واني ادري راح اجذب عليهم بس ماكو غير حجة مرات ننجبر نجذب حتى نبيض وجوهنا وننقذ مستقبلنا

دخلت منصية وكلت بصوت يرجف السلام عليكم
ردو وكلهم منصين مصطفى وكف كبالي مثل الدرع عيوني غركت وضليت ابجي بزيادة

كال سيد رحمن بصوت صارم ...سؤال واحد واريدله اجابة وحدة هذا الزلمة منين يعرفج؟

جريت نفس وحجيت ...قبل طلبني وقرو الفاتحة وبعدين خربت لان ما اريده اني ، بس هاي السالفة هو ضل يطلبني متمسك واني رافضته

عم قيس گال لأبو ...شنو نحمل لبنية ذنب واحد مثل هذا شلها علاقة بي

طلعني مصطفى ابجي وارجف منهارة كعدت بالصالة ملتمات علي يصبرن بيه دخل قيس يرعد صاح لحگيني وركض

ركضت ورا خايفة دخلت للغرفه سديت الباب وايديني ترعش لزمني من زندي وجرني حيل
نتر ...منين هذا منين مو كلتي بس خال دلال وراد يساعدني
ليلى ...والقران خال دلال والقران وهو خاطبني ورافضته والله والله اقسملك بالله ورسوله

عافني ضل يفتر لازم رأسه واني ابجي كتله بهدوء ...رفضته علمودك والله حابتك وميته بيك ما كدرت عيني تشوف غيرك هاي عيني ما تريد غير شوفتك رفضته اكثر من مرة بس هو متمسك شسوي شنو ذنبي؟ ما كتله حبني

خزرني نصيت امسح دموعي واحجي ...والله ردت اقبل بي بس حبنا وگف بعيني كلت ما رايده ادمر علاقتي بيك واروح يمه وگلبي يمك ما احب العب على الحبلين جان مستعد يسوي كلشي علمودي حتى كال اخطبج من عمامج ورفضته

قيس ...سكتي

عافني وطلع ضايج نزلت مخنوگة ودمعتي بطرف عيني دنيا صاحت ليلى تعاي داده

مشيت للمطبخ مختنگة اشرتلي وكفت باوعت من الشباك قيس گاعد مختنگ بالگاع مخلي ايده على وجهه وسيد مؤمن يمه يحجي ويا ويمسح على متنه

ليلى ...فتحي الشباك شوية اريد اسمع حچيهم
دنيا ...بس تعاي منا
وخرت غاد فتحته و ضليت انصت الهم مؤمن يگله عادي الحياة بيها هواي مشاكل البشر معرض لمواقف اصعب لا تشيل هم لنظرة الناس الك بعد هذا الموقف المهم انتَ عاررف زوجتك زين

قيس رد بصوت مخنوگ ...مؤمن شفت نظرة ابوي الي؟ يگلي مو گتلك هاي البت ما ترتاح وياها وتوكعنا بمشاكل

مؤمن ...اسألك بالله انتَ واثق بيها؟ تدري بيها ماعدها شي ويا
قيس ...واثق هي ماريدته وحبتني وخذتني رغم تدري اهلي ما يردونها ، القاهرني الحجي ونظرة اهلي والجيران من بعد هذا الموقف

مؤمن ...الحمدلله الباقي مو مهم نظرة الناس تمثل اخلاقهم وتربيتهم الماشي بطريق اعوج يشوف مرتك عوجة والماشي بطريق عدل يكول هاي البنية مالها ذنب وزينة

قيس هز راسه مؤمن هواي حجة ويا ضليت مختنگة حييييل كلش البيت كله داخل انذار العيون تترقب والشفاه تدعي

دك التلفون جاوب مصطفى گال وهو منصي هاي خالة ليلى تريدها

ركضت اخذت السماعة حجيت وياها گالت خايفة ولج يوم هذا صهيب بس لا يجيج يسويلج طركاعة عرف بيج متزوجة وعرف رجلج

ليلى ...صارت مشكلة اريد افهم هذا ما اله رداد بنية ما تريدك رافضتك بعد المن لازگ شنو عزلت النسوان يتباهى برتبتة ومكانته وجاي مستقوي بيهن يهد ويرمي على بيت عيالي

نسيمة ... يا عزة وطين ، رجلج وعيالج شحجو

ليلى ...شيحجون همه مصدومين واني اكثر منهم كلبي راح يوكف من القهر
شرحيلي بله اريد اعرف هذا شلون سوا هيج

نسيمة ...ما تنشرح ع التلفون ما تجين يمي ترتاحين شوية وهم نشوفج ولا شفناج بعد من تزوجتي واحجيلج

كتلها بضجر ...لا ما اكدر اجي خالة
قيس حجة من وراي فززني ...لا ترحين صعدي بدلي وجيبي ملابسج والسويج اوديج لخالتج

باوعتله وجهه محتقن گلت هاي هيه طلگني رجعت احجي ويا خالتي كتلها بصوت مخنوگ وكاتلتني الغصة
...جايتچ خالة

طب سيد رحمن معصب يحجي على قيس
...وين ماخذها انته تلعب بالبنية تريد تكسر ركبتها حرام
من كلنالك اخطب من بناتنا علمود تعرف كلشي بيهن ما رضيت فضلت الغريبة الردتها غصبا ما عليك تتحمل كلشي يجي من وراها وتحل كل مشاكلها المن ماخذها لعد رغبة وشهوة وانتهت وبعد ما تهمك؟

قيس رد بصوت يرجف من الغضب ...لا بس ترتاح كم يوم وتشوف خالتها وارجعها ما مرجعها الهم

نتر ابو ...خوش تجيبها باجر لان الجمعة عمامها يمنه معزومين

هز راسه وصعد لحكته ابجي اخذتلي لبسه وحدة لان باجر ارجع ولبست جواريبي والعباية فوك الدشداشة اخذ الجنطة ونزل قبلي لفيت روحي زين بالعباية ونزلت لكيت عمتي واكفة يم الدرس بستها وكتلها الله وياج عمة

لحكته صعدت بالسيارة واخذني شكد كان الطريق طويل ولا حجة بس مقهور ويرجف من وصلني كال اني رايح للمركز اشوف شسوو لهذا الضابط السكران

ليلى بخنگة ...راح تطلگني؟

قيس ...مو نلعب بيت بيوت واطلگچ نزلي يابة نزلي شوفي خالتج وارتاحي باجر العصر اجي اخذچ

ليلى ...الله وياك

اخذت جنطتي ونزلت امسح دموعي بردن العباية بوجهي ما باوع ضل واكف لحد ما دخلت للبيت ذبيت جنطتي ابجي وحضنت حور واشكيلها من سواية صهيب بيه وهي تبجي وراها خالتي نفس الشي بس ما بجت جانت مقهورة وعيونها حمر

نسيمة ...شنو جابج زعلانة لو مسيرة؟

ليلى ...لا مسيرة ارجع باجر لان عكب باجر عازمين عمامي يردون يتعارفون عزيمة مال نسابة

شهكت نسومة ولطمت صدرها ...شمعرفهم بعمامج؟
ليلى ...راحولهم بعد غصبا ماعليهم يجون الجمعة ونتعرف ويتكفلون بيه ويصير مرجعي الهم غصبا ما على خشومهم هسة لو عندي ظهر جان صهيب ما تجرأ يسوي هيج شي

نسيمة ...يوووو خل يجون شلي علاقة بس شوية عمامج شرانيين خاف النوب يصير موقف بينهم وبين السادة

ليلى ...شنو يريد يصير خل يصير بعد ولا اهتم

شمرت العباية اريد اصعد لزمني ورجعني يصبرن بيه ومن عرفن عمي شنو كال لقيس واني شنو كتلهم تطمنن كالن هاي هيه لعد محلولة هذول يخافون الله ما يطلگونچ بذنب غيرچ

مسحت وجهي ونزعت الربطه كتلهن وين ريحانة لعد ما شفتها كلبي طاك عليها

نسيمة ... يووو المسكينة اجتها الدورة وامس خذيناها للدكتورة كالت عادي طبيعي وهسة موجوعة اخذت علاج ونامت

حور ...سودة علي يمة

ليلى بأستغراب ...عشر سنين منين تجيها الدورة
نسيمة ...الدكتورة كالت عادي تصير وكالت يجوز هسة تضل كم شهر يلا ترجع تجيها والله خطيه صغيرة لاحگة على الضيم مال الدورة

تأفأفت وگتلهن ...عبالك مو كم يوم سنة سنة عشتها يمهم والله سنة شكد صار 4 ايام تعذبت بيهن شكد زينين بس غربة وقوانين واريد اكسبهم تالي اجة صهيب جفص بالسالفة

نسيمة ...عزة بعينك صهيب غير هو يسأل عليج واني يومية حجة اخير شي اجالي كال اذا ما تحجن افجر روسجن بالطلق ريحانة خافت كلتله تزوجت وهوا تخبل علينا بس احنه ولا انطيناه مكانج راح سأل استاذ جمال كايله رجل ليلى معذبها وشارد نريد نوصله وذاك خطية حاط كلشي بذان صهيب وهل وصلچ

ليلى ...هو خذو جماعتهم الشرطة صعدو ودفعو يمكن يتحاسب
نسيمة ...بالبدلة لو هيج
ليلى ...بالبدلة
نسيمة ...اكص ذراعي اذا ما راح بيها يستاهل ولو عزيز بس مو خوش سالفة لزگلج

ليلى ...لا هلا النوب يتطوطح سكران
حور ...عززززة يبووووو فضيحة
غطت وجهة بالشال
ليلى ...تزيد ضيمي هاي وتقهر ببه
حور ...عجل مجذبة صدك فضيحة يبووو يبووو مساع كلتيلي سكران بس هسة استوعبت السالفة وتخيلت المنظر يمة

ضليت اكل بروحي اكل انتهيت نسومة كعدت تلف دولة للعشاء وريحانة كعدت سلمت علي وكعدت بصفي تسألني عمو قيس يحبج هم يداريج لو مضوجج

ضحكت وكرصت خدها ...اروح فدوة لليهتم لأمري مليون فدوة مو فدوة وحدة

ريحانة ...افكر بيج دوم
بست خدها وحضنتها احب ريحانة احب رقتها وهدوئها مثل النسمة مرت على روحي وبردتني

ورا العشا دك التلفون ردت نسومة وگالت ...تعاي ليلى هاي دلال صديقتج بسرعة تعاي

ركضت اخذت السماعة كلت الووو ردت وهي تبجي بصوت خافت
دلال ...هلا ليلى اتصل على تلفونكم ماحصلتچ
ليلى ...هلا دلول اني يم خالتي خير ان شاءالله؟
دلال ...اكدر اجي يمكم شوية
ليلى ...هلا بيج داده اذا ما يشيلج البيت تشيلج عيونه
دلال ...مشكورة داده مسافة الطريق واصير يمكم

نهيت الاتصال نسومة كالت ...النوب هاي بنت اخته لصهيب الله يستر
ليلى ...تبجي
حور ...لو كايلتلها ما اكدر استقبلج راجعة لعيالي
ليلى ...لا بعد عيب كالت اريد اجي يمكن صايرة وياها مشكلة واني هم اريد احجي وياها حجي ما ينگال على التلفون

رتبت الغرفة المسوينها استقبال وخالتي جهزت الضيافة على ما وصلت استقبلتها حضنتني عيونها حمر ودخلتها للغرفة

خالتي ترخصت بحجة المطبخ كتلها بحدة ...لا تلفين ولا تدورين من الاخير كولي منو وياج؟

دلال ...الموضوع يختلف هاي المرة مو عركة ويا اهلي ولا شغلة معارضة مقهورة علي خالو ليلى مصيبة نزلت على روسنا واهلي كلهم طلعو ضليت وحدي من كثر الخوف صرت اتخيل اشياء موحلوة

عقدت حاجبي وكتلها بتساؤول... خالج صهيب لو غيره؟ شبي اسم الله مصيبة شنو

مسحت دموعها وكالت بصوت مبحوح من البجي
دلال ...خالو مو رائد اليوم مسوي شغلة ما لازم تصير شارب وهوا بالبدلة العسكرية وطالع بيها متهجم على ناس مدنيين وضارب واحد بوكسي على صدره اعتقلو فورًا لان جريمته تعتبر كبير
اساء للدولة وتهجم على مدنيين واهان الدولة لانه سكران

سويت روحي مصدومة وشهكت ...عزززة وهسة شلون

بجت وغطت وجهة ...اعتقلوو وبعدين ... شهكت ومسحت وجهة
...اعتقلوه وعرف عقوبته عرف راح يسوون بي محكمة سريعة وتنسحب رتبته منه بطريقه مهينه وكل شي وياها يحرمو من كل شي سكن وسيارته الحكومية والتقاعد ويمكن ينسجن سنوات طويله لانه رائد مسؤول عن الانضباط وسوا هيج فعل وفوكاها ضارب مدني بعد هاي جريمة اكبر بعين الدولة

ليلى ...عزة شموازي؟
دلال ...وين ادري ما توقعته يشرب والله گايللهم اريد اسبح سكران نجس رايح يسبح وبعد ما طالع حسبالهم شارد من كاسرين الباب ... شهگت ترجف
انطيتها ماي تشرب شربت وجرت نفس

دلال ...لاگينه شانق روحه بالحمام وميت وقبل ليفوت للحمام گايل لزميله

:- خسرت رتبتي واحترامي وكرامتي ضلت بس روحي عساها تطلع اليوم وتنختم صفحة الرائد صهيب

ليلى ...لا حول ولا قوة الا بالله مات خالج لا اله الا الله الله يرحمه ويغفرله

دلال ...امي انصدمت وراحت كلهم راحو ضليت وحدي كل ما اباوع للحايط اشوفه شانق روحه گبالي وركبته زركة ووجهه مابي روح كلت اذا اضل بالبيت اكثر اتخبل

ليلى ...زين اجيتي الله ينطيكم الصبر ويرحم خالج ويغفرله
رفعت كلاص الماي ايدي ترجف ما كدرت اوصله لحلگي واشرب نزلته انمردت روحي

كتلها ...زين منين جاب حبل خاف احد قاتله
دلال ...يكولون اكو كيبل بالحايط طويل جاره ومنتحر بي شلون مسويها والله ما ادري بس اليريد يموت يلگى الف طريقة وطريقة ما يوگف بعينه حبل

شنو تسوالك يا خالو متت مهان ليش هيج سويت بنفسك

دخلت خالتي شايلة الضيافة وتحجي خالة خوفتينا شصاير وياج تحتاجين مساعدة اني نسومة برسم الخدمة المضوجج اشگه شگ والله

دلال ...لا خالة بس خالي مات ومقهورة وخايفة

نسيمة ...انا لله وانا اليه راجعون

باوعتلي شافتني ارجف سألت دلال ...حبيبتي اهلج يدرون بيج هنا
دلال ...كتبت الهم رساله يم التلفون ورقمكم من يجون يتصلون هاي اذا اجو اليوم

كانت منهارة صعدتها فوك لغرفتي تمددت تبجي وكل شوية تكول ...خالو حبيبي
شكد كنت اعاركه اكلله كانك ذيب ومرات اضوج منه بس هسة روحي متكطعة علي
حبيبي خالو اخذت حيلي ورحت

حسيت غصة بصدري مسحت دموعي وكتلها نامي شوية ارتاحي راح تموتين
نامت غفت دك التلفون نسومة ضلت تحجي واسمعها تكول الوقت تاخر هسة نص ليل خليها تنام والصبح اجيبها واجي بس اريد عنوان الفاتحة

نزلت شفت نسومة عيونها حمر وحور مختنگة وبس دموعها تصب
لطمت رجلها بقهر وكالت بحسرة
حور ...صهيب خوية ابو وگفة الحلوة عمت عيني عليك

نسيمة ...نامت البنية؟ هزيت راسي وكعدت على الدرج ارجف منهارة
نسيمة ...شلون مات مو الظهر هاد عليكم ومسوي كارثة
ليلى ...منتحر تكول دلال لان يدري راح يسوون محاكمة عسكرية سريعة ويجردونه من كل شي وينزل راسه كام انتحر قبل لا يصير هذا الشي

دارت وجهة ودخلت للغرفة سدت الباب مقهورة حيل صهيب جان صديقها وصاحب وكفات ضليت اشهگ
گلت لحور بقهر ...والله ما ردت هيج يصير مو بسببي والله هو طلع سكران بالبدلة العسكرية وتهجم ع عيالي هو جابها الروحه وانتحر لان راح تنسحب رتبته مو بسببي والله

مسحت دموعها بطرف ثوبها وكالت ...بعد السبب ما يهم هو راح الله يرحمه ويغفرله عمري ما انسى وگفته ويانه بعمري لا اله الا الله يا خوية يا صهيب سويتلي الماسووه اخواني من امي وابوي الله يغفرلك ويرحمك

ليلى ...كله مني كله مني .. ضليت اضرب بروحي منهارة نسومة طلعت تركض لزمتني وحور جرتني وياها لغرفة نسومة نومني يسمن علي
هزيت راسي بقهر مخنوگة
...كله مني اني دمار وأذية راح بسببي وكلشي جاي يصير بسببي حسبالك بيه لعنه محد يرتاح من وراي

هاي هيه اني بعد كلشي ما اريد حتى قيس ما اريده اذا اضل ويا ينتحر مثل صهيب ينتحر ويروح من اهله

ضليت اون وابجي وكلت بعد ما اريد شي ما اريد بس اريد اضل معزولة عن العالم

غفيت ورا تعب بس نومة الضيم اون وكل شوية افز جسمي كله يرجف احس گلبي يخفق حيل وبي وجع

كعدت الصبح راسي ثگيل اريد اشيله ما اگدر ضليت اعصر بي شوية وكمت كوة امشي غسلت بالمطبخ وطلعت اصيح حور خالة
طلعت حور من الغرفة عيونها حمر مورمات
ليلى ...وين خالتي
حور ...خذت دلال وراحن للفاتحة

كعدت ع القنفة ولميت رجليني الصدري دخلت للمطبخ كالت وجهج اصفر راح تموتين كولي يالله شنو بأيدج قابل لو بيدج ما صار هيچ

ليلى ...وجهي فگر حور اول ما دخلت لبيت السادة ابنهم مسوي حادث ومتعور
شهكت ...يااا
ليلى ...والله تخيلي وامس صهيب هد وطلق ومنا ابو قيس ما يحجي ويا قيس ولا يباوع بوجهه وامس عاركه ضل يصيح علي بسببي البيت انخبص عبالك شيطان داخللهم

حور ...بس كون ما يعرفون بصهيب منتحر
ليلى ...يعرفون السادة مو قليليين امس نص ولدهم صعدو بسياراتهم وطلعو يمكن يتبعونه للمركز حتى يشتكون علي خاف جماعته تسترو على السالفة وطبعا ما يتركون السالفة اذا ما يشوفون الضابط الهد عليهم وتعارك وفضحهم شنو سووله وشصار ويا

حور ...اكلج شي القبلتي والزعلتي الغلط غلطج من الاول كلنالج قيس مو ثوبج وحياتج ويا صعبة اخذي صهيب اخذي ما سمعتي تخبلتي منه هسه صهيب انتحر وراح
غصت بالحجاية ومسحت عيونها
وقيس حياته وياج صعبة ويمكن تضرينه شايفة اذا اهله عرفو نسومة وسوالفها يتبرون من قيس عدهم كلشي ولا الشرف

حتى اذا نكرتي وكلتي من كنت يم نسومة ما تسوي هيج هم يشدون وياج ويباوعولج بعين الصغيره

خليت راسي ع الحايط ورديت بخنكة ...لا تزيدين ضيمي سكتي راح اموت

خلت ريوگ اكلت لكمتين بدون نفس واخذت علاج اتصل قيس كال بال4 يمج
للظهر اجت نسومة حور خلت غدة مثل ما خلته شلناه ما كلينا نسومة مقهووورررة على صهيب كلش حتى حجي ما تحجي

لميت غراضي واخذت كم شغلة من غرفتي القديمة ولبست عبايتي ضليت كاعدة انتظر اجة قيس سلم واخذني من الباب حتى ما باوع بوجهي ساكت ما يحجي

بنص الطريق كال ...الضابط انتحر
ليلى ...عرفت من دلال
قيس ...اهلي هم عرفوا بالسالفة ضاجو علي ما تمنو اله هيج موته

ضليت ساكته ما رديت خليت راسي ع الجامة كتله بتعب ...نزلني على مستشفى اريد اشوف ضغطي

ما رد شوية وطبگ گال نزلي ودار من صفحتي لزمني من زندي اخذني شافو ضغطي صاعد كلش
قيس باوع لوجهي وعقد حاجبه من راحت الممرضة كال
شبي وجهج منو ضاربج خالتج ضاربتج؟

هزيت راسي لا وهمست بتعب ...اني لطمت على حظي حد ما كلت بس
قيس ...لا تلطمين بعد لاي سبب كان لو قيس يموت لا تلطمين ع وجهج

هزيت راسي اي
كومني اخذني للسيارة ومشة مسافة وكف نزل شوية واجة جايب لفات وعصير
قيس ...هذني لفات معلاك مشوي اكليهن وجهج اصفر مابي دم

هزيت راسي لا ...مالي نفس تعبانة

ضليت مخليه راسي على الجامة لحد ما وصلنه نزلت قبل لا ينزل حتى عفت وراي كلشي ودخلت من باب الصالة لكيتهم كاعدين وحتى هاشم جاي وكاعد يم اهله كلت السلام عليكم
ردو السلام
بست راس عمتي وكتلها خالتي تسلم عليكم
...الله يسلمج ويسلمها ما عزمتيها باجر تجي ما طول عازمين عمامج
ليلى ... لا والله بعدين اخلي قيس يتصل بيها يعزمها

نزعت عبايتي من راسي وكعدت يمهم عمي باوعلي كال
...انتي عمي شايفتهم عمامج ملتقية بيهم
حجيت بغصة ...لا والله وين يحسرة جبت عمري كله وحيده لا عم اليسأل ولا عندي خال ابوي يشتغل من الصبح لنص الليل يدور لكمه حلال ما اشوفه بس اذا كعدت للصلاة الفجر يصلي ويطلع وامي جانت مريضة طريحة الفراش وتالي هم حرموني من شوفتهم كلش وراحو لدار حقهم

جنت احجي گوة بغصة الحجاية تجرح بلعومي وتطلع وكوة لازمة دمعتي
محد يدري بالعشته وعانيته دائما اذكر الجانب الحلو واضم القهر والمعانات ما احجي بيهن

اذكر ذكرياتي الحلوة ويا ابوي القليلة وذكرياتي ويا امي قبل لا يصير بيها سرطان وتطيح فد نوب اتذكر طلعاتنا الحلوة ومشياتنا واضم كلشي يقهر شفته بعمري

وكملو قهري وضيمي من راحو مني بنفس اليوم وعافوني لا ام ولا اب وحيدة بهاي الدنيا اخذتني نسومة دارتني

كال عمي ...الله يرحمهم ويغفر الهم

ترخصت وصعدت بسرعة ضامة دمعاتي كوة حسيت روحي شكد وحيدة ومقهورة وتعبانة وما الي احد بهاي الدنيا بدلت هدومي واني ابجي على روحي وحالي

رفعت ايديني كتله ربي مالي غيرك تعبت وروحي تعذبت ومع هذا ما اسولف كدام الناس غير بنعمك علي واحمدك واشكرك عوضني عن كل شي خسرته ولو الام والاب ما يتعوضون ابد

دخل قيس نزلت ايديني سد الباب تحمحم وگال ...بعد الصار امس ننساه اليوم نعتبره ماصار وهاي هيه لا تضلين مقهورة وتفكرين

تنهدت وكعدت بالكاع على السجادة مخلينها مكان للكعدة ولميت رجليني لصدري احس بغصة ما اكدر حتى اتنفس ضلوعي توجعني عبالك مكسرات

ضل محتار بعدين كعد يمي وحط العلاكة والعصير على صفحة
كال بعتب ...اني مو كتلج كلشي احجيلي ليلى ولا تضمين شي عني ليش ما تحجين راح اخذ راسج اذا حجيتي

انفجرت بجي اشهك وامسح بوجهي واحجي بقهر
...موضوع ما يسوة ... ش ششحجي اكلك .. ضابط يحبني ... يريد ياخذني ... حتى صعبة

حضني الصدره كال ... لا تناشغين يابه اهدي اهدي

ضليت ابجي وهو يمسح على ظهري لحد ما هديت
كال ...بعد كلشي احجيلي ما اسويلج شي ولا اخذ راسج اني رجلج سترج وغطاج لو اكبر مصيبة صايرة وياج قبل احجيلي

هزيت راسي اي واني ابجي ما يدري اكو اشياء صعب تنحجي واسرار ما نكدر نطلعها
نفضل طلعة الروح من باطن الجسد ولا نطلع هاي الاسرار ونبيحها. كدام احد

الدنيا بوابة للتعب ندخللها من اول ما نوكف ونخطي اول خطوة
نتعب يلا نمشي .. نتعب يلا نركض .. نتعب بلا نوصل للمدرسة .. نتعب يلا نكبر ... ونصير مسؤولين .. ونتزوج ... ونخلف .. ونكبر ... كلشي تعب بتعب الراحة شي ما موجود بهاي الدنيا

طلع اللفات وكال اكلي خليني اكل على واهسج ترة ضال من امس لليوم على لحم بطني ميت قهر وجوع هسة لو ميت اصير ميت ×2
ضحكت مسح دموعي وحط اللفة بيدي اكل واباوعله يضحك ويمسح خدي وترجع تنزل دمعتي مقهورة ومتحسرة صارت لكمتي ودمعتي بالسوا

ثاني يوم اجو عمامي جنت متوقعة الموضوع طويل بس طلع اكصر من ما توقعت اجو بس زلم هم عمامي اربعه جايين تلاثة وهذا عمج طاهر وهذا حاكم وهذا حبيب سلمت عليهم بالايد وياهم شباب ثنين كلولي هذا هادي ابن عمج طاهر الجبير والثاني اسمه حمزة ابن عمي حاكم
وعندي عم اسمه ضاري ما جاي .. عفتهم وطلعت وبعد ما دزو علي تعبت واني احضر واركض والبنات كلهن يركضن وقبل لا يطلعون كالو عمج يريدج

مسحت ايديني من الماي وعمي يريدني بالطارمة اخذت العباية خليتها على راسي لفيت روحي وطلعتله

لكيته عمي واكف اجيت منصية كتله هاي عمو
كال الله بالخير عمي
...الله بالخير والبركة
...شلونج عمي مرتاحة ان شاءالله
...الحمدلله بنعمة

حجي طاهر ...سمعي عمي ما راح اطول بالحجي جيف كثرة الحجي ما تفيد ، البشر الزين يبين بالافعال مو بالكلمات
احنه عمومتج كبل سنتين وصل النه خبر موتكم .. اي موتكم تلاثتكم وسوينالكم فاتحة هناك بالنجف الوصل النه خبركم مادري جذاب مادري صدك مايدري بيج عدلة ومن اجة حماج تفاجئنة يا ليلة عمي كلش تفاجئنة كال ليلة ماخذة اخوي بس ما حجينة سوينا رواحنا ندري بيج عدلة علمود نخلي مجال نبدي بي صفحة جديدة ونكبرج بعين عيالج

احنة هسة عمومتج ومسؤولين عنج هذا رقمنا عدكم تلفون اي شي تعتازينا خابري مسافة الطريق تلكين فوج كامل يمج لا واحد ولا ثنين

وانه حجيت ويا زلمتج كتله بوية ترة البت من حكها تروح الاهلها بعد انته مو تحرمنا منها جيبها علينا كال ان شاءالله
تعاي صوبنا ونجي صوبج حتى تقوة العلاقة وترتاحين من صوبنه ونصيرلج ظهر وسند البت تحتاج السند ولزوم يكونون اهلها مو الغرب لان محد يحمل البت ويشيلها غير اهلها

هزيت راسي وكلت ان شاءالله حجة هواي حجي وصاني وكالي احنة موجودين الدرب صح بعيد بس ما نحتاج طيارة ونجيج من يصير شي احجي ويانه
سلم وراح

كانوا مستسهلين الامور كلت هاي هي دام همه مستسهلينها ليش اصعبها اني

بالي وتفكيري كله يم دلال مقهورة عليها ومن اذكر صهيب تخنكني العبرة ليش هيج سويت بروحك ليش
خسرت روحك ورتبتك واحترامك

ما اكول غير الله يرحمك ويغفرلك طويت صفحتك بنفسك وراح تبقى غصة بگلبي عليك طول العمر لانك كنت صاحب مواقف حلوة ومشرفة وياي و ويا عائلتي ..

دنيا ..بعد يوم مهلك وطويل خلصت شغلي و صعدت قريت جزء من القرآن وفريت السبحة عشر مرات "سبوح قدوس رب الملائكة والروح"
وكمت شلت قراني وسبحتي وذبيت شالي

مشطت شعري وبدلت طفيت الضوا ومشيت للشباك عادة صارت عندي روحي وكلبي يجرني من ايدي ويخلني واگفة گبال شباك غرفته اراقبه ولقرب شباكه من شباكي اشوف كلشي

بيومها ما كان يقرأ شي كاعد ع سريره منصي ، تمدد وغطه عيونه بايده
تنهدت بضيق روحي انضكت تمنيت روحي مثل الطيف تجيك وتكعد يمك تمسح على جروحك وتداريك ياليت ايديني تطولك يا سيد مؤمن ياليت

شهگت مصدومة من جرأة افكاري وامنياتي شفته رفع رأسه بأتجاه الشباك صفن لحظات وگام وگف على حيله طفة الاضوية استغربت حركته ضليت ما اشوفه تنهدت ورحت لفراشي تمددت اريد انام بس روحي تلوب وكلبي يخفق بسرعة

كل ما افكر بي يصير عندي الم غريب بأمعائي واحس روحي مثل الغريب رغم كاعدة بنص اهلي
اصير متضايقه ومخنوگة واريد ابچي ومن ابسط حجاية ادمع

ما جنت افهم شعوري وما اعرف شنو سببه بعدين اكتشفت هذا اسمه الحب من طرف واحد
اصعب شعور ممكن يعيشه الانسان شبهته بخلايا السرطان اول شي ما نحس بي وبعدها يبدي يغزي اجسادنا ويهلك ارواحنا وغير قابل للشفاء ..

اليحب من طرف واحد يعيش بخوف وحزن
يحب انسان ما يدري بي ولا يحس بي
يراقبه من بعيد لبعيد ، ما يدري اكو بكلبه انسان ثاني لو لا
ما يدري بي شنو سوا .. مقهور .. ضايج . مريض .. وما تكدر ايده توصله وتمسح علي وتخفف الامه واحزانه

...

الشيهانة ..

گعدت الصبح متنگة من القهر وكلبي يوجعني مالي نفس بشي كلولي شبييج
كتلها حساسية وهو جذب چوية

ضليت افتر على روحي البيت خالي والبنات طلعن للبصرة دخلت للغرفه بدلت وكلت لعمتي رايحة اشتري ضليت امشي بالشارع مثل الماله احد مكسور ومقهور وروحه تلوب على حضن يلمه

اخذت تكسي وطلعت لدجلة كعدت مقابيل النهر دموعي تجارى على حياتي المتدمره وقهري و وضعي مادري الاعيشه صدك لو اوهام ضليت اسوي سوالف انساهن واتخيل مواقف حسبالي صدك

كمت اخاف حتى من روحي ومن افكاري

مشيت خففت عن كلبي ورجعت للبيت لكيت عمتي كاضة الباب كالت وينج وكف كلبي عبالي صار بيج شي

...مابيه شي عمة بس اريد اموت اريد الله ياخذ عمري

دخلت للبيت ابجي وهي تمشي وراي
...شنو تعاركتي ويا جبران

...لا عمة لا اني اريد اموت تعبت من الدنيا كلبي يوجعني ما اتحمل اكثر من هيج قهر وضيم
لو ارجع للكويت ادور مشاري عسى ما يحركني قابلة بس اشوف شعلان ابني

علياء بحدة ...انتي تلعبين ترجعين لمشاري هوا هم بشر حتى ساحرج احنه نريد ناخذج لسادة ردنا للناصرية وهسة راح ندورلج هنا الناصرية بعيدة

نترت بغضب وحزن ...ترى اني مو مخبله

باوعتلي بقهر وهزت راسها ...حشاج عقلج يوزن بلد بس هسه انتي مريضة اكو سحر ماثر بيج لازم تتعالجين منه وتردين طبيعية علمود تحاربين الدنيا وتجيبين جهالج شنو تردين تضلين بهاي حالتج

بجيت وضليت ادمغ براسي مقهورة اريد اكتل مشاري وجبران هذول الاثنين اني كتالتهم ما بيها مجال

الحرگ اهلي وحرمني منهم ولعذبني وحرمني من ظناي ثنينهم ما ارتاح الا ادمرهم واشوف دمهم تارس ايدي ..

للعصر اجة عماد اخذني لواحد يعرف بالعقارات ومناك طلعنه لاطراف بغداد مزرعه جبيرة وبنصها بيت حلو ومرتب وبيها كراج كلش حبيت المزرعه تفتح النفس وجبيرة كال عماد عجبتج
...هيه عجبتني بس سعرها ما ادري

عماد ...اذا على السعر سهله

رجعنا كال عماد خليها يمي اطلعها الج بسعر زين واخذيها خوش مزرعه حتى نروحلها نغير جو خو ما تاخذينا وتحطين مفتاحها على كلبج

...هسة خل اشتريها وسهله

جنت افتر على روحي اريد بس طريقة ارضي بيها شعوري الداخلي الغريب وابرد نار ما اعرف سببهه

نار غريبة خلتني بالليل نايمة واحس جواي نار واحس بشعورها ردت بس اطفه اخذت ملابسي وطبيت للحمام جاي اسبح خليت شامبو على راسي وبس غسلته وفتحت شفت اشكال تخوف زلم يخوفون اشكالهم تشبه البشر بس يخوفون ولازمين حيوان غريب شكله مقرف يصلخون بجلده جمدت وانسلب حيلي تعوذت ورمشت خايفة رجعت ليورة ويا رمشت عيني الزلم كضو ايديني وباظافرهم ضلو يصلخون بجلدي صرخت من نص گلبي صرخة بشر خايف

ضليت اتوة واصرخ ميته خوف ونارهم چوتني احس بوجع اغمض وافتح اشوفهم بشكل مو واضح ودمي ترس ايديهم

فرفحت روحي من الخوف عقلي وكف وراسي شاب والله يمكن من احجيها لمجنون ما يصدك العشته وما يصدك اني هيج شفت وهيج حسيت

يصلخون بجلدي باظافرهم وجوهم صارت مثل الشياطين واني بس اصرخ لا حول ولا قوة لحد ما داهت روحي وطحت

بعد ما حسيت غير عمتي تدك على خدي ومغطيتني بجرجف بالحمام كعدت عاونتني هي ونزهة لبسني هدومي واني يرفعون ايدي وتطيح بس عيوني تباوعلهم واحرك جسمي حركة خفيفة

علياء ...تعالو لبسناها هدومها

دخل عمي وجبران شالني اخذني للغرفة حالي حال الميته يبجون عليه واسمعهم يكولون لعماد
... تخبلت البنية من عين باجر نطلع للناصرية ما نضل هنا على ما نلگى سيد زين خاف يصير بيها شي

نزهة ...الليلة ابات يمها
علياء ...ارتاحي اني اضل يمها هم اقرا قرآن يم راسها

جبران ...لا تقرين شي خاف تزيد حالتها وحدة منجن تضل وانه هم اضل هنا كبالجن بالصالة اذا فقدت ما تكدرن الها
حجاها وتنهد بضيق

نزهة ...ام عادل باجر تحتاجچ تطلعين وياها للناصرية خليني يمها خاف تفز. اكعد وياها اناطرها

علياء ...خوش لعد

حميد ...يلا جا التنام يمها تمد فراشها بس هاي الليلة باجر نروح وبلكي يصيرلها حل

ضليت اون واباوع عليهم غمضت عيني ساعة احس بروحي وساعة افتح ما ادري اني منو اباوع للاشياء بالغرفه ما اعرفهن شنو مثل الفاقد ذاكرته

غفيت شوية حسيت ايد ع شفايفي فتحت لگيته جبران كاعد يدهن الچوية مركز ويا المكان ويخليله عصارة دمعت شفايفي رجفن بقهر باوعلي وعيونه غورگن رفع طرف تيشيرته مسح عيونه وگال متحسر

جبران ...عسى گلبي يحترك مثل ما حرگتچ

همست بغصة ...جبران اني ما ادري شبيه لا تروح عني ضل يمي اخاف
حط ايده ع حلكي همس ...اش نزهة نايمة .. لا تخافين يمج ما اعوفج او يوذروني نامي راح اكعد بالباب خاف تحتاجيني بس كولي جبران تلكيني يمج

هزيت راسي لا ...نزهة منا نايمة دور بالصفحة الثانية مال الجرباية نام بالكاع حتى ما تشوف نزهة

هز راسه ودار جر المخده حطها ع الميز وارتجى عليها صار بالصفحة الثانية مالت الغرفة وبعد ما يشوف نزهة

شلت مخدتي خليتها بالصفحة الصار بيها وتدنيت نمت بالحافة كلش باوعلي وهو مرتجي على الميز واني نايمة بحافة الجرباية صار وجهي يم وجهة همس
جبران ...يلا نامي وانه اضل كاعد خاف تفزين مرعوبة تلگيني يمچ

غمضت عيني بدون وغفيت شوية وفزيت لگيته بعده گاعد مرتجي وداير راسه علي يباوعلي كال بفزة
بيج شي؟

هزيت راسي لا وهمست نام ارتاح مابيه شي الله عليك لخاطري نام
هز راسه وغمض بسرعة شخر ضحكت علي خطية تعبان وحتى ما تمدد نام وهو گاعد اخاف ابتعد عنه واشوف شي صرت اشوفه ملاك رحيم وحارس الي

مادري شمالني تجي لحظات اشوفه شيطان واكول هو حارك اهلي ويكون ادمره

درت وجهي للصفحة الثانية ورجعت باوعت باتجاه جبران واشوف الزلم اليخوفون ثنينهم كاعدين كبال جبران واحد حاط وجهة بوجه جبران والثاني مخلي وجهة بوجهي شهگت شهگة مال واحد روحه راح تطلع وصرخت

غمضت اخاف افتح وضليت ارفس بمكاني متخبلة جبران يلزمني ادفع بي عبالي واحد من الزلم اليخوفون ضليت حتى لطم الطم وصريخي وصل لسابع جار بحيث من حسيت على روحي لكيت حتى عادل وهبة جايين يركضون بهدوم البيت

عمي عيونه حمر وجبران يرعش ولازمني
گال جبران ...يمه بدلي حضري روحج وتعاي حضريها هسة نطلع للناصرية بس نصلي الفجر بوجهنا گبل

ذبيت روحي تعبانة اباوعلهم بدون روح من واحد لواحد مقهورين
اجة عادل يمي گال بحنية ...شنو تهيسين؟ شنو يوجعج

بصوت مبحوح رديت قصيتله شنو شفت ضل يهز رأسه متحسف وگال عمي اخذوها بسرعة وشكد تحتاج روحات ناخذها حتى لو نتناوب كل واحد ياخذها مرة بس كون ترجع زينه

صدك جهزو كلشي وصلو اني حتى صلاة ما صليت ورا الاذان بشوية كوموني وصعدوني بالسيارة كوة عمي كال اني اسوق وجبران كعد يمي كال خاف تفز اسيطر عليها

غمضت عيني وغفيت كل ما افز الگى السيارة تمشي صار الصبح كل ما اغمض وافتح اشوف شارع

جبران كاعد يمي مكتف وعينه علي يباوعلي متحسر ..

باوعت وصلنا لذي قار ومشت بينه السيارة فترة وعمي ضل يسأل هواي يلا وصلنا للسادة عمتي لبستني حجاب ونزلني جبران لازمني بقوة لان ماعندي حيل من هول الشفته رجليني ما يعينني وعيوني مفتوحة بشكل غريب من انصدمت وفتحتهن حيل تشنجت وضلن مبحلگات اسدهم كوة وافتحهن كوة

دخلوني كانوا كم نفر موجودين عمي سأل الرجال گله انته جايلهم قبل زينين؟ خصوصا للمسحور نريد نعالج البنيه

گاله ... همة تلاثة انه جاي لسيد محمد هذا عنده معجانة حتى السحر يطلعه منها كفيلك العباس حجي طلعلي ملابسي منها عليهن طلاسم وهنه ضايعات صارلهن سنتين وانتَ قيس بس كون السحر مو قديم كلش لان يصير صعب مرة كلالي ينفقد اثره وما نكدر نطلعه

حميد ...ماادري بس اظنه جديد اقل من سنه

...لا زين يطلع ان شاءالله

دخلنا للسيد عمي يحجي ويا ويباوعلي انطاه معلوماتي وكل ما يحجي ويا اختنگ ضل يقرا وما اعرف شنو يسوي خفت غطيت وجهي گلب المعجانه مالته وطلع منها بلاوي عمري ما توقعت اكو هيج شي لو ما شفته بعيني اكول جذب

طلع منها مثل الدود ملتف شي ع شي رفعه وگال لعمي
...شايف هذني حجي حياية توة فاگسات لافين وحدة على وحده هذا سحر زنا تصدك لو ما تصدك مسوالها عمل زنا

عمتي خايفة بس تبجي واني ارعش باوعت لجبران زم شفايفه ويمكن يتذكر من جنت اصعدله بالليل

وطلع سحر ثاني بي صورتي قديمه وعليها طلاسم مخلين راسي وراسمين جسم مصلخ مقيد وما اعرف شنو بي وملابس داخليه مال الدورة مالتي
ضليت ارعش واعيط ...طلعوووني طلعوني منا جبران طلعني العباس عليك

تخبلت وانهدمت كل حصوني اتهسترت كلش ، لزمني قيدني وعمتي جلبت بايدي حيل

والسيد يطلع اشكال السحوره طلع واحد ملفوف بي شعر مني ضليت اشهگ واگللهم
... طلعوووني راح اتخبل انهد حيلييي جبررران طلعني

حميد ...سيد فكهن هذني وعالجها وشتريد انطيك
سيد محمد ...ما اطلب هواي انه شغلي لسد حاجتي وحاجة عائلتي وبس

حميد ...لا والله شيخ عندي بالبصرة ارض جبيرة اذا عالجت هاي البنية ورجعلها عقلها هاي الگاع هدية مني الك

سيد محمد ...رحم الله والديك

السيد گال يرادلها جلسات وسوالي جلسة طلعت روحي بيها ضليت مخبلة واصيح ولساني ينطق حجي بس مو مالي مال واحد ثاني يخليني احچي

من كمل جلسته طلعوني لبغداد ، حسيت هاي الدنيا كلها ضايكه بعيني اسبوع واني اتعذب كل يوم نفس المشاهد تعذبو وياي واني اتعذبت

اسبوع واحد وكمت شفت روحي بالمراية صرت انسانه ثانية وجهي اسمر وضعفان كلش وعيوني طايحات بحفرة لزمت كذلتي بأيدي متروسة شيب حتى راسي شاب من الشافته عيني

وجسمي كله اثار صار مشوه بس السيد كللهم عادي اليطلع بجسمها عالجو عند طبيب واني اعالجها من السحر

عشت اصعب لحظات بحياتي مر شهر ورحت جلسة ثانية اصعب من القبلها بديت ارتاح شوية بس احس بروحي وراها ضليت افكر بأشياء ثانية شلون صار عندي خبث وحقاره وخصوصا اتجاه جبران

يسهر يمي متعذب واني من اباوعله تجيلي افكار واكون مقتنعه بيها
اريد اجيب سجين واذبحه
وعيني صارت تلتهم ركبته وتريد تحز نحره

وخبثي اتجاهة يزيد صرت متماسكة اكثر وامشي واحجي وما اصرخ بس بعدني اسوي اشياء غريبة ومرات أأذي روحي

لحد ما مره طلعت من البيت ويا نزهة كلت كافي اختنگت هناك بالمحل سمعت ثنين يحجون عن واحد معارض للنظام عادمينه

ضليت افكر بالموضوع وادور لحد ما عرفت ان اذا لكو عند شخص معلومات وكتابات ضد النظام يروح بالرجلين

لحد هسة ما اتذكر شلون دورت وشلون لكيت الكتابات وشلون وصلن الايدي ما استوعبت الا من صعدت لغرفة جبران وخليتهن جوة المندر كلت لروحي هذني شلون جبتهن شوكت طلعت ومشيت وشكد صارلي ادور؟

نسيتي كلشي عبالك واحد غيري يمشي ويتحرك بمكاني ..

ضليت اكول خطية جبران ليش اسوي هيج بي؟ شسوالي هوا
اصفن اريد اعرف ليش اني حاقده علي ولا اتذكر

باوعتله من دخل ضليت مقهورة وضميري يأنبني ردت اصعد اگله عقلي راح وسويت هيج واخلي يحركهن بس رجليني ماتن ونربط لساني

بدل ونزل كعد يمي كال بحنية ...شلون صرتي

هزيت راسي بدون جواب ..

كام يتغدة صب جاي كال اصبلج؟ هزيت راسي اي

صبلي جاي وكعد يمي شربته وعيني تراقبه يضحك وياي يسولفلي عن الصيدلية وتعب الشغل واني ابتسم

كتله بخفوت ...تذكر من جويتني

اختفت ابتسامته ...عسى ايدي كسر شلون سويتها والله ما ادري
...مو تعيدها

كال بغضب ...والله اذا عدتها الايد الچويتچ بيها ازين بيها شاربي بالقندرة وحگ ذاك اسد بغداد

ابتسمت ...تاخذني اريد ازور وتوديني لدجلة همين ضايجة

گال بفرح ...ابشررري بدلي وتعاي من هاي العين قبل هاي العين انه ما اصدك تطلبين

كمت بدلت لبست عباية وطلعت ويا اخذني من نزلنا نمشي للامام اباوع ليكدام وارجع اباوع لجبران

اجيت للمسجون .. امشي ويا مسجون
اجيت للمظلوم .. امشي ويا مظلوم

اجيت للمسموم بسم گطع جبده .. امشي ويا مسموم بنار الخبث والحقد والسحر الراح يكطعن روحه

زرت وكعدت على صفحه اباوع بدون هدف بالفراغ حطيت عبايتي على راسي وطلعت لكيته منتظرني

ضل يشتري صوغه للاهل مرينه بمحل فضه باوعله وگال تعاي
دخلنا للمحل ضل يگلب اكو كم قطعة صايغهن الرجال اخذ سوار حلو گلبه وگال للصايغ

جبران ...تكدر تكتبلي علي "امانة موسى ابن جعفر"

رد ...سهلة بس شوية وارجعلي

انطاه الاسوار وطلع كتله بفضول المن هذا الاسوار؟
باوعلي مبتسم ...لوحدة عزيزة على گلبي كلش خايف عليها اكثر من روحي اريد اخليها عند موسى ابن جعفر

ضلينا نفتر شوية ورجعنه اخذ الاسوار وانطه الرجال فلوس واخذني الدجلة الدنيا جانت ليل كتله اشتريلي منا لفة جوعانة

كال امشي لمطعم
هزيت راسي لا وكعدت ...جيب شي هنا ناكله

راح اشترالي واجة واني ع نفسي كعدتي داخلة ويا روحي بنقاش عقيم احس الشيطان متلبسني ويتحكم بيه

اكلت نص من اللفة وتعبت من الاكل مديتها اله
...ذبها شبعت بعد ما اريد

اخذها من ايدي ...انه اشتهيتها
اكلها وكمل عصيره لم الزبالة ذبها ورجع كعد يمي طلع الاسوار من جيبه ومده الي

جبران ...لبسي سهير ولا تنزعينه ابد

اخذته اصابعي ترجف يباوعلي وينصي مرتبك وعيونه تترقب تصرفاتي
لزمته وضليت امشي ابهامي على الكتابة "امانة موسى ابن جعفر" وبي كم حجره لونهن احمر دخلته بأيدي لبسته وباوعت لايدي
رفعت عيني علي يباوع لايدي مبتسم

...هذا طلع الي
هز راسه
همست ...مشكور يالغالي

جبران ...تدللين

غوركن عيوني خزرني ونتر ...لا تبچين

هزيت راسي لا ومسحت دموعي كلت هاي هي اشيل كلشي واحركهن ومحد يدري

رجعنة للبيت صعد يرتاح واني راويت الاسوار العمتي وانطيتها الاشياء الجابهن جبران ودخلت للغرفة

حطيت راسي ونمت لو طلعت مو نومة بلاء اسود كل شر رجع سيطر على روحي وسباني سباية

استوطن روحي الشر والخبث صرت مثل عبد للشياطين كلي ظلام ومريبة
شكو شر بالدنيا موجود بداخلي و وين ما اكو خطة خبيثة تخطر على بالي

ماكو بشر بينا ماكو بداخله شر وضلام بس اكو بشر استقوى عليهن ومحاهن
واكو بشر صار مثلي مسير يمشي ورا رغبات الشياطين وطلع الشر باسوء صوره وظلم ناس بريئة

واكو ناس من ذاتهم يهوون الشر ويمشون بكل درب سيء حتى يرضون رغباتهم ويشبعون غريزتهم الصارت ما ترتوي الا بدموع الابرياء واهات المساكين ودم الماله والي ومتعذب بدنياته

صبح الصبح تريگت وكلت لعمتي رايحة للصيدلية اجيب علاج خلص علاجي بدلت بسرعة وطلعت بوجهي للمركز

بلغت عن جبران .. كلت من دون اهله هذا معارض وحركاته مريبه وشفت بغرفته كتابات ضد الرئيس بس اني ما اريد احد يعرف اني مبلغه علي لان اريد اراقبهم كلهم
كالي الضابط متاكدة اهله ابرياء كلت اي بس هم اريد اراقبهم اكثر واكثر

كلولي راقبي كل اهله بداخل البيت واي شي تشوفي ضدهم تعاي بلغينا

طلعت من المركز مرتاحة غمضت عيني وبلعت ريكي عبالك دمه نزل ويا بلعة ريگي
رجعت للبيت وانتظر يجون الشرطة ماكو

لنص الليل نايمين وجفتو علينه گلبو البيت على البطانة تفتيش ومن صعدو لغرفة جبران لگو جوا مندره الكتابات كبل كلبجو ايدينا ونزلو يسحلون بي رفع رأسه باوع النه وگال بحسرة
...بريئ والله بريئ ............للحكاية بقية 🖤

رأيكم بالقصة يهمني ...

فاطمة العبادي