رواية حمائم تخشى الطيران الفصل الثالث وأربعون 43 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو البارت 1000 تصويت وتعليقات بين الفقرات لطفًا 😁🖤..

..

رفعت عيني اشوف دخانه بعيده بس الناس مخبوصة وتركض وجسمي كله يرجف اتلفت خايفة اباوع اريد المحه ماكو

سمعت صوت خالتي تصيح ليلى .. ادور عليها عيوني ضليت ما اشوف بيهن من الهبطة
صارت قريبة علي شايله هادي بايد والعلاليك حاطتهن بايد ركضت اخذته من ايدها ضميته جوة عبايتي وهو يبجي خايف

خالتي لزمتني من زندي ونركض حالنه حال العالم

المنظر عمري ما انساه الناس تصرخ وصوت الانفجار يدوي دوي ، ودخانة گابة

بينا وبين الموت شعره ونركض ماندري بأي لحظة تنفجر مفخخة ثانية ونصير بعداد الموتى

كلبي يدك سريع وهاي لاف ايدينه ع ركبتي حيل لدرجه خنكني بس ما اهتميت وضليت اجر النفس كوة وامشي بسرعة وساعة نركض

ابتعدنه مسافة وطلعنا من السوگ كله وخالتي محتارة تدور تكسي
والعالم مختبصة بالانفجار ، كوة لكينا رجال جبير جان مخلي ايدينه ع راسه مشدوه ويباوع للناس شلون مخبوصة وخايفه رغم مكان المفخخة صار بعيد
بس كلها ترجف ومصدومة

خالتي كالتله :- حجي هاي التكسي الك

التفت عليها مثل الفز وكللها :- اي الي

نسيمة :- رحمة لوالديك ما توصلنا لبيتنا ويانه طفل وهاي امه راح تموت راح تتخربط علينا

تحجي وتأشر علي وجهي مخطوف ودموعي ع خدي
انكسر خاطره علي وكال
:- والله جنت راجعة للبيت بس لخاطر هاي البنية والطفل صعدو

صعدنا ورا نرعش وخالتي متمسكة بالعلاليك ادري يا خاله وكتها والله لو منها اشمرهن واركض

طلعت هادي من جوة عبايتي احاجي مخترع
:- وليدي حبيبي شبيك باوعلي ماكو شي لا تخاف

هز راسه ضل يباوع للمكان وحس شوية بالامان
وجهه اصفر يرعش التفتت لخالتي
:- قبل شوية مو اشترينا عصير خلينا بوحدة من العلاليك طلعيلي بطل خليني اشربه راح يموت سودة عليه

رفعت طرف عبايتي امسح بوجهه يبجي ويرعش
وخالتي تدور بالعلاليك مخليتهن يم رجليها وتحجي
نسيمة :- من كون نار تحرگهم مثل ما حرگو كلوبنا وخرعونه دم هاي الناس الراحت مايطيح بالكاع حوبة كل ام انفجعت ما تتخطاهم

الحجي :- والله انهبطنا حجية شصار بينه

فتحت العصير وهي تمده الي ردت :- ع بختك سويتني حجية غير اني بعمر بناتك

الحجي :- لا منيلج انه ستيني وانتي تصيحين لامج وابوج عمرج بالخمسين

نسيمة :- فلك طرك شلون عرفت

الحجي :- نظرتي ما تخيب حجية

انطيت لهادي عصير يشرب ويرجف وهمست لخالتي
هسة وكتها تتناگرين ويا الرجال دعوفيه شبيج
نسيمة :- ما تسمعينه يكلي حجية واني بت البنات

:- حجي كللها بعدج صغيرة كامت علينا بعد هسة عدها استعداد تكتلنا كلنا لو تفخخنا وتفجرنا

:- بوية لا عمي انتي بكد بناتي هاي هيه بس خلينا نوصل سالمين

نسيمة :- اي هيج
شلونك امي لا تخاف ماكو شي

باوعتلي وضربت رجلها محترگ دمها :- وانتي شبيج طلعتي تركضين ترة الطفل جان بنهاية المحل يمشي ويباوع للغراض متونس عليهن

ليلى :- والله ولا شفته حسبالي طلع كلت انخطف وليدي ردت اموت
يمة حيلي كله راح توبة علي اذا طلعت للسوگ بعد يمة يمة انهد حيلي

نسيمة ، بحركة كلب :- يممممة الله لا ينطيهم
رفعت طرف عبايتها تمسح وجها فحطانة

وطلعت بطالة العصير ثنين مدت واحد للحجي
:- حجي اشرب هسة كلبك غادي نار مجمر

الحجي :- لا حجية رحم الله والديج ما اريد حلكي صار مر ومااشتهي شي

نسيمة :- هم كال حجية استغفرالله اشرب حجي اشرب افتحه الك؟

لكزتها بكوعي باوعتلي مستغربة وفتحت البطل مدته اله اخذه شفطه شفط وهو يسوق خلص من البطل خلاه يمه وكال
:- ايي ريع ع گلبي

نسيمة :- مو تكول ما اشتهي

الحجي :- هسة انتي انطيتينياه وعينج ورا

نسيمة :- لا بالعافية

شربت شوية من بطلها ومدته الي اني بيا حال ارجف وما اشتهي شي ريكي ماكدر ابلعه
هزيتلها راسي لا

نسيمة :- شربيلج شوية حلكج صار ابيض لا توكعين وين نوديج هسة المستشفيات مخبوصة من ورا الانفجارات والحوادث

اخذته من ايدها شربت شوية ورجعته الها
مسحت وجه هادي وحجيت
:- شلونك ماما زين؟

هز راسه اي ما يحجي
:- دحجي يا امي شبيك ماتحجي
هادي :- زين ماما اخاف صوت باذني

نسيمة :- اخترع من صوت الانفجار من نوصل اخذي لجدته تقرا ع ماي وشربي

ليلى :- لا دسكتي هسة يكولون ماخدة الطفل تفتر بي وصار انفجار

نسيمة :- لا المرة زينة بينج وبينها احجن كليلها اخاف من الملامة لا تكولين كدام احد
خليها تقرالها ايات وتشربه لا يروح الطفل تضل بي الخوفه لو يتمرض

سكتت وصلنا نزلنا للبيت نتراجف النوب الحجي ماقبل ياخذ كروة ، دخلت كبل خليت خالتي تشمر علي الكروة وهو يشمرها عليها

دخلت للبيت خليت هادي وذبيت عبايتي وحجابي دخلت خالتي ركضت للحمام سبحت بسرعة وطلعت احس روحي ثكيله وخفيت

طلعن انشف بشعري وجسمي بي رجفة مو طبيعية
خالتي كاعدة يم هادي تحاجي ماكو اصفر جنة ليمونه

نسيمة :- خالة دلبسي عبايتج واخذي للعلوية الطفل راح يموت

هزيت راسي لفيت شعري بدون تمشيط ولبست ربطتي وعبايتي
نسيمة :- اجي وياج؟
:- لا اني اتمشالهم وحدي

تعال يمة .. اجة يمشي لزمت ايده وطلعنا نمشي بس لازمته حيل خايفة بيتهم قريب بسرعة وصلت دكيت الباب هواي فتحته الي حنان دخلت سلمت عليها

هي گبل انتبهت :- شسالفة وجوهكم مخطوفة خير

ليلى :- صار موقف ويانه انهبطنا وجبت هادي اريد العلوية تقرأ علي دشوفي انخلس خلس

نصت لزمته تحجي ويا مخلوس
كالت بخوف :- يمه اسم الله شصار وياكم الطفل ميت خوف دمه ناشف

ليلى :- دسكتي ماكدر احجي شأكول
طاحت عبايتي من راسي واني امسح العرك يزخ مني رغم الجو بي برودة ومو حار

حنان :- احجي ليلى سرج ابير

مشينا للبيت ورديت بصوت ناصي
:- جنة نتسوگ وانفجرت مفخخة قريبة بس غير متنا لو تشوفين حالنا

شهگت مصدومة :- اسم الله الزهرة يمة دخيلك ياعلي الحمدلله ربي نجاكم منها
اشوفج صفرة وهادي كلش رايح يابس داده اذا ماصار زين اخذي للدكتور وضعه يخوف

ليلى :- هو ماشاف شي بس الصوت خلسه خلس وخبصة العالم

فتحتلي الباب دخلت وردت :- هسة اصيح لعمتي تجيج انتي سكتي لا تحجين ما تحصلين غير الملامة بس لعمتي كولي

هزيت راسي وكعدت راحت شوية وطلعن البنات سلمن علي واجت العلوية لاحظت علينا
حنان كومتهن للمطبخ كلهن وخلتنا وحدنا

حجيت الها الصاير انصدمت وخافت واخذت هادي تبوس بي وضلت تبوس بيه وتبجي
:- الحمدلله بينكم وبين الموت شبر بس الله كتبلكم عمر جديد

ليلى :- اي والله علوية عندج طاسة بيها ايات وتقرين عليها فدوة اقريلنا عليها ايات خل نشرب منها خصوصا هادي خايف ميت دشوفي

علوية :- حقه احنه الكبار مانتحمل
تعاي وياي للغرفه احسن

كمت وياها دخلنا كالت سدي الباب التفتت اسده شفت فاطمة تنزل الدرج وعينها صارت علي عقدت حاجبها مستغربة
سلمت علي ومشت للمطبخ سديت الباب واجيت يم العلوية كعدت خلت ماي بالطاسة قرت ايات وشربته الهادي وسوتلي نفس الشي وضلت تقرا علينا هواي

علوية :- كل يوم تعالي اقرا عليكم

ليلى :- لا ما اكدر والله بس كليلي شنو اقرا ع راسه من ايات
علوية :- مو اني متعودة اقرا يكلولي مبروكة يلا اني كل يوم العصر اخلي الولد يجيبوني الج

ليلى :- ما اريد اتعبج علوية
:- لا تعبج راحة بعد عيني المهم سلامتك
بيبي هادي شلونك شلون صرت

هز راسه زين .. جان تعبان

سميرة :- الولد الصبح جابو ذبيحة ع سلامه قيس عزلت الج لحم منها وراح انطيج المعلاگ اشوي و وكلي بس مو تحركين روحج

باوعتله بهتت :- مشكورة ماتقصرين بس شبي السيد خيره؟

سميرة :- من رجع منكم تخربط راد يموت وكوة طلعو الصبح من المستشفى الدكتور مايقبل وهو قيس دك الا يطلع ضاربته جلطة

ليلى :- وينه وين الجلطة قيس
سميرة :- هو من ينقهر يطك خشمه دم ويصير عنده انهيار مادري شبي
باوعتلي خجلانة ضلت ماتعرف شنو تحجي

كالتلي بصوت ناصي خجلانه :- خاف تعاركتو

نزلت راسي ضليت افرك بعبايتي ورجعت باوعتلها محتارة
:- الصبح من جابني للبيت تجادلنا شوية علوية اني ماريد اضل ع ذمته الله يخليكم فهموني

علوية :- ليش يمه ترة قيس يموت عليج وانتي ام ابنه رجعيله وانتي ابيتج والعلوية يمنه وهاي هيه

ليلى :- علوية السالفة مو هيچ انتي ماتعرفين الصاير
اكو سوالف جبيرة قيس داسني كلش داسني
واذاني تقبلينها علوية ع بنتج دنيا تتطلك اسم الله عليها وتنعاف بالغربة وحيدة؟

سميرة :- لا ما اقبلها وقيس غلط واحنه كلنا مارضينا علي لا اني ولا ابو ولا اخوته خو مرتضى وهاشم شبو وطفو من عرفو طلكج وعافج يم كرايب بيت عمج مرتضى ضل يفرفح وحق هو علي

لو شايفته يفتر بالبيت ويكول هو طلع وياها طلع ومايكدر يرجع بعد ليش يطلكها

ولا عمج قبل علي ودزله خبر روح للبنية تفاهم وياها قيس دز خبر لا اني وياها انتهينا

من كال هيج وضل مصر ع رأيه خطبوله فاطمة وقبل ياخذها

بس يشهد الله احنه بالبداية ولا قبلنا علي هو تسرع الله يسلمه دومه متسرع قيس

ليلى :- شوفي علوية اني سالفتي جبيرة خليني اسولفلچ حتى تفتهميني اكثر وتفهمين موقفي

تقربت منها خليت هادي ع المخدة يرتاح ونصيت صوتي كلش وحجيت الها كل قصتي وهي طول الحجي تنشغ وتضرب ايدها

ليلى :- صدك اني غلطت وضميت علي بس مالي ذنب ويشهد الله علي شريفة وهو يعرف هذا الشي كلش زين بس مو بأيدي تيتمت وضليت يم خالتي وشرحتلج وضع خالتي بالضبط
كلش تخاف يوصلني احد وما خلت واحد يطولني
الحمدلله ، وقيس ضال يعايرني بيها حتى امس عايرني بيها تصدكين؟ شنو ذنبي مو انتم اهل دين وتعرفون حرام تاخذون واحد بذنب غيره؟

والله ما شفتو شي عليه واذا ع سالفة الحزب لا اني اول وحدة دخلتله ولا اخر وحدة الحزب ما يمس الشرف ولا يوصله

وهو من طلكني مو علمود سالفة الحزب خاف منكم تعرفون بخالتي عدها سوالف موحلوة وتلومونه

عافني وحيدة بديرة غرب لا الي اخو ولا اخت وراح كله علمود محد يلومه ويكله اخذت وحدة من بيت موزين

شلون تردوني اسامحه وارجعله؟ شلون اسامحه من يكلي العرك دساس هسة ع عيني وراسي هذا القول
بس يمسني هو من يحجي ويكلي العرك دساس يمسني علوية يعني خذيت ع روحي كلت يخاف اطلع موزينة

واني يشهد الله لو يكطعوني مااقبل يوصلني احد ولا اسوي شي يغضب رب العالمين

علوية :- لا والنعم منج خوش بنية انتي ماله حق يطلكج علمود خالتج شلج دخل بيها انتي بنية متربية والتزمتي بحجابج وعبايتج وجواريبج
هسة شلون احنه اذا لا سامح الله عدنا بنية لو ولد طلع عن الطريق كلنا نصير موزينين؟ لا مو خوش منطق هذا قيس غلطان كلش غلطان لو جايني ومحاجيني وكايلي السالفة جان فهمته انتي خوش بنية ومالج ذنب بس اخ منه ولا كال

ليلى :- بعد هسة عرفتي كلشي بس امانه حتى قيس ماريده يعرف اني سولفت الج
شفتي شلون ماذيني وشنو من حجي يقهر كاله وعرفتي شلون عافني ودار الوجه عني واني جنت اباوع لله واباوعله وماعندي بهاي الدنيا غيره ف لا تلوميني اذا رفضت ارجعله

العافني بضعفي لا يجيلي واني قوية هسة ما احتاجه ولا احتاج احد غير رب العالمين

سميرة :- حقج محد يلومج بس يا بنيتي الانسان يغلط هو غلط وانتي غلطتي كعدو احجو تصافو بيناتكم ورجعو لخاطر هادي

ليلى :- هادي ما يحتاج نرجع لخاطره علوية اني ممقصرة ويا الحمدلله والشكر
سميرة :- مو شغلة قصور بس الطفل يحتاج ام واب ويا

ليلى :- يا ما ناس عاشو بدون ام واب وشحلاتهم ذيج العيشة وذيج التربية مو شرط الا ام واب فوك راسه اني اكفي و اوفي

بعدين كرامتي فوك كل شي ما اخلي العشك يذلني ويرجعني ولا حتى لخاطر هادي شكد عزيز وهو اغلى شي عندي بالدنيا بس هم ارجع ما اقبل بالذلة

سميرة :- براحتج بعد هاي حياتج اني ماكدر الح عليج بعدين يصير شي وتكولين العلوية لحت ورجعتني وما ارتاحيت

ليلى :- لا والله ياليت كلها مثلج علوية
حطيت عبايتي ع راسي
:- يلا اني اروح ارجع لبيتي الحمدلله ع سلامة السيد مايشوف شر

سميرة :- بعد وكت ضلي شبيج كاعج حارة
ليلى :- لا علوية مناك بيتي وخالتي ضلت وحدها خاف من ورا هبطة الانفجار الكاها متخربطة غير رادت تموت من الخوف

سميرة :- خطية عاد خوش مرية الله يهديها والله حرامات مخربة ع روحها

ليلى :- شنسوي بعد استغفرالله كل زينياتها يرحن يم سالفتها هاي الله يكتبلها الهداية

طلعنا ركضت جابت اللحم والمعلاك وطلعت وراها حنان
سميرة :- اشوي واكلو وجوهكم صفر
حنان اخذت المعلاك من ايدها وكالت
:- جيبي عمه اشوي الها وادزه هية تعبانة مابيها حيل خاف تتخربط

ليلى :- يو داده اتعبج
حنان :- لا شسالفة تعبج راحة اذا تردين تاخذينه تسوينه غير يوم خاف ماتردين تشوينه هسة؟
ليلى :- لا عادي بأي وقت

ودعتهم وطلعت مشيت للبيت وصلت لبيتي لفتتني سيارة بيضة واكفة ع صفحة بيها واحد عينه علي صارت
لزمت هادي حيل ودكيت الباب فتحته خالتي بسرعة دخلت

ليلى :- شو هذا ابو السيارة البيضة شكله مريب
مدت راسها تباوع باوعتله ودخلت وسدت الباب خايفة

حطت ايدها ع حلكها وحجت :- هذا الزلمة شفته كبال بيتي هواي من اطلع يشخط سيارته ويطلع

خرطت خدودي :- فلك طرنا المصايب ورانه وين ما نروح شلون هسة اريد افتهم شسوي وين اضم روحي واضم ابني حتى ما نرتاح من شر هاي العالم

قضمت اظافرها خايفة :- لا تخافين يمكن متابعني اني ويريد شي مني مالج شغل انتي

ليلى :- خاف من اجيتيلي لحگچ وشافج من دخلتي علي؟

نسيمة :- يمكن صدك لاحگني لهنا من اجيتچ اطلعله احجي ويا
مدت ايدها ع الباب جريتها حيل
ليلى :- عوفي لا العن ابو لا ابو اليطلع ورا هيج نماذج لعبو نفسنا امشي نفوت وخليها ورا الله

نسيمة :- والله لو نسوان عمامج وبناتهم جان كتلج روحي للنجف احسنلج من بغداد بالف مرة

ليلى :- اي رحت يومين ذبن علي زلم اذا اضل هناك اعيش يومية يصيحني

نسيمة :- الله ينتقم منهن بشر انتقامه

ليلى :- النوب هذا عيونه يخوفن يذكرني بعيون صهيب من هيج جان يباوعلي اخاف جنهن عيون ذيب

نسيمة :- اي صحيح شفته بس وين اكو مثل صهيب الامان كله يمه عمت عيني علي خسر شبابه

ضليت ساكته ذبيت عبايتي وجواريبي وارتاحيت فترة مرت واندك الباب طلعت خالتي من كد خوفي لحكتها بس سمعت صوت هاشم ارتاحيت دخلت خالتي ورا ما سدت الباب شايلة صينية صغيرة

فتحتها شاوين المعلاك ومسوين كباب هم وخبز حار وكلشي جاهز
:- رحم الله والديج حنان ع هذا الاكل من ريحته مبين شكد طيب

كعدت هادي وكلته وشربته عصير شوية شوية بدا يصير زين والعلوية يومية العصر تجي تقرا علي لحد ما بدا يتحسن

جنت استحي اسالها عن قيس بس اخر مرة كالت بعد هاي هيه هادي ما يحتاج بعد بس اذا تحلم لو فز مخترع اتصلي علي وارجع اجيج

كتلها ان شاءالله وسألتها عن قيس
:- صدك سيد قيس شلونه شلون صار

سميرة :- ما اجذب عليج تعبان وحال الضيم حاله بس الدكتور كال يصير زين بس يرتاح فترة

ليلى :- ما يشوف شر
سميرة :- كال جيبولي هادي قبل كم يوم حنان كلتله هادي مريض عنده فلاونزة من يصير زين نجيبه الك
هسة ماطول صار زين ليش ما تجيبينه وتجين تتحمدين اله ع سلامته
ومنها يشوف ابنه كلبه يمه

ليلى :- اني والله ماكدر وما اريد اتواجه ويا وهو رجال مريض بس هادي اخذي وياج وخلي هاشم يجيبه الي بعدين خطية يشوفه والده اكيد اشتاقله

باوعتلي بحيرة زمت شفايفها مقهورة وكالت
:- هاي هيه براحتج جيبي راح انتظره
ليلى : اغيرله ملابسه خاف اتاخر
:- لا عليمن تراكه حلو ونظيف وهو شحلاته ريحته ترد الروح قابل رايح خطار وتبدليله طالع من بيت امه رايح لبيت ابو بس لبسي نعاله

مشيت صحتله لبسته نعال جلد وخليته بايد بيبيته اخذته وياها سديت البيبان ودخلت للبيت اكمل شغلي
حسيت بصوت دكة باب استغربت منو ممكن يكون اجالي كمت هسة اريد اطلع وسمعت صوت جامه الصالة انكسرت صرخت مفجوعة وكلبي حسيته وكع

ضليت اباوع محد مشيت للصالة شلت البردة اشوف الجامة مكسورة والكزاز منثور بالگاع ولفت نظري ورقة ملفوفه ع شي خفت اشيلها وكوة نصيت لمستها خايفة

فتحت الورقة صارت عيني عليها بيها كتابة

قريتها ويبس الدم بعروكي
مكتوب بخط واضح تهديد صريح "اني وراچ وراچ الا اطلع روح عزيز گلبچ يلا تهدأ نار گلبي"

كعدت مهدود حيلي وعيني ع الورقة اقرأ المكتوب وجسمي يرجف منو الشمر هذا التهديد وشنو المقصود اطلع روح عزيز گلبچ؟ منو عزيز كلبي غير هادي
لطمت صدري يمة هادي غير اموت اذا صار بي شي ..

....

الشيهانة :- من جنا بالبصرة زهراء طلعتلي اغراضي هبة مجمعتهن كلهن بصندوگ ضليت اگلب بيهن وعيني صارت ع الكصيبة مفلوله نصها وهبة مخليتها بجيس

طلعتها وركضت بيها لجبران جان متمدد خليتها كباله باوعلها وعدل كعدته مستغرب
هاي شنو؟

:- الگصيبة تذكر لمن ظفرتلي شعري وطلعت ما انطاني گلبي افلها كمت كصيتها

جرها من ايدي مستغرب يباوعلها ورجع باوعلي
:- احس وريدي انكص مو الكصيبة ولج شعرج اموت علي شلون تكصينه؟

:- غير ردت اموت بفراكك كلت والله الا اكصها واضمها لان هاي اخر شي لزمته ايدك

تنهد جرني حيل من خصري حضني باس راسي
:- بس طولان ولا انتبهت

شيهانة :- اي غير بالسجن صار بيه گمل وضل يفور فور بسرعة طال

ضل يضحك ويهز بأيده تمدد ع ظهره يضحك
:- وشسويتي للگمل

:- ليلى تطلع من شعري وتطگطگ بي واني اطلعلها واطگطگه لحد هسة الصوت براسي

رجع يضحك وجرني صرت ع صدره حضني يبوس بشعري
:- ام الكمل احبج
:- اووو عاد لا تكضها علي صوجي كتلك لو ما ثنينه جنة مساجين شنو تكول

:- انجبي ماصار بشعري كمل
:- غير شعرك كصير جا مثلي يلا هسة عوفنا شوكت نرجع لبغداد ترة عندي روحه للنجف اريد اشوف الكاع

:- نخلي طلعتنا يوم الجمعة نروح كبل للنجف ومناك لبغداد
:- لازم اخابر الولد اتفق ويا

عقد حاجبه ورد متضايق :- اهوو وهسة لازم تتعاملين ويا الزلم وانه اباوع واسكت

شيهانة :- غير اريد اصير سيدة اعمال حبيبي تحمل

رفع حاجبه ما قابل بسته بخده :- لتغار وانت بعيد ما حلى بعيني زلمة غيرك لا تتوقع وانت موجود اسويها

حضني حيل وباسني بقوة
:- ولج ادري بيج اصيلة اني اخاف عليج منهم واغار ع طولج من تشوفه عيونهم اتمنى اضمج بصبي عيني ومحد يشوفج غيري
يا حنينة اهلي .. يـ صبي عيني

شيهانة :- اعشقك .. كوم نطلع يم عمو خطية مامصدك رجعتله تريد نضل بالغرفه

جرني حيل :- فد شوية ونطلع شبيج مستعجلة مو راح نعيش سوية ونشبع منهم ويشبعون من عدنا

شيهانة :- اهوو عيب هسة النوب تعاي سبحي كدامهم كلهم الغرفه هاي مابيها حمام
ضليت ادفع بي واضحك

جرني حيل قيدني وذب روحه فوكي يبوس بيه بشفتي يسكتني حتى ما اتذمر رفع ايديني ثنينهن خلاهن فوك راسي ولزمهن بأيد وحده وتمكن مني

خليته ياخذ رغبته مثل مايحب ويريد الزلمة صابر سنين حقه ، كمت مستحية رحت للحمام اتختل همزين محد شافني جاي اسبح ودك الباب

صحت انتظر فضحتنا
لبست ملاابسي وطلعت مشطت ورحت يم بيت عمي كعدت شوية ولحكني ينشف بشعره

ضليت ارمش بعيوني خجلانة وعمي يكله :- شسالفة بوية كلساع تسبح راح تتمرض

عمتي لكزته بخاصرته ضل يضحك واكتافه تهتز وجبران غمزله
:- كل الحيل بيه مو مثلك صرت اكسباير بنجرت

حميد :- لا يا طايح الحظ يا سرسري

علياء :- فاسدين ..

عشت ايام حلوة وياهم وحاجيت ليلى ردتلي رقم هادي ما حافظته اتصلت بي واتفقت ويا ع المكان الي لازم نلتقي بي

كالي :- بس حسبو حسابكم معزومين يمنه ع الغدة وبلغت الاهل مالكم طلعه

باوعت لجبران ورجعت حجيت
:- مادري اشوف زوجي .. جبران الجماعة عازمينا ع الغدة نضل؟

هز راسه اي ..
هاي هيه هادي ان شاءالله نضل ونتعرف ع اهل شريكي بالعمل

نهيت المكالمة جبران يباوعلي بنص عين رفعتله حاجبي هز ايده ما قابل وكال
جبران :- ع هذا شغلج ويا الزلم لازم انه ازين شاربي والبس شيله واكعد بنص النسوان

شيهانة :- وسع صدرك الشغل شغل .. ماله دخل بباقي الامور هسة شلون لو متوظفة هم راح اتعامل ويا زلم ف عادي لا تكبرها

هز راسه اي واشرلي اكوم فسحتله المجال
ضل يحط رقم واسمعه يسلم وبعد السلام سال المقابل

:- شنو صار ع الشغلة الوصيتك عليها؟
سكت شوية ورد ... استعجل كلبي راح يطك حاول توصلي اخبار حلوة بهاي الايام ..
يلا مو بهاي الايام بهاي الاسابيع الجاية او الشهور لا تكطع كلبي ترة انه والي وياي كتلني الصبر صبرنا لحد ما كال الصبر بس

سكت ضل يسمع ويهز براسه طلع جكارة يورثها سحبتها من ايده مردتها وذبيتها واخذت الباكيت خزرته
ضحك وجرني كعدني ع رجله ضل يمسد ع ظهري ويسمع للمتصل

شوية ورد :- هاي هيه انتظر منك خبر وبالوكت التريده تلكاني يمك
يلا هلا بيك .. سلملنا ع الربع

نهى الاتصال سألته بفضول :- شنو السالفة
جبران :- شغل

رفعت طرف حاجبي :- شغل كتلي مو؟ احجيلي شنو من شغل اريد افهم طبيعة شغل زوجي

جبران :- بعدين اسولفلج من تكمل الشغلة كومي هسة بدلي وكولي لامي والبنات يحضرون نفسهم ماطول هسة محد اجالنة خلينا نروح للكورنيش نتونس وحتى نزهة انطيها خبر تجي ويانه

شيهانة :- نزهة المسكينة اجت من اقاربها وشافتك وبس تبجي من مساع لسه مكابلة عمتي وتبجي مالها خلك بعد حتى تطلع

جبران :- تبجي ضايجة لان رجعت
:- لا فرحانة
جبران :- جا دموع الفرح هاي شلون مالها خلك تطلع بعد ولج يلا روحي خلينا نغير جو اختنكنا

كمت باوعتله بنص عين :- ادري بيك جاي تغير الموضوع بس راح امشيها الك

وصدك بيومها طلعنا غيرنا جو وبشبشنا بالماي اني وزهراء الا شوية جان طحنا وتسينا وانلعب بحالنة ورجعنا ميتين تعب

وبطلعتنا للنجف جانت الفجر السايق غفار اخذنا مناك زرنه وطلعنا لهادي رحناله للعنوان
سلمنا علي تعرف ع جبران وسلمو ع بعض بالايد
وبعدها اخذونا للارض شفناها الموقع والتفاصيل عجبو جبران كلش

وهزلي راسه برضا اي
باوعت لهادي هزيت راسي مبتسمة
كال خير؟
كتله كل خير

هادي :- ان شاءالله نردلك خبر باسرع وكت ونجي نكمل الاجرائات
:- افهم منك نويتو تشترون
هز راسه اي

طلع هادي بسيارته واحنه ورا عزمنا ببيت اهله
وصلنا ويا الغدة جبران حب يجي للغدة حتى يتعرف ع هادي اكثر و ع اهله

ورا الغدة بفترة طلعنا وجانت عزيمة عادية رحبو بيه ام هادي طايرة بيه ولا عبالك هاي نفسها التكره ليلى

بس مرته تباوعلي بنص عين يمعودة غير جاية اني ورجلي المن هاي الغيرة بعد هسة لو ماعندي رجل نكول حقج

رجعنا لبغداد وبعدها بايام رجعنا للنجف والحمدلله ربي سهل علينا شغلتنا وكمل اثاث البيت
رحت شفته انغرمت بي من برة شكله حلو يشبه الڤلل ومن الداخل اثاث كله ملكي الوانه فاتحة وحلوة ومرتب وجبير ..

انغرمت بي حسيت روحي طايرة من الفرح وشكد عشت ببيوت حلوة بس هذا جان احلى بيت ادخله وراح اعيش بي

انتقلنا اله بسرعه وجبنا بيت عمي يمنه ونزهة حتى يرتاحون ونزهة تعودت تشتغل ويا بيت عمي وصارو جزء من حياتها ماتكدر تفاركهم

واني ما ردت تجي غريبة تشتغل ببيتي فضلت نزهة

جبران جان يشتغل ، وملتهي بشغله واني اخذت سيارة بيت عمي اروح بيها للمعمل وارجع
حسنين جان شايل عني حمل جبير ومساعدني بكل شي

وهادي لزم الشغل بالنجف .. حياتنا صارت كلها شغل بشغل والايام تركض عيني بهاي الايام كلها ع جبران جانت تصرفاته ويانه عادية بس احسه بشغله عنده ضغوط ويمكن مشاكل بس ما يحجي ابد

ولا يگول شنو يصير ويا هذا الشي يضوجني
ويخليني اشك .. اشك راح يدخل نفسه بمشاكل هو في غنى عنها ..

جنت كاعدة اشتغل واجرد دخل للغرفه رفعت راسي باوعتله ينزع بسترته

كمت اله تلگيته :- هلا حبيبي الله يساعدك
جبران :- هلا يَ صبي عيني .. اليوم من وكت راجعه

شيهانة :- اي خليت حسنين يكمل
ساعدته بفتح ازرار القميص جان مبين تعبان نزعته قميصه فرد جسمه
باوعت لاكتافه مد ايده ضل يمرغ بكتفه خليت ايدي فوك ايده
:- شبيك حياتي شنو يوجعك
جبران :- ما يوجعني شي بس تعب وركضه

شيهانة :- راح احضرلك الحمام
جبران :- راح ادخل تعاي وراي

راح فات للحمام اخذت المنشفه وملابس داخلية وفتت علكتهن وطلعت جان باله سارح حتى وهو يسبح

انطيت خبر لنزهة تصب غدا
شوية وطلع ينشف بشعره وكال :- حضريلي جنطتي عندي سفر

التفتت مصدومة :- وين مسافر؟

جبران :- للكويت حبيبتي

فز كلبي قبل جسمي مشيت يمه وعيوني تراقبه واذني تنتظر تسمع خبر حلو منه
:- شعندك بالكويت؟

جبران :- عرس صديق الي راح يتزوج وعزمني وماكدرت ارده ما اطول وارجع

ضليت ساكته فتره هو يمشط شعره ويخلي عطورات
:- ليش تباوعيلي هيج صافنة مو جاي اكلج عرس رايح احضره تجين وياي؟

هزيت راسي لا :- روح الله وياك اني ماكدر عندي شغل شنو راح استفاد من العرس

:- براحتج كلت تغيرين جو
:- لا ما اريد اغير جو

ضجت ومشيت كعدت اكمل شغل هو طلع تراكسود لبسه واجة من ورا حضني وباس خدي
:- ضجتي ماتردين اسافر؟ الغي سفري وكلشي يروح فدوة لعيونج

شيهانة :- لا بس طاري الكويت يخنكني روح حبيبي الله وياك ع غير مرة ان شاءالله اجي وياك اتونس

رفع راسي باس شفتي حيل :- يرحولج فدوة الكسرو گلبچ وانه وعدتج وراح ابرد نار كلبج قريبا

كمت وكفت بسرعة :- كول والله يعني جاي تدور وياي

هز راسه اي
شيهانة :- هم وصلك خبر شي برد نار كلبي الشابة ماتقبل تطفى
جبران :- خبر واحد مو اكيد بس انه مو رايح مناك استفسر عسي ولعل اوصل لخيط ياخذني لصگر واخو

انه سمعت اخبار صگر وشعلان مختفين من التسعينات وهسة وصلني خبر جذب جانو ببيت ابوهم ودزولي العنوان هو بكل الاحوال فطس رايح امر واشوف

حطيت ايدي ع كلبي :- يمة يخوفون دير بالك ع نفسك
جبران :- مارايح وحدي لا تخافين كلش امان

هزيت راسي حسيت كلبي ضل يرجف ..
راح ثاني يوم للبصرة ومناك خلص شغله عنده لحد ما اجة موعد سفره وطلع للكويت
ضليت اصلي وادعي ربي يرجعه الي سالم وجايبلي اخبار حلوة عن ابني. .

بيوم من الايام دك التلفون جاوبت عمتي عرفت هاي ليلى طلبت تحجي وياي وكالتلي تريد تجيلي للبيت تباركلي

جهزت كلشي الضيافة ورتبت الاستقبال وعدلته
وجهزت نفسي وانتظرت جيتها .. دخلت علي العصر هي وخالتها وابنها وجايبات هدية البيت

اخذتها منهن تشكرتهن ودخلتهن جوة وعمتي موجودة تعرفت عليهن وضلت كاعده يمنه نسولف

سالفة جرت سالفة وباثناء مجاي نسولف نزهة دخلت شايله سراحية عصير طبيعي حتى تصب النه بعد ما شربنا صبت لهادي وجاي تنطي طاح الكلاص من ايدها وانكسر

هادي فز مخترع وخله ايدينا ع عيونه يرعش ورأسًا بچة

طفرت ليلى حضنته وبعدته عن مكان الكلاص المكسور
شيهانة :- فدوة انكسر الشر شبيك خالة حبيبي اخترعت
نزهة :- سودة عليه وليدي مادري والله

ليلى :- لا بس هو مخترع هاي الاصوات تخرعه
شيهانة :- يااا شماله
ليلى :- يو سكتي غير بالسوك وطكت مفخخة وانهبطنا ردنا نموت

شهكت وغطيت حلكي مصدومة :- يمته ولج
ليلى :- قبل اسبوعين تقريبا بس شصار بينه يا داده عود هاي العلوية تقرا علينه وشوية تحسنا ولحد هسة بينه فزة

علياء :- هاي المفخخات بلوة شكد ناس انفجعت من وراهن ربي يستر من الجاي يمكن ازيد واكثر رعب

نسيمة :- اي والله داده نشف ريكي بيومها اركض اركض وادورها هاي مخترعة وتدور ابنها كوة وصلنا للبيت

علياء :- الله يساعدجن

جابته كعدته فوك سكتناه وشربناه ماي وهدأ
شيهانة :- شلون يضل هيج؟

ليلى :- اخذته للدكتور سويتله تحاليل  اول امس حتى دمه نازل مادري شبي سودة عليه
هسة جاي اعالجه والعلوية سمعت بي دمه نازل وتنگل بهاي العلاليك اول امس علاكة امس علاكتين محملات اشكال والوان واليوم الصبح هم وفد ضجت احس روحي ماريد شي منهم بس استحي اردها رغم اكللها ما محتاجين

شيهانة :- شنو تجيب
:- تجيب كبدة ولحوم وفواكه وخضروات تكول هذني يفيدنا سويهن اله خصوصا شونذر ورمان وكرفس تكلي بكل وجبة وكلي حتى مل هههه

:- ترة جايبتهن لابنهم زين هاي من محبتهم اله وحنيتهم .. تعاي ابو هم يسأل علي
ليلى :- اي بس ابو غير مريض

سألتها شبي قصتلي الصار
:- زين تسوين ليلى هذا السيد يضل طول عمره يعايرج انتبهي واخذي حذرج من زوجته هاي مببينه كلش تغار وتخاف تخسره

جنة نحجي بهمس سولفتلي سالفة التهديد
خلتني اصفصف
:- ما حجيتي ما كلتي ضالة ساكتة

حطت ايدها ع حلكها محتارة :- شنو احجي وشنو اكول ساكته الي الله ابني مخليته ع كلبي والبيبان بس اقفلهن وجبت حديد خليتهم يلحمونه للشبابيك حتى البزون ماتكدر تدخل منهن و ما اطلع هواي
واذا رادو اهله يجون ياخذونه بالسيارة

شيهانة :- لا المفروض تحجين والله كعدتج وحدج خطرة لا تعاندين

ليلى :- تدرين اذا احجيلهم اشبع حجي بظهري خصوصا من مرته اكيد تكله هاي راعيه مشاكل ورجعت جايبة مشاكلها وياها

خليني هيج احسن واذا لا سامح الله سطى علينه احد ادافعله يروحي خليهم يكتلوني بالاول وهوا وراي عاد نموت ثنينه

ضربت ظهر ايدي بباطن ايدي الثانية مقهورة
:- والله عليج سوالف تسحن الكلب

:- داده اذا حجيت شنو يسوولي؟ يعرفون الي مهددني؟ لو يحطولهم سيطرة يم باب بيتي
بعدين بيني وبينج اشك قيس ورا السالفة يمكن يريد يخوفني حتى ارجعله ليش من ذاك اليوم لهذا اليوم ماصار شي

شيهانة :- يمكن صدك حتى يحسسج انتي بخطر وتحتاجين زلمة بحياتج

:- اي هيج فكرت اشك بالسالفة
:- جا نسيتي هذا الي لاحكج خايبة خاف هوا والله تبطين الكلب

:- هذا مو يمي لاحك خالتي بالدليل بعد ما شفته بس خالتي شايفته اكثر من مرة

هزيت راسي محتارة :- الله يستر كلبي نار عليج اني شلون بيج
ليلى :- الله الحافظ .. تحسرت ورجعت باوعتلي
:- والله اني كلبي نار واريد اموت بس اصلي وابجي دموعي ما توكف عمري ما حسيت بالامان وشوكت احس بي مادري

شيهانة :- سودة عليه تعالي يمي والله البيت اذا مايشيلج احطج ع راسي عمي بس كاعد بالحديقة وجبران كله بالشغل
والله تضلين مرتاحة وامان

ليلى :- لا صعبة مااكدر احس روحي ثكيلة وما ارتاح بعدين الشر اذا يوصلني راح يوصلني لو يخلوني مادري وين

شيهانة :- شنو السالفة شبيج هيج تفكرين والله اني افرح بيج اذا اجيتي هنا
هزت راسها لا وتحسرت :- ما اكدر خليني ببيتي احسن

:- تؤؤ ... هادي هم اجاج بعد
:- لا بس يخابر يكول ملتهي مجاي يلحك من يفرغ يمر عليه ويسألني اذا محتاجة شي كتله خالتي والسادة ممقصرين وياي

شيهانة :- خاف تحجيله وياخذج للنجف وهناك نسوانهم يذبن عليج مصيبة ويكتلونج وين ماترحين القهر وراج

ليلى :- تعودت
ردت بعدم اهتمام كأنما الوجع والخوف صار جزء منها

اباوعلها بعيون مليانه دمع وكلبي يحترك
بنية صغيرة بملامح بريئة صارعت الحياة وتحملت امور زلم ما تتحملها الخوف وعدم الامان رافقنها بكل سنواتها الماضية وملازماتها

من اباوع بعيونها الگى الحيرة وبضحكتها خوف

تمنيت لو اكدر اسويلها شي واحميها رجعت كتلها
الله عليج تعالي يمي والله امان

رفضت رفض قاطع وكالت خليني هناك يمهم اذا اجي يمج ويصير شي اطلع كلبه بنت كلب واخذت الولد وعرضته للخطر

هزيت راسي كلت براحتها بس كلبي يفور

ورا العشا خليت السايق يوصلهن جنت مقهورة ع ليلى وخايفة عليها كلش ..

سولفت لعمتي شكد خافت وكالت خل تجي والله حالها من حال نزهة مو غريبة بس مرتاحة وكاعدة معززة مكرمة

شيهانة :- ماتقبل كتلج ماتقبل
علياء. :- لا تلومينها تخاف من الملامة

سكتت مقهورة افكر بيها وعمتي فززتني من كالت
باجر يجن خواتي ورجولتهن عازمتهن
شيماء وشذى وعواصم

ضحكت :- عواصم مرت بلبل
:- هههههه ع كولتها زرزور ساعة تصيحله عصفور مخبلة الزلمة

هزيت ايدي :- هو اسمه هم اسم هسة ما لكو غيره
:- اندري؟

مرت الايام وسفر جبران طول حاجانة مرتين وانكطع واني كلبي ينمرد من يكطع عني احس روحي تريد تطلع اخاف بعد ما يرجع

ضليت افتر بالغرفة محتارة شوية وبدلت نزلت خابرت غفار يجي ياخذني للسوك
كلت اروح اشتريلي ملابس جديدة من يرجع اتكشخله ماريد اضل سلبيه وافكر مايرجع
اذا هو من راح باسوء الظروف رجع

اريد اضل ايجابيه وافكر بأشياء حلوة

عمتي ضلت تلوم وتفتر علي :- وين رايحة الوضع خطر وانتي هسة زوجج يعتبر سياسي وعليج خطورة

شيهانة :- شسالفة رايحة للجبهة حتى خطر هو السوگ هياته اتسوك واجي اريد اتكشخ لابنج

علياء :- خايبة المن هو شو تالي الليل ما يضلن هدوم كعدي وسكتي

ضحكت :- يضلن مايضلن المهم يشوفني حلوة ومرتبة بعدين جلدي يحكني مليت من ملابسي القديمة لازم اغير

ما عاجبها خايفة اجة غفار اخذني تسوگت وكملت
برجعتنا للبيت صار ازدحام .. مديت راسي حجيت
:- شصاير؟

بلع ريگه وكال خايف
:- الظاهر اكو ابلاغ عن سيارة مفخخة لو شي
شيهانة :- لا والله؟

هز راسه اي وكمل :- دائما تصير الدنيا كلش تخوف اليطلع ما يضمن روحه يرجع

ضليت اتلفت اباوع خايفة .. ورجعت كتله
:- اذا طكت مفخخة نموت
:- حسب قريبة علينا لو بعيدة

:- يلا اذا متنا شهداء الحمدلله

:- شنسوي حالنه حال العالم

بطلعان الروح خلص الازدحام وطلعنا جرينا نفس وصلت للبيت خايفة
بس ما حجيت لعمتي تضل ترزل بيه صعدت رتبت الملابس بالكنتور ورتبت الغرفة وضلت عيني ع التلفون انتظر مكالمة من جبران حتى اتاكد هو سالم ..

...

دنيا ...اباوعله وجهه اصفر نحلان وعيونه ذبلانه
تنهدت وحاچيته بهدوء
:- شبيك خوية فهمني تريدني اروحلها اتوسلها ترجعلك؟

رفع اصابعه اشرلي لا
غمض عيونه بتعب وكال بصوت يرجف
:- فراگ ليلى جان ياكل بعافيتي اكل بس مقاوم ولابس ثوب القوة لمن وصلت وصارت كبالي انهدت كل حصوني وبعد ماكدر ماعندي طريقة اقاوم بيها ثوب القوة احترگ ويا نار گلبي يا دنيه

دمعت عيوني مديت ايدي اخذت ايده مسدت عليها
گح بالگوة وهو مغمض جفنه مكرمش
متألم
قيس :- رجعتها و وگفتها كبالي خلت ضعفي يبين بعد ماكدر دنيه عشگها اذاني ويمكن هاي الروح راح تسلمها شو ما احس روحي مطول

دنيا :- اشش من عمري ع عمرك هسة تصير زين سيد وتحجي وياها وتبرد نار كلبك

قيس :- يا تبرد اذا هيه ندمانه ع زواجها مني وتتمنى لو ماخذه الضابط ليلى بعد ماتريدني كرهتني ورجعتها الي مستحيلة
مبين من كلامها ماتريد تفتح وياي صفحة جديدة

دنيا :- هسة انتَ گوم ع رجلينك حبيبي قيس وخليها ع الله مو انت تقويني

قيس :- دنية الوجع جان ياكل بروحي من سنين وهسة طلعت علي الام متراكمة مو بايدي احاول اسند روحي واكوم ما جاي اكدر

فتح عينه نزلت دمعه من طرف عينه غمض رفع ايده ترجف ماكدر يوصلها ويمسح دمعته
مسحتها بأبهامي اشوف المرض اخذه وضعف كلش وروحي صارت تنمرد مرد

رجف فكه فتح عينه باوعلي
:- من اموت وصيتي يا دنيه هادي .. وخاتون والحسن عينكم عليهم
بالذات هادي هذا وحيد وامه وحيده يتيم وامه يتيمه داروهم زين ولا تظلمونهن مثل ما اني ظلمتهم

دنيا :- اسم الله عليك شاب كل الحيل بيك وكمت توصي ع بختك سيد

روحي فارت سكت ما حجة
رجع غمض خجلان من دموعه التنزل
وجهه شاحب يدل ع مرضه وتعبان ..
تحسر وگال بصوت يرجف كله غصة
:- ذلني عشگ ليلى ذلني ... يا جمرة افادي الما اظن تبرد كتلتني كتل

ولج دنيه ذبحتني من الوريد للوريد من كلتلي جانت تتمنى لو ماخذه صهيب لو ما ماخذتني حسيت مو كلمات سيف خلته ع ركبتي ونحرتني نحر

رفع صبعه اشر ع عنقه يبلع ريكه بصعوبه وتفاحة اذم تصعد وتنزل
ولج هنا احس السيف جاي يحز بنحري واحس بحرورته

دنيا :- رادت تقهرك وتخليك تندم ماتقصد
اخذ علاجك الله عليك وارتاح حتى تطيب وترجع توگف ع حيلك

حط ايده ع كلبه ضل يأشر علي ويحجي بغصة
:- هنا علتي اني هنااا حبها مرض اخذ كل حيلي وما اطيب منه لا اكدر اوصللها ولا اكدر ارجع لروحي دنيه اني ضعت اخوج ضاع

دنيا :- بعد اختك وعمرها .. قوي گلبك وشد روحك
ليلى قوية وتريد زلمة قوي كوم اوكف ع حيلك وراجع نفسك شوف شلون تتصرف
خليلك حجاية وقرار ثابت وامشي بي حتى تنجذبلك

هز راسه اي انطيته الدورة شربته التفتت جاي اطلع شفت خيال كانه واحد جان واكف ويسمعنه

نزلت شفت فاطمة بالمطبخ كاعدة صافنه بالفراغ و وجها مطعون طعن كانما واحد كاللها اجت ساعة اعدامج ..

....

الشيهانة ..

طال الانتظار والروح تعلعلت ..
ضليت ابجي ضعفت بعده يضعفني عمتي طبطبت علي
:- لا تخافين عمه تلكينه عنده شغل والتهة واتاخر

شيهانة :- عمة كلبي نار علي ابنج موتني عذبني واذا اول مرة سلمت الجرة وما متت هاي المرة اودع اسلمها ما اتحمل فراكه مرتين
علياء :- لا اسم الله علي يرجع وداعتج مثل مارجع قبل صبري ماتدرين بيا ساعة يدخل علينا

هزيت راسي كتلها خوش انتظر
بس كلبي ينزف رحت للشغل ورجعت ميته تعب هناك شوية التهي هنا بالبيت اضل بس كاعده انتظره واتعذب

اندك جرس البيت اكو حارس مخلينه يطلع يفتحه بس اني صارت سولتي بهذا الجرس والباب كل ما يندك يفز كلبي وانزل ركض اسابق الوكت حتى اوصل واشوف منو

ركضت فتحت باب الصالة واشوف الحارس كوة يمشي طالع من غرفته وكفت ع صفحة لان جنت بملابس البيت

شفته فتح الباب وسحبه دخل جبران يجر بجنطة السفر فزت روحي وركضت اله ، ورجعت وكفت بمكاني متبسمرة من شفته ما انتبهلي ودار وجهه مد ايده ودخل طفل يركض ورا و ورا شاب يمشي ع عكازات نحيل مبين من شكله مريض وتعبان ..
عقدت حاجبي وقلصت عيوني
واذا بي هذا صگر الي الدنيا ما مخليه شي منه بس اسمه
خليت ايدي ع كلبي اذا هذا صگر هذا الطفل ابني؟ شعلان؟! معقولة تحقق حلمي وجبران وصل لصكر وشعلان وجابهم واجة للعراق .......للحكاية بقية

رأيكم بالقصة يهمني 🖤..

التنزيل بين يوم ويوم ..