رواية حمائم تخشى الطيران الفصل الرابع وأربعون 44 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

....

وحدة .. الم .. هم .. وحزن
تاخذني الدنيا وين ماتحب وتريد واني مالي رأي
الي تحبو هي تسوي بيه .. وما اكدر افتحو لحلگي واعترض

اني سلعة مبيوعه لهذا لرجال .. هو ما اذاني جسديا
ما ضربني بس شلعو لگلبي تعبني نفسيا
استخدمني مثل رحم مستأجر حتى يخلف مني صبيان ويترس بيتو برأسي

تقربلي واني بأضعف حالاتي وحملت منو شلت برحمي صبي و ولدتو بضعف جنت طفلة وتا اولد طفل
روحي طلعت ويا طلعتو وحسيت بيبان الدنيا كلها انسدت بوجهي

ربتو ام رواء ضرتي لان اني طفلة .. العب لعابات ما اعرف اربي طفل

وهو فرح عزم وذبح ذبايح وعلن انه صار عندو صبي بس ما نسبو الي نسبو لحرمتو الالى خجل يكول متزوج طفلة خجل من الناس بس ما خجل من رب العالمين

ما خجل من انتهك حرمة جسمي وتقرب مني واني طفلة صغيرة .. مرت سنتين واني ببيتو بس كاعدة يم البنات ما يجيلي ولا يتقرب الي

طلب من حرمتو الاولى ام رواء تحمل عسى ولعل تجيبلو صبي ثاني ويا ابني ، وحاولت بس نزل الطفل وهو گلب وجهو عليها صار ما يطرو السيف

وبس يزكح بينا عيونو بگصتو 24 ساعة .. بناتو يخافن يتنفسن لا يضربهن
اني اختل بالغرفه ماطلع منها ابد اخاف يجيني يأذيني

وبهاي الفترة ام رواء تعبت وانطتني ابني لان نفسيتها ما تتقبل شي وهملت حتى بناتها

جنت اواجه صعوبة بتربيتو بس الحمدلله بمرور الايام تعلقت بي وصار جزء من روحي وروحي تعلقت بي

هنا ضرتي طلبت منو يعقد علي محكمة حتى اني احبل واجيبلو صبيان ويا محمد
ضليت ابجي واتوسل بيها حضنتني وباستني وكالت
:- البطن الجابت محمد تجيب غيرو وانتي هساع كبرتي وتكدرين اني املي بيج ما اريدو يجيب حرمة غيرج للبيت وتطلع ما زينة واموت ويضلن بناتي يمها

انتي ماكو منج والبنات بحسبة خواتج وتصيرين ام اخوانهن

ما جنت مقتنعة بس توسلاتها بيه وتعلقي بيها لان هي اخذت مكان امي حور بعد انتحارها خلني اوافق
خفت اخسرها هي واصير يتيمة من كل الجهات

وافقت اخذني عقد علي محكمة واشترالي حلقة ذهب وكلادة لبسنياهن وهي فرحت

واخذتني للسوك اشترتلي ملابس هواي وبيهن مشلحات استحيت منهن
وانطتني شيرة خلتني انظف جسمي وصعدتني للغرفة الي المفروض غرفتي

انطتني ثوب فوك الركبة وردي خلتني البسه ما يستر شي يفشل ومشطت شعري وعدلته وخلتلي مكياج

رسمت عيوني بالكحل وباستني براسي
:- هاي هيه صرتي جاهزة لخاطري تقبلي وجيبيلو ولد خلي يفك عنه الو ساعة يذبحنا بيها

هزيت راسي ب اي .. جنت راضية اجيبلو ولد ثاني بس خفت احبل وتطلع بنية ويذبحني
لان مرة سمعتو يكول لام رواء اذا جبتي بنت احز نحرها ونحرچ

طلعت ام رواء رحت كعدت ع الفراش شوية ودخل علي عمرو صار اربعين واني طفلة عمري 14 سنة
بجيت بضعف من شفتو ومسحت عيوني بسرعة خفت يضربني

بس هو جان يتملك الي ويحاجيني ع كيف ويقنعي بيه
باسني بززني شواربو كشت روحي ما متقبلتو ابد
بس سكتت ، وانطيتو روحي نام وياي
وضل كله يمي يومية يمي بالغرفة وتعبني ما يروح لام رواء واني ابجي من هذا الحمل

مر اول شهر ونزلت الشهرية وهو كلب وجهو صار جنه شيطان
ام رواء خايفه وبناتو خايفات كلتلها
:- هساع شنو حلاتو الولد كاتل روحو راح يطك علينا

رواء ضحكت :- يا ريت بيه فايده

ريحانة :- والله هذا محمد بس يبجي وشالعو لكلبي شلع ع ساعة اشيلو واطرو بالگاع موتني

ام رواء - دسكتي استري علينا وداري للولد واني وياج نشيلو بس خلي كريم يفك ياخه عنه

ريحانة :- هذا اسمو كريم وهيج ميبسها علينا لا نسمع منو كلمة زينة لا نشوف منو تصرف حلو لو مسمينو بخيل شلون

رواء :- يذبحنا وياكلنا

ام رواء :- ما يسكتن بعد

وصدك سكتنا واستمرت محاولات كريم حتى احبل وماكو وشائت الاقدار وحبلت ام رواء وحملها ثبت والله كتبلها الولد كريم فرح طار من الفرح واحنه نخدمها ما نخليها تشيل الخيط من الكاع

علمود يثبت ببطنها هذا الطفل وتجيبو يصيرون ثنين ولد ويفك ياخة بعد ما يشلع كلوبنا بالولد

بس للاسف حملها جان صعب وهو ضل كله يمي ينام ويتعبني جنت صغيرة ما اتحمل وتربية ابني صعبة
خواتو شالن عني هواي وساعدني هواي وشكد ما ادعيلهن احس روحي مقصرة ويستاهلن اكثر

ما حسيتهن بناتو لزلمتي ولا حسيتو زلمتي اصلا منين اجة زلمتي هذا شايبي المهرفل عقلو خفيف عيب اكول عنو زلمتي

وام رواء ما جانت ضرتي لا بالله امي وتخاف علي ومربيتني مثل بناتها

جابتلو الصبي وحياتنا صارت حلوة سد حلگو من صار عندو ثنين ولد ..

اجت احداث السقوط وسقط النظام وصار نظام جديد
بس ساعة السودة .. حياتنا جانت مستقرة صح اني ما طايقتو ولا اجرعو ابد بس هو ما مأذيني ويشتريلي ومدللني ومدلل ام رواء الشهادة لله خصوصا من من جابتلو ولد صار سمسم

بس بعد السقوط والتصفيات الصارت كريم خاف لانو عندو ثار ويا واحد ، متعاركين مرة ومتضاربين وكريم مأذي هسة شنو مسويلو ليومكم ولله ماندري
بس عندو ثار ويا

صار خايف وكل ظنو ما راح يوصل الو بس بنهاية 2003 طلع كريم وما رجع وبعد يومين
وصل النه خبر كريم مكتول وجثتو بالمستشفى راحت ام رواء واخوانها للمستشفى ورجعت منهارة تصرخ وتلطم

وهنا عرفت كريم مات انكتل وخرب استقرار حياتنا
وتدمرنا .. الكتلو ما اكتفى بهذا الشي ضل يدزلنا تهديدات واخذتنا ام رواء لبيت اخوها

بس مرتو تخبلت لان اني ارملة غريبة وصغيره وجنت توني اكبر و ع كولة ام رواء منشنشة ومتفحة وعلي العين

الشهادة لله الزلمة ما يباوعلي ويستحي مني واني ما انزل من يكون موجود بس هي تراقب بيه وحسستني راح اخذو منها

مرت الايام بصعوبة جنت مختنكة وبس ابني شايل عني شكد افرح من انومو بحضني والعب ويا
ويصيحلي ماما روحي ترد وعرفت شكد اني جنت عزيزة عند امي الله يرحمها ويغفر الها ذنبها ..

بدأت مشاكلي ويا حرمتو لصالح
ضلت تزكح بيه ومرة دفعتني من الدرج رادت توكعني وتموتني

التفتت الها مصدومة ونترت :- شنو تردين تموتيني تدفعين بيه شمسويتلج اني

:-واكفه مثل العظم ابلعومي انتي لو بيدي اذبحج واشرب من دمج

:- اعوذ الله ليش تذبحيني عيني يمج بكاعج شو محبوسة وضاله بالغرفة

تخصرت ما عاجبها دفعتني من كتفي وجرت عيونها بغرور ونزلت ..
هزيت ايدي ما عاجبني وعيبت عليها
:- جنها درنفيس فحص وشايفه حالها عليه تهي بهي لو حلوة شتسوي

رجعت لام رواء جانت كاعدة ايدها ع خدها صافنة مقهورة حقها بركبتها خير من الله وتيتمو وهي ترملت
اني ما حاسة بشي لان كريم ما يهمني بكدها هي جانت امي وشايلتني

حضنتها حيل وبستها براسها
:- ام رواء ما نرجع لبيتنا اني ما اكدر اضل هينا تعبت
ام رواء :- ليش يول منو وياج

:- حرمتو لاخوج تغار عبالها اخذ زلمتها منها

:- لا شتاخذينو هو عادج مثل بناتو ترة
:- والله دفعتني من الدرج جان وكعتني و موتتني خايفه منها كلش اريد ارجع لبيتنا

تحسرت وخلت ايدها ع خدها مقهورة
:- ما نكدر نرجع مو امان لا يسوولنا شي يذبحونا يموتونا

:- زين رجعيني يم خالة نسيمة هي كالتلي اذا ضاكت بيج الدنيا تعاي لخالتج نسيمة تداريني وتداري ابني
ع ما تهدا الاوضاع ويصير امان ونرجع لبيتنا

باوعتلي بتفكير هي حست لازم تتجنب المشاكل وتعرف خالة نسيمة شكد تحبني وتريدني واجت لصلاح الدين اكثر من مرة علمود تتطمن علي

هزت راسها اي وكالت ... اشوف شلون ارجعج يمها لحد ما تهدأ الامور هين

سكتت وهزيت راسي
هي ضلت تراقب وتشوف غيرة حرمة اخوها مني ونترها علي

وراحت كالت لاخوها يرجعني لبغداد لبيت نسيمة
اضل يمها فترة ومن يرجعون للبيت ارجع يمهم لان هذا بيت زلمتي وهذول اخوانو لابني لازم يعيش يمهم

الزلمة قبل لميت جنطتي واخذت اغراضي واغراض وليدي ، بدلتلو لبستو قمصلة جلد لان الجو بارد
وبوت مبطن فرو وكلاو صار كانو دب قطبي

خواتو يبوسن بي ما يفارگنو وهو يكللهن ما اروح اني اعوفجن

ضلن يبوسن بي ويشمنو حيل ، عمرو سبع سنين
وكلبو طيب ويحب خواتو حيل متعلق بيهن

مشينا سوية اخذتني ام رواء واخوها طلعنة من صلاح الدين لبغداد
عيني تترقب الطريق واسترجع ذكرياتي السودة جنت امر منو واني شاردة ويا امي واخر مرة رجعوني مخطوفة من حضن امي وانتحرت ما تحملت حزن فراكي

نزلت دمعتي مسحت خدي وتحسرت خليت راسي ع الجامة ومحمد تمدد وحط راسو ع رجلي

محمد :- شكد ونوصل ماما؟

ريحانة :- هواي نام واكعد واحنه واصلين

ام رواء :- انطي شي ياكلو

ريحانة :- لا خلي هساع اكل لا يتزوهر ويضل يذب من راسو

غمض عيونو شوية ونام والسيارة تمشي بينه ، شوية وطلعت سيطرة بس اشكالهم غريبة مو كانهم جيش

طبك السيارة من اشرو اله واجة واحد ملثم يخوفن عيونو
ضليت اباوعلو مستغربة وهو نصة يحجي ويا اخو ام رواء

:- منين انتم؟

:- من صلاح الدين طالعين لبغداد
:- شعدكم؟

:- خطار لاهل البنية

حجاها واشر باصبعه علي

:- هذا الطفل الكم

ضحك مستغرب ورد :- طبعا النه ابنها هذا

هز راسه الملثم بوعيد وكال :- تضحك تستهزأ مو؟

رفع سلاحه علي ضلينه نصرخ اني وام رواء خايفات نتر اخوها سكتن لا تخافن
وفتح باب السيارة ونزل

ام رواء بهمس :- تعزينا هذول مو جيش مبينين هاي سيطرة وهمية

ريحانة :- خل يصعد ويطلع لا يكتلونو تعزينا تعزينا يمة

لزمتو لمحمد خايفه وادحك اشوفو يتكاون ويا الملثم شوية وذاك ضربو بالسلاح ع راسو وكلو اصعد واتبعني بالسيارة واذا ما تبعتني بالسلاح وراكم وننخلكم نخل

صعد وجهو كله دم خايف لان الملثم ضربو بالسلاح ع وجهو وذاك صعد بغير سيارة ولحگنا

ام رواء بخوف :- لا تلحكو اطلع بغير طريق واخذنا لبغداد لو رجعنا هذا راح يكتلنا

:- ما تدحكين مراقبينا هساع اذا الوف السيارة يشتغل علينا الرمي ونموت اربعتنا

حطيت ايدي ع صدري خايفة ابجي ، طبگ السيارة گبال نهر دجلة
ضليت اباوع خايفة نزل الملثم واجة كال لاخو ام رواء

:- الراح يصير درس حتى مرة ثانية ما تضحك من توگف گبال اسيادك احنه نحب الدم بس هاي المرة نعبرها الكم وننطيكم درس

ما فهمت كلامو ضليت اباوع مستغربة ما حسيت غير الباب انفتح وزلمة ثاني جر محمد من رجلينو ضل يصرخ
ماما ماما .. واني انفجعت صرخت وفتحت الباب اريد الحكو حيل

جرني واحد منهم شمرني ع الكاع .. التفتت اباوع لام رواء مغطيه وجها تصرخ واخوها يبس الدم بعروكو صار اصفر

كمت من الكاع اركض ورا اشوفو راح للبلم ام رواء نزلت تمنعني وهذا رجع جرني وشمرني ع الكاع وحط رجلو فوك صدري هجست ضلوعي تكسرت

صرخت من الوجع ورفعت راسي ادحك ابني يبجي يصرخ صعدو بالبلم وحطو بلوكة
:- وين ماخذينوووو جيبووو والله اسويلكم شنو تردون بس رجعولي ابني لتاخذونه

:- ما ماخذينا احنه الله راح ياخذه

صرخت بخوف لالاااااا ماما .. طفل شنو سوالكم حرام عليكم ذبحوني اني ورجعووووو طططفلللل

شال رجلو من صدري خلاها ع حلكي وضرب راسي بالكاع حيل شاغت روحي حسيت بطعم التراب بحلگي وعيني عليهم يمشون بالبلم وصلو مسافة بعيدة بالبلم اشوف واحد كعد يم رجل محمد ومحمد يصرخ ويريد يفلت روحو من ايديهم خايف

شفته شال محمد والثاني شال الطابوكه شادها برجله بحبل وشمرو بنص دجلة گبال عيني

فرفحت روحي غمضت عيني اهجس روحي انسحبت من شمرو وهو يصرخ ونزل بالنهر
كلبي تخدر وجسمي باد

رفع رجلو من ع وجهي وام رواء اسمعها تصرخ واني مغمضة عيني مادري شنو صار بيه حسيت جسمي نمل

ما اكدر افتح عيني
وام رواء ضلت تضرب ع وجهي واسمع صوت سيارات شخطت وطلعت ورمي قريب

عبالي كتلونه كلنا وام رواء تصرخ وترشك ماي ع وجهي
ما كدرت افتح عيني شالوني للسيارة شيل وضلو يكعدون بيه فتحت عيني وذبيت روحي من السيارة للكاع اصرخ

:- ابني غرك هنااا ابني

ركضت للنهر واسمعهم وراي يركضون لزموني حيل جروني
:- امشي راح يرجعون يذبحونه ورا

جنت ابجي واصرخ متهسترة :- خليهم يذبحوني عوفوني خليهم يغركوني ورا

جرتني حيل وجنت اقاوم اخوها لزمني حيل خلاني ع صدره ورفعني من الكاع حيل ذبني بالسيارة وقفل البيبان ضليت الطم ع وجهي اريد انزل اذب روحي ورا

ما ضل عندي احد بالدنيا ما ضل الي عزيز كلهم ماتو امي وهسة ابني

ضليت الطم حيل واعيط ملخت روحي تملخ
ام رواء :- اطلع لبغداد گبل لا ترجعنا ومن نرجع نغير طريقنا

هز راسه رفعت عيني علي اصفر يرجف
ام رواء :- الله لا يوفقهم گلبي راح يوكف

جنت ارجف حيل
:- نروح لبغداد اقرب مركز ننزل نحجي لصار ويانه وننطي مواصفاتهم حتى يطلعون فريق شي يدزون قواصين يطلعون الطفل

ام رواء :- خسرنة كريم ومحمد بسبب المايخافون الله خاف من نشتكي نخسر الباقيين؟

:- يول فدوة اهم شي ما تروح حركة كلبها لأمو ما تا تشوفينها فرفحت تفرفح خطيه والله واني كلبي غادي نار

ام رواء :- اي سودة علي

طول الطريق احنا منهارين نبجي نزلنا لمركز شرطة حالتنا جانت يرثى لها وانتبهت الضابط يسأل عن ارقام سيارات واسماء
بس السيارات مابيها ارقام وضل ينطيهم القاب سمعها

كاله الضابط
للاسف هاي عصابة مسيطرة ع هاي المناطق والها اربع جرايم سابقة واحنه هسة مستغربين شلون ما قتلوكم وقتلو بس الطفل

:- كالو تخويف النه

:- مو بس الكم نيتهم تنقلون الشفتوه حتى ينتشر الخبر والرعب يسيطر ع كلوب الناس هم يتلذذون بتخويف وترويع البشر

احنه راح نطلع للمكان ونسوي العلينا وانت تجي ويانه

باوع علينا وكال
:- بس سيدي امه ميته حالها صعب لازم اوصلها لكرايبها

:- احنة ندز سيارة توصلها وجودك ويانه مهم

وصدك طلعوني اني وام رواء وصلونه لبيت خالة نسيمة جنت جثة ماعندي روح ما اسمع حجيهم ةطولا افهم شنو يكولون بس منظرو وهو يغرك كبال عيني ما يفاركها

مددتني بفراش بالاستقبال غمضت عيني وضلت الكوابيس تهاجمني وافز اعيط ويسكتوني وارجع لوضعي

شوية وحسيت بخاله نسيمة انطتني حباية وراها غمضت عيني وما ادري بالدنيا وين حطتني ..

كعدت والشرطة ويا اخو ام رواء فوك راسي يحجون وياي اجاوبهم بدون فهم حسب الشافته عيني
شوية ونقلوني للمستشفى خلولي مغذي وزرقو بي ابر واني فاصلة عن الدنيا

طلعو جثة ابني من النهر .. وسووله استخلاف
واني بالمستشفى مثل الميته
بس اون وابجي ومرات اصرخ يتلاحگوني بأبر وينوموني

بعدها طلعوني لبيت نسيمة ضليت يمها رغم اصرار ام رواء حتى اروح وياها لبيت اخوها
كتلها لا بسبب حرمتو طلعت من صلاح الدين لبغداد وكتلو بني بعد لو اموت ما ارجع خليني هين والجان رابطني بيكم مات مالي شي يمكم بعد عوفوني لا تجون علي ولا اجي عليكم

ضلت تبجي وتبوس بيه
نسيمة :- ع كيفج داده هي لان منهارة ومقهورة تحجي هيج بعد فترة مري عليها تلكينها مرحبة بيج وتريدج

:- لا بعد ماتريدنا كله صوجي لو ضاله بالبيت احسنلي

نسيمة :- لا داده مو صوج احد هذا امر رب العالمين

غمضت عيوني حطيت ايديني ع اذاني ونمت وما مر الليل الا واني فازة اكثر من اربع مرات اعيط ع ابني متهسترة وارجع انام ..

....

شفته فتح الباب وسحبه دخل جبران يجر بجنطة السفر فزت روحي وركضت اله ، ورجعت وكفت بمكاني متبسمرة من شفته ما انتبهلي ودار وجهه مد ايده ودخل طفل يركض ورا و ورا شاب يمشي ع عكازات نحيل مبين من شكله مريض وتعبان ..
عقدت حاجبي وقلصت عيوني
واذا بي هذا صگر الي الدنيا ما مخليه شي منه بس اسمه
خليت ايدي ع كلبي اذا هذا صگر هذا الطفل ابني؟ شعلان؟! معقولة تحقق حلمي وجبران وصل لصكر وشعلان وجابهم واجة للعراق ..

اباوع وعيوني لمعت بيها دموع الفرح والبشارة والله هذا صگر ... وهذا وليدي ماكو غيره

شهگت وصحت :- شعلاااان ... وليدي شعلااان

باوعلي الطفل ولزم صگر خايف رفع راسه صكر ولمعت عيونه
نصة باوع لشعلان وگله
:- هذي امك يـَ ابن الشيهانة ... هذي امك الاحجيلك عنها وايد روح لمها خلي الدنيا تلمك بالامان روح لمها يبا

ضل يباوع الطفل خايف رجليني رجفن نفس من شفت جبران وماتن مشي ماكدرت امشي جمدت بمكاني
خليت ايديني ع اركبي وانحنيت ابجي واني اتذكر وجع السنين وجع الحرمان العشته وهو بعيد عني

ضليت اشهگ وابجي منصيه ايديني ع اركبي جبران اجة علي لزمني من زندي كومني لمني لصدره وعيني ع شعلان اشهگ

جبران :- كرت عينج برجعة وليدج يَ صبي عيني كرت عينج يالغالية

وشاء الله ان يلم شملنا
انا ارض حملت البذرة و نبتت بي وخرجت مني روحًا طيبة
وهو حصادي .. حصاد لم اظفر به الا بعد سبع عجاف

في عينيه خوف وريبة
وفي عيني اشواق ولهفة

اخذته بين ايديني حضنته بلهفة وشميته لحد ما مليت ريتي بريحته
منزل ايدينه ما يعرفني ولا يعرف شنو يعني ام
لزمت وجهه بايديني لاثنين اباوعله وايدي تتحسس وجهه ما مصدكة صار يمي وراح اخلي بحضني

مبرطم خايف سماره ويا جرة عيونه المكحلة اخذن گلبي ، ما جان هيج شكله من صار
التفت باوع لصگر اباوع لعيونه وروحي رجفت

رجع باوعلي صكر واكف مستند ع عكازاته وجهه تعبان كاله جبران
:- استريح صكر تفضل للبيت شكله لقاء الاحباء مطول

صگر :- اكو احلى من لقاء الاحباب خليهم يا اخوي

هز راسه جريت وجهه ابوس بي
:- اني امك يا روح امك اني جبتك لهاي الدنيا بس حرموني منك الله يحرمهم من رحمته
رجفوني عليك وبجوني

اني امك صار سنين ادورك وانتظر هاي اللحظة اني الشيهانة حجالك عني صكر؟

هز راسه اي

دموعي تجري والزم بوجهه ابوسه واكلله اني امك
دمك مختلط ويا دمي وراضع من حليبي

شعلان :- يباا هذي المرة امي؟
هز راسه صكر
ورجع باوعلي
:- والله انه اسمع عنج وايد بس ما اعرفج

راد يبتعد جريته وحضنته حيل اشمه
جان خايف بس قررت انطي مساحة شوية و وكت حتى يتقبلني

دخلناهم للبيت ركضت بدلت ملابسي ونزلت كعدت يمهم شفته كاعد يم صكر لازك روحه بي
خايف
كعدت يمهم اباوع لصگر هز راسه بأسف

جبران دخل شايل صينية ضيافة وكال
:- الحجية تريدج دقيقة

هزيت راسي وكمت طلعت اجة وراي
همس يم اذني
ما حجيتله شي انتي ذكية تعرفين يا جزء تخفين ويا جزء تحجينه اهم شي جزء كتل ابو تنسينه

هزيت راسي اي مد ايده مسح عيوني وحضني
:- شلون كيفج عيناي؟ والله مشتاكلچ شوك الصحرى للماي .. باسني بخدي

شيهانة :- اني هم مشتاقتلك
جبران شلون اجازيك؟ فهمني شلون رجعتلي روحي انت من فدوة رحتلك يابعد حيلي

باس راسي وابتسم :- تجازيني من تجيبيلي طفل اريد الي يشيل اسمي منج كافي كبرنا
شيهانة :- ليش هو بأيدي بأيد رب العالمين بس انت طيب وربي راح يرزقنا ع نيتك الطيبة

هز راسه مبتسم فرحانة رفع اصابعه يمسح دموعي الماتقبل توگف
:- ما ضل شي ويرجعن بناتج ردت اكلج لحضنج وتذكرت صارن كبار حضنج مايكدر يلمهن

:- حضن روحي يلم العالم جبران .. اخليهن بعين كلبي وحضن روحي هذني بزر بطني

جبران :- وانه وين تخليني؟

شيهانة :- انت بصبي عيني

جبران :- تبوگينهن مني وتبيعينهن علي انه اكلج صبي عيني وحنينة اهلي

ضحكت رفعت روحي وكفت ع اطراف اصابعي وبسته بخده مديت ايديني حررت روحي منه
:- رايحة اشبع من ابني انت بعد ماتفيد هههههه

رفع طرف حاجبه وكال بشقاوة :- خوش حجي عيناي

دخلت للاستقبال كعدت يم صگر رفعت العصير انطيته لان ما ماخذه
:- اشرب صگر انت من اهل البيت لا تستحي

هز راسه اباوعله نحيف كلش وتعبان
باوعت لشعلان مديت ايدي الزم ايده سحبها خايف

لميت شفتي مقهورة عرفت الرحله طويلة ويا هذا الولد ولازم ارجع اشيله بروحي تسع شهور مثل ماشلته برحمي حتى يحس اني فعلا امه ويريدني
ولازم انطي من فيض حبي مثل ما انطيته حليبي يلا يحس بيه

:- شنو وصلك لهاي الحالة صكر وانت الزلمة القوي الماكو منك

هز راسه مقهور وكال بحسرة
:- ابوي الوصلني لهنا سحره اكل روحي وخلاني طريح الفراش سنين

شهگت مقهورة :- شره ضيعنا
:- الحمدلله اختفة ومحد لگاله اثر اظنه انكتل لانه ريال راعي مشاكل وشراني

نصيت راسي جريت نفس
ورفعت راسي مقهورة
:- الله ينتقم منه واني اكول وين راح عني صگر بس والله جنت منتظرتك ادري بيك تجي وجايب شعلان

اريدك تحجيلي كلشي صار وياك

صگر :- ماصار معاي وايد امور
من ذيج الليلة الطلعتج بيها وانه طحت محد عرف علتي ريولي ماتن مشي ماكدر امشي ولا اوكف
اخذنه لبيت ثاني بعيد عن البيت الاول وحرم علينا طلعة الباب
جنت محبوس بدار بنهاية البيت ولو اصرخ محد يسمع حسي
تدخل علي منيرة توكلني وتشربني وتطلع

كبر شعلان وانه كبرت بس حالي صعب
من اختفة ضلت منيرة تجيب شيخ يقرا علي قران ويعالجني سنين اتعالج يلا كدرت اوكف وامشي ع هاي العكازات

سحرني ابوي اااخ من الدنيا ابو يسحر ولده ويسوي بي چذي؟ عمري ما توقعت هذا الشي

شيهانة :- سودة علي صگر والله جنت خايفة عليك وطلع خوفي بمحله الحمدلله من رجعت وكفت ع حيلك

ضل يهز راسه يباوع للبيت جان خجلان ومتردد بحلگه حجي
سالني بصوت ناصي
:- هدير تزوجت ما ضلت للحين تنطرني؟

ضحكت مستهزأة وهزيت ايدي
:- هدير ضيعتنا كلنا وخلت رؤسنا بالطين

عقد حاجبه مستغرب قصيتله كل شي بس استثنيت سالفة السحر السوو الي هي ومشاري لان اذا حجيت راح يسألني منين عرفت وتصير طويلة ويمكن يعرف ابو جاي للعراق

ضل عاقد حاجبه مقهور رفع ساعده غطة عيونه لحظات ونزله
:- الحمدلله ما مكتوبة الي

:- تستاهل الاحسن منها والله اني ادورلك واخطبلك احسن وحدة

ضحك وهز راسه لا
:- يا محفوظة السلامة انه راجع للكويت يم منيرة اختي كلها شغلة ايام بس يتعود عليج شعلان

شيهانة :- ليش شبي العراق وتعوفه ضل هنا
:- لا اختي ماكدر اعوفها واخوي صار يم امه ولو هو ما يعرفني اخو يكلي يبا

ضحك ومد ايده يخرب شعر شعلان شعلان بعد ايده متضايق ورتب شعره باصابعه

صگر :- ما اوصيج علي انتي امه واحنه نضل ع تواصل

شيهانة :- عود بعدين نحجي بهذا الموضوع
ماما .. باوعتله دار وجهه عني

لزم ايده صكر وباسها
:- يبا هذي امك الشيهانة هي الك من بعدي
تحبك وايد وصبرت سنين حتى تشوفك وعينها بچتلك لحد ما كالت بس

شيهانة :- وليدي طالع من روحي انتَ لا تدير وجهك عني
لزمت ايده الثانية ما بعدها ضل يباوعلي مستغرب وعيوني تجري ما اتحمل اباوعله وما ابجي

باوعلي صكر مبتسم
:- راح يحبچ صدكيني الشغلة شغلة وكت جبران راح يتكفل بكلشي حتى شعلان يضل يمج
الحمدلله انت متزوجة ريال والنعم في كفو
صاحب غيرة واخلاق ومبادئ مبارك عليج الله عوضج بعد تعب السنين

شيهانة :- اي والله العوض اجالي بعد تعب استمر سنين طويلة وعذاب وألم

وهسة ابني صار يمي وجبران ماراح يقصر يجيب بناتي

صگر :- جبران تواصل ويا ناس وايد من اهلنا وراح يوصلونه لمهيب عن قريب ان شاءالله تعبج انتهى وانتهت سنين الصبر ايت ايام الفرج

شيهانة :- مادري شلون اجازي جبران صدك زلمة معدل وفرحني
صگر :- تستاهلين هيج ريال تساهلين لانج اصيلة ومرة معدله

...........

ليلى ...

:- الوو وياك
هادي :- شمالج ما تردين كطعتي كلبي حسبالي متي

تثاوبت نعسانة ورديت :- شيموتني؟ عدلة بعدني ما خلصت مني

هادي :- طاح حظج وصبغچ انه جاي لبغداد بس مادخل واكعد وياج بالبيت وانتي بوحدج لو تخابرين خالتج تجيلج لو امر اخذج ونروح لخالتج
نكعد عدها بالليل ارجع للنجف

باوعت للساعة سبعة
كتله :- صار فترة خالتي ماتقبل تجي تكلي الطريق طويل شيجيبني واني هنا مختنگة بس بيوت مر اخذني ونروح عليها لبيتها

سكت شوية ورد بأنزعاج :- ولو انه ما اواطنها بعيشة الله بس شسوي علمودج ياليلة راح اروحلها

ليلى :- لخاطري لا تتعارك وياها

هادي :- لا ما اتعارك عزمي ام اعطوب غداجن علي

ليلى :- ماتوقع تكدر تجي هي ابنها رجع للعراق قبل كم يوم ويمكن مشغولة

هادي :- وانه اكول كاطعة ما تخابر يلا جربي عزميها

ليلى :- خووش

نهيت المكالمة كلت هسة مو وكت مناسب خليها ورا الريوك سويت ريوك وكعدت هادي ريكته ونظفت البيت

لحد ماصارت ب8 ردت اخابر خالتي بس كلت لا هادي كال غداجن علي ماكو داعي انطيها خبر
خابرت للشيهانة
سلمت عليها وسالتها شلون ابنج شعلان

ردت مقهورة :-شلونه امس صكر رجع للكويت وهو دك مناحة ساعات يبجي كوة سكتناه اخذه جبران للسوك اشتراله كومة العاب لج ولا جنة طفل ما يقتنع

يريد يروح ويا والله يسلمه صكر كاعة حارة اصر الا يرجع يم اخته منيرة وترك شعلان وهو لهسة ممتعود علي

ليلى :- زين جيبي ويا هادي يجوز يتونس

سكتت شوية وردت بحماس :- خوش فكرة والله اذا اجة وحب هادي الا يومية جايتكم لو دازة عليكم السايق تجولي

ضحكت :- عادي ماكو مشكلة شوفي جبران يقبل

شيهانة :- يقبل يقبل ما يحجي همزين ماطلعت للمعمل جانت عندي شغلة راح اتصل بحسنين يكملها

ليلى :- لا ترى اني اتاخر ع مايوصل هادي لبغداد ونروح لخالتي اووو للغدة شلونكم وين غداكم

شيهانة :- اذا هيج اخلص شغلتي واجي وخليني احاجي جبران ما كول لهسة ماطالع

الشيهانة ..
نهيت المكالمة ومشيت لجبران جان يدكم ازرار قميصه اجيت اخذتهن بداله اسدهن وحجيت بدلع
:- جبراني .. حبيبي ردت ابلغك بشي

رفع طرف حاجبه وكال :- شنو؟

شيهانة :- هادي عازمنة احنه وعازم ليلى الملتقى ببيت خالتها خلينا نروح حباب
جبران :- انه عازمني
هزيت راسي :- طبعا
جبران :- مااكدر شغلي لراسي هوا جاي لبغداد خلينا نعزمه عشا يمنه اذا يتغده يم بيت خالة ليلى

شيهانة :- هو اني ماريد اروح علمود هادي الشغل نسولف بي ع التلفون اريد اخذ شعلان يم سيد هادي يجنن اريده يتعرف علي بلكي تروح طنكورته

باوعلي بتفكير شوية وكال :- روحي انتي وشعلان وعزمي هادي ع العشا كليله مايطلع من بغداد الا يتعشا يمنه وبلغي نزهة تسوي العشا ع وكت اريده عشا مرتب يليق بي

هزيت راسي اي وبسته بخده :- شكرا حبيبي عندي شغلة بالمعمل اكملها وارجع اخذ شعلان ونروح

جبران :- بكيفج

لبسته سترته راد يطلع وتذكرت شي عطت اوكف حبيبي
وكف متفاجئ التفت الي
خليت ايدي ع كصتي بقهر لان نسيت هيج شي مهم

:- التهيت ويا شعلان وصكر ونسيت اسولفلك شي
خله جنطته ع القنفة وكال
سولفي حبيبي

شيهانة :- ليلى مرة شايفة واحد ملثم يباوعلها وخالتها نفسه شايفته مرتين مبين عنده شي وياهم واخير شي اجة تهديد لليلى بلكي تكدر تساعدهم تشوف جليل صديقك اذا يكدر

هز راسه :- انطيها خبر من تشوفه تحفظ رقم السيارة او مواصفاتها مواصفات الشخص اي علامة غريبة

هزيت راسي اي
:- اذا ع الامن احجي ويا جليل ونكدر نكثف عناصر الامن هناك حتى تصير حركات هيج اشخاص مشبوهين صعبة اليوم احلها ان شاءالله

شيهانة :- بعد روحي ماتقصر دومك صاحب واجب

جبران :-تدلل حنينة اهلي وصديقتها

باسني بخدي وطلع لشغله

مشيت للغرفة النايم بيها شعلان لهسة ما جبتله غرفه ورتبتها لان انشغلت ويا صكر وطلعنا سوية من باب نقوي العلاقات بس شعلان مصر يريد يرجع ويا صكر

من شافني دار وجهه لجانب الاخر تقربت منه كعدت بسته بخده
:- ماماتي حبيبي اكعد حتى نجهزك واخذك اعرفك ع صديق حلو مثلك تلعب ويا وتتونس

شعلان :- ما ابي اصدقاء انه صديقي الوحيد ابوي صگر

شيهانة :- واني هم صديقتك حبيبي فدوة رحتلك نتعرف ونطلع ونتونس وشنو تريده اجيبه الك شنو تحب اشتريلك؟ لو تريد اخذك للالعاب

ضل ساكت تنهدت وكمت :- راح اسويلك ريوك طيب تاكل اصابعك من ورا واشوف شلون ماتاكل وما تطلع

كمت خابرت حسنين يكمل الشغل عني واجلت كلشي
دخلت للمطبخ سويتله ريوك طيب وعصرتله برتقال
وصعدت نزلته كوة عافس وجهه

شافته عمتي وصاحت
:- هلا بشعلان هلا بالنزل زعلان

لم ضحكته يكابر ما يريد يبين هو ضحك ع كلماتها

كعدته وكعدت يمه اريد اوكله خزرني :- اعرف اكل

شيهانة :- اكل وحدك بس عيب تخزر ماما حبيبي انت تربية صكر لازم تعكس تربيته بصورة حلوة تقبل يكولون صكر ما عرف يربي وابنه يخزر امه؟

هز راسه لا وتجمعت لدموع بعيونه :- ليش ما اخذني معاه وهدني هني ؟
شيهانة :- لان اني امك حبيبي اني امك يا روحي وخلاك يمي لان اني امنتك يمه وهسة رجعك الي وما يكطع بيك راح يجيك واحنه هم نروحله

شعلان :- صدك؟
:- والله
علياء :- حبيبي انت عندك عائلتين بالكويت وحدة ووحدة هنا احنه عائلتك الثاني ونحبك خليك ويانه شهر اذا ما حبيتنا نرجعك

هز راسه اي وضل ياكل ويشرب عصيره
اخذته اجهزه للطلعه حسيته صعب بس اني امه وراح اكسبه

....

ليلى ..
انتظرت هادي اجة متأخر شوية جنة مجهزين ومنتظري بالطارمة ليشوفنا يكول عمرنا ما طالعين
بس دك هورن طلعنا نركض شافنة وضل يضحك مد ايده فتح باب الصدر وهادي صعد ورا علمود المكان واسع ويمد روحه من النص يتونس

بس سلمت شغل السيارة وطلع بينا وكف ع محل شوي سمج اخذ سمج مشوي ومقبلات وخبز
خلاهن ورا يم هادي
هادي :- خالوو الريحة طيبة تجنن شوكت ناكل

هادي :- بس نوصل نحطهن وناكل

هز راسه
ليلى :- ام اعطوب تجي هي وابنها وراح تصير خوش شله

ضحك :- والله من رجع رجلها ضليت استحي منها هسة لازم اصير ثگيل گبالها

ليلى: - انت من كاعك ثكيل بس وياها مادري شبيك تستخف
هادي :- ولجن شو انتن سايكات علي شني تكليلي مستخف بعلي الفحل افرسج فرس اذا عدتيها

ضحكت وغطيت وجهي بالعباية

صفن شوية هز ايده وكال
:- شلونه السيد

ليلى :- والله مريض كلش طريح الفراش جلطة ويكلهم الدكتور لا يرهق نفسه لا يقهر روحه وهو ماكو مادري شبي يمكن متعارك ويا مرته

باوعلي بنص عين ما عاجبه واني العب بطرف عبايتي مسوية روحي بريئة
:- ويا يا مرة منهن الاولى الثانية

سكتت
كال اسمي وشدد علي :- ليلة

ليلى :- وياي كتله اريد اتطلگ منك وما اضل ع ذمتك وهذا حقي هادي العافني باضعف حالاتي بشنو يفيدني بعد هذا مو سند هادي

تنهد وكال بحسرة :- حكج بوية حكج ليلة بس السيد جان صغير وغلط وجل من لا يخطأ انتي كبري عقلج وخلي كلبج عطوف وانطي فرصة يمكن تغير وصار صاحب قرار

ليلى :- لا يا خوية اذا انطيته فرصة يعني دست كرامتي وتراجعت بكلمتي واني كلشي ولا كرامتي تنداس اموت وما اقبل بهذا الشي

هادي :- اذا الشغلة بيها كرامة انه هم ما ارضا تنداس واسحك شارب كل واحد يفكر يدوسها ليلة

ابتسمت برضا وهزيت راسي مرتاحة
درت وجهي للشارع اشوف الخضار وردت روحي
بدخلتنا شفنه زلم ملثمين بسيارة طالعين
هادي باوع ما عاجبه
:- هذول شني شو صاير الوضع هنا فيطي

ليلى :- والله ما اعرف خوية

قوست شفايفي وضليت اباوع مستغربة ..

وصلنا ويا وصلتنا شفنه الشيهانة واكفة طاكة البنطلون الكابوي ويا قميص سمائي والشعر ويفي يتطاير ويا الهوى والوجه جنها عروس
واكفة يم السيارة وتحجي ويا شخص داخل السيارة وصلنا ونزلنا وهي بعدها ع وكفتها تحجي من نزل هادي صاحت

:- هاي اجة هادي شوف طفل وياك

ما حسينه غير طفل اسمر نزل من السيارة عيونه مكحلة وعيونه ضلت تدور هادي من شافه هز راسه برضا

سدت باب السيارة ونصت حجت بصوت كله انوثه
:- اطلع غفار تعال علينا بالاربعه ونص

شغل السيارة وطلع اني دخلت انتظرها يم الباب ذبيت عبايتي من فوك راسي ورفعتها لان خالتي شاطفة والكاع كلها ماي

بوستها ومديت ايدي لزمت خد ابنها بسته كش ودار وجهه
مبين عنيد وصعب قدمتله هادي حتى يتعرف علي
باوعله ومدله ايده للسلام
هادي مد ايده تسالمو بالايد عادي

دخل هاي ابن عمي شايل السمج
:- هلااا بام اعطوب عاش من شافج عيني مرت السياسي

ضحكت وميلت شعرها ليورا بحركة كلها انوثه ولا عرفتها هاي من رجع رجلها زادت جمال ودلع
:- انت العايش جا ما تمر علينا احنه تعودنا تجينا مو نجيكم

هادي :- جا هسة ليسمعج انتي جايتني غير انه جايجن

ضحكت وكالت انطيني اشيل وياك
اخذت منه وعلكت جنطتها بكتفها وفاتت تسلم ع خالتي

التمينه كلنا بالاستقبال وخالتي مثل الضامله ضميمه خايفه وتلوب
و وجها مطعون
لحكناها للمطبخ عفنا هادي يلاعب الجهال خطية حنين يا طفل طلع كباله لاعبه وحبه

ليلى :- نسومة شبيج وجهج مصوفر

نسيمة :- مريضة يمكن فيتامينات نازلات وطاكني صداع

شيهانة :- اوي عيني هاي العيادات ضاله امشي حللي ليش ضاله ع اليمكن ع الاقل تاخذين علاج اذا فعلا نازلات

نسيمة :- ما صارت عندي فرغه روحن بالاستقبال اني اخلي الاكل

جانت تحجي بخوف واضح رغم حاولت تخفي زين شنو ضامه ما تحجي
عقدت حواجبي ضربت الكاونتر بأيدي بعصبية
:- شنو عندج خالة ضامتلج شي وراج مصيبة احجي اريد اسمعچ واحلها قبل لا ارجع للاستقبال

نسيمة :- اوي يمه حلي مصايبج بالاول

ليلى :- تحجين لو شلون
نسيمة :- مو مصيبة سالفة صغيرة ورا الغدة نسولف بيها هسة لو تمشن لو تساعدني ننقل الاكل بمواعين بيت ونروح نتغدة

شيهانة :- عوفيها براحتها شنو لحيتي

رتبنا الاكل واخذناه نتغده خالتي اكلت وكالت لهادي
:- فدوة لكلبك يوم ع هذا الاكل عاشت ايدك

هادي :- مو انه طابخة عاشت ايد الطباخ

نسيمة :- ايدك الدفعت يوم

شيهانة :- ماما عجبك?
باوعتلها توكله وتسأله بحنية وعيونها تلمع من تباوعله هو هز راسه اي

ذكرتني بروحي شلون جنت احاول اكسب هادي
باوعت لهادي وابتسمت ضليت اطلع عظام وانطي السمج ياكله وخاله ممقصر لكمة بحلكه والثانية بحلك ابني

نسيمة :- اكلك يوم اخر فترة ماكو ما تجي علينا وجارتي سألتني كالتلي هذا الاسمراني لحليوة هليام ما يمر عليج

هادي :- طركاعة لفت عمرج هسة عبالها مصاحبج

نسيمة :- غدي ما اصاحب زعاطيط

نفض الاكل من ايده خازرها
:- شبيك قصدي بكد وليداتي انت لو مخلفة بزري بطولك لا تاخذ ع روحك انت مو زعطوط زلمة والنعم منك

كللها وهو يسوي حركة مكص يم حلگه
:- لسانج هواي يسحك كون نطگه بالدهن بلكي اتوبين

نسيمة :- خلي اتوب امك بالاول
هادي :- هاااا؟

نسيمة : شو شابعة ليلى حجي ما تابت من التجفيص لو بس يمي تكصكص لسانات

رفع طرف حاجبه ما قابل وكللها بهمس
:- كونج زلمة الا افرسج فرس بعلي الفحل

ليلى :- احنه شلون بالاعداء والله حتى ما نشتهي ناكل من وراكم بطلنا
كومي سهير خلينا نروح خابري السايق

حطيت ايدي امثل اريد اكوم زعلانة وهم فزعو لا لا كعدي ما نحجي بعد

ضليت اضحك وهم ضجو بالضحك وهادي يهز بايده ما عاجبه
:- شلون نسوان مكابلهن وحدة اصخم من الثانية خوب هاي ام اعطوب صارت مرت سياسي نخاف نسولف وياها

شيهانة :- اشمرك ورا الشمس
هادي :- عندج خبرة وتندلين الورا الشمس زين

رفعتله حاجبها وضحكت تك خد وهو مات من الضحك

وبهاي الاثناء سمعنه صوت بنية تعيط من داخل البيت
:-عوووفني لك حيوان كلب عوووفني خليني اخذ ابني

هادي وكفت اللكمة بحلگه واني انمغصت بطني وباوعنا كلنا لخالتي

هادي طفر ع مصدر الصوت وكلنا تطافرنا ورا
جريت ايد خالتي ونترت بغضب
:- جايبتلج وحدة لكواد يغتصبهااا معقووولة خالة معقووولة

نترت ايدها مني وضربتني راشدي قوي
:- طاح حظج وحظ تفكيرج تدرين بيه ما اسويها حقيرة
خزرتني حيل

طلعنا هادي واكف بنص الصالة يباوع البيبان ودار علينا
بكل غضب صاح
:- هسة تطلعينها الي وتطلعين الوياها

نسيمة :- فهمتووو غلط والله العظيم

حسينه باب من بيبان الغرف انفتح وطلعت بنية بدشداشة قصيرة مدلعه سودة وشعرها طويل مفلول تركض لباب البيت وتصيح
عووووفني ابني غرك عوفني اخذه

شكلها مالوف ضليت جامدة بمكاني واشوف خالتي تركض وراها جلبت بيها وتصيح
:- ريحانة ولج حلم كعدي منه حلم كعدي امي حبيبتي

شهكت ولطمت وجهي وهي دفعت خالتي وتريد تطلع من البيت

خالتي صرخت
:- هادي الزمها البنية راح تطلع بهذا المنظر بالشارع

هادي منصي وداير وجهه لان جانت مشلحة

والجهال مخترعين من صريخها خاتلين ورانه

ركضت اني احاول الزمها بايدها سجين صغيرة تهدد بيها
باوعت علينا وبكل غضب صاحت
:- اذبحجن والله اذبحجن خلوني اطلع ابننييي

ضلت تهادد بينه خفنه لا تاذينه لو تأذي روحها اباوع لوجها شكد كبرانه ومتغيرة

ما حسيت غير هادي طلع من وراي لزم ايدها البيها السجين وخلاها ورا ظهرها ...
وبهاي الحركة انسحبت ع صدره هزت راسها بعدت شعرها عن وجها وصرخت بوجهه
ريحانة :- وخرررر عني مجررررم
حط ايده ع حلگها سده وضلت بس عيونها دم خازرته ومثبته عينها بعينه
خزرها وهمس بغضب :- بعلي الفحل اذا ما تسكتين افرسچ فرس ......للحكاية بقية

رايكم بالقصة يهمني 🖤..

هذا حقكم بارت البارحة ... وبارت باجر ينزل باجر ان شاءالله بالليل

سبب التأخير .. مات عمي ابن عم ابوي وطلعنا للفاتحة بالزبير امس ورجعنا اليوم بعد صلاة الظهر
ويانه اقاربنا من الناصرية ضلو عدنا لورا العشاء يلا راحو
وصار عندي وقت اكمل البارت اسفة اذا بي اخطاء انكتب واني متشوشة وابد مو بواهس حلو