رواية حمائم تخشى الطيران الفصل الثاني وخمسون 52 - بقلم فاطمة العبادي

فاطمة العبادي ..

في #حمائم_تخشى_الطيران

قراءة ممتعة كيكاتي ..

......

يضل ذكرك خيال ويمشي وياي 
وطولي لغير طولك ماظن يلوگ 

وشيلك عَ المتن شيلة جنانيز 
وونّ عليك ون الجايها طلوگ

عله فراگك نمّت نوم النواطير 
واسولفلك حچي الماگالتَه حلوك 

يعيطه إلـ تِعبت حيل الصواعيد 
ومن تثگل تطخ يالطبعك عثوگ

....

نترت :- شنو التريده انت؟

ما رد بس عيونه تنكط سم وكره ، سكت لحظات وكانه يستجمع الحقد والسم
ويتذكر مواقف تشحنه وكبل رفسني بقوته ع بطني
وكعت ع الكاع اصرخ وما احس غير رجله تصعد وتنزل ع بطني يرفس بيها بكل حقد ...

شاغت روحي من الالم ويبست بمكاني نفس بعد ما كدرت اجر شمس صرخت وكامت ذبت روحها كدامي دفرها ع راسها خشمها طك دم

نفس بعد ما كدرت اجر احس بروحي ضليت انزف وظهري يتكطع
من الوجع

من باوعلي وشافني يبست هيج نصة جرني من شعري حيل وقرب رأسه من اذني همس بخبث

:- تعمدت اراويچ وجهي واخليج تشوفيني زين

وجهي مطعون من الالم ما كدرت اجاوبة ولا اتنفس زين اختنكت

رجع كال :- تردين تشوفين صور بنتج مصلخة مطشرة منا ومنا روحي كولي لرجلج عادل طيح طفلي

فكيت عيوني مصدومة دفعت ايده باوعت لشمس بصدمة خشمها ينزف وعيونها تجي ترجف
من الخوف

كتله بصوت متقطع من الالم :- چلب .. نذل ماعندك غيره
هز راسه لا :- ماعندي غيرة

كام وكف ع حيله نكت ايدينه وكال بدون اهتمام
:- بعد بكيفچ انتي

اشر للاثنين الويا وكللهم يلا شباب خلص شغلنا هنا

عوفو واذا بي زود يطلع سلاحه

اشر براسه علي قاسم باوعلي هزيتله راسي لا

عافو كام ينكت روحه ويركض علينا واني يابسة من الوجع

كامت شمس لزمتني من ايدي تگومني
:- كومي لا يرجعون يكتلونا

تحجي وتتلفت بخوف

قاسم :-هسة منين اجيب بطانية اشيلج

جريت نفس عميق ممرودة وحجيت
:- هسة اكوم. . ساعديني شمس

جرتني من ايدي حيل كمت ذبيت حملي عليها
وضليت امشي بس اخذني النزف ورجليني يرجفن
ظهري انحنى ما كدرت اوكف زين

قاسم يمشي كدامنا يتلفت وبأيده سلاحه ما اخذو منه الظاهر فعلا راحو

حقدهم علينا غريب عدهم مرض نفسي
يتلذذون بأذيتنا رغم احنه ما ظالمينهم بشي ولا ماذينهم

حقدو علينا وحطو رؤسهم برؤسنا وصار هدفهم يدمرونا ..

الانانية .. الطمع .. الغيرة هجمتنا هجم ودمرتنا
كل وجع بجسمي جان يهون عن وجع كلبي
احس نار شبت بين ضلوعي من كال صور بنتج مصلخة

سديت حلگي لان ماكدرت احجي شي كدام قاسم ادري بي ما سمع عادل

صعدوني بالسيارة وطلع بينا قاسم للمستشفى الوب طول الطريق ، كلت لقاسم

:- كول حادث لا تحجي شي هسة ولا تجيب طاري بشر اني احلها

قاسم :- شلون؟ راد يموتج هذا لازم يتحاسب

هزيت راسي اي وغمضت عيني بألم وحجيت
:- يتحاسب لا تخاف

هز رأسه وسكت شوية ورد سأل
حادث شنو اكله السيارة مابيها شي

:- اندعمنا واحنه نعبر الشارع والسايق شرد مو صعبة وما شفنا رقم السيارة

هز رأسه اي وخابر جبران كله سوو حادث وماخذهم للمستشفى اقرب وحدة .....
ضليت الواب واعض بأيدي متأذية

وصلنه للمستشفى بسرعة اخذوني فحص
كالت الي
عندج اسقاط

ضليت ابجي محروگ كلبي ومن الالم
اذكر ذاك اليوم كلش زين .. اذكر الحرگة الصارت بصدري كأنما نار وشابة

والغصة الجرحت بلعومي
ونار كلبي ع بنتي وانتظر اطلع منا واحطها واشوف شنو سالفتها واحلها

حسيت الموت وصل وروحي صارت بحلگي
بلعت غصتي وغمضت دمعتي حارة نزلت تچويني

الدكتورة كالت
يحتاجلج مراجعات عند دكتورتج لان متاذية والحمل بالفترات الجاية مو بصالحج ابد

هزيت راسي اي متأذية
كالت السستر راح نحولج للغرفة الحجزها زوجج

هزيت راسي بدون كلام .. ساعدتني اخذتني للحمام
لبست ملابس جابتهن عمتي وطلعوني كبالهم وجهي اصفر وروحي لايبة وجبران جان مطعون وجهه مخطوف علي

جبران:- الحمدلله ع سلامتج فدوة فدوة

رفعت عيني دورت ع شمس واكفة ع صفحة ملابسها كلهن دم صافنة علي خايفة نزلت عيني ع ايديها يرعشن

باوعت لجبران وحجيت بتعب
:- الغرفة المن؟ طلعوني للبيت كبل لا اتخبل

جبران :- علمود نتطمن عليج ونجيبلج طبيب يشوف وضعج خاف عندج نزيف داخلي من الحادث

هزيت راسي لا وكتله
:- رجعني للبيت مابيه شي

هز رأسه متحسر واخذوني للبيت تمددت بغرفة جوة لان ما اكدر اصعد بطني تأذيني وراسي مصدع

:- عمة عينج ع البنات ما تطلع وحدة لباب البيت بس ارتاح شوية

:- نامي. لا تحسبين
دخل جبران اجة كعد يمي مد ايده ميل شعري عن كصتي وضل يمسح ع خدي
:- جاي تتأذين?
هزيت راسي لا: -شوية

جبران :- لا تصوجين فدوة ما مقسوم النه الله يعوضنا

ابتسمت بألم :- بعدنا صغار نلحك نلحك

ضحك رغم مبين كلش مقهور نصة باس راسي
:- نامي ي صبي عيني نوم العافية
ارتاحي وشبعي راحة ولا تنقهرين ع شي كل الخساير فدوة دام مو انتي

:- اطلب منك شي

:- أمريني امر

:- نام يمي اريد انام بحضنك
حجيت بخنكة وغصيت بدمعتي

هز رأسه :- الف طلب من هذا الطلب
غير انه اكيف ع حضنج

ضحك وكام طفة الاضوية واجة تمدد حط ايده جواي ماكدرت ادور كام حضني واني ع نومتي
ميلت راسي خليته بصدره
:- اعذرني ما حافظت ع ابنك وكسرت فرحتك

:- ابننا ثنيناتنا لا تطلبين مني اعذرج لان ما بأيدج شي الصار قضاء وقدر مكتوب
الله يعوضنا حنينتي نامي

:- بعدين احجيلك شي بس ارتاح اول شي لان احتاج طاقة

:- عوفي كل شي وارتاحي

غمضت فترة وغفيت ، كعدت ع صوت عمتي تكعد بينه علمود ناكل
كمت ع كيفي غسلت بطرف الصالة اكو مراية طويلة تلفتت محد رفعت التيشيرت وشفت بطني غمضت عيني ونزلته بسرعة
بيها كدمات صايرات بنفسجيات بسبب رفساته

حسيت كل جسمي رجف من تذكرت الموقف
صاح جبران يلا حبيبتي

مشيت كعدت يمهم وحجيت واني اباوع بالوجوه
:- وين شمس؟

نجمة :- اكلت كوة ونامت متاذية راسها يوجعها

هزيت راسي اي وكعدت اكل
ايدي ترجف نزلت الخاشوكة حتى ما كدرت اوصل السوب لحلگي اشربه
جبران انتبه

جر الخاشوكة وهو شربني ضحكت خجلانة لان كلهم يباوعون علينا

لولوة سبلت عيونها وكالت
:- اووي فدوة عمو شكد حنون ورومانسي حرامات ماعندك اخو صغير

هي كالت هيج وهم ماتو ضحك عليها وعمتي تعضلها بشفتها عود عيب

:- لتخافين ماما عمج جبران يدورلج رجل مثله ولو ما اعتقد اكو نسختين منه

عمتي تحسرت وكالت بالم
:- جانت اكو بس كلتها نار الحاقدين وصارت جوة التراب

تحسرنا بالم هزيت راسي متحسفة واني اتذكر موقف عادل اليوم وكل شي مريت بي انعاد علي

غمضت عيني كلبي نغزني وبطني صلت تلويني من الي تذكرته
كمت ع كيفي
جبران :- شكليتي؟

:- شبعت ما اكدر اكل اكثر بس ارتاح ارجع اكل

علياء :- بعدها هسة ما تشتهي شي لباجر ترجع توب لا تخاف

هزيت راسي جبران  تحسر وكام
:- اوصلج للغرفة امشي

اشرتله يكعد
:- اكعد اريد اتمشى اصلا

هز راسه ورجع كعد طلعت من المطبخ اخذت الدرج ع كيفي صعدت وكفت كبال غرفة شمس مترددة اواجها هسة
بس كلب والدة شاب نار ع بنتها ما تحملت ااجل اكثر

دكيت الباب دكتين وفتحته بدون ما انتظر

دخلت امشي ع كيفي مديت ايديني ع المفاتيح شغلت ضوة شمس كاعدة لامه رجلينها لصدرها وتمسح بعيونها وشعرها منفوش
ضلت تلم بشعرها

سديت الباب وتقربت كعدت كبالها خلت عينها بعيني ورجعن دموعها طاحن وشفايفها ترجف
فتحت الها ايديني وبجيت
كبل شمرت روحها ع صدري وانفجرت تبجي بصوت عالي وتحجي بحرگة كلب

شمس :- والله ما سويت شي والله بس جنت اضوج من البيت واطلع افرفر وارجع هم كانو يراقبوني وخطفوني واختج صلختني بالحمام وصورتني بالكامرة فيديو والله اني ما رحتلهم ولا اعرفهم ولا عندي شي وياهم اقسم بالله ماعندي شي وياهم ماما ولا اريدهم يأذونچ اني غيرت نظرتي عنج من عشت وياكم بس ما انطوني فرصة ارتاح

مسحت ع ظهرها كتلها بغصة
:- اهدي وشرحيلي كل شي بالتفصيل

وخرت عن حضني تمسح بوجها وتباوع بعيني تتوسل اصدكها

:- سمعي اني مو اطلع افرفر واتعارك ويا قاسم علمود اطلع احب اغثه واخلي يركض وراي

هزيت راسي اي
:- هم طلعو يراقبون بيتكم وحياتكم وعرفو بوجودنا وضلو يلاحقوني لحد ما مرة اريد ارجع وطبكت علي تكسي رجال كبير بالعمر مبين من اهل الله وكال عمو تردين تكسي

شفته تعبان كلت هذا خطية يدور لقمة العيش خليني افيده وانطي فلوس كروة هوايه حتى يستفيد اكيد برقبته عائله ينتظرون رجعته مشتري الهم اكل

هزيت راسي اي مسحت دموعها مرة ثانية بدون فايدة لان ضلن ينزلن
:- صعدت ويا وطلع .. طلع .. ضلت تتأتئ من الخوف والقهر والحجاية ماتطلع لان تشهك

مسحت ع شعرها وضليت الم بي واباوعلها بحنية
كلتلها بهدوء
:- اهدي كل شي ينحل يلا احجي ع كيفج لا تخافين

هزت راسها اي جرت نفس ترجف
:- طلعو هم دازينه واني ما اندل اخذني لبيتهم كانو مجهزين كل شي بحيث من فات بالفرع ضليت دايخة كل البيوت مبينه بيوت راقية نفس البيوت الموجودة هنا حسيت اكو شي يختلف والله بس مااعرف اني ممركزة
وكبل فات لكراج واحد من البيوت صحتله لا عمو غلطان بدون ما افهم شي والله دايخة وما اندل ولا مركزة ضعت ضعت

طلع خاطفني اني بنفسي صعدت ويا وانطيته نفسي بسهولة

واختج الحيوانه ضربتني وهددوني بالسلاح
خلتني انزع ملابسي كلهن واني ابجي وصورتني والله حتى طالعة بالتصوير ابجي وارجف

وضلو يهددون بيه يردون معلومات عنكم واني من الخوف انجبر ابعث الهم واخير موقف ضغطو علي كلش كالو نفضحج اذا ما تستدرجينها

تعاركت ويا قاسم وطلعت وكنت اعرف راح تلحكيني
دزولي سايق ضل واكف ومن تقربت سيارة قاسم صعدت ويا حتى تلحكونا بس ما كنت اعرف راح يسوون بيج هيج والله
وحتى لو اعرف الخوف مسيطر علي

كلتلها بعتب :- ليش ما اجيتي وحجيتي الي كل شي وطلبتي مساعدتي؟

شمس :- خفت منج ومن عمو جبران وكلت هسة يكرهوني لو ما يصدكوني

هزيت راسي لا
:- انتي بنتي شلون ما اصدكج?

غطت وجها تبجي بحركة حضنتها لصدري ضليت امسح ع ظهرها
:- حقج ناخذه الج لتخافين

:- لا يفضحوووني والله يفضحوني صوروني بدون ملابس

:- شحدهم عمج جبران ذكي وسبع يحلها بدون ما تتأذين
:- مبينين ما عدهم ضمير والله خايفة فدوة لا تخلونهم يفضحوني مو بس فيديو حتى صور صوروني خاف يسحبونهن

:- تحرشو بيج؟
هزت راسها وكالت :- لا ابد

:- الحمدلله .. جريت نفس براحه

:- بعد ماكو طلعة وحدج ليش اني امنعج غير من خوفي عليج

:- عبالي الوضع متشابه بكل الدول

:- لا هنا صايرة غابة والله يستر من الجاي
حتى اليطلع ما يرجع

:- بعد ما اطلع هاي كعدتي بالبيت بس ليفضحوني

هزيت راسي لا
:- لا تخافين ماما ليش ما نمتي؟
نامي شوية ارتاحي راسج يأذيج لان ضربج ع راسج

هزت راسها اي :- اخاف انام تجيلي كوابيس بسببهم

:- لا بعد ماكو كوابيس نامي مرتاحة هسة امج وراج بظهرج اكبر واحد مايكدر يأذيج

هزت راسها اي سحبت الفرشة من جواها وتمددت
:- اكلتي؟

هزت راسها اي
خلت الغطة ع صدرها وضلت تباوع للسكف بس شفايفها ترجف من الخوف

وكفت حطيت ايدي ع خدها مسحت علي
:- لا تخافين ارتاحي انتي هسة بأمان وما عليج شي
امج بظهرج والله لو اعرف يكتلوني هم ما اخليهم يفضحونج

:- تأذيتي بسببي

:- اذيتي عليج كلبي يوجعني عليج شمس

بجت مبرطمة بقهر ضليت اطمن بيها واكللها ماعليج شي من اليوم ورايح لحد ما ارتاحت ونامت

طفيت الضوة وطلعت مشيت لغرفتي لكيت جبران كاعد بايده اوراق
ذبهن ع الميز وكام
:- وين جنتي

:- شفت شمس

:- باجية؟

هزيت راسي اي وجريته من ايده كعدته
:- هسة اريدك تسمعلي زين من اول حرف لأخر حرف
وتساعدني بدون تسرع

هز رأسه اي وعقد حاجبه مستغرب
بديت اشرحله كل شي صار من البداية للنهاية وكل شي حجته شمس
كام يريد يروح عليها يفهم منها اكثر جريته من ايده امنعه
:-نايمة كوة غفت صفرة ترجف

رفس الحايط برجله معصب والتفت علي يفور
:- هذول ما يجوزون؟ الا اذبحهم يلا نفتك من شرهم

:- مريضين النوب

:- جا شعبالج صاحين؟ هز ايده وضحك مستهزأ
:- بعد وبعد استغلو بنتج واخذو الله يعلم شنو من مستمسكات ومعلومات تخصنا واستغلوها جروج وسقطو الطفل حتى يقهرونا وراح يضلون يستخدمون فيديو شمس وصورها حتى يكسرون بينا

:- هسة شلون شنسوي فهمني اني اريدهم يحسون كأنما انت ماتدري

ضل يفكر ويفتر بالغرفة
التفت باوعلي وكال
:- اريد اضربهم ضربة قوية وجنت لازم ع عادل مستمسكات تزوير ومنتظر يصيرن علي هواي نقاط حتى اكسره كسرة قوية و اوكعه بحفرة مايطلع منها بس هسة لازم اطلع اواجهه وانطي كل شي لازمة ضده مقابل شرف شمس بنتج

لطمت رجلي بقهر :- صخام وتعبك وركضتك ورا كلها تروح نقطة بشط؟

زم شفايفه مقهور ورفع اكتافة بقلة حيله
:- جا شنو نخسر الضلو عدنا؟ احنه ما نريد نزيد الخساير سهير!! اذا طلعو فيديو شمس وصورها تنتحر لو تموت من القهر
وننفضح كلنا .. انتي منا وقيسي حجم الخساير

شسوي؟ التعب التعبته يولي وارجع اركض ورا ركضة ثانية وامري الى الله. عادل وهدير مرض سرطان

تنهدت مقهورة فكرت شوية وكتله بتساؤول
:- معقولة عرفو انت لازم عليهم لزمة وسوو هيج حتى تضطر تحط كبالهم فضايحهم وتاخذ فيديو شمس وصورها

باوعلي صفن بوجهي لحظات وحط ايده ع خاصرته
:- جائز .. انه ما استبعد هذا الاحتمال وبكل الاحوال احنه رجعنا طحنا بمستنقعهم الوصخ الله يهلكهم ان شاءالله

تنهد ضل يفرك راسه مقهور ويفكر

:- ماكو غير حل لا تكليلي سجن وقضاية ذول واحد ابليس يطلعون منها لان وراهم ظهر قوي
ما يهتزون بسبب هيج قضية ابتزاز وخطف

:- خاف يغدرونك؟

:- حسبت حسابي وراح انسخ كل شي واكون متهيأ لأي غدره منهم
هذول ما يحاربون بشرف خايف منهم اكثر من ما تتصورين

هسة خوفي زاد
خوفي منهم عليكم مو شي ثاني

عض ايده مقهور وكال
:- اتمنى هسة اشرب من دمه

باوع للساعة وكال
راح اخابره اتقابل ويا ونتفاهم

شيهانة :- وابني الوكع؟

:- ما افوتها اله هذا ثاره وحده

راح يطلعله ملابس تمددت خايفه علي
و ع شمس وباقي اولادي وبيت عمي
شياطين يلعبونها بخبث ومكر ويتمكنون من عدنا
النظيف ما يكدر يغلبهم

غمضت عيوني سمعته طلع من الغرفة ضليت اكل بروحي اكل
وعيني ع الساعة كلبي يوجعني خايفه
ساعة ورجع متنرفز كال بغصب

رفض يقابلني وخله موعدنا باجر

:- حسب حسابك خاف يكيد الك لو شي

هز رأسه اي ..

مقهور وجهه احمر وحواجبه معقودة ما انفكن
رجع طلع ضليت محتارة بوجعي من جهة وشايله همهم من جهة ثانية

......

ليلى ..

ضليت صافنة علي شنو نروح للغربية
مشيت ورا لحكته للغرفة وكتله

:- شنسوي بالغربية؟

بدون ما يلتفت حاجاني :- مو كتلج ورا عرسنا نسوي عزيمة بالغربية احنه الزفة وحيدها ما تفيدنه

هزيت راسي وجريت نفس
:- وشكد نضل؟

:- يوم

:- هااا ما اريد اخذ هادي وياي للغربية يتعب من الطريق وهم افضل يضل يم اهله لان ابو مريض

:- كيفج اخذو الهم قبل لا نروح

:- زين بيش الساعة نطلع

:- من الصبح حتى نوصل من وكت دحكي هين
باوعتله مستغربة

اشرلي ع الفراش
:- راسج من تحطينو هينه انتي حرمتي و ع ذمتي ما تتسالين عن زلمة ثاني

:- شوكت متسأله اني

كال بغضب :- غشمي نفسج غشميها

صفنت علي بتفكير
:- قصدك سألت هادي عن ابو؟

دار وجهه بدون جواب تلقائيا لكيت نفسي ابررله
:- والله ما سألت هو هادي سولف وردت اعرف الاخبار ترة العشرة ما تهون بس ع ابن الحرام

التفت خازرني :- اش سكتي حسچ ما اهيسو

:- شحجيت هسة ماتگلي؟ استغفر الله هذا هم حظي دومي انفهم غلط واتحاسب

درت وجهي وطلعت ضايجة .. ضليت الوم بروحي لان سألت هادي عن ابو هسة اني ليش ما اسكت?
شو من طلكني وراح تزوج فاطمة ولا سأل عني ولا اهتملي ابد
جنت ببيت ابو محمود وعانيت كومة وجبت وضليت شهور ورا ولادتي لا اجة ولا دك الباب ولا سأل
حتى صدكت راجع للعراق لان كطع فد كطعة اتصال ما اتصل

ليش هسة اني اسأل علي؟ ليش كلبي ما ينطيني بس هو كلبه انطاه ونساني فرد نوب

ولو ما راجعة لبيت السادة وياي هادي جان ما رجع يطالب بيه وضل ملتهي بحياته بعيد عني

اتمنى اصير مثله وما اسأل ولا اشيل همه اتمنى

ورا فترة طلع حرب لگاني اكص كيكة لهادي
طلع للحديقة كعد سويت جاي واخذت الكيكة وهادي وطلعنا كعدنا يمنه

خله ايده ع راس هادي يشاقي ويبعثر شعره
خليت كدامه الجاي باوعله وباوعلي بسرعه ورجع يحاجي هادي يسأله عن هواياته

خاط الكوب وشرب منه شوية
كصيت اله قطعة كيك ومديتها اله ما فشلني اخذها بس بدون ما يباوعلي واكلها

هادي گله :- طيبة الكيكة مو صحيح
حرب :- ايي والله
هادي :- ماما احسن طباخة بالدنيا

حرب :- والله بعدنا ما جربنا غير الكيك ما نكدر نحكم على اللاعب من اول هدف

هادي :- تسوي برياني يجنن ماما بعدين سوي لعمو منه والله يحبه
:- ان شاءالله حبيبي

هادي :- زين عمو انت تضل يمنه ماتروح

حرب :- لا مو كتلك اني وماما راح نتزوج واعيش وياكم

هز رأسه هادي :- افهم .. بس ماعرف شلون تتزوجون يعني انتم هسة تزوجتو

حرب. :-اي
هادي :-حلو اتونس وياك وحدنا نضوج

ضحكت وغطيت حلكي
هادي اكل كيك وسوا بايده اوكي
وكال :- عمو والله ماما احسن طباخة

حرب :- بس الطباخ المعدل المفروض ما يسال ع الوصفات يقلل سؤال حتى يثبت نفسو
باوعلي بنص عين

ليلى :- الطباخ تعلم الدرس وبعد ما يسأل

نرسمت ع وجهه ابتسامة بسرعة خفاها
دخلت سويت عشا وعفتهم مندمجين

تعشينا وخلصنا هادي سأل حرب عن ابو اني صفنت حرب شمدري يا هادي؟
كاله حرب باجر الصبح ناخذك يم بابا
باوعلي وكال انطيهم خبر خاف نايمين الصبح

هزيت راسي لا
:- يكعدون من الصبح

هز راسه اي دخل هادي ينام اني رحت بدلت ملابسي وتمددت وحرب كاعد ع التلفزيون حسيت روحي بردانه وراسي يأذيني

كانها بداية فلاونزة وعلاج ما عدنا حتى اخذ غلست ع روحي وغمصت حتى انام
غفيت ماادري شكد وحسيت حرب دخل للغرفة وتمدد كعدت ع حيلي باوعتله وحجيت

:- بردانة

:- تردين الفج بين ذرعاني وادفيچ بناري؟

:- لا مو هيج قصدي حرب يمكن تمرضت فلاونزة وسخونة شلون نروح باجر للغربية اني اتعب والله

كعد مد ايده ع راسي وكاال
اخ مصخنه يول هاي البارحة كتلج تتمرضين طالعة تفترين بهدوم خفيفة عندج علاج

هزيت راسي لا وعطست
:- الحمدلله
:- يرحمكم الله
:- اثابك الله

:- راح اطلع اشوفلج صيدلية قريبة اجيبلج منها علاج

:- لا وين طالع لو ناجل الروحه لان ادري للصبح تزيد

:- يول ذابحين وعازمين الاوادم هساع خليني ادورلج علاج بكل الاحوال اذا صبحتي تعبانة ما ترحين

:- مو تكول عازمين

:- اي اني اروح استقبل الاوادم والنساوين خليهن بغير وكت يشوفنج

هزيت راسي وتمددت جريت الغطا تلفلفت زين بردانة كام يلبس واخذ السويج وطلع
غمضت دايخة شوية وغفيت ما كعدت الا ع صوته يندهني وايده تطبطب ع خدي

حط ايده جوا راسي رفعه ودفع الحباية بحلگي
وقرب كلاص الماي من حلكي خليت ايدي فوك ايده شربت

حرب :- وياي ابوية واعية

:- امم نعسانة ودايخة

:- نامي عجل

هزيت راسي اي رجع راسي ع المخدة حسيت شي بارد ع كصتي
فتحت ورفعت ايدي تلمست مخليلي كمادة

رجعت نمت بسبب الدوخة سيطرت علي كلش

كعدت ع صوت المنبه مخلينا الصبح هو نايم بمكانه فز ع الصوت شلت راسي تمغطت جسمي مكسر طفيته

باوعتله مفتح تك عين نعسان
كتله صباح الخير
:- صباح النور

:- احس جسمي كله متكسر يأذيني

:- من الصخونة الاجتج باليل

كعد حط ايده ع وجهي
:- لا ماكو زينة الحمدلله ترحين لو لا

:- لا اروح زينة بس شوية جسمي يأذيني

غمزلي بوكاحة :-اسويلج مساج

فكيت عيني وشهكت :- منحرف

ضل يضحك كمت اتلوة من جسمي رجعت شمرت روحي بالفراش
:- بعد وكت شوية وكعدني النوب فاتتني الصلاة
اووف

غمضت عيوني اسمعه كام طلع ضليت نايمة شوية ورجع كعدني
:- كومي تاخرنا هم ياله نروح ونوصل ع وكت

كمت متكاسلة جريت روحي كوة غسلت وجهي شميت ريحة اكل فتت للمطبخ لكيته مسوي مخلمة
مشيت كعدت هادي غسلتله وهو يطكطك بالمطبخ يحضر اكواب الجاي ويجهز السفرة

حضرت ملابس الهادي ع ما غسل كتله نتريك بالاول يلا تبدل زفر

اخذته للمطبخ تريكنا بسرعة وبدل لهادي وسبحت وجهزت نفسي ع السريع وجنت مجهزة جنطة النه اني وحرب بيها لبسة لكل واحد

اخذها خلاها بالسيارة طفيت البيت وطلعت ورا
صعدنا واخذنا لبيت السادة كبل دك الباب شوية وطلع هاشم باوعتله سلم علي وجامله
وبعدها نزل هادي من ايده وانطاه لعمه ورجع صعد

وطلعنا للغربية ..الطريق طويل ضلينا نسولف اول شي عن هادي وبعدها سالفة جرت سالفة لحد ما دخنا وسكتنا

خليت راسي ع الباب وغمضت
شوية وحسيته مد ايده ع كصتي وكال
:- اناخوك رجعت صخنت لو ما جاية احسن بالبيت ع الاقل تاخذين علاج وتضلين مرتاحة

ليلى :- لا زينة ما احس بتعب

:- غير صرتي دجاجة

:- شنو شفتني اقاقي شبيك انت

:-خنجرتي كلش شوية وتقاقين صدك

ضحكت وسكتت فتحت الجنطة طلعت علاج اخذت
وصلنا ضل
يسولفلي واشوف الاماكن ويحجيلي هينا بيت عمي فلان وهين بيت خالي ومستمر يشرح

الى ان وصلنا لبيت اهله بيوتهم كلها كبار .. وبيها حدايق
استقبلو حرب كأنو اليوم عرسه هوسات يهوسون بالشارع. وذبحو

اني اخذني دخلني جوة كلش خلاني بايد ام دلال وغمز الها
:-بأمانتچ صارت

ام دلال :- لا تشيل هم

اخذتني جوة اسلم ابوس بالنسوان وارجع ليورا
حسيت روحي تعبت وهاي بنت عمه وذيج بنت خاله
سلمت ع زوجة اخو الكبير
طبعا اخو الكبير مشلول من سنين حتى بزفتنا ما حضر بس عنده ابناء وبنات كبار بعمري واكبر مني

مرته اسمها حفصة خوش مرية مبينه فقيرة ومن اهل الله

گعدت يم حبايبهم وامه گلبت الوجه من شافتني حاطة راسها براس اختها وتبسبس

اختنكت كلش وام دلال اختفت بالمطبخ
نزعت عبايتي وخليتها يمي اجت بنت اخو حرب كالت عمة انطيني عبايتج اخليها بغرفتي
:- عفية بس خليها ع ايدج خاف يفوتون زلم شي

:- لا شحدو ليوصل عمي يكضبو ينسي حليب امو هههههههه بعد حرمتو بالبيت يغار

ردت وحدة من بنات عمامه
:- والله يذبحنا لو واحد دحك ع حرمتو

بنت اخو كلتلها :- حقو عمي يغار عليها تا اشوف اميرة كاعدة شكد حلوة محظوظ عمي

ليلى :- شكرا حبيبتي تسلمين

ضليت كاعدة اندمجت ويا كم وحدة من بنات عمامه زينات عكس بنات خواله يباوعلي بنظرة مادري شلونها بين قوسين يكرهني ع كره ام حرب الي

صار الغدة ومدو سفرة بالاستقبال بس للنسوان الكبار واني وياهن لان العروس
ضلن يسألن بيه عن اهلي وناسي وعمامي واني اجاوب

من سالني ع الدراسة كتلهن السنة الجاية ارجع اداوم جامعة

كالت امه
:- شنو تداومين جامعة وابني منو الو وين تلحكين ع البيت والدراسة وهذا حرب ترى كلاص الماي ما يجيبو النفسو يحب واحد يخدمو وين تلحكين

:- اصلا جنت رافضة بس هو قنعني ارجع ادرس واصر علي ارجع

:- عاميتو عمي ..

حماتها لكزتها سكتت وكالن الله يوفقج ..

رجعت خالته سألتني شعجب حرب رادج وانتي مطلكة؟ وعاف كل هاي البنوات شوفة عينج تارساتو للبيت وكلهن ما متزوجات

:- خالة والله ما اعرف هو شافني ورادني واجاني راغب وهاوي ومشتاق

عمته ضحكت:- واكع ع وجهو ابن اخوي بس خوش ذوق ذوقو معدل

رجعت خالته حجت ما عاجبها
:-الشكل مو كل شي الانسان اهم شي سمعتو طيبة
حجتها وباوعتلي بنص عين

ذبيت من ايدي وكتلها
:- ليش شبيها سمعتي؟ اني اطالبج بالاحترام من تحجين وياي ما تايهة لحضرتج ولا جايبيني من الشارع

ضحكت وهزت ايدها باستهزاء
:-وخالتچ الركاصة ما ادري ام الدعارة غير معروف اصلج ومعروفة من يا بيت طلعتي خليها سكته

نفضت ايدي من الاكل وكمت طلعت من الاستقبال كله مخنوكة كبل للحمامات غسلت ايديني باوعت لوجهي انطعن انمردت مرد
هاي شلون منين عرفت بخالتي

شلون وصل خبرها لهنا
شفت طفل نصيت كتله تعال يا وليد
هز راسه واجة

:- صيحلي لحرب كله حرمتك تريدك

:- خوش

راح يركض مشيت للمطبخ بناتهم يحجن وصوت هوستهن عالي من شافني سكتن
وصفنن علي
وحدة منهن كالت شنو محتاجة حبيبتي؟
كلتلها بصوت مخنوك
:- حرب

:- هساع ندز واحد يصيحو الج

:- لا ما يحتاج دزيت طفل

ضليت واكفة مختنكة وهن سكتن شوية واجة يتحمحم يم الباب مشيت اله يحجي وهو داير وجهه عن المطبخ
ويفر بسبحته
:- ها ابوية دازه علي؟

حجيت بصوت مخنوك
:- انهنت بنص بيت اهلك رجعني لبغداد هسة وبعد ما الي دخلي لهذا البيت

التفت نص التفاته باوعلي وعقد حاجبه
:- منو وياج احجي منو هانچ؟ الا اهينو

بلعت ريكي مخنوكة :- خالتك .. تكلي كلنا نعرف باصلج ومن يا بيت طالعة
حرب رجعني لبغداد

:- يا خالة منهن؟

:- ما اعرف رجعني

:- كتلج يا خالة منهن؟

:- والله ماعرف اسمها بس شكلها

هز راسه وصاح
:- فرغن .. فرغن اريد ادخل سون درب

:- لا عوفها لا تسوي مشكلة هسة يكولون اجت من اول مرة سوت مشاكل

:- عجل يهينون حرمتي ويطعنون بشرفي واسكت؟ ما عليه شارب والله

البنات طلعن نصهن ونص لابسات حجابات دخل هو للاستقبال
اول ما دخل للاستقبال كامن يسلمن علي
من كملن كللهن وهو منفعل معصب وحواجبه معقودة

:- اريد اعرف السامعة حجاية عن حرمتي واصلها منين سامعتها؟ وكبل لا تجاوبني
راح اكللجن
اشر علي بايده
:- هاي بت ناس اجاويد وخيرة وطالعة من عائلة الناس تحلف باخلاقها واني ما اسمع لكائن من يكن يجيب سيرة حرمتي بالموزين وان كانت امي

هاي البنية شرفي وعرضي والحجاية التمسها تمسني
واليطعن بيها يطعن بيه

هساع هيه انهانت واني انهنت وياها

واريد اعرف منين سمعتن الحجايات المالهن صحة وذبيتنهن ع حرمتي لا وحك سبع الدجيل اطشركم طشار واخلي ناري تاكل الاخضر واليابس

ام حرب :- شسالفة محد حجة وياها شي كبل ركضت شحنتك

حرب :- ليلى ما تجذب

ام حرب :- ترة حجاية طلعت من ابن عمك يعرف صاحب صهيب ومن ملاكي كايله شنو هذا ابن عمك حرب عاف البنوات كلهن وركض ع هاي سمعتها ما زينه حتى صهيب الله يرحمو طلع يعرفها لان صاحبو لابن عمك كايلو مرة شفناها بالمركز وصهيب مساعدها لوجه الله

حرب :- ابن عمي؟

ام حرب :- عزام ابن عمك

بدون ما يرد ولا بحرف طلع برة وامه وخالته گبن علي وعماته يدافعن ويحجن ع خالته
كلتله عمته ما احترمتي نفسج وبت الناس سويتي مشكلة و شبجتي لحية بلحية من ورا لسانج الزفر

وهي الهوسة كبت بيناتهن وبنفس الوكت من برة

بس يستاهلون لان ما تستحي هانتني وذاك ما يستحي يحجي بشرفي وهو ما يعرفني حتى

شوية وهذني نص طلعن ونص راحن للمطبخ
وخالته تفلت وكالت
لا بارك الله بالبطن النگلتچ

وعمته جرتني للمطبخ لان ضليت ابجي غسلت وجهي بالسنك

وكالت باستغراب
:- منو مخلي هاي السجين ع الطباخ

حفصة :- حرب كال حطي سجينة ع الطباخ اريدها تحمه وطلع

عمته كالت مستغربة :- شيسوي بيها
ورجعت تكمل
همزين ام عزام بالعمرة جان هسة دهرتنا ويا ام حرب

مديت ايدي سديت الماي وهي كالتلي بعتب
:- لو ما كايلتلو هذا نار ما يسكت والله لو ... ما كملت كلامها ودخل حرب ساحله واحد مكتول وحال الضيم حاله

نتر بينا طلعن منا

اني ركضت ويا البنات بس ضليت اباوع من الباب عمته تريد تهدي ودخلو هواي ولد يحجون ويا

جر السجين من الطباخ ولزم فكه حيل ونتر
:- طلعو للسانك لا اكصو والله
والولد اصفر وعينه زركه والولد يجرون بحرب منه
وهو رجع لزمه حيل ونتر طلع لسانك
وهذا بكل طاعه طلع لسانه وجاب السجينة الحمرة خلاها ع لسانه وگال بغضب
:- حتى ما تجيب سيرة حرمتي تاج راسك ع لسانك الزفر مرة ثانية
هاي المرة حركتو مرة الثانية اكصو ....للحكاية بقية

رايكم بالقصة يهمني 🖤

اعرف هذا البرتوت قصير 🥹 لهذا السبب باجر راح انزل باااااارت تعويض 😁