رواية حمائم تخشى الطيران الفصل الحادي وخمسون 51 - بقلم فاطمة العبادي

فاطمة العبادي ..

في #حمائم_تخشى_الطيران

قراءة ممتعة كيكاتي ..

دنيا ..

خابرت امي من البيت ع مبايل مؤمن انطانياه وطلع حتى احجي وياها براحتي

اول ما سلمت كالت وهي تلهث تعبانة
سميرة :- ولج دنيه يمه تعالي يمي عينيني ع هادي و ع ضيمي اليوم صعب وما أظنه يمر ع خير

دنيا :- بس اشوف مؤمن شبي صوتج شو ترجفين
سميرة :- ضغطي صاعد راح اطك واموت
دنيا :- قيس بي شي يمه؟

سميرة :- لا حبسوه اخوتج فوگ لو يجي مؤمن وياچ تسوون فضل
دنيا :- هسة انزل اشوفه واجيج

نهيت المكالمة ونزلت ادور مؤمن طلع بوجهي اباذر
نزلت ردان دشداشتي زين وسألته
:- ما شفت مؤمن؟

هز رأسه اي وهو منصي ورد
:-طلع يرش الحديقة

:- هاا مشكور

طلعت لگيته واكف يرش بالشجرة قطرات الماي تتناثر ع الاوراق وريحة الزرع تجنن
حطيت ايدي فوك عيوني وخصمتهن عن الشمس وصحتله
:- مؤمن

التفت الي ونزل الصوندة من ايده :- عيونه

ابتسمت وتقربت منه مسافة حتى يسمعني
:- امي تريدنا تكول تعالو عينوني كالت ياريت مؤمن يجي وياج علمود قيس لان حابسي بالغرفه

ذب الصوندة بالكاع وضل يصفك ايدينه يطيح منهن الطين
:- شبي قيس هاد ولازمينه لو شنو

:- عليمن يهد؟ بس خايفين يتسرع ويسوي شي صاير يتصرف بدون تفكير

نصة جر الصوندة يغسل ايدينه ورافع عيونه علي يسألني مقهور
:- هي تتزوج بالبيت مالها معقولة تسويها وتجي بزفتها علمود تقهر قيس

دنيا :- لا ليلى ما تسويها بس خوفك من رجلها كلشي يطلع منه واكيد هي ما بأيدها شي اذا هو قرر واصر عليها

استقام بوكفته واجة علي لف ايده ع اكتافي ودارني حتى نفوت للبيت
:- حرب يدك حتى يكسر قيس مبين من شفته بالمركز يباوع لقيس بشماته
يتشمت بوجعه وكسرته اكلج شي يدور براسي

هزيت راسي اي
:- ما احب ادخل بنواية الناس وحرام
بس ما ادري استغفرالله اشوف حرب متزوج ليلى حتى يكسر قيس مو اكثر
مثل الانتقام ..

دنيا :- قيس ماله ذنب بانتحار اخو
مؤمن :- اتوقع حرب يشوف قيس وليلى سبب دمار صهيب وشايل بگلبه عليهم وبهذا التصرف يحس روحه رجع الضربه لقيس
يعني شلون انت اخذتها من اخوي ودمرته
هسة اني اخذتها منك ودمرتك ..

تنهدت بضيق :- الك الله يا قيس بس لا يصير علي شي من القهر
دنيا :- الله يساعد كلبه ويصبره صعدي لبسي انتظرج

هزيت راسي وصعدت لبست بسرعة ونزلت عمتي لكيتها بطريقي كالت انتظروني اجي وياكم
لبست بسرعة وطلعت ويانه لاهلي

اول ما شافت امي .. دموع امي نزلت وشبكتها مقهورة كلتلها بحسرة
:- انكسر الولد وانهد حيله هد كلبي حاطته بشيشة اخاف ع ساعة يطگ ويموت من القهر

ام مؤمن :- الله ينطي الصبر وينه ابنهم
سميرة :- ذاك يلعب ويا الجهال

اشرت باوعنه علي مندمج عادي
كعدت عمتي وذبت عبايتها من راسها ضربت ع ايدها مقهورة
:- النوب المصيبة جايبة الطفل هنا لو مخليته يم خالة ليلى احسن
شلون هيج تتصرفين ام مصطفى ؟ هسة كل ما يشوفه قيس يتذكر الولد جايبينه حتى امه تعيش ايام عرسها ويا زلمة ثاني

سميرة :- غير كلبي نار بس شوفته يمي ترد روحي احس ما خسرناه

:- ما تخسرونه داده ابنكم .. ومرجعه الكم
اوف تؤ خطية يلعب ما يدري امه تزوجت

دخلت حنان شايله سراحيه ماي وكلاص وكالت
:- شسالفة خطية المرة متزوجة مو ميتة طولة العمر الها لا تصعبن الامور وهي سهلة واذا مو اليوم زواجها بعد سنة سنتين هم تتزوج هاي سنة الحياة

ام مؤمن :- بس صعبة ع الواحد امه تعرس كباله

حنان :- لا صعبة ولا ابوها جبير
كعدت وحطت السراحية كبالها واسترسلت بالكلام
:- البنية صغيرة بعدها ما صارت 30 سنة حتى
ويتيمة .. تريدلها ظهر يسندها تريدلها زلمة يرد عنها الوحشة ويوكف بوجه اليتعرض الها ويأذيها
وهذا حقها لا تصعبونها امه تزوجت مثل ما ابو تزوج

ام مؤمن :-والله يا حنان ما ادري شنو اكلج بس اني اشوفها صعبة مو بس ع هادي حتى ع قيس اليوم صعب علي الله يكون بعونه

حنان :- والله حيرنا قيس وسحن گلوبنا سحن
اذا هيچ يحبها ويريدها ليش طلكها وركض تزوج؟
ليش ما ضل وحيد وخلة بيناتهم خط رجعة؟

بعدين ليش كلجن تفكرن بقيس ومشاعره ولا وحدة فكرت بالمرة
ع الاقل ليلى صارلها سنين وحيدة شكد صارن 7 سنين? لو مو سبعة؟ سبع سنين بعيده عنه ومنفصلين وهسة يلا دخلت لحياتها زلمة ثاني
بس محد فكر بيها من حطو بحضنه عروس وهي توها مطلگه ماصار كم شهر

امي لطمت ع رجليها وكالت بأستنكار
:-حرام والله اني فكرت وحسبت وما رضيت وانتي اول وحدة تشهدين

حنان :- انتي فكرتي غيرج ما فكرو ولا لامو قيس
الجانو ساكتين من تزوج قيس هسة طلعو حجو من تزوجت ليلى وضلو يلومون بيها

ام مؤمن :- والله اني ما لمتها شعليه ياهي مالتي بيها بس احسب بقيس وهادي مو اكثر

حنان :- حقج ما سمعتي العلوية نرجس من اجت وشافته مريض ماضلت حجاية ما ذبتها ع ليلى
وتصيح شبيها مفلفلة ع الزلم ما ضلت ع ابنها لو الا رجولة يلا يرتاحن نسوان اخر وكت
عمتي شهكت مصدومة

حنان :- وعبالج سكتت الها؟ لا ما سكتت كتلها بنتج هم ترملت ورجعت تزوجت مرة ثانية هم مفلفلة ع الزلم؟
وبنتج بركبتها 3 مو واحد

وهدت علي وتعاركنا اني وياها اخير شي اجة عمي السيد وشرحتله الصار تعارك وياها وطلعت زعلانة من البيت

امي باوعت لعمتي :- ما تشوفيني راح اموت؟ والله لو عليه اكول خطية حقها تعيش حياتها بس كلبي ما يتحمل اشوفها ويا زلمة غير قيس
نهت كلامها وعيونها ضلت تجري

رفعت شيلتها تمسح بعيونها والدموع ما توكف
حنان :- عمة كل احنه ما تنطينا كلوبنا ولا نتقبل بس قيس هسة عنده مرة وجهال ثنين اذا يرجع ليلى تطلك فطوم وهم تاخذ زلمة غيره ما تضل
منين ما تجيبينها صعبة ع الاقل ليلى غريبة طلاكها وزواجها من زلمة ثاني اهون من فاطمة

سميرة :- والله ماكو اهون ثنينهن نار ع كلبي خصوصا ليلى لان قيس يحبها وخاف يصير بي شي هسة
:- لا اسم الله كلشي مايصير بي ويتعود ويرجع فاطمة ويستقر وياها ويتأقلمون ع الوضع الجديد

ام مؤمن :- زين هسة عرسها وين
سميرة :- مريت عليها كالت تعرس بالبيت مالها فترة لحد ما يكمل بيت رجلها وينتقلون
ردت اكللها صعبة علينا وسكتت شفتها متفشلة وما راضية كلت يمكن رجلها ضاغط عليها

دنيا :- اني هم هيج توقعت .. الله يسعدها

دخل مؤمن ومصطفى سلمو وصعدو لقيس ضلينا كاعدين نسولف عمتي تصبر بأمي وتهون عليها
راحت عيني ع هادي يلعب ويا الاطفال وفرحان يضحك
رجعت التفتت لامي كتلها
:- شعجب قيس تنازل عن هادي الها توقعته راح يستغله ويستخدمه ورقة ضدها

سميرة :- علمود ابوج يتبرأ منه
كله ابنك ماتاخذه منها بالغصب تكعد وياها واذا هيه قبلت تنطي الك تاخذه
واذا ما قبلت تسد حلكك وتسكت انت الطلكت بدون ما تلتفت وهي الي تحملت ضيم وضلايم علمود هادي ما تجي تاخذه منها بالغصب ويصير بايدك ع البارد

حنان :- هو قيس لو ياخذه منها بالعباس ليلى تموت لو تسوي فلك غير شبعت مرررر علموده

سميرة :- اي مالة الله البنية اولى بي من قيس
بس كون هذا الزلمة زين وما يأذي البنية لو هادي
اني كلت امر عليها احجي وياها اكللها اذا الولد موزين هادي خلي يمي اني احطه بعيني

ام مؤمن :- ما اعتقد يكولون هذا الزلمة مشتريها بالغالي

سميرة بحسرة :- وابني باعها برخص

تحسرت وخلت ايدها جوة خدها فترة وسمعنه صوت موسيقى واغاني وهورنات
الاطفال ضلو يكمزون ويركضون للباب عرفو هذا صوت زفة

امي فز كلبها واصفر لونها اني وحنان طلعنا صحنا بالجهال دخلناهم واحس گلبي يدك بقوة سكينة ركضت بسرعه فوك لحكناها نباوع من الشباك

بيت ليلى ما يبين بس السيارات هواي وكفن بالشارع نصهن مبينات ونازلين منهن شباب شي لابسين رسمي مرتبين وشي دشاديش وغتر وضلو يهوسون بالشارع
شعلو الجو شعل صوت الالات عالي وهوستهم واضحة

حنان خرطت خدودها وهمست
ربي سترك ربي سترك لا يموت السيد

سكينة :- شو م دا يسكتون شسالفة
وفاء :- اذا ما يسمعنا شبيج انتي ولا يسكتون

فتحت الشباك حتى اسمع بوضوح واباوع شكثرهم وكلهم ع فد هوسة
"حرب خذاها... والنية صافية
ما حب غيرها... وعينه عليها وافية"

"اللي حبها ... اليوم صارت يمه
حرب ما يتراجع... والكل تشهد بأسمه"

وفاء :-عزة شلون هوسات همزين ما ينسمعن واضحات

سدينا الشباك البنات نزلن رحت اني يم باب الغرفة وكفت خليت ايدي ع العروة وفتحت الباب
صارت عيني ع مصطفى واكف يستغفر وجهه احمر

وقيس كاعد مرتجي ع الكنتور يضرب بأيدينه ع راسه
لزمه مؤمن من ايدينه گوة تهستر
عيونه تجري وضل ينحب عليها نحيب ويصيح بحركة
:- ياااا بووووية ولك ياااابة راحت ليلتي يااااابة

فلت ايدينه من ايدين مؤمن ورجع يضرب ع رأسه ويصيح بحرگة
:-طلعووو سكتووووووهم شبت نار بگلبي
فرحها حرگ روحي حرگ

مؤمن :- تعال وياي نطلع بالسيارة فترة ونرجع

قيس :- گلبي شب نار
قبض ايده يضرب ع صدره بحرگه وعيونه تجري بدون توقف
كل كيانه يرجف
ايدينه. . شفايفه ترجف
واكتافه مو ثابته تهتز من يبجي

مصطفى :-كافي قيس شد روحك وصير زلمة كلف
كافي ماضل شخص ما تفرج ع ضعفك وصرت علج بحلوك العالم كلها تكول سيد ورجل دين مرة لعبت بأحواله وخلته يوكع قتيل

قيس :- مو اي مرة مصطفى هاي ليلى

مصطفى :- خوية ليلى ما عادت تهوى قيس
و قيس لازم يغير طريقه هسة

قيس :- شنو اغير؟ واني روحي تفرفح بس من ينجاب طاريها خوية احس گلبي راح يوكف يوجعني تلاحگلي يا ابن امي

مصطفى جر نفس رجف فكه نصة علي خله ايده ع ظهر قيس يمسح علي ويحجي ويا بهدوء

:- قوي گلبك فترة وتتعود ع هذا الوجع لدرجة تصير ما تحس بي

:- صار سنين وما تعودت احبها مصطفى اعشكها لحد قطع النفس

:- بس هي صارت نصيب غيرك

:- عساها ما تهنت ويا وكون يعوفها اليوم قبل باجر واني اخذها

مؤمن :- من جانت بأيدك ضيعتها .. ومن صارت بأيد غيرك ضليت تدعي حتى ترجعلك؟ حرام عليك خليها تشوف حياتها مثل ما شفت حياتك

باوع لمؤمن صفن لحظات وشال ايدينه حيل ضرب ع راسه وصيح
:- الليلة تنام بحضن غيري ولكم الليلة تنام ع ذراعه يانار گلبييييي

وجهه شحب اكثر غص بدمعته ورجع صاح
:- هاي هيه صارت ع ذمة واحد غيري انتهت
ضرب ايد بأيد متحسف وغطه عيونه بساعده يبجي
:- تزوجت غيري صارت حلاله
جانت حليلتي وروحي ونفسي جانت عشكي
تصيحلي سيد كلبي
جانت خاتونتي .. صارت لغيري بعد ما الي حك بيها ولا اكدر ارفع عيني عليها

ولكم ما اصدك حرمت علي وصارت حلال لغيري
الجانت تنام ع صدري الليلة تنام ع صدر واحد غيري يااااا ابو الحسن .. ياااا عليييي
دخيلك يااا ربي طفي نارررري

مؤمن :-كافي سيد انت صحتك موزينة كلبك راح يوكف اترك موضوعها واطلب العوض من الله

هز رأسه لا وصيح :- شلون تردوني استوعب واتقبل الجانت تموت علي واموت عليها وحضني بيتها وامانها
راحت لحضن غيري

اجة صوت هامس من وراي
مرتضى :- حضنه بيتها وامانها ! هو طلعها من حضنه وشمرها بأكثر وكت جانت محتاجته بي وهسة يبجي

هز ايده ما قابل وراح جان واكف وراي ويسمع بدون ما انتبه
تنهدت وحسيت كلبي خلص من القهر طلعت كعدت ع صفحة خليت ايديني ع وجهي وكلبي يرجف
اسمع صوت ألمه من داخل الغرفة

تجمعت الغصة ابلعومي كل ما اسمع صوته مختنك يكح وصوته يرجف

تقريبا ساعة زمان وهدأ كلش .. طلعو الولد
مصطفى ناطي حباية منوم غصب وهو من تعب ذب روحه نام

الحزن مغيم ع البيت وكان ميت النه عزيز

نزلنا جوة البنات يسون عشا بالمطبخ وامي صايرة مثل الليمونة حالها امر من حال قيس
ردنا نرجع للبيت لزمو بينه للعشا وضلينه

كعدنا ورا العشا سوية جوة ابوي صاح لهادي اخذه كعده بصفه ولف ايده حضنه
:- الليلة تضل يمنه حبيبي

:- اي كالت ماما

:- زين عفيه خو ما تبجي عليها؟

:- لا عادي اني بطل
برطمت شفايفه واختنك
حضنه ابوي وهو ضل يبجي بحضن ابوي ع امه ويمسح بدموعه يكابر

:- لالا جدو حبيبي ليش هاي الدموع حبيبي
منو وياك احد مضوجك

هز راسه لا وكال بخجل
:- شتاقيت لماما ممتعود تعوفني

:- ما عافتك امك هي تزوجت كم يوم وتجي تاخذك ترجع يمها
:- اعرف تزوجت

:- حلو عفيه ان شاءالله يحبك عمو حرب؟

هز راسه اي :- اي يحبني اخذني وياهم للسوگ واشترالي بايسكل جديد يجنن وسررريع بس كال لا تسوق سريع توكع وتتعور

:- الحمدلله انت احترمه
:- طبعا احترمه

:- زين عمو حرب يحب ماما ما يأذيها؟ اذا يأذي ماما كول النه حبيبي

ضحك هادي وهز راسه لا
:- ما ياذيها ابد كلش يحبها اجا النه قبل يومين شاف ماما نايمة تعبانة باسها براسها وغطاها زين علمود ما تتمرض واخذ شال من الكنتور لف شعرها المبلل حتى ما تتمرض.

واخذني بالسيارة اشترالي ورجعني لخالة نسيمة

:- لا تحجي كافي الحمدلله بس اذا اذاها وخلاها تبجي كول لبيبي

سميرة :- سيد حرام خصوصية بيت
همس ابوي :- ترى خايفين عليها من حرب شنو النه دخل بخصوصياتهم

هادي طفر كال
:-لا ابد ما يخليها تبجي احسن .. سكت
لحظات وكمل بابا من يشوفها يخليها تبجي واني ما اقبل يبجي ماما حتى كلت اذا ضل يبجيها ما اجيكم بعد ولا اقابله

:- لا بابا ما يبجيها بعد واذا بجاها اضربه بالعكازة
:- لا حرام بس علمه كله عيب يبجي مرة رقيقة

ام مؤمن :- حسافة هذا الولد بهاي الاخلاق والتربية ما يعيش هنا بنصكم ويا امه وابو

تحسر ابوي وهز راسه متحسف ضل يمسح ع رأس هادي بحنية ويسولف ويا ..

.....

ليلى ..

عبرنا من گبال بيتهم بسيارة الزفة مديت ايدي ع ايده جريتها حيل وكتله
:- طفو ولا تشغلون اغاني شنو السالفة احترام لابني ع الاقل

:- شنو ناهب امو؟ غير بالحلال ماخذچ

:- اي بس شلون ما كان صعبة وهو يم بيت جده

رفعلي طرف حاجبه وما رد طبك السيارة يم باب البيت ونزلو ولد ويا وفتحو الباب فوت السيارة جوة واني كلبي يرجف
اكيد سمعو صوت الهوسة وعرفو هاي زفتي
ما جنت متوقعة الزفة هيج عبالي نطلع اني ويا وحدنا ونجي للبيت بس غدرني

نزلت دخلت جوة البيت نظيف ومرتب ومبخر خالتي كل شي مجهزة هو ضل برة رفعت بدلتي ودخلت لغرفة النوم شمرت المسكة ع الجرباية و وكفت كبال ميز التواليت خليت ايدي علي وانحنيت بتعب

غمضت عيني ماكو براسي اي صوت ولا فكرت بأي شي احس من كد ما تعبت وفكرت بكل شي هسة ما اريد افكر لان القلق كتلني والتفكير المفرط سلب راحتي سلب

كل الاريده تمر هاي الليلة ع خير ويصبح علينا الصبح بدون خساير
شنو حال قيس هسة اذا اني كلبي نار واحس وجع بصدري هو شنو حاله؟

طالت وكفتي احس التعب ماخذ حيلي بحيث ما عندي طاقة افتح عيني واغير مكاني حتى اكعد

سمعت صوت الباب انفتح فتحت عيني حسيت بخطواته يتحرك بالغرفة رفعت عيني ع المراية اشوفه نزع ساعته وخواتمه خلاهن ع الميز

ايدينه يرجفن بشكل واضح ، نزع سترته ذبها ع الجرباية وضل يفتح بقميصه كصته تزخ عرك

رفعت البدلة ومشيت طلعت ملابس حتى ابدل خالتي محضرة روب نوم بس لو يكطعوني ما البسه اخذت بجامة نوم عادية وطلعت من الغرفة دخلت للغرفة الثانية نزعت البدلة ولبست البجامة

رجعت للغرفة ما لكيته ضليت افتح بالتسريحة
من كملت اخذت ملابس داخلية ومنشفة ودخلت سبحت ولبست بجامتي وطلعت وهو ماكو

ضليت امشط وجففت شعري لان برودة ما اريد اتمرض ، باوعت للساعة صارت ب8
خليت شعري ع صفحة وطلعت ادوره

لكيت باب الاستقبال مفتوح مشيت ع كيفي وكفت بالباب شفته كاعد يسحب نفس من الجكارة ويذبه
وبسرعة يرجع يسحب الثاني يحرگ روحه بالجكاير

طلعت مشيت ع كيفي باوعلي ورفع طرف حاجبه كعدت بالمرجوحة ورفعت رجليني لصدري
:- حسيت على نفسك مو وضميرك الميت فز

ضحك تك خد سحب نفس من الجكارة زفره وطفاها بالكاع
حرب :- مو حرب اليسوي شي بدون ما يحس ع نفسو محسب حساب لكل خطوة اخطيها

ليلى :- جيد

حرب :- سبحتي؟

هزيت راسي اي
:- عجل شعندج طالعة بالهوى باردة تتمرضين

:- لا ما عليه شي متعودة

:- لابسه خفيف كومي دخلي جوة لا تتمرضين

صفنت علي شوية تنهدت ونزلت رجليني
:- ما متعودة عليك تتصرف وياي هيج بلطافة
حرب :- متعودة ازكح بيج

هزيت راسي اي ورديت :- بس والله اذا ترجع تعيط بيه العب لعب والقران شنو تصيح علي وترزل

حرب :- هاااا حلو تهددين

هزيت راسي اي ومشيت للبيت
دخلت للمطبخ شفت العشا بطني توجعني من الجوع. حضرت كل شي ورتبته وغصيت بدمعتي
ماما حبيبي بس لا يبجي عليه هسة ياربي خلي ينساني الليلة ولا يتذكرني علمود ما يبجي

سمعت صوت الباب انسد باوعت حرب دخل شاف الاكل وكال
:- لو منتظرتني اسبح

صفنت علي اني مخليه الاكل لروحي رمشت بعيوني فات يمشي بطرك البنطلون سحب الكرسي وكعد
غسلت خاشوكة ثانية وكعدت

خليت اللكمة بحلكي وهو حجة
:- اذا هددتي مرة ثانية اكصو للسانج

رفعت حواجبي ما اكدر اجاوبة بحلكي لكمة بلعتها وكتله
:- مو كتلك لا تعيط ولا ترزل ولا تحجي وياي بهذا الشكل ما اقبل ترى تريد احترمك؟ احترمني

هز راسه اي ضليت انتظر جواب منه ما جاوبني خليت بحلكي لكمة ثانية وهو رد

:- اشوفج ما تحترميني الا اورج ور وحك سبع الدجيل

بلعت اللكمة وكتله :- انت تخليني اخلي بحلكي لكمة يلا تحجي؟
رفع حاجبه ورد :- اي لان انتي ما تسكتين بس من تاكلين

رديت بتعجب :- اني؟

هز راسه اي
رمشت مستغربة كتله شوكت حاجية لا تجذب

مد ايده ع فخذي كرصني :- لا تكولين لا تجذب عيب

دفعت ايده وخزرته :- لا تكرص انت دكتور عيب عليك

حرب :- بكيفي حرمتي واكرص بيها ماعلي عيب

سكتت عنه اكلت هواي الاكل جان طيب واني جوعانة من خلصت كمت غسلت وفرشت اسناني
رجعت دخلت للمطبخ شفته يشيل بالمواعين
كال سوي جاي راسي صاير طبل من ورا الهوسة والهورنات

هزيت راسي اي .. وخليت القوري حط المواعين بالحوض وفتح الباب اخذ الجلافة وضل يغسل بيهن ويجر موال
اباوعله لابس بس بنطلون صدره عاري هو مو معضل بس جسمه حلو اكتافه عريضة
وعنده بزنده نساوة حمرة جبيرة صايرة مثل الدائرة

صفنت شوية وتذكرت حتى قيس جان يغسل مواعين زين ليش اني الزلم التزوجتهم ثنينهم يغسلون مواعين معقولة كل الزلم يغسلون مواعين ويا زوجاتهم

زين هذا شنو بعقله كبل فات بالجو وضل يغسل مواعين بمطبخي يمكن مو صاحي

فززني من كال
:- لا تفرحين بس اليوم اغسل مواعين عنج لان انتي عروس وعمج كال لا تتعب بنيتنا واني وعاهدتو ادللج

:- واني اكول شعجب طلعت منك تريد تبري ذمتك
وتريح ضميرك

:- عليج نور ..

حضرتله كوب صبيتله جاي راح كعد بالصالة عفته ودخلت للغرفه تمددت
شوية وفات اخذ ملابسه وراح للحمام سبح ورجع
وكف يخلي عطر ويمشط شعره عدل شعره باصابعه وطفة الضوة ضل بس كلوب نوم خفيف مشتغل

اجة تمدد بالصفحة الثانية نام ع بطنه شوية وسمعت صوت انفاسه انتظم ارتاحت نفسيتي غمضت عيوني
ضليت افكر بهادي مختنگة اريد انام ماكو
رفعت راسي باوعت للساعة بعد وكت ذبيت الغطا وكمت خابرت ع بيت السادة

كلبي يم هادي احس روحي تلوب علي
اجالي صوت رجال كال الو
رديت الو مساء الخير اني ليلى

هاشم :-ها هلا ومرحبا هلا بيج ام هادي بالمبارك زواجج

ليلى :- تسلم الله يبارك بيك
احم بالي يم هادي اذا يبجي علي جيبو الي الله يخليك كلبي يمه

هاشم :- لا والله يلعب ويا الجهال وقبل شوية نام يم امي تعب من اللعب

ليلى :- خو ما ضل يبجي؟
تحسرت ورديت خو ما متأذي؟ بالي يمه والله

تنهد ورد :- كلش متأذي ليلى اكثر من ما تتصورين
بس بعد هذا كله ما يفيد الله يسعدج خوية تستاهلين كل خير والله يمسح ع گلبه

جريت حسرة وكتله :- تصبح ع خير

:- اجمعين

رجعت السماعة فززني من كال بهدوء
:- بيت السادة؟

خليت ايدي ع گلبي والتفتت خايفة
:- وكفت كلبي .. جريت نفس وحجيت
:- اي خابرت اسأل ع هادي كتلهم اذا يبجي جيبو

:- منو رد عليج؟

:- سيد هاشم

هز رأسه رفع ايدينه يتمغط
:- شلون ليلتنا تخلص هيج؟

:- شنو تريد لعد؟

:- تفهميني زين وتعرفين شنو اريد اكثر مني

:- واذا گتلك مالي نفس بيك وما اريدك تقبل توصلني؟

عقد حواجبه ورد بغضب: -شنو هذا الحجي مو انتي طلبتي اخطبج من عمامج واخذج عروس شنو تغير هسة

ليلى :- حرب اني فاهمتك انت غايتك واضحة واخذتها بعد شنو

حرب :-لا غايتي تطورت هساع

رفعت حاجبي وكتفت ايديني :- النوب؟

هز رأسه اي وتقرب مني لف ايده حول خصري وسحبني حيل لصدره ، حط عينه بعيني وهمس
:- غايتي انولچ

رديت بضيق
:- بأحلامك ..

رفع حاجبه وثبت عينه بعيني بتحدي ..
:- واذا نلتچ؟

:- شنو قصدك اذا نلتج اذا جسديا يمكن سهلة عليك

:- لا ما هيج قصدي .. قصدي انولچ بكبرچ
طولج .. شعرج التمري .. روحج .. وگلبچ

:- بأحلامك

:- تراهنين؟

:- حرام الرهان ..

:- اذا مابي فلوس حلال .. نتراهن من الف بوسة ع نحرچ الجنة زلال

بلعت ريگي بصعوبة رفع ايده الثانية حط اصبع السبابة ع شفتي السفلية ونزل يمشي ع نحري لحد صدري وعينه ع المكان اليلمسه أصبعه

دفعت ايده وكتله بتشديد
:- بأحلامك .. طماع تريدني جسد لان دخلت بنفسك

حرب :- صدكتي نفسج كلش

ابتعدت عنه مسافة وكتله
:- خوش

عفته ودخلت للغرفة لفيت روحي بالغطة ونمت

كعدت الصبح ما لگيته بدلت ملابسي ومشطت شوية ودخل جايب ريوك
وجهه يضحك مبتسم واني وجهي ما يكصه السيف

تريكت وضليت افتر بالبيت ضايجة وهو شغل التلفزيون وضل يباوع برنامج

حسيت بملل ردت اتصل ع بيت السادة يجيبون هادي بس كلت عيب اني كلت للعلوية خلي يمكم كم يوم ع الاقل اصبر للعصر واخليهم يرجعونه

شمر الكنترول وباوعلي
:- بدلي خلينا نطلع لعبت نفسي من البيت اختنكت

:- يوو مالي خلك اطلع خلينا كاعدين بالبيت احسن

خزرني وصاح :- تكومين لو شلون؟

نفخت ضايجة وكمت للغرفة بسرعة بدلت هو دخل بدل ع السريع لبست عبايتي وكتله يلا كملت

هز رأسه اي طلعت صعدت بالسيارة هو فتح الباب طلعها ورجع نزل سده
وفرها وطلع ضل فترة ساكت ويسوق شوية وكال

:- ننزل بهاي الحديقة الجو حلو

:- بكيفك

طبك السيارة وكال يلا
نزلت اجة اشرلي براسه امشي مشيت ورا دخلنا للحديقة نمشي وساكتين اباوع للاطفال يلعبون كبل دمعت وكتله بقهر

عمت عيني اجيت وهادي مو وياي لو هسة جايبته جان لعب ويا الاطفال هنا

التفت باوعلي مستغرب جر نفس وكال
:- عادي نحيبو غير مرة يلعب سهلة

ضجت ضليت ساكتة هو فتح موضوع
:- برأيچ السنة التجي تكدرين تداومين جامعة؟
:- وهادي؟
:- شعلي هادي يدخل مدرسة السنة التجي

:- لا خليني شسوي بالجامعة راتب وعندي اريد اكابل ابني

:- لا مو بكيفج اني مقرر ارجعج للجامعة

:- لا والله شنو بكيفك انتَ

:- طبعا اني زلمتج وكلت ترجعين تداومين يعني تداومين اجرج جر من راسج واحطج بنص الجامعة

:- مو بكيفك

:- لا بكيفي ونص اني التمشي كلمتي

دلغمت ومشيت كدامه بسرعه متعصبة صاح هوب هوب شغلتي المحرك؟

التفتت باوعتله عاقدة حواجبي كتله شتريد؟
خزرني وعض اصبعه :- احجي زين

بلعت ريكي وكتله بهدوء: - انت تضوجني بسوالفك وتغثني بعد لا تضوجني واني احجي عدل

هز راسه وكال :- ان شاءالله

ضلينا نمشي بنهاية الحديقة اكو مراجيح عاليات كعدت بوحدة منهن حتى ارتاح
ضل واكف كبالي يدخن تحسرت وكتله
هسة لو جايبة هادي وياي

حرب: -نجيبو باجر عكبة

هزيت راسي اي وسكتت دار وراي حط ايده ع كرسي المرجوحة وقرب راسه مني يم اذني همس
:- كضبيها زين راح اطيرج

خليت ايديني ع السلاسل بخوف والتفتت علي مصدومة ما لحكت استوعب جر المرجوحة حيل ودفعني اول شي عطت :- عزة بعينك حرررب

بس من سمعته يضحك ضحكت ع روحي واني لابسة العباية واتمرجح

كل ما تصير بطيئة يلزمها ويدفعني حيل يطيرني
ضليت اضحك وكلبي يدك بسرعة
:- ادفعني حيل خليها تطير

حرب :- تكعين ابوية تتأذين

:- لا الله عليك حيل ما اوكع

لزمها جرها حيل ودفعني عيطت خايفة وفرحانة
لزمها حيل وكال بعصبية لا يطلع حسج ما اهيسة شجاج

هزيت راسي اي اضحك وعيوني تدمع رجع ضحك وجرها ودفعها حيل ضليت اضحك اكركر متونسة

لحد ما حسيت كلبي تعب كتله كافي اوكف راح اموت لا تدفعها بعد
لزمها وكفها اضحك ودايخة

ميلت راسي ليورا خله ايده ورا راسي
كال شبيج
رديت واني اضحك :- دخت
ما متوقعة المراجيح العالية هيج حلوة

حرب :- ما راكبة بيهن كبل

ليلى: - من جنت صغيرة لا ومن كبرت صرت استحي اكول عيب جبيرة حدي المراجيح الصغار والناصيات

هز رأسه كال بتساؤول
:-شعجب بطفولتج ما ياخذونج اهلج للالعاب

تحسرت وهزيت راسي بقهر لا
:- ما لحگو امي مريضة وابوي محتار بيها وبالعيشة الحمدلله ع كل حال بس ما عشت لا طفولتي مثل البنات ولا شبابي حياتي كلها خوف بخوف

حرب :- منيش خايفة يول؟

:- بصغري خايفة من فقدان امي جنت كل يوم اشوفها تخلص وتنتهي عافيتها جنت اخاف اغمض وافتح عيني والكاها ميتة
ومن كد ما حظي سيء ما فقدتها بس هي فقدتهم ثنينهم وتيتمت ذبني الوكت ع خالتي

عشت يمها بأستقرار فترة وبعدين ضلت تشتغل شغلها الموزين وهم رجعت عايشة بخوف
اخاف من الثعالب اليدخلون بيتها .. وراها تزوجت واني ضامه عنه كل حقيقتي وجنت خايفة يجي يوم ويكشفني وكشفني بساعه غضب حجيت حجي ويا خالتي وسمعه وعرف حقيقتي

دزني لعمامي وهناك لزمو دلال بنت اختك وتحت التعذيب اعترفت عليه شردوني لايران باصعب الطرق
جانت ليلة صعبة وظلمة وراها تطلكت وجبت ابني بالغربة واني وحيدة مالي غيره ولا عنده غيري

ومن قررت ارجع للعراق ادور ع السيد نلزمت وانسجنت

طلعت من السجن وكعدت ببيتي كلت هسة ارتاح ماعندي شي طلعتلي انت

هاي حياتي خلصتها خوف بخوف

تحسرت مقهورة مد ايده ع راسي مسح علي من فوگ
حرب :- انتي مخلية الخوف يتغلب عليج

قوست شفتي ما اعرف
:- لا انتي مخليتو صدك ليش تخافين من باجر وانتي ماتدرين شنو يصير بي؟ عيشي اليوم بتفاصيلو يمكن هذا اخر يوم الج

ليلى: - راح اخذ بنصيحتك واعيش اليوم وكانه اخر يوم الي

هز راسه اي وكام طلع جكارة ورثها
كتله :- مرجحني يلا

ضحك خله الجكارة بين شفايفه ولزم المرجوحة يدفعني لحد ما تعبت ودخت كتله دخت الزمها كافي

نزلت من المرجوحه دايخة لزمني من ايدي
:- ع كيفج يول مرجوحة هاي مو بطل شبيج تروطين

ليلى :- والله تدوخ شنو كوة هيه

حرب :- انتي مايعه روحج

طلعنا من الحديقة صعدنا بالسيارة
طبك يم اسواق قريبة كال
جكايري خلصن نازل اجيب تردين شي؟

هزيت راسي لا

نزل ضليت انتظره شوية ورجع بأيده علاكة ومخلي جكارة بحلكه

خلاها بحضني باوعتله بتساؤول
كال وهو يزفر نفس :- هاا شفت حلويات واشتريت كلت لهادي .. والج اذا تردين تاكلين ويا

بلعت ريگي وعيني ضلت ع العلاكة فتحتها اكلب جايب ككو ونساتل وعصاير
دنت نفسي ع ككواية اريد اخذها اكلها واستحي

حرب :- هاي طيبة اشتريها دوم جربيها بله تعجبج مثل ما عجبتني؟

سحبها نفسها العيني جانت عليها اخذتها من ايده فتحتها واكلتها وصدك جانت طيبة هزيت راسي اي وضحكت
:- والله طيبة تجنن
تريد؟

مديتها اله هز راسه واكل منها
:- بالعافيه عليج

ضل يفرفر بينه بالسيارة ، بعدين نزلنا يم مطعم حلو بي كعده ع النهر كال ع ما ينزل الاكل نجوع

كعدنا طلبنا سمج مشوي وضلينه نباوع ع النهر وهو يشرحلي شلون يطلعون هو وجماعته للصيد
يصيدون سمج وينظفونه ويشوونه ويحجيلي موقفه شلون صاد سمجة جبيرة وفرح بيها

واني منمدجة ويا لحد ما نزل الاكل تغدينا سوية ورجعنا للبيت اول ما وصلت دخلت سبحت وطلعت انشف بشعري

لكيت هادي يلعب بالصالة بس شافني شهك وركض علي جثيت ع اركبي فتحت ايديني حضنته حيل ابوس بي
:- حبيبي فدوة لعمرك مشتاقتلك منو جابك؟

هادي :- عمو حرب

ضليت ابوس بوجهه مشتاقتله عبالك صارله سنة بعيد عني
:- حبيبي فدوة رحتلك اشتاقيتلي

هز راسه اي
:- اشتاقيت الج وضجت انقهرت لان بابا مريض كل ما اشوفه ابجي
عادي العصر ارجع يمهم اشوفه

هزيت راسي اي ورجعت ابوس بي

دخل حرب كتله
:- شنو رحت جبته شگلت الهم

:- كلتلهم امو تبجي علي موتت نفسها وجبتو

خصمت عيوني بشك :- جبته علمودي لو تدور اخبار

رمش مستغرب وكال
:- مو كل شوية كلتي لو هادي يمي ولو جايبتو
ما يجي بعينج نكارة

:- مشكور ما قصرت

درت وجهي منه لهادي :- متغدي لو اسويلك غدة

هادي :- متغدي الحمدلله

اخذته للغرفه الثانية كعدته ع الجرباية اسولف ويا مشتاقتله ضل يسولفلي كل شي صار
شلون ابو متخربط بل2 بالليل وضاله العلوية تصرخ وماخذينه للمستشفى عبالهم ميت بس طلع عايش

ضليت محتارة ومختنكة جريت نفس وحضنت هادي لصدري
:- زين هسة شنو كالو زين?

هادي :- اي كالو العصر يجي اريد اروح اشوفه

:- صار حبيبي

كعدت يمه اسمع سوالفه لحد ما داخ وضل يغفه
شوية شوية نام غطيته وطلعت للغرفة دايخة
لكيت حرب كالب وجهه ما يكصة السيف

استغربت لان جان يضحك كلشي مابي كتله شبيك

نتر مابيه شي وتمدد كال طفي ال** اريد انام

طفيت الضوة ومشطت شعري وتمددت نمت
كعدت العصر ما لكيته ولا لكيت البدلة ماخذها للايجار دخلت للمطبخ لكيت هادي يدور

كتله شنو تريد ماما
:- اريد كيك

:- عمو اشترالك ككو ونساتل
:- اريد من الي تسوينه انتي

:- هسة اسويلك .. ضليت اسويله دك التلفون جاوبته عرفتها العلوية

سلمت علي وباركتلي بس صوتها مخنوك
من كملت مباركتها كالت
قيس ماطلع لباجر يلا يطلع اجي ع هادي اجيبه هسة

:- لا خلي من يطلع ابو يجي لان بس شافني ضل يبجي والله ما متعود يفاركني يتمرض

:- براحتج اني باجر قبل لا اجي انطيج خبر

:- تمام شلونكم انتم

تحسرت وكالت
:- مو زينين بس بعد شنسوي حبيبتي هي هاي الدنيه لازم تستمر وتمشي مايصير واحد يوكف حياته
انتي حقج تتزوجين اذا مو هسة بعد فترة

سكتت مقهورة شوية وكالت
يلا حبيبتي الله وياج عينج ع هادي

:- الله وياج بعد عمري

رجعت السماعة وكمت للمطبخ اكمل شوية ورجع حرب وجهه مكلوب معصب وعافس روحه
وكال بنتر
:- حضري روحج باجر نروح للغربية

.....

الشيهانة ..

فرحتنا بالحمل ما تنوصف عمتي تصدقت بذبيحة للفقراء وجبران دور بأغراضي وطلع الاسوار الي صاغه الي مرة
لبسنياه وكال ما اخلي الج كعب كل ما اشوفج لابسة كعب اكسرة

كتله سمعا وطاعة لولوة فرحانة كل شوية تتلمس بطني وتكول وهي مكزكزة
:- عززة ماما راح يصير عندي اخ او اخت صغيرة ياربي تطلع بنية اسويلها شعرها تساريح ماما فدوة جيبي بنية

:- ليش هي بأيدي ماما بأيد الله

:- ماما باعي اذا بنية اني اربيها وخلي كركوتها بغرفتي الله عليج

ضحكت ومديت ايدي ع شعرها عفسته اضحك
دخل جبران من برة شايل عصاير جايبهن وعلاكة حلويات النه

جبران :- شوفو شنو جبتللللكم .. شعلااان جبتلك البقلاوة التحبها

نزل من سيارته الصغيرة واجة يركض جبران وزع علينا العصاير اخذته لولوة من ايده كلتله شكرا عمو
بس شمس اخذته بدون ما تباوعله حتى وخلته كبالها

ضل يطلع بالحلويات يوزع علينا عمي ولولوة يتعاركون لان هي تكله لا تاااكووول انت رجل كبير ما يصير

حميد :- تالي علي انت الصفرة تكليلي لا تاكل

علياء :- صدك لا تاكل النوب يرتفع سكرك علينا حجي

نجمة :- شووف مو اكلك لا تااكول

ترفعله بحواجبها وهو ياكل بعنادها

شعلان :- مشكور عمي ما تكصر

جبران :- عافيات

شعلان :- اكلك عمي اذا يابت ياهل.. باوعلي ورجع باوع لجبران
:- بعد ما تذكرني تضل تييب لابنك

جبران مد ايده ع ركبته ضربها بخفه وكله
:- لا انتم كلكم اولادي انه عندي ولد وبنات ثنين
والجاي الله يعلم شنو

شمس :- بنية و ولد رجاءً شيلني من قائمة اولادك

جبران :- ليش هيه بكيفج

شمس :- اي

كامت كالبة وجها وصعدت
نجمة :- تتدلع

شيهانة :- انتي من تكعدين ويا اختج ما تحجين وياها شي تكليلها ترة ماما تحبج تموت عليج
وعمج سليم يشهد ع كل شي صار وحاجي كدامجن

:- اكللها بس هي عنيدة بمرور الوقت تتعود صبرو عليها

تنهدت وكتلها بقهر
:- جان تعود شعلان لحد هسة ما صايحلي ماما

ضليت كاعدة يمهم رغم تغير مزاجي ضجت
بس جمعتهم حولي وان كانت ناقصة تفرحني
اباوع لجبران يلعب ويا شعلان مكاسر
ويخلي يفوز وشعلان يطفر يطلع عضلاته ويصيح
:- انه ريال قووووي بطل

جبران يكض ايده يسوي نفسه متوجع ويكول
:- كسرت ايدي ااااخ منين جايب هاي القوة؟

لولوة تأفأفت وكالت بدون نفس
:- هسة لازم اكوم ادرس بدا وقت دراستي

:- عفية الشاطرة

:- المناهج صعبة جاي اتعب

:- اليتعب يلعب حبيبتي هاي الايام بعدين تتمنى ترجع

هزت راسها كامت اخذت حلوياتها وصعدت تدرس

نعست اني تمددت ع القنفة وبدون شعور غفيت

كمت بوقت العشا غسلت وتعشيت بشهية مفتوحة

وصعدت شفت شعلان درسته وتفقدت البنات لكيتهن يدرسن بغرفهن ورحت لغرفتي تمددت وبسرعة غفيت

فزيت ع صوت الاذان صليت ورجعت نمت
ما فزيت الا ع صوت المبايل

رفعت راسي فتحت تك عين مزعوجة شفت المتصل قاسم
جاوبته بنعس
الوو ها قاسم

قاسم :- صباح الخير ست ردت ابلغج بنتج شمس غافلتني وطلعت

فزيت بسرعة ذبيت الغطة :- احد اخذها لو مشي

:- لا مشي

:- حضر السيارة نازلة اني نلحكها نجيبها

شمرت المبايل وركضت غسلت وجهي ولبست عباية خليجية فوك ملابسي اخذت قراصة الم بشعري واني انزل وطلعت بسرعة صعدت بالسيارة ويا وطلع

:- منا راحت تمشي

طلع يمشي بالفرع صاح بفزة
ست شوفيها ذيج هيه جاي تصعد بالسيارة السودة

رفعت عيوني اشوف ما لمحت بس شعرها من صعدت بالسيارة

:- الحكهم بسرعة
اعصابي ضلت ترجف وصرت نار

هاي يمكن بكل مرة تطلع تصعد ويا شخص وتطلع ويا الله يعلم منو و وين تروح ويا

ضل قاسم يلحك السيارة وجانت حيل سريعة

ضليت اضرب ع رجلي معصبة واسبها والعنها ع هاي الصلافة والرعونية الشايلتها

من اجت لهسة مداريتها مثل الماي بالصينية ومدللتها بس هي تمردت كلش

قاسم :- خرب بغيرته شكد سريع بس حفظت رقمها سهلة

:- هاي يمكن كل ماتطلع هيج
هز راسه اي

ضليت اكل بروحي اكل وخايفة لا تكون صاعدة ويا شخص مو زين وياذيها لو يستغلها

شفناه دخل بمكان بي بنايات عبارة عن هياكل
قاسم دخل وراهم بالسيارة وكفت السيارة ونزلت شمس تمشي باتجاه بناية والسايق شخطها وطلع

نزلت وراها وركضت عليها اصيح
:- شمس تعاااالي ولج

شافتني كبل ركضت ليجوا .. حسيت اكو خطأ وخلل بس هاي بنتي شلون ما الحكها ركض قاسم قبلي ايده ع سلاحه سحبه بسرعه

وصاح
ست رجعي للسيارة لا تتأذين

شيهانة :- ما اعوفها والله شفتها صعدت درج صعدت وراها وقاسم وياي

ما حسيت غير واحد جر قاسم وثنين زلم جرو صرخت وضليت اتلفت ادورها بعيوني شفتها واكفة يم واحد لازمها من كتفها يعت بيها وموجه عليها سلاح

اول ما شفته صرخت بي بغضب
:- عاااادل الحيوان ماكو مشكلة تصير بينه الا انت وراها من الله لا ينطيك
عووووفهااا

رفع المسدس سوالي حركة بي لا
وهز راسه يضحك

ركضت علي بغضب واحس الدم كله صعد لراسي جريتها من ايده هدها يضحك خليتها وراي وتفلت علي

:- شعندك ويا بنتي ولك؟ سافل نزل سلاحك

عادل :- نحب نذلكم ونشوفكم مكسورين وتبجون دم

:- والله انت جلب وكل غيره ماعندك كافي اخذت كلشي تريده

هجم علي لزمني من ركبتي حيل جرني
:- ولج احنه نريد نذلكم نحب نشوفكم مذلولين نستمتع بدموعكم ودمكم مشروبنا المفضل

دفعت ايده حيل ما تندفع شمرني ع الكاع ضليت اتلفت اشوف قاسم ربطو الزلم
وشمس واكفة تبجي وترجف

جرها عادل من شعرها شمرها ع الكاع ورفع رجله يريد يرفسها ذبيت روحي بسرعه ودفعت رجله
مثل اللبوة من تشوف اكو خطر ع ابنائها انتفضت
ودفعته حيل وعطت
:- بالك توصل لبنتي حيوان

رفسني برجله ع وجهي طيحني ع راسي حسيت الدينا كلها افترت بيه
حطيت ايدي ع الكاع و كمت ع اركبي خليت شمس وراي ترجف

نترت :- شنو التريده انت؟

ما رد بس عيونه تنكط سم وكره ، سكت لحظات وكانه يستجمع الحقد والسم
ويتذكر مواقف تشحنه وكبل رفسني بقوته ع بطني
وكعت ع الكاع اصرخ وما احس غير رجله تصعد وتنزل ع بطني يرفس بيها بكل حقد ......للحكاية بقية

رأيكم بالقصة يهمني 🖤..