رواية حمائم تخشى الطيران الفصل الثامن وأربعون 48 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو البارت 1000 تعليق بين الفقرات وتصويت لطفا 🩷🖤

واكفة متبنجة من الصدمة اشوفه اقتحم بيتي وسد الباب والتفت يباوعلي بعيونه التشبه عيون الذيب
ومسدسه بخصره
اول شي اجة ببالي ابني .. وشلون احمي ابني من هذا الرجل

نشغت مصدومة واجيت اصرخ هجم علي حط ايده على حلگي سده ولزكني بالحايط حسيت ظهري تزلغ وعظامي تكسرت
مثبت عينه بعيني ، عينه بنية مختلط بياضها بحمار وشكلهن يخوف
رفع طرف حاجبه وگال بصوت خافت من بين اسنانه

:- اذا تصرخين هساع احط جيلة براسچ واذبچ ميته حسج ما اهيسة خوش؟

هزيت راسي بخوف خوش ..

ابتعد عني خطوتين ورفع ايده من على حلگي جسمي كله يرجف خايفة ضليت اباوعله
كتله بصوت يتلعثم :- شنو تريد اخذ بس عوفنا .. الله عليك .. ولا اصرخ ولا شي

شال سلاحه فرة بأيده وباوعلي بنظرة كلها استهزاء
:- ليش اني ميت ع العندچ؟ دحكي بعيني زين هاي العين ما تذكرچ بواحد
واحد كتلتي بمكرچ وحيلتچ ودمرتي

باوعتله بتفكير ما فهمت قصده خليت ايدي ع صدري خايفة نتر بغضب
:-احچي وياچ جاوبي

غمضت عيني خايفة وهمست بصوت متقطع :- لا .. لا .. ما كتلت احد اني والله ما كتلت احد بعمري وحياتي

نتر بغضب :- وصهيب الجنتي تحبينا ويحبچ وعلقتي بيچ تالي عفتي ورا ظهرچ مكسور وتزوجتي غيرو وجنتي سبب بدمارو وانتحر من وراچ

شهكت وفكيت عيني مصدومة وگبل اقسمت اله منفعله
:- والله وبالله ما جان بيناتنا شي هو الجان يحبني ويريدني ويدافعلي من اوكع بمشكلة
والف مرة كتله ما احبك ما اريدك ولا املته بشي اقسم بالله

تقرب حط عينه بعيني ورد :-چذبچ هذا مو عليه مركضتو وراج لل*** ومخليتو يخاطر بنفسو اكثر من مرة تا ينقذچ يعني تقنعيني كل هاي تضحياتو بدون ما تنطي شي وتاملينو بيج

هزيت راسي :- اي والله بس هو يحبني من طرف واحد اني ولا حبيته ولا شي انت منين عرفت؟ منو سولفلك يمكن يكذب عليك ويريد يورطني

:- صاحبو .. يعرف خالتج ويعوفج حق المعرفة وصلني الجن والله الا اخلي حياتج دم بدم اعيشج العاشو اخوي ومثل ما تسببتي بانتحارو راح اخليج تفقدين عقلج وادحك عليج بعيني تعلكين نفسج وما اوصلج اخليج تموتين مثل ما هو مات

عصبني كلامه نترت بغضب :- صاحبه جذاب روح تاكد منه ودور وشوف ماعندي شي اخوك هو الرادني واني ما ردته ولا كتله اتزوجك

هو خسر نفسه وهو الغلط من تهجم ع عيالي سكران وهو الي انتحر اني شكو تحملني المسؤولية بس فهمني بيا حال اني وانت طالعلي تزيد مصايبي وضيمي

هز راسه بوعيد :- حجيج هذا كلو جذب بجذب انتي خليتي يمد ايدو بالعسل وسحبتي الج جنتي تضحكين علي ومخليتو حارس الج يطمطم خياساتج ويا الاحزاب من شبعتي منو شمرتي عظم والله الا اعيشج بجهنم وانتي عايشة وجهنم وانتي ميته

ليلى :- ليش تايهتلك اني عندي عشيرة تسد عين الشمس ....
قاطعني :- اي واحد تدخلينو اشوفج بي يوم اسود عمرج ما تنسينو

خفت خليت ايدي ع حلگي حتى اضل ساكته وما احجي
:- ابنج شلونو؟

ليلى :- والله وبالله اذا ماطلعت منا هسة اعيط والم الناس كلها عليك

هجم علي لزمني من رگبتي حيل ودفعني ع الحايط
عيونه تنفض غضب حطيت ايدي فوك ايده ابعدها حسيت روحي جاي تطلع
همس بوجهي بغضب :- دم اخوي اطلعه من عيونچ وعيون الخلفوچ ياكلبة يا بنت الكلاب

دفعت ايده حيل مختنكة ضليت اكح وعيني ع الباب اخاف ابني يطلع ويشوف هذا الرجل متهجم علي وينخلس

ضليت اتلفت اريد شي الزمه ادافع بي عن نفسي مديت روحي بسرعة لزمت طابوگه محطوطة ع صفحة ورفعتها

نترت :- اطلع منا اطلع مالي دخل بالصار بأخوك شنو تريد تحملني ذنبه هو خسر نفسه بنفسه
شنو ذنبي جاي تتهجم علي وتدور ثار وياي

رفع طرف حاجبه تقرب علي بخطواته لزگت روحي ويا الحايط
مد ايده نزل اللثام عن وجهه وهمس قريب من وجهي لدرجة حسيت بانفاسه ودرت وجهي متضايقه من هذا القرب

:- شوفي هذا وجهي وحفظي زين اخذ ثار اخوي بس مو منچ من عزيز گلبچ واخليچ متعذبة طول العمر هاي اذا ماخبلتچ وخليتچ تمشين وتحجين ويا روحچ ، اورچ ور ..

بلعت ريكي بخوف مغمضة عيوني ودايره وجهي
همس بغضب :- فتحي عينچ يول تا تشوفين وجهي زين

فتحت عيني باوعتله بطرفها رفع طرف حاجبه وابتعد راح يمشي بالطارمة ويباوع للبيت والتفت علي

:- نار الي بگلبي وتحرگ بروحي راح احرگچ واخليج تهيسين بأضعاف اضعاف حزني ع اخوي

سكتت غمضت عيني جريت نفس
:- انت مافاهم الصاير بس افهمني وراح تعرف اني مالي ذنب

ضحك بأستهزاء ، گال وهو يتوجه للباب ..
:- بيرچ غميچ وانتي راح تگعين بي

ليلى :- حرررام عليك ... صحت واني ابجي بضعف

التفت باوعلي وعقد حاجبه :- حرررام عليك هيج تسوي بيه وانت ما فاهم شي ولا متأكد منه وين تروح من عذاب رب العالمين
بريئة من دم اخوك هو ضيع روحه مستعد تلطخ ايدينك بأيدين ناس ابرياء بسبب سوء فهم؟ فهمني مستعد؟

والله اذا اذيتني لو اذيت ابني دمي ودمه بأيدينك يضل ليوم الدين وما ينظف لو تخلص عمرك تتوضئ بماي زمزم

روح دور واسأل وشوف حتى تعرف انت جاي تتهجم ع مرة بريئة مالها ذنب بالصار بأخوك

مسحت وجهي وحجيت بعصبية :- اطلع من بيتي يلا

ضل صافن علي شوية ورفع طرف حاجبه وتقرب مني
وكف مقابيلي ثبت عينه بعيني وكال بمكر
:- شنو رأيچ نحدد الثمن .. لو نسميها الديه؟

عقدت حاجبي :- تريد ابيع بيتي وانطيك فلوسه ديه؟

:- ما عايز لفلوسچ اني اريد الديه شي يجرحج ويضل بگلبچ طول العمر هذا الجرح

صفن شوية ورجع كال .:- اني احدد بس مو هساع
هساع عقلي قافل ع السيد الصغير عزيز كلبج هذا
غمزلي ..

ليلى :- عوف ابني وشنو تريد انطيك

:- اذا ردت ارحمج اطلب شي غير دم ابنچ ادعي الله يخلي بگلبي رحمة اتجاهج واغير رأيي

غمضت عيني بقلة صبر مشى للباب فتحه وطلع بكل صلافة سديت الباب كلبي يرجف دخلت للبيت قفلت البيبان وطحت ع اركبي ابجي مرعوبة

منين طلعلي اخو صهيب منين اجالي النوب .. ويهددني بهادي؟!! والله اخذه واهج
بس وين اروح وين انطي وجهي ويا كاع تلمني اني وبزر بطني وتحمينا

شو كاع النجف ادخللها نظيفة اطلع تارسني اللثگ ما ضلت مصيبة ما لثگوني بيها
وبغداد صارت عش مؤلم ملغم .. واني حمامة ما اكدر اطير

مسحت وجهي وركضت للتلفون اخابر سهير بس جاوبتني انفجرت بجي
كالت بخوف :- شبيج ولججج شنو صارلج

ليلى :- طلعت متوهمه وغلطانة التهديد مو تخويف من السادة علمود ارجع لقيس طلع اخو صهيب مادري منين طلعلي يگلي اني تسببت بانتحار اخو لان جانت عندي علاقة بي ومستغلته حتى يدافعلي وبعدين تركته

شهكت :- فلك طره .. فلك شمدريج وين لكاج حجيتو

:- اي اجة دك الباب كلت هذا لو من السادة لو يجوز واحد من عمامي ويا هادي هيج ظنيت فتحت الباب ودخل جفت للطارمة .. ضليت اقص الها الصار واني ابجي

كالت وهي تصبرني :- لا تخافين جبران جاي يبحث عنه هو وجليل وهسة ما طول عرفتي يصير اخو صهيب انطيني كل المعلومات عنهم

حجيت بخوف :- انطيج هواي عرفت معلومات عن صهيب بس هذا ماعرف حتى اسمه

تنهدت وكالت بهدوء :-تدرين احس ماكو داعي تخافين لو نيته يكتلج لو يكتل هادي جان بهاي دخلته سواها بس هذا هدفه يخوفج واحنه راح نوصل اله ونحطله حد حبيبتي اتطمني

هدأت شوية ورديت :- يعني تتوقعين نيته بس يخبلني ويخوفني؟
:- جا دخل للبيت عليج ليش ما كتلج مثلا؟ وانتي وحيدة بطرك روحج وابنج شنو مثلا بس جاي يخلي الشبهات ع نفسه ويروح

:- صح وهو بينلي وجهه حتى
:- شفتي؟ يدري بيج خوافه وما تسوين شي
اني هسة اخابر جبران واحجيله الصار وانتي انطيني باقي المعلومات اريد اشوف اليوم شنو سالفته هذا

انطيتها كلشي اعرفه عن صهيب اسمه الكامل وسكنه حسب ما جنت اعرف
شيهانة :- هاي هيه راح ادزلج غفار ياخذج ولا تعترضين حياتج وحياة هادي مو لعبة اني صح طمنتج واشوفه بس يخوف بس الحذر واجب
تجين يمي حضريلج ملابس .. لحد ما جبران يلگاه ويحطله حد

حطيت ايدي ع حلگي محتارة
شوية وكتلها تمام .. راح اتحضر

نهيت المكالمة وحضرت ملابس الي ولهادي واخذت فلوسي وكل شي غالي املكه لان الموضوع ما يتحمل غباء ولا مال اضل هنا
السالفة صارت صعبة وحياة ابني اهم من كل شي حتى من روحي

طفيت كلشي بالبيت وانتظرت غفار اجة اخذني لبيت الشيهانة انهاريت بجي خايفة ع هادي
ضليت الوب طول النهار .. رغم هم بيتهم امان وبي حماية بس خايفة

خلوني ويا هادي بغرفة الخطار اني من النوع الما ارتاح ببيت احد احس روحي ثكيلة بس كلت ميخالف اتحمل يومين لحد ما جبران يشوف حل لهذا البلوة

بالليل خابرت خالتي حجيت الها كلشي وكتلها خاف تخابرني العلوية وما تحصلني وتخابرلكم كليلها يمي ليلى

نسيمة :- اذا صدك اخو صهيب والله اروح ع اهلهم واشگهم شگ اعرف وين كاعدين اندلهم

ليلى :- هسة خلي جبران يلگاه ويحجي ويا بلكي يقنعه وافتك منه مادري منين طلعلي شوفي حظي

نسيمة :- لا والله المثله ما يوگفونه غير اهله شنو انتي تايهة اله ويجي يدخل ع بيتج ويهددج؟
ليلى :- ميته خوف على هادي يمكن اخابر هادي ياخذني للنجف وهناك اروح احسنلي بمليون مرة

نسيمة :- من اول اسبوع يحبلنج وكلساع يذبن عليج نغل

ليلى :- اتحمل واسكت ولا يتأذى هادي
مستعدة اعيش بخيمة واكعد ويا انكس بشر ولا يلمسون شعره من راس هادي

نهيت المكالمة ويا خالتي ، ضليت صافنة بمكاني
غمضت عيني بتعب والتفتت للشيهانة
:- جبران ما اجة؟

هزت راسها لا
:- هو من اول ما انطيته رقم السيارة ومواصفاتها بدأ يدور علي واليوم من حاجيتيني بسرعة خابرته انطيته باقي المعلومات

هزيت راسي خوش مقهورة ورحت نمت
جانت ليلة ثگيلة وكل ما يتحرك هادي افز خايفة احس واحد داخل علينا وراح ياخذه من يمي

للفجر كمت ع صوت الاذان جانت ليلة صعبة ومتعبة توضيت مديت سجادة الصلاة وصليت
ضليت ادعي ودمعتي على خدي ويا كل يارب تطلع مني شهكة تجرح حنجرتي

حسيت الدنيا ضاگت بيه حيل .. صارت مثل التابوت

تمددت بمكاني شوية ابجي وغفيت دمعتي برمشي
فزيت الصبح ع اصواتهم بالبيت اسمع ابو جبران يسولف ويا زوجته
الغرفة قريبة من الصالة شوية وصوته بدأ يبتعد ويختفي

لبست ربطتي وكعدت هادي غسل وبدلتله ملابسه
خجلت اطلع بس من سمعت صوت شعلان جوة طلعت هادي علمود الشيهانة تجيلي

صدك شوية واجت دخلت صبحت علي
وكالت
يلا الريوك جاهز تعالي نفتح ريگنا بلكمة طيبة من ايدين نزهة

هزيت راسي وكمت اعدل بملابسي
:- عمي وجبران بالاستقبال ما يفوتون لا تخجلين

:- عيب مشمورين هناك بسببي ومتقيدين
:- لا محد متقيد عمي يحب يكعد بالاستقبال ويفتح الشباك ع الحديقة وجبران اصلا ما نشوفه بس يكعد الصبح يتريك ويطلع ويجرها لليل شغل اذا راد يحن علينا ويخلينا نشوفه يرجع العصر

ليلى :- هاا زين ما كلج شي البارحة

باوعتلي بتفكير شوية وكالت :- يكول واصل اله بس اليوم يلتقي بي ويحجي ويا انتي تطمني هو يحلها

هزيت راسي اي .. كعدنا تريكنا ويا عمتها ، جانت شكد حنونة توكل الاطفال ومهتمة بيهم كأنهم احفادها

للظهر اتصلت خالتي حلگها ناشف
كالت بخوف صوتها يرجف
:- عوفي هادي امني يم الشيهانة وتعاليلي انتي وحدج

ضليت صافنة حجيت بخوف :- ليش شنو صار هذا المجنون اجالج مو؟
نسيمة :- اي متخبل متخبل شلون جبران واصل اله وحاجي ويا ومهدده المهم حجي طويل مو مال تلفون تعاليلي ولج بسرعة

هزيت راسي اي .. نهيت المكالمة اناملي ترجف
مسحت ع وجهي ومشيت للغرفة االبس جواريبي وطلعت عبايتي خليتها ع راسي واخذت فلوس وطلعت من الغرفة رحت للشيهانة

شافتني اريد اطلع بأيدها كوب ذبته وكامت متفاجئة
:- وين رايحة
:- ابني امانة يمج لحد ما ارجع اذا صار علي قدر دزي لأهله

:- وين مولية ولج انتي ما تجوزين من تسرعچ هذا؟ ليش دومج مخليه نفسج عرضه للمشاكل فهميني
تذبين روحج بالنار ذب

مسحت دمعتي بردن العباية
:- رايحة لخالتي والله عندي موضوع وياها مهم هادي يم شعلان يلعب اذا سأل عني كليله شوية وترجع واذا ما كتبلي الله رجعه واخذ عمري دزي للسادة

:- اجي وياج .. اوكفي بس ابد نروح بالسيارة سوية

لزمتها من ايدها امنعها :- لا ضلي اني اروح وحدي ما اريد تجيج اذية بسببي لخاطري ولخاطر العشرة هاي المرة لا تجبريني ع شي وكتلج رايحة لخالتي والله تكدرين تتصلين وتتأكدين

سحبت ايدها ما قابلة وعقدت حاجبها بغضب
:- كتلج ابدل واجي انتظريني دقايق ما اتأخر

تنهدت بضيق راحت تركض عفتها وراي وطلعت من البيت وحدي ، اخذت تكسي وطلعت لبيت خالتي ما اعرف شنو من اذية منتظرتني وشنو من مصايب ورا هاي المكالمة .. وهاي الروحه

اول ما وصلت دكيت الباب بسرعه فتحته وجها مخطوف اصفر دخلت انزع بعبايتي خايفة وهي تمشي وراي تطكطك من الخوف

ليلى :- هاي اجيتج احجيلي بس اول شي انطيني مي ريكي نشف راح اموت وحق هو الله ناقصة عمر اني

كعدت بالمطبخ امسح بوجهي بالعباية جابتلي ماي
شربت منه شوية وشمرته كدامي
:- شنو حاجاج ليش هيج ميته خوف

بلعت ريگها وكعدت لطمت ع رجلينها بقهر
:- يريد ثمن ابتعاده عن ابنج شرفچ .. يگول اريد اوجعها بشي عزيز اذا مو ابنها شرفها

شهكت مصدومة وكمت وكفت ع حيلي اصيح معصبه
:- عمت عينه يريد شرفي عمت عينه صنت روحي سنين وما خليت واحد يطخ طرف ثوبي يجيلي واحد مهتلف زايعته الكاع يريد يلوثني
والله احرك روحي وما اخلي يوصلني

حطت ايدها ع حلكها تسويلي اش كبل استلمت
درت وجهي للبيت امشي وادور
:- شنو هو هنا خاتل بهذا البيت العيشني رعب وخوف وضاله اثاره تلحكني وين ما رحت

ضربت الباب مال الاستقبال حيل ودخلت شفته كاعد رجل ع رجل والاركيله كدامه يدخن ومنتظر دخلتي علي ولا بعينه ولا بحاجبه

لميت عبايتي وخليتها جوة ذراعي خصمت عيوني
وكتله بغضب
:- انت ما عندك دم؟ ماعندك عرض صدك ما تستحي ع روحك جاي تساومني على شرفي ولك كول اني رخيص وعديم تربية واخلاق وادور علاقات ليش حاط موتت اخوك حجة

رفع طرف حاجبه ورد وراي :- اني رخيص وعديم تربية واخلاق وادور علاقات

رفعت صبعي بوجهه وكتله
:- والله وبالله يا الما اعرف اسمك وما تتسمى غير شيطان
طرف عبايتي ما اخليك توصله تريد تاخذ ثار اخوك كطعني وصل .. اذبحني .. عندك سلاح فرغه برأسي بس لا تحلم اخليك تطخني وتدنس شرفي

نسيمة :- كعدي انتي خلينا نسولف يمكن نوصل لحل
رفعت ايدي الها سكتي .. ماكو حل هو جاي حامي يريد ياخذ ثار اخو ومحملني مسؤولية انتحاره هاي هيه ياخذه من ركبتي دم صهيب

مشيت للمطبخ حيل جريت سجين جبيرة مال لحم دخلت بيها للاستقبال امشي بغضب شمرتها كباله
:- اخوك شنق روحه وانكطع عن نحره الهوى كوم اكطع نحري وخلصني من هاي الدنيا وبرد نار گلبك

جرتني خالتي تخليني وراها وهو كاعد رجل ع رجل ع القنفة يدخن ويباوعلي وان ل،ي افور معصبة وايدي ترجف من الخوف والغضب
:- شنو يذبحج مالج ذنب انتي اني اجيبله شهود واسفطهم كباله كلهم يشهدون ما جان عندج شي ويا صهيب ولا املتي بشي ولا استغليتي

ليلى :- ما يقتنع ولا راح يقتنع ولا راح يقتنع حاط براسه شي وقافل علي ليش نطولها فهميني
يريد الثمن يكوم ياخذه من ركبتي لا يضل يجي عليج لو يهددني بابني

دفعت خالتي حيل ورفعت اصبعي بوجهه :- ولك شوف وحق الله ابني وشرفي خط احمر اذا تخلي براسك توصل الهن يصير دم ..
:- ما هو احمر!!
:- اصبغه بدمك

:- تعالي هين .. تگلطي (تقربي) كعدي كافي لغوة زايدة صدعتي راسي راح يطك يول

تنهدت عدلت عبايتي وكعدت بمكاني بغضب
باوعتله عيوني تخزر عيونه وتتوعده عدل كعدته ذب القامجي ونتر
:- نزلي عيونج لا افگسهن لا تخوزرين بيهن

بلعتها وسكتت .. رفعت عيني للبيت اباوع تذكرت ريحانة هنا وين مختلتها خالتي عن هذا المجنون
ورجعت باوعتله

ليلى :- شسمك انت؟ شلون احجي وياك واخاطبك واني ما اعرف اسمك

:- حرب ..

:- استاذ حرب جاي تدور حربك وياي؟ فهمني وين جنت ذيج السنين كلها هسة تذكرت عندك اخو انتحر

حرب :- وانتي مو شغلچ تعرفين وين جنت وشنو جنت اسوي وليش تأخرت

ليلى :- يلا مو شغلي

حرب :- عشتي يول .. هيج صيري مطيعه

لميت شفتي للداخل ضغطتها رفعت عيني اباوعله ما يحجي يباوع لوجهي ويضحك تك خد مستهزأ
حرب :- حتى ما تسووين واحد يدحك بوجهج عليش صهيب كتل نفسو عليج؟

ليلى :- شافني خوش بنية بنص وحوش وحافظت ع روحي وشرفي شاف الما تكدر تشوفه انتَ
لان الحقد عامي عيونك عمي كلش

حرب :- هسة ننهيها .. اني الاريدو اخلي بكلبج جرح عمرو ما يشفى
انتي عندج ابنج .. وشرفج .. اثنين اعزاز مالهن ثالث
واحد منهن يبرد كلبي ويطفي ناري ويشب نارچ
الج مطلق الحرية تختارين التردينو

ليلى :- عندك روحي اخذها وبرد گلبك

كال وهو يرفع ايدينه ثنينهن :- اني كلبي رهيف اخاف من الدم تعذريني

غمضت عيني بقلة صبر ضربت رجلي بقبضة ايدي اصبر روحي احس بأي لحظة اطفر علي واخنگه انسان مستفز كلش ونظرات عيونه كلها مكر وحيله واستهزاء

نسيمة :- شوف يوم ليلى الناس كلها تشهد عاشت بهذا البيت سنين وطلعت منه نظيفة شرفها عزيز واخوك ما حبها لو ما يعرف نظافتها

حرب :- نظافتها بنص الاحزاب وجانت مخليتو محامي الدفاع وتدخلو يحل مشاكلها من شبعت شمرتو عظم

ليلى :- شوف ما اطولها وياك اني العندي حجيته

صفن علي :- بعقد .. خمس ايام ابيتج هناك يم السادة

صفنت بوجهه فكيت حلكي مصدومة ورديت بصوت مبهوت
:- شنو بعقد ما فهمت شنو بيتج؟

:- انتي ما تدورين حرام واني سهلتها الج اكثر من هيج ما اكدر تعذريني يول
عقد خمس ايام بالحلال بس ابيتج مو بغير مكان

ضليت صافنة فاكة عيوني مصدومة وگلبي يرجف
همست بقهر وعيوني طكن بجي
:- ولك انت تساومني ع جسمي تريد ترخصني وتاخذ مني التريده على بالك العقد يغير فعلتك

حرب :- اعرفو ما يغير .. وهذا الاريدو اني

ضحك ورفع القامجي مسحه وخلاه بحلكه كلب الفحمات باوعت لخالتي ارجف وهي عيونها علي ميته خوف صفرة

خليت ايدي ع راسي ضل يوجعني حيل نزل وجعه ع عيوني
رفعت عيني باوعتله مثبت نظره علي
كتله بهدوء عكس البحر الهايج بداخلي
:- احرگ روحي وما اخليك توصلني وتوصخني

حرب :- كيفج العندي گلتو
رفع ايده يحسب
:- ولو انتي جنتي مهجورة بس نحسب عدة طلاك راح يمر شهر انتي مطلكه يضلن شهرين تقريبا
هاي الشهرين كافيات تفكرين بيهن وتاخذين قرارج
لو اي .. وتشترين روحو لهادي ابنج يا لا والباقي تعرفينو

نصيت اطبطب ع رجلي الزم اعصابي
نتر :- دحكي بعيني وكولي تفكرين ؟

رفعت عيني بعينه لمعت عينه بتحدي تنرفزت باوعت لخالتي جاوبت مكاني
:- اي تفكر هاي المدة وان شاءالله تنحل بدون خساير بالارواح انت بس اهدأ وروح دور يمكن بهاي الشهرين توصل لواحد تثق بي شريف وتعرف منه الحقيقة وما تضلمها هاي المسكينة اليتيمة وتروح حوبتها تدمرك

حرب :- ما بيها حوبة هاي كل البلى بيها

كام وكف ع حيله رفع سلاحه من القنفة خلاه بخصره
وباوعلي مستهزأ بنظراته

:- عبالج من تدزين واحد بالدولة اخاف؟ گتلو صار والك التريدو هاي المرة ما اصلها ولا ادحك بوجها بعد و لو اشوفها بدربي اغيرو ... تعهدتلو بس اني كلامي ما ينوخذ بسرعة اغيرو واگلب واخلف بوعودي
بأختصار غدار

ليلى :- ذيب ما الك امان

حرب :- التشوفينو

اندك باب البيت هو الصلف ما وكف طلع يمشي عادي وماخذ ع البيت عادي
خالتي تمشي ورا اسمعها تتوسله يهدأ ويغير ويسأل
حطيت راسي بين ايديني ابجي بحرگة گلب حسيت نار شبت بين ضلوعي

اسمع صوت كعب بالبيت رفعت راسي امسح بدموعي
والشيهانة تمشي تدور علي وتحجي
:- وينها هذا منو بس لا نفسه اليهدد بيها؟

نسيمة :- لا مو هو هذا من معارفنا
دخلت شافتني مسحت عيوني واجت علي هايجة وجها احمر

:- مو كتلج انتظريني انتي ليش هيج عنيده وراسج يابس ما خفتي ع روحج من طلعتي وحدج بهذا الوضع الخطر وانتي مرة مهدده

ليلى :- مو كتلج لا تجين؟

:- طيح الله حظج .. غبية وتحبين تجيبين المشاكل لنفسج هسة اريد اعرف كل شي هسة بهاي اللحظة اني الي حق اعرف واتدخل واحل مشاكلج وياج من صرنا صديقات و وكفنا ويا بعض وتعاهدنا نضل صديقات انطيتيني الحق بالتدخل وغصبا ما عليج تشرحيلي كل شي هسة

خالتي كعدت جزعانه وخرطت الها الاول والتالي وهي واكفة ع حيلها ما كعدت وضلت تفتر بالمكان متعصبة

وتدعي علي وتغلط
:- وشنو عباله تقبلين لا تكليلي راح تقبلين بطلبه ترة هذا جاي يساومج ع جسمج يريد ياخذ منج هواي
لا تتوقعين اذا عقد عليج وصار حلال ما راح ينجرح شرفج ولا تتلوثين ترة حااله حال الزنا والله

ليلى :- اعرف يريد يرخصني

شيهانة :- وشرطه يريد بالبيت مالتج تدرين شنو غايته ولجججج غايته يكلج اجيت ودخلت بنص بيتج ونمت وياج
وما يهتم يطب ويطلع براحته ولا يكول خاف يشوفني احد لان باختصار اذا شافه شخص ما راح يتجرئ يسأله انت منو بس گبل يذب عليج بلوة ويكول هذا عشيقها يجيها وتتشوه سمعتج

هو متقصد يحط هيج شرط علمود يشوهج ويكسر وجهج ويسوده

يدري الناس راح تحس بواحد يدخل عليج وريحة علاقتكم تطلع ومحد يكول متزوجين

هزيت راسي اي واني ابجي ضليت ادك ع راسي واعيط
:- ما اقبل لو اموت ما اقبل بهذا الحيوان يوصلني والله ما اقبل

نسيمة :- صبرن انتن عدنا وكت

شيهانة :- احاجي جبران هاي المرة اخلي يشمره ورا الشمس هذا ما يجي بالعيني والاغاتي

نسيمة :- دسكتي جبران مهدده ومخلي يتعهد ما يوصللها بعد اجاني حط سلاح براسي
ترة ما يخاف من اكبر واحد نذل وبايعها لا يروح يكتلنا كلنا ويسوي مصايب ماصايره ما شايفة البلد تايه انتي؟

جانت اعصاب تفور طلعت ريحانة تتلفت خايفة واجت تسأل شنو صار ضلينا كلنا ساكتين ما نعرف شنو نجاوب

شيهانة :- ما يريد فلوس؟ الفلوس سهلة نحط بأيده المبلغ اليريده ويكفينه شره

نسيمة :- ع اساس هم عايزين فلوس عدها خير من الله هذا بعد عتوي يدورله زفره يسكت روحه بيها

ليلى :- عزززة وطين ... عزة وطين .. تدمرت وضاع شرفي من خرب بروحي وبالساعة الصرت بيها
ياربي فدوة رحتلك خلقتني للعذاب والاذية شنو شفت من حياتي بس المذلة والتعب

نسيمة :- اني اكول تقبل .. هن 5 ايام يخلصن وترتاح العمر كله والله ما يعوفج اذا ما ياخذ ليريده
اشتري عمر ابنج

رديت واني ابجي :- عمر ابني اشتري بشرف امه؟ شگلله اذا عرف جاي اشتري عمرك بشرفي

نسيمة :- بالحلال هاي هيه والله شكد نسوان ساوموهن حطن عقد حللن بي النومة وارتاحن العمر كله انتي ما راح تذبين روحج جوا الزلمة بالحرام

ليلى :- لو اموت سمعتي لو اموت ..

شيهانة :- هاي غير اذا عمامج عرفو بوية يذبحونج ع القبلة

ضليت ادك وابجي لليل رجعتني الشيهانة وياها للبيت
منهارة اعصابي والخوف كاتلنا هو انطانه مهلة شهرين افكر بيها كلت الشهرين هذني ادبر روحي بيهن يمكن اروح للنجف اشرد بروحي وابني واكعد هناك

ثاني يوم رجعت لبيتي وقفلت الباب ع روحي
هادي ضاج لان عفنا شعلان كتله حبيبي فترة ويجي يمنه

بعدني ماصارلي ساعة بالبيت دك التلفون

جاوبته واجالي صوت رجال غريب اول ما كلت الو

گال بنبرة ماكرة :- رجعتي لعشچ .. شهرين فكري زين تردين تشترين راحة بالج وترتاحين من العذاب
انطيني خمس ايام من عمرج

:- خليني افكر

:- فكري ..

رجعت السماعة كلت خليني افكر حتى اصرفه وارتاح من ملحته لحد ما اشوف وضعي ..

...

الشيهانة ...ما كان اكو شي اصعب من تهديد علاقتنا بالانهيار
جنت خايفة بأي لحظه الزمه بيها يخوني وانهي كلشي بديناه لان اني وفيه اله ونذرت عمري اله وطلعت من السجن جنت اكدر اكمل حياتي بدونه بس ضليت ورا وادور علي واريد اثر منه
جنت وفيه اله من كل روحي وما خنته حتى بالنظر رجل غيره
طول ما اني ع ذمته حاطته بين عيوني
ما اقبل يطلع من حضني ويروح لحضن وحده ثانية يخوني وياها

لو روحي تتعلك بي ما اضل ويا

ضليت اراقبه دائما .. وعيني ضلت ع مبايله

شفت مرة من نفس الرقم رسائل هواي تطلب منه يروح الها ، ضليت صافنة اقوى من هيج ماكو بعد
تطلب منه يروحلها للبيت كاتبتله
انتظرك بالبيت

بس السكتني وخلاني اصبر ما يرد ع رسائلها
واسلوبه وياي وحبه واهتمامه يخلني اعيد النظر بالموضوع مليون مرة

اخر توقع اجة ببالي هاي يمكن هدير ويريد يستدرجها ويوكعها وهذا اقرب احتمال للواقع
لان جبران مبيت النية براسه ويريد يدمر هدير وعادل
جاي يسوي اشياء من وراي ، ما يشاركني حتى ما اشغل بالي

ورا ما رجعت ليلى البيتها الهم زاد عليه كلش لان صارت جزء من روحي خصوصا احنه وكفنا ويا بعض بهواي مواقف وصرنا قريبات مثل الاخوات
سوتلي اشياء ليلى اختي ما تسويهن ..

ومن جهة ثانية مراقبة جبران .. واهتمامي بشعلان العنيد الي ما يطخ راس ولا يصيحلي ماما ولا جاي يليلن وياي

تعبت نفسيتي كلش والشغل بصفحة
حسيت لو ما حسنين يمكن انهار وما اكدر حتى اكمل

مر شهر ع نفس الوضع بيوم من الايام طلعت الصبح للمعمل ، بديت شغلي ويا حسنين هناك الوكت يمشي واحنه مخبوصين خبص
جنة نجهز مجموعة كبيرة ، والشغل لازم يكون مضبوط ومرتب وكل شي يكمل بالوقت المطلوب

مخلية مبايلي بجيب البنطلون دك سحبته جاوبته بدون ما اشوف الرقم خليته ع كتفي ورفعته
حجيت واني اشتغل :- الوو

اجالي صوت قاسم حارس البيت :- الو هلا ست شلونج
:- هلا قاسم الحمدلله اني بالمعمل مو بالبيت
:- ادري بيج احم .. ادري ما يجوز بس انتي بعد وصيتيني

كمت من مكاني ذبيت كل شي من ايدي
خليت المبايل ع اذني عقدت حاجبي وبداخلي اتمنى يوصلي شي غير المتوقعته

قاسم :- راقبته ولحگته عرفت هو جاي يروح لبيت بمنطقة ..... بيت صغير ويروحله يومية
ما ادري منو كاعد بالبيت ولا شنو عنده ويا اهل البيت بس هم مو فقرة البيت مال ناس حالتهم المادية زينة متوسطة ما اعتقد يروح للمساعدة

غمضت عيني رفعت ايدي فركت كصتي حجيت بحيرة
:- متاكد
:- اي والله متاكد ست صار فترة مراقبة كلت يمكن يروح خطار بس بالحقيقة جاي يروح هواي ويدخل للبيت يضل فترة ويطلع ونادرا ما يروح بين يوم ويوم
اني صورت البيت وجبتلج العنوان بالضبط اكتبلج العنوان برسالة اذا تردين هو هسة بداخل البيت

:- كتبه .. وينك انت اذا بالمنطقة خليك مراقب وضل وياي ع اتصال اني مسافة الطريق واكون يمك

:- صار

سديته اخذت جنطتي واني اوصي بحسنين يكمل عني وطلعت اركض
وراي صاح صاير شي
:- لا سلامتك

طلعت بسرعة اخذت السيارة وطلعت للمنطقة اجت رسالة من قاسم كاتبلي العنوان بالضبط
خابرته
:- شوف جاية خليك يم نقطة اكدر اوصلك بيها اخذني للبيت
قاسم :- صار

ضليت اكل بروحي اكل الدم صعد لراسي راد ينفجر
عيني ع الطريق امشي سرعة اكثر من مرة ردت اسوي حادث
منين ما التفت احسهم يسبون بيه كد السرعة

بس ايدي جانت ترجف اريد اوصل قبل لا يطلع
بالبداية ضميري يأنبني لان شكيت وخليت الحارس قاسم يراقبه الي ، من احسه غريب ويجي اتصال مريب انطي قاسم اشارة

بس هسة تأكدت السويته صح ، لو ما مراقبته ما جان وصلت لهاي المعلومات كلها حتى البيت مالها

وصلت ضليت اخابر قاسم كوة وصلت شفته من بعيد اجة ع سيارتي متلثم ولابس دشداشة
نزلت الجامة وحجيت مستغربة
هايي شنو مسوي بروحك

قاسم :- علمود ما يكشفني غير اذا عرف اراقبه يبطلني وينكطع رزقي واني بركبتي عائلة

هزيت راسي اي .. تنهدت
:- وين البيت دليني
:- اصعد وياج ادليج وانزل ارجع قبل لا يحس عليه لو يطلع للبيت ويوصل ما يلگاني

هزيت راسي اي فتح الباب ودلاني طبگت ع صفحة نزل هو وراح
يتلفت وملثم ضليت صافنة ع غرابة الموقف عبالك داخلين بمهمه سرية خطيرة ، ماخذين الحيطة والحذر وقاسم ملثم وخايف ولازم يرجع قبل لا يرجع جبران

واني طابكة السيارة ع صفحة بحيث من يطلع اشوفه ما يشوفني
ولابسه نظارة شمسية مغطية نص وجهي خاف يلمحني ع اساس النظارة ما تخلي يعرفني مثل الافلام

بلحظة حسيت شكلي غبية كلش ومتأثرة بالافلام
بس تذكرت اي وحدة تريد تكشف رجلها لازم تراقبه وكل وحدة وطريقتها بالمراقبة عاد والله اني كتبلي قاسم يراقبه ويوصلني اله

ضليت واكفة فوك الثلث ساعة روحي تلوب وعيني ثابته ع باب البيت
من انفتح الباب عدلت كعدتي وجسمي كله انتفض ضليت ارجف همست بيني وبين روحي
يارب مايطلع هوا .. يارب عيني ما تشوفه

باوعت الباب انفتح ومحد طلع رفعت ايدي الترجف نزعت النظارة قلصت عيوني حتى اشوف بوضوح
طلع جبران .. خنجر وانغرز بنص صدري

حسيت روحي انشلت من الوجع طلع بسيارته من البيت جان مرتاح لدرجة مدخل سيارته للكراج مال البيت
يعني واصل مرحله وياها

نزل سد الباب وضل واكف برة باب البيت ويحجي
وعينه بداخل البيت ردت اشغل السيارة وادعمه امردة ادوسة ويا الكاع

بس جريت نفس اقوي نفسي والزم اعصابي

كلبي رجف من شفتها طلعت من باب البيت لابسة ثوب لنص الساق والبنية مدبدبة وشعرها طويل مظفور كصيبتها واصلة للركبة
تقربت منه ضليت اباوعلها اريد اشوف شكلها زين ما واضح بسبب المسافة والدموع الحجبت عندي الرؤيا

بس انهدمت الدنيا ع راسي من رفعت رجلينها وحضنته بسرعه وابتعدت وهو يضحك
دخلت للبيت تركض سدت الباب وهو صعد بالسيارة حرك وطلع

مديت روحي ارتجيت ع الكشن ارجف ضليت مبهوته عقلي ما يجمع اريد اطلع بروحي قصور وابررله خيانته هاي ماكو
اريد سبب واحد يخلي يخوني ماكو

تهدمت روحي وحب سنين كله اندفن جوة الحطام
صرت بقاية انسان .. بقاية روح
ضل مني بس نفس .. يصعد وينزل

حسيت بنغزات بنص صدري مادري شلون شغلت السيارة وسقت وشكد مشيت وشلون وصلت يم بيت ليلى

طبكت السيارة بالباب ونزلت دكيت باب بيتها صاحت منو
رديت اني
عرفتني وفتحت الباب كبل دخلت للبيت باوعتلي مستغربة وهي تسد الباب حسيت شفايفي ترجف ما اكدر احجي ولساني ثكيل

لزمتني من اكتافي تهزني
:- شبيج ولج وجهج مابي روح مخطوف لونج

ذبيت روحي عليها خليت راسي ع كتفها وانهاريت بجي
ضليت اشهك وابجي ، ذبيت كل حملي
جرتني كعدتني بالمرجوحة جرت الصوندة مفتوحة ع الحديقة غسلت وجهي وضلت تميل بشعري تخلي ورا اذني

وتلزم بوجهي تتفقده وتحجي
شبيج جاوبيني
واني بس ارجف وابجي

اخير شي انفجرت ضليت انشغ واكرر الشفته
:- خاني ... يروحلها للبيت وحضنته
ولج خاااني جبران بعد كل هاي السنين وبعد كل هذا الحب خااني
شفته بعيني طلع من بيتها وهي حضنته

شهكت مصدومة غطت حلكها
:- عزة وطين جبران يسويها

شيهانة :- خاااني ياررربي خاااني كسر گلبي مررررد روحي علعلني والله احبه وما مقصرة ويا بشي
ليش يخوووني ليش يروح لحضن غير حضني واني صرتله وطن يلم روحه الغريبة

ليش اختار غيري ولج طلع منها والوجه يضحك سنونه ما طبكهن وهي حضنته بالشارع

ليلى :- عززة عززة يمة ضليت ارجف عزة بعين الزلم ما تملي عيونهم مرة دومهم هيج يركضون منا ومنا

:- متخيلة ولج متخيلة حضنته كبال عيني اني ردت ادعمه ادوسه بالسيارة بس كوة لزمت روحي

:- ما نزلتي واجهتي شبيج ولج

هزيت راسي لا
:- لو نازلة جا كتلته بالشارع والله بس خل يصبر اذا ما دسته بسيطة

سحبت مبايلي اخابر
جاوبني قاسم
:- قاسم باجر هم شوفه الي اذا يروح لو لا راقبه زين
:- تدللين بس امانة ما اريد يعرف اني مراقبة
:- لا تخاف ما يعرف

مسحت وجهي كمت جريت الصوندة غسلت وجهي زين ولميت شعري ليورا واني اتوعد بي
:- شوفي شسوي بي بسيطة الجلب ما وكفت بعينه عشرتنا لا وكف حب سنين والله توقعت يستدرج هدير

ليلى :- هسة تعالي جوة ارتاحي شربي شي وجري نفس ريحانة جوة بالمناسبة يعني خاف ماتردين تحجين

هزيت راسي ودخلت تربعت ع القنفة وجريت نفس
احس روحي تتكطع وكلبي يضرب ضلوعي بقوة يريد يطلع

بس جنت اضحك ع روحي واكول واذا الحياة ما توكف علي وبالحقيقة اني كد ما احبه احس بدونه اموت

بس حجي اللسان سهل

شربت ماي وضليت مصفنة اصبر روحي واقنع نفسي اني قوية
ساعة وطلعت رجعت للبيت سويت نفسي طبيعية

سبحت ولبست لبسي المرتب وعدلت وجهي بشوية مكياج خفيف حتى ما يبين علي الحزن
وطلعت شعلان للحديقة يلعب بالبايسكل
كعدت يم عمتي وسولفت وضحكت .. بس بداخلي جنت ميتة

لحد ما اجة كمت وكفت ع اطراف اصابعي حضنته وبسته بخده استقبله طبيعي
لف ايده حول خصري وباسني حيل
:- اشتاقيتلج حبيبي

حركت شعري بدلع وكتله :- اني هم تاخرت
هز راسه :- شغل

:- يلا اصعد للحمام محضرته الك
هز راسه وسلم ع عمي وعمتي وصعد

صعدت ورا كعدت انتظره طلع من الحمام ينشف شعره
كتله بعتب :- ماعندك وكت النه وكلش جاي اشتاقلك وين تروح طول اليوم شنو جاي تسوي؟

جبران :- شغل اني وجليل من يبدي اليوم لحد ما ينتهي ما افرغ حقج عليه ي صبي عيني
يا رمش العين .. يا حيل الحيل
الجمعة اعوضكم بطلعة عائلية

هزيت راسي اي وحجيت :- اذا اجت الجمعة

باوعلي مستغرب ابتسمت بهدوء
:- الدنيا تخوف الواحد ما يضمن روحه حياتي

هز راسه :- انتم بحمايتي ما عليكم شي

ضليت اباوعله اتمنى اكوم اكطعة باسناني
اجة ذب روحه ع الفراش درت علي مديت روحي خليت ايديني ع صدره
وحجيت بهدوء :- احسك متغير علي هاي الايام شنو صاير وياك سولفلي .. اني مقصرة وياك

لزم راسي جرني باس شفتي وباوع بنص عيني بذبول
:- مابيج كل قصور وين اكو منج انتي؟
:- احس روحي مقصرة وياك ما اعرف يجيني هيج شعور بالله اصفن فكر شوفني مقصرة

:- ماكو داعي افكر .. كل قصور مابيج انتي معدله حنينتي
هزيت راسي اي
:- روحي انتي بيج شي سامعة شي
هزيت راسي لا :- احسك بعيد وتتهرب مني

:- ولج انه كل لحظة برة البيت اشتاقلج بيها ، لو يصح بأيدي اگابلج طول اليوم وما اتحرك بعيد عنج ولا دقيقة
شلون اتهرب بعد؟

:- ما اعرف كتلك شعور .. مرات هيج افكر
:- لا تفكرين بعد

جرني باس شفتي ابتعدت عنه بسرعة وكفت ضايجة لميت شعري سند روحه ع عكسه وحجة مستغرب
:- وراج ضميمة ولج

شيهانة :- اني ما وراي ضميمة واضحة مثل الشمس
جبران :- جا انه الما واضح؟

شيهانة :- وضعك واتصالاتك غريبة جاي تخليني اشك بيك
غير تريد الصدك اني كلبي لاعب منك

جبران :- وانه كلبي ميت بيج وهايم وذبلان بيج شلون تشكين بيه بعد؟

:- الحب ما يضمن عدم الخيانة!! ردت اكول صار عندك منصب وفلوس وتذكرت انت من يوم يومك ابن خير وشبعان ما تغيرك مكانة ولا كم فلس
ردت اكول اني مقصرة .. شو ما اشوف بروحي قصور

24 ساعة عروس ومدلعتك ومدللتك ما اتوقع تحصل مرة بجمالي لو تحبك بكدي ولا تدللك مثل ما اني مدللتك

ضحك وكعد ع حيله :- والله صحيح كلامج ثقتج بروحج بمكانها ما غلطتي

شيهانة :- اعرف .. بس اذا طلع شكي بمكانة يا جبران وجهي تحلم تشوفه بعد احرمك حتى من خيالي
ما اخلي خيالك يطخ خيالي مرة ثانية

جنت احجي منفعله وجهي محتقن
ابتسم ومد ايده انطيته ايدي وتقربت كعدت يمه جرني خلاني بحضنه
ضل يمسح ع ظهري
:- شاربي مو عليه اذا فكرت اخونج وحك اسد بغداد ازينه .. واطلع بدون شارب

شيهانة :- نشوف

ضليت ساكتة مقاومة لثاني يوم .. انتظر اتصال من قاسم ماكو ما كال
اليوم الورا قاسم كال
راح للبنية

طلعت بسرعة اركض جنت سابحة حتى شعري ما مشطته ضل نازل ع ظهري مبلل ومادري شنو لبست
شخطت السيارة وطلعت من وصلت خليتها ع صفحة طبكت وضليت اراقب

جان ما مدخل سيارته مخليها برة البيت
ردت انزل اهجم عليهم واگلب عاليها واطيها والعب بي لعب

بس دك مبايلي ردت ارفض عرفت ليلى تتصل خفت يكون عدها شي مهم لان هي وراها مصايب
جاوبتها كبل
:- ليلى اذا شي مهم كولي اذا مو مهم بعدين نحجي ومن اجيج اشرحلج

ليلى :- ردت اكلج خابرني هادي يكول مجاي يحصلج وعنده حجي وياج بخصوص الشغل
صاير وياج شي

سكتت لحظات مسحت ع وجهي اخذت نفس وكتلها
:- وينه هو اجة لبغداد
:- لا بالنجف يكول يريدج ترحين للنجف تشوفين بنفسج التطور وتتناقشون بموضوع الفندق

صفنت شوية هزيت راسي ورديت
:- سهلة خابري گليله جايتك للنجف اليوم

ليلى :- اكلج صاير شي وياج؟
:- لا ماصاير بعدين نحجي

سديت المكالمة خابرت ع البيت حاجيت نزهة
:- نزهة حضريلي جنطة صغيرة خلي بيها ملابس الي ولشعلان مال سفر يومين وخلي عبايات خليجية وحجابات خوش
نزهة :- ان شاءالله شنو طالعة للزيارة

:- اي طالعة للزيارة

نهيت المكالمة شمرت المبايل ورجعت اباوع ع البيت
ضليت انتظر وعيني ع الساعة خمس دقايق مو اكثر
وانفتح باب البيت

طلعت هي لابسة بنطلون وقميص للورك وردي وشعرها يتطاير بالهوى تركض مثل الطفلة صعدت بالصدر الظاهر مدلعها السياسي ،  وهو فتح الباب الثاني يريد يصعد
شغلت السيارة وبلحظات طلعت بأتجاه سيارته رفع عينه ع صوت عجلات السيارة وصارت عينه بنص عينه
وفكها مصدوم من وجودي ، عرف النية الي مبيتتها برأسي ، كلها لحظات وأذني سمعت صوت اصطدام سيارتي بسيارته وهي بداخلها ........... للحكاية بقية

رأيكم بالقصة يهمني 🖤

توقعاتكم؟

حبايب عدكم توقعات غريبة 😇 تخليني اريد الطم واصرخ واملخ روحي تملخ
شوية خلو توقعاتكم واقعية قبل لا انجلط 🤣

خصوصا بموضوع ليلى .. بالله الشيهانة هذول السياسيين والتجار طول عمرهم سوالفهم غريبة وتصفن 🤣🤣🤣🤣🤣
ف حقكم تشطحون بتفكيركم وياهم