رواية حمائم تخشى الطيران الفصل السابع وأربعون 47 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو البارت 1000 تعليق وتصويت

علقو بين الفقرات لطفاا 🔥🔥
...

ضليت واگفة مشمئزة من شكلها .. اباوعلها ع وجها ابتسامة لئيمة لابسة بنطلون وقميص لحد الركبة وحجاب
ضحكت مستهزءة والتفتت اتاكد من انشغال صاحب المحل

گالت بخبث وهي تكبر ابتسامتها
:- اكو اخت ما تسلم ع اختها شگد عيب؟

شيهانة :- ليش اكو اخت تسجن اختها وتزني ويا اخو زوجها وتكتل اهلها علمود الورث؟

هدير :- اخر نقطة

شيهانة :- هاي اصح نقطة واكثر نقطة واثقة منها ومن حقيقتها ، من تشوفيني مرة ثانية لا تحجين وياي ما احجي ويا ناس القذار والجيفة طالعة منهم ماريد اوصخ روحي

درت وجهي عنها جانت ع وكفتها وبأيدها اغراض
تقربت مرت من يمي وحجت بهمس
:- اني نسيت الفات انتي انسي حتى نكدر نعيش ونكمل

مديت ايدي لزمتها من زندها وقربتها مني
همست يم اذنها بهدوء
:- ما انسى من شفتج سكرانة ويا عادل تخونين زوجج ولا انسى انتي سجنتيني ومتاكدة انتي ويا ورا سجن جبران .. وحرگ اهلي
ما انسى شي من السويتو انتي وعادل اذا تكدرين تنسين انسي انتي ويكون افضل اذا ما نسيتي

دفعتها بخفة وابتسمت بهدوء ثبتت عيني بعينها
لحظات ودرت وجهي عنها حجيت بصوت عالي

:- خلصت اخوي؟

باوعلي وهز رأسه اي :- دقيقة

هدير بهمس :- اذا ما ترديني انسى راح انسى اشوف شلون تذكريني بضعفج هذا عمرج ما كدرتي تاخذين حقج من الظلموج ولا مرة كدرتي تجيبين التردينه عكسي كلشي ردته حققته

ابتسمت ميلت كذلتي بدلع ورديت بهدوء
:- لان عندي جبران نمري الاحبه واكف بظهري ويجيبلي حقي واني اتدلع واتدلل وافرح بحقي بدون ما اتعب

انتي ضلي ازني وسوي علاقات وانطي بروحج وزعي بيها حتى تلمين زلم يوكفون وياچ

وجها احتقن شكد حاولت تخفي غضبها بس بين عليها
ضليت دايره وجهي عنها كالت
هدير :- ما دايملچ جبران

ضليت دايره وجهي متجاهلتها بدون ما ارد

رجعت كالت وهي تفور تهمس بغضب
هدير :- تاليته يعوفج ويروح للتحبه بدون مصالح وتستاهله وانتي تضلين اشوف منو يوكف وياج بوكتها

خليت ايدي جوة خدي اباوع ع صاحب المحل وهو يجهز الهدية ما رديت عليها
باوعلي وكال
:- كملت اختي

حاسبته واخذت الهدية وطلعت وهي وراي بالمحل بعد حتى ما التفتت ولا شفت شكلها مرة ثانية تجاهلتها كلش

بس ما انكر بداخلي شبت نار من هاي الصدفة الحقيرة ، الي جمعتني بأكثر انسانه اكرها وامقتها
وحرام اكول انسانة هاي جيفة متحركة شايلة بداخلها شيطان

صار بوجهي واحد لابس سترة ماروني ردت انضرب بي رفعت راسي وفكيت عيني ع وسعها من شفته عادل عينه بالمبايل ويمشي بهمه للمحل

بس لمحني ضحك تك خد ونزل المبايل من ايده
درت وجهي عنه متقززة ومشيت صاح
:- بنت عمي شدعوة على الاقل سلام

التفتت نترت :- صلفين

وعفته ومشيت بعمري ما شفت بشر مثل صلافتهم ولا كأنهم مسوين مصايب الدنيا كلها
هسة الواحد من يسوي غلط تنكسر عينه يخجل، لو ناس غيرهم جان حتى طريقهم يغيرونه حتى ما نشوفهم
بس ماعدهم مستحى هي نكطة وطاحت منين يجيبونها بعد انداست بالقنادر

نزل غفار اخذ الهدية مني صعدها صعدت مصفصفة اليوم شكله اسوء ايامي
بعد ما كلت فرجت وارتاحيت رجعتلي المشاكل
من صفحة جبران ومن صفحة ذول الجلاب الطلعو بوجهي صدفة ولعبو نفسي من هذا اليوم كله

نصيت راسي خليت ايديني ع راسي متوجعه
غمضت عيني احاول اسيطر ع مشاعري ونفسي واخلص هاي الزيارة وارجع للبيت اختلي بنفسي وافكر

شعلان :- علامچ؟

شيهانة :- مابيه شي ماما دخت من الطريق

شعلان :- نرد للبيت؟

هزيت راسي لا :- هسة ارتاح يم خالتك ليلى

هز راسه مخلي سيارته يمه علمود يلعب ويا هادي بالسيارة الي هداها اله
فركت كصتي حيل جريت نفس وفردت اكتافي وارتجيت
رجعت لبست ثوب القوة لان ما يلوگلي الضعف

شيهانة :- غفار محل حلويات مرتب ومجربة اطبگ علي بس اتعبك انت تنزل تشتري

هز راسه :- تأمرين امر

شعلان :- اكلج ... ااا ...عمو جبران ياب مرة ... منه لونه اخضر ... ابي منه

شيهانة :- قصدك بقلاوة بالفستق
هز راسه اي .. خجلان
غفار اترسلي السيارة بقلاوة بالفستق غير يتدلل شعلان حبيب امه

غفار :- تامرين

نزل غفار يشتري ضليت اسولف ويا شعلان احاول اعرف شنو يحب اسويله حتى يتونس عرفته هسة حاب هادي ويريد يلعب ويا

وصلنا لبيت ليلى استقبلتنا خطية فرحت بينه
لگيت يمها بنية شابة باوعتلها وقلصت عيوني عرفتها هاي ريحانة

تقربت سلمت علي وكعدت ع صفحة مكسورة بس تصفن
اني اعرفها من سوالف ليلى وشفتها من جنة يم نسيمة معزومين بس هسة شوية راجع الدم لوجها

شيهانة :- جايتج للمطبخ

صحت من مكاني وكمت لحكتها
:- شعجب ريحانة يمج

باوعتلي وهي تكصص فواكه :- خالتي خلتها ترد عني الوحشة وهم شابة واني شابة اكدر شوية اطلعها من جو الحزن

شيهانة :- خطية بس تدرين زين سويتن وخليتنها يمج ترة صدك راجع الدم لوجها خطية
ليلى :- اي زين صارلها كم يوم يمي بس اني احطها اسولف وياها الهيها حتى تنسى حزنها والهي روحي
حجت كلماتها وتحسرت

اجيت ضربتها ع كتفها ولفيت ايديني ثنينهن ع زندها
:- شبيج ليلى تتحسرين واني موجودة عفا عليج
ليلى :- هذا الي لاحكني اتوقعه مو خطر بس هيج يتحرش ذاك اليوم شفته يكلي اوصلج ومن رفضت يكلي من فوك مبركعة ومن جوة مطركعة يمكن يدور علاقات

عقدت حاجبي باوعتلها بتفكير :- جا والتهديد الي انشمر عليج
صفنت شوية وقوست شفايفها :- شاكة بالسادة يمكن رادو يخوفوني حتى ارجع لقيس واشوفه هو اماني

شيهانة :- هسة حفظتي رقم سيارة الزلمة شي مثل ما كال جبران
هزت راسها :- كتبتهن بدفتر انطيجياهن قبل لا ترحين

شيهانة :- شنو منتظرة جان خابرتي شي
تحسرت :- جنت .. افكر بروحي ... بسيد قيس .. بهادي
شيهانة احنه تطلكنا كلش اجة هو واهله وتطلكنا وبعد يومين نروح للمحكمة وننهي كلشي خابرت هادي امس يجي بيوم الطلاك يحضر وياي لان احس روحي بأقصى مراحل الضعف وبأي لحظة انهار

فكيت عيني اباوعلها تدمع وتحجي حضنتها بدون كلام
ضلت تبجي بحضني مسدت ع ظهرها بحنية
وبست راسها :- لا تبجين مسحي دموعج ليلى الله كاتبلج الاحسن والعوض يجيج

برطمت وعيونها تدمع :- باليل اقتحم بيتي واجة يمي نام بحضني طول الليل وبجينا جانت اصعب ليلة بحياتي حتى اصعب من ليلة شردتي لايران

شيهانة :- شنو حجيتو ما حنيتي علي ؟

هزت راسها اي :- حنيت كلت ميخالف اسامحه وثنينه غلطنة ولو غلطة اشوفه اكبر من غلطي لان هو تصرفه وياي جان مابي غيره وحمية وعافني صغيرة بديرة غرب مكسورة وضعيفه بس كلت ميخااالف عمي ميخالف

بس ضليت افكر بالضرة ما اكدر اتقبلها داده لا اكدر اكلله طلك حرام عليه اكسر ركبتها واضيع اطفاله

هزيت راسي مقهورة حسيت حرورة صارت بحنجرتي
:- حقج خية والله حقج الف مرة مو مرة وحدة اني من اكلج رجعي علمودج لان ادري بيج تحبينه وادري بي يحبج
انتي شنو تسوين صح عفتي صح لو رجعتيله هم صح
كل موقف تسوي ينشاف من نافذتين .. واكو حجج وظروف تجبرج وتجرج لهذا الموقف

اذا رجعتيله محد يلومج تحبينه و علمود ابنج وهو هم يحبج
واذا عفتي محد يلومج هم لان كسرج وعافج بالغربة وحتى ما فكر يجي ويكعد وياج ويحجي و ع الاقل يخليج ع ذمته ويداريج لحد ما تلكين حل لروحج

هزت راسها اي :- اني هذا الكاتلني راح اموت
اكلج كافي فدوة اني بعد كلبي ما يحمل تعاي كملي تكصيص خليني اغسل واشرب ماي ونكعد يم ريحانة زحمة عفناها ما نريد موضوع يسد النفس نريد شي يفرح

هزيت راسي ضليت اقطع مكانها وهي تغسل
وافكر بيها خلصت عمرها بالاه والحسرة سودة عليه
ولو اني حالي من حالها بس؟ ع الاقل اشوف روحي قوية وعندي ظهر هي ماعدها

اني محد تخلى عني مثل ما الكل تخلى عنها

انعم الله ع هادي جان خير سند الها بس للاسف بعيد والايد كصيرة هي تحرم علي ما يكدر يكونلها بالقرب الي هي محتاجته

ضليت اجر حسرات بدون شعور وادور بكاونترها ع مواعين ارتب بيهن الفواكه ومسوية عصير وغيره
وهي عافتني وراحت تشوفهم ليش يعيطون

رجعت كالت :- هذا لعب عبالي يتعاركون النوب هادي ابني نسى الهدوء يم ابنج
شيهانة :- راح نخرب اخلاق السيد وشيفكنا النوب

ضحكت تهز ايدها ما قابلة نقلنا كلشي للصالة وكعدنا يم ريحانة شوية واندمجنا بالسوالف ونسينا نفسنه
اجاها اتصال كامت تجاوب سلمت
واسمعها تكول

بس يمي صديقتي وهو ديلعب ويا ابنها جاي علموده شلون عادي بغير وقت اني اجيبه
سكتت شوية ورفعت السماعة من ذانها
وباوعتلي
:- عادي شعلان ياخذونه ويا هادي لبيت السادة يلعبون ويا الاطفال ويرجعونه

همست :- خاف عيب يشلعون كلوبهم
:- العلوية مشتاقة الهادي وابو مشتاقله وتكول نونسهم ونلعبهم ويا الاطفال ونرجعه

رفعت اكتافي قوست شفتي بتفكير وكتلها :- خوش

رجعت تحجي :- هاي هي علوية والله علمود شعلان ابن صديقتي ديلعب ويا جان ما اخرتج هيج

كملت حجي ونهت المكالمة :- الولد اهله مشتاقيله يردون يجون ياخذونه هسة خلي شعلان يروح يلعب وياهم كالت شوية ونرجعهم

شيهانة :- خاف يشوفون اطفال وتطلع عيونهم ويستوكحون عيب النوب اني كلبي يضل يم ابني

ليلى :- يمعودة يدارون الاطفال كلش عدهم مقدسين يمكن اكثر منج يدارونه

هزيت راسي اي .. صاحتلهم جانو هم يلعبون لدرجة رفضو ياكلون شي راحت ليلى للمطبخ خلت من الحلويات المشتريتهن والي جبتهن اني جهزتهن
وضلينا نوصي بيهم يصيرون عقال تفاجئت بحماسهم وخصوصا شعلان من عرف اكو اطفال وراح يلعب وياهم

شوية واندك الباب وصوت هورن
ليلى :- اجتي العلوية

خجلت اضل جوة طلعت للطرمة سلمت عليها
لان احنه التقينا قبل .. واخذتهم وياها بالسيارة
وكفت كبال الباب لمحت ابنها كاعد بالسيارة لابس دشداشة بيضة مخلي ع اكتافه جفية خضرة مال سادة
وعينه ع الشارع مو علينا

بس سدت الباب كتلها :- اتمنى اشوف قيس والله بس يجي غفار شو الا انزل عليهم واخذ ابني منهم بلكي اشوفه شالع كلبي مثل ماشالع كلبج هذا الزلمة

ضحكت وهزت ايدها :- اي هو وعمامته وتطلعين كدامه بالبنطلون مالتج وعطوبج ام اعطوب كعدي وسكتي

شيهانة :- سحبتي فيشة من هادي ولج

....

دنيا ..

كاعدة ببيت اهلي ضايجة من جهة خوفي ع مؤمن بعد خطفه خلاني اتعذب طول وقتي خايفه علي
ومن جهة ثانية اخوي قيس وليلى وفاطمة
ما نعرف ويامن نوكف ما نعرف شنو نسوي وشنو نگول

بالاخير من كد تفكيري بيهم رحت لمؤمن ابجي
وكتله :- هسة شنو لازم يسوون فهمني هذول تعذبو
كال :- عوفيهم هي الحياة حياتهم وكل واحد بيهم يعرف مصلحته وشنو يسوي مو اطفال همه
وانتي ابد لا تتدخلين ولا تنصحين احد لان الاكبر منج تدخلو ونصحو وبعد ضلت يمهم

بوقتها سكتت ما حجيت ولا حاجيت قيس شي ولا حاجيت فاطمة مثل ما كال مؤمن هم كبار والاكبر من عدنا نصحوهم وضلت يمهم هم يمشون حياتهم مثل ما يردون

باوعت لامي تخابر ليلى حتى تجيب هادي يمها نهت المكالمة واجت كعدت خلت. ايديها ع رجليها وباوعتلي بتفكير
شوية وكالت
:- الله يرزقج ويترس حضنج جهال بجاه نحر الرضيع

دنيا :- الله يسمع منج ويفرح كلبي وكلب مؤمن بطفل

سميرة :- مو بعيدة عند الله وتفرحون عن قريب وتفرحونه وياكم
سكتت شوية ورجعت كالت
:- خليني اروح اجيب الجهال
صفنت عليها يا جهال
:- مو ليلى تكول صديقتها يمها وجايبة ابنها كتلها عادي حتى ابن صديقتج خلي يجي يلعب هنا ويا الجهال خطية يتونسون واني كلبي يم هادي مشتاقتله واخوج كلي خابريها اريد اشوف هادي

هزيت راسي اي كامت تلبس بجواريبها واخذها هاشم شوية واجن البنات مسويات كيك وجاي وكعدنه نتعلل ونسولف بالصالة
والاطفال يلعبون فوك رؤسنا والبيت ضجة بس بي روح هاي الضجة هي الامان بالنسبة الي
لان هاي اصوات الراحة والحياة

فاطمة جانت فرحانة حتى وجها مورد واني اباوعلها بتفكير صح حقها قيس رجلها وتحبه بس معقولة ما انقهرت ع حال ليلى؟! ما انقهرت ع وحدتها و ع ابنها هادي ليش هي تريد قيس الها ويكون اب لاطفالها بينما هادي يعيش بعيد عن ابو وهاي اذا راده نروح نجيبه ونجي حتى يشوفه

تحسرت ودرت وجهي منها ولو هي ما تنلام الغيرة تحرك صعبة الحياة ويا ضرة لا ذيج تكدر ولا هاي تكدر

دخلت امي وياها هادي وطفل ثاني اسمر عيونه مكحلة حنان كالت
:- شوف حاطيله كحل هذا الطفل

شو هذا باوع لحنان وخزرها وكبل كال
:- انه ريال ما اتكحل هذي خلقة ربج

سكتنا كلنا لميت ضحكتي وحنان غطت حلكها مستحية
:- ما شاءالله عليك عبالي مكحلينك
وفاء بهمس :- شو هذا ما يحجي مثلنا .. لهجته غريبة

حنان :- شمدريني اخاف حتى اسأله واگلله انت منين ههههههه

ضلو يلعبون سوية ويا الاطفال واحنه نباوعله ونرجع نسأل امي
منين هذا ابنها شو مو مثلنا يحجي
ترفع ايديها وتكول
:- والله مادري بس صديقتها بصراوية هذا شو يحجي عراقي وكويتي

سكينة :- حتى شكله شكل كويتيين اسمراني وعيونه سود كبار
مادري مثل هذول اليطلعون بالتلفزيون

التفتنا من فاطمة ضحكت
:- صف ويا خاتون النوب صارو جنهم دبس وراشي هي شگرة وهو اسمر

باوعنه واكف كبال خاتون مخلي ايده ع خاصرته وهي بأيدها لعابتها وماندري شنو تدردم ويا ورفعت ايدها ما قابلة دفعته من صدره

هو معصب عقد حواجبه وجرها حيل من شعرها من كدام
طفرن فاطمة وامي حتى يفاككنهم وهو جرها حيل للكاع وطاحت ع وجهة بحيث رفعت راسها سنها مكسور والدم ينزل من حلگها

ضلو الاطفال صافنين وامي لزمته تحجي ويا
تگله شنو سوتلك
وفاطمة تغسل لفاطمة تسكتها وسكينة تمسح الدم من الكاع وصارت خبصة

كال لامي بنتر معصب
:- هذي ما تستحي تگلي انتَ اسود مزنجر علامها شايفه ويها بالمراية جنها فجلاية مصوفرة

سميرة :- اعذرها حبيبي وانت مايصير تضرب احد جان اشتكيت الي اني اخذ حقك

رفع اكتافه مايدري وكال :- شدراني حرتني

هادي :- شعلان حلو مو اسود
سميرة :- يخبل اسمر مملوح جنة طين الكاع يخبل

رجعت فاطمة تسكت بخاتون وذيج مبرطمة وشفتها ورمت باوعت لشعلان تخزر بي وهو يخزر بيها
هادي كاللها ما قابل
:- لا تعيبين ع خلق الله خاتون

هي رجعت تبجي من كللها هيج
فاطمة :- بعد ما تعيب مو خاتون
باوعلي للولد كليله اسفة انت حلو

شعلان نتر بعصبية :- لا تعتذر ولا هاي بس ربوها زين

فكينا عيونا مصدومين كوة لازمين ضحكتنا اجة طشر جهالنا تطشر
سميرة :- هاي هي حبيبي نربيها ومن ضمن التربية الاعتذار
اعتذري منه خاتون وهو يعتذر منج

شعلان :- لو تموت انه شعلان اعتذر من الفجلاية هاي
خاتون :- اسفه

ضل ساكت يباوعلها بنص عين مخلي ايده ع خاصرته متعصب وامي تحجي ويا
جر نفس وباوعلها كال من ورة خشمه
:- السموحة منج

وراح كعد ع القنفة متضايق
وهادي راح ويا كعد يحجي ويا نشوفه شلون يراضي
وفاء :- فدوة لعزيز السادة شوفن شلون يراضي بي

حنان :- والنعم التربية ابن ليلى

شوية وباسه بخده وراح جابله حلويات من الي خلتهن امي اله وانطاه ضل ياكل

فترة وگالو اجت امه علي احنه كلنا وكفنة بباب المطبخ نريد نشوفها وحنان تكول شايفتها بس ناسية شكلها وجانت مو كلش حلوة حيل ضعيفة وتعبانة

دنيا :- الله عليج نزليها دخليها يمه نريد نشوفها

امي تعض بأيدها وتخزرنا بس بردت كلوبنا فتحت الباب ع وسعه واشوفها جنها عارضة ازياء مفرعة والجسم رشيق وطويل وتجنن
كرصت حنان ابطنها
:- ولج هاي غير تخبل شلون تكولين موكلش حلوة

حنان :- متغيرة من اجتنا مو هيج
دنيا :- هذا يمكن رجلها

سكينة :- خوش رجل طويل وشخصية واسمر اتوقع هذا ابنها يشبه ابو هي مو سمرة

جانت تحجي ويا امي وتتشكر منها واحنه نسمعها صوتها واضح وعدها حضور

شيهانة :- خاف تعبكم لو سوا وكاحة

سميرة :- لا ابد والله بس هاي خاتونه حجت علي شكد عيب عذرينا اطفال بينهم
شعلان :- خذيت حكي مربع شكيت حلكها

هي شهكت وغطت حلكها
:- يا ماما عيب بس لا اذاها

سميرة :- هههه لا جرها واطحت تعور حلكها بدون قصد هي غير حجت علي وهو طفل بدر منه رد فعل قاسي شوية

حبيبي اني كتله بعد ما يتصرف بعصبية حتى يكبر يصير هادئ لان العصبية موحلوة تضره وتضر نفسيته

تحسرت وكلتلها :- والله هو نفسيته صدك تعبانة لان متعود ع اخو واخته بالكويت وقبل فترة قصيرة رجع للعراق لهسة ما متعود

دنيا بهمس :- ولجن كويتي

سميرة :- حبيبة فوتي عشاج يمنه خلينا نتعرف ونسولف
شيهانة :- لا خالة تضل يمكم العافية احنه هم حلت النه السوالف بالباب بعد نسوان هههه

ودعت امي وصعدت بالسيارة ورا
حنان :- مو رجلها لو رجلها جان كعدت يمه

سميرة :- الله يستر عليها
دخلت وسدت الباب وعضت ايدها حيل
:- بس لا شافجن الولد
فاطمة :- منين يشوفنه غير هاي ستارة اكلج خالة هذا رجلها

سميرة :- لا ما اظن شو سمعت ليلى كالت هسة يجي السايق مالتها وتجي ع ابنها

سكينة بحماس :- يمة عدهااا سايق شنو تشتغل رجلها شنو شغله شوفن شكلها مبينه موظفة جبيرة بالدولة

سميرة :- من اكعد يم ليلى اسولف وياها واسألها شو حتى اني صار عندي فضول اعرف هاي البنية منين وشنو وراها

ضليت لليل يم اهلي اجة مؤمن اخذني تمشينا لبيتنا
مرت من يمنه سيارة كبل لفيت ايدي ع زنده خايفة
خله ايده فوك ايدي وهمس ..
:-لا تخافين دنيتي ..

هزيت راسي اي فتح الباب ودخلنا للبيت صعدت بسرعة انتظرته ما اجة ضل جوة سبحت وطلعت رتبت شعري ونفسي اله
ورتبت فراش الغرفة شوية وصعد
سد الباب وباوعلي بتفكير
بعدها كال

:- صايرة كأنج قطعة من القمر انتي شنو؟ ليش كل ما اجالج تحلوين وتخبليني

ضحكت غطيت وجهي بايديني خجلانة

اجة يمي كعد لزم ايديني نزلهن باوعتله وميلت راسي بدلع
:- والله دنيتي احجي صدك اني عيوني بس تشتهي تباوعلچ يمكن لو اخلص عمري كاعد كبالج اتأملج ما اشبع منج

خله ابهامه ع شفتي وهمس بصوت ذابل
:- ترفة ..ورقيقة مثل الوردة

دنيا :- حبيبي هيج اني بعينك حلوة؟
مؤمن :- اجمل بنية بالدنيا كلها .. ولج انتي دنيه والدنيا كلها بعيني

خليت راسي ع صدره :- اوف مؤمني شكد احب كلامك واحبك من فدوة رحتلك اني
مؤمن :- اني الاروحلج فدوة .. فداج روحي وعمري وعافيتي وكل شي بمؤمنج فدوة لضحكتج

ضحكت بصوت عالي وحضنته حيل تحسر وهمس
:- صوتج دنيه ما اريد احد يسمع صوت ضحكتج غيري نار السادة كلها تصعد لراسي اروحلج فدوة فهميني

رفعت راسي ذبلت عيوني خله ايده ع عنقي جر راسي قربه من وجهه ونصة لمستواي
انفاسه تضرب وجهي وعيونه تتجول ع ملامحي بذبول لف ايده الثانيه حول خصري وهمس
مؤمن :- اغار ع صوتج من اذان اليسمعون .. واغار ع ضحكتج

دنيا :- ابطل ضحك؟
مؤمن :- ضحكي وشبعي ضحك اموت ع ضحكتج بس ماريد غيري يسمعها فهميني دنيه احترگ حرگ النار تشب بيه

هزيت راسي اي .. نصة باسني بشفتي غمضت عيني نسيت الدنيا والبيها ..

دخلت سبحت وطلعت ضليت امشط بشعري نعسانة طلع هو وراي متوضي
شافني كوة امشط اجة اخذ المشط وكعد وراي يمشط بشعري و يدندن بأنشودة

غمضت عيني بديت اغفة واني كاعدة رجعت روحي صار راسي بصدره
اسمع ضحكته حسيت بي مد روحه خله المشط ورفعني من ع الطبلة شالني لصدره لفيت ايديني حول ركبته وخليت راسي بيها وذبيت نفس

خلاني بفراشي ونيمني .. احبه واحب اتدلع علي
واحب اتصرف يمه مثل الطفلة وهو يداريني

....

الشيهانة

... رجعت من بيت ليلى وقت العشا بدلت ونزلت تعشيت شعلان جان تعبان صعدت ويا للغرفة طلعتله بجامته لبسها وشلت ملابسه الوصخات خليتهن بالسلة

شعلان :- اكولج ابي من البقلاووة

غمضت عيني وخليت راسي ع الميز بتعب
حسرة بكلبي اسمعه يكول يمه جريت نفس وحجيت

:- هسة اجيبلك بس قطعة وحدة الكثرة مؤذية للصحة حبيبي
هز راسه نزلت جبتله من المطبخ وصعدت كتله
هذا خلي يمك بس مو كل شوية تاكل منه تتاذة اني الصبح اجي اشوفه مسموحلك بس وحدة تمام

هز راسه اي
بسته براسه واخليته ينام بفراشة وطلعت

جان اول الليل بس لان هو طفل ولعب هواي تعب ونام

دخلت للغرفة ماكو جبران جوة واني مختنكة بحسرتي كعدت لميت رجليني لصدري مقهورة
اريد افكر واتوصل لنتيجة ماكو
حسيت بحرورة بصدري خليت ايدي ع صدري وشهكت غمضت وطاحت دمعتي
رفعت راسي فوك بدون ما افتح وهمست
:- ربي طفي ناري راح اموت

ضليت ابجي وامسح بدموعي مقهورة ..الانذال بكل عين وقحة يباوعون بعيني ويردون مني اخذ وانطي وياهم
مستغربة الصدفة ومستغربة تصرف جبران .. ومخابرته لهاي البنية

بس ما ادري يمكن من كثر هموم الدنيا جنت اشوف رقم البنية والاتصال شي سخيف وما يستحق مني انقهر بكد شوفتهم ويمكن شوفتهم هي السخفت الموضوع

انفتح الباب ودخل شافني عقد حاجبه سد الباب واجة كعد لزم وجهي يمسح بدموعي مستغرب
كال بحنية
:- شبي صبي عيني يبجي؟

ميلت راسي خليته يستقر بكف ايده مبرطمة وعيوني تدمع من وحدها حجيت مقهورة
:- صدفة شفت هدير وعادل بمحل الهداية وقهروني كلش

عقد حاجبه ضل يباوعلي بتفكير
:- شنو حجو وياج لو سوولج شي
:- صلفين هدير تكلي جبران يعوفج وتضلين وحيدة وعادل يريد اسلم والله انقهرت وانقرفت منهم جبران

خليت ايدي ع صدري ااشر مقهورة
:- هنا نار شابة بسببهم تفهمني نارررررر مجاي تطفى

لزم ايدي نصه باس صدري
:- انه اطفيها حبيبتي نامي ..نامي يا روح حبران وعمره

لزمني من اكتافي نزلني ع الفراش باوعتله مستغربة
مسح ع شعري ورفع الغطا غطاني باس كصتي ومسح عيوني من الدموع
:- نامي ارتاحي شوية واجيج
:- وين رايح؟

:- يم جليل محتاجني بشغلة ماكدر ارده من ارجع الكاج نايمة

هزيت راسي اي ودرت نمت ع جانبي الايسر ورفعت الغطة لصدري سمعته يدوس بالمبايل ويمشي بالغرفة خليت الغطة بحلكي وبجيت بدون ما اطلع صوت

انشغاله ماخذه مني ومن جهة هاي البنية هسة ما اعرف اذا رايح لجليل لو لا
ويمكن صارت عنده اهتمامات اولى مني خلنه يعوفني واني بهذا الوضع

طفة الاضوية وفتح الباب قبل لا يسده حجة بصوت ناصية
:- غفار حضر السيارة عدنا سهرة حلوة ترد الروح

رفعت راسي اشوفه طلع وسد الباب وعيوني ضلت تجري فاتحة حلگي مصدومة
ليش هيج حظي بالزلم ليش ياربي ولا تزوجت واحد يبرد الكلب كله قهر بقهر واحد يبيعني ويشك واحد يسحرني ويضربني والاخير يخون

ضليت الطم ع وجهي منهارة واشهگ
احس روحي راحت انمردت ، صار عندي حتى مغص
راسي صدع من كثر البجي والف شي تخيلت
هسة مو يم جليل يمها ويمكن جليل عنده سوالف سهرات ونسوان وياخذ جبران يمه

ضليت اكطع بروحي تكطع .. كمت ارجف افتر بالغرفة ع روحي
بس يجي العب بي لعب اليوم اطيح ابو حظه مو اني الاقبل يخوفني بكل صلافة ويروح يم وحدة ويعوفني واني بأمس الحاجة اله

حتى ما كلف روحه يحاجيني ولا يصبرني يكلي ابرد كلبج وتالي يدير وجهه ويطلع ولا كأني ابجي منهارة

ضليت افتر منتظرته لعبت روحي ضليت اتقيء مختنكة تخربطت معدتي ضليت الوب واحترك بنار غيرتي

اخير شي طكت روحي اتصلت ع رقمه انتظره يجاوب ماكو ، ما جاوبني
غميت روحي حيل ودمغت كصتي ابجي
:- اكيد هسة يمها هاي الصلفة الخابرته لا يم جليل ولا غيره ما يملي عينهم بس التراب ولك ليش تضيع حب سنين وصبر سنين وتعبنا علمود نزوات ولك ليششش

ليش جبران مو اني حنينة اهلك ينطيك كلبك تكسرني علمود نزوة!!

رجعت صعدت لغرفتي منهارة لميت رجليني ع صدري وضليت انتظر اهز بروحي متوتره
وكل بالي وتفكيري يمه ..

تاخر الوكت كلش واخير شي بين الافندي

فتح الباب ودخل جانت الغرفة بيها ضوة خفيف مبين ما متوازن فكيت عيوني بصدمة سكران
سد الباب ع كيف ما شافني حجيت بنتر

:- وين جنت

تحمحم وضل يتلمس الحايط شغل الضوة وكال
:- جانت عندي شغلة مهمه
شيهانة :- شنو شغلك الاهم مني..... شهكت مصدومة من شفت شكله كله دم

وكمت من مكاني مخترعة تقرب الي ضليت اتلمس بي كله دم خايفة علي وناسية كل الوجع الحسيت بي بسببه

غمض عينه بتعب وحط ايده ع خدي
:- اغسل واجيج اسولفلج الصار

شيهانة :- روح اجيبلك ملابس والحكك

فات للحمام اخذتله ملابس ولحكته انصدمت من صدره بي زراك وخشمه بي دم وشفته مشكوكة
ساعدته غسل وبدلتله ملابسه وطلع يمشي بتعب
كعد ع السرير

جبت الاسعافات عقمت جرح شفته ، وعيوني تجري
وهو يهز راسه بتعب لا ويهمس
:- لا تبجين لا اشلع عيونج بجي لا تبجين ما تفتهمين انتي

غمضت عيني بتعب وهمست بجزع
:- تعبتني جبران تعبتني

جبران :- شبيت بصدورهم نار مثل ما شبو النار بصدرج مو انه الانام ليلي ومرتي بكلبها نار وما اطفيها

لزمته من كتفه وفكيت عيني مصدومة
جريت وجهه بايدي رفعته
:- شسويت الهم جبران؟ وين تندلهم انت

:- كلشي اندل ما سويتلهم هواي بس شبيت بكلوبهم نار لا تعرفين شلون وشنو سويت انتي الج الصافي
حرگو كلبج حرگت كلوبهم وسويت ليلتهم حمرة دم

بدون شعور نزلت للكاع طحت ع وركي خليت ايدي ع راسي ابجي بتعب
وضليت اصيح :- هذول انذال بحر ما يتگايش جبران لا تخليهم يدخلون حياتنا مرة ثانية حتى الثار مانريده الله موجود وياخذ حقنا تعبنا والله تعبنا ما ضل عندي شي اخسره بعد راح اموت

نزل بتعب كعد كبالي وجرني حضني لصدره حيل
:- لا تخافين ما اخلي واحد يطولچ ولا يأذونج انتي يمي بامان نامي ليلج رغد

شيهانة :- شنو سويت الهم جبران احجيلي
جبران :- اخذت غفار وحركت الدنيا بالرصاص ع بيتهم ودخلت لنص بيتهم دست بصدر عادل كسرت ضلوعه خليته يتلوة وهدير رادت تدافعله سحبت المسدس وخليته بحلكها رعبتها صارت زركة اخير شي ماعت روحها وطاحت وعفتهم وراي ثنينهم بالكاع والخدامة خايفة خاتلة عبالها اكتلها

بسته بصدره :- بس كافي يولون وانت مبين متعارك ويا
:- صحيح تضاربنه يلا كدرت ادخل للبيت واتمكن منه سويته الج مثل الجريذي يتوسل الرحمة وهي رادت تموت برد كلبج؟

هزيت راسي اي :- برد كلبي واذا تريده يبرد كلش شيل ايدك منهم اني اخاف تتأذى بسببهم هذول انجاس كلشي يسوون

جبران :- تدللين ..

رفعني ويا من الكاع كعدني ع السرير وجابلي ماي شربت اخذ بايده غسل وجهي
تمددت طفة الضوة واجة تمدد حضني خلاني ع صدره ونام

وهنا رجعت اعيد حساباتي وافكر بموضوع البنية

...

ليلى ..

مختنگة وصدري ضايق كلش مخليه عبايتي بحضني وكاعدة بالمرجوحة بالحديقة انتظر جية هادي حتى نروح ونتطلك اني وقيس بالمحكمة

دمعتي بعيني والخوف كاتلني كتل ، خايفة من الجاي كلش مرات اندم لان ما انطيته فرصة واكول لو ناطيته جان صار سند الي ولابني

واتذكر اني الحيطان سندتني اكثر منه من احتاجيته واضل مصرة ع قراري ورأيي

اندك هورن خليت عبايتي بالمرجوحة وطلعت فتحت الباب شفت هادي كاعد وكبل اشرلي اطلع حتى ما نزل

اخذت عبايتي وصحت لهادي وطلعنا سوية
سلمت علي بالسيارة

هو ضل يباوعلي يدرس شكلي من طلعنا كال
:- متأكدة من قرارج ليلة

تحسرت ودمعتي طاحت :- متأكدة بس كلبي نار هادي

ضل يهز راسه مقهور تنهد وكال
:- هاي هيه الدنيه بلوة مرات تخلي البشر بهيج موقف مثلج لا تكدرين تتقدمين اله ولا تكدرين ترجعين وتعوفينه وراج وحال الضيم يا حالج
متعلگه وضاله

ليلى :- واليوم ينتهي كل شي

هادي :- ما اظن قصتكم تنتهي اليوم انتم سالفتكم طويلة كلش ومبين وراكم هواي تعب بس سمعي ليلة امانة وانه ما اشك اعرفج شني بس اوصيج
امانة لا تخلينا يتمادة ويوصل صوبج وانتم متطلكين حدة اذا يدخل للطارمة ياخذ ابنه ويطلع

ما اريد الناس تكول طليقها يطب عليها ويمكن تشيع عليج ما مطلكة وبعدج ع ذمته بس انتم ناشرين خبر الطلاك علمود مرته ذيج

وهيج الناس تسترخصج وتصيرين مثل الماخذته بالسر وغلطانة وخايفة من مرته الاولى

ليلى :- لا تخاف ما اخلي يوصل اطمن

هز راسه سكت شوية وكال
:- هاي ام تفلة شلونها بعدها شافطة وشايلة سجين وتركض

ليلى :- لا خطية يمي زينة شوية جاي تتحسن وتنسى او شنو اكلك صعب تنسى بس تتناسه وتلتهي

هز راسه مقهور :- الله يكون بعونها ويصبرها
خابرتني ام اعطوب تعاتبني لان ما اخابرها كتلها غير مشغول وماكاعد الحك
كالت من تجي لبغداد مر علينا نسولف واشوف تطورات المشروع كلتلها سهلة العصر يمكم انطي خبر لرجلج
ليلى :- الله يوفقكم ويستر عليكم ان شاءالله من نجاح الى نجاح

هادي :- مشكورة بنت العم

وصلنا للمحكمة ، اتفقنا وياهم اليوم جان حاضر قيس
عيونه ما رفعهن علي بس مبين محتار بروحه كل شوية يفرك وجهه ويرتجي تعبان يمه سيد مصطفى جايبه
خله ايده ع رجل قيس طبطب عليها

باوعله قيس مصطفى انطاه نظره قيس هز راسه
ورفع روحه كعد عدل

هاي جانت اصعب لحظات بيناتنا من تطلكنا وثنينا كلنا احنه متفاهمين علمود الطلاك
وبالحقيقة هو بكلبه مايريد يطلك واني احبه بس اختاريت الطلاك لان صارت صعبة علي اكمل ويا

رجعنا للبيت اقاوم واضم دمعتي بعيني كوة
هادي طبك اشترالنا غدة ورجع صعد

عيوني من القهر ضليت ما اشوف بيهن يغوشن غيمة نزلت عليهن
الدموع حاجية الرؤية
صعد هادي وشغل المسجل خليت ايدي ع حلكي وعيني صارت ع الشارع

وشغل عود الحبيبك عود كافي بعد عود عنن علي ذنيج رصعات الخدود
وهو صوته حلو ويغني ويا واني انهاريت دموعي صارت تتسابق ع خدودي

واتذكر من اخلي اصابعه بغمازاته واكلله اريد طفل مثلك عنده رصعات وهسة صدك عنن علي ذنيج رصعات الخدود بس بيناتنا حواجز هواي صعب اشيلهن واكمل طريقي اله

الرجعة لنقطة الصفر احسن حل .. وافضل قرار

هادي :- ها ليلة تبجين؟

ليلى :- لا عيوني مطرت حزنها

هادي :- لا تبجين ولج لا تبجين شني قلة الزلم والله احسن زلمة تاخذينا

ليلى :- شايفني مكطعة روحي ع الزلم؟ داكة ع كصتي اريد رجل؟ غير عشرة عمر انتهت وهذا ابو ابني

هادي :- شمدريني حسبالي تردين رجل

ليلى :- كرهت الزلم بعد ما اريد

هادي :- جا احنه شلنا شغل والله حلوة هاي هو اذاج تكرهينا كلنا

ليلى :- لا انت اخوي ما اكرهك اكره بس الزلم الغرب

هز راسه مد ايده طفة المسجل
:- عكبيش ورا ما صارت دموعي سيل طفيته

هادي :- موزين خليتج تطلعين نار كلبج وتبجين الدموع اذا ضلن مجلبات بالعين هم صعبة واذية لازم يطلعن

سكتت رجع كال والله ابجي لا تستحين مني بيج ومابيج ابجي طلعي كل قهرج لا تضمين بكلبج تتمرضين

تحسرت ودموعي تجارى ع خدودي

وصلنا للبيت مسحت وجهي نزل دك الباب طلعت فتحته ريحانة اول ما صارو كبال بعض واحد خزر الثاني اشرلها براسه تفوت فاتت ما عاجبها وهو فتح الباب دخل السيارة
ونزل سده ، نزلت اخذت الغدة وهادي جان دايخ تعبان من الطريق

خليت الاكل بالمطبخ ريحانة اجت تساعدني كالت روحي ارتاحي

دخلت غسلت لهادي ابني وبدلتله ملابسه وضل يم خاله يلعب رجعت للمطبخ لكيت ريحانة تحضر الاكل عزلت الها ماعون اخذت الاكل لهادي والله ما اشتهي اكل شي بس هو جبرني اكلت كم لكمة ودمعتي تطيح واني اكل كوة تعبر اللكمة من بلعومي

شوية وكمت اخلي الجاي لكيت ريحانة تاكل
:- هذا شوكت يروح؟

:- العصر بس يرتاح الظهرية تعبان

:- اكلج اريد اروح للغرفه وهو كاعد بنص البيت اخاف منو يخزرني

ليلى :- هسة كملي اكلج بعدين من ينام روحي للغرفة

هزت راسها اي شلت المواعين هي خلصت وهو يشرب جاي كامت غسلتهن كلهن وضلت تنتظر وهو خلص القوري وهو يسولف هواي واني مندمجة ويا ناسية ريحانة

شوية وتحمحمت وعبرت من گبالنا للغرفة باوعلها مستغرب ورجع باوعلي
:- هاي شمالها شافطة تخزرني وتمشي جا غير هي تافله عليه شو رافعه خشمها مو المفروض انه اخزرها

ليلى :- هسة البنية بيا حال عوفها وگلي شخبار عذيرة
هادي :- زينة الحمدلله

هز راسه تحسر ورفع عينه لباب الغرفه ورجع باوعلي
:- خطية هسة هاي شلون بيها وين تروح والدنيا ما مخلية الها احد لا ام لا ابن وابوها ع حجيج عار

ليلى :-تضل يمنه احنه وحيدات وحدة تسد وحشة الثانية
هادي :-عود اذا اكو رجل زين يريد مرة اجيبه عليها تاخذ لو ما تاخذ؟

ليلى :- مادري والله بس هسة اكيد لا هية مو بحال رجل
ليش اكو واحد يريد مرة وتريد تخطبها اله؟

هادي :- اي حاتم من طلك مرته لهسة يريد مرة بس ما جاي يحصل وحدة فقيرة وزينة وبنات ال يوشع كلهن معذربات لعبت روحه منهن مايريد يريد الا غريبة شو كلت اكلله ع هاي الشافطة يمكن يقبل

باوعتله بتفكير :- لا حاتم جبير هاي صغيرة خطية سد موضوعها

هز راسه وسكت صفن شوية جر حسرة ومدلي الاستكان
:-صبيلي
صبيتله اخذه شربه بسرعه لان برد وكال
:- راح اتمدد ع القنفة وانام شوية لا تطلعن حس العصر اروح لام اعطوب وارجع لديرتي خليتني يا رايح يا راجع فلك طرجن من نسوان
:- تعبتك اعذرني
:- اكلي تبن

تمدد ع القنفة جبتله غطة ومخدة وحتى مندر بس ضل فوك نايم

ريحانة ...كعدت العصر البيت هدوء كلهم نايمين مديت راسي شفت هادي ع كولة سهير المتوحش نايم
اخذت ملابسي وركضت للحمام اسبح خلصت سبح لفيت شعري بالمنشفة وطلعت وصرت ويا يم باب الحمام وجه بوجه

فك عينو ودار وجهو بسرعة من بين اسنانو همس
استغفرالله استغفرالله

ريحانة :- دحكت مرة لو شيطان ضليت تستغفر شسالفة
رد وهو داير وجهو مني

:- ولي منا روحي طبي للحجرة لا افرسج هسة

ريحانة :- شبيك متوحش حاجي العالم زين شايف حالك تهي بهي
هزيت ايدي ما عاجبني

هادي :- ولج انه متوحش ولا اتفل ع الوادم كلش ماكو احترامات كلش

ريحانة :- خليت الاحترامات الك تگضب بيه ما تستحي شابكني شبگ شكد عيب تسولف بالاحترامات
التفت دحكلي ورفع طرف حاجبو

بادلته الحركة رفع اصبعو بتهديد :- احسبلج للثلاثة اذا ما اختفيتي من جدامي بعلي الفحل افرسج فرس واحرك شيب الخلفج

ضليت واكفة رفع اصابعو وكال واحد .. اعتلى طرف حاجبي اكثر
كال ثنين كتفت ايديني وابتسمت بطرف شفتي
كال ثلاثة .. وفك عينو مصدوم لان ما مشيت

حركت كتفي ومريت من كدامو :- بعد لا تهدد لاني اكسرو للتهديد وعينك ويا خوووش؟

سمعته يستغفر ورفس الحايط بغضب
بداخلي ارعش خايفه منو ومن عيونو التخزر بس ردت استفزو لان شايف نفسو كلش

بعد ما طلعت لحد ما راح العصر لبيت الشيهانة ع كولتو ام اعطوب

....
ليلى ..مر اسبوع ع طلاكي. واجت خالتي اخذت ريحانة كالت كم يوم يمي وارجعها الج

البيت رجع وحشة علي واحس روحي مخنوگة كلش
واريد احد يمي
العب ويا هادي مرات والتهي ومرات امل اضل اكلب بالتلفزيون وماكو شي بي

مشيت للمطبخ اسوي غدة جان عندي نقص مسواك
لبست جواريبي وعبايتي واخذت هادي وياي اخاف اتركه بالبيت وحده

مشينا اني ويا نتسوك من المحلات القريبة
رفعت راسي شفت الشمس اختفت ورا الغيوم
الرمادية ..الظاهر راح تمطر

المطر يخنكني ما احبه .. خصوصا بعد ما صارتلي من ورا ذكريات جنت اذكرها واضحك واهسة اذكرها واموت بجي

تسوكنا ورجعنا نتمشى اني ويا ، ضلت تنكط تنهدت ولميت عبايتي زين حطيت العلاليك ورجعت شلتهن زين ولزمت ايد هادي حيل

:- استعجل ماما لا تزخ واحنه بالشارع

ضلينا نمشي بسرعة صرنا قريبين من بيت السادة الباب مبين مفتوح اتوتر من اصير يمهم وقريبة عليهم لو من يشوفني واحد منهم

شفت طرف ثوب واحد شوية وطلعو سيد قيس ومصطفى يتمشون وقيس رافع راسه يباوع للسما
واسمع مصطفى يگله
:- اذا المطر هيج يرد روحك ان شاءالله يومية تمطر

قيس :- رحمة رب العالمين شلون ما ترد روحي؟
تحسر والتفت ع صوت هادي الترك ايدي وركض صاح بابا

نصة قيس باسه واني صرت قريبة القيت السلام
ردو ثنينهم سيد مصطفى كال معاتب
:- ليش يا خوية بس اتصلي بالعلوية تلكين المسواك كله يمج بالبيت

ليلى :- رحم والله والديكم ما تقصرون بس احنه تعودنا وهيج مرتاحين
هادي .. يلا ماما لا تمطر قوي ونضل جوة المطر

قيس حضن هادي وشمه وباسه حيل وكال بصوت ناصي
:-اذا مطرت حيل اغطي بعبايتي

بلعت ريكي متوترة اجاني هادي ورجعنا نمشي بدون ما التفت بس هادي يضل يتلفت جر ايدي وكال
بابا يباوع علينا

هزيت راسي اي وضليت امشي بسرعة بدون حجي

دخلنا فتحت باب المطبخ ضليت اطبخ وهادي يلعب جوة ضلت تمطر شوية اشم ريحة الزرع والتراب المبلل ترست ريتي والهوى بارد

شوية وكطعت وطلعت الشمس حلوة دافية
نصيت جوة الجدورة وطلعت انشف بالطارمة بالماسحة

اندك الباب جريت الربطة حطيتها ع راسي وحجيت
:- منو؟

رد من ورا الباب صوت زلمة
كال :- من معارفج ليلى فتحي الباب

استغربت صوته ما اعرفه كلت هذا يمكن واحد من عمامي لو من السادة جايب شي
نزلت رداناتي زين وفتحت الباب كبل اندفع ودخل واحد ملثم جفت ع البيت ودفع الباب حيل سدة
شهكت مصدومة ورجعت ليورا ارجف وعيوني ع السلاح الشايلة بخصره .......للحكاية بقية

رأيكم بالقصة يهمني 🖤

حساب الانستا @ffatema.__

الاسم فاطمة العبادي

اعتذر لان اكو تأخير بساعات النشر المفروض قبل 12 انزل بس ما جاي الحك والله مشغولة كلش
ع فراغي اكتب 🖤