رواية حمائم تخشى الطيران الفصل التاسع وأربعون 49 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو البارت 1000تصويت وتعليق بين الفقرات لطفا🔥🔥🔥

رد بنتر :- اي تسودنت ضرب عندي خيط راح اجرو واعدمج بي
رفعت طرف حاجبي ما قابله
:- روح حرب جوابي تعرفه وكلامي ما اغيره لو ع كص ركبتي مو اني الاتساوم

رفع حاجبه ما قابل ثبت عينه بعيني وابتسم تك خد
:- عش مهزومة مني ما اني خطيبج يولي وانتي صرتي ملك خاص لـ حرب
وحرب ما يعوف ليلى .. اذا ما ياخذ منها الف ليلة وليلة
نهى كلامه وضل يباوع بعيني بمكر ، مادري شلون لمحت سواده ورفعت راسي ع خيال رجال يمشي
وعينه علينا اني وحرب بالباب ..حسيت روحي رجفت ورجعت باوعت لحرب يضحك بمكر
وكانه يدري بسيد قيس يمشي ورا وشافنا واكفين بالباب سوية ...

بلعت ريگي متوتره ارتفع حاجبه اكثر والتفت باوع ع سيد قيس الي كمل طريقه بأتجاهنا

نظره يتنقل بيناتنا .. اني حسيت روحي جاي تنسحب مني شوية شوية عبالك الموت دخل برجليني

قيس :- السلام عليكم

اني وحرب ردينا ثنينه :- عليكم السلام ..

باوع لحرب ورفع طرف حاجبه ومدله ايده
:- نتعرف ع حضرتك؟ وياك ابو هادي

حرب ضحك تك خد ومدله ايده بسرعه اخذها صافحه
:- اني حرب

قيس :- من اعمام ام هادي؟
حجة وعقد حاجبه بتساؤول يباوعله

حرب :- اهلها ..

ارتفع طرف حاجب قيس وباوعلي
:- مريت اخذ هادي يم اخوته

هزيت راسي اي والتفتت بسرعة صحت
تعال هادي البس شحاطتك بابا اجة ياخذك يم خاتون والحسن

هادي كام متحمس التفتت باوعت لحرب وحجيت
:- محتاج شي بعد؟
ضحك ومسح ع شواربه ..
:- سلامتج بوية

:- سلملي ع البنات .. ان شاءالله بأقرب وكت امر عليكم اشوفهن واذا تجيبهن علي تسوي فضل

حرب :- تتدللين

هز رأسه مبتسم وباوع لقيس يباوع علينا رافع طرف حاجبه
حرب رجع مد ايده لقيس وگله بنبرة متلاعبة وحاجبه مرفوع

:- تشرفت بمعرفتك سيد ، ان شاءالله نلتقي مرة ثانية بظروف اكثر حماس وتشويق

:- ان شاءالله
قيس ضل يباوعلي مستغرب التفتت اصيح هادي كاعد بالباب يمسح بشحاطته
تنهدت واستعجلته
:- يلا ماما

قيس :- انت شنو تقرب لأم هادي بالضبط
اني ما شايفك من قبل ابن عمه ابن خالة

يباوع لحرب بشك .. وعيونه تترقبه تنتظر جواب

باوعتله بخزره باوعلي مستغرب ورجع يباوع لحرب
حرب عدل طرف شاربه
و رد :- اكثر من ابن عمه وابن خاله بس احنه ما نريد نحجي شي هساع .. ليش الفضول سيد؟
ما اظن عندك شي يمها ولا الك حگ تتدخل وتسأل هذا منو وذاك منو وكف يمها وحجة وياها
طالما هي طالعة من ذمتك .. مالك حك

عسى ما اني غريب وما يربطني بيها دم
مو من حقك تسألني لو تسألها ، وليش نبرتك بيها شك ونظرة استغراب شنو دحكت؟ .. لا اني وياها بوضع مخل ولا هي طالعتلي متبرجة المرة بحشمتها واكفة وياي بالباب سلمت عليها وانطيتها حاجات الاهل دزوهن الها

ليلى :- هاي هيه حرب ما صار شي بعد شسوي گملتي بيضة مشكور وما قصرت طريقك طويل انت
والله لو ما مرة وحيدة ما تروح منا الا وانت متعشي بس بعد تعرف بالوضع

هز رأسه وكال
:- كثر الله خيرج بنت خير واصيلة ما يطلع منج قصور

راد يمشي قيس مد ايده لزمه من ساعده
اجة هادي ضل واكف يباوع
حرب باوع لأيد قيس الي لازمة ساعده ورفع عينه لعين قيس عاقدها

قيس :- الي حق ونص المرة ام ابني وهذا البيت عايش بي وليدي اكيد اهتم منو دخله ومنو طلع منه
سمعتها وسمعة ابني تهمني

نتر ايده حرب بغضب وتقرب منه صار ويا صدر بصدر تواجهو :- بيضة ما بيها خلة الخلة بعيونك ونفسيتك

حجيت بخوف :- لا تسوون مشكلة وتفرجون العالم علي واني صوتي ما يطلع

جريت هادي دخلته مستغرب
حرب :- سمعتها تهمك؟ ليش شنو شفتني متشابك وياها؟ لو كاضب ايدها؟ احترم نفسك سيد راح اعبرها الك لخاطر هذا الطفل مو اكثر

قيس :- لا والله لا تعبرها خليني اشوفك شنو تسوي وبيا ظهر جاي تزامط حرب افندي!

شهگت مصدومة وعطت :- كااافي قيس
حرب بروح اخوك لا تسوي مشكلة بعدين نتفاهم

باوعلي عيوني غورگن ردت ابجي هز رأسه اي
عبر من قيس بسرعة ضربه بكتفه حيل
قيس رجع خطوة ليورا وغمض عينه بقلة صبر

نتر :- اريد احجي وياج

نترت بغضب :- ما عندي حجي وياك هسة هيج حلوة فشلتني كدامه؟ وتحجي ما اعرف شلون كأنك شايفنا بوضع مو زين شكد طحت من عيني
وكرهتني بيك اضعاف

قيس :- ليلى انتي ام ابني ام سيد هادي لازم تحافظين على اسمه وسمعته مو حلوة يكلوله امك توگف ويا زلم غرب بالباب وتدگ فچ ، سمعة هادي برگبتچ هاي مسؤولية جبيرة اذا ما تكدرين تتحملينها جيبي ابني اني اربي

ليلى :- ربي روحك بالاول ظنان سوء

جريت هادي جوة وسديت الباب بوجهه بكل غضب
هادي ضل ساكت ما كال اي شي ورجع كعد يم ريحانة

كتلهم فوتو جوة خلينا نقفل البيبان
لمو اغراضهم وفاتو بس قفلت بيبان البيت ودخلت للغرفة سديت ع روحي الباب وانهاريت بجي
ضليت اضرب ع رجليني بقهر مكسور گلبي
ما يتوب مخلي خالتي وشغلها بباله وبكل صغيرة وكبيرة لازم يحسسني بهذا الشي

نظرته ذبحتني ذبح ، سنين مرت ولليوم ما گدر يغض النظر عن خالتي وسمعتها ويباوعلي الي كليلى
دومه يباوعلي ليلى بنت اخت نسيمة
ليلى الكذبت علي قبل ، ما يقبل يعيش ويا الحاضر ويعيش وياي اني ليلى بدون اضافه

دخلت ريحانة كعدت كبالي تنهدت ولزمت ايديني
:- شنو صار ليلو؟ حرب ضوجج؟ خابري هادي ابن عمج وبلغي بكل شي يحل المشكلة كلها

هزيت راسي لا
:- ما حجينة واجة سيد قيس اول شي حرب شمر حجي عود اني خطيبته بس قيس ما سمع مبين لان سأله انت منو
وبعدين قيس ضل يشمر حجي ونظراته ماا اعرف شلون صارت كلها شك

واني كدامج الله يشهد لا ضاحكة ويا حرب ولا طالعتله مكحلة ومحمرة شو حتى حلكي ابيض
وربطتي عوجة وفاتحة الباب كوة واخنزر بي

بعد شنو اله داعي هذا الشك والخوف
الحقير يكلي سمعة هادي مسؤولية جبيرة بركبتج اذا ما تكدرين رجعي الي اني اربي كتله ربي روحك بالاول
عضيت صبعي معصبة ومقهورة

ريحانة :- زين عرف حرب منو
:- كاله انت منو حرب گله اهلها .. ورجع كله اني اكثر من ابن خاله واكثر من ابن عمه
ولج سمعي
فكيت عيوني بصدمة وشرحتلها الموقف كله

ضحكت وجرت نفس مطمئنه :- توقعت كلت ما معقولة اخو صهيب الجان ظهر النا وصاحب نخوة تطلع منو يشوه صورتج .. وهسه بين ع حقيقتو
والله هذا بس يريد يخوفج ويضغط اعصابج مو اكثر

ليلى :- ما اعرف هو هم يخوف شوية
تنهدت نصيت ايديني افرك ايد بايد
:- ترى ديلح يريد مني جواب ريحانة ما اعرف غايته شنو والله حيرني ليش من جهة يريد يشوه صورتي
ومن جهة ثانية استقتل كدام قيس حتى ما يمسني بحجاية؟

صفنت علي بتفكير خلت ايدها جوة خدها صفنت
ورجعت كالت
:- مثل ما كالت الشيهانة يشوف قيس سرقج من صهيب ويمكن هو محمل قيس مسؤولية انتحار صهيب
هو يريد يتزوجج مو علمود يشوهج .. لا هدفو يكسر السادة لان يعرف راح يكون عدهم علم ويعرفونو اخو صهيب

عضيت شفتي بتفكير رفعت عيوني اباوع بالفراغ افكر
:- يمكن والله عجيب ما دا افتهم هذا الرجال كل يوم يحيرني اكثر بالبداية جنت شايفته ملك الموت وجاي يفتر وراي وراها من حجيت ويا اكثر من مرة حسيته انسان فارغ بس يهدد
بس هسة .. احسه مو فارغ عنده غاية ما دافهمها

يمكن صدك يريد يتزوجني علمود يگللهم شوفو اني اخو صهيب تزوجتها وصرت رجل ام ابنكم وراح يعيش يمي وتحت جناحي

ريحانة :- عزة غير السادة يموتون نفسهم من تتزوجين ياخذون هادي منج
ليلى :- مو هيه بكيفهم
هزيت ايدي مستهزأة
:- اكبر واحد ما يكدر ياخذ ابني مني حلم ما يحلمون من ينامون مو بالصدك النوب

ريحانة :- شلون عجل هذا قافل

:- هذا اصلا يريد زواج 5 ايام

:- كلج زواج مهر وشهود اجيبلج اتوقع هدفو يخلي السادة يعرفون سواء خمس ايام لو 10 لو سنة
كاملة .. هذا ذيب مو سهل بس والله ما يأذيج واليوم بأيدو جنتي والفرصة كدامو بس ما انطه بيج

ضليت صافنة محتارة جريت نفس طلع من نص صدري وتمددت افكر خليت ايديني ع راسي
ريحانة :- عندي اقتراح يمكن ما يعجبج بس يفيدج يبعد حرب عنج متاكدة لو كانت نيتو مو حلوة

باوعتلها بنص عين :- حرب بلسانه يكول نيته موزينة اتجاهي شتحجين انتي

ريحانة :- ما أحسو هيج والله تا اشوفو واحد يريد يكسر عيون السادة بس وما عندو شي وياج ويمكن جان عندو بس من شافج بنية فقيرة وما الج دخل باحد ومحافظة ع نفسج غير رأيو وطلعج من لعبة الانتقام هاي
ليلى :- شنو اقتراحچ بالله

ريحانة :- كليلو اقبل بيك بشرط مو 5 ايام ولا سر تروح تطلب ايدي من هادي وعمي واذا قبلو اني اتزوجك

كعدت وضحكت بدون شعور بأستهزاء
دمغتها ع كصتها :- تخبلتي لازم

ريحانة :- كولي هذا شرطي الوحيد يمكن يأيس ويبطل منج
ليلى :- واذا سواها وخطب صدك واني بهيج راح اكون ناطيته موافقتي مقدما يعني انجبر اخذه

ريحانة :- اخذي شبي والله اخو جان درة مال الله لو تفرين الزلم كلهم ما تلگين مثلو وهذا اخو واشوفو نفس اطباعو تعيشين ويا متهنية احسن من السيد

ليلى :- لا ما اريد اعيش متهنية ويا هذا المريض
:- ما مريض والله جنة العافية هو بس محترك دمو ع اخو بس عندو جوانب خيرة جثيرة
وموقف اليوم خير دليل

حطيها بعقلج دحكي زين
المعاشرج سنين يكوم ويكعد ويعاير بيج ويشكك بيج
وهذا الجاي يساومج باول موقف بين معدنو وما انطه بيج وحتى فشلو للسيد وانتي بكيفج بعد

انتي مو تكولين حرب ما يعوفج الا ياخذ اليريدو هاي هيه هو يريد زواج 5 ايام انتي كلبيها علي وكليلو ما اكدر اخلاقي ما تسمحلي وكبريائي وكرامتي وشرفي فوك كل شي. هذا الزواج يمس شرفي
تريدني اخطب واخذني بالعلن

اذا قبل انتي مجبورة تكملين لان حرب مجلب ما راح يفك ياخه عنج واذا رفض انتي الربحانة تكليلو اني سهلتها عليك انت الرفضت مو مشكلتي

ليلى :- ولج انتي ليش ثولة هو ما يهمه شرفي جاي يساومني

:- والله مبين جذاب من غضبو يحجي هيج هسة شنو تخسرين كليلو هذا الحجي وشوفي
اذا كلج اي قابل وخطبج معناها الزلمة هذا رايدج وشاريج بس هو يضغط عليج ويطلع حجج حتى يجبرج تتزوجينو لان يدري من يخطبج بدون تهديد ما تقبلين

:- اجي وياج بس يجبرني مو محبة بيه لا علمود يكول للسادة شوفو تزوجتها واني اخو صهيييب الجنتكم جانت بعلاقة وياي ، وهسة بس تطلكت وكملت العدة تزوجتني

:- كيفج بعد حبيبة بس الكلته احسن حل وافضل شي الا اذا انتي تردين ترجعين للسيد؟ هذا بحث اخر

:- لو اموت لو يكلولي تختارين الكبر لو السيد اختار الكبر ولج هسة كدام نعال حرب يشكك بيه
من عمت عيني اذا رجعت هاي فوك ما هو عنده مرة غيري واطفال
وغير مواقفه القديمة .. لا والله لو يكطعوني

رفعت اكتافها وقوست شفايفها ما ادري
غمضت عيوني راسي صدع كلش ضليت اتكلب بالفراش والف فكرة اجت براسي
كعدت خليت ايديني جوة وجهي افكر
ساعة اشوف حجي ريحانة صحيح وساعة لا اتراجع

بس من اشوف ضغطه علي اشوف كلامها صحيح
حرب جاي يضغط علي ويلح وما راح يفك ياخه مني اني اكدر احجي لهادي ابن عمي وادخله
بس حرب مخوفني مبين علي ما يخاف من شي ومستعد يكتل ويمشي بدون ما يهتم ما اريد اخسر هادي

دخلت ريحانة ورا فترة كالت خليت عشا
هزيت راسي وكمت اليوم معذورة ما اصلي جان هسة صليت ركعتين وبجيت ع سجادتي وطلبت ربي يسهل امري و يفتح عيوني ع الصح

رحت غسلت وجهي وبجيت ضليت اذب ع وجهي ماي
خليت ايديني ع المغسلة سندت روحي وحجيت بضعف
فدوة رحتلك ربي افتح عيني للطريق الصحيح وخليني امشي بي لان والله عشت يتيمة ومتعلعله وما ارتاحيت حياتي كلها سودة بسودة

غسلت وجهي ودخلت للمطبخ شفت ريحانة مسوية عشا خطية كعدت تعشيت هادي جان ساكت وضايج
كتله شبيك ماما

بلع اللكمة وكال
:- ليش بابا هيج يحجي وياج؟

صفنت بوجهه شوية وكتله
:- شلون؟ حبيبي لا تدقق بحجي الكبار مايصير ترى! من تكبر تفهم كل شي

هز رأسه متضايق عاقد حاجبه
ما ضل ياكل
:- شبيك يمة لا تموتني شبيك والله ما حجة وياي شي

هادي :- يخليج تبجين دائما .. من اول ما شفته كل ما يحجي وياج تبجين اني بعد ما اريدهم ولا اريد اروح عليهم

ليلى :- ليش مضوجينك؟
هز رأسه لا
:- بس بابا كل ما يحجي وياج تبجين وهو يجي علمودي بعد لا يجي كليله هادي مشغول

ضحكت مسحت وجهي
وريحانة نصت تلم ضحكتها
:- لا حبيبي مايصير لازم تروح الهم هذول اجدادك واعمامك مايصير قطع صلة الرحم
واني وبابا كبار ما يجوز تدقق باليصير بيناتنا مرة ثانية ازعل عليك

هز راسه اي جر نفس سويتله لفة صغيرة مديتها اله اخذها ياكلها دك التلفون كمت ولكمتي بحلكي
جاوبت طلعت العلوية سلمت علي اكلتني اكل بالسلام
وكالت قيس يكول العصر هادي نايم ما كعد
كتلها كعد
كالت اريد اجي اخذه اليوم عماته ملتمات وجهالهن موجودين خلي يجي يمنه يتونس وياهم

ليلى :- ها لا عادي مو مشكلة هلا بيج تعالي اخذي بأي وقت
سميرة :- فدوة رحتلج الله ينطيج ع كد نيتج الطيبة

ليلى :- فدوة رحتلج علوية اني والله ضايعة امانة ادعيلي الله يسهل علي امري وتتيسر اموري ادعيلي الله يفتح عيني ع الصح

سميرة :- ولو اني ما ناسيتج حالج حال بناتي اذكرج بالدعاء بس تدللين ادعيلج مخصوص للشي الي ابالج
:- والله ياريت ما تقصرين فدوة رحتلج

نهيت. الاتصال خليت هادي يكمل عشا وفات للحمام سبح ولبسته لبس حلو مرتب ، وراح ويا العلوية وعمه مصطفى اجو اخذو بالسيارة

ريحانة :- من ياخذون هادي يوحش علي البيت هساع ويامن العب
وياج بس تبجين وتندبين حظج وما تعرفين تفكرين

ليلى :- شلون راح اكتلها؟
ضحكت وشغلت التلفزيون تمددت ع القنفة تباوع وخلت رجل ع رجل ضلت تكلب خلته ع قناة مال اغاني ابتسمت بوجع تذكرت ايامي قبل احط المسجل واشغل هيثم يوسف وروحي تروح ويا شكد جنت احبه واتمنى اتزوجه

باوعتلي ريحانة :- شنو هاجت المواجع
جرت المخدة مخلتها جوة ايدها وثنتها وعيونها لمعن

:- تذكرين شكد جنتي تسمعين وخالة نسومة وامي من جوة ينطربن اذكر امي تكوم تتمايل وتغني
وخالة نسومة تكلج طفي هيثم وشغلي كظومي

وكبرت وصرت مثل امي وخالة نسومة احب كاظم الساهر

ليلى :- ايي شلون ايام
تحسرت وبدينه نستعيد ذكرياتنا سوية بذاك البيت والعيون تلمع بالدموع
واحنة نحجي دك التلفون طفرت بسرعة ريحانة صاحت

:- اراهنج هذا حرب

هزيت راسي اي :- اعرف ما يفوت اليوم اذا ما يكمل الجاي بي العصر

خليت السماعة ع اذني كلت الو
رد :- هلا بليل الشتا

عضيت شفتي السفلية وبعدت السماعة عن اذني
باوعت لريحانة بأستياء
رفعت اكتفاها وباوعتلي بمعنى شعليه واجت يمي كعدت

ليلى :- هم سواية تسويها العصر حرب؟ هسة اني اريد اعاتبك اخوك الله يرحمه جان رجال معدل وما تطلع منه العيبة وعنده مواقف شگلك؟ كلها رجولة وشهامة انت شبيك ما تكلي

حرب :- اجيت اخذ منج جواب ليلى لان طولتيها واني صبري الو حدود

ليلى :- كتلك تريد تاخذ ثارك اخذه من ركبتي لا توصل لشرفي وغير حجي ما عندي تريد اوصلها لعمامي اوصلها والله وداعة ابني هسة اسدة منك وانطيهم خبر واخليكم انتم العشاير بينكم تتناطحون

ضحك شوية وسكت
:- لا مو بصالحج توصل لعمامج اني زلمة بايعها اسوي الاريدو ومحد يلگالي اثر محد يكع بيها غيرج

ليلى :- هسة شنو؟
حرب :- نتزوج

ليلى :- خمس ايام؟
سكت لحظات وكال بصوت خافت :- اي
:- نجوم السما اقربلك من هذا الحلم

عاط :- شلون عجل فهميني

باوعت لريحانة وقلصت عيوني بتفكير شوية وحجيت بتردد
:- اذا تريد نتزوج تروح تطلبني من عمامي وتاخذني كدام خلق الله اني ما اقبلها ع روحي اتزوج بالسر من واحد يريد يقضي وياي خمس ايام ويطلكني ، مثلي مثل الزانيات اذا قبلت بشرطك

حرب :- هيچ تردين؟ زواج دائمي وعلني؟

ليلى :- اي

سكت ما اكو منه جواب لحظات و كال بهدوء
:- رتبيلي موعد ويا عمامچ ورجعيلي خبر واني اجيب الغربية كلها لعند بابج اخطب

سكتت مخلوسة بهت لساني فركت عيوني ضلن يأذني حجيت بحيرة
:- انت شنو تريد؟ مو غايتك تشوه سمعتي من تتزوجني خمس ايام وتكسر السادة
ليش هسة قبلت حرب ولا جاي افهمك حيرتني

حرب :- كل شي تفهمين بعدين انتي الج الصافي

ليلى :- ها يعني ما قبلت منها لله هم عندك غاية وهدف

ضحك ورد :- كل خطوة اخطيها عندي بيها غاية سودة ضدج ليل ..

ليلى :- عساه الليل بعمرك شتريد مني ولك فهمني حلفتلك مالي علاقة بانتحار اخوك
شكو مجلب بيه

حرب :- كضبي لسانج لا اكصو الج من الجذر ..كضبي لساااانج
نتر بيه حيل

نزيت خايفة ودموعي نزلن حجيت ويا بغضب
:- كاافي شنو هتلر جاي علينا جنك وحش ماشايف دم تصيح اذبح واملخ

حرب :- شوكت لا تجذبين كتلج اني زلمة رقيق اخاف من الدم اخذ غير اشياء .. يلا كافي انطيتج وجه
رتبيلي موعد ورجعيلي خبر حتى امشي ع عروستي

ليلى :-مع السلامة
حرب :- الله وياج

رجعت السماعة وجهي مبهوت كلت لريحانة بحيرة
ولج هذا وافق يكلي رتبيلي موعد اجي اطلبج من عمامج

ريحانة :- هاي هيه بعد انتي متورطة ويا متورطة وهو ضال وراج يريد يخبلج
ع الاقل قبل وراح يخطبج بالعلن وراها بيناتكم تصافون وما يضطر يدخل هادي بيناتكم
ولج الدنيا تخوف اشتري عمر ابنج وطلعي من هاي المعركة بأقل الخساير

ليلى :- احسن شي نروح للشيهانة باجر نمر عليها واكعد وياها اسولفلها كل شي يكولون شور احسن من شور وشور رب العالمين اخير شور

ريحانة :- لو كايلتلها ضل يهددني ومخلية رجلها يرجع يتدخل
:- لا النوب ينشحن اكثر ويحمل اكثر ويذبحنا غير مسودن هوا

هزت راسها محتارة وضلت تحاول تحلل شخصيته
وكل شوية تذكرني بصهيب وجوانبه الايجابيه
خليت ايدي ع عيوني محتارة ..

صرت امشي وافكر واحجي ويا روحي وبليلتها ضليت افكر طول الليل ماكدرت انام
والفجر ضليت ادعي ربي يسهل علي ويشرح صدري
ضليت ادعي لحد ما خلص الاذان ونمت لان ما اصلي

كعدت انطيت خبر للشيهانة كلتلها العصر يمكم
جهزنا نفسنا اني وريحانة وهادي
ما قبلت تجي وياي بس اصريت عليها لان اخاف عليها تضل وحدها
ومن جهة ثانية اريدها تغير جو وتتونس

رحنا لبيتها استقبلتنا ذاك الاستقبال الحلو والطاولة مرتبة حلويات وفواكه وعصاير باردة
بطريقة تجنن وكله مواعين راقية وحلوة ..
وريحة البخور الطيبة من الباب تنشم

ريحانة ضلت تباوع للبيت باعجاب وكالت للشيهانة
بيتكم حلو ما شاءالله تبارك الرحمن عامر باهله وناسه ان شاءالله

:- حبيبتي تسلمين الله يحفظج

ليلى :-وين عمتج شو ماكو

:- امس راحت للبصرة هي وعمي زواج ابن ابن عم ابوي وعزمونا

هزيت راسي اي
:- البنات وينهن ولج صار حلمي اشوفهن اسمع وصفج الهن واحترك

:- بلغتهن بجيتج والله شمس بعد تدرين
سوت بأيدها حركة قبضة ايدها ولمت شفايفها ضغطتهن
:- بس لولوة فرحت وكالت تنزل تسلم عليج اذا ما التهت بالاغاني ونست

:- سالفتج صعبة وسالفتي اصعب من سالفتج

شعلان :- مساكم الله بالخير

باوعت للباب وردينا مساء الخيرات

هادي طفر متحمس وتسالمو ع بعض حضنو بعض
شاور هادي ماعرف شنو والتفت الي هادي
:- اصعد ويا شعلان ماما

:- براحتكم

هزو روسهم وطلعو يركضون متحمسين
الشيهانة ضحكت وكالت
:- من عرف راح تجون وياكم هادي كال اريد استقبله بداري ع گولته وجهزناله كل شي بغرفته
حتى الضيافة يريدون وقت خاص عيني

ليلى :- بعد روحي الله يحفظه ويستر عليكم
شيهانة :- تسلمين ويحفظلج هادي ..تعاي ولج شبيها سالفتج وين وصلت

تنهدت وذبيت عبايتي وكعدت عدل حتى اكدر احجي وبديت اشرحلها كل شي بالتفصيل الممل

ضلت صافنة علي شوية وكالت
:- انتي ليش مقتنعة تتزوجين حرب؟

هزيت راسي لا
:- لا والله مقتنعة وامرج منتهي وجاي تمدحين بتصرف حرب مال امس .. انتي اصلا لو ما موافقة ما تكليله ع اقتراح ريحانة ولا تتجرئين تحجين بي اصلا

ليلى :- مو محبة بي علمود اشتري راحة بالي اني لو علي كارهته خصوصا سالفته من ساومني بشرفي

:- جا خية انتي تشترين راحة بالج بالمقابل تبيعين عمرج كله اله خاف بعدين ما يطلك وتنربطين ويا العمر كله

ريحانة :- اذا طلع زين مثل صهيب ليش تطلك؟

:- جاي تكولين اذا .. احنه نمشي ع الاذا يا حبيبتي؟
ليلى السويتي غلط والاغلط الاكبر ضميتي عني ان هو بعده يضايقج مو كلتي شال ايده منج؟!! ليش تجذبين فهميني ما اتوبين انتي؟

ليلى :- والله من خوفي عليكم حرب يخوف وعنده غايات مو غاية اخاف يأذي رجلج لو هادي اني شنو احجي شنو اكول من يضيع زلمة طول بعرض بسببي

:- ليش احنه تايهين اله لو هادي تايه شبيج انتي
صيري قوية وخلينا ندخل الزلم يجيبون حگچ من حلگ السبع وشرط مربع

ضليت اباوعلها بتفكير جريت نفس مقتنعة وهزيت راسي
:- احاجي هادي واخلي سالفته تصير من عشيرتي لعشيرته يحلونها احسن شي هسة لا تدخلين جبران الرجال غريب وما اريد تجي مشاكل خصوصا هو سياسي وبضل هاي الظروف والطائفية اذا سوا شي الاف الناس تتورط

:- اذا صدك حاجيتي هادي ما اسولف لجبران

هزيت راسي اي .. ضل كلبي ينبض بسرعة
:- والله خايفة لا يصير بيها دم يتصخم وجهي النوب

:- ليش انتي دازة علي والله بطرانه غير هو واحد زايعته الكاع

هزت ايدها ما عاجبها ضلت تقنعني احجي لهادي وادخل عمامي واخليها تنحل
وتلوم بيه شلون كتله تقدم واخطب من عمامي

ما خلونا نطلع الا نتعشا وبعد العشا رجعنا غفار وصلنه دايخين وتعبانين نمنا گبل

كعدت الصبح ع صوت التلفون كمت كوة اجر بروحي وسحبت السماعة حجيت الو

واجالي صوت البركان الهايج هادي
:- بنت ال....... احتركت صفحة الخلفج بنت البرابيج

حطيت ايدي ع كلبي مخترعة :- شبيك هادي دخيلك يا ربي هسة وكفت كلبي من الصبح

هادي :- انه هنا فزاعة خضرة لو شني اريد افهم ليش تخطين خطوة شكبرها بدون علمي
:- شمسوية فهمني؟ والله ما مسوية شي

هادي :- لا بس خاطبج معركة وقابلة بي عود عود خابر علي ماخذ رقمي منج وگلي احنه قررنا نتزوج ونريد وگفتك ويانه

بهت وجهي فكيت حلكي مصدومة وحجيت بتعجب
:- منو؟ وشوكت؟

هادي :- معركة ابن الغربية

ليلى :- حرب؟

هادي :- اندري اسمه حرب مادري معركة من سوو ع كبرج معركة وشبو نار وما طفة بنت البرابيج

ليلى :- شوكت خابرلك؟
هادي :- هسة گبل شوية ويكلي احنة طالعين الكم اليوم يمكم نطلب ايدها بشكل رسمي ونريد وكفتك ويانه والك اجر وثواب اذا تجمع راسين بالحلال

من كون جمعو راسج وراسه بتنور طين وحرگوهن

:- ما اعرف والله اني اصلا كلت احجي وياك بالاول
:- لا شتحجين وياي خابرني معركة وحجة كلشي بالخير بنية عمي بيها الخير
يحجي بغيض معصب

سد الخط بوجهي ضليت افر بذاناتي مصدومة
خليت رقم حرب اتصلت جاوبني بكل صدمة حجيت وصوتي يرجف

:- شنو سويت حرب؟

حرب :- ادري بيج ما عندج راي وتغيرين برايج كل شوية وامس رحتي يم حرمة السياسي الله يعلم شنو حشت راسج كلت انهيها من يمي واخصمها

:- ومنين جبت رقم هادي
:- من خالتج

:- احترگت روح خالتي وروح لخلفها وروحك وروح كل شريف يطلع وراك

:- شنو غيرتي؟ تردين نرجع؟ هساع مايفيد التراجع كتلو لابن عمج احنه هاوين ومقررين ونريد وكفتك ويانه

واذا ترجعين بحجايتج اجيبو لابن عمج واروح اشهد سيد قيس الشافني واكف وياج بالباب
اكلو ادحك بيناتنا علاقة وتريد تملص روحها مني

:- شكد خسيس؟! جاي تجبرني ع شي ما رايدته مالي نفس بيك شلون روحك تتقبل مرة مالها نفس بيك

:- عادي مكبرة ما ترد ميت نفسي كلشي تحب حتى النساوين الميته

سديته بوجهه افور باوعت لأيدي ترجف
ياربي ساعدني ع هذا الخبل ياربي .. ياربي ساعدني راح يوكف كلبي ما ناوي يعوفني الا ياخذ غايته ويتزوجني

هسة شنو اسوي شنو احجي شنو اكول .. بلكي يارب عمامي يرفضون
بلكي الله يرفضون ينطوني اله وينهوها وتفض وارتاح منه النوب تهمني بعلاقة ويا من عزة بنص عينه

رجع دك التلفون رفعته اجالي صوت هادي
:- ولج هذا خو ما مصاحبته وتخابرينه بعلي الفحل اجيج هسة لبغداد افصم ركبتج

:- لا وين والله هيج خطبني وقبلت وكتله روح ع عمامي
:- احجيلي عنه ما اريد اضل اطرش بالزفة
:- والله كل شي ما اعرف غير اسمه
:- واخو؟ مو يكول احنه عرف من سنين

:- اي صحيح اخو خوش رجال الله يرحمه صحيح اعرفه من سنين بس اقصد هو حرب نفسه ما اعرف شي عنه انتم شوفو الولد وجيكه شوف وضعه شنو ويمك اذا ما عجبك ارفض واذا عجبك اقبل انت شنو تفصل اني البس

:- هاي هيه اذا بي شي واحد ما عجبني اكله طكطك نعالاتك وروح منين ما اجيت
:- اي والله ياريت دقق بي زين اسأله هواي اسئلة شوف وضعه شلونه وضع اهله سمعتهم

:- هاي هيه بنت ..... عبرتها الج هاي النوبة جيف الولد جاي داك الباب وبالحلال
بس بعلي لو داري عندج شي ويا منا منا وانه الا افرسج فرس واجيبج من بغداد اكسر رجليج واكعدج بالتجف

غمضت عيني :- عصبيتك خوفتني
والله ماعندي شي ويا واذا شفته مو خوش رجال انت ارفض واني وراك

:- خير ان شاءالله

مشيت غسلت وجهي اريد اصحيح عبالي اني داحلم مشيت لريحانة ارفس برجلها واصيح
كعدي
رفعت راسها مفتحه تك عين
:- هجمو علينا المغول؟

:- لا هجم علينا حرب ابن الغربية من اتغربت روحه عن جسمه كولي امين

:- وينو؟ يمة وين حجابي

:- ولج صحصحي وسمعي حرب ماخذ رقم هادي ومخابرله ورايحيلهم يخطبوووني بشكل رسمي
لطمت ع خدودي حيل

شهكت مصدومة وكعدت ع اركبها مغطيه نص وجها بأيدها
:- كتلج ما يعوفج طلعي ويا بأقل الخساير ليلى
اكلج من الاخير الجمرة بأيدج لو بأيد غيرج؟

ليلى :- بايدي وجاي تحركني حرك

ريحانة :- محد يحس بيج بكد روحج شوفي نفسج ترتاحين اذا تزوجتي حرب وخليتي الحرب بيناتكم انتي ويا كزوج وزوجة؟
لو تضلين رافضة ويضل يومية مدخل طرف يهددج بي وما تعرفين صدكه من جذبه

سكتت رفعت ايدي وكتفي بحيرة وعطت
:- ما اعرف ما فاهمة روحي حتى

عفتها وطلعت للحديقة مخنوكة ضليت طول اليوم بس ابجي وبطني مغص والام الدورة زادت كانها اول يوم
ضليت الوب الوب ..وحتى غدة ما طبخت ريحانة طبخت وحركت النه التمن
والمركة طلعت مالحة لبست عبايتي وكتلها

:- كتالنا رايح يخطب من النجف ضلي يم هادي بالبيت ماعليكم شي

اخذت الفلوس. وطلعت للمطعم القريب دوم نجيب اكل منه رحت امشي مسافة احس المشي فادني رغم رجليني تعبن بس فرغت طاقتي وحزني كله بالمشي

وصلت اخذت نص دجاجة شوي وكباب دجاج لان ريحانة تحبه ومقبلات ، صح الاكل صار هواي علينا واحنه ثلاثة بس اضم الزايد ما ينذب

وطلعت امشي واحاجي روحي مثل المخبلة
واكول هسة اذا صار حرب نصيبي معقولة اكدر اسيطر علي واخلي يتخلى عن انتقامه ويصير الي زوج صالح واعيش ويا حياة سعيدة؟

يمكن هو العوض والامان الكنت انتظره بس جيته صارت بظروف صعبة وظروفنا يمكن تستمر فترة متعصية وتعبانة وبعدها يلگى روحه يمي والگى يمه الامان والراحة

تذكرت شلون ساومني ولعبت نفسي حسيت معدتي ضلت تكلب وحظي يم بيت السادة ركضت ع حاوية محطوطة قريب ومديت راسي بيها ذبيت من راسي
ضليت اكح واضرب ع صدري ودموعي عمت عيوني
شلون اتقبل واحد ساومني؟ ولا اكدر ارجع لواحد يعايرني بخالتي ويشك بيه ومحملني ذنبها

هاشم :- سلامتج ام هادي سلامتج

رفعت راسي خجلانة
فتح الباب وهو يحجي
:- فوتي خوية ام هادي غسلي وارتاحي واحنه نوصلج

كحيت وضربت ع صدري رفعت طرف عبايتي مسحت وجهي وحجيت بخنگة
:- لا هياتني وصلت ضل قليل

تقرب شال العلاليك وما انطاني مجال
:- فوتي لا تزعليني منج خوية؟ غسلي وجري نفس ارتاحي

هزيت راسي فتت
كتله
ما اكدر افوت جوة كلش بحنفيه الحديقة اغسل

مشى كدامي بهمة وهو يحجي :- شسالفة؟ شنو ام هادي كارهتنا احنه شدخلنا؟ نضل اخوتج والعلويات خواتج
انتي ام السيد

هزيت راسي خجلانه اخذني من باب المطبخ وحجة بصوت عالي
حياج الله حياج الله خوية

طلعت حنان تباوع وكالت يا هلا ومرحبا

غطيت حلگي وحواجبي معقودة وحجيت بصعوبة صارت شحطة ابلعومي
:- السلام عليكم
هاشم. :- ام هادي تخربطت اخذيها تغسل وترتاح خطية

حنان :-يا داده تعالي فوتي هلا بيج

اخذتني كبل للمغسلة غسلت ونزعت حجابي ورجعت عدلته وهي يمي تسألني زينه
واني بس اهز راسي الغصة متجمعة ابلعومي اذا احجي حرف ابجي

حنان :- خيرج صاير وياج شي؟
ليلى :- لا
حنان :- لعد شبيج صوتج كله دموع تردين تطكين

ليلى :- شايفة من توكفين بنص الطريق رجلج مجروحه لا تكدرين تمشين ليكدام وتكملين لمكان جديد و وجهة جديدة
ولا تكدرين ترجعين ليورا لمكانج القديم ؟ تضلين بس واكفة تنزفين وتنتظرين ساعة موتچ تقترب هذا وضعي وهذا حالي

عقدت حاجبها وكالت :- شنو متقدملج احد ومحتارة
ليلى :- شلون عرفتي؟
حنان :- والله مبين من كلامج مكان قديم ومكان جديد يعني رجل جديد ورجل قديم

ليلى :- اي صحيح
حنان :- تقدمي ولا ترجعين لمكانج حبيبتي نصيحة من اخت نصحتج قبل وارجع انصحج
وانتي بكيفج
شايفة الوضع هنا؟ شايفة غيرة فاطمة واصلة ليا درجة؟ من قيس يحضن هادي تحترگ بنار
كون تسألين وفاء ذيج الليلة من تجمعن البنات وجابو هادي

قيس حضنه يبوسه فاطمة صارت حمرة والدمعة بعينها وبس صعد قيس ضلت تلح ويا وانت تبوس بي وتحضن بي لان من ريحتها وتريد ترجعها
وگبت بينهم ساعة يلا طفت من نزل هو وطلع للمسجد

البنية تغار علي بطريقة تخوف وما تقبل تجين تشاركينها بي رغم الج حق بي هو ابو ابنج
واذا تردين ترجعين حكج بس تحزمي للمشاكل مال الضراير .. ما تعيشين مستقرة والله

والضرة تموت تكتل .. انتي صغيرة وحلوة وكدامج العمر وهواي فرص اخذيلج واحد خالي مختلي وصيري بس انتي بحياته وين الحلو بالمشاركة

ليلى :- هو اني من اتخيل اموت اذا صدك شلون؟
واذا فاطمة تغار بجنون اني من ارجع ادخل حياته اغار غيرة موت يمكن افقد حتى عقلي

حنان :- حقج الغيرة تذبح ذبح بعد بكيفج بس والله ما تعيشين بأستقرار ولا راح تكون حياتج هادئة

هزيت راسي اي وحطيت عبايتي ع راسي
:- ادري بس اني مخوفني شي بيناتنا راح اكلج واويدج تجسين الي النبض
اني هادي ما انطي لو ع كص ركبتي اخاف من اتزوج تصير مشاكل بالله شوفيلي شنو رأيهم بدون ما تحسسينهم

حنان :- وليش اشوفلج اني كلشي اعرف من راد يطلكج قيس كلوله احنه ما نقبل ابنه يعيش يم الغريب اذا طلكتها تتزوج غيرك وابنك ما يعيش بحضنك
هو كللهم اني اريد اطلك لان هاي رغبتها
يعني هم محسبين حساب تتزوجين ومفكرين بيها والظاهر متاكدين منج ما تنطين ابنج لهذا السبب كلوله رجع ليلى

:- يعني اكو امل نضل صحبة وابني بحظني

:- اي وبعد انتي اذا نويتي جيبي ابن عمج وتعالي انطيهم خبر وكليلهم ابني بحضني لا تنطينه ليلى ترة فاطمة مسودنه والله خاف غيرتها منج توصل لابنج وتأذي هي هسة من يجي ماعدها شي ويا وتداري ويا جهالها امانة الله بس من قيس يحضنه لو يبوسه تنتقم

:- فهمتج وصلت .. وين العلوية خليني اسلم عليها عيب دخلت الكم واطلع بدون سلام

:- ما موجودة ماخذة دنيا للطبيبة
:- خيرها؟
:- علمود جهال بلكي الله وتطلع حامل تكول فايتتها ادعيلها انتي يتيمة وفقيرة ونيتج بيضة الله يستجاب منج

:- ان شاءالله تطلع حامل وتفرح وتفرحنا خابريلي اذا طلعت حامل بشريني خليني افرح

:- ان شاءالله

طلعت وصلتني للباب هاشم اصر ياخذني بالسيارة يوصلني
كلتلي بهمس صلي استخارة شبيج علمود من رب العالمين تجيج البشارة

كتلها ان شاءالله .. وصلني هاشم
كلولي تأخرتي
كتلهم المطعم ازدحام

ذبيت عبايتي وغسلت وضليت بس افكر
للعصر خابرني هادي

كال :- ولج انتقمو الجماعة هنا طكت عدهم الغيرة للراس يكولون شلون امبخته وين لگته هذا
الاول ابن السادة وهذا الثاني ما يقل عن الاول

ليلى :- ليش طلع ابن رئيس الوزراء واني ما ادري؟

هادي :- لا خوثة بس طلع دكتور جامعي ومكمل دراسته برة وراجع للعراق قبل سنة
يدرس بوحدة من جامعات بغداد وعنده بيت ملك يعيشج بي
ويكول انتم شرطو واحنه نحط ليلة تستاهل اعدال وزنها ذهب وما معرس گبل

ضليت صافنة تنفست براحة :- اي زين خوش مواصفات انتم شگلتو؟
:- والله ابوي وعمامي من كعدو ويا ناسهم وسألوهم هواي اسئله ارتاحو وارتاحينا للولد جاي وياهم يخطب مبين مثقف وراقي وحتى من يحجي كله
يشرط ع روحه مو احنه نشرط

يعني شرط ع روحه مهرها كذا مليون
واكعدها بيت وحدها
ودراستها اذا تريد تكمل اني ادخلها احسن قسم وتكمل
وابنها اعتبره ابني واخلي بعيني .. وكال كل شرط يعجبها ينكتب بالعقد حتى تتطمنون

ليلى :- خير ان شاءالله

هادي :- شو انتي موديته واحسج ما راضية

ليلى :- متوترة هادي مو اكثر

هادي :- والله انه ارتاحيت للولد وهواي سولفت ويا وضليت اوصي بي كلي :- عد يمناك
اذا اجت وشكتلك مني كتلي بأيدك حلال

ليلى :- اي تمام الحمدلله شلون نكمل باقي الامور عقد وغيرها؟
هادي :- انه اتواصل ويا ويجنج نسوانهم يتعرفن عليج جيبي ام اعطوب يمج وعمتها انخيهن ما يكولن شي وكملن سوالف النسوان من يمجن

:- يعني انتم قبلتو
:- اي قبلنا اذا انتي قابلة وموديته وانه ارتاحيت للولد وكتلج هو شرط ع روحه

:- تمام هاي هيه الله يتمم ع خير

نهيت المكالمة غمضت عيني احس كلبي ارتاح للسالفة هادي نظرته بالبشر ما تغلط وحاجي ويا
هادي معدل يسحب لسان اكبر واحد ويدقق بكل كلمه ويعرف نوايا البشر ، دام ارتاح لحرب يمكن يطلع مثل صهيب

صهيب هم هيج ضوجني وضايقني اول شي بعدين اكتشفت هو احسن زلمة وعضيت اصابعي ندم لان رفضته وما قبلت بي ركضت ورا كلبي من امدا كلبي الجايف

غميت روحي وكمت ..

ضليت انظف بالبيت وافكر ساعة ارتاح وساعة لا واكول اخابر الشيهانة اخاف ترزلني
واني ما اريد ارجع بقراري اريد اضل ثابته علي يمكن الله كاتبلي خير ويا حرب

واتذكر من ساومني واريد اتصل بهادي واكلله خرب كل شي. ما موافقه

بس ارجع واكول محترك كلبه ع اخو هسة يعاشرني ويعرفني اني شنو
حطيت ايدي ع حلكي شلون عود هذا يدخل علي وينام يمي ما اكدر ما اتحمل ولا اكدر اتقبله اني ما فكرت بهاي السالفة من قبل ما الي نفس بالزلم

رجعت تذكرت حجي هادي من كال دكتور جامعي ودارس برة وقبل سنة راجع للعراق
شهگت مصدومة هذا المسودن دكتور جامعي؟
هزيت راسي وقوست شفايفي بأعجاب
يعني انسان مثقف شو سوالفه مال ملطلطين مو مال مثقافين

شوية واجتلي صفنه وشهكت مرة ثانية وكلت
هسة عرفت ليش طلع بوجهي من تالي طلع جان برة يدرس
والله خوش كمل دراسته ورجع يمكن من رجع متواصل ويا صديق صهيب وحاجي اله عني ومورطني ويا الجلب

خابرت خالتي حجيت الها كل شي وعاتبتها لان ناطيته رقم هادي كالت ترة هو كال ليلى طلبت اخطبها
طلبت مني اروحلها اغير جو يمها وتاخذني للسوك اتسوك
صفنت وكتلها ليش اتسوك
كالت مو قبلتي وراح تنخطبين لازم تتسوكين

:- خالة اني كل هاي السالفة ما بالعتها
:- بلعتيها او ما بلعتيها بكل الاحوال راح يجون ناس ويشوفونج لازم تطلعين حلوة معدلة

وافقت ورحنا لبيت خالتي ضلينا عدها الصبح والعصر طلعنا للسوك بس كلبي بأيدي حاطته تسوكنا بسرعة ورجعنا من وصلت للبيت يلا جريت نفس مرتاحة

كعدت اباوع لخالتي تطلع بالملابس وتعلمني
هذا لبسي من يجن نسوان يشوفنج وهذا لبسي بالعقد حلو ومستور ومريح انتي تحبين تتكمطين بالهدوم لو اني بمكانج اطلعله الشحم واخلي شكو انتقام يطير من راسه

:- خليني بستري احسن

طالت كعدتنا هن يحجن واني بالي مو يمهن افكر بضيمي وافكاري ومشاعري كلها متناقضة

اندك الباب طلعت خالتي فتحته وكبل عاطت
طفرنا ثنينه اني وريحانة واول شي سويته جريت ابني خليته بأيدي

جفتو علينا ثنين زلم اني ما عرفتهم بس ريحانة شهكت وركضت للبيت وهم ركضو وراها

ضلينا نتصارخ
خالتي دنكت جرت من جوة الكاونتر عصة طويلة وعريضة وريحانة جوة البيت تصرخ

كلبي راد يوكف فتحت خانة الكاونتر وسحبت منها الجدورة ودخلت هادي ابطنها كعدته
مسحت دموعة وهمست لا تبجي هسة اجي

ركضت سحبت سجين لحم ودخلت وراهن اشوف خالتي تركع بواحد ع راسه وهو لازم العصة يريد يبعدها

والثاني نازل ع ريحانة ضرب ويجر بيها وهي ترفس بي كلت هذول لو من اهلها لو خوالها ما تقبل غلط

ركضت ع المجلب بريحانة. ودجيته بكتفه من ورا بكل قوتي وسحبت السجين والدم ضل يكطر كامت من مكانها بسرعة دفعته حيل شمرته ع الحايط

ورفسته بنص وجهه بكل قوتها وطلعت تركض وخالتي تتلاوة ويا الثاني وتصيح
نسيمة :- الك** تدخل ع بيتي والله اشگك شگ والعو صفحتك اخو ال** لا اختك شريفة انت ك** ما تستاهل نغلط عليها

:- وخري ترملت وملفيتها يمج تكودين عليها

دفعها حيل رفعت العصة بوجهه وكلتله اكسرك اذا وصلت لبيتي بعد ساقط تريد تاخذها حتى تشبع براسها مثل ما جنت شابع براس امها تديحها تجدي وتحط بحلكك الجايف

وانت الثاني كوم والله الا اسجنكم عاتبوني اذا خليت اليوم مر عليكم

:- مالج دخل احنه جايين ناخذ لحمنة انتي مرة غريبة تدخلج هذا يجيبلج مشاكل

رد الثاني وهو لازم كتفه متوجع
:- بالعشاير ناخذها ولو انتي دايحة منيلج عشيرة

هو كللها هيج وهي بكل قوتها رفسته جوة خصره
ونترت :- شوف الماعدها عشيرة شنو راح تسوي بيك

كومو طلعو من بيتي يلا واعلى ما بخيلكم اركبو
اريد اشوف شلون تاخذون ريحانة الا اشگنكم شگ

كامو يطلعون ويهددون وهذا كل شوية فازع لغرفة يدور وخالتي تركض ورا بالعصا

طلعو وسدت الباب ودخلت تصيح
طلعي ريحانة وينج ..راحوو

ركضت فتحت الكاونتر طلعت هادي يبجي ويرجف وحضنته حيل لصدري ابوس براسه
لا تخاف امي ماصار شي هذول مجانين ودخلو لان عفنا الباب مفتوح

حوط ركبتي بأيدينه وضل يرجف ويبجي خايف

نسيمة خايفة فاكة عيونها بصدمة
:- ولج ريحانة ماهي مادري وينها بس لا طلعت من البيت

نشغت ولطمت صدري
:- عزة اذا صدك عزة وطين بس لا وياهم واحد برة ماندري بي ولگفها للبنية

خالتي جرت عبايتها من ورا الباب شمرتها ع رأسها
وكالت
:- طالعة ولج اركض بالشارع ادورها رجعي دوري البيت

ريحانة ... دفعتو لخالي حيل وكع ع ظهرو بحرگة گلب رفستو ع وجهو وطلعت من البيت اركض هايمه ع وجهي ما اعرف وين اروح كل الاعرفو ما لازم يكضبوني لان السوو بأمي راح يسوونه بيه اذا مو اكثر

جنت خايفة يعرفون بيه رجعت لبغداد وطلعت من يم ام رواء
عرفت راح يطمعون بيه بس يعرفوني صرت وحيدة ورجعت يم نسومة

ضليت اركض بالشارع هايمة ع وجهي الدنيا غروب حمرة وكلبي يرجف
اهجس الموت دخل برجليني بيهن رعشه
ما انتبهت لروحي بدون حجاب .. ولا انتبهت لحالتي
ولا شفت الدم الينزل من خشمي لان الخسيس ضربني ع وجهي بقوة شوهو لوجهي بخاتمو

عثرت وطحت بالكع حسيت اركبي تزلغن رفعتو لراسي وكمت ع حيلي اركض بهمه دحكت سيارة جاية باتجاهي ضواها صار بعيوني

خليت ايديني ع عيوني ونزلت للكع مرة ثانية متأذية سمعت صوت رجال نزل يصيح
الله الله شجرالج يول انتي مو ريحانة؟

رفعت راسي ادحك شفتو حرب شهكت ومديتلو ايدي خايفة
:- راح ياخذوني يعذبوني ويضربوني ساعدني

تقرب مني باوعلي بحيرة وكال
:- كومي تعالي وياي بالسيارة كومي

هزيت راسي كمت فتحلي باب السيارة صعدني وشغل
دحكلي بحيرة وكال
نسيمة وياج؟

هزيت راسي لا واني ابجي
:- لا وين اكو منها خالة هي تدافعلي وتريدني بس خوالي يردون ياخذوني حتى يعيشوني كلشي عاشتو امي بسببهم يردون يخلوني اجدي بالشوارع لو يبيعوني لزلمة جبير بحجة زواج ويشبعون فلوس براسي

جنت ابجي واحجي واعيد بمظلومية امي واشكيله بدون شعور كلشي صار وياي
باوعتله يفتر بالسيارة شوية ورجع للشارع نفسو وكال

:- هساع اورهم ور وطلع نار كلبي كلها بيهم اني محمل وكلبي صاير جمرة وهم مشتهينها
هذا لضربج اطلع مصارينو من خشمو قليل الاصل

دحكت خالتي نسيمة تدور بالشارع كتلو هاي خاله
طبك السيارة اجت تركض فايرة خلت ايدها ع كلبها
:- وكفتي كلبي عبالي خذوج

حرب :- صعدي نروح للبيت

فتحت الباب وصعدت ضلت تتلمس بايديني و وجهي
وتكول
:- وين لكيتها

حرب :- والله جاي عليج اضبط وياج الامور مااكدر ادخل ع بيت ليلى هساع
ودحكت مرة تركض مدماية ادحك عليها هاي اعرفها شايفها طلعت ريحانة

نسيمة :- ينطيك الصحة والعافية جنك اخوك فدوة لكلبه سكط ابوها مرة وعلمه قدره ذاك يوم وهذا يوم ما شفناه ولا طلعله حس

حرب :- اخوي سبع الله يرحمه ويغمد روحه الجنه

طبك السيارة يم باب البيت ونزلنا كلتله ادخل
اني دخلت اخذتني ليلى تغسل وجهي واخذتني للغرفة تضمد بجرح اسفل عيني بسبب خاتمو للنذل

دخلت نسيمة كلتلها ليلى
هذا شيريد
نسيمة :- يكول جاي عليه علمود يضبط الامور وشايفها

ليلى :- ها ضبط وياج لا
نسيمة :- يكول باجر العصر يجون خواته ثنين وامه لبيتج يشوفنج ولازم اكون موجودة حتى نتفق ع سوالف الخطوبة

هزت راسها اي متضايقة
نسيمة :- سألني ع خوالج وانطيته حتى عنوانهم
يكول اني كلبي فحم من سوالفها عليهم اريد اطلع نار كلبي بيهم بلكي اهيد واحط رجليني بالكاع

كتله روح يوم شنو يطلع بأيدك سوي

ليلى :- جنة صهيب

نسيمة :- اي والله اني هم ذكرته

تمددت متوجعه راسي يأذيني و اون من الالم
نسيمة :- اخذيها لبيتج هناك محد يندلها
ليلى :- اي شوفيلنا تكسي ترجعنا وانتي هم امشي ويانه احسن
نسيمة :- خلينا نلم ملابسنا ونروح

غمضت عيني اون شوية وكعدتني ليلى كالت التكسي بالباب لبستني جبة وعباية وطلعنا رجعت بالسيارة اون من راسي وغفيت لحد ما وصلنا

جانت ليلة سودة كلها كوابيس ومؤلمة بالنسبة الي
باليوم الثاني خلصتها كلها نوم كل ما اكعد اتذكر كل حياتي السودة واغطي راسي ابجي ع روحي و ع حظي و ع امي وابني وانام من كثر البجي

دخلت ليلى شفتها تبدل وتمسح بعيونها رفعت راسي فركت عيني وتأذيت من الضربة ناسية الجرح
كالت وهي تدحكلي بغضب
:- غير تنتبهين راح تروح عينج

ريحانة :- ما انتبهت شكو جايات النسوان
:- اي ع جية جاي اجهز نفسي

:- ليش تبجين عجل ماقابلة

:- خايفة والله

:- حرب زلمة سبع واخو اخيته اخذيها مني راح يعوضج وتعيشين ويا براحة
تنهدت وكالت الله يسمع منج

ليلى ...جهزت نفسي مشطت شعري ولبست ثوب جديد
طبعا بالليل حاجيت الشيهانة صح لامتني هواي بس بعدين كالت براحتج واجت هسة يمي وبنتها لولوة اجت وياها

اباوعلها شحلاتها وشكد انيقة لابسة فستان وردية جوة الركبة نص ردن وشعرها مسويته ظفيرة هندية ولابسه عقد لؤلؤ وتراجي وردة فضية ناعمة
كأنها اميرة طالعة من رواية ..

ضلت تلعب ويا هادي وشعلان روحها حلوة وتحب تضحك
ومن اجو الناس دخلنا شعلان وهادي جوة بالغرفة واستقبلناهن. شفت وحدة عرفتها وعرفتني ام دلال طاحتلي سلام واني سويت نفسي مستغربة ومتفاجئة من هاي الصدفة

كعدتني يمها وضلت تباوعلي وتكول
سبحان الله من قبل اني ردتج لاخوي الله يرحمه وماكو جنتي صغيرة وهو جبير وهسة دارت دارت القسمة واخوي الثاني رادج شلون صدفة

ابتسمت وكتلها :- نصيب بعد
دلال شلونها؟

تحسرت وكالت :- بعد ورا السالفة انتي تعرفين قصدي انسجنت ومن طلعت ورا السقوط سافرت گبل ما ضلت بالعراق هاجرت وخطيبها يحيى جان بعده ما متزوج رجع تقدم الها وكمل وياها

ليلى :- الله يسعدهم ويوفقهم

:- بعد اكيد تجي تزور العراق وتحضر زواج خالها وتشوفينها

ام حرب :- هاي صاحبة ادليل؟

ام دلال باحراج :- اي

:- بس لا جانت وياها بالاحزاب

:- لا يمة منين وياها البنية فقيرة تروح بطريقها وترجع بطريقها هسة خلونه نحجي بتفاصيل الخطبة والمهر

عيني ام شنو اكلج
نسيمة: -ماعندي صيحيلي بأسمي نسيمة

وضلن يسولفن ويتفقن واخته الثانية وامه يخزرن بيه ماقابلات كالت امه بضوجة قبل لا تطلع

:- شكد صعبة عليه هذا وليدي المعدل اخذله وحدة مطلكة ومخلفة بس عاندني شسوي

نسيمة :- شبيج حجية تحجين هيج من ورا خشمج ترة ابنكم اجة ودك الباب وراد احنه ما دزينا علي

ام دلال :- حبيبتي غير لو ما شافكم خوش ناس ونسبكم ينشرى بالذهب ما جان اجة عليكم بس الحجية بعد ذبة قبل تعرفين عدهن سوالف قديمة

هزت راسها خالتي وسكتت لخاطر ام دلال وطلعن

صحت ايع شلون اعاشر امه
نسيمة :- غير حاطلج بيت وحدج شلج دخل بامه بالمناسبات تشوفينها

:- اي همزين مبينه ما تنجرع

شيهانة :- وين تلحكين العقد بعد يومين
نسيمة :- غير حتى بدلة اشتريت الها وحفيتها ضلت بس الشيرة

شيهانة :- ما تفوتج انتي

ضلينا نركض نجهز للعقد .. وعمامي يجون بيوم العقد الصبح يتغدون يمي والظهر يستقبلون العالم
وقبلها طبعا يرحون للسادة وهذا جان اكثر جزء خايفه منه وشايله همه بس عمو ابو هادي من حجيت ويا بالتلفون كال لا تخافين ابنج الج وما اخلي اكبر واحد يتجرأ يمد ايده ويحاول ياخذه منج

بيوم العقد اجو وهادي وعمي راحو ع السادة ساعة ورجعو
الفهمته السادة متضايقين بس قيس كايللهم هي اولى بي هي التعبت علي ومحد اله حق ياخذه منها
المهم تداري واذا تشوف نفسها ماتكدر ترجعه الي

هادي :-هو حجة وطلع بس الزلمة من عرف راح تعرسين صار شلون الليمونه الصفرة خطية

والسادة ضاجو من حجية بس سكتو يدرون بيج شكد عانيتي وتعبتي علمود هذا الواحد ما يكدرون ياخذونه منج اتطمني وداري ابنج

ولا تحرمينه منهم

هزيت راسي اي مخنوكة هادي ورث جكارة وجر نفس مقهور
كسر كلبي سيد قيس والله استعجل بزواجة
اذا يحبج هل كثر ليش ورط بنت الناس ويا احسه تخربط ماضل ع حيله لهسة

:- شسويله ما تكلي اني هم تعذبت ويا هواي
وهاي هي الله كتبلي حياة جديدة وراح اعيش حياتي ويا غير رجال مثل ما هو عاش حياته ويا مرة ثانية

هادي :- الله يوفقج بنية عمي وان شاءالله معركة ابن الغربية يعوضج
غمزلي وضحك

ابتسمت متوجعة وتنهدت لو يدري الوجع الي بكلبي ع سيد قيس والخنكة يمكن جان خرب كلشي هسة واخذني خلاني يم قيس وكعد يرزل بينه ثنيناتنا

جهزت نفسي جنت مختنكة مو كره بحرب ولا محبة بقيس
ثنينهم جنت ما اريدهم .. وثنينهم مأذيني وجارحيني

بس كل واحد خله بگلبي جرحه الخاص و وجع مختلف

اجو العالم وعمامي استقبلوهم ودخلن النسوان جوة جانن كم وحدة ينعدن ع الاصابع
من بينهن ام دلال ويمكن هاي الوحيدة الجاية قابلة وفرحانة

وضلت تهوس وتردح

لحد ما اجة وكت العقد اخذوني خليت الحجاب ع راسي سترت بي شعري وضليت واكفة اسمع الشيخ يذكر الشروط والمهر وسألني اذا موافقه
صدك حجي هادي حرب هو شرط ع نفسه ما انتظرني اشرط
غمضت عيني وجريت نفس. طاحت دمعتي ورديت
ليلى :- نعم ...
وبعدها صوت حرب ترس أذني وهو يرد ع الشيخ
ارتفع صوت الهلاهل .. وصرت حلال حرب ....للحكاية بقية

رأيكم بالقصة يهمني 🖤..

🔥ملاحظة لحد تكلي ليش البارت بي هواي حجي بنات ماكدر اختصر اذا اختصرت تحسون الاحداث صارت ركضة لازم نذكر كل تخبطات ليلى وحيرتها وكل موقف صار وياها قبل العقد حتى تفهمون ضياعها ..

بنات امس سويت تغيير بالسرد سردت من المستقبل وصورتلكم هذا المشهد
بس شو صار هوسة البارت حذفته نصه ورجعت سردت بالتسلسل صار مرتب اكثر

هذا المشهد صار من البارت القادم