رواية حمائم تخشى الطيران الفصل الرابع عشر 14 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

لتنسون تصويت + تعليق بين الفقرات لطفا

بعد ما قريت بعض العناوين توجهت اله استقبلني بأبتسامة وگال بتساؤول :- بشنو اگدر اخدمچ أنسة؟ ببالچ عناوين معينة لو تحبين اساعدچ حسب ذوقچ بالكتب والروايات

بعدت خصلات شعري ليورا ولعقت شفايفي اخفف عن توتري
ليلى :- كنت مواعدة صديقتي هنا حتى نشتري كتب سوية اسمها دلال ..
تعمدت اذكر اسمها حتى يعرف اني من طرفهم

ابتسم وعاف القلم من ايده وگال :- وصلتي ..

راح للستارة رفعها وظهر وراها باب خشبي فتح الباب واشر برأسه حتى اتقرب بين خوفي وبين اصراري احتاريت .. بس گلت دلال مستحيل توگعني بمشكلة واكيد راح الگى الامان ورا هذا الباب وتوجهت اله بدون تردد 

طل وجه دلال گبالي ابتسمت وگامت ترحب بيَ
دلال :- وهاي وصلت صديقتنا الجديدة تعالي ليلى تعالي حبيبتي
تقربت بخطوات ثابتة والقيت السلام توجهت كل الانظار الي سحبتني من ايدي بوستني وقادتني وياها لمكان الجلوس

باوعت للحضور من بنات وشباب كلش هواي بينهم الشايفتهم وبيهم لا .. المكان كان كأنما مكتبة ثانية الكتب موجودة ووبيها اكثر من عشرين ميز وعدد كبير من الكراسي للقراء

گعدت خليت رجل على رجل باوعت الكل ينظرلي بفضول
قدمتني دلال لشخص كبير عمره نهاية الثلاثينات ومبين من هندامة واحد فوگ وشبعان مو جوعان ..

دلال :- اعرفچ كبير مجموعتنا الطبيب فاروق
ليلى :- تشرفت

فاروق :- الي الشرف ست ليلى .. حچت النة دلال عنج هواي الواضح من كلامها عنج انتي بنية مثابرة وثائرة تحبين الحرية وما تقبلين بالظلم

ليلى :- اكيد ، ولهذا اني موجودة بينكم اليوم

فاروق :- جيد جدًا تعرفين اهدافنا تعرفين النقاط الي نريد نوصل الها ؟

ليلى :- بلي اعرف صارلي فترة طويلة ويا دلال حچتلي كل شيء يخصكم وانطتني كتب قريتها ونگدر نگول اني حاليًا صرت منكم لو مو منكم

ضحك وهز رأسه بالموافقة :- لا من عدنا ونص

ليلى :- سؤال اجة براسي هسة انتم شلون مجتمعين هنا ؟ الأعرفه الحكومة تراقب والجواسيس بكل مكان!

ضحك بهدوء وشال گلاص المي اخذ منه رشفه ورجعه لمكانه ، بعدها گال بنبرة متلاعبة
فاروق :- تعرفين اسرارنا من اول يوم؟ مايصير شگد ما واثقين بيج شگد ما متخوفين منج ومن سعيد وزينب و طيبة .. انتم الجدد كسبتو ثقتنا بحفظكم للسر وهسة بديتو المرحلة الثانية الراح تخلينا نثق بيكم ثقة عمياء ... الوكت هسة وكت الاختبارات

هزينا رؤسنا بالقبول وعيوننا تراقبه وتدرس كل حرف يطلع من بين شفايفه واستوقفني كلامه عن الثورة والانقلاب
وبدأ يتكلم بعدها عن الانقلابات وطبيعة كل انقلاب

انهى كلامه بتوجيه مهام النه لازم نقوم بيها وانهى الاجتماع الي كنت متوقعة راح يطول ساعات لكن بالحقيقة طول ساعة وحدة فقط .. وطلب من الجميع الانصراف

گمنا اني ودلال بعد ما بدؤ الحضور يتفرقون و يطلعون كل ثنين سوية وقسم راحو يقرون كتب همست لدلال
:- اگدر اسأل استاذ فاروق شي؟

دلال :- اكيد تگدرين

اخذتني رجليني اله هيبتة وجبروته الواضح على وجهه خلاني اهابة جريت نفس عميق خلاه يرفع رأسه ويا طرف حاجبة وسألني :- عندچ استفسار؟

تنهدت و رديت :- نعم أستاذ ، الشخص العنده بحياته شخصيات سياسية يگدر يبدأ من دعوتهم للانظام للحزب؟

عقد حواجبة وگال ينهيني :- لا طبعا هذول اصعب فئة ومو اي واحد يگدر بسهولة يأثر عليهم ولا اي واحد ينظم للحزب .. احنة نعرف منو الشخص السهل ونجيبة ومنو الصعب وشلون نغري ونجيبه

ليلى :- يعني ما اگدر نهائيا

فاروق :- اتوقع لغتي العربية واضحة ولكنتي سليمة؟

غمضت عيني جريت نفس وكتله بهمس :- بس اني هذا محيطي

فاروق :- نعرف .. ليش ببالج احنة ما نعرف؟ كل شي نعرف عنچ بس هاي المهمة الصعبة مو الچ مهمتچ اخذتيها سهلة وما تاخذج للتهلكة حتى في حال وكعتي بغلط

ليلى :- تمام استاذ راح التزم

ارتخت ملامحه وگال بهدوء :- تهمنة سلامتچ حافظي ع سرچ ليلى

هزيت رأسي ورديت ان شاءالله ..

ومشيت لدلال طلعنا اني وياها للشارع جريت نفس براحة حسيت شي كاتم على انفاسي گالت وهي تضحك بشكل هستيري
:- لچ شنو هذا الجمال والاناقة حسيت وكأنج عارضة ازياء صفنتي كل الحضور من شباب وبنات الظاهر راح تكونين مشهورة
غمزتلي بمكر

ضربتها على ايدها واني اضحك ومشينة
دلال :- اهم شي ما نسيتي معزومة يمي على الغدة ماما گالت اليوم تطبخ دولمة والبارحة سوت معجنات وبعد الله يعلم شنو مسوية برياني ومقبلات يمكن

ليلى :- الظاهر اهلچ واصلين .. ضحكت وهزت رأسها بـ أي
دلال :- بابا عقيد وماما مديرة مدرسة والها مكانتها

ليلى :- متخافين لا اهلج يعرفون بأنتمائچ؟

دلال :- وخل يعرفون عدهم اهم شي الديمقراطية عموما لا تحجين بشي گدامهم ابد خليج خرسة

هزيت راسي لزمتني من ايدي تمشينة طلعنا مناك بتكسي للزوراء مشينا وكرزنة حب شمسي وطلعنا وراها لأهلها اول ما نزلنا وطل بيتهم گبالي عرفت رقي هاي العائلة وامكانياتهم

دخلنا للبيت استقبلتنا امها من باب المطبخ تهلي وترحب
ليلى :- هلا باجي شلونچ
بوستها بوستين وعيني تجولت بالمطبخ الراقي بتصميم حديث وميز طعام كبير مغطي بقماش تول ابيض حافاته مذهبة ،  تتوسطه سله فاكها بيها انواع الفواكه المختلفة

دخلتني لصالة البيت كعدت ع كرويتات كلش مريحات وضلت عيني تتجول بالمكان بأنذهال مثل بيت السادة بس بيت السادة بتصاميم ملكية والوان كثيرة ذهبية ونقوش
هذول هنا تصميم احدث وديكورات اخف واثاث يشبه لنشوفه بالافلام الاجنبية من نروح للسينما ..

دلال :- سمعتي ابوي عقيد ونبلع صوتچ ليلى

ضحكت بأحراج وگلت ابرر موقفي :- لا والله بس خجلانة دصبري حتى اخذ ع الوضع

رفعت رجليها تربعت ع القنفة وبدأت كلامها عن الموضة ولافلام والاغاني .. اندمجت وياها خصوصا من بدينة نحجي عن هيثم يوسف وكاظم الساهر صرنا مثل العاشقات نحجي بكل لهفة

دخلت باجي شايله صينية الضيافة كامت دلال اخذتها منها
ام دلال :- شرفتينا ونورتينا .. بسم الله ماشاءالله من دخلتي گلت هاي الشمس الداخلة علينا من وين

ليلى :- شكرا هههه

ام دلال :- منين انتي حبيبتي منين اهلچ ..

ليلى :- اني عايشة ويا خالتي لأني يتيمة كاعدين بالـ**
ام دلال :- بعيدة شنو يوصلچ للجامعة حسب معلوماتي انتم بأطراف بغداد

ليلى :- اي والله ينهد حيلي بالطريق بس شنسوي مجبورين

ام دلال :- ان شاءالله تتخرجين وترتاحين خلصن سنة ونص ضلن سنتين ونص
دلال :- اي تخلص

ام دلال تباوعلي بتمعن تتفحصني راحت للمطبخ عافتنا لوحدنا گلتلها باحراج
اهلج يدرون بجيتي
دلال .. شلون لعد؟ انطيت خبر لماما

هزيت راسي ب اي وسكتت .. انتهى هذا النهار رجعت وصلت للبيت متأخرة لگيت نسومة لازمة الجفجير تضرب بي بباطن ايدها وتترقب تنفست براحة من شافتني دخلت وگالت
نسيمة :- فدوة لعينچ يوم ليش كل هذا التأخير قلقتيني

ليلى :- مو گتلچ

نسيمة :- اي بس ضل بالي الشمس راح تغيب ميصير هيچ يا يوم
ليلى :- متنعاد حبيبتي لتشيلين هم

نزعت كعبي وصعدت ركض بدلت ملابسي وغسلت وجهي تنفست براحة وضحكت
اول مرة اسوي هيج شي خطير وحدي اول مرة اخطي هيج خطوة وانتهت على خير الحمدلله ..

.......

دلال ..

فتت للبيت بعد ما ودعت ليلى تنفست براحة اخيرا انتهى هذا اليوم وليلى وثقت بيَ هسة نشوف الراح يصير بالمستقبل القريب ..

فتت للصالة ذبيت نفسي على القنفة بتعب دخلت ماما تحجي وهي تقوس شفايفها بأعجاب
:- شلون بنية فلقة من الگمر ماشاءالله بسم الله استحي احط عيني عليها خفت لتحسدها عيني

دلال :- اي والله ليلى تجنن الله يحفظها
تمغطت بتعب
ام دلال :- بربج اذا واحد يخطبها ينطوها؟
دلال :- اووو ماما انتي اذا ردتي تخطبين بنية يعني ترديها لخالي والفرق بين ليلى وخالو من السما للارض هي فراشة مغمضة وهو ذيب

ام دلال :- لتحجين ع خالج هيج خوش رجال والله بس غير الوكت ما نصفه من تخلص عطلتچن بله احجي وياها لمسي النبض
وينه هو خالچ هنا عدنا

دلال :- هسة يفشلچ ويرفض هو هيج بعدين يوم امي حبيبتي وياعمري ليلى صغيرة على خالي

ام دلال :- الرجال ميعيبه الا جيبة ... سمعت صوت خالي يتحمحم عدلت گعدتي قبل ليفوت
دخل علينا بأيده القامجي مال الاريگله
گال لأمي
:- هيام ماعليج امر حرگيلي فحمات

ام دلال :- تدلل حبيبي ونور عيوني .. تدلل يالغالي

كمت ترخصت وصعدت لغرفتي عايفتهم وراي والله يعلم اذا راح تسكت امي او تفتح موضوع ليلى ويا خالو ..

.......

الشيهانة ..

تمر الايام السودة عليه وتاخذ روحي مني وتسلب عافيتي بداخلي جنت محطمة وعيوني ذبلت من كثر البجي وتغيرت رسومها .. ولون الوجه صار اسمر والصوت مبحوح
دموعي ساعة لاهلي الماتو محروكين وما ينعرف منو السواها الذيب والحمل بنفس الوجه
وساعة تجري على ظناي .. اااخ يا سهير المظلومة اخ الى متى تضلين تتجرعين مرارة الفراق
انه يومية اتسمم بسم الفرگة والحزن لحد ما يتقطع كبدي وتنمرد كل احشائي ..

ارتجيت ع تاج الجرباية ابجي بدون صوت حتى ما ضل الي حيل وانحب بي واطلع لوعة گلبي
بداخلي نار الحقد والغل والانتقام تفور .. بس عليمن؟ اي على مشاري بس غير مشاري احس عندي غيره اعداء ولازم اكتشف منو هم واخذ حيفي منهم

ضروي الشيهانة تعرف منو ورا موت اهلها محروگين ما من المعقول الصار حادث لان كلام جار اهلي يكول الصار جريمة
بس منو يا ترى ورا موت اهلي؟

اذا عمي .. ليش ما كوش على املاك والدي او املاك جدي
معقولة عمي عنده عداوة ويا والدي بشغلة غير الفلوس؟ لا .. ما يسويها ويقتل حتى الرضيع وان جانه صدك قاسي لهذا الحد جان شفت قسوته ويانه ليش هيج يتعامل بكل حب

اااخ رااااسي ررراح اموت ربي راح انجلط ليش ياربي ليش انا هيج مظلومة وعايشة بظلام يمتة عيني تشوف النور؟!

اندك الباب مال الغرفة مسحت وجهي بسرعة من الدموع وعدلت كعدتي صحت
:- تفضل

انفتح الباب دخل عماد مبتسم بادلته الابتسامة عقد حاجبة واختفت ابتسامته
:- شنهي بت عمي ياهو وياج ياهو مبچيچ

هزيت راسي بنفي وگتله :- ما كاعد ابجي متوهم

تقرب مني وبيده علاگة حط ايدينا ورا ظهره ونصة رأسه لمستواي قطب حاجبه اكثر ومد ايده جوة عيني مسح الدمعة وخلاها بحلگه ، عفس وجهه وكال

عماد :- لا والعباس هاي دمعة مالحة عبالي مخلية تفال

شيهانة :- تحچي كل عقلك؟ عماد ما ابجي هيج تذكرت شي ودمعت عيني

استقام بوگفته ورفع تك حاجب كال بنبرة متلاعبة :- شني بت عمي حنيتي لمشاري كولي الله عليج اشتاقيتيله نحطج ونطكج دفرة نشمرج بحضنه باالكويت

شيهانة :- بشرفك؟ انا اشتاق لهذا السفاح تخبلت شنو

عماد :- ولا شوية شوگ منا منا

شيهانة :- لا ابد ولا نقطة ويع عمت عيني بس كول مشتاقة لشعلان .. لصكر ... لـ .... قطعت كلامي ونصيت رأسي متألمة حطيت ايدي على صدري

عماد :- شبيج شبيج بت عمي الله اكبر ... الله اكبر ... كولي الله اكبر ... جري نفس صيحي الله اكبر حتى تطلع الخنگة هذا هوى بگلبج يأذيج

شيهانة :- گلبي ينغزني

عماد :- اي هذا هوى بگلبچ گولي الله اكبر

شيهانة :- اااخ عماد گلبي راح اموت يأذيني ماعرف شبي يمكن راح يوگف

صاح مرعوب :- الله اكبر الله اكبر يمة ويننننج

شيهانة :- اااخ گلبي ااااخ راح يوگف

عماد :- الله اكبررر .. صيحي الله اكبررر

شيهانة :- شنو راح افجر روحي؟

عماد :- لا فجري القيود فجري العادات فجري حزنج

شيهانة :- الله اكبرررررر وخر عماد افتح الشباك اركض اركض اختنگت ماكو هوى

شمر العلاگة وركض للشباك فتحه طبت عمتي ويا ما هو يفتح الشباك مرعوبة تركض وراها طب جبران وعادل وهبة مرته جانو بالحديقة

علياء :- سلامات سلامات

شيهانة :- عمة گلبي راح يوگف

هبة :- نامي نامي بسرعة

تمددت وجريت نفس افرك بصدري

الولد يفترون متوترين وجبران جر ايدي يتحسس النبض فجأة نغزني گلبي حيل عطت بصوت عالي متألمة وغمضت عيني

عادل برعب :- ماتت

عماد :- الله اكبررررر

علياء :- يبوووووووي يبوووووي الحگ ابو عادل ماتت بت اخوك لحگت اهلها يا حسرتي عليج يا حزني عليج يا عمة ما شفتي الراحة بحياتچ ورحتي من شبابج

عماد :- حاست حاست ما ميتة

عادل :- راح افتح السيارة شيلها جبران ناخذها للمستشفى

جبران :- اهدوو جاي اسعفهااا

عماد :- هاي ما تحوس ماتت يمة صرخي ماتت

علياء وهي تلطم :- يبوووووووووي يبووووووي

جبران :- عادل وينك اركض للسيارة حضرها

عماد :- ها ماتت؟

علياء :- يبووووووووووووي ماتتت الشيهانة ماتت ام طول الحلو وهي محرومة من ظناها ماتتت من حسرتهااا يبوووووي

عماد :- ولك جبران ماتت لو لااا

جبران :- وتررررتني راح اشيلها بس اول شي اريد اتفقد نبضها اسكتتت وترتني لا تسأل شعندك تسأل هسةة؟

عماد :- ردت اعرف اشگ ثوبي واصرخ لو بعد
خزره جبران سد حلگه وگال ..سكتت يلا ، هاا بيها نبض لو ماكو

جبران بعصبية :- ماكو نبضها ضعيييف

عماد :- يبوووووووي ... وشگ قميصة بحرگة گلب
:- جبتلها دجاجة شوي ما كلتها وماتت

هبة :- يمة يمة راحت البنية ، دشيلها يا عيني عادل حضر السيارة شيلها بسرعة

شالها للسيارة ركض وعماد يعيط ويضرب ع صدرة بقبضة ايده :- ماتت گبل لا تاكل الدجاج الشوي ماتت جوعاااانة ما متغدية

علياء :- يبووووي يبووووي ... تصرخ وهي تلبس عبايتها البغدادية وتركض ورا جبران للسيارة

هبة ... عائلة درامية البنية فقدت الوعي سووها ميتة استغفر الله واتوب اليه

انتبهت علاگة بالكاع شلتها للمطبخ بيها الدجاجة جابها عماد الها يگول شفتها ماتغدت
نزهة تضرب ظهر ايدها بباطن ايدها الثانية متحسرة وتگول بحزن
:- راحت بعز شبابها هم زين ابو عادل واختها طالعين

هبة :- وين راحو؟

نزهة :- ابو عادل اخذ هدير للسوگ

هبة :- اي عيني صايرلها مرافق وسايق وكل شي تريده المسعدة مثل حظي لعد؟ هسة خليني اكول دااطلع ما يسألني اذا اكو احد يوصلني لو لا

نزهة :- جا غير البت بت اخو انتي غريبة تختلفين

هبة :- اوي عشتو شنو شايف من بنت اخو دادة خليني ساكتة اذا طاح منو يشيله غيري ثقي واعتقدي ما توگفله ولا راح تصيرله بنية مو مثلي اني گلبي عليهم وحنونة

نزهة :- والله يا هبة حتى هو وام عادل يكولون عليج حنينة كلش ودوم بذكرج بالزين

هبة :- اعرف بس ما يتعاملون وياي مثل تعاملهم ويا هدير وتردين الصدك اذا ضل الوضع هل شكل اني اسحب روحي منهم وترة مو صعبة علي اجيب مرية تطبخلي وتهتم ببنتي هداوي من اطلع للدوام وما اضل بحاجة الهم لان اني علاقتي وياهم ما بانيتها على مصلحة ، لا بالعكس اريدهم عائلة ثانية الي واريد اكون بحسبة بنتهم

نزهة :- يااااع خية شاهد الله يحبونج ويعدونچ بنيتهم

هزيت رأسي ب اي وعفست وجهي متضايقة هو اني شنو رايده منهم غير يعاملوني مثل هدير؟
صح زينين وياي بس دائما تعاملهم ويا هدير يختلف وكأنها اميرة يخدمونها ويركضولها وحاسبيلها الف حساب وهي وحدة صلفة وما تستحي عجبها سلمت ما عجبها صباح الخير متگول بس هي الدنيا هم حظوظ

اخذت هدى ورجعت البيتي بعد ما وصيت نزهة تخابر عليه من يرجعون حتى تطمني

...

فتحت عيني بغرفة المستشفى نايمة على السدية وجهاز الاوكسجين على وجهي ورجعت غمضت عيني ما فتحتها غير من شالو الجهاز من على وجهي جريت نفس مثل الغرگان وطلع من الماي بأعجوبة

درت عيني ع عادل وجبران وعمة يباوعولي بترقب
همست :- شنو صارلي

جبران :- تنگتي مابيج شي

شيهانة :- هسة صرت زينة؟

علياء :- اي الحمدلله ..

شيهانة :- اي جا طلعوني لعبت روحي من ريحة المستشفى
جبران :- الدكتور كال تطلع بس خايفين عليج ليش ما تضلين بعد ساعتين اكثر

شيهانة :- لا ما اريد بس كلبي ليش أذاني ؟

جبران :- سوينالج فحوصات وكل شي سليم بس جنتي متنگة الدكتور ما عرف علتج اتوقع الصار بيج بسبب الاجهاد

شيهانة :- ليش شفتني احرث البستان؟ غير كاعدة وساكتة

جبران :- زين ما انقهرتي بجيتي

عضيت شفتي بخجل و هزيت راسي ب اي

جبران :- عليمن ما تگليلي مو كتلج صبري وكل شي ينحل ما اريد هذا الشي يتكرر سهيررر احذرج مرة ثانية اعوفج تموتين وهناك عود كولي لو سامعة حجي جبران جا هسة عدلة وراسي يشم الهوى

الشيهانة :- التوبة ما ابجي بعد

علياء :- يلا عزيزتي گومي دوخر ليغاد ماما خليني اساعدها تكوم

جبران :- بيج حيل لو اشيلچ

علياء :- مو خذاك الواهس على الشيل ماما

عادل :- سمعتك بالصلاة امس تدعي عليها تطيح حتى تشيلها حلتلك السالفة

جبران بأستنكار :- انااااا؟ لا وحك اسد بغداد مادعيت عليها انا ادعي على سهير اكو واحد يدعي على .........بنت عمة ، استغفرالله هسة ليش تطلع صوتي

علياء :- دنتشاقة ليش انفعلت ماما اعصابك

لمت ضحكتها گوة كوموني اخذوني للسيارة عقلي ما كاعد يستوعب اي شي احس بمشاعر سلبية وغريبة وألم بجسمي بس ما اله سبب

وصلنا للبيت سيارة عماد طابگة جوة يعني عمو وهدير راجعين فتنة للصالة لگيناهم كلهم منتظرينه عمو تحمدلي على السلامة وبدأ يسأل جبران عني

عماد تربع گدام القنفة بالگاع وعكس ايدينا ضل يلطم لطم نسوان
عماد :- يبوووووي اريد الطم لطم حد ما تطيح ايديا ، بردت الدجاج وما كليتيها يا خية
احوو احوو

جيبو الدجاجة لا احرگ روحي
هاي بتعبي والله مشتريها بفلوسي احووو

عادل :- طاح حظك يمكن شگيت هدومك علمود الدجاجة مو علمود الشيهانة

علياء :- اني هيچ توقعت بس سكتت گلت ما اريد اظلمه واظن بي سوء

عمو ضحك وفر ايده :- عايزين لفلوسك لو لدجاجتك احنه

عماد :- اي جا وينها جيبوها اذا ما بيج حيل تاكلينها وحدج انا اعاونچ ... حجاها ودگ صدره

رديت :- لا اكلها وحدي ما اريدك تعاوني

عماد :- الله اكبررر .. حرام والله فقدت طاقة كد ما لطمت اريد اعوض

:- تؤؤؤ انت جايبها الي

سنح وارتجة ع قنفة وكال بصوت مبحوح :- سنحت روحي من كثر اللطم والصريخ نززززهة سويلي عصير نزل ضغطي

ابو عادل :- بابا هدير كومي سوي لرجلج عصير

هدير ردت بتذمر :- والله تعبانة من فرة السوگ مو هاي نزهة راحت تسويله؟ اعفوني اريد ارتاح دايخة

عماد :- تلاحگولي راحت طاقتي جسمي نحل جيبولي عصير  بسرررعة راح اموت جيبولي شي اكله ماعدنا دجاجة شوي؟ مساع شفت دجاجة بالمطبخ

ضحكنا كل احنه جنت كاعدة بصف عمو ميلت راسي ريحته ع كتفه اباوع لعماد يمثل التعب والدوخة والا شوية يسوي روحه مغمي علي كله علمود ياكل الدجاجة

نزهة رجعت خطية شايله الصينية وتحجي
نزهة :- ترة انا حاسبة حسابي وسويت زلاطة وحضرت العصير كلت من ترجع البت احطلها الصينية

عماد :- تعاي نزهة انطيني عنج

رفع ايدينا تلگاها حطها كدامه واشرلي انزل كلت لا ما اريد مستحيل اكل

جبران گام صب كلاص عصير و انطانيا و عماد سوالي لفة
عماد :- هاي كافيه على حلگچ الفاهي

جبران :- ما تحترم شوية كافي تصجم

عماد :- شني كدامك گتلها حلگچ حلو؟ لو ما حلكها فاهي وساعة تلوج باللگمة انه اطير نص الصينية وهو لكمتها بعدها ما واصله للمريء

:- عمو فدوة ما اشتهي خليني على العصير كافي خليها للعشا تكون نفسي انفتحت

جبران :- شكد تتدلعين ضلي هيج وجهج مصفرچ تالي تموتين يكولون بيت ابو عادل موتوها من الجوع

هدير بضحك :- شنو ناقصها خير وتموت جوع خل تحرك جيبها

جبران بنخوة :- عفا والله بت عمي يمنا وبرگابنا ونخليها تدفع وتصرف من جيبها؟ الا زين شاربي

علياء :- لو بس تعوف شاربك احنه بخير

عماد :- شني هاي الدجاجة زفرة بيها ريحة ريش وما مستوية والله لو طالع للقفص وكاضلي دجاجة وعاضها من فخذها اشرفلي

علياء :- اني هم حسيت بيها زفرة

هدير :- اكل الصدر ما بي زفرة

عماد :- صدرها جبير ، ما احب الصدر الجبير احب الافخاذ

ابو عادل :- اعدل كلامك غبي زمال

بهت وجه عماد و وگفت اللگمة بحلگة صفن شوفي على ابو وضحك
عماد :- خرب بعرضك بوية بالك مو صافي وتفكيرك وصخ اتأدب شوية وين راح تفكيرك

صفن مرة ثانية عمي فر سبحته ويباوعله بخزرة

عماد :- اعذرني بوية ما اقصد عبالي جبران يحجي وياي گلت جبران يحب الفساد وتفكيره منحرف

جبران نتر بغضب :- وتااالي نجيبلك ابرة وخيط نخيط حلگك لو نگص لسانك الوسخ

عماد :- اوووي وسخ

جبران :- دخيلك يا اسد بغداد دخيييلك

علياء :- كافي مناگر شنو ديوچة

عماد :- يمة الزفرررررررررة .. حجاها وشدد ع الكلمة

عمتي فكت حلگها رفع ايدينا بوضعية الاستسلام :- الله اكبر الله اكبر قصدي يمة الزفرة يعني يمة الزفرة مال الدجاج قوية والله وامان الله

علياء :- عادل ماما .. ماتاخذني للمستشفى اخوك رفع ضغطي ما اتحمل بعد

هدير همست بغضب بس كلنا سمعناها :- شوكت تصير زلمة وشخصية وكلامك موزون؟
خزرته بهت وجهه واتغيرت ملامحة للحزن فورًا

عماد :- الحمدلله گايم اغسل اكو جاي

نزهة :- هسة اسويلك من عيني

طلع يغسل عمة علياء گلتلها بغضب :- ما تستحين اكو مرة هيج تحجي ويا رجلها شمسوي هو بين اهله واخوته ماخذ راحته شنو تردي ضابط حتى بالبيت واخرس و وجهه ما يگصة السيف حتى تگولين عنده شخصية لو يعجبج يگومج بكتله ويكعدج بكتله

هدير :- تسمع عمو تسمع ما الي حق احجي شي ويا رجلي ؟ وشنو يكومني بكتله ويكعدني بكتله! لان شفتوني تيتمت وماعندي ظهر هيج تحجون عبالك اسكت والله ما اسكت اذا يمد ايده عليه اكسرها

علياء :- كسر بأيدج كون ما محترمة كمتي تحورين بالسالفة وتكلبينها لصالحج لوتية

هدير :- هاي كلهم سمعوج وكلهم شهود گلتي يعجبج يكومج بكتله ويكعدج بكتله مو بعيده تضلين توزينة عليه وعمي ساكت يخاف منج انتي امشيه هذا البيت على مزاجج ومحد يگلج لا بس مو وياي صدكي مو وياي مو اني لتقبل ينداسلها على طرف

جبران نتر :- ثمني كلااامج

طب عماد سكتت هي وبس تبجي عماد گال لجبران :- لا تصيح عليها كومي صعدي هدير تعاي فوك نحجي

هدير :- اي انشحنت واندفعت بعد

حجتها وكامت صعدت ولحكها عماد عمتي ضربت رجليها بقهر وگالت بحرگة
ابو عااااادل شو ما الك لا حس ولا نفسسس قااابل لو شنو

ابو عادل :- عماد يردها شما كان رجلها انه ما اكدر احجي شي اخاف اهضمها وهي يتيمة ومالها احد وتحس احنه مستفردينها

علياء :- لا والله؟!

ابو عادل :- ما تدرين بيها عقلها صغير هسة هيه كاعد تشوف روحها مظلومة ومسكينة

علياء :- اووف اوووف

كامت معصبة وتفور وفاتت للبيت الولد دارو ع ابوهم يحجون ويا ان لازم يحط هدير ويحجي وياها ويفهمها ان احترام اهل هذا البيت واجب وممنوع منعا باتا تتجاوز حدودها ويا امهم

جبران :- والله على هذا نترها واسلوبها اجر لسانها واكطمة بس غير ماهي مرتي ولا اختي مااكدر مربط

عادل :- جبران!! ..اشر بعينه عليه

جبران :- هي ماقابلة الاختها شتحجي انت هدير مستهترة ولازم تتربى من جديد ومحد غيرك انتَ وعماد يكدر يعيد تربيتها احنه مربطين عاد انت عمها وذاك رجلها اذا تضل هيج تركب فوگ روسنا وكول جبران ماكال

ختم كلامة وضرب الكلاص مال الماي على الطبلة بعصبية وگام صعد لغرفته عادل فر ايده ما عاجبة وطلع راح لبيتهم ونزهة بالمطبخ تسوي چاي

حسيت روحي انحرجت بسبب اسلوبها بس مالي شغل هي تمثل روحها انه شكو حتى انحرج؟ غلط الانسان يحمل نفسه اثم بسبب اغلاط غيره خصوصا اذا كان البي مكفي مثلي

استحيت اكوم من يم عمو لان ضايج غيرت الموضوع وبديت اسولف ويا كلها نص ساعة مو اكثر ونزل عماد بالزي العسكري وشايل جنطة ايد بدون ما يحجي اي شي طلع عمو هز رأسه ضايج كمت من مكاني جريت روحي بتعب لگيته واكف يم سيارته يصعد جنطته صحتله بصوت مبحوح التفتلي

ردت اطلعله اشرلي اوكف واجة باتجاهي
عماد :- خليج انتي مريضة

وگف مقابيلي وعلامة التساؤول مرسومة على وجهه ، حواجبة معقودة بضوجة ومبين علي مكسور خاطره

:- هذا مو وكت دوامك عماد وين رايح؟

تنهد بضيق رد :- خنگني البيت رايح اشتم هوى ومناك اطلع للدوام ما اريد اضل بهذا البيت الفوگ تموتني

:- طيب ، روح شم هوى وغير جو وارجع للبيت ترة عمة تنقهر اذا لگتك رايح والمشاكل تزيد ما تنقص بينهن

:- تجين وياي؟ ضايج اريدج وياي صح انتي مريضة بس ما اخليج تنزلين من السيارة

هزيت راسي :- بس احط عباية ع اكتافي

دخلت اخذت العباية من الصالة وكلت لعمو طالعة ويا عماد شوية مختنكة

:- ما راح يروح للدوام؟

:- ما اخلي هسة يشم هوى ويرتاح ونرجع

طلعت ركبت يمه وطلع اخذني لدجلة شكد جان مخنوگ وساكت من نزلنا ضل يسحب نفس عميق ويزفره بتعب

عماد :- لو تدرين شكد احبها وفرحتي بيها من تزوجنا ما تنوصف لو تريد ماي عيني ما اگللها لا ، بس ما يجي بعينها شي انسانة حقودة حسودة كلبها اسود طماعة وتريد تمشي العالم كله مثل ماتريد تشوف نفسها محور هذا الكون

تعبتني كلش تعبتني .. اقدملها هدية تعيب عليها و على ذوقي اطلعها تكول لو طالعة ويا صديقاتي احسن
اسكت وامد بوزي تكول بس مغنتب اختنكت منك
اضحك واشاقي تكول ماعندك شخصية ومسوي نفسك مضحكة

حرام عليه اخذ راحتي ويا اهل بيتي تريدني صنم ومن اصير صنم تكول الحياة وياك مملة ماتنحمل

شيهانة :- نفسها ماتعرف شتريد منك

عماد :- تعبتني والله مرة طلعنة سفرة وزميلاتها وازواجهن كلهم حاضرين هانتني گدامهم كلهم
متخيلة هذا الشي؟ نزلت من قيمتي وحرجتني خلتني مثل بلاع الموس

:- شنو سوت؟

:- انه برة البيت اتصرف بثكل وهدوء هذا طبعي ما اخذ راحتي غير ويا اهل بيتي وكم واحد من جماعتي بس كدام باقي الناس مثل جبران اتصرف سبحان الله نسخة منه بالتصرفات ما احب احجي هواي ولا اضحك هواي
جنت ساكت والمكان صار هدوء واحد زوج زميلتها كال ملينا ماعدكم سالفة

هدير ردت علي گلتله بضحك ، عماد بطبيعته مهرج ويضحك بينا بس كدامكم نافخ ريشاته عود ضابط وشخصية هسة ياخذ على الوضع والضحك هنا يصير بفلس

:- صخام الصخمها

:- والله تخيلي ضحكت مجاملة وما تحملت عشر دقايق وترخصت وكمت صحتلها كتلها جيبي جنطتج ولحكيني للسيارة ماقبلت كلتلها اذا ما تجين اسحلج هنا كدامهم كلهم واسويج انتِ المضحكة الهم واخليج سالفة بحلوگهم شهر كامل

رجعنا للبيت وتعاركنا عركة شكبرها وتدخل والدي ورزلها ضلت تبجي وما تاكل وخابرت صديقتها ممرضة اجت للبيت تشوفها ونزلت كالت لابوي هدير كلش تعبانة كلبها وضغطها وخلته يريد يموت قهر لان رزلها حسباله بسببها صار بيها هيج وهي جذابة كل شي مابيها تمثل ومتفقة ويا صديقتها

كتله بأستغراب
:- طيب شنو جابرك تتحمل كل هاي الاذية عماد

:- يتمها و وحدتها شيهانة انتن صرتن امانة بأعناقنا واحنة لازم نصون هاي الامانة ، هي ماتريد تتطلك واذا طلعت مني وطلگتها تتبهذل وتنكسر ما اتحمل عذاب ضميري يموتني لان اكون كسرت الامانة وما صنتها

رديت بمكر :- بس هيييج

جر حسرة طلعت من نص گلبه :- غير اعشگها واموت بهواها بس هيَ معذبتني وما جاي تعقل

:- اي گول العشگ ما يخليك

دمغني بخفة ضحكت عفس وجهة

عماد :- والله شسوي الها شلون تنحل ما ادري ما معقولة اضل طول العمر هيج اعاني ؟!

شيهانة :- اعقد وياها اتفاق گللها اني ما يصرفلي هيج اريد زوجة تحترمني وتحترم اهل بيتي وتعامل البشر بالمثل مثل ما يحترموها تحترمهم ومثل مايخلولها قيمة تخليلهم تكونين هاي الزوجة نكمل ونصير سمسم ما تقبلين كولي عماد طلگني لان ما اكدر اكون الزوجة التريدها

دار وجهه للنهر بنظره حزن عيونه صارن حمر :- فكرت بهذا الحجي من زمان ردت اكثر من مرة اگلها لو تجرين عدل لو نتطلگ خيارين مالهن ثالث بس اخاف تگول انه هذا طبعي اذا ما تگدر تكمل وياي طلگ

شيهانة :- چا اذا تگلك طلگ وماتقبل تتنازل عن جسارتها وقلة التربية واللسان معناها بايعتك
نصيحة من اختك عمرك بحياتك لا تتمسك بأنسان بايعك لو روحك بي
اخذ الانسان المشتريك لو حتى جنت ما تحبه

عماد :- الگلب كلب ابن كلب مايقتنع بهذا الحچي اگلله توب منها يحبها بالزايد شسويله تورطت

:- اضحك خلي الدنيا تضحكلك

:- ما تضحكين انتي مساع تبجين وطحتي خليتيني اشگ قميصي حسبالي فطستي وضليت اصرخ والطم ع صدري

ضليت اضحك بصوت عالي وانه اتذكره شلون يصيح الله اكبر ويگول كولي الله اكبر

فر ايده وغمني كال امشي امشي ندور اكل ناكل الدنيا ليل والناس هسة تعشت بس احنه ضالين والدجاجة طلعت زفرة وماتنوكل والله ولا حاسب روحي ماكل

:- اي طلع حجج حتى تاكل مرة ثانية

اخذني اشترينا من ابو عربانة لفات واخذنه كازوزة وكعدنا بالسيارة اكلنا ورجعنة للبيت

لگيناهم يتعشون صعد لمرته وانه مشيت للغرفة تمددت ارتاح لان تعبانة غفيت وغطيت بنوم عميق

حسيت بضيق بصدري وروحي تريد تطلع شي بداخلي ياكل بيَ وجسمي يأذيني وكأن اكو ضربات جاي تنزل على جسمي
شفت رجال وجهه اسود وريحته قذرة شال فاس يباوعلي بحقد ويضحك بمكر وبكل قوته ضربني على رأسي حسيت بالألم حسيت براسي انطبر شهگت من الألم وفتحت عيوني بسرعة ..

رفعت عيني على الساعة بالوحدة ضبط .. جريت نفس قوي حسيت جسمي مربط جانن ثواني بس وكأنها ساعات جسمي متعرق وريگي ناشف رفعت روحي بصعوبة وجريت كلاص ماي شربته صكيت علي وكمت افتر ع روحي بالغرفه وحاطة ايدي على رأسي يأذيني بمكان الضربة
وكأنها ضربة حقيقة بفاس من نار .. احس بحرورة دم ع وجهي بس ماكو اي دم ولا جرح وألم براسي وكأنه مقسوم نصفين ..

اخذتني رجليني للجرباية احس واحد غيري جاي يتحكم بجسمي ، كعدت وغمضت عيني وبعدها ما حسيت بروحي فقدت اخر ذرة عقل براسي ..وكأن شيطان تلبسني

....

جبران ..

اندگ باب الغرفة شلت راسي من المخدة باوعت للساعة بالميز الجانبي فوگ الوحدة استغربت كل ظني ابوي لو اخواني بيهم شي طفرت بسرعة ويا دگة الباب الثانية فتحته اندفع بسرعة طبت سهير للغرفة بهتت وتفاجئت من جيتها لغرفتي لان سهير تصرفاتها مدروسة وما تسوي هيج شي بالعادة

عينها تفتر بالغرفة وعيني ثابته عليها حجيت بحدة :- سهير تخبلتي؟ محتاجة شي تعاي ننزل للصالة اذا عندج شي تردين تحجين بي

باوعتلي بنظرة جامدة تقربت كضت الباب وسدته وطكت القفل قفلت الباب علينا ..................للحكاية بقية 🖤

رأيكم بالقصة يهمني 🖤 ..

دوسو النجمة ⭐⭐⭐⭐⭐⭐⭐