رواية حمائم تخشى الطيران الفصل الثالث عشر 13 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

طول البارت 6750 كلمة قسمو ع يومين حتى باجر ما انشر بس اذا عجبكم شوفوني حماسكم حتى اعرف ختمتو البارت وما قسمتو ع يومين

تعليقات بين الفقرات لطفًا 🤍🖤

تقربت مني السجانة وكفختني بقوة على رأسي وبعصا بأيدها ضربتني على ايدي ودفعتني للحايط
:- حيوانه بالسجن المن تبوگين هوا غير محكومة مؤبد لو عندج ك** برة وتدزيلهم

شيهانة :- لا تتهميني بشي ممسويته
السجانة :- واچذب عيوني الشافت الساعة وهي تطلع من جوة فراشچ

شيهانة :- اي جذبي عيونج نسيتي احنة وين بسجن وهنا اشكال وانواع النفسيات شمدريج شفتيني واني اخذها اكيد اكو وحدة تريد تبليني

السجانة :- لا هيچ الناس مهتمة الامرج وتريد توگعچ فد نمونة انتي
شيهانة :- لا نمونة ولا من هم يحزنون الساعة اني ما بايگتها ومحد هنا شافني واني امد ايدي وأخذها ، الله يعلم منو ذبها جوة فراشي حتى يورطني
واني مو هيج غبية اسرق ساعة واضمها جوة فراشي خوب اضمها بغير مكان بحيث الي يلگاها ما يدري منو البايگ

السجانة :- طلعنها

حجيت بعدم اهتمام :- اي طلعني وشنو يعني ، فريت ايدي ماعاجبني
بشيه بشيه عبالچ اهتم لو اخاف منچن شعرة مني ما تهزن

باوعت ليلى مدلغمة تباوعلي مدمعة ، اخذني السجانات ونزلن علي بالضرب والاهانة ومن ايديهن الايد الضابط صاحب الساعة طب فاير عيونه بهامته
شاربة كثيف صاحب عضلات و عيون خضر
شكله جميل بس اخلاقه زفت فشر عليَ انواع الفشار وضربني موتني ضرب حتى على ضرب اماكن محضورة من جسمي ضليت اتلوة من الوجع

جر شعري حيل وضربني وتفل بوجهي
:- عفية عين صلفة دمعة ما طاحت من عينچ
ضحك مستهزء
:- شتوقع من مجرمة عاهرة هذا اقل شي يطلع منچ

رديت بنتر :- انتَ منين ماخذ رتبتك؟ وين اكو ضابط هيج سهل يصدگ وهوا ماكو احد يشهد اني بايگتها
رد :- غير طلعوها من جوة فراشچ بعد اكثر من هيچ
شيهانة :- عمرك ماسامع بالمكر والحيلة اني لو اريد ابوگ شي اضمه بمكان محد يتوقعه وبعيد عني حتى اذا فتشتو ولگيتو ما تعرفون منو البايگ
بس الغبي يبوگ شي ويضمه جوة فراشه

لطمني على وجهي وصاح رجعنها ..

اخذني سحل ماكدر امشي من كثر الدك وشمرني بالزنزانه اجتي ليلى ركض اخذتني للحمام وغسلتلي الدم وضلت تبجي وتحضن بيَ وتدعي عليهم بهمس خوفًا منهم لا يسمعونها ونتعاقب ثنيناتنا

رجعتني لفراشي مرتبته الي نومتني جسمي كله يون طلعت علاج ضامته وانطتني حبه بلعتها وما غفيت الا بعد ساعة تقريبا
اخذتلي يومين جسمي يون من الالم استذكر ايام الراحة والعيشة السعيدة وانهضم

واضل اناشد جدو وابوي واگللهم تعالو شوفو عزيزتكم شلون انهانت تعالو شوفو شيهانتكم شلون انذلت

الانسان صعبة علي بعد ما جان عايش عيشة كريمة فجأة تنگلب حياته ويصير مذلول
ينضرب وينهان
اني حياتي تغيرت وصارت سودة من بعد ذاك الحادث المشؤوم خسرت ظناي وكل شي حلو بهاي الدنيا ياليت امي ما والدتني
ياليتني ميته قبل لا تنزل على روسنه المصايب وتغزينا الخساير

رجعت بذاكرتي ليورا .. بيت الجحيل
اخابر عليهم وكل مرة يجاوبوني غلطانه هذا مو بيت الجحيل وما نعرف واحد اسمه صگر
نزلت السماعة عن اذني عيوني مليانه دموع ، جبران كاعد مسافة عني
يمسح على شواربه وينتظر كلام مني

شيهانة :- مثل كل مرة يكولون مو احنة بيت الجحيل
جبران :- غلطان صگر ناطيچ رقم غلط بس ولا يهمج بت عمي باجر خميس وان شاءالله اطلع للبصرة وارجع الجمعة
اروح للزبير بنفسي واسأل عنهم بيت ببت

شيهانة :- وياك ما يبرد كلبي ... قاطعني
جبران :- لا تلعبين بت عمي الدرب طويل ومتعب وراح افتر بالشوارع شلون اخذج وياي
انه اسأل واشوفلچ الاخبار شنو ماتثقين بيه؟
كالها مستغرب

شيهانة :- لالا طبعا اثق شلون ما اثق بيك بس گلبي ما يطاوعني جبران اني والده وخاسرة ظناي مرتين مو مرة محد هسة يحس بالنار الشابة بصدري

جبران :- انه ادري لتلدغه الحية يخاف جرة الحبل انتي شجاج شلون تطاوعين صكر
رديت بقهر :- انته ما تعرف كل شي جبران

عدل كعدته وكال يأنبني
:- اي ما اعرف كلشي بس ادري بمشاري شنو من بشر شتردين ابنه يطلع نبي شو مادري شلونج انتي وأمنتي بواحد طالع من صلب مشاري انه بمكانج والله جلب يوكله مشاري هم ما اثق بي

:- والله صگر غير وهوا خلصني من عذاب ابو خوش انسان والله وضميره حي

:- ما ادري شگلچ بعد خليها يمي اروحلهم بيت الجحيل واسئل ان شاءالله خير
:-اخذني وياك حبوبي

تنهد ضل يستغفر ورجع عاد عليَ
:- يبا الدرب طويل وما اريد اتعبين خليج هنا مرتاحة وتجيج الاخبار باردة
والله اذا ما حصلناهم ادز مرسال للكويت يجيبلي اخبار مشاري وصكر

نصيت بحزن رديت :- براحتك ..ما تقصر الله يسهل وتروح وترجع بالسلامة واذا ما تكدر اني اروح

هز رأسه ضل يحرك بخاتمه ترخصت وطلعت

ثاني يوم اول ما وصل للبيت كلي حضري روحج اخذج وياي للبصرة
الفرحة غمرتني ركضت بدلت وطلعتلي ملابس بسيطة هوا يوم واحد ، رفعت شعري كباية ونزلت كذلي حطيت حمرة وكحلة ، رشيت عطر
وطلعت انتظره نزل باوعتله لابس قميص وينطلون سود وحذاء جوزي وحزام جوزي
شعرة مرتب وعطرة طيب ، يزين ايده خاتم حجره رصاصي

باوعلي بنظرة مطوله تنهد واشرلي برأسه اطلع ودعتنا عمة علياء شمرت ورانه طاسة ماي
طلعنا اول الطريق ضلينا نسولف وراها ملينه فتحنة الراديو جانو يبثون برنامج يتناقشون بموضيع الفن والشعر ..

جبران ما عجبه وطلع اغنية لرائد جورج
فنانه المفضل
الاغنية كلماتها تنطبق علينا مفصله تفصال عبالك كاتب الكلمات كاعد خلف الكواليس يشاهد قصتنا وبعد ما انتهت جر حسره وطلع اوجاعة بهاي الكلمات ..

لا لا ترحلين
من بعدج يموت ورد الياسمين
ليش ليش ليش
حالي من بعدج يكون
بس هم وسكون ويزيد الانين
ليششش
ياما كلتي شلون انسى
انسى لا مستحيل
كل كياني ودمي انت
وليلي من بعدك طويل
تالي عفتيني بجروحي
اهمس بأسمج ياروحي ياروحي يا روحي
والكلب شيفيده شيفيده
وانفاسج بعيدة بعيدة بعيدة
تمطر الدنيا حنين
تمطر وتحيى الزهور
وباالسما المح عيونج
اداعب احلام الطيو......

مديت ايدي طفيته المسجل جان يسوق مرتاح وحاط عكسه ع شباك واصابعه على لحيته
باوعلي ورجع باوع للطريق
جبران :- ما تخلين الواحد يستمتع حتى بالاغنية كطعتيها على النص مرة وحدة بحياتچ سويها وكملي شي للنهاية

شيهانة :- كلماتها وجعتني ..

باوعلي مستغرب :- ما متعود عليچ تفصحين عن اليدور بگلبج وبداخلج
ضحكت ومديت ايدي سحبت علاكة فتحتها طلعت منها بسبوسة حطتها النه عمه علياء

جبران :- جاي اسوق
اخذت قضمة من القطعة الي بأيدي وگتله بأنبهار
:- تموووت تمووت
:- جااااي اسووووق

مديتله القطعة قربتها من حلگه اكل منها صاح
:- ام عادل بعد منو يلحگها بالطبخ والحلويات
نادرة نادرة هنيال ابوي

شيهانة :- شگد بعد للبصرة
جبران :- خير من الله ..

وصلنا مكسرين گبل بطريقنا للزبير اول ماوصلنا سألنه العالم گبل عرفوهم ودلونه ، وصلنة نزلنه تراب
مشينه للبيت بناء حلو وكبير بس قديم
شوفته لهذا البيت وتصميم البناء هيج بداخلي المواجع
لان بنائه يشبه ابنيه بعض البيوت بالكويت
من ناحية التصميم والصبغ وابواب البيوت

جبران دگ الباب ، ماكو جواب ضلينا ندك ندك ماحصلناهم
باوعت للبيت بأستياء
ورجعت التفتت على صوت باب الجيران انفتح

جبران :- مساك الله بالخير عمي
رد الجار :- مساك الله بالخيرات وليدي طلعت على صوت دگ الباب عالي
جبران :- اعذرنا على الازعاج بس الجماعة اهل وجاييلهم بزيارة من بعيد
رد الجار :- اهل وما تدري بمصيبتهم؟

جبران :- هاي جيتنا من بغداد والله وماعدنا تواصل وياهم على التلفون ولا واحد جاي لبغداد وناگل النه اخبارهم

الجار هز رأسه طلع وسد باب بيته فر سبحته ورفع كلابيته وارتجى على الحايط
:- وليدي بيت الجحيل انقلعو من جذورهم بعد مالهم غير اخيتهم بالكويت الجبيرة راهية

جبران :- دخيلك يا اسد بغداد شجرى عليهم؟ حادث شالو سافرو

:- وين وليدي ساعة شيطان والله يعلم الاسباب
ابنهم تسودن وذبحهم كلهم من زغيرهم لجبيرهم لا عافلة بنيه ولا ولد

:- لا حول ولا قوة الا بالله .. يمتة هذا الحجي

:- عشر ايام احدعش يوم اظن

:- لا حول ولا قوة الا بالله انا لله وانا اليه راجعون ....

عفت جبران يحجي ويا الجار رجعت مبهوتة للسيارة.  كل اعضاي ترجف حضنت جف ايدي ليرجف بالجف الثاني منصية راسي
اجة جبران باوعلي كال
:- ترعشين يبا

غمضت عيني نصيت ، ما مستوعبة الحجي السمعته
جبران :- الحجي وياچ يَ الشيهانة اطلع بيج للمستشفى جنج من الصدمة انهبطتي
حجيت مبهوتة
:- شمعنى ورا رجعتي للعراق ابنهم تسودن وذبحهم
:- الزلمة يكول مطلوب دم بعد ماراد اهله يتورطون ذبحهم

فركت كصتي باصابعي نصيت اكثر
لزم وجهي رفعه وهو يسوق
:- لا تخربين صبري نوصل لاقرب مستشفى قوي گلبچ وشدي روحج

مشاري .. مشاري ... مشاررري ماكو غيره مشاري
ماكو غيره .....
ضررربت البنيد وصرخت بغضب
:- مشاررررري مشارري الله يحرمك جرة النفس ويحرمك نطق الشهادة

جبران :- اعصااابج يبااا الزلمة يگول مطلوب دم من زمان الشغلة مابيها مشاري مبينه

شيهانة :- شيطان مشاري راضع ويا بليس ماتعرفه انتَ يابوية
جبران :- مع هذا مشاري ماله دخل
شيهانة :- لا اله
جبران :- اووووو گتلج ماله دخل الزلمة يگول الجار من مطلوبين دم وطفح عندة الكيل من ورا الخوف ليش مصعبة الامور على عقلج وكلبج

شيهانة :- اروح للكويت
جبران :- مو هي لعب وبكيفج تلعبين ترحين وين ما يعجبج وتجين بالوكت اليعجبج واني وعمج نواطير خضرة هنا

شيهانة :- لا حشاكم اكيد اروح بعد ما اخذ اذن عمي
جبران :- ما يحتاج عدنا عرف انطينه العنوان ونوديهم ينشدون انتي ماحجيتي بس مبين مشاري متربصلج ويمكن دخلتج للكويت مرة ثانية معناها ماراح تطلعين منها وان طلعتي طلعتي بخسارة

ضليت ابجي مرعوبة اخاف ندز احد ويأذي مشاري وشنو ضل عندي حتى اخسره بعد
رد :- لا شسالفة لا تصعبينها وهاي دامنا هنا نروح لبيت حجي جاسب نسلم عليهم ونتغدة يمهم صارلهم هواي يعاتبون مانمرلهم
وبنفس الوكت ناخذ رقم بيت اختهم بالكويت ونوديهم ينشدولنا عن صكر وشرط نخليهم يتواصلون ويا صگر مو غيرة بدون ما يحس مشاري

شيهانة :- هذا هو قابلة

جبران :- يلا نزلي هاي عيادة
باوعت صدك عيادة عليها لافته "عيادة الدكتور كمال"
ضغطي صاعد وانلعب بي جولة من العيادة لشقه صديقه لجبران ناطي خبر بجيتنا وكايله نوصل متأخرين بالليل

استقبلونا صديقه وزوجته ومسويلنا عشا اني تعشيت يم زوجته وجبران يم صديقة
وكبل ذبيت روحي بالفراش اتگلب وافكر بشعلان وصگر هذول ضلو جوة رحمة مشاري الماعنده رحمة من الاساس

كل ما اغمض عيني تجي الهواجس ضليت الوب للثلاثة كمت مختنگة طلعت شفت جبران واكف بالبلكونة وحدة يدخن

مشيت باتجاها كال بدون ما يلتفت
:- ليش مانايمة؟

:- شمعرفك هاي اني؟

تنهد :- اشتمچ من بعيد وحافظ حتى صوت خطواتچ

:- جبران .. تعبتك وياي
وگفت بصفه حطيت ايديني على المحجر باوعت للظاهر من المدينه وابتسمت بوجع غورگت عيوني غمضت عيني استنشق هوى البصرة ..

شيهانة :- مشتاقة هواي لديرتي مشتاقة لاهلي وللمة مالتنة جبران مشتاقة لضحكة امي وسوالف ابوي وجدي

مد ايده ميل رأسي خلا على زنده ، ريحت راسي علي
ما حجة اي شي يتنهد واني دموعي تجارى وتطلع نشغه مني نشغة وحدة مهضومة وميته بحسرتها

جبران :- والله هوى البصرة يرد الروح اني مثلج هم مشتاق لهاي الريحة صار سنين مفارگة رياتي جنت متعود اشمها

مسحت دموعي مستغربة :- ما صارلك سنين من رحت لبغداد
ضحك وباوعلي رجعت راسي على زنده
حجة :- غريبة الدنيا والوادم اغرب تنطي روحك يردوها الك تنزف تنطيهم عينك يردوها عمية تكشف كلبك يكسرونا ويمردونه مرد

وخرت عنه بدون رد رجعت لفراشي ، نمت كوة وكعدت من وكت سبحت وبدلت ملابسي ودعنا الجماعة ورحنا الاقاربنا بيت حجي جاسب استقبلونا استقبال حلو ، وكرمونا وبعدها اخذنا رقم اختهم العايشة بالكويت وطلعنا لبغداد وصلنا بالليل ..

وراها بيوم جبران كدامي اتصل بيهم حتى ينشدون النه وشرحلهم الوضع حتى ما يندگون بمشاري ويتعنون لصگر يسألونه عن احواله ويگلوله احنة من اهل الشيهانة ..

عصرية ودخلت علينا مرت عادل هبة ، كعدت يمنا واقترحت نطلع نتونس ونغير جو
ما گلنا باطل اني وعمتي وحتى نزهة غيرنا ملابسنا وطلعنا نتونس ومناك تعنينه للكاظمية زرنا وطلعنا نفتر بالسوگ

شفت العاب اطفال هبة راحت تشتري لبنتها هدى اني اختنكت وگفت الغصة بحنجرتي درت وجهي وبكلبي كلت الله يحفظلها ظناها
عمتي علياء كالت وهي مدمعة
:- اشتري وضميهن عسى ولعل الملگى قريب مو بعيد ما تعرفين ربچ شضاملچ باچر

ابتسمت على املها ومسحت دمعه نزلت غفل من عيني تقربت كلبت الالعاب واخذت الي عجبني ومن وصلت للبيت كابلتهن ومتت بجي احاجيهن عبالك احاجي اطفالي مو مجرد العاب مابيهن روح ..

قبل لا انام اندك باب الغرفة طلعت اشوفة جبران اشرلي براسه الحگه عماد كاعد بالصالة مشغل المسجل ومسلطن
عمي من غرفته يصيح :- ولك طفيييي واصعد عمااااد
عماد :- ما اطفيييي وحك علي الفحل ما اطفييي
اهواااك واتمنى لو انساااك

علياء :- يوم نصي لو تاخذه وتصعد يم مرتك
عماد :- هية مرتي طاردتني
علياء :- شمسويلها؟

عماد :- اي هاي انتم كله شمسويلها وشمسويلها كولي هي شمسويتلك ليش كله براسي اني المظلوم الفقير الماله من الحظ نصيب

عمتي خزرته خجلانه مني غمزتله وضحكت ..

دخلنا للاستقبال وهو بعدة يغني بصوت عالي صوته حلو يجنن وهرج البيت هرج

جبران :- استريحي
سد الباب واجة كعد مقابيلي باوعتله بتساؤول
:- خابروك الجماعة ؟

زم شفايفه ، ورجع ارتخى گال بحزن
:- بس اريدج صبورة
حطيت ايدي على گلبي :- ابني ميت؟

جبران :- چعمناچ بالله لا لا ما ميت
تنفست براحة استرسل :- بس الجماعة شايلين ومالهم اثر من هيج استنتجت ان مشاري مايريدج توصلين الابنج ويمكن ضاب على صكر لهذا السبب صكر لهسة ما اجة للعراق

شيهانة :- كلب

جبران :- حشى الچلب
سمعيني زين انتي بنية عمي وشعرة من شاربي اني ما اخليج تتواجهين ويا مشاري وحدج اذا الج نية للحرب احارب وياچ بس مال ابحدج ترحين وتواجهينا هاي كطنة وشيليها من ذانج

صفنت بوجها يباوعلي وايدة على لحيته يمسح بيها زفر نفس لفحني وفززني من صفنتي
:- اذا ردت احارب مشاري راح احاربة وحدي

جبران :- وجبران يزين شاربة بالقندرة ..

شيهانة :- كلت اذا ..
جبران :- نيتچ؟
شيهانة :- اصبر فترة كم شهر اتاني صگر كتلك ماراح يخذلني صگر محل ثقة تلگاه هسة يحاول يخلي ابو يأمنله ويشيله من قائمة الشكوك وراها يتصرف

جبران :- اني وياچ بعد اصبر وياج ان صبرتي واحارب وياج ان حاربتي وامشي وياج للموت ان مشيتيله .. وشاربي ازينه اذا عفتج بنص الدرب
شيهانة :- والنعم منك وتلث انعام من شاربك ..

ليلى ..

واگفة كبال المراية الميز كدامي مليان مكياج وعطور ولفافات الشعر ، الف بخصلات شعري واستمع لكلمات نسومة و حور وهن يقنعني بشيء ما رايدته ..

نسيمة :- بعد هسة انتي راح تداومين فتحي ويا الموضوع شو سكت والسكته سكته ذاك يوم وهذا يوم لا خابر ولا گال ....

ليلى :- سيد رحمن رجال متدين ومتعصب ما يقبل ابنه يخابر بنيه كل ما يخابرني قيس يكون خايف ويمه يكعد شخص يراقبله

حور بانزعاج :- اتفضل وتنتظر ياخذها

تأفافت وحجيت ابرر :- ياخذني بس مو بسهولة اتوقع اهله رفضو وهسة راح يقنعهم
نسيمة :- حاچي باچر گليله جايتلي قسمة وخوش قسمة شاب مال وجاه واخلاق وشاريني بروحه وخالتي قابلة بالولد

هياته صهيب من يوم الحجيتي ويا لا وصل ولا شي بس يخابر ويسئل عنج وعن اخبارج لا وصل حفله ولا حط بحلگه حرام كله علمودچ
حور :- والله ينطي من يوم الوكفلي ودافعلي وخله ابو ريحانه يهابني وما يوصلني ويأذيني واني حابته كلش

نسيمة :- عبالها البشر اذا انكطع عنده خيط من خيوط الايمان بعد هذا هوَ فسد وخرب ..
صدك صهيب بيوم لجئ للحرام وسد شهواته بس عنده من الزينيات هواي وبداخله خير ويسعى حتى مايخرب الباقي من ايمانه ويتوب ويرجع يوصل المكطوع

ليلى :- اوووف اني ما احبه اريد قيس ، انسان مؤمن وخايف الله وجذور الايمان عنده قوية ما تتزحزح بسرعة

نسيمة :- وينه قيس؟ غير يجي يتقدم ترة هذا مو حجي تضلين تنتظرين وتضيعين صهيب من ايدچ وقيس مايجي
تضلين نفس الهاي الما حضت برجيلها ولا خذت سيد علي

صرخت متضايقة من الخصله ومن حجيهن ..

ليلى :- غير ننطي الولد صبرررر كافي طلعن طلعن من يمي وترتني وشعري ماجاي يضبط

نسيمة :- كومي داده كومي هاي راح تخسر المشيتين وتضل مثلي ومثلچ لا سند ولا عائلة ..
حور :- نسومة الحق ينكال قيس واهله درر وحكها تتمناهم بس هية ماجاي تقتنع ولا تتقبل ان مثل هيج عوائل يدورون جناين من ثوبهم وعدهم بالبداية اصلها وفصلها ودينها

نسيمة :- لعد اني شنو احجي من مساع لسه؟ هذا الاريدها تفهمه والله يا يوم والله ما يقتنعون ولا ياخذوج السادة المن منتظرة ، مدي رجلج على گد غطاچ

طلعن من يمي ورا ما نشف ريگهن واني ما اقتنعت بصهيب راسي والف سيف ، گلبي يم قيس صح هو بعد ماخابرني ولا حاجاني بس يمكن جاي يقنع اهله
ما اريد استعجل واخسره وتاليتي اندم ..

كملت حط اللفافات ، تمددت بفراشي عيني مايجيها نوم افكر بباجر اول يوم دوام مرحله ثانية وراح اشوفه بعد انقطاع طويل
مليت من روحي ما اكدر اغفي كمت شغلت المسجل طلعت اغنية هيثم شيجيب باجر ، ضليت اتمايل واگلب بملابسي اختار منهن عايشة اللحظة ومنطربة ..

اعذرني هيثم صحيح اني احبك وجنت اريد اتزوجك بس هسة بطلت راح اتزوج قيس .. لا تضوج اذا ما تزوجت قيس ارجعلك ..

تعبت من كثر التفكير وراسي وجعني من الغناء طفيت ونمت ، گعدت الصبح تريكت وصعدت ركض ابدل وارتب بشعري ويفي وكذلتي قصرتها وكلبتها
خليت مكياج خفيف ورشيت عطر ريحته طيبة ..

نزلت ركض جمدت رجلي على الدرج من شفت صهيب واكف بالمطبخ وظهره للباب ماشافني ردت اسحب روحي وارجع اصعد بس هو صاح

صهيب :- صوت كعبج وصل قبلج وصرت اعرف بنزلتچ ماكو داعي تشردين

عفست وجهي متضايقة وكملت مشي حجيت صباح الخير التفتت التقت نظراته عيونه صفر مخصومة
نظراته ترعبني تهز كلبي بنص صدري
صاحب انياب بارزة مااكدر انطي شبيه غير الذئاب ..صهيب اخو الذئاب

صهيب :- ما شاءالله تبارك الرحمن الله يستر عليج ..
ليلى :- خاله رايحة
نسيمة :- دقيقة نطلع سوية نوصلج للشارع بطريقنا

ليلى :- وين رايحين

صهيب :- ماخذين ريحانة نتسوگ الها للمدرسة ملابس وقرطاسية
ليلى :- بعد روحي ريحانة تنگرط گراطة وماكو بشر شافها وماحبها وضل يدور راحتها
صهيب :- واللهي صحيح بحيث تفكيري دائما بيها

نسيمة :- اووو حور نمتي خما نمتي ديلا ياعيوني يلا ياريحانة
حور :- صبررررج صبرررج انطينه مجال

ضلينه ننتظر شوية واجن اخذهن صهيب واني نزلت ع الشارع ، وصعدت بالكية مبتسمة والفرحة مبينه على عيوني

مشيت بهمة عاشگ راح يلتقي بمحبوبه الشوق بداخلي ما توصفه الكلمات
نسمات الهوى بيها برودة ، وصوت اغصان الاشجار ترد الروح لمحته والله لمحته بقميصه الابيض وبنطلونه الاسود القماش واكف يم باب القاعة رافع رجله ساندها ع حايط وصافن بالفراغ ضحكت وهميت بخطواتي اله حس علي وكبل التفت وعدل وگفته مبتسم واجة يمشي باتجاهي بهمة اكبر من همتي ولهفة اكبر من لهفتي وعيونه لمعت اكثر من لمعه عيوني مبتسم وهام الي ..

ليلى بلهفة :- صباح الخييييررررر
قيس :- صباح الخيرات خاتون ما شاءالله حماسچ رائع صح احنة شطار مثلچ بس مو بحماسج
ليلى :- الحماس واضح بوجهك لا تكابر

نصة مبتسم وعض شفته بأحراج ورفع رأسه بسرعة
:- ما تنغلبين ، نتمشى شوية؟
هزيت رأسي مشينا سوية بيناتنا مسافة صغيرة فاصلة اجسادنا بس اجزم ان الروح متعانقة بحنين ، ونظرات عيونه هي الذرعان الما نكدر نحضن بعض بيها
اول مرة بحياتي اعرف العيون تتحاضن وحضنها ادفئ حضن بالدنيا ..

كل واحد بينا سولف عن عطلته بشكل مختصر ويا التغييرات البسيطة الصارت بروتينا عرفت منه ان هم سوو صيانة للحسينية واستقبلو ضيوف جايين من دولة اخرى لمدة شهر كامل لهذا السبب ما گدر يتصل بيه ويحاجيني ختم كلامه وهو يبرد گلبي
:- وما اگدرت افاتح سيد رحمن والعلوية بموضوع الخطبة بسبب انشغالهم بالضيوف ، وموضوع الخطبة يحتاجله ذهن خالي ما مشغول بشي ثاني حتى يكدرون يفكرون زين قبل لا ينطوني الرفض او القبول ..

اختفت ابتسامتي بعد اخر كلمتين وگتله معبرة عن خوفي بنبرة حزن
:- اذا السيد والعلوية رفضو طلبك بالزواج مني معناها اني وياك ننتهي

بهت واختفت ابتسامته وگال متعجب :- ليش ننتهي؟ الاقناع موجود وكثرة الطلب تلينهم
وكثرة الدعاء وراها استجابة ولو متأخرة اني يومية بصلاتي ادعي ربي والح بالدعاء وحاشاه رب العالمين يرد انسان لجئ اله وتوكل عليه
هسة العلوية اذا شافتني الح واحب الموضوع بسرعة تلين وتنقهر علي وتحن عليَ
ورب العالمين احن على العبد من حنيه الام على اولادها مايردني ..

ابتسمت مطمئنة وهزيت رأسي بأرتياح ..

لمحت عمار البسمار يراقبني من بعيد قيس ما انتبهله
هذا الانسان اقل مايقال عنه لزكة لزكة ما ينشلع كلش كارهته وكارها تواجده حولي وصيت نسومة تحاجي اخو حتى يأدبه ويبعده عني بس ماكو نتيجة .. تنهدت بدون شعور ..
قيس :- سلامات ..
ليلى :- هيج حسبة ابالي سيد

سكت لحظات بعدها كال بحزن ...الله وحده يعلم بحالي كل ليلة واني اتكطع من الالم عليج وعليَ
لوثتچ بقربي ولوثت نفسي بالذنوب بس رغبتي بالقرب منج صارت اكبر من ايماني حتى وهذا الشي يرعبني ، يهلك الانسان اذا رغباته استقوت علي ونالت منه ويضعف ويصير اسير رغباته والذنوب

ابتسمت وگتله اطمأنه :- من نتزوج نتوب ..

قيس :- رباني السيد على مبدأ ان هاي الدقيقة الجاي اعيشها هسة ممكن تكون اخر دقيقة بعمري وبعدها اذا متت ماكو مجال للتوبة

وانتي تحسبين للبعيد نتوب ..

صفنت بتفكير :- هذا هو اعتبر هاي اخر مرة احجي بيها وياك وحجينا الباقي نحجي بعد ما تقنع اهلك وتجي تتقدملي وتعقد عليَ
قيس :- منعيني منچ هذا الاريده وصبري على بعدچ والشوگ للقاء بالحلال الذ واجمل جهاد ..

لوحتله بأيدي مودعا :- انتظر لحظة الحلال سيد لا تتأخر ترة الشوق يفوق تحملي ويمكن اطگ واموت ..

قيس :- ان شاءالله بأقرب وقت ممكن ، اسوي المستحيل حتى انالج

درت وجهي وانطيته مگفاي و رجعت تعمدت اغير مكاني حتى يرتاح اكثر و بنفس الوكت يحس بالشوق الي و لقربي ويستعجل بموضوع الزواج

انتهى اليوم و رجعت للبيت ، لكيت گدر شوية كبير محطوط على الميز فتحته بي لبلبي منگع كلش هواي سديته و طلعت لكيت حور كاعدة تمشط لريحانة وتظفر شعرها سلمت
سألتها عن الگدر البي لبلبي

گالت بفرح :- مو راح اشتغل غير شغلة بيها كرامة اركبه بليل واطلع الفجر اخذ صمون واطلع بي لمكان الضابط صهيب گال اروحله يكول هناك بي ناااس هواي لان يم الكراج و اضل ابيع لبلبي وصمونه

ليلى :- عاشت ايدچ نسميچ النوب حور ام اللبلبي
حور :- وشبيها ام اللبلبي ست ليلى
ليلى :- تخبل واحلى اخت وصديقة ، متغدين؟
حور :- لا منتظرتج ومنتظرة نسومة راحت ويا صويحبها للبستان ههههههههههههه

ليلى :- يا صاحب؟
حور :- استاذ جمال ابو عون گللها عنده هدية الها من بستانه وهي نسومة اصرت تروح ويا بنفسها هسة يكمصها
ليلى :- شنوووو؟
حور :- شبيج يعني يلزمها و يكرصها يكضبها اوضح اكثررر اوف منچ المايعة دصعدي صعدي بدلي وكملي نسومة كالت متتأخر على جية

ليلى :- تمام ، ريحانة اشتررريتي ملابس وقرطاسية
هزت رأسها بفرح
ريحانه :- اراويجياهن؟
ليلى :- حضررريهن من انزل اريد اشوفهن

صعدت غسلت بالحنفية و بدلت ملابسي و نزلت ، كعدت يم ريحانة اشوف شنو مشتريلها جانت فرحانة وعيونها تلمع بفرح و هي تشوفني الاغراض
فرحت من گلبي على فرحتها ..
طفلة زارها الفرح اخيرًا ، حسيتها عدها جنحان وجاي تحلق بالسما رجليها ما مستقرة على الارض

حور من المطبخ صاحت :- اجت نسووومة تعالن تغدن
ليلى :- يله نضم اغراضچ ونرررركض ناكل ونملئ البطن الصغييير علمود نكبررر
ريحانة :- نترس الكرش)
ليلى :- اييي نترسه

تسابقنا اني وياها للمطبخ لكيناهن يرتبن الاكل على الميز التمينه نسومة صاحت لحور
:- حور لبلبية غير هذا اللقب ما عندي

حور صاحت بدلع مستائة :- لاااااا الا اسميچ نسوومة ابرة وخيط
نسومة :- سميني اليعجبج المهم ما اغير اللقب الطلقته عليچ حور لبلبية

حور :- بسيطة نسومة اني اعلمچ
ليلى :- هسة حور رجعت الها انوثتها ودلعها بعد يومين تطلب عدها رجل منين نجيب الها واحنه ممحصلين لنفسنا

حور :- خافي على روحج داده اني الرجل بغمزة اجيبة للباب ضلي انتي انتظري ابن السادة يتحرك ماعرف شنو مجمدة بمكانه

ليلى :- حچيت وياا اليوم. ..
نسومة :- صلاوات وشنو كان عذره بالله؟
قصيت عليهن الصار جانن يسمعن بأهتمام و بالاخير حور ضربتني على كتفي
حور :- يمة هاي شلون سالفة مال تبتعدين حتى يشتاااق ويستعجل يمة وجهچ مايبين عندچ هيچ افكاررر

ليلى :- شنو متوقعة لعد؟ اني جبته بأفكاري وحفرت نفسي بذاكرته بطريقتي الخاصة وهسة راح يجي يتقدملي
كل ما ابتعد عنه راح يشتاق اكثر ويستعجل

نسيمة :- يمة البنات

حور :- خاف ينساچ من تبتعدين اني اشوف لزگيله لزگه وگابلي واهتمي وتدلعي وتمنعي علمود ما يبرد اتجاهچ

ليلى :- تؤؤؤ ، هوَ يحبني صدگ وماكو بحياته بنية غيري تسد الفراغ العفته بحياته راح يتخبل يتخبل ينجن يصير مثل الضايع والشوق راح ياكله اكل
وتشوفن هسة يگابل اهلة ويكعد روحو خطبوها الي

نسيمة :- ايي زين سويتي يوم

حور :- ناخذ منچ افكار ونتعلم لازم
ليلى :- مو اكول بعد كم يوم تطلب عدها على رجل وهسة جاي تتعلم ههههههههههه

نسيمة :- شنو وحد عن النسوان بعدها شابة عشرينية و شحلاتها فلقة من الگمر والله لو عندي اخووو اخذها اله

حور :- حبيبتي نسومة شكرًا عيونچ الحلوة

نسيمة :- لا صدگ حور اذا ربي سهل وكتب يتقدملچ شخص ابن اودام وعلي الاعتماد وافقي وتزوجي المرأة تحتاچ سند بالدنيا وانتِ اخوتچ عارات ماعليهم الاعتماد وما يفيدون ولا راح يجي يوم ويستعدلون و يحتوونچ الافضل تزوجين

حور :- اي بس ما اذب روحي ذب

نسيمة :- لا طبعا نسأل ونشوف واذا المتقدملچ خوش رجال نقبل ونتوكل على الله

ليلى :- اليسمعجن هسة هو الرجل اجة وخطب لا تخططن خاف التخطيط يخرب كل شيء
نسيمة :- لا منخطط شنو اختارينه بدلة لو حضرنه صينية البخت؟ هههههه ومنيلچ حظ و بخت حور

حور :- اي والله لو عندي بخت جان صار عندي اهل بيهم حظ رجل بي خير وشاربة خير امداني

ليلى :- منين نجيبلجن رجولة صبرن من اخذ ابن السادة اشوفلجن واحد منا منا من الاقارب

نسيمة :- يممممة عوووذة عووذة اذا جهالهم اكلونه بگشورنه الملايكة الكبار شنو تسوي دخلينا ندور هنا اشرف النه

ضحكت عليهن وسكتت ثاني يوم راحت حور لشغلها الجديد وريحانة للمدرسة صارت مسؤولية نسومة واني طلعت لجامعتي شفت قيس من بعيد و شافني نصة رأسه ما باوعلي وگعد بمكانه واني انسحبت لمكاني الجديد بعيد عنه ..

اريده يتعذب بسبب الشوق لحد ما ينفذ صبره ويفتح ويا اهله موضوعي ويتقدم لخطبتي

بأخر محاضرة لميت اغراضي ببطئ وهو گاعد منصي وممبين بس ظهره وايده التتحرك على الاستيج بأنسيابية اخذت نفس ورفعت جنطتي خليتها بأيدي وطلعت امشي بدون ما اباوعله موجهة نظري للباب مريت من گباله تنهد باوعتله بطرف عيني منصي ما يباوعلي وگفت ورجعت خطوات وگفت مقابيله وسألت بهمس

ليلى :- شخبارك سيد قيس؟

رفع رأسه وبنظره خاطفه باوعلي ونصة رد وهو يعدل گعدته متوتر وكأنها اول نظرة بيناتنا
قيس :- الحمدلله ليلى اسأل عنچ؟ شخبارچ انتِ
حجة اخر كلمتين ورفع رأسه ثبتت عيوني بعيونه وحجيت بهدوء
:- بخير .. ابتسمت وسحبت عيوني من علي ومتأكدة سحبت روحه وقلبه وتفكيره وطلعت من القاعة ..

رجعت للبيت لگيت حور ونسومة بالمطبخ گاعدات وحور تحجي منطلقة وتضحك
ذبيت جنطتي وگعدت كبالهن تعبانه حجيت واني ارفع طرف حاجبي :- الله يديم الافراح فرحوني وياكم

حور التفتت وحجت بفرح :- خليني احجيلج الصار وياي الله عليچ سمعي ولا تضحكين علي مثل نسومة

نسيمة :- اوي عيني هسة اني ضحكت داده؟ بس گتلچ لتستسبقين الامور النوب من اول يوم رجعت النه تحب

حور :- ما احب هو بس موقف شبيييج نسووومة ما احجي شي بطلت هاي سكتت
حطت ايدها ع حلگها بمعنى ما احجي

ليلى :- ما الچ شغل احچي احچي اني اسمعچ يله نسومة كبيرة ماتعرف اني وياج نفس الجيل يله دأحجي

نسيمة :- يمة منچن امهات المياعه اروح اسبح واحف واتعدل احسنلي المن ضاله يمجن وجهي يفيدني انتن بشنو تفيدني ؟

ضحكنا اني وحور راحت نسومة ضلينا اني وحور ابتسمت بخجل وبدت تقص عليه الصار وياها بأول يوم الها بعملها الجديد ..

حور :- چنت تاابييع ليلى واجة واحد الاكتاف هلعرض والوجه يخبل هندامة شحلاته عسكري شاربة غصن زيتون لج عيني لج داده لج حبيبه اني شفته وراحت روحي ضعت. وگف گبالي صفنت بي رحت لغير عالم ضعت بي ضعت بعيونه وهو ضل حاط عينه بعيني ويباوع لوجهي مبتسم
گالي .. اخيتي ما الج نية تبيعيلي ؟

خجلني كلامه نصيت رأسي تداركت نفسي وحطيت الاكل گتله اداري خجلي
:- اعذرني سهيت شبهتك بعزيز على گلبي

ابتسم وهز رأسه اخذ من ايدي وانطاني فلوسي رفعت طرف عيني باوعتله مدنگ رفع عينه باوعلي لمحني لمحة وراح گعد ع صفحة ياكل كمل ورجعلي جاب الماعون

گال بأمتنان :- عاشت ايدچ نقذتيني من جوع كافر يأكل بأمعائي نفسج شگد طيبة اول مرة بحياتي اكل لبلبي هيچ طيب

ابتسمت بفرح ابتهجت اساريري وكأنه توجني ملكة مو مدح لبلبياتي گتله اتشكر منه
:- رحم الله والديك على هذا الكلام الطيب عسا مداخل العافية .. هني ومري

هز رأسه متشكر مني ودار وجها هو دار الوجه لو عبالك جبل واگف گبالي غطة عين الشمس يا ليلى غطاهاا

راح يمشي بخطوات ثابتة حتى يلحگ الباص و عيني ما طاحت من علي اشتغل واباوعله بطرف عيني استرق النظر يعني ..

رديت بحماس يضاهي لهفة البدايات :- تتوقعين انعجب بيچ؟

حور بلهفة :- ليش حتى ما ينعجب بيه شبيه شحلاتني بيضة ووجهي حلو وصغيرونة هو جبير يطلع هيج نهاية الثلاثينات بداية الاربعين

ليلى :- مزوج لعد .. عبالي من عمرچ نگول متأخر زواجة

حور :- ما ادري يجوز ميتة مرته

ليلى :- صح .. يمكن منفصل هم ..... اندگ الباب ركضت نسومة وهي تصيح تمنعنه لحد تفتحه وركضت هي عدلت روحها سدت علينه باب المطبخ وراحت فتحته

باوعت للباب غمضت عيني بحزن وزميت شفايفي بأسى تملكني الحزن واجة ببالي قيس ابن السادة لو يعرف بحقيقة بيتنا شنو راح يكون موقفه

يا ترى راح يصدگ اني نظيفة وما غرگانة بمستنقع الرذيله؟
لو راح تتحقق المقولة الشهيرة "الشر يعم" و يعم عليَ و يعمي عيون قيس عني

فززني صوت حور وهي تردف بقهر :- شگد عندها زينيات نسومة بس مخربة روحها بسوالف مالها داعي ولو بهذا الوقت الدنيا تريد هيچ بس طريق الخطأ ما ينراد ... لأي سبب كان

ليلى :- اذا قيس عرف .....

حور :- ما يضل وياچ يا حبيبه الزلم هذول يردون واحد من ثوبهم
اخ يا يمة كتلني الجوع خلينا ناكل هسة والله كريم الف حلال يحلها

ليلى :- والنعم بالله ..

ثاني يوم داومت بنص الدوام اجت بنية من زميلاتي اشوفها دائما اجتماعية وگلبها طيب هذا الشي مبين عليها رغم قلة حديثنا

گعدت يمي وبدأت تسولف تبادلنا اطراف الحديث وشوية شوية وصلنا لموضوع حزب نصت صوتها وبدأت تحچي بصوت خافت
دلال :- هو احنه شنو شايفين من حكومتنا والله البي خير وغيرة على بلده ينظم للحزب ونسقط النظام

ليلى :- لا تحچين هيچ دلال الحياطين الها أذان

دلال :- يمعووودة منو هنا يهتم دتشوفين ذولاك الشباب علي ابن تاجر كبير وطالب ابن دكتور جراح والهم مكانتهم
منظمين للحزب الناس كلها تريد تغير النظام الدنعيشه لا يطاق شوفي الناس دتموت من الجوع

اجن حور وريحانة ببالي هزيت رأسي بحزن وگتلها
:- صح والله الناس جاي تموت الله يساعد الفقير

دلال :- خ*** ب*** احنة لازم نثور نسوي ثورة تقلب الموازيين ويصير زمام الامور بأيد حاكم شريف

حطيت اصبعي ع حلگي خايفة وحچيت انهيها
:- لج دلال لا يسمعچ احد ويطير رأسج

هزت ايدها ولوت حلگها ما عاجبها :- يكون افضل وارحم من الدانشوفه عموما دوختچ وحچيت حچي زايد
قربت رأسها مني وگالت
اني لو ما شايفتچ اهل للثقة ما احچي گدامچ مو تعلسيني هههههه

هزيت راسي ب لا وضحكت .. راحت البنية ومر اسبوع وهم رجعت كعدت يمي وبدأت تحجي وتتذمر من واقع الدولة البائس وگالت
انتي طلعتي صدك اهل للثقة والدليل اني لليوم حية ارزق ليلى انتي بنية سباعية لازم يكون الج موقف وتدخلين ويانه بهاي الثورة الفكرية وتنظمين للحزب

سويت حركة الذبح ع رقبتي وگتلها :- علمود خالتي تطير رأسي ما الي بهيج امور

دلال :- وليش خالتچ منين راح تعرف؟ كلنا اهلنا ضد هاي الثورة وضد هذا الحزب لهذا السبب محد يعرف منهم كلشي سري

ليلى :- لا فدوة اني اخاف ما اريد ادخل روحي بهاي المعمعة

دلال :- لچ ليلى يعجبج الديصير؟ زين تعاي باجر انتظريني برة بالكراج نطلع سوية اخذج لبعض الاماكن شوفي الناس شلون دتموووت كاتلهم الجوع لازم يتغييير هذا الواقع وما راح يتغير اذا ما نبدي نتحرك ونغير النظام كله الله مايغير حال البلد اذا مابدينا ، اسعى يا عبدي واعينك ... خل نسعى بالاول ويجي العون من الله

ليلى :- اعرف شايفه بس شبيدي عليهم

دلال :- بيدي وبيدچ هواي ... بس فكري بالموضوع

هزيت رأسي وگلتلها بحزن  ... صح احتاج افكر واني وياكم مو ضدكم جاي اشوف الظلم والاستبداد واشوف طغيان الناس الي حاطين ايديهم بأيدين الدولة واتمنى اغير هذا الواقع

دلال :- تحركي لعد .. صوت على صوت ينتج اعصار يزلزل طغيان الظالم ويهز كيانه وينهي وجوده ويقلع جذوره

ليلى :- تحچيلي بالبداية على كل اهداف الحزب وتنظيمهم .. واول فقرة تحجييلي ليش اختاريتيني

دلال :- اختاريتج لان واضح عليج بنية لا الها ايد بدولة ولا شي ... واختبرتج الاسبوع السابق طلعتي اهل للثقة عرفت اذا طرحت عليج الموضوع حتى اذا رفضتي ماراح ننضر

هزيت رأسي گومتني واخذتني لمكان فارغ گعدت تحجيلي عن اهداف الحزب ولشنو يسعى
لگيت كلشي بالحزب يتطابق ويا الاريده تغيير النظام تغيير واقع الامه المحزن .. قلع جذور الظلم .. وزرع بذور الامان والحب والسلام

وبعدها عرفت تاريخ تنظيم الحزب تاريخ قديم مو اليوم او امس انما سنين طويلة كفيلة بأن تبني حزب قوي رصين جذوره قوية صامدة امام اكبر اعصار سياسي

شافت بعيوني الخوف حجت تطمني :- انتِ الج حق الرفض اني بس دااعرض عليچ لكن امانه يا ليلى في حال قبلتي او رفضتي ماتتكلمين بهذا الموضوع گدام اي بشر وان كان ثقة هسة رقابنة صارت بين ايدينچ بكلمة منج كدام الشخص الغلط تطير ... تباح دمائنا

ليلى :- لا ابد اني وياكم احنة نتشارك بنفس الافكار والاحلام
دلال :- وكل هاي الافكار والاحلام ما تتحقق اذا ما سعينا الها

ليلى :- احتاج وقت .. لازم افكر واعرف اكثر
هزت رأسها بالموافقة ..
وبعدها طلعت من جوة قميصها كتاب صغير باوعت بالارجاء ماكو بشر گلتلي خلي جوة قميصج ثبتي بالتنورة
ضميته مثل ماكالت هي ضامته طلبت مني اقراه على كيفي وشرط محد يشوفه
دلال :- اذا شافة عندج الشخص الغلط تلگين روحج واگفة بمحكمة الثورة والقاضي ينطي قرار اعدامچ

ليلى :- لا محد يتدخل بخصوصياتي لتخافين

دلال :- من تكملينا رجعي الي بنفس الطريقة وانطيج غيره اذا حبيتي
راح اكتبلج رقمي بس افضل مانحجي اي شي بالهاتف فقط للضرورة
ولا تگولين كملت الكتاب اريد غيره گولي كملت الرواية اريد غير رواية اقراها

هزيت راسي بالموافقة و افترقنا اني وياها رجعت للبيت بس گلبي يضرب بجدار صدري بخوف احس بأي لحظة يوكع الكتاب وكل ما اغمض عيني اشوف حبل المشنقة ملفوف حول رقبتي
كل هذا الخوف ما منعني ولا ردعني لان اني وحدة من الناس الي تتمنى التغيير بس ابد ما احجي گدام بشر

خصوصا الي اشوفة عدنا بداخل هذا البيت من فساد .. رجال الدولة هم وحوشها ..

خبيت الكتاب تحت مندر السرير ورجعت الفرشة والمخدة حتى ميبين اي شي
بدلت ملابسي غسلت وجهي ورجعت طبيعية نزلت تغديت وصعدت سديت الباب على نفسي وطلعت الكتاب

بديت اقرأ بي صفحة ورا صفحة نال اعجابي وما حسيت غير الساعات تمر واني اقرأ
كتاب سياسي لكن مكتوب بطريقة سهلة وسلسة الكاتب نازل بي لمستوى يخلي القارئ شكد ماكان عقلة صغير ومعلوماته السياسية قليلة او شبه معدومة راح يفهم

رجعت ضميته بمكانه وغفيت نص ساعة كعدت صليت المغرب ورجعت اقرا لحد ما صعدت ريحانة تدك الباب

ريحانة :- ليلوووو عشاااء

ليلى :- جاية يعيون ليلوووو .. ذبيت القلم لفيت شعري ونزلت
تعشيت وماكو ببالي غير الكلام الموجود داخل الكتاب وكلام دلال ..

حور :- الوجه اصفر وأبن السادة ما اجة وخطب الظاهر الامور ماتبشر بخير

نسيمة :- ليجي صهيب موجود

غمضت عيني بقلة صبر وسحبت ايديني من ع الميز وحجيت بحدة
:- لا تجيبون طاري صهيب يمي ما اريده .. ولا اريد اسمع أسمه
ممكن اذا ماتصير زحمة عليكم ما تعيدون الموضوع

نسيمة :- لا عيني رحمة لا داده رحمة .. غير نعرف شبيج وجهج مخطوف غادية ليمونة

ليلى :- الدراسة متعبتني واحس روحي مريضة

ريحانة :- اعصرلج ليمون ليلووو؟

ليلى :- لا يعمري ما اريد ليمون رايحة انام وارتاح

حور :- ياااا مو العصر كله نايمة وباجر عطله هماتين عود گلنا نسهر والبيت فارغ الليلة

ليلى :- هاا اذا هيج سهلة رايحة اسبح وانزل اسوي قهوة حتى امخمخ واكدر اسهر وياجن

نسيمة :- والله يالليلى وراج شي كبير بس شنگول الايام توضح كل شي مضموم ماكو سر ما تطلع علي الشمس وتكشفة

ليلى :- سر

نسيمة :- اي يخص ابن السادة غيره الله يعلم ..

ليلى :- لا ابد وين اكو ..

عفتهن وصعدت سبحت حسيت روحي صحصحت نزلت سهرت وياهن لوقت متأخر بعدها صعدت نمت راسن ثاني يوم كعدت غسلت كلهم نايمين سديت الباب وطلعت الكتاب اكمل قراية
ما حسيت غير بالعطلة كملت الكتاب وعدت بعض الصفحات والمواضيع لقلة فهمي الها

خابرت دلال وبعد السلام گلتلها بصوت خافت كملت الرواية اريد رواية ثانية
انهالت علية بالمديح وبدات تحفزني حتى اكمل بهذا الطريق

التقينه ثاني يوم وتبادلنا الكتب ، وكعدنة ع صفحة نسولف وهي تشرحلي هواي امور

مرت الايام واني لهسه اتعلم من دلال والكتب التجيبهن الي وبفترة الامتحانات گالت اجة الوقت حتى تتعرفين على الكل بعد الامتحانات نلتقي بمكتبة الفرس .. هناك نعقد اجتماعاتنا ويانة شخصيات كبيرة من شخصيات هذا الحزب

الايام خلتني اثق بدلال وانطيتها موافقتي ..

وبكل هاي الفترة اني وقيس مابيناتنا غير السلام اباوعله مبين متعذب ومتأذي واجزم ان اهله رفضوني اني هم ماسألته ولا ضغطت علي هو براحته خلي يقنعهم لا بد يجي يوم ويقتنعون ..

بدأت امتحاناتنا وبأخر يوم اجت دلال تحجي وياي ..

دلال :- مثل ما متفقين باچر نلتقي بمكتبة الفرس الساعة 9 الصبح

ليلى :- اي على الاتفاق اصلا گلت لخالتي باجر عندي امتحان حتى اطلع براحتي

دلال :- فدوة لقلبج شگد ذكية وسباعية ان شاءالله باجر اعرفج على كل اعضاء مجموعتنا وعلى كبارنا وتصيرين جزء من عدنا وها معزومة يمي بالبيت بلغي خالتج كليلها تتأخرين

ابتسمت بفرح وهزيت راسي :- الحمدلله كتبلي اكون منكم

دلال :- الحمدلله ..

طلعت امشي للسيارة تلاگيت ويا قيس قاطب حواجبة بغضب خازرني اجة عليه حجة وهو صاك على سنونة
قيس :- شنو هاي خاتون صايرة تمشين ويا بنية عليها علامة x
ليلى خاتون لا تذبين روحچ بنار جهنم

حجيت بهدوء :- علامة اكس شنو نار جهنم شنو شبيك قيس سامع شي
قيس :- دلال يكولون عنها مرات تابعة لاحزاب معارضة للنظام ومشيچ ومرافقتج الها ممكن توكعج بنار

شهگت متصنعة الصدمة وگتله واني افك عيوني على وسعهن
:- معقوووولة؟!! دلال لالا متوهم كل كلامنا عن اللبس والموضة او الدراسة ما سمعت منها شي

قيس بصوت خافت :- شوووفي ليلى اني اعرف كلش زين دلال نيتها تجرج اني مو ضد حتى اكون بالصورة خاف يوم تلگيني وياهم ... بس

قاطعته وحجيت بنبرة متلاعبة :- سيد رحمن يقبل تدخل بأحزاب وسياسة

قيس :- لا .. في حال اني من نفسي وبدون علم احد دخلت هذا قصدي
لا تقطعين كلامي ليلى انتي بنية يعجبج تتجرجرين بالسجون؟ لو تصعدين منصة الاعدام؟
سألي خالتچ وغيرها گليلها المعارضين وجماعة حزب الدعوة شصار بيهم و وين صفة بيهم الدهر

ليلى :- اي سامعة ترة اني مو غبية ما أذب روحي بالنار سيد .. ابتسمت وبدلت نظرتي للحب والهيام واللهفة
:- ما اشتاقيتلي سيد؟

رخت ملامحة نزل صدره بتنهيدة وگال بلهفة :- يروحلچ فدوة السيد .. شلون ما اشتاقلج واني على سجادة صلاتي واهلوس بأسمچ

گتله بخيبة امل :- طولتها عليه سيد كلش اني منتظرة اهلك كل ميندگ باب بيتنا بعصرية اركض لغرفتي بلهفة ابدل وانزل عبالي اهلك جايين خطابة عليه

نصة بحزن يتنهد :- السيد رفض لأنه رايدلي وحدة من بنات عماتي لكن اني داقنعه وراح اوسط احد اعمامي يتكلم ويا انتظر رجعته من كربلاء صارله شهر هناك ..

وخلي نرجع لموضوعنا اني لو اعرف السالفة امان ما جان منعتج

ليلى :- قيس اني محد يتحكم بيه اذا ردت اسوي هذا الشي محد يمنعني تمام وگتلك مو وياهم لا تلح عليه

تقرب مني قبض ايده بغضب وعيونه كادت تطلع من حجرها ونتر
:- مو بكيفچ تلعبين اي حزب وانتماء سياسي ممنوع تكونين بي

ليلى :- گتلك مموجودة وياهم ولا اعرف شي اصلا ليش تشكك بيه من شوكت اني مكذبة عليك؟! كافي تلح كااافي عاد

قيس :- هاي هيه سهلة ما الح وراح اخذ حجايتچ هاي رأس مال بس وحگ ذاك ابن البدوية اذا سمعت بيچ داخلة وياهم اعتبري كلشي بيناتنا انتهى

نترت بأستنكار :- ليش احنة شنو بيناتنا؟ كم مكالمة نحچي بيها عن روتين الاسبوع الممل لو كم رسالة مكتوبة بحبر اسود على ورق تنمحي بقطرات ماي وتتبعثر كلماتها؟!! وتنتهي مشاعرها

شنو بيناتنا هاا؟!! ماكو شي بيناتنا لحد متجي جايب اهلك وتخطب بشكل رسمي
لا تصنع من الماكو شي اكوو .. الحب الي بالگلب عمره ماجان شي الناس ما يسألونك عن المرأة الموجودة بگلبك .. الناس يسألونك عن المرأة المرتبط اسمها بأسمك ورحمها شال اطفال منك

لا تصنع من الماكووو شي اكوو ...

بهت وجهه وگال بخيبة وحزن :- بس اني داأسعى
ليلى :- واني جاي انتظر وراح اضل انتظر اليوم وباجر وسنة ويمكن اكثر بس ما اقبل تگول بيناتنا شي
لان الشي التقصده ما موجود اطلاقًا

عفته وراي ومشيت بغضب احس الدنيا وگعت فوگ راسي ، بيني وبينه بحار وصحاري لازم يقطها يلا يوصل الي .. واني احبه اذا ما تجرأ وقطعها هو راح اقطعها اني لا يمكن ان اقبل كل هاي المشاعر تكون مجرد ذكريات حزينة اذكرها واندب حظي

لو اضطريت اكعد بباب اهله انتظره .. راح اگعد

رجعت للبيت دايخة وطالعة الدنيا من عيني سبحت فورا وغمضت ساعات بدون ما اغفى ما اعرف ليش النوم هجر عيوني
نزلت العصر اكلت كعدت حور تفرك بعيونها نعسانة وتقربت للمطبخ

حور :- شو هسة دتاكلين شنو متغديتي من اجيتي

رديت بدون نفس :- لا متغديت

باوعتلي بأستغراب وگالت :- صارلچ فترة متغيرة وابد مو على بعضچ احجيلي سريني ابن السادة وياچ؟ لو غيره

تنهدت فركت وجهي حيل وگتلها بحزن
:- اهله رفضوني ومنتظر عمة يرجع من كربلاء حتى يوسطه يحجي ويا والده سيد رحمن والله وحده هو العالم راح يوافق او لا

وازيدچ من الشعر بيت السيد رايدله بنت عمته العلوية بنت الاصل والفصل والحسب والنسب شنو ليلى اليتيمة المالها احد واعمامها متبرين من ابوها
منو ليلى؟ منو اني خلگ بنية عايشة ببيت ريحته طالعة والناس تعلج بسمعته بدون ملل او كلل

اني وقيس بيناتنا هوواي وما اعتقد ابن السادة راح يگدر يتخطى كلشي بيناتنا ويوصل الي

حور :- غدي شنو هذا الضعف

ليلى :- مو ضعف حور لو ضعيف ماحبني ولا فاتح اهله بموضوعي بس العنده ظهر مايعوفه علمود الماعنده ظهر
الظهرة قوي مايعوفه علمود الضعيف الينهز بنسمة هوى

اني وانتي لو عدنا اهل سند واساسهم قوي مثل اهل السيد ما نضحي بيهم لأي سبب كان
حور قيس مو مثلي ومثلچ ماعدنا احد قيس عنده ...

غورگت عيوني واختنگت بعبرتي احس بضعف

حور گالت بغصة :- عدنا نسومة اكبر ظهر واليتقرب النة بنية سيئة تشگة شگ

ليلى :- ههه .. نسومة قوية بزلمها الك** التحكمهم شهواتهم اذا ما حصلو الفرصة لتفريغ شهواتهم صارو وحوش ويستلمونه اني وياج وبنتج وحدة ورا الخ

حور :- الله لا يگولها ليلى لا تفاولين علينا بالشر خليهم ساندين نسيمة ونسيمة ساندتنا احنة ماعدنا احد بهاي الدنيا من بعد رحمة الله تجي نسومة وربعها

هزيت رأسي متألمة من اعماق گلبي ..

حطيت لفافات الشعري حتى يصير حلو مموج وخليت خلطة طبيعي لبشرتي وقريت شوية بكتاب جابته دلال الي وراها نمت وكعدت صليت وصبغت اظافري بلون برونزي
لبست تنورة للركبة سودة وقميص برونزي بي لمعة رتبت شعري وضاع نص وقتي واني ارتب البرجم

لبست تراچي على شكل لؤلؤة وعقد لؤلؤ ، رتبت وجهي ببعض مساحيق التجميل ، زينت عيوني بكحل اسود من ايامي .. ورسمت شفاهي بحمرة برونزي خفيفة
رشيت عطر وكأني رايحة لموعد غرامي
اعتمدت جوارب طويله سودة خفيفه وكعب اسود
خليت چاكيت اسود على اكتافي يدفيني لأن الجو بارد جدا ..

اخذت حقيبتي ونزلت استقبلني بعيون تحمل الف سؤال رديت على كل تساؤولاتهن قبل لينطقن
:- رايحة للامتحان وراها اتغدة برا لا تنتظروني ع غدة البنات راح يتجمعن ونطلع سوية مو يضل بالج خالتي

نسيمة :- اي مو اگول الشكل مو شكل وحدة رايحة تمتحن وترجع عندج مصرف امي لو اوگفي لتطلعين انتظري
مدت ايدها طلعت محفظتها من صدرها وطلعت منها فلوس اخذتهن منها لان ما كنت شايلة هواي

ودعتهن وطلعت اخذت سيارة انطيت السايق العنوان وبعد طريق طويل وصلني للمكتبة عيوني استقرت على واجهتها ديكور الجدار طابوگ احمر واسم المكتبة مكتوب بخط كوفي اسود وسط لوحة قرمزية "مكتبة الفرس"

نزلت بخطوات مرتجفة جريت نفس عميق وباوعت على المكتبة بتمعن حسيت بحرورة طبگت الجاكيت وخليته على ايدي رتبت اطراف شعري وفتت للمكتبة كانت من الداخل كبيرة  رفوف خشبية للسقف ، تحمل اعداد هائلة من الكتب

مشيت بخطوات ثابتة لأحد الرفوف وبطرف عيني رمقت صاحب المكتبة الواگف ورا الكاشير
وبيده قلم ويكتب داخل دفتر يرفع نظره الي ويرجع ينصي يكتب
كان شاب طويل ونحيف لابس قميص رصاصي ومرتب كلش

بعد ما قريت بعض العناوين توجهت اله استقبلني بأبتسامة وگال بتساؤول :- بشنو اگدر اخدمچ أنسة؟ ببالچ عناوين معينة او تحبين اساعدچ

بعدت خصلات شعري ليورا ولعقت شفايفي اخفف عن توتري
ليلى :- كنت مواعدة صديقتي هنا حتى نشتري كتب سوية اسمها دلال ..
تعمدت اذكر اسمها حتى يعرف اني من طرفهم

ابتسم وعاف القلم من ايده وگال :- وصلتي ..

راح للستارة رفعها وظهر وراها باب خشبي فتح الباب واشر برأسه حتى اتقرب بين خوفي وبين اصراري احتاريت .. بس گلت دلال مستحيل توگعني بمشكلة واكيد راح الگى الامان ورا هذا الباب وتوجهت اله بدون تردد  ................للحكاية بقية 🖤

رأيكم بالقصة يهمني 🖤

ملاحظة بنات ارجع اكرر التنزيل بين يوم ويوم بس اني هسة مكثفة النشر لحد منوصل بارت 20 ارجع انشر بين يوم ويوم

شاركو القصة مع اصدقائكم لطفًا