رواية حمائم تخشى الطيران الفصل الخامس عشر 15 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

🚫تفاعلكم تعليقات بين الفقرات وتصويت لطفًا حتى نستمر بالنشر نريد واهس قوي 😁

الشيهانة ..

امشي وذهني شارد اجر ذيال الخيبة والحزن
روحي ممرودة وگلبي ينزف خناجر كلماته خنااجر انغرزت بنص صدري
خلاني اصحى على روحي وافكر زين عرفت اللازم يصير

لازم ارجع اتجرع المر واشرب من كاس الذل لخاطر ابني

امداني لان عفتك امداني الف مرة لو حاجية ويا مشاري وعاقدة ويا اتفاق اخ اخ .. عضيت صبعي بقهر

وكفت محتارة وين اصعد وين اروح وشلون اوصل للبصرة حسيت صوت سيارة مسرعة من وراي عرضت گدامي شهگت مصدومة وفكيت عيني من شفته ..

اجة وراي اجة يدمر كل شي نزل من السيارة يمشي بغضب عاقد حواجبه مخنزر وعيونه تنفض غضب

تراجعت خطوات ليورا وگف گبالي رفع اصبعه وحجة بنبرة تهديد مليانه غضب ..

جبران :- وحگ ذاك اسد بغداد اذا ما شلتي جنطتج وركبتي وياي علمود نرد للبيت افصم ظهرچ والعن سلفة سلفاچ

خفت انتفض گلبي لكن تنصعت القوة وحجيت بغضب
:- ما ارجع رايحة لابني شتريد تسوي سوي اعلى ما بخيلك اركبه ما تخوفني ولا تهز شعره مني

جبران :- بيمن ساندة ظهرج سهير شو تزامطين؟!

شيهانة :- بروحي

نتر ..
جبران :- ص ع د ي بسرعة يلا

غمضت عيني بقلة صبر العناد ويا ما يفيد اخذت جنطتي وضليت امشي بهمة ركض وراي جرني من ايدي خلانه فرجة للناس

ضغط زندي حيل ويحجي من بين اسنانه بغضب مكتوم
جبران :- وحك اسد بغداد احطج جوة التاير وادوسچ تايهة ما وراج زلم تضبج تطبين وتطلعين وتشردين بكيفج

صعدني بالسيارة ضليت ساكته شمر جنطتي ورا ودار صعد بمكانه كتمت غضبي ودموعي لان جان عصبي ما يتحاچة خفت احجي شي واخلي ينفجر ..

صعد شخط السيارة وطلع وانفجر ضل يسب ويغلط ويلعن
ما خله واحد من اهلي لأهله سمطهم سمط
ماتحملت يسب اهلي انفجرت ضلت دموعي تنزل واشهگ

عاط بغضب :- لا تبچين اموتچ اذا تبچين مسحي دموعچ مسحييييهن

انهضمت اكثر وزدت بجي ضل يصيح عليَ
:- لا تبچين اني جلب ابن سطعش جلب وحمار وما عليه شارب خير بس لا تبجيين مسحييهن مسحي عيووونچ

رديت بخنگة :- حرام عليك جنت رايده اروح لأبني ليش تسوي بيَ هيچ؟

جبران :- مشاري يذبحچ ويلعن سلفة سلفاج شنو ماعندج عقل لو طاح منج البارحة؟

:- اسكت عاد اسكت تعبتني انتَ

صاح بغضب حطيت ايديني على اذاني من عياطه
:- اني تعبتچ لو انتيييي فهميني غير انتي شعلتي صفحة لخلفني وطيحتي ابو حظي وحرگتي اسلافي بنار ونفط

تجيلي بليل ترديني وتكضكضين بيَ وتحضنين وترجعين الصبح تجيلي حاصرة روحج بتنورة حتى ملابسچ الخاصة مبينه وامكيجة وتفترين بالمستشفى خليتيهم يفتحون حلوگهم عليچ

عطت بغضب :- مو بيدي الصار بالليل اكو شي يجبرني اسوي هيج افقد عقلي اصير مو طبيعية ما اعرف شنو اتصرررف جبران ما اعرررف حرام عليك لا تتهمني ولا تظن بيه ظن سيء

جبران :- واني اشتم گفة ايدي ما تحجييين ما تحجين بنت ال.... ليش تخليني اغلط؟

:- دروووح

جبران :- لج هاااي ويامن دروح ويامن
لزمني من زندي حيل يعت بيه ويصيح

سحبت ايدي حيل ودفعت ايده :- وياااك ماعندك اخلاق تصرفاتك مو حلوة

جبران :- رشيلهن شكر

:- لا تضووجني جبررران

:- ميت عليج واضوجج كامت تتفنتك

هزيت ايدي ما عاجبني :- بشيه بشيه

دمغني حيل ضل يحجي بدون توقف
:- والله نسوان طالعات بالليالي يردن يرحن من محافظة المحافظة وحدهن گويات عين حسبالهن كل شي بهاي الدنيا يمشي على مزاجهن ومشتهاتهن

:- ليش تگول نسوان كول سهير وفضها

باوعلي بطرف عينه ورجع يكمل الطريق لمن وصلنا نتر نزلي والجنطة عوفيها اذا احد من البيت شافنه نگللهم طلعنا للعيادة ضغطج نازل لان اليوم مماكلة

هزيت راسي اي ..

فتح الباب جاي ينزل رجع سده وباوعلي بحيرة لم شفايفه لداخل ثغره وغمض عينه لحظات وفتح
كال بتنهيده :- انتِ مريضة سهير؟ شعندج بالمستشفى من الصبح

خليت ايدي على زندي امسحه اخفف توتري وخجلي
رديت بهمس :- ردت اعرف شنو سبب اليصير بيَ بالليل ليش افقد وعيي وسيطرتي على نفسي واضل اسوي تصرفات من يصبح الصبح ما اتذكرها

جر نفس ضرب الستيرن :- ما عليه شارب خير يوم الرديتج وما شفت علتج شنو

رديت بحزن :- فوگ كل الامر بي زدت همي وضيمي وسميت روحي

تحمحم عدل گعدته وگال بأهتمام :- اسف واعتذر وحقج تاخذي مني مربع ، اني افصلچ
والعصر حضري روحج اخذج للدكتور

باوعلي بطرف عينه وعلت نبرة صوته بغضب :- تلبسين لبس مال اوادم لا وحگ اسد بغداد احطچ حدر التاير واسحگچ

:- واذا لبست مثل لبس الصبح؟

جاوب بكل اريحيه :- اشگهن عليچ

رديت ببرود :- شگهن

نزلت البيت فارغ كل واحد بغرفته مشيت للغرفه قفلت الباب ثواني واندك فتحته جبران جايب جنطتي حطها بالكاع وراح بدون ما يباوعلي حتى ..

انتقمت وصلت عندي لطرف خشمي ردت انجلط الا شوية ضليت املخ بروحي بس علمود يخف الضغط
قفلت الباب وضميت المفتاح حتى اتجنب الصار البارحة

نمت بهدومي بدون ما ابدل والف حسبة ابالي كعدت وقت متأخر بدلت ملابسي وطلعت توضيت ورجعت صليت صلاتي قضاء لميت السجادة وطلعت ادور ع عمتي سألت نزهة عليها كالت بالحديقة

طلعت امشيلها جانت ترش النباتات وتدندن بأغنية لـ عبد الحليم حافظ
عماد اخذ منها حب عبد الحليم مصدع راسي كد ما يغني اهواك ..

شافتني وضحكت :- صلاوات على سيدنا محمد طلع هلال العيد

:- هلا عمة صباح الخير

:- هلا بهل صباح صباحج ورد عمة شلونچ؟ امس ولا شفناچ ختلتي بالغرفة وضليتي

تنهدت وكعدت ع المرجوحة رديت بحزن :- قهرني جبران حيل قهرني وذكرني بالماضي حسيت الدنيا ضلمت بعيني

علياء :- ياااا واني على بالي ضوجج علمود اللبس ورزلته كتله يوم عوفها للبنية تعيش حياتها شنو وين عايشين بالعصر الحجري كالي انتي ما تفهميني كلت هذا غيران عليها

غمضت عيني بتعب وفتحت رديت بحسرة :- عمة يا غيره؟ اني وجبران بعد ما بيناتنا غير الكره والجدل عمومًا ما اريد اذكر كل شي صار احس روحي مخنوگة ما نروح للامام الكاظم نزور

علياء :- ما طلبتي شي هسة تطبين تبدلين وتاكليلچ لگمة ونروح اني وياچ نزور ونكعد بحضرة الامام نصلي وننسى هموم الدنيا

رديت بأمتنان :- رحمة على روح والديچ عمة والله احس صدري ثگيل اريد الهم هذا يزول بركعتين اصليها بضريح ابو الجوادين

علياء :- شرايج نخابر على خواتي ونعزم نفسنا يمهن نكمل زيارة ونمر عليهن نتغده ونتونس ونخلي الولد العصر ياخذونه لدجلة

تحمست صفكت وكتلها بلهفة :- موافقة رايحة اسبح واجهز نفسي كلش زين

رفعت ملابسها وسدت الماي وكالت بلهفة :- رايحة اخابر عمج انطي خبر و اوصي نزهة ماتحسب حسابنا بالغدة

:- خل تجي ويانه

:- الولد وعمج منو الهم خليها غير مرة نروح عصرية وناخذها ويانه

هزيت راسي وركضت حضرت ملابسي وفتت سبحت طلعت جففت شعري سويت ذيل حصان ولبست تنورة لنص الساق وجواريب طوال سود وقميص ارجواني وفوكهن عباية لفيت نفسي بيها

طلعت لعمتي اخذتني وطلعنا توجهنا للامام زرنا صلينا وكعدنا وحدة بصف الثانية عمتي كاضة سبحة تسبح بيها واني اسبح بأصابعي

مرية كبيرة كعدت قريب مني باوعتلي وگالت خالة اليوم شنهي من ايام الاسبوع تيهت راسي دار

صفنت شوية لان الكعده بالبيت تخلي الايام متشابها بدون طعم ما نتلهف لليوم الجاي ولا نعرفه شنو

تذكرت بصعوبة ورديت :- جمعة خالة اليوم جمعة

هزت رأسها وكالت متحسرة بصوت كله غصة :- هاي عاشر جمعة والولي ما رد ولا شفت طوله
لا وصلني منه مرسال يبرد افادي
ضربت ايد بأيد متحسفه

كتلها بتساؤول :- انتي من الجنوب خالة

هزت راسها ب اي وهي تتحسر وترفع مسبحتها تسبح

كملت حجيها بقهر :- ابني بالجيش صارله هواي ما نازل مادري شني السالفة اجيت هنا زرت واندعيت هلبت يرد سالم وتقر عيني

ابتسمت بحزن وكتلها بقهر :- حتى اني دعيت الله يلم شملي بأبنائي ادعيلي خالة الله يبرد كلبي على الاقل وليدي يرجع الحضني عفته لحمه حمرة

:- يااا جا خالة ليش عفتي

:- انجبرت الدنيا جبرتني بس ادعيلي واني ما انساج ولا انسى ابنج بدعائي

رفعت ايديها وشهگت لربها وغركتني بجميل دعواتها :- ياربي بجاه ابو الجوادين قر عيون هاي البت وردلها ظناها ارزقها و وفقها وابعد عنها اولاد السوء واحفظ غاليها
واستمرت تدعيلي وكل شوية ترفع ايديها وتكول ربي فرح هاي البت وريح كلبها

جانت مرأة جنوبية بوجها مبين تعب هاي السنين وعيونها مكحلة بحنجها دگات خضر
وبأصبعها خاتم مزين بشذرة فيروزية

عمتي دغتني كالت يلا تأخرنا عدلت عبايتي وحجيت ويا المرة
:- الله يبرد كلبج برجعة ابنچ سالم غانم ان شاءالله الله لا يضركم ان شاءالله

شكرتني وضلت تدعيلي ارتاح كلبي كلش طلعنا نمشي اني وعمتي للكيشوانية عثرت بطرف عبايتي عدلتها ورفعت راسي دعمت ببنية رفعت عيونها الحمر طاحت بعيوني عقدت حاجبي مستغربة واني اباوعلها وهي تتعذر مني

لزمتها من زندها بخفه باوعتلي مستغربة عقدت حاجبها وكالت
:- اكو شي داده؟

رديت بصوت خافت :- مو انتِ نفسچ امس شفتچ بالصيدلية تردين حبوب تسقط الطفل؟

عقدت حاجبها ونترت :- لاااا ..

وعافتني وراحت تمشي تتلفت خايفة حسيت وراها سر كبير كلش الله وحده يعلم شلون عايشة حياتها

بقيت امشي واباوع بوجوه النسوان والف سؤال يجي براسي
هاي المرأة شنو عدها؟ شلون عايشة حياتها
مرتاحة لو متأذية؟ هم عدها مشاكل
شلون اسلوب حياتهم ..

جنت اتمنى اعيش ويا كل عائلة فترة اشوف طبيعة حياتهم واجرب عيشتهم
هيج بداخلي رغبة اتعرف على الناس وسلوب حيااتهم

لفتني صوت عمتي وهي تگول .. يلا عمة استعجلي دنروح لا يزعلن يكولن تأخرتن علينا

خفيت رجلي استعجلت اخذنا تكسي الهم يم بيت اختها الكبيرة المتزوجة الراحة والطمأنينة سيطرن علي نسيت كل همي وحزني واندمجت وياهن

تحاجن عواصم وشيماء ، شيماء شمرت المس (الچفچير وگالت بغضب
:- اذا الزمج اضربج اكسرج تكسر مو على بالچ استحي من شيهانة وارحمج

عواصم بغضب :- اعصابج يمه اعصابج شحجيت هسه اني شگلت شنو متصدگين يوكع احد بلسانج وبين ايديج جنچ ملكة المغول

شيماء شهكت وكالت باستنكار :- اني ملكة المغول؟ اليوم اكطعج بسنوني

ركضت ورا عواصم بالطارمة وعواصم تصرخ
كعدت بالكاع من الضحك ما اكدر امشي منظرها جان يضحك شيماء جلبت بكذلة عواصم وتضربها بالمس على زرورها وعمة علياء بالباب تضحك

عواصم صاحت علي بغضب :- تعاي فكيني منها مو ضاله كاعدة وتضحكين جنج فزاعة انتي وكشتچ

كمت اركض افاككهن عواصم معصبة جرت عباية من المنشرة ولبستها بالطريقة البغدادية بدون حجاب وكذلتها مطفرة مهلسة وكالت بغضب

:- رايحة وبعد رجلي ما تعتب هذا البيت شنو شحجيت شكلت ملكة المغول هسة شفايتلج تصيرين ملكة وجوة رجليج الخدم احسن ما ضاله تدكين علي

شيماء بغضب :- دفعة مردي والهوى شرقي

فتحت الباب من صدك وطلعت تمشي بغضب تلاگت ويا ابو الغاز بسرعة لزم برسك وهي صرخت مخروعة

شيماء عاطت وهي تلطم صدرها :- يمة عصووووومة

عواصم تخصرت للزلمة الطلعت گدام سيارته فجأة وعيونها صارن بهامتها وعطوبها مطفرات مبينه مكفوشة

عواصم بغضب :- شبيك يمة اعمه ما تشوف زين ما سحگتني وكسرتني واني هيج هيج ضاله عانس النوب تكسرني منو ياخذني تريدني اصير طرشي عند اهلي

مد رأسه من السيارة ورد :- طبعا تصيرين طرشي وتعنسين اذا جنچ صخل طايح بالماي ومشسوريله

اشرت ع روحها وردت بأستنكار :- اني صخل مشسوريله

هز رأسه ورد بهدوء :- اي

عواصم :- صدك ما تستحي ولا عندك ثقافة تحجي على بنيه فوك ما ردت تسحكها وتموتها وبعدين تتنمر

رفع طرف حاجبة :- ضلت بگلبي تنمورة صغيرة

عواصم :- تنمورة؟

هز رأسه :- تنمورة مفرد تنمر

استرسل بالكلام ... وجهج جنة غراب البين ما ينبلع اني لو ينطوني مرة مثلج ابلاش ما اخذها الله يساعد الياخذج ويغفرله كل ذنوبه وينطي الصبر لانج حتى تهيجين القالون

عواصم متخصرة تتلاغة ويا الزلمة وشيماء واكفة تباوع بنظرة ندم ندمانة لان شهكت ولطمت صدرها مرعوبة ومبين تتمنى لو ساحگها احسن
وراحت دخلت للبيت لان شذى صاحتلها الجدر احترگ

عواصم رفعت ايدها تفرها ما عاجبها وكالتله :- يلا انزل نزلي الدبات لا تأخرني كله علمودك طلعت ملهوفة وردت تسحگني

:- علمودي طلعتي ملهوفة؟

عواصم :- علمود الغاز عدنا عزيمة كبيرة ومحتاجين نبدل الدبات

باوعتلي خزرتني وصاحت :- طلعو الدبات بسرعة حتى الما فارغة طلعوها خاف بعدين ننغدر ونتفشل ويا الناس

باوعتله فتح باب السيارة ينزللها كللها كم وحدة ثنين؟

ردت بهدوء تام وجد :- لا داده ثنين شنو 6 وحدة للخبزة و الباقي للطبخ

هز راسه وهو يباوعلها بنص عين ، صحت بصوت خاف لج عواصم شتسوووين؟

خزرتني سكتت كلت اذا احجي تمطلني هنا نزلهن كلتله
:- جيبهن لهنا هيج بعيدات عني

رد من ورة خشمة :- خادم

نقلهن كلهن يم الباب وگللها :- بس بدون زحمة طلعو الفارغات

ضحكت بأستهزاء وردت بخبث :- وين اكو صخلة تسوي عزيمة من شوكت هذا الحجي لا النوب مسوية القاتلة

فك حلكه بصدمة وميل رأسه ، لحظات ولم شفايفه بداخل ثغره وباوعلها بتوعد

:- بسيطة اذا ما اقدم شكوة ضدج واخليج بالتوقيف

كالت بخوف مصطنع :- يمه جاي ارجف يمه خفت خفت تعال شوف لشتي كلها ترجف راح اوكع من طولي

يباوعلها فاك عيونه بصدمه ..

ضحكت بأستهزاء وردت :- روح قدم شكوى گللهم صخلة مسوية القذلة القاتلة ضحكت علي وخلتني انزل الدبات وانقلهن من مكان المكان واتعب

فاتت للبيت وسدت الباب ضل يفور وصاح بغضب يتوعد

:- بسيطة اذا ما علمتچ درس ما يطلع اسمي بلبل

فتحت الباب وضحكت :- وين اكو زلمة اسمه بلبل لا النوب يبيع غاز لو تبيع مكياج شيسمونك كتكوت لو فرفوشاية
فرفوشاية مصغر فراشة خاف ما تعرفه

ضرب رجله بالكاع بغضب صار جنة ثور هايج وكباله واحد لابس احمر حجيت بصوت خافت كله خوف

الشيهانة :- ولج هذا هاج وراح ينطحنا

رفع القنينة بكل غضب وهو يصك ع سنونه عطنا بخوف حسبالنه راح يهبدها بينا

بس زين ما هبدنا ونقلها للسيارة سدينا الباب وهو يدردم ويصيح بغضب
:- والله لو عندي انوم الدبة براسها وامرده مرد ناس مستهترة بأرزاق العالم فايخة

تريد تفتح الباب وتهجم بس اني جريتها وكتلها كافي عيب الزلمة ضل يفور

فاتت للبيت معصبة نزعت العباية بنتر وكالت بكل غضب موجها كلامها الشيماء
:- كله منچ طيحتيني بلسان واحد اسمه عصفور خليتي يتجاوز عليه وزين ما سحگني

الشيهانة :- بلبل

عواصم :- اي هذا مرادف اسم بلبل

كعدت بقهر مفرفحة وتحجي بهضيمة :- اني مظلومة شنو اسوي من خير ماتقبلون علي شنو احجي ما تقبلون علي اني مظلوووومة

طبطبت ع كتفها وكتلها بنبرة قهر مصطنع :- سودة عليه خيه شتسوين هم حظج هذا خلاج تتعاركين ويا واحد فوگ ما اسمه بلبل يتنمر عليچ

شهگت بقهر وجريت زيگها :- روح يا عصفور كون لا يرضا عليك ربي حرگت گلبي

وضلت تدردم ع بلبل وترجع تحجي ع شيماء وتصيح اني مظلومة وماعندي حظ

......

ليلى .. معشوقة قيس وقلبه النابض ..

اجة عليه ياخذهن وبسرعة دفعهن جوة كراتين البسكت و وگف بمكانه وكال اخذي أغراض گبل جريت كيكة ، كلشي جان بلحضات كأنما رمشت عين

ما حسينه غير اندفر الباب ودخلو الشرطة علينا مسلحين واسلحتهم مرفوعة بأتجاهنا
الضابط صاح بغضب عارم :- اليوم اكسر ضلوعكم واخيسكم بالسجون تا اشوف يا ساقط ينجي من فعلته وهو معارض الريس

الولد گال بتساؤول :- عفوًا سيدي شنو قصدك؟! اعوذ بالله اني ما اخون سيدي الرئيس

عيني عليهم گبل جفتو وضلو ينبشون بالمحل باوعلي الضابط وصاح بغضب
انتي ويااااا؟

تمالكت نفسي وتذكرت حجي استاذ فاروق گال نكري حتى لو لگو شي عندچ وشبعتي تعذيب لا تعترفين بشي وصيري قوية صامده

نكري حتى لو الناس الي گبالج منضمين لحزبنا بس مامتعرفه عليهم داخل مكتبة الفرس ..

حجيت بثبات :- العفو سيدي ما فهمت هو الولد شمسوي حتى اني ويا؟ والله ما دافهم
رفعت الكيكة واسترسلت :- جاي اشتري

تقرب مني كال فتحي جنطتج فتحتها بهاي الاثناء شالو الكراتين ولكوهن بدون ميعرفون محتواهن كلبشو والضابط دور بجنطتي وبنفسه فتش كتبي

حط سلاحه بحلگ الولد وگله :- هاي وياك لو لا؟ نعرف كلشي بس نريد اعتراف منك واذا جذبت افجر راسك بطلقة

هز رأسه ب لا :- لا سيدي وروح امي البنية مو وياي وما اعرفها لا تكتلني فدوة وخر مسدسك

ضربه بالمسدس حلگه وگله اسكت حيوان ك.... وضل يغلط و يگله ..نشوف شنو من كتب لو مخطوطات هذني نتاكد من محتواهن وان شاءالله نشوف حبل المشنقة بركبتك واني اشرف ع اعدامك يا خسيس

متت من الخوف حجيت بخوف :- سيدي خفت والله شجاي يصير فدوة جاوبني

اشر بالمسدس حتى اطلع وگال :- هذا معارض للنظام جايين ننهي ونصعده اعدام اطلعي انتي مالج دخل بشي

هزيت راسي وطلعت ركض من المحل امشي بسرعة اخاف التفت وروحي رايحة صاح الضابط التفتت خايفه بس اتصنع القوة وثابتة على موقفي حتى اكمل البديت بي ..

تقرب مني واني  مشيتله

كال بتساؤول :- منين انتِ؟

ليلى :- من الـ.....

:- احجي الصدك عندج معرفه بهذا الشخص انطيج وعد ما المس شعره منچ وشسمج انتي

:- سيدي اسمي ليلى
هز رأسه اي وگال كملييي عندج معرفة بي
:- مو جوة گتله نعرف كلشي وهو كال مايعرفني ترة بس جاية اشتري طلعنا اني وصديقتي نتونس اجينا للمحلات هنا بعدها راحت البيتها واني ردت اشتري شي اكله لان جوعانة وطريقي بعيد

وصديقتي ابوها عقيد وخطيبي ضابط مثلكم رائد واصدقاء العائلة كلهم من كبار الدولة اذا تحب اجي وياك للمركز واخابر الاهل وكل معارفي يجون للمركز ينورونه حتى تتعرف عليهم

رفع طرف حاجبه وضحك تك خد :- مبين من حجيج جذب فضحتي نفسج ، غمزلي ..

رديت بثقة :- اجي وياك؟

:- ما انتظر منج تجين راح ناخذچ لان اصابع الاتهام موجها الچ ست ليلى

:- ليش تتهم شخص ماعندك دليل ضده ولا شايف شي علي

جرني من زندي :- امشي للمركز خلي معارفج كبار الدولة يجون ويثبتون كلامج صحيح

اخذني كلبشو ايدينا وصعدوني بالسيارة بداخلي جنت ارجف بس اكابر واسوي نفسي واثقة وقوية حتى اكمل للنهاية ..

بس وصلنا طلبت منه اخابر اهلي عيونه تترقبني مشيت للتلفون وهو واكف فوگ راسي

خابرت ع بيت جاوبتني حور كالت يا ليلى منين تخابرين شكو
:- وين خالتي اريدها ضروري

صاحت نسومة تعاي تريدج ليلوو

ثواني واجالي صوت نسومة تحجي هلا يوم ليلو وينج امي حبيبتي

ليلى :- خالة اني بمركز الشرطة جنت اشتري من محل وابو المحل طلع من الاحزاب المعارضة خابري خطيبيييي صهيب ومعارفنا الي بالدولة فدوة خلي يجون يثبتون برائتي

نسيمة :- عزة وطين وين يا مركززز؟

ليلى :- سيدي الضابط شنو هذا يا مركز

انطاني المعلومات وهي كالت :- هسة اخابر معارفي وخطيبج ما نتأخر امي

عرفت هي لگفتها نهيت الاتصال بسرعة اخذني يريد يكعدني ويا السجينات كتله باستنگاف
:- اني مستواي اكبر من ان اكعد ويا مجرمين وانتي ما شفت شي ضدي اني مو معارضة ولا حتى متهمة

:- ترة ما فارغين الج والله احطج وادوسج انتي هسة متهمة لحد ما تثبت ادانتج

:- انطيني دليل او كتاب بي امر القاء قبض

رفع طرف حاجبة وضحك مستهزأ :- شو انتي واثقة وتحجين بتعالي؟

رفعت حواجبي ورديت :- البريئ قوي سيدي

جر نفس وكال تعاي لمكتبي باوعتله ومشيت ورا ..

كعدني يمه بالمكتب خابر ضل دقايق يحجي وراها يكتب بأوراق گدامه بكل هدوء قربلي ظرف اخذته خليته جوة ملابسي وهو منصي

طلع من الغرفه ضليت وحدي اباوع بالفراغ وماكو اي تفكير الخوف بداخلي ياكلني اكل وگلبي يرجف ..

ماكو مدة مو طويله دخل ويا نسومة وصهيب رجال شايفته قبل من الكبار اليجون يم نسومة
كعدو وبدو يحجون وصهيب والرجال اعترضو وگالوله هذول عائلة بعيدين عن هيج امور وما بيهم واحد معارض وعدهم ولاء للرئيس
وذاك الكبير ضل يوبخ الضابط حسب علمي منصبه كبير بالدولة ..

ورجع گله ما اريد اسمها ينحط بأي سجل ولا تنلمس شعره منها اليأذي ليلى يأذي الحكومة

وكام بغضب وهو يحجي كومي بابا ليلى

الضابط ضل يتعذر و گله سوء فهم استاذ واسمها مايندرج بأي سجل ولا ينذكر هاي هي صرنا نعرف ليلى تخص الدولة وبريئة

رد :- نعم بريئة هي بخدمة الدولة ولا يمكن ان تنظم لاحزاب معارضة نسيمة خالتها كذلك بخدمة الدولة

هز رأسه ب اي :- الحمدلله واكرر اعتذاري ومثل ما شفتو اني ما اعتقلتها بس ردت اتأكد من برائتها وابعد الشكوك

كملو حديثهم ودخل الشرطي كال سيدي شفنة كلشي هذني كتب بيهن قصائد تمجد الرئيس صدام حسين حفظه الله واوراق بيهن قصائد حب وهيام بسيطه الولد كذلك بريئ

الرجال الكبير ضحك وگال للضابط :- مو گلنالك البنية بنيتنة ونعرفها شنو ما تنطي بالرئيس ولا تدخل بأحزاب معارضة

رجع الضابط يعتذر وباوعلي بنظرة اخيرا ابتسم الي درت وجهي ومشيت

اخذوني وطلعو خالتي تتشكر من الجبير تگله مشكور عيوني ابو خلدون فدوة اروحلك انقذت البنية وانت عيني صهيب ما قصرت بشنو اجازيك

ابو خلدون :- ولو بالخدمة نسومة انتي صديقة عزيزة بالمناسبة اني رغم ما اعرف ليلى بس ثقتي بيج خلتني اخش بعين الضابط وابرئها ياريت تتاكدين من بنت اختج واذا عدها فد لعبة من وراج خليها تتركها حتى ما تروح ورا الشمس

صهيب :- اليروح ورا الشمس ما يرجع يضيع ذكره
باوعلي خزرني رفعت طرف حاجبي بمعنى شكو
سوالي حركة بأصابعه يعني بسيطة

خلوني بالسيارة واستلموني تحقيق خصوصا هذا ابو خلدون بس اني ما انطيت لزمة ع روحي وبينت الهم ان اني مع الرئيس بدون ما ابالغ وافضح نفسي وابين جاي اخدعهم ..

مثل ما درسوني وعلموني بالضبط ..

وصلنا نزلو نسومة وابو خلدون وكبل للبيت صاير سفردحي ردت افوت حسيت بصهيب كرصني حيل بزندي وخزرني نترت ايدي منه وحجيت متوجعه
شبيييك

صهيب :- مصلحجية من توكعين بمصيبة تصيحين صهيب زوجي صهيب خطيبي من تجي للصدگ تنكريني وما ترديني

حجيت بخوف مصطنع :- من الخوف شسوي كلت راح يقتلوني واجيت ع بالي انتَ اعذرني اذا تعبتك وسببت الك احراج .

صهيب :- لج يا احراج ليلى يا احراج ويا تعب انتي لو بنص النار الفج بروحي احترگ في سبيل احميچ روحي ترخصلج

ليلى :- تعذبني بهذا حجيك

صهيب :- مو نيتي اعذبج وما يهون علي تتعذبين بس يا ليلى ... قاطعت كلامه حجيت بهمس بنبره خوف
ليلى :- لتگول بس

ذبلت عيونه همس :- ذايب بحبچ ومنتهي

دمعت عيني قطب حواجبه وضرب الحايط بقبضة ايده ضل الدم ينزل منها شهگت بخوف
صاح بغضب :- ليششش من احجي وياااج تتخبلين وتبجين وحش كداااامج وحش كاااسر؟ بشر بشر وعاشكج وميت بيج ذااايب محترگ

ما ادري شبيه انهاريت ضليت ابچي بشهگه لزم ايدي جرني للبيت نزل دم ايده لطخ قميصي وايدي ، حجة بغضب من يين سنونه
:- هاي هي اليعجبچ ماتحبيني لا تحبيني ولا ترديني بس لا تأمليني بعد جوزي مني ومن تحتاجيني كولي اخوي ابن عمي صديقي مو خطيبي ورجلي وتعيشيني بأوهام واحلام سعيدة

هزيت راسي ب اي ركضت حور اخذتني منه تحجي بخوف :- ها خوية صهيب شبيهاا شمسوية على كيفك وياها ترة ليلى تخاف والله

صهيب :- ما مسوية شي علميها احجي وياهة بلكت تسمع منچ كليلها هذا بشر لا تبقين تاملينا وتخلينا يبني احلام على سراب

حور :- ع كيفك وياها
حجت وباوعت الايده نتر ايدي وطلع بسرعة جنت منهارة وبس ابچي
انطتني ماي شربتني صعدت فوك ارجف سديت الباب طلعت الظرف ضميته جوة فراشي وبدلت ركضت غسلت وجهي واني مستمرة ابجي اجاني صوت نسومة تصيحلي

نسيمة :- يوم ليلو نزلي ابو خلدون يريد يحجي وياج

نزلت ركض بهدوم البيت مالي خلگ شي جرتني من ايدي دخلتني علي وبدأت تعرفني علي
نسيمة :- ابو خلدون صديقي المقرب اعرفه من سنين ويعرفني وكلش واثق من تربيتي الج
باوعتله كمل ع كلامها

ابو خلدون :- مع هذا انتي طالبة جامعية واحنه نعرف كلش زين اكو منظمات واحزاب ضد الرئيس موجودة بالجامعات لهذا السبب نريد نعرف اني وخالتج اذا أثرو عليج وجرجروج وياهم حتى نعالج الموضوع ونلحك ننقذج

جريت نفس بعمق و حجيت :- لا محد جرني ولا جنت اعرف اكو هيج امور اني عازلة نفسي والجامعة كلها تشهد وعندي صديقة وحده ابوها عقيد

ابو خلدون :- متأكدة يا ليلى؟ زين شلون لزموچ بالضبط

ليلى :- مو گتلكم ابو المحل لگو عنده اشياء ما اعرف شنو بس شافوهن گبل اخذو وضلو يضربون بي ف الضابط اخذني للمركز حتى يتأكد اني مالي شغل شرحتله كلشي وهو تفهم الموضوع وانتم اجيتو وهم حجيتو ويا وتأكد اني بريئة ماعندي شي
واخير شي طلع حتى ابو المحل بريء مثل ما سمعتو كلشي صار گدامكم

نسيمة :- الحمدلله يمعود ليلو فقيرة

ابو خلدون :- هسة انفتحت عيونج ع هاي الامور ديري بالج تنجرفين ما تدرين ب اي لحظة تلكين حبل المشنقة على رگبتچ

هزيت راسي وكمت سمعته يكول لخالتي :- هاي بنتچ تخبل وصغيرة ضميها عن العيون لا يفترسونها حرامات يضيع شبابها

انتفضت بسرعة وردت :- مو بنتي هاي بنت اختي المرحومة

ضليت اتگلب من الخوف وبطني تأذيني كمت للحمام لكيت الشهرية نازلة ولزمتتي سخونة تغطيت ونمت بتعب فزيت ع صوت حور يمي تحچي

حور :- كعدي عاد كعدي نسومة عدها حفلة خلينا نتعشى قبل ليجون الناس وتبدي

شلت راسي بضيق وحجيت بتعب :- ما اشتهي

حور :- انتي بدون اكل ميصير من رجعتي ما اكلتي شي

ليلى :- مممم زين عندج علاج بطني موتتني وعندي سخونة

لزمت جبيني وكالت بخوف :- صدك مسخنة نزلي اكلي وانطيج علاج حتى متتأذين وتتخربطين

هزيت راسي سبقتني نزلت كمت غسلت ونزلت لكيتها تحط بالعشا ونسومة يمها استغربت اصناف الاكل عرفت ابو خلدون موصي جماعته يجيبو كعدت اكل بدون كلام بعدني كل يوم اتگطع وانقهر من تنزل لگمة لبطني اخاف تطلع حرام .. بس اكول مابيدي شي مجبورة ماكدر اشتغل نسومة ماتقبل لازم اتخرج يلا

كمنا غسلنا مواعين واخذت علاجي و صعدت شوية والالم سكن والسخونة نزلت حسيت روحي تحسنت صرت زينه

ضليت افكر بالولد خطيه ادري راح يطلع وكلشي صار كان خطة مدروسه
وراح يطلعه الضابط منها مثل الشعرة من العجين وكل الموجودين ويا الضابط يشتغلون جوة ايده
الولد هذا علي شكوك ف اكو امر بالقاء القبض علي

هاي الاشياء الي وصلتها اصلا ما كانت اله كانت للضابط ..
بعد ما طلعت من المحل تبدلت ونحط مكانها رسائل وكتب تمجد النظام والرئيس حتى يطلعوهن وتسقط عنه الشكوك بالمركز وكدام الضباط الي يمجدون الرئيس ويردون يصعدون بعد قطع عنقه ..
والكتب اخذهن الضابط بدون ما يشعر احد

وبدوره اخذني للمركز وانطاني الظرف لاستاذ فاروق ..

بس مع هذا خايفة لازم باجر اتاكد هو طلع لو لا عن طريق استاذ فاروق

بعدها ابحرت بأفكاري ويا قيس ابن السادة وبديت اعيش احلام وردية تجمعني اني ويا
وبنفس الوقت بديت احس بمغص الخوف ياربي اقسمني اله واقسمه الي وحدك تعرف شكد احبه ..

بعدت الافكار عن راسي وكمت الهي نفسي بالدراسه وراها شغلت المسجل
هيثم يوسف شيجيب باچر .. وضليت ادندن ويا واتخيل روحي بملابس انيقة افوت من كدامه ويشوفني وينسحر بجمالي ..

اختاريت لبسي ونمت كعدت تعبانة وجسمي كله مكسر يون علي من الالم كمت سبحت اريد بس سخونتي تخف لفيت راسي بالمنشفة ونزلت بالبجامة للمطبخ سويتلي اعشاب اشربهن حتى يخف الالم حطيت ايدي ع ظهري احسه يريد ينقسم نصفين من شدة الالم
أنيت بوجع جريت الكرسي وكعدت حطيت ايديني فوگ راسي وغمضت عيني تعبانة ..

حسيت بحركة وطكطكة شلت راسي شفت صهيب بالبدلة مالته ويلبس بساعته فوگ راسي فزيت مخترعة حطيت ايدي ع صدري وفكيت عيوني ع وسعهن
:- انتَ شتسوووي هنا؟ لا ليش اسألك هو البيت صاير تايه منو يجي ويدخل يتجول ويطلع

باوعلي بطرف عينه ما عاجبه وكال بهدوء :- اجيت حجيت ويا نسومة بموضوعج بوقت متأخر وما خلتني اطلع كالت طريقك بعيد نام هنا وارتاح
جنت تعبان وشايط للزرگة من وراچ و ورا سوالفچ ما اكدر اسوق

هزيت راسي بدون رد ما جاي ارتاح هنا ما جاي ارتاح يا عالم فهموني كل شوية يطلع زلمة بنص هذا البيت

باوعت الايد صهيب كلها جروح من ضرب ايده امس شحيت نظري عنه
اخذت اعشابي اريد اطلع هو واكف بمكانة ساند ايده ع الكرسي ويباوعلي رفع طرف حاجبه رفعت حاجبي بمعنى شنو
سوالي بحلگه جج .. واشر اصعد

لزمني ظهري وبطني تشنجت بمكاني غمضت عيوني متألمة واجر النفس بصعوبة
تقرب مني بلمح البصر وكال باهتمام

:- بيج شي؟ اشيلچ

ليلى :- شسالفة لا بس ارتاح تعبانة شوية

ضليت اتنفس خف الالم وصعدت ركض شربتهن وجهزت نفسي للدوام اباوع لروحي تعبانة ومبين التعب على وجهي صاير احمر وعيوني ذابلات
لبست شلون ما كان وطلعت حتى شعري سويته كعكه وبس نزلت گذلة

لكيته واكف بالباب ويفر بالسويج من شافني عدل وكفته وكال
:- منتظرج ترة تعبانة شنو يمشيج اوصلج بطريقي

وكفت متبسمرة باوعتله بخوف و حجيت :- ما اثق بيك

صهيب :- ما اغتصبج لا تفكرين زايد وتتخيلين

حطيت ايدي ع بطني ضامة الظرف هنا جريت نفس وهزيت راسي ب اي
لان بهذا التعب ما اكدر امشي هواي مريت اخذتلي مسكن وطلعت صعدت ويا يوصلني للجامعة بطريقه

فتح قرآن بالمسجل وضل ساكت طول الطريق ولا حجة حرف بس يجر نفس ويتنهد
من وصلنا طفاه وتنفس براحة نترت بقهر
:- حسستني جنت نايمة ع كلبك وهيج ارتاحيت لان راح انزل وبعدين ما دزيت عليك توصلني انت اقترحت سيدددي الضابط

ضحك تك خد مستهزأ وكال وهو يهز ايده :- غبية شيفهمچ

ليلى :- مو غبية احترم

صهيب :- عندج قلة استيعاب يلا نزلي ليلو الرقيقة

ليلى بصدمة :- يااااا تطرد بيه ع اساس ميته عليك هاي نازلة لا تضل تطرد

فتحت الباب بغضب ضحك بصوت مسموع وكال غبييييية استغفرالله واتوب اليه ..طبكت الباب بقوة

نزل الجامة وصاح :- اجيج بنص الدوام اتطمن عليج وجهج مايبشر بخير خاف الگاج ميته

ليلى :- لا تجي اطردك النوب يكولون يجون عليها ضباط

غمز وكال :- كليلهم خطيبي

درت وجهي بغضب ونترت :- كتلك لتجي

هز رأسه ب اي .. عفته ومشيت وبداخلي ادعي قيس يكون ما جاي لان هذا صهيب ماعلي عتب بأي لحظه الگاه مزروع گبالي يروح يشوه صورتي بعين قيس

دخلت للجامعة اجر بروحي جر لگيت دلال تنتظرني سلمنا ع بعض ورحنة للحمام انطيتها الظرف وطلبت منها هي توصله لان اني هسة ماكدر اتحرك احس عيون صهيب انفتحت علي بس ما كتلها هذا الحجي بس كتلها مريضة ..

اخذته سألتها عن الولد كالت طلع لتخافين تبرأ من التهمه عفو عنه فورًا ما تحول لا محكمة ولا شي وسقطت عنه الشكوك

تنفست براحه طلعنا كعدنا سوية دقايق وورحنا لقاعاتنا ضلت عيني تتجول بالمكان ما كان موجود هذا الغياب زاد الخوف بداخلي وأذاني حيل ..

گعدت على صفحة مالي نفس تنهدت وعيني وكعت على باب القاعة واكف دكتور ميثاق ويمه ناصر صديق قيس شفتهم بس ميشوفوني
استغربت دكتور ميثاق ما يدرسنا وزاد استغرابي من دخل للقاعة وسلم .. بعدها گال ان هذا الفصل راح يدرسنا الطلاب كلهم فرحو وكالو هلا بيك باصوات متفاوته ..

ابتسمت براحة وفرح دكتور ميثاق انسان عظيم واحب وجوده بالجامعة ..

انطانه محاضره وختمها وطلع من القاعة بس انفتح باب القاعة صار كبال عيني ناصر صديق قيس يباوعلي كمت بهمه مشيت بأتجاها اريد احجي ويا واسأله على قيس و شنو يريد يصير خل يصير لان روحي طگت

دار وجهه ضل يمشي مبتعد عن الطلاب وصل مكان شبه فارغ و وكف التفتت الي

كتله بدون ما اسلم
بلهفة عاشقة حرگها الشوق وذلها الحنين
:- وين قيس؟ صديقك وين شنو بطل سافر تزوج اريد اعرف هسة

هز رأسه بأسى وگال :- السيد عنده ظرف
رفع ايده يمسح على لحيته و يحجي بحزن
:- بس ما ناسيج ابد ادعيله تنحل مشاكله وان شاءالله يرجع
دزلج بأيدي رسالة يريد منچ جواب عليها ..

طلعها ومدها الي ظرف ابيض بأطرافه خط ازرك واحمر اخذته من ايده وخليته على گلبي استرسل بالكلام :- انتظري اليوم يمكن يجي يشوف دكتور ميثاق ويروح عنده موضوع ويا
رديت بـ تمام واني اهز رأسي وايدي تتأمل رسالته
حجيت بتوسل :- يصير تگولي شنو صاير ويا

هز رأسه ب لا ونصة رجعت حجيت بنفس النبرة
:- بلغه سلامي خاف من يجي ما اشوفه او ما يجي وگله ليلى موتها غيابك وذلها شوقها الك ارجع بسرعة قبل لا تحترگ بنار فرگتك وتصير رماد

ناصر :- الله يسلمج اختي ..

رفع ايده ودعني وگال :- مع السلامه وراح

ضليت اتكطع من القهر والف فكرة اجت براسي خفت يكون ظرفه هو زواج او خطوبة
اناملي ترجف ماكدرت حتى افتح الظرف واقرأ مضمون الرسالة ..

ضميتها بالجنطة و كعدت ع اقرب مصطبى منصية رأسي بألم اجت دلال تركض خايفة
وكالت بأهتمام :- شكووو شبيجج ليلى والله متت بدمي

ليلى :- احبه احبه احبه دا اتگطع من الالم احبه دلال وما اعرف شنو الظرف المانعه يجي

عقدت حاجبها باوعت بالأرجاء ورجعت حجت :- قيس؟

هزيت راسي وعيوني دمعن وكل مواجعي هاجت الم گلبي وصار الم بأمعائي وظهري ورجليني ضلن يرجفن ابجي خايفه ومرعوبة وكل خليه بيه ترجف

كعدت دلال گبالي تشربني ماي وتفرك بأيديني وتحجي بنبرة خوف واهتمام :- دكومي نروح للمستشفى حتموتتتين ليلى انهاريتي

اهز رأسي ب لا وابجي بشكل مستمر ضلت تحجي وياي وتهدأ بيَ اخير شي ختمت كلامها برأيها
:- برأيي تركي الامور كلها تمشي مثل ما يريد الله ومثل ما كاتبها ولا تهتمين لأي شي هو يعرف المناسب النه

هزيت رأسي مقتنعه رأيها يشبه رأي حور وخالتي دائما يگللي ابن السادة مو ثوبج ولا انتي ثوبة واليشتري ثوب ما مناسب اله ما يگدر يلبسه ، بس اخ من گلبي النذل شمرني بهاي النار وضل يشوفني احترگ بدون ما يحرك ساكن ..

دلال مسحت دموعي وباست خدودي بعد گعده طويلة من البجي والانهيار وگالت :- رايحة اجيبلج شي تشربي وتاكلي حتى ترجع قوتچ لا تتحركين من مكانچ ليلى

راحت تهرول وتطلع فلوس من جنطتها بدون ما تحس دعمت بالشاب الوسيم المعجبه بي طاحن الفلوس من ايدها ونص اغراض الحقيبة وتراجعو ثنينهم للخلف منحرجين
نصت تلم الاغراض فتح عينه بصدمه وعقد حاجبه وگال الها شي فورًا گامت وهو دنگ يلم الاغراض وينطيها

من وگف باوع لوجهها بنظره استمرت ثواني وهو ساكت و بعدها حجة شي وابتسم تك خد ومشة هي التفتت راقبت خطواته ومبين ع وجها الامتعاض قاطبه حواجبها وتباوعله بأستياء ..

كملت طريقها بدون مترجع وهو كمل بالاتجاه الأخر ..

نصيت غمضت عيني الالم ذبحني ضليت اعصر بأيديني حتى يخف الألم وعيوني تدمع بدون شعور

حسيت بخطوات قريبة مني كلش فتحت عيني طاحت ع بسطاله گال بنبرة أمر :- امشي وياي بسرعه للمستشفى يلا بدون دلع زايد

رفعت عيني باوعتله بضعف وضلن عيوني يجرن اكثر ما اعرف شنو احجي فرحت بشوفته لان محتاجة مستشفى ومحتاجة اطلع من الجامعة بسرعة

هزيت رأسي ب اي وهمست :- بس تجي صديقتي وأبلغها فدوة اصبر

حاط ايده ع خاصرته ويباوعلي بنظرة خوف هز رأسه حواجبه معقودة وعيونه تترقبني
باوع للاوراق لمهن وهو يحجي
:- ليش اجيتي اذا تعبانه
:- م .. ما اعرف
هز رأسه رفع اصابعه مسح ع شاربه وگال

:- سهله هسه نروح للمستشفى بس لتبجين ولترجفين رجفت ايدج سرت لگلبي

نصيت بدون ما ارد استرسل بالكلام :- والله گلبي كرصني واجيت گلت هسة الگاها تعبانه وبأمس الحاجة للطبيب والادوية

ليلى :- ممممم

صهيب :- دعوفي صديقتج وگومي وجهج صار ليمونه صفرة وشفايفج يابسة ترجف

نزلت رجليني من المصطبة وگفت احس الخدر والتشنج سيطر ع كل جسمي رجفت ورجعت حطيت ايدي ع مصطبة متألمه

بدون ما يستأذن ولا شي لزمني من زندي وشال اغراضي بالأيد الثانية
صهيب :- تكدرين تمشين لو اخليج ترتاحين اكثر

جريت نفس وقويت روحي سندت نفسي ومديت ايدي دفعت ايده بخفة وحجيت بتلعثم :- اگدر امشي

رفعت راسي امشي ويا ومن بين كل الناس عيني وگعت ع قيس واگف بثبات ومخلي ايدينه ورا ظهره لام شفته لثغره ويباوع علينا من بعيد عيونه ثابته علينا لدرجة ما يرمش حتى متضيع علي لحظه ..................للحكاية بقية 🖤

🚫 شفت بعض البنات معترضين ع التنزيل بين يوم ويوم بعد بارت 15 لان متحمسين وما يكدرون يصبرون ف لهذا السبب ولاني كريمة 😎
قررت قرار التنزيل ما راح يصير بين يوم ويوم لا
يصير نشر يومين ويوم استراحة ان شاءالله نبدي من اليوم بهذا النظام