رواية حمائم تخشى الطيران الفصل الثاني والعشرون 22 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

تفاعلو لطفا وصلو البارت 500 تصويت وتعليق

هاشم :- ياااا خوووية يا ابن امي

نزلت للنهر اركض تعثرت بالحافة مال النهر وطحت على وجهي على الشوك شلت راسي وكمت اركض واصيح ...يا خوية يا ابن امي .. يا خوية
ماكو غير هاي الكلمات على لساني شلون وصلتله ما اعرف انضكت روحي وانسلبت بهاي اللحظات

الواحد من يطيح اخو گباله يركضله وكل ما يركض يحس ظهره مكسور
ساعد الله گلبك سيدي ابا عبدالله شلون شفت ابا الفضل طايح مگطوع الذرعان

طحت گباله على اركبي اشوفه يون باوعلي بعيون هافتات وگال بصوت مخنوگ متقطع
مرتضى ...شيلني خوية شيلني هاشم گبل لا تفارگ الروح الجسد احسها وصلت للحلقوم

بچيت ضعفي بهاي اللحظة ما كان جسدي بالعكس صرت اقوة بأضعاف بس ضعفي جان بالمشاعر روحي راحت على منظر اخوي الغارگ بدمه
هاشم ...عمرك طويل ابن امي من عمري على عمرك

رغم مرتضى اكبر مني ب7 سنوات بس كان ناعم وضعيف كلش شلته على گلبي بصعوبة جسمه ثگلان اكثر بس اجتلي قوة عظيمة بهذه اللحظات

شايله وامشي بي واصيح ...شييييخ ... خوووية زين العابدين ... شييييخ

اصيح طلع واحد من الفلح من بين الزرع اجالي يركض يصيح ...هاا خوية انتَ ياهو؟

هاشم ...خطار الشيخ فزعه الي

شايل مرتضى على متني واصيح ...الزم روحك مرتضى اصبر ما ضل شي ونوصل اصبر يا خوية

شايلة واهم بخطواتي كل ما اجالها قوتي تكبر وصلنه يم الحسينية وطلع الشيخ يركض صحت فتحولي السيارة بسااع

الشيخ فتح سيارته بدل سيارة مرتضى حطيناه بيها وصعد الشيخ وابن اخو وطلعنه گبل للمستشفى
باوعتله واني الهسه ما اعرف مكان صوابه
كتله ...وين صوابك؟

فتح عيونه بصعوبة وگال ...بخاصرتي

استغربت لان الدم مغطي حتى صدره حطيت ايدي على صوابه
الشيخ ...ياهو وياك سيد ياهو طگاك

مرتضى ...واحد من الامن ما ادري البعث گالي شجايبك على الشيخ انتم سوية بحزب الدعوة؟ ضل يستجوبني واني حجيت الحق والحقيقة بس رادني اعترف بشي ما مسوي

خفت صوته اكثر فركت صدره وكتله ...لا تحجي اسكت ان شاءالله تگوم سالم وتسولف النه كل شي

مرتضى ...راح تطلع سيد اوصيك على زوجتي واطفالي لا تخليهم يحسون باليتم اريدك تضل مقتدي باخلاق ابو الحسنين من تشوفهم تصير مثله ابو الايتام

هاشم ...من عمري على عمرك يا خوية 

وصلنا لأقرب مستشفى نقلوه على السدية بسرعة ضلينه ننتظر بره خليت راسي على الحايط غمضت عيني مختنگ رفعت راسي للشيخ كتله اريد اصلي فاتتني صلاة الفجر

هدومي كلهن دم گال اوديلك ابن اخوي يجيبلك هدوم واغسل جسمك بالحمام وبدل وصلي

هزيتله رأسي اي .. راح الولد وقبل لا يرجع طلعو گالو ما متأذي كلش من الطعنة بس متعرض لتعنيف وضربات قوية

خلو تحت المراقبة باوعتله ممرود احس الوجع البي بگلبي

رجعت بذاكرتي للماضي قبل سنين طويلة كان عمري 7 سنوات گعدت الفجر اتسابق ويا اخوي قيس للوضوء حتى من يطلع والدي يلگانه متوضين ومنتظري ويثني علينا

لگينا مصطفى مكمل وضوئه و مرتضى واگف يمه يكف ردانه حتى يتوضئ
باوعلنا ولمعت عيونه بفخر وگال ...يا هلا بالاشبال بارك الله بيكم احبابي

قيس ...سيد عندي سؤال شرعي اريدله اجابه شرعية

ضحك مرتضى ومسح على كتف قيس
مرتضى ...شنو السؤال
قيس ...اني اكبر من هاشم منو اله الحق بالوضوء اول شي اني لو هاشم؟
هسة شفت سيد مصطفى سبقك بالوضوء لانه اكبر منك بسنة

ضحك ونصة علينه خله ايده اليمنة حول كتفي واليسرى حوط بيها ظهر قيس وگال

...بالوضوء ماكو ترتيب لكن اذا الاخوان تسابقوا مثلكم للوضوء وكان بيهم الكبير مثل القيس والصغير مثل هاشم
وانتم تباوعولهم وشفتو الصغير توضئ قبل الكبير هذا لحسن خلق الكبير وعقالته وحبه للصغير وحتى يشرف على وضوئه ويشوفه ضابط الوضوء لو لا

واذا شفتو الكبير توضئ قبل الصغير والصغير راضي ويباوع الاخو بحب ويراقب وضوئه حتى يتعلم
ف هذا ايضا لحسن خلق الصغير واحترامه للكبير وان كان يكبره بيوم واحد ف هوَ يقدره ويعترف بي

وبالحالتين مقامكم يم رب العالمين يكبر

هاشم ...شفت كتلك ماكو اشكال شرعي بس انتَ تريد تسبقني واني راح اسمحلك تتوضئ قبلي حتى اشوف واتعلم منكم

قيس ...لا انتَ توضئ قبلي واني اشرف على وضوئك خاف عندك اغلاط

مرتضى ...حلً للجدال وحتى ننهي هذه المعضله توضو ثنينكم سوية قيس اسبق هاشم بالخطوات

وگفنة نتوضئ مرتضى لزم ايدي واخذ الماي بأيده وعلمني شلون اخلي على ايدي

ركضنا بعد الوضوء للغرفة خلينه عطر ومشطنه طلعنا لگينا والدي سابقنة وكاعد بالصالة شافنه ابتسم برضا يمه مصطفى كاعد يسبح

تسابقنا حتى نقبل ايده وننال رضاه
مسح على رؤسنا وگال ...الله يحفظكم اولادي ويثبت اقدامكم على طريق الله اريدكم دائما بهذا نشاطكم وحماسكم حتى تعمرون الدنيا بالعمل الصالح

گالت العلوية وهي تدخل للصالة بيدها سجادتها
...يمة فدوة لأولادي الله يحفظكم من كل شر يا نظر عيني ويثبتكم على ولاية امير المؤمنين ويجعلكم من انصار الامهدي عجل الله فرجه

هاشم ...يوم ابوي انطانه نصيحة انتي ليش كا تنصحينا؟

ضحكت وهزت راسها
...والله يا يمة تضيع الكلمات مني من اشوفكم ولساني يسبح لله ويحمده ويشكره
ما اگلكم غير خليكم ويا ربكم ولا تخلون الدنيا تغريكم وتبعدكم عن طريق الله واهل البيت
تمسكو بآهل البيت ترى همة سفينة النجاة

اردفنا بصوت واحد ان شاءالله

ضلينا ننتظر مرتضى تأخر شوية يلا نزل لابس عباية جدي فكيت حلگي وقيس عقد حواجبه وباوع لأبوي
گاله بنبره حزن مغلفة بالغيرة من مرتضى

قيس ...اني شوكت البس من عباياتك لو عبايات جدي ليش بس مرتضى مو اني كبرت وصرت رجال يابة

ضحك والدي بصوت عالي وباس قيس براسه
...مو هسة يابة بعدك صغير هو حتى على مرتضى طويله دزيناها للخياط كفها اله من تكبر ان شاءالله تاخذ عباية مني

هاشم ...واني يابة؟

هز رأسه وكال حتى انتَ يابة كلكم تورثون عبينا ان شاءالله وقبلها دينا وعلمنا وحبنا لاهل البيت ماكو فايدة من لبس العبي اذا كانت على اجساد غير طاهرة وماشية بطريق ما يرضي الله

قيس بعده ضايج وغيران رجع گال ...يابه اني هم طويل خلي الخياط يكفها والبسها الله يخليك

عبد الرحمن ...اياكم والغيرة اولادي ليش غيران من اخوك باركله وگله ثوب العافيه الغيرة ما اريدها تدخل لگلب واحد منكم لانها مؤذيه وتودي صاحبها للتهلكه اعوذ بالله

مرتضى مبتسم فرحان بعباية جدي وقيس هز رأسه وبارك لمرتضى واني بالي راح لغير مكان كمنا كلنا نتمشى للمسجد والدي لازم ايدي براحة واخواني ويانه يماشونه

سألت والدي ... يابة الغيرة نفسها بسورة يوسف
التفتتو اخوتي علي مبتسمين
رد ...اي يابة نفسها
...اذا صارت بگلوبنا غيرة نأذي اخواننا مثل ما سوو اخوة سيدنا يوسف؟

...اي ابني وهم اولاد نبي ما سلمو من وساوس الشيطان ونار الغيرة

وصلنا للمسجد صلينا وكعد والدي يقرا قرآن اني بنص اخوتي نعست وبردت وكف شعر ايدي من البرد

ضليت اغمض بمكاني وبلساني اقرا ويا والدي الايات الحافظهن حسيت مرتضى لزمني وخلاني جوة عبايته غفيت بحجره تحت العبايه وبعد انتهاء والدي من قراءة جزء من القران شالني مرتضى خلاني على متنه ورجعني للبيت ...

ما كنت متوقع بيوم من الايام اشيل الشالني على متنه وهو بأضعف حالاته ..

رفعت ايديني ودعيتله انطلقت دعواتي تحمل وياها حزني على حال اخوي وحسرتي على حاله

جابولي ملابس غسلت وبدلت وصليت صلاتي قضاء لان الشمس طلعت استغفرت ربي لان فاتتني الصلاة
ماكو شي اصعب علي من ان تفوتني صلاتي اعتبر نفسي متجاهل لقاء الله
مو حلو الانسان يخلف وما يقابل من يحب على الموعد ما بالك بهذا اللقاء العظيم

صليت ركعتين لوجه الله كملت وشفت مرتضى كاعد بس تعبان مسحت على شعره حاجيته غمض عينه بتعب وگال ...بس ارتاح واسولفلك اريد انام

حاجيت الدكتور كال تركوه يرتاح كم ساعة

طلعت خليت ابن اخو الشيخ واجة اخو الشيخ خليتهم يمه امنتهم علي وكتلهم رايح بشغلة حك ساعه وارجع

اخذت الشيخ وطلعنه خليت ايدي ورا ظهره وقربت راسي منه مدنك احجي ويا بصوت خافت
...شنو شيخ عليكم مراقبة وشكوك

الشيخ ...اي والله واحنه مالنه بالاحزاب لا من قريب ولا من بعيد الله شاهد وكفيل بس شسوي جارنا كارهنا ويحاربنا حسبنا الله ونعم الوكيل بي

هزيت راسي حسيت مو بس هيج السالفة اظن السبب الثاني مراقبة الامن النه من بعد سفر قيس ويمكن وصلهم احنه هسة بالنجف بعد ما يخفه عليهم شي ومن شافوونه اجينه لبيت الشيخ وهذول منا عليهم شكوك ، كبرت السالفة

تنهدت ورفعت عيني دعيت الله بسري يحفظ بيت الشيخ ويحفظ عائلتي

هاشم ...شيخ اريد ادفع صدقة لوجه الله تعرف انسان محتاج تدليني بي؟
الشيخ زين العابدين ...اي هواي الناس المحتاجة اعارف رجال ابو ل7 بنات يشتغل حمال يوم يطلع وعشرة يكعد تعبان مابي حيل حالة مستحقة

هاشم ...هاي هيه نروح للسوگ اريدن اتسوگ بظل هاي الظروف الصعبة اتوقع المونه هيه احسن شي

رحنا للسوگ اشترينا الهم دجاجات ومسواگ من الموجود بالسوگ نوعناه ومرينه لمحل ملابس رجاليه اشترينه منه لمرتضى وللرجال ورحنه عليهم اني والشيخ قدمناهن اله وطلبنه منه دعائه دعاء الفقير كنز واخذت عهد على نفسي كل ما اجي للنجف او واحد من اخوتي يجي انطي فلوس يتسوكون للرجال هذا ويفرحونه ..

بعد ما رجعنه للمستشفى فهمنه من مرتضى طالع يغسل ومستدرجه الولد ومرتضى طالع ورا حسباله من اولاد اخوان الشيخ لان كلهم شباب تالي طلع واحد ما ينعرف انتمائه وضال يضرب بي ويريده يعترف ع بيت الشيخ

گتله ...راح اتصل بالوالد واشرحله الوضع

لزم ايدي وگال يتوسلني ...لا تحجي شي اقسم عليك برسول الله خلي ... خلي چنتنا الجديدة تجي و يتم موضوع قيس على خير

هاشم ...ضروري نحجي للسيد شنو نضم علي وين تصير

الشيخ ...خليني احجي ويا واگله اني محتاجكم بشغلة يومين تلاثة يمي لحد ما يتحسن مرتضى شوية وراها بلغوه

مرتضى ...شوف هاشم اذا الله اخذ روحي ف هذه امره لا اعتراض علي واذا كتبلي الشفاء وتجاوز هاي المحنة ف له الحمد والشكر .. كلشي يجي من ربي اني قابل بي
الاريده شي واحد هسه يتم موضوع قيس على خير خبر اصابتي راح يوترهم ويسبب قلق خصوصا بين النسوان وعاد تعرف سوالفهن انته

رديت بأستنكار ...لا والله ما اعرف سوالفهن

باوعلي بنص عين وگال ...يضوجن زوجة قيس عدهن معتقدات غريبة خصوصا العلوية نرجس

خزرته ضل يطلع الاسرار ... اتصلت بالوالد وحجيت بلغته راح نتأخر وما اعترض لان اخوي مصطفى واولاد عمومتي موجودين يكفون و يوفون ..

ثاني يوم الصبح اخذنا مرتضى لبيت الشيخ حجة وياي الشيخ كال خلي مرتضى وامشي نسأل وندور اهل البنية انه وديت عليهم وسألت وتقريبا وصلت الهم وتحديدا حجي طاهر ..

والله ما گلت لا حضرت روحي وطلعنا اباوع للشارع واحفظ الدرب عدلت جفيتي السودة وباوعت للشيخ كتله ها شيخ ما وصلنا
كال فد شوية و فد شوية لفد شوية لحد ما وصلنا لمكان كله بساتين حتى ما تنشاف بيوت ابد كال الولد الدازة الشيخ امس عليهم

ثائر ...هاي البساتين كلها الهم لبيت حجي طاهر واخوته غنايه ما شاءالله

ضليت اسأله ...همه متكاتفين لو لا كل واحد وحدة
ثائر ...ايد وحده بس عدهم اخو اسمه ضاري يگلك يغرگ بشبر ماي ودومه بعيد عنهم البقية لا ايد وحده

زين العابدين ...ضاري ابو ليلى؟
هزيت راسي لا ..

هاشم ...ثائر خوية اني ما اريد التقي بيهم بس اسأل عنهم بس شو ماكو جيران بس بساتين؟

ثائر ...هسة حدر نلگى بيوتهم وبيوت عمومتهم وجم واحد غريب ننشد الغريب عنهم بحكم هوا بنصهم ومعاشرهم

هاشم ...هاي هي خير ان شاءالله نصيت اسبح وما حسيت غير زين العابدين صاح دخيلك يا علي هاي شني

رفعت راسي متفاجئ اشوف الزلم ضلو يطلعون گبالنه مثل عيون الدود مسلحين وملثمين
من البساتين ويطفرون من فوك سياجات البساتين الناصية

ثائر ضحك باوعتله كتله ليش تضحك راح يكتلون هذول
ثائر ...الله انطاها والله ياخذها ما عندي شي بهاي الدنيا اخاف اموت ويفوتني

بلعت ريگي بقلق كلت هسة يصير بالشيخ والولد شي من وراي لو وحدي ف لا اهتم 
طبگنا واجة علينا واحد طول بضخامه بيده سلاحه اشرلنا الشيخ نزل الجامة وسلم علي

گال الولد بحدة ...انتم گاصدينمن؟

زين العابدين ...گاصدين عرب آل يوشع

باوعلنا الولد اسمر وعيونه حادة طالعة من اللثام حتى ثائر اصفر لونه باوعتله بنظرات "ها وين الماخايف؟" سوالي حركة خوف درت وجهي منه الولد گال بنفس النبرة

...احنه آل يوشع ، انتم نفسكم الامس اجيتو صوبنا ونشدتو عن جبيرنا الحجي طاهر؟

حجيت اني حتى اطلع الشيخ وثائر من القضية
...اني اجيت خوية وسألت عن الحجي
...شعندك من سالفة؟

هاشم ...شغلة بيني وبين الحجي

فتح الباب الورا وصعد قبل لا يسد الباب صاح رايحين للحجي لحگونة
سد الباب وكال ... امشي انه اخذكم بس وحگ الاسمه علي اذا يطلع بيكم شر انه چتالكم واخليكم ريوگ للسمچات

ثائر ...جا خوية انه افادي هل كبرة تاليتي اطلع ريوگ؟

خزره ثائر سد حلگه بعد ما نطق شي دلانه واني محتار شنو احجي شنو اگول هذول مبينين شرانيين بس الله الساتر منهم اذا اريد اطلع الولد منها لازم احجي الصدك للحجي بس اذا شفته بي مجال شوية احاول اغير الموضوع واسده لان قيس گال بس اسأل واني بعدين اخذ ليلى واروحلهم ..

الولد گال ...الشايل سلاح خل يذبه گبل ما يتفرغ براسه

هاشم ...خوية ما عرفنا اسمك؟
خزرني عبالك قاتل ابو ورد بصوت حاد ...هادي
باوعتله بنظرات وين الهدوء؟

جليت صوتي وگتله ...خوية لا شايلين سلاح ولا شي وهسه انته طرگت گلوبنا والله اني الجاي عليكم الشيخ وثائر مالهم شغله يمكم

رد الشيخ ...انه والسيد واحد مالك شغل

هادي ...اطبگ وصلنا يم المصيف الكصب اطبگ

طبگ السيارة ونزلنا النوب الزلم تروش مثل خليه النحل هذا الشايل على ظهره كارة عنگر (طعام للحيوانات) وهذا اليسرح بالطليان مشينة للمضيف طبينا سلمنا گال زلمة مهيوب كاعد بنص الديوان بصوت عالي

حجي طاهر ...هلا بضيوفنا من امس متانينكم

سلمنا عليهم بالايد وكعدنا باوعت للشيخ ورجعت باوعت للحجي يخوف اكثر من هادي گلت هذا هسه اذا اگله جاي اخطب منكم مرة يكول منين تعرف نسوانا ويحطني ويغطني بالساگية واني ماريد اجذب بعد هذول نسابتنا احجيلهم الصدگ وين تريد توصل خلها توصل

بس ضيفونه كهوة بنفاجين وسألنا شعدكم تفترون هنا وتنشدون علينا

كتله بهدوء ...خذينا منكم مرية وردنا نسأل عنكم ونعرف مرجع چنتنا هاي هيه وذيج هيه حجي

عكد حاجبة وباوع لجماعته ...جا ياهو منكم معرس مرته وانه ماعندي خبر يشهد ابو فاضل اشمرة من العشيرة

رديت من مكاني بهدوء ...حجي اني سيد هاشم احنه سادة يرجع نسبنا لرسول الله وهناك معروفين ان شاءالله تشرفنا وتنورنا يوم ونقوم بواجبك ونضيفك
رد ...هلا ومية هلا بالسادة على روسنا

رديت ...سالمة روسكم ...حجي احنه ماخذين بنيتكم ليلى العايشة غاد يمنه ببغداد خذيناها لاخوي سيد قيس

صفن شوية وگال ليلة بت اخوي؟
هاشم ...علييييك نور حجي واحنة بعد جايين نسأل نريد نتعرف على نسابتنا

واحد صفن بوجه الثاني وباوعولي اخير شي وگالو وان شاءالله سمعتو كل خير

هاشم ...والله سمع ما سمعنا بس شوف شفنه

ضحك الحجي وگال ...مو وضعكم شوية مريب واحنه هنا هاي حدودنا ما يتخطاها الغريب وبعد انتم مو غرب

الرجال بهت بدأ يعرفني عليهم وعلى اصلهم هو يحجي واني اباوعله واكول بداخلي هسة اني شجابني شورطني شنو راح استفاد هي البنيه حتى ما عايشة يمهم

ترسني معلومات عنهم عرفت كل شجرة العائلة ورجع سألني عن بتهم كتله تزوجها اخوي قبل فترة بس احنه ما نعرفكم وردنا نتشرف بيكم بالاخير انتم اجداد احفادنا اذا الله كتب ان شاءالله يكرمنا

طال الحديث بيناتنا بالاخير عزمته كتله احنه عاداتنا ولازم نعزمكم انتم عمام البنية واتمنى تنورونا يوم الجمعة وطلعت شيريد يصير خل يصير غير اني لازم اقوي العلاقات والروابط الاسرية بين العائلتين ..

دنيا .. اجة يوم العزيمة ناس تنظف وناس تطبخ وناس تسولف والزلم ملتمين خواتي زعلانات يكولن شنو تعرسون بدون ماندري كلتلهن امي لا بدلة ولا حمرة وكحلة بس عقد

وعماتي يلومن وخالاتي ضايجات الله اكبر عبالك هنه امهات قيس وضايجات حتى امي من عرفت متزوج ما سوت السونه خالاتي وعماتي

ننتظر جية العروس ليلى وكل شوية نشيل بردة الشباك نباوع
طوعة گالت شوفي سيد مؤمن اخوي واخوج واكفين سوية وكأنهم توم

باوعت وسويت نفسي ما مهتمة رغم بداخلي رغبة اضل اباوع واشوف شكله واحفظ معالمة كان يشبه اخوي مصطفى بشكل كبير بس سيد مؤمن اضخم

اباوعله لابس اسود وعمامته سودة سبحته بأيده ويحجي ويا مصطفى منصي ضحك وهز راسه ابتسمت بدون شعور سدت البردة وكالت عيب لا يشوفونه

رحنة نثرم زلاطة وطوعة تحجي كل حديثها عن سيد مؤمن سبحان الله بس صرت اهتم لموضوعه وعندي فضول اتجاهه صار كل حديث طوعة يدور حوله

كنت استمع الها وادقق بكل كلمة تكولها تخص مؤمن لحد ما سمعنة اصوات الاطفال يصيحون اجة عمو قيس وزوجته

باوعت من البردة اشوف قيس دخل يجر بحقيبة السفر الكبيرة وامي طلعت مبوشاية تستقبل زوجته كانت تمشي ورا قيس منصية ولابسة عباية راس سودة لافه نفسها لف ..

الولد يهوسون ويدبجون يستقبلونه امي دخلت لبنيه من باب الصالة ضليت ادور بعيوني على سيد مؤمن شفته واگف ويا عمامي بكل ثگل وشكله وقور سلم عليهم قيس باس ايد ابوي وايدين عمامي ابوي شكله طبيعي ويضحك بس ادري هذا مجرد تمثيل وبداخله جاي يفور

من صار قيس گباله منصي ما رفع راسه ولا حط عينه بعين ابوي

ومنا العلويات استقبلن ليلى طشن عليها جكليت ويبوسهن ويهوسن طبت يالزهرة تلكيها
البنية وجهة مخطوف وتباوع بالوجوه مستغربة وخايفة حقها اكيد تفكر برد فعلنا وموقفنا

نصت باست ايد امي وحضنتها بوست خدودها اخذنها للصالة كعدنها طاحت عبايتها من راسها لامتها من يم صدرها وتباوع للعلويات يسألنها وتجاوب مبتسمة بثگل ومبين ابتسامة مو من گلب

كسرت خاطري كلت خليني انقذها مشيت من شافتني كامت وضحكت بوستها ورحبت بيها
كتلها نزعي عبايتج ليلى ما يدخلون زلم هنا

نزعت عبايتها اخذتها من ايدها وابن مصطفى جاب الحقيبة اخذتهن صعدتهن لغرفة قيس فوگ

اباوعلها شكد حلوة الغرفة ذوق مصطفى والفرش ذوق امي كلشي مرتب وحلو خليت الجنطة بصف الزاوية وعبايتها علكتها بالشمعدان وطلعت ..

من نزلت باوعتلي براحة وابتسمت
مشيت للمطبخ اكمل اساعدهن وصار الغدة صبينا الاكل وتغدو كامت هي كالت اريد اغسل اخذتها تغسل تنفست براحة وكالت ...اكدر اروح لغرفتي لو عيب؟
دنيا ...لا مو عيب غير جاية من سفر وتعبانة هسة احاجي امي تصعدج

ليلى ...اكلج ما تعرفت على خواتج
دنيا ...من يرحون العمام هن يضلن يباتن اعرفج عليهن ما اظن عافنچ وما سلمن عليج
ليلى ...بس ماعرفتهن يلا بعدين نتعرف

رحت حاجيت امي اجت بنص العلويات كالتلها
ام مصطفى ...امشي يمة عروستنا امشي ارتاحي دربج طويل ومبارك عليكم العرس ان شاءالله

ليلى ابتسمت وهزت راسها كامت ويا امي صعدت واني حطيت روحي وراهن التفتت امي شافتني خزرتني ونزلت ركض

ليلى ...صعدتني ام قيس لغرفتي اول ما دخلنا سدت الباب و گالت تعاي كعدي هنا نحجي شوية ما صارت فرصة انفرد بيج جوة

گعدت باوعتلي وهي زامه شفايفها وراها انفك وجها وكالت بهدوء
...عمج السيد ما راضي وسوا هاي العزيمة وعلن زواجكم بسبب خوفه على سمعتنا خاف العالم يشوفونچ ويا قيس وعبالهم عشيقته تفترين ويا وتنزل روسنا

هزيت راسي ورديت بهدوء ...ما ردنا توصل للغضب والغصب بس ما خليتولنا حل ثاني يحبني واحبه وزواجنا كان شي ضروري اني ويا صرنا روح وحدة

ابتسمت ومشت ايدها ع كتفي
...ما صرتو روح وحدة بعد وكت بعدكم صغار ومتهورين يمكن ما تحبون بس منبهرين واحد منبهر بالثاني وتوقعي بأي لحظة ينتهي هذا الانبهار وراها تكتشفون شكد جنتو غلطانين من سويتو هيج
واني ما اتمنى هذا الشي والله ياريت تكملون وتخلفون ونفرح بيكم

هسة اني ردت ابلغج بغضب عمچ واريدچ تكسبينا وترفعين راس قيس صيري زينه ومحترمة والتزمي بدينچ وحشمتچ حتى يحبج السيد ويغير نظرته بيچ

الوكاحة والعرامة الوحدة تسويها من تاخذ ناس هيج اطباعهم يعني صعبين وصلفين بس انتي ماخذتنا احنه مو هيج الحمدلله والصلافة والعرامة والوكاحة حشاج منهن بنيتي ما توكل خبز يمنه اذا تردين تكسبين رضا عمج وترتاحين عليج بكم شغلة

صوت ناصي ولبس محتشم لا تراددين اذا حاجاج يمكن يختبرج كتمي غضبج ونزلي راسج لا ترفعينه
لان السيد ما يصيح على جنة عمره وحياته ما سواها
ولا يعارك چنة
التزمي بدينج صلاتج يوم ورا يومين يمكن يضل يحبج اكثر من بناته حتى

ليلى ...ان شاءالله عمة كل شي كلتي اسوي

...عفيه السباعية يلا ارتاحي ومن تنزلين العصر لبسي ثوب عريض واحتشمي زين وتعاي طيحي ع عمج بوسي ايده

هزيت راسي عافتني وطلعت تمددت غمضت عيوني وجسمي يرجف عبالك اليوم عرسي بليلة دخلتي ما حسيت بهيج مشاعر قلق وتوتر

كمت طلعت ثوب خفيف لبسته وتمددت غطيت حتى راسي حاولت انام ماكو فوگ الساعة وحسيت الباب اندگ كمت اركض واصيح منوووو؟ عضيت لساني وغميت روحي صوت ناصي ليلى صوت ناصي

رد قيسس

فتحت الباب وصرت ورا خاف واحد يمر ويشوفني دخل قفلت الباب تمغط بتعب كان وجهه مبين بي التعب والقلق

قيس ...ابوي خازرني وعمامي كل ما يجي واحد يمي يشاورني ويكول شلون قنعت ابوك اضل مصفن مادري شكول

ليلى ...وعماتك وخالاتك يگللي شلون تزوجتو ما اعرف شجاوب عمتي تجاوب بدالي

ذب ملابسة طلعتله ملابس خفيفه من الجنطة ولميت الي نزعهن كال بصوت خافت من التعب تعالي نرتاح وبعدين نجيب باقي اغراضنا بعد راح نستقر هنا
ليلى ...اي واضح مايخلونه نطلع
قيس ...ابوي يريد يخلينا كدام عيونه

تنهد وكال هاشم بالنجف دزيته يدور عمامج وماخذ مرتضى ويا بعدهم ماراجعيين بس الله الساتر

تمددت خليت راسي بحضنه وتنفست براحة ...هسة يلا ارتاحيت جنت ضايعة والله
...تتعودين خاتون

غمضت عيني بعد ما حسيت بأمان الدنيا كلها بحضنه وغفيت مرتاحة

كعدت العصر او بالاحرى هو كعدني صليت صلاة العصر ولبست كلابية واسعة وطويلة لبست الربطة وتحنكت بيها باوعلي وضل يضحك ويهز براسه
كتله مستغربة ...موحلوة؟

قيس ...لا تخبل والله ضلي هيج

نزعت محبسي وسواراتي ما اريد انزل متزينة حتى عطر وصاني قيس ما اخلي قوي خليت رشة ع ايدي ومشيتها ع ملابسي

طلعنه سوية من الغرفة البيت هدوء بنات اربعة كاعدات ع صفحة والسيد ابو قيس كاعد ع صفحة بيده عكازته و العلوية كاعدة بالكاع بحضنها طفل

توترت واني اباوع لابو قيس وهو بس رفع نظره باوعلي بنظرة خاطفة انخطف لوني وصابتني رعشة بحيث رجليني بادن وعثرت عطت بصوت عالي ولزمت المحجر

قيس فز ولزم ايدي يكول الله الله عدلت وكفتي تنفست بصعوبة وهمست متوترة

والعلوية من جوة تسمي علي قيس سحب ايده مني مادري ليش كدام اهله تبرأ مني ردت اكرصه بس خفت ينتبهون

كلت بصوت ناصي السلام عليكم .. والعلوية اجت لزمتني من ايدي تكول
تعالي ليلى سلمي على عمچ

تقربت منصية راسي لزمت ايده بأيديني اليرجفن وكتله بصوت ناصي
...شلونك عمو
هز رأسه ورد بهدوء ...هلا بيج عمو نورتي بيتنا

ابتسمت ورفعت عيني باوعتله بسرعة ونصيت عمتي ضلت تعرفني ع البنات
كالت هاي سعاد بنيتي الكبيرة البچر
وهاي كوثر اكبر من قيس بسنة
وهاي طيبة توم كوثر
وبعد دنيا تعرفينها و سرور اخذها رجلها ما ضلت غير يوم تتعرفين عليها

كعدتني بنصهن من باب تريد تخلق الفه بيناتنا جنت افرك ايد بأيد اباوع لقيس ضل واگف يباوع الابو وابو ولا يباوعله يلعب طفل مادري ابن منو شو هواي عدهم جهال ماشاءالله

قيس كعد على صفحة منصي اني افرك بايديني حيل عمري ما توترت هل كد
باوعت للبيت وابتسمت اول مرة اجيت جنت غريبة وذاك الدرج الصعده هاشم وسكينه من زفوهم جان حلمي اصعده واني جنتهم
تنفست براحة

كالت سعاد وهي تباوعلي بنظرة ثاقبة تتفحصني
...انتي تداومين؟
ليلى ...اي خلصت مرحلة ثانية
سعاد ...وتكملين؟
ليلى ...طبعا شلون لعد حلم ابوي الله يرحمه الزم شهادة

باوعت الابوها استغربت باوعت وياها هز راسه وكال
...ليش لا تكمل دامها حطها رجلها بدرب الدراسة تكمله بس سمعي يابة احنه نسوان موظفات ماعدنا بعد خاف تگولين بعدين صرت چنتهم وحرموني

ليلى ...الله كريم عمو على ما اتخرج بعدين اني شغلي يكون بالتدريس واكدر اداوم بمدارس بنات

عبد الرحمن ...حتى لو احنه الجنة عدنا تكعد بالبيت تربي جهالها واذا ع الراتب ننطيها بكدة مرتين كل شهر

هزيت راسي وكتله هاي هيه صار
هسة خلي اكسبه ع ما اتخرج الف حلال يحلها

ومن هذا اليوم دخلت لبيت السادة وبدت حياتي ويا عائلة سيد رحمـن الزعلان من قيس وما يباوع حتى بوجهه ..

....

الشيهانة ..

الهث وايدي ترعش رفعت السجين اريد اطعنه بنص گلبه وانهي حياته واحرمه جرة النفس صوت نفسي عالي قبل لا اضربه فز وبلمح البصر لزم ايدي وجرني حيل شمرني ع الفراش مقيد حركتي ولازم ايديني بقوة

جبران ... تردين تكتليني سهير؟ تكتليني ولچ؟ شمسويلچ انه صايرلچ درب تدوسينه وتمشين

عطت حيل ... وخر

طبك ايديني وكضهن بأيد وحده وسد حلگي بالأيد الثانية طابگ حواجبه معصب وفرك حلگي حيل

جبران ...وحگ اسد بغداد اذا صحتي اذبحج بسچينتچ

ضليت ارافس خزرني وضغط حلگي حسيت فجوجي راح يتكسرن نتر من بين سنوانه بغضب
...اششش راح اذبحج لا تتحركين سمعي اشيل ايدي عن حلگچ واذا صرختي اگللهم هيه اجتلي تريد مني اشياء موزينه

عقدت حواجبي خازرته نتر ...لا تخزرين لا اشلع عيونچ احطهن بأيدچ ولچ ..
باوع للباب ورجع باوعلي ...بعد انتي صاعدتلي تثبت عليج التهمة

هزيت راسي اي شال ايده نترت ...ليش ردت تحرگني
ضربني على راسي بغضب قاطب حواجبة وينتر
...وشعندي وياج علمود احرگچ چا شني شايفتني مسودن

نترت
...شفتك من الشباك وذاب نفط بغرفتي

ضحك مستهزأ ...بدت تتخيل مادري تفتري علي وين شفتيني بالله وشلون شفتيني مو نايم وتعب الدنيا كله بيه وحضرتچ اجيتي تذبحيني عبالك صخل ناذرته للعيد

دفعت ايده الچان لازم بيها زندي وكتله انزل وياي شوف النفط بنفسك التارس الگاع واشرحلك وين شفتك وعلي الا اصرخ والمهم عليك احجيلهم الصدگ

نتر ... نزلي يلا واذا ماكو نفط اربطج وادير عليج تيزاب

بكل ثقة نزلت امشي كلت اليوم اخصمها واخليهم يشوفون النفط بنفسهم طبيت للغرفه ااشر اريد اگلله شوف وانصدم الكاع نظيفة والشباك مسدود

كتف ايدينه وارتجى ع الباب رفع حاجبة وكال ...وينه؟ هسة لو متفق ويا واحد يمسحة هم جا ضلت ريحته بالمكان ما تروح

طبيت للغرفة اشمشم بالمكان ماكو حتى ريحة نفط انهاريت ضليت افتر وامشي للشباك وحتى عود الشخاط ماكو
من شافني انهاريت تحولت نظراته من الغضب للاهتمام والخوف

گال باهتمام ...جاي تتوهمين سهير انتي مريضة وراح نعالجچ ابوي كال ناخذج لسادة بالناصرية يكشفون السحر ويفكونه

التفتت باوعتله وعيوني تنفض غضب ...والله فزيت نفط نفط حتى دمر ايدي
شميت ايدي ريحتها طبيعية ضليت امشع شعري متخبلة واكتم صرخاتي كوة

...راح يوكف عقلي جبران راح يوگف عقلي انته جاي تخبلني جاي تنطيني دوة يخبلني

واكف متشنج وفاك عينه مايكدر يدخل جان لابس سروال وصدره عاري صعبة علي يدخل للغرفة يمي هيج ويجي احد يشوف اكتفه بنظرات الحزن والعتب

گال مقهور ...انه اخبلچ؟ من عمت عيني اذا مسويها لو مفكر حتى تفكير بيها

ضليت الوب كتله ...مثل ما كتلت اهلي تريد تكتلني
كعدت ابجي اشهك وهو صافن اشر على روحه كال بصدمة
انه كاتل اهلج
هزيت راسي اي ...انت انت مخليلهم دوة وحاركهم جلب مطي كاتل اهلي ليش ولك ليش مو ابوي يحبك واخوي ليش سويت هيج بيهم شكالتلك روحك من حركتهم

ضرب رجله بقبضة ايده وضل يحوم مثل الاسد الجريح وكف اشر على روحه وگال بأستنكار ...ولج انه اكتل بيت عمي
دمغ گصته وكال امداااني

...انت انت وذيج الليلة ردت تحركني هم مو بس اليوم بس انت تنكر تسوي نفسك بريئ

جبران ...لان انه بريئ صدك سهير اذا بعد عدتيها وكلتي انت حارك اهلي وحك اسد بغداد اكضج واكص لسانچ

حطيت عيني بعينه وكتله ...انت كاتل اهلي وهسة تريد تكتلني اني متاكدة ليش ولك ليش
كتله بعتب ليش جبرااان

ضل يضرب راسه حيل ركض للمطبخ خليت ايديني على راسي ابجي بدون صوت وتجي ببالي مشاهد مادري صدك لو خيال بس جنت افرفح وكأن عقلي مو الي

طب جبران للغرفه يرعد خزرني ولزم فكي بأيده
رفع السجينه ونتر طلعي لسانج
تخبلت جايب سجينه يكص لساني نتر حيل لسااااانج

ضليت الوب ما طول حط السجين ع شفايفي فرفحت روحي صعدت ونزلت محمي السجين وچواني بيها

عصر فكي حيل وگال ...تكولييين بعد انه حارگ اهلچ لو لاااا؟

هزيت راسي ب لا ودموعي تنزل تبلل ايده فرفحت كتمت صرختي وروحي ماعت بأيده من الم الچوية

سلهمت شمر السجين خله ايد ورا ظهري والثانية جوة رجليني وشالني خلاني بالفراش وبلل ايده مشاها على وجهي مسح دموعي وغطاني

جبران بهدوء ...تگولين بعد انت حارگ اهلي؟

هزيت راسي لا واني ابچي طلع وسد الباب ورا ولا كأن صاير شي

نار حقدي شبت اكثر وصارت تلهب واقسمت الا ادمره مثل ما دمر حياتي وحرگ اهلي بسيطة جبران اني وياك والزمن طويل ..

ليلى ... هاشم خابر ع اهله كللهم مرتضى سوا حادث وتأذة شوية مايكدر يجي وخلاه يحجي ويا اهله يطمنهم هو زين بس مايكدر يجي لازم بعد كم يوم والشيخ زين العابدين كال مرتضى بامانتي

هاشم ضل يحجي ويا اهله فترة وگال ابو هاي هي يجيك سيد مؤمن وابا ذر

نهى الاتصال وطلع باوعت للعلوية كالت ولا فهمت شي حرام والله

دخلت للمطبخ اساعدهن بالطبخ وزوجة مرتضى تبجي خايفة علي دنيا كلتلها مو حجة ويانه بعد عليش تبجين مابي شي

كلبت التمن ومشيت احضر مواعين كلبتهن حتى ينشفن طلعت كلت بصوت ناصي عمة
كالت ها عمة
...نصب غدة لو بعد؟
كالت صبن عمة هسة يجي عمجن

كلهم هادئين ولا كأن ابنهم مسوي حادث حتى مرته سكتت وضلت تضحك ويا زوجة مصطفى وتگللها من يجي اتعارك ويا ليش ما حاچاني وطمني بس حاچاهم طبعا جانت تشاقة مو صدك تحجي

صبينه اني ودنيا مصطفى اخذ السفرة مدها واولاده يمدونها ويا
ويگلوله ... صح هيج حلو امسطحة؟

مصطفى ...بارك الله بيكم نقلو بس التمن لا تشيلون المرگ

صرت ع صفحة اجة شال صينية متروسة كاسات مرگ رتبهن ونقل كل الاكل هو واطفاله

كعدو على صفحة واحنة بصفحة ثانية ياكلون بهدوء ماكو نفس ومن خلصو نكفت السفرة الولد يلمون مواعينهم وينقلوهن للمطبخ خلصنا غسل وصبينا جاي ردت ارجع للمطبخ گالي تعاي عمي ابلغچ بشي

گعدت على صفحة گال وهو يخوط الاستكان
...الجمعة يجون عمامچ معزومين يمنه عزيمة نسابة

بهت وجهي صفنت شوية ونصيت گلت بأستنكار ...عمامي؟

عبد الرحمن ...اي عمي سيد هاشم رايحلهم والله اني ما ادري بس بعد يگول لازم نتعرف على نسابتنا وعازمهم واحنة نتشرف بيهم

ليلى ...تسلم عمي مشكور

باوعت لقيس مستغرب واني مستغربة هذول عمامي شلون اسلم عليهم شلون اواجهم اني اهل قيس وردت اموت عمامي شلون

صعدت لحكني قيس بس دخل انفجرت
...مو كلت نروحلهم وحدنا هاشم شلون عازمهم

قيس ...رايحلهم ومتعرف عليهم وعازمهم يكول خوش ناس ومرحبين بي معناها هاي هيه عمامج ما نابذينج تردينهم اجوج

ليلى ...بعد ما اريد اواجه بشر بعد ما اريد قيس اخاااف اخااف بالله اجو وكدام اهلك كالو ما نريدها لو شي شمدريني بمخططهم وتفكيرهم

قيس. ..شنو ليلى فلم لو مسلسل ترى احنه هنا بالعراق الظفر مايطلع من اللحم وهذول عمامچ ناس كبارية وعشاير حتى لو مايردونج مجبورين يعترفون بيج ويرفعونج كدام عيالج

ليلى ...ومنا خالتي تكرهم .... عزززة
غطيت اذاني من سمعت صوت طلق قريب لدرجة حسيناه من نص البيت نزلنا نركض والولد طلعو ركض دخلت للمطبخ خايفة اكول لدنيا شنووو صاررر

كالت بخوف ...هذا ضابط هاد علينه وجاي يرمي على بيتنا يمه بس لا يصوب اخواني
وبهاي الاثناء رجع يرمي عيطنا بخوف وعمتي تصيح دنگن .......للحكاية بقية

رأيكم بالقصة يهمني 😁🖤

وقبل لتكولون بارت اليوم مابي احداث راح اجاوبكم ادري 😂😂😔
بعد ماكدررت اختصر هاي التفاصيل