رواية حمائم تخشى الطيران الفصل الخمسون 50 - بقلم فاطمة العبادي

فاطمة العبادي

في #حمائم_تخشى_الطيران

قراءة ممتعة كيكاتي ..

وصلو البارت 1000 تعليق وتصويت بين الفقرات لطفا 🖤🖤

ليلى .
.
تم العقد رجعت كعدت بمكاني اخته طلعت الحلقات
لان ذهب ما مشترين نشتري سوية بعد العقد هيج كان الاتفاق الما يهمني بس يهم خالتي

فات لابس دشداشة وعباية سودة
وغترة بيضة وعگال ..فكيت حلكي لحظات مصدومه من شكله وبسرعه تلاحكت روحي ورجعت نفسي طبيعية

خواته يهوسن ويذبن علي جكليت لحد ما وصل الي
رفع عينه مشت علي من فوك ليجوة يلا كعد يمي

ضليت محتارة بروحي رغم جنت لابسة بدلة مستورة لونها بنفسجي وبيها من الصدر كرستال فصي
بس ما طالع صدري مستور بس حسيت روحي عريانة يمكن لان كنت بدون حجاب

قرب وجهه صار قريب مني باوعتله ورفعت طرف حاجبي مستغربة ..

حرب :- بنفسجي؟
نطقها وعيونه اكلني اكل ..

باوعتله خجلانة ميلت شعري ليورا وضليت اتلفت بالمكان ..
باوعت ورا الشيهانة واكفة مكتفة ايديها
تباوع علينا نصة رأسه اخذ الحلقة
رفعت ايدي قدمتها علي

لزم ايدي لبسني الحلقة مشة ابهامه ع اصبعي بخفة سحبت ايدي منه
اخته انطتني الحلقة مالته حتى البسه
لزمتها ايدي ترجف لزمت ايده ورجفت مشمئزة
بعدت ايدي وحاولت البسه الحلقة بدون ما الزمه
ضحك تك خد ورفع طرف حاجبه
باوعلي وهمس :-ع كيفج يول تا ترجفين مني .. غير اني زلمتچ؟

بلعت ريگي متوترة رفعت عيني للشيهانة نفس وكفتها مكتفة وتباوع علينا
التفتت وراحت للباب بهمه تمشي ضليت اباوع وراها من مشت حواجبها معقودة .. شوية وگبت العيطة
ما ندري شنو صار وليش هاي الهوسة .. منو تعارك

اخته ام دلال طلعت بسرعة ع الصوت ضليت ادور بعيوني ع هادي جريت نفس من شفته بعده ع كعدته يم شعلان
هادئين وما بيهم شي

كام حرب من مكانه وهو يلم عبايته وابتسم تك خد
بمكر وعيونه لمعن كال بصوت خافت
:- اجة الحمل برجله لوكر الذيب

مديت ايدي لزمت عبايته التفت باوعلي جانت بأيده سبحه ملفوفة بسرعه نزلها وفرها وشمرها بأيده الثانية سمعت صوت احجارها ضرب بنص گلبي

مد ايده ع ايدي الي لازمة بيها العباية لزمها وجرها بهدوء نزلها خلاها ع فخذي ونصة
قرب وجهه من اذني ودنك علي صار كله قريب مني
غترته النازلة صارت يم وجهي
وانفاسه تضرب جوة اذني دافية
همس بهدوء
:- عش تگضبيني يول؟ تردين اضل يمچ لو خايفة؟
سكتت رفعزطرف حاجبه

حجيت بهدوء: - ما احب المشاكل حرب

هز رأسه وقرب وجهه من اذني اكثر
همس :-واني اشتريها شراية

استقام بوگفته رفعت عيني علي اشوفه لم عبايته وطلع يمشي والبنات بالمطبخ يباوعن من الباب
ضليت ارجف وافرك بايديني
اريد اكوم اتفقد كل شي بنفسي بس احس رجليني ما يشيلني ارجف ويا هذا الكعب يمكن اطيح

دخلت الشيهانة واجت الي تقربت وجها مطعون نصت راسها همست بأذني
:- سيد قيس انفجر واجة يطالب بليلته .. عگب ما صارت لغيره اتمنى اطلع بنفسي واگله بعديش سيد؟ لو فات الفوت ما ينفع الصوت

بلعت ريگي متوترة رفعت عيني عليها مصدومة وتجمعت الدموع بعيني
كتلها بقلق
:- خابري هادي ابن عمي بسرعة

باوعت بمبايلها وضلت تخابر اسمع اصوات هوسة زلم واباوع النسوان انخبصن خبص
الشيهانة تخابر ماكو جواب من هادي تقريبا ربع ساعة وهدأت الهوسة وانخفصت اصواتهم

دخلت ام دلال تحجي بهمه :- بنوات يلا يكولون راح نرجع لبسن تسترن

اجت علي كالت
:- بالمبارك عروستنا .. الحمدلله ماصار شي هاي المشاكل تصير بكل مناسبة منتهين منها

بوستني مرة ثانية كمت وكفت اودعها بس احس طولي ما مستقر اريد اوكع بأي لحظة
امه تباوعلي من فوك ليجوة وفرت ايدها ولوت حلگها ما قابلة ودارت وجها عني

هسة بالله هاي شنو تحطيلها وتطيب؟ دازة ع
ابنج اني؟ غير هو اجالي
استغفرت بيني بين نفسي وكلبت عيوني بضجر

سمعتها تحاجي اخته الثانية
:- البومة حتى بخطبتها مشاكل

كامت طلعت تمشي ما قابلة نسوانهم ودعني وضلن يطلعن بس ام دلال رجعت كالت
:- حرب يريد يدخل يسلم عليچ

رمشت مستغربة ، بعدها هزيت راسي اي
وكتلها هلا بي ..

راحت للباب مال الاستقبال شوية ودخلت ودخل وراها حرب يعدل بغترته من كدام
وصل يمي نصة راسه وكال
:- اجة واني الاعرف شلون ارجعها الو

حجيت بهمس وعيوني تتوسله
:- ابو ابني هذا لا تسوي شي وتكسرني گباله

عقد حاجبه وكال بنبرة ناصية يغلفها الغضب
:- گبالو؟ منو تقصدين منهم؟
:- شبيك حرب ابني اذا صار شي الموقف يضل طول العمر ينذكر

:- اني اريد يتذكرو طول العمر حتى يعرف النسوان شتجيب من زلم
جيتو هذي و وكفتو كبالي ورجفتو ما تشفي غليلي
بس حرگتو من راسو لطرف جدمو

:- هاي هيه احترك عوفه

مد ايده لزم زندي وضغطه حيل بأيده عقدت حاجبي متوجعه وغمضت عيني
ايدي جانت بصفحة الحايط ومحد يشوف حركته بس تألمت من لزمته

نصة اكثر ويم اذني همس بغضب
:-احترگ .. بس ما اتركو لحد ما يصير رماد وادوسو برجلي وامشي

همست من بين اسناني بغضب
:- عووف ايدي!!

عافها واستقام بوگفته باوعلي ثبت عينه بعيني
ورفع طرف حاجبه رفع اصبعه عدل طرف شاربه
وگال
:- اودعناچ ليل ..

هزيت راسي مختنكة وهمست :- الله وياكم

.....

دنيا ..

جو من التوتر والقلق وانعدام الامل وقطع كل خيوط الرجعة .. بسيوف الكبرياء

انتهت قصة ما كانت مثل اي قصة
قيـس وليلى .. قصتهم كانت مثال مؤلم
كل السادة يحچون بيها .. صارو موضوع بكل كعدة

ببيوتنا وببيوت اعمامي .. كل لمة لازم ينذكرون والحديث عنهم يطول

اليوم ليلى خلت نهاية لهاي القصة وقطعت اخر خيط امل عند قيس

خبر خطوبتها كان نايبة ونزلت على البيت ..
مو خبر عادي
قيس انهار .. وابوي حمل قيس المسؤولية
گاله انتَ عاندت وردتها وضليت معاند ومصر عليها فترة طويلة لحد ما خليتها تصير من عدنا وبينا
من شبعت عينك منها وغلطت تخليت عنها بأول مطب وهسة بسببك عدنا ولد راح يكبر بحضن زلمة غريب ..

مصطفى كان يفور وأيد ابوي وكمل ع كلامه ..
:- فوگ كل هذا ما شديت روحك وحاولت ترجعها
عفتها وعفت ابنك .. البنية هسة راح تتزوج واحد غريب ويختلف عنا
اطباعه وطبيعة حياته وعقيدته .. كل شي بي مختلف هادي بس بالاسم راح يكون ابنك
لان راح يتطبع بأطباع هذا الزلمة

كال بغضب :- شلون اخذه منها؟ تردون اخذ هادي منها اجيبه هنا اربي ويا اطفالي
سيد رحمن :- صوتك لا ترفعه ع اخوك الجبير قيس
انت هواي تماديت كلنالك لا تطلك

قيس :- هي تريد الطلاك اجبرها؟ اجبرها تضل وياي؟ البنية ما الها نفس بيه طلعت من نفسها فد نوب ما تواطني بعيشة الله

مرتضى :- حقها من عمايلك وبسبب ضعفك ولك النسوان يحبن الزلمة الگلبه قوي وتصرفاته مدروسة
وعنده غيره وشهامة .. وانت كل هذني ما عندك

غطيت حلكي مصدومه مصطفى خزره لان رزله كدامنا وقيس ضل يفور صار نار
رجع مرتضى يكمل ما يقبل يسكت

:- هسة من شفتها راحت من ايدك رايح تهجم ع العالم وتهادد
شنو كلتلك روحك من وكفت بنص هاي العالم وتهدد خطيبها.
يابة متخيل ابنك واكف كبال الزلمة يكله حرب اني كتالك!!

تدري هسة وبهاي الظروف اي واحد عنده عداوة ويا هذا الزلمة يكتله ويطلع منها مثل الشعره من العجين وانت التوكع بيها!!

مصطفى :- ما تعرف تتصرف شكبرك بعد تصير؟

قيس :- هاي انت كلتها اني ما اعرف اتصرف واريد اضل ما اعرف اتصرف لحد ما يرتاح كلبي
حجة بوعيد وكام يريد يصعد دفعه مصطفى من صدره وكعه ع القنفة وابوي جان يفور يباوعله بغضب

رفع عكازته يأشر بيها ويهدد
:- اذا تضل بهذا طيشك حتى العمامة تنزعها لان انت مو اهل الها هاي عمامة رسول الله تريدله زلمة معدل يعرف يفرق بين الحق والباطل وتصرفاته مدروسه .. حليم .. حكيم .. ويتحكم بأعصابه وينتقي الفاضه

قيس :- هو من البداية الغلط منكم شنو صار ربطتو بكوني سيد وجدي رسول الله ولازم اتزوج علوية
كل الغلط بدأ منكم لو مسانديني من اول ما ردت ليلى و واكفين وياي ما وصلنا لهاي المواصيل
بس ضليتو تلحون اخذ فاطمة واخذ فاطمة علوية ومن ثوبنا .. خليتوني اسلك طريق غلط وهسة اني الواكع بيها واني الدا ادفع الثمن

رحمن :- هاا هيج صارت احنه الكلنالك طلكها وعوفها وحيدة بالغربة؟ ومن رجعتو التقيتو احنه الكالنالك ارجع طلكها وعوف ابنك؟ هم هذني اشمرهن برؤسنا واطلع منها قيس

قيس :- السالفة غير لو واكفين وياي اول ما ردتها ما وصلنا لهنا انتم ما تفهمون اني شنو اقصد ولا راح تفتهمون

كام بغضب صعد امي بس تبجي مغطية وجها بالحجاب مقهورة .. الحيرة صارت بعيون الكل
والكل مقهورين من هاي النهاية .. ومن غضب قيس وتصرفه الاخير

بس اكثر شخص انقهر هو فاطمة دموعها ما وكفت وكانت تسمع كل حرف يحجي وتشوفه وهو يحترگ عليها ويهدد بخطيبها واخيرر شي كلامه الي اثبت الها هو ما رايدها ابد

جانت بس تبجي واكفة بباب المطبخ مكسورة الخاطر ..شوية وراحت جابت اطفالها من الحديقة وصعدت نص ساعة ونزلت لابسة عبايتها وتجر بالجنطة

اخواني وابوي راحو للاستقبال ما شافوها بس احنة جنة جوة ضلينا صافنين
شمرت الجنطة بنص البيت وصرخت
:-خل يجي واحد يوصلني لبيت اهلي ضلي ويا قيس ما الي بعد

سميرة :- فاطمة كولي يالله تشوفين الوضع يساعد لو اعصابهم باردة؟ ليش تكبرينها

فاطمة :- لا اريد اكبرها وازيدها وصلت عندي حدها
هو مو طلگها المن محترك عليها بعد اريد افهم
ليش شاب نار ومجاي يطفئ
ليش يروح يتهجم ع عمامها وخطيبها ويهدده

زين ابنكم الفايخ شنو هدد خطيبها؟ يكله طلك خطيبتك علمود ترجعلي لو اكتلك
لو شنو بالضبط؟

جان احساسه ميت وتوة صحى؟ صارلنا شكد من رجعنا وعرف عنده ولد منها
ضل نشيله منا ويطيح منا مايعه روحه عليها
لا خله بايدي ورقة طلاكي وكال يابة اني مااريدج روحي انكلعي لبيت اهلج وخلي المجال الها ترجع

ولا نساها .. وضاله اني متعلكة وهو بحضني يتبكبك عليها ومن اروح لبيت اهلي واكله طلكني يكلي لا ويرجع ياخذني

الله لا يوفقه ولا يرضا علي دمرني بضعفه
دمرني دمر حياااتي ... صارلي سنين ويا دمعتي ولكمتي بالسوة من ورا حتى استقرار ماعندي

ابني بحياتي ويا .. وكل ساعة اكول راح ينهجم كلشي بنيته وينهدم فوك راسي

صارلي سنين عايشة ويا ما مرتاحة علاقتنا مهددة بأي لحظة يشمرني ع صفحة ويرجع عليها
ومن رجعت وصارت كباله لا كدر يعوفني ويرجعها
ولا عافها واشتراني
كل شخصية ما عنده ابنكم هسة ترجعوني لاهلي جزعت اني

سميرة :- والله عيب عليج وما تستحين من رحتي ركضتي لحصنه تدرين بي يحبها محد طكج ع ايدج
ولا حطينه ع ركبتج سيف خطبناج وانتي القبلتي ورحتيله برجلينج شكو تتهجمين هسة وتحجين ويانه هل شكل ترة ما اقبل هسة اخابر امج

فاطمة :- لا تخابرون اني رايحة واحجيلها

جرت جنطتها تبجي اعصابها نار جانت تفور وطلعت تمشي وحدها بالشارع ع ما حنان فزعتهم لحكها مصطفى بالسيارة شالها وصلها لبيت اهلها

شوية وعمتي خابرت كالت لامي سمعي داده اني مالي دخل بمشاكل فاطمة وقيس
عسى ما يتذابحون ، هاي البنية يمنة يجي رجلها يتفاهم وياهم يردون يتطلكون بكيفهم يردون يضلون بكيفهم مالي دخل

كلتلها امي هي بكيفهم محد يتدخل بيهم ونهت المكالمة

عافت خاتون والحسن هنا ما اخذتهم وراحت وحدها
الدنيا صارت ليل اجة مؤمن كال صيحوله احجي ويا
ما قبل قيس ينزل .. صعدله مؤمن للغرفه
اني شلت الحسن خليته بحضني وكلته وخاتون تلعب ويا كريمة

شوية ونسمع صوت بالباب انخمشت گلوبنا خمش
امي خلت عبايتها ع راسها و وكفت بالباب تراقب الصاير دخل هاشم بسرعة صعد يركض
ورا مرتضى يحجي بغضب

:- طالعين على قيس علي بلاغ

حنان :- خطيب ليلى مبلغ علي

مرتضى :- اي يستاهل

سميرة بغضب :- ولك هذا اخوك

مرتضى :- خلي السجون تربي شوية وتعلمه

سميرة :- اهاا شقصدك احنه ما نعرف نربي

لم شفته ما جاوب نزلو هاشم و قيس ومؤمن وقيس يحجي
:- ليش تبجن شنو كصو راسي واخذو؟

سميرة :- ولك يمه ليش علعلتني ومرمرتني هيج هسة شلون بيك شلون اذا سجنوك وما طلعوك

قيس :- بعد احسن

هاشم :- امشي سلم روحك هسة واحنة هسة نجي وراك نشوف شلون تنحل

طلع قيس ويا الولد ضليت ميته خوف لان سلم نفسه الهم اجة مؤمن جلبت بايده خايفه ودموعي تنزل
:- خاف يسووله شي مؤمن
:- ما علي شي هسة نروح ورا ونحلها

هزيت راسي اي مسح دموعي وميل راسه
:- لا تبجين علويتي
دموعج غسلني والله مردتيني مرد دومج بس تبجين واني دموعج تحركني

دنيا :- شسوي والله تعبت وگلبي خلص
مؤمن :- اعوضچ ان شاءالله .. عن كل هذا التعب بس لا تبجين ضلي يم البنات من ارجع امر اخذج وياي

هزيت راسي اي .. باس جبيني وحضني
:- دنيتي اذا رجعت وشفت عيونج باجيات ازعل منج وزعلي ثكيل

دنيا :- لا بعد ما ابجي بس طلعو قيس

مؤمن :- هل رايحين يابة صبرج علينا هسة قيس غير يتعلم من اغلاطه ويبطل تسرع
دومه تعبان و واكع بمشاكل بسبب هذا التسرع الواحد لازم يفكر الف مرة قبل لا يتصرف اي تصرف حتى ما يصير بمكان قيس هسة شابع ملامه

راحو امي ضلت بس تبجي مقهورة غيم علينا الحزن
كل واحد اخذله صفحة ضايج ومتضايق
البيت صار يخنك. فترة ورجعو اسمعهم يحجون
ويشرحون لامي

يكلولها الضابط راسه يابس وطردنا من المركز حتى ما قبل نحجي ويا ويحجي وكأن اكبر واحد بالدولة بظهره ما نظن سوء استغفرالله نتوقع مرتشي

سميرة :- لا والحظ الاگشر هسة شلون والحل؟

مرتضى :- الحل يم خطيب ليلى هو يحلها من يتنازل
لان قيس مهدده ومتهجم علي

مصطفى :- انتم كلكم ملتهين بالبلوة مال قيس بس ولا واحد منكم حط گباله اسم خطيب ليلى وربطه بالماضي مثل ما سويت اني

كلهم التفتو علي
حرب اسمه الكامل من ذكره الضابط كدامي وشدد علي ذكرني بواحد نفس اسم الاب والجد وثنينهم من الغربية
مستحيل يكون تشابه اسماء هم اخوان فعلا

مؤمن :- اكلك خوية طلعها للدرة؟

مصطفى :- الضابط الي تهجم علينا وبعدها انتحر
نفس الاسم حرب خطيب ليلى اخو الضابط صهيب

فكيت حلگي مصدومه ومصطفى كعد يذكر الاسماء والمحافظة ومن ختم ضرب ع الميز كباله بباطن ايده وكال
:- حتى الوجه من تباوعله يشبهله بس هذا اصغر والعيون نفسهن لا انسى عيون الضابط صهيب ولا انسى نظرة حرب مساع العصر من حط عينه بعيني نفس العيون والنظر تكول الرائد ما مات .. عايش و واكف كبالي سبحان الله

عبد الرحمن :- يمكن يصيرون كرابتها من صفحة الام والنصيب جمعهم

مصطفى :- هاا يا نصيب هذا؟ معقولة حرب ما يدري بمشكلة اخو الصارت تخص ليلى؟ لو ما يدري باخو جان يحبها؟ اذا ما يدري تمشي الامور عادي
بس اذا يدري هاي مصيبة بحد ذاتها

مؤمن :- يجوز تشابه اسماء
مصطفى: - اكلك حتى العيون تكول الرائد واكف يباوع بعيني والمحافظة
شنو كلهن صدفة

هاشم :- ابن امي .. احنه بهذا حجينا ما راح نستفاد شي عمام ليلى هنا خلي الوالد يسير ع حجي طاهر يحجي ويا
بلكي هو يصير واسطة خير ونحل موضوع قيس

احنة شنو نستفاد اذا عرفنه حرب اخو الرائد لو ابن عمه؟ مالنه اي فايدة

مرتضى :- هاشم هذا نفس الموقف جاي ينعاد بس بالعكس
سميرة :- يمةةةة!!

مصطفى :- هذا الادك علي واريد اوصله اظن اظن اعوذ بالله من ظنوني
حرب خطيب ليلى استغل الفرصة وما راح يعيدها لقيس بسهولة لان من اخو تهجم علينا احنه ما عديناها ولا الحكومة عدتها وبالنتيجة انتحر الرائد .. وحرب خسر اخو

رحمن :- المقصد من كلامك .. حرب ممكن يدفع ويرشي حتى قيس يتأذى بالسجن وتصرفه يعتبر انتقام بسيط لاخو؟

مصطفى :- اي ليش الضابط تصرف ويانه بهذا الاسلوب وطردنا ويحجي منفوخ عبالك ورا الحكومة كلها

هاشم :- زين يابة روح ع حجي طاهر احجي ويا خلي يتدخل ويحلها والباقي يبين بعدين

مؤمن :- اي عمي صحيح واكيد حرب واهله يخجلون من حجي طاهر لان ماخذين منهم مرة وشي ويلينون بسرعة ويخف غضبهم

تنهد ابوي بتعب وهز رأسه
مد ايده لمصطفى :- عيني يابة اخوك كسر ظهري وهد حيلي

ساعده مصطفى واخذه وطلع لبيت ليلى حتى يشوفون حجي طاهر ويطلبون منه يتدخل ويحلون المشكلة بالتراضي .. بين الكبارية

ليلى ..

ضلو عمامي يمنا ع العشا وهادي عزم جبران رجل الشيهانة وابو
جنة مخبوصين خبص حتى اني بس راحو اهل حرب دخلت للمطبخ اجهز واحضر كل شي وياهن
رغم الاكل جابو جاهز بس خو ما نخلي بسفري

خلينا العشا الهم واحنه تعشينا جوة بس خالتي ما كعدت ضلت تسوي جاي

هادي من المطبخ اسمعه يحاجيها يكللها الجاي خفيف ما ينشرب ثگلي شوية

نسيمة :- يوم انت حتى من تحجي ع الجاي احسك تشمر بسامير

هادي :- كون تحسين ما طكتني هضيمة

نسيمة :- داخذ الجاي وروح لا تخليني اسلم ع حجي طاهر وتدري بيه اني نسومة بنظرة اوكعه

هادي :- دهر صابچ

شيهانة :- هادي وخالتج مستحيل يكونون ع وفاق مستحيل
ليلى :- بلوة والله ريحانة اكلي شبيج حلكج فاهي
شيهانة :-معصعصة تاكل بالدين

ريحانة :- مالي نفس رايحة اشوف خالة نسومة

كامت من يمنه راحت
شيهانة :- شنو شبيها شو خوالها حرب هاجم بيوتهم فوك روسهم وشالو ايديهم منها
بعد ليش شايله الدنيا فوك راسها

ليلى :- ما سمعتي اخر الاخبار دزو خبر لخالتي يكلولها احنه بالعشاير نعرف ناخذ بنتنا انتي مالج حق مخليتها ببيتج وانتي مرة غريبة

شيهانة :- هلووو ونسومة شگالت
ليلى :- خابرت ابو خلدون هو دواهم
شيهانة :- ادخل جبران؟
ليلى :- ابو خلدون يكفي و ويوفي لا تخافين

...

ريحانة :-صافن بوجهي مضيع شي؟ ادوره الك

هادي :- ام تفلة طلعلها لسان وتحجي

ريحانة :- انت ما تكضبلك شي ع واحد تذله بي مذلة

هادي :- لا ولج بس وجهج شماله شني شو مزورگة ومزلغه ياهو وياج بعلي الفحل اكتله خلاص

ريحانة :- محد حادث بسيط

هادي :- لا مو حادث نسيمة شمالها هاي المسودنه

ريحانة :- شلون بعنتر

دحكت خالة نسيمة مخلية ايدها جوة حنكها تباوع علينا رفعت حاجبها وكالت
:- والله يا هادي بلوتها بلوة ريحانة خوالها يردون ياخذونها من يمي غصب وخوالها ابد مو خوش ابد
ياليت عندك حل وتكد تساعدنا

خله صينيه لستكاين وحط ايدو ع الباب سند نفسو علي ودحك عليها بتركيز
:- شني ماشني احجي فهميني وبهاي الركبة اعتبري شغلتها گضية
اشر ع ركبته وحجة بنخوة

كتفت ايديني سمعتها ضلت تحجيلو كل شي وعيوني كل شوية تريد تدمع بس اكضب روحي كوة مقهورة

من خلصت دحكت علي مقهورة وتحسرت
:- والله اني محافظة عليها بس خالها يكلي تك** عليها وهاي هي كدامك معتبرتها مثل ليلى هي تشهد شلون مداريتها وضامتها عن العيون

هسة يطالبون بيها يكلولي نجيب ابوها وناخذ بتنا ما الج حق تخلينها يمج
حاجيت ابو خلدون كال اخذها لخلدون ابني ونسكت حلوگهم بعقد الزواج وما الهم حق يحجون ولا حرف لان هم عايفينها من سنين

انتفض فاز ونتر :- وهذا يهو منين يعقد عليها شني هي لعبة عدكم وتلزكونها بهذا وذاك

نسيمة :- شنسوي ما تگلي؟ يكولون بنية ارملة وانتي تلعبين بيها ومخليتها تشتغل وياج
يردون يدخلون العشاير وياخذونها وبالعشاير اذا ما اخلي عقد زواجها بأيدهم ويطلع رجلها يكللهم مرتي هاي واخذتها بوكت انتم ما موجودين بي ما تنحل

بعدين احنه ما راح نزوجها صدك هو عقد حتى ابو خلدون يگللهم هاي جنتي

هادي :- وهو هذا منيين

تنهدت وردت بذبول :- صويحبي

هادي :- يعني واحد مابي حظ
نسيمة :- لا خوش زلمة

هادي :- انطيني معلوماته اروح اسأل عن ابنه ما يعقد عليها اذا ما اسأل واعرف خلفيته كلها بالله طلع مو زين وطمع بيها لو استغلها

نسيمة :-غير اني اعرف ابو
هادي :- شلي غرض بمعرفتج انه؟ يمكن ابو زين وهو طايح حظ

نسيمة :- هسة شلون
هادي :- اروح اسأل علي بمكان شغله وبالمنطقة مالته

نسيمة :- احم .. شسالفة قابل زواج صدكي
عقد حواجبه معصب :- كل شي يصير شنو تردين تورطين البنية وتدمرينها البيها مكفيها

ريحانة :- اعقد علي انتَ ومن تنحل المشكلة افسخ العقد

فك عينه مصدوم ، بهت وجهه وضل صافن علي
دمعت عيني رفعت ايدي امسح دمعتي وادحك بعيونو بنظرة توسل

ريحانة :- ما اثق بالعالم واخاف من الزلم بس انتَ ابن عم ليلى وزين ، نكدر نتفق سوية نعقد ونفسخ من تنحل المشكلة بدون ما اهلك يدرون لان اكيد يرفضون .. اهلك اقصد كلهم من ضمنهم زوجتك

نسومة كرصتني وخزرتني اسكت
نسيمة :- عوفها هاي من الخوف تخبلت

هادي :- لا خليها تحجي .. يباوعلي مصدوم وجهه باهت

رجفت ايديني حضنت روحي خجلانة من نفسي نصيت عضيت شفتي متفشلة
نتر :- مو احجي وياج احجي سولفي لا تنلصمين

ريحانة :- انتَ لا تنتر اني تا اطلب مساعدتك حتى تساعدني ما تذلني!

غمض عينه بقلة صبر مسح ع وجهه حيل وكال
:- يخسى شارب اليذلچ بوية بس انه اريد اسمع شني براسج احجي

ريحانة :- اهجس هذا الولد خلدون ما زين اخاف اتورط ويا اعقد انت علي ودافعلي كدام خوالي
وسكتهم وراها افسخ لا من شاف ولا من درى

دخلت ليلى وكل احنه سكتنا و بهتت وجوهنا
هادي طلع بدون ما يكمل وخالة نسومة ضلت تلهي نفسها بالمواعين واني ضليت ساكتة

فترة واجة ابو قيس واخو وابن عمو
خالة جددت الجاي وليلى ضلت تقضم بأظافرها متوترة ومرتبكة ما خلت بيهن ظفر

بس هم شوية وراحو .. ومن راحو دخل ابو هادي سلم علينا وكعد بالصالة يخابر ع حرب
واخذو بلسانو الحلو ومبين من فكة حواجبو وضحكتو راضي

سد السماعة وكال
الله يحفظه ما فشلني وراح يتنازل .. خوش ولد يحترم

ليلى :- الحمدلله انتهت ع خير

ابو هادي :- بس والله ما ظنيت تطلع من سيد قيس فشل ابو
ليلى :- ساعة شيطان بعد الواحد يفقد

هز راسو متحسف وفر سبحتو دحك للشيهانة وكللها بعصبية
:- انتي شلون تجين للنجف وما تمرين علينا تضلين بالفنادق هاي وحدة وياج

هي بلحظات وجها انطعن وبسرعة ضحكت
:- حقك عليه عمو ان شاءالله المرة الجاية اخسركم غدة تتدلل

:- والله انغثيت من كال هادي ضاله بالفنادق انه هم ما دريت ما حجالي الا من رحتي جا اجيتج للفندق خذيتج قصر هادي

:- لا والله اني اصلا جنت محتاجة ازور وارتاح بالامام
اذا اجيكم معناها ابتعد عن ‏الامام هواي
بس ع الجايات اجيكم
هز رأسه اي

نسيمة :- نورت بغداد حجي

:- بغداد منورة بأهلها حجية

:- تسلم يالغالي فدوة لكلبك .. هيج كل فترة ومر بغداد مو بعيدة
الا صارت مناسبة يلا شفناك

:- والله يا حجية لو بأيدي اكعد هنا شحلاته هوى بغداد يرد الروح بس الويلاد مناك والحلال ما اكدر اعوفهم يضيعون بدوني نشدي هادي
انه صاير عكازة لآل يوشع يوم واحد مااكدر اغيب عنهم

:- غير معدل لو ما يشوفونك سندهم وظهرهم القوي ما ينتچون عليك

الشيهانة قربت راسها من راس ليلى حطت اصابعها ع حلكها وغمضت بسرعة وفتحت تضحك
وليلى لامة شفايفها لداخل حلگها وتدحك عليهم

هو مرتجي ويفر خرزات سبحتو بس ما يسبح
وهي كاعده ع القنفة متشخصه ونافخة روحها

دخل شعلان يكول لامه :- يكولون يلا

هزت راسها وكامت تجهز وتاخذ اغراضها وعم ليلى سلم علي وطلع يودعهم
شوية وراحو وضلو بس عمام ليلى ع اساس يطلعون بس غيرو رايهم ما اعرف ليش

بعدين فهمت من هادي يحاجي ليلى
كللها انه كتلهم نضل الليلة وباجر نرجع دايخ ماكدر اسوق وحاتم ما علي اعتماد اخاف من سياقته بالليل

ليلى :- هلا بيكم اذا البيت ما يشيلكم عيوني تشيلكم
هادي :- سالمات عيونج تعبانين انطينا فراشات وانتي هم روحي نامي صايرة جنج سحير الليل ما تنامين

ليلى :- اي هسة فد شوية وانام

رفع ايده يفرك عيونو دايخ والتفت للبيت متعمد دحكلي ثبت عينو بعيني لحظات ودار وجهو وطلع

اخذت فراشات الهم ودخلت تسبح .. اجت خالة كلتلي عزة بعينج خطبتي الولد من روحه
ريحانة :- احسن حل بس هذا نأمن بي ذاك خلدون مو خوش وانتي تدرين ليش تورطيني ويا

نسيمة :- ولج هو ابو اقترح
ريحانة بغضب :- ابو اقترح حتى يخليني مصكعة لابنو يدري بي دايح ويدور نسوان راد يجرب يربطو بيه حتى يختبر اذا يصير زين لو يضل بدياحتو

نسيمة :- ماادري بس هادي ما فكرت بيها من قبل هسة هو اذا قبل بعد احسن وافضل

هزيت راسي اي :- اثق بي ولو اني اكرهو ما اطيق ادحك بوجهو بس شسوي ماعندي غير حل

نسيمة :- هسة ياريت يقبل تسهل السالفة اكثر
اظن ما طلعو علمود نحجي بالسالفة

هزيت راسي اي .. طلعت ليلى من الحمام خصمت عيونها بشك وضلت تدحك علينا
نسيمة :- دروحي مشطي وتعاي سالفتنا طويلة

ريحانة بهمس :- خاف تزعل مني
نسيمة :- اخليها تصيح لهادي ويجي يكعد ونحط حل للسالفة كلها

هزيت راسي اي هي راحت تمشط وقبل لا تجي هو من باب المطبخ صاح راد يدخل وخالة كلتله تعال لابسات حجاباتنا

دخل بس حواجبو معقودة دايخ خطية

كعد وكاللنا :- هسة انه فهمت السالفة كلها بس راح افهم الحجي وعمي ابو حاتم
ونعقد هنا بوجودهم ، يعني اني وعشيرتي راح نكفلج
وراح نصير بظهرج

انتفضت: - واذا رفضو

هادي :- ما يرفضون هي شغلة انسانية وانتي من هسة صرتي بامانتي

ليلى :- امانة شنو

التفت دحك ورجع نصة هز راسو وكال
:- راح اعقد ع ريحانة واكول لخوالها انه رجلها وما الكم بنية يمي و اوكف بوجوهم كلهم

شهكت مصدومة وردت معترضة
:- وعذيرة

هادي :- عقد فترة ونفسخه بس نأمن عليها مو زواج شمالني تسودنت
غير لو معرس من وكت جا بتي بطولها!

ليلى سكتت محتقنه فرك وجهو وكام طلع. ينام وهي هجمت علينا تحجي ما قابلة
حجت لمن ملت وراحت نامت

ضليت افرك بوجهي محتارة ورطت الناس وياي واخاف الجاي يصير اصعب
خالة كالت هي فترة صبري ان شاءالله تمر ع خير

بليلتها ما كدرت انام وثاني يوم من حجو بالموضوع سمعت كل حجيهم جانو ماخذين الموضوع قضية انسانية مو زواج لو شي هذا الشي طمني

هادي كال لخالة هم تواصلو وياج ع التلفون

كلتله اي اخير شي صار بيناتنا تواصل ع التلفون وهددوني بالعشاير

هادي: - رقمهم يمج؟
نسيمة :- طبعا يمي

هادي :- كليلهم العصر اريدكم ابيتي حتى نحل السالفة

نسيمة :- بيش الساعة يعني
هادي :- ما ادري نشوف بال5 زين
نسيمة :- كيفك انت

هز رأسه وكللها
:- اتصلي بيهم بلغيهم بهذا الشي وجهزي البنية فد ساعة ونعقد

هزت راسها اي

ليلى ..
ما قابلة ولا مقتنعة هادي متزوج واذا عرفت عذيرة بهذا العقد تتخبل وحقها محد يلومها
حتى لو مجرد عقد وينتهي بالانفصال بعد مده
بس يضل شي صعب وما تتحمله المرة

المشكلة جانت بوحدة ريحانة وما الها احد بهاي الدنيا تستند علي
تحتاج ظهر قوي وتحتاج واحد يدافعلها سيوف سيوف حتى خوالها يخافون وينردعون

اكو هواي حلول من ضمنهن بالقانون نكدر
بس خالتي رادت تسلك اسهل الطرق ، واكثر طريق يقنعهم وهو الزواج

لان ريحانة من جانت متزوجة كريم فكوها .. وهسة اذا تزوجت يرجعون يفكونها وما يوصلون الها

تحضرو للعقد ريحانة ضلت تطكطك تبجي
صبرت روحها كوة ولملمت روحها ودخلت يمهم كعدت
اباوعلها من الباب رجلها تهتز متوترة
وهادي عاقد حاجبه ومقدم نفسه رجلينه ثنينهن يهتزن جر نفس وثبت وعدل كعدته

ضل الشيخ يحجي ويردد وهم يجاوبون
وعقد الهم ع بعض ..

خالتي اشرت لريحانة تكوم جنت ملبستها عبايتي
من كامت من كثر ما خايفة ومتوترة جلبت برجلها وطاحت ع وجها

هادي كام كبل اجة عليها يكول الله الله
وكف كبالها وخالتي كومتها اباوعلها طفرت دمعة من عينها خجلانه وشعرها طلع من الحجاب

هادي جر العباية حيل نزلها ع وجها .. وطلعوها من المكان

خطية بس عقد تبهذل حالها بي ، وتمرمطت تمرمط

ذبت العباية شمرتها وعدلت شالها تنتر بهمس
:-شبيكم خنگتوني خنك شسالفة

هادي كال من بين اسنانه بغضب
:-غير طلع شعرج كدام الغضب

:- شنو الغضب ما شايف شعر اول طيحته

عض اصبعه حيل خازرها
:- لو اكضج اخخ الا افرسج فرس
تفتين الفاد تمردينه مرد

تعالن سدن الباب الزلمة منا لا تصيرن كبال الباب

رجع يمهم واحنه سدينا كعدنا كلنا متوترات وكلوبنا تدك
والله عذيرة لو تدري تجي لبغداد تحركها فوك روسنا لان تغار علي موت

حسيت برجفة سرت بكل جسمي من دك التلفون
جريت السماعة اجاوب

اول ما كلت الو
رد

حرب :- هلا بليل شلونج يول

ليلى :- زينة الحمدلله محتاج شي؟

حرب :- عمامج هينه راحو؟

ليلى: - هنا محتاج منهم شي

حرب :- سلامتج ابوية .. تحمحم وگال بهدوء
:- البنفسجي لون عظيم

گلبت عيوني بضجر :- لا والله مخابر حتى تنطيني هاي المعلومة اني ما مهتمة بالالوان وما اريد اعرف يا لون عظيم ويا لون ملك الالوان ..

ضحك بصوت عالي لحد ما ضل يگح
جلى صوته وكال بجدية
:- السيد طلعتو من السجن لخاطر عمج وكتلو ادحك يول اني سامحتك هاي المرة لخاطر حجي طاهر ولعيونو لهادي ابن ليلى
مرة ثانية اورك بنص السجن

ليلى :- كثر الله خيرك
حرب :- سمعي يول ما اريد تنطينو وجه وتاخذين وتنطين بالحجي ويا قسم بالواحد الاحد ركبتج املصها ملص
يخابرج ما تحاجينو كليلو عندك ام توصل الحجي لتريد تكولو الي

ليلى :- اوامر ثانية؟
حرب :- هساع لا .. ما اريد اضغط عليج

ليلى :- الله وياك

نهيت المكالمة وباوعت عليهن مستغربة انسان مستفز يثير غضبي كل ما نتواجه

خالتي كالت لهادي ما اريد خوالها يندلون بيت ليلى
لهذا السبب كلتلهم هناك يجون لبيتي
كللها هذا قصدي من كتلج تخابريهم انه هم ما اريدهم يندلون بيت ليلى

والله والظهر هن تحضرن يرحن واني دكيت رجل الا اروح وياهم ما اكدر اضل اكل بروحي اكل وانتظر خبر منهم

بدلت لهادي ركض ولبست عبايتي فوك دشداشة البيت النوب زركة وحجابي وردي لكيته ع محجر الدرج مشرور لان جنت ذابة حجابي الي لابسته
وطلعت وياهم ركض

صعدنا ورحنة لبيت خالتي والله خالتي دخلتهم وسوت الهم جاي وهم يسولفون وينتظرون جيتهم

شوية وصاحلي هادي بايده مبايله مده الي وكال
رجلج

اخذته من ايده ونفخت
خزرني
خليت المبايل ع اذني وكلت الو

رد بعصبية :- وين رحتي؟

:- اجيت لبيت خالتي حرب

حرب :- جايج .. حجاها وسدة بوجهي

رمشت مستغربة انطيته لهادي نتر
:- ما ناطيته خبر بعد صار عندج رجل ما يصير تطلعين وتطبين بدون ما تاخذين شوره

ليلى :-اندري نسيت والله

هز راسه وكال تعلمي

وراح للاستقبال يمهم واحنه ضالين كاعدين ننتظر
فترة وسمعنه صوت دكة الباب ضليت اباوع من باب المطبخ هادي فتحه عبالي هسة جايين جايبين شيوخ وعالم كبار

طلعو خوالها ثنينهم وجايبين زلمة جبير شايب لابس عكال
هادي سوا نفسه ما يعرفهم
اسمعه يكللهم
تفضلو ؟ بشني اخدمكم

جاوب خالها بنتر :- جايين ناخذ بتنا
التفت للمعكل وكله :- مو اكلك البيت ما يخلى من الزلم يلفي شكو كو* ودايح

شهكت مصدومة من كلامه وهادي لكمة واجت لحلكه ما حسيت غير حط ايدينه بركبة خالها وطكة كله برأسه

واشتعل الجو والمصايح
هادي :- ولك ياهو الك**
خال ريحانة انبلع صوته ما طلع بعد صار اصفر

وذاك ابو عكال دخل بينهم يفاككهم ويكول
:- لا تتعاركون وانطونا بتنا خلونه نرجع منين ما اجينة

هادي عاف خالها ودار لابو عكال
:- ياهي بتكم؟ هذا البيت مابي غير مرتي؟

سمعت صوت سيارة شخطت و واحد نتر بغضب
حرب :- ولكم انتم ما اتوبون

خرطت خدودي .. اجة حرب ومنا هادي شلون ثنين ما يحبون العرايك

مشيت ع كيف وصلت للباب رديته وضليت اباوع بدون ما يشوفوني وريحانة واكفة بباب المطبخ تراقب وعيونها تدمع

خالها الثاني دفع هادي وگله
:- ريحانة بنت اختنا المرحومة جيبها خليها بايدنا
ترة نحگك بالعشاير .. ضام بنيتنا عنه وتعرف شنو من مصايب ورا عملتك وشنو من فصول

هادي :- كتلي ريحانة بنتكم وتريدوها؟
هز رأسه اي .. هادي ضحك والتفت شافني خزرني حتى ادخل
ميلت شوية حتى ما ينتبهلي

خال ريحانة ضل يصيح
:- اشهركم اليوم بيت مال ك** ضامين بي بنتنا
هسة تطلعونها واذا ما طلعت احنه وياكم گوم
وما نحلها الا بغسل عار ريحانة ونكعدك فصل

جيبها خليها تجي ويانه

هادي مد ايده بجيبه طلع ورقه العقد
انتبهت الثاني طلع سلاح وحرب كبل سحب سلاحه
طحت ع اركبي وعطت بصوت وغطيت حلكي
التفت الي رافع طرف حاجبه وضحك بسخرية ع خوال ريحانة
هادي :-مرتي هاي وهاي ورقة العقد، حلالي بكيفي تمشي اذا انه اگللها روحي يمين تروح روحي يسار تروح
ما اكو احد الا حگ يتدخل بيها

ليلى :- هادي ادخل فدوة .. حجيت بخوف وقضمت اظافري
حرب نتر بغصب وهو يهدد يريد يكتل شايل سلاحه
:-والله اورك ور، ساقط لو بيك حظ ما ضال خاتل ورا النساوين وتطلع بيهن يگولن زلمتنا ماهو حتى غيرة ما عندك الا ادوسك بالقندرة

لطمت وجهي من شفتهم ضلو يتمالخون وصوت عياطهم عالي حسيت روحي جاي تطلع وجسمي كله يرجف اريد اكوم ع حيلي ما اكدر منظرهم رعبني وخلاني ارجف بشكل مو طبيعي وغريب الناس كلها تتفرج

حسيت انجر الباب حيل وطلع حاتم عمامي واكفين يباوعون بكل برود واعصابهم هادئة
وحرب وهادي وحاتم صارو وياهم لحم وتدخلو الناس حتى يفاككونهم

سحبو حرب ليورا لان بأيده سلاح
هو لازمة ليجوة ومخنزر ع خوال ريحانة حسيته يتمنى يشرب من دمهم

التفت شافني ابجي منهارة وخايفة ولازمة الباب
عافهم يتعاركون واجة علي لزمني من زندي حيل وجرني دخلني جوة وطلع وسد الباب ..

ليلى :- خااالة راح يتذابحون

رد عمي :- عوفيهم زلم شمالج خايفة

وعادي عبرني وفتح الباب وطلع عاط بيهم وسكتهم
شوية وصاح سوو مجال وفتحو الاستقبال ودخلو جوة

نص ساعة هادئين حاجاهم عمي وطلعو ولا كأنهم صارو لحم قبل شوية وكل واحد طلع من عدنا مزورگ

سمعت اصواتهم يحجون وهادي يكول هم ياله نوصل للنجف
وحرب اللوكي يكللهم من رخصتكم اريد منكم الاذن ارجع ليلى للبيت واجي عليها اطلعها نختار اثار وذهب
وعمي انطاه الاذن كله بعد هي مرتك براحتك

وخله هادي يصيحلي وكال رجعي ريحانة وياج لا تخلينها هنا

هزيت راسي ودخلت للغرفة البس عبايتي وصارت المراية كبالي ضليت اباوع لروحي مصدومة
شالي شلون ودشداشتي شلون و وجهي ابيض جني كراط حجار

كلت يلا واذا شافني هيج مو مهم ما احبه ولا يحبني

لبست وطلعت اخذت هادي ضاج
كال :- اريد العب بالزرع
:- بعدين غير مرة نجي ونلعب بالزرع

طلعت كدامهم عمامي وهادي واكفين يحجون ويا واسمع حرب مستمر يشرح الهم موقفه
يكللهم رحت عليهم اول شي طلعلي النساوين يكولن ما موجودين سمعو صوتي اهدد يلا طلعو
وقضيت بيهم التوبة بس ما يتوبون حشاكم يحبون الدك وهاي بنية يتيمة لازم نوكف وياها ونحميها

هادي :- ما تقصر هسة صارت بركبتي

حرب من شافني اجيت شسوا كبل فتح الصدر وقطع كلامه وكال بحنيه
صعدي ابوية..

خصمت عيوني بشك منين نازلة المحنة
صعدت وهادي راح ويا ريحانة صعدو ورا

توادعو واني لوحتلهم بأيدي باي

وهم طلعو واحنه وراهم ..

سكتنا ثنيناتنا ما حجينة شي لحد ما وصلنا كال لا تنزلين اريد احجي وياج لو ادخل جوة

ليلى ':- فوت جوة نحجي

نزلنا فتحنا الباب ودخلنا اشرت لريحانة تاخذ هادي
واني وكفت يم الباب فات ورده بدون ما يقفله

ارتفع حاجبه وكال
:- اريد اتزوجج هين بهذا البيت جهزي روحج بسرعة
باجر عطله عندي امر عليج ساعة 9 نطلع نشتري ذهب ونختار غرفة

وباقي التجهيزات ما اعرف بيهن عليجن

ليلى :- لا تكول لحكتني لبيت خالتي علمود تگلي هيج؟
حرب :- ردت اشوفج بالدشداشة الزركة والشال الوردي شكلج عظيييم

لفيت العباية ع دشداشتي ودرت وجهي متفشلة
:-ردت اتكاون وياج بس صارت ويا خوال ريحانة

ليلى :- الله يحبني وكل مرة ينقذني من جنونك
شنو براسك اذا ردت تتعارك تجي علي تفرغ غضبك وتروح

غمزلي ورد :- متعة ما يحس بيها غيري

ليلى :- تفضل تعشا يمنه

:- هاي طردة بأدب بس اني ما اعرف الادب وراح اتفضل صدك

جريته من ايده بدون شعور
:- البيت بي بنية غريبة ما يجوز غير مرة

حرب :- هاا كولي تردين انفرد بيچ وهساع ما تگدرين

سكتت ادري بي يريد يستفزني ويطلع لساني
ضليت ساكته وهو ساكت

رفعتله حاجبي بتساؤول: ما ناوي تروح ما وراك بيت شي شغل
هز راسه لا :- فارغ شغلي الحكچ

ليلى :- حرب .. اني وياك شنو فهمني؟ ..

رفع حاجبه وكال :- ليل و حرب ..

رفعلي ايده يودعني وكاال :- اودعناچ

....

الشيهانة ..

بعد فترة من السعي بأتجاه ابنائي اكتشفت اني خسرت هواي من طاقتي وحيلي وصبري بدو ينفذون

لولوة سهلة وطيبة وكسبتها من اول حضن ويمكن كسبتها قبل اللقاء حتى
بس شمس وشعلان .. صعبين تعبوني ودمرو نفسيتي

حسيت روحي بديت افقد عقلي وصبري وكل مرة ارجع اوكف ع حيلي واخوض وياهم معارك نفسية
تاخذ حيلي

مشيت لجبران اشتكيله من عناده شمس وغضبها مني
اكله جبران بس تنتر من احجي وياها ومن اطالبها باحترام تضل بس ساكته وعنيدة
تريد تطلع وحدها واكثر من مرة اكتشف هي طالعة برة البيت ساعات وراجعة
وصيت قاسم ما يخليها تطلع ضلت تتعارك ويا وتطلع ما يكدر يردها وما يلحك يتصل علي يبلغني

جبران :- انتبهي طلعتها وحدها بهيج عمر غلط
انه راح اشدد ع البيت اكثر واحجي وياها

:- تعبتني جبران والله احس حيلي انهد كله

مد ايده ع خدي يمسح علي بظهر اصابعه
ميلت راسي ضايجة
:- الحجر يلين محتاج شوية ود

:- مم يعني تشوف هاي الصلابة تلين اذا سقيتها من حبي وحناني اكثر
هز راسه اي

تمدد حط راسه بحضني
:- حتى الحديد يلين كبالج حبيبتي

ابتسمت ضليت العب بشواربه ولحيته وهو يحاول يعض اصابعي من اغفل
رفع روحه سند نفسه ع عكسه وصار وجهه مقابيل وجهي

يباوعلي يتاملني رفعتله حاجبي :- ما تحجي شجاك؟
:- شنو احجي بحضرة جمالچ؟ حروف العربية ما تسعفني

غطيت وجهي بأيديني خجلانة وحجيت
:- جبرررانن

:- صبي عينه لـ جبررران رمش عيييينه

شلت ايديني لفيتهن ع ركبته وبسته حيل
:- اجيك بداخلي معركة ونار واطلع طافية ومنتصرة شكد احب وجودك بحياتي
الله لا يحرمني منك

باسني بخدي :- ولا يحرمني منج
عضيت شفتي وميلت راسي بدلع
:-جبران هسة اذا اذا طلعت حامل مو اكيد اذا
شكد تفرح
عدل كعدته ولزم ايديني باسهن

:- لا تسأليني شكد افرح طفل ومن محبوبة عمري وعشكي
طفل من لحمج ودمج يخصني شايلته بين احشائج
تتخيلين فرحتي شكبرها؟ تتوقعين اكدر اوصفها لو اعرف حجمها

شيهانة :- بكد الدنيا كلها

جبران :- لا هلكد

فتح ايدينه كلش ياشرلي يعني هواي بس كان قصده حضن ذبيت نفسي بحضنه فرحانة اضحك

برطمت وكتله :- واذا ما طلعت حامل

جبران:- يومية نحاول شعدنا ؟

اعشگچ .. اعشك كل ذرة بيج
احب شعرج النازل ع اكتافج ..من تمرين كبالي وشعرج يلعب ع ظهرج احس روحي تبدي تصعد وتنزل وتلزمني رجفة

كل ما تتقربين مني ارجف تكول مراهق .. خاتل ويا عشك صباه

:- اني هم اضعف گدامك ..

:- اضعف كدامك بس انت .. هههههههههه
كل بشر عنده نقطة ضعف الا اني عندي نقاط
يبدن بشعرج .. ينتهن بالشامة الراكزة بجعب رجلج اليسرى

دفعته خفيف خجلانه:- جبران ميل سخنت

عينه صارت ع شفتي عض شفته وهمس
:- اووف باوعيلي بالله شفه هاي لو معمل عسل
يمكن تمرة ذايبة اريد اضوگ؟

:- ع اساس ما ضايگ

همس بذبول
:- ضايگ بس ما شايف .. يمج اصير حيل ماشايف

ضلينا نضحك ونتسامر وسهرنا ..ليلة حلوة
انتهت المعركة بقبلة على الجبين وحضن دافي

باليوم الثاني رحنا سوية للمستشفى سويت تحليل حمل
وضلينا ننتظر النتيجة .. ننتظر نتيجة صبر سنين وتعب
ننتظر ثمرة هذا الحب ..

من طلعت النتيجة هو باوعلها قبلي .. ابتهجت اساريره
عيونه لمعت .. ودمعت
وحضني كبال العالم بدون ما يحس ع نفسه وهمس براحة
:- الحمدلله حامل .........

.....

ليلى..

حرب ضل يركض بيه ركض بسرعة بسرعة جهزت نفسي حتى ما فهمت شي اسبوع مو اكثر
اتصل بهادي واتفقو سوية حرب بلغهم لازم نتزوج بالبيت مالتي فترة لحد ما يكمل بيته

محد جان فاهم غايته بكدي كلهم عبالهم كلامه صحيح يريد يجهز بيته براحته
بس اني فاهمته زين .. جابو الغرفه الجديدة شدوها

وخالتي اجت حفتلي وسوتلي شيرة ساعدتني
ورتبن ملابسي بالكنتور الجديد

جانت اعصابي نار واي واحد يحاجيني انفجر
العلوية اجت سلمت علي وكالت من تتزوجين خلي هادي يمنا كم يوم واخذي

اول شي رفضت بس هي قنعتني من كالت
ماناخذة منج هذا وليدج وندري روحج بي بس كم يوم هم انتي عروس لازم تاخذين راحتج شوية

ضليت صافنة رجعت حجت
لخاطري هم نريد نشبع منه

كتلها هاي هيه

جنت مقهورة ومرتبكة وهي كلش مختنكة ومبينه مريضة
ما جنت اعرف زواجي راح يأثر بيها هيج

احنه اتفقنا بيناتنا نسوي بس زفة ..
لا هو عاجبه عرس ولا اني .. بس گلي ورا الزفة نسوي عزيمة عرس بالغربية ما فهمت عزيمة شنو وشلون ولا سألته

اجة يوم الزفة طلعت للصالون الصبح .. جنت رايده خالتي تمكيجني بس هي ماقبلت واصرت تاخذني صالون ونستأجر بدلة عرس جديدة وحلوة ونسوي جلسة تصوير

اختنگت كلش وتعبت من كعدة الصبح
الكوافيرة مكيجتني ..ولبسوني بدلة منفوشة بيضة
وغطوني بالبرنص .. اجة حرب اخذني للستوديو
جان لابس بدلة سودة ، سوينا جلسة تصوير عادي بس ثنينه متوترين ونزخ عرگ ..
اخير شي نتر :- يلا ما خلصنا خل نولي للبيت
كلتله خالتي خلصتو طلعو براحتكم

ساعدتني صعدتني بالسيارة وشفت هواي سيارات من معارفة طلع للبيت واصوات الموسيقى والاغاني كلش عالية
كل شوية يمد راسه الهم ويگللهم شعلولي الجو اني استاهل يشتعل ..

خليت ايدي ع گلبي من وصلنا للفرع وضليت ارجف
صوت هورنات السيارات عالية وجايبين الات
مرينا من گبال بيتهم ..واني عروس كاعدة يم حرب ببدلة العرس .............للحكاية بقية

رأيكم بالقصة يهمني 🖤