رواية حمائم تخشى الطيران الفصل السابع 7 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

تصويت + رأيكم بين الفقرات لطفًا 🩷🖤

________________________________________

اذا مات الضمير
اصبح الجسد للحرام أسير ..

وأذا ذهب العقل
اصبح الحرام طقس لا يُـمل ..

اما القلب اذا ذهب !
فـ ان الانسان على قلوب الاحباب سـ يهوى اللعب ..

مخليه ايديني فوك راسي وابجي بحرگة
يمة يا حبيبة عفتيني يمة اجيتج متلهفة الكاج جوة التراب وينك جدو وينك حبيبي وينك يا نظر عيني
بعد منو يصيحلي الشيهانة عزيزة النفس
منو يدللني
جريت حسرة جرحت بلعومي وطلعت

المرأة مدتلي كلينس اخذته منها مسحت وجهي طبطبت على كتفي وگالت :- حمدي ربچ اخيتچ عدلة بيها بخت ما جانت حاضرة العزيمة

صارلج فوگ الساعة تبجين كافي يا عيني كافي ما مليتي والله گلبي تگطع عليچ

شيهانة :- خالة هذول اهلي اهلي اجي الكاهم كلهم ميتين حتى ابن اخوي الرضيع ميييت وياهم والله العقل ما يستوعب والله

ام حيدر :- والله يا امي كلنا تكطعنة عليهم شهور الناس تذكرهم وتبچي بس بعد الواحد شيسوي؟ امر رب العالمين لا اعتراض لا حكمه

شيهانة :- زين فهموني شلون احترگ البيت گلبي راح يوگف من القهر

ام حيدر :- ما ادري .

حيدر :- يگولون بفعل فاعل

امه خزرته :- ليش خزرتي؟ خلي يحجي كمل اسمعك شلون گتلي بفعل فاعل

حيدر :- اي لان البيت مرشوش نفط وشاب ، يما لا تخزريني الساكت عن الحق شيطان اخرس وهذا مو اي حق هذا دم عائلة كاملة من الجد للاحفاد

ام حيدر :- لا تذب الحطب على النار

رديت بغضب :- ذبهااا ذب الحطب على النار وخليها تحترگ ما تطفى

ام حيدر :- استهدي بالرحمن يما صلي على محمد شربيلج اميه راح يوگف گلبج وجرتي

درت وجهي برفض
حيدر :- على الاغلب عمچ او اولادة همَ القتله

فكيت عيني باوعتله بصدمة حسيت رجفة سرت بكل ذرة بجسمي
رديت بأستنكار :- ما فهمت؟ وضحلي اكثر شلون

حيدر :- انا ما اعرف كلشي انتم حسب العرفته من الناس قبل خسرانين كل املاككم وفلوسكم مو صحيح

هزيت رأسي بـ اي :- ورجلي ساعد اهلي حتى ينهضون وعمي كذلك ما قصر ساعد ابوي وداينه مبالغ جبيرة

حيدر :- اي هنا الحچي ، سمعت الناس تگول
صايرة مشاكل بين ابوج وعمج
ابوج مرجع الفلوس العمج ومتشكره بس عمج ما قابل طالب ضعف الفلوس وگايله انا ساعدتك وبفضلي رجعت وكفت على حيلك اريد ضعف هاي الفلوس
المبلغ كبير وابوج توة ناهض بروحه رفض صارت بينهم مشاكل

استمرت المشاكل فترة بيناتهم ، وعلى اساس عمج گايل لوالدج حجي راضي كل سنة تمر يتضااعف المبلغ يعني شغلة فايز

وقبل وفاتهم بشهر صارت ناس تردم بناس ، يومية العيطه تكب والناس كلها صارت تعرف بهاي المشكلة
عاد فجأة بيوم من الايام بالظهرية الحمرة سمعنة الدنيا اشتعلت بالصريخ لهنا وصل الصوت

طلعنا وناس تنشد ناس وفزعنة من عرفنة صاير حريق ، بدينة نطفي البيت بس وين لحد ماخلصنا البيت صاير فحم هوَ والبي والباب مقفول والمفتاح ما موجود

شيهانة :- يعني وين ما موجود؟

حيدر :-الشرطة دورو بالبيت على مفتاح البيت ما لگو يعني القاتل حارگ وقافل البيت وطالع وماخذ المفتاح سوو حتى تفتيش المنطقة تفتشت بيت بيت الله وكيلج گلبوها ع البطانة كله علمود يلكون دليل لو المفتاح بس ماحصلو شي الكاتل جان ذكي وما عاف وراه اثر ماحي كلشي

ضليت ارعش مصفصفه مسحت جبيني ورديت بحيره :- يعني ما تنعقل واحد يدخل يرشهم نفط ويشعلهم ما يصرخون ما يقاومون
الناس ما سمعت صوتهم شنو مخدرينهم

حيدر :- محد يسمع لان بيت اهلج صاير بنص مزرعة
وماكو بيت قريب عليهم غير بيت عمج هو اقرب شي

نصيت رأسي ضغطته بقوة ورفعته باوعت للمرأة وگتلها :- كلتيلي اختي ما حاضره العزيمة ؟! تغريد اختي عايشة الحمدلله

ام حيدر :- يا خالة وين هي و جهالها ماتو بالحريق

رديت بصدمة :- مو كلتيلي عايشة لو بس ردتي تأمليني!!!

ام حيدر :- اختج الماخذة بيت عمج .... قاطعتها بنفي

:- ماعندي اخت متزوجة واحد من ولد عمي هي بس تغريد متزوجة ماخذة غريب

ام حيدر :- لا خالة اختج شسمها يمة حيدر شسموها ذكرني والله راح من بالي

حيدر :- هدير سمعت اسمها هدير ماخذه واحد من ولد عمج عرسهم صار ابغداد محد يدري من اهل الديرة لمن ماتوا اهلج يلا سمعنه بت حجي راضي ماخذه بيت ابو عادل والوحيده الضلت عدله وهسه هيه وياهم الله يساعدها ويقوي گلبها كاعده بنص ناس مشكوك بيهم

لطمت وجهي بسرعة وحجيت بحركة :- هدير ما متزوجة ما متزوجة

لزمت ايديني وكالت :- لا خالة متزوجين بس رادين من زمان للعراق الظاهر ما گلولچ واحنه هنا بالديرة ماندري رايحين هناك معرسين ابغداد تالي يلا سمعنه

ضليت اطحن بروحي طحن واكطع بروحي ، گلبي شب نار ودموعي تحرگ روحي قبل ما تنزل

حيدر :- ما يستاهلون ابوج ناطيهم مرة الله يرحمه

شيهانة :- لا لا خبلتوني والله جننتوني عقلي مجاي يستوعب ، عمي زييين اني من جنت طفلة عايشة بنصهم زييينين ومن جانو اهلي يزورون العراق يرجعون للكويت يبجون عليهم يشتاقولهم شلون بسوونها ويكتلون اهلي شلوووون شلون عمتهم الفلوس .. حطيت ايدي بالكاع ونهضت
دلوني بيت عمي لو بيت اهلي الدرب متغيرة تفاصيلة ما اندل

ام حيدر لزمتني من ايدي تتوسل :- يمه استهدي بالرحمن ترة التهمة ما ثبتت عليهم وبين الحك والباطل شعره لا تنعمي عيونج وتضلمين العالم الا تثبت عليهم القضية

رديت بجزع وعيوني تجري :- ودوووني الهم

حيدر :- غير ورا ما حققو وياهم وطلعو من السالفة شردو البغداد عدهم معارف هناك؟

بلعت ريگي بصعوبة :- زوجة عمي بغدادية

ام حيدر بنتر :- العالم يكولون راحو من القهر ما يتحملون يضلون ويسمعون حجي والله انتم كتاله بيت اخوكم ليش تشعل بالنار وانت ما متاكد

ضلمت الدنيا بعيني
ام حيدر :- سودنت البنية

:- من حقها تعرف كلشي يخص موت اهلها
بس ها خوية سمعي الله يسلمج ما اريد عمج يدري انا حاجيلج عمج و ولده شرانيين اخاف على اهل بيتي مو على روحي الله شاهد

شيهانة :- بس جاوبني ليش ما سجنوهم شي شياتين

حيدر :- ماكو شي يثبت هم القتلة وماكو لا دليل ولا شهود ضدهم ، بس الناس كلها متأكدة

شيهانة :- مشكورين على كلشي رحم الله والديكم

حيدر :-لا لا شنو وين رايحة ما مقبولة منج ضلي هنا ارتاحي زحمة تطلعين من عدنا تعبانة وما متعشية

شيهانة :- تضل عدكم العافية ، اني لازم اروح وراي طلعة البغداد بس منين اطلع؟

حيدر :- والله ما تطلعين

ام حيدر :- شنو هيَ بكيفج نخليج تطلعين بهاي الحالة ضلي ارتاحي وخل تهيد نارج بالاول

شيهانة :- زين اخذوني لبيت اهلي اريد اشوفه

حيدر :- ليش تحركين دمج؟ ليش تعذبين روحج بشوفته

شيهانة :- اريد اتعذب لحد ما يموت گلبي

حيدر :- اوصلج حجية سويلنة عشا

تشكرت منه عفت جنطتي امانة يمهم اخذنه يمشي بالطريق دك الباب على بيت باوعتله بتساؤول

حيدر :- مفتاح الباب الجبير يم الحجي امانة بس الباب الثاني ما اله مفتاح كسرو ورا الحريق

فتحله الباب شاب سلم علي وفهمة السالفة باوعلى بأسف وكال البقية بحياتج خوية
راح جاب المفتاح واجة واصر ندخل نتعشى يمهم بس رفضنة
ناس نفسيتهم حلوة رغم الظروف الصعبة

وصلنة فتح الباب الكبير صارت المزرعة كبالي مشيت باتجاه البيت من بعيد اشوف بيتنة شلون صاير اسود بسبب الحريق جثيت على اركبي وبجيت بنحيب لحد ما خلص حيلي
مات گلبي وصار رماد اخذته رياح الحزن بعيد عن صدري
وحل الحقد وشرار الانتقام اعماق صدري

كمت من مكاني مبيتة النية برأسي ، الا اخليهم يتجرعون المر اضعاف الاحس بي هسة بسببهم ،
واني الشيهانة بنت حجي راضي ابن حجي حامد
كتال اهلي اكتله والبچاني على اهلي ويتمني ايتم اولاده وابجيهم دم علي

ان جانوا بيت عمي لو غيرهم ..

حيدر :- ها خوية

:- اريد المفتاح يضل يمي

:- براحتج هسة خل نرجع للبيت بليل احاجي الحجي

رغم الولد ماعرفة ولا اعرف اهله بس ثقيت بي لان حجالي الحقيقة وحسب العرفته هذول من اهل المنطقة ويعرفون اهلي حتى قبل ما انولد بس اني ماعرفهم

اخذوني كعدت ويا الحجية مشاعري وكلبي تجمدو فجأة حطو عشو تذكرت اني ماماكلة من البارحة اكلت شوية سديت جوعتي اجة الحجي عرفته جان صديق ابوي سلم علي وحجة وياي شوية شرحلي كلشي صار وبعدها راح

ليلة بطولها ما نمت بيها غير ساعتين وبس غفيت الاحلام صارت تتوالى علي
كل حلم اشوف بي اهلي محروكين وصايرين فحم اكعد مجمرة من القهر

دخلت علي الحجية الصبح كمت من فراشي گلتلي :- سودة عليَ گعدتچ

شيهانة :- لا صليت وبعد ماغفيت

:- نتريك سوية؟

شيهانة :- ما اشتهي شي والله اريد اروح الساعة بالـ٦ هم ياله اطلع لبغداد
لا تباوعيلي هيج اطلع علمود اختي ، والحجي البارحة دلاني على مكان بيت عمي يكول عمي يتواصل ويا بين فترة والثانية لان يربطهم عمل

ام حيدر :- يااا ولا ادري
بس مو بكيفج تتريكين يلا

عافتني وراحت حضرت الريوك كعدت اكلت كم لكمة وشلت ايدي رفعت شعري كباية ولبست حذائي ضلت تباوعلي بحزن
:- لا تسوين شي انتِ مرة وحدج والعالم وحوش ماعندج ظهر قوي وبهذا وكتنا حتى العنده ظهر قوي ما يسلم من شر اولاد ابليس

:- ما اسوي شي لا تخافين اني رايحة علمود اختي راح اعتبر روحي كلشي مادري حتى الحجي مايدري بحجي حيدر الي والبارحة قبل لا انام اتفقت ويا حيدر مايجيب سيرتي ولا يكول هو حاجي شي كدامي وهاي وصية الج هم ماريدهم يعرفون انُ اني عرفت السالفة حتى ما يحسون وجودي خطر

باوعتلها بتفكير كانت مقهورة علي كتلها :- اطلب طلب اخير ولو تعبتج وياي

:- تاخذين عيوني

:- سالمات،  تاخذيني لصايغ عندي شوية ذهب اريد ابيعة امشي اموري بي

:- انطيج ... قاطعتها: - لا ابد ماحب اخذ شي من واحد وكافي ضيفتوني واستقبلتوني ليلة عدكم

:- براحتج يما البس جواريبي وعبايتي واجيج

اقل الخمس دقايق وطلعت خطية اخذتني للصايغ طلعت كم قطعة من ذهبي الانطانياه صگر قبل لا اجي بعتهم جابولي سعر ممتاز ضميته زين وطلعت حضنتها اودعها حجيت بأمتنان

:- الله يرزقكم ويستر عليكم ما انسالكم هاي الوگفة الحلوة ان شاءالله امر عليكم من ارجع للبصرة

:- روحي يما الله يوفقج ويفتحها بوجهج بجاه محمد وال محمد

طلعت للساحة مثل ما علموني وصعدت بكية ، دفعنة الكروة وطلع السايق الطريق جان طويل كلش الناس نصها نايمة واني عيني ما تاخذ نوم اباوع للشارع حتى نظراتي خالية مابيها حياة

جنت متوقعة راح ارتاح يم اهلي واكعد انتظر جية صكر يجي جايبلي وليدي شعلان واعيش باقي عمرة براحة

بس وين لكيت مصيبة منتظرتني وبظرف يوم واحد اغتالو فرحتي بسلاح الحقد .

مرأة كاعدة يمي بفضول سألتني :- خالة انتِ ماخذة؟

شيهانة :- اي خالة

:- چا وين رجلج

:- اني رايحة لرجلي لبغداد

:- يا انتِ ماخذة أبقداد

:- اي حجية

:- ليش ما الچ نفس تحچين من ورة خشمچ شني متعاركة ويا اهلج ورادة لعيالچ

:- لا، مشتاقة لاهلي

:- چا مو جنتي جارهم شمالچن ما تستحملن ، المن تعرسن اذا كاتلات رواحجن على اهاليتچن

سكتت ما جاوبتها سكتت شوي ورجعت گالت :- خالة شعجب انتِ مفرعة شني ما تعرفين رب العالمين

حجيت بغضب واني اصك على اسناني :- لا اني كافرة خالة ممكن تعوفيني وتسكتين عني لخاطر ربچ

:- ياا شمالچ ما تتحملين عوذة صميت حلكي
امداني كلبي رجيج وينقهر على الوادم امداااني

سكتت عني ورا فترة وصلنة لبغداد نزلنة هيَ نزلت قبلي صارت بوجهي كتلها خالة ابريني الذمة عصبت عليج

:- مبرية الذمة انت و والديج يمة شلي شغل بيج شسالفة

عفتها ومشيت اخذت سيارة ثانية وصلتني للمنطقة الكاعدين بيها بيت عمي كلت للسايق العنوان بالضبط مثل ما انطانيا الحجي السايق وصلني للشارع مالهم ، انطيته الكروة ونزلت

لكيت دكان مفتح مشيت فتت للمحل اخذت عصير واني اطلع لفلوس سألت الولد :- اكول عيني تعرف بيت حميد حامد ابو عادل

:- البصريين ؟

:- اي البصراويين

:- اعرفهم خالة تردين ادليج عليهم

:- اكون ممنونة ، اخذ الفلوس مني وطلع وياي اشرلي وانطاني وصف كانو قريبين على المحل

:- خالة حبيبي شنو اسمك

احمرت خدودة بخجل ونطق :- حسوني

:- شكرا حسوني الورد
لوحتله بأيدي وگتله باي ..

مشيت وصلت گبال بيتهم وكفت ورفعت رأسي باتجاه البيت
بيت كبير واجزم ان مساحته اكثر من 800 متر
وبهيج منطقة!! طبعا ليش استبعد من فتحت عيوني على الدنيا ابوي وعمي اغنياء جدًا مو شي غريب يكون عدهم هيچ بيت ..

دكيت جرس البيت طلعتلي مرية شكلها غريب ولبسها ابد مو مال تكون زوجة عمي لو من اهل هذا البيت

سلمت بعدها كلتلها :- اريد ام عادل ابو عادل اني جاية عليهم

فتحتلي الطريق وكالت :- هلا ومية هلا بالخطار تفضلي

فتت فتحتلي الديوان اكعد بي ضحكت باستهزاء وكتلها لا دخليني عليهم فورًا اني مو غريبة اخت هدير بنتهم

باوعتلي بفهم وكالت :- طلعتي من الاهل اهلا وسهلا تفضلي منا

اخذتني فوتتني على الصالة كلهم متجمعين يشربون جاي كل الانظار توجهت الي من بينهم شخص واحد عرفني لمعت عيونه واستقام ظهره بكعدته ..

باوعت بالوجوه ادور هدير ما شفتها بينهم اول شي خطر ع بالي يكونون قاتلينها او مسويلها شي

رحبو بيَ وكامت مرت عمي عضت اصبعها وكالت باحراج :- نهلة غير تدخلين الضيفة بالاستقبال عيب والله

:- اني مو خطار شنو ماعرفتوني ، ابتسمت حتى اوهمهم انُ اني جاية وذابتها بيضة وما اعرف شي

شسالفة ليش صفنتو

حميد :- ما عرفناچ ولا صغر البيچ

شيهانة :- سهير بت حجي راضي ..

ليلى :- وشگلولچ!؟
حچتها بحماس

شيهانة :- لو تشوفين رد فعلهم تنصدمين اخذوني بالأحضان وعمي يبچي وزوجته تكول ماعرفناچ صار سنين طويله ما شايفينج متغيره كلش مشتاقيلچ وتبوس بيَ ضليت فاتحة حلگي والمشكلة التمست الحزن بنظراتهم بحيث ضيعت روحي
وضليت واكفة بنصهم مصدومة واكول بسري "معقولة يطلعون ابرياء"

صاحت السجانة :- ليلى زيارة

ليلى :- اجت خالة رايحة اشوفها

عافتني وراحت فترة ورجعت شايلة علاگة جبيرة بسطت بيها وطلعت الغراض من بينهم روايات مشترينها جديدة لأجاثا كريستي ودفتر وقلم حبر هذول الي ليلى طلبت منها تجيبهن
وشوية اكل واغراض ثانية جنة محتاجيهن

فتحت الدفتر ورق الدفتر اسمر ومخطط خطوط خفيفة جربت القلم بـ بداية الدفتر كتبت اسمي "سهير راضي حامد"

بليل تمددت بالفراش اجت ليلى شمرت روحها بصفي تضحك وگالت
:- تذكرت ذاك اليوم سمعي الله عليج

:- هوَ اني مبتلية بوحدة عطلانة مثلچ الله يصبرني

:- سمعي سمعي ، بذاك اليوم نزلت بليل للعشاء بس بداخلي فضول فضيع اريد اشوف المراة وبنتها شريكاتنة بالبيت يعني لكيتهن بالمطبخ ويا خالة البنية تسولف ويا خالتي نسومة والطفلة كاعدة بالكاع ترسم

:- مساء الخير

التفتن عليَ وردن السلام :- هاي بنت اختي ليلى طالبة مرحلة اولى

ابتسمتلي :- هلا ومرحبا تشرفت اني حور

نسيمة :- وهاي بنيتها ريحانة

ليلى: - تشرفت

كعدت يم البنية اشوفها شنو ترسم جانت صغيرة يطلع عمرها 8 سنوات حلوة وجهة بريئ
باوعتلي وابتسمت گالت :- هلو خالة

ليلى :- ياهلا بزينة البنات شنو دترسمين اشوف بله

ريحانة :- شمس و شجرة ، حلوة؟

ليلى :- طبعا تخبل ، عاشت ايدچ أستمري

ابتسمت برضا ورجعت ترسم مبين عليها تحب الرسم وترسم باستمرار لان رسمها كان حلو خصوصًا الشجرة راسمتها بطريقة تجنن اذهلتني بصراحة
صارت عين عليها وعين على امها ذيج الثانية شايلة جمال تخبل العيون واسعات عسليات والرمش كثيف
والشفايف مرسومات رسم شنو الطول شنو الرشاقة عمرها ما يتجاوز الـ 30 سنة

كمل العشاء حطينا على الميز وگعدنة البنية تباوع بفرح ، وكالت :- الله مثل بيت باجي عدهم كرسي ياكلون علي

حور :- عيب نحجي واحنة ناكل ماما ممنوع احترام للنعمة

ابتسمت باوعت لريحانة تنگرط گراطة ، سمرة بعيون واسعة وشعر طويل ما شاءالله كصيبتها لنص فخذها واصلة وشعرها كثيف
بس من تحجي ماتلفظ الراء صحيح

خلصنا عشاء خالتي غسلت مواعين هي وحور وشفتهن كلش طابكات سوية بحيث حسيت ان هن يعرفن بعض من سنوات

ردت اصعد الدرج صاحتلي ريحانة :- خالة
توقفت اجت تركض بأتجاهي

حجت بدلع :- خالة انتِ حلوة اريد ارسمچ  ؟

ليلى :- عادي حبيبتي بس شنو تردين اكعدلج وترسمين بيَ
هزت راسها ب لا

ريحانة :- بالعشا جنت اباوعلج حفظت وجهج بس ردت اتاكد

باوعت متفاجئة البنية خلوقة ولبقة كلش هزيت راسي برضا :- انتظر اشوف روحي مو تكبرين خشمي وتصغرين عيوني

هزت راسها ب لا وركضت لغرفتهم ، زفرت نفس وصعدت بسرعة للغرفة سديت الباب لزمتني دوخة لهناك وبدأت اعراض المرض تبين عليَ
اوف ليش ما احب المطر الشوارع تتطين ونتمرض ونتقيد

سمعت المنبه دك طفيته ورجعت نمت ما حسيت غير دكة الباب قوية رفعت راسي مفزوعة وصحت منو

:- اني نسومة لج يوم نشفتي دمي دفتحي الباب فتحي

كمت بكسل فتحتة بعدني ما مستوعبة دخلت للغرفة وراها حور واكفة ع درج بس باوعتلها نزلت

:- لج يوم الساعة 10 الصبح عبالي رايحة الدوامج انصدمت من كالتلي ريحانة كاعدة من ال6 وما شايفتج نازلة الصبح

حطت ايدها على كصتي وهيَ تحجي :- شنو هاي حمرة من الصخونة طبعا هاي لو الاخ حسدج لو المطر مال امس مرضج ويمكن ثنينهن سوية

كعدت زفرت بضجر وباوعلها تتحرك بالغرفة وتحجي :- نازلة احطلج ريوك كومي غسلي
شنو هاي هدومج مطشرة شبيج يوم مو عوايدج

ليلى :- تعبانة جسمي نحلان
عافتني و نزلت كمت غسلت ونزلت جوة دخلت للمطبخ

صبحت. عليهم وكعدت ذبيت راسي على الميز احسه ثگيل خالتي حطت الريوك كدامي وبدل الجاي عاصرتلي برتقال وليمونة وتعال يا ليلى اكلي وشربي كلشي كدامج

كملت اكل واخذت علاجي تجمعن بالمطبخ كلهن حور كالت و هي مبتسمة :- ريحانة متحمسة ترسم بيج كوة نومتها البارحة وكعدت من الستة حتى تكمل

روحي جيبي رسمتج راويها لخالة ليلى

ركضت ريحانة جابت رسمتها وحطتها كبالي كُلتلها :- واووو ما شاءالله مبدعة عاشت ايدينج

ريحانة :- هاي هدية حتى نصير صديقات

ليلى :- مدي صبعج بعد صرتي صديقتي
مدت اصبع الخنصر لفينة اصابعنا وعقدنا العهد

صار العصر واني متمددة من التعب الاحسه بجسمي واتأفأف بضجر جنت متوقعة اليوم اداوم واشوفة واسلم علي ، اشكره على توصيلته الي

دخلت حور من برة وبيدها ريحانة باوعتلهن بأستغراب وگتلها :- وين رحتو؟
انتبهت لروحي تعذرت منها بسرعة
قابل اني شكو واسألهم وين رحتو و وين اجيتو

حور :- شسالفة حبيبة عادي براحتج سألي احنة اهل ان شاءالله ، اخذت ريحانة ورحت للشغل

ليلى :- تشتغلين؟

حور :- اي خدامة بالبيوت ، بعد العيشة تريد واني عندي طفلة

ليلى :- الله يساعدج داده صدك الدنيا صعبة

كعدت كبالي و كعدت ريحانة بصفها طبكت رجليني على صدري و بديت احجي وياها
:- ريحانة شكد عمرها

:- عمرها سبعة راح تصير ثمانية

:- يعني صف اول ابتدائي

:- لا ما مسجلة

:- لا ليش خطية

:- بعد، حجتها وسكتت شوية تباوع لريحانة بنظرة حزن ورجعت كالت
اني ادرسها واعلمها تقرأ وتكتب

رديت مقهورة
:- خطية لازم تسجل وتدرس حتى يكون الها مستقبل قابل تضل هيچ!؟

سكتت ما ردت :- انتِ شگد عمرچ

:- 26 سنة

:- متزوجة صغيرة

ضحكت :- اي تزوجت صغيرة بس صار عمري 16 عشكت واحد وعشگني وتزوجنة وخلفت ريحانة بس بعد ماكو شي يدوم كل حلو ورا مُـر

:- الله يساعدچ والله مادري شنو اكلج بس ريحانة خطية سجليها

:- هي منيلها مستمسكات؟ جنسية ماعدها

:- يااا!! عجبة ولا عند الله عجبة مو بنتج هية شلون ماعدها
حجيت اخر كلمات وقلصت عيوني بشك ..

تحسرت وهزت ايدها
:- غير ابوها غضب الله علي ما اعترف بيها لان بنية جان يريد ولد وبس صارت طلعت الاربعين طلگني واخذتها ورحت الأهلي
شبعوني ذلة وضرب واهانة مستثقليني ومعتبريني عالة وصلت بأخوي الجبير خلاني اگدي

شهكت بصدمة وكتلها :- جذب!!

:- اي والله صدك اگدي شايلة ريحانة ومتلثمة وامشي واصيح الكم عد الله ارملة وماعندي والي بس حليبات البنية ولگمتنة
... حجت بغصة

الم الفلوس وارجع للبيت ياخذهن اخوي ما اشوف منهن شي تدرين ريحانة من صغرها تضل جوعانة من عمرها شهرررين البنية تبجي من الجوع لحد ما تهلك يضمون عليَ الحليب وصدري ناشف
احطة بحلكها بس علمود اسكتها ..

مسحت دموعها ريحانة حضنت امها حيل تبجي وتكللها :- لا تبجين ماما اني اعوضچ اصير صديقتج وحبيبتج لا تبجين

ما قاومت خليت دموعي تنزل على دموعها
استرسلت بالكلام تبجي وتشرح معاناتها :- والله يا ليلى جنت اتكطع تكطع عليها تتمرض ماعندي فلوس طبيب ولا عندي مكان اروحله شبعوني ذلة موتووووني موتوني صارت دمعتي ولكمتي سوة ، امسح الدمعة واحط اللگمة بحلگي حتى ما احس بطعم الاكل سنين صارلي ما يوم كليت لكمة واستلذيت بيها

باوعت لريحانة وكلتلها :- ماماتي روحي للغرفة رسمي

كامت بدون كلام خلت كصيبتها صفح وركضت للغرفة

:- شحجيلج ليلى ملثمة بالشارع وما خلصت من الحيوانات ، رحت لصاحب محل اشتري منه حليب كلت اضمه عنهم واسوي منه لريحانة تشرب
بس طبيت كلي نزعي لثامج شكلج يجيب الشبهات

نزعته لان ما باليد حيلة ، حبيبة شاف وجهي وطمع بيَ ضليت كل ما اروحلة اشتري شي منه يضايقني وبذيج السنة ماكو محلات هواي بهذا الفرع
انجبرت ادورلي محل ثاني بعيد طلع ابو المحل ابن حلال وضل يبيعلي بدون حجاية

كلشي شافت عيني ما ضل شي ماشافته
رفعت ثوبها تراويني :- كتل اخواني ومن غير كتل الزلم الما تسمى زلم بالشوارع سأليني كم مرة تعرضتي للأغتصاب راح اجاوبج ما ينعدن بس كل ذكرى انطبعت براسي مستحيل انساها

ليلى :- اغتصبوج؟

حور :- ولج اغتصبوني مرة واني حاضنة ريحانة وضامة راسها بصدري ومغطيته بعبايتي

لان بيتنة بدربونة خطرة عبارة عن بؤرة من الفساد واني ارجع بتالي الليل ولا تسأليني ليش بتالي الليل بس لا تظنين بيَ سوء جنت ارجع متأخرة لان اخواني يردوني اكدي شكد وما بيَ ما يقبلون ارجع من وكت يكتلوني وليلة منهن بيتوني يم باب البيت بالبرد وريحانة بحضني ترجف بس لان رجعت الهم من وكت وما جايبة مبلغ زين

:- ما گتيلهم اغتصبوني ؟

:- اذا اگلهم اغتصبوني يذبحوني بنيتي المن تضل؟ ويم منو؟ يم الزلم الماعدها غيرة

بس مرة كتلهم جاي اتعرض للتحرش گلولي انتِ تقتحين الهم مجال لو ما تنطيهم مجال ما تحرشو بيج

ليلى :- حيوانات والله صدك ماعدهم غيرة

تحسرت وكالت :- شسوي بعد بسبب رجل منحط سكير همجي واخوان عارات ضيعت روحي وما لگيتها عمري 26 البگدي والله بعدهن ما معرسات

ليلى :- داده انتِ استعجلتي

:- لا ما ستعجلت عبالي راح يطلعني من جحيم اهلي طلع ناقض ما يشبه اخوانة وعمامه كلهم ناس خيرين وينحلف بروسهم بس هوَ عار على الزلم

:- وهسة؟ شلون طلعتي منهم

:- شردت والشردة شردة جنت اخاف اسويها علمود ريحانة بس قبل شهر طگت عندي كلش عفت كلشي وشردت واجيت لبغداد

:- انتِ منين لعد؟

:- من **** اختاريت بغداد لان اخواني عدهم طلابة ومحرمين عليهم يدخلون لبغداد يعني ما يجون هنا
هاي اذا همهم امري اصلا

ضليت متجمدة انصدمت من حجيها شگد معانية؟!! بس الله يعلم شنو ضمت من وجع
ماكو انسان يجي ويصب حزنه وضيمه كله بأذان واحد غريب اكيد يختار الجزء البسيط ويضم الجزء الكبير

ثاني يوم بدلت وسويت شعري ظفيرة ونزلت تريكت وطلعت للدوام جنت تعبانة كوة اجر بروحي وعيوني حمر من المرض وصلت للجامعة بلكوة
من بعيد لمحته واكف بالباب باوع لساعته ونفخ ورجع باوع ع طريق بس شافني استقام بوگفته وابتسم

تقربت منه ابتسمت :- صباح الخير قيـس

قيس :- صباح النور ضل بالي لان ما اجيتي امس كلت اكيد تمرضت

ليلى :- اي اعتقد شكلي يشرح
ابتسم ونصة وكال سلامتج

دخلنة للقاعة هوَ يحاول قدر الامكان ما يباوع على البنات حتى وياي دائما يغض البصر واذا باوع نظرة خاطفة ويدور وجهة

بالمحاضرة بدون ما يشعر كتبتله بطرف كتابه "يقول الرسول (( ما من شيء في الميزان أثقل من حسن الخلق)) خُلقك جميل بارك الله فيكَ ، و شكرًا على مساعدتك لي"

انتبه الحركتي من حطيت القلم بقوة باوع بطرف عينه على الكتاب بتمعن شوية وابتسم بفرح وبينت غمازاته نصة بخجل

التفت الدكتور همسلي "خادم للطيبين خاتون"

مرت الايام متشابها يوم بعد يوم علاقتي بحور صارت قوية
خالتي ما بطلت حفلاتها بتوالي الليل بس مو يومية بين فترة وفترة ومرات يجون ناس اشكالهم غريبة وياهم بنات

شهر كامل مر ، قيس امشي ويا بهدوء ما ردت اطلع للولد گبل واصدمه جنت هادئة ويا يوم احجي واطيح الميانة ويوم لا
ردته يحس اني ثگيلة وماذابة روحي علي

جان شعور بداخلي غريب مو حـُب بس ردته يكون الي

اما هوَ طلع انسان خايف الله وثگيل ما شفت تصرف واحد موحلو طلع منه

بيوم من الايام رجعت جنت امشي بالفرع وعدت من يمي سيارة السايق بطئ سرعته وحسيته مستهدفني باوعتله شفته الرائد صهيب جفلت ورجعت خطوتين ليورا خفف السرعة ونزل الجامعة

صهيب :- صعدي اوصلج وراج هواي مشي

ليلى :- مشكور ما اريد عفته ومشيت

ضل يماشيني ويلح عليَ اصعد ضجت زفرت بغضب وصحت :- ما اصعد ويا واحد غريب ما اعرف اصله من فصله عوفني وروح .

رفع طرف حاجبة باوعلي بطرف عينه شخط السيارة وطلعني هزيت ايدي وبستها وحطيتها على گصتي "مو صاحي"

وصلت للبيت شفت سيارته يم الباب اوو خالتي اليوم عدها سهرة فتت للبيت هدوء حور وريحانة بالشغل تجي العصر بس خالتي بالبيت صعدت فوگ بسرعة وسديت الباب

مر هذا اليوم على خير وراها يوم ثاني طلعت الصبح للدوام لمحته من بعيد بسيارته استغربت تصرفه بس مع هذا سويت نفسي ما منتبهة علي وصلت للكلية واني افكر اليوم بكبره بالي مشغول ماكدرت ادخل اخر محاضرة بقيت كاعدة على المصطبه محتارة بتصرف صهيب وين يريد يوصل؟ معقولـة يأذيني لأن تجاوزت علي

تنهدت حسيت بخطوات احد يقترب رفعت رأسي لمحته قيس كعد بصفي بدون كلام

:- ليش طلعت

:- بالي يمچ .

:- بالك شيسوي يمي؟ ممكن افهم

:- حسيتچ مو طبيعية اليوم ، سريني ليلى اخاف محتاجة شي

:- لا قيس متوهم بس شوية تعبانة لا يضل بالك

رفعت رأسي باوعت بالمكان كل عادة عمار البسمار لاطش وراي يعرف بحقيقة خالتي ويجي ويا اخو الكبير للسهرات تنهدت باوعت لقيس يباوع بعيد
انتبهت لمكان عمار مرة ثانية

:- وين تباوع قيس

:- هذا شعندة؟ الا اكسر رأسه
حجاها وگام فاير

طفرت ورا اعترضت طريقه وهمست بتحذير :- لا تسويلي فضيحة ارجع اكعد بمكانك لخاطر الله

نتر :- وانتِ عدلي لبسچ شوية ما يصير هيچ

ليلى :- ليش شبي لبسي عادي وهاي الناس كلها لابسة نفسي لو بس يمي تتغير السالفة

قيس :- ما تشوفين روحج حلوة ومميزة الانظار كلها عليچ ليلـى خاتـون

ليلى :- شسويلهم قابل قيس لو تكعد وتتكفى الشر لو تعوفني وتروح ماناقصني فضايح

دار وجهة عني يستغفر نصة راسه ورجع كعد بهدوء
:- شحارگ دمك انتَ لا اني اختك ولا بت عمك حتى تغار عليَ

قيس :- ما يتسمى زلمة الما يهتز شاربه وتعرگ گصته على بنات الناس

حجاها بنتر وعافني وراح هذا شبي بله ناقصني مخابيل اني؟ استغفرالله العظيم واتوب اليه

رجعت للبيت كل امالي خايبة اندب حظي الخايس ، بعدني بالباب حتى ماسادته طلع صهيب بوجهي نزيت ورجعت ليورة

صهيب :- كثرن ضدچ

ليلى :- وخليهن يوصلن للراس شتريد تسوي سوي ما تخوفني

صهيب بغضب :- تتحديني يعني

ليلى :- انتَ مو ببالي حتى ادخل وياك بتحدي عوفني رجاءً لا تصير مزعج اني بنية طالبة ادرس واسعى لشهادتي ومستقبلي مافارغة لسوالفك ولو اني ما اعرف وين تريد توصل

صهيب :- ما تعرفين وين اريد اوصل؟

هزيت رأسـي بـ لا و حجيت :- ياريت تكون صريح و واضح حتى نحط حد وننهي السالفة الي مالها بداية من الأساس

صهيب :- اريد اوصل لمكان ما واصله بشر قبلي ، حط اصبعه على صدري نفرت انلطشت بالباب قرب رأسه مني وهمس بأذني :- اريـد اوصل لـ گلـبچ يالترفه
.............للحكاية بقية 🖤

رأيكم بالقصة يهمني ..