رواية حمائم تخشى الطيران الفصل الثامن 8 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

تصويت + تعليقات لطفًا 🩷🖤
__________________________________

الموت لا يمنع الخوف
لكنه يمنع الحياة
نجيب محفوظ

______________________________

صهيب :- ما تعرفين وين اريد اوصل؟

هزيت رأسـي بـ لا و حجيت :- ياريت تكون صريح و واضح حتى نحط حد وننهي السالفة الي مالها بداية من الأساس

صهيب :- اريد اوصل لمكان ما واصله بشر قبلي ، حط اصبعه على صدري نفرت انلطشت بالباب قرب رأسه مني وهمس بأذني :- اريـد اوصل گلـبچ يالترفه

غمضت عيني بلعت ريگي بخوف فتحت عيني لگيته يباوع لعيوني بس فتحت ابتسم :- وخر عني ابتعد شوية حتى نحجي براحة

ابتعد خطوة وحدة استقام جسمي :- اني ما الي نية ادخل اي انسان لگلبي فـ رجاءً لا تلح وياي لان ما تستفاد

قوس شفايفة ورفع اصبع السبابه وگال :- فرصة وحدة

عقدت حاجبي بتساؤول كمل :- فرصة وحدة انطيني ارجعج العمامج واطلبج منهم
ادورهم لو اعرف انبش الگاع نبش ادورهم واطلعهم الج

فكيت عيوني بصدمة ابتسم تك خد :- شنو عبالج تمشي عليَ؟ طبعا لا سألت نسومة سولفتلي كلشي عنج
عندج خيارين الاول ارجعج العمامج واخطبج منهم واخذج
والثاني نتزوج هنا بموافقة نسومة بدون ما ترجعين لعمامج

ليلى :- وين الخيارين بالموضوع؟!

صهيب :- من تفكرين زين راح تلگين خيارين واني افضل الاول

:- شمعنى؟

:- الاول افضل الي والج اني رجال الي سمعتي ومكانتي ماكدر اخذ بنية من بيت ...... سكت

يعني اخذج من عمامج افضل الي والج حتى الناس تكول اخذ بنت اصول

:- اني مو بنت اصول؟

:- الما يعرفك ما يثمنك اني صرت اعرفج واعرف قصتج بس يا تُرى باقي الناس شنو من نظرة ماخذين عنج
حجاها وحط ايده على حنكه بتساؤول

باوعلي وعيونه لمعت بمعرفة :- اكيد هسة يكولون هاي تشتغل هنا راقصة ويمكن بنت ليل مسكينة تجيج التهايم وانتِ نايمة

ليلى :- اني مو بنت ليل انتَ ابن ليل

صهيب :- اني رجال ارمل وماعندي زوجة حاليا ف مضطر اكون ابن ليل مثل ما تفضلتي

هسة ها شگلتي؟ طلعي من هذا البيت اذا ضليتي تاليتج نفس نسومة

ليلى :- لا ما اريد اتزوجك ولا اريد ادخلك بگلبي شنو انتَ نمونة كلك خلك واحد عديم التربية والاخلاق

صهيب :- عبرتلج الفاتن لخاطر هاي العيون وراح اعبرلج هاي لخاطر گلبي الهاويچ بس الجايات ما اضمنلج نفسي

حجاها وغمز وطلع سد الباب ورا دخلت للمطبخ نسومة واكفة بالباب تباوع شمرت كلشي بالكاع وصرخت بغضب
:- هاي انتِ ناطيته مجال يحجي وياي انتِ انتِ
فهميني ماعندج دم ما تخافين عليَ مو اني امانة عندج والمفروض تصونيها

لزمتني من اكتافي وكالت :- اذا اريد احافظ عليج فعلا انطيج الواحد مثل صهيب
اني ماعندي مشكلة يرجعج العمامج وياخذج منهم علمود تضمنين نفسج وينمحي تاريخج بهذا البيت

ليلى :- يا تاريخ!!!

نسيمة :- وجودچ هنا يعتبر نقطة سودة ضدچ يوم بس اذا خذاج لعمامج وطلعتي منهم عروس كلشي ينمحي وتبدين حياة جديدة

بيت كبير وسيارة وضابط الرتبة تلمع على اكتافة يخليج تكملين ومستعد يحققلج كل احلامچ

عفتها لان اذا ارد عليها اتعب نفسي بدون فايدة ، صاحت من وراي
:- ولج يوم والله بس تصيرين بحضنه يخليچ اميرة

صحت بغضب :- اصير اميرة النعل

دقيقة وصعدت وراي لامه اغراضي شافتني كاعدة وازفر بغضب طبكت ايديها وغمتني :- النسوان ما تصدك يجيها هيج زلمة وانتِ تطردين بي من امداج

ولج دشوفي الطول شوفي الهيبة بس شاربة يسوة عشر زلم

ليلى :- طول هيبة فلوس بس ما يسوة عشر زلم هذا يسوة نعال زايد علي هم

ضربت حلگها وكالت :- ولچ سكتي لا تودينه بداهية وتودين روحج بعشر داهيات من ورا هذا اللسان الفالت

ليلى :- يعني يجي هنا لهذا البيت الحفلاتچ شيسوي مثلا يصلي بيكم جماعة لو يقرالكم ادعية تحميكم من الفقر
غير يجي هنا يدور سوالف مكسرة

شوفي خالة اني لهسة ما بالعة شغلتج بهاي البيت جاي تجيبيلي السمعة ترة الشر يعم

:- مو أكلج اخذي صهيب ولج هذا رررائد راااائد

ليلى :- اريد واحد متدين هذا ملطلط شسوي بي

نسيمة :- بس لا عاشگة ولچ

ليلى :- لا ما عاشگة ولا اريد اعشگ احد هسة ممكن واذا ماتصير زحمة تطلعين حتى انام

نسيمة :- تغدي على الاقل

ليلى :- شبعني الضابط مالتج سم ما الي نفس اكل شي بعد

بملابسي تمددت ودررت وجهي ضاجت نفخت بضوجة وطلعت
لزمت راسي بقوة يريد ينفجر من ورا سوالف خالتي بله اني وين وهذا وين

اني بسيطة وكل همي دراستي ويصير الي اسم والاخ واحد ملطلط يدور نسوان والله بحجة ارمل محتاج اكون ابن ليل
امداك وامدا وجهك الحلو ، عمي هوَ حلو كوة هيَ الحق يقال الزلمة يكتل كتل بس اخلاق ماكو

ما حطيته ببالي ولو واحد بالمية بعد ما صار العصر كمت بدلت ونزلت لكيت حور كاعدة يم ريحانة تمسد على رأسها وريحانة تاكل باوعلي ثنينهن وابتسمن
بس ريحانة ابتسامتها تختلف ابتسامة فرح

ريحانة :- خاااالة شوفي
مدت ايدها من وراها طلعت علاكة بيها اقلام والوان

ريحانة :- عمو حلو اشترالي اقلام

ليلى :- اوي عيني فدوة عمو الحلو منو هذا النوب

حور :- رجال نشتغل عندة الله ينطي العافية ذكرها بأقلام تلوين ودفتر رسم

ليلى :- خطية الله يرزقه

مشيت احطلي اكل باوعت الحور :- اكلج حورية ريحانة هم عدها بيان ولادة

حور :- اي عدها بيان لقحتها على البيان

هزيت رأسي ودرت
حور :- ليش تسألين؟

ليلى :- حور لازم تطلعيلها جنسية شلون تمشي امورها هيچ

نسيمة :- منو هيَ

حور :- ريحانة ماعدها جنسية بس عدها بيان ولادة

نسيمة :- يوووو هاي البنية سالفتها سالفة شوف الدنيا ما ترحم الك الله يالفقير ما الك غير الله

حور :- ما اكدر اروح لمحافظتي واطالب ابوها بجنسية اخاف يلزموني اخوتي
بعد هوَ جابر شيقنعه؟

ليلى :- عندي فكرة مو گلتي عمام ريحانة خوش ناس طلبي منهم يقنعونة
واذا على الروحة لمحافظتج عمي اني اروحلهم وخالتي نسومة تجي وياي
نسيمة بنخوة :- اجي ليش لا اني ما ارد احد يحتاج مساعدتي

حور ضحكت باستهزاء :- شنو عبالچن ما حاولو؟! جابر شراني وخبيث ومحد يگدرله ياما حاولو ويا حتى البيان ضامه زوجة حماي باگته بوكة وجابته الي علمود القحها لريحانة ورجع خذاه مني من باب المستوصف الجلب

مشكورات بس والله هيج مرتاحين مانريد نوصل لذيج الصفحة ، اخاف

ليلى :- براحتچ بس اعتقد تكدرين تسويلها جنسية دام عندها البيان تصير الجنسية بسهولة

حور :- والله مادري

خالتي خزرتني حتى اعوف البنية براحتها صدك حقها تخاف ترجع لمحافظتها لو توصل لواحد هناك
رغم كلش قريبة واحنه گاعدين ع حدودها الطريق الها مو كلش طويل بنهار واحد تنتهي شغلتهم

شـيهانة :- شگد خطية هاي الطفلة كسرت گلبي كسر الله بلاها بأب ظالم وخوال ما يعرفون معنى الرحمة

ليلى :- اي والله

هاجر :- الدرنفيسات بس تكركن ما تسدن حلوكجن نريد نخمد

شيهانة :- كومي كومي مالي نفس اتعارك

عفتها وكمت تمددت بفراشي وفكرة تاخذني وفكرة تجيبني غمضت عيني ورجعت بذاكرتي لذيج الليلة العصيبة ، لحد هسة ما تجرأت وسولفت بيها كدام احد خنگتني العبرة غطيت راسي ، كتمت شهگاتي

صرت شجرة بوسط ريح تاخذني وتردني
وحيدة وحتى البلابل هاجرتني

بعد دمعة وتنهيدة غفيت ..

حسيت بأيد تتحسس رجلي فزيت مفزوعة شفت هاجر يم رجليني گبل گالت
:- جاي اغطيج متكشفة

جريت رجلي وغطيتها :- لو تشوفيني اموت لا تتقربين مني مفهوم لو لا

هاجر :- شبيچ درنفيسة؟ هذا ليسوي زين؟!
صدگ لو كالو سوي زين وذب بالشط
فرت ايدها وراحت

حطيت ايدي على گلبي يقرأ الف حسيت الخوف بدأ ينهش بروحي نهش
شگد حاولت ارجع انام بس اجذب اذا اكول خذت عيني نوم بعد هذا الموقف

صار الفجر كمت توضيت وصليت ماكعدت شيهانة ادري عليها الدورة ماتصلي رتبت فراشي وضليت اقرأ رواية كعدو والسجن ضل يروش من كثر السجينات

باوعت للوجوه مثل كل مرة اسأل روحي شنو التهم الدخلتهن هنا؟ قتل سرقة خطف

شيهانة :- الماخذ عقلج يتهنى بي

ليلى :- اوف اوف وينه هوَ؟

لكزتني بخاصرتي وغمزت :- ما اظنج خالية ليلى ما اظننننن

ليلى :- دسكتي عيني سكتي ماكو مثل ضيمي خليها مضمومة

شيهانة :- بشه بشه ، واخليج تضميها وما تحجيها الا اقسمج نصين

ليلى :- اوي عيني بنت الطبقة المخملية تقسمني نصين
وخري عني مالي خلگ

شيهانة :- طيب لا تتمغلجين

ليلى :- شنو تتمغلجين؟

شيهانة :- يعني تتمضيگين هيچ شي

طبگت الرواية وعدلت گعدتي :- مُمكن ست سـُهير تكمليلي قصتچ الفضول قاتل

شيهانة :- حضرتج فضولية

ليلى :- ايي خصوصًا بهاي بسالفتچ خليتيني اضرب صفنات خلفلة على صفنات المطي
بحيث شكيت بالاكل ومصادره

دمغتني على رأسي حيل وكالت :- خفت هلوجه كون لا تلعبين رواحنة مالنة خلگ صخونة مال حصونة كون

سمعي سمعي اكملج ليش لا اصلا الحجي ضال متجمع على كلبي وكاتم انفاسي ما صدگت ارتاح لبشر واكتله الاول والتالي وين ماتريد تصفى خل تصفى

حطيت ايدي تحت حنكي انتظرها تحچي عيوني تترقب حركاتها عدلت گعدتها وكالت ...

عمي تفاجئ كلش من شافني وكال

حميد :- ما عرفناچ ولا صغر البيچ

شيهانة :- سهير بت حجي راضي

گام بسرعة اخذني بحضنه يبجي ويبوس براسي يبعدني يباوعلي ويرجع يحضني

حميد :- كبرانة عزيزة گلبي صايرة مرأة من عمت عيني عليچ يا عمو شلون احجيلج بالصار بأهلج شلون اقهر كلبج ع موت اهلج ومصيبتچ

صرت من حضن الحضن والبيت انخبص خبص عمي يبجي وزوجته تبجي والكل متأثر
بحيث گبل تراجعت وگلت ما لازم احقد واسوي شي اذا ما اتأكد لان عيونهم تحجي الحزن البداخلهم على وفاة اهلي
يمكن مو همَ الحرگو البيت ومثل ما كالت ام حيدر بين الحق والباطل شعره

عيوني تباوع عليهم واحد واحد سلمو وعرفو عن نفسهم
عادل الكبير ومرته يمه بوستني وطفلة تلعب توقعتها بنتهم لان الطفلة تشبه عادل حباية ومفشوگة

وأبنهم الاصغر "جبران" اعرفه ، والأخير "عماد" صارلي سنين ما شايفتهم ناسيتهم

حجيت بحسرة :- سمعت هدير ماخذة واحد من الولد شنو وينها؟

زوجة عمي علياء گالت :- معزومة يم صديقاتها اخذناها لـ عماد حاولنة ندزلج دعوة بس عرفنة ان زوجچ رافض تتواصلين ويا اهلچ

شيهانة :- شوكت تزوجو؟

عماد :- صارلنة سنتين الحمدلله

شيهانة :- چنت وحيدة ما متزوجة قبل سنتين بس بعد تعرفون الظرف المريت بي لهذا السبب يعني تواصلي ويا اهلي انقطع اجه والدي بس ما حجالي شي الظاهر عنده نيه من اخفائه موضوع زواج هدير عني

علياء بتلعثم :- ما اعتقد ، زين احجي شلونچ شخبارج شصار عندج ماعندج، خلفتي؟

شيهانة :- اي جبت ولد من مشاري ضل يم ابو تنازلت عنه

حميد :- ليش انتِ تطلگتي؟

هزيت رأسي بأسف متصنعة الحزن :- مشاري خذلني اخذته لسبب معين تالي كسر بيَ ، وبالحقيقة اني كلش تعبت ونفسيتي ما تتحمل شي تطلكت وتنازلت عن ابني على الاقل ضل يمه اخو يمه ابو يدارونة وعندة ثنين خوات من مشاري خير من الله

حميد :- زين وانتِ هسة وين تعيشين؟ لا تفهميني غلط طبعا بس اول شي اجة ببالي بهاي اللحظة انتِ لازم تبقين يمنه ما من المعقول نعوف بنية شابة تعيش وحدها ولا البنيه بنيتنا ودمها من دمنا

صفنت بتفكير بسرعة عقلي فكر وكلت اي لازم اضل يمهم اول خطوة لاكتشاف الحقيقة هو عيشتي بهذا البيت

شيهانة :- اني مخططة اسكن وحدي ما اريد اكون ثقل على احد لو اقيد احد بوجودي

عماد :- لا يبنت عمي لا تكولين هيج تزعلينة من عندچ هذا البيت شكبره اذا ما يضمج وتعيشين بين حيطانه من امدا

حميد :- مثل ما گال عماد يالشيهانة يا عزيزة النفس
انتِ صاحبة البيت مو غريبة والبيت يعيشون بيَ اصحابه ام عادل شتكولين

علياء :- نحطها بعيونه عفا عليك ابو عادل تسألني شأكول؟!

شيهانة :- الله كريم يوم يومين اشوف اموري

علياء :- نزهة، نزززهة، حظري غدا للشيهانة

شيهانة :- لا ما يحتاج بس اريد هدير شنو تتأخر؟

طلعت البنية وتحجي بأسف :- كل الزايد انطيته لبيت ابو محسن

باوعتلي عمة علياء وكالت :- اي تتأخر ، شنو تحبين تاكلين

شيهانة :- لا ابد ماريد

جبران :- انا طالع للمطعم اجيب الها غدا نص ساعة واكون بالبيت خل ترتاح ، اتذكرج بصغرج تاكلين دجاج مشوي هواي مو صح
ضحكت وهزيت رأسي ب اي وشحيت نظري عنه بسرعه

ابتسم اخذ السويج وطلع ، تصرفاتهم نفس تصرفات اهلي من يجيهم احد ما شفت عليهم شي
كل تصرف يطلع منهم طبيعي بحيث رأسي راد ينفجر من كثر التفكير بموضوعهم

گعد عمي يسألني شلون اجيت و شنو صار بالحقيقة غدرتني دموعي وبجيت كدامهم من تذكرت موقفي ورجعت نار الحقد بداخلي تلهب
من اشوف الدموع مالية عيونهم اغير نظرتي صرت متشتتة و واكعة بين نارين

ساعات مرت حجي مستمر تغديت والصار الليل ورجعنا جعنا ، بحيث البنية نزهة كملت العشاء وصبته
باوعت لعماد وكتله :- وين مرتك؟

:- ويا صديقاتها هسة على جية

هزيت رأسي توجهت وياهم للسفرة ممدودة بالكاع كعدت اكلت وياهم والحديث لا زال مستمر خلصنة عشاء جاي نشرب جاي وفاتت هدير ما انتبهتلي تحجي ويا نزهة توبخها

هدير :- مو تدرين بيَ اكل هنا ليش مسوية لحم اني ما احبة ، سويلي شي ثاني لو اطل...... دارت باتجاهي انتبهتلي واتسعت عيونها بصدمة و همست :- شيهانة!!!

كمت على حيلي ركضت الها حضنتها بادلتني الحضن بس كانت باردة رد فعل بيت عمي افضل بهواي شفت حرورة بيهم ما شفتها بيها ولا كأنها اختي

هدير :- هلا بيج ، صاعدة ابدل واجيج
هزيت راسي بالقبول صعدت والصعدة صعدة بحيث حتى رجلها ضل يبلعم وعينه تعلگت بالدرج

ابتسمت بألم وكلت لزوجة عمي :- عمة اريد انام ارتاح

علياء :- صار نزهة نززهة كملتي الغرفة

نزهة :- ام عادل عيني الغرفة نظيفة تنتظر من يجي وينام بيها وجنطة البنية هم خليتها

علياء :-كومي حبيبة كومي اخذج ترتاحين
اخذتني لغرفة بابها يصير جوة الدرج للوهلة الاولى ضنيت هاي غرفة تعبانة وراح يشمروني بيها بس من انفتح الباب تغيرت نظرتي وقوست شفايفي بأعجاب

علياء :- ولو مو مقامچ عيني .... قاطعتها

شيهانة :- لا تكولين هيج عمة الغرفة كلش حلوة، بيت العامر ان شاءالله

ودعتني وطلعت قفلت الباب وتجولت بالغرفة سرير خشب وميز تواليت وكنتور فتحت الكنتور مابي غير مناشف الظاهر الغرفة للخطار بس الحق يقال الغرفة مرتبة وحلوة ومفروشة ونظيفة كلش

تمددت بملابسي اباوع للسقف وكل شي صار يمر كبال عيني بديت اتخيل شكل عائلتي المحروكة
كل ما اريد ارفع ايدي و اوجه اصابع الاتهام البيت عمي ضميري يكلي لا حرام عليج شفتي معاملتهم الج؟! ما متأكدة لا تظنين سوء "ان بعض الظن اثم"

حطيت ايديني على وجهي وبچيت بحرگة گلب
ياربي ساعدني ولا تخليني اشيل اثم ناس مالها ذنب

غفيت بعد تفكير استمر لوقت طويل وكعدت الصبح على اصوات عالية كدرت اميزها

جبران :- حيووان لاااااااا

عماد :- ادوس ابطنك اليوم ، يحجي ويلهث

كمت مفزوعة من فراشي اخذتني رجليني للباب انتبهت لشكلي بالمراية وتراجعت عدلت شعري واذاني يمهم اتسمع

جبران :- عمااااد ولك ، يا امي

عماد :- اليغلط يتحمل نتائج غلطه ، سمعت صوت ضربة قوية وبعدها اصوات الضرب تعلى وهم يلهثون

خفت اكثر تشجعت وفتحت الباب وطلعت شفتهم ثنينهم بالكاع جبران جوة عماد وعماد يضرب بي وثنينهم يضحكون من شافوني سكتو

رمشت بصدمة وگتلهم :- طلع گلبي من بلعومي عبالي تذابحتو ، طلع كل هذا ضحك

عفتهم ومشيت للحمام وطلعت غسلت وجهي باوعت لروحي بالمراية تأملت وجهي التعب صار واضح على ملامحي

الدنيا رسمت قسوتها على وجهي ، وخطت حروفها بدفاتر اقداري

ها هي اللعنة قد بدأت
واروح احبابها قد اتعبت ..
خُطفت الانفاس ، و وقع الفأس بالرأس
نار حقده لا تتخطى الناس
بل تصيبهم وذويهم حتى تعدم الأحساس
وتحبس الانفاس
حتى ينصدع من هول نوائبها الألماس
ما بالكم بقلوب الناس؟

غمضت عيني برهبة حسيت شي اخترق صدري ويا ما فتحت عيني المراية تحركت و وكعت رفعت ايدي بسرعة غطيت رأسي ، حسيت بحرورة تنزل على ايدي و وجع بساعدي

على صوت طيحة المراية على الگاع ركضو جبران وعماد ومن المطبخ عمة علياء ونزهة باوعت الايدي تنزف دم الكاع انترست زجاج ودم من ايدي يوكع بشكل قطرات على قطع المراية المتكسرة
باوعت برهبة القطع الصغيرة عكستلي منظري بشكل مرعب

رجعت خطوتين ليورا كلها لحظات صارت يمي عمة علياء ونزهة جبران بأعتباره صيدلاني تقرب بسرعة لزمي ايدي وشاف الجرح

جبران :- يحتاج خياطة لازم نروح للمستشفى

علياء :- ما معقول شلون وگعت!!؟ بيج شي ثاني تأذى راسج

شيهانة :- صدمتني ما حسيت غير جاي توكع على رأسي تلاحكت روحي وغطيته بأيدي

جبران :- عوفن الحجي البنية نشف دمها من كثر النزف يمة بسرعة لبسي وتعاي
نزهة جيبي شاش الف ايدها بي

نزهة :- صار من عيوني

عماد حجة وهو يغطي خده بأيده متحسر :- عاد شلون بيج صار شگ جبير بايدج يمة هسة يخيطونة الج

جبران بخوف :- ولك دشوف العظم طلع شيهانة الشگ غميج طلع العظم مال ايدچ بس لا يبترونها

بلعت ريگي بخوف وهمست :- وگفتو كلبي

ضحك جبران :- نتشاقة وياچ

اخذ اللفاف ولفة على ايدي غسلت كف ايدي من الدم كان ساعدي كله يوجعني

عماد :- يا مصيبتج يا داده راحت ايدج

جبران :- لازم هسة يجيبولچ تچمالة جلد بس وين يلگون صخل وياخذولج من جلده

شيهانة :- انتَ موجود

عماد يحرضه علي :- اسمع جاي تقصدك يعني انتَ صخل عيب وخزي على شواربك تسكت وما تردها لاه لاه يا عيبة العيبة

جبران :- لا عادي ثنيناتنة نفس الصنف صخول تايها وما نندل دربنا ، مو بالله؟

شيهانة :- اني شيهانة انتَ صخل شعليَ بيك

عماد شهگ وحط ايده على حلگه :- يَـ مصيبتتتتتتي يَـ مصيبتي يَـ خرررررابي الست دي مش مؤداااباااااا

ضغط ايدي حيل وهو يشد الشاش وگال بخزره
:- ليش تشمتين الشمات بيَ لو حلتلج السالفة؟ تعودتي

بهت حلگي سكتت ما رديت بالبداية جنت مبتسمة وما احس حتى بالوجع بس من كال اخر كلمات الوجع عندي تضاعف بسبب بسمارة الي دك بالعظم

اجت عمة اخذوني للمستشفى اجة الممرض يخيط ايدي وبدأ ينضف بالجرح جبران واكف يمي يراقب
غمضت عيوني بوجع ودرت وجهي تقرب مني اكثر ومد ايده گبالي وهمس
:- كضيني .

حطيت ايدي على اصابعة ولزمتهن بقوة شاغت روحي يله خلص خياطة الشگ عميق كلش وطويل

الممرض من كمل ابتسم وكال :- هذا حظج نحس مراية معلكة شوگعها عليچ؟

علياء :- حظنه ابو سجاد حظنه والله فشلة اول يوم الها بالبيت يمنه وتعورت

:- قضاء وقدر خالة

:- ليش مكبرة الموضوع عمه؟ ترا عادي ما طار نصي خياطات فترة وتنشال عادي

جبران :- دگومي گومي شنو چلبتي بالسدية طاح جواچ علچ

جان يحجي بهمس وكفت لزمني من زندي عمتي تشكرت من الولد وكلتله سلملي على امك حبيبي

باوعت لجبران كال :- غير ابن خالتي لا تصفنين

هزيت راسي ، صعدت بالسيارة عمتي التفتت باوعتلي ورجعت باوعت لجبران

علياء :- اذا شايل فلوس مرنة على السوگ ناخذ شوية ملابس لبنت عمك جنطتها صغيرة الظاهر ما جايبة ملابس تكفيها

شيهانة :- لا عمة ماكو داعي اني العصر اطلع واتسوگ براحتي بعدين جبران اكيد عنده شغل

علياء :- اي وشكو علي لو اخذنة ساعة زمن نجيبلج كم لبسة عبري روحج بيهن لحد ما تشترين
امي طلعنة للسوك مالك علاقة بالشيهانة من يوم يومها عنيدة وما تريد واحد يقدملها شي اوف منها اوف

جبران :- اوف الف مرة مو مرة وحدة

شيهانة :- والله تعبتكم وراح اكلفكم

رفع عيونه بالمراية وگال :- بالخدمة عيناي .

شيهانة :- خادم ربك .

خذوني للسوك اشتريت 3 لبسات وملابس داخلية وبعض الاشياء ورجعنة فتت سبحت بدون ما يلوح ايدي ماي ولبست من لبسي الجديد لفيت راسي بالمنشفة وطلعت جاي اعبر للغرفة صار بوجهي جبران ينزل مبدل لابس غير لبس
باوعلي درت وجهي ومشيت مشطت وخليت شعري مفلول وطلعت للمطبخ

نزهة :- اجت الحلوة تعاي تريگي ام عادل راح تنجلط من وراچ

شيهانة :- سلامتها؟

نزهة :- مستحية تكول اول يوم يمنة تعورت البنية خجلانة منج

شيهانة :- لا شسالفة قضاء وقدر
اكول نزهة وين هدير؟ زوجة عادل؟ شو مالهم حس

نزهة :- عادل بيته هنا بصف بيتنة يجي هوَ ومرته يتغدون ويرحون ثنينهم موظفين بنفس الشركة البنية ماتلحك تطبخ

شيهانة :- وهدير؟

نزهة :- فوگ مادري يمكن طلعت

شيهانة :- وين تطلع مثلا؟ تشتغل؟

نزهة :- اي تشتغل غير البت معلمة خو ما تضل بالبيت كاعدة وساكتة هم ترفه عن نفسها من تطلع الواحد شيسوي بكعدة البيت

علياء :- نعيمًا امي

شيهانة :- ينعم عليچ هدير وين؟

علياء :- رايحة للمدرسة من ترجع تشوفيها

باوعتلها بتفكير نزهة حطت الريوك بس بالي مو يم الاكل يم هدير
شبيها؟
ليش هيج تصرفت البارحة ما اجتي واليوم طلعت للدوام
حقها ماتكدر تغيب بس ع الاقل البارحة نازلتلي

علياء :- امي اكلي نزفتي دم اُكلي عوضي الراح منج لا تموع روحج وتطيحين يروح يصير بيج شي

شيهانة :- كاعد اكل والله بس بالي يم هدير احسها غريية؟ شتگولين

علياء :- متوهمة .

شالت كلاص الجاي وكالت :- الحمدلله ، رايحة اشوف بنت عادل خاف كعدت

نزهة :- اگلج حبيبة شلونها الكويت

شيهانة :- حلوة تجنن

نزهة :- ياااا هنيالج لو انا منج ولا ارد اضل هناك مرتاحة شعندج جاية لشلعان الكلب؟

شيهانة :- ما فهمت يعني ليش شلعان گلب اني جاية لأهلي وناسي
يعني بالبيت هنا شلعان گلب؟

نزهة :- بالبيت وبرا البيت

شيهانة :- طيب ، احچيلي

نزهة :- والله برة الوضع السياسي والاقتصادي
وبالبيت اختچ بس بدون زعل حبوبة

:- ليش شبيها اختي؟

:- تسوي مشاكل مستغلة العالم وخشمها حيل عالي وشوكتها گوية ما تنكسر
يااا يااا شوف وانا اخرط كلشي جدام اختها عذريني خية عذريني لساني فلات

:- معذورة ، طيب سولفيلي شنو تسوي اختي

حطت ايدها على حلگها بمعنى ما تحچي ما ضحكت بوجها سكتت ماردت انطيها مجال واخليها تتمادى بالكلام عن اختي

خصوصًا بهذا وضعي جاية الهم ما اعرف منو وياي ومنو ضدي
معاملتهم الي قلبت كل الموازين وخلتني اعيد النظر بالموضوع
حطيت ايدي جوة راسي تنهدت وكلت بداخلي
معقولة اكو احد استغل المشاكل الي بين ابوي وعمي وقتل اهلي حتى هوَ يطلع منها وتوكع براس عمي
اي جائز يمكن ابوي يطلب هذا الشخص فلوس او عندة مشكلة ويا

ويمكن كل حجيهم ومعاملتهم تمثيل بس حتى يوهموني ان هم ابرياء
المشكلة احساسي يكلي هم صادقين جاي اشوف بيهم حنية نفس ماعفتهم

عماد :- صافن الحلو صافن ابو الحب صافن ابو الحصين

شيهانة :- يا حب عماد حايرة بضيم الدنيا

سحب الكرسي وكعد وكال :- بت عمي الحلوة تاج راسي شعرة من شاربي محتارة بضيم الدنيا واني موجود
عفاااااا تخسى الدنيا تحمل بت عمي ضيم

شيهانة :- ضحكتني خرب بيومك هههههههههه

فر سبحته وكال :- عماد الحداد صاحب الامداد
يمدكم بزيت الزيتون واحيانًا بالرماد تفضلي ست سهير واطلبي

شيهانة :- هسة انتَ حداد عطار ، لو شنو اثبتلك على شي

نزهة :- بله ما تمدني برجل

باوعتلها بصدمة وغصيت من الضحك

عماد :- نزهة الرجل موجود خليها يمي بس تنطيني نصيبي من المهر اكيد ينطيج هواي وتصيرين مريشة

نزهة :- او وغمة حسدتني حماتي على طول عباتي

شيهانة :- نزهة شلج بالرجل بس هم وغم خليج وحيدة احسن

عماد :- لا يالشيهانة الرجل حلو نزهة يلزمج من ايدج وتتمشون يومية مثل البلابل
ولو هي البلابل ماتمشي تطير بس يلا

نزهة :- هوَ من يجي الرجل اطير مالك شغل انتَ بس جيبة

عماد :- شرايج بـ صلوحي ؟

نزهة :- لا بارك الله بيك گووووم اطلع منا كوم
لزمت ليفة المواعين تشمرها علي طلع يركض وميت ضحك

عماد :- صحلها رجل گالت عور

باوعتلي وكالت :- اي ضحكي ضحكي ماتعرفين صلوحي واحد شاخط نص عقل يلحكني من اروح اتسوگ يصيحلي صلوحة

سكتت ماكدر احجي بس افتح حلكي اضحك على منظرها وهي شادة الشيلة على راسها وشواربها خضر ، وعدها شامة جبيرة بخدها

بس للامانة ملامحها حلوة تحتاج شوية تعديلات

اجت عمتي جايبة بيدها بنت عادل غسلتها وريگتها الي فهمتة اهلها يخلوها هنا من يرحون للدوام

بقيت انتظر ساعات بالمطبخ الى ان رجعت هدير تقربت منها كتلها بحدية :- اكو وحدة صارلها سنين ماشايفة اختها تتصرف هيچ؟

هدير :- شلون يعني؟ باوعت منا ومنا تقربت مني همست
:- اخاف منهم بس يشوفوني طبيعية وياج يشدون وياي اكثر هم هيج هيج كارهيني
خليني اصعد نصيحة ابتعدي طلعي من هذا البيت لا تصير نهايتچ سودة

شيهانة :- فهميني شرحيلي
جريتها من ايدها للغرفة وسديت الباب تأفأف بضجر

:- ترة هنا الكل يكرهني ويكرهون اهلي ويكرهوج الج نصيحة طلعي طلعي شردي لا تضلين يمهم

:- طيب بس خل افهم ليش؟

:- هيج بدون سبب حاقدين مشوفيني نجوم الظهر خليني ساكتة ماكدر احجي الضيم الي بالگلب هواي

:- احجيلي شلون ماتو اهلي سولفيلي على الاقل عن اسباب موتت اهلي

:- مادري بس كل الي اعرفه كتال اهلي واحد غريب مو مثل ما الناس حجت بعد اني ساكنة وياهم واعرف هم مالهم شغل بموت اهلي

:- اذا مالهم شغل بموت اهلنا زين الحمدلله
هسة كعدي واحجيلي بالتفصيل شمسوين بيج ليش تكرهيهم

:- مو كلشي ينحجي يالشيهانة بس من الاخير اني ما مرتاحة هنا

باوعتلها شكلها يوحي انُ هي مُدللة وعايشة بترف ونعيم الايدين جبن من البياض ومزينات بخواتم واساور والوجه يضوي والخد اذا تطكة يطفر دم ، من غير اللبس

نزعت حجابها وباوعت بالمكان :- وانطوج انكس غرفة

باوعت للشعر مسويتة ميش وكلش مرتب وكثيف
اني اعرف المهموم يبين الهم بوجهة بشعرة بلبسة مرات لان يهمله
بس هدير اسم الله عليها ما مبين

:- شوفيلج بيت وطلعي اذا تحبين اني اساعدج اسألج المعلمات بلكي يحصلن

:- لا اني عاجبني اضل هنا شلون اضل وحدي ما اكدر
اني بنية مطلقة ما اريد اكون وحيدة وانطي ضعيفي الانفس فرصة ويستغلوني

:- بكيفج اني بلغتج بالوضع وما على الرسول الا البلاغ

:- اذا شفت الوضع ما ناسبني اطلع لا تفكرين زايد وتقلقين ، بس سالفة زواجج صدمتني

هزت ايدها وضحكت كالت بالشقة
:- ليش؟ شنو وحد قابل بس انتِ ترغبچ الزلم وتتزوجين؟

ابتسمت تك خد
:- بعدج بهذا اسلوبچ؟ تحسسيني انچ تغارين مني

ردت وهي تضحك
:- ما اغار بس شويَ شايفة روحج عبالك بس انت محبوبة وتتزوجين

:- هدير

:- هاا

:- مو انطيتي صگر وعد ، عاهدتي راح تكونين اله وخليتيه يقسم ما يتزوج وحدة غيرچ؟ ويضل على عهده ليش خلفتي العهد
..........................للحكاية بقية 🖤

رأيكم بالقصة يهمني 🖤..