رواية حمائم تخشى الطيران الفصل السادس عشر 16 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

🚫 لتنسون تصويت + تعليقات بين الفقرات لطفًا 😁 وصلو البارت 300 تعليق

رفعت راسي امشي ويا ومن بين كل الناس عيني وگعت ع قيس واگف بثبات ومخلي ايدينه ورا ظهره لام شفته لثغره ويباوع علينا من بعيد عيونه ثابته علينا لدرجة ما يرمش حتى متضيع علي لحظه ..

جمد الدم بعروگي الله يعلم هسه شنو اخذ علي من نظره وشنو جاي يفكر بيَ واني غبية غبية ليش ما طردت صهيب

وكع كلبي من شفت راسه مضمد حسيت روحي دتطلع ما اعرف بشنو مر وشصاير ويا

ددلال من ورانا تصيح بصوت واضح :- ليلى اوگفي التفتنا اني وصهيب سوية وگفت مصدومة فاتحة عيونها ع وسعهن
تباوع لأيد صهيب شايل اغراضي ويمشي وياي وترجع تباوعلي

بلعت صدمتها وتقدمت :- خالو شدتسوي هنا

باوعلها بحيرة ورجع باوعلي ضلت عيوني تتنقل بيناتهم مصدومة
صهيب :- اجيت بشغلة عندي صديق محتاج مساعده وشفت لبنيه تعبانه وردت اساعدها

لزمتني دلال من شافتني ارجف گوة واكفة :- زين زين اخذنا للمستشفى ليلى تعبانه اذا تگدر

ابتسم وارتفع طرف حاجبه :- صديقتچ؟

هزت راسها بـ أي وهمست :- هذا خالو اخو ماما

أشر النه برأسه حتى نمشي ورا جنت متبنجة من گد الصدمة واني سويت نفسي داموت حتى قيس السيد يعرف وضعي ويطلعلي الحجج وما يظن بيَ ظن سيء ..

كرصتني دلال وهمست :- خالو وين شافج وشنو حجة وياج

ليلى بألم :- لكاني اتلوا من الالم وكال محتاجة مساعدة كتله اي لان راح اموت مابيها مجال

دلال :- هاا زين الحمدلله عبالي يعرفج

هزيت رأسي بـ لا ..

مشينه للسيارة اخذنا صهيب للمستشفى مسوي نفسه ما يعرفني واني لهسه مصدومة شلون وشنو من صدفه هاي الي تخلي صهيب يكون خال دلال!!
غمضت عيني لحظات احس روحي بحلم ما مستوعبة وارجع افتح واباوعلهم واحد واگف بصف الثاني وصهيب معبر ايده حول كتف دلال ويشاقة وياها

من تحسنت طلعوني وصلوني للبيت وراحو وطول هاي المدة اني ساكته ما حاجية شي

اول ما طبيت لگيت خالتي واكفة تطبخ من شافتني وكع من ايدها الجفجير وركضت لزمتني من زندي

نسيمة :- شبيج يوم منو وياج والله اشگه شگ المتعرضلج

هزيت راسي ب لا ورديت :- الشهرية وتعبت ما بيه شي

نسيمة :- دكولي والله

ليلى :- والله واريد ارتاح داموت من التعب

نسيمة :- عسى الوجع البيج يجيلي يا امي يا حبيبتي تعاي وياي امشي

ساعدتني اصعد بدلتلي ملابسي ونومتي والدمعة بطرف عيني اوف يا عشق ابن السادة موتني موت واخذ حيلي

غمضت عيني ما حسيت ع روحي غير غفيت من كعدت نزلت للمطبخ لكيت نسومة وحور يبسبسن وريحانة ترسم

سحبت الكرسي وگعدت رافعة طرف حاجبي :- شنو عندجن احجلي

حور غطت وجها خجلانه واجت شاورتني :- طلع اسمه محمد
باوعتلها بنص عين ودفعتها :- حسبالي معترفلج

حور :- سألني وين بيتنا وشعندي ماعندي
حط عينه بعيني وگالي "ليت كل العيون بريئة مثل عيونچ"

ليلى :- اويلييي

حور :- تتوقعين حبني؟

ليلى :- على الاغلب اي گتيله وين البيت

هزت راسها ب لا :- بعت ثگل كتله شتسوي بعنواني اني هنا مرة اركض ع عيشتي وعيشة بنيتي
كالي متزوجة كتله منفصلة ولو عندي زلمة اطلعه بمكاني يشتغل حتى ما اتعرض الهيج موقف
ويجي واحد يريد عنواني وبس الله يعلم بنواياه

كالي وهو مبتسم :- انا رجال شروكي من العمارة اسمي محمد وما معرس وعيني شافتج ما الي نيه سيئة اتجاهج ولا شي رايد اجي للبيت من بابه

حور :- توكل خوية خليني اشتغل احنه ناس دروبنة متعبة ، شلون ما نرتاح حتى بشغلنه؟

محمد :- ان جان روحتي عنچ تريح كلبج رايح وبعد ما تشوفين وجهي وما الفي هنا

حور :- الگاع گاع الله شنو دخلني بيك اجيت ما اجيت

هز راسه مبتسم وراح ..

ليلى :- طردتي الرجال

حور :- حتى ما يحسبني لگمة سهلة وبسرعة يلوچني ويشمرني

ليلى :- وتحجين علي تكولين ملعبة وسحرتي ابن السادة بسوالفج طلعتي داهية
ضربتني ع كتفي :- عيارة تعلمت منج

نسيمة :- هاج شربي هاي الاعشاب حتى ميضل عندج وجع

اخذتهن من ايدها شربتهن وحجيت بهمس :- خالة لتخلين رجال غريب يبات وياخذ راحته مو حالة هاي نريد نرتاح والله اخترعت من شفت صهيب

نسيمة بعدم رضا :- الرجال جاي علمودج ومتعب ومتلوع تردين مني اطرده لو اخلي يروح بوقت متاخر؟ شسوا هو بس نام المسكين والله كملته بكعة

ليلى :- انطيني خبر لعد علمود ما افتر براحتي

نسيمة :- على الجايات

حور بفرحة :- يرتاح گلبي من اشوف صهيب احسه صار حامينا وسندنا

ليلى :- عمرج لا ترتجين ع حايط مايل ماتدرين بيا ساعة يطيح

نسيمة :- المايل مستقتل عليج والعدل طاكها تغليسة ضلي بهاي فطاريتج وضيعي روحج

ليلى :- بدت القوانه الجديدة اذا ما تسدون الموضوع اصعد

دك التلفون نسومة تباوعلي بنص عين ما عاجبها تنشف بأيديها وراحت جاوبت لحظات وصاحت ليلى يردونج

عقدت حاجبي مستغربة منو هذا اليريدني كلت يمكن دلال تريد تتطمن ع سلامتي اخذت المبايل اجاني صوت واحد يهمس
:- ليلى وياج سيد قيس

ابتسمت بفرح وبنفس اللحظة تذكرت موقف اليوم ومغصتني بطني متألمة من الرعب
ليلى :- هلو قيس

رد بغضب :- ماراح اطيل الحديث بس ردت اكلج مرة ثانية حسبي الي حساب ولا تتصرفين مثل تصرف اليوم لانج راح تصيرين حليلتي واسمج مرتبط بأسمي

ضحكت باستهزاء :- حليلتك؟ الغريب يجي يساعدني بالوقت الي مبادئك ماتسمحلك تجي تساعد بنية راح تصير حليلتك

جر نفس واستغفر :- لا تطلعيني عن طوري اجيت لكيته لازمج
ليلى :- ردت اوكع ما كان قاصد من شفت هذا الشي ماعرفت تجي تتقدم وتاخذني من ايده ضليت واكف مثل الجبان تباوع بصمت وتخلي الغريب يساعد محبوبتك قيس الى متى تضل بهذا الضعف؟ فهمني فهمني انتظرك ما تجي من بداية السنة كتلي تنتظر عمك يجي ويقنع والدك ولهسه ماكو يومية من يندك الباب افرح واصعد احضر روحي ع امل يكونون اهلك الجايين وتالي انخذل

اعترف قيس انت ضعيف ماتكدر تاخذني خليني للاقوى منك للي ما تهمة طائفة ولا مستوى مادي وديني وعقائدي ليش مجلب بيه ومأملني

قيس :- ما قريتي الرسالة الظاهر؟

نترت :- لا وما راح اقراها ولا اعتبرك موجود اذا ما تجي وتتقدم لخطبتي ما اقبل اكون وحدة تلعب ع مشاعرها سيد ع الاقل احترم كون نسلك يرجع لرسول الله واوفي بوعدك لو تنسحب بهدوء

حسيته يستغفر ويتنهد :- ليلى الوالد رافض رفض قاطع زواجي منج ومصر اتزوج العروس الي هو اختارها الي من عمامي ونسبها علوي

ضحكت باستهزاء :- روح اخذ اليختارها الك البابا واني خليني للشجاع اليستحقني

نتر :- مو بكيفج مو اني الاتنازل عن عشگي

حجيت بضعف :- تعال نتزوج لعد لتضل تماطل اقنع اهلك وتعال صدكني هاي اخر فرصة والا اقبل بأي شخص يجي ويدك بابي

تنهد سكت لحظات ورد :- نتزوج بدون علم السيد زواج شرعي كامل

فكيت عيني مستغربة وحجيت بخوف :- افهم هذا طلبك زواج بالسر؟ تخبلت شنو اني عاهرة وخايف تاخذني كدام اهلك لو مستحي

قيس :- السيد لو اجيبله اشرف وحدة بالعالم راح يرفضها لان يريدلي الي هو مختارها ماكو امل غير نتزوج بدون علمه وراها نصارحه ونخلي امام الامر الواقع وعد مني اجيب ناس واجي اطلبج بشكل رسمي واخذج بعرس مو سكته بس بدون علم اهلي

ليلى :- لتخبلني

قيس :- ما اخبلج ليلى انتي مو تحبيني واني احبچ؟ خلينا نتوج هذا الحب بعرس ترة گلبي انگطع وتلوعت سجادتي ثگلت من كثر همومي كله بسببج

ليلى :- كالعادة محملي الذنب
قيس :- عشگچ عماني لو اعرف زواجي منج يكلفني حياتي مستعد اتنازل عنها لخاطرچ

صدكي زواجي منج بهاي الطريقة ما ينقص شي منج راح اجي واجيب ناس واخذچ بعرس واخلي الناس كلها تعرف ليلى صارت زوجة سيد قيس

ليلى :- واهلك شلون
قيس :- بعد ما يهمني شي غيرچ روحي تعلقت بيچ فراگچ اخذ حيلي وموتني كمت احس روحي شايب بالستين مو ابن الواحد وعشرين سنة

ليلى :- انطيني وقت افكر وارجعلك خبر

تنهد ورد بحسرة :- والله احبج وافقي ليلى ثقي بمحمد اني بهذا الزواج مجازف يمكن اخسر والدي للابد ويتبرأ مني لا عبالج معتبر هذا الطريق هو الاسهل الچ
ثقي بمحمد هذا الاصعب

ضليت محتارة رد متحسر :- صرتي وسواسي ليلى موتني عشگچ اذا ما تزوجنا انجن والله العلي العظيم افقد عقلي نوم ما اكدر انام مسيطر علي حبج وعامي عيوني وگلبي

نهيت الاتصال بدون رد خليت رأسي ع تلفون مقهورة وعيوني مغورگة دموع حسيت بضعف سيطر ع كل بدني احبه واريده واموت علي گلبي متعلق بي وشكد ما احاول اكابر بالاخير انهزم

عمري ما توقعت اكون الشجرة التعشگ الفاس .. وصرت

ضليت ابجي بدون صوت لحد ما اجت حور جرتني كعدتني بالمطبخ تمسح بدموعي وتسألني شنو حجينا وهيج ضعفت ونسومة تنتر بغضب وهي متخصرة وعاقدة حاجبها

نسيمة :- اشگه شگ اذا عافج شنو لعبة عنده يضحك عليج ويلعب بمشاعرچ

هزيت راسي ب لا واني ابجي ورديت بنحيب :- يگول اجي اخطبچ واتزوجچ كدام الناس بس بدون علم والدي لان السيد مختارله بنية من عمامه ومستحيل يقبل يتزوج غيرها

نسيمة ارتخت ملامحها وضحكت بمكر :- اي ليش لا موافقين

حور شهگت وعاطت :- ليش عيوني ياخذها بالبسكوت ناقصها شي قابل
نسيمة :- سهلة خليها يمي والله محلولة بس خلي يجي ويحجي وياي يطلبج مني واني اتصرف

حور :- لا والله
حجت بغضب

نسيمة :- اخلي يتعهد ما يتزوج غيرها لو اهله حطو ع رگبته سيف وبس يخلفون يعلن زواجهم كدام اهله واشوف منو منهم يكدر يفك حلگه ورا ماتخلف ويربطهم طفل

حور :- وكلوله طلكها شلون؟

نسيمة :- من يصير الطفل ميگولون اعرف هواي ناس هيج تزوجو وبس خلو اهلهم امام الامر الواقع تعصبو وزعلو يوم يومين وبعدها وافقوا اهم شي يجي يكعد وياي ويقبل بشروطي

حجيت من بين دموعي :- تشوفين هذا حل؟

نسيمة :- لا انسب شي تاخذين صهيب بس دامج تحبين السيد ما اقبل ينكسر گلبچ التحبي تاخذي لو اعرف اواجه الدنيا كلها واخليج بحضنه

كمت حضنتها ابجي خايفة وما مقتنعة اقتناع كلي بهذا الموضوع
بس ضلت تحجي وياي وقنعت حور وصارن ثنينهن يقنعن بيَ
يكولن اذا تزوجتو وخلفتي اهله مايكدرون يرفضون ويقبلون بيج وهم الممنونين

وترجع نسومة تكول هو ابن سادة معروفين وعدهم رضا ابوهم فوق كل شي بس علمود حبج راح يضحي ويمكن بغضب ابو شوفي شكد يحبج لعد
اذا يجي ياخذج من بيتي بعرس انطيج اله

قنعوني بحجيهم وخلوني اطمن وقررت اكتبله رسالة واطلب منه يجي يحجي ويا خالتي حتى تحجي ويا وتحط علي شروطها الي تعتقد هذولي الشروط راح يخلون كلشي يمشي صح وتتحسن حياتي

كتبتله الرسالة واخذتها وياي ثاني يوم للجامعة بعد ماقريت رسالته الي تحتوي ع طلبه مني للزواج بدون علم والده

انطيت الرسالة لناصر وطلبت منه يجي باليوم التالي ، وفعلا اجة اليوم المنتظر واجة قيس وكعدت ويا خالتي جنة اني وحور نتصنط عليهم

خلت علي شروط اولها ما يتزوج اي بنية ثانية وهددته في حال خلف بهذا الشرط تخرب علي زواجة وهي بنفسها تعلن زواجنا
وهو وافق بكل اريحية

والشرط الثاني يحطلي المهر نص بيت ويكون البيت الي نكعد بي
كاللها عنده فلوس مجمعهن من شغله ويا اهله يكدر يشتري ويخلي نصه باسمي كمهر و وافق

وبعدها شرطت علي نخلف اول طفل ونواجه اهله حتى ما اضل طول عمري عايشه ويا بالظلام .. والسر
والعجيب وافق بدون تفكير

حور كالت بقهر :- خطية ميت عليج ومضحي بكلشي علمودج الله يهدي اهله عليكم

خنكتني العبرة صعدت ابجي واندب حظي الخلاني بهيج موقف ومتأكدة لو اني هسه بنت حسب ونسب جان اهل قيس وافقو يطلبني وارجع اتذكر حقيقة نسومة وشغلها واذا عرف شلون شسوي وشلون اصارحه احس روحي خادعته وارجع اكول مالي ذنب كل انسان يتحاسب ع اغلاطه والتسوي نسومة مو غلطي
وبعدها اذم نفسي

شبعت قهر لحد ما صعدت نسومة وكالتلي :- بالمبارك عليج ابن السادة وميت بهواج وصار بالجيب بس ديري بالج تحجين من توصل لصهيب يسود عمرج خلينا نعقد يلا على ما يشوفله بيت ويرتب اموره ياخذله شهر حاولي تكتمين ولا تحجين

نصيت راسي بحزن
نسيمة :- شتردين يا امي مو عاشكته وميته علي وهاي انطيتج اله
ليلى :- اذا عرف بشغلج
نسيمة :- شمدري هو جاي يطلبج بدون لا يسأل ولا شي ومنطقتة بعيده ما بيناتنا ناس عرف واذا سأل وعرف ننكر ونگله هاي العالم تريد تخرب ما تحب الخير النه سوده علي بسرعه يصدگ عشكج عاميله عيونه ، واذا ما سأل وعرف وبعدين ورا الزواج سمع سوي روحج متفاجئة ومتعرفين شي وكليله من جنت يمهم ماعدهم هيج حفلات وطربكة يريد يمنعج تجين عادي المهم تكونين مرتاحة وسعيدة

ليلى :- اكذب يعني؟

نسيمة بقلة حيلة :- مو ذنبج يوم مو ذنبج الذنب ذنبي واخ مني ما حسبت حساب لهذا اليوم بس يضل مو ذنبج تزوجي هسة ومن يعرف نكري وكليله متعرفين شي مبين الولد حابچ وما راح يهتم اهم شي عنده انتي نظيفة

سكتت ورجعت كالت :- لازم ابدي اجهزج هسة واخيطلج واشتريلج يا دوب الحگ بعد انتي عروسه وها شرطة ابن السادة تتحجبين كتله موافقة ادري بيج لو يكلج لبسي درع هم تقبلين ف گبل وافقت

ضحكت ومسحت وجهي من الدموع :- عادي اتحجب من نتزوج

باوعتلي بقهر :- ما عاجبني هيج زواج بس اريدج تعيشين حياة نظيفة ويا انسان تحبينه وكلبج يرتاح ويا

حضنتني باست راسي وطلعت

قيس بعد لا داوم ولا شفته ما اعرف ليش ترك الجامعة هذا الشي حيرني بس گلت يمكن اهله فرضو علي من عرفو يريد يخطبني واني ويا بالجامعة ع بالهم بهذا الشي راح يقتلون حبنا ويمنعونه مني ..ميدرون هو يموت علي وراح يتزوجني بدون ميهتم الهم ولرضاهم ..

.......

العلوية دنيا اخت سيد قيس ..

كنت دائما اسمع من والدي السيد ان الحب مثل المرض الخبيث جذوره قوية وصعب اقتلاعه من بين الاضلاع وممكن يضل مسيطر على الانسان لحد مياخذ روحه
كل حب لغير الله والانبياء و آل البيت هو مرض خبيث .

علمنا ما نحب غير ربنا الخلقنا وانبيائنا وآل بيت النبوة من صغرنه كبر بداخلنا حب آل البيت وترسخ وصارت قلوبنا ما تعرف حب غير حب ابا عبدالله وآل بيته

اليتزوج من عدنا فقط يجرب طعم الحب الحلال وما وصل واحد من عدنا لذروة الحب الحقيقية ولا عشگ من گلب صادق غير اخوي سيد قيس

كل المتزوجين بالعائلة يحبون زوجاتهم حب تعلق وعشرة عمر في حال ماتت الزوجة يحزن عليها 40 يوم ويدور الثانية ..

بينما قيس انجن بعشق ليلى صار يهلوس بأسمها خصوصا بعد ما طلب من والدي يخطبها اله ورفض اصر ودخل احد اعمامي بس ماكو هيهات والدي متعصب جدا من هاي الناحية واقسم ان قيس ما يتزوج غير العلوية فاطمة بنت عمتي ، استمرت محاولته شهور وماكو الرفض كان موقف والدي الوحيد

كلنا نعرف والدي مستحيل يلين ويقبل سيد قيس يتزوج عامية

قيس ما أيس واستمر بالمحاولة اخر موقف دخل بنقاش حاد مع والدي كانت نهايته وگفة ابوي متعصب وصاح وهو يقسم ان ماراح يخطب هاي البنية اله لو كلفه الثمن روحه

وضرب عكازته بالارض واقسم :- ما راح تاخذ غير علوية ذات حسب ونسب من اعمامنا ما تدخل بيتنا عامية غريبة ولا من غير دين ولا من غير طائفه
احنا بيت سيد عبد الرحمن العراق يحلف بروسنا مانخرب نسلنا علمود عشقك لبنت مو من ثوبنا ولا تناسبنا

التفتت الاخواني وصاح :- شوفو بنفسكم نتائج دخول الجامعات المختلطة وين وصلتنا بس لا تحلم ما تنال مبتغاك ما طول راسي يشم الهوى

مو قيس اليخرب نسلنا باجر عكبة اطفالنه ياخذون اطباع امهم المتحررة وتخرب العائلة وتنحط رؤسنا بالطين

گام سيد هاشم اخوي الاصغر وتكلم ويا والدي المعصب بكل هدوء ورزانه
هاشم :- يابة اني انطيك وعد واكفلك التزامها ، السيد عاشگ البنيه وميت بهواها وهي تحبه راح تنفذ اي شي يطلبه وتصير نفس بناتنا حتى

باوع لقيس ورجع باوع الابوي وباس كتفه :- الله يخليك سيد لا تكسر بگلبه كسر الگلب ما ينجبر لانه مو عظم قابل للشفاء

رد بغضب وهو يمشي :- الغريبة ما تدخل عتبة هذا البيت والجامعة ماكو بعد اذا داومت يا قيس اغضب عليك اليوم الدين واتبرئ منك امام الله وخلقه اجمع

قيس رفع رأسه بصدمة عيونه مفتوحة على وسعهن حمر غرگانات بالدموع وبجرأة تناقض الي تعودنا علي وتربينا علي صاح ..

قيس :- احبها يابة وعيونك احبها انتَ ماتدري ترة الما يحصل عشگه يعيش محروم

والدي راد ينجلط الا شوية وامي ضلت تخرط بخدودها وتبجي التفتله بغضب
ورفع عكازته يأشر بيها متعصب

:- لا تعيد هذا الحجي مرة ثانية واذا عدته يصير شي ما يعجبك وحق من نزل القرآن اندمك واخلي راسك ينزل كدام اخوتك واعمامك

گام قيس بهمة من مكانه ورد بحزن ونبرة توسل وهو يلزم ايد ابوي يبوسها
قيس :- فدوة رحتلك وافق يابة لا تكسر گلبي وتخسرني
ماتدري الصاير بگلبي هسة حقك ما تدري ، والله ما يرف على وحده غيرها وحق ذاك ابن البدوية

دفعه من كتفه بغضب تراجع قيس الصاير هش بسبب عشگه وغرامه وكأنه عجوز كهل !!

:- موافقتي باحلامك ما تحصلها والجامعة انمنعت عليك يا قيس واذا داومت بدون علمي فيشهد الله اني بريئ منك لا انتَ ابني ولا اني ابوك يا حضرة العاشگ

رد بحزن بعد ما ذب حسره عاشگ محروم جرحت گلبه وطلعت ..
قيس :- اني ابنك بويه اني ابنك بحق جدك رسول الله لا تكسر گلبي
واني انطيك وعد راح تصير تنافس علوياتنا بالحشمة والتقوى والدين واثق منها ومن اخلاقها واستعدادها لدخول حياتنا

:- لو تلف الدنيا كلها ما تلگى مثل علوياتنا وما تجي وحده تنافسهن بالدين والحشمة حشمة بناتنا نابعة من حب لله وشرعه وللعقيدة حشمة التريد تاخذها النه والك حتى ترضينا مو لربها ، لا تقارن وحدة ما تسوة شي بينا

قيس :- تسوة روحي ونظر عيني وكل دگه يدگها گلبي

ما حسينا غير راشدي قوي نزل على وجه قيس شهگنه مصدومين اول مرة بحياتنا يصير هيج موقف و السيد يضرب واحد امي خرطت خدودها تبجي وقيس مصدوم منصي رأسه مصعوق من الضربه

ركض سيد هاشم لزم والدي يبوس بكتفه ويهدئه ويطلب منه يرتاح بالغرفه

راح يمشي بظهره المستقيم وبايده عكازته الورثها من جده وابو اليعتبرها اعز من روحه حتى ، ودخل للغرفه وسد الباب
قيس كان واگف يم الدرج متبنج من الصدمة ومخلي ايده ع صدره جثة على اركبه ونصة رأسه متألم

تراكضو اخوتي لزمو وامي تصيح وهي تبجي
:- لزموا اخوكم رجليني انتهن ما يعينني ما اكدر اكوم
ولج يمه دنيه تعاي گوميني تعاي گومي امج انهد حيلها

وقيس مستمر يفرك بصدره عفت امي وركضت اجر ماي واغسل بوجهه وهو مغمض عينه وجهه احمر ، حسينه بي بدأ يثگل جسمه وبعدها رخت ايده و وگع على وجهه بدون ما نسيطر علي وانضرب رأسه بالمحجر

هاشم :- دخيلك يا ابو الحسن

جره بخوف على صدره واني متت بدمي ضليت ابجي والبنات ميتات خوف يساعدن بامي تگوم رجليها ما يعيننها ينتهن بهيج مواقف

وما احس غير دم قيس يغرگ وجهه ودشداشه هاشم ومرتضى يركض يجر سويج السيارة حتى ينقلو للمستشفى

نزله هاشم للكاع بمساعدتي حطينه رأسه بحجر هاشم وجريت ربطتي اخليها ع راسه امنع جريان الدم
قيس يأن متألم ولسانه يلهج بأسمها "ليلى"

يلهج بي بحزن وكأنه مايريد احد غيرها يمه بهاي اللحظة

اجة مرتضى وكلنا تساعدنا نقلنا قيس للسيارة واخذو الولد للمستشفى صاير عنده انهيار عصبي ضل يوم كامل بالمستشفى خيطو رأسه وتاكدو من سلامته ورجعو باليوم الثاني
وبهذا كله والدي غاضب وحابس نفسه بالغرفه وماكو واحد غيري بالبيت شافه لان اخذله الماي يتوضأ والاكل والشرب
بهذا تصرفه يعبر عن حزنه الممزوج بغضبه من سيد قيس

وبهيج انتهت مسيرة قيس الدراسية ترك الدراسة من بدأ الدوام هاشم طلب من ابوي يسمح لقيس بالدوام بس رفض وما داوم .. وخصص كل وقته للشغل ويا الولد ما يرجع للبيت وحتى الصلاة يصليها بمسجد قريب من موقع العمل لان ما يرجع للبيت الا بوقت النوم ..

توسلت امي بي حتى يخفف الضغط عن نفسه لان تعب ووجهه ذبل وبين علي المرض والارهاق بس لا حياة لمن تنادي
توقعت السيد من يشوف حالة قيس راح يتنازل بس ضل رافض رفض قاطع وحتى اعمامي عجزو يقنعوه ..

مرة نحجي اني وامي والبنات عن وضع سيد قيس المؤلم عمتي نرجس طفرت من مكانها بغضب كالت
نرجس :- اي داده كلشي تردنه مثل ما تحبن هذا زواج وبي اطفال واحنه سادة واصلنا يرجع لرسول الله ما نخربه بياهي الجانت

شبيها فاطمة بنت اختي علوية صايمة مصلية متقية ليش مياخدها ويحبها وراح يركض ورا بنات الجامعات المابيهن حظ

ام قيس :- اتقي ربج لا تطعنين بالبنات قيس الرادها البنية ما ذبت روحها علي وجبرته

نرجس وهي تهز ايدها مستهزأة :- ما تعرفينهن هذني بنات ابليس كلشي يسون حتى يسحرن ولدنا وياخذنهم طمعانات بالمال والجاه والحسب والنسب

ام قيس :- والله بعد انتي اعرف ببنات ابليس اكثر مني اني شمعرفني

عمتي نرجس فكت عينها مستغربة وبانت على معالمها علامات الغضب رادت تهد وتتعارك ويا امي بس وجود عمتي الكبيرة عواطف نقذ الموقف
لزمتها من ايدها وكلتلها تكفي الشر بخزره و سكتتها ..

صاحلي ابوي من يم الغرفه يهمني بسرعة
عبد الرحمن :- دنية بابا تعاي اريدچ بشغله

عفت كلشي من ايدي كمت متوترة عدلت ربطتي وركضت للغرفه من فتت لگيته فاتح القاصة گالي فورا
قفلي الباب

قفلته ومشيت يمه بخوف منصيه راسي افرك بايديني

قدملي الدفتر والقلم وكال كعدي
حسبي وياي انطاني كل مجموعة فلوس كال هاي هل كد حدد شكد
وطلب اجمعهن سوية واطلعله المبلغ الكلي

بديت احسب ويا بالفلوس ومن انطيته الرقم عقد حاجبه مستغرب وطلب مني اعيد الحساب مرة ثانية
عدت الحساب من جديد بشكل ابطئ وبتاكيد وطلعتله نفس الرقم هز رأسه بأسى وگال بقهر

عبد الرحمن :- روحي صيحيلي اخوانچ كلهم وخلهم يخابرون قيس اريدهم بظرف ساعة كلهم مصطفين گبالي هنا

بلعت ريگي بقلق وسألته :- ليش يابه صاير شي الفلوس ناقصات
هز رأسه ب اي :- يمكن واحد من اخوتج محتاج وماخذ بدون علمي اريد اتاكد منهم بسرعة واعرف وين راحن باقي فلوسنا

دنيا :- صار يابة هسة اجمعهم الك بس ... دنكت افرك بايديني
:- بس شنو يا يابة سويتيها قصة صيحي الاخوتج الله يرضا عليج

دنيا :- قيس يرفض يرجع للبيت لأي سبب الا لوقت النوم تدري بي مختاض

:- عادي جمعي باقي اخوتج واني انتظر قيس يرجع و احجي ويا

كمت بسرعة ركضت دكيت باب غرفه هاشم طلعت زوجته سكينة كتلها اريد هاشم
طلعلي سحبته برة الغرفة وحجيت ويا شرحتله مختصر بهت وجهه وضل يفرك بجبينه محتار

هاشم :- اتمنى ما يكون قيس سواله شي يخلي النار تكبر

شهكت بصدمة ورديت معترضة :- محشوم قيس ما يسوي هيج ماعدنا واحد يمد ايده ع فلس يمكن صاير غلط بالحسابات لو شي

هاشم :- والله لو تدرين يا دنيه اخوج قيس شلون ضاع اني والولد كلنا مصدومين طلع ايمانه ضعيف ما اعرف يريد يعاند والدي بهاي تصرفاته الغلط

دنيا بخوف :- ليش شمسوي قيس

هز راسه بأسى وزم شفايفه بعد تفكير رد :- يجي يطبگ سيارته بالباب مال الشغل يضل واگفله فد عشر دقايق يسمع غناء والصوت طالع العالم كلها تضل تعاين مستغربه يعرفونه سيد قيس ابن سيد عبد الرحمن وتزيد صدمتهم

دنيا :- اتوقع يسوي هيج حتى انتم او اولاد عمومتي يوصلون خبر خرابه لوالدي ويجبره يخضع ويقبل يتزوج ليلى

هاشم :- هاي غايته ما اريد قيس يتدمر اكثر فوك كل الذنوب الي ارتكبها يكون حرامي

حط ايده على رأسه وعيونه تنفض حزن على حال قيس

كالي روحي اني اتصرف ، عفته ومشيت اجة مرتضى ومصطفى وكعدو ويا السيد وراها طلعو وجوههم حمر ، مصطفى طلع من البيت رأسن
سمعت مرتضى يحجي بهمس يم هاشم

مرتضى :- عندك المبلغ؟ لو ادفعه كله واطمطم هاي المصيبة
هاشم :- اعوذ بالله من المصايب عندي نص ومنك النص ونرجعهن للسيد استغفرالله ربي واتوب اليه ان شاءالله ما يكون حس بكذبتنا

ضلو يتهامسون بقهر شافني هاشم وصعد ركضت ورا اتوسله يحجيلي الصاير

هاشم :- ما صار شي علويه گلنا للوالد اني ومرتضى احتاجينا واخذناهن ونسينه نبلغه اعتذرنا منه وگلناله راح نرجعلك المبلغ لان نيتنه دين من اخذناه

دنيا :- يعني قيس بايگهن؟  حجيت بصدمة

هاشم :- ليش منو غيرنا يكدر يفتح القاصة؟ عندج تفسير ثاني دنية؟ فهميني عندج؟

غرگت عيوني دموع على غرك اخوي بالمعاصي والذنوب
:- قيس بدأ يدمر نفسه سيد اتوسلك تلاحگ اخوك ورجعه للطريق الصحيح حرام سيد مؤمن يصير انسان فاسد وسارق

هز رأسه يباوعلي مقهور ، ما يريد قيس يضيع ويوگع وگعة ما وراها وگفه

نسدت سالفة الفلوس بفضل مرتضى وهاشم الحمدلله ضليت اني اكل بروحي وادعي الله يرجع اخوي للطريق الصح ويترك درب المعاصي

،،،،

ليلى ... گاعده بغرفتي ادرس صعدت ريحانة تركض كالت وهي تلهث
:- خطيبج اجة يشوفج

شمرت الكتب من ايدي وكمت متوترة افتر على روحي شنو خطيبج يشوفج احنه لهسة ما عاقدين قران قيس ميسويها ويجي

شلبس شلون اطلعله ركضت للكنتور جريت ثوب طويل لبسته وخليت حمرة خفيفة فليت شعري نثرته مشطت المقدمة ورفعته مرة ثانية رشيت عطر ونزلت بسرعة

دخلت لكيته كاعد يم خالتي منصي ويحجي وياها رفع رأسه لمحني ابتسم ونصة بسرعة

نسيمة :- تعالي امي سيد قيس يريد يبلغج بموعد العرس

هزيت راسي وكعدت يمها منصية رجفة تسري بجسمي خوف توتر قلق كل مشاعر الدنيا تجمعت بداخلي

نسيمة كرصتني وكالت وهي تكوم :- اخذو راحتكم واتفقوا بيناتكم

هزينه روسنا طلعت وخلت الباب مفتوح رفعت عيني شفته يباوعلي ابتسم وگال بلهفة
:-ما ضل شي نكمل اوراق البيت هذا الاسبوع ونتزوج بظرف ايام قليلة خلص صبري عطشانج ياليلى ما اصدك يجي اليوم التصيرين بي حليلتي وجف ايدي يحضن جف ايدج بالحلال

نصيت مبتسمة بخجل :- الله يتمم النه على خير بالحقيقة استغربت جيتك وعندي هواي اسئلة اريد اطرحهن عليك

قيس :- كلشي عندج احجي اريد هاي الكعدة تكون كعدة اتفاق بيناتنا حتى نأمن مستقبلنا سوية

رفعت عيني مبتسمه :- كل شي ما اريد غير اصير حليلتك ما رايده شي من الدنيا

ضل مبتسم يباوعلي يتاملني عيونه تلمع ينصي يعدل ساعته ويرجع يباوعلي
ليلى :- ردت اسألك ليش تركت الجامعة

قيس :- والدي كال يتبرأ مني اذا داومت بعد يعتقد الجامعة خربتني

ليلى :- لو اعرف بزواجنا؟

قيس :- الله كريم تنحل شخبار گلبچ ليلتي

ليلى :- متعذب بهواك يَ قيس صاير جمرة الشوق أذاه ومرضه وعلاجه قربك

همس بحسرة :- واني علاجي لزمة ايدچ ما اريد احجي اكثر واتجاوز الحدود كلها ايام وتصيرين زوجتي ابدي بتحضير نفسج واتوقع صار اكثر من اسبوعين من حجيت ويا خالتج ما اظن ضليتي لهسه بدون تجهيز

ضحكت وهزيت رأسي :- بلي خالتي تعبت وهي تجهز وتحضر وتخيطلي وما بقالي هواي

كام وكف مسح وجهه متوتر :- هاي هي مو هاي الجمعة لا الوراها العرس وقبله بيوم نعقد قران
اجيب ناس من معارف ناصر صديقي واخذج كبال العالم بالعلن

هزيت راسي بفرح متلهفة لهذا اليوم طال النظر الي لدرجة حسيته بهاي نظرته جاي يودعني وما راح يشوفني وراها بعد و راح ..

خالتي وحور مستلماتني ماسكات وترتيبات ونسومة بدأت تحضر الجنط وهو يركض حتى نكمل اجرائات البيت والحمدلله ما اخذن ذاك الوقت الطويل واجة يوم الحنة يركض ركض بحيث كلشي ما افتهمت وما كدرت حتى استوعب شلون وصلت لهذا اليوم وشلون راح نعقد وباجر عرسي!

ماكو احد يعرف ابسط شي دلال ما تعرف خفت احجي گدامها وتوصل لخالها صهيب ويسود حياتي
فضلت السكوت واقضي كل شي بالكتمان

لبستني نسومة بدلة حمرة نص ردن منفوخة رداناتها ورفعت شعري بتسريحة نزلت زلوفي ومكيجتني مكياج حلو طلعت كل ابداعاتها حتى تجملني اكثر

عزمت نسوان المنطقة وهواي منهن حضرن وجهزت مكان للزلم عزمت استاذ جمال وكذا شخص من الجيران حتى يكعدون بعقدي

ما ادري شنو جنت احس بس متبنجة عيني تتجول بالمكان اشوف ريحانة فرحانة وترگص والبنات يدگن ويهوسن ويصفگن
وحور تبخرني وترش ماي ورد علينا

دقايق مو اكثر حضرو الزلم وطلبو مني اروح يم الباب حتى الشيخ يعقد النة

حور لبستني شال نزلته ع ايديني واخذتني وگفتني يم الباب اسمع الشيخ يردد وطلب موافقتي انطيته االموافقة وسمعت صوت قيس ينطي الموافقة ، و بهيج صرنا اني وقيس زوج وزوجة لكن بدون علم اهله.....................................................للحكاية بقية 🖤

رأيكم بالقصة يهمني 🖤..

جاي تقرون خيال الظل والارهاب؟  للكاتبة 20nana29

بالمناسبة الغلاف من تصميم الكاتبة المبدعة التميمية altmeme313