رواية حمائم تخشى الطيران الفصل السابع عشر 17 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ...

تفاعلكم 😊🖤

الله من يريد يجمع قلبين بالحلال راح يجمعهم لو كان بيناتهم بلدان وبحار ، سبحانه وتعالى يعرف حبنا بدون مصالح ولا بي غايات حبنا حب عفيف وطاهر وگلوبنا عشكت بعض بدون رضاتنا
راد يجمعنا ويبرد گلوبنا بالحلال

ايديني ترتعش وگلبي يخفق بقوة عيني ماكدرت ارفعها من كثر الخجل وهاي مو عادتي اخجل منه بس الموقف كان غريب شويه بالنسبه الي

گعد يمي ع الكرسي وخالتي تشرحله شلون لازم يحني ايدي وهو منتبه وياها ومندمج بكل حواسه طلبت مني نسومة امد ايدي رفعت ايدي الترجف لزمها بكف ايده اليرجف اكثر من كفي
ضحكت وباوعتله كان متوتر ويرتجف وعيونه تصعد لعيوني وتنزل لأيدي
حناني وابتسم برضا

وقبل لا حتى يحجي شي گال لخالتي :- ما اكدر اضل بهيج مكان بي نسوان طالع بسرعة يم الزلم

نسيمة :- الله وياك عيني ابن السادة الله وياك يوم

هز رأسه ونصة يم أذني جر نفس استنشق عطري وزفره بحسره
همس بذبول :- موعدنا باچر .. باچر ينزل الماي ع النار وتنطفي نار الشوگ والعيون يهودن والجروح تطيب وتنمحي العلة

ابتسمت وضليت منصية همست ان شاءالله

سحب روحه وطلع والنسوان يصفگن ويهوسن ويغنن الي ،، ليلى الحلوة الريحانة خدها خد رمانة
ويهلهلن

اختلطت مشاعري بين الفرح والحزن
الخوف والطمئنينة
الراحة والاستقرار والامان ..و عدمه!

انتظرت النسوان يكومن وصعدت بسرعة غسلت وفليت شعري ولبست بجامتي گعدت ع السرير بتعب مخليه ايديني بحضني
طبت حور للغرفة تركص وتمشي والحنة بعدها بأيديها
حور :- هلا صرتي جنة السادة هلا هلا والمايقبل يموت بحسرته

ليلى :- سكتي خاااايفة

حور :- ماكو شي يخوف بس توكلي على الله هو يحل كل شي ويضبطلج كل امورچ انتي الج الصافي

كعدت يمي لحكتها نسومة حضنتني تبوس بيه وتنصحني وتعلمني شلون لازم ادير امور حياتي بعد الزواج
وكالت بالنهاية ... قيس راح يضل كله وياج يگول قانع اخوته بحجة يشتغل ويا صديقه بمعمل حتى بالليل لان زعلان ومايريد يضل بالبيت

گتله اذا ماتكدر تعالو كعدو يمي

شهكت مصدومة :- حتى يطلگني

نسيمة :- لا بعد اذا اجيتو علمودج اعوف كلشي اني شعندي غيرج يا يوم؟ كلشي فدواتچ
هسة نامي ارتاحي باجر وراج ليلة طويله

غمزتلي وضربتني ع زندي
گامت وهي تأشر لحور تطلع وياها :- رتبتلج غراضج بالبيت مالتج كلشي مثل ما تحبين وعدكم تلفون ارضي اذا احتاجيتي شي لو ضيعتي شي خابريلي

ليلى :- صار

نسيمة :- ديري بالچ بالطبخ لا تحركين روحج اذا ماتكدرين اني اطبخ وادزلچ
ليلى :- ما اعرف اشوف شلون ادير اموري وهو ان شاءالله يساعدني

هربت من التفكير للنوم الحمدلله كدرت اغفى ثاني يوم كعدت من وكت سبحت سبحة زينة وكعدتني خالتي تمكيج بيَ وتريد تسويلي تسريحة
گلتلها اريد شعري مفلول بس ماقبلت رفعت جزء وخلت جزء نازل برمته الي ولبستني البدلة البيضة المنفوشة
وكعدتني على القنفة حتى النسوان يشوفني ويركصن كدامي
نسيمة :- علمود تحسين بلذة عرسج لازم بي ركص

هزيت راسي اباوع للكل متوترة اكو مغصة ببطني جريت نفس اصبر روحي بي واسترجع حيلي
وعيني تترقب الساعة كل شوية ابتسم من اتذكر اني صرت الحبيبي والليلة ليلتي بحضنه ويرجع يحاصرني الخوف من اتذكر ضروف زواجنا

رغم فرق العمر بيناتنة شي بسيط كلش بس هو قيس عقله يختلف عن عقلي احس روحي بعدني عايشة بطفولة عكسه هو انسان ناضج
راح يسعدني ويدير امور حياتنا ويخليها حلوة قيس زلمة كلف

صدح صوت المزمار بالمكان والنسوان كلهن كالن اجو اجو
حور ركضت جابتلي برنص لفلتني بي تلفلف ما خلت ولا اصبع طالع مني

حور :- ابن السادة يريد الستر ، روحي يالليلى عسى الله يكتبلج السعادة بهذا العرس والاستقرار مودعه بالله يالعزيزة

خنگتني العبرة بلعت غصتي و حسيت صوت هوسات مرية بعدين عرفت هاي ام ناصر اهل ناصر وكفو ويا قيس وكفه مشرفه

دخل قيس لزم ايدي وطلعني حتى شكله ما شفته خانكيني خنك لو مصعديني ويا رجال ثاني هم ما حسيت بروحي ولا عرفته ناقصهم يجيبون بطانية يلفوني بيها

لزم ايدي بقوة خالتي صعدت بالصدر يم صديقه ناصر وطلعو بينه ما نسمع غير صوت المزمار وصفگات خالتي وهلاهلها كل شوية يعصر ايدي حيل ويتنهد ابتسمت ع حركته
رفعت البرنص شوية من ع وجهي وباوعتله مبتسم مرتاح من شاف وجهي طلع خزرني ونزل البرنص ع وجهي اكثر من الاول
لو ضاله ع البداية اشرفلي ..

نزلنا للاستوديو اخذنا صور سوية وطلعنا بزفة لبيتنا اني ويا بيتنا اني وحبيبي عشنا الصغير ومصدر أمانا القادم

ودعتنا خالتي وام ناصر من الباب وراحو سد الباب مال البيت رفع بدلتي وساعدني ادخل للصالة
قيس :- فوتي برجلج اليمين

ليلى :- اوكي

قيس :- جنت متمني استقبالج يكون حافل من قبل اهلي وتمنيت العلوية تهوس بعباتها وتتلگاچ بس الضروف حكمت

ليلى :- ما يهمني غير وجودك يمي والشي الوحيد الاريده نكون سويه حضنك حلمي

ذب نفس ابتسم مرتاح بانت رصعاته ياخذ گلبي من يبتسم ويبينن
مسح وجهه وگف كبالي مستقيم وطبع قبلة رقيقة على جبيني جر نفس عميق مغمض مرتاح
قيس :- لا يحرمني منچ يبعد روحي كلها

حضني بلهفه حوطت ظهره بأيديني يبوس براسي وكتفي ويغمر رأسه بركبتي يشهكني حيل ويصيح :- صرتي حليلتي ليلى .. ليلى قيس صرتي ليلاي امام الله وخلقه

رفع رأسه يباوعلي بهيام خله جبينه على جبيني غمض عينه يتنفس وياي نفس النفس الأخذه
رجع باس راسي وفتح عينه

قيس :- فوتي خاتون نورتي بيتچ

رفعت بدلتي وعيني تجولت بالمكان بيت صغير غرفة ومطبخ وصاله شوية كبيرة على جدرانها مصفوفات قنفات بلون زيتوني واطار القنفات ذهبي ملكي ويتوسط الصالة ميز خشب مغطة بتول اطرافه مذهبة وفوگه فازة كبيرة بيها ورد ابيض

لمعت عيوني بفرح يالله هاي مملكتي صارت باوعتله بفرح :- الصالة تجنن اريد اشوف المطبخ وها وعد اسويلك اطيب اكل

حوط خصري بشقاوة واخذ قبلة سريعة من شفايفي
:- متأكدة خاف تموتيني جوع
قلصت عيوني ضربته ع صدره بقبضة ايدي
:- بس اول مرة تجوع بعدين اتعلم

لم شفته لداخل ثغره ضل يمسح لحيته رفع طرف حاجبه وكال بمكر
قيس :- ليلاااي تصلين؟

خجلت وكرصت زندة :- اصلي بس لازم غسل كل شي حتى اتوضأ
جرني من ايدي اخذني للغرفه فتح الباب وانفتحت عيوني ويا ، جمال الغرفه وترتيبها اخذني لعالم ثاني
ضليت افتر بيها وايدي تتحسس اخشابها الصاج العراقي المنجور افضل نجارة وبأجمل شكل

والستائر الطويلة المارونية ومطعمة بلون ذهبي ولون الفرشة الذهبي ، غرفة احلامي
ليلى :- نص فلوسك مشتري بيهن اثاث البيت
قيس :- شلون لعد خاتون البيت يحتاج اثاث وعروس

وگفت كبال المراية بديت افل بتسريحتي واحجي ويا
وهو ينزع بسترته ويفتح ازرار قميصه
ليلى :- البيت يجنن حبيته والاثاث يخبل بس ما شفت الحديقة
قيس :- الحديقة حلوة صغيرة تبجيلها ع وردات نفسج ما صار عندي وكت نرتبها سوية ان شاءالله

هزيت رأسي وگتله بحماس :- اريد شجرة نارنج بالحديقة وست الحسن ع الحايط

قيس :- تدللين خاتون

ذبيت الاكليل هو جان مبدل كل ملابسه طلبت منه يساعدني بفتح البدلة نزعتها گباله ضل يباوعلي خزرته بضحك وكتله :- غمض متستحي اريد اسبح

حط ايدينا ع عيونه ويباوع من بين اصابعه يسوي نفسه مغمض
لفيت نفسي بروب بسرعة وركضت للحمام سبحت وطلعت توضيت

صلينه سوية بأختلاف صلاتنا ومذاهبنا جمعنا العشگ

التفتت الي وخله ايده ع خدي گال بهدوء :- اني هسة صرت برگبتچ ليلى الحشمة الحشمة اريد زوجة سيد قيس الكل يحلف براسها وانتي بنت اصول ومعدلة وشريفة وما ناقصج شي غير تلتزمين بحجابج حتى يرفعج ويرفعني ويعلى من مقامج ومقامي

نصيت مبتسمة :- تحجبت ان شاءالله من اليوم

هز رأسه :- عفية شنو رأيج نشوف المطبخ؟
ليلى :- متأكد تريد نشوف المطبخ

كرص خدي :- لج انتي ليش وكيحة
ضحكت حيل وبسته بخده :- طالعة على حبيبي قيس ابو ليلى
قيس :- وأسمي ليلى بأذن الله ليلى وحده ما تكفيني

باس خدي واسترسل بالكلام :- جوعانة؟
هزيت راسي ب اي

كمت لم السجادات وراح للمطبخ يرتب العشاء ، بينما اني مشطت شعري وخليت شوية حمرة سحرية وعطر وبودرة جوليا لجسمي ورقبتي وطلعتله العب بأطراف شعري

اخذت عيني جولة سريعة بارجاء المطبخ كاونتر خشب وبنص المطبخ ميز صغير محوطاته اربع كراسي كلشي خشب
الاكل مبين جاهز والفرن مشتغل يعني محمي بالجديد ريحة الاكل دكت براسي خلتني اسلطن

سحبلي الكرسي ومد ايده :- تفضلي خاتون

ليلى :- شكراااا

كعد بالكرسي القريب مني وبدأ ياكل وياي يخليلي دجاج على التمن ويصبلي عصير يحطه گبالي كل ما ينقص الگلاص شلت ايدي من الاكل قبلة وكمت غسلت وفرشت اسناني واكلت هيل نسومة ترستلي الجنطة هيل حسستني راح ينقرض من السوگ

رجعت للمطبخ لكيته بعده ياكل
باوعلي وهو يضحك :- اليوم نفسيتي مفتوحة مفجوع وهم وراي جهد لازم اخزن طاقة

حضنته من ورا ، بست خده برهاوة :- بالعافية حبيبي مداخل العافية ان شاءالله

جر ايده من الاكل وگام متحمس
قيس :- سبقيني للغرفه اغسل واجي وراج

عافني وراح يركض للمغسلة ردت اشيل الاكل بس كلت ليلة عرسي مو مال التهي بهيج امور غطيته بمواعين اكبر بعدني ممخلصة اجة للمطبخ لگاني لهسة واگفة تقرب مني بلهفة شالني لفيت ايديني على رگبته اضحك واهز برجليني
ليلى :- لتوگعنييي

قيس :- اني الواگع ليلى اني ومشتعلة روحي وگلبي مجمر
ضحكت من گلبي اخذني للغرفه شيل ..

سرقني من روحي واخذني بين ايدينا غمرني بدفو احضانه وسحرني برقي تصرفاته وكلماته الرزينة الحلوة ، لمني بحضنه بكل حيله حسيت جسمي انطبع بجسمه وغمر رأسه بشعري ونمنا بعد تعب اليوم الطويل ..

صوت سماعات المساجد ملئ البيت فتحت عيني بنشاط باوعتله لازم خصله من شعري يلف بيها بأصبعه ويحجي بصوت ناصي
:- اندار فدوة لخصلات شعرچ ليلاي اندارلهن فدوة

لزمت ايده باوعلي متفاجئ وضحك :- گعدتچ؟
ليلى :- كان لازم اكعد أذان

قيس :- بعد ربع ساعة هذا قرآن گلت اخليج بعد نايمة لحد ميأذن بس ها اول ليلة بس الباقيات اريد نتسابق بيهن على المغسلة للوضوء والصلاة

ضربته بكوعي :- ترة اني اصلي والله ولا اترك فرض
قيس :- ادري بيج ي روحي شنو رأيج اخذج للحمام اسبحج بأيدي مبينه تعبانة

كرصته بزنده وعضيته :- احببببك قيسي احبببك يا سيد گلبي

حضني حيل دفيت بحضنه حسيت براحة عجيبة وامان ضل يشدد حضنته ويشمني ويرجع يبوسني بلهفة

گعد عدل وگال :- يلا گومي وياي قبل لا توجب الصلاة

تمغطت ودفعت الفرشة اخذت ملابس من الكنتور وهو يلم ملابسنا الوسخات ويخليهن ع ايده
قيس :- اخليهن بغسالة الملابس اشغل عليهن ورا الصلاة

ليلى :- خليهن اني اغسلهن حبيبي

قيس :- انتي سبحي ومشطي سالفتج تطول اني ماعندي شي

فتت للحمام عفته وراي يرتب بالغرفه سبحت بسرعه لان مابيه شي نظيفة بس علمود الغسل وطلعت لگيته واكف يم الماي مال الغسالة وبيده التايت

ابتسملي وكال :- بالعافية حبيبتي

ليلى :- الله يعافيك يلا فوت اني اكملهن

هز رأسه وراح جر ملابسه من فوگ القنفة ، فات يسبح خليت تايت وسديت الماي ما شغلت لان اذان ماردت صوت ثاني يعلى ويا صوت الاذان

مشطت بسرعة ولفيت شعري مديت السجادات ولبست احرامي فات ينشف شعره لابس كلابية بيجية ويباوعلي براحه
قيس :- الطمئنينة من تكون انسان راح تكون انتي

ليلى :- تعال نذكر الله ما نخلي فرحتنا تنسينا ذكره

هز راسه مبتسم تقرب باس راسي و وگف ع سجادته صلينه سوية حسيت براحة واني كاعده ع السجادة وهو يمي يقرا سورة عن ظهر قلب حطيت راسي بحجره وغمضت عيني خله ايده فوگ رأسي يمسد علي من فوگ الاحرام روحي سكنت كأن الراحة والامان سكنو روحي بهذا اليوم وهجرني الخوف عساه لا رجع ..

غفيت بدون شعور الانسان من يرتاح يم الشخص اليحبه ينام وهو مرتاح هاي قاعدة عندي اذا ما ارتاح البشر ماتكدر تغمض عيني واني يمه

فتحت عيني لگيته مخلي ايده گبال عيوني يحجب ضوء الشمس عن عيني حتى ما اكعد رفعت عيني باوعتله بعده على گعدته جان يسبح وهو مغمض عينه

همست :- حبيبي صار الصبح واني نايمة ع رجلك حتى عجزت جان كعدتني ليش هيچ متعب روحك ومخليلي ايدك

فتح عينه وميل راسه :- صبحج الله بالخير
ليلى :- صباح النور
قيس :- اذا ما اداريچ واتعبلچ المن اتعب؟

هزيت راسي خجلانه وفرحانة مسح ع خدي ومد رجله منملة ضليت افركها اله وهو يرفض ويدفع ايدي حتى ما اخدمه

لم رجلة وگام لمينا السجادات ورحنة للمطبخ حضرنا الريوگ سوية وتريگنا وكملنا يومنا بحب وراحه بأحضان بعض

الشيهانة ..

جبران اخذني للدكتور وسوالي فحوصات واشعه شخصني بنقص دم والحديد وگال ع الاشياء الاسويهن واني نايمه هاي تطلع بسبب السخونه التصيب جسمي تخليني امشي بنومي واحجي وما اذكر كلشي صار لان ما اكون واعيه

باخر مراجعة الي طلعنا من الدكتور المغرب اخذنا ادوية من الصيدلية ورجعنا للسيارة سبقته بخطواتي گال بقلة حيله :- والله مرمرتيني وشبيتي ناري ونار الخلفني

التفتت متفاجئة لگيته مخلي ايده ع رأسه ويباوع علي بقهر
جبران :- لا تبحلگين بعيونج هيج وحگ اسد بغداد اشلعهن واحطهن بأيدچ

بهت وجهي وتشنجت اعصابي فورا كتمت غضبي وتصنعت الهدوء
شيهانة :- اذا هيج اني ثكيله عليك ومالك خلگي المن جبتني؟ ترة اگدر اجي وحدي الله ليعوزني لأحد حجي راضي وحجي حامد جابوا عمرهم كله يعلموني اعتمد ع روحي واشيل روحي واشيلك انت وياي اذا احتاجيتني مو اني لاضل بعازة احد

غمض عينه وجر نفس عميق وزفره باوعلي بحيره وميل راسه
جبران :- هذا حد فهمچ سهير؟ انا الاسوي وياج واجبي غصبا عليه وعلى شاربي وشارب الخلفني اسوي وانا الممنون وتعبج مثل العسل على گلبي

شيهانة :-چا ليش تكول تعبتيني ؟

جبران :- بداخلي هواي اسئله ادور على اجوبتهن وتعبت حيل تعبت وانا اطلع الحجج وابررلچ خيانتچ

شيهانة :- قصدك زواجي من مهيب؟ ضحكت مستهزءة من هز رأسه ب اي ومشيت للسيارة
جبران بغضب :- ما عندج جذبة تجذبينها وتضحكين بيها عليه
شيهانة :- اصعد اني احجيلك

فتح الباب وصعد طبگه بغضب فرك وجهه وتنهد شغل السويج كال وهو يلتفت ويطلع بالسيارة
:- اشوفلنا مكان هادئ نكدر نكعد ونسولف بي براحة

ما رديت اباوعله عيونه تباوع بحيره ويترقب تنهدت وكتله :- تذكر من ابوي خسر كل املاكه وطاح طيحه قوية قبل سنين
هز رأسه ضليت اباوعله انتظر منه يگول اي ما احب بس يهز رأسه وميجاوب
باوعلي وفهمني گال اي اذكر
نبرة صوته مبحوحة مال واحد مقهور ومختنگ كلش

شيهانة :- اطبك السيارة خلينا ننزل نتمشى ونسولف

هز رأسه وطبگ السيارة بسرعة نزل قبلي حتى وفك دكمة قميصه
جبران :- اذكر من عمي خسر واذكر كلشي صار .. يحجي وهو يفرك رگبته
شيهانة :- اسمعني من الاول للاخر

من خسر ابوي فلوسه وطاح طيحه قوية عمري جان 17 سنة واني وياك جان بيناتنا وعد اكمل دراستي وتجي تتقدملي ونتزوج بالعراق
انت جنت اخر مرحلة بكلية الصيدلة واني بعدني طالبة ثانوية

ضحك بأستهزاء :- ليش تتوقعين نسيت هاي التفاصيل

ابتسمت بألم ولمعت عيوني بالدموع
شيهانة :- مهيب واخو جانوا وارثين ابوهم بالجديد الله يرحمه ابو مهيب خلالهم فلوس تغطي عين الشمس لو يحرگونها ماتخلص اقترح ع والدي يساعده وعمي حميد هم ساعد ابوي بمبالغ كبيرة

ابوي نهض ورجع وكف على رجلينا بس بالعراق مو بالكويت تدري بي بدأ مشاريعه شي بالبصرة وشي ببغداد كال ماكو مثل بلدي اضمن مستقبلي بي وصار ما يجي للكويت الا كل شهرين ثلاثة مرة ويروح مرة من المرات وبرجعته انتَ جنت داز النه هداية وبنص هديتي تاركلي رساله
ذكرتها وعيوني دمعن وضحكت

احتقن وجهه وگال متألم :- كتلج بيها تخرجت وانتي راح تخلصين ثانوية خلينا نخطب وانتظرت منج رد برسالة

هزيت راسي اباوعله بقهر وعيوني تجري دموع قهر وحزن كتله بغصه :- كتبتلك رساله بنفس اليوم وانطيتك بيها موافقتي وشمرتها لمهيب بس الرسالة ما وصلتلك
عقد حاجبه مستغرب

:- بنفس اليوم ورا ما وصلت الرسالة لمهيب اجة خطبني وتوسل بابوي وگله بالخط العريض "اني رايد بنتك الشيهانة عمي الگلب هاويها"

وابوي انطاني اله بدون ما ياخذ شوري تدري ليش؟ ضحكت مقهورة وعيوني ضلت تجري اكثر
اهز راسي لا وابجي واضحك :- مو لان انحرج منه ولا بسبب فضله ع ابوي لالا لان دائما يشوفوني ع السطح ويمنعوني كل ظنهم اني جنت بعلاقه ويا مهيب مايدرون مهيب جان الصديق الينقل المكاتيب ما يدرون بي جان الوفي الثاقين بي تالي طعن بظهرك قبل ظهري واخذ محبوبتك جبران اخذها مهيب هو الغدرك مو اني

وجهه احمر محتقن يسمعني بقهر فرك رگبته يباوعلي كملت واني امسح وجهي من الدموع
رفضت مهيب امي كامت فوك راسي هي وبيبي يكللي لازمة السطح وهدير شهدت ضدي كالت تشمر ورق عليهم ومرات الكه رسائل مشمورة ع سطحنا وسمع اخوي تخبل كال جا هاي انتي عاشكته بعد المن رافضه تردين تنزلين روسنه يكولون جانت صاحبته وما خذاها والله يعلم شنو بيناتهم

التمو علي لمه وحدة وضغطو علي صرت ماكدر احجي واماطل انتظرك تجي تخطبني كلت من تجي استقوي بيك واطلب منك تحلها بحجيك ويا اخوي ادري بي يحبك ويحترمك وراح يصدك كلشي يطلع منك ويحلها بدون ميأذيني او يأذيك لانه متفهم شوية

ضليت انتظر واني احترك مثل الشمعة يومية احرك بروحي لحد ما اذبل و اوكف كبال البيبان انتظر دكة الباب وجيتكم

بس بالاخير ما اجيت لان الرسالة ما وصلتلك وطلع مهيب يقرا الرسائل كلها ويعرف محتواها
ونص الرسائل ميوصلها لكيتها يمه بعد ما تزوجته بدون رضاتي

سألته ليش مجان يوصلها گالي احبچ واغار ما اكدر اوصلهن واخلي يقرا كلماتچ

هز رأسه بحزن وكال بأسى :- مهيب جان اخووووي وگفاي

شيهانة :- گفاك ؟ متوهم جان الخنجر المغروز بمگفاك بس محد من عدنا انتبه

:- اذاج؟

شيهانة :- هووواي ... هووواي .. حجيت بغصة

ضليت اشهگ بدون شعور واحجي :- ضل يشك بيه ويعاملني معاملة يهود ما اكدر اتنفس بسببه وبسبب شكه يدور وراي شكد حاولت اوهمه عودك نسيتك واحبه ما اقتنع يدري بالگلب ما يهوى مرتين والمهرة ما تهوى غير خيالها وان كثرت الفرسان يمها

جبران :- اصيلة بنت عمي اصيلة

ضحكت باستهزاء وهزيت ايدي :- الاصيلة باعت روحها والثمن ظناها وما حصلته وطلعت عايشة لعبة بنص مخطط وهم يحركوني

من عافني مهيب واخذ بناتي بالنصب والحيلة وانهزم حتى ما اشوفهن ضليت لا ليلي ليل ولا نهاري نهار اريد اموت بناتي التوم جانن اول بطن واول ظنه ومعزتهن جبيرة اكثر من ما تتصور

كعدت ع كرسي انتظار صب وفركت زندي اخفف من توتري
ضلت دموعي تجري اكثر واشهگ

شيهانة :- مهيب ومشاري جانو يلعبون بيه واني الغبية انعمت عيوووني علمود بناتي

ضرب العمود بأيده فاير كاز ع سنونه :- كون اشرب من دمهم وما يبرد غليلي احجييي شسوولچ؟ احجي مردتي گلبي

:- من مخطط مهيب يعوفني وياخذ بناتي طالب مساعده مشاري ، مسوين مخطط ضدي وخبلوني شلون ما ادري لا تسألني ما ادري خبلوني صرت مو واعيه وخلو الخدامات يراقبني ويشوفون جنوني
صرت اضرب بروحي واضرب بالموجودين ويكولون كم مرة رايده اذبح بناتي

رد مصدوم :- تذبحينهن؟

رديت بقهر :- يكولون اني ما اتذكر شي غير انام بالليل اكعد الكه روحي فاقدة الوعي ومربوطة بغرفه فارغة مقفولة اضل اعيط يجي مهيب يسوي نفسه حنين ويسولفلي جرائمي بالليل من صريخ ومحاولات قتل ومرات اشوف بجسمي اثار ضرب قوية يكول هاي انتي ضربتي نفسج والخدامات كلهن يشهدن وكذا مرة اخذوني الاهلي صار وياي نفس الشي اهلي هم شهدو وبدو يعالجوني شي يم طبيب وشي يم روحاني

هنا ما جنت ادري هاي خطة من مشاري ومهيب
مهيب بايعني بيع ع مشاري
مشاري مثل ما تعرف من اغنى الاغنياء ومعارفه من كبار الدولة كدرو سوية يطلكوني من مهيب وياخذون بناتي وما خلولي حتى حق الرؤية
بجيت بقهر وحرگة گلب :- صاررر عمر بناتي 8 سنين وما شايفتهن تخيل اخر مرة شفتهن بيها عمرهن 4 اشهر وحرموني منهن

جر حسره ولزم كف ايدي يمسد علي :- تندلين مكانهن؟
هزيت راسي ب لا :- عايشين بلندن اكثر من هيج ما اعرف ومرة سمعت مو بلندن بدولة عربية ثانية غير الكويت

لم شفايفه لداخل ثغره وكال بتردد :- ورا طلاكج شصار؟

شيهانة :- ضليتي ويا اهلي متعذبة وادور عليهن لمدة 3 سنين وراها صارت رجعة اهلي للعراق رفضت ارجع وهددت بالانتحار ضليت بالبيت يمي المساعدة جانت وحدقجي البيت يهتمون بيه وابوي واخوي وامي يجولي كلششش هواي بحيث ما حسسوني هم بعاد عني وضلو مثلي يدورون حقي ويردون يحصلون مهيب بس ماكدرو كلشي انسد وصرت اني المجنونة الما اكدر اكون ام ومهيب هو الصار مسؤول عن بناتي بشكل قانوني وما من حقنا نركض ورا حتى نشوووف اثرهن

عانيت هواي وتأزمت نفسيتي الى ان اجة مشاري وهنا من اجة ما جنت اعرف بلعبته ويا مهيب ضدي ولا جنت ادري بروحي مبيوعه اله ومدفوع الثمن مقدما
سوا نفسه خير براسي وطلبني للزواج بالمقابل يرجعلي بناتي لان هو عنده سيطره ع كل اهله وناسه ومعارفه وافقت بي ورغم رفض ابوي ضليت مصرة الا اتزوجه
ابوي مل مني ومن بعد عرايك ومشاكل تم الزواج بس بشروط ما اتواصل ويا اهلي ولا يتواصلون وياي ولا حتى بمكالمات الحجة جانت عاداتي وتقاليدي هيج المراه عندي ما تتواصل ويا اهلها
صدكته .. ويمكن ما صدكته جانت عيوني معميه كل همي بناتي

تزوجته وبديت اعاني ويا وبعد زواجي بفتره قصيرة صرت حامل من حبلت اعترفلي بكل شي كال مهيب ما رايدچ لان يعرف بعشكج لابن عمج وزافر كلبه منج وخايف من خيانتج باعج بيع علي من جنتي ع ذمته
ودفعت ثمنچ لمهيب من انتي ع ذمته

كتله يعني ما ترجعلي بناتي ولا جاي تدور؟
استهزأ بي وضل يضحك وگال اتفاقنا انا ومهيب اساعده يتخلص منج بسهولة وياخذ بناته ويضيع ذكره وانتي تصيرين الي
حتى لو اعرف مكانه ما راح اوصلج اله

تخبلت ضليت ويا ع اعصابي ابحث وادور صگر جان يساعدني هواي بس ما لگينا اي اثر صكر كال اشتري راحة بالج تركي ابوي ورجعي للعراق عيشي حياتج وبناتج يم ابوهن عايشات لا تظنين عايشات بتعب اكيد مدللات والهن الله ليباوع لحالهن ويحفظهن
كال روحي ابدي صفحة جديدة وابتعدي قبل لتنباعين مرة ثانية لو تنكتلين ومحد يلگالچ اثر

كالي انتي صارلج سنين متعذبة لا يوم ولا يومين كافي اشتري راحة بالج

حجالي عن زواجات ابو السابقة هواي نسوان متزوج لو اختفن فجأة محد يدري بيهن وين لو تطلكن وما طولن وماتن ورا الطلاك

جبران :- جا ما رديتي المن ضليتي لسواد عيون مشاري

ضحكت :- شوف هذا من كال تركي ما قصده طلاك عادي واجي اني جنت بنفس مشاري وما جان راح يعوفني الا اطلع من نفسه
قصده اشرد وهو راد يشردني بس بعد ... الحمدلله كدرت كدرت اشرد بس شنو الفايدة رجعت انحرمت من ظناي

اني خايفه خاف مسوي شي لصكر ومشاري ميته خوف الله يعلم وين اختفه وشلون اختفه

صكر :- جاي يسألون لتخافين يجي يوم ونلگاه الكويت صغيره
:- انت مو جاي مدور علي من جنت ع ذمته

هز رأسه وتحسر :- وما لگيتكم

:- اي نقلنا لمكان ثاني ما يخطر ع البال وغيرلي كل شي وبالجامعة سايق خاص ياخذني ويجيبني من الباب للباب

جبران :- مو بطلج؟!

رديت مستغربة :- لا تركت بفترة من راح مهيب وقدمت وداومت من قبل لا اتزوج مشاري كملت مرحلتين وتزوجت مشاري بعدها

ضل مستغرب علامات الصدمة اعتلت ملامحه وبهت وجهه كلش
هز رأسه بقهر وضرب رجله بقبضة ايده :- ملاك كالت مشاري مبطلچ كلنا صرنه نعرف انتي مبطله ما تداومين

:- گالتلك من جنتو متزوجين؟ هز راسه ب اي
ضحكت تك خد :- يعني غارت مارادت تلگاني لان يدرون بيه اداوم

:- لا هو عمي هم جان زعلان حيل منج وكال لحد يوصل الها خليها تتطلك وترجع نحطها ع روسنا بس مال ع ذمة مشاري ونوصلها لا منعونه منج بس انا ما اهتميت ردت اعرف ظروفج واشوف شلون عايشة وحتى ورا موت بيت عمي هم اجيت ادورچ وما لگيتچ

:- شسوي هسة؟

:- تردين نصيحتي؟ انتظري صگر لو حتى سنين ولا ترجعين للكويت صرت اخاف وكل ليلة انزل اتفقد خاف الگاج رايحة

:- لا ما اروح واذا ردت اروح ما اروح وحدي صرت اخاف ما اريد اتعذب اكثر گلبي تعب بعد ماعندي گلب يحمل كل هاي الاذية

:- اظن صگر راح يوهم ابو عود الامور طبيعية وهو ما يريد يجيبلج شعلان وشي وبعدين فجأة ينفذ فد خطه بباله ونلگا هنا ويا شعلان

:- شلون يوصل؟ اذا حتى خواله ميتين هاااا هااا شوف سالفه خواله هم تخووووف وراها مشاري الجلب المطي

ضحك وميل شعري من وجهي ضل يبعده ليورا :- لا تفكرين هيج وتهوسين كومي اشتريلج بارد بردي ع گلبج وانسي كلشي صار ابدي صفحة جديدة نظيفة وعيشي حياتج بعيد عن ذيج الصفحة لخاطر الله

لميت شعري ومسحت وجهي وكتله :- هسة عرفت اني بريئة وما غادرتك يمته تبررلي انت

جبران :- لا ابرر ولا شي السالفة ومابيها من رجعو اهلج للعراق بالديوان ابوي خطب ملاك الي كدام العالم والشيوخ وابوج انطاها الي وصار النصيب زواج مدبر وعادي وراها يمكن بسنتين مادري ثلاثة خطبو هدير لعماد
بس العالم ماتدري ثنيناتنا عرسنا هنا ورجعنا للبصرة لحد هسة مايدرون انا جنت ماخذ ملاك اختچ

:- قصدك اهل البصرة مايدرون؟

هز رأسه :- اي بس العرف يدرون

لميت شفايفي وضغطتهن :- زواجكم مو ويا هدير وعماد؟ من جنت منفصله زين شگد طولتو

جبران :- اي من جنتي منفصله وتدورين مهيب
تحسر وكال بضيق ضلينا سوية لحد ما ماتت ويا اهلچ يشهد الله طرف ثوبها ما طخيته الله يرحمها حبتني وتعلقت بي وتعذبت وياي وين الله تكون مسامحتني وما شايلة بگلبها علي

حجيت بغصة
:- حرام عليك عذبت اختي

تحسر وزم شفايفه بأسى :- چا شسوي گلبي مو الي ولا الها الله يسامحهم هم سوو كلشي بدون علمنا حجو بموضوعنا واحرجونا

:- الله يرحمها ملاك جانت تعرف بعلاقتنا زين ليش ما حبيت وتزوجت وحدة تحبها
:- هيج .. بدون سبب گلبي انكطع من سالفتج وجنت شكد كارهج وحاقد عليج بس هسة لا طلعتي متأذية ومتعذبة اكثر مني

:- القاهرني محد حجالي
هز راسه مقهور :- اي ملاك ورا زواجنا بعد ما شافتني ما اريدها ما سكتت حجت كلشي لاهلج واقسمت اذا وصلولج خبر زواجها مني تتطلك كالت شلون اختي تعرف بزواجي من الشخص الحبته
شهكت :- اهلي كلهم عرفو؟

تنهد بضيق شح نظره عني :- اهلچ اي عرفو كلشي .. واحترگ دمهم جا ما حجينه وضلو يعضون الاصابع ندم امج الله يرحمها ماتت قهر ضلت تكول بناتي ثنينهن تدمرن بسببي ثنينهن ضغطت عليهن

:- جا هاي ورا زواجكم قبل زواجكم غير يكولون يعزموني
:- ما سوينه عزيمة ولا علنا هنا تزوجنة بزفة بس

گام اشرلي برأسه اگوم اشترالنا بارد شربنه ورجعنا للبيت نضحك جانت عمة علياء تسوي عشا ويا نزهة بالمطبخ من شافتنا طبينا كالت وهي تبتسم ضحك خير ان شاءالله

جبران :- خير خير حسبالي مسودنه لو راح تموت طلعن مشاكل مكدور عليهن يتعالجن

شرحلها كلام الدكتور كله وفهمها شنو انواع الاكل اللازم اكثر منهن صاحله عمي مشيت ورا ضحكت واشرتلي بحاجبها ع البيت
علياء :- فوتي شوفي منو بالصالة

مشيت بهمة واني اتسائل فكيت عيني بصدمة من شفت عماد كاعد ويمه بنات ثنين وحدة من نظره عيونها الواسعات الكبار عرفتها هاي رجاء بنت عمي تصير اول خلفته اكبر من عادل حتى
والثانية بدون سؤال واضح هاي زهراء

كامت نجلاء من مكانها تبتسم وتحجي :- هلا بالشيهانة هلا ومليون هلا

تقدمت سلمت عليها بفرح جانت طايرة وتحضن بيه حيل وزهراء كذلك جهالهن يلعبون بالصالة يطفرون يم عمي وهو طاير بيهم من الفرح

شيهانة :- هاااي يمته اجيتووو ليش احنه ماندري شنو هاي المفاجأة

رجاء :- جابنه عماد

باوعت لعماد كاعد شابك اصابعه وساند عكوسه ع اركبه ويباوع للكل بنظرة ضياع
عقدت حاجبي بس شافني ضحك وسوا نفسه طبيعي

حجيت اسلم :- الله يساعدك والحمدلله ع سلامتك عماد

هز رأسه ورد :- الله يسلمچ

گبل گام يتمغط ويحجي ويا روحه :- ميت تعب رايح انام واعوض هذا التعب كله

مشة يصعد عيني ضلت تمشي ويا محتارة رجاء جرتني كعدتني بالمطبخ وكابلتني تسأل عن احوالي وزهراء تكمل عشا ويا عمة ونزهة ويسولفن

ضل بالي يم عماد بس ما بينت اكو شي شاغلني حتى ما يسألوني واضطر اجاوبهم ويضلون يحسبون ويشيلون هم عماد

طبت هبة زوجة عادل ولحگها عادل شايل بنته ع كتفه نايمة
سلمن علي خواته بوسنا سألهن وين رجولتجن

رجاء :- وين عشتو شحتونا كل وحدة حطو خلفتها بايدها وكلولها انكلعي خوية خل نخفف عليهم شوية ملو خانكاتهم وضالات ع كلوبهم النوب اخوان ومبتلين بخوات

ضحك حضنها لصدره يبوس راسها :- رجيوة شكد مشتاكلج يشهد الله ومشتاك لسوالفج

زهراء بانزعاج مصطنع :- واني بنت البطة السودة
حضنها بايده الثانية لصدره وكال :- وانتي مشتاكلج اضعاف ام لسان الفالت عسى ايامنا كلها سوية والله لو تجن تعيشن ببغداد يمنه انتن وزلمجن

رجاء :- لا عيني شكرا البصرة تمشي ويا الدم ما نعوفها خلينا بغداد لأهلها وناسها

هبة :- والله بغداد تتشرف بيكم

اباوعلهم عيوني تلمع واتذكر حياتي ويا اهلي واخواني وحنيتهم دعيت الله بسري يحفظهم ويحفظ خوتهم ولا يحرمهم من بعض شافني عادل وكأنه لمح نظره الحرمان بعيوني گبل دفعهن واجة حط ايده ع راسي وباسني بسرعة
عادل :- وهاي اخيتي الثالثة انتن خواتي بالدم والشيهانة بالروح

ابتسمت بفرح ولمعت عيوني ..

همست الله يحفظك

راح يم عمي والولد واني بدلت ورجعت يمهم للمطبخ تعشينا سوية حتى هدير نزلت بس جانت عازلة روحها وكاعدة مثل الخطار كل شوي عيني تصير عليها والف فكرة تجي براسي
وارجع اكول شلون اطلعج واطلع الضامته يا هدير؟

خلصو عشا رجاء كالت وهي تجر جهالها :- اني حالفة ما اكعد بالبيت تعالو يما ابدللكم هسة خوالكم يحطونه ويطلعونه نتونس

عماد :- تدللن امدلجن روحي شارع
جبران :- شارع للطيبين

حميد :- ههههههه يلا كلنا نطلع نغير جو بدلن كلجن بناتي وجنايني

هبة :- لا عمي اني ما اروح انتم تونسو غير يوم بلكي باجر عكبة
شيهانة :- واني تعبانة من ركضة الدكتور اضل هم ما اطلع اذا تطلعن باجر اجي وياجن

زهراء :- شوف العيارات

هدير ما حجت لا اي ولا لا .. كامن بدلن وطلعن وعمي يتوسل بهدير تجي وياهم تتونس ما قبلت

جاي يطلعون وعماد ع درج يفرك براسه كتله مو كلت صاعد تنام ترتاح شو نزلت بسرعة
عماد بانزعاج :- انغثيت شيهانة ونزلت هسة طالع وياهم شارد من البيت والله كريم

هزيت راسي التفتت شفت هدير تباوع باتجاهنا ومقلصة عيونها بشك
مخليه رجل ع رجل تهز برجلها وتلعب بطرف المنديل بايدها برهاوة

هبة راحت للمطبخ تسوي اكل لبنتها جانت نايمة ما تعشت ونزهة تركض تلبس عبايتها طالعة وياهم

عماد فر سويجة وباوعلي همس :- تكلي المن لافي لو ضال بدوامك مرتاحة منك
شاقيتها كتلها لو استشهد يمكن ترتاحين
تكلي اي .. بكل جدية وترجع تكلي اشاقة من تشوفني انزعج

:- بلوة بعدين نحجي اطلع هسة غير جو ويا خواتك

هز راسه باوعلها بخزرة وطلع وهي مستمرة تباوع بشك باتجاهنا

طلعو ماكو خمس دقايق ضليت كاعدة اسولف ويا هبة وهي توكل بنيتها وهدير نطقت
هدير :- الشيهانة والشيهانة وعزيرة النفس تاليتچ هيج؟

باوعتلها بتساؤول وهبة عقدت حاجبها مستغربة نبرتها
هدير :- لا تصفنين حبيبتي وانتي هبة لتصفين وياها ماتعرفين هاي شنو من بشر وشنو من نفسيه شايله تريد تخلي العالم كلها تريدها وكلهم بصفها

ومنو يعجبها تلف علي لفت ع مهيب خذته ورجعت لفت ع مشاري وهي ع ذمته ديري بالج لا تلتف ع عادل هاي حية ركطة خو هي اختي بس جا اعرف طينتها احجيلج لمصلحتج

بقيت فاكة حلكي بصدمة هبة ضحكت وكلتلها :- عادل توة باسها براسها وكللها انتي اختي ثالثة ويحبها ويحترمها ويحسبلها حساب ويعرف بجبران جان رايدها لو تضل اخر مرة بالدنيا وهو يريد يبدلني ما يختارها
مو عادل اليحط عينه ع وحده عايشة بگلب اخو

هدير ضحكت ضحكة طويلة وكامت تتبختر بمشيتها تريد تصعد وتحجي
ويا هبه :- لو تدرين شلون ملتفه ع عماد وهو رجل اختها يومية يكلي اريد اطلكج كله بسببها
ماتدري نجوم السما اقربلها من عماد اقتله وما انطي الها

باوعت لهبة وحجيت :- هدير مريضة مرضها اخلاقي مو جسدي صعب تتعالج منه

هبة هزت راسها عيني ضلت ع هدير وكفت يم الدرج سندت ايدها علي تضحك بخبث وتباوع لهبة
:- ضلي فطيرة هسة تاخذ رجلج وتشمرج بالعتبة اني عن نفسي ما اعوف عماد الها ضل عادل

رديت ببرود :- خو اخذ جبران خالي مختلي

ردت بقرف :- جبران ماياخذ فضاله غيره

ضحكت تك خد ورفعت طرف حاجبي واني اكوم الها :- هسة عماد اذا طلكج تصيرين فضالة؟
بطلي هاي المسميات ماكو بشر يصير فضاله لان عاش تجربه فاشلة وانفصل

هدير :- ينفصل مرة مو مرتين صرتي بالضيم مثل الهايشة يومية جوة عجل استجني وطلعي منا بكرامتج ليش تنتظرين تنهانين اكثر
واذا هم بوجهج ما يحسسونج انتي عاله عليهم ف بظهرج يحجون ليغرج ضحكهم

شيهانة :- خلصتي ؟ صعدي فوگ رجعي لگنچ

اجت تصعد تباوعلي بطرف عينها زلكت رجلها وطاحت متأذية كبل ضلت تبجي وتصرخ
طيحتيني متعمدة حقيرة تردين تموتيني وتاخذين عماد

بقيت صافنة وهبة تهز ايدها وتشيل بنتها تريد تطلع تعبر البيتها
كالتلي وهي تطلع امشي كعدي يمي لحد ما يرجعون امشي

وهدير تعيط وتبجي ولازمة رجلها تتلوة حتى ما دنگت عليها ولا شفت شبيها خليها وحيدة ومالها احد لحد ما يجي يوم وتتنازل بي عن غرورها وتترك اطباعها القذرة

رحت ويا هبة ارجف جابتلي ماي اشرب وكالت
لا يصير بيج شي داده شنو ينفعج؟ حجيها هاي السمانية ؟

:- اختتتي هاي اختتتي ليش هيج تتعامل وياي والله ما اذيتها الاخت غير تلم اختها وتحطها بروحها شو هدير تعاملني مثل عدوتها

هبة :- هي هدير هيج من اول ما شفتها وشافتني ماعدها اخلاق حتى لو تزعلين علي يا داده ما تستاهل الاحترام والتقدير

ضربت ع رجلي بقهر مصدومة حسيت الدم صعد لراسي ضلت هبة تصبر بيه وتواسيني اخير شي كالت
عادل يدري بجبران يموت عليج يومية يكلي جبران رادتله روحه لان الشيهانة كاعده وياهم بالبيت والله لو تنطي فرصة وتتزوجي وتتشيخين عليها تخليها تضرب راسها بالحايط من القهر

:- لا يا زواج اني انتظر ابني وبعد هاي هي اعيش واكمل حياتي ويا احسنلي واريحلي

هبة :- براحتج بعد انتي هسة متأذية ومجروحة بالمستقبل يمكن كلشي يتغير وتردين احد يشاركج حياتج افضل وانسب شخص هو جبران فدوة لعمره وين اكو منه غير يخليج بعيونه

عقدت حاجبي وكتلها :- اكلج انتي خاف تحجين هيج چا خفتي من حجي هدير
ضحكت وضربتني ع زندي
هبة :- امشي لج اخاف من حجي هدير والله بطرانة كتلها وارجع اكلج عادل لو يريد يخوني ما يخوني ويا بنية يحبها اخو مو ناقص عادل

:- والنعم منه

جنة نحجي وسمعنه صوت هوسة ودگة الباب كامت هبة للباب وركضت وراها خايفة من الهوسة
ما نحس غير الشرطة جفتو وهدير وياهم كلتلهم هااي بكل حقد وغل وعيونها تنكط شر .. واشرت باصبعها علي حطو الحديد بأيدي وكالو انتي رهن الاعتقال ........للحكاية بقية 🖤

رأيكم بالقصة يهمني ..

🚫بوووية ترتيب السنين بالقصة عذاب عذاب اصعب شي مر عليه بكل قصصي يكون سهل بس هنا صعب لان صايرة لخة
ناس تسافر وناس ترجع وناس تخلف وناس تتزوج
وما اعرف السنين بالضبط فجاي ارتبها من يمي حسب التقدير
بس الاعرفه والي متأكدة منه بنات سهير (الشيهانة) مواليد 1990 بناتها مو هي هي مواليد 1972