رواية حمائم تخشى الطيران الفصل الخامس وأربعون 45 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو البارت 1000 تصويت وتعليق بين الفقرات لطفًا 🖤🔥🔥

...

جنت خايفة لزمتني رجفة حتى رجليني بادن ومصدومة من منظر ريحانة وجنونها وبنفس الوكت من تصرف خالتي لان ضربتني راشدي
وخجلانة لان سئت الظن بيها

اريد الزمها ما اكدر لازمة سجين تهدد وتريد تفتح الباب وتطلع
ريحانة :- عوفوني اطلع ابني من النهر غرگ

ردت الزمها امنعها تفتح الباب و ما حسيت غير هادي طلع من وراي لزم ايدها البيها السجين وخلاها ورا ظهرها ...
وبهاي الحركة انسحبت ع صدره هزت راسها بعدت شعرها عن وجها وصرخت بوجهه
ريحانة :- وخرررر عني مجررررم
حط ايده ع حلگها سده وضلت بس عيونها دم خازرته ومثبته عينها بعينه
خزرها وهمس بغضب :- بعلي الفحل اذا ما تسكتين افرسچ فرس ...

عضت ايده سحبها حيل التفت ع خالتي صاح
:- جيبي عباية شي ذبيها عليها

راحت تركض خالتي وهو لازمها بقوة مقيد حركتها وداير وجهه منها يستغفر

وهي تصيح علي وتريد بعده عنها بقوة ..
نتر بغضب :- ولج غضب الله ع راسچ ربضي شوية شمااالج مسودنه هاي نسيمة ما تلفي بس المخابيل

شيهانة :- انعم الله عليك صرنا مخابيل

التفت باوعلها ورجع باوع لريحانة
حجيت وياها بهدوء :- اهدي حبيبتي اصحي ع روحج انتي يمنه عمري اني ليلو اختج وصديقتج

باوعتلي تبجي عيونها ذبلت دفعت هادي وهو صرخ
نسيمة وينننننج

كومي ريحانة ورفسي برجله وتفلي بوجها
لطمت خدي صدك راح يفرسها فرس
غمض عينه بقلة صبر رجعت دفرته برجله
:- جلب عوفني ما تستحي كاضبني استحي شوية

وهو مغمض عينه ويزفر بغضب حسيته بعد حجاية والا يمدها هنا يطمس بمصارينها
لوا ايدها حيل واخذ منها السجينة ولزكها ع الحايط
فتح عينه ومسح وجهه بمتنه
وكللها بغضب من بين سنونه
:- بعلي الفحل اذا تحركتي لو صرختي بمكان التفلة اغطج ابرميل نفط واحرگنچ حرگ

دفعته حيل ضلت توخر بشعرها من ع وجها وتلم بروحها رغم هو دار وجهه وشمر علي السجين خازرني
اني شدخلني يخزر بيه قابل اني تفلت علي!

طلعت نسيمة بعد ما خلصت المسرحية شايله شال وتكول
عبايتي مغسولة ما شارتها مبللة

هادي :- عگبيش ورا ما دخلتيني بنظرة حرام جايبتلي شال وطالعه تركض كوة جنها ام الدويچات

تقربت من ريحانة لزمتها منهارة نترت روحها مني
غطتها خالتي وجرتها للغرفة ركضت وراها اشوفها واحجي من الباب
:- شنو شبيها ريحانة ليش هذا حالها شرجعها الج

التفتت خالتي خزرتني ودارت وجها زعلان
طلعت حباية انطتها الها شربتها غصب تدفع بايد خالتي وغمضت عيونها تبجي تون وكل شوية تريد تكوم

عشر دقايق ع وضعها طلعت رجعت للاستقبال لكيت الشيهانة مخليه الجهال يمها منا واحد ومنا واحد وهادي كاعد ع صفحة يسولف متضايق

من دخلت نتر بيه :- هاي مو معرسة البت شجابها بعد
ليلى :- وين اعرف يمكن انفصلت يمكن مات رجلها الله يعلم انت شلون تذكرتها
هادي :- وين اتذكرها ناسي مرة مسولفتلي عنها بس الشيهانة عرفتها وكالتلي ترة جانت عايشة يمهم وعرست وهيج تذكرت مرة كلتيلي عنها

كعدت ع صفحة خليت ايدي جوة حنكي محتارة
تنهدت وصفكت ايد بايد متحسفة
:- الظاهر الدنيا كسرتها مرة ثانية خطية صغيرة وزوجوها خوالها عمرها 11 وحبلت وجابت
هادي :- 11!!! صاح متعجب

ليلى :- اي والله مسكينة وامها حركت روحها مسولفتلك اني عن حور وصارت يتيمة الله يساعدها حالها يبجي الكافر يمكن ابنها غركان وميت

شيهانة :- اي ترة واضح هذا الشي من كلامها سودة علي تقهر تقهر البنية متازمة نفسيتها

هادي :- صارلج ساعة يمهن ما سألتي خالتج شبيها مابيها عمي بعلي الفحل انتن مو نسوان فلك تسودنن الما يتسودن وعدجن عرف منا ومنا لامات الدنيا كلها

شيهانة :- رجع يشمر حجي واني مرت سياسي واشمر ورا الشمس

هادي :- سكتي انتي ام اعطوب

جرت عيونها ما عاجبها نصت تحاجي هادي وشعلان
:- شبيكم حبايبي خايفين ماكو شي بنية جانت تلعب وتعورت وضلت تعيط
يلا كومو لعبو سوية لو نكمل اكل
هزو روسهم لا

:- تلعبون؟

ضلو ساكتين هادي كال
:- شنو نلعب
:- كيفكم شنو تعرف من العاب علم شعلان وشعلان يعلمك ولعبو

شعلان :- غميضة

هادي :- اي اعرفها نلعب ?

هز راسه اي
:-يلا حبايبي بس لا تختلون بمكان يخوف انتبهو لنفسكم من تلعبون

كامو طلعو صحت وراهم
لعبو بس بداخل البيت لحد يفتح الباب ويطلع
هادي كال صار ماما

وذاك بس باوعلي وهز راسه
التفتت لامه :- ابنج مبين عنيد وراسه ياااابس

رفعت ايدها وصاحت بقهر :- بلوة ولا كانه طفل ما يطخ راس جبران خذاه ما خله شي ما اشتراه اله بس كون يسكته ماكوو
وهسة ننتظر غرفته تكمل بس وين ولا يقتنع ولا يعجبه العجب بس اني راح اضل احاول ويا لحد اخر نفس بيه يكون اكسبه وليدي هذا

هادي بهدوء :- اعصابچ

باوعتله تنهدت كعدت الم المواعين دخلت خالتي تلهث
نسيمة :- الحمدلله نامت كوة ع الحباية هدأت

هادي شافها عقد حاجبه وكال
:- شمالها هاي ام تفلة؟

خالتي ضاجت نصت تلم وياي وردت
:- ارهابيين مادري عصابة خذو ابنها كبال عينها وشدو برجله طابوكة وغركو بدجلة

كلنا صحنا يمة اسم الله وفزينا مقهورين

نسيمة :- ورجلها انكتل وجابوها الي ميتة لان مالها غيري اني كلتلها من تضيك بيج الدنيا تعالي يمي احطج بعيوني

هادي :- والله والنعم منج ما تقصرين بس ما حجيتي ما كلتي عندي بنية هيج وضعها ليش خليتينا متسودنين من صرخت

ضلت ساكته ما ردت مقهورة وشالت المواعين شلت الباقي ومشيت وراها مختنكة همست
خالة!! وطاحت دمعتي

ما ردت علي
:- خالة شسوي غير شغلتج هي عامه عليج ومخليتنا نفكر بيج سوء والله

نسيمة بقهر وهي دايرة وجها :- تدرين بيه ما اسويها واجيب احد يغتصب وحدة لو اموت اني ما اوصخ بشر طاهر مو طبعي

ذبت المواعين بنص الحوض ولزمت الجلافة تريد تغسل
ليلى :- عذريني خالة والله من صريخها هيج ظنيت شمدريني بهاي المصيبة
نسيمة :- هسة دريتي يلا روحي يمهم لو سوي جاي

بستها بكتفها من ورا :- عذريني والله ما تنعاد ولا اظن بيج سوء بعد
تنهدت ارتفعت اكتافها ونزلت مقهورة
:- هاي هيه روحي سوي جاي

:- رضيتي علي يا بعد روحي؟
ذبت من ايدها المواعين بغضب ونترت :- اذا ما تولين ازعل صدك ولي احسلج

جريت روحي وركضت للقوري ذبيت البثل وشطفته بالمغسلة وسويت جاي جديد حضرت استكاين
والمواعين شوية بسرعة خلصت هي ع ما تهدر الجاي واخذ لون

شلته للاستقبال خليته جانو هادي والشيهانة يسولفون عن مشروعهم وتطوراته بهاي الفترة بينما الاطفال يلعبون غميضة سوية مندمجين كل شوية واحد يختل والثاني يدور علي الحمدلله اخذو ع بعض

هادي انتبه لوجودي جنت صافنه فززني من صاح
الصفنه للعشاك مو الج

الشيهانة باوعتلي بمكر وكالتله :- يجوز عاشگه ليلى

نتر بيها :- سدي حلگچ
شيهانة :- اقصد عاشكة السيد شبيك السيد رجلها الله. اكبر شكد ظنانين سوء انت وبنت عمك والله بلوة بعد ما احجي سكتت

هادي :- خيولي ما عاشكته تريد تتطلك والله يا ليلة الا اعرسج واختارلج احسن زلمة

ليلى :- ما اريد مشكور خليني هيج براحة گلبي
صدك شخبار عذيرة

هادي :- زينة عذيرة تتنسة خطية ومريضة كل شوية مزوعه نسواتها تموتني هذا ثالث جاهل نفس الشي
احس روحي حامل وياها احس بثكل ولعبان روح ومرات وجع ابطني

ضحكنا اني والشيهانة كلتله وهي تشمر بكف ايدها
:- فلشك كون والله عندك سوالف

هادي :- والله غير الصدك هي تضل تفتر فوك راسي اكعد هادي راح اموت حموضة وراح ازوع
هسة كتلها امشي وياي لبغداد اونسج ونضل يم ليلة جم يوم ما رضت تكول تلعب روحي ودرب طويل كتلها يطبج حمس ضلي مختنكة هنا

تكلي اها اضل مختنكة بنص هاي الديرة الكلها خضار ولا اروح وياك غاد لبغداد كلها بيوت ومابيها خضار

كتلها ضلي واجيت ..

:- بناتك ثنينهن يخبلن يشبهن امهن ما يشبهنك انت مزنجر
باوعلها بنص عين ومسح ع لحيته وشعره
:- لوني ما يعجبجن امهات بنطرون تردن الاشكر المايعه روحه هذا ملح الجنوب

شيهانة :- ههههههه لا والله بنتك الجبيرة نسيت اسمها شفتها اني من رحتلكم شسمها
هادي :- فواطم والصغيرة اسمها فرات

شيهانة :- الجبيرة فواطم اخطبها لابني من يكبرون والله حبيتها
هادي :- كبعي واخذي ولو احنه ما ننطي لبعيد بس بعد انتي غالية ما اكدر اردج وفرات لسيد هادي وهاي هيه

ليلى :- باع هذول وين يحجون واني افكر بهاي المسكينة مغركين ابنها شلون حالها

هادي :- ختولي ام تفلة بعلي هذا البيت بعد ما اطبله دامها موجودة بي
ليلى :- ياا بنية مريضة ماعليها عتب
هادي :- جا المريض يتفل؟

شيهانة :- شبيك اعتبرها تفلة سيد تطيبك هههههههه
هادي :- عمت عينج وعين السيد اليتفل علي علمود يطيبني

شيهانة :- هاي سكتت كل ما اكول بعد ماحجي وياك ارجع احجي ما اتوب والله بعد ما احجي

سكتت دايره وجها الي واني افكر بريحانة ممرودة روحي عليها همه لان ما معاشرينها عدهم عادي ضاجو شوية ورجعو طبيعي بس اني ميته قهر

رجعت باوعتله وكالت :- صدك رجلي عازمك للعشا ويكول ما يطلع للنجف اذا ما يتعشا يمنه وبعد رجلي سياسي ويشمر ورا الشمس وفهمك كفاية

هادي :- حتى بعزايمكم تهديد عمي نلفي نتزقنب يمكم

شيهانة :- انتي هم بعد ويانه مالج حجة ابن عمج وياج والسايق موجود هو نطرده للنجف وانتي نروح وياج نوصلج لبيتج

هزيت راسي بدون تفكير اي جنت شاردة لبعيد

دخلت خالتي صبت جاي شاركتنا وهادي تعذر منها هواي وبسرعه لانت كلبها طيب ما تشيل حقد ..

ريحانة ع نومتها خطية كل شوية ادخل اباوعلها تنمرد روحي واطلع
بس غير صايرة مرة تجنن متفحة وشحلاتها حرامات ما عدها حظ

للعصر رحنا لبيت الشيهانة نتعشا وهاي خلصنا النهار نفتر
فرح بيهنا جبران وعمها ورحبو بينا واندمجو الولد بالكعدة كانهم يعرفون بعض من سنوات واحنه جوة
غير للامانة تونسنا كلش وغيرنا جوة وجبران لزم بهادي يضل لثاني يوم يلا يرجع للنجف

بس تعذر منه وكله زوجتي مريضة مااكدر اتركها تبات الليل وحدها ، وراح راد يوصلني بس كلوله لا طريقك طويل احنه نوصلها مادري شعجب قبل يمكن ارتاح زايد لجبران لان مو عوايده يقبل

اخذتني الشيهانة صعدتني للغرفة المخلينها لشعلان ما جان بيها اثاث بس مليانه العاب مشتريله كومة
زين جانو مندمجين بسيارات يشغلوهن ويخلوهن يمشن للحايط مثل السباق والي يفوز يكوم يصيح ويطفر فرحان

ليلى :- يلا ماما راح نروح للبيت نرجع غير يوم

هادي :- شوكت غير يوم؟
ليلى :- ما اعرف يجوز هم يجونه نعزمهم؟
هز راسه فرحان اي ..

:- هاي هي يلا نروح سلم ع صديقك الجديد وخلينا نرجع للبيت ونشوف بأقرب وكت نخابرهم يجون يمنه وهم تلعبون

هز راسه والتفت لشعلان
:- باي شعلان .. اشوفك بخير

شعلان :- الله معاك

مديت ايدي لهادي اباوع للشيهانة مختنكة ما تحجي بس عيونها تلالي بيها دموع
كل ما تشوفه تتذكر وجعها والمها وصبرها ..

لوحتله باي ...الله وياك خالاتي حبيبي دير بالك ع ماما ترة تموت عليك تحبك
حطيت ايدي ع زندها مسدت علي هو باوعلها وهز راسه اي خجلان

دنطلع من الغرفة وصاح
:- لحظة هادي وگف شوي

التفتنا ثنينا نصة شال سيارة زركة واجة يركض
خلاها بأيد هادي
شعلان :- هذي عربون صداقة بيناتنا من اجيكم اجيب سيارتي وياي

هادي :- اخذها ماما

هزيت راسي :- اي الهدية ما تنرد

اخذها من ايده :- شكرا راح احتفظ بيها وما اخربها

ابتسمو لبعض شعلان خجل راح مسوي نفسه مشغول بالالعاب وهادي احمرت وجناته

شيهانة :- الله يحفظهم ويديم صحبتنا ونكبر ونشوفهم اصحاب وهم شباب

ليلى :- اللهم امين

شيهانة :- يلا اني اروح وياچ من يوصلچ غفار ماريدهم يشوفونج لو شي وانتي وحيدة ويا السايق

ليلى :- خاف اتعبج
شيهانة :- تعبج راحة بعدين هياتكم مو ذاك البعد انتم مسافة حلوة وهم امر بطريق الرجعة للاسواق اشتري حلويات لشعلان شنو رأيك حبيبي؟ شنو تحب لو تجي ويانه نوصلهم

طفر من مكانه :- اي ايي معاكم بالسيارة

مدتله ايدها فرحانة جاي تسوي هيج حتى تقربه منها
اخذته ونزلنا لكيت جبران واكف يم السايق يحجون من شافها كللها هاي شعلان انظم للفريق

كلتله بحماس :- ايييي

صعدنا سوية مشة مسافة وكالتله نزلنا هنا نتسوك
نزلنا سوية خليت هادي يختار الي يريده وهي خلته ابنها ع مايه ومو اندمج ويا هادي ضلو ياخذون نفس الاشياء

فتحت جنطتي حطت ايدها فوك ايدي وكالت بهمس
:- ما تستحين غير انتي خطاري شلون تدفعين

:- لا فدوة هواي هيج
خزرتني :- سكتي
طلعت فلوس حاسبت والمشكلة اشترينا هواي اشياء لان هم ع الواهس اخذو واني اخذت كم شغلة للمطبخ محتاجتهن جبن وروبة وغيرها

ليلى :- شنو هذا الاحراج ما تگليلي والله بعد ولا ادخل وياج محل

شيهانة :- انتي تلعبين لعب والله عندج سوالف بعدين ما يرد الكريم الا البخيل

ومن اجيتي لبيتي جايبة ذيج الهدية واني ما اخذتلج هدية لبيتج جنت مشغولة بس ما ناسية تطلبيني هدية عزميني حتى اجيج واجيبها

ليلى :- هاي هيه بس مو بعزيمة انتي شوكت ماتحبين عزمي روحج وانطيني خبر حتى ادلعج بالاكل

شيهانة :- اوكي

ضحكت :-ولج انتي صلاوات ع محمد شنو صايرة جمال ورقة وانوثة جبران رجعج بنت ال18
شيهانة :- من يكون الزوج عاشق لزوجته هيج تكون النتائج واني متاكدة السيد راح يدللج هيج ويسعدج بس لازم تنطي فرصة وتفرضين نفسج علي مو ترجعين انتي التتنازلين وتضلمين روحج

جانت تحجي بصوت ناصي تحسرت ورديت
:- ولج صدك اني اشوف روحي صرت رجال حتى انوثه ماضلت عندي بس ويا هذا الرجال مالي رجعه داده خليني هيج احسن

اذكر من جنت متزوجته غير لعب لعب بيه ويمشي ويوصي صوتج لا يطلع لبسج كذا وهذا كذا واني اكلله سمعا وطاعه واسوي كلشي يريده وصرت امشي ع مايه تنازلت كلش .. وتغيرت كلبني وحدة ثانية

تالي هو ما تنازل عن غروره وكبريائه وطلكني ودار الوجه وتزوج

كولي ما وكفت بعينه تضحياتي والتغيير الي تغيرته علموده ؟ حتى اهله يموتون علي لهسة والعلوية تسولف تكول كلهم ماقبلو يطلكج وما جانو راضيين بس هو تنازل عني وخسرني

شيهانة :- اكلج حتى ابو?

هزيت راسي متحسرة :- اي تكول حتى عمج السيد ماقبل علي وكايله روحلها تفاهم وياها بس هو ضل ميبس راسه خاف عشتو يعرفون بالوضع ويلومونه
وخسرني بالاخير ابو شافه مصر زوجه حتى يضمن ما يختار وحده ثانية ع مزاجه وراد يرضا علي لان هم ميتين ع فاطمة يردونها اله

:- اي وهي ع حجيج ضاله بدون زواج يمكن حابته والسيد يدري لهذا السبب خطبها اله من شافه مصر مايرجعج راد يجبر كسرها ويجمعهم سوية بالحلال

هزيت راسي اي .. واضح هيج

وصلنا للمنطقة ودخلنا السايق بالفرع ، عدلت عبايتي لميت روحي من تقربنا عيني صارت ع بيتهم شفت يمه خبصة مال ناس

انخمش كلبي باوعت للشيهانة وحجيت :- شنو هاي هوسة العالم

ضليت اباوع مبين عليهم مخبوصين ، ولدهم نصهم بالشارع ونص داخل البيت والباب مفتوح ع وسعه

ضليت مخروعة
:- كبل خابري عليهم سألي شنو صاير

غفار :- تحبون انزل اشوف الوضع الكم؟

ليلى :- لالا اني اتصل بيهم هسة

غمضت عيني خايفه والف احتمال اجة ببالي كلت يمكن ابوهم صاير بي شي لو سيد قيس تعب لان هو مريض
استبعدت الموت لان اخاف من الموت والفقد بسبب موت اهلي وعيشتي وحيدة

هادي جان يمي لميته لصدري خايفه
:-اسم الله عليك من اليتم ماما .. حجيت بهمس

اوكف هنا هذا بيتنا فتناه .. صار ورانه

اشرتله رجع ونزلني الشيهانة نزلت وياي
كالت :- خابريهم بالله كدامي اني هم ضل بالي خاف سيد قيس...... قطعت كلامها ولمت شفايفها للداخل

هادي رد بتساؤول :- شبي بابا
ليلى :- ما بي شي تعال اكعد امي هسة اجيك

ركضت للتلفون اتصلت ضليت انتظر اجاني صوت رجل
كلت السلام عليكم
رد عليكم السلام
:- منو وياي انت ؟
:- مصطفى

:- هلا خوية مصطفى اني ليلى
:- هلا بيج ام هادي حياج الله شلونج اخيتي
:- الحمدلله بخير .. احم .. سيد هسة مرينا بالسيارة وشفت لمه وخبصة يم بابكم وضل بالي خير ان شاءالله

جر حسرة وكاال بأسف
:- والله الظهر تازمت حالة قيس ونقلناه للمستشفى تعبان وقبل فترة رجعناه. بسبب الحاحه الا يطلع ، وهذول اولاد عمومتنا جايين يتطمنون علي وتخربط مرة لخ
انخبصو بي وهسة اخذو مرتضى وهاشم واباذر للمستشفى مرة ثانية

ليلى :- سلامته ما يشوف شر عادي من يطلع تتصل بيه تطمني؟ وهم حتى نجي نزوره اني وهادي

مصطفى :- ان شاءالله اتصل بيج وابلغج

ودعنا بعض ورجعت السماعة حسيت صوت كلبي عالي وصارت وشة باذاني
غمضت عيني خليت ايدي ع الحايط اختل توازني
لزمتني الشيهانة من ايدي حيل
:- سلامتج الله الله .. تعالي كعدي

اجت عيني بعين ابني الخايف علي وقويت روحي
جريت نفس وكعدت ارجف
جابلي هادي ماي واجة يركض والشيهانة تفتح بربطتي ونزلت بالكاع تنزعني جواريبي
:- عوفيهن ولج شسوين
:- اختنكتي اريد اخفف عنج

اخذت الماي من هادي شربت وغسلت وجهي فحطانة
كالت بهمس
:- خير

رفعت الوسطي والسبابة ااشر الها وحجيت واني الهث
:- اليوم متخربط مرتين تخيلي داده الله يعلم بحاله

كالت بحسرة :- لج اني ليش اكلج انطي فرصة لان السيد عليل ودوة علته انتي .. حضنج .. حبج
يستاهل فرصة مرات لازم نسامح ونغفر اغلاط احبابنا

غمضت عيني متحسرة :- ما اكدر روحي ماجاي تتقبل شسوي اتذكر كسرتي وكلبي يزفر

شيهانة :- والله ما اعرف شنو اكلج هم حقج .. وهو هم خطية يستاهل فرصة يمكن صدك ندم وكبر وبعد مايعيدها

ليلى: - وفاطمة؟
:- انتي زوجته الاولى ترة وام ابنه مو ذنبج اذا اقاربهم كذبت وضمت خبر حملج اذا انكسرت فاطمة برجعتج ف الذنب مو ذنبج الذنب ذنبها هي الكلبة

ليلى :- ما اعرف محتارة .. بس اني مشكلتي ما اكدر اتحمل الضرة اموت تخيلي يجيلي حاضنته وبي ريحتها ولج تخيلي يمه اموت من القهر
ضربت ع وجهي بقهر لزمت ايديني نزلتهن

دموعي تنزل :- لو تردوني انسى من عافني وانكسر وتنكسر حجايتي لا والله ما اكدر اتحمل وجع الفراك ولا اتحمل الذل والغيرة والقهر خليني هيج داده

شيهانة :- هاي هيه خية براحتج

باستني ومسحت دموعي اشرتلي براسها ع الاطفال واكفين ع صفحة متوترين
:- اليوم خطية هواي شافو دموع ، خليني امسح دمعتي وارجع اوكف ع رجليني الدنيا ماتحب الضعيف تريد الكلبه قوي

ضربتني ع كتفي وصاحت :- كفووو ليلى

مسحت وجهي وابتسمت جذب
هي باوعت لساعة ايدها وكالت وهي تقوس شفايفها
:- تاخرت اليوم اتطلك

ليلى :- لا اسم الله عليج عذريني اخرتج .. بس والله لو كايلتله وضاله يمي شكد نتونس

غمزتلي :- ما يتحمل ينام بعيد عن حضني

كصرتها بايدها .. ودعتني وراحت قفلت بيبان بيتي
واخذت هادي للغرفه انطيته ملابسه بدل دكمتله قميصه جنت تعبانه

هو كال بفضول :- شبيج ماما ليش جنتي تبجين قبل شوية
:- ما بيه شي ماما مرات احنه الكبار نتذكر امور توجع كلوبنا ونبجي ، الوجع الي بالكلب من عزيز
والدمعه الطاحت .. طاحت لعزيز .. والعزيز ذلني يا ماما

صفن علي ما فاهم طاحن دموعي جريته حضنته خليت وجهي بشعره مهضومة
حجيت بقهر اوصي :-دير بالك تذلك بشر امي دير بالك تعاير واحد بعائلته .. لو بذنب ارتكبه وبعدها تاب
لا تهضم احد ولا تكسر كلب احد ابن امك اريدك تصير رحيم بالناس انت سيد وجدك رسول الله ومن اخلاق رسول الله جان عطوف ع الناس ما يعاير بشر اذنب ولا يذل بشر

هز راسه نومته وكمت بدلت وتمددت الف فكرة اجت براسي
الشوك ضل يجلدني بسياط ما ترحم حسيت الالم ذبحني .. خليت ايدي ع گلبي احس بنار هنا شابة
غمضت عيني تذكرت كل ذكرياتنا .. ضحكنا وسوالفنا وحنيت
ومن حن كلبي مردته بقسوتي .. وخليت كرامتي وكبريائي فوك كل شي

نمت تعبانة .. بعد بجي و وجع واهات مكتومة ..

...

فاطمة ...

اشوفه يذبل گبال عيني وروحه كامت تروح
دخلت علي اباوعله صاير جلد وعظم و وجهه شاحب
تقربت كعدت بصفه جريت ايده خليتها بحضني وحجيت بهدوء
:- سيد كاعد اريد احجي وياك؟

فتح عينه بياض عينه صاير احمر وعيونه ذبلانه
خنگتني عبرتي بلعت غصتي حركت كلبي وروحي وحجيت
:- اني موافقة ترجع ليلى اعرف هاي اذيتك علمود ابنك انت حبيته وتعلقت بي وتريده يمك وبحضنك
رجعها بعد ما اگلك اتطلگ .. اني هم عندي اطفال ماريدهم يعيشون بعاد عن ابوهم سهلتلك الطريق

غمضت عيني ممرودة ما جنت اقصد ابنه وهو فهمني

بلع ريگه وهز راسه لا
:- ليلى ماتريد ترجع ..

فتحت عيني كتله بنبرة كلها خوف :- كلتلك طلك فاطمة وارجعلك?
رفع ايده حرك اصابعه بصعوبة "لا" ونزلها
قيس :- مو ليلى التطلب ادمرج ع حساب راحتها فاطمة .. ليلى تدوس ع نفسها علمود ما تنغثين وتتأذين

فاطمة :- لمحتلك؟ اذا لمحت الك اني اطلع من حياتك لان ... انت ... سيد انت تحبها ... ما تحبني

غمض عينه بتعب جر نفسه رفع روحه يرتجي ع تاج السرير ساعدته خليت ورا ظهره مخده شفته مشككه من المرض بللها بلسانه انطيته ماي يشرب

اخذه من ايدي همس :- السلام عليك يا سيدي ابا عبدالله .. شرب شوية من الماي وخلاه ع الميز

كح جلى صوته وكال
:- افكارج هاي راح تموتج فاطمة الج يوم تصيرين بمكاني بسببهن
غمضت عيني نزلت دمعتي ع خدي

كتله بهضم :- احس روحي دخيله ع حياتك ومخربتها بوجودي .. اني والله مو ذنبي اذا ليلى جانت حامل وانت ماتدري بيها

قيس :- فاطمة بردي كلبج مشكلتي مو انتي .. انتي عزيزتي والك محبة بكلبي والج كل الاحترام والتقدير ومكانتك محفوظة بكلبي وبالبيت
بطلي افكارج لخاطري .. اذا تردين تشوفيني مرتاح بطليهن

ابتسمت برضا .. مستحيل يكذب وهو بهاي الحالة
:- هاي هيه
:- انت من كلبج قابلة ارجع ليلى

نصيت وهزيت راسي
:- رفعي راسج وجاوبي
:- اتعود وهي اذا قبلت ترجع تتعود مو اول ثنين يصيرن ضراير

هز راسه ورجع يذكرني :- ليلى ما ترجع فاطمة ولازم اطلكها مرة ثانية لان حملها ما كان مبين

سكتت ادري بي بكلبه مو هيج يريد وخليت كل الاحتمالات حتى ما ارجع انكسر
:- شو ساكته
:- شنو احجي ما تكلي انت وياها تنجازون
كمت الم الهوسة الصايرة ع الميز من ماي وادوية وغيرها وحجيت واني ابعد عيوني عنه حتى ما يشوف كسرتي وضعفي

:- واذا رجعتها بيها شرط طلاكي وانت تريد كول اني ما اعترض ماريد تضل عايش وياي طول عمرك ونفسك بيها وروحك يمها
يمكن من تجي يمك تتوازن وتصير تعدل بيناتنا ع الاقل شوية

سكت ما رد .. لم شفايفه فتره يباوعلي واني اتنقل بالغرفه

كح التفتت اشوف شبي طلع المنديل خلاه ع حلكه وضل يكح مختنك
كوة فكت منه الكحة ، وجهه كلش صار شاحب خفت علي يتخربط

ردت اطلع اصيح للولد بس ستوقفني من لزمني من معصمي ولزمته كانت ضعيفه كلش
:- جيبيلي دفتري هناك .. وقلمي .. ما عليج امر

هزيت راسي اي
:- شنو اجة ببالك تكتب شعر ههه
جنت اضحك متوجعه

قيس :- اكو براسي شوية حجي اريد اكتبه ع الورق

طلعتله الدفتر والقلم الحبر الاسود وانطيتهن اله

فاطمة :- اريد انزل خو ما تحتاجني ؟

هز راسه لا ونصة يفتح بدفتره ويجر نفس عميق يقوي روحه بي باوعت لايدينه ترجف لزم القلم وغمض عينه بألم وفتح .. عفته و نزلت .

اخذت الحسن وخاتون وكعدتهم بالحديقة يمي مختنكة محتاجة اشم هوى
طلعت كريمة بنت هاشم تلعب وياهم وتهتم بالحسن حطيت ايدي ع راسي وغمضت عيني تعبانة

احس ماعندي روح بعد ولا عندي گلب ما ادري شنو صار بيه من سمعته يشكي لدنيا وكان روحي كلها راحت

مشاعري اندثرت .. ماتت .. ويمكن اندفنت جوة حطام روحي الي انهدمت بذاك اليوم

ما ادري شكد ضليت ع كعدتي بس فتحت عيني لكيت الحسن نايم بحضني وخاتون وكريمة جاي يفوتن للبيت حنان تحجي وياهن وتصيح الهن

والدنيا مغرب ... البارحة خلص ليلته بالمستشفى
جان هو والميت سوية الدكتور يكله لا ترهق نفسك لا تنقهر وهو يريد يموت عليها

متاكدة حتى جلطته بسبب فراكها ويمكن لان طلبت تطلك منه

كمت فتت للبيت روحي خاوية خليت الحسن يم خالتي نايم فتت للمطبخ اخذت البتيتة اريد اكشر
حنان :- فطومة العشا كبه ومسوين مشاوي شتسوين بالبتيتة؟

باوعت لايدي ورجعت باوعت الها :- عبالي نسوي مقليات
باوعتلي بتفكير وباوعت لوفاء وسكينة
:- لا حبيبتي اذا مشتهية بتيتة جيبي احنه نسويلج صعدي يم قيس شوفي وديري بالج علي

فاطمة :- اني ما مشتهية شي والله مالي نفس بس كلت اساعدكم اصار ايام ما اساعد

سكينة :- وانتي بيا حال الضيم البيج مكفيج روحي ديري بالج ع رجلج الشغل احنه موجودين ونشيله

عفت من ايدي غسلت وصعدت لكيته نايم مغطي عيونه بايده
انفاسه منتظمة باوعت يمه ماكو شي

ورغم اني اخاف الحرام وما احب اتجسس ولا امد ايدي والزم شي مايخصني وادور بي
بس بيومها روحي راحت تمنيت اعرف شنو كاتب
شنو الشي الجان براسه

باوعت يمه وفتحت المجر ماكو شي رجعت لمكتبه لكيته مرجع الدفتر لمكانه جريته وخليته ع صدري ودخلت للحمام بسرعه

فتحته ايدي ترجف ردت اشوف اخر صفحة شنو كاتب
اخر صفحة بيها كتابة بيا الم خط حروفه وشنو من وجع ترجم ع هاي السطور

وكعت ورقة مطبوكة رفعتها وفتحتها ، ومن التاريخ المكتوب بطرف الورقة عرفت هذا الشي الكاتبة وليش شاك الورقة ما اعرف

كعدت ع التخته خليت الدفتر بحضني واناملي ترجف اريد اسدها وارجعها بمكانها بس ما جنت اكدر

كاتب التاريخ بطرف الورقة من فوك
وجواها بسطر كاتب رسالته

"وصيتي .. وصية كتبها رجل قد فارق الحياة منذ سنين مضت ، انا اعتقد ان الوفاة في بعض الاحيان لا تعني فراق الرواح لباطن الجسد فهي ربما تكون فراق شخصًا ما ..

انا قيس عبد الرحمن ... ومكمل وصيته يوصي علينا اني وليلى وابنائه ويطلب السماح من عدنه

بس الكلمات الكانت ببداية الوصية كسرت روحي الف وصلة هشمتني
طبكت الورقة ورجعتها بنص الدفتر غسلت وجهي ومديت راسي شفته ع وضعه طلعت خليت الدفتر بمكانه وانهزت من الغرفه مختنكة نزلت

شفت هادي لازم ايد خاتون وجاي يصعدون ابتسمت و وكفت بنص الدرج
:- حي الله سيد هادي اجيت تشوف بابا

هز راسه وكال :- اي خاله

فاطمة :- بابا نايم تعالو ننزل سوية وهسة من نخلي العشا اخليلكم ويا تتعشون سوية حتى يفرح من يشوفكم داير مدايره متفقين؟

هزو روسهم اي خاتون جرته :- تئال نلئب لئد .. ضحكت ما لفظت حرف العين ولا بكلمة

راح وياها دخل جدهم جوة وحمويني والتمو جانو كاعدين يسولفون عن حالة قيس وشلون لازم ندير بالنه علي حتى يصير زين ويكوم سالم

بعدها الولد اندمجو والاحفاد التمو حول خالي .. يحجون ويا ويسولف وياهم ويعلمهم

جنت كاعدة ع صفحة مخليه ايدي ع خدي وتتكرر الكلمات براسي واحس بصداهن يضرب اذني حيل ويوجعني

لفت انتباهي صوت هادي يسأل جده
:- جدو اسألك شي .. ماما امس بليل تبجي
هز راسه خالي شدني حديثه البريئ
:- كتله شبيج ماما كلتلي لا تذل بشر ولا تعاير بشر بذنب
هسه اني ما عرفت شنو الحجي ضل بعقلي
يحجي ويأشر باصابعه لصغيره ع رأسه

جده هز راسه مرة ثانية وخلاه بحضنه
وضل يسولف ويا ويشرحله
عيني ما طاحت من هادي وهو يسمع ويسأل جده ويرجع يجاوبه كانه كبير مو صغير عقله اكبر من عمره

باوعت لحمويني يباوعون مثلي متاثرين ، وكانهم عرفو شنو يقصد هادي وليش ليلى هيج كلتله وليش كانت تبجي

اختنكت كلش انسحبت مجاي اعرف وين اروح ضايعه اريد اموت اريد اكطع روحي

ختلت بالحمام خليت راسي بين رجليني وضغطته وجعه موتني. .

سمعته اندك كمت مسحت وجهي وفتحته وطلعت
سكينة :- شبيج تخبلتي تردين تموتين روحج بالحمام
فاطمة :- هو اني متت شنو ضل بيه

حجيتها وتجاوزتها صعدت ما اريد اضل هنا والمشكلة اخاف هسة ادك رجل الا اتطلك واخذ جنطتي واطلع ويصير بي شي واصير اني المسؤولة

فتحت باب الغرفه ما لكيته بفراشه ، مشيت للحمام بابه مفتوح وهو ماكو ولا جوة

طلعت محتارة وين راح وصارت عيني ع باب غرفتهم القديمة وكان اجالي تنبيه
كبل عيني طاحت عليها .. مشيت ع كيفي لمحت من جوة الباب مبين ضواها مفتوح

خليت ايدي ع عروة الباب فتحته ع كيف مفتوح رغم كانت مقفوله
شفته واكف لازم جاكيت اله قديم وصافن بي
عقدت حاجبي مستغربة حتى مو لبسة الها حتى يصفن بيها

حجيت بصوت ناصي :- شتسوي هنا قيس

فز التفت باوعلي وجر نفس
:- عندي قطع ملابس اجيت اخذهن ضلن هنا من زمان

رفعت طرف حاجبي
:- الظاهر الجاكيت هذا عندك بي ذكريات ويا ليلى ذكرياتها مو قويات مثلها ما فاركنك

درت وجهي عفته وراي واكف ورجعت للغرفة قاومت وما بجيت اجة وراي دخل نفس الجاكيت بايده

ما حجة شي ولا برر ولا اني جنت انتظر تبرير كلشي صار واضح

قيس من شافها رجعت لحياته رجع ضعف ومثل ما كال ثوب القوة الجان لابسه ويقاوم فراقها احترك بنار كلبه وصار رماد ..

ليلى ...

بعد هذا الموقف بايام جنت افتر ع روحي بالبيت تعبانة وافكر
شلون انهي هاي السالفة احس روحي مقيدة ومختنكة

اجت عيني ع التلفون اتصلت سألت عن ريحانة خالتي كالت وين بعدها ع وضعها تحتاج وقت يلا تتأقلم ويا هذا الوجع والالم

وفعلا تحتاج هواي وقت مو شوية .. نهيت المكالمة

شغلت التلفزيون وتمددت كباله طالع مسلسل عراقي ضليت اباوع للحلقة شوية وخلصت
غمضت عيني بملل ، هادي نايم هسة لو كاعد جان لعبت ويا

اخذت ملابسي وسبحت وطلعت مشطت بسرعة ورحت لفراشي تمددت ضليت اتكلب بفراشي
باوعت للساعة صارت ب11 وربع .. تأفأفت ورجعت غمضت عيني حاولت انام

بديت اغفى حسيت بصوت خطوات داخل البيت خطوات خفيفة بلعت ريگي بخوف وضليت مغمضة وهادي وراي نايم اني بجهة الباب

عيني ضلت تباوع من جوة الباب احس بخطوات احد بالبيت رفعت راسي اتصنت شوية ماكو شي
رجعت راسي وقريت المعوذات والفاتحة واستغفرت ربي
هاي اوهام تجيلي بسبب الخوف من التهديد

كل ما تصير حركة اتخيل هذا شخص راح يكتلنا

رجعت غمضت هدوء ماكو شي خفت اكوم اتفقد البيت بعد هو اذا دخل واحد يكتلنا راح يكتلنا لا محال

طلعت او ضليت بالغرفة .. ضليت مغمضة اتصنت ماكو اي شي عرفت هاي اوهام مو اكثر

كمت كلت خليني اطلع احسن مشيت فتحت الباب وباوعت هدوء .. مشيت للمطبخ وبس دخلت طفرت فارة من كدامي

:- يلعن بليسج عبالي واحد اجة يكتلنا متت خوف

حطيت ايدي محتارة هاي الفارة منين اجت شلون اصيدها واطلعها من البيت

فركت عيني نعسانة كلت ويا روحي خليني انام ومنا لباجر الله كريم

دخلت للغرفه تمددت بفراشي غفيت ..

شوية وحسيت بحركة يمي ع السرير عبالي حلم .. جفلت ويبس الدم بعروكي من حسيت بشخص تمدد يمي وحط ايد ع حلكي والايد الثانية خلاها جواي وجرني حيل لزكني بصدره ......للحكاية بقية

رأيكم بالقصة يهمني 🖤..

منو هذا الاجة ع ليلى؟

قبل لا تهجمون ادري البارت مو طويل 🤣 بس 4450 كلمة ما لحكت اوصله 5500 مثل كل مرة لان بيوم واحد مالحك اكتب هيج بارت 😁 وعدنا زوار ماشاءالله غدة وعشا ..وهسة عشا مادري سحور عليهم بالف عافية 🖤