رواية حمائم تخشى الطيران الفصل السادس وأربعون 46 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

وصلو البارت 1000 تعليق بين الفقرات وتصويت لطفاا 🖤

البارت غير مراجع ..

...

دخلت للغرفه تمددت بفراشي غفيت ..

شوية وحسيت بحركة يمي ع السرير عبالي حلم .. جفلت ويبس الدم بعروكي من حسيت بشخص تمدد يمي وحط ايد ع حلكي والايد الثانية خلاها جواي وجرني حيل لزكني بصدره ...

شهگت روحي رادت تطلع همس بصوت تعبان وانفاسه ضربت وجهي حارة
قيس :- اني قيس .. لتخافين

هدأت شوية غمضت عيني بتعب .. راد يوگف گلبي عبالي واحد راح يكتلنا دفعت ايده حيل جاي اكوم
نترت بهمس :- ما تستحي داخل ع بيتي بدون استأذان وجاي لغرفة النوم؟ وانت مو زلمة تعبان قبل ايام متخربط شجابك علي هسة وانت تدري اني وياك مثل النفط والشخاط كل ما نتقرب من بعض تگب النار

رجع حط ايده ع حلگي غمض عينه اريد اكوم لزمني حيل جارني من خصري اله
سكتت لحظات احس دگات گلبي عالية .. ما اريده يحس بضعفي يمه ما اريده يعرف اني لهسه تتخربط اوضاعي بقربه واتخردل

همس :- اسف خوفتچ هذا الحل الوحيد حتى اكون قريب منج واشم ريحتج واتشافى غير اني مريضچ ليلاي

مديت ايدي بعدت ايده والتفتت اباوع لهادي واني ابتعد عنه
:- عيب عليك راح يفز هادي شنو يكول من يشوفك وياي بهذا المنظر؟
جنت احجي بغضب ارجف

هو رد بهدوء :- عادي ابو جاي يشوف امه

طفرت بسرعه من الفراش
:- اذا عندك حجي وياي امشي بالصالة نحجي مو يم هادي نايم لا يفز ونتخزة كبال الطفل

جنت احجي واطلع حسيت بخطواته وراي استغربت هاي قوته وهو قبل ايام طريح الفراش مريض ما يكدر يتحرك

بس طلعت من الغرفة طلع وراي وجرني من خصري حيل صار ظهري بصدره خله وجهه بشعري
دفعت ايدينه لزمني بقوة وضل يقربني اكثر
قيس :- اتوسلچ ليلى فرصة وحدة كافي ذليتيني

ليلى :- انت الردت تنذل

سكت ما رد ضليت ادفع بأيدينه اريد احرر نفسي
:- وخر قيس وخر حرام عليك جاي تخنكني وتضايقني ليش هيج تسوي
فلتني ابتعدت عنه لميت شعري خليته ع صفحة وحجيت ويا بغضب واني رافعه صبعي بوجهه

:- تطلع منا وترجع لا اتصل ع بيت اهلك اكللهم تعالو اخذو ابنكم تخبل

مد ايده لزم ايدي الرافعتها بوجهه جرها حيل خلاها ع صدره
:- اي تخبلت هذا گلبي راح يوگف من وراج وعقلي عافني من عشگتچ .. ليلى .. سمعيني ليلى .. وفهميني
اني بدونچ ما اسوا شي مالي قيمة قيمتي تكمل يمج الا اكلج هيج .. ما احس روحي اكمل الا بيج بدونج ناقص هواي ومحد يسد هذا النقص

حطيت ايدي ع كلبي وجريت ايدي الثانية من ع صدره نبض گلبه كان سريع حسيت برجفته سرت لكل جسمي ابتعدت مسافة كعدت رجليني بايدات من الخوف والموقف هذا وحده يهد حيلي

تقرب مني كعد ع اركبه كبالي ومد ايدينه لزم ايديني حيل جرهن رفع كفوف ايديني باسهن ثبت عينه بعيني

ضليت ساكته ، بعدها رجعت روحي ليورا نزلت دمعتي وغمضت عيني بتعب وحجيت
:-شعندك جاي تضيف جرح زايد لجروحي .. القديمات لهسة ما طابن حرام عليك قيس

قيس :- اريد اطيبچ وتطيبيني

ليلى :- علتي تختلف عن علتك سيد ، اني صرت ما اشوفك من تعبر گبالي جروحي من حجيك علي ومعايرتك الي والخذلان الشفته منك

جروحي من روحي الباعت الشاريها وركضت حافية الحضنك

هز راسه مقهور عيونه حمر دم يرجف فكه كل مايريد ينطق ويسكت
اخير شي جر نفس وكال متحسر
:-والله حقچ واني غلطان بكل شي وجاي مستعد اعوضچ بس انطيني فرصة

هزيت راسي لا ودموعي تنزل رفع روحه كعد بصفي درت وجهي اباوعله لزم وجهي بكفوفه مسح دموعي بعدت راسي لزمه بأيدينه قربه اله

جمدت حركتي من حط شفايفه وباس عيوني
قيس :-لا تبچين دمعچ حرگ گلبي وعساه ما طفى
ما اريد ناره تطفى اريده يتعذب حتى يحس بنار گلبچ من خذلتج اني عشت العشتي انتي رجعتيها الي وحسيت بشعورج

ليلى :- انصحك وخر عني اني صرت بحر مال هموم ما افيدك
ارتخى وهمس :- اريد اغرگ بيچ ليلاي

دفعت ايدينه من وجهي :- اني هسة مو ليلاك .. ولا راح ارجع ليلاك صرت غريبة عنك والباقي بيناتنا هادي وبس

هز راسه خوش ..
سكت لم شفايفه للداخل يباوعلي بحيره
تحسرت وگتله بقهر اعاتبه ..

ليلى :- اقسم عليك بجدك رسول الله ما هزنك دموعي؟ ما هزتك رجفتي من توسلتك ما تطلگني؟

قيس :- روحي كلها اهتزت ومتت من ذيج اللحظة ليلى
ليلى :- اذا فراكي يهزك ويأذيك ليش عفتني؟ اذا تحبلك شخص ليش تهجره وتعوفه
انتَ وضعك مثل اليحب الله وما يصلي

بهت وجهه نصة ايده مشت لزمت ايدي حيل سحبتها بنتر
رفع عينه باوعلي محروگ گلبه مختنك
جر نفس رجف صوته ميل راسه وهمس
قيس :- ذبحني الندم

اباوعله ادرس شكله اشوف رجفته وتعبه
وجهه الباهت عيونه الجاحظة ضعف بدنه وحسرته ، نار كلبه الي لفحتني وحرگت روحي

رجل لم يكمل العشرينات حتى الان .. احتل الشيب شعره وغزت التجاعيد ملامحه واستوطنت النيران قلبه ..
اهلكه الفراق لا المرض
وذبحه الشوق

اصيب بداء ظن الطبيب انه يستطيع علاجه ببعض العقاقير .. لا يعلم ان دائه
بشر .. دائه عشق .. دائه ندم
ندم ع خسارة ليلاه ..

مسك يدها واخفض رأسه متوسلا بها طالبا منها ان تعود ..
اين تعود؟ فـ هو الان وطنا محتل
منزل فيه نزيل ..
لا بلـ روح تائها وجدت منزلا ، ظن هذا الصغير انه له
سكنه .. ليكتشف في ما بعد انه قد اضاع الطريق
وهجر منزله ليعود بعد سنين ف يجد ابوابه مغلقة
لا يمكن ان يفتحها مفتاح .. ف هي اغلقت الابواب ورمت المفاتيح في قاع بحرها
ولا تعرف الطريق اليها ..

بحسرة عاشق مشتاق قال ، والدموع شقت طريقها على وجنتيه
:- اسألچ بالله ما اشتاقيتي الي؟

رديت بصوت يرجف :- روحي ما تعرف تشتاق لليكسرها قيس

انت تريد رجعه واني صعب ارجعلك واخذت قراري خلينا نتطلق ونحط نهاية للبديناه اني وياك

عينه تجولت ع ملامحي وكانه ياخذ كفايته من النظر لبلاد تريد هجره .. ما يقبل يعترف بأنه هو من هجرها

لحظات من السكوت صوت حسراته واضطراب انفاسه مسموع
نطق يذكرني بشي
:- مرة كتلج حطت الحمامة .. ع سطوحنا
جنتي انتي الحمامة الحطيتي ع گلبي
وهسة گبالچ احس روحي طفل گوة متمسك بيج
حمامة بچف طفل .. گوة اريد احتفظ بيج رغم جنحانج ترفرف تريدين تطيرين بعيد عني

ليلى :- ما طول حاس اني اريد ابتعد عنك ليش جاي تطلب ارجع ..قيس شد روحك وصير زلمة
خليلك شوية كرامة لا تضل مرخص نفسك هيج
يمي تتوسل والله يعلم يم فاطمة شنو تسوي

جر ايده مني عقد حاجبه متألم هز راسه خوش
ونطق بضعف
:- تردين نتطلك؟ ما فكررتي تنطيني فرصة تضلين ع ذمتي مثلا فترة نرجع نتعرف لان احنه تغيرنا ليلى! كبرنا وكلشي بينه اختلف

ما اكذب عليج اذا اني جنت احترك كبال ليلى القديمة مرة .. صاير احترك كبال الجديدة مليون مرة

ليلى :- انتَ مو الي قيس عندك عائلة .. عندك زوجة واطفال روحلهم
قيس :- مليون مرة غيرج ما يسدن مكانج خاتون
نبع هن بس ما يرويني مثل ملوحة بحرچ

حجيت بهدوء :- طلكني قيس

هز راسه خوش
:- شوكت تردين الطلاك؟

بلعت ريكي بتفكير واني اباوعله حسيت كل حصونه انهدت وانهار بس ضل يقاوم ولازم روحه كوة
حجيت بهدوء :- تكدر باچر؟

هز راسه اي
:- بس امانة الله خليك انسان قوي لخاطر اولادك
اريدك سالم لخاطر هادي لا تأذي نفسك

غمض عينه گال بحسره وصوته رجف طلعت كلماته متقطعه
:- وحگ ذاك ابن البدوية احس الدنيا هسة طاحت ع رأسي

متت من القهر رجفت روحي ضلن بس دموعي ينزلن
گام من مكانه يرجف
وگال :- الج التردي باجر اطلكج اذا مستعدة
هزيت راسي وهمست :- ماعندي شي

كام يمشي ركضت ورا
:- شلون دخلت للبيت

جر المفتاح من الباب واتقرب
:-اخذت نسخة منه من اشتريت البيت بس بعد ما تلزمني راح تحرمين علي مثل ما حرمت علي العافية والراحة وضحكة الروح
كون الروح تلوذ وترجع لربها بس هو يرحم باليحبهم واليحبونه

اخذت المفتاح ضليت واكفة شفته فتح الباب كال
:- تعاي قفلي

جاي يطلع اختل توازنه وكع شهكت وركضت علي لگيته ساند روحه ع اركبه وكفوفه سحبته من كتفه نتر
:- دخلي انتي بدون حجاااب

:- محد بالشارع ولا طير تعال فوت اني اخابرهم يجونك

جريته من كتفه وكع ع وركه ليورا ضعيف صاير اضعف من الطفل استغربت قوته الي جرني بيها جوة

لم رجلينه لصدره ورفع رأسه للسما دموعه نزلت ع وجهه بضعف وبچة بشهگه
صاح بصوت رجفني وهز كياني بكلمات طلعت بغصه
قيس :- ربي عينك عليه راااح اموت ربي مد ايدك على گلبي العليل

ضليت ابجي جريته حيل وهمست
:- بس كوم فوت ضل يمي الله عليك كوم

ساعدني وكف ع حيله دخلته للبيت ذب روحه ع القنفة جسمه كله يرجف الزلمة مريض موات
ركضت قفلت الباب ورجعت اتصل ع بيتهم محد يجاوب نص ليل والناس نايمه

رجعت السماعة حطيت ايدي ع خاصرتي محتارة وباوعتله
مغمص جفنة مكرمش وايده مخليها ع صدره ترجف حيل وصدره يصعد وينزل بسرعه

تقربت حجيت بهدوء :- نام يمنا راح اخليلك فراش لو فوت نام يم هادي

ضل ساكت لحظات وفتح عينه
:- تذكرين من دزيتج لعمامج طلبتي مني طلب اخير قبل لا ننفصل ونفذته هذا دين اريد ترجعينه الي

سكتت محتارة شوية وهزيت راسي اي
:- طلبتي مني احضنج هسة اني اريد منج بس هاي الليلة تنامين بحضني يمي اريد اشبع من ريحتچ الراح انحرم منها طول العمر اريد اشبع منج ولو انتي المثلج ما ينشبع منها!!!

ضليت ساكته ما اقبل ع روحي هيج شي
بس من شفت انهياره ورجفته هزيت راسي اي
مشيت جبت فراش خليته بالغرفة الثانية جانت فارغة وساعدته يكوم للفراش تمدد ضليت واكفة محتارة ومستحية جسمي كله يرجف

فتح ايده وهمس :- تعاي ليش ما تجين اريد اطول وكت يمج وما اريد اضيع ولا دقيقة باخر ليلة وانتي ع ذمتي

ليلى :- اهلك شلون خاف ما يلگونك ويتخبلون

غمض عينه تعبان وبدون وعي همس
:- ما يهمني احد بهاي اللحظة غيرج تعاي ليلى الله عليج بردي ناري راح اموت احتركت

ضليت ارجف لميت ايديني اداري روحي راح انهار
حجيت بخوف
:- امانة ما تتقربلي بس تحضني
هز راسه اي :- ما تشوفيني عليل شلون اتقربلج؟ تعالي هاي اخر ليلة وانتي حليلتي

هاي اخر ليلة وانتي ليلاي وخاتونتي

اريد اشبع من ريحتج وحضنج تعاي ليلاي ..

بخجل تقربت كعدت ع الفراش وتمددت جامدة خليت راسي ع ايده جسمي كله رجف غمضت عيني ودمعتي نزلت ع ايده دار علي لمني بالايد الثانية حضني لصدره وثنينه انفجرنا بچي
صوت شهگاتنا رجف حيطان الغرفه

ورجفت ارواحنا زلزلت الشوك النايم بالصدور وفززته

خليت راسي بصدره ابجي من حسرتي وقهري وشوكي وكل شي اني جنت اعيش كل المشاعر ويا بنفس اللحظة اريده وما اريده وهذا جان اصعب شعور

عيشني كل المشاعر بنفس اللحظة وكل الفصول
بردت واحتريت ودفيت ..

شال ايده الثانية من ورا ظهري لزم وجهي رفعه ونصة راسه حط جبينه ع جبيني وانفاسه نار تضرب وجهي غمضت عيوني كلها دموع مسح دموعي بأبهامه
وحط شفايفه ع عيوني باسهن ، وباس رموشي وخدودي

ضليت ساكته وانفاسي ترجف من القهر وبس ارمش تنزل دموعي
حسيت حروره انفاسه صارت قريبة كلش رفعت ايدي من صدره ترجف خليت اصابعي ع شفايفه باس اصابعي ولزمي ايدي ضل يبوس باصابعي وحط ايدي ع صدره مرة ثانية

همست :- لا تتقرب اكثر
تحسر ضل ثابت بمكانه لحظات فتحت عيني شفته مغمض همس بعدها
:- بس ارويني من عطش شفتچ عطشانچ

ضليت ارجف قرب رأسه غمضت عيني ما اعرف شنو صارلي بس ما ردته يتقرب ويشوف سكوتي قبول

حط شفته ع شفتي حسيت بناره حرگتني
روحي راحت ضليت ما احس بروحي جسمي باد
بس احس بشفايفه تتنقل ع شفتي

رفع رأسه وخله شفته ع شفتي بدون ما يبوسني وبعدها نصة رأسه خلاه بركبتي شمني حيل من نحري وباسه بوسه خفيفه

ضل يشم ركبتي ويبوسها نصه رأسه وبوجهه بعد ثوبي من يم صدري جريت ايدي كبل غطيت بيها صدري ورفعت الثوب
لزم ايدي بعدها وما اعرف منين اجتله هاي القوة
خله راسه ع صدري شوية ورفع راسه لركبتي ضل يتنفس بسرعة

حضني حيل وراسه ضل بركبتي مغمضة وهو ما ادري بي نايم لو كاعد .. بس رجفته وانفاسه حارات

خليت ايدي ع راسه من ورا تخللت اصابعي بين خصلات شعره وهمست
:- نايم؟

ما رد توقعت نايم كلت بحسره :- انت الضيعتني قيس ، قيس خسرت ليلاك

همس وصوته فززني :- خسرت روحي مو ليلاي بيتچ جان گلبي واحترگ بيتچ

ليلى :- طفي نار گلبك بدمي ولا تگلي رجعيلي

قيس :- شنو انطيچ وترجعيلي شنو شرطچ؟ تردين تذليني يلا ترجعين؟ والله انذليت صارو يگولون قيس راح يموته العشگ

ليلى :- العشگ ما يموتله بشر قيس

قيس :- لا موتني .. كتبت وصيتي ليلى بس اني ميت من زمااان من يوم دزيتج لعمامج وقررت اطلگچ

ليلى :- ما بأيدي شي عليك قيس مشكلتك عفتني بوكت جنت محتاجتك بي عفتني بوكت ما جان الي بالدنيا غيرك وهسة من وكفت ع رجليني وصرت قوية تريد ارجعلك؟

الانسان يبين بالمواقف وانت بينت تخاف من الملامة تخاف من غضب اهلك تخاف من نسبي تخاف لا يجي يوم واطلع مثل خالتي وعندك هواي مخاوف خلتك بأصعب ظرف مريت بي عفتني
خوفك مشكلتك وضعفك

قيس :- كل شي تگولينه حقچ وصحيح

ليلى :- بعدك ما كملت 30 سنة وشيبت .. شيبك گلبك وقرارتك الغلط
قيس :- هذا الشيب حچي بگلبي وخضر ع رأسي

سكتت جريت نفس .. هو ما حجة شي بعد غمضت عيني وبالي يم هادي اخاف يفز خايف لو يجي يدخل علينا ويشوفنا هيج شكد عيب وفشلة وخزي

غمضت عيوني بعد ما حسيت بشي تعبت من البجي والحسرات ونمت ..

كعدت ورا فترة ع صوت الباب ينفتح فتحت عيني قيس حاضني ومخلي رأسه بركبتي رفعت راسي شفت هادي عيونه حمر يدور علي من شافني وشاف ابو عرفه اجة يركض نام من الصفحة الثانية وحضني
همس :- بابا هنا نايم واني عبالي عفتيني ورحتي مثله

همست :- لا ما عفتك حبيبي
خليته بحضني ابو نايم من جهة حاضني وراسه بركبتي وهادي حاضني من جهة ثانية ومخلي ايده ع بطني

همس خجلان :- يعني بابا عادي يشبگچ مثلي؟

غطيت بهدومي من ابني بس جاوبته :- اي عادي غير بابا واني زوجته يصير
بس اذا تطلگنا مايصير
جنت احجي ع كيف اخاف يفز قيس

غمض هادي ما رد ورجع غفى واني بنصهم بالله هسة شلون ورطة شلون اكوم
حالي من حالها غمضت عيني بس بعد ماكو طار النوم من عيني ، كوة يلا رجعت غفيت

....

فاطمة ..

:- الله اكبر .. الله اكبر

رفعت راسي ع صوت الاذان شمرت الغطة وجريت دشداشتي البسها كمت ع كيفي امشي للحمام
كملت وغسلت وتوضيت ورجعت للغرفه

شغلت الاضوية واجيت لفراش قيس اكعده ماكو ومن كمت ضلمه صارت عيني ع باب الحمام
اكيد جاي يغسل ويتوضأ ويمكن نزل من اني بالحمام
اكيد اشتاق للصلاة ويا السادة سوية

اخذت سجادتي بأيدي ولبست احرامي ونزلت
لكيتهن كلهن ملتمات صبحت عليهن بالخير و وگفت وياهن اصلي صلاتي

من كملت التفتت ع صوت خالي بالمطبخ واكف يحجي ويا مصطفى
:- اصعد لأخوك قيس حاول تنزله يابة ع الاقل يتمدد يمنه واحنه نقرأ قرآن ترتاح نفسيته

ضليت صافنة عليهم طبكت المصحف وكمت بسرعة سبقت مصطفى بالصعود توجهت الانظار كلها الي

فتحت باب الغرفة وفتت مشيت للحمام فتحت الباب ما شفته
طلعت ركضت لغرفته ويا ليلى فتحت الباب كان مفتوح الغرفة ظلمة فتحت الضوة اباوع بيها ما موجود

نزلت ركض ارجف خالي ومصطفى وخالتي واكفين يحجون بهدوء من شافوني نزلت سكتو
حطيت ايدي ع محجر الدرج الهث وحجيت

:- اني من رحت للحمام وتوضيت رجعت عبالي قيس بحمام الغرفه يتوضأ لو نازل يمكم بس كلامك فتح عيوني وخلاني اصعد اشوفه ما موجود

مصطفى كال بسرعه :- خاف بغرفة ليلى

هزيت راسي لا ودموعي نزلن
:- دورتها وعلي ما موجود بيها والله عبالي نازل يمكم

سيد عبد الرحمن :- شسالفة خفتو ترة مو طفل ويضيع صعدي خالي دوري زين بالحمامات خاف احتاج يتكرم روحي شوفي وانتم جوة شوفو الحمامات طلعو للحديقة وين يروح

كعدت ع الدرج منهارة اعصابي ضليت ارجف
ما اعرف شنو بيه نزل ضغطي وفجأة انكلبت

ركضن البنات ذبن علي ماي ونزلني من الدرج كلت لا هاي هيه طلع وما رجع يمكن انخطف مثل مؤمن

والولد يفترون بالبيت يدورونه خافو يكون متخربط ومحد حاس بي

دخل هاشم يركض ويحجي
:- يابة باب البيت الجبير مفتوح يمكن قيس طالع

خالتي شهكت وصاحت :- ياربي احفظ وليدي وين راح شنو اجة براسه وخلاه يطلع بهيج وكت خافنه فقد عقله

خالي رفع ايدينه يهديهم :- صلو على محمد وآل محمد ذكرو الله
مصطفى هاشم واحد منكم يخابر ع بيت ليلى بسرعة

مصطفى :- خاف نفجع لبنية ويطلع مو يمها

سميرة :- وين يروح لعد؟ خاف طلع لمؤمن سودة علي يحب يصلي ورا صلاة الجماعة

سيد عبد الرحمن :- الجامع مسدود علوية
سميرة :- يصلي ويا بالبيت خابر بيت عمك

عبد الرحمن :- لا .. اتصل اول شي ع ليلى وشوفه يمكن رايح لبيتها لو نازل للصلاة جان شفناه مو كاعدين اني وياج علوية؟!

هزت راسها خلت ايدها ع حلكها خايفة

راح هاشم يتصل ، فترة وشخص رد علي

اول ما سمع الصوت صاح بغضب يصاحبه اهتمام وخوف
:- قيس بشرفك هاي سوايه تسويها وكعت گلوبنا من الخوف

سكت شوية يسمعه واني حسيت كلبي اتكطع ضليت ارجف ودموعي تنزل
هاشم :- اذا تريد تطلع انطي واحد بينه خبر والله الف فكرة اجت برؤسنا من الخوف عليك
شلونك انت؟ زين لو متخربط شو صوتك ماكو

هز راسه ورد :- هاي هيه جاي عليك بالسيارة

نهى الاتصال والتفت :- رايح لبيت ليلى بنص الليل ويكلي تعال اخذني راح اموت

ضلو كلهم ساكتين ، ركض اخذ السويج مال سيارة البيت من المعرض وطلع ولحگه مرتضى

خالي ضرب ايد بأيد متحسف وگال :- ضاع الولد بعد شنو يرجعه؟

مصطفى :- لا حول ولا قوة الا بالله اشك بعقله بدأ يضيع
حجة بصوت ناصي وخالي التفت باوعله ولم شفته هز راسه متحسف

ضليت صافنة من طلعو حجيت :- معقولة كلكم صرتو تشوفون قيس صار مجنون بسبب عشق ليلى؟ جنت اتوقع بس اني شايفة هذا الشي وملاحظته

حنان :- مابي شي زلمة مريض وعنده مشكله تنحل ويرجع مثل الورد

ضليت انتظر شوية واجو قيس وهاشم وخالي والولد دخلو جوة لميت احرامي بايدي متوجعه صارت عندي نغزات بگلبي

خصوصا من شفته تعبان كلش كعده هاشم وخالي ضل يعاتبه

:- عيب بابا قيس يعني انت جبير وسيد ومعمم تروح للمرة بنص الليل بدون ما تكول ولا تعلن رجعتكم

فرك صدره وهز راسه لا
:- ما رجعنا حجينا سوية ونهينه الموضوع ولو اني عفتها نايمة بس مو مشكلة كم ساعة واتصلو بيها بلغوها الساعة بال4 العصر نروحلها ونتطلك .. ونكمل طلاك المحكمة باسرع وكت حتى ترتاح

حجيت بهدوء طلع صوتي مختنك
:- شوكت رحت ليش تطلع من يمي بدون ماتكول اجة كلبي يوكف من خوفي عليك

قيس :- عذريني علوية بس ما حسيت ع روحي غير واكف كبال بيتها

عبد الرحمن :- هسة كلش انتهيتو؟ ماكو امل
هز راسه اي
وغمض ارتجى ع القنفة متأذي
:- ليش هاي الانانية بيناتكم طفل اسمع قيس احنه مانقبل سيد هادي يكبر بحضن زلمة غريب

فك عينه باوع لخالي راد يحجي رجف وسكت ما كال شي
هاشم :- هسة خليهم ع مايهم بمرور الوكت يمكن يتغير رأيهم ويرجعون والعلوية قابلة صحيح؟

باوعلي لان اني كلت لخالي واهلي اذا رجعو عادي
هزيت راسي اي ..

مصطفى :- يمكن من تطلگها يشفى جرحها وتكدرون تتفاهمون بعدين
هز راسه لا :- انتهينا مالنا رجعة بعد

مرتضى كال بغضب :- اي يبس راسك مثل من عفتها بأيران وحيدة وتالي ماوكع بيها غيرك ثق بنية الف من يتمناها تتزوج وتروح بحضن واحد غريب وقوي ويصونها ويحفظ كرامتها ويعوضها عن كل شي خسرته يمك ويعوض دمعها والمها و وحدتها وتنساك

فك عينه مصدوم يباوع لمرتضى مصطفى خزره وخالتي حجت بخوف
:- اسكت يمة بيناتهم يحلونها

رفع ايده يعبر عن غضبه والمه
:- بنت الناس مو لعبة حرام عليه هاي يتيمة كسرها ويبس رأسه وعافها وكل شي جاي يصير بي حوبتها الله يعلم شكد بجت عليك وبجت من ألمك ومن وحدتها وغربتها
الله يعلم شنو صار بيها من رجعت وحيدة من ايران للعراق ونلزمت بالاهوار وشنو عانت بالسجن كله بسببه ضيع بنت الناس وكل شي جاي يعيشه قيس هو دين وجاي يرجعله

دفعه مصطفى من صدره للمطبخ مرتضى كلش جان مقهور ع ليلى ومختنك من قيس لان عافها بالغربة وما قبل يتفاهم وياها ويرجعها

ضل قيس ساكت كلت هسة يتخربط ويموت بس هز راسه وكام من مكانه محني الظهر راد يساعده هاشم رفعله ايده لا
وراح صعد وحده وهاشم ورا خايف علي لا يتخربط وخالتي ورا هاشم تبجي وشفايفها تتحرك تلهج بالدعاء اله وتفرك ايد بأيد خايفه من القادم

ومثل ما كال خالي قبل حب ليلى مرض بگلب سيد قيس مرض غير قابل للشفاء ..

...

ريحانة ..

گاعدة يم خالة نسيمة متأذية وروحي تلوب ع ابني ومنظرو ما يفارگ عيني ابد
اهجس روحي تطلع كل ليلة واتمنى اكطع نحرو للنهر
لغرگ بي ابني وموتو ..

كل ما يصير كبالي الماي ترجف روحي واكول هذا الماي غرك بي ابني ومات وما اشتهي اشربو
والله وحدو يعلم غير ابني كم روح بي

مرت الايام صعبة بس ما قصرت خالة نسيمة وياي ابد وحاولت تغيرلي جو بس اني ما اكدر روحي مختنكة

كلتلي وهي تحاول تحجيني
:- اخذج يم ليلى هناك تضلين يمها يومين هي شابه وانتي شابه تفهمينها وتفهمج واخذج ازورج ابو الجوادين شتكولين

ضليت ساكتة ما يطلع مني رد
كالت :- اذا تضلين هيج تتخبلين ريحانة تفقدين عقلج فتحي عيونج حبيبتي وقوي گلبج واني وياج

باوعتلها مقهورة و وكعت دموعي :- خالة كلبي نار ع ابني شلونو بالكبر هساع اهجس روحي اني مدفونه بمكانو اهجس جبل كاعد ع صدري وخانكني

نسيمة :- طير بالجنة يمكن امج اشتاقتلج والله اخذ محمد يمها من ريحتج

ريحانة :- امي ضيعت الجنة خالة لا تضحكين علي بكلامج انتحرت

نسيمة :- لا الله ارحم الرحمين وامج فقدت عقلها بأخر يوم والله السوته بدون وعي مثل المجنونه صارت

ريحانة :- امي وابني ماتو وماعندي ابو مثل البنات اروحلو اذب حزني بحضنو واشكيلو همي

بجيت متوجعه كالت وهي تطبطب علي
:- اني يمج وليلو يمج خليني اخذج الها شوية بلكي روحج ترتاح

هزيت راسي اي لان ضلت تلح وياي واني من كد تعبي اي واحد يلح وياي بشي هسة مستعدة اكلو اي بس كون يبطل حجي

ساعدتني كومتني كعدتني ع كرويته خشب وراحت جابتلي ملابس ساعدتني ابدل
لبستني جبة وعباية وهي بدلت واخذتني لبيت ليلو

جنت طول الطريق ساكته وعيني تباوع للشارع بس بالي مو يمه ابد يم وليدي
باوعت لخالة نسيمة وحجيت بصوت ناصي
:- منين اجيب الثار واني ما اعرفهم ملثمين

كضبت ايدي وكالت :- الله ينتقم منهم حبيبتي سلميهم للواحد الاحد ياخذ حقج منهم مربع

ريحانة :- حسابي وياهم هناك يم رب العالمين اريدو

هزت راسها اي

درت وجهي للطريق مرة ثانية غمضت عيني حتى ما ابجي وانهار هجست ايد ع رجلي تلكزني فتحت ادحك منو
نسيمة :- وصلنا نزلي
هزيت راسي فتحت الباب ونزلت بصعوبة جسمي كله مكسر لان ما اكوم من الفراش

ضليت واكفة بمكاني اجت اخذتني من ايدي دكت الباب فتحتو ليلى شافتنا تفاجئت الدنيا ظهر سلمنا عليها ودخلتنا جوة

جانت مو طبيعية وعيونها مورمات مشيت كبل تمددت ع القنفة بالصالة لان روحي تا تطلع من التعب والالم

نسيمة :- ها تمددتي احنه نريد نطلعج من حالتج ونكومج من الفراش ترجعين تتمددين هنا

ريحانة :- هينة احسن ادحك وجوه هواي بس ما اكدر اكعد ظهري تا يوجعني

نسيمة :- كد ما متمددة كعدي يلا كعدي واحجي شاركينا الحديث سمعي اصوات عالم وشوفي عالم
حتى تبدين تتأقلمين

كعدت ساعدتني ليلو ارتجيت وضليت اباوع عليهن نسيمة سألت ليلى بخوف
:- حالج مو طبيعي شبيج ولج

ليلى ترددت شوية وحجت ضلت تقص عليها الصار بالليل ودموعها تجري
نسيمة :- واهله عرفو هو يمج

ليلى :- اي من فزيت ما لكيته خفت علي خابرتهم وحاجتني امه كالت راجع الفجر هاشم جايبه و ع اساس مخابرين ع بيتي ما اعرف شلون ما فهمت جنت ارجف ما اعرف شبيه وبعدها كلتلي العصر يجي ويطلكج قيس وافق يطلك خالة

نسيمة دحكت عليها بتفكير مدت ايدها خلتها فوك ايد ليلى وكلتلها
:- تردين ترجعيله؟

هزت راسها لا وانفجرت بجي
:- موقف البارحة رجعني لنقطة الصفر رجعت احس بالغربة والوحدة والالم خالة بس ما اريده بسببه عشت هاي المشاعر الحقيرة مرتين

نسيمة ردت معاتبة :- شدعوة كل هاي القسوة يوم انطي فرصة اله ولروحچ يمكن گلبج يحن وتشوفين ويا الراحة

هزت راسها لا بقوة متخبلة وصرخت :- اموووووت والله امووووت اذا رجعتله يموتني القهررررر انقهررر ع روحي الضاعت بحبه واموووت غيرة من ضررررتي واضل اكل بروحي اكل

نسيمة :- بكيفج محد جابرج يوم تردين الطلاك تطلكي بس ما انطيتي خبر لهادي يجي غير ابن عمج

هزت راسها لا :- ع المحكمة انطي خبر يحضر وياي

هزت راسها اي ودارت تدحكلي
:- جبتج ترتاحين تالي لكينا القهر كدامنا سباق

ليلى :- عذروني بس شسوي القهر كاتلني

ريحانة :- عادي اليسمع مصايب الناس تهون علي مصيبته

ليلى :- داده انتي مصيبتج جبيرة بس الله يختبرج ويختبر قوتج والعوض موجود وان شاءالله ساعته قريبة

هزيت راسي وهمست ان شاءالله

ليلى :- رايحة البس عبايتي اروح للمطعم قريب اجيب منه غدة هادي مشتهي كباب
همزين ما اخذته وطلعت وضليتن واكفات بالباب محد يفتح الجن

نسيمة :- دليني اني اروح

كامت وهي تأشرلها تكعد :- ضلي اني اروح بس هادي بالغرفة يلعب راح ابوك روحي بوك واطلع ماريده يحس خاف يلح حتى اخذه واخاف علي

نسيمة هزت راسها وفركت كصتها دايخة تحسرت وكالت
شلون دنيا عوجة وتمرض لا هلا كون واحد يموت ويفتك

سكتنا ثنينة طلعت ليلى ضامه عبايتها جوة ابطها ولبست جواريبها بسرعة وطلعت من البيت

نسيمة :- البيت بيتج اخذي راحتچ ريحانة نزعي الجبة وارتاحي

هزيت راسي نزعت الجبة وكمت للمطبخ شربت ماي عطشانة بس كل ما يدخل الماي لحلكي اشم بي ريحة ابني وابجي

مسحت دموعي بسرعة بطرف شالي وغسلت بحوض المواعين
حديقتها حلوة صغيرة وبيها وردات ملونات شكلها يفتح النفس طلعت جانت مخلية مرجوحة حديد بالطارمة كبال الحديقة كعدت بيها ادحك للزرع
واتخيل محمد يمي وتا نلعب اني ويا هينة نطفر واركض ورا ويركض ورا

رجعن دموعي نزلن شكلها عيني ما ناوية تبطل دمع ضليت اتحسر وادحك واتخيلو يمي

اندك باب بيتها ضليت ادحك من جوة الباب رجلين رجال لابس شحاطة جلد وانتظر خالة تطلع تفتحه ماكو
رجع اندك مرة ثانية ما طلعت مسحت وجهي حيل وكمت ع حيلي فتحته وصرت كباله

شاب رفع راسه لابس دشداشة دحك علي بسرعة دار وجهو وكال
هاشم :- السلام عليكم اختي .. وين ام هادي؟

ريحانة :- عليكم السلام .. راحت تجيب غدة من المطعم ما رجعت لسه

هاشم :- عذريني خوية اني هاشم حماها انتي من قرابتها؟ خالتها هنا

ريحانة :- اي خالتها هينه هساع اصيحلها تفضل اذا حماها

هز راسه وهو ناطيني ظهرو التفت يريد يدخل بعدني ع وكفتي رفع عينو وكعت بعيني عقد حاجبو مستغرب ونصة بسرعة
هاشم :- شلون ادخل خوية سويلي مجال

ريحانة :- اول شي احلف انت حماها خاف زلمة غريب وجاي تذبحنا

ضحك تك خد ودار وجهو عني يضحك ضل بصوت عالي
عقدت حاجبي ونترت :- ما كلت شي يضحك عيب عليك تا تضحك علي الدنيا تخوف شلون ما نخاف بعد؟

هاشم وهو يضحك :-لو اريد اكتلج لو اذبحج ما انتظر ادخل للبيت لان انتي فتحتيلي الباب
خوية الله يستر عليج صيحيلي خالتها محتاجها ضروري

ريحانة :- اي ضل برة لا تدخل للبيت

سديت الباب ومشيت للبيت صحت الها طلعت وطلعت وراها وكفت ورا الباب
فتحت الباب سلمو ع بعض طلبت منه يدخل رفض
ضل يحجي وياها ع الباب وكللها قيس راح يموت مايكدر يفاركها ما تحجين وياها بلكي بيها امل

مديت راسي من ورا الباب ورديت قبل لا تحجي بغضب :- كسرو لگلبها واذاها وتردوها ترجع كل واحد يفكر بنفسو ومصلحتو وبس ما تهمكم مشاعر البنية

رفع طرف حاجبو وعينو وكعت بعيني نصة بساع
وكال :- هي هم مصلحتها ترجعله لان بيناتهم طفل حرام يضيع
ريحانة :- الولد مايضيع بدون ابو يضيع بدون امو الام عدها مقدرة تصير ام واب بنفس الوكت ماهي بحاجتو ولا تريد ترجعلو لا تلحون!

رفع عيونه معصب وكال :- وانتي شنو دخلج هسة اني جاي احجي وياج لو ويا خالة نسيمة

ريحانة :- لا تنتر علي خوش

هاشم :- لا والله ليش منو حضرتج صارلج ساعة تصيحين علي وترديني الزم اعصابي

ريحانة :- اي تكضب اعصابك غصبا عليك اني مرة انت زلمة

فرك وجهو يستغفر وخالة نسيمة تكرص بيه وتكول دخلي جوة

ضليت مادة راسي وهي تگلو
:- والله حجيت وياها ميبسة راسها شسويلها ماتكلي يا خالة هي هم مجروحه

هاشم :- اذا نيتها تعوفه هسة علمود تجرحه وتعلمه درس ف اني اكلج ماكو داعي تعلم الدرس كلش زين وما يحتاج بعد

نسيمة :- اعرف بي مريض سودة علي بس هي هم قاسية وشايله بكلبها وماتريد تتطلك وترجع هي كلش ناهية الموضوع ومقررة

هاشم :- بعد اني اجيت احجي وياها واطلب منها تفكر احجي وياها خالة الج اجر عند الله اذا جبرتي كلب هذا المسكين

والله نار علي كلوبنا ماجاي تطفى البيت كله داخل انذار وحتى ضل يوصي لا يموت وهو بحسرة رجعتها

نسيمة :- عمره طويل

هزيت حلگي ما عاجبني هو كبل باوعلي انتبه وخزرني

رفعت طرف حاجبي هو ودع خالة وراح
كالتلي :- عيب هذا هاشم درة مال الله ومحترم ما يصير هيج تحجين ويا
ريحانة :- حرگ كلبي يريد مصلحة اخو ع حساب كرامة ليلى هي غير موتت روحها من كلتي رجعي الو ماتريدو كوة هي؟ خو ما كوة

نسيمة :- اي مع هذا هاشم ما يستاهل هيج تحجين ويا الولد ذهب صافي

هزيت راسي اي وكلبت عيوني ما عاجبني ..

اجت ليلى ورا فترة تلهث كعدت وكالت
انطني ماي

انطتها خالة ماي وضلت تصفن ما حجت شي مادري شنو صاير وياها

ليلى :- راجعة من المطعم وجاي امشي والمح ابو السيارة الملثم تذكرت حجي الشيهانة من كالت رجلها يريد مواصفات السيارة ورقمها حفظت الرقم زين وعيوني ضلت تراقب شكلة ردت احفظ شي منه

بس عيونه يخوفن ضليت امشي خايفه نزل لثامه وتقرب مني خفف كلش ونزل الجامة وصاح
:- اوصلج؟

حجيت بهدوء واني الف روحي بالعباية :- لا خوية مشكور روح الله يرزقك

:- بلاش

:- لا ما اريد الله يرزقك

ضحك مستهزأ وكال :- من فوك مبركعة ومن جوة مطركعة

وشخط السيارة وطلع ، بس ضليت انكت يخوف صوته وشكله مألوف بس ماجاي اذكر وين شايفته
عيونه مثل الذيب يخوفن ومن يحطهن علي ارعش

خليت غدة تغدينا شوية جيتهن يمي طلعتني من الحزن وحتى ريحانة شوية سولفت اندمجت وضلت تشرح موقفها ويا هاشم

ضحكت عليها وكتلها لج لا هاشم خطية ليش هيج حاجية ويا والله عيب
ريحانة :- يول العيب بالجيب

ليلى :- يمة منج
اخذت لبن شربت ونزلت الكلاص تباوعلي قلصت عيونها وكالت
:- اذا ترجعيلو ورا ما رزلت اخو والله اگصبچ عجل اني اعارك وراج وانتي ترجعين

هزيت راسي لا
:- ما ارجع
ريحانة :- ولو انتي مبينه بوسة وحضن طحتي خدرانة باجر الكاع راجعتلو واكضبلج حديدة واطيحلچ ركع ع راسج اموتج بمكانج

ضليت اضحك شركت بالاكل غميتها :- طاح حظج عمي ما ارجع عزة وطين شكد عيييب ذبت بحضنه كلش

نسيمة تنهدت وارتخت ملامحها
:-هو الحضن يرخي الاعصاب اي سولفيلي شسوالج بعد همزين هادي خلص

ليلى :- ضل يبوس بيه

نسيمة :- وما ذابت روحج وخليتي يكمل

هزيت راسي لا :- عمت عيني غير حضن كوة انطيته كلت راح يموت ومن باسني ما راضية خفت ادفعه وينقهر ويموت بحضني كلت وين انطي وجهي

نسيمة غمتني :- امداج هاي كون اني الا الصبح ثنينه نسبح

ليلى :- بالله انتي كلش
يلا لا تفهن خلينا نكمل وارتب البيت يردون يجون نتطلك

ضليت اكل بسرعة كمت سويت جاي وخالتي لمت شربنا جاي ونظفت البيت وبدلت حضرت عبايتي

اجو كم نفر وخالتي سلمت عليهم بعبايتها وضلت تحجي وياهم شوية محاولات اقناع كلها انتهت بالفشل

دزو علي لبست عبايتي وكلبي يدك حيل دخلت سلمت وكعدت ع صفحة
شفت سيد معمم وياهم ماعرفه ضل يحجي ويحاول يرجعنا بس مل وسكت من شافني قافلة

وقيس باوعتله منصي بس جاي مرتب جلباته وعبايته وعمامته
وبأيده سبحته ، جان قريب مني كاعد وما بيناتنا احد رفع راسه حاجاني ضل يوصيني ع هادي ويوصيني كدامهم ما اخلي يكطع منهم

كتله ان شاءالله
بأيده محبس حجرته جبيرة نزعه وهم ملتهين يحجون ويا خالتي والسيد الغريب مد ايده خلاه بحضني

ما عرفت قصده شنو بس لزمته بأيدي وضميت ايديني جوة العباية

وبعدها تطلگنا اني وقيس طلاك شرعي .. وعافو البيت وطلعو مقهورين

هادي طلع وياهم وراد يروح اخذه مرتضى عمه ويا

رفعت المحبس باوعتله بتفكير فضي وبي حجر كبير ابيض نزلت دموعي بحسرة وضغطته حيل بأيدي خليته ع الميز وطلعت للحديقة مختنگة ..

ريحانة وخالتي باتن يمي يصبرن علي عبالهن ابجي لان احبه ما يدرن ابجي بدون ما افهم مشاعري ... وبدون ما افهم وجعي حتى

....

الشيهانة ..

رحلة تربية طفل جان بعيد عني مو سهلة صعبة كلش
تعبت كلش وجنت مخليه كل طاقتي اله واحاول ويا بكل الطرق بس اريد اكسبه بس صعب
حضرتله غرفته تخبل سويتها وكل شي يطلبه اگلله حاضر تتدلل

يومية مخليته بالسيارة وماخذته لمكان حلو اونسه واغيرله جو وهو شوية يلين وشوية يقسى

لهناك وكال بدون ما يذكر لا اسمي ولا كلمة يمة
:- اكلج عادي نروح لبيت هادي ابي اشوفه والعب معاه

اني ما صدكت طلب مني نروح
كتله تدلل حبيبي نروحلهم بس لازم ننطيهم خبر خاف ما موجودين

خابرت عليها انطيتها خبر كالت هلا بيكم
اجيته لزمته من وجهه بوست خدوده
:- راح نروح حبيبي لبيت خاله ليلى ونشوف هادي ونلعب ويا

هز راسه ابتسم كال مشكورة
:- تدلل حبيبي

صعدت ركض لجبران طبيت علي للغرفة مسوية مداهمه بيده جهاز مبايل سده بسرعه وخلاه ع الميز عقدت حاحبي مستغربة وهو كذلك

فرك كصته وكال :- شنو السالفة حياتي مداهمه؟
وكفتي كلبي

سديت الباب ومشيت اله :- شنو عندك وضعك يخوف جبران سرني اني مو زوجتك

مسح وجهه متضايق كلش وكال بضوجة
:- لكيت مهيب وكلبي نار منه كلش مضوجني الموضوع

رفعت رجليني ثنينهن وحجيت بلهفة :- صدك لكيته بشرفك
جبران :- مو كلنالج تواصلنا ويا اقاربهم كلهم ومن واحد لواحد وصلت اله مهيب صعب شعلان جنتي مأمنته يم صكر وانطاه الج بسهولة بس مهيب شلون
هسة لو الشغلة بالعراق مكدور عليها اخذهن منه واجيبهن احطهن بحضنج بس الشغلة برة العراق

تحسر وكمل :- ويمكن هن نفسهن ما يردنج

خنكتني العبرة بجيت وخليت راسي ع صدره حضني حيل يمسح ع ظهري
:- ليش ما يردني جبران اني امهن
:- ما يعرفنج ومهيب صعب حبيبتي البنات يمكن مو نصيبج من هاي الدنيا وشعلان راح يعوضج

ضليت ابجي بحرگه حجيت بغصه :- ريحتهن لهسه برياتي ما ناسيتهن بناتي هذني شلون ما يردني والله اموت جبران

جبران :- ي صبي عيني لا تبجين كل مشكلة والها حل يمكن نكدر نتفاوض اني ويا يمكن هو مايريدهن وينطيهن الج يكلج اخذيهن تورطي بيهن

رفعت راسي ابجي واحجي :- لا هذا جلب مطي هسة من يعرف اني متزوجتك ما يرجعهن الي يكرهك حرمني منهن سنين

تربع وكال :- زين بس خليني اتواصل ويا اطلب منه ع الاقل يسمحلكم تنواصلون وتتعرفون ولا تضلين محرومة منهن طول عمرج

هزيت راسي لا واني ابجي بشكل هستيري :- لا بناتي اريدهن بحضني تعبت اريد اشوفهن كبالي بالبيت يفترن صارن نسوان واني محرومة منهن الله يقبل عباده اعمارهن راحن صارن 15 واني محرومة من شوفتهن

مسح دموعي ضل يمسح ع شعري تحسر مقهور
:- هسة خليها وراي وانه ادبرلج حل لو اعرف اكتله واجيبهن الج

ضربته ع صدره حيل معترضه :- مو حلالك الوضع لا تضيع روحك جبران ابتعد عن الدم شكد وما بيك حتى هدير وعادل لا توسخ ايدينك بدمهم اكو الف طريقة وطريقة تاخذ بيها ثارك

ضحك تك خد شوية سكت وكال
:- شنو ليش هجمتي هجوم وراج شي

سكتت اتذكر :- نسيت
جبران :- لا والله
صفنت اباوعله وتذكرت :- شعلان يريد نروح يم ليلى نشوف هادي اني من فرحتي وافقت بدون ما انطيك خبر وخابرت ليلى يصير نروح؟

رفع حاجبه شبكت اصابعي وميلت راسي بدلع
:- لخاطري شعلان حب هادي بلكي ع بخت السيد يبدي يتأقلم ع الوضع

تحسر وهز راسه :- انه اوصلكم
شيهانة :- اريد اشتري هدية لبيت ليلى خاف تتاخر
انت مو كتلي عندك شغل مساع

باوع للساعة وتحسر :- ماصدكت احصلج الشغل حرمني منج
بسته بخده :- المهم بليل راسي بحضنك واشم ريحتك وتشمني

ضحك ومد ايده يدغدغني
:- حنينة اهلي بعد شابعتني حنية مدللتني وين اكو منج ثنين انتي
دك المبايل عيني بسرعة وكعت علي جريته رقم مكتوب "فاء .. جيم"

ضليت صافنة علي اخذه من ايدي انطاه رفض بسرعه وكال وهو يباوع للمبايل
كومي خلي غفار ياخذج
اني اطلع بسيارة اهلي

ضليت اباوعله بتفكير حجيت بهدوء :- من خابرلك؟
:- واحد مو مهم

سويت نفسي مقتنعة وكمت بدلت بس الرقم بصفحة وسالفة بناتي بصفحة البس وافكر رفعت شعري كباية مابية اسحبه وارتبه ونزلت كذلة

طلعت من الغرفة حافي نزلت ونسيت البس كعبي
صعدت بسرعة طلعته لبسته وسمعت المبايل دك وجبران بالحمام

مشيت ع كيفي اخذته نفس الرقم
جاوبته وخليته ع اذني اجاني صوت بنية
كالت الووو وينك فدوة .. الو بعد عمري جاوبني الله يخليك مو كتلي تحاجيني من تطلع

عقدت حاجبي وشمرت الجنطة من ايدي وكتلها بهدوء
:- طلعت ورجعت بس ما كتيلي منو انتي

سدت الخط بوجهي كمت جريت نفس ودخلت ع الرسائل بيناتهم كاتبتله جاوبني
راد عليها من تطلع سهير احاجيج حبيبتي

طلعت من الرسائل وشمرت المبايل بمكانه اخذت جنطتي ونزلت شعلان مجهزته نزهة اخذته من ايده وطلعت وبراسي مليون سالفة وفكرة

احس الدم صعد لراسي بس قررت هسة اسكت ومن اوجع اتصرف طبيعي اشوف رد فعله كايلتله اني حاجيتها لو لا .. وراح اراقبه كلش اريد الزمه بالجرم المشهود حتى ما ينكر شي

نسيت ما حذفت المكالمة بس جبران مو كلش يعرفله شوية يدوخ بي يمكن تمشي علي وما يحس

طولت صفنتي تحسرت بدون ما احس
وفززني صوت غفار من مال
هذا محل مرتب مال هداية يخدمج؟

مسحت ع شعري وباوعت لشعلان لازم سيارته
:- اي ضل يم شعلان بسرعة اشتري واجي

هز راسه نزلت افتر بالمحل وبالي مو يم الاغراض ابد ما جنت اعرف شنو جاي اختار مادري شلون اشتريت هدية بيتها ، شالها الولد وراح يجهزها الي ع صفحة

وكفت اباوع بدون اهتمام احس رجفة بكلبي وقهره
ما اصدك جبران يسويها ويخوني
جبران اني حب عمره وحصلني بصعوبة ويخوني؟
معقولة هيج حظي بالزلم سيء وما كعد ولا ويا واحد

غمضت عيني بتعب وطلعت حسرة من نص كلبي
لفتني صوت اجة من وراي فزز جروحي وزاد نار كلبي
هدير ....يا محاسن الصدف ......للحكاية بقية

رأيكم بالقصة يهمني 🖤