رواية حمائم تخشى الطيران الفصل السادس وثلاثون 36 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

اجة اتصال ع التلفون ونسيمة گالت المكالمة الي ..

فزيت من مكاني وركضت اخذت السماعة وبكل لهفة گلت الووو اني سهير

اجاني صوت رجل :- هلا ومرحبا اني صديق عماد الله يرحمه من جيران بيت حجي حميد

شيهانة :- اهلا بيك اخوي
:- انتم مو تدورون ع جبران اخو عماد؟

شيهانة :- اي صار هواي ننتظر خبر عنه گلنا يمكن سجين وطلع بعد السقوط خصوصا هسة اغلب المسجونين طلعو

:- وما سمعتو خبر؟ ما اجاكم مرسال منه

شيهانة :- لا ابد وحتى من طلعو السجناء من سجن الحوت بحثنا ودورنا وسألنا اذا واحد مصادفة ماكو محد يعرفه ولا اكو احد شايفة

سكت شوية جر نفس وگال ..
:- اني فاعل خير اريد اگلچ العندي و وراها لا تعرفيني ولا اعرفچ

شيهانة :- گول والك التريده

:- وصلولي جماعة اول البارحة ماعرفهم ملثمين وگفو علي وطلعو يعرفوني جنت من اصحاب عماد وجيران بيت الحجي
گالي واحد منهم جبران ابن حجي حميد رجع؟

گتله لا والله مارجع وما سمعنا خبر يخصه ولحد هسة ما تنعرف اخباره عايش ميت بس الله يعلم

واحد منهم گال جاي يدورونه اهله
كتله الظاهر انت اعرف مني بهاي السالفة وتدري بيهم يدورونه مو شي غريب كل الناس تدور عن ولدها الفقودة

الرجال ضل يستهزأ وراها گال بلهجة شديدة التهديد
:- اياني واياك من يطلع جبران تماشي احنه الي يماشي هذول النماذج ما نرحمه ولا نخلي راسه فوگ رگبته

شهگت مصدومة
كمل كلامه :- وگال وين ما تشوف جبران بلغه رسالتنا
گله "اذا يطيح بأيدينا نوذرة توذر ونخلي كل وصلة منه بمحافظة"

شهگت مصدومة
:- سمعي خوية اذا لكيتي جبران خلي يعوف بغداد بسرعه والافضل يعوف العراق كله هسة الهجرة افضل حل لان البلد سايب والارهاب منتشرين الخطف صاير بفلس والكتل اسهل من شربة الماي

غمضت عيني الدنيا ضلت تفتر جواي ما تحملت اكثر وگعت مغمى علي لا احرك ايد ولا رجل

فتحت عيني دايخة واشوف نسيمة وليلى يرشون عليه ماي ويخلون عطر ع ايدي وخشمي

بچيت بضعف وغطت وجهي بأيديني
ليلى گالت بصوت مبهوت وخوف
:- شنو من خبر وصلچ بس لا جبران ميت

هزيت راسي لا وزدت بالبجي كعدت اشرحلهن حجي الولد
نسيمة :- ما استغربت داده هوا العراق صار غابة

ليلى :- شيهانة باوعلي لنص الكاس المليان هذول اكيد يعرفون جبران عايش ما ميت
وجان مسجون وطالع بس ما يندلونه

نسيمة :- ايا ملعونه ع هذا التفكير
ليلى :- والله وهسه يطلع جبران مسافر لو رايح لمكان محد يندله لان يدري راح يصفونه ف اشترى روحه هذا اقرب احتمال

شيهانة :- هسة هوا بس كون عايش كلشي ما اريد بعد حتى شوفته ماريدها بطلت

ليلى بعدم رضا :- عينچ تعودت ع هجر التحبهم ولا حبت بشر وشبعت منه شوف

غمضت عيني متألمة من كلامها الوكع ع جرحي واجة مثل الملح
صدك عيني تعودت ع هجر الاحبهم صدك
ضليت اتگلب متألمة من راسي وافكر بكلام الرجل وكلام ليلى

وصلت لاستنتاج ان جبران سجين وهذول اكيد يدرون بي سجين وطلع لهذا السبب جاي يدورونه ويهددون ويمكن طالع بال2002 وعايف العراق

اتمنى لو بس اعرف خبره ماريد شي بس كون اعرفه وين وشلونه ارجع للبصرة واعوف بغداد وراي ..

ليلى گالت بنبرة قهر
:- شلون ويانه شلون اني مادري بوضعي وهذا ابني لازم يعرف ابو وابوه يعرفه بس خايفة ياخذه مني

نسيمة :- لا شنو بكيفه ياخذه
ليلى :- ماريد اتواجه ويا ابد ولا اوگف گباله العشت ابجي ع شوفته سنين بالسجن اطلع الگاه صدك متزوج وعايش حياته وناسيني

شيهانة :- جا شنو يضل ينحب وراج غير انتي الغلط منج وراكبج من ساسج الراسج

نسيمة :- وانتي شنو مستغربة زواجه شو من جنتي بايران عرفتي

ليلى :- جنت اكول بلكت يطلع حجيها جذب
شيهانة :- لا خية انتي تجذبين روحج علمود تضلين متأمله بي شوفي اني بعز مصيبتي وافكر بيج وبمصيبتچ و هسه هم ثبتت عندي الصورة وصرت اشوف كلشي بدون ضباب

نسيمة :- احجيلها بلكي الغيمة تنزاح من ع عيونها وتشوف الاحنه شايفينه

كعدت ارتجيت ع الحايط اخذت كلاص الماي شربت منه شوية وغسلت وجهي ورجعته لمكانه
جريت نفس و حجيت وياها
:- اهل قيس يحبونه ويردونه وهو يريد اهله ويريد يرجع يرضيهم مثل قبل لا ياخذج واكثر
ف شسوو انطو العلوية مو حتى يعاقبونه ولا حتى يكلوله تعال يا قيس احنه مشيناك بهوانا
لا انطوها اله حتى يضمنون قيس رجع الهم وحتى يكون زواجة من العلوية حجة يخليهم يرضون علي ويرجعون الماي المجراه

وقيس قبل لان هو هم رايد يرجع يرضي ابو ويرجع السيد ابن السيد المايعصي والده ويگله حاضر وتم ولبيك
اني الغلطان وانتَ الصح بس اغفرلي السويته قبل

نسيمة :- عفية طحتي ع العلة كلها شوفي ليلو ترى السادة من جانو زعلانين من قيس وابو مايحجي ويا مو عبالج هاي هيه كرهو ، تلگينه جان ينتظررر زلة منج حتى يگله شوف يابة اني احساسي صح وجنت رايد مصلحتك ويرجع يكبر ابو بعينه ويكول بعد ما امشي ولا اخطي خطوة الا برضاه
لان من خذيت ليلى بدون علمه وغضبته ما تهنيت ولا توفقت وابوي عنده بعد نظر ويحس بشي اني مااحس بي

شيهانة :- بعد هسة انتي عندج ولد روحيلهم وكليلهم الحجي كله خل يعرفون ابنهم وشحدهم ياخذونه منج والله لعبي بيهم لعب اذا رادو ياخذونه

نسيمة :- اني هم هيج اكول

باوعتلها صافنة بالفراغ عيونها مدمعة كالت مقهورة
:- ماعندي غيره اخاف ياخذونه مني
والله اني اربي واخلي بعيوني همه مالها دخل بي مو الا يعرفونه

عصبت عقدت حاجبي ورديت متنرفزة من كلامها
:- شنووو هوا لعب لو تردين هادي يعيش العشتي انتي؟ هذا الولد عنده اهل عنده ظهر وعنده حلال واسم
ودي الاهله حتى باجر من يطيح عنده اهل يكلوله الله

ليلى :- وخذو مني شسوي
شيهانة :- ولا ياخذونه مو بكيفهم بس ضروري السادة يعرفون بهادي لا تخلين هذا الطفل يعيش الي عشتي انتي ليلى تاليته يكبر وحيد مثلچ وماعنده ظهر ومحد يريده

مثل وضعج حتى من رحتي لعمامج نسوانهم مايردنج لان ما متعودات ع وجودج وخالتج ماا اخذتج الهم وفرضتج عليهم وخلتهم يعتبرونج بنتهم غصبا ع اكبر خشم

نسيمة :- والله صحيح هذا غلطي تدرين لو اني ماخذتج وفارضتج ع عمامج وكايلتلهم هاي بنتكم غصبا ماعليكم تعيش وياكم وتتنعم بخيركم ومالكم وجاهكم جان هسة مو هذا وضعچ

هزت راسها مقهورة وكامت من يمنه تبجي محتارة وضايعة
نسيمة :- ضاعت هاي البنية
شيهانة :- خليها تضيع بس لا تضيع هادي حرام هذا ابن السادة لازم يعرف عائلته ويصيروله سند چا شنو العاشته ليلى شوية؟ حتى ترجع تعيد الماضي وتخلي ابنها بنفس الطريق ويواجه نفس المصير

هزت ايدها ما عاجبها وكالت :- هي هم هواي لعبت ليلى والله صهيب الله يرحمه عشگها عشگ كتل روحه عليها بس هيه ركضت ورا گلبها ماتدري اليركض ورا گلبه خسران ولا يستفاد شي

تنهدت ورديت بحسرة :- اي وعلي الگلب شگد ضيع ناس ودمرهم

ضليت الوب واكل بروحي اكل كل تفكيري يم جبران
وتجيلي احلام موزينة افز مخروعة ابجي بدون صوت لحد ما اغفى

نسيمة لگت النه بيت صغير ايجار اخذنا اني وليلى جبتله شوية اثاث لان فارغ وانتقلنا بي بسرعة حتى نرضي هادي ابن عمها الجان كاعد الليلى مثل السيف
وينتظرها تزل حتى ياخذها للنجف

ومن جها جنت اعيش ويا ليلى صراعاتها النفسية
وخوفها من مواجهة السادة
جانت تخاف ياخذونه منها بس ترجع توافق تروحلهم وتواجهم لان لازم يعترفون بالطفل وينسبونه الهم
هي حتى رجعتها من ايران مو قانونية والطفل هذا لازم ينسب لأبو

جنت ارتب بمواعين المطبخ والرجل الكهربائي يشتغل بالكهربائيات واهم شي التلفون
بعد ما كمل شغلة وطلع رحت خليت رقم بيت عمي واتصلت
اجاني صوت عمة علياء التعبانة
سلمت عليها ردت السلام بتعب وگالت وراها مباشرة
:- هاا ماكو خبر عن جبران؟

هزيت راسي لا ونصيت رغم ما تشوفني بس احسها عرفت رد فعلي لان فورا بجت
شيهانة :- بس مستمرة وانتم استمرو راح نلگاه وين يروح عايش ميت لازم اطيح ع اثر يوصلني اله

علياء :- احنة ندور وممأيسين بس انتي كافي عوفي بغداد ورجعي للبصرة لازم تضلين يمنه عمج هنا بأشد الحاجة الج

شيهانة :- ومنو يدور جبران؟ عمار؟ ترة عمار علي خطر وراح يطلع خارج العراق بأسرع وكت
جبران رجلي واني راح اضل ادوره والگا

سكتت شوية تحسرت وگالت
:- ديري بالج ع روحج عمة مابينه حيل خساير بعد

شيهانة :- انتي بس ادعيلي والله يسهل عليه
علياء :- ما طايحة من لساني والله
سكتت ثواني وكالت بصوت متردد

علياء :- حاجوني جماعة من معارفنا بالكويت يگولون صگر مختفي من التسعينات ماله اثر لا هو ولا ابنج محد يدري بيهم وين مسافرين محبوسين ميتين

بهت وجهي غمضت عيني خليت راسي ع الحايط
:- هاي التمت عليه فرد نوب
علياء :- والله صدك التمت انتي شنو هسة تدورين عليمن وتخلينمن ياعمة
كالت كلامها مقهورة ونشغت

بجيت وياها بضعف وهمست :- اريد ادور روحي عمة اني ضايعة من روحي وعلي ضايعة ضايعة

علياء :- الله ينتقم من كل واحد خلاج توصلين لهنا

نهيت المكالمة بعد ما شبعت قهر وبجي وضليت واكفة مخلية راسي ع الحايط ومغمضة عيني بوجع
وينك يا ماما وينك ياصگر
وين اراضيكم ؟ ادوركم لو تجولي

اتمنى انگلب طير واجيكم وين ما جنتو واحط ع اسطوحكم
اكحل عيني بشوفتكم

ليلى طلعت من الغرفة كاضة ابنها من ايده
كالت راح الرجال
هزيت راسي ضلت تباوعلي بقلق
رفعت اكتافي بجزع وكعدت ع كرسي الخشب يم التلفون

ليلى :- دخيلك ربي
شيهانة :- والله ياخية جنت احجي ويا عمتي تكول واصللهم خبر عن صگر هوا مو خبر
ما ادري شنو اسمي ، گايلين صگر وشعلان مختفين من زمان ومالهم اثر الله وحدة يعلم وينهم محبوسين ميتين عدلين صگر ماخذ شعلان وشارد؟! بس الله يعلم

ما استبعد يكون مشاري مسويلهم شي ومأذيهم

ليلى :- كون الله لا يرحمه ولا ينزل علي نور

تحسرت شبكت ايديني ونصيت راسي
كالت تصبرني :- ما طول كالو صكر وشعلان يعني ثنينهم سوية ، يمكن صكر مربي ابنج وعايشين سوية

:- اتمنى
تحسرت احس بضيق كمت اخذت محفظتي ولبست شحاطتي
كالت مستغربة وين رايحة

شيهانة :- ناقصنا غراض ليلى البيت هواي محتاج
تحسرت وكالت
:- بلكي تنقذنا سالفة الراتب واكدر اسد وياج كلشي

ضحكت مستهزأة :- راتب السياسيين ما سياسيين خلي الج اني هيج راتب ماريده
ليلى :- هسة كتلج راكضي وراجعي علمودة اني احجي ع نفسي احتاجة حتى اربي ابني

شيهانة :- اي ان شاءالله يطلعلچ راتب
سكتت شوية ورجعت كتلها
:- بعدين شنو اني كايلتلج تعاي دفعي وياي لو اشتري اغراض؟
ترة هن المواعين نحطهن نضل ناكل ونشرب بيهن سنين ما يأثر اذا اني اشتريتهن

ليلى :- ما تقصرين داده والله مادري شلون اجازيج

ابتسمت ممتنة الي بادلتها الابتسامة وطلعت امشي روحي خاوية اشم ريحة الطبيعة وعيوني تغوش امسحهن بساعدي واكمل طريقي

الوضع خنگني كلش اريد خبر واحد حلو يفرح گلبي ماكو كله حزن حزن
حتى صرت معبد مال حزن كأنما اروح تفتر بداخلي اذب حزنها بجوفي وتطلع

مشيت ربع ساعة للمحل وكفت اخذت مواعين صارن هواي احتاريت بيهن
ابو المحل باوعلي
كال
عندي سيارة اوصلج بسرعة

هزيت راسي لا :- لا خوية شسالفة امشي
:- ثكال عليج وهواي
:- ادبر روحي زين .. توصلهن الي بكروتك بس اني الحكگ مشي

:- لويش تلحگيني مشي؟ اعتبريني تكسي

تنهدت وباوعت للشارع الدنيا مغرب ورجعت باوعتله
شيهانة :- يلا هاي هيه

صاح ع العامل وطلب منه يلزم المحل دقايق صعد الاغراض بالسيارة ركبت ورا وهو وصلني للبيت نزل الاغراض خلاهن يم الباب طلعت فلوس الكروة رفض ياخذ كتله
مو هذا اتفاقنا جا احنه كلنا توصلني بكروتك

ضحك وكال :- والله ما مشيت بيج غير دقايق وماصرفت حتى بانزين المن الكروة؟

شيهانة :- لا اخي ما احب هيج رجاءً اخذ مني هاي الكروة ولا تحرجني

باوعلي ومد ايده اخذهن من لا جارة وحرك السيارة وطلع

دكيت الباب فتحته ليلى ضليت انقل الها الاغراض نفضت ايديني وجاي ادخل وعبرت سيارة طايرة من وراي
الفتت باوعت اشوف بيها واحد يسوق ملثم بجفية ابيض واسود

هزيت ايدي ما عاجبني مستهتر ..

دخلت وسديت الباب ...

لكيت نسيمة بالمطبخ
واكفة تسوي عشا ضحكت
كالتلي وهي ترفع الجفجير :- شو تضحكين شايفة فزاعة كبالج

شيهانة :- لا وعلي بس من شفتج ذكرت هادي كلت هسة لو يدخل علينا ويشوفج ينجلط
ويكول اني ماريدهن وياج وانتي هنا

ضحكت وكالت :- ويلزمني من شعفتي ويسوحلني تسوحل هذا محمل علي الخايس

ليلى تضحك وتطلع بالمواعين تكلب بيهن ، نسيمة كالت
:- والله ياهادي اله يوم لو يسحلني لو اسحله ماتقبل غلط

شيهانة :- اني هم اتوقع يسحلني

ليلى :- باچر جمعة خلونه نروح ورا صلاة الظهر للامام نزور

التفتنا الها ثنيناتنا فاهمين نيتها وغايتها
كلتلها بنبرة مكر
:- ومنين تاخذينا من نفس المكان الجنتو تكعدون بي وتشتريلنا صوغة من نفس المحلات

سكتت تباوعلنا
نسيمة هزت ايدها ودارت وجها للطباخ
:- السيد بايران ليلو

ليلى :- البارحة حلمت بي يگلي مشتاقلج

حجتها مختنكة

ليلى :- يلا ما باللازم ماروح
نسيمة :- لا نروح شعدنا بس يا خالة الولد بايران حتى ماكو امل تشوفينه وتكحلين عيونج بشوفته

ليلى :- بس ردت ازور مختنگة

نسيمة :- تدللين

كعدت خليت رجل ع رجل وارتجيت باوعتلها بتفكير
:- جا انتي يمته ترحين للسادة وتاخذيلهم ابنهم راح يصير خمس سنين عمر الطفل

ليلى :- الله كريم بس خلينا نستقر شوية ونروح

ليلى ...هزت راسها ما مقتنعة ولا اني مقتنعة بروحي ولا بحججي

اخاف اخذ هادي وادخل بي لبيت السادة واطلع منهم بدونه
اخاف افقد روحي الثانية (هادي) ويتلوع گلبي مرة لخ
صار قطعة من روحي وگلبي واذا اخذو مني تنسلب روحي سلب

اباوعله كاعد يلعب بالعابة يم باب المطبخ واختنگت كلش ، اشوفه وحدة كاعد لا اخوان ولا اولاد عمام
يلعب وياهم تذكرت وحدتي وعيشتي

بس فرقي جان ابوي يلاعبني هادي حظه حتى من ابو انحرم

اتخيل قيس هسة كاعد ويمه اطفاله الما اعرف عددهم حتى ، ويمكن ديلاعبهم
لو مخليهم بحضنه ويسولف وياهم ابتسمت موجوعه وطاحت دمعتي ع خدي

حبيبي عندك اخوان بس مصيرك راح تعيش وحيد بدونهم لان اني لو يكطعوني ما ارجع لقيس وهو عنده زوجة ثانية هاي هيه هي اولى بي مني من البداية بس اني گلبي النذل ذلني وسحلني و ورطني و ورط السيد وياي ..

نسومة نصبت العشا تعشينا وغسلنا مواعين لبست عبايتها وراحت لبيتها القريب ع البيت الاجرناه
سدينا بابنا زين ودخلنا للغرفة خلينا فراشاتنا وتمددنا

هادي كاعد ضايج يباوعلي ويباوع للشيهانة
كلتله تعال خاله
تمددت وخلت ايدها ع الكاع
شيهانة :- حط ايدينك هيج تعاي ليلى لعبي ويانه
تمددت ع بطني وخليت ايد

وضلت تحسب حدية بدية ناصر دية حط الكور ع الزنبور بنات حريش يلمن عيش بكد الكمل والكريش
طاحت ع اصبع هادي السبابة وگلتله
:- تريد كرصه حية لو عگرب

هادي :- حية

كرصته كرصه خفيفه وكلتله اطبگ صبعك
مايعرف ساعدته اني طبكت صبعة وضلت تكمل وتحسب اندمجنا نضحك متونسين

الى ان نعسنا كلش طفينا الاضوية ونمنا

ثاني يوم بدلنا واجت نسومة ماجرة تكسي اخذتنا لزيارة الامام بكل مكان عندي ذكرى
ادخل للامام ازور ولازمة هادي بايدي ودموعي تجري
مادري شوق لهاي الاجواء لو من ذكريات حلوة صارت تحرگ روحي حرگ وتسبيني سبي

امسح بعيوني وامشي واجر بهادي
زورته رفعته كتله الزم الشباك حبيبي انت سيد ونسلم يرجع لآل البيت هذول اجدادك

لزمه ما فاهم زورته ودعيت الله بجاه الامام يسهل حياة ابني هادي ويخلي نصيبه اجمل من نصيبي وعيشته احسن من عيشتي

طلعت امشي وهن يمشن وياي اشتريت كم حاجة لهادي
وعيوني جانت تراقب حتى الشارع
وكل محل مرينه من يمه وكل باب وگفنه يمه
احس بروحي نار شاااابة وما تطفى لو هسة تزخ مطر فرح بداخلي ..

حسيت روحي صرت مثل المجنونة بكل وجه اشوف قيس وكل ما اسمع صوت رجل التفت اباوعله اكول هذا قيس رجع للعراق ورجع لعادته كل جمعة يجي يزور

بس اتذكر هو عنده زوجة غيري ومثل ما كان يجي ويجيبني ويا هسة اذا اجة اكيد راح ترافقه وياهم اطفالهم

خالتي كالت تستعجلني
:- يلا ليلى استعجلي

هزيت راسي ومشيت بهمه وراها لازمة هادي وهو يكول
ماما .. ماما ... ماماا

التفتت اله مستغربة اشرلي ع رجال يبيع حلويات من ضمنهن بيض الحمام
اخذته اشتريت اله وبعيني دمعة
اتذكر جان يشتريلي منه دائما والحلويات التنباع هنا جانت شي اساسي بحياتنا

نكعد نص الليل نسولف وناكل منهن ونضحك
لان مرات يكونن قاسيات ويرحن اسنانه واحنه ناكل
خصوصا اني جنت اغمض عين واگرط وهو يضل يضحك ويگول ادري اسنان لو فلين ماتكدرين تگرطين عليهن

ضحكت مثل المخبلة وحدي ودمعتي نازلة ع خدي بدون شعور ..

باوعلي مقهورات مسحت وجهي وحجيت باحراج
:- فرحتي بهادي جبيرة ما مصدكة يصيحلي ماما ولازمني من ايدي وروحه صارت يم روحي

ضلن يباوعلي بنفس النظرة مقهورات ..

رجعنة للبيت دخلت للحمام بجيت مقهورة ع روحي و ع وحدتي
بجيت من شوقي اله شوقي لحضنه ولضحكته لصوته لانفاسه لغمازاته لصرت اشوفهن بوجه هادي واتذكره

اتذكر من جنت اكله اريد طفل مثلك عنده رصعات

ضلينا ع وضعنا و ع حزنا وحياتنا الشيهانة تدور جبران لا خلت مستشفى لا خلت جرايد لا خلت شي يعتب عليها

واني انتظر اصفي بالي واروح للسادة بس ما جنت من داخلي مقتنعة بشي
اجة هادي فجأة دك الباب سلمت علي واستقبلته

وطبخت اله غداء من المسواك الجايبة جان محمل انواع واشكال من دجاج ولحم وسمج وفواكه وخضروات

باوع للبيت وكال بيت العامر ان شاءالله

ضل يباوع للبيت بحواجب معقودة ورجع باوعلي
:- وينها صاحبتچ ام عطوب؟

ضحكت وهزيت راسي ماقابلة :- بالغرفة كاعدة خو ماتطلع يمك تستحي

هز راسه وضحك حط ايده ورا راسه وارتجى
:- انه جاي اخذج عرس ابن عمنا

ليلى :- يا صلاوات بيها الخير شوكت؟
:- باجر الحنة وعكبة العرس

هزيت راسي وكتله الله يتمم الهم ع خير
بس ما تكلي ليش تاخذني شو اني ما مرحب بيه ال يوشع مايحبوني لو بيدهم يحرموني من دخلة النجف كلها

ضحك اهتزت اكتافه من ضحك ما عاجبة
:- جا انتي شلج شغل تضلين بنية من آل يوشع الرضو والمارضو ، توكفين بنصهم وتكولين انه ليلة واليفك حلگه وياج بحجاية وحدة العب القندرة ع راسه زغير جان لو جبير

ضحكت وهزيت ايدي :- هو انت بهاي سوالفك مكرهني يحسسوني اني ماخذتك منهم خصوصا النسوان

سوا حركة بحلگه تؤؤ ورفع ايده بمعنى يولن
وكال :- خلي يولن ياكلن تبن جم ليلة عدنا احنه بس انتي ف حگهن يغارن منج

دخل هادي مغمض عينه جان نايم طفرت اخذته غسلت وجهه وجبته شاله خاله خلاه بحضنه يبوس بي ويسأله عن حاله وطلع فلوس انطاه ويلاعبه

حتى نصة وصعده ع ظهره وشاله
واني اكمل بالغدا وكل شوية ادخل عليهم

فرحتي بيهم ما تنوصف بس اباوعلهم فرحانة تمنيت هادي يمي ع طول وهيج اشوفه يلاعب ابني ويهتم بي وما احس وليدي وحيد

دخلت للغرفة شفت الشيهانة ناييمة تباوع للسگف من شافتني رفعت راسها وكالت
...شعجب الوحش يضحك

ليلى :- ترى انتن ضالماته والله هادي يخبل ويضحك بشر

شيهانة :- كلش ضالمينه سودة عليه عيني علي عميه

ضحكت وكتلها اشورها
:- يكول عرس ابن عمي وجاي ياخذني اني اريد ارفض ما اروح بس شو هوا ماكال بكيفج كبل كال جاي اخذج

شيهانة :- اي جا غير ابن عمج ياليلى لازم تحضرين روحي دحسي روحج بنصهم وخلي الج موقف
لا تضلين شاردة وخاتله هنا

ليلى :- ادري بس النسوان متحزمات الي حزام وهذا هادي مايقبل واحد يحاجيني خاف كلمة منه وكلمه منهن وتصير مشكلة واطلع اني بالوجه الاسود

شيهانة :- يو طز بيهن يولن شنو يردن يحجن خل يحجن دام عمامج الزلم وياج هنه شنو؟ لا شيئ

ليلى :- خوش حجي زين اذا هاي ضل مصر اروح ويا
واحضر العرس

هزت راسها ورجعت تمددت جاي اطلع ورجعت كتلها
سأل عليج
شيهانة :- لا يسأل علي عمي اني بيا حال ويسأل المتوحش عني

ضليت اضحك واهز ايدي ما عاجبني لان وضعهم يضحك هو يسميها ام عطوب وهي تسمي المتوحش

طلعت صبيت غدة خلينا اني ويا سوية وهادي والشيهانة عبرت للمطبخ بدون ما يشوفها اكلت
جان يسولف عن عرب يوشع (عمامي) وبعدها كال

:- ورا الغدة نطلع هاي صاحبتج اذا تريد خل تجي للعرس وياچ شلون تضل وحدها

ليلى :- ماعتقد تقبل تروح يم خالتي تبات

رفع حاجبة ما راضي باوع باتجاه المطبخ ورجع باوعلي
هادي :- هي شكد عمرها هاي شو شكلها مال كبار وعقلها مال مزعطة

ليلى :- جبيرة اكبر مني بداية السبعينات

رفع حاجبة باوع بتفكير ورجع كال :- خوش والله ثلاثينات عمرها جا شمالها شاخطة

ليلى :- يبووي هادي والله ذكية ونبهة وخوش بنية بس هيه تعبانة ومقهورة ع رجلها جاي تدوره مفقود

هادي :- يمته انفقد؟
ليلى :- نسيت والله يمكن بالـ99
هادي :- جا هسة يصير تعرس ليش ما تعرس وتاخذ غيره

ليلى :- شلون غير متزوجة شبيك انته
هادي :- اي بس السنين مرت وبهاي الحالة يعتبر زلمتها ميت وتكدر تعرس تاخذ غير واحد

ليلى :- لا هيه وفيه ماتريد

هادي :- هنيالة لو انه مفقود يمكن عذيرة ماضلت هيج وفية الي وكبل راحت عرست خذت زلمة ثاني

ليلى :- عوفنا منها هسة اني الا احضر العرس
هادي :- والله انه كتلهم راح اجيب ليلة واجي تردين ارجع الهم متفشل وحدي وتضلين بكيفج

ليلى :- لا شكو ترجع متفشل اجي بس اخاف من لسونتهن
هادي :- هسة مو كتلج ياكلن تبن يولن شلج غرض بيهن والله تغثين انه اخوج وكلمتي تمشي عليج وعليهن البرابيج شيردن منج شعدهن وياج

سكتت متفشلة وسويت مثل مايريد لميت جنطتي وشيهانة راحت يم خالتي من قبل لا اطلع اني
هو شال هادي وصعد خلاه بحضنه وشمر جنطتي ورا
قفلت الباب وطلعت كعدت يمه انطاني هادي خليته بحضني واخذني لبيت خالتي انطاهم المفتاح وطلعنا للنجف ..

تفاجئت بي يضحك ويسولف ويستذكر مواقف قديمة يحجيها يموتني من الضحك

الطريق جان طويل بس ولا حسينه بي ماضلت سالفة ما حجاها حتى ما مليت

وصلنا لبيت اهله مو بيته لان هنا كلهم ملتمين شال هادي كال خلي يمي بامانتي وانتي روحي يم النسوان

دخلت سلمت بس كأن ملك الموت داخل برجليهن مو ليلى جاية من بغداد للعرس

دخلتنا صارت قريبة من وقت عشاهم بحيث مالحكت اكعد صبو عشا
ام سوادي جانت زينة من اول يوم شفتها وخلتني وياها دائما تعرفني ع الاقارب وتكعدني يمها وين ماتكعد

اني كل شوية ادز احد يتفقد هادي الصغير ويزمخ بي هادي الجبير يكله كله يم خواله

وبالليل جابولي هادي وبسرعة نمت لان تعبانة من الطريق

كعدت بيوم الحنة ع صوت التلفزيون مشغلينة ع اغاني ويركصن
طلعت غسلت وبدلت لهادي لكيتهن بالصالة يركصن

مشيت للمطبخ اريد احطلي ريوك بس عمتي ام سوادي حطت ماخلتني المس شي
كعدت كبال الباب اباوعلهن شادات شالاتهن ع خصرهن ويركصن والاغاني يتغيرن كل شوية
من تطلع اغنية حزينة يضوجن ويضلن يهوسن ويدبچن

ام سوادي خلت الريوگ كدامي وكالت
:- لا تصفنين ولا تتحسرين ضحكهن جذب وخوتهن ع كد الركصة لليل كل ثنين يكعدن ياكلن بلحم الثانية انتي الوحيدة الربحانة بيهن بعيدة ومتكترة ومرتاحة

باوعتلها مستغربة ومديت ايدي اتريگ
:- والله سالفتهن سالفة اني ما ضايجة بس اشوفهن مايردني اضوج

:- ولا تهتمين ولا تحسبين يمعودة كملي العرس ورجعي لبغداد احسنلچ وخلي جيتج ع كد الواجب

هزيت راسي اي شوية شوية البيت بدأ ينترس والنسوان يلتمن عود هذا يوم الحنة مو العرس
والمطبخ صار يروش اجة طفل اخذ هادي وصيته علي زين بس گلبي ضل يمه

كل شوية ادزلي بنيه صغيرة تشوفه وتجي

واي واحد يطلع كبالي اكله روح شوف ابني

التفت عليهن اسمعهن يتبسبسن علي وانقهر
يحجن ع سجني و ع خالتي وامي وبيبيتي

رجعت كعدت يمهن بدون ما احجي
وحدة من عماتي كالتلي بنبرة متلاعبة
:- شلونه السجن ليلة ؟ شلون ضليتي سنين بي وما متي وحدة الغيرچ من ساعة الطبت السجن تموت بقهرها وحزنها

باوعت الها ورديت بعدم اهتمام
:- لا شكو نفس الوضع هنا والله لو تدخلين للسجن اسم الله عليج ماتشوفين فرق
كله نسوان مجرمات ومتحزمات للشر يسون مصيبة لو يذبن حجي وتگب العركة تجي السجانة ترزلهن وتفشلهن وتخليهن يبلعن لسونتهن

باوعتلي بنص عين ماقابلة اندك باب المطبخ اجة صوت هادي ابن عمي
يحاجي امه يكللها يمه سويلي لفة نزل ضغطي يمكن

كالتله تعال طب ماكو غريبة هنا لبسن حجاباتجن

لبسن البنات ودخل مبين دايخ اكو كرسي يمي جانت كاعدة بي بنيه وراحت لان مالابسة حجاب اجة كعد بي يمي وكلي

:- ها ام هادي شلونج ؟ ان شاءالله مرتاحة

هزيت راسي مبتسمة :- مرتاحة الحمدلله شلونك سلامتك

هادي :- نزل الضغط

امه تسويله لفة وعماتي يحجن ويا هو باوعلي وضحك
رفع طرف حاجبة وكال
:- بت عم الولد كاعدة حالج حال الغرب شوفي البنوات جاي يردحن

ليلى :- تدري بيه مو رداحة ماعندي مزاج للردح

رفع حاجبة يضحك هن يباوعن علينه
وهو كل شوية يباوعلي يبتسم وياكل باللفة وكل مايريد يطلع تجلب بي عمتي تسأله سؤال عن سوالف الزلم والطبخ

كوة عافته ، لليل البنات بدن يجهزن تجي ملا تسوي مولود ويبدلن ونسوان الديرة يلتمن كلهن

اني طلعتلي بدلة طويلة مستورة ولبست حجابي وخليت هادي بالغرفة نايم لان تعب من اللعب ويا الجهال

وطلعت حضرت المولود الاجواء حلوة ضليت اصفگ
جان ام سوادي تجرني من ايدي كومتني وياها دبجت شوية ورجعت كعدت

صارت خنكة كمت للحمام غسلت وعدلت شالي وطلعت للمطبخ شربت ماي بارد المطبخ محد بي
اجة صوت بنات من يم باب المطبخ مشيت اشوفهن منو ولمحت هادي وياهن يلعب

صحتله
هاددي مو عفتك نايم ماما تعال

باوعلي يضحك وطلع يركض اني عفته نايم بس كعد ع الهوسة وطلع مادري بي
مشيت ورا جريته من ايده ضل يبجي ويركض متبعد فلت روحه مني ويركض بالحوش يريد يلعب ويا البنات الصغار من عمره بأيدهن دوامات

ركضت ورا لزمته من ايده احذره
:- عيب ماما من اكولك تعال تجي لا تضل تركض هسة حتى طلعتني من البيت متخاف يجي زلمة يشوف امك

هادي :- اررريد العب

ليلى :- اي نلعب بالبيت

كملت كلمتي وانصدمت بصدر شخص ابتعدت بسرعة مصدومة وجريت هادي واني اباوع للشاب الواكف كبالي طول بعرض
ضل يباوعلي ما وخر
جريت هادي حيل وضليت اتلفت اشوفه ضل صافن علي الرجال كأنه اول مرة يشوف بنية بحياته

ويا مجاي ادخل للمطبخ شفت عمتي ام منذر واكفة متخصرة وبس دخلت نترت بيه بغضب

ام منذر :- ولچ ما تستحين ما تختشين مرة شكبرج وشكدج مخلفة وجاية لهنا خطار باحترامج
وتتواعدين؟

ليلى :- اعوذ بالله منج الزلمة حتى ماعرفه ولا شايفته طلعت اجيب هادي راح يركض ومن رجعت طلع بوجهي

ام منذر :- طلع بوجهج لو شابكته و وجهج بصدره

رديت بغضب :- دعمت بي عيب عليج مرة الشيب تارس راسج وعندج بنات خلي عندج حظ وبخت تتهميني بشي ما موجود بيه

التفتت واني انتر معصبة
:- هسة اصيحله شوفي منو وفهمي منه السالفة

التفتت اباوعله ماكو بمكانه رجعت باوعت الها متعصبة
:- هسة ادز ع البنات الجانن يلعبن هنا بناتكم اكيد يعرفنه ويكولن هذا منو نصيحله وفهمي منه الظاهر اني لو تشوفوني اطوف بالكعبة تكولون شفنه ليلى ترگص

رفعت صبعها بوجهي بتحذير وعصبية
:- وعلي اليوم اخلي عمامج يفصمون ظهرج مو حلتلج سوالف الزلم والسجون لو تردين تجين هنا تعيدين امجاد خالتج وجدتج وتحيين حفلاتج بالنجف

ليلى :- ليسمع سوالفج عن الشرف يكول يكطر منكم وانتي بدون حظ وبخت تتهمين بيه

شلت هادي اريد اعبرها دفعتني من كتفي وضلت تضرب بيه راشديات معصبة
ام منذر :- ولچ موش احنه العدنا نسوان تتواعد وتشوه سمعتنه وسمعة بناتنا انتي جاية تخربين تربيتنا

دفعتها حيل وخليت هادي ع كتفي
حواجبي انعقدت والغضب لبسني من راسي لرجلي
صيحت بوجها :- ترحلي مليون فدوة لا اني الاعرف زلمكم هنا و اواعد ولا اني الالي خلك لهاي السوالف روحي شوفي هذا الزلمة منين وسألي يشرحلج كافي تطعنين بيه

عصبت وضلت تكول شنووو قصدج
وگبت السالفة الملا سكتت ونسوان عمامي وعماتي التمن وهي تعيد بالسالفة بصوت هادئ وبنبرة وحدة مقهورة

ام منذر :- تصدكن هادي رايح جايبها من بغداد للنجف حتى يرفعها بنصنا ويعزها ويرزها وهيه تتواعد وعلي بهاي عيني شفتها راسها بحضن زلمة بالحوش بس ظهره الي ماشفته ماعرفته ياهو غريب لو كريب

التفتن كلهن يلومن بيه مصدكاتها
ام هادي :- ولج هادي كاتل روحه بس يدافعلج وميت حتى يسويج مرة وانتي هيج تجازينه تكسرين بي وتنزلين راسه؟ من عمت عينج

تفلت ع رجلي وصاحت :- لا بارك الله بالبطن الحملتچ

الجهال صاحو لهادي واني ضليت بس صافنة مصدومة كلت هسة يجي واحجيله
الغرب طلعن ضلن بس الكرايب يردن يشهدن ع باقي المسرحية ويخلني علج بحلوگهن يلوجن بي سنين وبنين

دخلو عمامي ثنين عمي ابو هادي اول واحد وهادي وياهم وحاتم ابن عمي هم
وعمتي ام منذر تسولف الهم نفس الحجي
تكللهم شفتها راسها بصدر زلمة بالحوش وتحجي ويا تتبسبس بس ما شفت وجها

هادي رفع حاجبة والتفت الي يسألني بنظراته قبل لسانه
هادي :- سولفي ليلة شني السالفة فهميني

جريت نفس وتقربت منه مدمعة مهضومة
:- والله اجيت اشرب ماي وشفت هادي طالع ويركض ورا البنات بيدهن دوامات يريد يلعب وراح للحوش يركض لبعيد واني ركضت ورا
جبته من ايده اسحب بي ودعمت بزلمة شاهد الله ماعرفه يم باب الحوش الخلفي مناك
احجي وااشر

وخرت عنه وجبت ابني واجيت وهي لكيتها واكفتلي هاي الوكفة واتهمتني شابكة الزلمة واتبسبس ويا واتواعد

هسة جيب الزلم كلهم حطهم كبالي بس خليني اشوف الزلمة الدعمت بي واكلك هذا هو وانت سأله اذا ماتصدكني

هادي التفت لابو ورجع باوع لعمتي معصب
هادي :- هذا حاتم الدعمت بي

باوعت لحاتم المشكلة هو مو حاتم
ليلى :- مادري والله ظلمة ما شفت وجهه

حاتم :- يا خوية هذا انه والله لو ادري ف لا اطب للحوش
عود خذيت نفط شابين نار يم الشط

هادي :- مطي انتَ
خزر حاتم والتفت لعمتي معصب رفع صبعه يهدد

:- سمعي عمه وحگ سبع الكنطرة وصلت حدها ويااااجن كلش حدهااا حاطات روسجن بروس هاي اليتيمة وتذبن عليها بلاوي ومصايب

وانه ساكتت هواي بس بعد من هاي اللحظة لا ماكو
ام منذر البيت يتعذرج تفضلي برة لو تتعذرين من ليلة هسة لانج غلطتي بحقها

عصبت ضربت الكاونتر والتفت عمي علي
نتر لا تطرد عمتك عيب

هادي رافع طرف حاجبه معصب ينتظرها تحجي
هو عصب صيح بغضب
:- لو تتعذرين من ليلة لو تطلعين من هذا البيت وحگ سبع الكنطرة حتى العرس باجر ماكوووو ماكو لغيت العرس انه

ام منذر :- واحنه نمشي بكيفك

هو شب وكللها :- هاااا وجا بكيفمن تمشن بكيفجن الجايف ؟ وحك علي الفحل اليوم اكلب البيت فوك روسجن تتهمن ليلة وتذبن عليها زلم!! وانه موجود وراسي يشم الهوى وتذبن ع ليلة زلم!!

بالعباس اذبحجن وعلي الفحل اذبحجن كلجن الليلة

ابو هادي :- ام منذر فهمي النساوين ع الصار فهميهن سوء ظنج لا تخلين العار يركب ليلة وهي بلا ذنب تراني ما اقبل بس زمخت ع هادي لخاطيرج

ام منذر :- لا وانه اجذب عيوني غير الزلمة شفت گفاه مو گفة حاتم

حاتم :- لا انه ومستعذ احلف ع كلام الله

هادي زمخ :- واحنه نجيب كلام الله ونحلف بي حتى نرضي ست الحسن ونكبر راسها
لان كلام الله صار لعبة بيد النساوين

التفت الها فاير يحوم بالمطبخ وهي خايفة منه بس عينها صلفة تخوزر

الولد تجمهرو يم الباب والسالفة تكبر وعمتي تحلف مو حاتم وحاتم عصب وضل يحلف بالعباس هو الدعم بي رغم هو مو حاتم اني متأكدة بس جذب

ضليت ابجي وشايله هادي يبجي ع كتفي
وعمي ابو هادي وهادي صارو براكين والصياح وصل لاخر الديرة

ضل هادي يصيح :- طلعيييي من البيت وبعد لا تحسبين عدج اخوان ولا تلفين علينه اذا ماتوكفين تتعذرين من ليلة كبال كل الناس الصيحتيها كبالهم

لا لاحت عثگ ولا حوت وصيحتيها لو زالة الها زلة شتسوين تذبحينها بدون ماندري

ابو هادي :- ام منذر احجي حظج وبختج وفضيها

هي انقهرت وانحصرت بزاوية كالت
:- والله شفت ظهره انه شمدريني ترة من خوفي ع سمعتنا حجيت مو كره بليلة

ابو هادي :- لو تخافين ع سمعتنا تحجين وياها ع صفحة تفهمين السالفة مو تفضحينها

هادي :- هو انتي اكبر البرابيج اتانين ليلة تزل لو تطلع منها حركة علمود تتهمينها وتذبين طركاعة براسها لا تكولين مو كره بيها

ضلت تبجي غطت وجهه بشيلتها تكول
امداني وامدا قسمتي ابن اخوي واخوي راح ياكلوني بس لاني خفت ع عرضنا

كلبو عيونهم بضجر ما عاجبهم وعمي خزرها
كالت والله انه متوهمه مادري بي حاتم جا لو ادري بي حاتم ما حجيت

حاتم :- جا غير تسألين بالاول

ام منذر :- تخربطت يلا بعد گلبي عمه عذريني
اجت باستني بخدي وانتهت المشكلة والنسوان فضن
والزلم طلعو

وهي راحت للغرفة تبجي مسوية روحها مظلومة

دخلت غسلت وبدلت ودمعتي ع خدي
هادي يلوب بالمطبخ منتظرني طلعتله وكف كبالي متخصر

كال وهو يخزرني :- فهميني ولج شلون شكله الزلمة

حجيتله كلشي وانطيته مواصفات الزلمة والعجبني بي صدكني بس ماعرف الزلمة كال هذا يمكن واحد عرف وطاب للحوش

بس انقهرت علي ضغطة وراسه ضل يأذي

كعد بالمطبخ مقهور واني كعدت ع صفحة اباوعله مهضومة ، كتله مقهورة
:- ياليتني ما اجيت والله ادري بيهن يدورن علي الزلة ويردني بس كون اغلط بحجاية بشي حتى يلبسوني العار

هادي :- ياكلن تبن مو كتلج انه هنا اخوج واسرت حلگها التفكة وياج بسوء لو رادت تضرج

جان يحجي معصب عيونه حمر وحواجبه معقودة

ضليت امسح بدموعي مقهورة وثاني يوم گوة فض العرس كلهن يخوزرن بيه ، ورجعني ثاني يوم العرس الصبح لبغداد ..

.......

فاطمة ...

بعد السقوط بفترة قصيرة اصر سيد قيس نرجع للعراق لان كل المخاوف انتهت وهسة مالهم شي يم قيس
يكدر يرجع للعراق ويعيش حياته بكل راحه

ضليت اجمع اغراضي المهمة واجهز بنتي ليلى وابني الاصغر من ليلى (الحسن)
حتى نرجع للعراق ..

حزمة امتعة السفر وجرينا احلامنا ويامنا وامانينا وكل تفاصيل حياتنا ورجعنا للعراق

بداخلي شوق ولهفة اريد التقي باهلي وناسي
اريد اشم ريحة بلدي واكعد بنص اهلي
اريد ازور الكاظم وانزل العصر اكعد يم عمتي العلوية سميرة واسمع سوالفها الحلوة ..

مخلية الحسن بحضني والممية بأيدي بس يبجي اخليها بحلگه
وليلى نايمة بنصنا اني وابوها ومخلية راسها ع فخذه
بينما سيد اباذر كاعد بالصدر يم السايق

الطريق طويل كلش ومتعب
باوعت لقيس بعيونه لمعة فرح مختلطة بدموع حزن
شوق للقاء هاي الارض الفارگها مجبر وخوف من لقائها

حسيت بتناقض مشاعره وافكاره وحيرته

مخلي ايده ع ليلى مديت ايدي خليتها فوگ ايده بحنيه باوعلي وابتسم وشال ايده لزم ايدي خلاها ع كتف ليلى وايده فوگها

ضل منصي يباوع لايدي ويمسد ع ظهر ايدي بأبهامه

الوقت يمشي وطريقنا بدأ يخلص
وصلنه للفرع .. فرع بيت خالي اشوف من السيارة الاقارب متجمهرين يم بيت خالي سيد رحمن

الشباب واكفين ع صفحة واطفالنا السادة يلعبون

كلبي ضل يرجف وعيوني تدمع باوعتله وعيوني تضحك گبل شفايفي
رجف لساني وحتى الحروف ضاعن مني ماعرفت شنو احجي وشلون اطلع الكلمات ..

وهو نصة راسه وغطة عيونه بايده وبچى بحرگة
ما اعرف شنو شعوره بس الفرحة واضحة بعيونه والشوق فاض

وكف السايق اني نزلت شايله الحسن ومشيت ع صفحة دخلت التفتت اشوف قيس مخلي راسه ع كتف خالي يبجي وخالي حاضنه بقوة
ومخلي ايده فوك عمامه قيس السودة

واعمامي يبجون ويباوعون لقيس وخالي

واباذر شايل ليلى اخذها منه مؤمن يبوسها وبدو ياخذونها من ايد لايد

عيني عليهم وعين ع الباب وصلت للعلويات استقبلوني بالهلاهل والواهلية

عيوني تجري وفاتحة ايديني احضن بيهم
من وحدة لوحدة ومن حضن لحضن
ابوس واحضن بيهم واحس ماجاي اروي روحي

مشتاقتلهم لحد قطع النفس

حضنتني دنية وباستني بخدي حيل
دنيا :- نور العراق برجعة السادة

فاطمة :- منور باهله

كعدت بالصالة والعلويات التمن علي يسألني عن احوالي وحياتي واخذن الحسن من ايد لايد يبوسن بي
وجابولي ليلى وهم اخذنها من حضن الحضن يبوسن بيها ويكرصن بخدودها ...

اليوم هذا شبعنه بي بجي من الفرحة حسيت روحي رجعتلي من رجعت للعراق وحسيت اخيرا بالانتماء
حسيت روحي هسة بحضن امي وابوي

ضليت ارجف من فرحتي ، اخذوني للغرفة فوگ غرفة دنيا القديمة مخلين بيها اخشاب

خليت جنطتي والحسن نام خليته ع الجرباية وخليتله مخاد
بدلت ملابسي وتوضيت

طلعت صليت وصليت ركعتين شكر لله ونزلت ..

ما انتهى هذا يومنه بسعادة ما تمت فرحتنا
اوضاع العراق سيئة والخطف والقتل بفلس
بس احنه مسالمين وكل اعتقادنا ماراح يلوحنا شر ..

بهذا اليوم وبوقت اذان المغرب طلع سيد مؤمن للجامع برأس الشارع حتى يأذن
وبطريق العودة اعترضت طريقة سيارة بيها مسلحين وانخطف مؤمن من يم باب الجامع ......للحكاية بقية

رايكم بالقصة يهمني 🖤