رواية حمائم تخشى الطيران الفصل الثامن والعشرون 28 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 .

🚫وصلو البارت 500 تعليق وتصويت لطفًا

اجة عمار ضل واكف ع راسي وكفة لحد ماطلعت
باوعتله ونترت ...شبيك انجلبت

عمار ...لا بس صاحبك مربط بالسيارة وذاب فوگه فرشه الحك كتله بأيدك لا يموت مختنگ
جبران ...حلو جيب مسحاة اريده يحفر گبره بأيده

ضحك تك خد وغمزلي ...جايبها شلون ندفنه لعد

مشيت ورا كال ...عوف سيارتك تعال وياي
ما جذبت خبر صعدت ويا وباوعت ورا

جبران ...وين العزيز؟

عمار ...جوة الفرشة وبعد ساعتين يصير جوة التراب

جبران ...عاشت ايدك

شغل وطلع التفتت باوعت وصحت ...مشاري تسمعني ما رد
عمار ...مطي غير شاد حلگه شبيك انته هم فاهي
جبران ...جا يون شي ، اسمع مطي وحگ اسد بغداد اذا ما كضيتك وطلعت حليب امك من خشمك شاربي ازينة بالقندرة

عمار صرخ بجزع ....يا طلابة الشااااارب الماتخلص
جبران ...مو انه حالف

عمار ...اكلك هذا خاف يسحرلنا ونسوي حادث ونموت
جبران ...اذا انت مجفنة شيسحرلنا سحورة خالتك

عمار ... يلا خوش
ضل يمشي بينه هوااي طلعنه لابعد نقطة بمكان عبارة عن هيمة نزلنا انه ويا صوت الهوى عالي وماكو العين ماتشوف بس هيمة صحراء لا بشر ولا بيها نفس لبني أدم

فتحنا الباب شلنه الفرشة وطلع مشاري مربط ومكرفص جنة گنفذ ، عمار كال جره
وراح طلع المسحاة دنگت جريته من رجلينه طاح راسه من السيارة للكاع طك طكه قوية عيونه تگلبن المطي

عمار شمر المسحاة وصفك ايدينا ينفضهن
اخذ الجكارة بين اصابعه وزفر الدخان
كال بحدة ...فضها وكتله ورانه طريق طويل

جبران ...تعال وياي فكه
عمار ...سهلة
طلع من جيبة شفرة وفكه صار حر يباوع علينا خايف هزيت ايدي ما عاجبني

جبران ...هاي تاليتك مثل الجريذي جوة ايدينا ومصيرك صار معروف

مشاري ...انا ماعندي شي معاكم ياي اخذ حرمتي ولدها كبر ويريد امه

قبضت ايدي وطگيته بوكسي على عينه
جبران ...تخسى وتعگب الشيهانة مرتي لا تجيب سيرتها على لسانك وحگ اسد بغداد اگصه واحطه بيدك

عمار باوعله بنص عين ...هيچ احسلك ليش ماتبطل تمسلت مشاري

مشاري ...انا من احجي معاها تهدك وتيي معاي ما تختارك وتفضلك على ولدها جبران هيه ماتحبك ولا تبيك

صيحت بغضب ...هذا راح يخليني اموته
عمار ...بكل الاحوال راح تموته جبران ليش ما تعوف النقاشات المالها داعي وتخلي يتوكل

طلع سلاحه سحبه والجكارة مستقرة بحلگه
وكفت نفضت ايديني وشمرت علي الشبل
اشرتله على الگاع
جبران ...گوم احفرلك حفرة هنا يله ندفنك بيها ومن تسولف ويانه سولف عراقي

عمار وجه السلاح علي وأشرله بطرف عينه على الگاع طلعت جكارة وارتچيت على السيارة مشاري كام خايف كض الشبل وبدأ يحفر بس ايديني يرعشن و وجهه قطرة دم مابي انخطف لونه

سحبت نفس من الجكارة وزفرته
وسألته بحده ...شرايك تسولف ويانه شوية يمكن نغفرلك
رفع عينه باوعلي

جبران ...احجيلي مثلا منو وياك من اهل بيتنا يساعدك ولا تكلي محد وياي احطك وادوس بمصرانك الا اطلعهن من *****

مشاري ...ما اعرف اهلك انا
باوعتله بطرف عيني ...تمشيهن علي كلهن طاكات حدر وجليني مثل ما راح يطكن بلاعيمك

بلع ريگه متوتر طاح الشبل عمار زمخ بي بغضب
...شيله واحفر عدل واحجي انطينا اسباب تخلينا نعذرك ونسامحك وننطيك فرصة ترجع لبلدك سالم غانم

جبران ...شعلان وين وصگر شصار ويا

مشاري ...صگر مادري بي وين انحاش من البيت وشعلان يم اخته منيرة تربيه مافيه الا العافيه

جبران ...خوش حجي نرجع لاهل بيتي ياهو منهم متعاون وياك
رفع حاجبه
...باوع عدل لا افگس عينك

مشاري ...انته راح تذبحني السكتت والحجيت خليني اموت واسراري تضل ابطني

سحبت نفس من الجگارة وهزيت راسي براحة
حجيت بهدوء ...راح اطلعهن ويا مصرانك

عمار ...اذا رضيتنا ما تموت نعوفك بس بشروط
مشاري ...شروط؟

عمار ...اي تحجيلنا كل شي بالتفصيل كل الاسرار ومن نعوفك تسوي نفسك ماتعرفنا ولا شايفنه وتطس منا طسة قوية بحيث بعد مانشوف خلقتك الزفرة

باوعتله بنص عين ...گول والعباس؟

عمار ...ما احلف بالعباس اني من ذاك الصوب

جبران ...احلف واكل تبن تروحله فدوة سبع الكنطرة هذا

رفسني برجلي ونتر على مشاري ...احفر

رجع يحفر وايدينا يرعشن ويرفع علينا يباوعلنا بتفكير
جبران ...عوفه يحفر ويموت هذا بايع عمره مايريد ينكتبله عمر جديد

مشاري ...لا ابي عمر ثاني وفرصة بس ما ظامنكم اخافنكم تچذبون
جريت السلاح من عمار ...الا افرغة بحلگك منو يجذب ولك

مشاري ...السموحة خاني التعبير السموحة

جبران ...جذب ما نجذب علينا الك التهمبل احفر گبرك واحجي حجي يخلي الكبر ينطم وانته مو بي واشتري لروحك عمر تلحگ اتوب بي وتستغفر ربك على ذنوبك

ضل يحفر ويباوعلي ويرجع ينصي
مشاري ...هدير تتواصل معاي وهيه يابتني للعراق
بهت وجهي وفكيت حلگي
مشاري ...رادت تطرد شيهانة من البيت وتخليها كبل كل شي تنطي كل شي تملكه لهدير
جبران ...تخبلونها قصدك مو تنطيهن برضاتها
هز راسه

جبران ...انطيتها سحورة تخبل بيهن الشيهانة
هز راسه بدون حجي
...بس انته ساحرلها من كبل هذني مو اول شي
هز راسه
نترت ...احجييي ك*** سحورتيشش مسويلها

بلع ريگه وگال ...مرض وزنا واكره الناس فيها اليشوفها يشوف شيطان واليحبها يبتلي معاها وما يرتاح .

عمار بغضب وعلامة الدهشة معتلية ملامحه ...خسيس

جبران ...ورجعت سويتلها سحورة من انسجن انه
هز راسه
...انتم سبب سجني انتم خليتوها تسجني اسمع عماررر اسمع
مشاري ...مو بس احنه واحد اسمه بشير راضي تعاون معانا وصل كتابات لهدير وهيه وصلتهن لشيهانة

انه وعمار باوعنا واحد بوجه الثاني بصدمة
جبران ...انذااال شمعرفكم بي
مشاري ...هدير تعرفه وتعرف هو يكرهك لانك انقذت عمار من راد يذبحه
تعاونا احنا الثلاث ودخلناك سجن الظن جان راح تنعدم بس طلعت گطو بشبع ارواح

عمار بغضب ...كتلك بشير نذل وهو ورا كل شي ماصدكتني اسمع وهاي النذلة اني الها تتعاون ويا عدوي ضدك لانك نقذتني من الموت

جبران ...اسكت شوية مشاري شنو اكو ابطنك اسرار طلعهن بديت اغير نظرتي بيك
اذا انتَ طلعت مو وحدك باللعبة ليش اكتلك لازم العقوبة تتوزع على الكل

مشاري ...انا ماتكتلني تهدني وارجع لبيتي ولا جنك شفتني ولا جني شفتك

هزيت راسي اي وشمرت المسدس على عمار ، سحبت جكارة ثانية
جبران ...هسة عرفنا انته صدك سحار طلعت وسحرتها وتتعاون ويا هدير
ما معقولة تتعاون وياها وماتعرف سبب كرها لاختها؟ ليش هيج تريد تسوي بسهير لازم اكو سبب مقنع

باوع لعمار خايف لان احقتن لو بيده هسة يدفنه وهوا عايش
مشاري ...خله يوخر شوي هذا هد حيلي
عمار ضحك مستهزأ ...واحد مثلكم شيطان رجيم يخاف من مسدس احجي ومالك دخل بيه احجييييييي حيوان

هز راسه وباوعلي اشرتله ...استمر احفر خاف تجذب ما اطولها واسمعلك ماعندي وكت اكضك وادفنك گبل

مشاري ...هيه جانت تبيك هدير ومن طالبها مهيب شهدت ضد اختها كالت شيهانة تحب مهيب وتصعد للسطح تنطي رسائل وتحجي معاه
جبران ...منو كلك
مشاري ...هي كالت ، رادت مهيب ياخذ شيهانة ويخلالها الجو وتصيرلها فرصة تتزوجك ومن ردت للعراق حاولت توصلك بكل الطرق بس انتَ ما حسيت ولا انطيت بال

عقدت حاجبي مستغرب والله جنت اظنها طبيعية وتتصرف بطفولة ماادري جانت تحبني
حجيت ...كمل
مشاري ...قرار الاهل كسرها من طلبولك ملاك وزاد نار حقدها وياها نار غيرتها من شيهانة وباقي خواتها تحسب اهلها يحبونهم كلهم الا هي محد يريدها ويحبها ضلت تغار وحقدت وبعدين طمعت بمال اهلها كالتلي بالحرف الواحد

هدير "ما حصلت حبهم ومداراهم ولا تنعمت بحنانهم اريد اتنعم بفلوسهم''

هزيت راسي مستنكر ورجعت خطوتين ليورا وكأن الصورة وضحت عندي والضباب بدأ ينزل ويوضح كلشي مثل عين الشمس

مشاري ...رادت مني اساعدها بسحورة كانت تتصل بيه وتحجي معاي بالخفية خصوصا ورا زواجك من ملاك وانا بذيج الفترة ما متزوج اختها بس تعرفني وتعرف ولدي صكر بحكم احنه ومهيب گرابة وداشين طالعين عليهم يعني اهل

جبران ...سويتلها
هز راسه ...اي هواي سويت بالمقابل انطيها سحورة لاهلها ادزهن الها بيد صديق يجي للبصرة تلتقي بي من جانت بالمعهد وتاخذهن منه
السحورة هذني عمن عيونهم عنها وعن سهير بعد ردتهم ينعمون كلش حتى من اجيب سهير لسجني محد وراها ولا احد يهتم الها يصير حجاب على عيونهم وما يشوفون ولا يهتمون

عمار ...لا حول ولا قوة الا بالله ولكم شنو انتم شياطين

مشاري ...انا اتعامل ويا الشياطين بسحورتي اسوي اقوا انواع السحر ، السحر الاحمر والاسود والمقابر والماكول والمشروب والمبعوث عن طريق الريح

عمار ...اسكت كتلك اشرحلي شنو اريدك تشغلني وياك

سكت ورجع يحفر
جبران ...ورا كل هذا شنو سويتو انته وياها
مشاري ...سكتنا بيت عمك وعميناهم واخذت سهير وبعد ما انحاشت مني سهير رجعت سحرت الها وقبل فترة تواصلت وياي هدير طلبت اسحرلها من جديد وصار بيناتنا اتفاق توصل السحر الماكول والمشروب لسهير وتخبلها وتعميها وتخليها ترجعلي بالمقابل انا اخلي سهير تتنازل بكل شي تملكه لهدير .. احنه بيناتنا واحد مشترك وابد ما ننكطع صار سنين

جبران ...منو؟

مشاري ...مو شغلك

كلبت عيوني بضجر...انت ليش تجيب منيتك بأيدك
مشاري ...بس هدني وبعد مايربطني شي بيكم اكطع علاقتي بالكل
جبران ...سؤالين ثنين مالهن ثالث اول واحد اريد اعرف ياهو هذا العدكم تواصل ويا وشريك وياكم والثاني اريدك تجاوبني علي ب اي لو لا
"هدير حركت اهلها؟"

رفع عينه باوعلي بنظره غريبه متفاجئ ...ماعندي علم شلون اجاوبك اي لو لا

جبران ...مشاري متاكد؟  قلصت عيوني بشك
رد بكل ثبات .. متاكد
جبران ...هذا الشخص منو البيناتكم ويدري بهدير تحبني

مشاري ...لا مايدري بيها تحبك لو يدري ما صار مثل الكلب المطيع الها يلهث الها ان حبت شمرتله عظم وان قست عرضت عنه وخلته يتمرغل كأنه كلب اجرب يحكه جلده

ضليت مبهوت كتله مرة ثانية ...من اهلي ؟
مشاري ...مادري شتكول انته

رديت بغضب من بين سنوني ...ليش تخرب على روحك
مشاري ...مو من صلاحياتي اگول جبران هدني وانا اهدكم ماراح تشوفون وجهي
جبران ...كلي هذا الشخص ياهو وانه اهدك

غمض عينه بقلة صبر وزفر ...لو تذبحني صج هم ما اگول

عمار ...ترررة كطعت كلبي تحجي لو امدك بالكبر المحفور هذا
مشاري ...تذبحني وما احجي هذا اخر حجي عندي انطيتك اسرار مالازم تطلع واكو اسرار لزوم تضل مضمومة

جبران ...عماد اخوي هذا الشخص؟

ضحك تك خد مستهزأ
مشاري ...هذا البشر ظاهره انسان وداخله شيطان
لابس وجه الحمل ويخفي وراه وجه الثعلب الماكر
يذبح ..ومحد يلاحظ
يحرگ .. ومحد يحس
وهوَ جان رابعنا انا وهدير وبشير بسجنك

طفرت علي طيحته وقضيت بي التوبة
كضيته من ياخته وجريته شمرته بنص الحفرة
جبران ...تگول ياهو رابعكم لو تتشاهد هاي اذا انقبلت شهادتك يالمشرك
عمار ناوشني السلاح

يباوعلي مبحلق عيونه وجهته علي ضحك ضحكة شر وتمدد صار مثل الشيطان ولا چنه نفسه اليرجف وخايف اول ما جبناه
تفلت علي ونترت ...احسبلك من واحد للـ3 وراها انطيك فرصة ثانية وحدة اذا ما تحچي اخلي الطلقة بنص راسك

مشاري ...انتَ وعدتني اذا حجيتلك تهدني

ضحكت تك خد ...انه الثعلب المكار الثاني اليخفي وجهه الثاني واذا ما حجيت منو رابعكم تنكتل

ضل يضحك مثل الشيطان طلعت من الحفرة ريحة نتنه ضلت روحي تگلب جان متطمن وما يحچي
جبران ... واحد ... ثنين ... تلاثة ... سكتت لحظات سكت مبتسم ومرتاح

زميت شفايفي بغضب وضغطت الزناد ثارت الرصاصة واستقرت بنص رأسه ، درت بسرعة زحفت على اركبي ذبيت من راسي

عمار ...والله بطل خلصت العالم من شره هذا هاجم بيوت ومسوي مصايب

ضليت اگح انطاني ماي من السيارة غسلت وجهي وتمضمضت
التفتت على الحفرة وگلبي صار يدك بكل جسمي حسيت بطاقة غريبة وضيق ضاكت علي جنها گبر

عمار ...لا تحس بتانيب الضمير ولا شي مجرم ابن مجرم ويستحق يموت
لا تظن يطب للجنة لانه مقتول هوا كافر وعبد للشياطين

باوعتله وكمت وكفت امشي لبعيد ومخلي ايديني على راسي
شكد كلبي قوي بس ما ظنيت بيوم تطلع مني واكتل بشر
عمار صاح ...والنبي محمد هذا كافر وعبد للشياطين غير سحار انته كتلت واحد خنزير نجس عفية بطل والله بطل

شال الشبل ضل يدفن بي كعدت مقابيلة مخلي ايديني على راسي اشوفه يهل التراب علي مادري شلون الحفرة انملت وذب الشبل بالسيارة
وباوعلي مخلي جگارة بين شفايفه شالها بين اصابعه ، نتر وهو يأشر براسه ع السيارة
عمار ...گوم مطي

كمت للسيارة كعدت جريت نفس مثل الغرگان شغل السيارة شطحها وطلع كال
مشاري ما جاي للعراق بشكل قانوني يعني احسب حسابك محد راح يحس بي مات

جبران ...شمدريك؟
عمار ...غير كلشي يمي احنه الحكومة
تنفست براحة غسلت وجهي وشربت ماي
جبران ...خرا بغيرته غير ريحة خايسة تفوح منه
عمار ...شيطان شمتوقع

سكت شوية وگال بنتره
...مطي ليش تگلي احلف بالعباس گدام مشاري
...تحلف بي وغصبا ماعليك تاج راسك هذا

...عمي تاج راسي ودخيل اسمه بس اني جنت اچذب گلت اذا انته ما تكتله اني اكتله

ضحكت علي هز ايده وغمني
عمار ...ولو اني ماعرفه زين بس انته خوفتني منه تگول يسطر ابو فاضل هم كمت اخاف كلت هسة احلف جذب وأأيبس بمكاني

ضليت اضحك بدون ما ارد وجسمي كله يهتز من الضحك وصلني للبيت من نزلت غمزلي وكال
...خوش سفرة كل ما تضوج گلي نعيدها

غمزتله وطبيت للبيت لگيتها كاعدة بالباب مال الاستقبال من برة لامة رجليها وساندة عكوسها عليها
مخليه ايديها ع خدودها بضجر من شافتني طبيت قلصت عيونها تباوع تريد تميزني لان المسافة جانت جبيرة شوية وضوا قوي ع عيونها

من ميزتني طفرت تركض الي انخمش گلبي كلت صاير وياها شي فتحت ايدي الها وكتلها
...شبيچ؟
ذبت روحها علي حضنتني وباستني برگبتي حيل شمتني شم

رفعت راسها تضحك ...عمتي كالت احنه تزوجنا
جبران ...اي شعبالچ صرت رجلچ
ضحكت وضلت تتمايل مثل الاطفال وتحجي بدلع
شيهانة ...اي اني هم تذكرت بليل كتلي تركصلي

حضنت خصرها ومشينا للبيت
جبران ...بليل نركص سوية
شيهانة ...احلف
...اي والله بس ما تذبين علي ماي لو تكتليني

هزت راسها ب لا كالت وين رايح منا غرفتنا وكتفت ايديها تباوعلي بعيون بريئة بيها لمحة حزن
جبران ...غرفتي القديمة فوك بعدين انزل ملابسي تجين تصعدين وياي ابدل واسبح؟
هزت راسها ومدت ايدها الي كضيتها وصعدنا سوية تضحك بدون سبب وتباوعلي عيونها تلمع

انفتح باب شقة عماد وهدير مدت راسها تباوع يمكن طلعت ع صوتنا
باوعتلها بنص عين لعبانه روحي منها وفتحت باب الغرفة دخلت سهير قبلي وسديت الباب وقفلته

راحت بكل هدوء گعدت على الجرباية مخليه ايديها بحضنها لامه شفتها للداخل وتتفحص الغرفة بنظراتها كأنها اول مرة تدخل الها

هدوئها يريحني وينطيني امل جبير بشفائها القريب
فتحت الكنتور اطلعلي هدوم اشوفها ما ثابتة بكعدتها تقدم جسمها وترجعه وتباوع للغرفه
باوعتلي وريحت جسمها ثبتت وطلعت شفتها من حلگها

شيهانة ...غرفتك حلوة يصير اصعد اعيش بيها يمك احلى من غرفتنا الجوة
جبران ...لا ننزل احسن انه احب الغرفة الجوة بيها اثر منج بكل مكان وريحتچ

ضحكت وكالت ...خالتك راح تعرس

عقدت حاجبي كملت ...عواصم راح تاخذ عصفور ابو الغاز

ضحكت وتذكرت امي مالتلي خالتي عواصم راح تتزوج بعد اسبوع تاخذ واحد يبيع غاز
شيهانة ...تاخذني العرسها
جبران ...صيري زينة واخذج
شيهانة ...جا انه زينه
جبران ...ليش تكولين كدام ابوي جبران كال اركصلج دام تحجين هيج يعني موزينة

ضحكت وباوعتلي ببراءة ...بعد ما اگول جبران اخذني للعرس فدوة
جبران ...صار واشتريلج هدوم يخبلن تطلعين بيهن اميرة
شيهانة ...اريد تنورة كصيرة تطلع سيقاني وقميص مدلع
ضحكت وهزيت راسي ...صار سهلة وبعد

شيهانة ...كعب عالي ومكياج
جبران ...تدللين ، انتظريني اسبح واجي

شيهانة ...اضل كاعدة

باوعتلها بتمعن خليت ملابسي على صفحة وتقربت منها كضيتها من اجتافاتها ونصيت راسي يم اذنها
همست واني استنشق عطرها برغبة
...تمددي اسبح واجي انومچ بحضني

رفعت رجليها من اجتافاتها نومتها ع ظهرها غطيتها ونصيت اكثر همست يم اذنها
... لا تنامين انتظريني انه انيمچ

غمضت عينها وهزت راسها اي

سبحت بسرعة كل ما اغمض عيني يجي منظره گبالي نشفت روحي بسرعة حتى اطلع واصير يمها وانسى كل شي يضوج الخلگ صار اليوم

لگيتها متمددة مغمضة عبالي غفت بس من حست بخطواتي فتحت عيونها باوعتلي
مشطت شعري ورشيت عطر ، طفيت الضوة ضل بس ضوة خفيف منتشر بالغرفه من ورا البردة

تمددت بالجهة الثانية وتقربت منها رفعت روحها بسرعة ونامت بحضني نرسمت على وجهي ابتسامة وحسيت بحزن اتجاها ادري بيها ضايعة و تحس روحها وحيدة رغم كثرت الناس من حولها
تريد قربي وحضني حتى تحس الها احد وماهي وحيدة

لميتها بحضني حطت راسها على صدري وحضنتني حيل ، ضليت امشي ايدي على شعرها واحس جسمي كله يرجف ينكت نكت اول مرة تصير قريبة مني بهذا الشكل بظرف عادي ومابي خوف واذية ومشاكل

شگد شلتها وحضنتها بس ماحسيت بشي غير خوفي عليها وألمي على حالها هاي المرة كلشي غير

سحبت خصلة من شعرها اشمها وابوسها حسيت انفاسها انتظمت ونامت غمضت عيني مرتاح وغفيت وهي على صدري نايمة مثل الملاك وريتي منتعشة بالهوى الشايل عطرها ..

.......

دنيا ..

احتل الحزن گلبي وجودر بي ودگ بي وتاد قوي
لدرجة عيني ما بطلت دمع وتمرضت بنفس اليوم الخطبتني بي عمتي لأباذر ماكدرت حتى انزل جسمي تأذة وصرت ما اكدر حتى اگوم من فراشي

صعدت امي تحجي وياي گبل كتلها ما اريد ابا ذر ما اريد
حاولت تقنعني بس راسي بالف سيف ما قبلت ضليت ابجي واستخدمت الدموع كسلاح عسى ولعل ينقذني من هاي الخطبة الي ممكن تدمرني وتدمر الباقي من حياتي

ضاجت مني ونزلت بعد ما حجت وياي كومة حتى تقنعني

مو بطبعي اخلي امي تزعل بالعكس اني اكثر وحدة احب ارضيها وارضي والدي واشتري خاطرهم بس هذا الموضوع مو بيدي ابد مو بيدي گلبي هواه لمؤمن شلون اخذ اخو

ضليت اتگلب بس مثل الجواي نار وعيني كل شوية تنفتح وبس افتح عيني تنزل دموعي وتلزمني الشهگة ، درت وعيني عاندتني وباوعت للشباك وضلت تعاندني تريدني اكوم افتح الستارة واشوفه

غطيت وجهي بمحاولة فاشلة مني للابتعاد عن هذا الشباك حتى انساه لان مابيناتنا نصيب وطرقنا مسدودة

ومن بعد محاولات عديدة واستغفار ذبيت الغطة وكمت رجليني يرجفن وايدي ترتفع تلزم طرف الستارة وتنزل
غمضت عيني اخذت نفس عميق وشلت طرفها

جريت نفس اداري بي روحي لزمت الحايط بأيدي الثانية حيلي رايح
بسبب قرب الشباك اشوف كل تفاصيله المسافة بين شبابيكنا قريبة جدا عكس المسافة البين گلبي وگلبه

باوعتله ومثل كل ليلة يقرأ وجها لمكتبه الصاير يم الشباك ، نرسمت المسافة البين گلوبنا كدام عيني
البعد بينهن مثل بعد الجنة عن الكافر

تنهدت وخليت راسي على الحايط اشوفه يقرا وبين لحظة والثانية يشيل ايده يفرك عيونه ويخلي ايده على عيونه لحظات ويرجع يقرا مثل التعبان

جنت مطلعه بس عيني مستحيل يشوفني او يلمحني خصوصا بالظلمة ماكو ضوا غير يمه غرفتي وظهر البيت اضلم

مع هذا رفع راسه وصارت واضحة نظراته لشباك غرفتي سديت الستارة بسرعة گلبي يخفق
ركضت تمددت وغطيت حتى راسي ادري مستحيل يكون شافني او عرف اني واكفة اراقبه بس ليش باوع؟

ضلت تخطر على بالي افكار سوداوية وابجي مقهورة
گلت هسة اخذ عني نظرة موحلوة وعباله من باوعتله ببيتهم اني موزينة واباوع للزلم

واني والله ولا اباوع للزلم بس هوا اباوعله اصلا من شفته بعيني ما حلى زلمة ثاني ولا حسيت اكو زلمة يسوة مني نظرة غيره

ضلت امي تلح علي واني تمرضت كلش من القهر كامت راحت لعمتي وكلتلها دنيه ماتقبل سديها داده لا نوصلها للزلم ويخلون دنيه امام الامر الواقع ويضلمونها وهي تظلم اباذر
وعمتي صدك سدتها بس دزت طوعة حجت وياي وتحاول تقنعني
بس مااخذت مني لا حق ولا باطل

وانسد من الموضوع .. من انسد وسمعت اباذر سافر لايران ارتاحت نفسيتي وصحيت سبحان الله وكأن المرض كان ملازم روحي مو جسمي

بس ما تبت ضلت عيني تراقبه كل يوم وگلبي يلهج بأسمه ، كأنه صار منهج الدنيا هذا المؤمن
وصار على دنيه تختمه كل يوم وترتل تسابيحه وتسجد لرب العشگ تطلب منه يكتبلها الدنيه ويا هذا المؤمن

رجع خطيب طوعة واجة وقت زواجهم طلبتني طوعة اروح اساعدها ببعض تفاصيل العرس والتجهيز وصلني سيد هاشم الهم دكيت الباب طلعتي طوعة سلم عليها هاشم ورجع لبيتنا
من دخلت للبيت لفيت روحي بالعباية لف خفت يطلع سيد مؤمن بوجهي واتفشل واتذكر كلشي مر علي من اول يوم شفته لحد هاي اللحظة

خصوصا الوقت كان عصر يعني لا دوامات ولا اشغال بالعادة حتى شغلهم يلزمونه العمال العصر وهم يرجعون للبيوت يرتاحون

طوعة ... اخذي راحتج ترة محد هنا اباذر رجع امس وهسة معزوم يم صديقه وامي راحت للسوك تجيبلي كم حاجة اخذها ابوي

ما جابت سيرة مؤمن خجلت اسألها عنه

صعدنا فوگ نزعت عبايتي وبدت تطلعلي مكياجها المشتريته وملابس النوم تراويني
طوعة ...جابهن حبيب الگلب الي من لندن شرايچ؟

دنيا ...يخبلن بعد روحة تكطعينهن بالعافية
طوعة ...خدودج صارن حمر
غطيت حلگي وضحكت ...حتى خدودج صارن حمر
نصت خجلانه تغطي بوجها

دنيا ...والله عيب شلون اشتراهن الج ومنين يعرف
طوعة ...ما اعرف لاحظته متغير حتى لبسه وكلامه مو مثل مؤمن
مؤمن راح ورجع نفس ما هو ولا تغير ولا شي

من جابت سيرة مؤمن صرت كله اذان صاغية
دنيا ...مؤمن انسان عنده شخصية قوية وراكزة لا يغيره مكان ولا يغيره صديق يضل مثل ما هوا

طوعة ...اي والله بس تغيير خطيبي ما مضوجني بالعكس مفرحني بالحقيقة اني اكره التعقيد العايشين بي وكنت ادعي ربي يومية كون يتغير شوية من يشوف الناس هناك بلندن ويعاشرهم

هزيت راسي ...ما طول تغييره ما يأثر على خلقه ودينه كلش زين

طلعت صبغ اظافر وگالت ...انطيني اصبغلج
دنيا ...همزين عندي عذر شرعي شكد اتمنى اصبغ من ليلى بس استحي واخاف امي تلگفني مصبغه

طوعة ...ليلى تجنن هنيال قيس عليها الطول طول والجسم يخبل والشعر تمري طويل تعجبت من شفتها عدلت شالها بالعزيمة لونه يجنن
والخد ريان ماشاءالله ماشاءالله لا احسدها عيني باردة عليها

دنيا ...صدك جميلة ما تشوفين قيس كتل نفسه عليها كتل ضل بواجي يبجي عليها

طوعة ...اي بس ترى احنه ما ناقصات هم حلوات شبينه
دنيا ...الحمدلله ، مع هذا تضل هيه تخبل تسحر العين واحب رقتها ونوثتها من تحجي صوتها ناعم وتطلع الحجاية من حلگها برهاوة وكانها تتغزل بالكلمة قبل لا تحجيها

ضحكت وباوعتلي ...ترة حجيج نفس حجيها وانتي اميع منها هم تجرين الحجاية جر وتحجين بصوت خافت نفسها

رفعت ايدي بعد ما كملت الصبغ انفخ على اظافري وهي تصبغ الايد الثانية
دنيا ...يخبل هذا اللون
طوعة ...اي زهري
دنيا ...قبل لا ارجع للبيت اشيله ذكريني

هزت راسها عاضه لسانها وتصبغ الايد الثانية بتركيز
طوعة ...اظافرج حلوات شكل ظفرج طويل حتى من تقصينهن مايصيرن صغار مو مثلي كل ظفر مدوحس گوة مخليه بيهن طول بسيط وكل جمعة اقرض منهن شوية ماريدهن ينعلسن علس

دنيا ...قل اعوذ برب الفلق
كرصتني تضحك وكالت ...اني احسد لچ؟

عيبت عليها وضليت اباوع لاظافري فرحانة وانفخ عليهن
طلعت مسكارة عيون ولا مرة بحياتي مخليه منها
كالت ...خليني احطلج من مكياجي وغسلي قبل لا ترحين وحتى اذا ضلت بقاية مكياج ماعليج اثم معذورة ماتصلين

دنيا ...اكلج جبتيني يمج اساعدج لو نسولف وتمكيجيني؟

طوعة ...ردت اشبع منج قبل الزواج
تنهدت ...شلون افارگچ دنية انتي عزيزة

من شفتها راح تدمع كتلها ...خليلي مكياج بس الله عليج ماكو اخوانج ما موجودين؟
طوعة ...لا والله محد واحنه كاعدين بالغرفة مالتي حتى لو موجودين مايشوفونج متمكيجه

هزيت راسي خلتلي مسكارة عيون ، وحمرة وردية وخرت راسي وهزيته لا
طوعة ...خفيف والله بس شوية
لزمت وجهي بقوة وخلتلي باوعت لروحي وجهي طالع حلو وتغير خصوصا عيوني

بس رأي طوعة يختلف كالت ...عيونج موتني جنج وحدة نعسانة وعدها هموم الدنيا كلها ولا يبين بيهن الفرح

ضحكت وضلينا نرتب الاغراض اجت عمتي وصاحت علينا كلت لطوعة تأكدي اخوانج هنا لو لا

طوعة ...وين اباذر معزوم عشا ومؤمن احنه ما نشوفه وابوي مادري وين مادخل هاي امي وحدها وحتى لو هو عمج مو حرام

هزيت راسي ورفعت ايدي اريد امسح حمرتي طكت ايدي وكالت
خليها علمود امي تشوفها عليج وعلي

عمتي صاحت وينجن

استعجلتنا نزلنا رفعت اصابعي امسح بيها بأيدي طوعة خزرتني وسحبت ايدي

عمتي ضلت تمدح بينا وتندعيلنا بالسعادة والحياة الحلوة مثل وجوهنا

كعدنا يم عمتي تعزل بالاغراض وجانت مشترية اغراض للبيت
عزلت كلشي وانطت طوعة اغراضها تصعدهن اخذت الاغراض الجايبتهن للبيت تقريبا كلهن جانن للمطبخ ومشيت بيهن للمطبخ كالت من وراي
الله يرضا عليج دنيه ويهديج للبالي

خليتهن على الكاونتر وبيدي علاكه شكتها طوعة وطلعت منها الغراض ضحكت على حماسها ولفيتها زين ومشيت للباب الخارجي مال المطبخ طلعت جاي اشمرها بالسلة وشهگت مصدومة من شفت سيد مؤمن واگف كبالي بيده الصوندة يرش الحديقة

انصدم اكثر مني بس بسرعة تلاحق روحه واني نزلت رداني على ايدي
گال بضحكة ...شنو دنية لهاي الدرجة اخرع

غطيت حلگي بباطن ايدي مستحية من الحمرة ورفعت عيني گتله ...لا والله بس ما عبالي موجود

رد وهو مدنك ما يباوعلي ويرش بالحديقة
...والله هاي جيتي

دنيا ... هلا بيك

دخلت للبيت ركض وبأيدي امسح حلگي شفت المغسلة گبالي ركضت غسلت وجهي وافرك بعيوني راحت المسكارة بس ضل اثر خفيف وبقاياها برموشي وما طاحن دعيت ربي كون محد يلاحظهن وما يكتبلي ذنب لان ما متعمدة اطلع متبرجة كدام احد

ضليت اطيح الصبغ بأسناني اجت طوعة تضحك علي وشالته الي
وبالاخير كالتلي ترة ما يلاحظ هيج اشياء ولا حتى يباوعلج يمكن اذا نسأله دنيه يالون لابسه مايلاحظ

رديت واني ارجف ...اريد ارجع للبيت
طوعة ...دسكتي ترجعين شنو تضلين يمي لليل امشي بس نكمل عشا نصعد

مشيت وياها للمطبخ سيد مؤمن تحمحم ودخل مدنگ وگبل صعد ضليت ويا طوعة اسوي عشا ودخلت عمتي كالت تعاي دنيا احجي وياج شوية

لزمتني من ايدي وكعدتني على الكرسي كبالها ضلت تمسح علي ايدي بحنيه دنكت راسي
...سمعي بنيتي اباذر جاي علمود عرس اخته وابن عمه راح يضل فترة ورجع حاجاني عليج ليش ماتقبلين ونخطبج اله والله مو عن ابني وامدحه بس اباذر خلقة واخلاق ما تلگين منه لو تفرين الدنيا فر ولا عبالج مثل سيد مؤمن جدي وثگيل لا ابد ترى اباذر دمه خفيف ومرح وتتونسين ويا

الدموع تجمعت بعيني رفعت عيني ونزلتها بسرعة عضيت شفتي حتى ما ابجي
تنهدت وحجيت ...والله يا عمة ما اكدر اني ماريد اتزوج

...المشكلة بأباذر لو وين
...اباذر درة مال الله مابي مشكلة المشكلة بيه اني ماريد اتزوج والله

هزت راسها مقهورة وگالت ...والله مادري شكلج هوا هم حجة ويا ابوج ويمكن هسة حجة ويا سيد رحمن

شهكت ورفعت راسي بصدمة فاكة حلگي وعيوني ...هاي شوكت؟
...البارحة حجة ويا عمج علمودچ
ضحكت ولزمت ايدي ...عمج كله شنو عاشكها
كاله لا والله بس دنية خوش دنية ماريد افرط بيها

سحبت ايدي وكتلها ...عمة رايحة للغرفة فوك بس ... شسمة ...البس عبايتي استحي من مؤمن خاف ينزل لو يجي اباذر

سحبت روحي وصعدت فوگ روحي شايغة محاجي عمي وما طول محاجي عمي يعني راح توصل لابوي ويقررون عني وينطوني لابادر وما تبقالي حجاية

دموعي بللت خدي طلعت مني شهگة لا اراديًا حسيت وكأن البيت طاح على راسي
باوعت لباب غرفة مؤمن وانقبض كلبي والله احبه ياربي خليني اعيش مكسورة طول عمري ولا اخذ اخو شلون اعيش ويا بنفس البيت واشوفه يومية واني روحي تشوغ من ينذكر اسمه

فتحت باب الغرفة ورجعت عيني ارتفعت على باب غرفة اباذر
مادري شنو صار بيه وشلون اجتلي هاي الجرئة گلت بداخلي لو اله لو اضل عايشة طول العمر وحدي بس مال اتزوج اخو مستحيلة يمكن اموت من القهر قبل الزواج

مشيت بهمة لغرفته دكيت الباب صاح تفضل
كل ظنه واحد من اهله فتحت الباب ودخلت للغرفه وكفت متصنمة شفته واكف ناطيني ظهره ويعلگ بعبايته بالكنتور

التفتت مستغرب لان فتحت الباب بدون كلام وانصدم من شافني واگفة كباله بغرفته وعيوني علي تجري دموع

طاحت العباية من ايده وضل فاتح حلگه
گال بصدمة ...دنية؟!

مسحت وجهي حيل وحجيت بصوت مخنوگ واني مخليه عيني بعينه ابچي بحرگة
دنيا ...اي دنية الدايسة على الجمر من يوم الشافتك فاتح شباك غرفتك وگاعد گباله تقرا وما كدرت تگول اخ خافت تلتفت وتجرح حيائها ..
دنية اليرجف گلبها عليك بالوكت الماتذكر شكلي بي حتى ، دنية التوگف ساعات تتأملك من شباك غرفتها وتدعي الله يجمع گلبك ويا گلبها بالحلال

اشرت على روحي مقهورة وحجيت بغصة ...اني الدنية ما حاولت تغريك بغرورها ولا حتى بعفتها التستحي ترفع عينها بعينك وان سوتها تخلص ليلها تبجي من عفتها
اني الجنت على ذمته مارفعت عيني علي ولا بلساني تجرأت وگلت احبه

ولا رفعت ايديني وكتله ربي اجمعني بي جنت حتى من ربي استحي ما اذكره
وهسة لساني مايلهج غير بيا ربي اجمعني بالمؤمن الماتلفته الدنيه وروحه متعلگة بالاخرى وراحت هناك بيها

دنية الراح يفرضون عليها تتزوج اخوك وهيَ تبجي طول الليل من ألم حبها الك الماحاس بي

مسحت وجهي خجلانة من روحي راد يفتح حلكه ويحجي وهو متصنم مصدوم كتله

...احلفك بالخلقك وخلقني من ضلعك احلفك بـ الي اقتلع گلبي من صدري وزرعه بصدرك
تحچي ويا اهلك وماتخلي خطبتي من اخوك تصير والا والله يا سيد وحگ لوعات گلبي وشوغاته افضح روحي گبال اهلي واگللهم عاشگة وانتَ تعرف اليصير وراها

مؤمن ...دنية تخبلتي يابة شجرالچ؟
دنيا ...اني حتى منك گلبي جاز بس خربها ولا تخلي الخطبة تصير شلون احط راسي بحضن اخوك وگلبي وروحي يمك

فرك وجهه ودنگ بسرعه يفرك راسه وجهه انطعن متألم اشرلي بأيده اطلع وگال بصوت موجوع
...روحي يابة محلولة روحي دنية

طلعت ابجي وركضت لغرفة طوعة استوعبت كلشي حجيته وصلافتي ندمت على كل حرف طلع مني طحت من عين نفسي وكرهت الحب واليجي من ورا الحب
فتك روحي وخلاني رماد تمددت بفراشها ابجي وغطيت وجهي بربطتي

ليلى ... جهزنا كلشي لعرس طوعة هي بنت عم قيس والعريس هم ابن عمه بس مو مثل بيت السيد ابو طوعة هذول يمنه لا ذولاك بعاد

دزو عزيمة للشيخ زين العابدين وعزمو عمامي شگد فرحت من عرفت عزمو عمامي حسيت روحي شكد جبيرة والي قيمة ومقام

رحت لغرفة دنية بأيدي ملابس جديدة من عرسي لهسة مالابستهن دكيت الباب ودخلت شالت راسها باوعتلي ورجعت خلته على المخدة لونها شاحب وعيونها غايرة وحمر دم كد ما مريضة وتبجي

ليلى ...دنية جبتلج من ملابسي لان ماقبلتي تشترين ملابس كومي اختاري يله لا تفشليني

كعدت جرت روحها ولمت رجلينها لصدرها باوعتلي بضياع وبجت
گلبي ناغزني واحس حالتها بسبب حبها لسيد مؤمن لان من راحت يم طوعة ورجعت بالليل صبحت مريضة

كعدت كبالها جريت ايدها خليتها بين ايديني وحجيت وياها بحنية
...دنية الله عليج احجيلي شبيچ ولا مرتاحة روحي لوضعج ذيج الليلة من ضليتي لتالي ليل يم طوعة شفتي سيد مؤمن حجيتي ويا؟

هزت راسها اي وغطت وجها تبچي وتشهگ
جريت ايديها مسحت دموعها وحجيت وياها بصوت ناصي
...احجي شنو صار يمكن اساعدج ويمكن انتي مكبرة الموضوع واني اهونها عليج

هزت راسها عضت شفتها ونصت خجلانه وبدت تحجيلي كلشي صار ودموعها تجري وتشهگ

انصدمت من فعلها لان غلط وخصوصا هنا بالبيئة مالتهم وتربيتهم وعاداتهم السوته كلش غلط وما يصير بس ماكدرت اكللها انتي غلط واخليها تنجلط وتيبس بمكانها البنية رقيقة ما تتحمل

ليلى ...سمعيني السويتي ما اكلج صح بس هم مو غلط انتي نقذتي روحج ونقذتي اباذر
وحتى مؤمن
عقدت حاجبها تتسائل

ليلى ...اي والله لتباوعين هيج اني متأكدة مؤمن حجة ويا اباذر الله يعلم شنو بس واثقة ماجاب سيرة الصار گدامه وخلاه يبطل منچ
لان ع حجيج وحجي ام مؤمن لو ما اكو احد مخربها جان هسة اباذر خاطبج من عمي

هزت راسها اي
...تخيلي ما حاجية ويا دنية جان هسة انتي مخطوبة لاخو وگلبج يمه تضلمين روحج وتضلين مريضة وتتعذبين واباذر ما يتهنى وياج ومؤمن اكيد مو غبي حشاه وراح يحس بيج لان ماتكدرين تتحكمين بمشاعرج ونظراتج انتي شفافه سهلة القراءة
واكيد من يحس وانتي على ذمة اخو حتى البيت يعوفه ويهج وبهيج كلكم تتدمرون

موقفج مو صح بس نقذكم والله

كالت بخنگة ...صحيح بس خايفة يكون ماخذ عني نظرة موحلوة
ليلى ...سيد مؤمن انسان مثقف ماعنده هيج سوالف بس بعد لا تعيدينها وابتعدي عنه كلش هو هسه عرف مشاعرج اتجاها بعد اذا اله نيه يجي يتقدم وياخذج بظرف شهر شهرين
واذا ما اله نيه والله والله يا دنية يكون الله بعده عنج لان يعرف اشياء انتي ما تعرفينها

دنيا ...شلون اعرف اله نيه لو لا
ليلى ...فترة اذا تقدم هاي هيه واذا ماتقدم معناها ماله نية بالاخير ماكو شي واكف عائق بطريقكم

دنيا ...لا اكو اباذر
ليلى ...ما اظن مو كلتي طوعه وامه كالن ما يحبج بس مايريد ترحين للبعيد بحكم الولد كلهم تزوجو وتاليتج تتزوجين بعيد لو سيد غريب

هسة كافي حزن سلمي امرج لرب العالمين وكومي اختاري لروحج لبسة كشخي بيها بالعرس واذا صرتي سباعية وزينة وما بجيتي بعد تاخذينها هدية مو استعارة

ضحكت ومسحت وجها ...تكولين انسى الموضوع وما افكر بي بعد
ليلى ...احسن شي تسوينه

دنيا ...خوش لعد اني والله من ذاك اليوم ولا وصلت للشباك ولا شي واتوقع هو بعد السمعه حتى غرفته غيرها

ليلى ...اي مستحيل يفتح شباكه بعد
دنيا ...واذا فتحه
ليلى ...اذا فتح شباكه سدي شباكچ حتى يجي للسيد يطلبچ منه
مؤمن اذا وگف كبال شباكة وهو مفتوح معناها يريدچ

دنيا ...ما اعتقد يريدني بعد لسمعه مني من قلة ادب مادري شلون تصرفت مثل البنات الماعدهن حياء بس هذا الحب خبلني خلاني ما واعيه

ضليت اصبرها واقنعها وهي فرحت وارتاحت شوية واختارت لبسه للعرس كالت راح تلبسها
واني كتلها اخذيها هاي هدية وكومي اصحي يلا العرس باچر وانتي مثل الميت رجلها

ضلت تضحك واجة ابن مصطفى يدور علي يلهث گال عمة بالتلفون يردونج

عفت دنيا وراي تكلب بالملابس الباقيات ونزلت هاشم واكف قريب من التلفون كال خالتج هاي وطلع

حطيت السماعة على اذني سلمت عليها ردت وصوتها يرجف
كتلها مستغربة ...شبيچ خالة؟

نسيمة ...حور رجعت شاردة وياها ريحانة حامل .......للحكاية بقية

رأيكم بالقصة يهمني 🫣🖤

اربطو الاحزمة البارتات الاربعة القادمة راح تنقلب القصة ويتغير جريان الاحداث وندخل من بوابة جديدة لأحداث اقوى من السابقة 🖤