رواية حمائم تخشى الطيران الفصل الحادي وأربعون 41 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

...

وصلو البارت 1000 تعليق وتصويت ......

....

حسرتي
وشوغات گلبي ورجفة إيدي
وشردت عيونـي بشوارعكُم شگلهن

نهاد الخيگاني

اندمجنا وتقربلي اكثر لحد ما صرنه روح وحده وبنص العلاقة حسيته تعب بسبب كلبه هاي الايام ياذي
خليت ايدي ع صدره وهمست :- قيس وخر تعبت كلبك ليصير بيك شي

خله راسه برگبتي وهمس :- اششش حبيبتي ليلى مالج دخل بگلبي ..

جمدت تشنجت دفعت وجهه حيل رفع راسه مصدوم باوعلي متفاجئ خليت ايدي بوجهه ودفعته حيل ابتعد عقد حاجبه معصب

كعدت جريت ثوبي لبسته وعيوني تجري
قيس :- شنو هذا تصرفج الوقح ليش دفعتيني هيج هذا هم اسلوب بعمري ما سئت وياج التصرف وعاملتج هيج

فاطمة :- انتَ حقير

فك عيونه مصدوم جنت ابجي واحجي كمت بسرعة مد ايده جر ايدي حيل وجعني ع الفراش معصب
لزمني من فكي وخله وجهه كبال وجهي
نتر :- ليش تتجاوزين لو شفتيني انطيتچ وجه زايد
عبالج الاحترام ضعف مني وتردين تصعدين فوك اجتافي

دفعت ايده حيل :- واكبر حقير الصوج مو صوجك صوجي اني الرخصت نفسي وذبيت روحي بحضنك حتى انت ترضي اهلك واني انسيك ليلى واكونلك عائلة طلعت ما تستاهل

اذا تشوف روحك ما بيك خير وما تكدر تنساها ليش قبلت تتزوجني؟ كل ظني انت ردت تبني حياة بعيد عنها وياي ، وتنساها

رجع لزمني من فكي بس هاي المرة قوي الشرر ضل يتطافر من عيونه ، دفعت ايده بقوة وهو ينتر
:- ثمني كلامج تدرين بالظرف وتعرفين اني ردت وياج حياة بعيد عنها وردت انساها بس انتي ما تنطيني فرصة تدكين وتنوحين ليلى وليلى وبالاخير اقسمتي تسمين بنتنا ليلى

فاطمة :- تعترف بعظمة لسانك ما ناسيها
قيس :- ايي اييي دفعني ودار يلبس ملابسه ويحجي بغضب
:- ما ناسيها ولا نسيتها لحظة واني شكد ما احاول ما جاي انساها هي ماخذة گلبي وروحي شنو بايدي؟ هاا فهميني شنو بأيدييييي؟ انتي تعرفين كلش زين احنه ماعدنا سلطة ع گلوبنا والگلب اذا عشگ صعب ننسى وانتي خير مثال ، عشكتيني وما كدرتي تنسيني رغم حبيت غيرج وتزوجتها ضليتي تحبيني

فاطمة :- اذا تعرف روحك ما تنساها ليش تورطني وياك
قيس :- ورطتج؟ شلون ورطتج فهميني ترة صنتج لا خنتچ لا سبيتچ لا تصرفت وياج تصرف سيء وانت ترفعين صوتج واني اكلج نصي ماريد صورتج تخرب
انتي تلحين بموضوع ليلى واني اكعد اقنع بيج ماريدها
هواي حجيت وكتلج ما اريدها .. ما اريدها
صحت واني ابجي :- جذاب تريدها

قيس :- ما اجذب اني اختاريتج اكمل حياتي وياج ما جنت ناوي ارجعها بس هسة مجبور المرة ع ذمتي وعندي منها ولد

فاطمة :- جذاب تريدها انت تدري بروحك شنو گلت توة تدري بروحك شحجيت نايم وياي وتتخيلها وكتلي ليلى

صفن بوجهي كعد ع السرير بتعب ورفع ايدينه نصة وخلاهن ع راسه
فاطمة :- نايم .. وياي .وتكلي حبيبتي ليلى ولك شنو من بشر انت شنو من نفسيه شايل تتخيلها والله يعلم كم مرة سويتها وتخيلتني ليلى ونمت وياي

نتر :- سكتتييي
فاطمة :- ما تسكتني وما اعبرها الك هاي كافي وصلت حدها للبشر كرامة جنت اكول ما اهدم بيتي واشتت خاتون بيناتنا خليني صابرة وهسة يجي الحسن وينسى يلتهي تالي زدت ما نقصت

تريد ليلى رجعها واني عايفتلك البيت بس جهالي وياي مااعوفهم

ضل ساكت كمت فتت للحمام سبحت ودموعي تجري ع خدودي طلعت مالكيته شوية وفات ع راسه منشفه سابح بالحمام البرة

شافني صفن بوجهي مقهور نصة ورجع رفع عينه باوعلي ، شال المنشفه من راسه و كال بنبرة قهر
:- يشهد علي الله ما اتخيلج ليلى يمكن زلة لسان مو اكثر
لان موضوعها شاغل بالي

سكتت طلعت المشط وسحبت التخته كعدت امشط هو ضل يباوعلي تنهد واجة طبك رجلة كعد نص كعدة من جانبي الايسر وخله ايديينه ع رجلي
قيس :- مو حلفتلج كتلج ما اتخيلج ليلى وعمري ما تخيلتج غير مرة فاطمة تدرين هذا الشي حرام واني ما اسوي

سكتت ما رديت جنت مقهورة ومعصبة بنفس الوقت
قيس :- والله تعبتيني فاطمة كتلج ما متخيلج ليلى اني اسفه غلطان زل لساني والزلة جبيرة
بس ما تفكرين اتخيلج ليلى

خليت المشط ع الميز بغضب وضربت رجليني محترك دمي
درت وجهي علي جاوبته بغضب بس دموعي تجري
:- بس غلطت بأسمي صحتلي ليلى وانت نايم وياي تدري ليش زل لسانك
لان انت تبوسني وتفكر بيها تحضني وبالك وياها تنام وياي وتتمنى لو اني مو بحياتك وليلى تكون مكاني

سكت ما رد لم شفايفه مقهور
كتله كلام استفزه بي حتى احسسه بوجعي
:- تقبل واني نايمة وياك اذكر واحد غيرك؟

غمض عيونه بقلة صبر ونطيق بتحذير :- فاطمة!!!!

فاطمة :- فاطمة فاطمة فاطمة ، اعرف اسمي لا تضل تكرر بي وفكر بكلامي وشوف شكد الموضوع يوجع ويقهر من نايمة وياك وتذكر اسم غير مرة

كمت بسرعة توجهت للفراش عفته وراي ينفض غضب بس ما اهتميت لفيت روحي بالغطا غطيت راسي وغمضت عيني محترگة حرگ دمي يفور يغلي وارجف

هيج استرخصت نفسي هيج شفت وحسيت بذل وهو يكول اسمها بعلاقتنا
وحتى كرهته اتمنى اكوم هسة اكطعة بسنوني

ضليت مغمضة بجة الحسن شمرت الفراش لكيته بمكانه كاعد مرتجي ع الميز وقابض ايدينه مخليهن ع كصته و حواجبه معقودات وجهه معفوس مبين جاي يتألم

شلت الحسن افتر بي واسوي ممية رجعته خليتها بحلكه سكت ضليت واكفه لحد ماخلصها وهو غافي شمرتها ع الميز ورجعت لفراشي

نفضت كل الافكار من راسي واتخذت قراري النهائي ونمت

كعدت ويا الاذان ما نزلت صليت جوة صليت فوك وهو نزل وياهم بعد ماصعد ولا راح يصعد ماله عين

طلعت جنطة خليت ملابسي بيها وملابس اطفالي
ع ما رتبت الجنطة زين ونظفت الغرفة صار الصبح واسمع اصواتهم بالبيت والاطفال يتسابقون حتى ينزلون

مشيت لغرفتهم شفت خاتون نايمة شلتها واني امشي للغرفة احاجيها حتى تكعد
ضلت تونون دخلتها للحمام غسلت وجها صحصحت فركت عينها

فاطمة :- صح النوم ياحلو صباح العسل خاتونة السادة

خاتون :- سباح الهير

فاطمة :- يلا نسوي سبيحة
سبحتها ولفيتها بالمنشفة طلعت لكيته واكف بالغرفة شافني كال
:- يلا راح يتريكون

فاطمة :- براحتهم اني شوية وانزل

قيس :- فطومة ...... علوية ... شنو هاي الجنطة؟ يابة اني غلطت وحقج عليه وهذا راسج ابوسه
لزم راسي باسه ابتعدت عنه

خليت خاتون ع صفحة وطلعتلها ملابس لبستها جبت المشط ودهن الشعر كعدت امشطلها وهو صافن علي

شوية وجر حسرة مشة للجنطة فتحها وضل يرجع الملابس لاماكنهن ويحجي
:- مشاكلنا ما يطلعن برة الغرفة فاطمة

فاطمة :- شنو خايف تتفشل؟
خزرني
كملت كلامي :- لا تخاف ما اكللهم نايم وياي ويذكر ليلى

قيس :- منو كلج راح اخليج ترحين بس اذا خطار تشوفينهم وترجعين اقبل

فاطمة :- اني خطار بحياتك وهسة اجة وكت رجعتي لداري

فرگت شعر خاتون من النص وسويتلها گرون
برمت شعرها باصابعه صارن ملفوفات ، باوعتلها ورجعت باوعتله
:- انت هواي خسرت مناك زوجتك الاولى وابنك وهسة اني واطفالي لانك عديم مسؤولية وراح تضل طول عمرك تخسر عمرك ما ترسالك ع بر

قيس :- هيج صارت؟ ليش اني قصرت وياج لو وياهم بشي
فاطمة :- لا ما قصرت بس ماعندك قوة تواجه نفسك وتعترف انت ضعيف وظلمت نسوان ثنين بسبب ضعفك
لا كدرت تحتوي ليلى وتضل واكف وياها بمحنتها وتكمل وياها ولا صرت قوي ونسيتها وكملت وياي

قيس :- من الاخير احجيلي شنو مشكلتج ليلى؟ تخافين ارجعها؟ ماتردين تعيشين ويا ضرة

فاطمة :- هواي حجيت ع ليلى وحملتها مسؤولية حياتي الموحلوة وياك بس البارحة عرفت البنية مالها ذنب الصوج صوج زوجي الضعيف المايعرف يتحكم بنفسه ولا يمشي حياته بمسار واحد وصحيح

انت تمشي بمسارين واليمشي هيج عمره مايوصل لخط النهاية الصحيح

ضل ساكت عجز يجاوب لان يدري بنفسه يمشي الي ساعة وساعة ل ليلى
ساعة يريد يكمل وياي وساعة يريد يرجعها

فتحت الكنتور ضليت ارجع الملابس بالجنطة
:- اني بشر وعندي كرامه وانت هواي ذليتني هسة لهنا وكافي اخذني لاهلي وضل وحدك شوف نفسك شنو تريد افهم روحك حتى اني وليلى نفهمك ونعرف شلون نتصرف وياك

اذا تشوف نفسك تريد ليلى روح وكللها اريدك خليها ترجعلك بعد ما اتمسك بيك لو روحي تصير بيك

واذا شفت نفسك ماتريد ليلى وتريدني تعال واحجي واني ارجعلك اذا طاب جرحي منك وماضل ينزف

قيس :- حطيتيني بموقف صعب

فاطمة :- تدري شنو مشكلة ليلى؟
هز راسه :- ليلى عافت حياتها وركضت ورا واحد ضعيف مثلك ، خفت تواجه العالم خفت يلومونك  يمك جانت بايران وقبل لا تتزوجني مارحتلها ولا حاولت تتفاهم وياها ، ولا رف كلبك عليها رغم عشقك الها لانك ضعيف كلش
وهيه خاطرت وذبت روحها بحلك الموت حتى ترجع للعراق وتشوفك

قيس :- انت ماتعرفين الاعرفه فاطمة

فاطمة :- لو ليلى مسوية شي جبير غير سالفة الحزب جان كرهتها بس هي صارت واضحة السالفة والحمدلله البارحة بزلة لسانك فتحت عيوني وشلت الغشاوة من عليهن

كملت الجنطة سديتها
:- خاتون تعالي ننزل نتريك ونروح لبيت جدو

اخذتها نزلتها نزل وراي واحنه نتريك كام بسرعة وصعد شوية وكمت اخذت خاتون وصعدت لكيته يلبس بعمامته يعدلها

شلت الحسن غسلتله وبدلت ملابسه واني بدلت هو بعده بالغرفه يحجي ويا خاتون مخليها بحضنه
استرق النظر اله اشوفه يلعب بشعرها ويبوس بخدودها
وهي تلف ايدينها ع ركبته وتبوسه وتحضن بي

لبست جواريبي وحجيت ويا
:- وصلني لاهلي

قيس :- تدللين

رفعت عيني مصدومة وبسرعة نصيت ، حتى ماكرر اعتذاره وحاول وهنا صدك اثبتلي هو بايعني مو شاريني

لبست عبايتي وشلت الحسن نزلت لكيت البنات بالمطبخ وخالتي كلهن تفاجئن كلت رايحة لاهلي
ودعتهن وطلعت عبالهم رايحة خطار مايدرن رايحة زعلانة واريد اعوف قيس

صعدنا الهدوء سيد الموقف من وصلنا نزل ، نزل الجنطة وخاتون
التفت باوعلي وكال :- جايبج خطار ارتاحي وارجع عليج عكب باجر ولا تعانديني فاطمة

فاطمة :- الله كريم

دكينا الباب طلع اخوي سلمنه وفتنة جوة سلمت ع امي استغربت جيتي من الصبح بس ماعلقت وهم شافت الجهال مبدلين واني مبدلة وقيس وياي سلم عليها يلا طلع جرت نفس مرتاحة

ما حجيت وكلت زعلانة
هي سألتني :- شلون اوضاعكم انتي وزوجج مرتاحين ان شاءالله
هزيت راسي لا :- منين تجي الراحة غير دا افور يوم ع يا ساعة اطك واموت

باوعتلي بنص عين وكالت :- مو انتي الردتي ودكيتي الا هو من تزوج وخطبوج ناس خوش ناس وسادة وابنهم ما ناقصة شي جمال واخلاق وادب ومال رفضتي وسويتيها مناحة

فاطمة :- اي غير انتم تكولون فاطمة لقيس وقيس لفاطمة دائما وخليتوني احبه كله صوجكم

:- صوجنا اي ما كلنالج عشكي هي حجاية تنحجي ليش انتي تحسبين سمج الـي بـالبحر ومخططة وبانية مستقبل ويا براسج وهو ماصار رجلج

اني الف مرة حذرتج وكتلج لا تبنين امال ع حجاية ترة تكبرون ويصير مايصير
كتلج هاي حجاية ويمكن يتغير ويختار غيرج

ومن تزوج رفضتي الولد خوب سويتيها فاتحة من خطبج كلتي لو ياخذني قيس ع ضرة اقبل وهاي اجتج الضرة تحملي انتي الردتي هذا الشي

اني لحد اخر لحظة ما قابلة وادري بأبن اخوي يريدها ويرجعها بس انتي ااااخ منج
عضت صبعها مقهورة وكملت :- ماصدكتي ركضتي وهو الولد هسة مطلك حتى مالحك ينساها

بجيت مقهورة :- كلكم تلوموني حتى حنان تلوم بيه
ام فاطمة :- غير تسرررعتي بموافقتج اني والله العظيم ماردت تاخذين قيس عرفته ماراح ينساها ويرجعها بس كلت بعد اذا انتي قابلة وماعندج مشكلة حتى لو ضرة وسكتت

:- هسة شلون يوم داموتت

:- تحملي نتائج اختيارج وقيس لا اول ولا اخر واحد عنده نسوان ثنين شرطي علي يعدل بيناتجن وهاي هيه

باوعتلها بقهر :- شنو مستثقليني؟ لو ماتردين ارجعلج مطلكة

:- تردين تطلكين تطلكي بس اني امشي لاخوي واكلله خوية مالي علاقة بمشاكل فاطمة وقيس وخوتنا ماتخرب بسببهم
وانتي ويا شتردون تسوون سوو

:- يوم سمعيني هسة اني مشكلتي شنو مو بالعدل
خلي يضل يمها اسبوع ويوم بحضني قابلة بس كونه يريدني اكثر ويحبني اكثر اني مايهمني جسمه وين نايم يهمني كلبه ويامن والمشكلة رغم كلشي صار بيناتهم ورغم اني افوقها بالجمال وعشت ويا اكثر منها وخلفتله ثنين وكلبه بعده وياها

واني احس روحي ما موجودة ما يشوفني ما يلاحظني

:- والحل امي؟ تطلكين؟ العصر يرجع ابوج واحجي ويا كليله اريد اتطلك لان صارت عندي ضرة ما اتحمل يقبل؟ ما اظن يقبل هسة يكلج وين المشكلة التعدد مو حرام وقيس مجبور يرجع مرته علمود ابنه

:- انتم اهل الدين ما ينعاش وياكم ، عدكم اذا الشي حلال لازم نقبل بي حتى لو ما مرتاحين
يوم اني مامرتاحة ويا قيس

:- بشنو مقصر وياج بمصرف؟ ما محترمج؟ ضاربج؟ شاتمج؟ تطلبينه شي ومايقبل؟
هزيت راسي لا :- لا زين من هاي النواحي بس يحب ليلى مايحبني

:- انتي تدرين بي يحب ليلى وقبلتي صح خذيتي مطلك بس الدنيا رجعتها علي وجايبة ابنه وياها شتردين يعوفها علمودج؟ لو يعوفج علمودها؟

ما يكدر ثنيناتجن امهات اطفاله صعب يعوف وحدة منجن تقبلي وقبلي بالمكتوب

:- تدرين اني شنو اكول
اكول من كد مايحبها الله قسملهم رجعه رغم صارت رجعتهم مستحيلة لان تزوجني وخلفنا

:- اي والله ، فطومة يوم حطي روحج مكانها بنية وحيدة وماعدها احد غير هذا الطفل تكدر تنطي؟ ماتكدر زين البنية صغيرة وحلوة وعليها العين صعبة تضل بهاي الوحدة طول العمر تلكين الطامعين بجمالها وراها واليشوفونها وحيدة وراها وهي هم تعيش بوحدة والوحدة صعبة ف اذا يجي يوم وتقرر تتزوج هاي اذا تطلكت من قيس
بهاي الحالة خوالج يطالبون بهادي مايقبلون يتربى بحضن زلمة غريب وياخذونه منها ف هي هسة راح تنجبر تضل وحيدة هم خطية شنو ذنبها حطي روحج مكانها

وتخيلينا ميتين وماعندج احد بهاي الدنيا

:- هي خطية واني مو خطية خذيته مطلك ومرتاحة بس اني مرته تالي انحط كبال خيارين صعبات الاول الطلاك وصعب عندي جهال ثنين ماريد اشتتهم ولا اريد اخسرهم والثاني اعيش ويا ضرة ماكدر اختار

:- شنو اكلج امي وشنو احجي اني لا اريدج تنظلمين ولا اقبل البنية تنظلم اخاف الله ومخليته بين عيوني. ما اكلج خيري بينج وبينها ولا انصحج
ولا اكلج عوفي بينكم جهال واخاف يتشتتون
عاد انتم بيناتكم اتفقو وقررو احنه ما نتدخل

درت وجهي منها مقهورة امسح بوجهي للعصر اجة ابوي وحجيت ويا
كالي هذا شرع الله والزلمة اذا رجعها ف مجبور شتسوين قابل؟ هو ما يرجعها علمود يكسرج يرجعها علمود الطفل واني ما اقبل يا فاطمة تتطلكين انتي اختاريتي وردتي رغم تدرين بحبه لطليقته وكتلج
امج تشهد كتلج السيد يحبها اذا رجعها ما تجيلي مطلكة لان الطلاك ابغض الحلال عند الله
انتي قبلتي وكلتي ينساها مايرجعها مشيتي ورا احساسج وتزوجتي

هسة تتحملين نتيجة اختيارج وترة اني ما مستثقل لكمتج وتدرين بيه كلش زين وانتي متزوجة ومامقصر وياج رجلج واني انگل بهاي الهداية واحط بيدج ذاك المصرف بس ما احب بنتي تطلك ولا اريد خاتون والحسن يتشتتون ويضلون بين ام واب متخاربين ما راح ينشئون نشئ سليم وتصير عدهم مشاكل بنفسياتهم وحتى يغارون من جهال ليلى في حال خلفتله غير هادي يعني ملخص الكلام اطفالج يتدمرون

ام فاطمة :- فاطمة احنه من حجينا وياج كلنالج الاولى شرط اخره نور ..شرطنا عليج ترحين تاخذينا بس تنسين شي اسمه طلاك تتحملين نتيجة اختيارج شنو ما كانت

لا نكرهج احنه ولا مستثقلينج بس اني ماريد اتخارب ويا اخوي ولا اريد الجهال يتدمرون
شنو ذنبهم يتدمرون بسبب اغلاطچ واغلاط قيس

باوعت لابوي وكملت :- حتى قيس غلط من دزوله خبر فاطمة وقبل ترى راد يرجع علاقته بأهله وينسى ليلى ، بس نعذره لان جان وضعه صعب ومتشتت وعباله يستقر
ونعتب ع بنيتنا الحجينا وياها حتى نفتح عيونها ولحت اريده واذا ما اخذه ما اتزوج وتنكسر ركبتي وبذمتكم مو هذا حجيج؟

ماكو بس دموعي تجري وامسح وجهي بطرف ربطتي ، ابوي نقهر باس راسي
وضل ينصحني ما اهدم بيتي ومو اول واحد يتزوج ثنين

كتله واني ابجي :- بلكي هي تضل ع موقفها وماترجع

:- والله يابابا اشوف تاليتها ترجع علمود ابنها وقيس حتى بالشغل ضلو يصيحوله ابو هادي .. تقبل ابنه ويريد يلمه ويخلي تحت جناحه حاله حال اخوته
وماكو حل غير يرجعها

صيري سباعية ولا تخلين كلبج يعمي عيونج حرام بابا
الطفل والمرة هاي مالها ذنب بشي هي هم ضحية مرة جذابة حالها من حالج لو حاجية وناقلة خبر حملها ماصار كل هذا

ام فاطمة :- الزبدة .. انتم الثلاثة صرتو ضحية جذبة وحقد وغيره .. ماكو شي بايديكم غير تتقبلون الواقع

:- ما يحبني .. حجيت بضعف

ابو فاطمة :- هاي هيه ما يحبج تطلكي ..
باوعتله بصدمة لان غير كلامه بسرعة
استرسل بالكلام :- تطلگي وانتي بنية صغيرة وحلوة اني ماقبل تضلين طول عمرج كاعدة بدون زواج اريدج تستقرين ويكون الج بيت وعائلة
خطابتج خوش ناس اهل حسب ونسب واخلاق نختار شخص مناسب وتشوفي وتتزوجين بعد طلاكج بكم سنة حتى تكونين ناسية قيس

بس لا تتوقعين كل العالم مثل بيت خالج ولا كل الزلم مثل قيس ، يجوز حياتج تصير صعبة
مو كلها مثل قيس بابا محترمج وما مقصر وياج ومايكلج لا ومدللج دلال .. وحتى يعزج انتي عزيزة ع كلبه لا عبالج مايريدج بس هو يحبها اكثر منج مو ما يحبج

كبري عقلج وشوفي شلون متمسك بيج وباوعي للجوانب الحلوة لا تباوعين من ذيج النافذه المكسوره المطلة ع خرابة وانتي عندج هواي نوافذ سليمة وراها جنائن ..

ضلو يقنعون بيه بعقلي اقتنع بس جيب اليقنع گلبي بحجيهم ضليت ادعي ربي ليلى هي تضل رافضة الرجعة ...

...

ليلى .. طلبوني حضرت علمود جنسية هادي وصارت جرجرة بس الحمدلله خلصناها شفت قيس وجان ويا هاشم واني وياي خالتي
بس ما جمعنا دار بيناتنا غير السلام ..

جانو يجهزون بيتي والشيهانة رجعت من البصرة ضلت اسبوع وراحت لبيتها ويا جبران واجو بيت عمها

اني بديت اجمع ملابسي واثاث هذا البيت الشيهانة هي اشترته بس رفضت تاخذه كالت لخالتي اخذي المحتاجته منه والباقي تصدقي بي دفعه بلاء عني وعن اهلي

جانت الايام تمر بيوم من الايام دك التلفون ركضت خالتي جاوبت
وسمعتها تكول هلا سيد هلا ومية هلا هسة اصيحلها
شالت السمعة وصاحت باسمي جنت وراها مشيت بسرعة وكلبي حسيته يدگ بسرعة

خليت السماعة ع اذني حسيت انفاسي اضطربت بعدتها وجريت نفس عميق غمضت عيني ورجعت السماعة ع اذني
كلت بنبرة ثابتة :- الوو

رد بفزة
قيس  :- اهلا وياج .. السلام عليكم
ليلى :- عليكم السلام هلا سيد .. تفضل؟

جر حسرة تحمحم ونطق
:- علمود بيتچ اتصلت نقلنالج الاثاث من البيت القديم ونظفنا الج اني والولد صار جاهز اذا ماعندج شي ومجهزة نفسج الصبح اجي واجيب سيارة نحمل اغراضج حتى تنتقلين

سكتت شوية وبعدها رديت بهدوء :- خوش كملت اني شوكت ماتريد تعال

قيس :- الصبح اجي
ليلى :- ان شاءالله خير .. يلا اخذ راحتك

جر حسرة وگال :- ليلى ..
غمضت عيني رديت :- هاا
قيس :- ما اشتاقيتيلي لو حتى بالچذب ؟ ما مريت ببالچ .. لو على عيونچ حتى لو طيف

خنگتني عبرتي جريت نفس عضيت شفتي بقهر
رديت بصوت ثابت عكس روحي الي انهزت
ليلى :- روحي ما تشتاق لشخص تخلى عني بأول غلط ولا يمر براسي بشر ما هزته دمعتي وبكل قسوة دار وجهه عني وكلي طالق

جنت قيسي .. جنت ابن السادة الماكل كلبي اكل
جنت احلم بيك واني كاعدة واحبك لدرجة عفت الشاريني بروحه علمودك

بس هسة انت لا شيء .. ما اشوفك حتى من تصير گبالي ولا اتذكرك مو النوب اشتاقلك!

قيس :- لهاي الدرجة روحچ كارهتني وحتى گلبج ما رف علي !!؟

ليلى :- انتَ العفت وطنك ورحت تغربت لا تلومه اذا ما رادك بعد ، يلا سيد اني عندي شغل تصبح ع خير

قيس :- وانتي من اهله

سديت السماعة التفتت الخالتي صفكتلي
:- عفية السباعية عذبي لا ترجعيله بسهولة

صفنت بوجها مستغربة رفعت حاجبي ماقابلة
:- منو كلج ارجعله؟ والله يا قيس لو ينصب ذهب هم ما اريده بعد طلع من نفسي كلش

نسيمة :- بس الكلب بعده يهواه
ليلى :- عمت عين الگلب اليذلني ..

ما يذلني كلب يهوى اني ليلى مو حي الله مرة

كالت بعدم قناعة :- نشوف

سكتت مشيت لهادي يكتب كعدت يمه خله القلم جان مدنك رفع راسه باوعلي
ليلى :- باجر ننتقل منا نروح يم بيت السادة بيت جدك

ابتسم فرحان وعيونه لمعت :- يم اخوتي
هزيت راسي اي .. راحلهم بس مرتين وتعود يكول اخوتي حلو بسرعة تاقلم كلبه يرفرف ع دمه ولحمه

حتى من رحت لايران بيت ابو محمود كلوله هاي ماما النحجيلك عنها وضل يوم كامل يمي اسولف ويا واحضن بي واشرحله شكد احبه وكبل اخذ علي ومن جبته ما طول فترة وتعود وصار يحبني لدرجة احس ماكو طفل يحب امه بكد هادي

ماضاع حليبي مغزر بي ..

هادي :- العب وياهم يومية يومية صحيح؟
ليلى :- ما ادري احنه مانعيش وياهم بس قريب عليهم وتكدرو تروحلهم هواي بس مو ماعتقد يومية يمكن ثلاث مرات بالاسبوع

هادي :- عادي احسن من هنا محد وياي بس انتي

كرصت خدوده :- شنو متريدني هدهد

هادي :- لا اريدج ماما اموت عليج بس الاطفال يختلفون هواي ونكدر نلعب هواي العاب ماكدر العبها ويا شخص واحد
من رحتلهم لعبنه غميضة والله والله تونست كلش

بسته بخده :- اعرف ماما حقك

هادي :- تضايقتي ماما؟
ليلى :- لا ياروح امك وعمرها ما تضايقت بالعكس اني اريدك تعيش طفولتك وياهم

هز راسه مبتسم نصة يكتب باوعت لخطه جاي يستعدل ماشاءالله ، مديت ايدي ع رسمه وردة تحسستها وفوكها كاتب ماما

غوركت عيوني بفرح ، اوف يا يمة لو يكطعوني ما اعوفك

ضليت كاعدة شوية يمه خالتي جابت جاي وسوت شامية لهادي ، گعد ياكل وخالتي تسويله حركات يضحك وتحضن بي تبوسه

نومته وكمت نمت .. خالتي يمي تجي تبات لان نخاف
كعدت الصبح سبحت وتاكدت ماخذه ضامة كلشي والمواعين نقلت جزء منهن وجزئ كلت لخالتي تاخذه لان عرفت ناقليلي كل اغراض ذاك البيت وجان عندي هواي مواعين واغلبهن جدد استخدمهن

للساعة تسعة سمعنه سيارة طبگت توترت اعصابي ركضت للغرفه لبست جواريبي وربطتي لفيتها زين جريت عبايتي من التعلاكه ورا الباب لبستها

التفتت لهادي كتله اجة ابوك ماما
كام من مكانه ركض للمراية رفع رجلينه ع اطرف اصابعه وعدل شعره بأيده
هادي :- ماما عطر

ليلى :- خليتلك من سبحت ميصير هواي تختنك
هادي :- شميني بالله؟

ضحكت ومشيت شميته حيل وبسته :- عنبررر
هادي :- طيبة؟
هزيت راسي اي :- تموت مو بس طيبة

الباب يندگ خالتي اسمعها تركض ، ضلينا بالغرفة واذني برة اسمع خالتي ترحب بي وهو يسلم عليها عدلت عبايتي وجريت هادي من ايده

طلعت شفته يفوت ويا خالتي لابس عباية سودة وعمامته حسيت كلبي ضل يرجف
عفت هادي مشة بهدوء مد ايده يسلم علي قيس نزل للكاع حضنه حيل وابتعد باسه براسه
:- شلونك وليدي؟ راح تصير يم بابا فرحان

هادي :- كلش فرحان

رجع قيس بوس خدود هادي وهادي خجل اجة يركض ختل يمي
ضحك قيس ورفع عيونه باوعلي
قيس :- ام هادي شلونج
ليلى :- الحمدلله بخير ونعمة

قيس :- ماحصلت سيارة اجيت بسيارتي خلينا ننقل بس الملابس وهو البيت كلشي بي المطبخ كامل واشتريت غسالة جديدة والطباخ جيكها المصلح توب ماتكول اخ ، ابد ما محتاجة غير ملابسج

ليلى :- عندي هنا شوية مواعين اريد اخذهن وياي كزاز بيهن
قيس :- العصر ادبر سيارة جبيرة واجي اخذهن

نسيمة :- تعال استريح سيد اضيفك
قيس :- لا تسلمين عندي شغل بعد ساعتين هم ياله نحمل ونروح

نقلنا الجنط للسيارة خلاهن شي ورا بالصندوك وشي بالكشنات الورا ع صفحة وضل مكان فارغ صغير
طلعنا مشيت كبل صعدت ورا وهو صعد هادي يمه بالصدر وخلاله الحزام
وخالتي راحت لبيتها

صعد بالسيارة تنهد ومسح ارنبة خشمه مثل ماجان يسوي حركته المتعود عليها من يتوتر او يحس بشعور مو طبيعي

سد الباب وكال لهادي :- يلا شوف ابوك وتعلم السياقة حتى من تكبر اجيبلك احسن سيارة

هادي :- من اكبر شوكت شكد يصير عمري يعني
قيس :- من تخلص سادس اعدادي وتقبط ال18 سنة اجيبلك سيارة تروح بيها للجامعة

هادي هز راسه شغل وطلع باوع لهادي وگاله
:- يمكن جوة المطر تلگى حورية بردانه تنطيها معطفك والمظلة وتكمل الموقف تنقلها بسيارتك للبيت

هادي :- بابا الحوريات اساطير ماما تقرالي رواية اطفال وكالتلي هاي المعلومة

باوعلي بالمراية ورجع باوع للطريق ورد وهو يبتسم بطرف شفته
:- صحيح كلام ماما .. بس ماقصد الحوريات هذول اكو حوريات حقيقيات

درت وجهي منه للطريق واسمع هادي يرد
:- شلون شكلهن

قيس :- مثل ماما يعني

هادي ضحك درت باوعتله وباوعلي
كال لأبو :- ماما مو حورية اميرة حلوة وشعرهااا طوووويل كلش

قيس جر حسرة خزرت هادي وخليت اصبعي ع شفتي بمعنى اسكت
قيس رد بحسرة :- لا تكول كدام احد ماما حلوة وشعرها طويل مايجوز بابا

هادي :- لا ما اكول بس انت بابا عادي

قيس :- عادي كدامي كول وشبيها ماما بعد؟

هادي باوعلي وسكت ما حجة لان خازرته

قيس :- ترة ماما لان خجلت تخزرك احجي حبيبي شبيها شنو تسوي بالبيت

غطيت وجهي ودرت وجهي بقلة حيله طبكت عنده بعد يريد يعرف كلشي
قيس :- احجي بابا منو يجيكم وين ترحون وشبيها ماما بس حلوة وشعرها طويل؟

هادي :- مابيها شي تطبخ طبخ طيب خالو هادي يحبها ويحبني وهي تحبه وكل ما يجي تطبخ اله طبخ طيب وياخذنا ونطلع سوية بالسيارة

رفعت عيني بسرعة باوعلي متفاجئ واتسعت عيونه
بلع ريگه وكال بصوت ناصي
:- شنو يحبج وتحبينا

ليلى :- ابن عمي واخوي وسندي بالدنيا من بعد رب العالمين شلون ما احبه؟ هادي يلاوي الموت علمودي ويوكف بوجه اكبر بشر اذا راد يأذيني بحرف ويسامحني من اغلط ويشردني للطريق الصحيح ما يغضب علي ويعوفني اصارع الدنيا وحدي

قيس :- بسمارچ وصل

ليلى :- نعمة من حسيت الاعرفه عنك ماكو احساس ابد مطفي

رفع حاجبه ماقابل وكال :- من نصير وحدنا نحجي

ليلى :- اني ماعندي حجي وياك واتمنى موقفنا الثاني يكون حاضر الشيخ ونتطلگ طلاك صحيح ومضبوط ونروح نتطلك بالمحكمة ونخلص

قيس :- مو هيه بكيفج ما تفكرين بس بنفسج

ليلى :- بنفسي وابني وهذا الشي لمصلحتنا روح لمرتك وكللها ليلى ماترجع طمنها يمكن هسة كلبها غادي نار وطلكني حتى تستقر

سكت ما رد شي تجاهلني وكلش ضوجني بهاي حركته
خزرته بالمراية ودرت وجهي
شوية ورجعت حجيت :- اذا تقصد هادي اني صرت يمكم تكدر تربي هادي ويا اخوانه من تخلص شغلك وتصير بالبيت تجي تاخذه يمكم وتلمه ويا اخوته وابناء عمومته وتخلي يعيش بنصكم ماله داعي احنه نرجع

بالاخير انت اختاريت بنية جميلة واخلاق وبنت حسب ونسب وعلوية لا تخرب وياها علمود الماعدها حسب ونسب مشرف واخلاقها عاطلة وتغلط هواي

تنهد كال بصوت مقهور :- البشر يغلط ليلى هسة انتي مو ارتكبتي اغلاط هواي المفروض تعرفين احنه مو معصومين

ليلى :- غلط عن غلط يختلف اني الحزب طلعت منه من تزوجتك ومن جذبت عليك وضميت عنك اشياء لاني جنت احبك واريد نتزوج ونكمل سوية بالاخير اني بنية صاينة نفسي ومحافظة عليها وما تلوثت ما جنت اشوف روحي عيب وراح تستعار منه و تطلكني

بس غلطك وين يختلف انت عفتني واني بأمس الحاجة الك عفتني واني مكسورة بالغربة
وتعرف اني لا اهل عندي ولا شي جنت اباوع لله واباوعلك وانت وين ذبيت علي يمين الطلاق ودرت وجهك ورحت

كلت هسة يوم يومين يكول خليني اروحلها احجي وياها واعلمها وانصحها بالاخير هي جانت صغيرة من رادتني وغلطت وضمت علي خافت تخسرني
وماكو انتظر ولا وصلت ولا اجيت

گلبك اسود حرامات انت حفيد رسول الله بريء منك رسول الله

ضام اغلاطك جوة عمامتك عبالك الله ما يشوفهن

كال بقهر وهو يباوعلي واني دمعتي بطرف عيني :- ليلى! اغلاطي ليلى لو انتي الخربتي بيناتنا

ليلى :- خليها نوصل ونسولف بيناتنا الظاهر غرورك ونرجسيتك ما يسمحلك تعترف ان انت هم غلطت مو بس اني

سكت مقهور يتحسر حسيته مريض بي شي
ضل يسوق من وصلنا فتح الباب ودخل السيارة ضل ينزل بالاغراض دخلنا للبيت حلو صغير ع كدنا ومرتب الله ينطيهم العافية منظفينه الي

قيس :- هادي حبيبي اطلع سوق بايسكلك بالحديقة اريد احجي ويا ماما بيناتنا

هادي ما قبل باوعلي ولزم ايدي
:- لا مااطلع تخلي ماما تبجي ما اقبل اني عيون امي تبجي

ليلى :- لا حبيبي بابا طيب مايبجيني روح العب لا تخاف يلا لخاطري

ابتسمت وبسته بخده ..
باوعت لقنفات بيتي الجنت كاعدة بي شكد جمعتنا ذكريات واحنه كاعدين عليهن
تحسرت وكعدت ع صفحة ذبيت العباية من راسي وباوعتله
كعد وشبك ايدينا وهو يباوعلي

قيس :- جنتي معيشتني بجذبة كلشي بيج طلع جذب ولج ليلى شغله وحدة صدك ماطلعت عندج وتكليلي انت غلطت؟ اي غلطت بس اغلاطي ماتجي يم اغلاطج

ليلى :- تجيب غلط بنية وحيدة ومالها احد بهاي الدنيا تمسكت بيك وكذبت حتى تكدر تكمل وياك وما حجت خايفه تخسرك
ويا غلطك انت ابن السادة ابو الدين والعقل والي المفروض تربيتك احسن تربية وتعرف توزن الامور بميزان عقلك وتفهم ليش جذبت

قيس انتَ ماعفتني هنا واني مرتاحة انت عفتني مكسورة هسة حتى بالدين الموزينة اذا تابت ماعليها ذنب بعد وتكدر انت وغيرك تتزوجها وتعيشها احسن عيشة
واني الحمدلله شريفة وغصبا عن اكبر شارب مو ذنبي اذا خالتي عدها سوالف موحلوة اني ما اختاريت نسبي وما اختاريت حياتي ولا انت ختاريت
اهلك

يمكن انت هسة صاير ابن عائلة موزينة بايدك هذا الشي؟ جاوبني

هز راسه لا :- حقج واني اعترف غلطت بس لو كايلتلي من الاول جان كدرت افكر زين اشوف شلون وين توصل ليش جذبتي وخليتيني بعدين بموقف صعب

وترة سالفة خالتج سالفة جبيرة وتقهر اني من فكرت بيها ع روحي كلت اسامحها ع جذبتها وارجعج من عمامج بس جنت خايف اخطي هاي الخطوة وترجعين والسادة يعرفون انتي طالعه من بيت موزين ليلى شايفة الملامة؟ فكري بعقل شوية

عائلة شكبرها سنين ما لاحهم شي ولا جاستهم حجاية تخيلي بسببي الناس تحجي عليهم ويكولون تزوج خالتها موزينة ومو بس خاالتج حتى علي وعليج يذبون حجي وتجيهم سمعة اني ماهتم اعرفج بس السادة شلون؟

اني هذا الشي الخبلني مع هذا كله كلت ميخالف اشوف ارجعها احجي وياها انطيها فرصة دام محد يعرف واخليها حتى اذا رادت تشوف خالتها بدون مايعرف احد حتى ينسد موضوع خالتج ويشبه ينسونها

بس مالحكنا سجنو دلال واعترفت عليج وانفضحتي هنا واخذو اخواني واهلي واولاد عمامي نصهم حققو وياهم ماتدرين انتي شصار بيهم هنا

ورا هاي الشغلة اني كلبي كلش تعب منج وشفت الطلاك انسب حل ادري غلطت بس بوكتها تعبتيني بسبب الاسرار المضمومة وطلعت كلها بوكت واحد

ليلى :- اي وراها ما فكرت بيه ما كلت ضلت وحيدة غريبة يم ناس غرب ترة بيت ابو محمود اقارب هادي مو اقاربي وانت تدري يعتبرون غرب
ماكلت اروح واحجي وياها ونتعاتب ؟

قيس اعترف انت عندك غلط ثاني غير تسرعك بطلاكنا ردت ترجع علاقتك ويا اهلك لهذا السبب تخليت عني

غمض عينه مقهور وهز راسه اي ..
:- عبالي انساچ مادري حبج مرض مزمن ملازمني وماله علاج ليلى اني مريضج ماكدر اطيب منج

ليلى :- بس اني طبت وبرت علتي ياريت نخصمها قيس وننفصل بشكل نهائي ضلتي ع ذمتك تعبتني اني ماريد تخسر عائلتك بسببي لان ضله وياك ما اضل بعد ليش تخرب ويا العلوية

قيس :- شبيج ليلى ؟
حجاها مختنگ رجف فكه تحسر فرك عيونه ورجع باوعلي
:- سنين واني اناجي ربي يخليني انساچ سنين سجادتي شبعت من دموعي ، يومية اكله ربي طيبني منها راح اموت گلبي عليل وبس اطبك سجادتي كلبي يكلي شلونها ليلى روحلها وعقلي يكول عوفها انت تزوجت لا تظلم الخذيتها

ولج ليلى اني بدونچ ضايع وتايه وما اندل دربي وروحي ترجف عليج ،  حالي مثل حال المحكوم اعدام وينتظر ساعة اعدامه
جنت اكول هسة يجي خبر منها ينهيني يذبحني من الوريد للوريد

تعبت والله تعبت بدونج اعترف اني غلطت كام من مكانه اجة وكف كبالي رفع ايده يحجي ويرجف
:- بس تغيرت وبعد ما اتسرع احسب الف حساب للشغله قبل ما اسويها صرت يمج شوفيني بنفسج وشوفي شلون الدنيا غيرتني ترة جنة صغار وعدنا تسرع وغلطنا هسة عقلنا

ليلى :- ما ارجعلك قيس اني اصلا ندمانة ع زواجي منك من اخليها بعقلي اتذكر صهيب الله يرحمه شلون جان زلمة معدل وياكلني الندم جان يستاهلني وسبع
يعرف شغل خالتي ويتوسل يرجعني لعمامي وياخذني منهم معززة مكرمة وتالي ركضت عليك خذيتني بالسر بسبب رفض اهلك وعفتني باول غلط

اااخ صهيب خسرته اتذكر شكله الله يرحمه وسيم وشخصية وصاحب مال وجاه وسلطة
بس بعد شيفيد الندم؟

سودة بوجهي خسر رتبته وسلطته واحترامه وحياته بسببي

واني متاكدة لو ضال ما منتحر واني متطلكة منك وهو هسه موجود جان نسى كلشي واجة خطبني واخذني ودللني لانه يحبني صدك مو حب شهوة لو مصالح ماراد يشبع مني ويدور علي الزلة حتى يذبني

باوعتله يرجف لم عبايته وطلع بدون ما يرد شغل السيارة وخلا هادي يدخل طلعها ونزل سد الباب واني ع كعدتي

تعمدت احرك كلبه بهذا الحجي مثل من حرك كلبي وكلي شفت فاطمة حلوة وتستحي ترفع عينها
وجان ندمان لان تزوجني وما تزوجها

هادي :- شنو بابا ليش راح
ليلى :- راح لبيتهم حبيبي يلا انت العب راح ارتب الاغراض واسوي غدة

تذكرت الثلاجة ما جايبة مسواك بس توقعت قيس متسوك لان ما مخلي نقص للبيت كمت للمطبخ شفت كاونتري القديم واثاثي كله وكلبي ينعصر
فتحت الثلاجة شفت بيها مسواك الحمدلله كلت اسوي غدة بالاول هادي هسة منا وهيج يجوع لان نكعد ع وقت

طبخت غدة ورتبت اغراض البيت جان مخلي تلفون ارضي سمعت صوت دكته ونزيت رحت بسرعه فتحت خط اجاني صوت عرفتها العلوية

سميرة :- شلونج عمة ليلى شلون صحتج

ليلى :- هلا بعد روحي زينة اني انتي شلونج علوية هههه صرت يمج مريلي اشوفج واشبع منج

سميرة :- عساج سالمة حبيبتي اني خابرتج اعزمج للعشا يمنه ردت ادزلج عشاج للبيت بس وين هياتج قريبة ادزلج واحد من الولد يجيبج

ليلى :- لالا رحم الله والديج ماتقصرين بس اني ماكدر اجي شلون اجي علوية ومرته للسيد والله صعبة

سميرة :- هي تريد تحجي وياج انطيها السماعة

بلعت ريكي بصعوبة ورديت انطيها

اخذت السماعة واجاني صوتها الهادئ
:- هلو ليلى اني فاطمة
:- هلا بيج داده شلونج اطفالج شلونهم
:- زينين لحمدلله تعالي حبيبتي معزومة اني هم اريد اشوفج واسولف وياج بعد لابد نتفاهم خو مانضل مهزومات ؟

:- صحيح بس تشوفين الوكت مناسب؟
:- كلش مناسب خلينا نسولف شوية ونحط النقاط ع الحروف

:- اذا هيج سهلة اجي اتمشى قريبين
:- لا وين احنه مانطلع لمكان هيج لان خطر وانتي وياج طفل ساعة ويجي عليج واحد من الولد

:- متفقين
:- خالتي وياج

انطتها السماعة واتفقنا ع العزيمة بس كلبي وكع حسيته ، البنية من تحجي مبين مخنوكة كوة يطلع صوتها ياربي الموقف صعب واحس راح تصير مشكلة لو خلاف

بس احسن شي اروح واكللها من الاخير داده قيس ما ارجعله واليوم قبل باجر اتطلك ارتاحي ونامي ليلج رغد خلي اطمنها ادري بنار الغيرة تحركها مثل مجاي تحركني بس فرقي عنها اني اختاريت ابتعد هي اختارت تضل ..

جهزت روحي وجهزت هادي اجو هاشم والعلوية بالسيارة اخذوني نزلت سلمت ع البنات وشفت فاطمة هي تقربت وسلمت علي بوستني

جانت مختنكة عيونها حمر مبينه شابعة بجي وتباوعلي زين تدرس شكلي

ردت اكللها لا تفكرين بجمالي انتي احلى مني بهواي بس حظي وحظج خلانا بنفس الطريق ونفس الشخص ودخلنا بمشاكل معقدة وصعبة الحل

البنات بالمطبخ يجهزن العشا واني دخلت جوة جان السيد موجود ركضله هادي سلم علي وباس ايده اخذهم احفاده ع صفحة بالصالة وكاللهم منو ما متوضي يتوضئ ويجيني

كام هادي كاله :- اني ما متوضي جدو
:- تعرف تتوضئ لو اجي اعلمك
:- اعرف جدو الحمدلله

اخذه ابن عمه مرتضى ويا توضو ورجعو واحنه نباوعلهم ساكتات مانكدر نحجي شي وهو موجود

العلوية ضلت تسالني عن حالي اشوف جدهم يسولفلهم قصة من قصص القرآن وهم مندمجين

بعدين التفت شافت سكينة كللها ماعليج امر عمو جيبيلي علبة الحلويات من الغرفه

راحت جابتها واجت انطتها
:- هاي الحلويات الطيبة منو يريد منها ؟
كلهم كالو اني اني
:- يلا انطيكم كللكم بس كل واحد انطي مهمه يجيلي باجر منفذها

كلهم تحمسو
شال قطعة انطاها لبنت قيس وكللها :- تجين حافظه اركان الاسلام
خاتون :- ثكرا دودو

باسها حيل وكال :- عمر جدج خاتون السادة

فكيت عيني متفاجئة فوك ما مسميها باسمي ناطيها لقبي

رجع انطه ابن مرتضى وكاله تحفظلي سورة المزمل الك اسبوع مو باجر
متفقين؟
لان ابن مرتضى جبير ويكدر يحفظها ما انطاه قصيرة

وضل يوزع وينطيهم اغلبهم انطاهم احاديث وايات وجانو نصهم يعرفونهن ماشاءالله لان اهلهم مغذيهم بالدين ومحفظيهم هواي وذاكرين كدامهم لكل موقف ايه او حديث للرسول يستدلون بي من هيج ضلت هاي الاحاديث بعقولهم وكالو لجدهم نعرفهم وحافظين جزء منهن

وصل لهادي شاله وحدة وكاله :- تحفظ سورة الكوثر
كاله ابن مرتضى الثاني :- هاي كلش قصيرة جدو
هادي :- لان هو صغير كل مايكبر ننطي اطول

هز راسه اخذها هادي وكال لجده :- حافظها جدو تريد اسمعك
:- ماشاءالله تعال سمعني
جره من ايده كعده بحضنه

هادي قراها اله بترتيل مثل ما حفظتها اله باسه براسه والتفت الي لمعت عيونه وكال
:- بارك الله بيج معدله بت اجاويد

ليلى :- تسلم عمي

شوية وعمي اخذهم للصلاة واحنه صلينا جوة
طشن مرة ثانية ضلت فاطمة كاعدة والعلوية هي تباوعلي ماشالت عينها من علي

كامت العلوية ترخصت وراحت للمطبخ بس كامت فاطمة تقربت كعدت قريب مني
باوعتلي جرت نفس وكالت بس الغصة بصوتها قهرتني وياها

:- شلونج ويا السيد هم حجيتو من جابج؟

ليلى :- اي علوية حجينا كتله ان شاءالله اللقاء الثاني الشيخ يكون حاضر ونتطلگ وننهي كلشي حتى اني اكون رسيت ع بر وانتم تستقرون

ابتسمت عضت شفتها ولمعت عيونها بفرح
:- ما الج نيه ترجعين من باب بيناتكم طفل
:- لا ما اكدر ما راح نرتاح وانت تعرفين هذا الشي كلش زين صعبة علي وعليج

:- صحيح اني صارلي ايام مريضة اريد اموت الله يبرد كلبج مثل ما بردتي كلبي انتي اهون مني سنين بعيده عنه ونسيتي تكدرين هسة بسهولة تبتعدين
بس اني صعبة علي صارلي سنين يمه وعندي منه ثنين اطفال تعودو علي

بس انتي لا تشيلين هم هادي هو صار قريب علينا خل يجيلنا يومية ويشبع من ابو واخوته اني ادير بالي علي من يجي لا تخافين

ضحكت وهزيت راسي :- هاي هيه من يجي بامانتج لان هذا وحيدي وكلبي ويا بكل خطوة اخاف علي

:- حقج والله .. شفتي بنتي خاتون هيه اسمها ليلى بس احنه نصيحلها خاتون

:- اي شفتها
هزت راسها اي ماعرفت غايتها شوية وكالت مقهورة
:- قبل ايام رحت زعلانة ردت اتطلك وكفت بعيني متعلقة بأبوها كلش تموت علي ماردت احرمها منه ورجعت لخاطر جهالي والله

:- لا يكون بسببي؟
كالت مقهورة :- لا وين انتي مرة بعيدة شدخلج بس اني احترك بناري عبالي ترجعين كلت ما اضل اعوفه ما اتحمل

:- لا سدج امان ما ارجع ارتاحي كلتيها اني تعودت واسمي مطلكة منه من زمان هسة طلاكنا ما يأثر علي

جنت احجي بداخلي نار بس ردت ابرد نارها مايصير نضل ثنيناتنا محترگات حرك

شفتها رجع الدم لوجها تعشينا ورا العشا كعدنا اني والبنات نسولف وفاطمة بعد ما شفتها واجت دنيا سلمت علي وكعدت يمنه شوية وراحت لان رجلها مريض

سألت العلوية ليش انخطف السيد شعنده المسكين شو اعرفه خوش رجال

:- يا ههههه خطفو وعذبو حتى مايصلي بالناس بالجامع ولا ينطيهم محاضرات يخافون من صوت الحق بنيتي وهو شالع كلوبنا يكول بس اطيب ارجع
وهم خصصوله سيارة وناس تاخذه وتجيبه راح مرتين وانتكست حالته بعد ما كدر يروح

ليلى :- ما طول ع طريق الحق خلو

:- اي كلنا عدنا ايمان ونتحمل بس دنيه اخ والله مؤمنه بس يم رجلها كلشي يختلف ضعيفه من كل النواحي

ابتسمت لان ادري بيها تموت علي
كتلها :- لان تحبه الواحد يم حبه ضعيف

هزت راسها تضحك :- اي والله

طلبت يوصلوني حتى ارجع لبيتي شوية ودزو هادي كال بابا يوصلنا العلوية رادت تاخذ عبايتها وتجي وياي من عرفت قيس يوصلني طردتني طرد علمود ماتوصل عبايتها واكللها امشي وياي اجت عبايتج

طلعت صعدت ورا وهادي كدام الطريق كلش قصير
باوعت لقيس شكله غريب مجبود جبد

انقهرت علي يمكن مقهور من الحجي الحجيته ويا
لا حاجاني شي ولا حاجيته وراسه مارفعه حتى
دخلنا للبيت قفلت البيبان زين واخذت هادي نومته يمي ع الجرباية

صدك حسيت بوحشة وخوف بس كلت الله الحافظ ماعلينا شي وخليت نفسي وابني امانة يم الخلقنا ونمنا

...

فاطمة ...ضليت كاعدة فوك ورا العشا مالي كلب اكعد يمها

فترة وسمعت صوت سيارة باوعت من الشباك قيس اخذهم وهي كاعدة ورا
جريت نفس وصبرت روحي كلت خليها ع الله ماريد اقهر روحي بعد

شوية ورجع بس تعبان كلش نزع ملابسة وتمدد فورا
فرك صدره
اجيت يمه خليت ايدي ع صدره افركه واحجي
...شبيك قيس اصيح للولد ياخذونك للمستشفى

هز راسه لا اباوعله عيونه حمر دم ووجه مطعون
خفت علي كمت جبتله عصير اريد اشربه
كال بصوت تعبان يلهث :- لا ماريد فطومة خليني هيج هسة اصير زين

خليته ع الميز خايفة
:- قيس والله تخوف خليني اجيبلك علاج تاخذه بلكي تصير زينه هذا ناطي الدكتور الك من تخربطت قبل فترة

هز راسه وكعد ع حيله ضليت اطلع بالعلاج مخبوصة حسيت بي وگف التفتت
:- وين ضل مرتاح لا تكوم

قيس:- شسالفة رايح اغسل مابيه شي

ضليت ادور انخبص علاجه ويا باقي العلاجات
جان يتحرك ع كيفه وصل الباب الحمام وما حسيت غير طبه قوية شهگت والتفتت مفجوعة ركضت علي اصرخ
قييييس
واشوفه واكف ومضروب راسه بالكاع واكو دم ماعرف منين ينزل ..

......

ليلى ...

قررت اروح اتبارك للشيهانة واجيبلها هدية لبيتها وصيت خالتي تجي تاخذنا ونطلع للسوك
وهم محتاجة اغراض للبيت والي ولهادي ملابس

اجت اخذتنا وطلعنه بالسوك مجلبة بهادي اخاف علي الوضع شوية مو كلش امان دخلنا للمحل كدرتله ملابس اخذتله

وطلعنا كلنا ندور هدية زينة لانها تستاهل احسن هدية

ضلينا نمشي خالتي كالت
:- شوفي ذاك المحل مبين بي ورد وتحف وسوالف مال بيت تعاي نفوتله

جريت هادي ودخلنا حطيت العلاكة وكتله اوكف واني وكفت يمه وعيني علي

غفلت عنه لحظات التفتت ماشفته بس حسيت الدنيا طاحت ع راسي

طلعت مثل المسودنه اباوع منا ومنا واصيح
:- يمه هادي وينك هاادي وين رحت ، اباوع للاطفال وماكو هادي ماشوفه
وما حسيت غير صوت قوي ونور مر ع عيني خطف،  صرخت وسديت اذاني والعالم انخبصو كلها تتراكض وتصيح مفخخة مفخخة انفجار .......للحكاية بقية

رأيكم بالقصة يهمني🖤 ...

التنزيل بين يوم ويوم ...

6200 كلمة هم كولن قصير ادج روحي 🤣