رواية حمائم تخشى الطيران الفصل الثاني 2 - بقلم فاطمة العبادي

فاطمة العبادي

في ... #حمائم_تخشى_الطيران

❗🔴 لا تحكم على الرواية من البارتات الاولى لأنها مجرد بداية ..
ربما تكون مختصرة او مملة او غير منطقية لكن بالنهاية تدخلنا الى احداث ممتعة نستمتع لها 🖤

❗🔴 تاكات لأصدقائكم وتعليقات بين الفقرات لطفًا ..

❗اغلب الاماكن والمناطق والدول المذكورة غير حقيقية تم تغييرها للتمويه حتى ما يتعرف احد ع الابطال

قراءة ممتعة كيكاتي 🖤 ..

كان يا ما كان من سالف العصر والزمان
أروي لكم حكاية المكان او اللامكان

لشيـهانة تركت وكر الذئـاب

فرت هاربة الى السَـعِير لتقـع في حُـجر الأَرقَـط
لـم تسمع منـه سوى بعض الهَـرِيـر
كتمت انفاسها المضطربة ، لمست شفاهها المتجردة ، حملت على ظهرها حـزن الافئدة
وعلى اطراف اصابعها وقفـت والـى باب السَـعِير بكل سُـرعة أتجهت
ليحدث فجأة ما لم يكن بالحسـبان
وزَّمـخَـرَة الأَرقَـط أخترقـت حـاجز الآذان

اوه! ياللتيه أيقـظت من كان في الـهُـجُود
ليـنزل بها انواع الإضطهاد
حتى ترمـي له حبـال الأمـان فيجرها نحو ابواب الطغيان
هوَ وحش ثائر
ليس أمام الحب بخاسر
يأبي التراجع ، والى وسط السَعير هو لـبطلتنا قد رمى
وأذا به على وجهه قد اُلقى
فـهل يا تُـرى سيجد في سَـعِيرها الجنة
ام الى الهلاك قـد ...؟
نادت من ارض السَعير
ماذا؟
ها هوَ للرب صلى وعلى الأرض نفسه القى
سجد للذي خلقه ونيران الحقد أطفى
حتى عاد بعدها طاهرً مُطهرا

:- أجيتي؟ بعد وقت فات الأوان التأخير ما كان بصالحچ أبد ياريت لو أستعجلتي شوية

:- ليش شنو صار بسبب تأخيري لمدة لا تزيد عن خمس دقائق
انشگت أرض هذا البيت وبلعت ناسه لو احترگت حيطانه بنار حقدهم وظلمهم
احچيلي بله أريد أسـمع

:-شبيچ أنهديتي يا عيني مو هذا قصدي بس الجماعة طلعو يتغدون برة ولأن تأخرتي عافوچ وراحو وراحت عليچ جمعة عائلية تتمنيهة انتِ

:- هاي بأيام زمان هسة لا طلعتهم من البيـت راحة ، بالنسبة الي البيت بدونهم جنة ياريت ما يرجعون وما اشوف وجوهم مرة ثانية بحياتي

باوعتلي بنظرة عتب وأسترسلت بالكلام وهي تقلب التمن بالجدر
:- لا تدعين عليهم حرام بنيتي هذول عيالـچ ودمهم نفسه دم الطفل الي شايلته بداخل رحمچ
يعني دمهم اختلط بدمچ ، والأذية التجيهم تطولچ لتنسين هذا الشي
روحي بدلي ملابسچ على ما اصبلچ غده من الطابخته

عفتها وراي ومشيت للغرفة غيرت ملابسي گعدت على اطراف السرير ونصيت راسي بتعب وبدأت الهموم والافكار تهجم علي وتمزق ذاكرتي بعنف
شوكت ينتهي هذا العذاب؟ شوكت ارجع لأهلي وناسي وأترك وراي كل انسان كان سبب بأذيتي

ما اتوقع يجي هذا اليوم يمكن ارجعلهم بتابوت ..

غيرت ملابسي وطلعت تغديت ورجعت تمددت جاي اغفى وسمعت اصواتهم بالبيت غطيت رأسي بالغطاء بسرعة وتصنعت النوم سمعت باب الغرفة انفتح وخطواته صارت داخل الغرفة بشكل واضح ، تمدد بصفي بدون ما يصدر اي صوت
ضليت مغمضة الى ان غفيت ..

فزيت الدنيا مغرب غسلت وجهي وطلعت لگيتهن گاعدات يسولفن گلبت وجهي بضجر وأمتعاض
تمشيت للمطبخ وقفني صوت وحده منهن وهيَ تحچي وياي بتعالي ..

:- أستانسنة بدونچ وي راحه الله يحرم عليچ الهوى مثل ما حرمتي علينا راحتنة بجيتچ هـني

:- لا تحچين وياها چذي حرام عليچ ما چنة عايشين بنعيم عيشتنة اهية أهية

رديت عليها :- انتِ الوحيدة العاقلة بهذا البيت الله يكملچ بعقلچ
هزت رأسها بدون جواب ..
الثانية ضلت تدردم بصوت خافت يصعب علي سماعه

گعدت يم خالة نورس بالمطبخ نصيت رأسي ع ميز سحبت الكرسي وگعدت مقابيلي وحچت :- اذا يضل هذا اسلوبچ بالحياة خساراتچ راح تكون اكبر من ما تتصورين واولهن نفسچ والطفل الشايلته ببطنچ

باوعتلها بقهر و رديت بدون ما اهتم ولا اخاف من وجود احد ..

:- اريد ارجع للعراق اريد اگعد بين أهلي وناسي اريد اشبع شوف منهم تعبت خالة اريد اعوف كلشي وراي وأشرد بطرگ ثوبي العليه
خالة والله راح اشرد وما تلگولي أثـر

اجالي صوته من وراي يرعد بغضب ...تنحاشششين؟ مالحگت ارفع راسي سحبني من شعري بقوة طحت بالكاع لميت روحي احمي بطني منه نزل عليَ بالضرب والغلط والفشار سمعت منه اسوء انواع الكلام
الكل خاف من التدخل، خافو نيرانة تحرگهم وياي ويغدون بعدها مثلي مجرد 'رماد' يطيره هبوب الرياح ويشتته

رفعت راسي صارت عيني بعينه مسحت الدم النازل على عيـني وگلت بغضب :- راح يجي يوم واتخلص من وكر الذئاب  هذا واكون حرة طليقة
راح اتخلص من ظلمكم الي كلها مسألة وقت والنـار الحرگتـني راح تحرگكم .

نورس :- ولچ سكتي غضب الله على راسچ
خوية بـو صگر لا تصدگ حچيها اعصابها تعبانة بسبب الضغط والحمل والضرب الأكلته أعذرها انتَ العاقل الفاهم لتاخذ بحچيها

بو صگر :- تبي تنحاش جليلة الأصل والله ثم والله يوم التطلع بي هذي الحشـرة برة البيت منحاشة ترد بي للعراق مذبوحة

:- تريد تذبحني اذبحني ما تخوووفني ... سدت حلگي خالة نورس تكتم صوتي رجع يريد يهجم عليَ وگف صگر بوجها مانعه ويهدأ بي

صگر :- تهدأ يـَبوي البنت ياهل وماهي بوعيها خلها ترد عقلها لراسها وتكلم وياها

بو صگر :- ما اتكلم ويا وحدة يااااهل بگد ولدي

:- طالما تعرفني جاهل ليش تزوجتني؟ نزوة؟ لو حتى ترضي غرورك
مشاري أسمعني والله الخلق هذا الكون كله لو تبوس رجلي ما اسامحك بعد هذي فعلتك وضربك الي

ثار اكثر راد يهجم لزمة صگر عني وسحبه للخارج رفعتني خالة نورس ركضت منيرة ساعدتها ورفعتني وياها وهمست بأذني
:- أمانة لا تصارخين بويه (بوجه) أبوي مرة ثانية لا يذبحچ ويذبح عمرة گصري الشر علامچ ما تصدگين تصارخين وتهددين؟

:- منيرة ابـوچ حرگني من زمان ونهى حياتي بعد ما حط الحقلة بأيدي ماعندي شي أخسرة لان خسرت روحي

نوموني بفراشي ضلت منيرة يمي تحچي وياي وتتوسلني اتجنب ابوها لو غضب هزيت بالرضا جابت الاسعافات وضلت تداوي الجرح الي بجبيني بسبب خاتمه ، وحضرتلي ملابس گالت
:- من ترتاحين تسبحي نفنوفچ كله دم

هزيت رأسي بالقبول وغمضت عيني جسمي تخدر من الضرب ضليت أون ساعات ، بعدها غفيت بتعب
فتحت عيني ع صوت المنبه مديت ايدي طفيته وگمت من فراشي جسمي كله يوجعني وانفاسي مضطربة مادري شلون عدت الليلة السابقة وصبحت عايشة فتت للحمام سبحت وطلعت مشطت شعري ورتبت وجهي بأستخدام بعض مساحيق التجميل وتوجهت للمطبخ چنت جوعانة كلش صبيت چاي وطلعت بعض الاجبان تريگت بسرعة وطلعت للدوام ..

الحياة الجامعية كانت حلوة للي عاشوها اما بالنسبة الي ما كنت عايشة بالواقع لا بعالم ثاني وروحي بمكان ثاني ، كملت دوام وطلعت ويا السواق للبيت او بالأحرى للقصر الفاخر المليان خدم وحشم بس مع هذا ما بي أي راحة بسبب زوجي "ابو صگر" الظالم المستبد

مرت الايام كامت متشابها وضعت حملي بعد ما كملت السنة وتخرجت الحمدلله انجبت صبي جميل الوجه جيد الصحة
أسماه اخوه صگر "شعلان"
وهوَ احد اسماء الصقور ..

تقدم بو صگر لبسني الملاوي الذهب الثقال جدًا والقلادة الي كسرت رقبتي وخنگتني بسبب ثقلها
بو صگر :- حمد لله على سلامتچ يا شيهانة
توة ما نور الدار بردتچ له سالمة انتِ و ولدي شعلان

ابتسمت مجاملة وهزيت رأسي
صگر :- بالله هل ياهل شايل حسن امه كله ياليت ربي يعطيني ياهل مثله ويهة (وجهة) يرد الروح

شيهانة :- صگر احچي عراقي لان فريت راسي فر بالكويتي

صگر :- لساني ماخذ يا حرمة أبوي الحچي الكويتي او الخليجي بشكل عام صار جزء من لهجتنة
بس ولا يهمچ يا طويلة العمر احاول اتكلم احچي احچي عراقي

همست بصوت خافت :- اگول صگر شوكت تساعدني بتنفيذ خطتي مو هسة كلشي صار اصعب من الاول صار وياي طفل

صگر :- گصري حسچ لا يسمعچ أبوي لو صمود

حطيت ايدي ع حلگي وباوعت للباب كان بعيد عن السرير بسبب كبر مساحة الغرفة تقرب مني بشكل واضح وهمس
:- كلها ايام معدودة و يصير الحلم واقـع بس صبري وتحضري للحظة الحازمة

شيهانة :- وشلون اجازبك؟

صگر :- تداويلي جروحي شيهانة تداويهن هذا المقابل الاريدة منچ

شيهانة :- وأذا ما گدرت؟ صگر واذا صعب عليَ الموضوع شنو الحل

صگر :- ولا يهمچ ان كان الموضوع صعب عليچ لا تحاولين بس كوني على ثقة انُ گليبي راح يضل متعذب ومتعلعل وعيوني ماراح ينشف دمعها ويمكن اموت بوقت جدا قياسي بسبب الحزن الراح يغزي گلبي ويقطعة من شدة القسوة

شيهانة :- راح احاول بكل حيلي اداوي گلبك لينزف من جرحه المايطيب بس فهمني شوكت شوكت ننفذ

فاتت منيرة ابتسم وگال :- توة الناس حرمة أبوي توة الناس

منيرة :- صگر ابوي طالبك بسرعة

باوعلي وبهت لونه معقولة سمع شي من حديثتنا او احد سمعنة و وصله الحچي!
تقربت منيرة باوعت لشعلان ورفعت راسها باوعتلي بنظرة عتب

منيرة :- ما اگص عليچ واگلچ ما سمعتكم تتحچون ، ولا فهمتكم بعد
أسمعي يالشيهانة طلعتچ من هذا البيت أصعب من طلعة الروح من باطن الجسد وراح اگلچياها بالعراقي "الموت أهون وأسهل من الطلعة من هذا البيت" المُشيد مو من حجر لا جدرانه من الظلم وأرضيته من نار وان حسيتي بروحچ عندچ جناح وراح تحلقين خلي يكون بعلمچ سقفه احد ابواب جهنم سقفه هو السَـعِير .

شيهانة :- راح تعلمين ابوچ؟ خل يكون بعلمچ اذا ابوچ عرف راح يقتلني ويقتل صگر وراح تشيلين دمنة برگبتچ

منيرة :- لا ما اعلمه ، انا أعيش العذاب كل يوم وما اگدر اتحچى كل يوم احلم اطلع من هني بس ما اگدر يذبحني أبوي الخوف من ناره سيطرت على گلبي وما الي مسكن من انحاش انحاشله
مو مثلچ عندچ اهل عشانچ وعشانه 'حچتها وباوعت لمشاري'
اساعدكم تنحاشون واغطي عن غيابكم لين ما تبتعدون

شيهانة :- راح اكون ممنونة الچ اذا سكتي وما فضحتي هذا السر هذا الشي الوحيد الأريدة منچ
لأن مساعدتچ النة تعني فتح ابواب الجحيم بوجهچ وبدون مخرج

ضحكت باستهزاء وگالت :- ليش انا عايشة بنعيم؟ چذي چذي حياتي عذاب ماراح يتغير شي
شيسوي مثلًا يحبسني بالدار لو يكسر ريولي؟

شيهانة :- عندچ عادي يكسر رجليچ ويگعدچ بالبيت؟

منيرة :- كسر روحي وگلبي وأذية الروح اصعب من أذية الجسد شيهانة

شيهانة :- امشي وياي منيرة نار الوحدة والبعد والشقاء في سبيل لگمة العيس اهون من نار مشاري عليَ وعليچ

منيرة :- انحاشي بروحچ ومنيرة الها رب يساعدها ويطلعها من عذابها عاجلًا ليس أجلًا

عافتني وطلعت من الغرفة ما اخفي عليكم تملكني الخوف اعرف منيرة مُسالمة وتختلف عن صمود ومشاري لكن ما متاكدة من صحة مشاعرها اتجاهي
يمكن تتصنع الحب وتسوي نفسها فقيرة حتى تضربني الضربة القاضية وتكسر شيهانة بيها ..

دخلت بحالة من الخوف والقلق حضرو مائدة الطعام گمت اباوع ع اكل كل ما لذ وطاب محطوط على المائدة معدتي اعلنت اعتراضها بسبب الجوع گعدت وياهم واكلت بشراها بحيث صگر كل شوية وصاح بضحك
:- حرمة ابووووي لا توگف اللكمة بحلكج وتموتين

مشاري :- خلها يبا الحرمة ما اكلت شي من امس
هچ يبا اكلي اللحمة
كان يشيل بالحم الذايب كد ما مستوي ويخلي ع ماعوني حتى اكل ويقدم كل شيء حتى اكدر امد ايدي بسهولة

ما انكر وما اخفي عليكم مشاري حنين لا كلش حنين بس بلحظات يتحول وحش كاسر ويفترس كل انسان موجود أمامه ، اشك بي يعاني من امراض خلته يوصل للي هوَ علي والا مستحيل تنجمع العاطفة والحنية المفرطة ويا براكين العصبية بذات الشخص وبهذا الشكل الغريب !

صمود :- يبا ولي يسلمك طلبتك لا تردني

مشاري :- أبشري

صمود :- أبي اروح اتسوگ لعرس رفيجتي ومسعود أبن عمي سلمان ولي يعافيك لا تردني

مشاري :- طلعه من هذا البيت مافي نورس تروح وتشتري لچ الي تبينه

صمود :- يعني حرام علي وحلال على حرمتك؟ حرمتني من مدرستي والطلعة والدشة محرومة منها حتى للسوگ

مشاري :- هذي بنت الناس غريبة وانتِ بنتي

صمود :- شمعنى؟ ما هي صارت حرمتك وشايلة أسمك وكاهي جدامك الشعر نازل والتنورة لين اركبها وتروح للجامعة لا حسيب ولا رقيب

باوعت لصگر بلع ريگ بخوف عرف مساير ابو الها وهدوئة يعتبر الهدوء ما قبل العاصفة ، سحبت ايدي من الاكل وضليت اراقب بصمت حالي حال صگر ومنيرة ، وخالة نورس الي نعتبرها فرد من العائلة وتشاركنة الاكل ..

مشاري :- گصري الشر صمود واصله لين هني
حچاها رأشر ع خشمة ، عفست وجهة وبين على ملامحها الغضب والحزن نصت تاكل بدون صوت

باوعت لصگر باوع الأبو ونظرًا لكون صگر الاقرب لمشاري وعزيز گلبه فـ تعاملة وياه اكثر ليونه

صگر :- يبا خلني اخذها انا ريلي على ريلها تاخذ الي تبي ونرد للبيت بساعتين

باوع لصگر بتفكير وگال بنبرة غريبة :- تاخذ منيرة ونورس معاك
منيرة :- بس انا ما اريد شي
مشاري :- انا گلت ياخذچ وياخذ نورس ماابي زنه براسي، صار مفهوم

صگر :-هذا هو مشكور يبا ما تگصر .

هزت رأسها بدون اجابة كملت اكل وغسلت ايدي وفتت للغرفة ضليت گاعدة اباوع ع باب بتفكير يا ترى ليش مشاري قبل صمود تروح ويا صگر وشرط نورس ومنيرة يرحن، معقولة يريد ينفرد بيَ!؟

بس ليش؟ انا اصلا نفاس وقبل النفاس علاقتنة مشت بشكل شبه طبيعي ما منعته من حقه لو شي واذا يريد يعاركني ويضربني ف عادي عنده يسويها كدامهم كلهم ، الحيرة اكلت راسي نصيت راسي شبكت اصابعي وخليتهن ع راسي بحيرة ..

دقايق وفات للغرفة شلت ايديني من راسي بدل ملابسة و قبل لا يطلع صحتله
:- مشاري

مشاري :- سمِ
شيهانة :- سم الله عدوك، بس ردت اسألك يعني اذا اكو امل اروح زيارة الاهلي بهذي الفترة مثل ماتعرف اني نفاس وما تحتاجني لحد الاربعين

مشاري :- وليش ما احتاجچ انا متزوجچ علمود الفراش؟

شيهانة :- مو هذا قصدي بس گلت يعني ماكو عليَ أثم اذا عفتك بهاي الفترة
مثل ماتعرف الزوجة مايصير تحرم زوجها منها متعمدة على الاقل هسة اگدر اروح وارجع بظرف اسبوعين

باوعلي بتفكير و گال :- طلبچ مرفوض دشيتي لهذا البيت حرمة الي عدلة ما تطلعين منه الا وانتِ ميته

شيهانة :- بس ما جاي اگلك طلكني هيَ زيارة لا اقل ولا أكثر!
مشاري حرام عليك مشتاقة الأهلي صار سنين ما شايفتهم الله ما يقبل بالشي الجاي تسوي وياي
تقبل هسة احد يحرمك من بناتك؟

تقرب مني حط ايده على رقبتي مشاها من رقبتي لكتفي ، بلعت ريگي بقلق وتوتر ضحك بمكر وگال :- تضحكين عليهم كلهم الا على مشاري حافظچ صم بكم ويعرف الي يدور براسچ يالشيهانة ، انتِ ان رديتي للعراق ما راح تدشين الكويت مرة ثانية

شيهانة :- شقصدك؟

مشاري :- تنحاشين وريليچ ما يعتبن الكويت وان كطعوچ وصل ، حافظچ تدورين المهرب من سجن مشاري وعمرچ ما تگدرين

شيهانة :- طيب تخلي شعلان يمك حتى تضمن رجوعي

ضحك بصوت عالي اهتزت اكتافه رفع رأسه ونزله ورجع حط ايده على كتفي وگال :- محتاجة شي يبا؟ طالع يم الربع للدوانية

بهت حلگي حچيت واني ادور وجهي وارجع للفراش :- سلامتك .

تمددت ورفعت الغطاء لراسي نمت والنومة أستمرت ساعات طووويلة فزيت راسي ثگيل ورجليني بيهن خدر غمضت عيني احاول اجمع حيلي والم شتات روحي المتبعثرة ، اخذت نفس طوييل ونهضت من الفراش دخلت للحمام غسلت وطلعت اشوف شعلان ونصعقت وارتج جسمي من لگيت سريره فارغ

ركضت فتحت الباب بهمة وصحت بصوت عالي :- خاااالة نورسسس صگررر منيييرة
اعيط واركض بين الغرف بخوف ياربي اخذ ابني مشاري اخذ ابنييي راح يحرمني منه
صگررررر وينك صگرررر
طب للبيت يركض صار بطريقي لزمته من اكتافه اهز بي واصرخ بقهر

:- مشاررري خطف ابننني أخذذذه المايخاف الله لا يحرم عيني من شوفة ابني ويحرمه من حليب امه
ابووووك اخذ ابني

رمش بعيونه بصدمة وگال بهدوء :- تهدي كاهو ولدچ بين ايدين نورس بالحديقة
دفعته بقوة من صدرة وصحت :- منووو اخذه

صگر :- الياهل ضل يبچي گتلها تطلعه من دارچ لا تصارخين چذي زرفتي أذوني

گعدت بالگاع سندت ايديني ع اركبي وغطيت وجهي بتعب نزل گعد گبالي :- خوفچ المستمرة من لا شيء راح يخرب كلشي بنينا ، انا معاچ يالشيهانة لا تخافين من شي شعلان قطعة من روحي هذا اخوي نسيتي!؟

شيهانة :- ما نسيت
بس خلي يكون بعلمك ما نسيت كلشي سوا ابوك ما نسيت تهديداته ما نسيت الحچي الي سمعته منك صگرررر ابوك زلمة ضااالم ما اريد يسوي بيَ السوا بالنسوان القبلي .

صگر :- لا تخاااافين يبااا لا تخااافين صرتي بمسؤوليتي وبرگبتي انا معاچ خليچ قوية مثل گبل لا تنهزززيين

الانسانة القوية الوحيدة الگدرت تسيطر على ابوي وتخلي يطلع حنيته وياها گبل جنونة هيَ انتِ
الزلمة المثل ابوي ما طاح بس گدام القوية مثلچ

شيهانة :- قصدك ابوك يعاملني معاملة خاصة؟ تختلف عن معاملته ويا القبلي

صگر :- عيل شلون چا چا شلون
ضحكنا عدلت گعدتي وگتله :- اذا وياي تعتبرة زين ويا القبلي شنو كان يسوي؟ اشك بي يذبحهن ويشمرهن لـ سمچ البحر تتغذة على جثثهن

صگر :- حررررمة ابوي اذا هن يگطهن لـ سمچ البحر انتِ يذبچ للصگور

شيهانة :- الصگور ما تتغذة على المنها وبيها عدها مبادئ مو مثل ابوك

صگر :- زعلتيني منچ حرمة ابوي على الأقل احترمي وجودي ولا تحچين جدامي راعي مشاعيري وشعوريري

شيهانة :- صگر احجي عراقي بشكل كامل لا تضل تشمر ع صفحتين هذا اصلك شبيك متگلي وان كانت ولادتك كويت اصلك يضل بصرة

صگر :- حرمة اب.....

شيهانة :- احترگت صفحة ابوك وحرمته لزگت حرمة ابوي وحرمة ابوي كرهتني بالساعة الخذيت بيها ابوك عاد انا شلون احبها ما شاءالله ، لتحسدنا

صگر :- طالعي حرمة ابوي مو بس ولادتي كويت ابوي بنفسه ولادته كويت وسكنه كويت وما شفنه البصرة غير مرات قليلة اي لا تلوميني مو زين ومني اعرف اتحچى عراقي واخبط وتفهميني زين

شيهانة :- صگر

صگر :- سم حرمة ابوي

شيهانة :- سمك الله گوم وخر من گدامي لا اطگك زگطة تعادل زگطة الثور واطيح فچوچك گدامك

قبض ايده ورفعها حيل وگال :- احچي عدل لا اطگچ بوكسي اخليچ اتفلين ضروس

شيهانة :- يمة اسم الله الرحمن خوفتني گوم جيب شعلان لحد ما امشط شعري ما اريد اطلع بهذا المنظر

صگر :- صار حرمة ابوي تامريني بشي ثاني؟
بعد انتِ بمقام امي وان كنت انا اكبر منچ واجب عليَ احترمچ واعاملچ معاملة زينة ، مجبوووور بر الوالدين جابرني

شيهانة :- گووووووووم

طفر بسرعة وباوعلي يتصنع الخوف :- اعصابچ عيني اعصابچ لا تاكليني بهدومي

فتت للغرفة كعدت گباال المراية جريت نفس عميق ومشطت شعري ولميته كباية رشيت عطر اندگ الباب صحت ادخل
دخلت خالة نورس جايبة شعلان گالتلي تتعذر

:- ماردت يگعدچ من نومتچ خذيته حتى ترتاحين عذريني اذا خوفتچ

:- ما تقصرين خالة بس شسوي انفعلت مو بيدي بسبب خوفي من تهديدات مشاري

نورس :- ليش هوَ شنو هددچ؟ خصمت عيونها بشك

سكتت ما رديت اخذت شعلان منها وغيرت الموضوع :- راح ارضعة خالة عينچ علي من انام لو اسبح لا تخلي صمود تاخذة هاي حية من تحت التبن شكو صفة زفرة بأبوها هيَ ماخذتها

نورس :- لا خالة ما اخلي يطيح للگاع ولا اخلي ياهو الچان يكضة لا تحسبين بس شبيچ ترجفين
حجتها ونزلت عيونها على ايديني

غمضت عيني وارتچيت ع سرير :- عبالي مشاري خطف شعلان
نورس :- ما گتيلي شنو هددچ مشاري يمة لا تضمين عليَ عسى ولعل اگدر اساعدج من تعتازيني

تنهدت بقهر ونصيت راسي گالت :- لا ترضعي اسويله ممية لا يتمرض الطفل القهر مو زين يأثر عليچ و على حليبچ وكله ينتقل للطفل

هزيت راسي بدون اجابة سوتله ممية شربته ونام خليته بسريره وشغلت التلفزيون گعدت گباله ، وحسبة تاخذني وحسبة تجيبني

ثاني يوم صگر اخذ البنات يتسوگن ضليت بس اني والخدم بالبيت ما حسيت غير مشاري دخل وأمرهم كلهم يروحون من وجهة بعصبية ..

باوعتله باستغراب تقرب مني جرني من زندي حيل :- وييييين شعلان، تحچيييييي وينننن شعلااان

بلعت ريگي بخوف وهمست :- نايم
جرني من ايدي حيل ضل يصعدني الدرج سحل ورا كل خلية بجسمي رجفت حجيت بصوت متقطع :- وين ماخذني مشاري فهمني وين مصعدني ظهري لسه يوجعني وما اكدر ع صعدة الدرج
مشاري احجي وياك ليش تجرني فهمني شصاييييير

ما رد عليَ وصلني گبال احد الغرفة الي كانت مقفولة طول فترة تواجدي هنا وابد ما نفتحت، طلع المفتاح من جيبة نترت ايدي منه بقوة رجع لزمني وضربني بقوة بالحايط خلاني ادوخ وانزل للگاع بدون حركة لزمت راسي ضلت الدنيا تفتر بيَ

فتح باب الغرفة وسحبني للداخل شميت ريحة التراب وحسيت بوساخة الارض بدون ما اشوفها شغل الأضوية ورفعني من اكتافي وشمرني على السرير طلع سلسلة حديد لفها على رجلي وقفلها بطرف السرير ..

جمعت قوتي وسألته بخوف :- مشاري ليش سويت هيچ افتحني لا يگعد شعلان

تقرب شمرني صرت نايمة ع ظهري ثنى رجله وخلاها على صدري بقوة ونبت اصابعة بفكي :- تردين شعلان يعيش وصگر ما يمسه سوء؟

ما كدرت اجاوب لان لازم فكي بقوة ورجله كسرت اضلاعي حسيت حتى بصوتهن ، رفع ايده ضربني راشدي ورجع لزمني من عنقي بقوة وخنگني وصاح بوجهي بغضب عارم

مشاري :- ****** ردييي ترديييين هذول الاثنين ما يمسهم سوء وله لا!!!

هزيت رأسي بـ اي
قرب رأسه وهمس بأذني :- عشانهم راح تسدين بوزچ وما تصارخين ولا يطلعلچ حس
والله يالشيهانة ان سمعتلچ صوت لو صحتي بصوت مسموع اول رصاصة راح تستقر برأس صگر والثانية برأس شعلان وشرط اييبهم جثث واخليهم وياچ هني حد ما تطلع ريحة جثثهم وتمرضچ وتموتچ صار معلوم

ضحك بخبث :- اكدر اسد حلگج وما يطلعلج صوت بس انه اريدج تتعذبين وتسكتين غصب ما عليج

شال ايده من عنقي گحيت بخنگة وهمست :- شنو سويتلك؟ انا ام ابنك مشاري ليش تسوي بيَ هيچ
حرام عليك الانسان كل ما يطغى ويطير ويتعافة وگعته تصير قوية ، صدگني مشاري رب العالمين راح يعاقبك ابشع عقوبة بسبب افعالك

عمره الظالم ما گدر يستمر بظلمه وأستبدادة راح يجيك يوم يا مشاري

ضحك بأستهزاء وشتدت ملامحه قسوة وبانت كل تجاعيدة ضربني بظهر ايده على وجهي بقوة وگال :- انتِ بالذات لازم تموتين وتعفنين بدون دفن اريد اشم ريحة موتچ لحد ماتصيرين عظااام يا *** ياا ******

شيهانة :- بس گلي شنو الذنب العظيم الي ارتكبته ويخليك تتمنى موتي بهذه الطريقة البشعة فهمني؟! اشرحلي مشاري
ما اريد اموت بدون ما اعرف ذنبي على الاقل استغفر ربي واطلب عفوه

هز رأسه بالرفض ورفع حواجبة مشى يم مفاتيح الكهرباء وطفى كل الاضوية والمروحة
والتفتت شفت ملامحه بسبب الضوء الداخل من شباك الغرفة محتدة غاضبة واسنانة تريد تاكلني

حاچيتة للمرة الأخيرة :- الله سبحانه وتعالى ناطينه فرصة حتى نتوب ، كل دقيقة بحياتنة هي فرصة حتى نتوب ونصحح اغلاطنة مشاري راجع نفسك لا يجيك الموت على غفلة وتاخذك المنية ويطمك التراب وانتَ مذنب وشايل برگبتك دمي

والله يا مشاري لو جان دخولك للجنة مرهون بغفراني لـذنبك ما راح اغفـرلك

طلع وسد الباب وطگ القفل ، عرفت هاي نهايتي وخروجي من هاي الغرفة صار شبه مستحيل
او مستحيل تمامً

باوع بعيني ضوء الشباك ضارب على جزء من الغرفة شاشة تلفزيون مكسورة وميز تواليت مرايته مكسرة جزء منها موجود والجزء الاخر منثور على الارض والاتربة مغطية المراية وسطح الميز والحايط ابيض بي أثار رؤوس ما گدرت اميز اللون اسود وربما دم يابس وصاير أسود

ضليت الوب وانتظر ساعتين ثلاثة ماكو كل شوية اگول هسة يحن گلبة هذا تهديد وراح ينتهي
جاي يخوفني والثلاث ساعات صارن اربعة وخمسة صار الليل والظلام صار دامس مرعب والغرفة بيها ريحة بشعة وحارة حرمني حتى من هوى المروحة ..

بديت اسمع صوت عياط صگر كلامه كان غير مفهوم وبعدها صياح مشاري استمر هذا الشي ساعة تقريبا سكتو دقائق وسمعت صوت صگر صار قريب
صاح بصوت واضح :- شيهاااانة وينچ شيهااانة حررمة ابوي علامچ ما تردين

ضل يفتح بالبيان ويسدهن بعصبية واضحه جدا غمضت عيني بقهر وسالت دموعي ، الي منعني من الكلام والعياط خوفي علي و على أبني مشاري من يغضب يتجرد من الرحمة ويلبس ثوب الطغيان ويجلد الناس بأحبابهم ، ما اريد اخسر ابني وصگر لو اكون سبب بأذيتهم ..

الشي الي استغربته صوت صگر يم باب الغرفه الي اني بيها ليش ما ضربه او حاول يفتحه ومبين علي يحوم بالمكان!! معقولة ما توقع وجودي هنا لو اكو سبب اخر؟!

مشاري بغضب :- صگررررررر اذبحك احترم روحك وانزل لا تلعب بأعصابي شفييييك

صگر :- وين الحررررمة لا تگولي نحاشت شيهانة ما تنحاااش ما تهد شعلااان وتنحاااش
تحچى وين وديت الحرررررمة

مشاري :- صگررررر اگصر الشرررر لا تخليني ادووووسك بريولي واحرمك من شمة الهوى

منيرة بخوف واضح ونبرة ترجف :- ولي يعافيك لا تتهاوش مع ابوي ما نبي نخسرك ونخسره ولي يسلمك اسسسكت

مشاري :- تگضب لسانك من تتحچى ويا ابوك وان طال هلسان اجرة واگطعة من عرجة ويصير وجبة ريوگ الي

صگر :- لأنننننك مجرم كل شي يطلع منك ما لك امان الله يعلم الناس الدشت لهذا البيت وطلعت بظروف غامضة شصار فيييهم ما استبعد تكون ذابحهم

منيرة صرخت بخوف :- صگررررررر
صمووود ركضي قفلي باب الدار على شعلان صموووود

صمود :- ما اقفله بالطگاك ليطگة

منيرة :-يباااا لا حرررام عليك ياااهل ما شم ريحة الدنياا
صگرررر لا تموته صگرررر صمووود ساااعديني راح يذبحه

صگر :- ما اخليك تووووصل لشعلان وتأذي ما اخلييييككككك
منيرة :- صگر راح يموت بيدك هذا ابوووك

مشاري :- خلي يطلع الحقد والنار الشابه بگلبه خليه يذبح ابو الخلاه عايش بنص هذا العز ورفع مقامة

صگر :- ياليتك گطيتني بالشارررررع ولا عيشتني بنص عز بثوب المذلة ، طالع يبا الحرمة تردها لبيتها اليوم ولدارها والا ...

مشاري :- شتسوي؟ تذبحني اذبح صگر اذبح

صگر بغضب :- وين شيهااااااانة مافي غيررررك خطفهااا طلعهاااااا من هني طلعهاااااا
حجاها وضل يضرب بباب ثاني صوته شوي بعيد

مشاري :- رديت للدار مالگيتها ماخذة كل اوراقها وكل ذهبها وفلوسها ومنحاااشة
صگر :- من صجك؟!!! شيهانة ما تهد شعلااان

مشاري :- انزل بروحك للدار وطالع ماخذة كل شي غالي ومنحاشة للعراق يبا تهدا وانزل تاكد بنفسك

صمود :- وانا شفت حجي ابوي صج ما مخليه شي الا وماخذته الطماعة بنت فگر گطت ابنها وخذت البيزات ونحاشت والله يعلم معامن ، عشيقها مافي غيييره

حطيت ايديني على اذاني اسمعها تطعن بعرضي وتتهمني بالخيانة بكل برود بچيت بصوت مكتوم شوية واختفت الاصوات وبدأ عذابي داخل جدران هذه الغرفة ..

للحكاية بقية 🖤

لتنسون تصويت + تعليق 🖤

ارجع اكرر لا تحكمون على الرواية من اول بارت يمكن ما تعجبكم مثل ماصار وياي اول ما سمعتها بدايتها ما حبيتها بس من كملت سماعها انغرمت بيها 🫣

النشر يبدأ يوم 10/4/2025 ويمكن اقربه ليوم 4 ان شاءالله وبحيله وقوته

ساعدوني بنشر الرواية شاركوها بكل مكان حتى تكون بدايتنا قوية