رواية هشاشة قلب الفصل الثامن والعشرون 28 - بقلم هاجر قاسم

الـسـلامُ عـلـيـكـم 🌻🌼

هشاشة قلب
الـبـارت_26_
الكاتبه_العباديه
alabadyia_09
                  
أراكَ علـيّ أقسَىٰ الـناسِ قلباً
‏وَلـِـي حـالٌ تـرقّ لـهُ الـقُـلـوبُ
‏حَبيـبٌ أنتَ قُـل لـي أم عـدوٌّ
‏فـفعلُكَ لـيسَ يفعـلـهُ حَـبيـبُ

~~~~~~~~~~~~~~~~~~~~~~~~~~~~~~~~~

( قبل قراءة البارت احب أنبه إنو المكالمه نقلتهه نصاً كلمه كلمه مثل ماوصلتني )

ثُرىٰ . . .

رديت على موبايلي وإجاني صوت يرجف ومبين مال واحد يبچي منهاار :-

- اختج ماتت !!

- شنوووووو؟؟؟؟؟

گلبي انخمش ورجليه رعشت .. أريد ألزم الموبايل بإيدي مااگدر حيلي باد ورأساً تقوى صارت مقابيل وجهي .. الصوت يتردد ببالي

- فدوه تعالي ماتت فدددوه الحكيي

رأساً عطت بعلو صوتي من حسيت شهقاتهه بلشت تزيد وصوتهه الباكي ينعي ويتوسل

- شكووو فهميينيي

الصوت جان مال بنيه يمكن حماة تقوى الصغيره منهارره .. نهى اجت تركض وتأشرلي شكو واني بس اريدهه تحجي لان تگطع وكلمه كلمه تحچي

- لاتكولين لااهلج يمكن يكتلون خواتي بس انتِ تعاااي فددوه الحكووو

- تتتقوووى شبيهههههه

- ممممـ.... مااتت

هيَ كالت هيج وآني بعد ماحسيت على شي...

نهى.. چنت توني جايه من الدوام ولگيت المشكله مال البنات اخواني معصبين وثُرىٰ دخلت للغرفه تبجي هاي عادتهه .. شويه وسمعت عياط ثُرىٰ .. ركضت أفهم شنو السالفه لگيتهه تعيط وهيَ تخابر وتريد تفهم شكو واني مافاهمه شي اصلاً .

لحظات وثُرىٰ تكومت بالگاع متت خوف ركضت عليهه والموبايل طاح من إيدهه

- ثُرررررررىٰ شببيجج

ظليت اگعد بيهه ماكو اهلي التمو يكعدون بيهه .. واني ركضت ع الموبايل اريد افهم السبب الخلّه ثُرىٰ هيج يصير بيهه  .. شغلت الموبايل بعدما انطفه ولگيتهه اخر متصل تقوى !

خابرت وظل يدگ وماكو جواب .. استمريت أتصل لما رد اجاني الصوت تبچي

نهى.. الووو شكو شصاير

- تعالو بسرعه

نهى.. اي شكو ونجي

- اختج ماتت

نهى.. شنووو شلوون ماتت

- هـ.. هسه هيَ ممدده بالگاع واگعد بيهه ماتگعد ومحد بالبيت

نهى.. شبيههه شصار وياههههه

- تعاي وتفهمين اني ماكدر احجي راح اموت

سدته واني كلتلهم وركضت للعبايه رحنه اني واسماعيل وامي وويانه موسى.. اخذنه تكسي ولبيت تقوى .. ارريد السياره تطير بيه راح اموت من الخوف .

وصلنه لبيتهم ونزلنه ركض رحنه للمشتمل مالتهه ماكو صوت وبس البيبان مفتوحه.

دگينه بيت عيالهه ماكو صوت محد فتح الباب .. لاحظت خيط بالباب بس ينسحب ينفتح .. سحبته ودخلنه

بداية بيتهم المطبخ .. وبعدين صاله والغرف موزعه بالصاله .

بالمطبخ ماكو شي ولا الصاله ظليت اصيح بعلو صوتي احس بلعومي تجرح

- تقوووووووى

انفتح الباب وطلعتلي حماتهه الصغيره بالأول متوسط .. شفت ملامحهه .. وجهه أحمر دم وتشهگ وتبچي كل شهگة تسحبهه تشگ الصدر.

خلتنه نرجف ركضت عليهه

- اختتييي ووويييين

أشرت ع الغرفه بأصبعهه وإيدهه ترجف .. ركضت للغرفه بهستيريا حتى عباتي طاحت من على متوني وتسحل وراي .. امشي وأربد بيهه كلساع اريد انسمط.

دخلت للغرفه ولگيت تقوى ممدده بالكاع على طولهه ووجهه ازرگ .. ركضت عليهه اهز بيهه واگعد ماكو شلت راسهه طلعلي دم قليل بإيدي .. رأساً نزلت دمعتي وعطت بموسى وإسماعيل الچانو ملتهين بأمي التخربطت .

نهى.. تععااالوو شيلووهه وياي للمستشفى

فتحت الكنتور وسحبت عبايه لفيتهه بيهه وشلناهه اني وإسماعيل .

حطيناهه بالتكسي وموسى ورانه ساند أمي هم اخذ تكسي وتوجهنه للمستشفى

اول ماوصلنه ركض اسماعيل جاب السديه حطيناهه وركضو بيهه للطوارئ.

يارب مابيهه شي حتى لو نفس قليل ميخالف بس كون ماميته امي تموت وراهه غير ثُرىٰ العفناهه متخربطه مانعرف شأحوالهه.

إسماعيل خابر حسن سأله على ثُرىٰ .

حسن.. إسماعيل اني هسه جاي بالسياره ثريا راح تتخبل يمكن صار عدهه إنهيار عصبي تحتاج أبر مهدأه حالياً بالتكسي ماكدر احجي اجي ونتفاهم

عائلتنه إنگلبت كلاب .. شويه والمستشفى إنترست ، ماهر ووليد وإسماعيل وحسن واني بيناتهم ابچي يردون يرجعوني واني رافضه اخواتي إثنينهم جوه واني ارجع.

طلع الدكتور المسؤل عن تقوى .. رجليه بادت خايفه من جوابه ياأما لغرفة التشريح ياأما لغرفة العنايه .

كلنه ركضنه عليه ظل يباوع بينه ومخنزر كال :-

- الحمد لله المريضه طلعت من الموت بعدما كانت شعره بينهه وبين الموت بس لازم نفتح محضر لان لكينه آثار خنق على رقبة المريضه وهاي محاولة قتل .

من كال طلعت ظليت اشهگ فرحانه اهم شي عايشه وتتنفس .. بس تشم الهوىٰ الأشتمه هالشي كافي .

شويه وشرّف رجلهه المصون دخل يركض ملهوف.. إسماعيل وحسن گامو تلگوه بغضبهم وحرگة گلوبهم فوك الرهبه الحصلناهه من وراهم الله لاينطيهم .

كام يصيح

- ماجنت ادررري بالددواام

اسماعيل.. ومن تدري خواتك ماينقبلن ليشش تخلي اختي وياهن

- گلتهه انتَ خواتي جا ويامن اخليهه غير اهلي يمهه خاف تبقه وحدهه

اسماعيل لزمه من ياخة قميصه ويهز بيه بحرگة گلب وماهر ووليد ركضو يفاككون بيهم

اسماعيل.. وولك اخواتك خنگنهههه يريدن يموتنهه

- هدددنيييي

اجو الأمن مال المستشفى طلعوهم بره .. فتت لثُرىٰ وإمي نايمات وحده بصف الثانيه ظليت ابچي مهضومه .. مصيبه وطاحت على روسنه .. تطشرنه بدقايق .

إمي كاعده بس مغمضه عيونهه وتبجي دموعهه تصب وهيَ مغمضه وثُرىٰ فاقده ماتدري شجاي يصير يمهه .

رحت يم راس امي بستهه وهمس بإذنهه

- ماما تقوى مابيهه شي اگعدي مرمرتي چبدي محد وياي بس اني مره اگعدي وياي فدوه رحتلج

فتحت عيونهه بثقل وبچت همست

- انه صوچي إلمن زوجتهه لو مخليتهه تبقه يمي ولا هذا الضيم

نهى.. جا انتِ شدراج هيج يصير .. وبعدين ياهو اليخليهه يمج هم ماتسلمين من حجي العالم وهم محد دايملهه

ظلينه نشكي همومنه ونبجي .

ثُرىٰ . . احس روحي بعالم ثاني راسي ثگيل وعيوني مااگدر افتحهن جسمي نحلان وبس احس بوجع الادويه اليحطوهه بإيدي .

فتحت عيوني دخل الضوه بيهن ظليت اغمض وافتح يلا استقر نظري .

سقف ثانوي ابيض وبلاجكتورات قويه وتعلاكة المغذي هاي غير ريحة الديتول الخنگتني .

عفست ملامح وجهي متأذيه وجسمي مكسر .. إلتفتت على جهتي اليمنى أريد اشوف احد من اهلي .. ولگيت ع الكرسي ماهر نايم ملامح وجهه تعبانه .

أريد اتذكر اخر موقف شنو وشصار وتخربطت.

..

گعدت على حيلي من تذكرت تقوى .. ظليت اصيح بإسمهه وابچي كل ظني ماتت اموت وراهه.

ماهر گعد وركض عليه يهدأ بيه بس اني اريد اسكت ماكو ابچي واصيح حتى الكانونه انشلعت وإيدي ظلت تجري دم.

ماهر.. مابيهههه شييي مابيهه

- جذذب سمعت ماااتتت كالتلي مااتتت

- البنيه صغيره ماتفهممم من شافتهه مغمي عليهه عبالهه مااتت .. ثُرىٰ ماماتتت تتنفس ..  ثُرىٰ اهدددييي

لزم وجهي بين كفوف إيديه .. مسح.دموعي وهمس

- وداعتج مابيهه شي ودااعتج

- وينهه خل اشوففهههه

- مابيهه شي بس بعدهه ماگاعده

ظليت اشهگ وابجي وهوَ يهدّأ بيه .. صاح الممرضه سوتلي الكانونه ورجعت اتمددت ع السرير.

إجه ماهر كعد يمي لزم إيدي وتنهد

- راح يصيرلج يومين

- حيييلل ليش يومين

- لان خليتهم يضربوج منوم لما تبردين يلا كلما تكعدين تظلين تصيحين وتهذين بإسمهه خوفتيني عليج ثُرىٰ إحساس فقدانج دمرني لتعوفيني ثُررىٰ

ظل يضغط على إيدي حيل ويتلمس بوجناتي ويجرجر حسرات.

- نعسانه؟

- لا شبعت نوم بس اريد اشوف تقوى

- من تگعد اني اخليج تشوفيهه هسه صايره هوسه ناس تجر طول وناس تجر عرض

- ليش؟

- محاولة قتل 

- عزززااا منو قاتل؟

- اخوات زوجها متعاونات وخانكاتهه بالشال الله ستركم ومغمي عليهه قبل لتموت والا قاتلاتهه

- عزااا وين عايشين يمه اخيتي صخام بوجهي وين عايشه صارلج چم شهر وتالي

- الله العالي

- وين هسه هنه؟

- إعتقلوهم الشرطه وحيطلعوهن بكفاله اكيد لان نسوان وبالسجن واگفه

- لا مايطلعن والله ولايطلعن خل ياخذن جزاتهن اني بعدني مصدومه مااصدگ والله مااصدگ

- ولا اني

ظليت صافنه شنو هاي وين عايشين يربي جان اختي راحت بيهه .. يمكن انسه مواليدي وماانسى هاي الايام  .

إستمرت المشاكل وتدخلت العشائر كلهه تريدنه نتنازل ونطلعهن بس إسماعيل ماقبل .. تقوى گعدت وبس صافنه كلمه مانطقت ومن يجي الليل تظل تهلوس وتصيح عووفنّي وبلعومهه كله بنفسجي آثار الخنگ .

حتى ماسولفت إلنه .. الله لاينطيهن شسون بإختي تخبلت .

أمي تكعد يم راسهه بالليل تبچي وتقره آيات قرآنيه تهدأهه واحنه وياهه لانوم ولا راحه ولا حياة مستقره .

إخواني اتفقوا بيناتهم ع الطلاگ وتتطلگ احسن ماتموت .. هيَ ظلت ساكته ماحجت شي بس گامت تبجي لان بإعتبار بعدهه عروس صارلهه كم شهر من تزوجت وشافت ضيم وضلايم .

اسماعيل خابر رجلهه گاله تطلگها بس ماقبل وهم صارت مشكله ذاك يصيح واسماعيل يصيح اخر شي تدخل شيخ عشيره وگالله تطلگهه وكل واحد بطريقه مادام حياة البنيه بخطر .. شكد توسل كال اطلع بيهه يم اهلهه اعزل بيهه بس محد قبل لان صارتلنه گرصة إذن شنو مارايدين بتنه .

اليوم إجه السيد لبيتنه علمود يرمي عليهه يمين الطلاگ وهيَ لازم تطلعله .

هوَ حتى شوف ماشافهه من طلعت من المستشفى ماخليناه .

العصر إجه رجلهه وصاحهه إسماعيل للاستقبال .. لبست وطلعت تباوع بقهر ماتريد تتطلگ بس مااعتقد بعد عدهه استعداد تتحمل الشافته .

راحت للاستقبال شويه ورجعت تشهك وتبجي

- شبيج تقوى

بس تبجي .. حضنتني وظلت تشهگ بقهر

- احجي يختي ترتاحين احجي

تقوى.. طلكني

- ارتاحي تقوى ارتاحي اخواته ماينحملن

ظليت سانده راسهه على متني ودموعهه تنزل

تقوى.. كلشي توقعت الا يدورن عليه يريدن يموتني ماتوقعتهه ولا حسبتلهه حساب نهائياً

- ليش هيج يسون

تقوى.. الغيره تعمي ثريا .. لان هنه كلهن مامتزوجات وعاضات ركبهن ويشوفني اني توني متزوجه وألبس وأبدل لرجلي ومدللته تخبلن عادنّي وحاولن يسون مشاكل بيناتنه من شافني كاسبته ومايصدگ بيهن ظلن يضربني واني مااگولله اگول خاف يضوج يجي تعبان واني اتلاگه بالنگ ف اسكت.

لما وصلت حدهه ذاك اليوم گتله لعبت لعب طلعت البگلبي كله صرخت وملشت شعري ظليت انشال وانرگع .

تالي زعل عليه لان واني عصبيه كلت حقيرات مامتربيات رزلني على حچايتي ورزلهن وظل زعلان عود منو مربيهن.

بزعت ثريا اتكأب من ادخل للبيت واريد ابقه ببيتي مايخليني يگول اخاف عليج وحدج .. من يطلع يشتغلني كرب وتنظيف لما اطيح صفح من التعب .. بالأخير يجي هوَ التعقيد والضوجه والكآبه كلهه بوجهه احاول اضحك ماكو تكول متعارك وي خشمه .

اسكت عنه من يشوفني اسكت يگلي ماتهتمين بيه ويرزلني ..

بيوم الگاللي اني اخذج للزياره سون مشكله شكبرهه وتعاركن وياي وگالله تتجاوز وتغلط علينه وهوَ من النوع يحترم اهله وخصوصاً امه ومن سمع من إمه گال ماكو زياره .

بطلت وگعدت نظفت وكملت .. حاولن يستفزني علمود نتعارك بس ماكدرن .. آخر شي من حرگتهن دارن عليه يريدن يكتلني اني ظليت أملش بيهن وأدفع وعضيت إخته الچبيره بمتنهه .

من سويت هيج دارن عليه لزمن إيديه ونزعني شالي ولفنهه على رگبتي وظلن يخنگن بيه .. حسيت روحي طلعت الهوى ضاق بريتي والاوكسجين خلص .. من حلات روحي والروح عزيزه ظليت اقاوم لما رجع راسي ع الحايط وانردم رأساً انغمى عليه وهنه جانن حاصراتني ع الحايط عود حتى مااشرد .

من انغمى عليهه عبالهن متت واخته الصغيره خابرتجن هاي لاتحل ولاتربط وتخاف عليهن حتى ماخابرت واحد من الولد خاف يسجنون اخواتهه عبالهه السونه بيه هين .

هسه صرت مطلگه وهوَ الباع چان يگدر يطلبني لبيت الطاعه لو يتمسك بيه ع الاقل مو حچاية التنگال بس مااطلگ وهاي هيه وبعدين من ضغطو عليه تخلى عني.

نهى.. خل يولي حقير .. من الله لاينطيهن

ثُرىٰ.. دسكتي لايشور بيج سيد

نهى.. ههه خوش اخوات سيد عمي

تقوى.. مايخليهن بالسجن اواعدجن باجر هنه طالعات 

ثُرىٰ.. شنو بكيفهن يطلعن مانتنازل

تقوى.. اواعدجن وشوفن

صدگ ثاني يوم اجه اتصال لااسماعيل كاله طلعن بكفاله 15 مليون

ظلينه ننشال وننرگع ليش طلعن وولا كأنما مسويات شي والله ظلم.

ماهر ماعافني كل هالفتره يوميه يتصل ويتطمن عليه وكلساع جاينه .

حتى من الكليه هوَ اخذلي إجازه همزين نقذني لان نفسيتي متدمره مااگدر حتى اداوم.

اليوم إجانه هم سيّر بالليل .. لبست فستان كلوش مخصر وسويت شعري ذيل حصان اكثر تسريحه احبهه .

دخلت سلمت وظلينه نسولف واهلي موجودين .. هوَ يباوع عليهم ويباوعلي متوسل ويتحسر يريد يستفرد الاخ.

أشرلي عود سوي أي شي .. اني أشرت لنهى بحواجبي .. فهمت القصد وگامت طلعت .. كالتلهم خلوهم وحدهم .

طلعو وبقينه بس إحنه .. أشرلي بلهفه وع السريع . اجيت گعدت يمه رأساً باسني بخدي .

ظليت صافنه وضحكت

- مللوني أريدهم يطلعون ماكو

- هههه

- مشتاقلج

- واني هم صار شكد مامسولفين

- اي هاي الظروف صعبه الحمد لله من خلصت بخير وسلامه

- الحمد لله

تذكرت الدكتوره لازم اعرفهه حتى لو مااريد اذكره بالمشكله بس مااكدر بعد فضولي راح يفجرنّي

- ماهر منيه قطر ؟

- اخت صديقي مخليهه امانه يمي

- وليش اجت المكتب

- علمود إختهه تريد تقدملهه

- وانتَ خوش طردتني بنزاكه

- ثُرىٰ اعرف سوالفج انتِ بس نظراتج افترسنهه مو الإ اخليج يمهه شرط تموتيهه وهيَ كاعده

- شننه سوالفي بله

- اهوو ثُرىٰ يعني سوالف البنات مال غيره ماغيره

- ومن تدري بيه اغار ليش تدخلها؟

- يعني اطردها؟

- اي

- ااااه؟؟ انتِ لو بمكاني تطرديها؟

- لا بس مااسوي مثلك وتطردني

- ثُرىٰ مطردتج اني بس خاف تصير مشكله سويت هيج

- اممم

- صدك اني ماصالحتج بوقتهه

- شنو ليش تصالحني

- غير تزاعلنه

باوعلي بنظرات خبيثه ونزلت نظراته على شفافي .. عض شفته وغمز .. خدودي صارن نار الغمزه تحديث جديد توه نزل . يريد حجه عزد يراضيني بهالطريقه

هوَ بدون غمزه مشلول حالي مو الأ غمزه وياهه.

قرب وجهه يم وجهي نفسنه صار واحد .. صوت انفاسه المتسارعه ملئ مسامعي .. لهفته وعذابه بقرابي خلاني افرح .

يقرب راسه ويرجع يبعده مثل شي طاهر مايريد يلوثه .

اخر شي همس

- مااتحمل بعد.

تقرب على شفافي طبع قُبله تفنن بيهه وإحتار شلون يحفظ تفاصيلهه بذهنه.

الهوىٍ إنقطع عني وإختنكت وهوَ ماابتعد .. حطيت إيدي على صدره ودفعته خفيف .

إبتعد مخمور ودايخ .. ظل يغمض بعيونه ويتقرب مني يتنفس النفس الآخذه.

إبتعد مبتسم ويباوعلي بنظرات حنيه وراحه .. تقرب مني اني رجعت لوره خاف يكررها .

ضحك وكال :-

- تعالي مااسوي شي لتخافين بس هاي جرعة تخدير كلش كافيه افيشش

تقرب رفع إيديه لشعري ولفه كعكه بعد ماجان ذيل حصان .

همس بإذني

- ماخلاني آخذ راحتي المره الجايه رفعيه

ضحكت وأخذت الخصله المنززلتهه ظليت ألعب بيهه وألف بيهه بحركات دائريه على إصبعي .. لزم إصبعي وفلت الخصله همس.

- هاي الخصله من شعرج البُني كلما تلفيهه راسي يدور وياهه خليتي الكون يندار وينهار بزخم اللفائف

رجع تقرب يم رگبتي ويم إذني تحديدياً .. تلمسهه بإصبعه

- هاي ليش حمره؟

سكتت خجلانه ونصيت

- إحمرار إذنج ديثيرني

وسع عيونه ووكف .. ضحك وكال :

- اذا بقيت بعد مااضمن نفسي رايح آني

وگفت هوَ ودعني وباسني بخدي وصاح إسماعيل سلم عليه وراح لااهله .

من رجع خابرني كال :-

- بما إنو جنتي بفتره كئيبه وتقوى هماتين دتمر بفتره صعبه عليهه فكرت باجر نروح للأرياف

- صددك وين؟

- صديقي البارحه إتصل بيه كال جيب الاهل وتعالو بيتهم بالدوايه

- ونروح؟

- اي طبعاً نروح كلنه بس انتطيني رأيچ حتى اخابر إسماعيل اگله

- اي اروح اموت على الطبيعه

- فديت مرتي الطبيعيه ههه

- بس السياره وين تكفي النه

- اذا السياره متكفي احطكم بعيوني

- هههه لا صدك

- نروح بسيارتي وسيارة وليد وسيارة صديقي دبرتهه لااسماعيل يسوق بيهه

- يعني الكل يروح

- اي الكل

- اني مااريد اروح بسياره

- لعد بشنو تروحين؟؟

- اريد اروح بستوته

- شنو؟

- اي اروح بستوته حتى اشبع هواء نقي

- دتتشاقين اكيد

- لا والله صدك احجي اذا تحبني نروح بستوته

- ومنو يسوقها ؟

- انتَ غير؟

ضحك ضحكه لم يضحكها الضاحكون من قبل.

رج سماعة الموبايل .. ضجت شنو يضحك عليه اني جاي احچي صدگ

- هههههههههههههههه خرب بطني أذتني من الضحك اول مره اضحك هيج ههههههه هههههه

- مااهرررر والله احجي صدك

- حتى لو اسوق الستوته مااخليج تركبيها

- اتلفلف بس كون اروح بيهه

- ههههههههه انسي الروحه كلهه اصلاً أذا صدك

- لا والله صدگ صديق اسماعيل عنده ستوته اخليه يخابره وأصعد بيهه

- هههههه بالأحلام يحبيبي

- ماااهرر هاي شبيك والله أمنيتي اروح لهاي المناطق بستوته

- زين تعقليها اني اوافق؟

- اي چا شبيهه

- ههههههه سكتي ثُرىٰ لتسمعج امي يمكن تروح تنتحر هيَ الروحه للقريه عود كتلهه تروح ويانه ظلت تكشكش مو الا تسمع رايحين بستوته ههههه

يا المن رايحه مره همزين ماراحت الله فكني جا هسه الطلعه تروح تطلع عليه زقوم.

- ماهر فدوه لخاطري اذا عندي خاطر خل اروح بستوته

- اممم بشرط

- اي شنوه ؟

يتبع..

                عـبـرات الـعـبـادي🌻🌼