رواية هذيانٌ بين جمرٍ وجليد ..(ارملة اخي المجنونة) الفصل السابع وثلاثون 37 - بقلم نورا ناصر

السلام عليكم
هذيان بين جمر وجليد
فصل ٣١
نورا ناصر

أحببتكَ بقلب طفلٌ بريء...لايعرفُ للحيلةِ دروبٍ
استنجدتُ بكَ ...ووجدتَ انتَ من يُشعل الحرائقَ في جوفي...
ظننتَ حياتي بكَ وأليك ...أماناً لي كجنينٌ برحمِ امه
وخابت ظنوني ...وكأن كل ما رأيتهُ أحلام يقضةِ
و وجدتَ نفسي...وأنا أرميها في غياهبِ حبك
بقلم noora-1995

***********&&*********

من كال تعال بويه تعال ، رجع عندي الامل ، ادري بي يراوغ وياي ويريد يشلع كلبي بس ما يتخلى عني .
رجعت كعدت يمه ..

كال صيح ع ابو محمد " الكهوجي" خل يحضر كهوته
سالفتك مطولة بويه وانه هم اريد اروح لابو احمد بالمستشفى الرجال متخربط .

_ اني ماريد اعطلك بس حلها يمك ، اني اكدر اروح لأوس واشك حلكه واخلي غصبا عليه يحذف الفديو وهو الممنون واسافر لان سفرتي بعد كم يوم .

رد : ولك بويه مو هيج تنحل الامور انه هم اكدر اروح لابوه وجده بس اول شي ماريد افضح البنية وثاني شي ترة هذا مو حل يكدر اوس ينشره ويكول ضاع جهازي لو تسرب الفديو بدون قصد مني او يذبها براس واحد ثاني .

هزيت راسي بتفهم : اي والله حجيك صحيح شيخ بس كلي شسووي ؟ والله البنية شريفة واني اعرفهه كولش زين .

كال ادري وهذا شي مانختلف عليه انه وياك وهذا مايبرر خطأك غلط روحتك للشقة لوحدك .

_ هي البنية استنجدت بيه حجيتلك التفاصيل اني وايدها جانت تنزف ومحتاجة تقطيب .....

_ اي ايدها تنزف توديها للمستشفى رأساً مو تكعد تخيطها انته بغرفة النوم والشقة مليانة كاميرات عود شنو تصرفك هذا شوفيني انه دكتور هو انته بيك خير جان كاملت دراستك الطبية .

جاوبت بقهر : هو منو الي مخلاني اكملها غير انته لمن بلغتك بخبر زواجي من نيفرا كطعت عني الامدادات وخليتني أفر بأذاني .

_ غلط زواجك من الروسية غلط بووويه وانه كتلك بوكتها وهسه هم اكلك وهاي كدامك لهسه جاي تدفع ثمن غلطتك ، يعني حلوة هسه هاي انت شهر هناك وعشرة هنا وابنك مريض لاتكدر تجيبه هنا ولاتكدر تبقى يمه هناك .

_ شسوي غلطت وانت تدري بيه اني شكد متعلق بيكم هنانه وبأمي وسبحانه المايخطئ واذا على سالفة الفديو لازم الناس ماتحكم على مقطع فديو مو فديو كامل خلي يكملون الفديو للأخير ويحكمون .

_ انت شايف المجتمع العايشين بي احنه ترة احنه بالعراق مو بروسيا ولك هنا الناس اذا انتشر الفديو وشافوا راح يظنون سوء حتى بالنية ، انت تكول اجه اوس ودخل علينا واحنه جنه نحجي ونتناقش ، الناس من تشوف الفديو راح يكولون جان بينهم شي وعدهم علاقة وناويين يسون شي ، بس اوس دخل بالوقت المناسب وكشفهم ، تكملة الفديو ماتفيدك بويه خاصة هو من كاميرا مراقبة بدون صوت.

فر سبحته ويباوعلي ، غمضت عيوني ثوني بيأس
ورجعت باوعتله : لعد والحل شيخي اني داخل على الله وعليك ، اني مايهمني بس البنية ماريدها تنفضح والناس تحجي عليها متستاهل .

_ تزوج البت ....

خليت ايدي على لحيتي صفنت باوعتله بحيرة
اتزوجها!! يعني ماكو غير حل ؟

_ ماكو غير حل ، حتى اذا طلع الفيديو ، احنه نكاوم عشائريا ، بويه احنه جتالين كل من يمس عرضنا ، نكول هالبت مرتنه وهو رجلها ونسد حلوك كلمن يتطاول ويحجي حجي زايد .

_ اي بس اني من أشهر خطبتها ورفضتني رفض قاطع.

_ وهذا انه وين عنه الحجي ليش ماكتلي عليه ؟

_ جانت علاقتي بنيفرا متوترة ووصلنه لطريق مسدود وجنت اريد اطلكها ، خطبت موج رفضت ، وبعدها سافرت لروسيا صلحت كل شي ويه نيفرا .

ماريد اكسر بأبني مريض واني وعدته ما ابتعد عنه وعن أمه يعني من الاخير موج ما اكدر اتزوجها صعبة تعرف القانون بروسيا يمنع تعدد الزوجات ، زوجتي اذا عرفت تقاضيني .

كال : خلي هاي هنا وذيج اليابسة ام شعفة الصفره هناك وموج راح تضطر توافق حفاظا على سمعتها .

رديت : بس ما اكدر اعقد محكمة بهالوضع ماريد مشاكل ويه نيفرا تأثر على ابني ماله ذنب احتمال حالته تتخربط واني ماعونت اريده يطيب هم يبقى ابني من دمي ولحمي .

_ افتهم بويه افتهم هسه اعقد عليها ونطشش خبر خطوبتكم حتى اوس بعد مايكدر يسوي شي وبعدين لكل حادث حديث .

فرح ...

صار العصر واحنه بس نفكر ببابا ، موج وأنين يلومن بروحهن ، موج تكول بسببي وأنين تكول بسببي خليته يجي .

واني مابيه حيل انصدم ببابا ، ظليت ادعي الله يشفيه ويرجعه النه ، للعصر خابر احمد جاوبته سألته عن وضعه .
كال خطر والدكتور كايللهم جايته جلطة بالمخ واحتمال اذا يسووله عملية قلب مفتوح يصير عنده نزيف بالمخ
او فشل كلوي ، و ضغطه والسكر هم مجاي ينزلن .

خوفني ظليت ابجي كتله يعني شنووو أحمد حالة بابا ميؤؤس منها!

رد بعصبية فرررح ادعيله اني داكلج هالحجي مو لحتى تخمنين وتتوقعين ادعيله والله كريم احتمال نطلعه باجر او البعده .

زين نجي اني والبنات نشوفه ؟

كال هسه راح ارجع للبيت بس ابدل ملابسي واخذ فلوس وبعدين ممنوع الزيارة مايقبل الدكتور وهو هم خاف يشوف موج ويتخربط بالزايد ..

رديت شون تجي وتعوفه وحده احمد لتعوفه اني اخابر علي يدزلنه احد .

كال لا شبيج انتي مخبل اني اخلي وحده! يمه عمي وسالم .

سديته منه دموووعي على خدي ، بعده بيدي الموبايل
وخابر علي رديت عليه واني امسح دموعي .
اجاني صوته هاا فرحه ؟ اجي عليج هسه ؟

رديت : لا لتجي بابا تعبان حييل واريد ابقى هسه يمهم .

رد : ابوج متخربط ليش ماكتيلي ؟ ليش ماخابرتيني!

_ انت مو كلت اذا اني بالسغل لتخابرين عليه ؟

رد بنفاذ صبر : كتلج لاتخابرين على شي تافه مو هيج شي مهم ؟

تحسرت : ها أي نسيت ..
كال استغفر الله ، انه اخلص شغلي واروحله مسحي دموعج ولاتبجين واذا تطلبت حالته نسفره بره .

زدت بالبجي واني اجاوبه يارييت علي والله اموت اني ماريد بابا يصير بي شي الله يخليك .
_ اسم الله اسم الله لا تخافين عمره طويل ان شاءالله .
ختمت المكالمة ويا واني الوب ، لليل يله اجه احمد
جان تعبان وميت قهر ، سألته أنين تريد عشه؟
هز راسه بمعنى لا وباوعلي كال الشيخ اجه للمستشفى
كلي سفره للهند وعليه تكاليف العلاج ، بس الدكتور
كال حالته ماتسمح سفر .

رحت كعدت يمه لزمت اديه واني ابجي
لعد شلوووون احمد كلي ؟

هز راسه الله كريم ادعوله ، مسح وجهه وباوع لموج
الي جانت صافنة بس تباوعله ودموعها على خدها تجري بغزارة ، لمن باوعلها دنكت وشهكت وظلت تعصر بأصابع اديها .

تكلم وهو يباوعلها : ها وابويه فتح ويا موضوع الفديو وهو خطب موج لشرار وكال هيج نسد السالفة .

كامت موج على حيلها وعلى ملامحها كل تعابير الاستنكار بس تهز راسه برفض .

هو هم كام وهو معصب وصارت عيونه براسه
ان شاءالله تردين تعترضين موج خاتون فوك مامصخمة وجهنا ؟ اعترضي يله حتى اشوف شغلي وياج .

كالت بعبرة وصوت مبحوح : احمد شرار متزوووج ؟ افهمنيي شتكول عني الناس شتكوول ؟ مصار فترة من فسخت انخطب مرة ثانية !

عصب وهو يتقدم بخطواته الها ويهم روحه يريد يضربها ، بس اني لزمته من ملابسه وادفع بي .
صاح : لعد حلييييها ست موج حليها النه ولج انتي ماتحسييين ولج موو ابوج مجطول بالمستشفى رجل بالدنيا ورجل .....

سديت حلكه وصرخت بووجهه واني منهارة
اسسسكت احمد اسكت لتتتتكمل ... اسسسكت...

رفع ايده خلاها على راسه وظل يستغفر
وموج دارت وجهه تمسح دمووعها .

ردت حجت : ماكو غير هيجي حل ؟ الله يخليكم حسوا بيه .

رد بعصبية : حليها انتي خاتون يله حليها مو دومج تتصرفين من ورانه ؟ وبكيفج تمشين امورج حليها النه .

دتعوفنه وتروح لغرفتها ، راح لزمها وسحبها من ايدها
هي خافت ودتحمي وجهه بايدها ، اول مرة اشوف موج خايفة من احمد واول مرة اشوف احمد هيج يعاملها ، انكسر قلبي عليهم اختي واخويه الله لا ينطي الي كان السبب .

راح يعيط بوجهه ولج موج مااريد رفض ماريد اعتراض لج كاقي ماتعبتي كاااافي .

ركضت ادفع بي حتى يووخر عنها واصيح
عووفها عوووفها احمد لا تجبرها موو كوة .

عافها واجه باتجاهي ويعيط بووجهي بصوت عالي
وللللج فرررح وجع حتى وجع خاف موج اكبر مني ومديت ايدي عليها انت اطيح حظج والله وخررررري من كدامي وووخررري .

اجت موج يمي صارت بيناتنا
وايده لافتها ولازمتني ظلت تحجي وياه
ولك تخبلت تضربها مريضة فرررح مريضة

لزم قميصه من اطراف ويجرجر بي بعصبية
ولجن لا تخبلني شسوووي اكتل روووحي بس كلولي لووو اكتلجن ؟ لا توووكفن بووجهي والله اكتلجن واكتل روحي هسه .

اجت انين مفرفحة من البجي ، خلت ايدها على كتف احمد وتتوسل بي ...
على كيفك حمودي الله يخليك والله أني خايفة
مووج فدوة وافقي لخاطر بابا .

احمد وهو يتنفس سريع كال وغصبا عليها توافق
موج بتوسل : الله يخليك انطيني فرصة لازم اكو حل.

كال بحزم : ماكو غير هذا الحل حضري نفسج
وراح لغرفته .
انين كعدت منهارة وتبجي وموج دخلت لغرفتها
واني بقيت واكفة وأرجف سمعت صوت دانيال يبجي بالغرفة مالة خالتي وبابا ، ركضت اخذته يمكن على صوت العركة كعد ، اخذته وطلعت ع الصالة ، شفت انين تبجي وصوت موج جاي من الغرفة هم تبجي .

واني بعد رجليه ماتحملني جسمي كله يرجف ، ولا اكدر اتحمل اشوف أهلي هيج ابد ، دانيال يبجي انطيته لأنين تسكته اخذته مني وهي تبجي هو شافها هيج
زاد بالبجي .

رحت لموج للغرفة شفتها حاضنه رجليها لصدرها
وتنحب وتبجي ، صارت عيني بعينها ، كسرت قلبي ، خطية عيونها حمرة من الضرب ومن البجي ، رحت كعدت يمها ، خليت ايدي على راسها .

اقتربت مني حضنتني ، حضنتها وامرر ايدي على شعرها ، ماعرف شون اواسيها ، احس عاجزة
ظليت اهمس يم إذنها ...
موج اني احس بيج تحبين شرار ارتباكج من يجي طاريه نظراتج من تشوفه احس اني ، حتى اتصالج بي وطلبج المساعدته هو الوحيد وانتي محبوسة بشقة اوس هم يخليني اشُك ، السؤال هنا لعد ليش رافضته ؟

كامت من حضني ، عدلت شعرها وخرت خصلات لازكة بوجهه بسبب دموعها الي مبللة خدها ..
كالت : فرح افهميني ، شرار متزوج عنده طفل اني ممسوية شي ويا والله ماعندي علاقة ماانكر اني يمكن مشاعري تميل اله او معجبة بي او ماعرف شون اوصف احساسي بس ماريد اتزوج بهالطريقة اني اكدر اقتل مشاعري واتجاوزها ولا ادخل على ضرة .

_ موج ماعندج غير حل سمعتج أهم من كل شي .
كالت بغصة : فرح اني ممسوية شي والله .
_ اعرف موج اعرف بس الشرف غالي واحنه بمجتمع يريدله حجه على البنية بس لحتى يطلعها مو شريفة ويطعن بسمعتها والزواج بهالحالة ستر الج وعلي اجه خطبج معناهه شرار كايلة بالموضوع اكيد .

ظلت تعصر بأصابعها كالت : شرار خطبني قبل فترة ..
انصدمت : صددك ليش مكتيلي ؟؟؟
_ مجان شي مهم رفضته وانسد الموضوع .
_ اني اعتقد شرار يحبج هيج احس بي من يحجي بيج ، وهو صح عصبي وخبيث ولسانه زفر وخبل
بس هم والله احسن من غيره .

ابتسمت والدمع مالي عيونها ..
مو كل شي حب فرح موو كل شي حب ولا حلو دائما نمشي وره عواطفنا ، ما انكر انعجبت بشرار اني وبيني وبين نفسي كلت اعجاب ويروح لحاله بمرور الايام وحتى لمن خطبني مانكر اكو فرحة جانت زغيرة بداخلي بس شفته شخص مو مناسبين احنه لبعض.

وكملت بغصة أكبر : فرح اني مو هاي احلامي لا زواج ولا إرتباط ولا حب ابد ، ردت اتفوق انجح اكمل مشروعي وشغلي ودراستي ماكفرت ولا طلبت المستحيل ولا غلط اني طموحة ليش يصير بيه هيج ليش!

حضنتها وكملت بجي ماعرف اواسيها والله محتارة حيل كلش حيل .

نامت من البجي ، طفيت الضوه عليها خليتها ترتاح وطلعت من الغرفة ، صار احمد مقابيلي .
كال كوليلها لأخت وفهميها انسب حل تتزوجه وتفكنا خوش .

ظليت اباوعله صاكة سنوني ولا جاوبته بس ادعي الله يصبرني ومااحجي شي ، اشوفه تعبان وكاسره مرض ابويه ومصيبة موج انقهر عليه شيريد يصير .

هو ديطلع كال قفلن الباب لاتصيرن فاهيات وطلع
رحت لأنين شفتها بالمطبخ سألتها عن خالة .
كالت من اجينه ويه سالم اصرت ننزلها ببيت خالو تبقى يمه .

هزيت راسي ، وكعدت ع الكاع يم دانيال جان يلعب باغراض المطبخ ، اجت يمي انين لزمتني من كتفي وظلت تشهك باوعتلها بقهر
كالت بغصة : فرح قنعي موج تتزوج عفية خاف بابا يموت .

عضيت شفتي بعذاب وقهر وهيه خلت راسها على كتفي وظلت تبجي ، حاوطت ركبتها من وره وبستها على راسها وهي تشهك واني دموعي حركتني بعيوني ماظل دمع بعد .

كام دانيال يجرها من شعرها مايريدها تبجي يضوج من واحد يبجي كدامه ومبرطم .
وخرته عنها وهي وخرت راسها تمسح دموعها وتباوعلي تريدني اطمأنها ..كتلها كومي غسلي وجهج لاتخافين موج ماعدها غير انو توفق وادعي لبابا يطيب ويصير زين ويرجع النه .

هزت راسها وراحت طلعت من المطبخ ، بالليل البيت كله كآبة قلبي انعصر عصر حسيت نفسي مااتحمل خلص راح تجيني نوبة الصرع وتشل كل حواسي .

اتصل بيه علي جاوبته بسرعة جنت محتاجته حيل بهاللحظة ، بس هو بعيد عني .
جاوبته والعبرة مسيطرة على صوتي ..
كال بويه كافي بجي انت هم صحتج على كدج ابوج يصير زين ان شاءالله خلي املج بالله جبير .
جاوبته : لعد انته هم تبجيني اشو ماتكول صحتها على كدها لا ابجيها خطية .
رد : انت ماتفوتج فوته ام جاسم ؟ واذا ابجيج من ايدج ترة المهم اجي عليج هسه ترجعين للبيت ؟ ولج الج وحشة والغرفة ظلمة بدونج .

جاوبته بنبرة زعل : اصلا انته يومية بالثنعش يله تطب للغرفة لو بالمكتب لو بالمضيف الغربة يشوفوك اكثر مني يمته لحكت تصير ظلمة الغرفة وهسه بالعشرة ونص ؟

رد ليش تخليني اندم لأن خابرتج!
_ اصلا زعلانة منك ..
_ هو انتي يايوم رضيتي وبعدين ليش زعلانة ؟
_ لأن متكولي شنو انطتك ختام بالعلاكة ..
ضحك كال كاتلتج العلاكة ، المهم ماكتيلي اجي عليج هسه لوو لا ؟
رديت مبرطمة : لا خواتي وحدهن خطية ابقى يمهن ..
... خوش لعد ضلي وديري بالج على نفسج وعلى جاسم .
.. علي انته ليش ماكتلي راح تخطب موج لشرار من خابرتني الظهر ؟
_ لمن خابرتج الظهر جنت بعدني ماادري بالسالفة شرار بعده ماحاجيلي وجنت بطريقي من الشركة للبيت وبعدين صدك فرح قريتي الكتب الي جبتهن الج لوو لا اشوف كلامج متغير وصايرة هادئة؟

_ هو اني شفت دربي حتى اقراهن طبعا لا .
_ انت يمته تبطلين تحجين بهاي اللهجة .
_ يا لهجة
_ لهجة الاحتجاج هايه ما احبها بنبرتج غيريها شوفيلج حل .
_ هسه اني شحجيت وكبيت عليه .
_ يعني هسه بدل ماتكليلي شفت دربي مدري شنو من هالكلام الي مايكولنه بس الرعنات كول لا شيخ ماقريته مالحكت صعبة عليج ؟ لو مو صعبة ؟ ترة انتي هم مو صغيرة ٢٢ سنة عمرج ومخلصة مرحلتين كلية يعني تعرفين تصيغين كلامج بطريقة مناسبة صح لو انه غلطان ؟

سكتت مجاوبته بس تنفست بانزعاج اني وين وهو وين حقه هو والله الايده بالمي مو مثل الايده بالنار .

اجاني صوته : شو سكتي ماتحجين منو اكل لسانج؟
_ علي اني والله تعبانة وعيني مابطلت بجي والله مناقصة وعلاجي بقى ببيتكم مااخذته تعبانة حيل عفية على كيفك ويايه الله يخليك .

_ عليمن متعبة نفسج انه موجود من بعد الله
ان شاءالله كل شي ينحل ابوج ان شاءالله باجر نطلعه نودي احسن طبيب واختج هم سالفتها محلولة كلها كم يوم ونعقد الهه هي وشرار بعد ليش البجي بويه ؟ ها وعلاجج هسه يوصلج اخذي ونامي وارتاحي .

_ لا علي لاتطلع الدنيا ليل والاوضاع مو زينة ...
_ انه مايهمني اطلع بس مهيب هسه قريب عليكم اخلي يشتري علاج من الصيدلية ويجيبه الج اكلي لاتاخذين علاجج على معدة فارغة تمام .

تمنيته هو يجي والله محتاجته ، ختمت المكالمة ويا وهو يوصيني على نفسي ويهدأ بيه ..
بعدها اجه مهيب ، خابرني طلعتله اخذت منه العلاج وجايب ويا عشى الظاهر ابوه موصي ، تشكرت منه اخذته وفتت جوه .

يومين مرت بابا بالمستشفى واني عند أهلي
احمد جاب علاج لوجه موج وانطانيا
وكال بحدة خلي تخلي لوجهه بعد يومين العقد مالتها شرار يريد يسافر .

رحت شفتها كاعدة ع الكاع بصف جربايتها ، وايدها ع الارض ترسم خطوط عشوائية وصافنة .

كعدت يمها ع الكاع ، جانت صافنة حتى منتبهتلي ، خليت علاكة العلاج على الكاع ، انتبهت باوعتلي لحظة ودنكت ، طلعت العصارة وفتحتها ، درت وجهه عليه
وظليت احجي وياهه .

يله عمري باوعيلي بعد يومين خطوبتج ، حتى تطلعين حلوة ، باوعتلي واهتزت شفايفها بابتسامة سخرية .
وهي تبعد ايدي من وجهه : من كل عقلج فرح !

رديت بأصرار : آي من كل عقلي .... وودرت وجهه عليه واستمريت اخلي جوه عينها وعلى جفنها ...

انطينه خبر لأقاربنه حتى يحضرون المشية مالتها
اجه خالي وعمي ابو سالم ومرته .
وهي لبست بدي اسود وجينز ورفعت شعرها ولفته
كباية وخلت خصلات نازلة تخفي عينها الوارمة .

تعجبوا عليها وظلوا بس يسألون واحنه ماعدنا آي إجابة .

للعصر اجوا ووياهم بلقيس والحجية والوجوه مكلوبة
وجايين غصبا عليهم ، حتى بلقيس من سلمت عليها
همسّت يم إذني : فاجأتونه كلش ماجنه متوقعين هسه من أشهر هي فسخت وشرار متزوج شنو السالفة فرح شنو جنتوا مدسترينهه ؟ لا الشيخ يحجي ولا شرار يفك حلكة بحجاية والحجية فايرة .

مجاوبته بس بكم كلمة بعد والله ياأم رحاب صارت القسمة ..

دخلت كعدت جوه واني هم رحت كعدت شفت موج سلمت عليهم بس هم مو طايقينها ويباوعولها من فوك ليجوة .

كعدت بصفها وكبالنه صايرة الحجية ، ظلت تأشرلي وتصيح عليه فريحة فريييحة تعاي تعاي .

شكد عيب فد خجلت هيج تصيحلي اني بابا عمره ماكسر اسمي انوب الحجية كسرته كبال مرة عمي ومرة خالو .

كمت كعدت يمها ظلت تهمس بأذني وتكرص بزندي
ولج هاي اختج شلابسة ؟ تريد تفاول على وليدي انوب منو شرار ؟ ولابسة اسود مصخم مثل حظه الي ورطه وياها ؟

كليلها خلي تكوم تلبس غير شي وألا والله ماخلي يعقد عليها اليوم .

موج سمعتها خطية دنكت وحتى مرة خالي ومرة عمي هم سمعوا ، وظلوا يحجون عليها كلولها كسري الشر وكومي لبسيلج غير شي .

بلقيس كالت والله احنه اول مرة نشوف عروسة متبنطرة غير تلبس فستان .

ريلام جاوبتها ماما والله هيه حلوة تخبل وحلو عليها .

امها خزرتها سكتت ودنكت وسوت نفسها تلعب دانيال . هو بس شافها جلب بيها .

موج خطية جانت يائسة ، كامت للغرفة بدلت لبست قميص بنفسجي طوخ واجت كعدت ، ودنكت راسها مارفعته بعد .

الحجية ظلت تفر باديها ويتهامسن .

موج ...

احس نفسي صرت قطعة من جليد ماعندي اي مشاعر
والله مو هذا الي اتمناه ولا هذا الي اريده ابد ، بس شسوي حظي .

باوعت لوجهي عيني بعدها مورمة نزلت خصلات على عيني المتعورة حتى لأحد يشوفها ، كلام امه وأخته وصل لاذاني بطريقة احس نزل على اسماعي مثل الي يصب زيت حار وساخن ، بس لازم اتعود ع الاقل لفترة مؤقتة وبعدها كل شي يرجع لحاله .

صاحني احمد وعقدوا النه من وره الباب ...
ورجعت كعدت بمكاني وظلوا يباركولي بنات عمي وخالي وخالتي خطية محتارة شسوي ساعة تهلهل ساعة تضحك ساعة تجيب عصير ساعة تاخذه من اديهم ترجعه للمطبخ .

والحجية كضتها تفرها باديها وفرح بركان وتريد تنفجر بس مادري شنو مصبرها دتضغط على نفسها يمكن لخاطر بابا .

بعدها دخل هو راح لأمه بوسها هواي ، اديها وراسها وخدودها وحضنها وهيه تبجي وماتلوحه طويل وهي قصيرة .

وبعدها اجه كعد يمي ، اخذ ايدي من حضني بدون ما أمدها اله و لبسني الحلقة .

فرح انطتني حلقة داللبسها اله ، هو باوع لأيده اليسار بيها حلقة اكيد ذيج تخص الروسية .

باوعلي وابتسم ومد ايده الي
كال يله لبسيها الي صرت متزوج وخاطب بنفس الوقت
وغمزلي ..
باوعتله بقهر وبقيت الحلقة بيده ، عصرت قبضتي عليها .

هو انتظرني البسه ، دارجعها لفرح ، لزمني من رسغي وجر ايدي وجبرني البسها اله .

انقهرت حيل صبّرت نفسي لحتى ما أبجي .

بعدها رجع هو يم الزلم ، وراحوا امه واخته وبنات اخوه ، واني بقيت كاعدة بمكاني ، اجت فرح
كالت يريدوج بالاستقبال .
سألتها منو ؟
كالت كلهم راحوا بقى بس شرار وعنده حجي وياج .

كمت من الصالة وطبيت للاستقبال
شفت بابا واحمد يم شرار .
من شافوني احمد كوم بابا وسلم على شرار وديطلع .
اجه يمي اني واكفة بصف الباب .
حضني وبوس راسي احتاجيت ابجي
حبيبي بابا كوة يتنفس بوست اديه واشتميت ريحته
الي احبها ومااشبع منها ، مسحت دموعي بصدره
اتمتمت سامحني بابا واباوعله بنظرات قهر
باسني على راسي واحمد لازمة وديطلع
باوعت لأحمد بقهر وعتب وندم ..
وهو بدوره زفر نفس بقهر ودار وجهه مني ، اخذ بابا وطلع .

بقيت واكفة يم الباب واباوع لشرار كاعد ع التخم
تنفست بعمق ودرت وجهي منه .
هو اجه يمي ، واني دحست جسمي بالبوفيه الي واكفة يمها .

مد ايده وهو يباوعلي وسد الباب ، باوعتله بعصبية
وسألته ليش طبكته ؟؟

تنهد وهو يباوعلي كال عندي حجي وياج لازم تسمعينه

رديت انته هم لازم تعرف لاتبني امال هواي على هالعقد هذا اعتبره مؤقت فترة .

ابتسم بسخرية كال ابني امال ؟

رفعت تك حاجبي واباوعله .

باوع للكاع وكال المهم هسه قبل الكلام المهم جاوبيني على شغلة هي هم مهمة بالنسبة الي .

على شنو اجاوبك

جاوبيني قبل لانحجي .... ورفع راسه
كال مستهلكات لو شنو ؟
ونظرات عيونه على شفايفي .

كتله شنو ؟

كال اريد اتأكد من ممتلكاتي ، شفايفج مستهلكات لوو شنووو ؟

فتحت عيوني بصدمة دااطلع من سجنه الي حبسني بي بين جسمه والبوفيه .

بس هو مخلاني رجعني لمكاني بيده
كتله شنو قصدك شنو هالسؤال ترة اني صح فري بس مو معناهه

صك اسنانه وكال اقصد النعال أوس .

جاوبته شنو هالسؤال البايخ اني مجنت احبه حتى اتقبل قربه خليها ابالك .

غمضت عيوني بانزعاج ودرت وجهي

هو يتفرس بنظراته عليه
كال شبيج
كتله انقرفت من سؤالك ... وبعدين لا انت ولا اوس ولا الاكبر منكم يكدر يلمس مني شعره ، اله اكون مقتنعه بزواجي يالله اقبل يتقرب مني .

رفع تك حاجبه وعض شفته وكال هسه ممقتنعة مووو ؟

درت وجهي وجريت الخصلة ثبتتها على عيوني
هو بسرعة البرق طبك شفايفه على شفايفي ......

فرح ...

رجعت من بيت اهلي وصعدت لغرفتي وظليت ادور بالغرفة على علاكة ختام وناوية اله اعرف شنو بيها .

الى وكعت ع العلة ، شفتها بالكنتور مالته ، ركض فتحتها شفت بيها كارتونة شككتها وشمرتها وطلعت من زجاجة عطر ريحتها تجنننن .

عصرتها حيل بيدي ، وظليت اشتم واسب ببختام
الحقيرة ماتستحي تجيب هدية عطر لواحد متزوووج
شنو المناسبة بالله!!!!

شمرت الكارتونة مالتها بالزبل والعلاكة وهي رجعتها بالكنتور ويه الملابس ..

بالليل انتظرته لمن كلش راح اطفي وانعس ، بس لمن فتح الباب مال الغرفة ودخل ، كمزت اني .

باوعلي ابتسم نزع شماغه وكال اليوم الغرفة ضاويه ومنورة بأم جاسم .

كمزت من الجرباية كتله فديتك ، اصبر اطلعلك ملابس
هز راسه ونزع البشت مالته وعلكه بالزاوية .

واني فتحت باب الكنتور وباوعتله داير وجهه دينكت الشماغ ولازم العكال بيده اللخ ، سحبت كلبيه من الكنتور ، ودفعت العطر ع الكاع متعمدة وكع وتكسر وتناثر الكزاز والعطر مالته ع كد الغرفة .

يتبع ...

مو تنسوووون ماتصوووتون 😩

متابعة للكاتبة فضلا وليس امرا ... _Zoza25